طوبى الجزء الاول

الجزء الثاني والثلاثين

(مش مسامحة اي حد يقرا و مايتفاعلش )

#طوبى "أقحوان وفلة وياسمينه"
#جمان_فريد
#الجزء_الثاني_والثلاثين" مقادير"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
"أريج خلينا شويه معليشي"
مررت نظرها عليهم بقلق بعدين ناضت ومشت قعمزت في طاوله فاضيه قريبه عليهم..
قدم وليد ع الطاوله وقال:آلاء ماطلعنيش عن طوري ارجوك..
آلاء ببرود مصطنع؛خيرك وليد راهو كل شي بالغصب الا الحاجه هادي...اني خلاص معاش نبي..
وليد رفع حواجبه وقال:عادي هكي بالساهل!.
آلاء؛وعلاش نصعبوا فيها..انت حاولت معاي وقتلي عطيني فرصه وعطيتك ولما عرفتك عن قرب لقيت انك مش مناسب ليا شن تبيني نستمر معاك بالسيف واني مش متقبلاتك!؟
وليد وهو مصدوم:بعد سنه ياآلاء.!
آلاء:سنه ياما صار فيها ياوليد واني مليت خلاص..
وليد بحرقه:اقسملك بالله ياآلاء نحبك من قلبي اقسم بالله مافي وحده غيرك في حياتي..آلاء راني نحبك من صغري يابنت معقوله مش مصدقتيني ومش مأمنه فيا بعد هدا كله..تي اني كان تطلبي روحي نعطيهالك ومش كلام بس ياآلاء وانتي عارفه..
آلاء ببرود؛معاش تكلمني باش نصخف عليك مانحبش الراجل اللي يبان بمنظر زي هدا قدام بنت..
وليد بصدمه؛تصخفي عليا.!
خدت حكة العصير وشربت منها وهي تشوفله بنفس النظرات الباردة..
تبدلت ملامح وجهه للحده وقال؛تمام ياآلاء تمام..اللي تبيه يصير...وناض ومش وخلاها وهو في قمة الغضب بس قلبه كان موجوع ع الآخر..
اما هي بعد مشي..قعدت تشبح لمكانه وعيونها تعبوا بالدموع وهي تتفكر لقاء صار بينها وبين امه في المزرعه متاعهم..
《ثريا؛حتى لو كنتي بنت عمه لاهو من ثوبك ولاك من ثوبه ولدي البكري كان جي بيتزوج لازم ياخد وحده تناسبه عايشه في نفس مستواه عينها شبعانه ومليانه..
خلي ولدي في حاله احسنلك مانبيش نوصل الموضوع لأمك بروحها مش ناقصه مسكينه》
جت اريج قعمزت حدا اختها شافتها لقت الدموع ينزلوا من عيونها بحزن قالت؛مادام تحبيه علاش خلتيه..
آلاء مسحت دموعها وخدت شنطته وناضت وهي تقول؛مانحب حد اني..
ومشت طلعت...
ناضت اريج وخدت شنطتها ولحقتها بسرعه...
وعيون نضال تبع فيهم...
☘☘☘☘☘☘
درست سيارة قدام العمارة اللي يسكن فيها طاهر...
نزلوا منها مراد وصابرين..
مراد؛كان خلتينا نعطوهم علم مش خير..
صابرين وهي مبتسمه؛نبيها مفاجأة قتلك..
مراد؛ان شاء الله ماننحطوش في موقف محرج..
صابرين؛مراد خلاص عاد ماتعقدهاش وتحبط حماسي..
ضحك وقال؛تحمسي تحمسي ياحنه عنبوه اللي يحبطك..
قعدت تضحك..
ركبوا الدروج هما الزوز لين وصلوا الدور التاني..
وقفوا ع الباب..
كيف جت صابرين بتضرب الجرس..
اختفت ابتسامتها وعقدت حواجبها لما سمعت صوت عياط اختها..
صابرين؛تسمع مراد..
مراد بقلق:ايه..
قعدت صابرين دق ع الباب بقوة وتنادي: نجاه...نجاه
مراد؛اهدي صابرين.
صابرين بخوف وهلع؛اختي تعيط داخل كيف تبيني نهدا..حامل راهو حامل..وقعدت تخبط بإيديها الزوز..
مراد تفلوش ومعاش عرف شن يدير..
