طوبى الجزء الاول

تابع

(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_الثالث_والثلاثين" شعور2"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
يوم جديد..
مستشفى طرابلس الجامعي..
الساعه 1:00ظهرا..
كانت واقفه قدام مبنى المشفى مع الدكتور رئيس مجموعتها.
قصي:تمام انت توا تاخدي الملف متاعها وتعبيه وبعدين تجيبهولي..
اميمه؛إن شاء الله دكتور..وكيف جت بتمشي قال..
قصي بإبتسامه؛اميمه ممكن بعد تفضي تجيني الكافتيريا عندي موضوع بنحكيه معاك..
اميمه ابتسمت بجديه وقالت؛إن شاء الله دكتور عن اذنك..
ومشت بسرعه وهي مش طايقاته..
وهو تنهد بعدين مشي بإتجاه العيادات الخارجيه..
مشت لقسم الجراحه ودارت اللي طلبه منها الدكتور وبعد ماكملت شغلها..
مشت مجبوره للكافتيريا زي ماقاللها..
لقاته قدامه يراجي فيها..
جاته وهي لابسه لبس الجراحين وعليه يونيفورم ابيض وع راسها وشاح ابيض..
وقفت قدامه وقالت؛دكتور عبيت الملف وخليته عند الدكتورة سماح..
قصي:تمام..توا خل نجوا للموضوع اللي نبيك فيه..
اميمه:تفضل دكتور..
تنهد وقال:اميمه تتفكري زمان ايام كنتي طالبه في سنة الاعداد..تعبتي ورقدتي في مصحه*****
طبعا اميمه مستحيل تنسى هداكا اليوم بس استغربت الدكتور من وين عرف..
اميمه:ايه صح صار معاي هكي..
قصي:باهي مش متفكرة دكتور كان مهتم بحالتك وتجرأ وطلب منك الرقم..
اميمه قعدت تذكر وهي تعصر في دماغها بعدين تفكراته..
وكانت متفاجئه ع الآخر لما عرفت ان اهتمامه بيها ماكانش بس في السنه هادي..
لكن..
اميمه؛اسفه تفاصيل هلبه نسيتها تخص اللي صار هديكا الفترة..بس يعني ماتقولش انك نفسه دكتور!؟
ضحك وقال:ايه نفسه..
اميمه:اها..
قصي:من الاخير اميمه اني نبي نخطبك..
رفعت حواجبها وهي متفاجئه..
قصي:ليا من بداية السنه من لما شفتك واني في بالي الشي هدا..شوفتك فرحتني ع الآخر وحسستني ان في ليا فرصة قويه معاك..
اميمه ابتسمت بإرتباك وقالت:سامحني دكتور بس اني حاليا موضوع الزواج لاغياته من تفكيري...
قصي:مافهمتش يعني امتى بتفكري فيه هدا الوقت المناسب..
اميمه بإبتسامه جاده؛لابالنسبه ليا اني مش الوقت المناسب..
قصي قعد يشبحلها وهو ساكت..
هي غيرت عيونها عنه وهي محرجه هلبه..
قصي:تمام نخليك براحتك توا تمام لين تكملي الامتياز وبعدين يصير خير.
هي هزت راسها وقعدت ساكته..
قصي:تبي تاخدي حاجه من الكافتيريا..
اميمه:لا..
قصي:تمام هي تعالي نشوفوا شغلنا..
مشي واميمه معاه وبدوا يحكوا عن حالة من حالات..
وهما ماشيين..
كان عمر في الكليه وهو لابس بدلة الطيار..
وفيده باقة ورد كان جاي من الرحله متاعه طول للمستشفى..
وقف في مكانها وين شافها مع الدكتور ماشيين يهدرزوا..
وماتبانش هدرزة خدمة نهائي..
ومعروفه غيرة عمر طول تهب..
قدملهم وين قرب منهم قال:اميمه..
هي تفاجئت والدكتور استغرب..
عمر:تعالي لحظه وتباعد شويه..
اميمه توترت وارتبكت وقالت:عن اذنك دكتور.
ومشتله..
والدكتور شبحلهم وحس ان في شي..
تباعد بعيد وقف في تركينه وقعد يشبحلهم..
هي وقفت عليه وقالت..
اميمه بنرفزة؛كيف ديرلي هكي قدام الاستاذ متاعي..
عمر وهو معصب:ايوه هدا استاذ وهداكا طالب وعادي ياعمر تحمل ياعمر فوت ياعمر.
اميمه؛بطل جو الغيرة الغبيه هادي..
عمر:غيرة غبيه!معناها انتي عندك عادي تشوفيني نضحك ونبصر مع مضيفه ولامساعده..
