طوبى الجزء الاول

الجزء الثالث والأربعين

(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_الثالث_والأربعين"إلا أنت1"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
وتم الإتفاق بين العائلات..
ع موعد العرس اللي حيكون مع عرس اميمه وعمر في نفس الأسبوع...
وعلى انهم يديروا تلبيسه رابع يوم العيد
وانقضي شهر رمضان...
وطل العيد...
وفي قلب بعيد معيد بعيد عن احبابه وميت من شوقه ليهم لكن إمكانيات العصر الحديث هونت بعد المسافات...
عبر مكالمة ماسنجر فيديو...
صفيه ودموعها في عيونها:كل سنه وانت طيب وليدي..
"كل عام وانتم بخير يام...شن اموركم"
صفيه:تمام ولدي الحمد لله..ناقصنا تكون حدانا بس..
"يفوتوا الشهور يام بسرعه الايام تجري دورة تلقي روحك في شهر 11 ونخشوا طول ع عرس القطوسه وينها هي"
امه كانت تبتسم بالغصب وهو يتكلم عن العرس قالت؛اهي تحوس عارف الناس اللي تجي تعيد ع جدك اول يوم..
"ايه عارف عارف..لكن هي غير تبان شويه تعيد بس"
جت اميمه وع وجهه ابتسامه مبالغ فيها ماتبيش خوها يحس بشي:سونه حبيبي كل سنة وانت طيب..
"كل عام وانتي بخير ياقطوسه..عيدي ع الكابتن هو الاول صح"
هي انحرجت وهربت مرة وحده..
ضحكت صفيه وقال:حرجتها ليك عليك..
وحسين ضحك بعدين مسح ع ذقنه وقال:شن حال حوش عمي..
اميمه وهي تصب في القهوة شبحت لأمها بحزن..
وصفيه تقاوم بإبتسامتها المصطنعه وهي تقول:الحمد لله كلهم كويسين مابيهمش..
"غرفه وراجلها شن امورهم"
صفيه:سمن ع عسل والله ماتقول صايرة حاجه..
"باهي الحمد لله الحمد لله..يام بنسكر توا بعدين نعاودلكم جو الجماعه"
صفيه:باهي وليدي باهي بالسلامه توا..
"سلام..سلام"
سكرت صفيه..
واميمه طلعت قدامها بالسفره وهي مضايقه.
صفيه بقلق:ياربي استرها معانا ومايصير لأميمه شي حتى هي في جرتهم...
☘☘☘☘
طلعت من جناحها وهي لابسه قفطان مغربي وحاطه برنوسه ع راسها...
رافعه في غمرها ولدها اللي كانت ملبساته عربي..
وحداها جوري وحمزة بكامل اناقتهم ولابسين احلى لبس..
خشت عليهم الصاله وهي تقول..
نجاة بإبتسامه:صباح الخير..
الصغار مشوا يجروا لمغليه..
ومغليه استقبلتهم يالأحضان وهي تقول:مرحبتين مرحبتين...
حمزة:كل وانتي بخير حنينه..
جوري: كل وانتي بخير حنينه..
مغليه:كل سنه وانتم طيبين..
وجنبها سدرة مقعمزة تشبح للصغار بإبتسامه..
اما نجاه مشت تعيد ع عائشه..
عائشه:من العايدين الفايزين ان شاء الله..
نجاة:اجمعين..تقبل الله منا ومنك صالح الأعمال..
عائشه:آمين..
مشت بعدين نجاه لمغليه باست راسها وقالت:كل سنه وانتي طيبه عمتي وان شاء الله كل عام منورتنا بوجودك..
مغليه:اللهم آمين..كل سنه وانتي طيبه..
ومشت نجاة قعمزت جنب عائشه ونزلت برنوسها..
كانت هالمرة طالعه حلوة هلبه وكأنها عروسه..
مغليه لاحظتها بس كانت دير في روحها ع قد ماتقدر بش ماتبين شي..
نجاة:ووك عيشه نزلتي هلبه..
عائشه:المعده متاعي طلع فيها جرثومة المعده حاشاك..
نجاة:مش قالوا بكتيريا!
عائشه:دورته فاضيه الدكتور هداكا قالتلي الدكتورة اللي نعاين عندها مايعرفوش الحاجه هادي الا بالتحاليل وهو ماطلبش عليا تحاليل خلاني ناخد في المضاد ع الفاضي..
مغليه:تشخيص صفر..
نجاة:والطب زفت فهالبلاد..اهو حمزة كان مش رفعوه عمته وعمه برا وعاينوه راهو لتوا ماعرفنا وضعه..
حمزة:امي بنطلع..
نجاة:برا ماما..
مشي حمزة طلع من حداهم..
نجاه وهي تشوف لسدره كيف شاده في يدها فلوس قالت في نفسها..
"عزوز الستوت بتبدا بجو المكر"
عائشه:سدرة خودي بنت عمك وبروا العبوا وعطيها حاجاتها..
نجاة:غير علاش متعبه روحك!؟
عائشه:لاتعب ولاشي كله من عمهم وهو زي بوهم بالزبط..
نجاة:تسلموا ربي يبارك فيكم..
عائشه:أجمعين..
مغليه:نوضي عويشه ديرلنا قهيوه..
عائشه:حاضر.
وناضت مش طلعت من حداهم...
مغليه:شني يانجاة عيدتي ع لطفيه..
نجاة تنهدت وقالت:نكذب عليك لو نقولك مااتصلتش بس هي مابتش ترد..
مغليه:معليشي حاولي اكثر من مرة..انتي اصلا مفروض اليوم عندها..
نجاة:والله كان بودي ياعمتي..والحق ماكنتش نبي نحكيلك لكن الله غالب..
عقدت مغليه حواجبها بإستغراب..
نجاة:يوم الموسم في رمضان كلمتها ردت عليا قلتلها بنجيك نفطر عندك اول يوم..واني نقول هالكلام من هني تنزل فيا هزايب من هني وتقولي معليشي عمتي هي قالت..قالتلي بري لهديكا اللفعه رمضني وعيدي عندها وحتى الصغار مانبيهمش خليهم لخرابة البيوت السحاره..
مغليه بغضب:ريتي ريتي..اني اللي طلعت خرابة البيوت وسحارة..لعنة الله عليها هالفاتشه المعفنه..تي هيا اللي خشت عليا هالمسردنه وكانت تبي تخرب حوشي..صدق من قال اللي تحشموا ماتوا..
