طوبى الجزء الاول

تابع

# طوبى "شارع القهوة"
#جمان_فريد
#الجزء_التاسع_والعشرين" عاصفه فبراير2"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
خلوهم كل واحد في مكان لساعات..
كل مكان كان مغلق ومظلم..فيه فتحه تخش منها تهويه..
كانوا قاصدين هالشي بش يلعبوا بنفسياتهم ويخوفوهم..
وهما غادي..
في حوشهم..
مغليه ببكي:مانيش عارفه ياوخيتي علاش..الحاج محمد قال نشدوني ع عمر..
اميمه لما سمعتها شن قالت حطت يدها ع قلبها وهي خايفه..
مطيرة:عمر!
سدرة:واضحه زي عيون الشمس..
خديجه؛شني اللي واضح!؟
سدرة؛عمر وين قاعد توا ياخديجه؟
نسرين؛في قطر..
سدرة:وقطر مش هي اول من دعم اللي صار في مصر وتونس وتوا اللي ينادوا بيه بش يصير في ليبيا!
مغليه بصدمه:نهاري اسود!
•••برا
حامد؛مش هما بس نعرف ناس عندهم من قاعد برا اللي في فرنسا واللي في بريطانيا..واللي في قطر حتى هما شدوهم وحققوا معاهم..
لطفي:الولد ماشي يقرا من قبل ماتصير هالمعمعه..
حامد:هما توا عندهم الكل في دائرة الاشتباه المظلوم في جرة ظالم..
يوسف:قعدته في قطر بحد ذاتها جنايه..
حامد:هو هدا..
وعلي واقف معاهم ويسمع فيهم وفي فمه كلام مش قادر يقوله..
مهما يكون البنادم شجاع وعنده مواقف جريئه ضد الظلم لما يلقى الوضع واصل لدرجة عليه من الخطورة ضر حتى اللي حواليه مجبر يقعد ساكت..
••داخل..
مغليه وهي تبكي وتندب:ياحليلي اني كيف بيصير فينا ياويلي ويل ياظلام الليل..والله ماكنت نبيه يسافر هو اللي شد في السفر..
خديجه التفتت ع اميمه وعطتها نظرات حاده..
واميمه ارتبكت من نظراتها وغيرت عيونها المليانات دموع عنها..
سدرة:تو انتم مش عندكم معارف في الدوله حاولوا معاهم بالك يديروا حل..قولولهم الولد ماشي يقرا من 2010..
نسرين؛ايه صح نعرفوا نساوينهم يام ياما مشوا علينا وجو..
خديجه:ومن قال يرضوا يستقبلونا الوضع حساس توا.
مطيرة؛انتوا حاولوا وربك يفرج..
مغليه رشفت وهي تقول:باهي خل نمشولهم توا..
نسرين؛معليشي يام راجي ساعتين تانيات..
مغليه مسحت ع رجليها وقالت؛ااه ياربي غير شن بيصبرني بس...
☘☘☘☘☘
"حول من قدامي هادوا جيراني ونسابه فوقها تبيني نسيبهم وهما فهالحال"
الصيد؛ماناش حمل البلي اللي بيصير يامراة الوضع توا يخوف والعيون مفتوحه ع الناس كلها..
نجمه بصدمه:شن تقول انت ياراجل!..عيت الواعر اللي عندهم ولد عسكري كلهم مع بعضهم مشولهم..
محي الدين؛وهاك بروحك قلتيها عندهم حد..
نجمه؛مصح وجهك كلاانت والله ماتستحي ياما وقفوا معاك ودارو فيك خير نساباتك هادو نسابك جدود صغارك..
محي:توا طاح فيهم الغلا يام ماك كنتي تكرهيهم!
الصيد:فكوني من قطاف زايد..واني كلمه وقلتها مافيش مشي وبري خشي داخل.
نجمه بعصبيه:لاحول ولاقوة الا بالله...لاحول ولاقوة الابالله..
ومشت خشت داخل..
وفاتت من حدا بناتها اللي كانوا يشبحوا لخوهم محي بإزدراء..
☘☘☘☘☘
"ولدك غادي شن قاعد يدير"
محمد بلع ريقه وقال:قتلك ماشي يقرا غادي..
~~~~~~
المهدي:انتم ادرى..
بصوت عالي؛جاوب ع قد السؤال ياحيوان..
المهدي قعد يشبحله بحده وهو ساكت..
جاه وشده من مقدمه شعره لقصد الاهانه وقاله؛خوك شن قاعد يدير غادي..
المهدي؛يقرا..ماشي يقرا..ولو يدير في شي تاني انتم ادرى بيه مش عندكم مخابرات مايفوتهم شي..
طلقه بقوة وقعد يشبحله بحده..
والمهدي يشوفله بتحدي..
~~~~~~
الجالي:مادام عارفين انا نتراسلو معناها عندكم علم باللي يدير فيه..
:علاش مااختارش غير قطر..
الجالي:بلاد عربي وفيها هلبه ليبين في تخصصه مرتاحين غادي..
:تعرف ان خوك ليه علاقه بالناس اللي تنادي بالتمرد والمظاهرات متاع17\
الجالي ابتسم تهكما وقال؛قلنا انتم ادرى..
~~~~~~
نضال؛مانصدقكش خوي ماعنداش في السياسه ولايحبها وبعدين اني نعطيك معلومه اللي مشاله حكايه السفرة متاعه *******..وحني عيله ماننكروش الجميل..
:لسانك طويل..
نضال؛علاش شن قلت!
قعد يشوفله وهو يهز في راسه بوعيد..