هي هبت عصبيتها شويه وربعت ايديها وقالت؛اني لانضحك ولانبصر هادي طبيعة قرايتي وخدمتي بعدين عمر من توا نقولك ياترضى بيا بكل شي ياإما كل واحد يقعد في حاله.
عمر:علاش ديما تحسسي فيا اني مانسوا شي عندك..
غمضت عيونهاوهي تحاول تهدي روحها وفتحتهم وقالت؛عمر..التحسسات هادي والافكار الهبله هادي حولها من راسك تمام...اني عندي هلبه اولوياتك في حياتي وانت واحد منهم.
ابتسم برفعة حاجب وقال:اني ع راسهم..
اميمه بإبتسامه؛مش اهم من جدي..
عمر بغيظ:جدك هدا بالذات..شن بنقولك بس...
ضحكت اميمه.
هو ابتسم ومدلها الباقه وقال؛حاجه حلوة تشبهلك..
اميمه بإبتسامه:مانحبش الورد البلدي..
عمر نزل الباقه وقال:مال شن تحبي ياهمي!
اميمه بضحكه:هدا غير اني اهم حد في حياتك وناسي اني نحب الفل..
عمر غمض عيونه الزوز بشده بعدين فتح وحده منهم وقال:جديات نسيت.بعدين فتح التانيه وقال..بس والله حافظ غيره صم..
اميمه بإبتسامه:لالازم تحفظه كله بش نقنع جدي..
عمر:ااخ منك جدك هدا..اللي يشوفنا مع بعض يقول لبعض من غادي مخلوقين لبعض حتى منظرنا واني بلبسك هدا واني ببدلتي مش عادي..
ضحكت اميمه ونزلت عيونها خجلا..
عمر:جدك هدا من اليوم اعلنت عليه الجهاد وبإذن الله نولي منصور وغانم..
اميمه بضحكه؛باهي خليني نمشي عندي ماندير..
عمر:تمام خفيفي هدرزة وديري حدود ..
اميمه:راك تنسى ياكابتن اني اميمه الواعر..
عمر:ننسى عمر ومحمد ومغليه ولاننساك..
اميمه قعدت تضحك ومشت من قدامه..
عمر وهو يشوفلها:والورد..
اميمه:بعد يوافق جدي ناخده
عمر:اه منه شيباني الهم هدا ياني ياهو في شارع القهوة
ومشي بالورد متاعه طالع من المستشفى..
☘☘☘☘☘☘
وفي مكان بعيد شويه عن المستشفى الجامعي..
في كلية الهندسه.
قدام الكافتيريا..
مقعمزة غرفه هي وصاحباتها يفطروا ومنسجمات في الهدرزة..
صاحباتها نفسهم ماتغيروش الا من وحده تخرجت وتزوجت وماكملتش معاهم..
غرفه؛حاسه القطار بيبدا يفوتنا يابنات..
:شن بنديروا باهي حظنا مايطيحنا كان في المعفن وخوه..
:شكالات تقطع الرزق..
غرفه بضيق:اني كان جيت حد يخطبني لازن يكون كبير مواليد نص السبعينات فوق منها بعامين لهالدرجه نبان اكبر من عمري!
:لاحبيبتي هما توا هبلوا يدوروا في الصغيرات عامين تانيات يخطوا علينا ويخشوا ع جماعة الألفين..
:لاع هكي راحت علينا بالرسمي..
وهما يهدرزوا..
ويدرس عبد الرؤوف بسيارته العاليه قدام الكافتيريا ووراه سيارة تانيه في مجموعه نزلوا قعمزوا ..
:حي بنات هدا شني!
شافوا وين ماتشبح..
اندهشت غرفه وهي تشوف فيه كيف خاش..
كله هيبه العيون كلها عليه..
:ياويلي يابنات هدا مني وشن جاي يدير هني..
غرفه ابتسمت و قلبها يدق بقوة وهي تقول:هذا ولد جيرانا.
الزوز بذهول؛كذابه!
غرفه شبحتلهم وهي فرحانه:تعرفوا يابنات اني ليا فترة ملاحظاته زي اللي يشبحلي هلبه ومهتم وجيته عادي اكدتلي..
صاحباتها كانوا يشبحوله قالولها:متأكده!؟
هي حست انهم يشوفوا في شي غريب..
التفتت وشبحتله..
لقاته واقفه ع بنت صغيره في اواخر التسعين وجميلة جدا..
كان يهدرز عليها وهو يضحك..
بعدين خداها ومشي قعمز هو وياها ع طاوله وقعدوا يهدرزوا..
وكأنه انضربت كف قوي ع وجهها..
غيرت عيونها لصاحباتها لقتهم يشبحولها بنظرات احرجتها وخلت وجهها احمر هلبه..
