طوبى الجزء الاول

الجزء الخامس والثلاثين

(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_الخامس_والثلاثين" بعترفلك"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
في يوم جديد....
"غدانا اليوم في حوش جدو لطفي بنات"
ردت عليها بنتها بإنزعاج؛يعني ضروري نمشوا نتغدوا غادي ماعندناش ماناكلوا هني!
استغربت في ردها استغراب شديد وقالت؛كيف حني نمشوا غادي بش ناكلوا يعني!؟
صفاء:مش هدا قصدي بس ياسر يعني الاسبوع كله وانتي مهناش وحني نتغدوا برواحنا ولاعندهم خلينا اليوم هدا مع بعض برواحنا..
فايزة شبحتلها شويه وقالت؛عندك حق ماما حاضر..خل نكلم خالتك سدرة ونقوللها ماصارش..
ومشت لوين مافي تليفونها بش تكلمها..
مروة راجت لين امها مشت وقالت؛انتي خيرك كرهتي حوش جدي لطفي!؟
صفاء؛ماكرهتاش..
مروة:لاكرهتيه ومعاش تبي تمشيله وكرهتي حتى خالتي سدرة نشبح فيك كيف ديري معاها.
صفاء؛مروة سكري فمك ماتخلنيش نوضلك..
وتاله مقعمزة حداهم ع التلفزيون لكن مركزة معاهم...
ع جية امهم قالت بإبتسامه:شن خاطركم نديروا غدي اليوم..
صفاء:بيشاميل وشربه عربيه ماما..
مروة؛ومعاهم كفتة بطاطا..
فايزة بضحكه:باهي نوضوا عاونوني هي..
ومشت وهما الزوز ناضوا وراها..
ومروة تشبح لأختها بنظرات ريبه..
☘اما عند سدرة..
حطت طاجين كلب البحر في الكوشه وهي تفكر في حال صفاء بنت فايزة وتبي تعرف علاش انقلبت عليها شن غيرها عليها هكي..
ع خشة طوبى وهي تقول..
طوبى:صقع مش طبيعي...
سدرة؛الصقع كله في شهر واحد..
طوبى:ايه..كملتي الغدي..
سدرة؛ايه انتي كملي وديري كفته..
طوبى:حاضر..الله كان تجينا دوسه..
سدرة وهي تغسل في الماعين؛ماظنيش مطر امس خلت الدنيا مغدرة..
طوبى وهي تاخد في البطاطا:خسارة..
التفتت سدرة وشبحتلها وقالت؛طوبى..
شبحتلها وقالت:نعم؟
سدرة؛مش ملاحظه ان صفاء بنت فايزة متغيرة؟
طوبى:بصراحه ايه ومش عارفه السبب..
سدرة؛نهائي!.
طوبى؛والله ابدا هي معاش ولت تجي ولاعاد تتصل ولادور واني مرة جربت نكلمها حسيتها تبي تنهي المكالمه..
سدرة:البنت اشبح شن سامعه..
طوبى:شن بتسمع يعني؟واللي سمعاته هي مش حيسمعوه امها واختها؟
تأففت سدرة وقالت؛مش عارفه..ورجعت تغسل في الماعين.
وخلت طوبى تشتغل وهي تفكر...
☘☘☘☘☘
"والله مالازمك المشي للخدمه غير بتمرمدي في الطريق وخلاص"
اريج؛مانقدرش يام..اليوم بناخد المعاش..
إلاء:لكن كان بتاخدي المعاش بري..
شبحتلها امها شبحه حاده..
اما اريج تجاهلت لفت حوالين رقبتها شال غليظ وقالت؛ماتبي شي من برا يام؟
معتز:ماتنسيش الادوات الجدد اللي قتلك عليهم..
اريج بإبتسامه؛حاضر..هي سلام..
لحقتها امها وهي تسقد فيها؛اول ماتوصلي كلميني..
اريج؛حاضر يام..
فردوس؛ردي بالك من الطريق..
لبست البوت متاعها وقالت:حاضر..
وفتحت الباب وطلعت..
وامها قعدت واقفه في الباب لين شافتها راكبه السيارة وتحركت بيها..
فردوس:في وديعة الله...
بعدين تنهدت وخشت للحوش..
☘☘☘☘☘
" الجو يقولك تغطى وارقد بس وانت بتطلع"
نضال وهو يسرت في كبوطه:عندي ماندير..
مغليه:تو تلقطلي برده نقعد نعاني فيك..
نضال؛لاماتخافيش عليا خافي ع بوي يلقطله حاجه وتقعدي تعاني بعدين..غمزلها وقال..سلام ياكبيرة الشارع..
ومشي طلع من حداها..
مغليه وهي تفكر؛هدا الولد يلقح مايبصرش..ابصر شن شايف ع بوه ياكبدي هييه منه...
☘ونضال طلع بسيارته من الحوش وتوجه لمشواره...
وصل بعد طول مسافه للعياده اللي تخدم فيها اريج..
شاف سيارتها قدامها..
تنهد بعدين قال؛خل ناخد ماناكل القعده مطوله هني..
ونزل سكر سيارته ومشي لأقرب قهوة..
☘☘☘☘☘
ماشي في الشقه وهو يمرر في كاميرا هاتفه عليه وقال..
عبد الرؤوف:هاه شن رايك؟
"كله حلو كله"
عبد الرؤوف؛تشكري في ذوقك..
"اكيد ذوقي حلو مش حلو اخترتك"
شبح للتليفون بنظرة غل..بعدين بدلها بإبتسامه لما وجه ليه الشاشه وقال:اصلا اني هدا باش عرفت ان ذوقك حلو..
ضحكت وقالت..
"لكن تعرف توقعت الاثاث يعطل"
هو قال:لامايعطلش حني معاملتنا خاصه..
"حلو"
عبد الرؤوف:من هو الحلو..
ضحكت بخجل..
ابتسم وقال:هي تو بنسكر ياحلو عندي ماندير تبي شي..
"سلامتك بيدو"
خفتت الابتسامه ع وجهه وهو يشبح لوجهها في الشاشه كيف قالت.."بيدو"
فهداكا الوقت خطرت ع باله هلبه افكار شيطانيه..
بس تعوذ منه وقال:حلو بيدو..
"عجبك معناها"
هو قال:اها..
"خلاص من اليوم بيدو بس"
هو قال؛واني نقولك مياسه خلاص ..ديل..
ضحكت وقالت..
