طوبى الجزء الاول

تابع

#طوبى "أقحوان وفلة وياسمينه"
#جمان_فريد
#الجزء_الثالث_والخمسين"اواخر الشتا4"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
☘المراة في مجتمعاتنا العربيه..
وفي مجتمعنا حني بالخصوص..
ديما تحب تلعب دور المضحيه..
اضحي بكل شي حتى بكرامتها لعدة اسباب..
ابرزها الخوف من كلام الناس..
صح في اللي مجبورات يضحوا لأن ظروفهم صعبة..
بس في اللي اختاروا يضحوا بش مايكونوش عرضة للقيل والقال..
ومع هذا..
في قلة قليله..كرامتها واحترامها لنفسها فوق كل شي..
نظرتها بعيده...ابعد من انها تهتم لنظره المجتمع..
اخر همها....ويمكن مش في قائمة الهموم والإهتمامات نهائي..
هادي..المراة القويه..
واميمه خير مثال..
لأنها تأكدت انها مهما ضحت مش حتكسب شي بل حتخسر هلبه حاجات ومرات يكون في ضحايا غيرها..
اختارت انها تنهي حياة زوجيه وسط بيئة مسمومه في كل الحالات محكوم عليها بالفشل..
وحولت من حساباتها كون انها مازال عروسه جديده ليها شهرين بس متزوجه..
والناس في الحالات هادي ماترحمش..المراة طبعا..
لكن وجع ساعة ولاوجع مية ساعه..
كلها سنه سنتين بالكثير والناس تنسى..
وهي وقتها حتكون ربحت هلبه حاجات مهمه..مقابل هالخسارة☘
🍃🍃🍃🍃🍃
وقفت في الباب..
كانت خايفه..وهلبه مش شويه..
لكنها تحدت خوفها وصممت ع المواجهه..
دقت الباب..
انفتح طول..واللي فتحه كان يزن ولد المهدي..
اميمه بإبتسامه؛يزن شن جو..وخشت.
يزن:الحمد لله..مرت عمي..عمي عمر قالك تعالي لحوش جديده..
وهي مبتسمه ابتسامه فيها مسحة حزن قالت:عارفه..
يزن هز راسه ومشي طلع من الحوش وسكر الباب..
وهي شبحت لباب الحوش الدخلاني..
بعدين خدت نفس وقالت..
"حسبي الله ونعم الوكيل"..
ومشت خشت داخل..
ودقات قلبها من الخوف والتوتر كانت متلاحقه..
كورت ايديها الزوز وشدت عليهم بقوة وهي ماشية بإتجاه الصاله اللي تسمع في اصواتهم جايه منها..
ووين قربت..
تصنعت الثبات واخفت خوفها وتوترها..
فتحت ايديها وخشت عليهم للصاله وع وجهه ابتسامة واثقه..
كلهم شبحولها بنظرات حاده..
وعمر قال:تعالي هني تعالي..
رفعت يدها وقدمت ناحيتهم وهي تقول:انت بالذات ماتكلمنيش نهائي..
ووقفت ع بعد مسافه من الجميع..
عمر؛خيرك بلاك انتي.!؟ مهبوله مش طبيعيه امس بحال واليوم بحال..
شبحتله من فوق لتحت بإزدراء من اسلوبه اللي يكلم فيها بيه بعدين قالت؛اسأل اختك ..واشرت بعيونها عليها وقالت..خديجه..
هما شبحوا لخديجه..
وخديجة تشبحلها بحده..
اميمه وهي تشوف لعمر بإبتسامة متهكمه وهي تقول:قالت عمر عطانا فلوس نشرولك ماتلبسي في البيان لان اللي عندك مش ولابد مايبنيش نحشمه..
نسرين شبحت لخديجه بغل..
اميمه:هي خديجه مش اول مرة تتعتمد تهيني وتقلل مني..بس المرة هادي انت عطيتها الفرصه ياعمر..عطيتها فرصه تضحك عليا وتهيني وطلعني هبله هي ونسرين..
وشبحت لنسرين وهي تقول..ولا يانسرين!؟..انتي تقولي اني خديته وهي تقول اني خديته..مررت سبابتها عليهم وقالت..من فيكم كذابه..
نسرين بحده؛اميمه..احترمي نفسك..
ضحكت نص ضحكه متهكمه..
والجالي وخديجه يشوفولها بكره..
عمر تهكما:هذا كله ع خاطر من جابلك القفطان وشن قالولك خديجه ونسرين!.. قداش طلعتي سطحيه وعقلك صغير..
اميمه:السطحي واللي عقله صغير هو اللي يتعمد يهين مرته ويصغرها لأنها عارضاته وقالت لا ومشتش في طوعه ودارت مايبي ودفنت روحها وضيعت مستقبلها..نعرفك كويس تقدر بألف طريقه تجيب القفطان او تتحايل عليا بش طلعني وناخد بدال الواحد زوز..لكن انت كنت قاصد دير هكي لأنك عارف ان نسرين حتقول اللي سمعاته منك لخديجه وخديجه فرصه وحصلتها..
قعد ساكت وهو يشوفلها ودموعه عبوا عيونه..
☘فعلا كان قاصد يدير هكي بش يرد عليها لما عارضاته في حكاية الخدمه..
