طوبى الجزء الاول

تابع

#طوبى "جنة طوبى"
#جمان_فريد
#الجزء_التاسع_والخمسين"اسرار 2"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕
طلعت من الصاله ومعاها بنتها وهي تقول؛بري حبيبتي للجناح وطلعي حوايجك اللي بتلبسيهم..
جوري مشت تجري للجناح وهي تقول؛حاضر..
ونجاه ماشيه وراها ع مهلها..
سمعت باب الحوش انفتح..
وقفت والتفتت..
شافت الجالي خاش..
ابتسمت وهي تشوفله..
هو حول كندرته..وقام عيونه جو عليها..
ارتسمت ع وجهه ابتسامه جانبيه..
ع طلعة خديجه من الصاله..
الزوز انفجعوا..
هو اختفت ابتسامته..ومشي طول للمربوعه..
وخديجه معاه بعيونها لين اختفي من قدامها..
التفتت لنجاه لقتها قاعده في مكانها وتشوفلها بإبتسامه مستفزة..
قدمتلها لين وقفت قدامها وهي تقول؛اللي دايرتيه لخوي تو  نعرف شن هو ونحوله وتشوفي بعدين شن يصير فيك..
ضحكت نجاه نص ضحكه ساخره وقالت؛ضحكي ياديجا..حبيبتي اني مانربطش الرجاله بيا الا بالحب ياقلبي مافيش راجل قعد معاي بدون ارادته ولاغصب عنه...خوك يحبني ياحلوة يحبني..ماتعمميش حالتك ع غيرك..
رفعت حواجبها وقالت؛يحبك!!..باهي علاش تزوج غيرك كان يحبك...
نجاه؛مجبور ياعيوني..
ابتسمت خديجه تهكما وقالت؛تمام..خيريه بينك وبينها..اجبريه وشوفيه شن يدير...
ولفت ومشت وخلتها بعد مانجحت في حرق دمها واستفزازها..
هزت راسها هي تقول بوعيد؛تو تشوفي
ولفت ومشت لجناحها وهي معصبه
🍃وفي مكان تاني..
كانت اختها بين احضان الفاحشة..بعد ماسولتلها نفسها بدعوى الحب انها تسلمها لشخص يدعي زورا انه المحب المتحضر المتحرر من قيود المجتمعات الجاهله في نظره..
ومن قيود الدين اللي ولوا هلبه ناس يشوفوا فيه موروث ثقافي يعني عادات وتقاليد باليه لازم تختفي وينسوها الناس..
☘اللي متبنيين هالفكره زادو هلبه في وقتنا الحالي والمصيبه الاكبر انهم بدوا ينشروا في فكرهم وثقافتهم المشوهه اللي خدوها من الغرب للناس عن طريق وسائل التواصل الاجتماعي..وللأسف مش بس المراهقين اللي تأثروا بيهم حتى اللي ينقال عنهم كبار وناضجين☘
🍃🍃🍃🍃🍃
لبست كندرتها وهي تقول؛اختي من بكري تتصل..
مختار؛تو يوصلك رضا بسرعه ماتخافيش
صابرين؛تمام..سلام توا حبيبي..
هو بإبتسامه؛استني..
وقفت وهي تشوفله..
هو قدملها وعطاها علبه مجوهرات صغيره....
هي خداته وفتحاته لقاته سلسال ألماس ناعم حلو..
ابتسمت وقالت؛يجنن..
هو قال:زيك..
ضحكت وقالت؛حبيبي...خلاص لازم نطلع توا..باي ياقلبي..
وفتحت باب الشقه وطلعت..
وهو بعد ماطلعت..رن تليفونه..
لف وخش داخل وهو يشوف في المتصل..بعدين فتح الخط وقال..
شنو؟.............لالا نهيت الشغل اني وياه المشروع اللي كان بيني وبينه كملناه........لالا خلاص...نزل التليفون وسكر وقال بصوت عالي:ديري قهوة وجيبيها للمكتب..
ومشي بطريقه لمكتبه...
☘☘☘☘☘
ومع المغرب..
خشت فردوس بصغارها لحوش بوها..
اليوم كلهم ملتمين ع خاطر مرواح خالهم من السفر يبوا يعرفوا منه اخبار حالة سدرة..
في الصاله قعمزوا كلهم مع بعضهم وقعدوا يهدرزوا ع اكثر من موضوع يخصهم..
خدمة طوبى في المدرسه..قصة زواج عمر شنيبه وردة فعل اميمه..
شويه ناضت طوبى ومشت بدير قهوة..
واريج ناضت وراها ولحقتها...
وخلوهم يهدرزوا...
🍃في الكوجينه..
خشت اريج وقعمزت ع الكرسي وهي تقول:بيبو خيرك؟
طوبى وهي دير في القهوة؛خيرني؟!
اريج؛حسيتك مضايقه جوك مش حلو..ع خاطر اميمه؟
تنهدت طوبى وحطت البكرج ع النار بعدين شبحتلها وقالت؛اكيد مضايقني اللي صار معاها..بس اللي ضايقني اكثر التتش اللي صار بيني وبين الجالي
اريج؛علاش شن صار!؟
طوبى بضيق؛زي ماتعرفي كان برا طرابلس اليومين اللي فاتوا..المهم اليوم روح وجاني هني هدرزنا شويه واني كلمته باسلوب مش حلو من حرقتي ع اميمه..
اريج؛لابيبو غلط هكي هو شن دخله!؟ ماتخربيش ع روحك..
طوبي:تمام..لكن حتى هو مستفز جاي يقولي روحي معاي وهو عارف شن في عندهم..
اريج؛هو يبيك تروحي معاه لأنه مستاحشك طبيعي يعني..
طوبى:مفروض قالي نروحوا لحوشنا مش حوش ماليه..
اريج سكتت وهي تشوفلها بضيق..
التفتت طوبى لبكرج القهوة..
لقاته كيف بادي يغلي..خدت كاشيك وشدت يد البكرج ورفعاته وقعدت تحرك فيها..