"تمام سلام"
هو بإبتسامه؛سلام..بعدين سكر وملامح وجهه تبدلت للكره ومشي طلع من الشقه...
☘☘☘☘☘
واقفه في كوجينتها دير في الغدي..
روحت لشقتها اليوم لأن صغار اليوم يروحوا من السفر.
حطت غداها..
وخدت مق النسكافيه مشت وقفت في روشن الكوجينه اللي كان مسكر تتفرج ع الشارع وهي تغني..
ياطير او طاير ع اطراف الدني..
لوفيك تحكي للحبايب شوبني ياطير..
ياطير..
فجأة..
رن جرس الشقه..
استغربت..
حطت المق ومشت خدت وشاح لبساته..
بعدين طلعت للباب وقالت:مني.. "افتحي ماما"
تفاجئت هلبه وطول فتحت الباب..
لقت قدامها الصغار ونسرين والجالي..
هي لما شافت الجالي حست بروحها طايره مع شعور الشوق اللي حست بيه..
نسرين؛مفاجأة والله..
وهو يشوفلها بآبتسامه وصمت..
ضحكت بآرتباك وقالت:ايه..هلبه..حمد لله ع السلامه..تفضلوا..شبحت لصغارها وقالت..خشوا ماما خشوا..
خشوا الصغار وهي شبحت لنسرين والجالي وقالت:خيركم قاعدي برا خشوا.
نسرين:لاحبيبتي والله مافيها كيف..
الجالي:اني وسعيلي شويه خل ندخل الشناطي.
ابتسمت بتوتر وقالت:تفضل..
وسعت وهو دخل الشناطي وهي تشوفله كانت تبي تملي عيونها منه..
دخلهم وطلع وقال لاخته:نراجي فيك لوطا..
ونزل طول..
وهي تنهدت..
نسرين لاحظتها وعقدت حواجبها..
نجاة شبحتلها وقالت:شن صار في حالة حمزة؟
نسرين:ماتخافيش قال الدكتور عمليه تحل مشكلته بس يديرها لما يكبر شويه توا لازم يقعد ماشي بالنظارات وبس.
نجاة؛تمام الحمد لله...بارك الله فيكم..
نسرين؛شن تقولي ولدنا هدا مانديروش فيه فجميل.!
نجاه؛ربي مايحرمهم منكم..
نسرين بآبتسامه:تسلمي..هي باالسلامه..
نجاة:بالسلامه..
مشت نسرين نزلت..
وهي سكرت الباب وشبحت للشناطي..
ابتسمت وخدتهم بتقيمهم فاحت عليها ريحة عطره اللي عالقه فيهم...غمضت عيونها وهي تشم فيها..
لين جاها ولدها وقال:تعالي نوروك شن شرينا ماما..
ضحكت وقالت:هي..
وخدت الشناطي وخشت مع ولدها داخل..
☘☘☘☘☘☘
"متأكد من اللي درته؟!"
يوسف؛ايه ياجدي في النهايه اسمها رئاسة الاركان مؤسسة نظاميه..نقولوا نظاميه..
علي الواعر هز راسه وقال:واني عاجبني اللي درته لكن في نفس الوقت نبيك تشد مطحن العيله ياحسين..عمك لطفي قداش منه..وبوك مش مدور بكل عطيه يبيع ويشري فهالسعي وخلاص..
هز حسين راسه وقال:حاضر..
وسكت وهو يفكر يحكي لجده عن موضوعه مع طوبى لكن تراجع عن الفكرة وأجلها لوقت تاني...
علي:تعرف مش هاينه عليا اختك ياخدها ولد شنيبه..
حسين؛مش فاهم علاش ياجدي..الحق عمر كويس هلبه..
علي:رجالة العيله هادي مهما بانوا كويسين فيهم حاجه غلط ماتتعداش..الحق مافيهم كان ولدهم الجالي راكز عاقل محترم الناس تشهدله بالحكمه وكبر العقل واللي يشهدوله الناس هدا ماتلقى فيه عيب..تمنيته خطب اختك ولاوحده من بنات عمك.
حسين عقد حواجبه وقال بشي من العصبيه:نصيبه في مكان تاني ياجدي..
علي:ع قولتك نصيب..ربي يهنينا عليهم كلهم بالذات سدرة اللي شاغلتني في كل وقت..
تنهد حسين وقال:ربي يجيبلها اللي فيه الخير..
علي:آمين..
☘وهي فهالوقت..
كانت واقفه قدام مراية الحمام كانت تتفحص في بشرة وجهها ورقبتها لاحظت ان جلدها قاعد يتقشر..
وهادي ماكانتش اول مرة..
بس..
سدرة؛اكيد من الدوش تحت الميه السخونه..
مشت طلعت من الحمام وبطريقها للدار..حست روحها صقعانه بتتجمد..
برغم وجوده دفايه كبيره هلبه والعه في الحوش مخلياته دافي ع الاخر لدرجة ان في الحوش كانوا يلبسوا في لبس خفيف مش ثقيل..
وقفت ع مراية الدار وسنونها يصطكوا من الصقع..
نزلت راسها تحت وحولت الفوطه..
بعدين رفعاته فوق وين جت بتحط الفوطه ع الكرسي لقت فيها شعر..
قعدت تشبحله هلبه...بعدين شبحت لشكلها في المرايه..
وبدت تفكر..
جلد متقشر..شعر يطيح..وزن قاعد يزيد رغم انها معاش ولت تاكل زي قبل..تحس في روحها تعبانه ديما..ومزاجها ملخبط..
وولت تحب تنعزل ومعاش تختلط باللي حواليها...
《 اياد:سدرة فكري حتى في صحتك انتي مش باهي ليك الاعصاب والتوتر والقلق الزايد..
سدرة؛نحاول والله نحاول..
اياد؛لا مش نحاول..معاش تتوتري وتفكري هلبه..》
ع خشة طوبى قالت؛هيا الغدي طاب..
شبحتلها سدرة شويه بعدين قالت؛روحت عمتي؟
طوبى:لا قالن بيعطلوا هي وصفيه مرت عمي..
هزت سدرة راسها وقالت:حطيه في الصاله تو نجيكم..
طوبى:سدرة خيرك!؟
سدرة بشي من الانفعال:شي ياطوبى شي بري.
طوبى وهي تشوفلها بقلق:حاضر..
ومشت طلعت من حداها..
وسدرة رجعت شافت للمرايه...خدت المشط وقعدت تخلص في شعرها بعدين شبحت للمشط لقاته لم هلبه من شعرها..
