طوبى الجزء الاول

تابع

# طوبى "شارع القهوة"
#جمان_فريد
#الجزء_الثامن_والعشرين" قبل العاصفه3"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
بسرعه المهدي رفع مرت خوه لمصحه قريبه..
نجاة وهي تتألم؛مهدي اني فاتحه ملف في مستشفى الجلاء..
المهدي؛مش مشكله خل نشوفوا هني شن يقولولك قبل بعدين يصير خير
نزلت مغليه ومشت فتحت الباب ونزلت نجاة وهي تقول؛بالشويه بنتي بالشويه عليك..
ومشت بيها وخشوا داخل..
والمهدي كلم دكتور يعرفه في الجلاء يشوف موضوع ملف نجاة اللي غادي..
وهي داخل اسعفوها طول..
وبعد الفحص..
☘الدكتورة؛لازم دير قصيريه..
مغليه بخوف:كيف يادكتورة مازال موعدها!؟
الدكتورة؛الجنين نبضه ضعيف لازم توا دير القيصيريه..
ومشت مستعجله من حداها..
مغليه وهي مصدومه:حي عليا حي!..
وطول مشت طلعت من المصحه بش تكلم المهدي لأنها نست تجيب تليفونها معاها..
☘وفي الحوش..
كان تليفونها يرن..
وعائشه وهي ضم في الكوجينه تسمع وهي تبكي بصمت..
وتسمع في عمها محمد كيف يكلم في ولده ويطمن ع وضع نجاه..
سمعاته قال.."عمليه"
قعدت ترعش مع بعضها..خافت ليكون صار فيها هكي بسبب كلامها معاها
اما الولاد فكان نضال قاعد مع بوه
والجالي ولااهتم للي صار مشي للجامع عادي بش يصلي التروايح..وهو مش عارف ان بسببه هو نجاة جتها حالة ولادة مبكرة...
اندارت لنجاة العمليه بعد ماتمولها الإجراءات..
وجي ولدها ع خير...
وطبعا لأنه جي بكري رفعوه للحضانه...
وهي طلعوها لجناح تقعد فيه..وكله اوامر محمد شنيبه...
عطوا علم لخواتها بولادتها جوها هديكا الليله الزوز...
مروة خطمت ع صابرين وجابتها..
☘صابرين بإبتسامه:ياعيني ياعيني جناح خاص..
مروة:والله ناس ذوق شوفوا كيف حاطين الشكولاته والعصير..
نجاة بصوت متعب بعض الشيء:نسمع في عمتي تقول غدوة يجيبوا الزينه ويديروها في الجناح وع الباب..
صابرين:عليك دلال..
نجاه شبحتلها وضحكت بصعوبه بعدين قالت؛منظرك يضحك بالجلابيه والشاربه..
مروة بضحكه؛لما طلعت ماعرفتهاش..
صابرين:تتسهوكوا عليا ياتافهات..مادخليش بيك مروة بنروح معاك نلبس في حوشنا وترديني هني..
مروة؛مالا تحسابي راجلي كراطون!..اصبري الليله وغدوة نجي ونجيبلك حوايج..
صابرين؛امباه...بعدين شبحت لنجاة وقالت..طاهر عنده علم..
نجاة:قلتلهم مايقولوش نخاف ينفجع ويجي يجري بالسيارة ولاقدر الله تصيرله حاجه..
مروة:احسن مادرتي..
نجاة:شفتوا ولدي؟
مروة:لالا تو نطللعوا نشوفوه..
صابرين:تو نصوره.
نجاة:ايه بالله صوريه..
صابرين بضحكه:تمام..
ومشوا طلعوا الزوز مع بعض..
وهي بعد طلعوا..
رفعت عيونها فوق في السقف..وقعدت تتفكر في نفس الموقف..
مازال مابردتش..منقهرة ع الاخر وعقلها يفكر بس في كيف ترده..
☘☘☘☘☘☘
"تي شاده المراة في التركينه وتقوللها شن بديري لمرت المهدي"
المهدي وهو عاقد حواجبه قال:كلمتها غلط مانيش مجادلك فيها..لكن يام اني عارفها عايشه ردة فعل بس ماتبدا ع حد..
مغليه:ايوه طبعا بدافع عليها من قبل وانت هكي..
المهدي؛اني قلت الحق يام..مرتي ونعرفها كويس..
مغليه:يعني اني الكذابه واللي نتبلى عليها!
المهدي بهدوء وهو يحاول يتمالك اعصابه:حشاك يام وكلمتها هادي تو نحاسبها عليها..بس نبيك تعرفي ان عايشه ماديرش عيب صح عندها حركات ماتعجبش فيا مرات..بس زي ماقتلك ردة فعل ولامرة هي اللي بدت بالمشاكل...
مغليه:شكلها معبياتك تعبايه باهيه..
المهدي بضحكه؛غاز ولاميه!؟
مغليه:تتسهوك..باهي برا اركب لشقتك وراضي السنيورة.
المهدي:قصدك ركبت زعلانه هي.!؟
وطلع بسرعه..
وتصرفاته هادي كانت مقصوده يستفز في امه من باب المزح وفي نفس الوقت يبي يوصللها رساله انه مش حيتأثر بكلام حد عن حد...
لكن فوق...
المهدي بغضب:اني من قبل منبه عليك ع الدوة اللي تقولي فيها واطلعي فيها من فمك..حتى الحق يكون معاك يولي ضدك..وبعدين قلتيلي مانكش محتكه بيها شن جاك توا.
عائشه قعدت تبكي وهي مقعمزة ع السرير..
مش عارفه شن تقول..
هو تنهد...وهدي شويه بعدين جاها مسح ع راسها وقال:اسمعي بنكمل رمضان هني مانيش فاطر لوطا..
عائشه ناضت وهي تقول بخوف:لا مهدي بالله عليك فكني مش ناقصه تو يقولوا خداته من ماليه..انزل افطر لوطا مع عمي والولاد زي قبل واني نقعد في الشقه عادي..
ابتسم وقال؛حاضر اللي يريحك..وتوا وتي روحك بش نطلعوا..
عائشه مسحت دموعها وقالت؛توا..
المهدي؛رمضان عادي نطلعوا في اي وقت نحطوا بنت بوها عند خديجه وناخدوا وجبة سحور ونمشوا للبحر نتسحروا غادي..غمز بعينه وقال..شن رايك.
هي قعدت تشوفله بنظرات غارفه بالدموع كلها حب..
بعدين فاجأته لما احتواته احتواء حب واحتياج..
وقالت ودموعها ينزلوا...نحبك مهدي..نحبك هلبه..
هو حط يده ع ظهرها وقعد يطبطب عليها واحساس بالذنب اتجاهها يوجع فيه في كل وقت..