بعدين للنار وولت تغلي..رفعتها مرة تانيه بعدين رجعت حطتها من جديد..
واريج تراقب فيها وملاحظه انها تفكر في شي..
طفت طوبى ع القهوة وقالت؛تعرفي..
اريج؛شني..
تنهدت وشبحت لأريج شويه بعدين قالت؛حاسه ان طلاق اميمه مش بسبب خدمتها بس في شي تاني..
اريج بإستغراب؛علاش حسيتي هكي؟
ردت تقول وهي تفكر:زواج عمر بعدها بسرعه هكي..وكيف كلهم سعوا للحاجه هادي..عمتي..خديجه..نسرين..واللي مخليني متأكده من اللي في عقلي موقف عمي..يعني زواجه بسرعه هكي واضح للناس كلها انه نكاية في اميمه نفسها وعمي كان يعز اميمه شن يخليه يرضى بحركة زي هادي..
اريج؛مافهمتش شن تبي تقولي..
تنهدت طوبى وقالت؛قصدي ان المشكله اللي خلت اميمه تطلق ماكانتش بينها وبين عمر بس..كانت بينها وبين العيله كلها..
اريج؛ الحاجه هادي كلنا عارفينها طوبى وانتي بروحك حكيتي عنها قبل...
طوبى؛ركزي معاي اريج..اني نحكي ع المشكله اللي صارت يوم انضربت اميمه..ماكانتش بين عمر واميمه بروحهم..
اريج؛اها...تمام..شن اللي خلاك تقولي هكي باهي؟
طوبى:اميمه قاعده تحب عمر..وحسيتها الفترة الاخيرة زي اللي نادمه..بكري لما سمعت ان فاتحته غدوة هربت هروب بش مايشوفها حد وهي تبكي..تعرفي اريج..اني مفكره في الابعد من هكي..
اريج؛ياستار..! في شني..؟
عقدت حواجبها وقالت؛شاكه ان عمر هو اللي ضربها..
اريج؛لاعاد..اميمه بروحها قالت عمر ضربني..
طوبى؛مرات بلعاني قالت هكي بش تطلق..
اريج؛وكيف فكرتي فيها هادي؟
طوبى:حسين..حسين يومها يهدرز هو وجدي في الموضوع نفسه سمعته قال..في الاول نكر انه ضاربها بعدين اعترف وقعد يسب فيه.
اريج:طبيعي بينكر في الاول..
طوبى؛وشن اللي جبره بعدين يعترف علاش!؟ اني بروحي استغربت لما عرفت انه ضاربها لاني عارفاته يحبها هلبه ويخاف عليها..بعدين قلت بالك مش الشحن والاستفزاز..لكن بعد سمعت كلام حسين ليلتها تأكدت ان مش ضاربها ولما زدت فكرت فيها..حسيت انه كذب بش يدرق ع حد تاني..
فتحت اريج عيونها ع وسعهم وقالت؛كيف! قصدك حد تاني ضاربها!؟ مني!؟
طوبى بضيق:وحده من خواته..وغالبا تكون خديجه ماكانتش تحب اميمه بكل..اساسا يومها..روحوا خديجه ونسرين قبل اميمه..اميمه روحت بعدهم بشويه..
اريج وهي تفكر:ايه صح متفكرة خالتي صفيه جتها كلمتها بعدين روحت..شبحتلها وقالت..امتى فكرتي في هدا كله؟!
طوبى:من لما سمعت بيه خطب..وزادني كلام حسين..
اريج؛باهي..لو حق صار زي ماقلتي..اميمه علاش لتوا قاعده تقول ان سبب طلاقها الخدمه وان صار بينها وبين عمر عركه ع خاطرها خلاته يضربها!؟
طوبى وهي تفكر؛الحاجه هادي نبي نعرفها..
اريج؛سألتيها؟
طوبى؛من مدة بعد ماطلعت من المصحه بايام..قبل طلاقها يعني بطريقة غير مباشرة قالتلي اسباب مش مقنعه هلبه..هي تعرف عمر من قبل طباعه مش غريبه عليها ومع هدا وافقت عليه..وتوا قاعده تبكي عليه...
اريج بقلق؛حسك خوفتيني..اني من غير شي الايام هادي نخمم وخايفه..
طوبى بتساؤل؛من شني؟!
اريج؛نضال من لما سافر لتونس وهو متغير هلبه قليل النادر يكلم فيا وكان كلمني يقول كلمتين وقص..نضال عينه زايغة ياطوبى وانتي تعرفي الشباب لما يسافروا غادي شن يديروا..
طوبى ضحكت وقالت نافيه:لالالا مستحيل حولي من راسك الحاجه هادي..صح نضال عيونه زايغه شويه لكن مايديرش الحرام مستحيل ومن سابع المستحيلات حولي الافكار السودا هادي من راسك؟
اريج بقلق؛باهي قوليلي علاش فايتني من لما سافر..
طوبى وهي تفكر بقلق؛ان شاء الله مش المهدي فيه حاجه..
اريج؛زعمه!؟..كان في شي خوه عمر يقرا الفاتحه غدوة؟
طوبى:مرات ماقال لحد مايبيش يخرب عليه..
اريج وهي تفكر؛صح مرات يكون هكي..ياناري عمي مهدي مسكين..
طوبى ودموعها في عيونها؛ربي يسلمها ويسلمه..
اريج فهمت عليها وقالت بحزن:يارب..
ع خشة آلاء عليهم وهي تقول؛ديروا في قهوة ولاعصبان!؟
طوبى:حي نسيتها بكل!.
والتفتت عليها وقالت؛صقعت..خل نسخنها..
قعمزت آلاء وقالت؛في شنو كنتوا تهدرزوا هدا كله!؟ اكيد حكتيلها ع عمي اللي اهو الشهر وصل في نصه وماجابش الشهريه اللي يعطينا فيها..
طوبى؛كيف!؟
اريج بضيق؛امي اليوم الصبح كلمت حناي تقوله..