دمعوا عيونها بس فيسع مسحتهم..
ضمت شعرها فوق..وحولت اللي عالق في المشط..وخدت الفوطى ومشت طلعت..
☘☘☘☘☘☘
الساعه 5:00عصرا..
"هي تفضلي ياأريج"
خدت اريج المعاش وهي فرحانه وقالت؛شكرا دكتور.
حطت الفلوس في الشنطه بعدين قالت:السلام عليكم.
هو قال؛وعليكم السلام..
مشت اريج طلعت وسكرت الباب..
وهو طول قام تليفونه ودار اتصال.
؛طلعت توا..
"نراجو فيها"
:عمولتي شن صار فيها..
"توصلك اول ماناخدوها اهي طلعت"
وسكر عليه..
وهو مشي وقف في الروشن وقعد يراقب..
شافها كيف ركبت ومشت وهما طلعوا وراها..
وهو ولى داخل قعمز ع كرسي مكتبه ويراجي..
☘وفي الطريق..
اريج وهي تسوق تحسب شن بتاخد وشن بتخلي:اول حاجه ادوات معتز..
درست قدام المكتبه ونزلت..
وهما درسوا وراها و قعدوا يراجو..
☘هي داخل كانت تشوف في الادوات والرسمات اللي عليهم تبي ناخد لخوها الحاجات اللي يحبها..
وهي تاخد وتوازي..
"اريج"
انخلعت والتفتت وهي تقول وعيونها مفنصات:شن دير هني انت!؟
نضال وهو متوتر:اسمعي فوتي كل شي وركزي معاي..توا وانتي طالعه من العياده في سيارة كانت تلحق فيك اللي فيها شكلهم ناويين ع حاجه..
اريج:اسمع مش وقت برادتك بكل نبي نروح قبل لظلم الدنيا حول.
هو شدها من يدها بقوه وقال:اقسم بربي ندوي جديات ياأريج من امس وهما يلحقوا فيك وضعهم ماعجبنيش وحسيت ان القصه فيها ان..دورت وراها وعرفت حاجه مهمه..
الدكتور اللي تخدمي عنده كانت عنده سوابق قبل الثورة..
اريج وهي مصدومه:انت شن تقول!؟ نضال ماتجيش المقالب هكي راهو..
نضال؛اقسمت بالله يااريج..
اريج:نهاري احرف!..باهي هو شن يبي مني..
نضال؛ع الاغلب يبي يخطفك لغرض مش عارف شن هو..
اريج وهي مصدومه:حاسه روحي فشلت مع بعضي..! ياربي علاش يصير فيا هكي ناقصه اني!؟...
جبدت يدها منه وتباعدت شويه وحطت يدها بين عيونها وغمضتهم..
نضال وجعه قلبه عليها قربلها وقال:اريج!
صاحب المكتبه:خير يااستاذ تفضل شن تبي من الابله!؟
اريج نزلت يدها وفتحت عيونها وقعدت تمسح في دموعها وهي نقول؛قريبي..
نضال:سامحنا يامعلم..اريج اشبحيلي.
شبحتله..
نضال؛علاش البكي بس..كان تعرفي اني شن درت معاش تخافي بكل..
اريج:شن درت..
نضال ابتسم وقالت؛كلمت جماعه نعرفهم في الردع قاعدين يراقبوا في الوضع ويبوا يشدوهم بالثابت..اسمعي جاي انتي توا بتطلعي عادي جدا خودي بضاعتك واطلعي اركبي سيارتك وتوكلي ومادخلكش بالباقي..
خدت نفس عميق ومسحت دموعها كويس بعدين قالت؛باهي..
شافت للحاجات اللي في يدها وقالت:سادات..
ومشت لصاحب المكتبه بش تشريهم..
ونضال طلع قبلها من المكتبه ..
ومشي ركب سيارته وتباعد..
هي شويه وطلعت وكانت دايرة روحها عاديه جدا بس من داخل بتموت من الخوف..
ركبت السيارة..
شغلتها وتحركت طول..
وهما وراها..
قعدت تشبح من المرايه زبطتهم..
وبدت تقرا في آية الكرسي...
خشت لطريق فاضيه متعوده تخطم منها..
هما هني زادو السرعه جو جنبها بعدين تخطوها ووقفوا قدامها..
وهي فرنت وعيطت ع طول حسها..
نزلوا الزوز وفي ايديهم مسدسات ومشولها...
وهي تشوفلهم وبدت تشهد خلاص حست ان هادي نهايتها ونست كلام نضال كله..
ولما قربوا يوصلوا فيها..
تجي سيارات قوات الردع..
هما انصدموا لما شافوهم..
طلعوا من رواشن سيارتهم بالكلاشنات وواحد فيهم قال..
مكانك انت وياه..
جرب واحد منهم يهرب..
ضربوه مات في ارضه..
واريج اول مرة في حياتها تشوف مشهد مرعب زي هدا..
ومن التوتر والخوف والصدمه الضغوطات النفسيه معاش تقدر تقاوم اكثر..
طول اغمى عليها...
وهي فاقده الوعي في السيارة..
شدوا التاني ورفعوا جثة الاول..
وجاها واحد قعد يدق ع الروشن متاع سيارتها وهو يقول:ياأبله!
ع جية نضال يجري قال:ترا شويه ياخوي..
بعد الراجل .
وهو فتح باب السيارة لما شاف حالتها خاف عليها هلبه..
قعدت يخبط ع وجهها ويفيق فيها:اريج..اريج..اريج..خيرك يابنت الناس..
:خافت شكلها.
هو جبد شنطتها وفتحتها وقعد يدور فيها لقي عطر خداه..
وبخ منه ع يده وقعد يشمم فيها..
هي بدت تفيق...
نضال:اريج.
اريج وهي مش واعيه لشي:عيونها..
هو تخزرط قدام الراجل..شبحله وقال:مش واعيه..
وصاحب الردع يشبحله بشك...
~~~~~~~~
مقعمزة ع رشادة وهي شاده شيشة ميه وتبكي..
نضال:خلاص ياهوو خلاص..مش طالع عليك الزفت درهتيلي كبدي..
اريج وهي تبكي:كيف بندير توا كيف بندير وين بنخدم تاني اني هادي ماحصلتها لين كويت عند جازيه العورا..
نضال:عند مني!؟
اريج وهي تبكي:جازيه العورا مثل هدا..تي خليني مني توا نبي نندب ع حظي المشرك نرقعه من تركينه ينشرك من التانيه ياني ياطايحه السعد..