نجاة:مادوريهاش ياعمتي هادي وحده مريضه ومش مزبوطه..
مغليه:ربي ياخدها فيها الحق ويبليها باللي ماتقدر عليه..ماتبيلها مواصله الشيطانه هادي افتكيتي من وجهها..
نجاة:الله غالب ماكنتش نبي هكي بس هدا اللي صار..
☘شن هو اللي صار يانجاة ماصار شي..القصه اللي حكتها كلها كانت مختلقه الغرض منها كسب دعم مغليه بس ولاع عزوزتها ام الطاهر من لما توفى لاكلمتها ولاتندري عليها وكذلك هي مادورتهمش نهائي...
☘☘☘☘
وفي شارع القهوة..
طلعت مغليه مع خوها لطفي لمكان الحلاق ومعاها سفرة حلويات شغل بيتي..
فراس وهو مبتسم بإحراج:يعيشك خالتي وربي يحفظك..
مطيره بإبتسامه:عاد انت توا ولدنا فك شويه ومعاش تعقد روحك راهو الناس هني طيبين اطلع تعرف هدرز..وقالت بالتونسي..ماتقعدش شاد بلاستك عيش ولدي..
ضحكوا لطفي وفراس..
فراس بضحكه:حاضر حاضر كلامك ع راسي خالتي وان شاء الله نبدا نفده..
مطيرة:ايوه سلم ولدي..هيا عيدك مبارك..
ومشت طلعت..
فراس:وعيدك خالتي..
لطفي:غداك معانا..
فراس:لا هالمرة ريحوكم عيلة نجم اللي يسكنوا جنبي..
لطفي:تعبك راحه يافراس..
فراس:تسلم يارب..
لطفي:كلمت اهلك عيدت عليهم..
فراس:اها..كلمت المدام والصغار والميمه..وغدوة ان شاء الله بيجي خو المدام معيد هني..
لطفي:باهي باهي...لمن غداه علينا..
فراس بضحكه:مش حنقول لا..
لطفي بإبتسامه:بإذن الله..هي نخليك توا..وان شاء الله كل سنه وانت طيب..
فراس:كل عام وانت بخير..
ومشي لطفي طلع من الحلاق شبح قدام يوسا واقف ع الدكتور اياد ومهند يهدرزوا..
لطفي وهو متفاجئ:اوووووو...الهرابه جو..
اياد ومهند قعدوا يضحكوا..
جاهم وهو يقول:تي وينكم وينكم وينكم...
ووصل في اياد سلم عليه بالأحضان...
اياد:هانا جينا...كل سنه وانت طيب..
لطفي:كل عام وانتم بخير..
تباعد اياد وهو يقول:ينعاد عليه بالصحه والسلامه..
لطفي:اجمعين..
مهند؛كل عام وانت بخير عمي لطفي...وسلم عليه بالأحضان..
لطفي:كل سنه وانت طيب يامهند..
تباعدوا عن بعض وقال لطفي:والله عليكم حق وزعلان منكم رسمي..
اياد بضحكه:عيد عاد سامح ياراجل..
لطفي:مش قبل مانعاتب..هي تفضلوا لحوش الوالد يفرح بجيتكم هلبه..
اياد:والله حتى اني استاحشته..
لطفي:هدا علاش مقطع عليه شلايكك..
ضحكوا اياد ومهند..
لطفي:هي تفضلوا..يوسا حتى انت تفضل..
يوسا:لاشكرا..صحيت..
لطفي:والله ماضال الا ماشي قبلي..
اياد بإبتسامه:حلف يوسا خلاص..
يوسا ابتسم بإحراج وقال:باهي..
ومشوا كلهم لحوش علي الواعر ويقعدوا في مربوعته مليانه..
☘زي مربوعة حوش شنيبه المعبيه بالناس اللي جاية تعيد...
☘☘☘☘☘
الساعه 12:00ظهرا..
خشت طوبى ع غرفه الكوجينه وقالت:روفي روفه يبيك برا..
غرفه:شكله بيقولي هيا..
مسحت ايديها في الفوطه ومشت طلعت..
وطوبى كملت عليها باقي الحوش..
ومشت غرفه طلعت للجنان لقاته واقف القدام حاط ايديه ورا ظهره ويشبح فيها جايه بعيونه المدرقات بالنظارة.
وصلت فيه وقالت:نوتي روحي؟
عبد الرؤوف:جيت بنسألك كان تبي تقعدي ولاتمشي معانا..
غرفه بنبرة غيره:وين ماانت وين ماأني..
ابتسم وقال؛باهي بري البسي عبايتك واطلعي نراجي فيك برا..
غرفه:حاضر..
ولفت ومشت وهي تقول:يبيني نطلقه يمشي لحوش عمته الشومه وبناتها بروحه!
وهو عارفها في شن تفكر هدا علاش طلع للسيارة وهو يضحك...
☘☘☘☘☘
الساعه 7:00مساءا..
الحوش كله راقد..
وهي الوحيده اللي فاقت..صلت العصر اللي فاتها بسبب النوم
ومشت قعمزت في الجنان وقعدت تستغفر..
بعدين بدت تقرا في اذكار المساء وهي تمرر في نظرها ع الجنان..
وقداش كان يشبهم جنانهم...جنه...
مرات بش تخشع بالذكر طوبى..تقعد تتخيل روحها مقعمزه في الجنه..
وتبتسم تلقائيا...
كملت اذكار وقعدت تسمع في صوت العصافير كيف زاد قوي..
طوبى وهي مبتسمه بغيره:مش انتم بس..وبدن تردد..
سبحان الله وبحمده..سبحان الله وبحمده..سبحان الله وبحمده..
وحواليها قطاطيسها يدوروا وهما يتفرجوا عليها..
جي واحد منهم لرجلها وقعد يتمسح توددا بش ترفعه..
ابتسمت وهي مازال تسبح وطبست خداته وحطاته في حجرها..
فجأة..
دق باب الحوش..
شبحتله وعقدت حواجبها بإستغراب..
عاود دق من جديد..
نزلت القطوس وناضت وهي تساوي في وشاحها..
لين وصلت في الباب وقالت:منو؟
"يزن"
ابتسمت وفتحت الباب وبينت راسها..
