طوبى الجزء الاول

تابع

(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_الرابع_والأربعين"حق مشروع2"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
فتح الباب الفاصل..
خش ع حوش عمه وهو ينادي...
حسين والدموع باين اثرهم في عيونه:طوبى..طوبى..
☘في الصاله..
كانوا بنات لطفي الواعر وحفيداته واخته ملتمات يحكوا ع تفاصيل العرس..
لما سمعوا صوته ينادي..
كلهم شبحوا لطوبى..
اللي بدت عليها ملامح القلق مع الحزن..
"طوبى"
ناضت طوبى ومشت بتطلعله..
سدرة ومطيره قالوا: طوبى!..
☘وهي خدت ملاية الصلاة من ع الشماعه..
لبستها ومشت فتحت الباب وطلعت..
وطلعوا وراها سدرة ومطيره وفردوس وبنات فردوس..
وغرفه قعدت داخل وهي خايفه..
حسين بملامح حاده والدموع ولاقالوا نبطلوا نزول:طوبى..
اميمه بنبرة باكيه:حسين ماديرش هكي!
صفيه ببكي:تعالى سلم ولدي بالله عليك تو يروح عمك وتصير مصيبة..
حسين مش مهتم لكلامهم وقعد ينادي:طوبى..
لين بانت عليه..
لما شافها..قلبه قريب طلع من مكانه..
كان مشتاقلها هلبه...هلبه..
وهي زادت كبرت وزيانت..
كان عنده زي شجرة ورد يسقي فيها ويهتم بيها وكل يوم يطل عليها ويشوفها كيف تكبر ويراجي امتى طلع ورد..
وطوبى طلعت الورد متاعه...بس اللي حيقطفه حد تاني...
طوبى بجديه وصرامه؛نعم!
قدملها وقال بنبرة صدمه:حقه انخطبتي للجالي ولد شنيبه!؟
طوبى:ايه والعرس الاسبوع الجاي..باهي اللي روحت بش تعول معانا وتعاون يوسف عابيين عليكم..
سدرة قعدت تشوف لطوبى وهي مندهشه في كلامها اللي تقول فيه..
اما مطيره وفردوس وبناتها وجعهم حسين هلبه..
صفيه كانت تشبح لطوبى بحده..
واميمه كانت تشوفلها وهي فاهمه علاش تكلم في حسين بهالأسلوب..تبيه يكرهها..بش يسهل عليه ينساها..
قدملها هو يقول:نعول!!؟ وعابيه عليا..عابيه عليا اني نعول في عرسك..عرس البنت اللي حبيتها وتمنيتها ليا اكثر من عشرة سنين..
البنيه اللي قعدت نراجي فيها واني نعد الايام والشهور تكبر بش تولي  مرتي..!
التفت لأميمه واشر عليها وقال:انشديها..رجع شافلها وقال..انشدي اميمه وهي تقولك..قداش حبيتك..قداش حلمت تكوني ليا..تي اني مستقبلي كله خليته واقف عليك انتي..حياتي كلها...حتى بعد تغربت واني في الغربه عقلي وقلبي معاك انتي ودرت جهدي بش نروح وناخدك..
طوبى...طوبى انتي في حياتك كلها..مش حتلقي بنادم في الدنيا يحبك زيي...
طوبى:واني عمري ماشفتك اكثر من اخ ياحسين..كنت نقولك فيها ديما انت خوي بس..خوي اللي يعوضني عن اللي فقدته اللي يحامي عليا ويحميني ويسندني ويكون في ظهري قدام الراجل اللي بناخده بعدين يديرلي الف حساب..بس انت خليتني في عازة الخوت ياحسين...
نزلوا دموعها وهي تتكلم اثرت في كل من يسمع فيها...
بالذات سدرة..
طوبى ودموعها تنزل:برغم اللي صار حنقعد ديما نشوفلك كأخ..ونراجي في اليوم حتشوفني فيه انت كيف ماتشوف لأميمه..ولفت بتمشي وهي تقول..
"سامحني"
ومشت طول خشت داخل وهي شاده بكاها وبنات اختها خشوا وراها...
وهو يشوف للمكان اللي مشت منه بنظرات حزن وخيبة امل..
غير عيونه لسدره..
لقاها تشوفله بحزن..
ابتسم بألم وقال .
"إن شاء الله البراني يكونلها خير من ولد عمها"
وهز راسه وهو مبتسم بحسرة..
بعدين مشي بإتجاه الفاصل طلع من عندهم وامه واخته وراه..
تنهدت مطيرة بألم وقالت:استغفر الله العظيم وخلاص..
ومشت سكرت الباب الفاصل..
وسدرة وفردوس خشوا داخل وهما مضايقات..
بعدين هي خشت وراهم وسكرت الباب...
☘☘☘☘
"خودي اشربي عصير يروق الاعصاب"
خدت نجاة طاسة عصير ليمون ونعناع وقالت:والله لو نشرب منه مالقي ماني رايقه..
شربت صابرين من طاستها وهي تشوفلها..
نجاى بقهر:بنموت ياصابرين بنموت..بياخدها خلاص حتى هي بتولي مرته زيي زيها...لا هي خير مني...هي في العلن واني في السر تقول مدايرة حرام...
صابرين تنهدت وقالت:اني في بالي شي بس خايفه تقولي لا ومانديرش هكي..
نجاة عقدت حواجبها وقالت:شن اللي في بالك قولي!؟
شربت من العصير شويه بعدين قالت:شوفي هدا راجلك وانك تحافظي عليت بشتى الوسائل هدا حق مشروع ليك..شن مادرتي حقك...والغايه متاعك تبرر الوسيله..
نجاة:قولي اللي عندك طول صابرين..
شبحتلها صابرين شويه بعدين قالت:السحر...
نجاة برفض:لالا مستحيل نبيه يجيني بإراده نبي الجالي يرجعلي وهو يبيني من قلبه زي قبل..لالا مانتحملش ولانرضى لروحي نعيش مع راجل مغيب معاي بدون ارادته..
صابرين:مش للجالي..
نجاة:مش للجالي!
هزت صابرين راسها وقالت:ايه...لهادي اللي اسمها طوبى...
قعدت نجاة تسمعلها بإنتباه..
صابرين؛اللي يندارلها لازم مايكونش واضح انه سحر..مرض يبدا فيها ويتعبها ويخليهم يدوروا بيها الدنيا ومايعرفوش طبها وفي الاخيرحيمل من وضعه ويطلقها ويلوحها لماليها..
ولأن وقتها اكيد نفسيته حتتأزم ماليه حيخليه يدير مايبي وياخد اللي يبيها بإرداته..وطبعا وقتها يكون مطلق يعني لما يقوللهم عليك مافي حد يقدر يعارضه..وهكي يطلع زواجكم للعلن غصب عن اللي يبي واللي مايبيش..
نجاة وهي تفكر في كلام اختها:باهي ويت بنلقوه اللي يدير السحر اللي قلت عليه..