بعدين خدت حاجاتها وناضت وهي تقول:ماشيه الكليه..
ومشت طول من حداهم وهي حاسه روحها بتبكي..
انحبطت..وغارت...
وصاحباتها لحقوها..
هو بعد مامشت شبحلها..ابتسم تهكما بعدين شبح للبنت وقال:مادوري شي تو نوصل في خوك وبإذن الله نطلعه..
:يارب..
☘☘☘☘☘
"بش مهندسه"
نجاة:نعم
.السكتيرة ؛الباش مهندس الجالي يبيك تجيبي تصميم المول لمكتبه..
نجاه"غير امتى بديت فيه اني!؟:تمام جايه..
مشت السكرتيرة..
وشويه وناض نجاة باللاب توب متاعها ومشت لمكتبه..
وصلت فيه دقت ع الباب..
هو بدون مايشوفلها:خشي...
خشت وقعمزت قدامه..
الجالي بدون مايشوفلها:من قالك قعمزي..
هي قاعده تتمالك في نفسها بالسيف..ناضت وقفت..
شبحلها بعدين قال:قعمزي..
قعمزت..
الجالي:درتي تصميم مبدئي للمشروع..
هي حطت اللاب توب ع المكتب فتحاته وقالت؛زي ماقلت تصميم مبدئي ومع هدا سهرت الليل كله بش نكمله..
ووجهتله اللاب توب وقرباته ليه..
هو خداه وقعد يشوف للرسمه..
عجبه هلبه التصميم المبدي شكل المول كان حلو ومميز..
شبحلها وقال:كويس بس لازم تراعي الموقع متاعه لازم يكون مميز اكثر من هكي..
نجاة:مش حيكون في تصميم مميز اكثر من هكي..
الجالي:متأكده!؟
نجاة:زي مانشوف فيك..
ابتسم ع جنب بثقه وفتح اللاب توب متاعه وقعد يدور فيه لين لقي اللي يبيه بعدين وجهه ليها وقال؛شن رايك..
اندهشت نجاة التصميم متاعه كان جميل وفريد..
شبحتله وقالت؛مادام انت درتله التصميم علاش عطيتيني اني نديره؟
الجالي:نتحدا فيك توقعتك ديري حاجه احسن بس السنين اللي قعدت فيهم فالحوش فوتوا عليك هلبه والباين ناسيه هلبه حاجات..
استفزها هلبه بتحدي قالتله؛هدا تصميم مبدئي ونقدر نغير وتو تشوف شن يطلع معاك..
الجالي؛هادي فرصتك انتي عزيزتي يحقلك ديري فيها اللي تبيه..
قعدت تشبحله بتحدي وهي ساكته..بس نظراته ليها كانت مربكه مش عارفه علاش تتوتر قدامها..
خدت اللاب وقلت:نقدر نمشي نكمل شغلي؟!
الجالي:تؤ..طلع تذاكر  حطهم ع الطاوله وقال:عطلة نص السنه قربت واني بناخد اجازة بش نسافر اني وصغار خوي..
نجاه وهي متفاجئة؛بتقدر عليهم بروحك؟
ابتسم ابتسامه جذابه وقال:بنرفعوك معانا!
نجاة كانت تزيد تتوتر منه اكثر واكثر .
هو ضحك وقال؛بنطلع اني وياهم ونسرين وصغارها..وتي جوازتهم وحوايجهم من توا..اهو ع الأقل تحصلي وقت تلهي فيه بالتصميم ونشوفوا شن يطلع معاك..
هي ماكانتش قادرة ترد ولاتعصب شدت ع اللاب توب متاعها وهي تشوفله وبس..
الجالي بإبتسامه:تقدري تمشي..
ناضت ومشت بسرعه طلعت من مكتبه..
هو كان يشوف للباب بنظرات ليهم هلبه معاني..
اما قعدت تمشي بسرعه لمكتبها وهي خايفه من شن خايفه مش عارفه..
☘☘☘☘☘
الساعه 5:30عصرا..
كانت نبيله طالعه وهي بلبس محتشم وكامل اناقتها وفي يدها سفرة بكلاوة من حوشهم لحوش الواعر..
هي ماشيه ع طلعة محمد شنيبه من المطحن بيركب سيارته ويشوفها..
والراجل اللي جاه جاه..
قعد بعيونه معاها لين وصلت في حوش الواعر..
اول مرة تقابله مراة هكي مواصفاتها..
وهو واقف مسهم فيها...
كان نضال من القهوة يراقب
قاله في سره"حي عليك يامغليه رحتي رابش ياوخيتي'
فتحوا الباب لنبيله ودخلوها وسكروه..