نضال:خير عمك انتي خيرك..سكري فمك شويه خليني نعرف نتكلم..
اريج:تكلم تكلم ياارسطو ياافلاطون..اتحفني ياسقراط..
نضال؛تسهوكي براحتك ياشمطاء توا معذورة..المهم عندي وحده نعرفها تخدم في مجمع عيادات قريب عليكم ويبوا ممرضه..الحق ياربي او ماعرفت الحمار اللي تخدمي عنده شن وضعه كلمتها طول وهي قالت قوللها تجي في اقرب فرصه..
اريج هدت وقالت؛باهي وملفي..قاعد عند هداكا الواطي..
نضال:لاتوا خلاص راح في القص واللي عنده تو ياخدوه واني نجيبلك الملف بروحي لحد عندك..هاشن رايك يا لبنى السريعه..
ضحكت من بين دموعها وقالت؛طلعت تعرف تفكر والله كويس حصلنا منك ثمره..
نضال؛هو اني عارف ان حرام فيك في كل الاحوال لكن مقيوله سو خير وقطه بحر..
اريج ناضت وقفت وهي تقول:قبل بنشكرك لكن بعد كلمتك هادي طلعت منت بكفو..
ومشت وخلاته وهو يشوفلها ويضحك..
وصلت في السيارة بعدين التفتت وقال:شن اسمه المجمع..
نضال ابتسم وقال:*******
هزت راسها وركبت السيارة وشغلتها..
وهو طول مشي ركب سيارته..
وهي تشوفله ارتسمت ع وجهها ابتسامه حلوة..
وين ركب السيارة وشبحلها حولت عيونها عنه واختفت الابتسامه بكل..
تحركت..
وهو راجاها لين تمشي بعدين لحقها...
☘☘☘☘☘
في الحوش تمشي وتبخبخ في الميه في كل ركن منه...
وصلت للدروج وقعدت تبخ في التراكين..
ع نزلة عمر من فوق..
ابتسم وقال:شن دير يام..
مغليه؛نرقي في الحوش بميه ورق سدر برا سلم ولدي خش الكوجينه خود طاسه من الشيشه الزرقا واشرب..
عمر:ضروري يعني!
مغليه: مالا شنو سلم ولدي بش تم امورك ع خير الناس عيونها علينا مفتوحه زي الفناجيل ماترحم..
عمر:مالا خل نخش نشرب..
وخش للكوجينه..
مغليه:بعد تكمل جيب الشيشه وطاسه معاها...
وكملت ترش الميه في الحوش..
لين جاها عمر:خودي يام..
حطت الشيشه اللي في يدها ع الطاوله..
بعدين خدت منه ومشت للدروج..
عمر:ربي يصرف علينا كل شي الواحد ماصدق..
ولبس نظاراته ومشي طلع من الحوش..
☘وصلت مغليه دار الجالي..
دقت الباب..
"خشي يام"
فتحاته وخشت لقاته مقعمز ورا مكتبه..
مغليه:رقدت باهي؟
الجالي:الحمد لله..
حطت قدامه الشيشه والطاسه:هاك اشرب مية مرقيه بورق السدر واغتسل بيها..
هو هز راسه بدون مايعلق..
مغليه:اهو عمر خوك وصار منه وعرسه ان شاء الله في شهر 11 العام هدا..انت مازال مش ناوي..
الجالي شبحلها وقالت:حبيبتي لما ننوى اني نجيك ونقولك تمام؟
مغليه تنهدت وقالت:ربك يهديك ياوليدي وخلاص...
ومشت طلعت من حداه وسكرت الباب..
هو غمض عيونه ورفع النظارات متاعه وقعدت يمسح في عيونه..بعدين شبح لشيشه الميه..
خداها صب منها في طاسه وشربها كلها في مرة..
☘☘☘☘☘
"هدا كله داره عمو الجالي"
جوري:ايه وهو يركب ع الموطو ماما.
حمزة؛قعد يدير في فنياات مش عادي..
جوري بضحكه:وعمتو تعيط وتغمض في عيونها..
ضحكت نجاة وقالت؛امم..باهي ماهدرزتوش عليا؟
حمزة:سمعت عمتي قالت لعمي رد بالك ع نجاة في الخدمه ماتنزلش عليها..
نجاه وعيونها تلمع:وهو شن قال؟
حمزة؛قال لالا اني نساعد فيها..
ابتسمت وقعدت ساكته..
حمزة؛ماما مرة تانيه سافري معانا..
تنهدت وقالت:ان شاء الله حبيبي ان شاء الله..
☘☘☘☘☘
"حي نهار اسود"
اريج؛قريب رحت في خبر كان ياالاء..ردي بالك امي تعرف نذبحك بعدين..
الاء: ووك عليا..وجتها وضمتها بقوة..
اريج:تي حولي غادي مش ناقصاتك..
الاء:الااا اختي حبييتي قريب قعدت من غير خوات..
اريج بضحكه:متخلفه..
بعدت الاء وقالت بإبتسامه خبيثه:لكن نضال هدا قصته قصه شن يدير يتبع فيك..
وجه اريج ولى احمر وهي تقول:وين نندري ع دعوته اني..حولي خل بنرقد..
ورقدت وتغطت كلها..
الاء:غدوة يبان ياحنه غدوة يبان يااسمر ياسمراوي..
واريج تحت الغطا مغمضه عيونها وهي مبتسمه ابتسامه خفيفه..
☘☘☘☘☘
تاني يوم...
في الشركه...
خشت وهي جايه بروح جديده وطله نوعا ما فرايحيه...
ومازالت مكتفيه بتزيين عيونها بس وهالمرة زادت عليهم "آيلانير"
وصلت لمكتبها..
خشت وحطت شنطة اللاب توب..
بعدين مشت بتاخد قهوة من الكافتيريا..
وصلت في الكافتيريا وخشت..
شافت واقف ع وحده يشربوا في القهوة هما الزوز..
ويهدرزوا ويضحكوا..
من كعب رجلها لأعلى مكان في راسها ولعت فيها النار...
مشت طول بس تاخد القهوة وهي قاعده تنحرق..
وقفت ورا الكاصه وشبحتله..
هو مالاحظتش وجودها وقاعد يهدرز عادي..
غيرت عيونها عنه والنار تاكل فيها..
خدت طاسه القهوة وجت بتمشي..