قاعد يعامل فيها بما يرضي الله ويكفر عن ذنبه معاها..
يقدرها ويحترمها لانها مرته ام صغاره..
بس قلبه ماقدرش يطلع سدرة ويحطها مكانه..
ماقدرش لان سدرة مستوليه عليه تماما.. وقلب الراجل لو حب حب حقيقي..يكون اول واخر حب..
وان عرف بعدين العشرات لايمكن يقدروا يديروافيه زي مادارت المراة اللي حبها بصدق
☘☘☘☘☘
"انسه غرفه النتيجه غدوة"
وجه غرفه تغير وقالت:حقه؟
سدرة؛ايه حقه!..عرفت من مصادري الخاصه وتي روحك لو فصلوك بتقعدي في الحوش تتعلمي كيف تكوني ربة بيت خيرلك ع الاقل تفلحي في حاجه
غرفه:فاولي بالخير بالله عليك
سدرة؛شن ودك يالأعمى قال قفة من العيون...ان شاء الله يصير منك
غرفه شبحت للتلفزيون وقالت:إن شاء الله
شويه وخشت عليهم فايزة جايه من دار المعيشه؛رقدوا كلهم..
سدرة؛طوبى جيبي النقاريش..
"حاضر"
فايزة؛عمتي مطيره وين؟
سدرة ؛في حوش جدي..قولي فيزة امتى بتطلعي للسوق..
ع خشة طوبى بسفرة فيها موالح وعصير فراوله مصقع..
غرفه؛وشن بدير بيه السوق اللبس اللي جي لبناتها يفتح سوق..
طوبى شبحت لسدرة..
وسدرة كيف جت بترد..
قالت فايزة:ومازال بنزيدهم لبستين ..
غرفه بضحكه مهتمه:يابختهم تو بنات الشارع يحسدوهم ويقولوا ياريت حالنا حالهم..
سدرة؛انتي لسانك من شن مخلوق قوليلي والله مرات نتخيل في راسه مقسوم ع زوز..
شدت طوبى ضحكتها..
غرفه:اللسان الصريح ديما مكروه..
فايزة؛نبي نفهم وينها الصراحه في كلامك يعني الصغار في شن بيحسدوا بناتي في انهم يتامى ووالناس تتصدق عليهم!
طوبى:شن الكلام هدا!؟
غرفه؛ايوه أولوا كلامي كيف ماتبوه وترجموا ع مزاجكم المهم تقلبوا عليا الطاوله...اقعدوا فيها والنبي..
وناضت وهي حامقه..
سدرة:غير تطلع النتيجه بس..
فايزة:فوتيها كلامها معاش يأثر فيا هلبه زي زمان ومعاش نفوتلها..
طوبى:خلاص فكونا منها..وحطولنا ع المسلسل قريب يبدا..
خدت سدرة الريموت وحطت ع القناة اللي تبيها طوبى..
☘☘☘☘☘☘
تاني يوم...
الساعه 9:00صباحا..
كان واقف قدام الحضانه ويشوف في ولده وهو فرحان ع الاخر..
بعدين مشي للجناح اللي فيه مرته..
دق الباب..
"خش"
فتحه وخش لقي صابرين تحط في شاربتها ع راسها والنوم معبي عيونها قالتله:صباح الخير طاهر مبروك المزيود..
طاهر بإبتسامه؛الله يبارك فيك..شن حالها؟
صابرين؛كويسه الحمد لله..نوضهالك؟.
طاهر؛لاخليها مرتاحه..مرر نظره ع الجناح وشاف شن فيه..بعدين شبح لصابرين وقال..ماتبوا شي..
صابرين:لاسلامتك..
طاهر؛اني لوطا كان فاقت كلميني..
صابرين:حاضر..
مشي طلع وسكر الباب..
وصابرين حولت وشاحها ورجعت رقدت..
☘☘☘☘☘☘
الساعه 1:00ظهرا..
مغليه:وياحنه اليوم نزلي يقول ماتعبوش ع عيشة بتفطر في شقتها ونسكروا باب المشاكل..
خديجه:غالطه يام مفروض ماقلتي شي للمهدي وخلتيها بيناتنا رانا وريناها وعلمناها كيف تتكلم بنت جويده..قالك شن بديري لمرت المهدي!..شفتي مش قتلك شيطانه وقاعده تلمح من توا..
مغليه؛حني اللي كبرنا راسها وجبناها كان راجينا لين ربي هدي سدرة.
خديجه؛مافي خير في ام الخير..
مغليه:لالاسدرة مش زي هادي..وبعدين سدرة تناسبنا اكثر من عيشه الجربه اللي ماتعرف حاجه..يللا ردان الفايت محال توا..
خديجه:وهاك قلتيها بروحك..
مغليه:المهم توا..بتمشي معاي بعدين للزيارة؟
خديجه رفعت حاجبها وقالت:نمشي علاش لا؟
☘☘☘☘☘
"لالا والله حسيت بألم فجأة"
طاهر؛كيف الم فجأة..اني الدكتورة قالتلي العامل النفسي يتحكم في موعد الولادة
نجاة؛واني قتلك مافي شي ياطاهر صدقني..تي عمي وعمتي قريب خلوني معاش نمشي ع الوطا..وعمي ياخد ويوصي عليا وعمتي كل شويه تتفقد فيا..مش عارفه شن صار فجأة..
طاهر ماصدقهاش بس ماباش يناقشها اكثر وقال بإبتسامه:يللا توا المهم انك انتي وحمزة بخير..
نجاة بإبتسامه؛ايه حقه عجبك الاسم؟
طاهر بإبتسامه؛هلبه..عندك علم بوي اليوم بيذبح قعود صدقه..
نجاة بإبتسامه؛قصدك عقيقه.؟
طاهر:لا العقيقه بروحها قال نديروها بعد يطلع الزعيم..
نجاه وهي فرحانه ع الآخر:ربي يطول في عمره عمي..ريت بوك اللي كنت ناوي تقطعه عمرك كله شن قاعد يدير ع خاطرك..
ابتسم وقال:لولاك انتي ماكنتش قربت منه ومن خوتي ودرت عزوة وعيلة لصغاري..
ابتسمت نجاة وقالت:ربي مايفرقكم..
طاهر:آمين..
بعدين طبس ع جبينها وباسه وقال:اني طالع شويه ماتبي شي..
نجاة؛سلامتك ياغالي..
طلع طاهر من حداها..
وهي قعدت تشوف للمكان اللي طلع منه وع وجهها ابتسامة فرح...
☘☘☘☘☘
الساعه 6:00مساءا..
