طوبى الجزء الاول

الجزء الثامن

# طوبى "شارع القهوة"
#جمان_فريد
#الجزء_الثامن"على خاطري ياصاحبتي"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
طالعه من الكوجينه بسفرة القهوة والكيكه..
مشت لوسط الحوش وصوت دوشه لعب الصغار قالبه الدنيا..
سدرة حطت السفره وقالت؛هي خودي ياحنه..
خدت فردوس فنجانها وقالت:وشن دايرة فايزة مع متاعينها..
تنهدت سدرة وقالت:مكرهينها في عيشتها وهي ساكته ومتحمله وخلاص..
فردوس؛اكبر غلط السكنه في دار مع حوش العيله..
سدرة؛مجبورة مسكينه..
فردوس:ايه الله غالب..شبحت للصغار وقالت..شوفي مطلعين كندرتك ولابسينها..
شبحتلهم لقت طوبى لابسه كندرة فردوس واريج لابسه كندره سدرة والاء تعاند في شبشب سدرة متاع الحوش ويمشوا بيهم..
يدوب ضحكت بعدين قالت:محلاهم البنات..
فردوس؛ايه بس نبي وليد متاعيني بدوا يلقحوا برغم ان عندهم احفاد ولاد بس يبوا مصطفى يجيب ولاد حتى هو..
سدرة:لازم تلقي من ينغص عليك حياتك..
فردوس:صدقتي هي هكي الدنيا...
سكتوا شويه وهما يشربوا في القهوة ..
فردوس شبحت لسدرة شويه وقالت:معاش في جديد؟
سدرة:زي شنو يعني؟
فردوس:المهدي..
حركت راسها للاعلى حركه خفيفه وقالت:لا خلاص موضوعه تسكر..
تقول فيها عادي...بس من داخل قلبها كان ينحرق..
فردوس تنهدت وقالت:فيها خيره..
سدرة؛والحمد لله..
فردوس:غريفه قاعده في حوش عمي..
سدرة؛معاش تتحرك من غادي بس خلاص توا بعد توصل للصف السادس نخلي اميمه تجي هني معاش تمشي لحوش فيه ولاد..
فردوس:هكي الصح..زي مادارتلنا امي..
سدرة شبحت لطوبى وقالت؛واني بنمشي ع طريقها..
🌻🌻🌻🌻🌻🌻
الساعه 9:30ليلا...
ناضت نسرين بعد ماكانت راقده من قبل العصر..
توضت وصلت اللي فايتها...ومشت طول للكوجينه..
طلعت حاجات من التلاجه ودارت سندويتشات وقعمزت في الكوجينه تاكل...
خشت خديجه للكوجينه وهي تغني:يامبروك عليه زبونه هاللي كيف الصقر عيونه..
نسرين كانت مش فايقتلها تاكل ومش مهتمتلها بكل..
صبت خديجه ميه وشربت وبعدين التفتت لنسرين وهي مبتسمه بمكر..
وخدت الطاسه وقعمزت حداها وبدت تشرب وتشبحلها..
ونسرين تاكل..بعدين شافتلها اشرتلها براسها بمعنى "خيرك"
خديجه؛يامبروك عليه اللمه فرحانات خواته وامه..
نسرين بلعت وقالت؛خاطرك في عرس..
خديجه عضت ع شاربها بعدين قالت بضحكه؛يس وماقعدش في خاطري..
عقدت نسرين حواجبها بإستغراب..
خديجه؛واخيرا بنديروا عرس..
نسرين تهكما:عرسك مالا!؟
خديجه؛ياغبيه ماتسمعيش فيا نغني في اغاني عرس ولد..
ارتسمت ع وجه نسرين ملامح التوتر..بلعت ريقها بعدين قالت..
نسرين؛كيف عرس ولد؟!
خديجه:عرس خوك الكبير...المهدي..
نسرين:قصدك خلاص بيخطب!؟
خديجه هزت راسها بإيجاب..
نسرين حطت السنداويتش في الصونيه ومشت وهي تقول؛ربي يكمله ع خير..وطلعت من الكوجينه..