☘واستمر معاهم التحقيق لساعات..
كان يتبادلوا فيهم المحققين وكل واحد يكذب في المعلومات اللي يعطي فيها اثناء التحقيق من باب الاستدراج.
المهدي كان يحاول ضبط اعصابه وكذلك نضال..
وبوهم كان باين فيه الخوف..
بس الجالي كان يستفز فيهم لدرجه انهم ضربوه..
بعدين خلوهم في نفس الغرف برواحهم لساعات وكل مالهم يزيدوا يتوتروا واعصابهم تتلف..
☘☘☘☘☘
"ماله ومالهم ولدي يخش فيهم!؟"
لطفي:يشوف الموضوع يفهم اللي صاير..
عبد المطلب:لالالا مادخلاش بيهم يقعد بعيد عنهم..
علي:عنده الحق يالطفي الوضع مش مزبوط توا عيونهم ع الكل وبعدين مش حيفرقوا بين تريس ونساوين..
لطفي قعد ساكت وهو يفكر في كلامهم وشبه اقتنع بيه..
~~~~
فايزة:من لما صارت هالاحداث واني حاطه في بالي الحاجه هادي..
سدرة؛يستر الله وخلاص..
طوبى:باهي توا زعمه شن يصير..
مطيرة:الله اعلم يابنتي..
صفيه؛اني من رايي معاش لينا بيهم علاش..
كلهم شبحولها وهما متفاجئين ومنهم بنتها..
صفيه:ماتشبحوليش هكي مانبيش ولدي يضرر من وراهم. سدرة شبحت لأميمه بعدين لصفيه وقالت:شن دخله حسين يامرت عمي..
صفيه:هو اللي دخله ياسدرة نسيتي خوك شن يخدم..
سدرة:لامانسيتش لكن مالاش علاقه حني جيران قبل يخش العسكريه..
صفيه؛والله اللي يبي يواصلهم يمشيلهم من حوشه..
انصدموا في كلامها..مغزاه كان واضح..
مطيرة:باهي باهي ياصفيه..
ومشت طلعت وبعدها طلعوا سدرة وفايزة وطوبى..
اميمه بصدمه؛خيرك يام شن جاك..
صفيه وهي معصبه ومتوتره:انتي بالذات تسكري فمك وتسكتي..
ومشت وخلتها مصدومه فيها ع الاخر..
🍀🍀🍀🍀
وعدوا يومين..
ومازلوا محمد وولاده معتقلين..
برغم من محاوله نسرين ومغليه انهم يتوسطولهم عند ناس واصلين في البلاد بس ردوهم وقالوا مانقدروا نديروا شي..
ومن الشارع كله..
ماكانش في حد مدورهم الالطفي الواعر والدكتور اياد وولده اللي كانوا يشوفوا في طلباتهم..
ونسيبهم حامد اللي ماخلاهمش بكل..
اما محي فكان طالع منها ع خاطر مصالحه ومشاريعه كان يبي يكسب الاطراف التانيه اللي مصلحته معاهم وفي نفس الوقت حصلها فرصه فيهم..
خديجه ؛تي من خلاك بنادم غير بوي وخوتي..
شدها من ذراعها بقوة وقال:فمك هدا تسكريه مانبيش نسمع حسك خير ماندفنك في مكانك وبعدين وريني كان مازلتي تقدري ديري حاجه انتي وباباك وخوتك..
نزلوا دموعها وهي تشبحله بحده..
هو طلقها وقال تهكما:بوك وخوتك ..
وهي تتحسس في ذراعها وتشوفلها بنفس النظرات..
☘☘☘☘
والحراك ضد النظام بدي من قبل يوم 17\
بدي من الوقفه الاحتجاجيه للمحامي ضحايا سجن بوسليم..واللي انتهت بإعتقال ابرز من قام بيها..
وهني ناضت مدينه من مدن الشرق..وكانت اول من قام بهدم معالم النظام ع اراضيها..
وبدت الاذاعات الاخباريه تنقل في اللي قاعد يصير..
لعند ليله 17 فبراير..
المباراة اللي في الشرق..تحولت لمظاهرة ضد النظام..
وهدا كله كان قبل اي تدخل اجنبي...
☘واقفين بعيد عن المظاهره وهما يتفرجوا عليها..
عبد الله:مش مصدق اللي نحق بعيوني الليبين طالعين عليه ويهتفوا ضده..!
وعبد القيوم واقف حداه ويتفرج عليهم بنظرات عيون كلها قلق..
واحد معاهم:بنعدي معاهم..
عبد الله:معاك..شبح لعبد القيوم وقال..وانت..
حرك راسه بالنفي وقال:مانخشش في حاجه مش عارفه اولها من اخرها.
؛اها قصدك وضع البلاد عاجبك راك  من الكفره وجيت لبنغازي وريت الناس كيف عايشه وحتى طرابلس عديت وشفتها بعيونك مافي خير في ام الخير..
عبد القيوم:وشن عرفني ان اللي قاعد يصير بيرفع البلاد للأحسن!..ماهو ع ايام السنوسي قالوا الليبين نفس الكلام بعد انقلب عليه ورينا البلاد شن صار فيها..شن دراني ان اللي قاعد يصير توا مش حيودر البلاد اكثر من قبل..وبعدين هو تحسابه كيف زين العابدين ولامبارك بيخليها هكي بالسهل..وحق الله ماهو مسيبها هدا كان سيبها الا بالدم..
صحابه رجعوا شبحوا للمظاهرة وهما ساكتين وشبه اقنعهم كلام عبد القيوم..