"وقالت شن بديري لمرت المهدي"
نسرين؛شنو!؟
خديجه؛فهمتي شن قصدها بيها؟
نسرين وهي رافعه حواجبها؛ياسلام سلم..
خديجه:مش قتلك صاحبتك مش ساهله وانتي شي دافعي عنها وماراضيه فيها حاجه..
نسرين:بدت تتفرعن عمتك عويشه ولازم يندارلها حد..
خديجه؛حيندارلها بس مش توا..مش توا..واللي حيديره خوك المهدي بروحه..
نسرين بضيق:خديجه ماتخوفنيش اقرصيها قرصة وذن بس من غير خراب بيوت بالله عليك..
خديجه:طبعا مستحيل توصل لهني ع خاطر خوي وصغاره نبيها تتربى بس..
☘☘☘☘☘☘
الساعه 11:00ليلا..
في المصحه..
خشوا مغليه وخديجه ونسرين ع نجاة الحجره..
نجاة لما شافت خديجه..
خدت تليفونها وكتبت رساله لأختها..
"ماتجيش خديجه هني"
••صابرين قرت الرساله..
لوحت تليفونها ع السرير وقالت بتذمر:اوووف..
شويه دق باب الحوش..
تأففت تاني وناضت ومشت للباب..
فتحاته..
صابرين من فوق نفسها:نعم...
خوها؛جلم ياحيوانه..امي قالتك كان بتمشي للحيوانه التانيه بتمشي معاك..
صابرين تعجبا؛وشن هالغلا اللي نزل في نجاة توا..امك طيق العمي ولاطيقها..
:فكيني من الفتفته متاعك..وقولي بتمشي ولا لا..
صابرين؛لا ماصارش..
:احسن..
ومشي وهي سكرت وراه الباب بقوة وقالت؛من طول عمركم ناسينا توا خطرنا عليكم!..نار تحرقكم مع بعضكم وتحرق خديجه معاكم..
🍀🍀🍀🍀
ويعدوا يومين..
وتطلع نجاة من المصحه لشقتها ع طول..
وصابرين قعدت معاها في الحوش بش تعانيها..
وبعدها قعدت كل يوم...
وهي تمشي ع المصحه وتجي بش تشوف ولدها..
وطاهر كان متحشم ع الاخر من بوه ع المصاريف اللي صرفها..
••"ياولدي بطل تعاملني زي الغريب تقول مش بوك"
طاهر:لا والله ماقصدي هكي يابوي..بس هلبه والله هلبه وحاجات زي هادي اني ملزم بيها مش انت.
"لااني اللي ملزم بيها ياولدي اني..ملزم نعوضك في صغارك عن اللي مادرتاش معاك"
خنقت بوه العبره وهو يتكلم..
وطاهر قلبه وجعه عليه وقال؛بوي..بوي..الو..
"ايوه معاك"
طاهر:بالله عليك بوي معاش تقولها الدوة هادي الماضي معاش نبوا نحكوا فيه..
بنبرة يتخللها البكاء قال محمد...
"خلاص حتى انت معاش تقول الكلام اللي مايجيش منه"
ابتسم وقال؛حاضر...
🌻🌻🌻🌻🌻
"الحمد لله ع السلامه ياحاج"
علي وهو يحضن في ولده لطفي:الله يسلمك الله يسلمك..
أميمه وهي تحضن في خوها:لالا الحمد لله ماتعبناش هلبه..
حسين:باهي باهي الحمد لله ع السلامه مرة تانيه..
اميمه:الله يسلمك سونه..
بعدت عنه وقالت...خل نخش لأمي..
حسين بإبتسامه:هي بري..
خشت اميمه داخل...
ولطفي قال:فطوركم عندي اليوم راهو..
علي بإبتسامه؛باهي باهي..
🌻🌻🌻🌻
وفي حوش لطفي..
كانت التجهيزات قائمه ع قدم وساق..
مش باش ع خاطر مرواحه علي الواعر واميمه..
بل حتى اهل الفاندي جايين يفطروا عندهم بعد عزموهم سدرة وبوها...
وع الفطور...
في المربوعه..
اجتمعوا الرجاله..علي الواعر وولاده واحفاده ونسيب ولده وزوز من خوت الفاندي..
وفي الصاله..
نساوين عيت الواعر...ومعاهم فايزة..وتبرة واقبال وسعاد..
سعاد؛مشينا اني وامي خدينا اخر اسبوع في شعبان واسبوع في رمضان 15يوم..
سدرة بإبتسامه؛عمرة مقبوله ان شاء الله..
تبرة:درنا عمرة عن ايهاب الله يرحمه..
سدرة بإبتسامة حزن؛ربي يتقبلها يارب..
كلهم قالوا:آمين..
اقبال:شن فايزة امور المزين ماشيه تمام؟
فايزة:ايه الحمد لله..
اقبال:عندي زوز صحباتي قلتلهم عليك بيجوك يصبغوا ويلودوا ع ارواحهم قبل العيد..
فايزة بإبتسامه:مرحبتين بيهم..
مطيره:كولوا ياعيلة كولوا..تبره..اقبال سعاد تنقرشوا تنقريش راهو..
هما بأصوات متقطعه؛ناكلوا..والله ناكل..
🌻بعد الفطور...
في الكوجينه..
اقبال خشت مع اميمه وطوبى يغسلوا في الماعين.
اميمه:الكعبه لما تشوفيها ع التلفزيون مش زي ماتشوفيها ع الطبيعه..اول مابانت عليا قعد جسمي يرعش..وعيوني طول دمعوا..
طوبى بعيون مدمعه وهي متأثره؛يارب وصلني..
اميمه:المدينه بروحها هديكا..سبحان الله من اول ماتخشيلها تحسي براحه نفسيه..
اقبال؛حتى امي وسعاد قالوا نفس الكلام..ربي يوصلنا ان شاء الله
طوبى:آمين يارب العالمين..
اقبال؛اميمه شن جو القرايه..
اميمه:نراجي في النتيجه...
طوبى بضحكه؛سمعتي بغرفه صفت تلاته مواد وقعدتلها وحده بس..
اميمه؛باهي كويس..
طوبى:سدرة فرقت بكلاوة يومها من الفرحه..
ضحكت اميمه..
طوبى؛وقالت نراجي جدي امتى يروح بش يديرلي السيارة..
اقبال؛مقوى قلوبهم اللي يسوقوا اني نخاف..سعاد حاولت تعلمني لكن اني مابيتش الحق..
اميمه؛فالاول طبيعي تخافي بس بعدين مع التعود يريح احساس الخوف..
طوبى:حتى بإذن الله بنديرها..
"اميمه"
فنصت اقبال..
طوبى بضحكه:ماتخافيش مايخشش..