كان يبي يهز ثقتها بنفسها ويكسر شوكتها وياكثرهم الرجاله اللي دايرين هكي فنساوينهم....
هو بعدين ندم ع اللي داره وكان خايف من نتيجته ويحسابه عدا ع خير لما اميمه بعتتله صورتها قبل لتمشي☘
بس طبعا كان لازم يفند الكلام اللي قالاته ومايطلعش غالط قدامها..
قاللها متعجب:مش عارفه منين تجيب فيها الدوة هادي..مش عارف امتى تبطلي تتوهمي وتألفي قصص في راسك وتصدقيها....
نسرين بشي من الانفعال:معليشي اميمه معليشي..انتي عندك احساس بالنقص..
خديجه:من الاول بكل واضح الشي هدا تحسس من كل تصرف عفوي يطلع عادي.تفسر اي كلمه تطلع بحسن نيه غلط وتحكم اللي ع اللي قالها كيف مايصورلها دماغها هي من داخل حاسة روحها اقل اللي حواليها هذا علاش متحسسه منهم..
عمر:تعرفي يااميمه واهو قدام خواتي نقولها لو استمريتي بوضعك هذا مش حيمشي الحال..
ابتسمت ببرود وقالت؛خلاص طلقني..
انصدم...
وهما يشبحولها بدهشه..
اميمه:مافيش حياة بيني وبينك وهذا الواضح من
البدايه..انت تشوف فيا مريضه بعقده النقص..واني نشوف فيك مش مناسب ليا لا انت ولاعيلتك..
نسرين بدهشه:اشي!!
خديجه ضحكت بسخريه وقالت:هزلت..
وهو يشوفلها بحده وبخوف...
الجالي خرج ع صمته بعد ماوصلاته جملتها الاخيره لأقصى مراحل الاستفزاز..
قال لخوه:تعرف لو منك ياعمر نطلقها وقتي..
شبحتله بنظرة الجالي ماقدرش يفهمها..
بعدين ابتسمت تهكما وقالت:اسمع كلام خوك ياعمر..
عمر اندفع ناحيتها وشدها من ذراعها وقالت:نتفاهموا في الشقه..
جبدت ذراعها بقوة وقالت:مش ماشيه معاك لمكان خلاص..افهم خلاص..اني معاش نبي نكمل معاك..نبي نطلق افهم..
خديجه بتهكم؛عطيها ماتبي ياعمر عطيها وراسك هي الخاسره..
اميمه:خسارتكم مكسب..
نسرين بصدمه:ياما تحت السواهي الدواهي.
اميمه:في هادي صدقتي ياما تحت السواهي دواهي..اللي يعرفكم يشكر فيكم ويقول مافيش منكم وتخافوا ربي..مايندروش انكم ضحكتوا ع عيلة كامله..جيرانكم اللي ماريتوش الا كل خير..
خديجه :في شني ضحكنا عليكم يامريضه انتي!..
اميمه رفعت حاجبها وقالت؛ضحكتوا ع عمي لطفي خديتوا بنته لأحسن ولادكم هدا اللي كان باين لينا وللناس طبعا بس ماخفي كان اعظم..
نسرين وخديجه شبحوا للجالي ..
وهو كان يشوف لأميمه بصدمه والخوف باين في عيونه..
عمر عقد حواجبه وقال:شن قصدك!؟
شبحتله وقالت؛قصدي تعرفه كويس ياعمر..خوك الجالي مريض نفسي..
الجالي دموعه عبوا عيونه وهويشوفله بغل..
اما خواته الزوز انفعلوا وقعدوا يقولوا مع بعض..
خديجه؛شن تقولي ياتافهه ياحيوانه!؟
نسرين بصوت عالي :مانسمحلش تقولي ع خوي كلام زي هدا الزمي حدك ياأميمه خيرلك..
اميمه؛ماقلتش الا الحق..اللي حيجي يوم وتعرفه طوبى مش حيدرق هلبه..
ضحك الجالي وقال؛تعرف طوبى يامسكينه..
شبحوله خوته وهما متفاجئين..
قدملها كم خطوة وهو يقول؛تعرف..ووقف في مكانه وكمل يقول..ولأنها بنت اصل ومتربيه كويس قعدت معاي ولاكأنه في حاجه..بالعكس احترامها ليا زاد اكثر من قبل..
خواته شكوا في صدق كلامه..
وعمر كذلك كان مشكك فيه..
بس أميمه ردت وهي تقول:متوقع من طوبى الصراحه تصرف زي هدا..بس اللي مش قادرة نتوقعه ردة فعلها لما تعرف بعلاقتك بنجاة...
صاعقه ونزلت عليهم كلهم..
عمر اللي مايعرفش..
وخواته اللي يعرفوا ومدرقين..
وهو اللي فقد اعصابه من خوفه وقدملها بيضربها وهو يقول:ياعن فيتك مرة وحده..
دفه عمر بقوة وهو يقول بغضب:جالي!..
الجالي بإنفعال:ماتسمعش فيها شن تقول الحقيرة هادي..
عمر؛جالي تكلم كويس!..
خديجه؛قوللها هي تتكلم كويس اللي قاعده تفتري ع خوك وع مراة غافله ماتندري شي..
ابتسمت اميمه بتهكم
نسرين:عندك دليل ع كلامك!؟
اميمه:للأسف الشديد ماعنديش..