بس قعدت تشبح للبنت كيف تكلم فيه وهي تبتسم..
ماتحملتش اكثر..
رفعت حاجبها ومشت ناحيتهم وقالت:صباح الخير..
وكأنخ الطاسه انطلست منها وتجي متبزعه ع البنت..
عيطت..
ونجاه حطت يدها ع فمها وقالت:حي! اسفه اسفه هلبه..
البنت:انحرقت انحرقت..
الجالي وهو متفلوش:تو نجيبلك ميه..
هي وقفاته بيده اللي مدت تحت وقالت:تو نجيب اني..
ومشت..
وهو يشوفلها بنظرات شك..بعدين ابتسم ع جنب..
هي جتها وعطتها ميه وقالت:اسفه سامحيني بالله عليك..
البنت شبحتلها بحده وجبدت الشيشه ومشت وهي نقول:عن اذنك بش مهندس..
نجاه وهي تعجب عليها:عن اذنك بش مهندس!
هو قعد يشبحلها بدون مايعلق..
هي شبحتله بطرف عينها بعدين قالت:خلاص طارت منها النيه..
ومشت من حداه بسرعه..
هو شد ابتسامته بقوة وقال:نظفوا المكان بسرعه...
ومشي طلع من الكافتيريا...
☘☘☘☘☘
"مبروك اميمه"
اميمه بإبتسامه:الله يبارك فيك..
:مبروك ميمو امتى الفرح ان شاء الله..
اميمه بإبتسامه:نهاية العام ان شاء الله..
:مبروك حبيبتي ويارب حتى اني يصيرلي زيك نتخرج من هني ننخطب من هني.
اميمه بضحكه:آمين..
كان اسامه واقف من بعيد يشوف لزميلاتها كيف يهنوا فيها..
كان يتألم لأبعد حد وهو يشوف فالفرحه اللي في عيونها...
تحبه حب كبير ماقدر شي يمحيه..
وهو حبها حب كبير ماقدر شي ينسيه فيه او يصرفه عنه..
ولأنها يحبها من قلبه تمنالها كل خير..وكان يكفيه يشوفها سعيده وفرحانه..
استجمع نفسه..تظاهر بإنه عادي جدا..
رسم ابتسامه ع وجهه ومشالها..
وقف عليها وقال:شن الاخبار الحلوة اللي سمعناها هادي..
اميمه ضحكت..
اسامه:ماشاء الله تتخرجي من هني وتنخطبي من هني ينخاف عليه من العين..
ضحكوا البنات ووحده فيهم قالت؛والله حق..
ابتسم اسامه وقال:مبارك وربي يكمل ع خير..
اميمه بإبتسامه:آمين..عقبالك..
اسامه:شكرا..ايه حقه سمعت داليا؟
اميمه بضحكه:ماخلت عليا هزيبه وهي تقول كيف ديري في روحك هكي ياغبيه وتحصلي حصلتي هي تكلم فيا ولدها فك التليفون منها وقعد يهدرز..
قعدوا يضحكوا..
اسامه بضحكه:قوليلها احمدي ربك حصلتي في جرتها سفره فكاتك من هالبلاد المقربعه..
:مش غير..
اميمه:مافي حد عاجبه حاله.. اسامه:الحمد الله ع كل حال...
☘☘☘☘☘
"واسطة شني اللي تبيني نخشها بينك وبينهم فوق المصيبه اللي درتها معقوله تتزوجها منك ليك"
يوسف:نقولك البنت جايه عني وقاعدن في فندق بروحها تبي نخليها هكي..
حسين؛لاتزوجها وسكنها في حوشك من غير لاعرس ولااشهار..لايمكن نخش بينك وبينهم فاهم طلعني منه الموضوع هدا..
يوسف:ياما وقفنا معاك ياحسين رانا..
حسين؛في الصح مش في الغلط..اني مش عارف شن جاك بعد كبرت هبلت مرة وحده..
يوسف بحده:احترم نفسك راك تنسى انت من قاعد تكلم..
حسين؛للأسف مش ناسي..ناض وقال..ربطها بإيديك حلها بسنونك..
وناض ومشي طلع من الحوش بروحه....
بعد طلع..
"مش راضي صح!؟"
التفتلها وقال:يرضى ولايغضب ماحد ليه علاقه بحياتي...هادي حياتي اني واني اللي نمشيها..
ريما وهي دمع؛اسف هلبه يوسف جيت وقلبت حياتك قلب..
جاها وهويقول:معاش تقولي هكي حبيبي هي قبلك كانت مقلوبه وتوا بس تعدلت..
واحتواها احتواء الزوج لزوجته وقعد يطبطب عليها ومازال يفكر في ردة فعل اهله لما يعرفوا باللي داره...
☘☘☘☘☘
في مكتبه..
كانت عنده مكالمه يدير فيها..
هي جت ودقت الباب..
اشرلها تخش وتقعمز..
هي خشت وقعمزت وقعدت تشبحله كيف يتكلم..
الجالي:قتلك من البدايه مش حتلقى زينا انت مااقتنعتش.......ضحك وقال...لينا الشرف ياسيدي.........تمام تمام...تحياتي..وسكر وحط التليفون ع المكتب..
بعد حط ايديه الزوز فوق بعض ع المكتب وشبحلها وقال:هدا صاحب مشروع المول قاعد يشكر في التصميم متاعك ياستي وبيبدوا يخدموا عليه وانت بتشرفي ع كل شي راهو..
نجاة بإبتسامه فرح؛اني!
الجالي:اكيد مالا مني..مش تصميمك..
نجاه:ليا سنين طويله ع الحاجه هادي لين نسيتها..
الجالي:نمشي معاك اني ونفكرك..
قعدت تشبحله وهي ساكته..
ابتسم ورفع يده ودار بيها حركه وقال:صار الطاسه كانت رزينه..!
نجاه رفعت حاجبها وقالت؛لا..كانت سخونه..
نزل يده وقال:وحرقتيها بيها..
نجاة:هي جت في طريقي..
قعد يشبحلها وهو مبتسم برفعة حواجب..
هي غيرت عيونها عنه ونزلتهم..
هو نزل حواجبه وفتح الدرج وعيونه عليها..طلع علبه وحطها ع الطاوله وقال؛خودي..
هي شبحتلها شويه وقالت؛شن هادي!؟
هو:تفكرت واني غادي..
شبحتله..
شافت في عيونه نفس النظرات اللي توتر فيها..
الجالي:افتحيها وشوفي شن فيها..