طوبى:كيف يقعد لنص الشهر مايبعتش فلوس!؟..معناها معاش عندكم ماتصرفوا؟!
اريج؛لامش لهالدرجه
الاء؛شن مش لهالدرجه خلاص الفلوس قريب يتموا واني وياك سيبنا خدمه ومعاش عندنا من وين نجيبوا الفلوس..
طوبى؛معقوله اريج!!؟ علاش ماتكلمتوش!؟
اريج ودموعها في عيونها:شن بنقولوا..مش سادكم الهم اللي انتم فيه..مش ساده جدي غصايص..باع كل شي عنده ومعاش في شي يخش ع الحوش مصروف منه كان المطحن....يعني قداش يدخل المطحن في الشهر وفي النهايه بالنص بين جدي وخوه..والمدرسه لخالتي ربي يردهالنا..مانقدروا ناخدوا من فلوسها شي
طوبى بعصبيه؛شن تقولي انتي..قصدك لو سدرة كانت معانا بتشد عليكم فلوسها؟!
نزلوا دموع اريج ومسحتهم وهي محرجه ع الأخر
طوبى؛اريج ماتنزليش راسك..ومعاش ديري هكي..هدا حوش جدك وخالاتك يعني خوات امك..شن ماناقصها وشن ماتبي تجي طول تقول وتاخد..هدا رزقها حتى هي ورزقكم معاها..
الاء بضيق؛الله لايسامحه عمي الندل هدا يعامل فينا بمزاجه التافه هو..
طوبى؛طز فيه وفي فلوسه..حوش جدكم وخالاتكم مفتوح تعالوا امتى ماتبوا وخودوا اللي تبوه..
اريج شدت ع ايديها بقوة وقعدت تبكي..
والاء وهي تشوفلها دموعها نزلوا..
طوبى؛لا روجه مش هكي ربي يهديك..
ومشتلها وضمتها وهي تقول؛معاش ديري هكي يااريج..
اريج ببكي؛لو بوي معانا ماصارش هدا كله..
طوبى دموعها نزلوا وهي تقول؛ربك في الوجود..وحني بعده يااريج...
🍃شويه وهدت اريج..
وسخنت طوبى القهوة ووتوا سفره قهوة وحلو وطلعوا مع بعض للصاله..
كانت اميمه كيف خاشه وقتها..
قعمزوا مع بعض يشربوا فيها..ماعدا طوبى...
فردوس؛خيرك طوبى ماخدتيش قهوة؟.
مطيره؛معدتها نايضه عليها الفتره هادي فاتتها..
اميمه شبحت لطوبى وقالت؛واني نشجعها تسيبها بكل..
طوبى وهي تحاول تبان عاديه؛نفكر فيها..
فردوس بضحكه:والله مانقدر نعيش من غيرها..
مطيره؛حتى اني..
وفتحوا موضوع تاني وقعدوا يهدرزوا فيه..
وطوبى تاكل في الحلو..طرف ورا التاني وهي تهدرز..
وفردوس مركزه عليها..
بعدين جي في عينها طرف الحلو اللي في يد اميمه لهت بالهدرزة وماكلتش منه..
قعدت تقول في نفسها...
لالا..مش لنفسها..لروحها التانيه الموجوده في جوفها..
"تبيها ماما..ماحطيت عينك غير هادي حبيبي...كيف بناخدها توا ياماما بس...ربي يهديك وليدي"
طوبى وهي متسهفه؛اميمه تبيها القرينه؟
شبحولها..
واميمه شافت لطوبى ومدتهالها طول وهي تقول؛لالا..
خدتها طوبى وكلت منها بطريقه غريبه..
كلهم استغربوا فيها ماعدا اميمه اللي تحاول ترقع الموقف..
اميمه؛ان شاء لله اللي عندك مش جرثومه معده تاكلي في الحلو هلبه...
فردوس؛علاش اللي عنده جرثومه ياكل حلو هلبه!؟
اميمه في نفسها"ارفسي يااميمه"؛ايه..
طوبى "كله منك انت"؛اني اصلا نحب القرينات متاع الشكلاطه تعرفيني..ماقدرتش نقاومها..
اريج؛صح احلى حاجه...
ابتسمت طوبى وقالت؛ايه..وحطت الباقي في فم واحد..
مطيره؛نقصي طوبى الفتره هادي زايده شويه لاقدر الله يجيك السكر..
فردوس؛ووك عليا بعيد السو..
ابتسمت طوبى بشي من الارتباك..
واميمه تشبحلها شويه بعدين تبدل نظرها بيناتهم وهي تشرب في القهوة...
🍃🍃🍃🍃🍃
وبعيد عنهم...
بعيد عن البلاد كلها..
عند جارتها...تونس الخضراء...
تحديدا في الشقة اللي مستأجرها المهدي وقاعد فيها هو وخوه..
كان يدور بينهم حديث مهم..ومؤلم في نفس الوقت..
نضال بشي من الانفعال؛باهي كيف بدير بروحك راك حتى انت قاعد مريض!
المهدي:مافيا شي..اموري تمام..انت غدوة بتروح وتم الكلام معاش نبي نقاش..اهم شي بعد تروح تقول للعيله الكلام اللي تفاهمنا عليه رد بالك تقول لحد غيره بالذات مرتك..
تأفف بضيق بعدين قال؛محملني فوق طاقتي يامهدي اقسم بالله..
المهدي؛انت راجل ينعبا عليه..
تنهد وقال؛باهي شن قالك الدكتور اليوم..يعني في امل لو طلعت بيها لألمانيا يصير منها..؟
بدت ع وجهه ملامح الألم غير عيونه عنه وقال؛قالي هني ماعندنا مانديرولها واللي تشوفه مناسب ديره..
نضال بأسف وألم؛لاحول ولاقوة الابالله..
المهدي:متأمل في ربي لأخر لحظه يدير معجزة اي حاجه االمهم تولي لصغارها تمشي ع رجليها مش قادر نتخيل حاجه تانيه..