عبد القيوم:انا مروح..
ومشي..
وهما شبحوله شويه..بعدين لحقوه..
☘☘☘☘☘☘
واستمرت الاحداث في التسارع...
لعند ماقامت انتفاضه في الشرق كامل...
تبعتها انتفاضات في مدن الغرب الليبي مناصرة ليهم..
وصار الشي اللي ماكانوش الليبين يحلموا نهار انه يصير
الخروج ع نظام حكمهم بيد من حديد سنين طويله كان مخوفهم من انهم يقولوا ارائهم بينهم وبين انفسهم خوف من ان حيوط المكان تخبر عليهم..
وطلع الشرق الليبي عن سيطرة النظام بالكامل...
وهدا ماشجع اهل طرابلس انهم يطلعوا حتى هما...
وطلعوا...
وكان من ضمن الموجودين في المظاهرات..
اياد..وخوت الفاندي...
☘☘☘☘☘
"اطلعوا روحوا اطلعوا وماتجوش لين نبلغوكم"
طلعوا طلبه الطب اللي كانوا يحضروا في كورس في احد المعاهد..
منهم اميمه وداليا واسامه..
داليا بخوف؛توا كلمت خوي قال خايضه برا..
اميمه بقلق؛يارب سترك..
طلعوا برا المعهد..
داليا جاها خوها بس قبل لتروح:نروحوا وراك..
اميمه؛لالا طريقكم بعيده عن طريقنا..
داليا:مش مشكله نوصلوك بعدين نروحوا ..
اميمه:ماتندروش شن يصير في الطريق بعدين..
"اني نروح وراها"
اميمه بضيق؛لااسامه بالله عليك تو نروح مايصيرلي شي..
اسامه؛والله مانك مروحه بروحك..قدامي اميمه..
اميمه هزت راسها بإستسلام وقالت؛سلام داليا
داليا:لما توصلي كلميني ..
هزت اميمه راسها وقالت؛في امان الله..ومشت..
داليا:في حفظ الله...
☘اميمه كانت خايفه ماقدرتش حتى تكلم خوها يوسف يجي يروح بيها خافت عليه من الطريق..
ومابتش تمنع اسامه انه يروح وراها اساسا طريقه ع طريقها☘
وتحركوا الزوز ورا بعض..
هو كان متوتر وهي كانت خايفه..
في البدايه سمعوا صور سيارات شرطه.
بعدين سمعوا صوت ضرب رصاص..اميمه عيطت وهي تسوق..
اول مرة في حياتها تسمع هالصوت..
رن تليفونها خداته قدامها كان ع الدومان..
خداته وشافت المتصل..فتحت عليه وفتحت المايك ورداته في مكانه..
اميمه:مروحه في الطريق..
"خوك توا جايك"
اميمه؛لايام مش لازم قريب نوصل..
"اهو جايك بيلاقيك في الطريق"
اميمه:باهي اني قريب نوصل في*****
"تو نقوله..في امان الله بنتي"
سكرت امها..اتصل خوها
خدت التليفون وفتحت الخط والمايك وهي تشوف للطريق..
رداته في مكانه وقالت؛ايوه يوسف اني قريب نوصل******
"تمام قريب نلاقيك"
اميمه؛زميلي مروح وراي يوصل فيا يوسف .
"تمام تمام"..وسكر.
وهي قاعده تسوق..
سمعت صوت رصاص..صلي ورا بعضه..
اميمه بخوف وهي قريب تبكي؛ياربي لطفك يارب..
وصلت في الطريق اللي بتلاقي فيها يوسف لقاته قدامها..
وقفت ووقف وراها اسامه..
نزل اسامه المرش وركز بنظره ع يوسف ا اللي حياه وقاله؛بارك الله فيك..
حياه اسامه وقاله؛فيك بارك الله..
شبح يوسف لأميمه وقال؛هيا..
مشت اميمه وخوها وراها..ولحقهم اسامه..
وصل اسامه لحوشهم هو الأول..
وبعد طول مسافه..
وصلوا اميمه ويوسف لشارع القهوة..
~~~~~~~
اميمه؛قعدت نسمع في صوت سيارات الشرطه بعدين صوت رصاص قريب متت من الخوف..
علي:توا جايبين في الاخبار قالوا في موتى..
صفيه:اللي طلع يستاهل من قاللهم يطلعوا..
اميمه؛علاش يام هما شن داروا!
صفيه:ماشفتيهمش شادين عصي وسواطير ناويين الخراب..
علي:كان هدا يقابلوهم بالرصاص ويصفوا دمهم!
عبد المطلب؛اللي يبي يخرب ويدمر هدا مصيره..
اميمه ماعجبهاش كلامهم قالت؛تصبحوا ع خير..ومشت لدارها..
صفيه:ماعجبهاش الكلام ماهو كلام حق..
يوسف تنهد وقال؛تصبحوا على خير..
عبد المطلب؛سيف سيف يتكلم..
مشت تجري صفيه خدت الريموت وعلت الصوت...
☘☘☘☘☘☘
"اقسم بالله يام ماليا علاقه بشي اصلا اني حاجز بنسافر لأوكرانيا مش قاعد هني"
نسرين وهي دمع:زعمه يخلوك..
"يخلوني شن تحسابيهم انتي"
مغليه وهي تبكي؛يارب يعرفوا ويطلعوا بوك وخوتك..
"الو يام...نسرين..الو"
وفجأة فصلت المكالمه...النت فصل..
مغليه؛عمر ولدي..عمر..ياعمر..
نسرين؛خلاص يام النت فصل..