صابرين؛كسر الباب..
مراد بصدمه؛شني!؟
صابرين بعياط؛كسره قتلك كسره!
مراد:حاضر حاضر..حولي..
بعدت صابرين...
وهو بعد شويه وجاه يجري وقعد يخبط فيه مرة تنين تلاته...
سمعوا نجاه تعيط بصوت عالي بعدين صوتها اختفي..
صابرين قريب هبلت عيطت وهو تقول:هيا..
مراد بكل قوه ضرب الباب انفتح...
خشت صابرين تجري..
لقت اختها طايحه حدا الكنبه وهي تأن وشبه حتفقد الوعي وفي ميه تحتها..
وحداها بنتها جوري تبكي بتتفحم من العياط...
صابرين قعمزت ع ركابها حدا اختها وقعدت تمسح ع وجهها وهي تبكي بخوف وتقول:نجاة!
نجاه بصوت يدوب طالع؛بنموت..
صابرين؛اطلع دور حد يطلعها معانا اطلع شن قاعد واقف هكي..
مراد؛حاضر حاضر..
وطلع يجري وقعد يدق عالجيران...
وطلعوله مراة وراجلها وين خشوا للشقه شافوا حالتها قالوا هادي تبي مصحه...
وفعلا..اتصلوا بإسعاف احدي المصحات وجو رفعوها ومعاها صابرين..
اما مراد خدي معاه جوري بيرفعها لحوش خالتها مروة..
وفي الطريق اتصل بطاهر هلبه بش يخبره لكن ماردش عليه...
☘☘☘☘☘☘
"بتخليني نخش ولانخش غصب عنك!"
المهدي:مختار بالشويه مش هكي..
هي فاقت من حالتها صدمتها شبحتله بحده بعدين طلعت راسها وشبحت يمين ويسار في الشارع لقاته فاضي.
ولت خشت وقالت:خشوا داخل خشوا بسرعه..
وخرت عن الباب..
خش مختار وخش بعده المهدي وسكر الباب..
سدرة شبحت لمختار بغضب وقالت بإنفعال؛انت شن مازال تبي قولي جاي شن تبي بالزبط جاي تقتل بوي!..قسما بالله يامختار لوصارت في بوي حاجه بسببك نقتلك والله نقتلك..
هو قعد يشبحله يحده بدون مايتكلم..
اما المهدي قال:سدرة حاولي تكوني هاديه..تفاهموا بهدوء مش هكي في النهايه هدا خوك وجاي بعد سنين مش عارفه عنه شي لاشن شاف ولاشن عانى..شبحله وقال..ولاانت مختار تعرف شن صار في غيابك..
مختار شبحله وقال بعصبيه مكتومه؛لانعرف يامختار نعرف كل شي.
سدرة وهي تشبحله بحده؛اني بس نبي نفهم انت من جاتك الجرأة اللي خلاتك تجي بعد اللي درته..
مختار بغضب:شن هو اللي درته قولي شن درت.. سدرة بغضب:وتسأل شن درت ياعديم الاحساس ياقلبك الميت ياأخي!
المهدي ماباش يقعد معاهم مش من حقه...قال؛اني طالع..
ولف ومشي طلع من الحوش وسكر الباب..
وهو يشبح يمين ويسار كان الشارع فاضي...
تنهد بقلق..ومشي بآتجاه المطحن..
خشله وطلع كرسي وقعمز قدامه..
وقعد يشوف لحوش الواعر...
☘بعد طلع المهدي..
سدرة شدت مختار من ذراعه وقعدت دف فيه وهي تقول؛اطلع برا..اطلع..اطلع قبل ليجي بوي اطلع..
هو حول يدها وشد ذراعها وجبدها ومشي بيها لداخل الحوش..
سدرة؛حول ياحقير حول..
خش بيها للحوش..دفها داخل..
وسكر الباب...
وقعد يشبحلها بغضب..
وهي قعدت تتحسس في ذراعها وتشوفله بكره وعيونها معبيات دموع..
مختار اشر عليها وقال؛مهما صار راك تنسي ان اللي واقف قدامك خوك كبير..
سدرة ؛اني مش معترفه بيك خو اصلا بش نديرك كبير ولاصغير..
قدملها وقال بغضب؛خوك غصب عنك...