عمر؛عندك علم كلامك هذا تتحاكمي عليه!؟
نسرين؛بالذات لو وصل لنجاة حقها المراة ترفع عليك قضيه..
الجالي:مش غير هي حتى اني ووقتها وريني وقفتك هادي قدام القاضي..
اميمه:لأني ماعنديش دليل ماقدرتش نقول لطوبى..صدقني لوعندي خبرتها طول ووقتها انتي وريني كيف بتخلي طوبى تقعد معاك ولاكأنه في حاجه..
هز الجالي راسه وهو يتوعد فيها.
اميمه؛لكن مافي شي يقعد مدرق  حيجي يوم ويطلع ربي كل شي ويخلص طوبى حتى هي..
شد عمر يدها وقال:طلاق ماتحلميش مش حنطلقك ياأميمه..
اميمه وهي تجبد في ذراعها؛مش ع كيفك..
عمر:لا ع كيفي فاهمه..شدها من ذراعها التاني وهويقول..نخليك تقعدي معلقه طول عمرك..
اميمه بتحدي:حطلق غصب عنك..اااه..
قعد يشد ع ذراعاتها بقوة وهو يشوفلها بغضب وخوف..
وهي تتوجع..
الجالي؛عمر خليها
وعمر مش واعي لروحه كان يزيد يشد بقوة  وهي تزيد تتوجع..
لين طاحوا دموعها..
جاته خديجه فكتها منه وقالت؛ياغبي تبي تبلي روحك!
اميمه وهي تشوفله بألم وكره قالت:غلطة عمري اللي مش حنسامح روحي عليها لين نموت..
ومشت طلعت من حداهم..
سمعوا باب الحوش تسكر بقوة..
قالت خديجه؛في ستين داهيه..
"كله منك"
شبحت لخوها بتعجب..
عمر بإنفعال شديد؛حطيتي راسك من راسها لين طفشتيها..تريحتي!..
خديجه بتعجب:نعم!!؟ ماسمعتهاش شن قالت بكري!؟ اني اللي طفشتها ولاانت!..
مشي لطاوله وهو يقول بإنفعال شديد ؛سكري فمك سكريه..
وخدي التحفه اللي عليها وحدفها ع روشن كسر مرشه..
نسرين عيط..
والجالي جاه شده وقال؛تعالى معاي تعالي..
دفه بقوة وهو يقول:حول فوتني..حول..
ومشي طول طلع من حداهم...
نسرين بنبرة باكيه؛الله يسامحك ياخديجه الله يسامحك..
خديجه:مصرين تحطوها في راسي!؟
الجالي؛وهو البلي مايجينا كان من تحت راسك..
ومشي طلع حتى هو..
وهي تبع فيه بعيونها المصدومه وتقول:لاانت بريء ياجالي مايجيش من وراك بلي بكل!...تي اني اللي قاعده نرقع قي خوارقك..
سمعت باب الحوش انخبط بقوة..
شبحت لنسرين وقالت؛توا طلع البلي مايجي كان من تحت راسي..!
تعرفي اني الكلبه..اني..ياريتنا خليتها تتقربع ع روسكم وان شاء الله تخلو..
ومشت بتطلع من الحوش..
ونسرين مشت وراها وهي تقول؛تي غير راجي ياخديجه..مايجيش هكي راهو...
🍃وفي هالوقت..
اميمه كانت في الشقه تلم في حاجتها بش تاخد حاجاتها المهمه..
لمتهم كلهم في شنطه..
وخدتها وطلعت بيها من الشقه..
وكانت تتحرك بتوتر واستعجال خوف من عمر يجيها...
🍃وصلت بشنطتها لوطا..
قعدت تجر فيها وهي تمشي بسرعه..
وين وصلت للجهة الاماميه من الجنان..
طلعوا خديجه ونسرين من الحوش..
وقفت خديجه في مكانها لما شافتها جايه بشنطتها..
ونسرين حتى هي قعدت واقفه تشبحلها..
كملت اميمه طريقها وهي تحاول تتجاهلهم..
وخديجه كبدها عليها دم.. فوق الكلام اللي قالاته عنهم..تهزبت من خوتها بسببها..
مشتلها بإندفاع ونسرين بخوف تنادي؛خديجه!
اعترضت خديجه طريق اميمه وقالت:جيبي الشنطه نشوف شن فيها..
اميمه وهي منزعجه دفتها بيدها وقالت:حولي غادي..
شدتها خديجه من ذراعها بقوة زادت وجعتها وهي تقول:جيبي جاي الشنطه خيرلك..
نسرين بخوف:ياخديجه ربي يهديك خليها تطلع وفكينا من العار رانا في الجنان..
خديجه وهي تشبح لاميمه؛تندري عليها شن داسه في الشنطه مرات مشطه حاجه من هني ولا من هني مش جديد عليهم..
وتنزل خدها صفعه من قوتها حست بدوخه..
حطت نسرين يدها ع فمها بصدمه وهي تشوف لاميمه كيف واقفه تشبح لخديجه بنظرات حقد بعد ماضربتها..
وخديجه تشوفلها ونظرات الغضب سيطرت ع عيونها..
ردت لأميمه الكف بقوة..
وشدتها من وشاحها وقعدت تضرب فيها بغل وهي تقول..
تضربيني اني!!..اني تضربيني..!؟
وهي تعاود وتكرر في نفس الجملتين وتضرب فيها..
