طوبى الجزء الاول

الجزء الثاني عشر

# طوبى "شارع القهوة"
#جمان_فريد
#الجزء_الثاني_عشر"بنت الريح"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
مقعمز ع الكرسي يشبح للروشن..
ملامح وجهه كلها آسى...وفي عيونه لمعة الدموع..
هي معاه في نفس الدار حست بيه مارقدش..
وهو يحسابها راقده..
قعمزت وشبحتله وقالت..
عائشه:خيرك مارقدتش؟!
التفت شبحلها وقال:مارقدتيش..
عائشه؛ماقدرتش وانت هذا حالك..
ابتسم وحك رقبته من الخلف وقال:وخيره حالي..يجعله حال كل غالي..
ابتسمت..
المهدي رشف وقال:ارقدي وارتاحي مادورنيش اني في موضوع خدمه هكي شاغلني قاعد نقلب فيه فراسي بس..
هي هزت راسها بعدين قالت؛ماطولش في السهر..
المهدي:ان شاء الله..
عائشه؛تصبح ع خير..
هو ناض وقال؛نازل للمطحن شويه بنشوف حسابات وراكب..
عائشه هزت راسها بإبتسامه وعاودت تقول:تصبح ع خير..
ابتسم ع جنب وقال:وانتي من اهله..
هي رقدت وعطاته بالظهر..
وهو شبحلها شويه بعدين مشي طلع من الدار..
مجرد ماطلع...هي طول نزلوا دموعها...
🌻وهو نزل من الشقه يجري تقول هارب..
طلع برا ومشي للمطحن وخشله..
وقعمز فيه وهو يشوف من الروشن متاعه في حوش الواعر..
ويتفكر في الحركه اللي دارتها سدرة..
حطت يده في فمه وقعد يعض فيه بغيظ والدموع عبوا عيونه...
☘اما هي فكانت مظلمه الكوجينه ومقعمزة فيها بروحها..
وعيونها يشبحوا في الفراغ  والدموع ينزلوا منهم..
شويه وناضت ومشت طلعت قعمزت في الجنان في عز الصقع..
ضمت روحها بالشال ورفعت عيونها فوق وبدت تقول:ياعالم بحال سدرة..ياشايف قلب سدرة..هون علي عبدتك سدرة ياربي...اااه ياربي...لما كنت نسمعهم يقولوا الحب حرام كنت نضايق ومايعجبنيش الكلام..لكن توا جيته وفهمت علاش حرام...حرام لأنه يعذب القلوب ويفتفتها...حرام لأنه يذبل البنادم من داخل لبرا...حرمته لأنه يوجع وانت ماتبيناش نتوجعوا...هو اني مش عارفه اللي نقول فيه صح ولاغلط بس اللي فقلبي قاعده نطلعلك فيه كله..
يارب..هالبنادم قاعد يجري في دمي..ع قد مادار فيا ياربي قاعده نزيد نحبه مش عارفه كيف..مافهمتش كيف!!؟
هالحب قوي هلبه متمكن مني هلبه هلبه..ومافي حد يقدر يطلعه من قلبي ومن دمي غيرك ياربي...نسيني فيه..طلعه مني ياربي طلعه...تعبت يارب تعبت هلبه..
وغمضت عيونها بشده ومسحت بإيديها ع وجهها..
فتحتهم  وناضت ومشت خشت داخل ..
☘وهو طلع برا المطحن وقعد مقعمز في السيارة وعيونه ع حوش الواعر لين خداه النوم ورقد فيها..
🌻🌻🌻🌻🌻
تاني يوم...
فاق..وفتح عيونه ع اصوات هتاف وتشجيع..
شبحت لمصدر الصوت..
شاف سيارة "داو" كحلا..طالعه من حوش الواعر..
وحداها يوسف وحسين ولطفي يضحكوا..
ويوسف يصفر...
شويه ونزلت سدرة وهي لابسه جلابيه شتويه ووشاح شتوي ومغطيه عيونها بالنظارات وهي مبتسمه..