سدرة:لامش خوي..اني ماعنديش خوت غير يوسف وحسين وع اسم لطفي الواعر مافيش غير اربعه بنات بس..فردوس سدرة غرفه طوبى..من عشرين سنه تبرينا منك كلنا نسيناك كلنا حتى الشارع نساك..كلهم يقولوا لطفي الواعر ضنوته بنات بس...ماعنداش ولاد..
يسمع في كلامه اللي كان يخش في قلبه زي الرصاص..
كانت تقتل فيه اكثر من مرة وتمنى لومات بالمرة وانتهي..
هي نزلت دموعها وقالت:علاش جاي توا قولي علاش..عقلك قالك انا حنستقبلوك بالأحضان ونقولوا عفا الله عما سلف!
في بالك ان بوي بعد ماكبر ولان عظمه بيرق قلبه ويحن عليك.!؟ مستحيل..بوي السنين اللي فاتت كلها ماباش يذكرك ولايتكلم عليك بالتلميح..بوي لايمكن يسامحك يامختار لو طلع الروح قدامه..
مختار ابتسم ساخرا ودموعه في عيونه وقال:ماهو انتي تبي هكي..انتي اللي تحبي ديما تكوني في الصدارة تبي هكي..تبي تكوني انتي الوحيده الكبيره في عينه وعين جدي وعين العيله والشارع والناس كلهم..من لما كنتي صغيره وهدا ماديري..اطلعي فيا بصورة الولد العاق..وفردوس بصورة البنت اللامباليه وعديمه المسؤوليه وانتي ديما البطله بش تقعدي الكل في الكل..هدا اللي خلاك تصدي فيا كل مانتصل بيكم ونترجى ونبكي وانتي وقلبك الاسود كنتي ماتعطيش فيا المجال حتى نقول شن صار معاي..اول مرة تتفكري..وقعد يحرك في يده للخلف بعدين قال..قبل اكثر من عشرين سنه لما اتصلت وترجيتك بش تتوسطي بيني وبين بوي بش يسامحني شن قلتي انتي مذكره!!؟
تعرفي لو كانت ردة فعلك غير هكي راهو امي قاعده بيناتنا لتوا..
سدرة وهي مازال شاده ذراعها بعد سمعت كلامه ارتسمت ع وجهها ابتسامه خيبه..ومطت شواربها للأسفل بعدين قالت:عمرك ماتتغير حتقعد زي ماانت..تغلط وغلطه مايستوعبهاش العقل وترمي بذنبك ع غيرك..سدرة اللي تقول عليها همها انها طيحك من عين الكل..ياما رقعت وراك عمايل كبيره...وكانك ناسي نفكرك يامختار..تتفكر لما مرة روحت للحوش شارب في نص الليل...من تكتم عليك..من اللي رفعاتك لدار وهي تقيم فيه بثقلك لدارك..مني اللي غطت عليك وخلت بوي وامي مايعرفوش باللي درته ليومنا هدا..ولا لما خنبت سيارة بوي ودرت بيها حادث وجيتني تجري تحكيلي وانت خايف خلتيني نكذب ع بوي ونقوله شفت الخانب لما نقز وطلع بيها وكليت ع خاطرك هزايب لإني شفت وماتكلمتش وغيره وغيره وغيره..هدا كله وكان عمري وقتها 14سنه بس..بس..اللي دير ع خاطر خوها شن تكون يامختار قولي....تكلم..
يشوفلها بنظرات غاضبه بس غلبتها مسحة الحزن والدموع نزلوا منهم..
سدرة ودموعها نهر جاري ع خدودها:اني كنت فرحانه بيك اكثر من فرحة امي بيك..وين مانمشي نقول خوي الكبير دار خوي الكبير حط خوي الكبيرمشي خوي الكبير جي..واللي يديرلي حاجه نقوله تو نحرش خوي الكبير...
بس خوي الكبير هدا ماكانش يبي خوتي ولاخوت خواتي ولابوه ولاامه..تخلى علينا ومشي وخلانا وحني بأمس الحاجه ليه حتى بعد ماترجاته امه مافكرش فيها نهائي ودار مافي راسه وخلاها..خلاها تتعب من بعده وديما تبكي من شوقها ليك..ضحكت تهكما من وسط دموعها وقالت...وياريتك..ياريتك..درت ثمره..لابنت مستقبل ولادرت حاجه تفرح قعدت ماتسمع عنك كان في العار وخوه...لين ماتت بحسرتها..ماتت بسببك..بإنفعال قدمتله وشداته من دجاكته وقالت..انت اللي قتلت امي انت...