صابرين:يعني تبي متأكده!
نجاة رفعت حاجبها وقالت:ايه..وهلبه..
صابرين مصمصت شواربها وقالت:خلي كل شي عليا اني تو نتصرف..انتي عليك توتي فلوسك بس .
نجاة:شن مايبوا نعطي المهم تكون حاجه صح وواثقه منها..
صابرين:عيب عاد نجاة مانقولش عليهم الا واني ضامنتهم..
عقدت نجاة حواجبها وقالت:تعالي جاي من وين تعرفيه الجو هدا انتي؟
صابرين:في وحده كانت تبي ربايه وربيتها بس..وابتسمت بمكر وهي ترقص في حواجبها بعدين شربت من العصير..
ونجاه وهي تشوفلها ضحكت وقالت:لاكان تبي رباية تستاهل...
☘☘☘☘☘☘
الساعه 12:00ليلا..
واقفه في الكوجينه اللي كانت مسكرتها عليها وهي تتكلم بالتليفون..
"ريما ياإمي ماظل غير شهرين بس ع المهله"
ريما:خلاص ماما معاش ماقعد شي في اقل من شهرين حناخد الفلوس ونطلعوا من هني بس انتي قولي لتيام يراجي مني اتصال الايام جايه..
"طيب ياماما رح قلوا المهم انتي ديري بالك ع حالك منيح"
ريما:راده بالي ماتخافيش انتم ردوا بالكم ع ارواحكم..تصبحي ع خير"
"وانتي من اهلو ماما"
سكرت ريما..
بعدين مشت طلعت من الكوجينه وولت لدار النوم اللي كان راقد فيها يوسف مايندري على شي..
☘☘☘☘☘
عكس خوه حسين اللي كان مقعمز بروحه فوق السطوح..
وفيده البوم صور قديم صغير..
فيه صور للعيله في الاعياد الزرادي طلعات البحر..
هلبه صور جمعت بينه وبين طوبى..
من لما كانت في عمر السنه ماتسكتش الا بين ايديه...
لعند مابدت تتعلم الكلام وكان هو من الناس اللي علمتها الكلام...
لين كبرت وخشت للمدرسه...
حسين وهو يتفرج ع الصور ودموعه ينهمروا انهمار:ياريتك ماكبرتي..ياريتك قعدتي صغيرة...ياريتك قعدتي بنيتي راهو ماخليت حد ياخدك مني...بكل..
وحط يده ع عيونه وقعد يبكي بصمت...
بكاء مابكاشي قبل الا لما فقدوا البلاد وضاعت من بين ايديهم..
وتوا لما فقد الحبيبه وضاعت من بين ايديه..
لكن من قلبه قاعد يدعي في الله..
مايصير في الحبيبه..زي ماصار للبلاد..
🍀🍀🍀🍀🍀
4نوفمبر 2017...
الساعه 8:30مساءا.
كانت طوبى مقعمزة في المخزن وقدامها لوحة جديده كيف باديه ترسم فيها...
طوبى:مازال ماحفظتش ملامحه كويس..ابتسمت وقالت..عن قريب تو نبدا ندقق في ملامحه ونحفظهم  وحنعرف نرسمه من غير مايغيب عني تفصيل حتى صغير..
فجأة رن تليفونها..
ضحكت وقالت؛هو..
خداته من فوق الطاوله متاع الالوان شافاته لقاته فعلا هو المتصل .
فتحت الخط وردت..
طوبى:السلام عليكم..
"وعليكم السلام والرحمه..ياجميله الامور كلها تمام..امور السفر والحجز في الفندق..قعد بس يجي اسبوع العرس هدا.."
طوبى بضحكه:اليوم سبت خيرك!
"مغليه قالت بنبدوا الاثنين"
طوبى بضحكه؛هو هو..
"اني نبي يوم الاربعاء من الاخير"
طوبى قعدت تضحك بخجل..
"الاربعاء تولي للجالي معاش فيها كلام"
طوبى بضحكه:شن رايك معاش نكلمك ليوم الخميس...
"في احلامك"
هي بضحكه قالت:هادي العاده راهو مفروض في اسبوع العرس مانتكلموش مع بعض بكل..
"فوتي امها العادات المتخلفه هادي بكل..حي عليك نتصل بيك وماترديش نجيك ورب العزة"
طوبى وهي تضحك:خلاص خلاص تو نرد عليك..
"تمام توا بنسكر ياطوبى هانم بعدين نكلمك...سلام"
طوبى بإبتسامه: رد بالك ع روحك...سلام
"حتى انتي"
طوبى:تمام...بعدين سكرت..
حطت التليفون في مكانه..
بعدين خدت القلم وبدت تحدد في الخطوط الأولى وهي مبتسمه وتفكر في الجالي..
فجأة جتها رساله..
وقفت وخدت التليفون..
الرساله كانت صوتيه..
فتحتها...
وبدت تسمع في اغنيه لفنان خطيبها المفضل...
"كل ماتكبر تحلا.."
قعدت تسمع فيها وهي تضحك..
بعدين انسجمت مع كلماتها ورجعت ترسم وهي تسمع فيها...
☘وطوبى عايشه في حالة حلوة مخليتها متفائله بحياتها القادمه...
مش بس هي...
حتى سدرة اللي كانت مقعمزة في الجنان وتتفرج ع صورة امها في التليفون وهي تقول في نفسها..
"الحمد لله درت اللي عليا..كبرتها وربيتها احسن تربيه وعطيتها لراجل كويس..ان شاء الله تكوني مرتاحه في مكانك يارب..."
مسحت دمعتها اللي نزلت من عينها اليمين..
بعدين رشفت..وخدت نفس..وناضت خشت داخل...
🍀🍀🍀🍀🍀🍀
يوم الإثنين...
7نوفمبر..2017...
"وخويا ياخويا خويا'
في وسط الخيمه اللي ريحة الوشق تفوح منها..
والعه المنظومه...
وخديجه ترقص والاقارب حاضرين في سهريه عائليه...
اللي يشوف خديجه كيف ترقص يعرف انها مش عارفه وين تحط في فرحتها..
بس في الحقيقه..كانت تقهر في نجاة وتحرق فيها بس..
ونجاة مقعمزه تتفرج عليها وهي مبتسمه بهدوء..
وتتصنع في البرود...
وكانت لازم تبان عاديه وهاديه بش تنفد مخططها...
🌸اما حوش علي الواعر...
"اللهم صل ع النبي ع خوتي وضنى عمي"
والبنات يهيجوا ويردوا مع اغاني المنظومه..
بنات فردوس وصاحبات اميمه وطوبى...
ومرة مرة تخش فيهم وتقعد ترقص حتى هي وتزيد تنشط الجو..
كانوا عايشين فرحتهم بمعنى الكلمه مش مخليين شي ينغص عليهم.
حتى من صفيه كانت تبي تبان فرحان ع خاطر اميمه..