حطت مغليه يدها ع عيونها وقعدت تبكي..
ونسرين تمسح ع ظهرها وهي دمع...
☘☘☘☘☘
"كانك عندهم ليلتها راهو طبوك معاهم"
طاهر بضيق:خلاص يام بالله عليك..
لطفيه:اللي داروه فينا لقوه هادي مغليه اللي تبي تحرق قلبي بيك اهو ربي حرمها صغارها كلهم..
نجاة؛عمتي خلاص سكري ع الموضوع..
لطفيه؛انتي خليك برا منها هادي مواضيع عائليه..
طاهر:نوضي خشي لولدك نجاه نوضي..
ناضت نجاة وهي حامقه ومشت خشت لدار النوم..
طاهر:خيرك يام مش فاهم..المراة اللي انتي متشمته فيها عاملت ولدك زي ولدها..
لطفيه:تحسابه غلا فيك..كله دير بلعاني فيا اني..
تنهد طاهر وشبح للتلفزيون لقي سيف يتكلم ناض خدي الجهاز وزاد الصوت...
☘وليبيا كلها هديكا الليله تسمع للخطاب اللي يعطي تنبؤات ع اللي بيصير مستقبلا......
واول حاجه تكلم عنها عن الانفصال...
"أنا الآن اتكلم عن وقائع هذه حقائق لما يصير انفصال من بيوكلنا؟ من بيشربنا؟ من لديه القدرة ع ادارة البترول؟
هذا البترول سيتم حرقه ولاطرف ليبي سيستفيد من البترول وتذكروا كلامي هذا كويس"
نجح الخطاب هديكا الليله في تنفيد مآربه وهي تخويف الناس..
وخلاهم فعلا يلزموا بيوتهم...
زي ماصار مع اياد وولاد الفاندي اللي بعد ماشافوه هديكا الليله بأم عيونهم اختاروا يقعدوا في حياشهم لين يشوفوا شن يصير...
☘☘☘☘☘☘
بعد يومين...
مقعمزة مغليه في دارها تصلي وتدعي الله يرد راجلها وولادها ويحفظ ولدها المتغرب..
شويه جاها حفيدها دق الباب وهو يقول:جدي وبوي وعمامي روحوا ياحناي.
ناضت تجري فتحت الباب وهي تقول:وينهم..
محمد؛تعالي معاي..
ومشي يجري وهي لحقاته..
لين وصلت قربت الصاله..
وقفت في مكانها وهي مصدومه..
مناظرهم متعبه ع الآخر..وبان الضرب ع وجه الجالي والمهدي ونضال..
اما محمد شنيبه وزنه نازل ووجهه تاعب.
بدت ع وجهها ملامح البكاء وهي تقول:حسبي الله ونعم الوكيل..
☘☘☘☘☘
"وين ع خير وين"
عائشه:بنروح لحوشي خلاص طلقوهم شن مازال تبوا تاني!
جويده:مافيش مرواح لين يجوا هما يردوك..
عائشه:كيف تبوهم يجوا بعد الموقف اللي درتوه ماقلتوش مرة نمشوا نشوفوا هالمراة اللي قاعده بروحها في الحوش ماتقولش نسابه وعيله وحده..
:باهي شن رايك انهم معاش يلزمونا..
عائشه:تكلم عن نفسك اني مانيش مسيبه راجلي..
:تي تكلمي كويس ياكلبه ..وقدملها بيضربها بوه شده وقاللها..مانكش مروحه لين يجوا يردوك..
عتيقه:خلاص اسمعي كلام بوك وخشي داخل...
☘☘☘☘☘
واقف تحت الدوش..
الميه الساخنه تصب عليه وهو يتفكر في اللي صار معاه في المعتقل..
الكلام اللي سمعه المعامله المهينه اللي لقاها..الضرب..
كان كله ماله يزيد يحقد ع النظام اكثر واكثر..
طلع من الدوش وهو لابس الديشمبر..
مشي للدار النوم..
وقف قدام المرايه وهو يشوف لوجهه واللي صار فيه..
وحابس دموع القهرة بكل قوه..
بعدين...لبس حوايجه..ومشي بينزل لحوش بوه..
لما قرب يوصل لباب الشقه..
انفتح الباب..
شافها خاشه ببنتهم في حضنها ووراهم شنطتها..
اول ماشافاته وشافت شكله دموعها نزلوا..
بعدين قدمتله...واحتوت مشاعره كانت اشبه بفوران بركان..
وهو حط يده ع ظهرها وكان حاس بشعور عجز رهيب..لأنه اصبح محط شفقة زوجته..
☘فهالوقت..
كان الجالي في داره..
يفش غله في البوكسينج الموجوده..
كان يضرب فيها وهو يتخيل في اللي ضربوه في مكانها..
ودموع القهر ينزلوا من عيونه..
اما نضال.
فكان مطروح في سريره ع داره من التعب النفسي والجسدي..
وفيسع راح في نوم عميق..
زي ماصار لبوه..
اللي قعدت حداه مرته وهي تشوفله ودموعها ينزلوا وجع عليه...
☘☘☘☘☘
"اهم طلعوهم معناها مالقوا عليهم شي"
الصيد؛خلاص تو نمشولهم غدوة وخلاص.
نجمه:وبأي وجه ان شاء الله!
الصيد:مش غير حني اللي شدينا رجلينا عنهم..الشارع كلهم ماواصلهم حد كان عيت الواعر...
نجمه؛وحني نسابتهم خليناهم ياعارنا وخلاص..
فجأة..طلع في التلفزيون القذافي من قدام حوشه في باب العزيزيه..