مختار قعد يبكي وهو يقول؛معاش تقولي قتلتها.
سدرة بصوت عالي؛لاقتلتها قتلتها وحرمتنا منها..وقعدت تضرب وهي تقول..وحرمتنا من كل شي حلو بعدها انت...انت انت...
وهو كان يبكي بالصوت..شدت ايديها بعدين ضمها..
وهي استسلمت في حضنه وقعدت تبكي بالعبارة وتطلع من
آه تفتت القلب..وهو كان يبكي بالعبره بدون مايقول كلمه...
☘ومهدي..
مازال قدام المطحن يشبح للحوش وهو يهز في رجله بقلق..
شويه شاف طوبى جايه ع رجليها للحوش..
وقف ع حيله وهو يشبحلها بقلق اكبر...
وهي وصلت في الباب وطلعت المفتاح وفتحاته وخشت..
بعدين سكراته...
🍃سدرة سمعت صوت الباب..
بعدت طول عن خوها وقالت بخوف؛بوي..بوي..
مختار وهو يمسح في دموعه؛نبي نشوفه لازم نواجهه..
سدرة؛لالا بالله عليك لا بوي كان شافك يموت لا..
مختار بحزم؛سدرة..
سدرة وهي مش واعيه لروحها من الخوف ع بوها شدت في رقبته بتخنقه وهي تقول:اقسم بالله نقتلك والله نقتلك..
ومختار مصدوم فيها وفي حالتها ع الآخر..
☘وطوبى برا مشت تشوف للقطوسه اللي قاعده عندهم من ايام وكاينه حامل..
طوبى بإبتسامه؛مازال ماجبتيش.وضحكت..
بعدين مشت للباب استغربت لما شافته مسكر فهالوقت مش بالعاده..
خافت ع سدرة...فتحاته وخشت ..حولت من رجليها وهي تنادي" سدرة..."
مافيش رد..
زادت خافت ومشت دور عليها وهي تقول:سدرة..ياسدرة...
"اني وراك"
التفتت شافتها...
شافت عيونها حمر ووجهها اصفر...
حطت يدها ع جبهتها وقالت؛شكلك زدتي تعبتي..
خدت سدرة يد اختها وقالت؛عادي حبيبتي زكمه وتعرفيني اني مانتحملهاش.
طوبى:شن رايك نمشوا للمستوصف نطمنوا.
سدرة؛لاحبيبتي مش لازم تو نشم زعتر ونشربه وحالي يولي باهي..خشي لدارك بدلي واطلعي ديري الغدي...
طوبى تنهدت بيأس وقالت؛حاضر..
وجت بتمشي للدار بعدين وقفت..
بلعت سدرة ريقها وقالت:خيرك!؟
التفتت وقالت بإبتسامه؛بوي غير عطره؟
سدرة:عطره!؟
طوبى؛ايه..نشم في ريحة عطر رجالي حلوة بالمره..
قوت دقات قلبه سدرة الخايفه...
ومختار اللي كان مدرق في دار المعيشه كان يسمع في طوبى وهو مبتسم ودموعه مابطلوش نزول..
سدرة بخوف:ايه صح صح..بوي غير عطره..
ضحكت وقالت؛تو بعد يروح نسأله عن نوعه..
سدرة؛باهي سقدي روحك وديري اللي قتلك عليه..
طوبى ابتسمت وقالت؛حاضر..
ومشت خشت للدار وسكرتها عليها..
هي شبحت للدار شويه..
بعدين مشت بسرعه لدار المعيشه..
خشتلها وقعدت تأشرله بيدها وهي تقول بهمس:اطلع اطلع..
هو طلع بسرعه..
وهي وراه طلعاته من باب الكوجينه ومشت بيه للباب الوراني..
مختار:هادي طوبى..
سدرة وهي تستعجل فيه:ايه طوبى 
مختار:علاش ماتبنيش نشوفها..
وصلوا في الباب..
هي شبحتله بحده وقالت؛طوبى بالذات لا...وبالله عليك معاش تجي هني مرة تانيه انسانا..ارجوك انسانا...