لقت يزن شاد في يده بوكس لونه ازرق غامق وملفوف عليه شريطه لونها سماوي..
طوبى بإبتسامه:هلا يزون كل سنه وانت طيب..
يزن؛كل عام وانتي بخير..خودي..
طوبى:ليا اني؟
يزن:ايه من عمي الجالي.
وجه طوبى بدي يحمر شويه شويه..
شبحت القدام..لقاته وهو لابس عربي واقف ع السيارة ويتكلم بالتليفون..
شبحت للبوكس وقالت:صحيت يزونه..
وخداته منه..
يزن:اسمعي قالك افتحي وشوفيه ووريني ردة فعلك..
شبحت تاني للجالي..لقاته مازال لاهي بالمكالمه..
هزت راسها وقالت:باهي..لحظه بس...
خشت وردت الباب شويه..
شدت البوكس بيد والتانيه فكت بيها الشريط وحولت الغطا..
فتحت عيونها ع وسعهم من المفاجأة..
وابتسمت ابتسامه واسعه من الفرحه...
كان في البوكس..تلاته سلاحف وحده كبيره وزوز صغار..
طوبى بفرحه:ياعمري يهبلوا يهبلوا...
التفتت للباب..
فتحاته..
لقاته مازال لاهي بالتليفون..شبح جهتها لما سمع صوت الباب..
شاف ابتسامتها للي كانت طالعه من القلب..
هزت راسها وقالت بحركة الشفايف..."شكرا"
هو هز راسه وابتسم ع جنب وشبح القدام وكمل مكالمه..
ردت الباب ورجعت شافت للسلاحف وهي فرحانه بيهم بطير من فرحتها..
☘وفي حوش شنيبه..
نجاة مقعمزة في الصاله ع نار..
هما يتفرجوا ع التلفزيون وهي تبي تعرف الجالي مع مني يتكلم اللي ليه انتظار فوق الساعه..
شافت لمغليه اللي كانت متكيه لقتها راقده بالنوم..
وعائشه حتى هي...
والصغار نفس الحاله..
ناضت نجاة ومشت طلعت من الصاله..
وقعدت تمشي ودور بحذر..
ع خشة الجالي للحوش..
فجعها صوت الباب شبحتله.
هو سكره وقال بصوت منخفض:شن ديري هني.
نجاه بنفس الصوت وهي معصبه:مع مني مشغول!؟
الجالي؛بري خشي..
نجاه؛مع مني..
حط المكالمه ووراهالها وهو معصب..
هي هدت وقالت:رديت عليا
الجالي وهو معصب؛نجاه خشي داخل ومانبيش نشوف وجهك لين تروحي..
وطول مشي للدروج وركب..
وهي ندمت طول ع اللي داراته وبدت تأنب في روحها وتقول :غبيه حتى اني  .
ومشت ولت للصاله..
☘هو لما وصل لجناحه كان معصب ع الاجر من نجاة وتصرفاتها اللي ممكن تكشفهم للكل وتوديهم في داهيه...
رن تليفونه شاف المتصل رد..
الجالي:شن تبي ياخديجه شن تبي..
"خيرك والع اللطف!"
الجالي؛اختصري..
"قبل بنسألك ع المحل اللي بيلف حاجات التلبيسه"
الجالي:يفتح تالت يوم العيد تو نرفعله الهم واليوم اللي بعده الصبح نمشي ناخده تريحتي..وسكر في وجهها..
وهو معصب حدف التليفون ع السرير وقال:درهتولي كبدي وكرهتوني في عمري  نساوين الهم...
☘☘☘☘☘
الساعه 8:30مساءا
"مقنينهم مقنينهم"
طوبى وهي تشوف للسلاحف بلهفه:يهبلوا يهبلوا..
مطيرة بضحكه:ريتي الجالي هدا توا هكي مالا بعدين كيف..
ابتسمت طوبى بخجل..
سدرة وهي تشوف للسلاحف ضحكت وقالت:شوفي كيف تاكل شوفي..
طوبى بضحكه:عسل..
مطيره:غير راهو ينغروا عيت مياو..
ضحكت سدرة..
طوبى:لالا مش حندير الفرق بين صغاري..
ضحكوا عليها سدرة ومطيره..
☘وفي الحوش اللي في جنبهم..
كانوا الكنه وحماتها مقعمزين يهدرزوا..
ريمه:ننصحك بالماركه هادي احلا..
اميمه:تمام خل نحفظ الاسم..
ع جية صفيه بالمكنسة الكهربائيه..
اميمه سيبت اللي في يدها وناضت وهي تقول:خلي عنك امي..
ريمه ناضت معاها وقالت:خلوا عنكم انتم الزوز..
صفية:لاحبيبتي قعمزي مكانك يخش راجلك يلقاك تكنسي يقول دايرينها خدامه..
اميمه شبحت لأمها بعدم رضا..
ريمه:لاوالله ياعمتي يوسف مش هكي بكل ديما يقولي تحركي وعاوينهم..
صفيه بتهكم؛كتر خيرك وخيره ياحنه..
اميمه خدت المكنسه وعطتها لريمه وقالت:خودي حبيبتي انتي اكنسي وحني نخشوا نوتوا العشي..
وخدت اميمه امها من يدها ومشت بيها..
وريمه تنفست براحه ومشت شغلت المكنسه وبدت تكنس.
☘في الكوجينه..
اميمه:نعرف قلبك ابيض يام..
صفيه :وقاعد ابيض بس هالبنادمه معاش خشتلي خاطر من لما جت وخربت ع خوك..
اميمه:هي جت ومش عارفه انه كان خاطب..
صفيه:حتى انتي قاعده ع نياتك يابنتي..لو كانتش عارفه وقاصده راهو ماخدتاش في السر..
اميمه:باهي خلاص قصه وصارت ماتخليش يبعد عليك يام ويخليك بالله عليك..
صفيه بحسرة:قداش ليه مبعد..
اميمه:وانت بدال ماتقربيه تزيدي تبعديه!
سكتت صفيه وهي مضايقه.
اميمه :لمينا حواليك يام راهو مالينا الا بعضنا..
هزت صفيه راسها وهي مقتنعه ومتأثرة بكلام بنتها بعدين قالت:شن بنديروا العشي..