مصمصت اميمه ايديها وطلعت للجنان..
🌻اميمه؛نعم حسين..
اشرلها تقرب..
قربت منه وقالت؛نعم؟
حسين؛طوبى معاكم..
اميمه بإبتسامه؛ايه..
حسين؛ناديها ترا..
شبحت اميمه للكيسه اللي في يده وقالت بضحكه؛حاضر..
خشت اميمه داخل وقالت لطوبى:حسين يبيك طوبى..
طوبى بضحكه:عرفته..هي شويه بس .
ومشت خشت داخل..
وقعدوا اميمه واقبال يغسلوا مع بعض في الماعين..
شويه وجت طوبى وهي لابسه مستور..وحجاب..
ومشت طلعت لقاته واقف عاطي بالظهر ويراجي.
ضحكت وقالت؛سونه ياسنسن جتلك اهو..
التفت وقال؛يااااه قاعده متفكرتيها..
ضحكت طوبى وقالت:شن جو؟
حسين بآبتسامه؛بيك حلو..انتي شن جوك..
طوبى:تمام الحمد لله..
حسين؛طبعا سمعت انك نجحتي وبإمتياز قلت هادي ماتعديش هكي من غير هديه...مدلها الكيسه..
خدتها وقالت؛علاش حسين هكي ولاطرفين شكولاته سادين..
حسين:مافي شي يغلا عليك..شوفي شن فيه..
فتحت الكيسه وشافت اللي فيها كانت لبسه طلعتها وقالت..باينه عليها حلوة هلبه وغاليه حسين..
حسين؛قلنا مافي شي يغلى عليك يارتيله..
ضحكت وقالت:ياسيدي شكرا..وربي يعوضك يارب..
حسين شبح ليدها وقال:وين الخاتم؟
طوبى شبحت ليدها وقالت:كنت نغسل في الماعين حطيته ع تركينه.
حسين؛تمام بعد تكملي البسيه مش تنسي..
طوبى بآبتسامه؛حاضر..هي بنخش توا عيب نخليهم بروحهم..
تنهد وقال يإبتسامه:خشي..
ومشت طوبى وهي تقول؛سلام..
وهو قعد بعيونه معاها لين خشت وقال:السنه هادي شهاده اعداديه..هانت ياحسين...
~~~~~~~~~~
اريج:ذوقه يجنن..
طوبى بإبتسامه:ايه حلو..
اريج؛بيبو بنقولك حاجه..
طوبى:شني؟
اريج؛انتي مش ملاحظه ان حسين مهتم بيك زياده ع الكل..
طوبى:اني يقولوا عليا بنت حسين هدا علاش اهتمامه بيا زايد..
اريج:بس يعني..الهدايا والعركات اللي قبل..وسكتت..
عقدت طوبى حواجبها وقالت:شن نبي تقولي روجه؟
كيف جت اريج بتتكلم خشت سدرة...
سدرة؛ترا وريني شن خدالك الافندي..
طبست ع اللبسه وقعدت تشوف فيها بعدين قالت؛حلوة ومحتشمه..
شبحتلها وقالت؛اهو جاتك اللبسه قعدت الكندره واكسسوارات بس.
طوبى بإبتسامه:باهي امتى نطلعوا..
سدرة:غدوة بإذن الله..
اريج:بايته هني وغدوة بنمشي معاكم خويله..
سدرة؛حتى لولو قالت بتبات ..
طوبى بضحكه:الله احلى حاجه..
ابتسمت اريج..
سدرة؛روجه حبيبتي..شن جو امك وبوك..
شبحت طوبى لأريج..
أريج:لاتمام التمام خويله متفاهمين ع الآخر..
سدرة؛باهي الحمد لله..اصلا واضح ع وجه امك..
بعدين مشت بتطلع..
طوبى:شن رايك نديروا جيلاطي تعلمت وصفه من البرنامج مش عاديه..
اريج؛هيا بنا..
طوبى:خل ندس اللبسه قبل..
سدرة قعدت واقفه في الباب تشوفلها..
وعيوها ثبتوا ع هديه حسين..
《..في المستقبل ان شاء الله لو تقدم لطوبى عرسان..خليها تختار راجل صح انتم تعرفوه كويس قوي جواه زي براه بالزبط راجل يتقي ربنا فيها..》
سدرة في نفسها"لالاحسين طبعه صعب..هانت عليه قبل ومد يده عليها..لالا مانفرطش في طوبى ونعطيهاله.."
ومشت طلعت من الدار..
وكانت غرفه وقتها واقفه تشوف فيهم شن يديروا وشبحت هديه حسين لطوبى قريب ماتت من الغيره والحسد..
وين حست ع سدرة بتطلع..
هربت طول للكوجينه..
من النار اللي تحرق فيها مشت طول خدت طاسه مصمصتها بش تشرب ميه..
لمحت حدا الحوض خاتم طوبى..
رفعت حاجبها وهي تشوفله..بعدين خداته وحطاته في جيبها..
ع خشتها هي واريج..
اريج:اني حوش عمي هادم مانحبهمش يدرهوا الكبد بالذات ولدهم وليد..تصدقي شحطه عمره 16سنه دايرله عيد ميلاد..
ضحكت طوبى وقالت؛عادي شن فيها..
اريج:عندي بايخه ولد في عمره يدير عيد ميلاد البنت عادي بس الولد لا خي مش حلوة بكل..
شربت غرفه وطلعت من حداهم من سكات...
☘☘☘☘☘
وفي حوش الواعر..
تحديدا في الصاله..
مغليه:بيطلعوا بيه ويجوا هني طول بوك بيشوفه وبندبحوا العقيقه..
خديجه:كويس..
مغليه:وبإذن الله بعد العيد بنديرله اسبوع كبير..
خديجه؛امي الدلع هلبه هلبه مش باهي..
مغليه:اني ع خاطر بوك وطاهر..وبونتو في اللي سمها لطفيه..
خديجه؛علاش شن دايرة؟
مغليه؛حارقتلي دمي كيف رافعه خشمها من ولت السفيرة عزيزة! طايحه في المراة وتقلل من قيمتها ع الفاضيه والمليانه..
خديجه؛هي ماتبيهاش من الاول..
مغليه؛واني هدا علاش نبي نحرقها..
خديجه ضحكت بدون ماتتكلم..
وامها قعدت تشبحلها ع جنب..
"قرربت"
مغليه غمضت عيونها وقالت؛جي بنشافه .
خش عليهم نضال وهو يقول:قرربت.
مغليه بعد فتحت عيونها قالت؛هونا القهوة في البكرج سخن وكول واختك جايبه بالريش خود منها طرف..
نضال:يامو الجماعه جايين يتسحروا راهو..