اميمه اللي كانت فرحتها ناقصه بسبب اللي صار مع حسين..
ومن وراه حسين قاطعها ومعاش كلمها...
وفي نفس الوقت..
كان حاضر العرس ويعول فيه..
واللي يشوفه يقول ماصايبه حزن ولاجي من ركنه...
كان يبي يبان قدام الجميع..
حسين ضابط الجيش اللي ليه هيبته...
وحبس حزنه في داخله ومش مخليه يطلع لغيره...
☘وفي عز زحمة ودوشة العرس..
كانت ريمه تدرس في الوضع كويس....بش تنفد خطه رسمتها من فترة للوصول لهدف ما...
☘☘☘☘☘☘
يوم الثلاثاء
8نوفمبر..2017...
هاليوم مشوا فيه نساوين عيلة الواعر لحياش بناتهم رافعين حوايجهم...
مشوا مطيره وسدرة ومعاهم أريج لفيلا طوبى..
وآلاء وفردوس وغرفه لشقة أميمه اللي كانت فوق شقة المهدي..
☘في الفيلا..
استقبلوهم خديجه ومعاها عائشه وزوز من قريباتهم..
قالوا شويه شتاوات...
بعدين رفعوهم يدهوروا في الفيلا..
كانت فيلا كبيره...تصميمها مميز جدا..
نظامها حديث..اثاثها..حتى جنانها...
سدرة فرحت بيها هلبه..
كانت كل مالها تزيد تطمن ع طوبى..وتتأكد انها عطتها للراجل الصح..عطتها لما يليق بيها..
ومطيرة واريج فرحانات لطوبى زيها واكثر...
وصلوا في دار نومها..لقوا في داخلها دار خاصه بالملابس..
بدوا يفضوا في شناطيها ويحطوا في الحوايج ويعلقوا...
نظموهم بطريقه حلوة..
لبس السهرة والفساتين بروحه..
لبس الطلعه بروحه...
لبس الحوش بروحه...
كان دبش طوبى هلبه وواخده مقاسات مختلفه حاسبه حساب زيادة وزنها القدام...
كذلك الاحذيه كانت واخده هلبه احذيه..
ومركبتهم ع اغلب اللبس...
هدا بس بتاتها...اما الكسوة بروحها...
وبالنسبه للكهربائيات وغيره ماخلاهاش الجالي تاخد شي لأن المطبخ كامل ماناقصه شي...
☘برا الفيلا...
كان المهدي واقف يتكلم بالتليفون..
المهدي:توا جايين لحوشها جايبين حوايجها..
"مني"
المهدي:عمتك مطيرة واريج بنت فردوس..وسدرة المنتهى..
"اها..باهي الفندق اللي بيقعدوا فيه اول ليه كورونتيا اكيد"
المهدي:ايه..بس نبي نعرف انت ع شني ناوي..
"والله يامهدي ولاحاجه صدقني..نبي نشوفها من بعيد لاأكثر"
المهدي:ياريت يامختار ماديرش نكد..
"لاحول ولاقوة الابالله...والله يامهدي ماجاي جيهتهم هما كلهم هالثلاثه ايام بعدين نولي من وين ماجيت"
المهدي تنهد وقعد ساكت..
فجأة سمع صوت باب الفيلا انفتح..
التفت شاف سدرة طالعه..
جو عيونهم في بعض..
ومش عارفين علاش ماقدروش يحولوهم عن بعض..
"الو مهدي..معاي!؟"
المهدي وهو يشوف لسدرة قال:معاك..
وسدرة تشوفله وخلاص..
التفت القدام وقال:معاك...
وسدرة قلبها حس ان في شي غريب..
المهدي:هي بنسكر توا مشغول..
"طلعوا!؟"
المهدي:ايه..
"تمام تمام..السلام عليكم"..
المهدي:وعليكم السلام..وسكر..
شبح يمينه..
شاف سدره ماشيه مع عمتها لسيارتها..
واريج وراهم ماشيه لسيارتها..
سدرة قبل ماتركب شبحت للمهدي وهي مضيقه عيونها..
وهو طول غير عيونه وكأنه خايف تشوف اللي فيهم وتعرف هو شن مداير من وراها...
ركبت السيارة وعقلها يفكر..
وعمتها ركبت جنبها وتحركت طول ووراها اريج..
وهو شبح لسياراتهم بعدين تنهد بضيق...
☘☘☘☘☘☘
وبعد ماروحوا من حياش البنات...
شدوا كل وحده في دار وقعدوا يلبسوا فيهم في البودري...
الزوز كانوا فرحانات ومتحمسات ع الآخر للطلعه ودورة بالسيارات في شوارع طرابلس...
وهما يلبسوا داخل...
☘في الصاله...
سدرة بإبتسامه:والله خليتوا الفرحه فرحتين بجيتكم..
سالمين بإبتسامه؛نجكلي ياسديرة انتي وكلامك السمح وبعدين هضا فرح طوبى حبيبة قلبي وتبيني نغيب عنه..
سدرة:تسلمي ياربي..شن حال بنغازي وعربها..
سالمين:الحمد لله في خير ونعمه...قوليلي طوبى بتسكن في شارع القهوة..
سدرة:لابتطلع منه..
سالمين بإبتسامة حزن؛وبتقدري ع فراقها..
تعبوا عيون سدرة دموع وهي ترد بإبتسامه:اللي مصبرني انها طاحت في راجل وناس تخاف ربي...
سالمين هزت راسها وقالت:الحمد لله..وتو بعد اطمنتي عليها التفتي لحياتك..
ابتسمت بحسرة وقالت:لاخلاص راحت علينا..
سالمين:ماراح عليك شي مازلتي صغيرة لاقوة الابالله عليك مامنهم اللي يتمنوك ياسديره..
فجأة..
سمعوا صوت الزغاريد...
والعرايس خشوا عليهم مع كل من كان معاهم وهما يلبسوا في البودري..
سالمين لما شافت طوبى ابتسمت بفرح بس في مسحة حزن في عيونها..
وطوبى لما شافتها جتها طول وهي تقول:خالتي سالمين!
ناضت سالمين وحضنتها وهي تقول:مبروك عليك يامينه مبروك عليك يابنتي..ربي يكمل عليك بالخير ويهنيك ياطوبى..
طوبى وهي حاضنتها عيونها تعبوا دموع وقالت:الله يبارك فيك خالتي..قداش فرحتيني بجيتك..
سالمين:فرحك مانغيب عليه ياغاليه...
طوبى:ربي يحفظك وجعني مانفقدك..
ضحكت سالمين وبعدت عنها وهي شادتها قالت:ولانفقدك ياسمحة...يابخته صاحب النصيب حاز الزين كله..
مطيره:ايه والله..اللي حاز بنات الواعر حاز الزين كله..هيا دربكوا يابنات..
وبدت اريج دربك..
وهما يغنوا..