هي شبحتلها شويه..بعدين خدتها وفتحتها..
وهو مركز ع ردة فعله..ابتسم لما شاف ملامح الدهشه ع وجهها..
كانت ساعه من ماركه معروفه..
الجالي:عجباتك؟
شبحتله وقالت؛علاش تجيبلي حاجه زي هادي..
الجالي:لأن هدا بس اللي يطلع عليك..
مصر يفقدها السيطره ع نفسها..
كلامه ماسمعتاش من راجل قبل مافي حد كلمها قبل بأسلوب حسسها فيه انها حاجه كبيره وتستاهل التقدير..
طاهر زمان كانت تسمع منه في كلام حب وغزل تقليدي للغايه..
واي راجل لما يجي يمدحها مدحه يكون عادي جدا ومايأثرش فيها..
عكسه هو حتى وان كانت كلمة بسيطه اللي تطلع منه..
لازم تحس معاها انها ولت في عالم تاني..
بس مجبوره تقاوم سيل هالمشاعر المنجرف اللي كأنه راكد لسنين بعدين تحرك مرة وحده..
ناضت ومشت طلعت طول بدون بتنطق بكلمه..
وهو وين يشوفها هكي يعرف ان تأثيره عليها كل ماله يزيد يقوى اكثر واكثر ويفرح بيه هلبه..
~~~~~~~
الهديه محطوطه ع طاوله بينها وبين اختها وهي تشوفلها..
صابرين:كأن اول مرة تجيك هديه..
نجاة:مش قادرة نقبلها..
صابرين:السبب..
نجاة؛لو قبلتها بنفتح ع روحي باب الريح ياصابرين..
صابرين:خيرك خايفه هكي نجاه!
نجاة:لان مشاعري مخوفتني مشاعري منجرفه هلبه مش قادرة نتحكم فيها..
صابرين:لهالدرجه الجالي مأثر فيك!
نجاه؛باديه نتعلق بيه ياصابرين وانتي تعرفيني لما نتعلق بحد شن يصير فيا لما نفقده..
تفكرت صابرين بعد وفاة امها نجاه شن صار فيها حاولت تنتحر حتى الانتحار..
صابرين:خلاص اطلعي من حياته وطلعيه من حياتك الف شركه تتمنى تخدمي عندهم..
نزلوا دموعها وقالت؛مانقدرش..
صابرين؛وعلاش..
رفعت عيونها وقالت؛نحس في روحي حنموت بعدها ..
صابرين وهي متعجبه؛طاهر اللي قعدتي معاه علاقه سنين ماصارش فيك هكي ع خاطره..والجالي قربت منه في شهر شهر بس..يدير فيك هدا كله..
نجاه بدت تبكي..
صابرين وعيونها تعبوا دموع؛ياريت نقدر نديرلك حاجه ياريا..
نجاة ببكي:نبيه يحبني ياصابرين..
صابرين:وانتي تنحبي ياعمري موت..بالعلامه شوفي شن جابلك وهو برا عقله معاك..
نجاه:وبعدين شن بيصير قولي..
سكتت صابرين..
نجاة وهي تبكي:هدا اللي خايفه منه هدا...
☘وبصعوبه هدت نجاة...بعدين خدت صغارها من عند اختها وروحت للحوش..
قعدت تشتغل في شغل الحوش بش تلهي نفسها بس للأسف كانت الدموع تخون فيها ..
قعدت ع هالحال لليل..
لين عشت صغارها ورقدت..
وجت رقدت ع ولدها الصغير وقعدت تشوفله كيف راقد وهي مبتسمه بحب..
فجأة..
رن تليفونها..
قاماته ولما شافت المتصل غمضت عيونها وبلعت ريقها..
بعدين فتحتهم..وخدت نفس..
وفتحت الخط وردت..
"ايوه"
نجاه بصوت مبحوح:اهلا..
"شن حال الصغار"
نجاة:كويسين توا بس رقدوا..
"خيره صوتك!؟"
نجاة؛ماخيره شي..
"تمام..بنكمل معاك باقي الكلام اللي طلعتي وخلتيه في نصه..عرضوا علينا تصميم مشروع منتجع صيفي كبير حيبدا تنفيذه خلال 4سنوات..قررت ناخدوه اني وياك"
نجاه:اني وياك؟
"ايه بذكائك واني بخبرتي توقعي شن يطلع "
ابتسمت نجاه..
"نشطي روحك قدامك تحدي اكبر من اللي فاتوا ونبيك معاك تكون كتله طاقه وحماس بس تشجعيني"
نجاة بإبتسامه؛ماعنديش مانع..
"بالله عليك!..عزيزتي اني قاعد نعطي في اوامر!"
ضحكت وقالت؛انت غريب وديما تفاجئ فيا..
" من اي ناحيه"
نجاه؛يعني اللي نعرفه عنك انك تحب تكون الاول في كل شي وتكون في المقدمه وتبان الاوضح في الصورة شن اللي يخليك تشارك حد مشروع كبير زي هدا؟
"صح مزبوط اني هكي..ومافي حد في الدنيا مايحبش يكون هو الاحسن والاول في كل شي..الا اذا"
نجاه قعدت تسمع فيه وقلبها يدق بقوة..
هو كمل يقول..
"الا اذا صادفه انسان حس انه بنفس اهمية نفسه عنده"
مش قادرة تتكلم ولاترد عليه..تحس في لسانها ينشل وين يتكلم معاها كلام زي هدا..
"ع العموم نخليك توا ترقدي بش غدوة تجي مصحصحه اتفقنا"
نجاه بلعت ريقها وقالت:اتفقنا..
"تصبحي ع خير"
نجاه؛وانت من اهله..
وسكرت وحطت يدها ع قلبها وهي تحاول تهدا..
بعد رقدت بالجنب وهي تشوف لولدها ومازال قلبها مايبيش يهدا...
☘☘☘☘☘
تاني يوم..
الساعه 11:00صباحا..
جت فردوس لأهلها من الصبح عندها خدمه في المعمل..
والبنات بيطلعوا مع خالاتهم بش ياخدوا اللي محتاجينه للعرس..
وهما في السوق..
سدرة كانت تشوف في اكسسورات تخص ليله الحنه..
وهما بعاد عنها شويه ويهدرزوا.
طوبى:حي يانهاري!
اريج؛لطف بيا ربي الحمد لله كله من الاذكار بيبو ديما تقوليلي معاش تخليهم لين ربك جابك في طريقي نضال من قال بس..