واميمه تحاول دافع عن نفسها وتخلص روحها منها بس ماقدرتهاش خديجه كانت قويه هلبه..
طيحتها ومستمرة تضرب فيها..
واميمه تحاول ترد..
ونسرين واقفه في مكانها مش قادرة تتحرك من الخوف..
خافت لو دخلت بش تحز تجيها ضربه بالغلط وهي حامل..
وتحت ايدين اختها..
فقدت اميمه كل قوتها فجأه ومعاش قدرت تقاوم..
حست بكل شي فيها قاعد يتخدر تدريجيا...
نسرين لاحظت ان اميمه معاش قدرت تقاوم..
انجبرت تدخل بش توقف اختها اللي قاعده تضرب بدون وعي..
شدتها وقعدت تجبد فيها وهي تقول:حولي عنها قتلتيها حولي..
خديجه بغل؛خليني نقتلها الجربه هادي..تضربني اني..اني تضربني..
نسرين بعصبيه؛ياسرك هبال ياسر فيقي ع روحك..
وجبدتها عنها..
واميمه اللي كانت حاسه بألم رهيب اسفل بطنها..
وعيونها بدوا يشوفوا في المنظر يظلم شويه شويه..
نسرين وهي ترعش:اميمه.!
وخديجه استاقظت لروحها شن درات قعدت تشبحلها بخوف..
بنبرة صدمه نسرين قالت؛شن هدا !؟
خديجه شافتلها بعدين شبحت وين تشبح..
شافت دم طالع من تحت اميمه...
من الصدمه حست قلبها بيوقف...
واميمه خلاص فقدت وعيها تماما وعيونها تسكروا...
نسرين بصدمه:شن درتي ياخديجه!
خديجه وهي ترعش؛ما..درت..شي..
وينفتح باب الحوش..
وخش محمد ولدي المهدي ووراه امه وهو يقولها:شن قعد يوم واحد وتبدا القرايه..
عائشه:باهي بعدين نكلمهم ونسألك..
محمد وهو يسمع في امه شاف عماته واقفات يشبحوله..وشاف اميمه وهي طايحه ع الارض وفي جنبها شنطتها..
جمد من الصدمه..
وعائشه سكرت باب الحوش والتفتت ع ولدها شافت حالته..
شبحت وين يشبح توسعوا عيونها ع الاخر بفجعه وهي تقول:اميمه!!..
قامت خمارها ومشتلها بسرعه وهي تقول:شن صارلها..حي ياربي!..المراة تنزف...!
نسرين وهي ترعش خايفه:تعاركت هي وعمر مش عارفه شن صارلهم..لما طلعنا لقيناها هكي..
من كلام نسرين اللي مش مفهوم عائشه زبطت انها تكذب..
شافت لخديجه لقت وجهها شاحب وفمها ابيض وملامح الخوف واضحه ع وجهها..
فاتتهم والتفتت ع ولدها وهي تقول:بسرعه برا طلع سيارتي من القراج..
محمد وهو مصدوم:حاضر..
ومشي فات من حداهم بسرعه..
شافت عائشه لأميمه لاحظت آثار ضرب ع وجهها شبحتلهم وقالت:ضاربها!؟.
نسرين وهي ترعش:مش عارفه مندري..
قعدت تشبحلهم الزوز بريبه..
وهما هاربين بعيونهم عنها..
غيرت عيونها عنهم لما شافت السياره جايه..
طبست ع اميمه ونهضتها وهي تقول:وحده فيكم تساعدني..
نسرين من الخوف نست اللي فيها وجتها رفعت معاها اميمه..
عائشه وهي تشوف في الدم:شكلها كانت حامل..
نزلوا دموع نسرين وهي تقول؛شكلها..
وحاولوا يمشوا بيها الزوز للسياره ..
عائشه:تعالى يامحمد..
نزل محمد وهو يقول:نعم يام..
عائشه:معليشي ولدي الضرورات تبيح المحضورات..ارفع رجلين مرت عمك لين ندخلوها السياره..
محمد وهو محرج:حاضر..
وجي لرجلين اميمه رفعهم..
ومشوا بيها للباب الخلفي..
فتح محمد الباب بعدين وخر شويه..
وامه وعمته دخلوا اميمه داخل..
هو طلق رجليها وعمتها قعدت تساوي فيها وهي تبكي بصمت..
بعدين سكرت الباب..
وعائشه طلعت من الجهة التانيه وسكرت الباب..
بعدين ركبت القدام ومحمد ركب جنبها..
وخرت بسرعه ومشت طلعت من الباب التاني..
التفتت نسرين بتشوف خديجه مالقتهاش..
مشت بتخش داخل..
شافت للدم قلبها وجعها ع الآخر..
حولت نظرها عنه لطوبو الميه..شبحتله شويه بعدين مشت للحمام الخارجي..
طلعت منه مكنسه وسياقه وصابون..
مشت حطتهم قريب من المكان اللي فيه الدم..
بعدين مشت شغلت الميه وخدت الطوبو ومشت للبقعه وصبت عليها الميه..وبدت تبكي ..
🍃🍃🍃🍃
في الطريق.
محمد؛كان جبنالها الاسعاف خير يام..
عائشه؛لاولدي لا..فضايح ..