"لبست بوخطين توامه..وعروستنا تقول حمامه"
وطلعوا كلهم للجنان ودارو شوط حلو في الخيمه..
بعدين طلعوا بالعرايس برا..
اميمه بتركب مع حسين..
وطوبى بتركب مع يوسف..
بس اللي صار...
طوبى مشت مع اريج وعمتها مطيرة وصفاء بنت فايزة لسيارة يوسف..
ركبت مطيره القدام..
وطوبى واريج وصفاء من الخلف...
وقعدوا يراجو في يوسف..
مطيره:وين راح هدا!؟
فجأة..
ركب حسين السيارة وهو بكامل اناقته ومغطي عيونه بالنظرات..
سكر الباب وشغل السيارة..
كلهم قعدوا يشبحوله وهما مصدومين..
هو شبح لطوبى من المرايه ابتسم وقال:مبروك ربي يكمل ع خير..
هما مازال مصدومات..
وطوبى اللي ابتسمت بتوتر قالت:الله يبارك فيك..
شبح القدام وتحرك وهو يقول:شن جو ياصفاء..
ابتسمت صفاء بإرتباك وقالت:الحمد لله..
حسين:وانتي اريج شن دايره..
ابتسمت اريج مجامله وقالت؛ماشيه الحمد لله..
حسين:الحمد لله..الحمد لله..وحط يده ع منبه الصوت"الكلاكس" ومعاش حولها لين طلعوا من شارع القهوة..
اول ماطلعوا من الشارع..
فتح المسجل وكانت الاغنيه..
"يامحلا الدنيا لما تبي تجمع بينهم"
قعد يصفق وهويقول:خيركم راقدين ...نشاط نشاط هيا..
بدوا يصفقوا..
ومطيره انطلقت وبدت تصفق وتغني..
والبنات يصفقوا معاها وطوبى تشبح للطريق وهي تحاول تبان عادي..
حسين:من نظرة عين بداها..راها مرتين هواها..
بعت ناسه تموا معاها وهدا هو المزبوط..
ومطيره تصفق وتشبحله وقلبها واجعها عليه...
☘اما عند يوسف اللي ركب في سيارة حسين..
ومعاه اميمه ومرته و آلاء وفايزة..
وجوهم كان حلو بالمرة خلوا فرحة اميمه تزيد اكثر واكثر..
طلعوا ورا هالسيارتين..
زوز سيارات تانيات فيهم صاحبات العرايس..
ودارو بيهم اغلب شوارع طرابلس..
وردي البودري كان مغطي السيارتين جهة العرايس..
واللي يفوتوا من حداه ويشوفهم يبتهج وفي من يتسهف ويقول ياريتنا معاهم...
☘☘☘☘☘☘
هديكا الليله كانت ليلة سهريه عند العيلتين..
والشارع انقسم بيناتهم...
ناس بتحضر سهرية حوش الواعر..
وناس بتحضر سهرية حوش شنيبه..
☘نجاح:امي امس قالت انتي بتمشي لحوش شنيبه واني الواعر..
عواطف:الزوز المنظومه عندهم تخبط من الصبح مانيش ماشيتلهم الزوز..
نجاح رفعت حواجبها ونزلتهم وهي تقول:تفاهمي انتي وامك مادخليش بيكم..
ومشت توتي في روحها بش تمشي..
اما عواطف ولت رقدت وغمت روحها بالشرشاف...
☘حاولت نجمه في عواطف بس عواطف سكرت راسها ع المشي..
مشت نجمه بروحها لحوش نساباتها..
ونجاح لحوش الواعر..
والناس سألوا ع عواطف وقعدوا نجاح وامها يردوا بنفس الاجابه..
"التزمت معاش تخش لعراس فيهم منظومه"
وعائشه كذلك ملتزمه ومتدينه بس قعدت مقعمزة داخل..
تعول وتساعد فيهم لكن مابتش تطلع للخيمه بكل...
نسرين:سعدودك مريحه روحك من شوفة الوجوه المغمه..
عائشه:نسرين نحس فيك مش مزبوطه..
تنهدت نسرين بضيق وقالت:اني حامل..
عائشه قعدت تشبحلها بضيق وهي ساكته..
نسرين ودموعها في عيونها:معاش نبيه معاش نبي منه شي ياعيشه خلاص...
عائشه:وعلاش تزيدي ع همك هم؟
نسرين:انتي تعرفي ربي اكثر مني ياعيشه..!
عائشه هزت راسها وقالت؛فاهمه عليك..بس مادام معاش تقدري تستمري معاه اكثر من هكي لازم تاخدي قرار نهائي يانسرين..
نسرين:تحسابيه ساهل ياعيشه..
ابتسمت عائشه بتهكم وقالت:صدقتي..اني نظر عليك ومالقيته لروحي..
شبحتله نسرين بحزن شويه..بعدين نزلت راسها لوطا وابتسمت بألم...
☘وبرا..
كانت نجاة مقعمزة في الخيمه والعيون عليها..
مستغربين قوة علاقتها بعيلة شنيبه بعد موت راجلها وحضورها لكل مناسباتهم..
مايعرفوش انها ديما تجيهم و تبات عندهم بالأيام....!
وهي عايشه ع اعصابها برغم انها تبان قدام الناس عاديه وجوها حلو..
ومغليه وخديجه محاصرينها حصار ومش مخليينها تتنفس طول ماهي قاعده عندهم..
☘☘☘☘☘
الساعه 2:25ليلا...
خشت لجناحها وولدها في غمرها..
مشت حطاته في سريره...
ودارت طلة ع خوته..
بعدين مست للزيانه بتحول ذهبها..
تفاجئت وين شافت عليها علبة مجوهرات..
فتحتها..
لقت فيها طقم ذهب ناعم ولطيف..
وفي نص في ورقه مطبقه..
خدتها وفتحتها وبدت تقرا..
"شفته تخايلته عليك..
انتي حتحليه مش هو اللي يحليك
  الجالي"
ضحكت بتهكم وقالت: ع مني يالجالي على مني!؟...يسايس فيا خايف نديرله حاجه غدوة...اطمن ونرتاح حتى كان بندير حاجه حتكون ع سكيتي مش بشوشرة ياقلبي انت...
لوحت الورقه ع الزيانه وبدت تحول فب العقد متاعها بعدين قالت بضحكه:خل نحرق بيه دم خديجه يوم الحفله...
☘☘☘☘
فهالوقت..
نسرين كانت دور ع خوها الجالي في الحوش..
لين لقاته مقعمز في الجنان جهة الكوجينه ويشوف لتليفونه..
مشتله وهي تقول:علاش قاعد برا مش باهيه ريح الخريف..
الجالي شبحلها وقال:مش هداكا الريح عادي..
جبدت كرسي وقعمزت وهي تقول:جالي..
الجالي وهويشوفلها:نعم..