اميمه بإبتسامه:قلايه وبطاطا شن رايك؟
صفيه ابتسمت وقالت:باهي...
☘ولحوش تاني من حياش شارع القهوة..
صار مع احد افراده تغير سريع وغريب...
نجاح:قصدك خلاص التزمتي..
عواطف وهي تلبس في ملاية الصلاه قالت:ايه الحمد لله..
نجاح:غريبه..
عواطف:وشن الغريب تشبحي فيا يهوديه..!
نجاح:باهي خلاص اسكتي مش وقته توا خل نطلعوا نعيدوا ع عمي وولاده..
ومشت نجاح طلعت..
وهي تساوي في الملايه قالت بكره:ولاد عم وعم الهدود اللي مافيهم واحد فكر في بنات عمه ولاعمي قال لبوي نبي بناويتك لولادي...الناس تحجر من فيهم من وهما في القماط..
حطت يدها ع وجهها وهي تقول..ع حظنا حني النحس..
ومشت طلعت من الدار وهي معصبه..
☘☘☘☘☘
في هالوقت
خشت سيارة عبد الرؤوف لشارع القهوة..
واللي صاير في السياره عاصفه كلاميه بينه وبين..
عبد الرؤوف:اني منبه الف ع طولة لسانك هادي..
غرفه:هما تمادوا وحتى اسأل نبيله..
نبيله:جدد عليك عمتي وبناتها يامبروك!؟
عبد الرؤوف:ياودي اني عارفهم لكن هي جايه زياره كم ساعه والدنيا عيد مشت وتحملت..
غرفه:وخير ماينقاللهم هما الكلام ولابس غرفه اللي تاكل الهزايب والتكشيخ..وغلبها البكي..
نبيله؛غرفه!
عبدالرؤوف:دراما..
غرفه ببكي:مالا شنو باك بنوجعك ولابتجي معاي ديما اني اللي ماننفعش مهما ندير..
عبد الرؤوف:لاحول ولاقوة الا بالله..
ونبيله تحرك في راسها يمين ويسار بعدم رضا..
وصلوا للحوش وخش عبد الرؤوف بالسيارة لداخل..
درس..
هي نزلت اول وحده وخبطت الباب بقوة..
نزل وقاللها:تو نوريك..
خشت وماعدلتش عليه..
نبيله:زودتها راهو ..
عبد الرؤوف وهو يحرك في راسه استفهاما بسخريه:علاش شن درت!؟
نبيله:لامادرت شي غير انك هزبتها قدامهم واحرجتها..
هو قال: مطوله لسانها ع عمتي تبيني نصفقلها..
نبيله عكرشت وجهها وقالت:ع اساس مش عارف عمتك ولسانها يعني..
قاللها:مهما كان تقعد مراة كبيره تحترمها غصب عنها..
نبيله بإستسلام:ريقي شاط من النقاش معاك..
ومشت خشت داخل..
عبد الرؤوف:المهم توقف معاها وخلاص..مالا شنو محامية نساوين حتى هي..
ومشي سكر باب الحوش كويس بعدين خش داخل..
☘☘☘☘
"اهو بيطلع وراك نضال نازل توا"
نجاة وهي مبتسمه بالغصب:باهي..هي تصبحي ع خير عمتي.
مغليه:قدامك كل خير..
ع خشة محمد المهدي:حطيتهم الصغار في السيارة..
نجاة:شكرا..ومشت طلعت...
ووراها مغليه تسقد فيها..
ع نزله نضال من فوق وهو يجري..
محمد؛وين ياطير؟
نضال؛بنوصل نجاة وجاي..
محمد:اني في المربوعه..
نضال؛تم..
ومشي نضال طلع..
ومحمد مشي بإتجاه المربوعه..
نضال وهو طالع من الحوش شاف لنجاة في السيارة لاحظ انها معصبه..
وعرف السبب..
واخده ع الجالي هو اللي يروح وراها ديما..هالمرة تغير الوضع خلاص..
مشي ركب سيارته عيونه جو ع حوش الصيد..
شاف خديجه واقفه في روشن دارها..
ابتسم ع جنب وشغل السياره..
هي تحركت وهو طلع وراها..
مغليه سكرت الباب وهي تقول براحه:هم وانزاح..
ومشت خشت داخل..
اما خديجه اللي كانت واقفه في الروشن قالت:كان غيرك اشطر يانجوته..
سكرت الستار وخشت...
☘وفي الوقت الجالي غارق في النوم ومايندري ع حاجه..
🍀🍀🍀🍀
ويعدوا تاني وتالث يوم العيد..
ويجي الرابع..
من الصبح الكل في حوش لطفي..
يوتوا ويجهزوا للتلبيسه..
وطوبى مابتش تقعمز بكل من التوتر...اغلب الشي هي طيباته..
وماكانتش حتطلع من الكوجينه لولا هزايب سدرة والحاح فايزة..
☘☘☘☘☘
"مش حيقولولي تعالي معانا عارفتهم"
مروة:حماتك الشيطانه هادي..
نجاة:خايفه مني نخرب عليهم..
صابرين:طز فيها في النهايه انتي مرته والاولى والاخيره وهديكا مجرد برستيج قدام الناس..
نجاه:مش حنقعد عمري كله في الظلام حنولي مرته قدام الناس حتى اني..غير يصبروا عليا بس عيلة شنيبه..
مروة:بالعقل سلم وخيتي بالعقل راك تكرهي الراجل فيك وتخليه يطلقك..
صابرين؛حتى اني ننصحك نفس النصيحه نجاة ردي بالك..
نجاة هزت راسها وخدت فنجان القهوة شربت منه وهي تسحن من داخل..بتموت....
☘☘☘☘☘
الساعه9:45ليلا..
واقفه في الصاله وهي لابسه عبايتها وتصور في السوابت الزجاجيه اللي فيهم حاجات التلبيسه..
ع خشة نضال ومعاه عمر..
عمر:شويه نسرين..
بعدت ..وهما الزوز رفعوا وبيطلعوا..
نضال وهو ماشي قعد يغني:اهو جي اللي يبيها اهو جي جاب كساويها..
ضحكوا عمر ونسرين..
وهما طالعين جت خديجه..
وقالت:هي شن تراجي خالاتك بكري راكبات..
نسرين قلبت عيونها ومشت طلعت بدون ماتعبرها..