تلقائيا ابتسم وهو يشوفلها بعيونه الناعسه..
سدرة وهي توريلهم في الرخصه؛نعم للاستقلال..
كلهم انفجعوا وحطوا ايديهم ع فامهم يقولوها :اسكتي..
هي استغربت فيهم وقالت:شن قلت!!
والمهدي يضحك عليها..
لطفي:اركبي اركبي قبل تودرينا انتي وجدك مش ناويين تجيبوها البر..
ضحكت سدرة وقالت:فهمتكم...المهم توا اي حد يبي مشوار يدفع قبل..
لطفي:بري وصلي خواتك وبري لخدمتك خيرلك..
ضحكت وركبت السيارة...
والمهدي مركز فيها كيف مدايرة روحها شخصية بشدة الدومان والنظارات والحركات متاعها..
ضحك وقال:ع قولتك..الوي ياليلى علوي...
وهي طول تحركت بالسيارة ومشت...
قعد يتبع فيها بعيونه لين اختفت وهو يضحك عليها..
بعدين هدا ضحك وتنهد من قلبه وقال:الله يسامحك ياسدرتي...
شويه وخش بوها للحوش..
وولاد عمها ركبوا سيارتهم حتى هما وتوكلوا ع حالهم..
وهو نزل من السيارة ومشي خش للحوش..
ركب دروجه..
وصل في شقته وخشلها...
شم ريحة الشاهي..وقلي دحي...
تنهد وقال بهمس:استغفر الله العظيم..
وخش وسكر الباب..
شويه جاته وقالت:شكله خداتك نومه في المطحن!؟
هز راسه وقال:ايه...خل نصلي بعدين نجي نفطر..
عائشه:تمام..صباح الخيرات..
التفت وهو ماشي قاللها ومازال مدروخه النوم:صح ماصبحناش..صباح الورد..
والتفت وخش الدار .
هي ضحكت ومشت ولت للكوجينه...
🍀🍀🍀🍀🍀
والكل هايم في حاله..ويغني على ليلاه...
ونسرين غارقه لشوشتها في سواق التاكسي..فؤاد..
وحتى هو خشت قلبه وعجباته هلبه وبدي يفكر جيهتها بجديه واضحه..
وموضوع اختها خديجه قاعد يمشي في طريقه الصحيح...
محي وخديجه بدي واضح بينهم التقارب..
ومش غير هما حتى العيلتين برجالتهم ونساوينهم...
والشارع مستغرب هالود المفاجئ وبدوا يطلعوا عليه في قصص وحكايات...
~~~~~~~
في كوجينة حوش الواعر..
يوم الموسم...
فايزة؛وياحنه ولت في بيناتهم جو حلو وفراشات وقلوب ودباديب..
مطيره:سبحانك ياربي...من قال نجمه ومغليه يولوا حبايب لاوبيولوا نسايب فوقها..
فايزة:هذا اللي حكاته نسرين..
سدرة وهي تغسل في الخضرة؛يللا ربي يهني سعيد بسعيده ويقوي سعد كل بنيه..
الزوز وهما يشبحولها قالوا:آمين..
سدرة:العام هذا عميمه رمضان مع بعض حني وحوش عمي...
مطيرة بإبتسامه:الله! والله احسن حاجه ديروها...
سدرة:رمضان يبي اللمه..
فايزة:ايه والله 
سدرة؛طبعا شرادة مافيش داعي نقولك امتى ماتبي تعالي دفي الباب برجلك وخشي...
فايزة بضحكه:اكيد حوشنا هذا خلاص..
مطيرة بإبتسامه:ان شاء الله مانفقدوك يافيزة..
فايزة بإبتسامه؛ولانفقدكم يارب..
شويه وحطت سدرة السفرة وقالت؛يللا ابدوا...
شمروا فايزة ومطيره ع ايديهم وبدوا بتقريض خضرة العصبان..وسدرة معاهم...
~~~~~~~~
"لانقولي نتوحم ولاغيره غمي خشمك وخشي للكوجينه"
عائشه:لالا اني مانتوحمش عمتي لتوا..