نسرين تنهدت وقالت:جالي اسمعني..مازال عندك فرصه تقدر تنهي كل شي وتاخد نجاة وتهربوا لأبعد مكان..عارفك بتقول هادي خيرها هبلت..كيف ماتفكرش في اللي بيصير في بوي وامي والعار اللي بيلحقنا..اني لوكنت مكانك نقول طز..
المهم نعيش مع الانسان اللي نحبه ونبيه...
صدقني ياجالي لو استمريت فهالزواج حدمر نفسك ودمر طوبى معاك..
صعب هلبه ع المراة تعيش مع راجل مايحبهاش وقلبه مع غيرها..وطوبى صغيره ياجالي حرام يصير فيها هكي والله حرام..خليها ياجالي بالله عليك وعيش حياتك مع المراة اللي تبيها..
الجالي:كملتي!
نسرين قعدت تشبحله بضيق وهي ساكته..
الجالي بشي من الانفعال:نسرين اني كان نخلي طوبى...مش بعيد نختش مرة وحده...اني مانبيش غيرها...وكانك ع نجاه قداش ليا محولها من راسي..معاش نبي حد يجي ويقولي سيب طوبى نسمع حد فيكم يعاود يقولهالي مش حيصيرله طيب..
وناض من حداها وهو معصب..
وخلاها مصدومه في وضعه...وهدا وين زادت خافت منه ع طوبى أكثر من قبل...
☘وطوبى فهالساعه من الليل..
كانت في مكان مستخطي من حوش جدها مقعمزه ع الصلايه تقرا في سورة البقره بعد ماصلت القيام...
وصلت في آياتها الاخيره..
جتها رساله ع الهاتف...
كملت قراية السوره..
بعدين حطت المصحف مكان السجود..
وخدت تليفونها من جنبها وفتحت الرساله..
(محتاج نكلمك توا ضروري)
هي ردت عليه..
(باهي)
طول اتصل بيها ردت..
طوبى:السلام عليكم جالي..خيرك شغلتني..
"وعليكم السلام..لاماتخافيش مافي شي بس كنت نبي نسمع صوتك محتاج نسمعه هلبه..يريح فيا هلبه"
طوبى بإبتسامه؛امم..باهي شن رايك في حاجه تعرف كان قلتها وضحكت عليا والله معاد نكلمك ليوم الخميس..
قعد يضحك..
طوبى:حي اني مازال ماقلت شي!؟
هو هدا ضحك وقال
"خلاص خلاص...قولي ترا"
طوبى بإبتسامه؛شن رايك نحكيلك حكايه لين ترقد..
معاش سمعت صوته..
طوبى؛جالي..آلو..جالي معاي.!؟
شويه جاها صوته فيه شي غريب وهو يقول..
"معاك معاك"
طوبى ضيقت عيونها وقالت:بعدت التليفون وقعدت تضحك ولا..
وانفجر الجالي ضاحك..
وطوبى تسمع فيه وهي تقول:خلاص جنيت ع روحك واني حلفت..تصبح ع خير ياعزيزي...
وسكرت عليه..وقعدت تضحك..
عاود عليها اكثر من مرة ماردتش بعتلها رساله وقال..
(تو نحاسبك عليه كله)
وهي قرت الرساله وقعدت تضحك..
بعدين هدت ضحك وتنهدت وقالت..محلاه...
☘☘☘☘☘☘
ويجي اليوم بعده...
يوم الفاتحه والكسوة..
نساوين حوش شنيبه كلهم لبسوا عربي..
تركيبات ع صدرة...
حتى من نجاة لبست عربي بس شرقاوي وكانت طالعه فيه حلوة بالمرة..
قعدت دور في الجالي تبيه يشوفها..
لين جي نازل من الدروج شافها ابتسم..
وهي ابتسمت..
فات من حداها وقالت؛قمر..
وهي سمعتها وضحكت..
هو بعد طلع تنهد وتلاشت ابتسامته..
ومشي ركب سيارته طول وطلع برا الحوش متوجه للجامع اللي كانوا سابقينه عليه بوه وخوته واقاربهم...
وين وصل غادي شاف عيلة الواعر غادي كلهم..
حتى من حسين حضر..
مشالهم سلم عليهم كلهم..
ولما وصل في حسين..
حسين:معليشي نبيك شويه..
ومشي والجالي مشي معاه..
تباعدوا شويه..
وقف حسين والجالي وقف قدامه..
حسين تنهد وقال؛طبعا حني متربيين مع بعض ونعرفك ونعرف اخلاقك كويس ونعم الرجل..
الجالي:بارك الله فيك..
حسين؛فيك بارك الله..ومع هدا بنوصيك على وخيتي الصغيره طوبى..حطها في عيونك ياجالي..اللي زي طوبى مفروض تعيش مدللة تنقام من ع الأرض..خليها تاج راسك كيف ماكانت عندنا حني..وحط في بالك ديما ان عندها خوت مستعدين يديروا ع خاطرها مايندار كان انضرت شعرة منها..
الجالي كان يسمع فيه بهدوء وهو مبتسم وبعد كمل كلامه قال:كلامك كله حناخده بعين الاعتبار..ونقولك اطمن ع الآخر..طوبى مكانها عيوني..
حسين اللي كانت في داخله نار والعه تحرق في جوفه..
عكس ظاهره اللي كان بارد وعادي قال:هدا اللي توقعت نسمعه منك ربي يكمل ع خير..
الجالي طبطب ع كتفه وقال؛امين..وعقبالك..
ومشي وخلاه..
وعيون حسين اللي كانت كلها نظرات غيره معاه..
وعيوم عبد الرؤوف عليه وهو يتفكر في كلام غرفه عنه..
"حسين ولد عمي عاشق لأختي طوبى بيموت عليها بس هي تشوف فيه خوها بس..ضربته كانت قويه هلبه الله اعلم كيف بيتخطاها"
عبد الرؤوف بطيبة قلبه نسي كل شي وقعد يشوف لحسين بعين ع الشفقه ع حاله..
عاش عمره كله يحب ويتمنى في وحده قسمها الله لغيره..
وحس ان اللي عايشه حسين توا هو ماعاشش ربعه...
عذاب مش معروف اذا كان في ليه نهايه او لا...
☘☘☘
وآذن العصر..
وصلوا...
ومن بعد الصلاة بدت مراسم عقد القران..
ولأول مرة..
يحط محمد شنيبه يده في يد لطفي الواعر..
كان المهدي يشوف فيهم ويمر بعيونه شريط الذكريات..
ذكريات المرات اللي طلب فيهم سدرة وكان نصيبه منهم الرفض..
عكس ماصار مع خوه الجالي اللي جاه كل شي ساهل وهما رحبوا بيه وفرحوا وعطوه اغلى بناتهم..
حول عيونه عنهم وشاف للحاج علي لقاه يبان فرحان حتى هو..
قال في نفسه"شن اللي ماكانش عنده ولقيتوه عند خوي وافقتوا عليه بدون تعب..ورفضتوني اني اللي حفيت واني ماشي جاي عليكم!؟ مانقول غير الله يسامحكم ويسامحني معاكم"
وبعد يسمع في الشيخ وهو يدعي..