سكت محمد لما فهم ع امه واقتنع بكلامها..
عائشه بقلق:في حد ضاربها..
محمد؛واضح..مش قادر نستوعب ان عمي عمر يدير هكي.
عائشه:مرات مش هو..
شبحلها شويه وقال؛قصدك عمتي خديجه!..
عائشه:الله اعلم ياولدي..الله المستعان وخلاص..
سكت محمد وهو يفكر بضيق..
وعائشه كانت خايفه هلبه ع اميمه من النزيف..
زادت السرعه بش توصل في المصحه..
☘وفي هالوقت..
كانت طوبى دور ع اميمه بش بيروحوا الزوز مع مغليه لحوش العيله..
طوبى:مرت عمي ماريتيش اميمه؟
صفيه:كلمها راجلها روحت..
طوبى هزت راسها وقالت:باهي بالسلامه..
ومشت لمغليه اللي كانت واقفه في الباب..
وصلت فيها وقالت:عمتي ..
قاطعتها مغليه وقالت:خليك انتي طوبى هني باهي صار ظرف لوحده من خواتي وبنمشيلها توا والحوش فاضي مافيه حد اقعدي هني لين يجيك راجلك يروح بيك..
ومشت بسرعه..
طوبى قعدت واقفه تشوفلها وهي مستغربه..
طلعت مغليه من الحوش..
وطوبى طلعت تليفونها من جيب بالطوها..
واتصلت براجلها تطمن عليه..
🍃"خود حبيبي"
خدي الجالي مق النسكافيه وهو يقول:هي شاكه مش متأكده..
نجاة قعمزت جنبه وقالت.انت سلفي واني ارملة خوك وزي وخيتك نتعاملوا مع بعض بحسن نيه هي اللي نيتها خبيثه ومش صافيه..
ضحك وقرص خدها بعدين قالت؛ياشيطانه..
ضحكت وشربت من النسكافيه..
تنهد بعدين قال؛ع العموم افتك منها عمر مش ليه بكل..
نجاة:رافعه خشمها هلبه وتتعامل من فوق..
الجالي:ع الفاضي..
رن تليفون الجالي..
ناض شويه وخداه من ع الطاوله لما شاف المتصل بدي ع وجهه القلق و هويقول:أصصص...
شربت من النسكافيه وهي منغاظه..
وهو رد ع التليفون..
الجالي:ايوه عمري..
"السلام عليكم"
الجالي:وعليكم السلام..شن جو..
"تمام الحمد لله..وينك جالي"
الجالي؛عند واحد صاحب..
رفعت نجاة حاجبها..
"يعني امورك تمام"
الجالي:ايه حياتي تمام التمام علاش في حاجه!؟
"لامافي شي قلت نطمن عليك وخلاص...امتى بتجيني"
الجالي:بعد صلاة العشاء بساعه..تمام؟
"تمام..هي مانعطلش عليك..سلام"
الجالي؛سلام ياقلبي..
وسكر وهو يزفر بقوة..
نجاة؛لهالدرجه خايف تخسرها كان نعرف شن دارت فيك يامرشرشه يامشربه ياموكله..
الجالي:اني جايك بش ننسى النكد بتنكدي عليا حتى اني خل نوض نروح خيرلي..
نجاة:اقعد في مكانك وانت ماصدقت..
حطت المق وناضت وهي تقول:خل نمشي نشغل حاجه حلوة نهيجوا عليها..
الجالي:ياعيني عليك يارايق نموت فيك يامريحني..
هي ضحكت ومشت للمنظومه بتشغلها وهي تفكر..
"عطيك مايلهيك عني ياخديجه العمر كله"
🍃🍃🍃🍃🍃
وخديجه في شقتها..
في دار النوم..راقده ع السرير وغامه روحها بالورغان والخوف مسيطر عليها..
اللي داراته جريمه حتوديها في ستين داهيه..
لكن..
🍃مغليه:مش حتقولي ولايطلع منك شي يانسرين..لو طلعت منك حاجه حليبي اللي رضعتهولك حرام عليك..
نسرين ودموعها ينزلوا:مستحيل يام تطلع مني حاجه..بس توا قوليلي شن بيصير شن بنقولوا كان سألونا كان سألنا عمر يام..
مغليه شبحت للروشن المكسور وقالت؛اتصلي بخالتك صفيه..
نسرين:علاش!..
مغليه:اتصلي توا بسرعه وقوليلها امي تبيك ضروري..
نسرين هزت راسها وقالت؛حاضر...
🍃واتصلت نسرين بصفيه وقالتلها كلام امها بالحرف..
وصفيه وقلبها في رجليها جتهم تجري من غير ماتخبر حد..
☘صفيه بخوف:شن في يامغليه ياوخيتي ان شاء الله خير!
مغليه تنهدت وقالت:شوفي ياصفيه..حني لما جيناكم وخطبنا  بنتك لولدي كنا نشوفوا فيها متربيه كويسه محترمه مؤدبه ويعلم الله قداش كنت فرحانه بيها..فرحتي هادي ماتمت ياصفيه بنتك طلعت عكس اللي كنا نشوفوا فيه عليها..قليلة ادب..لسانها طويل..تعاند وتسكر في راسها وتبي تمشي كلمتها بالسيف..