مغليه؛وووك عليا منك ومن جماعتك..
خديجه بإبتسامه:تو ندلعلك الجو مادورش..
نضال؛والله احلى دج دج في الدنيا مش زي مرت بوي..
خديجه بمزح:من مرت بوك! قصدك بوي خدي ع امي تاني!؟
مغليه؛قصده اني ياغبيه..
خديجه قعدت تضحك..
نضال؛والله مش بعيده يادج دج اللي يديرها مرة يديرها عشرين مره..
مغليه بنفاد صبر:بتطلع ولانحلف ع صحابك ماهم هاويينه..
ضحك وقال:تي خيرك ياودي نبصر عليك..هو يقدر محمد بعدين راسه يطير..
مغليه بصوت عالي:نضال..
طلع بسرعه..
مغليه؛نشفلي ريقي..
بين راسه من الباب وقال:قربت يامغليه قررربت..
وفيسع ادرق راسه لما جت ع الباب مخده من مخاد الجلسه..
وخديجه هدا كله ميته ضحك..
🌻🌻🌻🌻🌻🌻
ويجي تاني يوم..
ويطلعوا نجاة وطاهر بحمزة من المستشفى ع حوش بوه طول..
استقبلوهم احلى استقبال..
وطاهر خدي ولده ومشي بيه لبوه..
خداه محمد وقعد يبرك عليه ويقول؛ربي ينبته نبات حسن ويجعله من حملة كتابه..
طاهر:آمين يابوي..
ويطلع محمد فلوس من جيبه ويحطهم عليه..كانت نص ربطه..يعني 500دينار..
انصدم طاهر وقال؛بوي!
شبحله وقال؛شن قلنا حني..
سكت طاهر وهو يشوف لولده بإبتسامة احراج..
وجده يشبحله ويقول:مش خسارة فيه مالي كله..
🌻وجابوا زوز كباش املاح ودبحوهم العشيه..
ووزعوا لحمهم ع الجيران..وخلوا منه شويه..
جزء دساته نجاه لخواتها..وجزء بين خديجه ونسرين..وجزء لحوش المهدي..
وطيبوا قعاد للعشي داب العيله بس...
🌻🌻🌻🌻🌻
سدرة:عقيقه ولد طاهر..
مطيره؛هدا ولد المراة التانيه..
سدرة؛ايه هو..
مطيرة:جو هبيرات خل نديروا بيهم قلايا للسحور شن رايك.
سدرة؛تمام..لكن تعرفي عمتي قداش عجبتني خالتي مغليه كيف تعامل في ربيبها ومرته..
مطيرة:ضحكي حتى انتي...تي اني اللي نعرف مغليه هدا كله جو دير فيه قدام الناس بش تحصل شكرانيه وفي نفس الوقت تقهر ام طاهر..
سدرة:مش لهالدرجه عمتي..صح هي تحب الشكرانيه لكن في نفس الوقت صاحبة واجب..
مطيره:صاحبتها عينها ماتغركش ياسدرة حتى انتي..
سدرة:الواحد يحسن الظن ويخلي النوايا لربي..
مطيره؛في اللي نيته تبان عليه..
خش عليهم لطفي وقال بصوت:طوبى..لمن وجد في صحيفته استغفارا كثيرا..استغفروا وانتم تشتغلوا استغفروا خيرلكم من القرمه..
مطيرة:مانقرموش حني نتناقشن..
ضحكت سدرة..
لطفي:نتناقشن صار.!
ع خشة طوبى قالت؛نعم بابا؟
شبحلها بإستغراب..
وسدرة ومطيره شبحوا لبعض وقعدوا يضحكوا..
🌻🌻🌻🌻🌻🌻
بعد صلاة العشاء..
المهدي:خليك انتي الكبيره.. هما دقايق تخشي شوفي الولد واطلعي قولي ماشيه السوق..
تنهدت عائشه وقالت:حاضر..
ومشت خشت عليهم وهي مش طايقه تشوفهم..
وين قربت من الصاله قعدت تسمع في اصواتهم يهدرزوا..
عائشه في نفسها"ياربي شد فيا"
وخشت عليهم وهي تقول:السلام عليكم..
هما ردوا:وعليكم السلام..
مشت طول سلمت ع مغليه وباست راسها.
ومغليه مش طايقه تشوفها..
بعدين سلمت ع حمواتها لاحظت ان سلامهم بارد..
لين وصلت في نجاة:الحمد لله ع سلامتهم..
نجاة بإبتسامه:الله يسلمك حبيبتي..
عائشه استغربت فيها كيف جوها معاها عادي بعد اللي صار:شن حالك توا؟
نجاة:الحمدلله مادام ولدي حداي..
شبحتله عائشه وقالت:ماشاء الله ربي يحفظه..
وحطتله حتى هي 500 وقالت..هادي من عمه..وحطت ميه وقالت..وهدا مني..
نجاة؛غير علاش بس انتم كلكم بياض..
عائشه بآبتسامه:تسلمي حبيبتي..وحمد لله ع سلامتكم مرتدة تانيه..سامحيني بنمشي بنطلع للسوق..
نجاة:خودي راحتك حبيبتي..
عائشه مررت نظرها عليهم وحركت يدها وهي تقول:بالسلامه..
مشت طلعت..
ونجاه ناضت وهي تقول:نستاذن شويه..
ومشت لحقتها..
وهما يشبحولها ويفكروا..
☘نجاه طلعت برا وهي تقول؛عيشه عيشه..
وقفت عيشه والتفتت..
قربت منها نجاه وقالت:ماتحطيش في بالك اللي صار يومها انتي مادخلكش بيه اني كنت مضايقه بس..
عائشه تنهدت وقالت:سامحيني حتى اني لبزت معاك في الدوة..
نجاة:مادوريش خلاص..بري للسوق هيجي وغيري جوك..
ابتسمت عائشه وقالت؛تسلمي حبيبتي..بالسلامه..
نجاة وهي مبتسمه؛بالسلامه..
ومشت عائشه..
ونجاة معاها بعيونها وابتسامتها المحبه انقلبت لأبتسامه ماكره وهي تقول في نفسها"تو تشوفي شن ندير لمرت المهدي"..
خدت نفس..
بعدين رسمت ع وجهها ابتسامه بشوشه مزيفه..
ومشت خشت عليهم..
خديجه وهي تشوفلها بتضييقة عيون:علاش لحقتيها؟
ونسرين ومغليه يراجوا في اجابة نجاة..
قعمزت نجاة حدا ولدها وهي تقول:اخر مرة صار بيني وبينها سوء تفاهم عمتي حاضراته وحسيتها توا وهي خاشه زي اللي متحشمه وخايفه..قلت اكيد حاطه في بالها ان هي السبب في اللي صارلي..وهي مادخلهاش اني كنت مضايقه من حاجه تانيه..