خديجه شبحتلها من فوق لتحت وقالت:انفلقي..
☘وطلعوا الولاد باقي السوابيت..
هالمرة عائشه حضرت لأن سدره قالتلها مش حيديروا منظومه دربوكه بس..
وركب مع سيارة راجلها..
ودارو دورة بالسيارة في المنطقه بعدين ولوا لشارع القهوة ودرسوا قدام حوش شنيبه..
ونضال قلب الشارع بالألعاب الناريه..
☘داخل..
في دار البنات وين ماكانت طوبى معاها بنات اختها.
طوبى بتوتر:حسهم جو..
اريج بضحكه:تقول جايه مليشيا بتهد ع الحوش..اهدي يابنتي خيرك..
آلاء:انتي توا هكي بيبو مالا في العرس كيف..
طوبى بضيق:تعرفوا حاسه روحي استعجلت..
اريج:كان تسمعك خالتي سدرة توريك عييت وهي تسأل فيك وتعاود هاشني ياطوبى فكرتي كويس ياطوبى..
غمضت طوبى عيونها وخدت نفس عميق بعدين زفرت وقالت بصوت منخفض..
لاإله إلا الله وحده لاشريك له له الملك وله الحمد بيده الخير وهو على كل شيء قدير...
اريج:ايوه قوليها لين يقولوا:اطلعي..
فجأة سمعوا اصوات الزغاريد..
مشوا اريج وآلاء طلعوا وخلوا طوبى مع توترها بروحها وهي تردد في #تاج_الذكر
☘☘☘☘
في الصاله..
والسوابيت متوزعات عليها بدوا يشتوا عليهم العيلتين...
مغليه..
يامبروك عليه وليدي فرحانه من وسط قليبي..
وهما يردوا وراها...
مطيرة..
هدا حد القدر معاكم نوار الحوش عطيناكم...
وهما يردوا وراها.
خديجه..
حصليتيه ولد متسمي..لاتبكي لاتقولي امي..
وهما يردوا وراها..
فردوس..
يامبروك على غاليتي حطيتك وين تهنيتي..
ردوا وراها..
أريج..
هي زينه والزين لهلها مبرك يومه اللي حصلها..
وقعدوا يزغردوا ويردوا وراها
وحده من خالاته..
ان شاء الله تجينا حنونه كيفه..
نشاد يرحب بضيقه..
زغردوا عيت شنيبه واللي جايين معاهم وقعدوا يردوا وراها..
خديجه..
جيابين المال رباطي ان شاء الله كرسيهم مايواطي..
وقعدوا يردوا وراها بحماس..
فايزة..
جيابين المال شويه..ان شاء الله مايغيبوش عليا..
وقعدوا وراها بحماس حتى هما..
اريج..
ياسلم بو جرد نظيف..مربيهم ربه ع الكيف...
كلهم زغردوا..
بعدين ردوا وراها...
فردوس..
ان شاء الله سالم ياسيدي..
نور العين وجد وليدي...
نسرين..
علينا يا غالق الفام
تعيش ميه واطناشر عام...
زغردت خديجه..
وهما يردوا وراها...
فجأة عطو بعضهم نظره..
وبدت خالتهم تصفق ع يدها بقوة ورفعتها فوق وهي تغني..
والجالي ياالأمير..واللي تبيه يصير..
وهما داروا زيها ورفعوا ايديهم وقعدوا يردوا وراها..
وعيلة الواعر مصدومين ومش عارفين علاش عيت شنيبه خاشيين حاميين هكي...
مطيره رفعت ايديها وبديت تشتي..
سعيدنا سعيدنا بنيتنا لوليدنا..
رفعوا البنات ايديهم معاها وبكل حماس قعدوا يردوا وراها..
لين خلوا عيت شنيبه غصب عنهم يردوا معاهم نفس الشتاوة..
سعيدنا سعيدنا بنيتنا لوليدنا...
بعدين نهتها مطيره وهي تقول..
الف الصلاة والسلام عليك ياحبيب الله محمد...
واللي تعرف تزغرد في العيلتين زغردت...
☘☘☘☘☘☘
وبعد قعمزوا ودخلوا الحاجات داخل..
بدوا يفرقوا في الضيافه..
وطوبى قاعده في الدار وبنات اختها ولولها..
اريج؛حسيتهم زي اللي مش ناسيين قصة المهدي وخالتي سدرة لما رداته..
طوبى:ياعيني قصدك هكي هما!
الاء:اريج ياحمارة خوفتيها..
اريج بضحكه؛ياغبيه اني نحكي عادي وبعدين ياريتك تشوفيهم كيف فرحانين بيك بيطيروا تي هادي تلبيسه وجابوا هدا كله امالا الكسوة كيف..
طوبى تنهدت وقالت:ان شاء الله..تأففت وقالت..باهي امتى نطلع مليت..
اريج:شويه بس..
ع خشة غرفه قالت:هي نوضي طوبى..
طوبى خدت نفس عميق وناضت درات طله ع روحها في المرايه..
والبنات نازلين فيها عبارات غزل لين ضحكت..
بعدين طلعت..
وهما معاها..
واريج وراها شاده دربوكه..
وصلت في الصاله وقفت..
خدت نفس وزفرت..بعدين قالت بهمس:ياالله..
ومشت خشت عليهم...
لما شافوها عيت شنيبه واللي جايين معاها انبهروا بيها كلهم..
زغردت مغليه..وهما زغردوا وراها..
ماعدا نسرين اللي كانت تشوف طوبى بإبتسامه فيها مسحة حزن..
سمعت صوت زغرودة سدرة..
قعدت تشبحلها وهي تزغرد..وفي نفسها تقول..
"شكله مكتوب عليا نخسرك "
غيرت عيونها عن سدرة لطوبى لقتها جايه لأمها وتسلم عليها وتبوس في راسها..
وامها تردد"الله يبارك الله يبارك"..
بعدين مشت سلمت ع خديجه..وعائشه..وباقي الحاضرات اللي معظمهم نظراتهم كانت نظرات حسد لأن في منهم كانوا يبوا الجالي لبناتهم..
بعد السلام..
مشت قعمزت طوبى ع كرسي كبير حاطينه في الصاله..
والنظرات محاصراتها وهي تبتسم بخجل وتوتر..
☘☘☘☘☘
شويه وبدوا يوتوا في العشي..