ومحمد شنيبه ابتسمت هديكا الابتسامه اللي رداته سنين لتالي
شويه تنهد بعدين ركب سيارته وتحرك لمشواره..
وعيون نضال معاه وهو يهز في راسه ويغني..
جرح تاني..
☘☘☘☘☘
نبيله:قلت مايبوش يجوني خل نجيهم..
مطيره:لا والله ماهكي قلنا نخلوا المراة ع راحتها تاخد ع حويشها بعدين نمشوله..
نبيله بإبتسامه:يللا مش مشكله اهو كسبت الجيه هني..
مطيره:حني اللي كسبناك..هي تفضلي تفضي..
وخششتها للصاله وقعمزوا االزوز.
مطيرة:تريحتي في الحوش؟
نبيله:الحمدلله في الحوش وفي الشارع..سكنه مريحه من البدايه..
مطيرة:ان شاء الله دوم..
نبيله؛تسلمي..
ع خشة سدرة قالت:السلام عليكم ..
ناضت نبيله وهي مبتسمه بإعجاب:وعليكم السلام..
كانت سدرة لابسة قفطان حوش بس شكله قنين ودايرة شعرها بطريقه بسيطه وحلوة وريحة الياسمين تفوح منها..
بعد ماسلموا ع بعض قعمزت سدرة.
سدرةهاه شني ماشيه امورك في شارعنا..
نبيله:تمام التمام ولله الحمد..الحق اول مرة نقابل زي ناس هالشارع قاعدين هما زي ناس زمان..
سدرة:مش بالزبط في هلبه حاجات تغيرت كيف ماتغير كل شي فهالبلاد.
نبيله:يعني كان احلا من هكي!
مطيرة:بوين..
نبيله بحسرة؛ياريتنا جينا سكنا هني ايام كانت امي حياة ..
مطيرة وسدرة:الله يرحمها..
ع خشة طوبى وهي تقول السلام عليكم..
وين خشت عليها ماقدرتش تخفي انبهارها بيها..
شافتها وعجبتها بس مش زي توا بانت اكثر وهي متأنقه هداكا الوقت كانت طالعه من عزي مش حتكون زي حالتها توا..
☘ميزة من ميزات طوبى انها في الحوش ماكانتش تلبس في بيجامات الالما تجي ترقد يعني لبسها كله انيق وهي في الحوش..
زي توا كانت لابسه ماليه مشماشيه غليظه فيها من النص عبارة باللغة الانجليزيه مزخرفه بعدس من نفس اللون..
وقونه مخصرة سودا..وشعرها قايمه منه شويه..
وهي في الحوش لازم تحط مكياج عيون من حبها للمكياج ماكانش في غيره ع وجهها..
هي هكي لما كبرت تعودت ومخالطتها لفايزة خلتها تقتدي بيها في الجانب هدا..☘
وصلت في نبيله وقالت ووجهها مشرق بإبتسامه حلوة؛اهلا وسهلا ابله نبيله..
نبيله ناضتلها وطوبى تقول:والله تقعمزي والله.
قعمزت نبيله وهي تضحك..
ومطيرة وسدرة يشوفوا لطوبى بإبتسامه..
سلمت طوبى ع نبيله بعدين مشت قعمزت..
نبيله:هاه شن جو القرايه..
طوبى:الحمد لله ماشيه تمام..
نبيله:شن تخصصك طوبى؟
طوبى وهي مبتسمه بحب:نقرا في كلية التربيه قسم رياض الأطفال..
نبيله؛حلو..بس يعني رغبتك؟
سدرة:نسبتها في الثانويه دخلها الطب بس من وهي صغيره نبي نولي ابله نبي نولي ابله..ولما كبرت بدت تفكر في تخصص رياض الأطفال من حبها فيهم..مش غير صغار البنادميه بس حتى الحيوانات اكرمكم الله..هونا عندنا قطوسه جايبه في الجنان دايرتلها عالم هي وصغارها..
ضحكت نبيله وهي تشوف لطوبى بإعجاب..
مطيرة:حي المطر تصب قطاطيسي..خلوا لقطوستي ماتاكل راهو نافس وترضع..
طوبى وهي تضحك بإحراج؛مش خلاص يعني..
قعدوا يضحكوا عليها...
وكملوا هدرزة شويه لين طلعت غرفه..
كانت مازال حاسه بشعور ضيق وزاد لما شافت نبيله..
بان ع وجهها انها باكيه بس استقبلت الضيفه بإبتسامه ورحبت بيها..
والضيفه مركزة فيهم كلهم بس اكثر تركيزها كان ع طوبى..
☘☘☘☘☘☘
"باهي اللي جيتي وشفناك عمك ديما يسأل عليك"
نجاة بحزن؛مش مني ياعمتي..