هو شبحلها شويه..بعدين فتح الباب ومشي طلع..
وهي سكرت وراه الباب..وقعدت شداته وحاسه روحها من الانفعال والخوف حتفقد الوعي..
لكن تماسكت..بعدت عن الباب..ودارت روحها عاديه..
ومشت بتخش للحوش..
☘والمهدي قاعد يدور في الشارع ومرة مرة يشوف لحوش لطفي...
قعد يقدم جيهته بعدين وقف وشبح لبدايه الشارع..
شاف السيارة الكبيره الفارهه..شويه شاف مختار بيركبها..
مختار شافه...اشرله من بعيد يجيه..
المهدي طول قدمله بسرعه..
ركب مختار السيارة وقعد يراجي..
والمهدي وصل فيه فتح باب السيارة وركب..
مختار؛عندك وقت؟ نبي نحكي معاك شويه..
المهدي؛بس بعيد عن هني..
هو شبح القدام هز راسه..بعدين شغل السيارة وتحرك...
☘☘☘☘☘
مستشفى طرابلس الجامعي...
في الباحه متاعه..
كانت مقعمزة اميمه تتفرج ع فيديو بخص عمليه جراحيه ومنسجمه معاه ومركزه فيه بالتفصيل..
وحاطه في ودانها السماعات وتسمع في الشرح.
هو شافها اول ماخش للباحه..
ابتسم..خطروا عليه ايام زمان...قدملها ووصل فيها..
قعمز جنبها بمسافه وقعد يشبحلها...
وهي ولاحست بيه..بكل حواسها مع الفيديو..
وهو بعيونه وقلبه وعقله معاها..
سمعها قالت مصطلح لاتيني ضحك ضحكه خفيفه..
وقعد يتأمل فيها كيف مركزة مع الفيديو...
تم...هي تنهدت وحولت السماعات من تحت الوشاح..وقعدت تمسد في رقبتها..بعدين شبحت جنبها..
فتحت عيونها ع وسعهم بصدمه...
هو ضحك وقال؛اسف..
اميمه؛من امتى هني؟
عمر بإبتسامه:مش مذكر..
هي غيرت عيونها عنه وقعدت تلف في السماعات بتوتر.
عمر شافها وقال؛قاعده تتوتري هلبه زي زمان..
شبحتله شويه بعدين قالت:علاش جيت..
عمر:تعرفي الجواب..
اميمه:لامانعرفاش..
ابتسم وقال؛تمام..جاي نحكي معاك عن مستقبلنا..
اميمه تنهدت وقعدت ساكته..
هو قعد بعيونه وطلع من جيب بالطوه طرفين شكولاته سنكرس..
ومدلها وحده..
شبحتها بعدين ابتسمت وخدتها وقالت؛ماكنتش تحبه صح؟
عمر بحب رد عليها يقول:وتوا نموت فيها..
هي شبحت لشكولاته بخجل وقعدت تفتح فيها..
هو ابتسم..بعدين فتح متاعه وبدي ياكل..
وهي كلت منها وقعدت تشبح القدام..
عمر:اميمه..
شبحتله..
شبحلها وقال؛سؤال صريح ونبي اجابته صريحه اكثر منه..
اميمه:شن هو؟
عمر؛تحبيني؟
وجهها زاد احمرار وهي تشبحله..
عمر:تبيني نكمل معاك حياتك..جاوبي اميمه سؤالي مافيشي عيب ولاحرام..
نزلت عيونها وقالت:اممم..
قعدت يضحك..
شبحتله بخوف وقالت؛علاش تضحك!؟
هو خفتت ضحكته لما شاف حالتها وين سألت السؤال ضايق هلبه وقال:اميمه انتي مازال مش ناسيه..
اميمه بلعت ريقها وغيرت عيونه عنه..
عمر:اني ضحكت من فرحتي اميمه..
اميمه شبحتله وقالت؛شوف عمر اني لتوا قاعد في قلبي خوف منك قاعده مش واثقه فيك مش بيدي..اللي درته فيا السنين ماتنسيشي...انت لو تبي هالخوف يتحول اثبتلي انك تحبني بصدق..
عمر:مافيش اكثر من اني نخطبك يااميمه..
اميمه؛ولو ردوك اهلي..