خديجه بضحكه:مازال لين تعرفي من هي اللي بياخدها..
وخدت خديجه السنداويتش وكملاته...
ونسرين خشت للدار وقعدت تبكي وهي تفكر في ردة فعل صاحبتها..
🌻وفي الدار اللي حداهم..
"بنت الشيخ جويده؟!"
مغليه:ايه قالي نبيها وغدوة امشوا تكلموا فيها اني قبل لنمشي نبيك تجس نبض الشيخ جويده..
محمد قعمز ع السرير وقال:هو مش حيقول لا متأكد بس ولدك متأكد  من اللي يدير فيه معقوله بعد مادار العار ع خاطر بنت الواعر يقلب بين يوم وليله ع بنت جويده؟
مغليه؛مالاش نصيب في بنت الواعر تبيه يقعد راهب ع خاطرها ولاشنو الولد يبي يتزوج كبر معاش صغير خلاص والحمد لله بعملته وشقته وسيارته ماناقصاته حاجه..
سكت شويه بعدين قال:باهي غدوة ان شاء الله نكلم الشيخ جويده..
مغليه؛وقوله نبوا العرس قبل رمضان...
محمد تنهد وقال:باهي باهي...
ورقد وتغطى وعطاها بالظهر..
وهي حطت راسها ع المخده وقعدت تفكر في الموضوع...
🌱🌱🌱🌱🌱🌱
"هي بالسلامه تصبحي على خير"..
فردوس:بالسلامه..
اريج؛باي خالتو..
فردوس بضحكه:باي ياعمري..
ومشوا طلعوا كلهم لسيارة مصطفى اللي كان واقف عليه لطفي..
ردت الباب..
ولفت وخشت داخل ومشت لوسط الحوش خدت طوبى اللي كانت راقده..
رفعتها ومشت بيها لدارها وحطتها ع الفراش..
ع خشة غرفه اللي قالت؛سدرة امتى نمشوا للبحر..
سدرة:بوي قال الخميس ان شاء الله..
غرفه:قالت اميمه نبي نمشي معاكم بوهم مايرفعش فيهم..
سدرة:تو نمشوا حني واميمه وخالتي صفيه ويوسف وحسين..
غرفه ابتسمت لما سمعت اسم حسين..
بعدين مشت خشت فراشها..
فتحت سدرة الروشن بش تخش النسمه..
"سدرة ياسدرة"..
سدرة؛جايه بوي...
ومشت طلعت من الدار وجاته..
لطفي:غدوة الصبح بيجي السطا يركب المكيف..
سدرة: واخيرا بيولي عندنا مكيف..
ضحك وقال:ماشي نرقد تصبحي ع خير..
سدرة بإبتسامه؛قدامك كل خير بوي..
ومشي هو  لداره وهي ولت لدارها...
وخشت ورقدت ع السرير
لقت غرفه راحت في النوم حتى هي قعدت تتفرج عليها هي وطوبى
وجي بين وذانها..
<<اقسم بالله عمرك ماحبتيني السنين هادوا كلهم كنت تكذبي عليا وخلاص وتمشي فيا واني الغبي الحمار مصدقك وقاعد ندير في المستحيل بش تولي معاي..تعرفي كيف..انت اكبر غلطه غلطتها في حياتي غلطه ومش حنسامح روحي عليها بكل.>>
غمضت عيونها ونزلت الدموع منهم..
والقلب ينزف في دموعه دم..
🌱🌱🌱🌱🌱
خشت للدار وهي تغني..
خديجه؛يامبروك عليه ولدنا العام الجاي يزيد عددنا..
نسرين مطت شواربها بملل وقالت:درهتيلي كبدي ع فكره..
خديجه خشت سريرها وقالت؛غريبه ماسألتيش من هي الكنه المرتقبه..
نسرين؛ماتهمنيش..
خديجه اشرت عليها وهي تقول:بالعكس انتي اكتر وحده تهمك..
عقدت نسرين حواجبها بإستغراب..
خديجه؛صاحبتك..
نسرين؛صاحبتي!؟
خديجه:يس:عيشه..
فتحت نسرين عيونها ع وسعهم بصدمه..