مغليه:راك بتباتي تبي ولاماتبيش..
نجاة؛عادي يقعدوا الصغار بس اني لا معليشي..
مغليه:مالا اعرفي كيف تخلصي روحك مع عمك..
تنهدت بضيق مصطنع..
مغليه؛ماتحسابيش روحك وليتي غريبه قاعده كنة هالحوش يانجاة ومنا وفينا والحق اني مانبيش نخسرك نبيك تقعدي مرت طاهر زي قبل رحمة الله عليك وكان جاك نصيب عاد ان شاء الله يخليك تواصلينا..
نجاة قعدت تفكر في مغليه اللي قاعده تلمح في تلميحات واضحه وكأنها تقول حتى كان قعدتي قريبه علينا ماتعبيش نردوك لواحد من سلافك...
ونجاة تقول في داخلها"تو نشوفوا يامغليه":ان شاء الله ياعمتي ان شاء الله..شبحت للباب وقالت..الصغار لتوا مع سلفي المهدي..
مغليه؛ايه وين يشوفهم معاش يطلقهم حتى هما صغار وخيه الغالي الله يرحمه..
نجاة؛الله يرحمه..
☘برا..
محمد المهدي:لاانت تفهم في الكورة مليح معناها المباراة الجايه بتجي تحضر..
حمزة:عمي الجالي قالي تو نجي معاع..
محمد؛تم متفاهمين برو..
حمزة؛متفاهمين..
في جنبه بوه كان مقعمزة وضام جوري وسدرة لحضنه..
سدرة:معاش تقصيه خليه طويل زيي شوفي هو من كثر ماطويل كيف..
المهدي يشوفلها بإبتسامه.
جوري:تو يولي طويل حتى شعري..
المهدي:معاش تقصيه بش يولي زي بنت بوها..
جوري:بنت بوها..
المهدي"عليك خرط نخرط فيه":قصدي سدرة..
جوري:اها..
سدرة؛بابا نخشوا نلعبوا بألعابي..
المهدي:وقرايتك ياحلوة..
سدرة؛والله يابابا والله كتبت الواجب كله اسأل ماما..اتصل بيها اصل واني واقف هني بش تصدق..
المهدي:باهي بري يانتفه مع بنت عمك وخشوا..
نزلت من حجر بوها..وهو نزل جوري..
وخدت سدرة جوري وخشت بيها داخل..
قعد يشوف لجوري بأسف..بعدين غير عيونه لحمزة كان واجعه هلبه..بس ليه فترة ملاحظ ان عينه فيها مشكله ...
شويه وخداه من محمد وخش بيه داخل..
وصل الصاله دق الباب وقال:امي..
مغليه؛خش ولدي خش..
خش المهدي لقي نجاة وعائشه مقعمزات..
ونجاة لما شافاته تستعد
المهدي:كيف حالك مرت خوي
بدايه مش مشجعه بس مع هدا..
نجاة بنبرة حزن؛اهو الحمد لله ع كل حال..
المهدي:ربي يصبرك ويعوضك في صغارك خير..
نجاة؛آمين..
المهدي:بالله بنسألك عين حمزة خيرها..
هي هني استغلت الفرصه وناضت مشتلهم..
قربت منهم وقالت:ايه عنده مشكله وطاهر خدي ع خاطره سلفة من الخدمه بس يعالجها..
المهدي بصدمه؛كيف!؟؟
نجاة بألم؛هو هكي كان الله يرحمه يقولي مش ديما بنطلب من بوي ساد العرس والشقه والسفر..
مغليه:معقوله هكي كان يفكر!؟
نجاة نزلوا دموعها وهي تقول:كان يقول مانبيش حد يقول يستغل في بوه..
المهدي بعصبيه؛عليك تفكير غبي وساذج بوه هدا بوه شن يستغله متاعه هادي..الله يرحمه وخلاص مانقول غير هكي..
ع خشة الجالي للحوش..
خش عليهم وقال؛السلام عليكم..
قلب نجاة قفز...طول التفتت وقعدت تشبحله وقلبها يدق في دقات سريعه متواليه..
الجالي؛متفاهم اني ونسرين ع القصه عادي بنسافروا مع بعض عطلة نص السنه وبالمرة علاج..
وجب للمهدي خدي منه حمزة.
ونجاة نست المهدي بالمرة وقعدت تشبح للجالي وولدها في حضنه..
المهدي؛كويس ولو احتجت طول قولي..
الجالي:الامور تمام مادورش..شبح لحمزة وقال..حتى انت يازعيم مادورش معاك عمك..
ضحك حمزة..
شبح الجالي لنجاة وقال:كيف الحال..
نجاة غيرت عيونها عنه وهي مرتبكه؛الحمد لله..ومشت قعمزت وقلبها ماباش يهدا..