وحسين يشوف الجالي كيف يبان فرحان..
قداش تخيل مرة انه ناض قتله..
او انه ناض وقف كل شي وقال..
"اني ولد عمها واولى"
بس ماكانش يقدر يدير من هدا كله شي..
كمل الشيخ الدعاء بعد آمنوا الحاضرين وراه..
وناضوا مع الجالي وقعدوا يهنوا فيه ويباركوا..
ووصل خبر للنساوين من العيلتين..
نساوين عيلة شنيبه قلبوا الدنيا اغاني وزغاريد..
ونجاه استغلت انشغالهم ومشت خشت الكوجينه صبت طاسة ميه وشربتها كلها وهي ترعش بس تحاول تهدي في نفسها..
دموعها غلبوها ونزلوا..
هربت بيهم لجناحها..
بعد مابكت...رجعت عاودت مكياجها من اول وجديده..
وبعد كملت حطت قناع اللامبالاة ع وجهها ومشت طلعت من الجناح..
☘اما الصاله اللي كانوا حاجزين فيها عيلة الواعر بش يديروا الكسوة..
كانت مقلوبه بعد ماوصلهم خبر قراية الفاتحه..
وطوبى كانت في وسطهم تتفرج عليهم وهي مبتسمه بفرح...
☘☘☘
وبعد حوالي نص ساعه..
كانوا واصلين عيلة شنيبه بكساويهم للعرايس الزوز...
"العين قالت يامرحب بيه اللي جانا وجاب كساويه"
بهالشتاوة استقبلوهم نساوين عيلة الواعر..
حطوا سوابيت العرايس الزوز في النص بس منفصلات..
وبدوا بالشتاوات...
يامبروك على غاليا ..
فرحانه من جد ونيه...
......
يامبروك ع غاليتي..
حطيتك وين تهنتي..
......
يامبروك على غالينا
هدا وين تسمت لينا
......
الطير الحر منين هبط
ع مربوعة بوها حط..
.......
سلم بوه قعدله مرسى
ياجياب كساوي عرسه..
........
ياوين عرفها ترهونيه
حط الألف وزاد الميه...
.......
ذهب صافي من جد لجد
خوتي مايسواهم حد...
☘☘☘☘☘
وتم الشوط..
وقعمزوا عرب الكسوة ع طاولاتهم..
بعدين دخلوا الكسوة داخل...
☘مطيرة:هيا اميمه اوفقي..
جتها امها ومعاها وحده من اقاربهم..
ومعاهم حولي البدله الكبيره والفجره..
وبدوا يلبسوا فيها وهما يلالوا عليها..
وبرا في الشاشات الحاضرين يتفرجوا...
بعد ماكملوا..
خدوها طلعوها...
وقدامها زوز صدارات من حوش شنيبه شادين المرايه وقدامهم مروة بنت فايزة بالصونيه متاع الحنه...
وصلوا بيها للقاعه...
والزغاريد بدت تتعالى...
خشوا بيها داخل وتوجهوا للكرسي الكبير..
وقعدوا يدوروا بيها عليه...
وهما يغنوا..
"دوروا بيها..دوروا بيها وان شاء الله السعد يواتيها"
وعيون نجاة ع الكرسي وهي تشوفله وتشوفلهم بتركيز..
لاحظت ان مافي حد جي جهة نقطة معينه..
اللي تكون قدام كرسي العروسه بالزبط..
لما كملت اميمه السبع الدورات وقفوها في هديكا التركينه..
هي بس..
نجاة لما شافتها هزت راسها وهي مضيقه عيونها..
وجتها عمتها مطيره رفعتها ونزلتها سبع مرات بعدين قعمزتها..
وتلاقوا عليها وبدوا بالشتاوات...
☘وطوبى في دار العروسه مقعمزة تستنى بروحها..
وفيدها مصحف صغير تقرا منه في سورة البقرة...
شويه وخشوا عليها مرت عمها صفيه ومعاها وحده جارتهم ومعاهم الحولي والفجرة وقالوا..
صفيه:هي طوبى اوقفي..
حطت المصحف ع تركينه وناضت وقفت..
ع خشة اميمه ومعاها عمتها مطيره وغرفه..
غرفه شبحت لأختها وقالت:بيبو..
ابتسمت طوبى..
وبدوا النساوين بالملالاة..
ومشتلهم مطيره تغني معاهم..
وغرفه جت لأميمه تساعد فيها بش تحول الحولي...
☘وكذلك كانت الشاشات في القاعه ناقله اللحظه اللي يلبسوا في طوبى فيها..
وفي عز انشغال الناس...
نجاة قالت لبنتها؛بري قعمزي ع الكرسي الأحمر هداكا..
وجوري طول ناضت ومشت للكرسي وقعمزت...
مرت نجاة نظرها ع خوات طوبى..وع حمواتها وعزوزتها..
كلهم كانوا منشغلين يتفرجوا...
هي ناضت ومشت لبنتها..
نزلتها وقعدت شادتها..
وطلعت من عبها حاجه..
فتحتها وقعدت ترش فيها في نفس المكان اللي ركزت عليه..
ومافي حد ابدا انتبه عليها..
بعدين كملت خدت بنتها وولت بيها للطاوله..
فجأة رن تليفونها شافاته لقتها صابرين تتصل ناضت ومشت طلعت من القاعه..
وهني خديجه انتبهتلها....
من جهة تانيه..
سدرة؛خلاص بيجيبوها..
النفتت ع الكرسي تشوفله لقت منثور عليه ورق حنه..
قدمت بش تحولهم...
وصلت فيه..
وتخطت مكان السحر اللي حطاته نجاه....🍃
طبست وقعدت تحول في ورق الحنه..
بعدين وخرت وشافتهم وهما خاشين بيها..
غرقوا عيونها بالدموع وهي مبتسمه..
وصلوا بطوبى للكرسي وبدوا يدوروا بيها...
ع خشة نجاة للقاعه مرة تانيه..
قربتلهم..
وقعدت دور معاهم وهي تصفق....
وتراقب في طوبى..
لعند ماكملوا بيها السبع الدورات..
بعدين وقفوها في هداكا المكان..
ونجاة تشوفلها وع وجهها ارتسمت ابتسامه نصر خفيفه..
قدمت سدرة لطوبى..
وضمتها وبدت ترفع فيها وتنزل وهما بعدوا لين وصلوا لرقم سبعه..
قعمزت سدرة اختها...
وبدوا بالشتاوات...
انشد سابع جار عليها..
حرة وين تحط ايديها...
........
انتي صليتي وبوك دعي
اللي حصلتي خويا..
.........
يابنيه كان جيتي لأمك
مشكورة ماوالي يذمك..
.......
ياكيف الصقر يحوم وراها..
سكر راسه لين خداها.