عمر؛قصدك جدك..هو مالاش علاقه مافي حد ليه علاقه بحياتك..انتي اللي تقرري مصيرك..
اميمه؛لاغالط..جدي اهم بنادم في حياتي كلها لو هو رفض اني مانقدر نقول شي..
عمر:واني مافي حد عندي اهم منك في حياتي كلها..
شبحت القدام وقالت: مش بالكلام ياعمر..
عمر بتحدي؛مش بالكلام يااميمه وحتشوفي وتسمعي بروحك..
"اميمه"
التفتوا الزوز وشبحوا للي ينادي..
كان اسامه...انصدم لما شاف عمر..
وهو انتابه شعور بالغيره الشديده والغضب...
اميمه وهي تشوف لعمر بتوتر:نعم اسامه..
اسامه وهو يشوف لعمر بكره قال:تعالي الدكتور جي.
هي ناضت وقالت؛سلام توا...
ومشت طول لأسامه...
اسامه غير عيونه عنه وشبح لأميمه بعدين مشوا مع بعض وقعدوا يهدرزوا..
وعمر قريب ينجن بالغيره؛لاالالا الشيباني الاحرف لازم يقتنع غصب عنه...
☘☘☘☘☘
"مش حالة ولاده هي قاعده تحس في وجع عادي بس قوي عليها شويه بسبب المسالك"
صابرين؛اكيد يادكتورة..
الدكتورة؛اكيد مالاشنو تشبحي فيا نلعب معاك..
صابرين:شن الاسلوب هدا...معقوله دكتورة واسلوبها هكي!
الدكتورة؛انتي اللي تسألي في اسئله غبيه..
صابرين؛ترا احترمي نفسك واعرفي كيف تتكلمي خاشين هني بفلوسنا حبيبتي مش جايين نشحتوا راهو..
الدكتورة؛مالا اقعدي انتي واختك..
ومشت وهي تقول..تحسابيني نراجي في فلوسك..
صابرين؛كان ماخلتيهمش يلزوك مانبداش اني...
هي من بعيد ردت عليها؛اعلى مافي خيلك اركبيه...
صابرين بغل؛خل نمشي نشوف لأختي دكتورة غيرها وبعدين نلهى بيك..ومشت وهي تقول..راجلها داره الكبد هو التاني وينه..وقامت تليفونها واتصلت بمراد رد عليها طول..
صابرين؛هاه مراد حصلت طاهر..
جاها صوت مراد مش طبيعي وهو يقول..
"والله ماعارف شن بنقولك ياصابرين"
وهي وقفت في مكانها جامده من الخوف...
☘☘☘☘☘☘
"ياما ريت وياما عشت ياالمهدي مش غير هما بس..."
المهدي؛معناتك جبتها لروحك بروحك لكن معناتهم ومعاناة سدرة بالذات كانت بسببك انت يامختار..
ابتسم تهكما وقال؛مش متوقع منك موقف غير هدا..
المهدي:هدا الحق يامختار..
غير عيونه عنه وقعد يشبح للطريق..
المهدي شبحله شويه وقال؛انت شن االلي خلاك هكي!؟
تنهد وقال؛طلعت من الحبس في 2009 بعفو...بس ماقدرتش نطلع من مالطا لأن ماكانش عندي ولا قرش..بتت في الشوارع..وكليت من الكنايس..ضحك ودموعه في عيونه وقال..وياما صار فيا من شي مانبيش نحكي فيه..لين طيحني ربي في راجل ليبي تلاقيت اني وياه في وحده مم البارات اللي خدمت فيها بش نحصل وين نبات ونلقى ماناكل...وين عرفني ليبي عقله ماتحملش..طلعني من غادي..وعرف مني قصتي كامله وعرض عليا نخدم عنده وحنى وفرلي مكان سكن..وعرض عليا نروح معاه هني بس اني رفضت ماكنتش نبي نروح واني فهديكا الحاله..
المهدي:شن خدمته..
مختار:رجل اعمال..اثبت نفسي عنده وكنت نخدم ليل من نهار قربني منه هلبه لدرجة اني وليت نسيبه..
المهدي:يعني انت توا متزوج!
مختار ضحك وقال؛كنت..وطلقت..
المهدي:طلقت! وكيف صار فيك بعدين..