هو قال:يام خليتي غدي..
مغليه:عيشه دارت كسكسي بالبصله..
شبح الجالي للمهدي وقال:ربي يديمها مرت خوي هادي..
ضحكوا عائشه والمهدي ومغليه..
ونجاه حست بشي من الغيره وقعدت تشبح لعائشه ع جنب بنظرة حاده..
مغليه؛حف روحك وفرحنا بيك حتى انت بش نشكروا تطييب مرتك..
شبحتله نجاه...
الجالي نزل حمزة وقال:مازال مازال نكمل الحوش وبعدين يصير حي..
مغليه:هالحوش اللي معاش بي يتم تقول تبني في سرايا..
الجالي:غير نتمه ياعمري ونرفعك تشوفيه بعدين احكمي..
المهدي؛نشهد بالله انه سرايا..
مغليه:سرايا ولاقصر السكنه بعيد مش راضيه عنها..ولولا انك بتقعدي في دارك اللي فوق تجي وتبات مع مرتك راني سكرت راسي وحلفت عليه..
الجالي بضحكه؛اني نطلع خيرلي الحاجه متسبله..باي باي..
ومشي طلع..
وهما يضحكوا..
ونجاه حست بضيق شديد لما طلع...
☘☘☘☘
"امم..روعه الكنافه من وين واخدينها"
مطيرة بضحكه؛من محلات طوبى ياحنه..
رفعت حواجبها وهي متفاجئة وقالت؛جديات.!
طوبى بضحكه:ايه اني دايرتها..
نبيله:الله يبارك...ع هكي بنتجرأ ونطلب منك طلب..
طوبى:عيوني تفضلي..
نبيله بضحكه؛سلمهم ياربي نبيك لو قاعد فيه تلفيلي طرفين لخوي يموت فيها...
طوبى:انتي بعد تروحي حتوصلك حافظه كامله..
نبيله:لالا هما طرفين ذواقه الحق مانحبش ناكل عليه حاجه هو يحبها..
سدرة؛ماعندكش غيره؟
نبيله بحسرة؛كان عندي غيره زوز اكبر مني..وكانوا متزوجين وبصغارهم في مرة طلعوا رحله مع بعض للخمس للبحر والآثار وقتها كنت نبي نمشي معاهم بس ربي ماقدرش لسبب عرفته بعدين..بعد مادارو حادث في الطريق وهما ماشيين وربك توفاهم كلهم..
هما تأثروا ع الآخر وسدرة قالت:عليك فاجعه..
نبيله؛فاجعه مرضت بوي وامي..بوي ماصبرش هلبه لحقهم بعد عام وامي قعدت تعاني في المرض مع الخوف خوف علينا اني وم...ااعبدالرؤوف..ومسكينه هالخوف كان سبب موتها لما انصاب خوي في حرب المطار..
مطيرة:يااربي...ربي يصبركم ان شاء الله..
نبيله:هدا علاش نكره سيرة الموت ومانحبهاش وقعدت ورا خوي لين خليته يسيب الكتيبه ونحولوا من غادي..
غرفه:سيب الكتيبه!
كلهم شبحولها بإستغراب كيف سألت السؤال..
غرفه ابتسمت بإرتباك وقالت؛قصدي غريبه من يخش كتيبه ويكون فيها قائد ويسيبها؟
نبيله:لاخوي مش زي هالجماعه المستفيده خدم فيها بشرفه وطلع منها وهو ماعنده شي اكثر من اللي هما عطوه مش كل من في المليشيات زي بعض..
غرفه بإحراج؛اسفه مش قصدي..
نبيله؛ولايهمك حبيبتي..سؤالك كان عادي جدا..
غرفه ابتسمت بصمت..
وطوبى تشوفلها وهي عارفه المغزى من أسئلتها..
☘☘☘☘☘
وفي الشارع..
وقت المغرب قرب...
والحاج علي عادته يطلع فهالوقت ويمشي يجيب خبزة شعير لروحه..هو كان مستغل هالشي بش يطلق رجليه ويتمشى شويه..
وصل في المحل خدي تلاته فردات خبزة شعير...
بعدين طلع بطريقه للحوش..
وهو ماشي شافه عمر وهو في القهوة..
ناضله طول...
تخطى الصغار اللي يلعبوا في الكورة في الشارع  منهم ولد المهدي يزن ومحمد ولد خديجه..
شويه جت الكورة قدام علي الواعر..
علي بغضب:بتلعبوا قدام حياشكم ولاناخدها نلفقها..
عمر وصل في الكورة ضربهالهم وقال وهو يكشخ؛العب غادي انت وياه تحرك..
علي؛وقت لعب فهالصقع وهالمغاريب..!