🍃نجاة لما سمعتها ابتسمت بتهكم🍃
...........
حتى كان صغيرة في سني
يشكولي مايشكوا مني..
............
ان شاء الله بنت حلال تجينا
من فم الحوش تلاقينا..
...........
ابنيتنا دلوعة بوها
اصحوا ياناس تبكوها
.........
الحوش اللي مليان صقورة
ان شاء الله مانعيط في سوره..
...........
ترهونيه وراسي عالي
نفرح ويقولوهالي..
وانقلبت الصاله بهالشتاوة..
والترهونيات شاشوا ومعاش قدرهم حد..
مطيره..
معروفين تراهنا..كبير وعالي جاهنا... ☘ والترهونيات رافعات ايديهم فوق ويصفقوا ويرددوا ورا مطيره..
مطيرة..
اه يامحلا القسميه..زليطني مع ترهونيه..
نشطوا معاهم عيلة شنيبه وقعدوا يشتوا معاهم..
بعدين اريج غنت..
بالطول بالعرض وطوبى زي الورد..
وقعدوا يردوا وراها...
بعدين آلاء غنت..
ياطوبى ياسمح..يارشوا عليه الملح..
وصاحوا خالاتهم وقعدوا يغنوا مع بعض..
وطوبى تسمع فيهم وهي تضحك وتقول بهمس..
غبر في عدوكم شن قاعدين تقولوا بس..!
وفي النهايه ختمتها مطيره..
هو صقر وهي ريمه ان شاء الله بعشرة عمره ديما....
وفي الاخير كلهم قالوا مع بعض..
"ألف الصلاة والسلام عليك ياحبيب الله محمد"
☘☘☘☘☘☘☘☘
الساعه 1:00ليلا...
"طوبى حبيبتي".
فاقت طوبى وهي تقول:اممم..
سدرة:قاومي شويه حبيبتي خلاص قعدت اليد هادي بس..
هزت راسها وقعدت شادة روحها عن النوم وسدرة تحني فيها..
وحداها اميمه ليا ساعه محنيه وراقده..
والحوش كل من فيه يغط في النوم...
ماعدا سدرة ومعاها طوبى اللي قاعده تقاوم في النوم..
سدرة:هي خلاص حبيبتي كملنا...ارقدي..
رقدت طوبى..
وسدرة غطتها..وباست ع راسها..
طوبى وهي مغمضه عيونها:ارقدي حداي..
ابتسمت سدرة وقالت:حاضر نلم الحوسه بس..
ولمت سدرة حوسة الحنه وغسلت ايديها..
بعدين فرشت ورقدت حدا طوبى...
قعدت تتأمل في وجهها وهي راقده..
دموعها نزلوا..بعدين مسحتهم وغمضت عيونها وماهي الا لحظات ورقدت.....
🍃🍃🍃🍃🍃🍃🍃🍃🍃🍃🍃🍃🍃🍃🍃🍃🍃
يوم الخميس...
10نوفمبر2017...
شادات في ايدين بعض...
وكل وحده فيهم خدت طاسه فيها مية رقيه وسطها طوبو..
قعدت تشرب فيها منه...
بعد كملوا..
سدرة؛-اقروا المعوذات ماتبطلوش اقروها لين توصلوا للكوشه..
الزوز قالوا؛حاضر...
المصورة؛هي نبدوا..
سدرة؛تفضلي...
☘وفي القاعه اللي كانت مليانه...
وكانت مشتركه...
حضروا فيها نساوين عيلة شنيبه الصغار بس..
الكبار قعدوا يراجوا في الحوش...
كانوا كلهم يراجوا في طلة العرايس...
فجأة..
ظلمت الصاله كلها وانفتح السبوت لايت ع المكان اللي بيخشوا منه...
شغلوا زفة حسين الجسمي..
وخشوا الزوز....
كانوا مختلفات عن بعض اختلاف كبير..
اميمه كانت عروس جميله جدا وكلاسكيه..
بفستان اببض منفوخ وكبير وطرحة طويله...ومكياج ثقيل..
عكسها طوبى اللي كانت عروس بطله غير تقليديه..
فستان زفاف بسيط جاي ع الجسم كله ضابط..تسريحه حلوة...مع مكياج ناعم غير مبالغ فيه..
وطرحة بسيطه...بس كانت جدا جميله..جدا ملفته ومميزة للغايه...
قعدوا يدرجوا الزوز..
والناس محتارين مني اللي يطلعوها احلى من الثانيه كل وحده فيهم كانت حكاية بروحها..
نجاة ماكانتش تشبح غير في طوبى..
ضحكة طوبى..فرحة طوبى.
وتزيد تنقهر منها وتحقد عليها اكثر...
وصابرين اختها كانت حاضرة حتى هي...
لما شافت طوبى وجعتها اختها هلبه..
وزادت بررت لنفسها واختها الفعل الشنيع اللي اقدموا عليه...
🌸وصلوا العرايس للكوشه..
وكل وحده فيهم قعمزت ع كرسيها...
وبدت المصورة تاخدلهم في لقطات..
شويه وركبولهم حمواتهم سلموا عليهم ووقفوا هدرزوا عليهم شويه بعدين ولوا لطاولتهم..
وبعدها جوهم البنات...اريج والاء وغرفه..
وقعدوا يهدرزوا عليهم...
☘☘☘☘☘
"حتى راجلي يغار عليا..
حتى راجلي يدلع فيا"
والصاله انقلبت في لحظه والمتزوجات كلهم ناضوا يرقصوا..
وع راسهم خديجه..
اللي كانوا نجاة وصابرين يعلقوا عليها ويضحكوا..
صابرين بضحكه:اللي يشوفها مايقولش خانها مرتين وطلقها مرة.
نجاة:خديجه هادي اكبر وهميه تقابلني الحياة..
وصابرين تضحك..
بعدين نجاة قعدت تهز في كتافها وتغني:حتى راجلي يدلع فيا..
صابرين:حتى راجلي يموت عليا...
نجاة:نوضي ارقصي صابرينا..
صابرين؛حاضر..
وناضت ومشت خشت في نصهم وقعدت ترقص..
وتجي حدا خديجه ودير في حركات بالقصد تغيظ فيها..
صابرين:حتى راجلي مايخونش فيا..
حتى راجلي مايعرف حد عليا..
وخديجه وهي ترقص قريب تجبدها من شعرها...
وباهي اللي تمت الاغنيه بش كل وحده شدت مكانها وريحت روحها...
☘☘☘☘☘☘
"انا في حوشي زايطه..والناس عليا شايطه"
وغرفه ترقص ع الأغنيه هادي..
وخواتها يتفرجوا عليها بحب..
اميمه وهي تشوفلها قالت بإبتسامه:تهبل روفي..
طوبى:مش عاديه طالعه...
شويه وجتها سدرة نزلتها خوف عليها من العين...
☘واستمرت الحفله بأجوائها الحلوة..
وكان احلى شي صار فيها لما العرايس ناضوا رقصوا...