صفيه بصدمه:اميمه بنتي اني!؟
مغليه:ايه بنتك ياصفيه..يومها طلقت عليا لسانها وماخلت ماقالت وفوقها وهي تكشخ وتعلي في صوتها..وطوبى وعيشه شهود..
نسرين:تكشخ حتى هي في وجوهنا حني ياخالتي صفيه ورافعه خشمها واسلوبها زي الزفت..
مغليه:وكله كوم واسلوبها مع راجلها كوم تاني لاتحترم فيه لاتسمع في كلامه..
نسرين؛بكري نقوللها راجلك قالك روحي قالت نكمل اللي عندي بعدين نكلمه!؟
مغليه:مش هكي وبس..موضوع خدمتها لنصافات الليل مش طايب عليه مافيش راجل يرضى بيه وضعها ووين جي ناقشها فيه طولت لسانها وماخلت ماقالت..
صفيه بصدمه:معقول اللي تقولوا فيه هدا بنتي اني يطلع منها هدا كله!؟
مغليه؛ايه ياصفيه واكثر من هكي بعنادها دارت مشكله كبيره مع راجلها ومش معروف السبب قالوا البنات بعد كملها وروحت خداها لشقتهم..
نسرين:سمعنا اصواتهم وهما يتعاركوا ومش عارفين ع شني بالزبط عمر كان واصلتله لوين وين منها وماباش يقول علاش..المهم بعد مااختفي طلعنا بنركبوا نشوفوا شن صار..
وين طلعنا..
لقينا اميمه طايحه مغمى عليها وحداها شنطه كبيره..
صفيه بفجعه:حي عليا شن دار في البنت!؟
مغليه:تقولك طلعوا لقوها طايحه في الجنان وشنطتها جنبها كان ضربها في الجنان راهو سمعوهم..
صفيه وهي ترعش ودموعها ينزلوا:مالا خيرها ووينها توا وين بنتي!؟
بلعت نسرين ريقها وقالت:روحت عيشه مرت المهدي في نفس الوقت اللي لقيناها فيه بهديكا الحال
رفعوها هي وولدها للمصحه..
خبطت صفيه ع رجليها وقالت؛يانهاري الاحرف!..
مغليه:اني جبتك وخبرتك باللي صار كله بش تكوني ع بينه ياصفيه يعني كان صار ماصار ماتقوليش كيف هكي!؟
ناضت صفيه وهي تبكي ومشت طلعت من حداهم..
ناضت وراها نسرين لقتها طلعت من الحوش..
بدت تبكي..ومشت خشت لأمها وهي تقول:وجعتلي قلبي..ااه منك ياخديجه ااه خلتينا نديروا اللي مايندار..
نزلوا دموع مغليه وهي تقول:زعمه حق كانت حامل ولاغير نزيف وخلاص..اتصلي بعيشه انشديها..
رشفت نسرين وقالت:حاضر...
🍃🍃🍃🍃🍃
وفي حوش لطفي الواعر..
في نفس الوقت..
كانت آلاء مقعمزة في المخزن تكلم في وليد..
معاش تكلمي معاش تفوت من ركني فوتني خلاص فوتني..
"ياعمري غير اهدي وامي هادي تو نعرف نتصرف معاها'
آلاء:ولي...
سكتت فجأة لما انجبد التليفون من يدها..
رفعت راسها وهي تشوف بصدمه..
سدرة؛اسمع انت قسما بالله كان مازال تكلمها مرة لانحرش بوك ولاجدك..للردع طول قسما بالله نخليهم يطبوك وتقعد شهر ماتشوفش ضي الشمس ومش تقول هادي تهتري انت جرب كلمها مرة تانيه وشوف شن يصير فيك ياعديم الربايه..
وسكرت عليه..
وشدت آلاء من شعرها ونهضتها وهي تقول:والله ياآلاء والله بكسر الهاء ياآلاء كان ماتعدلتيش ورجعتي لعقلك نخلي مهند يسيبك ونخليهم يعطوك لشيباني نديد جدك واظني عارفه كيف نخليهم يديروا هكي..
آلاء وهي ترعش:خالتي بالله اسمعيني خل نفهمك..
سدرة بصوت عالي:ضمك فمك..
انتفضت آلاء من قوة الصوت وقعدت ساكته..
سدره:اطلعي قدامي..ودفتها بقوة..
آلاء:التليفون..
سدرة:مافيش تليفون الليله..هيا اقلبي وجهك..
مشت الاء وهي معصبه وخايفه في نفس الوقت..
وسدرة طلعت وراها وسكرت المخزن..
ومشت نزلت وراها..
وين وصلوا تلقتهم مطيره وهي تقول:سدرة اميمه في المصحه ياسدره..
الاء وسدرة انفجعوا وقالت..
خيرها!؟
مطيرة بألم؛رمت ياروحي عليها..
🍃"رمت!؟"
نسرين وهي تبكي:ايه يام ايه بنتك قتلت روح يما..
مغليه وهي تبكي؛اسكتي معاش تقولي هكي..
نسرين ببكي؛تو تفيق يام وتقول شي بعد تعرف اللي صار فيها وتو تشكي في بنتك تستاهل مايصير فيها بنتك هادي تستاهل..
مغليه بنبره باكيه؛ياروحي ع عمر لما يعرف..فنصت عيونها وقالت..كان عرف شن يدير في اخته يانهاري الاسود!