نضال حط ايديه ع وجهه ومسحهم وهو يقول بوجع وعدم استيعاب:ياراجل والله ماني عارف شن بندير كان روحت كيف بندس ع محمد..محمد اربعه وعشرين ساعه معاي..استغفر الله العظيم..يعني يامهدي مالقيتش غيري ياخوي!..
المهدي حط يده ع ركبة خوه وشد عليها وقال؛قتلك انت الوحيد اللي نقدر نعبا عليه..طبطب ع ركبته وقاله..هي وتي روحك..غدوة الصبح الرحلة متاعك..
تنهد نضال بضيق بعدين هز راسه..وناض مشي للدار..
وقعد مهدي بروحه يفكر في الايام الجايه واللي بيصير فيها...
☘☘☘☘☘
"هاك خود"
خدي التليفون وقال؛مايديرلكش مشاكل بعدين ولا..
خديجه؛لايدير مشاكل ولاهم يحزنون بوك المشروع اللي بادي فيه توا معاش مخليه متفكر شي مش حينتبه ان تليفونك مش في دولابه حتى لو انتبه مش حيدور مش فاضي..شدت وذنه وقالت..لكن اني عيوني ولوا مفتوحات عليك تلبز مرة تانيه نطلق.عليك اللي احرف من اشرف والله والله نمشي نشكي فيك لكتيبه ونخليهم يطبوك وتقعد عندهم لين تتربى..
ضحك وباسها من خدها بعدين قال؛ماتقدرش ياقنين..
ومشي بسرعه طلع من حداها.
وهي قعدت تضحك وتحرك في راسها يمين ويسار بعدين مشت حتى هي طلعت من الشقه..
وين نزلت لوطا مشت لحوش شيابينها بش بتاخد راما من غادي وتمشي هي وياها لحوش بوها..
🍃عواطف؛بيات غادي لا ياخديجه..
خديجه:عواطف تلميحاتك عيب واني قاعده نفوت فيها بمزاجي..
عواطف رفعت حاجبها وقالت:مانبيكش تفوتيلي المرة هادي وريني شن بديري..
خديجه بنفاذ صبر:اللهم طولك ياروح..عواطف ماتخلنيش ندخل عمي..
اشرتلها ع الباب وقالت؛بري كلميه.
ولفت عنها وولت للعصارة وقعدت تعصر في البرتقال..
وخلت خديجه تغلي من الغضب..
مشت طلعت وتوجهت للصاله..
وين مافي شيبانيها وعزوزتها ومعاهم سلفها اشرف..
خديجه وهي حامقه؛عمي بالله عليك تصرف مع عواطف اني مانبيش ندير تصرف نندموا عليه كلنا..
اشرف؛تهددي ولاشنو؟
الصيد؛شويه يااشرف شويه..خيرها عواطف ياخديجه..
نجمه وهي تشوف لخديجه من فوق لتحت؛ماتبيش راما تبات في حوش شنيبه الحوش فيه شباب مايجيش ياحاج..
اشرف:تطلع من هني نقص رجليها..
خديجه شبحت للصيد وهي منفعله قالت؛تسمع ياعمي..
الصيد؛نسمع وكلامهم مافيشي غلط..
خديجه؛معقوله ياعمي تشكك في رباية ولاد خوي!؟ محمد ويزن متربيين احسن تربيه بعدين هما بيباتوا في شقة بوهم مش في حوش العيله..
اشرف؛وشقة بوهم وين!؟
خديجه بدون ماتشوفله؛اني ندوي مع عمي..
اشرف؛رد عليها يابوي..
الصيد؛عارف المناسبه اللي عندكم غدوة..غدوة تحضرها ماعندها علاش ماشيه الليله..
نجمه؛خلاص عمك قال كلامه..
هي تمالكت اعصابها ع قد ماتقدر ماتبيهمش يشدوا عليها شي..هزت راسها وقالت؛اللي تبيه يصير عمي.تصبحوا ع خير.
ومشت وهي بتنفجر من الغضب..
اشرف؛تبي البنت تفسد زي خوها بربايتها العوجه..
الصيد؛خلاص انهوا..
سكت اشرف وقعد يتفرج ع التلفزيون...
☘وراما مع عمتها نجاح في الدار تقري فيها لإختبار عندها يوم الأحد☘
☘وفي حوش جيرانهم...
خش عبد الرؤوف للحوش..
دار طلة ع الكوجينه لقي نبيله حاصله في العشي..
عقد حواجبه وقال بصوت منخفض:هديكا وين؟
ومشي طول للصالون..
لقاها متكيه تتفرج..
رفع حواجبها وقال:ماشاء الله ماشاء الله ماشاء الله..! شن ياللا..بالك تبي من يدلكلك رجليك بش تسترخي ع الاخر..!
ضحكت وقالت؛ايه والله حق...ترا تعالى دلكهم..
فنص فيها وقال؛نعم!..
هي صاحت بصوت عالي؛نبيله تعاليلي..
هو عض ع شاربه وقال؛نقصي حسك ياعنشكلك مرة وحده..
ع جية نبيله بسرعه وهي تضحك وتقول؛خليها مادخلكش بيها..
شبحلها وقال؛شن تقولي انتي تبيني نخليك تحوسي بروحك في الكوجينه وديري عشي اللا وهي تقعد راقده قدام التلفزيون!..
نبيله؛ايه..اصلا حني هكي متفقين..
رفع حواجبه وقال؛اها..
ومشي خدي مخده كانت ع الكرسي وقعمز عليه وضمها وهو يقول؛وع.شنو اتفقتوا انتي وياها؟
قعمزت غرفه وقعدت تشبح لنبيله وهي شاده ضحكتها..
نبيله بإبتسامه؛تراهنا اني وياها ع حاجه وهي ربحت الرهان وهدا كان شرط الرهان..
هو قال؛اها..وبدي يلف في المخدة بايديه الزوز وقال؛وعلى شني تراهنتوا؟
نبيله؛حاجه بيني وبينها مش لازم تعرف كل شي..