عمر:حتى اني مش عارف كيف؟!
شبحله علي ع جنب بعدين كمل طريقه..
عمر:هات عنك جدي رزينه عليك..وخدي منه شكارة..
علي وهو يشبحله من فوق لتحت:شوره ماعندك مادير شاد الحوش والشارع وخلاص..
عمر ابتسم بإرتباك:الاسبوع هدا ماعنديش رحلات..
علي:تو حق انت طيار!
ضحك عمر وقال؛مال شني ياجدي!
علي:عاد تبيني كان شفتك طلع بالبدله من حوشكم نصدق انك طيار مرات غير توري فينا وخلاص..
عمر بضحكه؛جدي اني ماكنتش نلعب برا وعندي شهايد هكي كبرهم تبي نجيبهملك تشوفهم .
علي:ع خاطر مايبيعوش ويشروا في الشهايد داروها غيرك هلبه..
عمر بضحكه مسايرة؛باهي انت قول لأميمه....
فنص فيه...
عمر تخزرط:قول لحسين ولايوسف تمام..يبحثوا في الغوغل عن اسمي ويقرولك اللي يطلع..
علي بعصبيه؛شن قالولك عليا جاهل اني نعرف في الانترنت اكثر منك وبعدين شن يقرولي هادي امي اني امي قالولك عليا امي!!؟
وجبد منه شكارة الخبزة بقوة وقال؛واحد مش محترم..
ولف وفتح الباب وخش سكر الباب..
وخلا عمر ضايع في الضباب...
ونضال ومحمد المهدي يشبحوله من القهوة وهما يعلقوا ويضحكوا...
☘اما في الحوش..
نجاة ماشيه ودور في جوري مالقتهاش..
نجاة؛وين مشت المصيبه هادي!
شبحت للدروج وقالت؛ان شاء الله مش ركبت فوق..
ركبت للدروج لين وصلت فوق..
وهادي اول مرة تركب الدور التاني ماركزتش فيه هلبه قعدت دور في بنتها وخلاص ..
لين سمعت صوت الجالي يضرب فيه ويدير في صوت كل مايضربها..
فضولها الشديد اتجاهه خلاها تبع مصدر الصوت لين وصلت في الباب اللي كان مردود..
لقت جوري واقفه حاجه صبعها في فمها وتتفرج ع حاجه..
وين زادت قدمت..
بان عليها ظهره وهو يضرب بالبوكسينج..
قعدت تتفرج وقلبها يدق بقوة..
وماركزتش ع بنتها اللي شافتها وقالت..
"ماما خشي"
وقف طول والتفت شبحلها..
وهي ارتبكت وتوترت وانحرجت ع الاخر قالت لبنتها:تعالي جاي شن ديري هني..
الجالي حول البوكسينج من ايديه وقال؛جايه لدار عمها..
نجاة بإحراج :مرات ضايقك..
الجالي؛نهائي..
نجاه:تمام نخليها مالا..وجت بتهرب.
بس وقفها لما قال.
الجالي؛تبي حاجه..
التفتت نص التفاته وشبحتله..
وهو كان يشوفلها بإبتسامه..
هي يدوب ابتسمت وقالت؛لا..شكرا..
ولفت ومشت بسرعه..
هو ضحك وقعد يضرب في فمه بالبوكس..بعدين شبح لجوري وقال..فيك شبه منها هلبه..بس ياتري شعرها زي شعرك..
وجوري تشوفله وهي مش فاهمه قصدك..
هو ضحك نص ضحكه بعدين رجع لبس البوكس وقعد يضرب بقوة والابتسامه ع وجهه....
☘☘☘☘☘
وصل محمد شنبيه بالسيارة للحوش..
لما شاف حمزة قلبه لهف بقوة...والوليد جاه يجري..
ونضال ومحمد المهدي مركزين..
وعمر اللي مقعمز في طاوله بروحه مهموم وهو يشرب في القهوة حتى هو انتبهلهم..
شافوا اللقاء بين الجد وحفيده اثر فيهم...
شويه انفتح باب حوش شنيبه..
طلعت منه نبيله..شبحت بإتجاه مطحن حوش شنيبه وقالت؛دورهم...
ومشت بآتجاه المطحن..
نضال؛اووبا...
محمد:خيرك!
نضال؛شفتها البيج طرف اللي طالعه توا من حوش الواعر شكلها جايتنا..
محمد؛ايه والله طرف غير كبيره...لكن كان جتنا عادي وين المشكله اكيد بتاخد قهوة..
نضال؛وين تفوت قدام جدك ركز عليه تو تعرف وين المشكله..
فنص محمد المهدي وهو يراقب وعمر اللي كان يسمع فيهم ركز معاه..