دفت المجله وناضت لأختها ومشتلها شدتها من ذراعها وقالت وهي مصدومه؛شن تخرفي انتي!؟
خديجه جبدت ذراعها وقالت:آااي..حولي غادي..
نسرين وهي مصدومه؛كذابه وستين كذابه..
خديجه؛اقسم بالله العلي العظيم الا المهدي بيخطب عيشه صاحبتك..
نسرين بصدمه:ياربي مستحيل كذب االمهدي هبل ولاكيف..
خديجه:مانعرفش هو هكي يبي هو..
نسرين:علاش يامهدي هكي علاش..
شبحت لخديجه وقال...اصلا عيشه مش حتوافق..
خديجه عقدت حواجبها وقالت؛تقريبا قبل حكتيلي ان عيشه ماعندهاش كلمة مع بوها وخوتها صح؟!..
نسرين شبحتلها وقالت:والله لاانتي اللي وراها ياعافنه ياحقيره..
خديجه؛هيييه احترمي نفسك والزمي حدودك خوك هو اللي يبي ياماما مش مصدقه تفضلي اركبي اسأليه..
نسرين مشت لسريرها وهي مصدومه قعمزت عليه وقالت:معقوله المهدي توصل بيه لهني معقوله!؟
خديجه؛وهادي اول عرس المهدي قالوا والعقبه للي مازالوا..
ورقدت..
وخلت اختها من الصدمه لين دموعها نزلوا ..
☘وماقدرتش نسرين ترقد غمضه للصبح..
بعدين راجت لين الكل يطلعوا من الحوش..
واستفردت بأمها...
نسرين؛منك جدي يما راهم هادم صاحبات عمر تبوا تفرقوهم عن بعض حتى اني بتخسروني صاحبتي...
مغليه:بالله فكوني من القطاف الزايد اني كل همي ولدي وراحته وولدي راحته مع عيشه بنيه ملتزمه وعاقله وماتسمعيلهاش حس ومراة زي هادي اللي تمشي مع المهدي..
نسرين:من بين بنات طرابلس كلهم مالقيتوا الا عيشه!
مغليه؛نعرفوها كويس ونعرفوا ماليها زين زين واللي تعرفه خير من اللي ماتعرفاش..
نسرين معاش عرفت شن تقول لأمها المراة مقتنعه تماما ومش حتقدر تغير رايها..
طلعت من حداها وهي تفكر شن تقدر  دير بش تمنع مصيبه زي هادي..
وع قد مافكرت مالقتش الا حل واحد رغم انه صعب بس مافيش غيره...
اول حاجه دارتها اتصلت بفايزة ع ارضي حوش اهل راجلها وقعدت تدعي انها تطلع قاعده..
وفعلا طلعت قاعده وقالتلها تجي ضروري لحوش لطفي...
وفايزة واقفت بعد ماانتابها القلق..
بعدين لبست وشاح وعبايه..
وشبشب..ومشت طلعت من حوشهم وتوجهت لحوش الواعر..
دقت ع الباب..
كانت سدرة تكد في بساط المربوعه..
وحداها خواتها ومعاهم اميمه يلعبوا بالميه..
سمعت الباب مشت وهي شاده المكنسه للباب وصلت فيه وقالت:منو..
"افتحي"
فتحت سدرة الباب وخشت نسرين طول..
نسرين:شن الاخبار ..
سدرة:تمام؛خيره وجهك اصفر هكي..
ع دقة الباب مرة تانيه..
نسرين:فايزة افتحيلها..
بإستغراب فتحت سدرة الباب وخشت فايزة..
فايزة؛شن جو..
سدرة:تمام الحمد لله...شن في خيركم؟
فايزة :اني اتصلت بيا نسرين وقالت بري لسدرة نبيكم ضروري..
سدرة؛شن في نسرين!؟
خدت نسرين سدرة فايزة من ايديها وبعدت بيهم عن الصغار بعدين قالت..
نسرين:خوي المهدي بيخطب..
فايزة انفجعت وشبحت لسدرة..
وسدرة حست وكأنها موش وخش لقلبها بس كعادتها دارت روحها بارده وقالت:باهي ربي يهنيه ..