وقف لعب ونزل المخده ع رجليه واشر بسبابته ع غرفه وقال:اي حاجه تخص هادي لازم نعرفها..
نبيله؛باهي تراهن انت وياها ع حاجه وشرط الرهان تقولك ع شن تراهنا..
عبد الرؤوف؛ترا فكيني من اللعب الزايد وقولي طول ع شن تراهنتوا..
غرفه بإبتسامه مستفزة وبنغمه في صوتها؛عارف روحه بيخسر...
هو بحده قال؛عارف روحي عينك..
غرفه شبحت لنبيله وقالت؛خوك ممكن يربح رهانات قدام العالم كله الا اني..
شبحتله ع جنب وهي ترقص في حواجبها..
هو قعد يشبحلها وحواجبه معقوده بعدين قال:غير نبيله قاعده بس..
نبيله بضحكه؛عندها الحق في هادي معليشي..
ضحكت غرفه..
وهو فنص وقال؛منك جد انتي.!؟ باهي تمام ترا خلينا تنتراهنوا ع حاجه توا وشوفي من فينا يربح..
غرفه؛قبلها...شرط الرهان..اني نقعد تلاته شهور ولا اربعه مرتاحه مانتحركش بكل ولانقيم قشة من وطا..وانت بس اللي تخدمني..اشرت عليه وقالت..انت انت..انت بس.
ونبيله تضحك..
عبد الرؤوف؛لاهي بتصير حق بتصير..لونضت توا وقعدت نعطي فيها باليمين واليسار بإيديا ورجليا..
غرفه؛مش قتلك يابلبله..
حدف عليها المخده عيطت وتقت بطنها بإيديها..
☘اكيد المخده مش حديرلها شي بس الخوف في داخلها من الاجهاض ولى شبيه بالفوبيا مخليها تخاف من اي شي ممكن يأذي جنينها حسب مامصورلها الخوف في عقلها☘
هو استغرب الحركه هلبه...
ونبيله قالت؛غرفه..
غرفه شبحتلها وقالت؛خفت..
هو مرر نظره عليهم وقال:انتي وياها قولولي شن صار واني مهناش؟!
شبحتله غرفه ودموعها عبوا عيونها؛ماكنتش نبي نقولك قبل لنتأكد..لكن مانقدرش ندرق عليك اكثر من هبالك مرة تضربني ضربه...وسكتت..
هو شبح لبطنها وقعد يفكر بعدين قال:تقعدي تلاته ولااربعه شهور ماتتحركيش..!فتح عيونه ع وسعهم وقال..قولي والله!
نبيله ناضت وانسحبت من حداهم وهي مبتسمه بحب..
غرفه ودموعها في عيونها؛مازال مش متأكده..
ناض ومشالها قعمز جنبها وقال؛كيف عرفتي باهي!؟
غرفه؛حسيت باعراض وشكيت في الحمل جابلتي نبيله هدا..متاع اختبار الحمل المنزلي تعرفه ولا..
عبد الرؤوف:مانعرفاش..المهم...!
غرفه؛المهم الجهاز هدا بينلي اني حامل بس الاكيده ناخدها لما نحلل غدوة في معمل ولافي عياده..
قرصها من خدها وقال؛وتخليتي غافل لغدوة يامسمومه! تي اني نراجي فيه الحاجه هادي كل يوم نحلم بيها ياشفشه..
غرفه وهي تتوجع؛مابيتش نفرحك ع الفاضي..ضرباته ع يده وقالت..خدي..
شد وجهها بإيديه وضرب جبهته بجبهتها وقال؛شفشه..شفشه..
غرفه بوجع:ااه..دخت..
وخر عنها وقال؛نوضي البسي بنرفعك توا نتأكدوا..
ضحكت وقالت؛باهي..وناضت وقفت..
هو قال؛ولا نقولك اقعدي اني نمشي نجيبلك عبايتك وبقاجك..خمسه بس..
ومشي بسرعه..
هي قعمزت وقالت بضحكه؛قداش نحبه هالمختش..
🍃ونزل يجري بالملايه ومن فرحته وخوفه عليها ساعدها في لبسهم بعدين خداها وطلع بيها من الحوش ونبيله سقدتهم..
بعد ماطلعوا..
تنهدت بإبتسامه ودعت برجاء وقالت؛يارب اجعله من قسمهم...
🍃وفي حوش لطفي الواعر...
كان المحجوب واصل ليه ربع ساعه..
مقعمز في المربوعه مع نسيبه والحاج علي وحسين وفردوس وطوبى..
اما الباقي كانوا في الصاله مقعمزين يراجوا فيهم يجوهم بأخبار تفرح...
🍃المحجوب؛اعضاء جسمها الوظائف الحيويه كلها تمام مافيهاش ولامشكله بس مسألة مدة الغيبوبه مش قادرين يحددوها..هما توقعوا مجرد توقعات انها ممكن طول لشهور ومرات توصل للسنه..
حطت فردوس يدها ع فمها ودموعها نزلوا..
وطوبى ولطفي الزوز قلوبهم انخطفت من اللي سمعوه...
علي:باهي طول المده مايأثرش عليها؟
هز راسه بأسف وقال؛اكيد يأثر..
بلعت طوبى ريقها اللي حساته نزل سم في جوفها وهي تقول؛لاحول ولاقوة الابالله..
حسين شبحلها بوجع...
نزلوا دموعها وهي تشبح لبوها كيف يبان مصدوم..
خدت نفس غيرملحوظ وقالت؛بابا..اشبحلي..
كلهم شبحوا للطفي..
وهو شافلها بنظرة زادت وجعت قلبها بس انجبرت تبان قويه وتتكلم بقوة وثقه ع خاطر بوها بش طمن قلبه؛بابا قالك توقعات..يعني مرات سدرة تفيق قبل هكي بهلبه..حني نوكلوا الأمر لله ونخلوا ايماننا بالله قوي..وربي عند ظن عبده بيه اني متأكده ان سدره حتفيق وحتوليلنا والله هكي حاسه بابا واحساس قوي هلبه..