مختار:لاعادي جدا..ماتفهمناش والطلاق كان حضاري جدا.. قعدت علاقتي معاها حلوة زي علاقتي ببوها..اساسا بوها وصل لمرحله انه مايقدرش يستغنى عني كنت نمشيله في شغله احسن من مايبي..بعدين استقليت عنه ودرت شغل لروحي ودرت معاه شراكه...
المهدي حس ان الشغل متاع مختار مش صافي بس ماباش يدقق سأله وقال؛مادرتش صغار..
ضحك وقال:وهادي كانت احسن حاجه صارت معاي..
المهدي:علاش وليت توا؟شن تبي تثبت..
خفت ضحكة مختار وهو يشوف للمهدي...
المهدي:تبي توري لبوك انت وين وصلت..
قعد مختار يشبح للمهدي وهو ساكت..
ابتسم المهدي ع جنب وشبح القدام وقال:خودها مني نصيحه..ولي من وين ماجيت يامختار جيتك مش حيكون فيها فايده ليك وليهم مرات تصير من بعدها حاجات تزيدك ندم على ندمك...ولي يامختار وخليهم يكملوا حياتهم..وارحم بوك واختك..اختك بالذات لأنها من صغرها وهي تعاني لعند هاللحظه...
ومختار يسمع في كلامه اللي كان يوجع فيه وهو يفكر...
قطع عليه تفكيره صوت رنة تليفون المهدي...
طلعه من جيب جاكيته وشاف المتصل لقاه الجالي..
رد وقال؛هاه جالي..........فتح عيونه ع وسعهم وقال:شن تقول!!؟....وينكم انتم وين........سكر..ونزل من السيارة يجري..
وخلا المختار في حيرة من امره...
☘خدي تاكسي عطاه العنوان..وقعد يستعجل فيه وهو في مفجوع ومصدوم من الخبر اللي جاه..
وصل للمستشفى.
نزل وخش يجري...
بعد ماسأل عن الحاله وينها ركب يجري...
ومجرد ماوصل...
شاف قدامه الجالي مقعمز ع روس صوابعه وهو يبكي..
وقف عليك وهو مفجوع قاله؛جالي طاهر وين؟
قام الجالي عيونه اللي ينزلوا منهم الدموع وقال...
"توفى"
~~~~~~~
صابرين ببكي:ياحليلي عليك ياوخيتي وع حظك عمرك ماارتحتي في حاجه..عمرك ماتهنيتي ياوخيتي..كله مني اني يومها تشكيلي منه وجعتني دعيت عليه بالحادث عطيني قصة في لساني..
مراد؛اسكتي خلاص..ماليك ذنب في شي انتي ربي هكي قدر هادي ساعته..
ع طلعة دكتورة تانيه جت تشوف في حالة نجاه..
صابرين وهي تبكي:شني دكتورة؟
الدكتورة؛لازم دير عمليه بسرعه وضعها معاش يتحمل..
صابرين وهي تبكي:بسرعه بالله عليكم..
الدكتورة؛هدي شويه وضعها مش خطير لهالدرجه..
مراد بأسف:توا جانا خبر وفاة راجلها..
الدكتورة؛قصدك الحاله اللي داخل؟!
مراد:ايه..
الدكتورة بأسف؛لاحول ولاقوة الا بالله..ربي يلطف بيها مسكينه.. ومشت وخلتهم..
وصابرين منهاره بالبكي...
☘☘☘☘☘
خش لمكتبه وهو يتكلم بالتليفون..
يوسف:ايه شن قعدلك تاني..
"خلاص هداكا هو كملت كل شي"
يوسف بإبتسامه:معاش قعد غير اسبوع واحد بس..
ضحكت بخجل وقعدت ساكته..
يوسف ضحك وقال:هي توا بنسكر وراي خدمه نكمل نعاودلك اقبالو...
"تمام جو..سلام"
يوسف:سلام..
وسكر وحط التليفون ع طاوله المكتب..
وجي بيكمل شغله..دق باب المكتب..
هو قال:تفضل..بدون مايشوفله..
"السلام عليكم"
هو قعد يراجع في نفسه وين سمع هالصوت من قبل...
عرف الاجابه..بس كان يبي يتأكد..
وين شبح للباب..تأكد تماما...
وقال وهو متفاجئ..
"ريما"

#مقادير
#طوبى

.....يتبع...