غرفه بضحكه:كان ماطلعش مكبد فيك نقطع يدي من هني..
اريج:لاخليها يدك نبوا نديروا عرس..
ضحكوا البنات..بعدين ..
طوبى:الحمد لله حمدا كثيرا اللي نجاك روجتي..
اريج:الحمد لله..بس هاه ماما ماتندري على شي ولاخالتي ولاعمتي..
طوبى:تمام..
غرفه:مادوري شي..
آلاء:مشت فيك الكلمه..
غرفه بضحكه:منه هو..
طوبى:يضحك كيف يقول فيها..قعدت تقلد فيه..مادوري شي مادوري شي..
"والله طلعت معاك احلى"
فنصوا كلهم..
وسدرة التفتت..
غرفه:عبد الرؤوف..
هو اشر لسدرة يحي فيها..
هي ردت عليه وجتهم وقالت؛اهلا وسهلا..
عبد الرؤوف:اهلا بيك..كيف حالكم
سدرة:الحمد لله..صدفه!
عبد الرؤوف ضحك وقال؛لا عارف انكم جايين هني..
الجهة هادي عندي فيها صحاب كلهم تحت امركم..
غرفه ابتسمت وهي تشوفله..
والبنات يشبحوله ماعدا طوبى راسها لوطا من الخجل..
سدرة؛بارك الله فيك..التفت وشبحتلهم وقالت..هيا قدامي..
مشوا وهي مشت وراهم..
عبد الرؤوف ضحك وقال:والله ماينلام خونا..
بعد كملوا شري..
روحوا طول...سدرة ماكانش عندها خلوق تقعد وحست روحها فيسع تعبت..
في السيارة..
طوبى وهي تشوفلها؛سدرة وجهك مش عاجبني بكل..
سدرة؛مافيا شي نخمم في عرس اختك بس..
طوبى:يمشي بجوه سوسو..
سدرة:ولو..لازم نخمم..
سكتت طوبى وهي تفكر فيها بقلق..
وصلوا للحوش..سيارات سدرة وغرفه..
نزلوا كلهم ماعدا سدرة قالت:عندي مشوار نديره ع السريع وجايه..
طوبى هزت راسها وهي ساكته..
خشوا البنات ماعدا طوبى..
اللي قعدت مع سيارة سدرة بعيونها لين طلعت من الشارع..
بعدين تنهدت بضيق وخشت داخل..
☘☘☘☘☘
خش ع امه الكوجينه لقاها طيب..
باس كتفها وقال:شن غدانا..
عائشة:رز..
محمد:شن فيها الطنجره التانيه.
عائشه؛بردوا ليا اني وبوك..
محمد:موليه تاكلي في ابيض هلبه..
عائشه وهي تغطي في الكسكاس:معدتي الفترة هادي مش ولابد..
محمد:من الماكله الحارة متاعي حناي..
ضحكت وقالت؛ربي يسامحها تحساب روحها كان كترت فلفل بتولي بنينه...
محمد بضحكه:مش عارف كيف عمامي تأقلموا ع ماكلتها..
عائشه؛تعودوا..ايه برا سلم ولدي جيب لبوك فواكه طلع وقالي شن تبي واني نسيت نوصيه وكان قتله توا حللي راسك نديرلك فيه قرون..
ضحك محمد وقال؛حاضر..ايه حقه يام بتمشي اول يوم قرايه..
عائشه:ايه..
محمد؛اني بنخط اني شوفي الجو باهي..
عائشه:باهي باهي..لكن اسمع راك تنسى السني شهاده ولدي شد بإيديك ورجليك وفوت الكورة شويه
محمد بإبتسامة ملل؛حاضر..
ومشي طلع من حداها..
هي ابتسمت وقال:اللهم اجعله واخوه صالحين مباركين اينما حلوا..
☘☘☘☘☘
مقعمزة في الفروسيه ليها ساعتين تراجي في اتصال من مختبر التحاليل..
وجاها هالاتصال يخبرها ان تحاليلها جاهزات..
طول مشت طلعت من عادي وركبت سيارتها ومشتلهم...
وصلت فيهم خدت النتائج..وطلعت بيهم طول للمصحه اللي يخدم فيها الدكتور اياد..
~~~~~~
اياد وهو يشوف في ورقة التحاليل:عندك كسل في الغدة الدرقيه..
سدرة:توقعت..
اياد شبحلها وقال:مع العلاج تولي احسن من قبل..
سدرة:لاحظت عليا انت صح؟
اياد؛مزبوط..بس مش مشكله نعرف دكتور ممتاز في المصحه هادي اسمه عبد القادر خوجه يجي غدوة ان شاء الله صبح تلقي تابعي معاه حالتك..
سدرة:مشكور جدا دكتور..
اياد؛واجبي..ومدلها الورقه..
سدرة:خليها عندك مانبي حد يشوفها معاي..السلام عليكم..
تنهد وقال:وعليكم السلام...
مشت وهو بحسرة وعيونه يلمعوا بالدموع قال...
"خسارة"
☘☘☘☘☘
نهاية الدوام..
كانت جايه تجري بإتجاه البركيدجو من برا...
وفي واحد جاي من بعيد خبطاته وطيحت منه شنطته..
نجاة بإحراج؛اسفه جدا سامحني..
هو طبس لشنطته وقال؛ولايهمك بش مهندسه..
ع جية الجالي للبركيدجو جاي لسيارته..
وقف لما شافهم مع بعض..
وهي تبتسم للراجل...
واللي صارلها هي امس صارله هو فهاللحظه..
قعد يشبحلهم وهو عاقد حواجبه بغضب..
شويه مشي الراجل..
وهي بتكمل طريقها لسيارتها شافاته وقفت في مكانها..
قدملها ..
وهي تشبحله وتبلع في ريقها وقلبها متسارعه دقاته كالعاده..
وقف قدامها ودار حركه بيده ع فمه وهو يقول:الابتسامات ديما هكي مع كل من هب ودب.!؟
نجاة:نعم!؟
الجالي قعد يشبحلها بغضب والغيره باينه في عيونه..
خاف لو تكلم اكثر يقول كلام يجرحها بيه..
لهدا اختار الانسحاب..
مشي من حداها لسيارته..
وهي تشبحله وخلاص..
فجأة..
وقف..
غمض عيونه شويه بعدين فتحت ولف ورجعلها..
وهي عيونها متوسعات ع الآخر...