وهي تتكلم كانوا كلهم يشبحولها..وخاطرهم يصدقوا احساسها..
زي مابوها يبي يصدقه..
رسم ع وجهه ابتسامه خفيفه وقال؛يارب..يارب..يسمع منك ربي يابنتي..
طوبى ودموعها في عيونها؛ايوه بابا ديما ادعيلها بالله عليك دعوتك ليها مستحابه بإذن الله..
المحجوب بإبتسامه؛الحاجه صفيه كل ماتزورها نلقاها مقعمزه حدا راسها ياتدعي..ياتقرا عليها..ياتقرالها في قرآن..
ابتسموا وهما متأثرين وعلي قال:بنتها حتى هي مالا شنو.
لطفي؛ربي يبارك فيها..ويبارك في يوسف اللي سيب كل شي ع خاطرها..
المحجوب:ايه ع سيرة يوسف اني دبرتله خدمة غادي مع شركه مهمه مالكها صديق ليا ليبي..يعني قعاده غادي مش حيكون ع فاضي..وبخصوص الحاجه صفيه حتروح الاسبوع الجاي ان شاء الله..بتجي مع عيلة ليبيه من غادي وانت حسين تمشي لتونس بش تستقبلها غادي في المطار وتروح بيها هني..
حسين؛تعرفها العيله هادي؟!
المحجوب:اكيد كويس كويس..ماتخافش عليها ياحسين اساسا تعرفت عليهم غادي هي ويوسف اتصل بيه واسأله بروحك..
هز راسه بإيجاب وهو ساكت..
فردوس وهي تمسح في دموعها؛يعني بيقعد معاها يوسف بس غادي..
المحجوب؛ايه وجود الحاجه صفيه غادي ماالاش داعي..غادي في المستشفى قايمين بواجبهم ع اكمل وجه..
لطفي:اكيد توا لازم نبعت فلوس..
المحجوب:اني خالها يالطفي ورجاءا ماتخلنيش نعاود الكلمه هادي مرة تانيه..
تنهد لطفي وهز راسه وهو ساكت والضيق كان بادي ع وجهه..
وطوبى تشوفله بقلق..
ناض محجوب وهو يقول؛هي مالا نخليكم توا وغدوة جاي تاني بإذن الله..
لطفي ناض وقال؛والله مانك طالعها قبل لتتعشى..
المحجوب؛غير علاش تحلف لطفي بس! اني وراي ستين حاجه بنديرها قبل نروح..
لطفي؛تعشى بعدين برا دير اللي وراك كله..
طوبى:العشي واتي خالي مش مطولين عليك..
نخصت فردوس بدون ماحد يلاحظ..
ناضت فردوس وهي تقول؛دقايق بس..
وناضت وراها طوبى ومشوا طلعوا هما الزوز..
علي؛قعمزوا قعمزوا..قعمز يامحجوب..
قعمز المحجوب وقعمز معاه لطفي..
لطفي؛بارك الله فيك يامحجوب وسامحني ع اللي ريته مني قبل..
ابتسم وقال؛معذور نسيبي وعندك الحق..
وعلي يشوف للمحجوب وهو يهز في راسه موافقه فكلامه..
🍃وداخل..
اميمه؛هو طبيعي بعد ماتفيق بإذن حيكون جسمها تعبان ويبي وقت بش يرجع لطبيعته والوقت هدا يكون حسب مدة الغيبوبه...
مطيره رفعت ايديها ودعت برجاء؛يارب..يارب..نوضها عاجلا غير اجل يارب واشفيها وعافيها يامولاي..
كلهم قالوا مع بعض:آمين...
ومطيره مسحت ع وجهها وهي تقول:يارب العالمين..تنهدت وقالت..هي بسرعه يابنات سقدوا ارواحكم الراجل مستعجل..
🍃وقعدوا يجروا ويوتوا...
وطوبى وهي توتي معاهم اللي تجي في خاطرها تاكلها وهالحركه ماكانتش عندها بكل..
كلهم لاحظوها بس اللي ركزت عليها أكثر شي..
فردوس..
☘☘☘☘☘
طالع بيها من العياده وهو يمشي فيها ويقول؛بالشوي..وحده وحده عليك...
غرفه؛مش لهالدرجه رؤوف مش ملصق بالمستكه راهو..
عبد الروؤف؛اسمعي وسكري فمك..
غرفه؛هييه النفسيه ليها دور ياغالي..
عبدالرؤوف فتحلها باب السيارة وقال؛باهي اركبي ياهمي اللي ع قلبي زي العسل..
ضحكت وركبت...
وهو طبس دخل عبايتها بعدين سكر الباب..
ومشي ركب ..
شغل السيارة وهو يقول؛خاطرك في حاجه؟
غرفه؛في عشي بلبله ريحته قاعده في خشمي..
عبد الرؤوف؛تمام ..
وتحرك بالسيارة..
وقفت ع محل حلويات مشهور خدي منه بكلاوة..
وروح بيها للحوش
فرحوا نبيله بالخبر..ومن فرحتها بيهم كانت مش سايعتها الدنيا
ووسط هالفرحه كان باين الحزن في عيون غرفه برغم انها حاولت تخفيه بس ماقدرتش..
كانت متمنيه لو معاها خواتها وشاركوها فرحتها..
من غيرهم فرحتها ناقصه هلبه..وهدا اللي حست بيه نبيله..
اما عبد الرؤوف من فرحته كان يلقى مايخليش غرفه تمشي ع الوطا..
وطبعا لأن هالمرحله مهمه جدا وتبي راحه بس..
قررت نبيله تعطي دارها لخوها ومرته..
وهي بتقعد في دار تانيه معاهم في نفس الدور...
☘☘☘☘☘
الساعه 1:00ليلا...
حوش محمد شنيبه هادي..ماينسمعش فيه صوت...
الجالي كان في جناحه مقعمز في سريره ومش قادر يرقد..