نسرين؛تعرفي من خطب..
سدرة:ان شاء الله تطلع بنيه حلال وتستاهله من كانت تكون..
"عيشه"
شقهت فايزة وحطت يدها ع فمها..
وسدرة انطمست مرة وحده..
نسرين ودموعها في عيونها؛اختار عيشه وانتي عارفه علاش تعرفي تفكير المهدي لما طيرله كيف يولي معاش يميز معاش يعرف شن يدير..
قعدت سدرة منطمسه وفايزة ونسرين يشبحولها..
نسرين؛لازم تعرف عيشه متأكده انها حتاخد موقف قوي..
فايزة هزت راسها وقالت؛صح..
طلقت سدرة المكنسه وقالت؛ماشيه نتصل بيها..
ومشت سدرة من حداهم..
فايزة:خيرك خوك هدا شن جاه..
نسرين:كله من السوسه خديجه..
فايزة؛واااك منها هالبنادمه!!! باهي وامك...
نسرين؛صدمتي في امي اني راضيه وعاجبها الموضوغ..
فايزة؛معقوله تي مش تحب سدرة هي وكانت تبيها للمهدي..
نسرين:امي خدت منها موقف بعد ماردت المهدي...
فايزة:لاحول ولاقوة الابالله...
ع جية سدرة وهي تقيم في قفطانها..
سدرة:كلمتها وقالت جايه..
وقعدوا ساكتين وماتكلموش بكل غير سدرة اللي كانت تعارك في البنات بش مايبلوش رواحهم بالميه..
شويه دق الباب..
بلعت سدرة ريقها وقالت؛بالله فايزة افتحي..
فايزة مشت فتحت الباب..
خشت عائشة وهي تقول؛السلام عليكم..
اول ماشافتها سدرة ولعت فقلبها النار..
قدمتلهم ومعاها فايزة وهي تقول:شن حالكم يابنات..
هما بأصوات متقطعه:الحمد لله..خيركم شن في شن صاير..علاش سدرة تبيني ضروري..
البنات شبحوا لسدرة..
سدرة بلعت ريقها وقالت:المهدي يبي يخطبك..
ضحكت عائشه وقالت:شني!!!!؟
سكتوا وهما يشبحولها..
عائشه :قصدك جايبتيني من الحوش بش تبصري عليا البصارة البايخه هادي..
سدرة؛مافيش بصارة ياعيشه المهدي بيخطبك..
عكرشت وجهها وقالت:شن تفتفتي انتي!
نسرين ودموعها في عيونها:ايه ياعيشه بيخبطوك ماليا للمهدي وهو اللي اختارك بروحه..
قلبك سدرة ينعصر عصر..
عائشه:فعلا خوك هدا مافيشي ذرة عقل شن يحساب روحه بيدير بالحركه هادي بيحرق صاحبتي بيا...ولابالك يحسابني بنوافق..
"ايه بتوافقي"
سكتوا كلهم وانظارهم توجهت ناحيتها بصدمه..
نزلوا دموع سدرة؛نبيك توافقي تعرفي علاش لأنك انتي الاصلح بالمهدي..
عائشه بصدمه؛خيرك انتي ضرباتك الشمس والاشنو؟!
فايزة:سدرة تدوي منك جد!..
سدرة ؛ايه من جدي نحكي سدرة انتي بنت عاقله متدينه ورزينه وربي عاطيك حكمه اللي زيك انتي هي اللي تقدر تروض المهدي وتغيره..اني متأكده انه حيعيش معاك متهني ومرتاح..
عائشه:خيرك سدرة خيرك..كيف تبيني الراجل اللي تحبه صاحبتي!!
سدرة ودموعهاسيل ؛مسامحاتك خوديه وربي يهنيكم..
نزلوا دموع عائشه وهي تقول؛ناخد راجل قلبه مع غيري!؟
سدرة؛حتنسيه مايجيه مني متأكده راجل يعاشر وحده زيك ينسى ان عرف حد قلبها حيندم انه ماحبكش من البدايه..