ياربي لطفك ياربي الطف بينا واستر علينا...
🍃🍃🍃🍃
ومن وسط العاصفه اللي صايرة في حوش شنيبه..
لحوش جارهم ونسيبهم الصيد..
وصدمة نجمه وهي تسمع في نجاح بنتها شن تقول..
نجاح؛عمليه تافهه عمليه منظار لافتح ولاجرح يحولولي الكيس ونفتك..
نجمه بصدمه:معقوله يابنتي تقوليلي توا بس!
عواطف؛ قبل ولا توا  يام ماتفرقش..المهم عرفتي..
نجاح؛يام والله عاديه صدقيني ماتخافيش..
مسحت دموعها وقالت:بنمشي معاك..
ابتسمت وقالت؛حتى اني نبيك تكوني معاي..
عواطف ابتسمت وقالت؛قولي الحمد لله يام هكي ولااكبر..
رشفت وقعدت تقول؛الحمد لله..الحمد لله...
🍀الحمد لله دائما وابدا..
في كل اقداره خير..
اللي داراته خديجه في اميمه كان خير ليها..
خلصها من اي رابط يربطها بعيلة الشنيبه اللي كرهتهم كلهم من صغيرهم لكبيرهم...
بعد ماداورلها عمليه بكم ساعه..
فاقت وعرفت باللي صار معاها..
🍃سدرة:خيره وجهك أميمه..قوليلي مافي حد غيري معاك هني..عمر ضاربك..
اميمه غمضت عيونها بتعب ودموعها نزلوا..
سدرة:اميمه قولي ياوخيتي شن اللي صارلك ريحي قلبي وقلب امك..ريحي قلوبنا كلنا..حسين قريب هبل لما قالتله الدكتورة انك منضربه وجدي تعب ياأميمه
اميمه بنبرة ألم:مانبيش ندوي سدره ولانبي نسمع شي نبي نرقد بس..
تنهدت سدرة بحزن وهي تشوفلها..
☘وبرا..
صفيه مقعمزة تبكي..
وحداها مطيره تهدي فيها..
وطوبى هي وبوها واقفين ع علي الواعر وهما يحاولوا يهدوه..
طوبى بحزن:والله ياجدي مانعرف حاجه كل وحده فينا ماتعرف شي عن حياة التانيه راهو ولا نسألوا في بعض عن شي..
علي:كيف هكي يابنتي كيف..راكم بنات عم خوات..معقوله ماتعرفوا عن بعض شي..
لطفي:خصوصيات يابوي مايجيش يدخلوا فيها هما تربوا ع هكي..
علي بغضب؛اللي نعرفه انها لهداكا الكلب ماعاد موليه..
بدت ع وجهه طوبى ملامح الاسف..
لطفي:بوي صل ع النبي..
علي:عليه الصلاة والسلام..واني قاعد ع كلمتي..هالبصطاردي وينه لتوا خيره ماجاش يشوف شن صاير في مرته..ماليه وينهم ماريت منهم حد..شن معناه هدا يالطفي.!؟
سكت لطفي وهو مضايق..
وطوبى جنبه تشوف لصفيه كيف تبكي وقلبها موجوع عليها..
🍃🍃🍃🍃🍃
"اني مش طالع من هني لين ولدك يروح ونتفاهم اني وياه'
محمد شنيبه:حسبي الله ونعم الوكيل..حسبي الله ونعم الوكيل..كلمه شوفه وينه يامهدي!؟
المهدي وهو معصب:تليفونه مسكر..
محمد:لعنة الله عليه هي باهي..
حسين:شوف يامهدي تليفونه مسكر مكسر..اني من هني مش متحرك..
المهدي؛شن تحسابني نكذب عليك خايف منك!؟
حسين؛خايف ع خوك..
المهدي؛حسين اني مقدر وضعك تمام..لكن ماتنساش انك في حوشنا بتكتر ع ماوصوك ماتلوم الانفسك..
حسين قعد يشبحله بعصبيه وهو ساكت..
محمد؛حسبي الله ونعم الوكيل..
فجأة..
سمعوا صوت باب القراج انفتح.
محمد؛هو ناض المهدي ومشي طلع وحسين ناض ومشي وراه..
ومحمد شنيبه لحقهم وهو خايف ومتوتر..
طلعوا برا..
ومشوا جهة القراج..
وهو طلع منه..
شافهم جايين ناحيته..
لما شاف حسين دب في قلبه الرعب..
وحسين بعصبيه قدمله وهو يقول:ضارب اختي انت..تحسابها صنعة راجل ياعيل..
وجي بيشده..المهدي شد يده وبعده وهويقول:وطريقة التفاهم هادي للمفرخ..
غمض حسين بشده وهو يحاول يتحكم في اعصابه..
محمد شنيبه بغضب:ماد يدك ع مرتك انت!؟
عمر وهو يتفكر في اللي صار قال ؛ماضربتهاش ومانديرهاش..صار بيني وبينها نقاش لااكثر..
حسين بإنفعال:تي كيف  نقاش بس والدكاتره طلعوا تقرير انها منضربه...
عمر بصدمه؛دكاترة!؟
المهدي وهو عاقد حواجبه بغضب:ضرب مبرح خلاها تخسر العيل ياعمر..
انصعق من اللي سمعه قعد مصموت وهو يشوف لخوه بعيون شاخصات البصر..