النوم مجافيه هالليله وهو يفكر في اللي صار بينه وبين طوبى وكيف لتوا مااتصلتش بيه ولادوراته..
فجأة..
رن تليفونه بنغمة رساله..
قلبه فز...
طول شافه..لقاها رساله جايه من نجاه..
(جالي خاطري في جيلاطي بنموت دبرلي)
هو قال؛جيلاطي شني في عز شتي!؟
رد عليها..
(تتسهوكي)
(قسما بالله..بنهبل ياجالي)
(من وين بنجيبه قوليلي توا من وين)
(مانعرفش دبرلي دبر..ولدك اللي يبيه مش اني)
تأفف وقال؛استغفر الله العظيم...
بعدين بعتلها..
(طالع توا نشوفلك وامري لله صارت فيا حاجه في رقبتك)
(مايصيرلك شي ماتخافش)
تنهد بملل وقال؛ياوالله عليك وحله وحلت روحي فيها تي مالي وماله امه الزواج والنساوين وعلل القلب!
ونزل من السرير..خدي كبوطه من ع الشماعه ومفاتيح سيارته ومشي طلع من الجناح ومنه من الحوش بكل بهدوء بدون مايحس بيه حد..
☘☘☘☘☘
فهالوقت...
كانت طوبى طالعه للحمام الخارجي ترجع..
صوت ترجيعها كان قوي..لكن مش واصل داخل اللي برا بس يسمعوه..
زي حسين اللي كان سهران ع بوه دخله للحمام بعدين رقده ومعاش جاه نوم ...
كان يفكر في كل شي صار معاهم واللي مازال حيصير القدام..
لما سمع صوت ترجيع طوبى..مازبطاش في الاول صوت راجل ولامراة..
بس بعدين زبط لما سمع طوبى تكح ان اللي ترجع مراة بس ماعرفش انها طوبى
كان يبي يمشي لحوش عمه بس تراجع في اخر لحظه تجنبا للإحراج...
لكن مشي ركب فوق السطح ووقف في تركينه تخليه يشوف من يطلع من الحمام الخارجي..
قعد واقف دقايق وهو يراجي..
لين انفتح باب الحمام وطلعت منه طوبى
وهي لافه عليها شال سدره ومربعه ايديها من الصقع...
قعد معاها بعيونه لين خشت للحوش..
الفكره اللي جاته من اللي شافه..
قظت خيوط جرح القلب..وخلاته ينزف...
واعر الشعور اللي حس بيه لما فهم وعرف اللي فيها..
ماقدرش يمنع دموعه انها تنزل...
وهو  اللي عمره مانزلهم الا على غالي
مسحهم بسرعه ومشي نزل طول وهويسب ويلعن في النوم اللي ماباش يجيه وحطه في هالموقف...
🍃ويروح الجالي للحوش ومعاه الجيلاطي اللي طلباته ست الحسن...
(تعالي ورا الحوش)
(جبته قصدك؟!)
(ايه..هيا تعالي)
(شويه وجايه) وبعتله رمز القلب التعبيري..
🍃وفي الحوش اللي جنبهم..
نجمه؛اركب شوفه كان فرغ ولالا سلم ولدي..
تنهد محي وقال؛باهي خشي داخل يام صقع..
خشت نجمه للحوش..
وهو مشي ركب الدروج لين وصل للسطوح..
خشله ومشي يشوف الخزان..
لما وقف عليه بيشوفه...
سمع صوت حركه جاي من جنان نساباته..
شبحله..
وتجي عيونه ع مشهد صدمه صدمة قويه.
شاف شي خلاه ينسى الخزان والميه...
وخر ومشي بسرعه نزل وهو يقول في نفسه..
"هدا شن قاعد يدير!؟..معقوله الجالي يطلع واحد وسخ لهالدرجه!؟"
وصل لوطا..ومشي للتاكو وشغل مفتاح المضخه..
ونسي انه ماشافش الخزان بكل...
وقعد يفكر في اللي شافه وهو مش مستوعب..
في باله ان الجالي بعد زواجه طلع نجاة من راسه..
بس اللي شافه بينله العكس..بينله اخر شي كان يتوقعه يطلع من الجالي..
🍃"قعمزي هني"
قعمزت جنبه ع الكرسي مقابلين شلال الميه..
نجاه بضحكه؛وين لقيته هدا!؟..
الجالي؛خلتيني نترجى صاحب محل حلويات مالقيتاش الا عندهم..الراجل يقولي ماينبعاش ياخوي وانا نطلعله في الفلوس ونقوله ناخده باش ماتبي..شك فيا مش بعقلي  قعد يساير فيا..شفت الجماعه اللي معاه كيف يشبحوا لبعضهم ويشبحولي لما حسيت انهم بيديروا حاجه قلتلهم المراة تتوحم..
ونجاة تسمع فيه وهي تضحك..
هو كمل يقول..عطاهولي كله بلاش..
نجاه؛كله؟
الجالي:هو حوض كبير جبتلك منه شويه والباقي حطيته في الثلاجه اللي في الجناح..
نجاه وهي تشبحله ع جنب:لازم لعبتك ذوق منه..
قلب عيونه بملل وماباش يرد..
نجاة؛يعني توا لو لعبتك حامل وتتوحم حتى هي وطلباته منك دير ع خاطرها هكي؟
شبحلها وقال:اكيد هي مرتي زي ماانتي مرتي مافيش فرق بينكم..
قعدت تشبحله وهي تتفكر في كلام خديجه بعدين قال؛جالي..لو خيرتك بيني وبينها من تختار؟
هو قال؛مانختار حد...لاانتي تخيريني ولاهي نبيكم الزوز مع بعض وقلتهالك قبل...
واكيد الاجابه هادي مش حتعجب نجاه وحتحرق دمها وتخليها تصدق كلام خديجه...
شبحتله شويه بعدين قالت؛باهي نغير السؤال..من تحب اني ولاهي؟
هو تنهد بعدين قال؛اجابة السؤال عندك..