مغليه:بس هي زادتها عليك..
نجاة؛حتى اني كترت دوة يعني مني ومنها..
خديجه قعدت تشبح لنجاه بنظرات شك..
نسرين:جديات هي كانت محمله روحها ذنب اتصلت بيها وفهمت منها كل شي..مش بقصدها راهو..
نجاة:عارفه عارفه..قتلك مضايقتي شي من قبلها..
خديجه؛لاباس شنو اللي ضايقك..
نجاة؛حاجه مشت ع حالها..
مغليه:عارفتها شن هي تفكري في عزوزتك ولا...اليوم هداكا كله وانتي مش ع بعضك..
تنهدت نجاة وقالت؛جتني للشقه وقعدت تلقح وماخلت ماقالت ولما قلتلها بنطلعوا بحمزة لحوش عمي طول لأنه يبي يشوفه..ماخلت ماقالت..قالتلي تبي ترفعي ولد ولدي لمغليه..
مغليه؛شوفوا التفكير شوفوا..رغم انها هي اللي جت عليا ومحمد هو اللي طلقها منه ليه...شن هالحقد..
نجاة؛حسد وغيرة حاشاك ياعمتي..في كل مشيه ليها ولاجية تجيني فيها..الا وهي نازله فيك ونازله فيا اني معاك والله قريب تبغددت يومها..
نسرين؛ربي يلطف بيها وحده مريضه..
تنهدت نجاه وحركت راسها يمين ويسار وهي تقول:ربي يهدي..
مغليه:خليها لربك..يعطيها ع قيس نيتها ان شاء الله..
خديجه بنبرة صوت ملفته للآنتباه؛ايه والله ربي يعطي كل حد ع قيس نيته..
شبحتلها نجاه وقالت..آمين..
وخديجه شبحتلها..
"يام"
طول نجاة شبحت للباب وحست بكل جزء فيها ولعت فيه نار الحقد..
خديجه؛خليك يام..
وناضت ومشت طلعتله..
خديجه؛نعم جللو..
جالي؛ترا جيبيلي حمزه..
ابتسمت وقالت:هي شويه بس..
مشت خشت وجت للولد وقالت:عمه يبي يشوفه..
امه ونسرين ابتسموا...
ونجاه ابتسمت بالغصب..
وخديجه حولت الفلوس وخدت العيل ومشت طلعت بيه للجالي..
ابتسم الجالي لماشافه..وقرب من اخته..وهو يزيد يدقق فيه..بعدين قال..الله يبارك..وطلع فلوس وحطله 200 وقال..عنده هديه تلقيها في الجنان..
خديجه؛علاش في الجنان..
الجالي:لما تشوفيها تعرفي..دخليه..
خديجه؛طالع..
الجالي؛ايه تبي حاجه؟
خديجه:لاسلامتك في امان الله..
ومشت خشت بالعيل لأمه..
وهو مشي بيطلع..
🌻حطت خديجه حمزة في مكانه بعدين قالت؛قال جايبله هديه حاطها في الجنان بنمشي نشوفها..
نسرين بفضول؛ارفعيني معاك..
ومشوا طلعوا هما الزوز مع بعض..
مغليه بضحكه؛ماعنداش مع الروح مع الصغار..
ابتسمت نجاة ابتسامه صفراء..
الجالي بالذات لويجيب الذهب والألماس مش حتقبل منه...
🌻وطلعوا خديجه ونسرين للجنان..
وتفاجئوا..
وين شافوا سرير اطفال كبير لونه ازرق منظره حلو بالمرة..
خديجه؛سلم عمه ياربي..
نسرين؛والله مافي احن من قلبه جللو...
🌻🌻🌻🌻🌻🌻
وفي احك اسواق العاصمه..
كانت سدرة مع فايزة وسدرة وغرفه يدهوروا ويدوروا ع حاجه حلوة ياخدوها..
ومعاهم اريج وآلاء وطوبى..
كانت في يده شنطه فيها فلوس عطيهم بوها بش ياخدوا بيهم الحوايج..
وفي نفس السوق..
كانوا يدوروا المهدي وعائشه..
هو قايم بنته في حضنه..وعائشه تمشي جنبه ويهدرزوا..
وماركزوا ع حد..
وكذلك البنات ماركزوش فيهم..
بس في واحد قدام محله واقف مركز ع سدرة يشوفلها من بعيد وهي جايه لفتت انتباهه وعجباته هلبه...
سدرة وهي ماشيه كانت منسجمه مع الهدرزة..وماركزتش ع علاقه قدام محل الراجل فيها وشاحات..
ناشتها بشنطتها وطيحتها..
دارت صوت..
خلا المهدي يلتفت ويشبح جهة هالصوت..
🌻سدرة بإحراج وهي تقيم فيها؛سامحني وخيي بالله عليك..
هو خداها منها وقال بإبتسامه؛ولايهمك..
سدرة؛قداش حقهم..
الراجل بإبتسامه تعجب؛لا مش من جدك مش واخد منك شي..
سدرة؛لامايجيش هكي وخيي راحت فيها بضاعتك..
الراجل بإبتسامه اعجاب:فداك..
هي انحرجت وشبحت لفايزة اللي كانت شاده ابتسامتها بقوة هي واللي معاهم..
ومن بعيد شويه المهدي يشوف في الموقف..
وكأنه كتلة لهب مشتعله...
عائشه؛شن رايك في هدا مهدي..
ماردش عليها..
شبحتله لقاته يشبح لجهة معينه شبحتلها وطول عيونها تعبوا دموع..
🌻الراجل؛تفضلوا خشوا حتلقوا عندي مايعجبكم..
فايزة؛خلينا نخشوا سدرة باين عندهم حاجات حلوة..
غرفه؛ايه صح..
الراجل بإبتسامه؛تفضلوا..
سدرة هزت راسها وقالت؛باهي..
هو فرح قريب طار من الفرحه..
خش قبلهم كلم الشباب اللي يخدموا عنده وكانوا لاهيين مع الزباين يتوصوا فيهم..
وهو مشي قعمز ورا كرسيه...وهما خشوا للمحل..
وبرا...
بعد ماخشوا..
عائشه قالت للمهدي:خيرك مهدي في شن تشبح..
هو شبحلها لقاها تشبح وين مايشبح وماكان في حد وقتها
يحسابها ماشافتهمش..
قاللها؛شن رايك تشوف المحل هدا بالك في حاجات تعجبك..
هي تمالكت نفسها بقوة وشدت دموعها وحاولت تبان عاديه وهي تقول؛باهي..