وصل فيها وقال:انتي تخصيني..
بلعت ريقها وقالت؛نخصك ع اني كنت مرت خوك..
هو بإنفعال:معاش تربط نفسك بأي راجل حتى في الكلام..اني قتلك انتي تخصيني..تخصي الجالي بس..
هي قريب اغمى عليها...
وهو بعد ماقال كلامه رجع مشي لسيارته..
بدت ترتسم ع وجهها ابتسامه حلوة ابتسامه فرح وعدم استيعاب..
وهو ارتسمت ع وجهه ابتسامه خالطت ملامح الغيره ..
ارتاح لأنه وضح اللي قاعد يحس بيه اتجاهها..
وقف لما وصل في سيارته التفت وشبحلها.
لقاها تشوفله وهي مبتسمه..
قعدوا يتبادلوا في النظرات والابتسامات للحظه بعدين..
هي مشت طول لسيارتها وهو ضحك ومشي ركب سيارته..
شغلها وتحرك..
طلعت سيارتها..
وهو طلع وراها طول...
قعد يتبع فيها..
وهي تسوق ومرة مرة تسرقله النظر من مراية السيارة..
وقعد وراها لين وصلها للعمارة..
خشتلها وهي بطير من فرحتها..
وهو روح للحوش...
~~~~~~~
نجاة:معاش نقدر نقاوم اكثر من هكي ياصابرين نحبه هدا اللي نحس بيه ومعاش نبي ندرقه بكل..
"ماعندي مانقولك غير ربي يجعله عوض الخير بس اهم شي لازم تعرفي كيف تخليه يغرق في حبك يانجاة ومايقدرش يعيش من غيرك"
ابتسمت نجاة وقالت؛كل يجي بروحه ياصابرين كل يجي بروحه...
🍀🍀🍀🍀🍀🍀
مشاعر منجرفه منها اللي عارفه شن تبي..
ومنها اللي انطلقت في مرة وحده بعد كبت دام طويلا ومش مهم وين تكون وجهتها المهم الاحساس الحلو اللي تعيشه فيه
اللي يخلينا متخدرين ومش عارفين وين رافعتنا..
نجاة..الجالي...
ومشاعر..
عمرها طويل طويل هلبه..من الطفوله للفتوة للشباب تراجي في اللحظه المناسبه بش تطلع ويفرج عنها..
بس ياترى هاللحظه حتجي في وقتها ولابعد فوات الاوان..
حسين..
ومشاعر..
حب غلفها الحقد الانتقام تخلينا نراجو بالساعه والدقيقه امتى نبردوا فيها ع قلوبنا المجروحه وننتقموا من الحبيب اللي غدرنا..بس مادامه قاعد حبيب حتولي علينا نيران انتقامنا منه وتوجعنا حتما..
عبد الرؤوف او مبروك..
ومشاعر..
حب اعمى..تخلينا نرتكبوا الاخطاء بدون مانشوفوا انها اخطاء ونبرروا لأنفسنا اللي درناه بإسم الحب..
..يوسف...
ومشاعر..
جميله..كيف باديه تخربش القلوب وتناشب فيها وتشاكس فيها بش تتجاوب معاها..
نضال..اريج...
ومشاعر..
منحرفه المسار..السكه متاعها تغيرت للطريق الغلط اللي مش معروف فأي هاويه حتكون نهايتها..
صفاء....
ومشاعر..
عتيقه..ريحة عتقها تشبه ريحة الياسمين العتيق اللي تحبها سدرة المنتهى سلطانة القلب التعبان اللي عايش بش يحبها وبس..حب مافيش منه امل..ولاليه أي مستقبل..
🍀🍀🍀🍀🍀
ويمر شهر..
والعلاقه بين نجاة والجالي تطورت هلبه..
مكالمات رسائل ..هدرزة في الخدمه..
ولما تجي لحوش بوه متفقين انهم مايتلاقوش نهائي منعا للشبهه...الجالي كان يبي يكون كل شي في السر وهي ماعندهاش اي مانع المهم هو يكون معاها..
اما اريج فكانت عاقده هدنه مع استاذها وكان التعامل بيناتهم عادي جدا مافيشي اي شي خارج ع هالأطار.
بس داخليا كل واحد فيهم كاين مشغول بالتاني..
☘وسدرة..
بدت تتعالج بعيد عن العيون مش محسسه اي حد بأي حاجه..
بس مش ع بنتك طوبى ياسدرة...اللي قد ماتحاول تعرف خيرك تصدي فيها وبالها ينشغل عليك اكثر واكثر...
☘ومازالت فايزة غارقه في الخدمه وغافله عن صفاء اللي قاعده تغرق في دوامة مشاعرها المضطربه اللي قاعده تأثر سلبا ع اخلاقها وطباعها...
☘وياااه ع الفرحه اللي عايشتها غرفه يااه.
خلاص مازال ع عرسها اسبوع واحد فقط لاغير...
اسبوع واحد يفصل عن الكارثه...
☘☘☘☘☘
في المكتب..
كانوا مقعمزين جنب بعض..
هي تشرح ع التصميم متاع المشروع..
وهو يشوفلها بنظرات كلها مشاعر..
نجاة:هكي خير شن رايك..
شبحتله وشافت نظراته جمدت في مكانها..
نجاه:خيرك!؟
الجالي بكل جرأة؛نتزوجوا.
هي انصدمت.
الجالي بلهفه:انتي مراة حرة نفسك مش لازمك ولي شرعي نقدروا نكتبوا الكتاب بزوز شهود وتمت..
هي تشوف لعيونه وهو يتكلم وخلاص
الجالي:معاش عندي صبر اكثر من هكي نبي نكون مرتاح معاك يانجاة خلي ربي يشوفلنا وهو راضي علينا نبي ضميري يكون مرتاح..
نجاة ؛وبعدين..
الجالي:بعدين خليه لبعدين لما تولي مرتي بعدين مش حيكون مهم بكل..
نجاة وهي زي المنومه مغناطيسيا:موافقه..
ضحك من الفرحه وقال:تحبك ياشيطانه رجيم..
نجاة ضحكت وقال:نموت فيك ياابليس الابالسه.
وقعدوا يضحكوا هما الزوز ع ارواحهم كيف شكل كرههم لبعض اللي تحول تحول كبير مثير للدهشه....

#بعترفلك
#طوبى

....يتبع.....
تفاعلوا بش تنزل التكمله بإذن الله..
عرس غرفه وعبد الرؤوف....