عائشه رفعت يده وقعدت تتكلم بيها وهي تقول؛بنخسرك راني بنخسرك راك اختي رانا كبرنا مع بعض كيف تبيني نضحي بيك..
فايزة ونسرين بدوا يبكوا...
سدرة:مش حتخسريني اني مستحيل نخسرك...
سكتت عائشه شويه وبعدين قالت..
"وكان حبيته!؟"
سدرة حست روحها بتموت شدت يد عائشه بقوة وقالت بصوت خانقاته العبرة وهي مغمضه عيونها بشده؛حبيه حبيه..فتحت عيونها وقالت..وحطبه في عيوتك وصونيه..نبيه يعيش مرتاح ومتهني نبيه يطيح في مراة باهيه خير مايجيبوله وحده تبهدله لانها مش حتعرف تتعامل تتعامل معاه زيك..
عائشه نزلت يدها شدت يد صاحبتها بقوة وقالت:شوفي قداش تحبيه !!...وتبيني نوافق...!!؟ مستحيل!..
جبدت يدها منها وقالت؛ع جثتي ياسدره..
ومشت للباب..
"ع خاطري ياصاحبتي"
فايزة ونسرين قعدوا يبكوا بالصوت ..
وقفت عائشه والتفتت وشافت نظرات الألم والرجاء في عيون صاحبتها..
شبحتلها شويه..
بعدين فتحت الباب وطلعت وسكراته..
وتتقابل مع المهدي وهو نازل من السيارة..
قعدت واقفه تشوفله بنظرات حاده..
وهو قعد يشبحلها...
لحظات وهما يتبادلوا في النظرات..
بعدين عائشه مشت وهي معصبه..
وهو قعد معاها بعيونه لين درقت..بعدها غير عيونه وشبح لحوش الواعر بنظرة حقد..
بعدين لف ومشي خش للمطحن...
🌻وروحوا نسرين وفايزة من حوش سدرة بعد ماهدوها...
وهي بعد ماروحوا قعدت تفش في غلها في البساطات..
وعيون طوبى البريئه عليها..
مش فاهمه خيرها بس حست بيها...يكفي انها شافت الدموع ينهمروا من عيونها...
🌱🌱🌱🌱🌱🌱
الساعه 5:00عصرا..
عائشه وعيونها لوطا:مش مواقفه يابوي..
جويده؛نعم!؟..
عائشه:مش موافقه مانبيش الزواج مش بالجبر..
جويده؛عطيني سبب..
عائشه بجرأة ولأول مرة:كان رايد غيري يابوي..
جويده:لكن جاك انتي..
عائشه:بوي اني الموضوع هدا مانبيشي..
جويده؛بنت اشبحيلي هني..
شبحتله..
جويده؛حاطه عينك ع غيره..
هي وامها انصدموا وعائشه قالت:معقوله يابوي تفكر فيا هكي!..
واحد من خوتها:مالا علاش رافضه!؟
عائشه:مانبيشي من حقي نرفض من حقي الا حقي هدا ماتحرمونيش منه..
جويده بعصبيه؛وطي حسك وطي..اصلا اني جايك نعطيك علم مش جاي ناخد شورك..
ناضت عائشه وهي تقول؛كيف ماتاخدش شوري كيف الموضوع هدا يخصني اني بس..
ناض واحد من خوتها عطاها كف لين طيحها ع الارض..
وعتيقه حطت ايديها ع فمها بصدمه..
جويده:هدا اللي مازال بتفرضي كلمتك ورايك علينا..!؟ اني الراجل جي طلبك منك واتي عطيته وتم الموضوع خلاص.
وتي روحك انتي وبنتك العرس قبل رمضان..
ومشي جويده من حداهم..
وولاده لحقوه للجامع بش يلحقوا ع صلاة المغرب..
وخلوها طايحه في مكانها وتبكي بالعبره..
امها جتها وضمتها وقالت:الله غالب يابنتي الله غالب..
وعائشه تبكي وتقول:حسبي الله ونعم الوكيل فيك يامهدي حسبي الله ونعم الوكيل...

#على_خاطري_ياصاحبتي
#طوبى

....يتبع..