حسين قدمله بإنفعال وقال:كيف دير هكي كيف..
شده من جاكيته..
المهدي بعده وهو يقول:حسين..
بعصبيه قال:تي حول ياراجل حول هادي اختي الوحيده اختي تنضرب ويصير فيها ماصار وتبيني نكتف ايديا ونتفرج!؟
المهدي:حقها اني ناخده ياحسين..
حسين:حق اختي ماياخده حد غيري يامهدي..واسمع جاي انت..اميمه امسحها من دماغك معاش في اميمه خلاص..
محمد:ياولدي صل ع النبي هادي مش طريقة تفاهم !
حسين؛ولدك ماخلاش فيها تفاهم ياعمي محمد..
ومشي طلع من الحوش وجبد وراه الباب بقوة..
التفت المهدي لعمر وقال بغضب:ضاربها انت!!؟
عمر وهو مصدوم:ورب العزة ماصارت...ايه صار بينا مشكله وتناقشنا لكن طلعت وخليتها بعدين..
محمد:تي مالا مرتك من ضاربها!؟
عمر بآنفعال:مانعرفش يابوي مانعرفش..وينها هي وين؟
المهدي:في مصحه القدس...
ولى بسرعه خش للقراج..
محمد؛امشي معاه يامهدي..
المهدي مش لحقه..
ومحمد شنيبه يقول:واني الليله والله ماني راقدها قبل لنعرف من ضربها..ومشي خش للحوش..
🍃🍃🍃🍃
في المصحه..
كانت اميمه في جناحها راقده ع جنبها الايمن بروحها..
تشبح في الفراغ ودموعها ينزلوا..
تتفكر في اللي صار كله وكأنه كابوس..
متمنيه تفيق منه بأي شكل...
☘وبرا..
جدها ومعاه لطفي ويوسف وصفيه ومطيره مقعمزين ع الكراسي وهما في حالة يرثى لها...
🍃اميمه رقدت ع ظهرها وجت بتنادي امها تخشلها..
فجأه..
سمعت صوت عركه برا..
🍃علي الواعر ولطفي ويوسف شادينه؛برا اقلب وجهك ياحلوف..
عمر والمهدي وشاده:مرتي هادي مرتي وبنخش نشوفها..
علي دف عنه يوسف ولطفي وهويقول؛لما تلحس ظهرك..
عمر:راجل كبير ومانبيش نقلل من احترامك..
يوسف؛ترا جرب ديرها!..
لطفي:مهدي خلي خوك يشد لسانك احسنله..
المهدي:عمر تعالى معاي..
عمر:مانيش متحرك من هني قبل لنخش لمرتي..
علي:ع جثتي..
من بعيد شويه..
صفيه وهي دمع:هو راجلها في النهايه مايقدروش يمنعوه يخشلها..
مطيره؛علاش سماه راجلها ..راجلها بش يحميها من كل شي يضرها حتى نفسه..اللي يمد ع مرته معاش يولي راجلها صفيه..
وصفيه تشوف لعمر وهي تتفكر في كلام مغليه..
جي أمن المصحه ومعاه واحد من الاداريين وطلبوا من الرجاله كلهم يطلعوا برا...
وطلعوا كلهم وعمر طلع بالسيف عليه..
🍃قدام المصحه..
علي:والله مانقعد ع ذمته والله..
لطفي بضيق:حاضر يابوي اركب بس..
ركب علي الواعر وهو يسب في عمر..
اللي ركب سيارته وهو يقول؛تعرف يامهدي كان تطلع خديجه دايرتها ياويلها مني..
المهدي:ياويلها منا كلنا...
🍃"معاش نبي تشوفها بنتك هادي معاش نبي نعرفها..تبي تفضحنا ودير العار عقاب الوقت"
مغليه وهي تبكي بخوف:هدي روحك توا يرقى عليك الضغط..
محمد شنيبه بإنفعال:اني بنموت في جرة ولادك هادم بنموت..
هدا عمر هكي..مالا الجالي كيف!؟ شن درت اني بس شن درت..كيف غاب عقلي وطاوعتك وخديتله بنت كيف!؟
ومغليه تشوفله بخوف ودموعها تنزل...
🍃الجالي..
وااخ من الجالي..
عطل ع طوبى ..تتصل بيه مايردش عليها..مااتصلش بيها بكل وقلبها واكلها من الخوف..
طويى بقلق:ياربي وينه هدا وينه..ناقصين رعايش.!.
اتصلت بيه لأخر مرة...
🍃وتليفونه كان في يده نجاة..
تشوف فيها تتصل ومبتسمه بمكر..
بعدين قالت؛خل نلعبوا معاها شويه..
فتحت الخط وقرباته للجالي اللي كان راقد ويشخر..
🍃طوبى سمعت صوت وقعدت تقول:آلو..جالي...آلو..
سكتت وهي تسمع...فجأة فصل الخط..
نزلت التليفون وبعدت تشبحله وهي مش فاهمه شي..
عاودت اتصلت بيه تاني..
نادى لين فصل...
نزلت التليفون وهي تقول:شن معناه هدا!؟
حطت التليفون ع الطاوله متاع الكوجينه..
وقعدت مع روحها تفكر والقلق والخوف والشك ماليين قلبها...

#اواخر_الشتا
#طوبى

....يتبع....