علا الصيد الصوت وهو يقول:خلاص اسكتي اسكتي..
وزي خطاب ولده...
كان هالخطاب متابع في البلاد كله..
خطاب التطهير من الجرذان "المعارضة" زنقه زنقه..بيت بيت..دار دار..شبر شبر..
وهني كان الوعيد والتهديد صريح لكل مدينه طلعت نظام الحكم...
لطفي:واضح انه بيحرك الجيش..
سدرة بقلق:بش يرد المدن اللي طلعت من تحت حكمه..
غرفه بخوف:معناها حسين بيخش الحرب..
طوبى خافت عليه هلبه..
مطيرة بقلق:يلطف الله بينا ويحفظه وليدي..
☘وامه كانت قالبتها بكي..
صفيه ببكي؛حني الغالطين اللي خليناه يخش الجيش حني
اميمه ودموعها ينزلوا:علاش مايسبش الحكم سلمي علاش يعطيه لولده باهي..
علي:هدا مايسيبش الكرسي لحد لاولاده ولاغيرهم..
عبد المطلب:خلاصة يامراة ياسرك نكد مفروض تفرحي بولدك انتي..
صفيه ببكي:بشن نفرح كان جاني غدوة في ثابوت كيف ندير قولي..
اميمه نطت وقالت:بعيد السو!
علي بقلق؛ربي يجيب مافيه الخير ويلطف بيه وبينا..
🍀🍀🍀🍀🍀
ويعدوا يومين تانيات..
جيران الشارع قصدوا حوش شنيبه..
وكان استقبال الحاج محمد ليهم بارد..وولاده مابوش يطلعوا يقابلوهم من الاصل..
اما مغليه خلت النساوين يراجوا ومابتش تطلع لين هما روحوا...
خديجه:يام عمتي والله ماليها علاقه هما اللي منعوها عيت وهي تعارك فيهم..
مغليه؛اني مش عليها هي ع التانيات ومنهم امك ياعيشه هدا غير نسابه وعيله وحده...ولاهدا كله ع خاطر مشكلتك مع المهدي هاك وليتي..
عائشه بضيق:ماعندي مانقول ياعمتي عندك الحق في كل كلمه قلتيها..
تنهدت نجاة وقالت؛هو ياعمتي تلومي وتعذري الناس خافت..
مغليه:وخيرهم عيلة الواعر تي العين عليهم هما اكثر من غير..الدكتور اياد اللي مافيش بينا وبينهم هديكا المواصله ماخلوناش..مافيش اعذار يانجاه يابنتي مافيش..
☘☘☘☘☘☘
في المربوعه..
طاهر:كنت متوقع كل يوم انهم يجوا ياخدوني..
الجالي:ماكنتش تكلم فيه هلبه..
طاهر:ايه ليا فتره عليه..زعمه لهالسبب..
الجالي:وارد..
محمد تنهد وقال:الحمد لله اللي ربي نجاك منهم..
طاهر مرر نظره عليهم وهو يشوف لملامح الضرب ع وجوههم وقال:هدا كله لان عمر كاين في قطر!
نضال:كان طلع داير شي الله اعله شن كان مصيرنا توا.
المهدي:معاش عرفتوا عنه شي!؟
طاهر:ولا حاجه غير انه ناوي يسافر اوكرانيا بس.
☘☘☘☘☘
في هالأثناء..
كانت طالعه مظاهر في تاجوراء...
وهالمظاهره كانت كبيره هلبه..
وفردوس كانت ع نار..بتموت من القلق ع راجلها اللي قاعد ماروحش..
جاها ولدها معتز وهو يقول:ماما جعان..
فردوس بقلق:اريج يااريج..
جت لأمها تجري وهي تقول؛ماما هلبه الناس اللي طلعوا..
بلعت فردوس ريقها وقالت:باهي بري ديري حاجه لخوك ياكلها..
اريج:بابا معاهم ماما؟
فردوس بقلق وتوتر:ان شاء الله لايابنتي ان شاء الله لا..
هيا يابنتي بري خوي خوك للكوجينه ديريله ماياكل وريحيني من نشفته..
اريج وهي خايفه:حاضر..هي تعالى عزو..
وخداته ومشت بيه للكوجينه..
شويه رن تليفونها..
لقت حماتها تتصل بيها ردت عليها طول وقالت:ايوه نجوى........لاوخيتي لتوا ماخشش..........حتى هما ماهناش!.........لاياوخيتي لا هادم طالعين فهالمظاهره....
☘وفعلا..
كان مصطفى مع خوته الشباب في المظاهره..
يهتفوا مع الناس لين قطعوا مسافه لاباس بيها..
وقفتها قوات الامن اللي واجهتها بالرصاص..
اللي طاح طاح...واللي هرب هرب..
وهما كانوا من ضمن اللي هربوا...
وقعدوا يجروا من تركينه لتركينه..لين وصلوا في السانيه متاعهم وخشوا لحياشهم..
☘فردوس بإنفعال ودموعها في عيونها؛كيف دير كيف وين كان عقلك راهو عندك عيله وصغار..
مصطفى:العيله والصغار اللي مش قادر نأمن مستقبلهم اللي قاعد ندين وناخد في القروض بش نأمن حاجتهم..
ولازم نكون زي خوي نخش ونطلع وناخد رشاوي بش ندير فلوس ونأمن مستقبل صغاري..
فردوس:خلاص معاش نبوا شي غيرك انت..انت غير اقعدلنا والباقي كله طز فيه..