وتوثقت هديكا اللحظات صوت وصورة في الكاميرا العاديه..وكاميرا العقل....
🌸جابوا العشي للمعازيم وقعدوا يتعشوا..
ونجاة تاكل وتراقب في طوبى بس...
فجأة..
شافتهم الزوز وقفوا لما جتهم آلاء وكلمتهم..
بعدين نزلوا بمساعده البنات وطلعوهم من القاعه وخشوا بيهم داخل..
ونجاه بطنها بدت توجع فيها...
واختها تشوفلها...
☘☘☘
حطوا طوبى في دار ..واميمه في دار...
🌸عند اميمه..
خش عليها عمر ..
لما شافها انذهل فيها وقال:الله يبارك الله يبارك..ملكه ياعمري ملكه...
اميمه بإبتسامه:حتى انت تهبل الله يبارك.
باس جبينها وقال..ربي يحميك ومايحرمني منك ياعمري..
اميمه:ولامنك..
ع خشة نسرين قالت بضحكه؛اسفه خشيت طول هكي.
بس استعدوا ياحلوين بتطلعوا انتم الاولين..الجالي قاعد في الطريق..
عمر:تمام..مش مشكله..
جت نسرين لأميمه ساوت طرحتها...
بعدين خشت المصورة وقالت:هيا!؟
نسرين:هيا
وحطت اميمه يدها ع ذراع عمر..
وفتحولهم الباب ع مصرعيه وطلعوا هما الزوز..
☘خشوا للقاعه الزوز ع وحده من الأغاني الجميله..
وكانوا الزوز طالعين ع بعض هلبه وحلوين مع بعض ع الآخر..
وصفيه تشوف لبنتها بدموع فرح وهي تدعيلها بينها وبين نفسها..
وصلوا للكوشه وبدوا يبدلوا في اماكن الدبل والزغاريد مسموعه في ارجاء القاعه...
بعدين خدتلهم المصورة لقطات مع العيله....
☘فهالوقت..
خديجه سيبتهم وطلعت بش دخل الجالي..
خديجه:وينك هدا كله..
الجالي:مشاوير خاصه..وينها طوبى..
ضحكت وقالت:اهي هني..
وصلت في باب الدار فتحتها..
طوبى كانت واقفه قدام المرايه تشوف في روحها..
لما انفتح الباب التفتت..
شافاته خاش ابتسمت..
الجالي بإعجاب شديد؛بسم الله ماشاء الله الله يبارك..
وجي لطوبى سلم عليها بالخد بعدين ضمها..
طوبى تحشمت هلبه شداته وقالت:جالي!
بعد عنها والتفت لخديجه وقال:قصدك انتي قاعده مادة وجهك!
جبداته طوبى من كمه وقالت:جالي!
خديجه بضحكه:مش مدوراته..
الجالي:بارده الله غالب..
وطوبى تضحك..
ع جية نسرين لما شافتهم مع بعض قالت:الله يبارك عليكم تهبلوا..
ابتسموا الزوز وطوبى قالت:تسلمي..
نسرين؛عمر واميمه طلعوا خلاص..
ع جية المصورة قالت:هيا!؟
خديجه ونسرين قالوا:هيا...
والجالي وطوبى شدوا في ايدين بعض بقوة وشبحوا لبعض وهما يتبادلوا في النظرات الحلوة والإبتسامه...
🍃🍃🍃🍃🍃🍃
في هالأثناء..
من بداية شارع القهوة..
خشت سيارة اجرة...
السائق متاعها جايب معاه مسافر جاي من مكان بعيد...
جاي بش يستقر في طرابلس ويخدم فيها ويكمل باقي عمره فيها....
كان وهو في السيارة يشبح القدام وع وجهه ملامح أمل
مش معروف شن سببه...
🌸وفي هاللحظه..
خشوا طوبى والجالي للقاعه ع انغام اغنيه..
"طلي بالأبيض"
ونجاة لما شافتهم مع بعض..شدت يد اختها صابرين بقوة من القهره والغيره الشديد...
وصابرين شدت يدها بقوة بوجع ع حالة اختها..
وطوبى والجالي وجوههم ابتسامه حلوة..
خلت اللي يشوفهم يحبهم مع بعض هلبه...
نظرات سدرة كانت نظرات فرح واطمئنان..
ونظرات باقي خواتها وبنات اختها نظرات فرح وحب..
لما جت عيونها عليهم رفعوا ايديهم وحيوها..
وهي رفعت يدها وردتلهم التحيه..
🍃والزائر الجديد لشارع القهوة..
في سيارة الأجره..
يدور بعيونه فيه يشوف في اهم معالم والاماكن المميزة اللي فيه لعند ماجو عيونه ع مطحن الجنه...
وين شاف الاسم حس بشعور غريب بس حلو..
خلاه يبتسم ابتسامه خفيفه...
🌸وابتسامة طوبى كانت واسعه اول ماوصلت للكوشه..
وقعدوا حمواتها يساووا في طرحتها..
الجالي كان يشوفلها وهو بيموت عليها..
ونجاة تشبحلها وكان تلقى تطلق الموت عليها...
🍃والزائر الجديد
اللي درست بيه سيارة الأجره قدام الحوش اللي جنب قهوة حوش شنيبه..
نزل وهولابس بوت كبير لونه قهوي...كان يشبه البوت العسكري..
ولابس سروال جبنز ازرق غامق..ع سوريه بيضا وكبوط جلد اسود..
مشي وقف قدام الحوش..
وسيارة الاجرة مشت...
:هضا هو الحوش اللي الدور الاول متاعه مطعم..
وجنبه قهوة جنبها مطحن..
التفت وشبح لمطحن حوش الواعر:زوز مطاحن قهوة مقابلات بعضهن..لهالسبب سموه شارع القهوة..
"ياخوي"
التفت وشبح لمصدر الصوت اشر ع نفسه وقال؛تدويلي!؟
جاه محمود اللي يخدم في مطحن شنيبه وقال:انت عبد القيوم عمران..
ابتسم وقالت؛هو بذاته..
:اهلا وسهلا بيك والحمد لله ع سلامتك وتفضل هدا مفتاح شفتك..
عبد القيوم خدي المفتاح وقال بضحكه:اهلا بيك..والله يسلمك ويزيدك فضلك..
ضحك محمود وقال:خش من غادي..واشرله ع الباب..
عبد القيوم بإبتسامه؛بارك الله فيك..
ومشي وهو يقول: لو كنت مكانه اول حاجه نديرها نضيف الراجل اللي خش عليا غريب وواصل من السفر..قالوها ليا واجد عرب في طرابلس في حسن الضيافه بالهون...
وصل في باب الحوش..
قال...
"اللهم ادخلني مدخل صدق..واخرجني مخرج صدق..بسم الله"
وخش عبد القيوم عمران التارقي برجله اليمين....

#حق_مشروع
#طوبى

....يتبع....