وطول ماهما يوتوا..
كانوا صفيه واميمه حابسات دموعهم بقوة...
طلعوا للناس العشي..
وطوبى ولت خشت داخل بش تلبس قفطانهم...
غرفه:وينها السوسته..
طوبى؛هني ع يمين..
جت غرفه ع يمين طوبى وبدت تسكر في السوسته..
كانت تسكر فيها بهدوء وببطء...
بس في النص تحولت السوسته..
غرفه بصدمه؛حي عليا!
اريج؛شن درتي!
غرفه وهي ترعش؛والله ماقصدي بالله..
آلاء؛حي ع العمله كيف بنديروا توا!؟
وطوبى تشبح لغرفه وهي عاقده حواجبها..
غرفه؛اقسم بالله ياطوبى من غير قصد..
قعدت تبرر لطوبى..وطوبى وقتها مافكرتش ان اختها دارت حاجه زي هكي اساسا..بس قلبها قبضها من الحركه اللي صارت...وحست بسببها احساس غير مريح..
غرفه؛طوبى ماتشبحليش هكي والله مانقصد..
طوبى:عارفه معاش تحلفي..بس نبيك تطلعي تنادي عمتي..
غرفه وهي ترعش قالت:باهي ومشت طلعت..
اريج:مش بقصدها..
الاء:كانت تسكر فيه بالشويه..
طوبى؛علاش تبرروا عارفتها مش قاصده ماحطيت في بالي شي من الأصل..
الاء:بس غريبه القفطان رزين وغالي كيف السوسته متاعه هكي!
ع خشة مطيره وهي تقول:شن صار..
طوبى:كل خير عميمه كل خير..بالله عليك افتحي دولابي طلعي منها بوكس جرارات السلك ماتي تلقي واحد لونه زي القفطان جيبيه..
مطيره:السوسته انفلتت..
اريج:ايه..
مطيرة فتحت الدولاب وقالت؛جتني غرفه ترعش وتحلف مسكينه..
طوبى:هبله والله ماظنيت بيها سوء بكل..
جتها مطيرة بالسلك واليبره وقالت:وينها ترا..
طوبى:فوتيها السوسته توا..نبيك تخيطيه بطريقه ماتخليشي يبان..
مطيرة؛فهمت عليك..
ومرقت مطيرة السلك وطوبى تشوفلها وهي تفكر في الشعور الغير مريح اللي حاسه بيه..
وخيطت مطيرة ع السريع مكان السوسته وماكانش باين انه مخيط نهائي..
ساعدوها البنات في وضع بعض اللمسات..
وبعد ماكملوا..
طلعوا طوبى ..
رسمت ع وجهها ابتسامه مصطنعه اول ماخشت عليهم الصاله..
وهما طول قعدوا يزغردوا...
مشت وقفت ع الكرسي متاعها..
جوها خديجه مغليه وهي ايديهم علب التعليقه والدبله..
وبدت مغليه تلبس في طوبى..
ونسرين تصور فيهم..
اميمه طاحت منها دمعه فيسع مسحت وخلت ابتسامتها تغلب ملامح الحزن..
لكن صفيه ماقدرتش تتحمل..
طول مشت انسحبت للكوجينه وسكرتها عليها وقعدت تبكي..
☘سدرة...
حتى كان بالدولار عطيتوا..
تفاحة لبنان خديتوا...
وهما يردوا وراها..
خديجه..
يامبروك عليك خديتي..
من راس العرمه وازيتي...
وهما يردوا وراها...
فردوس
ياسلم بوها رباها
للناس الزينين عطاها..
وهما يردوا وراها..
أريج
حتى اللي جاورنا كاسب
يابال اللي جانا يناسب..
زغردوا خالاتها وردوا وراها..
ووحده من خالاتها هو قالت..
انتي يازينه صوني غلاه
اللي جاك وخلا عرباه..
وقعدوا يردوا وراها بنات العيله..
وطوبى وخواتها يشبحولهم بصدمه..
نسرين قعدت ترقع..
ان شاء الله مانفقدله زول..
اللي من عمله يجيني طول..
وهما ردوا وراها
ركابين كراهب فخمه
خشاشين طريق زحمه..
قعدوا يزغردوا
سدرة
ياوردة في جنانك هيفي جدك شيخ وبوك شريفي..
🌸وقعدت طوبى تتفرج ع حرب الشتاوات بين حوش شنيبه والواعر اللي ماتم لين قريب علقوا في بعضهم..وهي تنفست الصعداء..
شويه وجابوا التورته..
قصتها طوبى هي ومغليه...
ونسرين تصور فيهم..ونظراتها لطوبى كانت اغلبها نظرات ضيق مع ابتسامه خفيفه..
اللي يشوفها يزبط انها ماتبيش الموضوع...
عكس امها واختها اللي وجوههم قريب تنشرك من الضحك...
🌸وتمت هديكا الليله خير...
ولبست طوبى دبلة الجالي...
☘☘☘☘☘
"اكبر غلطه درتيها في حياتك خديجه وتو تشوفي شكل عواقبها بعدين"
خديجه:نسرين من جهه وانت من جهة نفختوا راسي بدوتكم الفاضيه..مش صاير شي مش حيصير شي صدقتي يامحي..
محي الدين:معاش كيف بارده وعاديه انتي تي اول من بينضر انتم..
خديجه:توا اللي صار صار معاش ينفع التراجع..
محي الدين:ماعندي مانقول غير ربي يخلي اخرتها خير..
خديجه:ايوه خير من الدوة اللي مافيش منها فايده..
ومشت للدولاب بطلع دبشها..
وهو قعد يشبحلها للحظات بنظرات حاده بعدين مشي طلع من حداها..
وهي دور في دبشها وتغني:ياسلم خال ضراريا..
☘☘☘☘☘
وفي جنان حوش علي الواعر..
مطيرة بحزن:الله غالب نصيب ياوخيتي مش من قسمه..
صفيه وهي تبكي:عارفه..بس واجعني ولدي اللي مايندري على شي مانقدروش نقولوله وهو برا في غربته بيتكدر...بس لما يروح وبييه عليه..
مطيره دموعها نزلوا مسحتهم وقالت:يعوضه ربي بخير منه وينساها..
صفيه بتهكم:ينساها!؟...ماظني ينساها وان شاء الله اميمه ماتريحش في القص..