خديجه بضحكه:وان شاء الله ماتتوحمي..
عائشه ابتسمت مجامله..
مغليه:العام هدا مافيش راحه خديج فاهمتيني ولا؟
خديجه هزت راسها وهي تضحك وقالت:ايه ايه فاهمه..
وعائشه تمرر في نظرها عليهم..
اما نسرين..
فكانت حابسه روحها فالدار وتهدرز ع الارضي مع فؤاد..
نسرين؛لااني مش هديكا الفلاحه الحق..
"لاردي بالك اني تعجبني المراة الفالحه التنباله نو نو نو"
ضحكت وقالت؛باهي ياودي تو نولوا فالحين..
~~~~~~~~
"لالاخلونا في حوشنا اني تونجيبلكم كل شي"
علي:متأكد!؟
عبدالمطلب؛مش ديما وانتم نازلين فيا حارمنا ماحارمنا رمضان هذا حالف نسكتكم..
علي بتعجب:ان شاء الله دوم ياسيدي خلاص اني تو نكلم لطفي ونقوله خليهم يوم بيوم...
عبدالمطلب:باهي حتى يوم بيوم باهي 
صفيه:باهي توا كيف غدوة هني ولاغادي..
عبدالمطلب:غادي خليه اول يوم مادام هو عزم...
شبحله بوه ع جنب..
وصفية تنهدت وقالت:باهي....
🌻🌻🌻🌻🌻
وخش رمضان...
وكانت ايامه كالعاده حلوة...
بالذات ايام زمان...وجو زمان...مايعوضهم شي..
اللمات الحلوة في الشتي بعد الفطور...
الهدرزة والبطاطين مغطية تنين تلاته مقعمزين حدا بعض يشربوا في سحلب ..
عالة الشاهي ولمة عالة الشاهي..وهداكا البراد ع الكانون..
لازم يجي واحد يقعمز حداه بش يدفى..
زي يوسف توا  وهو يهدرز ع مشروعه مع الفاندي..
سدرة وهي تشرب في السحلب:طلع ولد حلال هالفاندي ان شاء الله خير يسامحني..
يوسف:تبي الحق الخبطه عدلت فيه هلبه..
سدرة؛مالا باهي اللي ضربته..
قعدوا يضحكوا..
حسين:الحق هو ولد بلاد لكن عنده حاجات خي..
سدرة؛يبان شوارعي شويه..
يوسف:ايه هو منظره هكي اشبح كيف لكن راجل يخدم ع راسه...
مطيرة:شوقتوني نشوفه..
حسين؛ماعندك ماديري بيه..
خبطاته عمته بالمخده ع وجهه قعدوا يضحكوا..
صفيه بضحكه وهي تصب في الشاهي:هي نوضوا ارفعوا الشاهي للمربوعه...
ناض يوسف وقال؛هاتي..
خدي السفره وناض معاه حسين...
سدرة:جو..بعدين نبيك شويه..
يوسف هز راسه وهو ساكت ومشوا الزوز طلعوا من الصاله..
تلاقوا هما والبنات الصغار يجروا ورا بعض..
حسين؛بالشويه عليكم..وقعد يشبح لطوبى كيف تجري وهو يضحك..
~~~~~~~~~
"شني جو احكي قول نسمع"
ضحك يوسف وقال:كان نعرف من جايبتيها جو هادي!..
سدرة:هذا ياسيدي في معاي مدرسة مصريه عندها ولد اسمه يوسف ديما تنادي فيه جو..وين سألتها علاش تنادي فيه هكي..قالتلي يوسف بالانجليزي جوزيف...وهما في مصر غادي يختصروا فيها ويقولوا جو...
يوسف بضحكه:اها...
سدرة:ماديرش الجو متاعك وتحاول تلف بيا ودور قولي في حويجه!
ضحك وقال:حويجه شنو!؟
سدرة:بنويته من هني ولامن هني ذاهبه الشيرة..راك وخيي مابتغبيني فيك..