نجاه؛لامش عندي نبي نسمعها منك
الجالي؛باهي بنرد عليك بسؤال..من اللي خديتها فيكم بإرادتي ومن اللي انفرضت عليا فرض؟ في جواب السؤال هدا جواب ع سؤالك..
وهالاجابه هي تبي تصدقها وصدقتها..وفرحتها هلبه..
ابتسمت وهي تشوفله وقالت؛نموت فيك..
حط يده ع راسها وقال بإبتسامه؛كله حيمشي تمام صدقيني مش مخليك لو شني يصير قلبي..
نجاة؛حبيبي انت..
غمزلها بعينه وبعتلها قبله في الهوا..بعدين قال..اعزمينا حتى بالكذب..
ضحكت وخدت شويه بالكشيك ووكلاته..
وقعدوا ساعة تانيه عايشين لحظات الحب والغرام في الخفاء..
بعدين خشوا الزوز يتسحبوا وكأنهم مخانب..
وكل حد خش جناحه...
☘☘☘☘☘
تاني يوم الصبح...
الساعه 9:00...
طلعت اميمه من الحوش بتمشي لخدمتها..
ع جية سيارة عمر اللي كان جاي بيها من المطار...
شافها وهي طالعه...
قلبه غصب عنه رفلها..حس بشوق كبير تحرك في داخله..
يشوفلها بحب..ولمعة الدموع بانت في عيونه..
هي ماركزتش عليه...
كانت مركزة ع مفتاح السيارة وهي تضغط ع الزر اللي فيه بش يفتحها..
هني طلعت نبيله حتى هي من الحوش بتمشي لمكتبها..
شافتها ابتسمت وقالت؛صباح الخير دكتورة..
هو درس قدام حوش بوه وقعد يشبحلها..
شافها كيف شافت لنبيله وابتسمت ورفعت يدها وردت؛صباح النور...
نبيله اشرتلها بيدها تستنى..
هي عقدت حواجبها وهي هزت راسها..
قصت نبيله الطريق وجتها...
وصلت فيها ووقفت عليها وصافحتها وهي تقول؛كيف الحال..
اميمه يإبتسامه؛الحمد لله كيف حالك انتي..
طلقت يدها وقالت؛الحمد لله..شني مافيش اخبار جديده ع سدرة؟
اميمه بأسف؛مافيش جديد..امس خالها المحجوب روح وحكي ع وضعها وماقالش جديد..
نبيله لما سمعت اسم المحجوب ابتسامتها خفت وقلبها دق بقوة..حاولت تبان عاديه وهي تقول بأسف؛ان شاء الله تنوض منها قريب..
اميمه؛إن شاء الله..
نبيله؛باهي اني وقفت بش نكملك ع حاجه تانيه..
اميمه؛ان شاء الله خير..
نبيله؛غرفه حامل..
ابتسمت اميمه بفرح وقالت؛الله!
نبيله بإبتسامه؛امس بس عرفت..وبأسف كملت تقول..بس فرحتها كانت ناقصه وانتي عارفه علاش..اللي صار مع سدرة والمشكله اللي صارت بينها وبين خواتها بعدين..
تنهدت اميمه وقالت؛ربي يهديها حتى هي مواقفها مستفزة هلبه..
نبيله؛تمام..لكن توا هي في وضع حساس وتعرفي الحمل متاعها مايثبتش الا بالابر والراحه التامه والنفسيه ليها دور..وحني اني وراجلها مهما اهتمينا بيها مانقدروش نغنوها عن عيلتها خواتها وعمتها...
اميمه بدت ع وجهها ملامح الضيق..
نبيله؛لو فيها كيف يااميمه تبلغي خواتها وتحاولي تليني قلوبهم عليها..حتى لو كانت فيها عيوب الدنيا تقعد اختهم ..
هزت اميمه راسها موافقه لكلام نبيله وقالت؛صح..خلاص ان شاء الله بعد نروح من الخدمه نقعمز معاهم ونبلغهم وتأكدي انهم في نفس اليوم حيكونوا عندها مافيش احن منهم ع بعض..
نبيله بإبتسامه؛مزبوط..
غيرت عيونها وبنظره عابره جو ع عمر وهو في السيارة ..
شافت لأميمه وابتسمت بعدين قالت؛نبي نقولك كلام في قلبي من وقت وكل مانشوفك يجي في خاطري نقوله..
ابتسمت بإستغراب وهي تراجي فيها تكمل كلامها..
نبيله؛سمعت عنك من غرفه..واحترمتك هلبه واعجبت بشخصيتك وطموحك ع الآخر نحب المراة القويه اللي مقدرة  قيمة نفسها ومكتفيه بذاتها ومش رابطه كيانها وحياتها بأي حد...
☘مش عارفه نبيله قداش كانت اميمه محتاجه تسمع كلام زي هدا بش يعطيها طاقه ايجابيه ويقوي ثقتها بنفسها ويخليها تزيد تحب روحها اكثر واكثر..☘
ابتسمت من قلبها وقالت بخجل؛بارك الله فيك..الحق كلامك فرحني ع الآخر..
نبيله بإبتسامه؛ماقلتش الاالحق..المهم خليك ديما هكي ردي بالك تتغيري..
هزت راسها وهي مبتسمه..
حطت يدها ع ذراع اميمه وقالت؛هي مالا نخليك تمشي لخدمتك..موفقه دكتورتنا..وضحكت..
اميمه بضحكه؛اجمعين محاميتنا..
ضحكت نبيله وقالت؛سلام..
ومشت..
واميمه ردت عليها؛سلام
بعدين التفتت ع باب السيارة فتحاته وركبت..
حطت شنطتها جنبها وسكرت الباب بعدين شغلت السياره..
لما شدت الدومان شافت القدام جو عيونها في عيونه...
هو طول تحرك بالسيارة للقراج اما هي تماسكت وقعدت تفكر في روحها بكلام نبيله.
وتحركت بالسيارة طول...م