مطيره:لااميمه مادخلهاش يرضى بالقسم والنصيب ويهني روحه..
وصفيه قعدت ساكته وهي تبكي بصمت...
☘☘☘☘
الساعه 1:30بعد منتصف الليل..
كانت مقعمزه ع تليفونها تشوف في صفحتها ع الفيس التفاعل ع ستوريات التلبيسه..
هو خش عليها..
ومشي قعمز حداها وحط مخده ع حجره وقال:ايه شن تخبرينا..
غرفه:ماعندي مانخبر بايته..
عبد الرؤوف:بايته عينك..اكيد الليله كانت مليانه احكي احكي..قولي في دراقات هلبه..
شبحتله وقالت:شن معناها دراقات!؟
عبد الرؤوف بضحكه مستفزة؛مزز بالمصري..
غرفه شبحتله بحده بعدين قعدت تشبح للتليفون وقالت:برا ارقد في دارك ع سريرك برا..
هو قال؛تلزي انتي!
غرفه:ايه..
قعد ساكت شويه بعدين فجأه خدي راسه ولف عليه ذراعه وقعد يشد عليه بالقوة وهو يقول:تلزي في من هاه قولي..
غرفه وهي تتضحك وتتوجع:لاحول راسي!..راهو والله نعيط نلم عليك الشارع..
عبد الرؤوف:جربي ديريها بش نكسر رقبتك طول..
غرفه:والله توجع الله..
هو قال:تبيني نخليك هدرزي عليا..
غرفه:باهي اطلق..
هو طلقها وقال:ماتمشيش الا هكي انتي..
وهي قعدت تساوي في شعرها قالت:اسمع اني لتوا طايرتلي منك وهلبه..
عبد الرؤوف؛باهي انتي علاش تعلي في صوتك ع مراة في عمر حناك مش عيب حقي..
غرفه:تمام عندك حق..بس هما مستفزات بالذات المشلفطه لميس ثقيلة الدم هادي..
عبد الرؤوف:تحشمي شويه ع اقل قدامي اني..
غرفه:هادي بالذات قدامك خليني ننزل فيها لين يبرد قلبي.
ضحك وقال:ياستي باهي حقك ع هو..وحط يده ع راسه..
غرفه:معاش تحرجني قدام الناس مرة تانيه..
عبد الرؤوف:ياودي باهي وانتي استانستي..
غرفه:باهي ماتعيطش عليا نخاف راهو..
هوقال بضحكه:باهي يافرخه هدرزي واحكيلي شن صار وشن درتوا..
غرفه بضحكه:باهي..
وبدت غرفه تحكيله وهو يتأمل فيها وبس..
مش هامه شن تحكي نهائي دوة النساوين مايدورش فيها..
كل اللي يهمه كلامها وحركاتها وتعليقاتها..
وهي تخش في موضوع تطلع من موضوع لين بدت ضوج فيه..
عبد الرؤوف:خلاص استاكي بنرقد..
وحط المخده قريب عليها ورقد..
غرفه؛مبردك انت اللي قلت هدرزي..
عبد الرؤوف؛وتوا نقول ارقد..
ورقد ع جنبه اليمين..
ابتسمت وقالت؛تصبح ع خير..
هو يدوب رد لما قال؛خير..
ضحكت ورجعت لهت بالفيس لين جاها نوم..
حطت مخدتها عند راسه ورقدت هي...
☘☘☘☘☘
وفي حوش جيرانهم..
تحديد دار عديل عبد الرؤوف..
الجالي بإبتسامه؛وإني احبك..
"الله قداش يهبل القائك حبيبي"
الجالي:نبي تسمعي تاني قلبي..
"ايه قلبي نبي نرقد ع صوتك"
الجالي بضحكه:حاضر..
وهو غارق في حالة الحب مع نجاة..
☘كانت طوبى مقعمزة في الجنان تشبح جهة حوش شنيبه وهي تغني..
عندي امل فيك..عندي ثقة فيك..
شوبدك اكثر يكون فيك..
غيرت عيونها وشافت للسلاحف اللي كانوا وسط حوشهم زي مايقولوا ابتسمت وهي تقول..
عندي حلم فيك...
عندي امل فيك...
شوبدك اكثر يكون فيك...
🌸وسدرة في دارهم..
مقعمزة وشاده في يدها ايشارب يذكر فيها بأيام حلوة معاش ترجع وتغني بصوت منخفض..
ضحك ولعب وسهرية عيد واني كل حبابي حوالي
عم فتش انا ع حب جديد وعيون الناس علي..
بطل بيوقع مني الكاس وحدي اللي بشوفك بين هالناس..
وشك معاد يفارقني قرب يسبح وغرقني...
عبوا دموعها عيونها وطاحوا وهي تغني..
من عز النوم بتسرقني بهرب لبعيد وتسبقني..
ياعمري ان كنت بأخر ارض عم تمشي وتمشي في الارض..
ياولي بعدك لاحقني...
☘وهو كان ساهر في المطحن اللي مسكر عليه..
حاط قدامه رسايله ورسايلها..
رتبهم بحيث كل رساله منه قدامها الرد عليها منها..
يقرا فيهم ويزيد يعذب في نفسه ويقهر فيها..اكثر من القهرة اللي عاشها اليوم وهو متمني لو كان مكان خوه الجالي وطوبى تكون مكانها سدره..
☘وع قد مايتقاربوا الجارح وياسمينه..
ع قد مايتباعدوا ...والاقدار تزيد طول بينهم المسافات...
وكل شي حواليهم يقول...
لاأمل...
🍀🍀🍀🍀🍀🍀
وتمر ايام الصيف ع شارع القهوة..
بين يوم حار ويوم معتدل شويه..
استغلاته سدرة وطلعت البساطات بس تغسلهم..
☘اما في حوش شنيبه..
في دار نضال وعمر..
الروشن كان مفتوح ويدخل في النسمه ع نضال والجالي اللي كانوا داخل..
الجالي:اني درته زي ماطلبه في حال يبي يزيد شي او يعدل قوله يجيني الشركه..
نضال:تمام..ومشت بيطلع شنطة اللاب توب بيحطه فيها..
والجالي شبح للروشن..
بعدين مشالها حول الستار ووقف عليه..