مصطفى:شن فايدتي كان مش قادر نكفي حاجه صغاري كان نشوف في عيونهم رغبتهم في حاجه ولايجي خاطرهم في شي مانقدرش نجيبه..واخر شي يقعدوا يقارنوا فيا بعمهم وبرجالة عماتهم ويقولوا خيره بونا مش زيهم..الله غالب ماجيتش خانب ومرتشي بش نولي زيهم..جيت عندي ضمير ونخاف ربي..خلونا في بلادنا اللي راقده ع كنوز محتاجين وكان نبوا نكفوا رواحنا لازم نولوا فاسدين..ولاتكون عندنا ثروة من الجد الاول..تي هما حتى هادم ماخلاهمش في حالهم..
شدت فردوس يده وقالت بتوسل ودموعها تنزل؛واهو بيخسرنا فيك حتى انت يامصطفى..كان لاقدر الله صارت فيك حاجه حني من بينا..بالله عليك يامصطفى اشبحلنا حني مالناش غيرك من بعد ربي بالله عليك يامصطفى..
وجعه قلبه عليها وهي تترجي فيه..خداها وقعد يمسح ع راسها وهو يقول..خلاص خلاص اسكتي تو يسمعوك الصغار تبكي ينفجعوا خلاص..
فردوس وهي تبكي:باهي اوعدني معاش تخش فهالمعامع مرة تانيه بالله عليك..
هو تنهد وقال؛حاضر..
فردوس؛قتلك وعد..
غمض عيونه بألم وهز راسه وهو يقول:وعد..
🍀🍀🍀🍀🍀
واستمرت الاوضاع في حالة هدوء حذر في العاصمه وضواحيها..
لكن الحياة شبه وقفت..
معاش في قرايه..وقفت في المدارس والجامعات والمعاهد...
فهالوقت..
من باب الترضيه ومحاولة مص غضب..
صرفوا مبلغ 500 لكل كتيب عائله..
وهلبه ناس سارعت بش تاخدها...
منهم عبد المطلب اللي تقول عمره ماشاف فلوس في عمره..
فالوقت اللي فيه مصطفى ماباش يدورهم نهائي..
وقال ان حق الليبين في بلادهم..مش 500دينار!
اما ع الصعيد العسكري..
جرت عمليات عسكريه لمدن الغرب الليبي اللي خرجت عن سيطرة النظام..
منها ماسقط..ومنها ماتحاصر..ومنها من لايزال يقاوم..
وفي نفس الوقت..
كانت تعد للهجوم ع الشرق واسترجاعه...
☘صفيه:حق ماشي بيمسحها..
حسين؛يام هدا جزء مارق متمرد لازم يرجع ولو بالدم..
عبد المطلب؛معناها الرتل اللي ماشي بيحارب بالحق..
حسين ضحك وقال:مالاماشيين يوزعوا الحلوة والشكلاطه!.
شدت امه ذراعه وقالت؛قول الحق ماشي معاهم انت!؟
ابتسم حسين؛لايام والله العظيم لا..اني هني في وحدات من الجبهات المفتوحه في الغرب..المهم توا ماتبوا شي لازم نولي..
صفيه ودموعها ينزلوا؛نبيك ترد بالك من روحك بس..
حسين:انتي استودعيني الله وماتخافي شي..وباس راسها..
عبد المطلب؛ربي ينصركم..
حسين بإبتسامه؛آمين...شبح لجده وقال..شن حاج علي ماعندك شي تقول..
علي وهو مقعمز شبحله ع جنب وقال؛كان قلت شن بديرلي بطبني!
ضحك حسين وقال:خلاص وصلني كلامك..
ومشاله طبس عليه وباس يده وراسه..
علي:رد بالك ع روحك..
هز حسين راسه..بعدين وقف ع حيله وقال:ان شاء الله...
ومشي طلع من حداهم وامه تدعيله في ادعية الاستوداع..
طلع من حداهم..
ومشي لحوش عمه...
سلم على لطفي...
وع اخته سدرة..
وع عمته مطيره..
وطلب يشوف طوبى..
طوبى ودموعها في عيونها:انت متأكد ان اللي دير فيه صح؟
حسين بإبتسامه؛اكيد..اني عكسري ياطوبى واقسمت نحارب دون الدوله ورمزها اللي بدونه البلاد ضيع يعني حربي كلها ع خاطر البلاد في النهايه..
طوبى ابتسمت من وسط دموعها بعدين هزت راسها وقالت؛بنعطيك حاجه..
حسين قعد يشوفلها وهو ساكت..
مدتلها مصحف صغير وقالت:خليه ديما معاك واقراه كل ماتفضى..
ابتسم من قلبه..ومد يده وخدي المصحف..
هي مسحت دمعتها وقالت؛استودعك الله الذي لاتضيع ودائعه..
حسين؛ربي يحفظك يابنت عمي..
هي يدوب ابتسمت..
وهو مشي بيطلع..
ع طلعة غرفه وهي تبكي:حسين ردبالك ع روحك..
شبحلها..بعدين هز راسها ومشي..
قعدوا يتبعوا فيه بعيونهم بالذات طوبى اللي كانت تدعيله وبس..
شافاته كيف ودع بوها وعمتها واختها مرة تانيه..
بعدين طلع من الحوش...
وهو طالع..
كان المهدي واقف في روشن شقته يتفرج ع السيارة العسكريه..
بعدين شاف حسين وهو طالع...
ركب السيارة..وتحرك..
وعمه وبوه وخوه واقفين يودعوافيه..
بعد ماتحركت سيارته..
غير المهدي عيونه لحوش الحاج علي الواعر..وشاف العلم الأخضر وهو يرفرف فوقه..وفي قلبه اتجاهه بغض شديد..