ضحك يوسف بإحراج وقال:ديما كاشفتيني..
سدرة:ايوه اعترف طلع طلع..
ضحك شويه بعدين ضم كفوفه ع بعض وقال:ايه في تقرا في كلية الطب بنيه كويسه خلوقه ومحترمه..لكن مش ليبيه..
سدرة:من وين؟
يوسف:اصولها سوريه لكن من يوم يومهم هني.
فنصت سدرة وقالت:راهي تطلع قريبة الدكتور اياد...!
يوسف بضحكه:مافيش في السوق كان مرزوق!؟
ضحكت سدرة وقالت:عندي مافيش سوريين فالبلاد غيرهم..باهي كمل..
يوسف:ناوي معاها الجديات واهو قاعد نتعب ليل نهار ع خاطرها..
ابتسمت سدرة وقالت:ربي يجبر بخاطرك يارب ويجمعكم ع خير..
ابتسم يوسف وقال:آمين..وحتى انتي فكري في روحك وشوفي حياتك..
شبحت سدرة القدام وهي مبتسمه بحسرة وقالت؛واني هكي دايرة...
تنهد يوسف وهو يشوفلها ومش عارف شن يقوللها بش يواسيها..
لكن مهما قال مش حيقدر يواسيها ولو شويه..
🌻ومن حوش الواعر لحوش شنيبه..
اللي كانوا لامين اقاربهم في سهرة رمضانيه...
ومعاهم نجمه وعتيقه اللي ولوا اساسيات في أي لمة..
في عز الهدرزة وحده من الحضور قالت..
:بالله يامغليه بنسألك ع بنيه جارتكم..
عائشه ركزت معاها..
مغليه:من هي..
:هادي اللي قامت عرس المهدي سماها سدرة..
مغليه:اها..خيرها؟
:والله عاجبتني هلبه..فالحه ونازكه وشخصيتها عجبتني هلبه ونبيها لخوي..
عتيقه؛زين مااختار سدرة مافيش منها..
نجمه قعدت تشبح لعتيقه..
:كان تكلموهالنا ولاتعطونا رقمهم...
مغليه:حاضر تو نعطيك رقم هاتفهم وربي يقدم اللي فيه الخير..
:ان شاء الله..
نسرين قعدت تشبح لعائشه..
وعائشه تشرب في القهوة وهي ساكته...
🌻🌻🌻🌻🌻
وبالرجوع لحوش الواعر واجواء لمتهم العائليه
فم باب الحوش الدخلاني.
مصطفى:عطيهولها ع غفله..
سدرة بضحكه:بحبحي يادوسه..باهي ياسيدي تو نديرلها جو قبل نعطيهولها..
ابتسم مصطفى وقال:هي انطلقي..
خشت سدرة وهي تضحك ومشت للصاله..
خشت عليهم لقت فردوس تهدرز..
فردوس:دلع الاء ماريتش زيه متعبه هلبه عكس روجه مريحتني نحسها هكي تحب تتحمل المسؤوليه..
مطيرة:صغيره ع المسؤوليه ياكبدي راهي تقرا في روضه..
فردوس بضحكه:مش هدا قصدي يعني معتمده ع روحها تلبس بروحها تاكل بروحها تخش الحمام بروحها هدا قصدي..
صفيه:حتى اني ملاحظتها نويشطه..
سدرة:طالعه لخويلتها حتى هي...
فردوس:ايوه..
فنصت فيها سدرة ومشتلها وهي تقول:قولي لا ترا قولي لا..
فردوس بخوف:باهي خلاص خوفتيني..
وصلت فيها سدرة وقال:اعرفي كيف تدوي خير مانحدفك بهدا..ولوحاته في حجرها..
شهقت فردوس بصدمه وقالت:هذا شنو!؟
سدرة؛بحبحي ياحنه اول مراة في العيله دير نقال..
خداته فردوس وهي مصدومه:من وين جبتيه!؟
سدرة؛من راجلك ياحنه..
قعدت تضحك فردوس وهي متفاجئة..