مرر نظره ع الشارع ..جو عيونه ع سيارة الجيلاطي مدرسه والصغار ملتمين عليها يشروا..
ابتسم..بعدين قام عيونه بيمرر نظرات عابره ع الحياش..
بس نظره ثبت ع سطح حوش الواعر..
وهو يشوف في مطيره وسدره كيف ينشروا في البساط..
وطوبى تحط عليه في الكراسي وهي تهدرز معاهم وابتسامتها ع وجهها..
ومن كثر مامتفاعله مع الهدرزة كانت تتكلم بإيديها ومرات تضحك..
هو حس بداخله بشعور مزعج هلبه قعد يتسلل لقلبه لين ملكه..
'منور جللو"
التفت لخوه وابتسم مجامله وقال:ولو...
بعدين سكر الروشن وقال:اي حاجه تبيها مرة تانيه تعالى طول..
نضال:من غير ماتوصي..
ضحك الجالي ومشي طلع من الدار..
ونضال خدي نفس وقال:وتوا يانضوله الى النضال..
وخدي تليفونه ومفاتيحه ونظارته ومشي طلع من الدار وسكر الباب..
☘الجالي لما وصل لوطا وطلع للسياره رفع عيونه فوق شافهم قاعدين طارتله هلبه..
ركب السياره وخبط بابها بقوة وتحرك..
وولاوحده فيهم هما الثلاثه ركزوا عليه...
☘☘☘☘
الساعه 11:00صباحا..
في المصحه اللي تخدم فيها اريج..
كانت جايتها آلاء غادي..
الاء:حطيتهالك في الورشه وجيتك ع اساس بتروحي ياأريج..
اريج؛خديت للمغرب وانتي تعرفي الو قداش محتاجه الإضافي..
آلاء:تمام عطيني خبر يابنتي مش تخليتي نضرب مشوار من تاجورا لهني ع الفاضي..
اريج:ياماضربت ع خاطرك مشاوير..
الاء:وكنتي تهزبي فيا عليهم..
اريج بنظرات عيون ضيقه:حقودة..
آلاء:باهي يابارده امتى نجيك تاني؟
اريج:السبعه تكوني قدام المصحه..
آلاء:كلام نهائي..
اريج:عيب عاد يابرو..
الاء بضحكه؛صامته..سلام..
اريج بإبتسامه:تشاوات..
ومشت أريج لشغلها..
والاء ماشيه بتطلع من المصحه..
وهي ماشيه..
شافت قدامها في بدايه الممر شخص خلاها توقف في مكانها شويه بعدين كملت مشي وهي تتجنب تشوفله..
وين وصلت فيه..
"السلام عليكم آلاء"
وقفت في مكانها شبحت القدام شويه وقال:وعليكم السلام..بعدين شبحتله وابتسمت وقالت..مهند..
مهند بإبتسامه:شن جو.
آلاء:تمام الحمد لله شن جوك انت..
مهند؛تمام التمام..جايه لأختك..
هي بإبتسامه قالت:ايه..
هو ابتسم وقال:تمام...شني شغلك ماشي كويس؟
هي قالت:الحمد لله ماشي كويس..ع العموم كويس اني شفتك وجه لوجه بش نشكرك ع اللي مبادرتك..
مهند بضحكه:اهم شي تكون بفايده.
هي ضحكت وقالت؛لابفايده..بارك الله فيك..
مهند:فيك بارك الله..في النهايه حني لبعض..
شبحتله بصدمه..
و ضحك وقال:الناس لبعضها..
ضيقت عيونها وقالت:تمام هي نستأذن..
مهند:لحظه..الاء..اني نبي نشوفك مرة تانيه بش نحكي معاك في موضوع ضروري جدا..
آلاء:موضوع شني!؟
مهند؛لما نتلاقوا في مكان تاني نحكوا فيه..
هي فكرت شويه بعدين قالت:تمام..اني توا نخدم في معمل سويت كوين في ***** مشهور اسأل يدلوك عليه المهم في جنبه حديقه ممكن نتلاقوا غادي.
مهند بإبتسامه؛تم..بس امتى..
آلاء:الخميس..
ضحك وقال؛حلو هلبه..
ابتسمت آلاء مجامله وقالت:تمام نستأدن..سلام..
ومشت .
وهو قعد معاها بعيونه لين اختفت من قدامهم..
تنهد بإبتساه بعدين كمل طريقه لمكتب بوه..
وفضي الممر وماقعد فيه حد..
اهو واحد خطم بسرعه...هادي ممرضه جايه من الجهة التانيه.
لما جت بتطلع من الممر..
خشوا نضال وصاحبه وهما يتعاركوا..
:قتلك مانبيش نحولها يالاإله إلا الله!
نضال:كان مش خايف ع سنونك اني خايف عليهم..السوسه هادي لو مقلعتهاش حتنتشر في سنونك واصرف بعدين ع القلع والزراعه..
:شن دخلك بيا ان شاء الله ننحرق..
نضال:تحشم ع وجهك ياتافه فوق ماجايبك مصحه خمسة نجوم نعالج في سنونك ع حسابي..
؛تي مني قالك مني ..
نضال؛خلاص سكر فمك وصلنا في الاستعلامات..
جبد صاحبه وقفوا عليهم...
نضال؛معليشي اختي حني جايين لدكتورة اسنان اسمها رانيا خليل..
:ايه موجوده وحاليا تخدم..
نضال:باهي بناخدوا كشف مستعجل..
؛تمام البيانات قبل..اسمك وسنك..
:صاحبي هو مش اني..اني سنوني الله يبارك..
ابتسمت الموظفه وقالت:باهي اسمه..
نضال:نور الدين زنكي..
الموظفه:نعم!
:فوتيه يتسهوك..اسمي نور الدين محمد الشيخ..
الموظفه ضحكت وقعدت تسجل وقالت:العمر..
نضال:62..
:26..
ونضال يضحك والموظفه تضحك معاه..
بعدين قالت:في الدور التاني..
نضال؛تمام بس سؤال اخير..الممرضه اريج مصطفى جت؟
؛بايته اريج خدت مناوبه واطوعت في الاسعاف.. نضال بعدم رضا:بايته!..تمام مشكورة..
هي تعالى انت..وجبد صاحبه ومشوا ركبوا الزوز الدور التاني....

#إلا_انت
#طوبى

...يتبع....