☘☘☘☘☘
الرتل اللي كان متوجه للشرق ع مرئ ومسمع العالم..
خلاهم يوافقوا ع قرار التدخل الاجنبي..
المر اللي حدنا عليه الامر منه...
ووللأسف الرتل اللي كان ماشي يقضي ع تمرد كمايقال..
قضي عليه بالكامل..
اللي مازال ربي كاتبله عمر نجي..واللي مكتوبله يموت قضى نحبه...
وهني في هلبه ناس كانت مناصرة للثورة تراجعت بعد التدخل الاجنبي اللي ضرره كان اكبر من نفعه...
بس في ناس قعدت ع موقفها لأنها اعتبرت ان السبب الاول والاخير في التدخل الاجنبي..نظام الدوله نفسه...
☘☘☘☘☘
"السلام عليكم بوي كيف حالك؟"
علي الواعر؛وعليكم السلام..واضح من وجهك جاي تقول حاجه صايره.
لطفي بأسف؛الحاجه عبد الكريم خوجه توفى..
علي بصدمه:لاإله الاالله..لاإله الالله..
عبد المطلب؛من قالك..
لطفي؛كلمني ولد خوه وبلغني..
عبد المطلب:إنا لله وإنا إليه راجعون..
علي ناض بعكوزه وهو يقول؛هي ارفعوني هي..
ومشي لداره بش يوتي روحه...
لطفي:هيا هي..يوسف قاعد..
عبد المطلب:لامهناش..
لطفي:قبل نبيه يسايرنا..يللا مش مشكله نكلموه في الطريق يلحقنا..هيا وتي روحك...
عبد المطلب؛شويه وجاي..
ومشي خش داخل..
ولطفي ولى لحوشه...
وشويه وطلعوا كلهم متوجهين لحوش العزي...
☘☘☘☘
"اني بنوقف قيدي صاحباتي كلهم هكي بيديروا"
سدرة؛هكي احسن..
طوبى:ياريت حتى اني نقدر ندير هكي..
سدرة بضيق؛الله غالب مجبورين حني مافي ايدينا شي..
غرفه تنهدت وقالت؛ماشيه بنرقد..
ومشت لدارهم...
وطوبى قعدت مقعمزة قدام التليفزيون تسمع لراديو قناة
ليبياFMكان راديو معارض...
اما سدرة مشت للكوجينه بدير لروحها قهوة...
☘فهالوقت في مكان ما...
:اني غدوة ماشي..وانت بعد يومين تحرك..
وانت الحقنا اخر الاسبوع..متفاهمين..
؛تم..
:متفاهمين..
:هيا كل واحد يطلع من تركينه ومن غير لفت انتباه..
طلعوا التلاته..
اللي من الباب الامامي واللي من الباب الخلفي..
منهم ركب سيارة..
وواحد بس ع رجليه لقرب المسافه..
وين قرب يوصل منطقته..
شاف جماعه من الكتائب متطوعين..
شادين مكان..وكان فاتحين اغاني تتغنى بالنظام...
وهما يرقصوا..ومنهم اللي يشرب...
هو تباعد عنهم شويه..
وكان في بحوزته عدة قنبله مولوتوف..
طلعها من الشنطه من متاعه وبدي يجهز فيها..
ولما كمل قدم بسرعه..
وحدفها عليهم...استقرت قريبه عليهم..
بعدين لوح الشنطه اللي ماكان فيها شي يدل عليه..
وطلع يجري...
وهو يجري..وفي من طلعوا وراه يجروا...
ولأنه كان عارف منطقته كويس..
قعد يخش من تركينه ويطلع من تركينه..
لين لقي روحه قدام سور متواطي مازبطاش لمنو في الليل..
ركبه ونقز منه طول...
وخش للحوش...وهو يدور بعيونه..مازال ماعرفش لمني..
لعند ماشم ريحة القهوة..
اللي طيب فيها سدرة في الكوجينه وهي دندن..
سدرة؛ليبيا..ليبيا..ليبيا..ليبيا وبس..
هو كان واقف جنب روشن الكوجينه يسمع في الصوت وهو مبتسم..
قرب من الروشن اكثر وشبح منه لداخل لقاها من غير حجاب طول وخر..
وبدي ينادي بصوت هامس..
"سدرة"
هي جمدت في مكانها وقعدت تشوف حواليهاوقالت؛بسم الله الكريم..!
هو ابتسم ع جنت وقال تاني؛سدرة..
سدرة خافت هلبه وقالت؛ناقصينكم انتم حني سادنا البلي اللي نعانوا فيه..
"سدرة"
سدرة؛اعوذ بالله منك لو كنت كافر والله يكفيني شرك كانك مسلم..
"البسي ع راسك يابنت وتعالي"
فتحت عيونها ع وسعهم بصدمه وقالت؛مهدي..
"اطلع ياكلب خيرلك اطلع"
كان هدا صوت لواحد من افراد الكتايب ينادي عن طريق المكبر..
سدرة بصدمه؛حي عليك حي..شن داير!..
ومشت تجري..لبست ع راسها بعدين طلعت للجنان..
شافاته وقالت:شن داير!
فجأة سمعوا صوت تخبيط قوي ع الباب..
سدرة بفجعه؛خش داخل خش..
المهدي خش داخل طول..
سدرة خشت وراه وقالت؛بسرعه بسرعه القدام هيا..
المهدي؛وين بالزبط..
وصلوا في دار المعيشه..
خشولها..
طوبى لما شافاته انفجعت وناضت وهي تقول؛عمو مهدي!