مطيرة:مالا والله ماهي اول مراة انتي قبلها بوين من امس راهو..
ومدتلها نقال..
انصدمت سدرة..
مطيره بضحكه؛بوك جاني امس وجابهولي قالي درته لسدرة ونبي نفاجئها بيه قتله خليها عليا..
صفيه:هي بحبحي هي اول مراة تسوق ودير نقال في مرة في العيله كلها..
مطيره:مظنها في شارع القهوة كله..
قدمت سدرة  وخدت النقال وهي متفاجئه قالت:الله عليك بوي وخلاص..
مطيرة؛وبي مافيش منهم حاطكم تاج ع راسه ورافعه بيكم ومعززكم ومكرمكم والله مافي راجل يجي في ظفره وخيي..
سدرة وهي تمسح في دموعها:صدقتي...
🍀🍀🍀🍀🍀
فرق كبير...
بين الاب اللي يعز صغاره وبين اللي يذلهم ويصغر منهم..
اكيد الكلام على عبدالمطلب..
اللي كيده كله حاطه فهالمسكينه اميمه..
حارمها من كل شي حتى الكلمه الطيبه..
ويعامل فيها اسوأ معامله..برغم انها بأمس الحاجه لعطفه وحنانه...
لكن هو ماكانش يعرف يحن ويحب....
في يوم..
ع سفرة الفطور وهما فاطرين في حوشهم..
كانوا برواحهم من غير الحاج علي اللي كان معزوم عند قريب ليه...
سفرتهم كان فيها كل شي..
لكن ياكلوا بغصة لانه يراقب فيهم بالحركه...
لهذا كانوا ينوضوا فيسع من ع السفرة..
بس اميمه كانت تقعد اخر وحده لانها تاكل وتشرب ع مهل..
عبدالمطلب:هيا سقدي روحك..
اميمه وهي مرتبكه:حاضر..
وكيف جت بتاخد المالقي وتصب من العصير ..
من التوتر فلت من يدها ويتبزع..
وبوها يجن جنونه..
عبدالمطلب بغضب يخوف:شن درتي ياحمارة شن درتي..
نشروا فيه بالفلوس ياحمارة..
وشدها من وجهها..من خدودها وطيحها ع الارض وغرس اضافره في خدودها وهو يقول...ياكلبه ياكله..
والبنيه تبكي وتعيط..
اضطرت امها تقطع صلاتها وتجيهم تجري
شافاته شن يدير عيطت وقالت:اطلقها اطلقها..
ودفاته عنها بكل قوتها وخدتها من تحت ايديه.
شافت وجهها قالت:ووه عليا شن درت في البنت وجهها دم..
عبدالمطلب بغضب:ان شاء الله معاد تولي هم ع قلبي الفرخه هادي هم..بزعت رزقي ع الوطا..
وناض ومشي من حداهم..
وصفيه تشوف لوجه بنتها وهي تقول:ياحليلي هيييه شوهك حسبي الله ونعم الوكيل..حسبي الله ونعم الوكيل..
والبنيه تبكي وترعش بين ايدين امها...
هدتها امها بالسيف وداوتلها وجهها ورقدتها في دارها..
وحتى بعد ماروحوا خوتها من الجامع مابتش تحكيلهم شي..
وين نشدوا عنها قالتلهم راقدة..
وهما ماركزوش هلبه فالوضع..بالذات وان بوهم كان ياكل عادي وكأنه مادار شي..
🌻🌻🌻🌻🌻
"اتصلوا وقالوا بنجوكم رديتهم مني غادي"
فايزة:هادوا اقارب خالتي مغليه..
سدرة:ايه زبطتها..يللا ماعلينا شن جو البوبو..
فايزة بضحكه:ماخلانيش نصيم بكل..
سدرة:ربي يكون في عونك..
فايزة بإبتسامه:آمين..وين الرتيله هديكا..
سدرة؛متنخات هي وغرفه سعدودهم..اكبر همهم النوضه بكري ..
فايزة :سيورهم يكبروا ويكبر همهم..