مشوا الزوز لنفس المحل..
خشت عائشه..
وهو قاعد واقف قدامه ع اساس يراجي وعيونه يدرورا ع سدرة..
شافها لقاها واقفه تشوف في بلوزة..
شويه جتهم عائشه..
☘فايزة:عويشه..
عائشه بإبتسامه؛شفتكم وانتم خاشين لحقتكم..
سدرة؛خيرك ماقلتيش بتطلعي للسوق!؟
عائشه؛ماكانتش اكيده ااطلعه المهدي قبل كانت عنده خدمه ماصارش منها..
سدرة؛اها..
عائشه وهي دور بعيونها في المحل؛حلوة بضاعتهم..
فايزة ؛حتى صاحبها قنين وساخ في سديرة من اول نظره..
سدرة؛لا وانتي الصادقه من اول وشاح..
عائشه بضحكه؛وشاح شني..
سدرة بتوري عائشه مكان الوشاحات؛تو نقولك..ريت سريت الوشاحات اللي برا..
وجه سدره ولى احمر لما جو عيونها في عيون المهدي..
هو طول غير عيونه وهي غيرت عيونها وقالت بضحكه؛نشته وطاح باللي فيه..
عائشه ضحكت..
فايزة؛جت بتدفع حقهم قاللها لا..قالتله كيف بضاعتك راحت..
قاللها.. فداك..
عائشه؛لاهدا رسمي ساخ..
سدرة؛يسيخ ولايخش غيبوبه..فوتوه وخل ناخدوا شلاتيتنا بسرعه مانبيش نعطل..
جتها طوبى وقالت؛سدرة مافيش دبش لعمرنا..
سدرة؛راجي نشروا حني بعدين نشوفولكم في مكان تاني..
طوبى؛في محل جنب هدا في حاجات للي عمرنا سدرة..
عائشه؛صح شفته..
سدرة؛والمعنى..
طوبى:نمشوا نشوفوه جنبكم هني لاصق لصوق..
عائشه؛خليهم يمشوا ويقولوا للمهدي يمشي معاهم..
طوبى؛خلاص سدرة معانا عمو المهدي..
سدرة تنهدت وقالت؛ماتعطلوش..
طوبى ابتسمت ومشت لبنات اختها وقالت؛قالت باهي..
فرحوا ومشوا طلعوا...
لاقوا المهدي..
سلموا عليه وطوبى قالت عن سدره بنته:نجيها هالعسل..عمو مهدي قالتلك ابله عايشه سايرنا للمحل اللي جنبنا..
حس المهدي ان عائشه حست عليه وقصدت تبعتهم معاه..
هو وافق ع مضض وقال؛هي بروا قدامي..
ومشوا وهو معاهم وخلا عقله في المحل..
وفي المحل البنات يختاروا وياخدوا والشباب اللي في المحل تحت خدمتهم..
وصاحب المحل مانزلش عيونه عن سدرة...
وفي المحل التاني..
المهدي نزل بنته وقعمز قدامها ع كرسي وقعد يلعب فيها مسايرة ويشبح جهة المحل اللي فيه مرته وصاحباتها..
وطوبى في المحل تختار مع بنات اختها في الدبش..
لين خدوا اللي عجبهم وبعدين طلعوا..
المهدي:خلاص كملتوا..
اريج؛عمو قعدوا الاحذيه هما هني نخشو نشوفوهم..
المهدي:باهي بسرعه..
مشوا التلاته لمحل الاحذيه..
والمهدي خلاهم يخشوا ومشي يشوف للمحل اللي فيه النساوين..
شبح للباب لقاهم شادات بلوزة وفاتحات موضوع ويهدرزوا..
المهدي؛هي خودلك!..
🌻فهالوقت..
جي من بعيد نضال ومعاه صحابه..
هدا موسم المعاكسات بالنسبه لأمثالهم..
نضال وزع رقمه ع خمس بنات ومازال بيزيد..
نضال؛لكن تعرفوا كيف ياولاد العام هدا مش ولابد البضاعه مش مليحه..
:والخمسه اللي فرقت عليهم الرقم..
نضال:يقولوا الجود في الموجود..
ومرر نظره ع المكان. ثبتوا عيونه ع اريج وهي طالعه من محل الاحديه..
حطت كيسه الحذاء متاعها ع تركينه ومعاها الشنطه..
وطبست تربط في سبيدروها..
بعد ربطاته وقفت ع حيلها وخشت للمحل تستعجل البنات..
هو ابتسم بمكر...وقال؛شويه شباب.
وجري بسرعة البرق..
خدي الكيسه والشنطه وهرب يجري..
صحابه انصدموا..
:شن درت انت!؟
نضال؛تي غير تعالى انت وياها..وهرب بيدرق في تركينه وهما لحقوه وهما مش فاهمين شي..
اريج:ديما هكي لاعاجبك العجب لاالصيام في رجب..
الاء:خل نشوفوا مكان تاني..
طوبى:خلاص خليها براحتها..
اريج؛دراه كبد..والتفتت لحاجاتهم بتاخدهم..
مالقتش كان مكانهم...🍃
فتحت عيونها ع وسعهم وقعدت ترعش وهي تقول:حي عليا الشنطه والكيسه وين!؟
الاء:وين حطتيهم انتي؟
اريج ودموعها في عيونها اشرت ع المكان وقالت:هني والله حطيتهم هني.
طوبى بقلق؛بالك خلتيهم داخل!؟
اريج:لا متأكده هني اني طلعت بيهم والله.
الاء؛معقوله ياغبيه تحطيهم هكي!
اريج ضربت خدودها بإيديها:حي عليا ياربي الفلوس راحو الكندرة..
ودموعها نزلوا..
طوبى قعدت تمشي دور هني وهني..
واريج قعدت دور معاها..
والاء خشت للمحل بش تتأكد..
اريج وهي تبكي ؛حي عليا ياطوبى الفلوس مازال بنشروا كندرة لآلاء...مزال ماما تبي حنه وحاجات تانيه ياربي كيف ندير!
☘ومن بعيد
:حرام عليك ياراجل البنت تبكي..
نضال ومبتسم بشماته؛لاخليها لين دوخ الشمطاء هادي..
:شن الغل هدا كله ع طفله!؟
نضال؛هادي طفله! مسكين ياانت ماتعرفهاش...
آلاء طلعت من المحل وهي تقول؛مافي شي مافي شي ياغبيه مفروض بابا ماعطاك شي ماينعباش عليك..
طوبى:الاء خلاص اسكتي اختك مش ناقصه..
الاء:كيف ندير اني باهي قوليلي كيف ندير..
واريج تشبحلها وهي ترعش..