والباب يدق بقوة لين قريب يتقلع..
☘برا..
:قلعه وخلاص..
وكيف جو بيخبطوه..
فتحت طوبى الباب وهي بحجابها..
:حولي يابنت..
دفوها وخشوا داخل..
وهي بتموت من الخوف..
لحقتهم..
خشوا للحوش داخل..
لاقتهم مطيره وهي تقول؛خيركم شن في ياخوي رانا نساوين قاعدات برواحنا..
وهما ولا مدورينها..
قعدوا يدوروا في الحوش كله..
لين خشوا لدار المعيشه..
لقوا سدرة متكيه وتتفرج ع قناة الجماهيريه..
لما شافتهم ناضت واقفه وحطت شاربتها ع راسها وقالت؛يااطيف ياربي شن في..
هما شبحوا للتلفزيون بعدين شبحولها..
؛في واحد تعدا ع نقطة تفتيش وهرب للشارع هدا..فتشنا الحياش اللي قبلهم وجي دور حوشهم..
والمهدي اللي كان واقف وسط الدولاب خاف واحد فيهم يوصل فيها وقتها مش حيشد روحه وحيطلعلهم..
سدرة؛حني اخر حوش مفروض دوروا فيه احني بالذات مستحيل يحينا..
فتحت الدولاب اللي جنب دولاب المهدي وطلعت كلاشن وقالت؛نقتلوه في مكانه..
فنصوا فيها وواحد منهم قال؛من جبتيه هدا!
سدرة؛من خوي..خوي ضابط في القوات المسلحه..الملازم حسين الواعر تابع للواء معزز..
؛اها زبطته هدا صح ضابط في اللواء...وعيت الواعر مؤيدين وبقوة..
شبح لسدرة شويه بعدين هز راسه وقال:انتم نسوان برواحكم؟
سدرة:توا بس..صارت حالة وفاة تريسنا مشولها كلهم..
:باهي سكروا ع ارواحكم كويس وردوا بالكم..
سدرة؛ماتخافش خوي مايقدروناش الجرذان..وقفت الكلاشن
جنبها وشداته من فوهته..
هز راسه وقال:ربي يحفظكم..
ومشي ومشوا وراه جماعه..
مطيرة؛ربي يحفظكم وينصركم ياولدي.
:بارك الله فيك خالتي..
وطلعوا وراهم هي وسدرة..
لقوا طوبى مازال واقفه في الجنان..
:خشي داخل خشي..
طوبى هزت راسها وقالت؛حاضر..
ومشت خشت داخل..
وسدرة ومطيره سقدوهم لين طلعوا وسكروا الباب..
قعدوا واقفات قدامه لين سمعوا السيارة تحركت..
طولوا شويه في الوقفه بعد مشوا..
بعدين شبحوا لبعض..
وسدرة مشت طول خشت داخل ومطيرة لحقتها..
وصلوا لدار المعيشه..
حطت سدرة الكلاشن في الدولاب..
ودقت ع فردة الدولاب اللي قاعد وراها المهدي..
فتحه وطلع وقعد ياخد في نفس..
مطيره؛خيرك انت وياهم..
المهدي؛كلاب حاشاك..
سدرة؛انت شن قاعد دير!؟
المهدي:خليني بنطلع توا ضروري..
ومشي طلع وهي لحقاته..
ومطيره شبحتلهم بعدين شبحوا لبعض هي وطوبى بحزن.
في الجنان..
سدرة؛مهدي سألتك شن قاعد دير!؟
ماباش يرد لين قرب يوصل السور..
عاودت سألاته وقالت؛مهدي نكلم فيك!
وقف والتفت وشبحلها بعدين قال:سدرة اني ماشي غدوة..
سدرة تعبوا عيونها بالدموع وقالت؛وين ؟
المهدي:لمكاني اللي يراجي فيا ياسدرة..
فهمت عليه وقعدت تشبحله بنظرات الم ودموعها ينزلوا..
شبح القدام وقال؛نبيك دعواتك مش دموعك..
وركب مع السور..
وين جي بينقز شبحلها..
لقاها تشوفله وهي تبكي بصمت..
المهدي:ادعيلي..
سدرو بصوت مخنوق؛ربي يحفظك وينصرك..
ابتسم ع جنب ابتسامه حلوة..بعدين نقز من الجهة التانيه..
وهي معاش قدرت تتمالك نفسها..
قعمزت ع الكرسي وحطت ايديها ع وجهه وقعدت تبكي.
وعيون عمتها واختها عليها وقلوبهم موجوعه ع خاطرها..
☘اما هو..
لف ع حياش الشارع وخشله من الجهة التانيه ومشي لحوشهم..
خشله ومشي لداره في حوش بوه..
كان مجهز فيها شنطه وملف طبي فيه تحاليل وكشوفات وتخطيط قلب ورسمة جهاز القلب..
هديكا الليله شبه مارقدش..لين طلع الفجر وجي وقت الصلاه..
صلى صلاته..
وجهز نفسه وطلع من الحوش بدون مايعطي حد علم..
دار دوره ع اشغاله كله في طرابلس وبرا منها..
واللي يسأله وين بتغيب..
يقول ماشي لتونس بنعاين...
وفعلا..توجه للحدود البريه...
تأكدوا من كل شي معاه وبعد كم سؤال جاوب عليهم بكل ثقه وبدون ارتباك..خش لتونس...
خش وماكانش هدفه العلاج..بل الانضمام لإحدى جبهات القتال....

#عاصفة_فبراير
#طوبى

....يتبع....