تنهدت سدرة وقالت:صدقتي..شبحت شويه لفايزة وقالت..معاش تواصلي في عيشه..
فايزة:لاياحنه حاولت هي شكلها معاش تبي حد..
سدرة:علاش!؟
فايزة:والله ماني عارفه كل مانكلمها نقوللها بنجيك طلع في حجه..ولما اني نعزمها نفس الشي..
سدرة:تعرفي شكله طاحت فيه بالرسمي..
فايزة:المهدي!
سدرة؛في غيره...قاعده تحارب بش تحافظ عليه ووالله مانلومها..
فايزة:المهدي لتوا قلبه مش ملكه..
سدرة وهي شاده دموعها:يمشي قلبه تقلبه هالحقير..قداش سحني وقهرني..
فايزة:وقاعده تحبيه..
غمضت عيونها بشده وقالت بألم وعصبيه:كان مازدت البلي كان مازدت..
فايزة قعدت تشبحلها بحزن وهي ساكته..
وخلتها تبكي براحتها..
🌻فهالوقت قدام الحوش..
يوسف:غير خش اشرب حتى قهوة..
الفاندي:مانبيش نحير العويله..
يوسف:ع فنجان قهوة..
وفتح باب حوش عمه وقال:هي تفضل..
خش الفاندي وهو يقول:بسم الله..
سكر يوسف الباب وهويقوله:تفضل تفضل..
ودخله المربوعه ومشي طول خش للحوش..
يوسف؛سدرة..سدرة..
شويه طلعتله سدرة لاحظها تبان باكيه...
يوسف:خيرك!
سدرة:شي..قول شن تبي..
يوسف:تمام براحتك..كان جوك تمام ديري قهوة جبت الفاندي هني سامحيني عارفه الوضع في حوشنا..
سدرة:باهي باهي مش لازم تشرح..هو توا وقت سحور..خل نديرلكم صفرة  وخلاص..
يوسف:تي والله مافي منك باهي..باس راسها وقال.. احسن وحده...ومشي من حداها للمربوعه..
هي لفت ومشت وهي تحرك في راسها يمين ويسار..
~~~~~
وبسرعة وتت هي وفايزة احلى سفرة..
وطلعها يوسف للفاندي..
الفاندي :هاه ريت تعبنا العويله..
يوسف:تعب شني ياراجل هو وقت سحور دارولنا معاهم..
الفاندي:عطيهم الصحه.
يوسف:تسلم هي مد يدك..
ابتسم الفاندي وبدي ياكل ومش قادر يوقف..
وكان يتخيل في سدرة دارت اللي ياكل فيه كله..
والشعور اللي حس بيه وقتها خلاه يتشجع ويسأل:معليشي يوسف عندي سؤال وان شاء الله مانتجاوزش حدودي فيه..
يوسف:تفضل..
تنحنح الفاندي وقال:بنت عمك مش متكلم فيها حد..
يوسف رفع حواجبه وقال:لا..علاش..
تنهد الفاندي وحط ايديه ع بعض وقال:الحق اني قاعد نوتي في روحي ونبي نتزوج وقداش ليا ندور ع وحده تكون بنت بلاد..وبنت ريح..قد روحها..والحق سألت عليها ومالقيتش الا اللي يشكر..واني الحق نبي نخطبها..
يوسف:كلامك مع عمي مش معاي..
الفاندي:ماهو حتى انت خوها..تقدر تفاتحه وتفاتحها في الموضوع وتجس نبضهم..
يوسف:وكان مافيش نصيب..
ابتسم وقالت:امر الله وكان ..
يوسف:علاقتنا مش حتتأثر..
الفاندي؛عيب عاد مش عيل اللي قدامك يايوسف..
يوسف؛من توا استعد لأي رد..
الفاندي ابتسم وقال:مستعد..مادورش انت..
يوسف هز راسه وقال...
"إن شاء الله خير"

(جزء بسيط ع خاطركم اعذروني لو كان دون المستوى..)

#بنت_الريح
#طوبى

....يتبع....