خافت من حساب بوها..هي ديما محسساته انها اهل للإعتماد عليها..بس بعد اللي صار اكيد حتتغير نظرته ليها..
حست انها عاجزة ومش قادره دير حل..
غير انها تحط ايديها ع وجهها وتبكي..
طوبى:روجه!
والآء تشبحلها بغضب وهي تهز في رجلها..
☘نضال؛تعرفوا كيف وجعتني الفرخه..اسمع عصام برا ردهم وقول شفت اللي جنبهم طلعت وراه نجري لين خديتهم منه..
فهاللحظه شافوا المهدي جاي ناحية البنات..
صاحبه قال:خوك المهدي معاهم! لالافوتني اني..
نضال وهو يفنص؛حي ع امها!! شن جابه ليهم!؟
☘المهدي؛خيركم شن صار؟
طوبى شبحتله وحكتله اللي صار كله..
المهدي نزل سدرة وعطاها لطوبى..
خدتها..
وهو قعد يمشي ويدور هني وهني..
اريج ببكي:عمو دورنا مافي شي..
المهدي؛خل نشوف اللي واقفين هني بالك في حد فيهم شاف حاجه..
ومشي سألهم..كلهم قالوا..ماشفنا شي..
واخيرا طلعوا سدرة والبنات من المحل وهما حاملين ومحملين..
وصاحب المحل طالع وراهم يشوفلهم..
فايزة؛والله جو خدينا اللي نبوه وبالسعر اللي نبوه..
غرفه:بركات الشيخه سدرة..
سدرة:اسكتوا خلاص..
وعائشه تضحك..
غرفه:حي اريج خيرها تبكي!
سدرة بخوف:شني!؟
ومشت تجري ناحيتها..
وصلت فيها وقالت؛خيرك اريج!؟
ع جية المهدي..
حكت طوبى اللي صار..
سدرة؛ياحليلي كيف هكي!! وقعدت دور بعيونها في المكان..
المهدي:سألت كان في حد شاف حاجه اللي هدا يقول ماشفنا شي..
سدرة بعصبيه وبدون ماتنتبه لنفسها:وانت وينك!؟
عائشه شبحتلها..
والبنات قعدوا يشبحوله هو..
هو حس روحه انحط في موقف بايخ امنوه ع البنات ومشي عنهم وخلاهم..
سدرة وهي معصبه:والله مانبي نطلقهم بروحهم مفروض مانعبى ع حد..تحركوا قدامي..
عطت طوبى سدرة لأمها...
وبعدين مشوا طول قدامها خوفا منها لأنها كانت معصبه..
وهي مشت معاهم ووراها فايزة وغرفه..
والمهدي معاها بعيونه وهو شاد ع قبضه يده بقوة..
عائشه:خلاص خلينا نروحوا..
المهدي غير عيونه ليها وقال:بري الحقهم مانيش مروح قبل لنلقى الكلب اللي دار هكي.
عائشه؛مالا بيقعد في السوق بعد دار عملته..
المهدي بحزم:عائشه...واشر بيده عليهم..معناها بري معاهم..
عائشه شبحتلهم قالت؛هونا هداكا شكله بيديرلهم حل..
شاف صاحب المحل يكلم في سدرة..
كان خلاص حيفقد اعصابه بس ضبطهم في اخر لحظه وقال:بري قوليلهم المهدي تو يتصرف..
ومشي من حداها..
وهي االي كانت تحاول تخفي عصبيتها وغيرتها..
مشتلهم..
الراجل:تو نشوف شن نقدر ندير ياابله..
ومشي حتى هو..
ع جية عائشه وهي تقول:شن صار؟
سدرة وهي معصبه:شن بيصير ع اساس بيساعدنا ماعنده مايدير..اللي خداهم مش حيقعد يراجي هني لين حد يشده..
فايزة:لاحول ولاقوة الابالله..
واريج تبكي وطوبى طبطب عليها بعدين قالت:وين عمو مهدي؟!
عائشه:مشي بش يقرب السيارة..
ابتسمت سدرة تهكما..
☘☘☘☘☘
في جناح...نجاة وطاهر..
نجاة؛بجديات حاجه غريبه يعني بعد هدا كله ومازالوا صاحبات..
نسرين:مجرد ماضي وراح ع حاله توا المهدي عنده عيلة وصغار وهي لاهيه بحياتها اصلا قبل مفروض عرسها العام الجاي لكن ربك ماارادش..
نجاة ؛وتقعد قدام عيونه عزبا..وهو اكيد في يوم حيحنلها..
نسرين:لا مستحيل ماحنلها قبل بيحن توا..
نجاة:سبحان الله اني كنت نحساب علاقتها بعيشة مقطوعه لأنها ماتجيش هني بكل..
نسرين؛ايام كانت مقريه فاتحتها..
نجاة ضحكت بإستغراب:وعلاش يعني ماتجيش لهالسبب!؟
نسرين ارتبكت وقالت:ماهو..قصة المهدي وسدرة زمان كانت معروفه في شارع القهوة كله وراجلها الله يرحمه طبيعي لما بيسأل عنها بيعرفها وهي مراعاة ليه معاش جتنا..
نجاة؛هدا مش ماضي هدا حاضر قائم!
نسرين بإبتسامه:لا ماضي صدقيني..
نجاة:مع هدا لازم تحتاط عيشه..تو يعني ممكن تكون وضع فايزة مايشبهش لوضع سدرة واللي صار يومها بين هالشي..
وجه نسرين تغير.
نجاة:اسفه مش قصدي نذكر بشي انتي قلتي معاش تبي تحكي فيه بس اني نفكر في مصلحة عيشه لإني حطيت روحي مكانها..ممكن في ليلة من غير ضي قمر تلقاه واخدها وتلقى روحها برا حياته..وماتقوليش ماضي مدام قدامه مستحيل تقعد ماضي..وواضح ان قصة حبهم كانت قويه مش من النوع اللي ينتسى مع الوقت..
نسرين:ردي بالك تقولي او تلمحي بكلام زي هدا قدام عيشه..مانكذبش عليك زمان ياما صار بينهم.
نجاة "حلو هلبه":لا شن تشوفي فيا هبله! بعد عرفت القصه مش حنجيب قدامها سيرة سدرة مع المهدي بكل.
نسرين:ولااني مازال تجبدي اللي صار معاي..مانبيش نزعل منك نجوته..الزعل متاعي اني خيي عليه راهو...
نجاة بضحكه:خلاص اسفه ياستي..
نسرين غيرت الموضوع وشبحت للسرير وهي تقول:يهبل السرير..
نجاة شبحتله بنظرات حاده وقالت:امم...

#قبل_العاصفه3
#طوبى

....يتبع....