فاتت نبيله من قدام محمد..
ركز معاها وقعد يتبع فيها بعيونه لين وقفت قدام المطحن..قعد يشبحلها وخلاص..
محمد:اوبا اوبا اوبا اوبا..
ونضال يضحك...
🌻نبيله؛نبي كيسة معليشي وتكون محسمه تحميسه كامله..
:حاضر ياابله..
نبيله ابتسمت وقعدت تراجي فيه..
"اهلا وسهلا"
هي شبحت جنبها شافت محمد شنيبه واقف يشوفلها بإبتسامه وفيده السبحه..
هي بإستغراب؛اهلا..
محمد؛معاك صاحب المطحن..
نبيله:اهلا بيك..جيت ناخد منكم لأول مرة..
شبح للكيسه االي فيدها  وقال:واخده حتى من الغريم متاعنا..
نبيله بضحكه:ايه بنقارن بينهم واللي تعجبني اكثر بنثبت عليها..
محمد هز راسه وهو مبتسم..
وهي شبحت داخل تراجي امتى يطلعوا..
هو شبحلها وقال:شكلك ذواقه في القهوة بالذات..
شبحتله وابتسمت وهي تقول؛اها هلبه نعرف نميز القهوة كويسه من ريحتها وجوده القهوة تبان هني..
:تفضلي ياابله..
نبيله؛لحظه بس..وجت بتدفع..
محمد:والله ماك دافعه حاجه هادي هديه منا ليك..
نبيله؛لا ياخوي مايجيش..
محمد؛كيف مايجيش اكيد واخده الجنه هديه حتى هي..
ابتسمت نبيله وقالت؛صح..
محمد؛خلاص معناها حتى الزعيم تجيك هديه..
☘محمد المهدي؛جدي توا يطيح فيها ولاكيف!
نضاال؛منظره وقفته ابتسامته المنشكحه هكي يقولوا..
محمد شبحله وقال؛المنشكحه!
نضال هز راسه وقال؛ايه..
☘نبيله؛شكرا..السلام عليكم..
محمد؛وعليكم السلام..
ومشت نبيله ومحمد شنيبه يتبع فيها بعيونه..
نضال؛كلا حني عليك عيله وخلاص..
محمد بضحكه؛علاش..
نضال؛تريسها رومانسيين هلبه بسلامتهم..
محمد؛وانت شنو..
نضال:لا اني الحمد لله اعقل من جابت سلاله شنيبه المواضيع هادي لاغيها من حياتي..for ever
محمد بضحكه؛اللي يقولوا هكي طيحتهم مش بالساهل ياعم..
نضال؛فكك من القطاف..اللي عارف روحه مسيطر مايغيره شي..
محمد :يامسيطر انت يامسطير...
عمر جاهم وقال؛بوك ناوي يخربها اخر عمره ولاشني!؟
نضال:بنقعدوا مشردين وحني فهالعمر..شوف اني كان خيرني القاضي بنختار بوي ونخلي السموحه هادي تربيني..
عمر قعد يشبحله بإمتعاض ومحمد يضحك وخلاص..
☘☘☘☘☘☘
الساعه 9:00ليلا..
نبيله؛شوف شوف شوف الطعامه في احلى من هكي كنافه..
عبد الرؤوف وهو منزعج؛جايبتهالي في الليل توريلي فيها..
نبيله بضحكه؛نبيك تكسر نظامك..
عبد الرؤوف:نوضي نوضي ارفعيها من قدام وجهي..
نبيله بضحكه؛تعرف غير جت صغيره عليك هلبه البنيه كان هدا والله مانفوتها لو نسحرك حتى السحر بش تاخدها..
عبدالرؤوف:انتي ماتمليش..
نبيله:نو لاملل ولاكلل..بس يعني نقول حتى اختها غرفه حلوه وهاديه وتبان مؤدبه وهكي وجهها كيوت هلبه وتناسبك يعني حتى فرق العمر مناسب..
سكت وماباش يعلق..
نبيله:غريبه ماعصبتش..
شبحلها شويه بعدين قال:عاجبينك هلبه لهالدرجه!
نبيله:فوق ماتتصور...
شبحله شويه وقال:باهي شوفيلي بنتهم هادي اللي قلتي عليها مش عارف شن اسمها قلتيه توا..
نبيله؛طوبى!؟؟
عبد الرؤوف:تي لا الاكبر منها..
نبيله؛غرفه..
اشر عليها وقال؛ايوه..
نبيله:جديات مبروك ماتجريش بيا..
عصب وقال؛نبيله لأخر مرة نقولك الاسم هدا معاش تناديني بيه وردي بالك تقوليه قدامهم..فنص عيونه وقال..ان شاء الله قلتيه!
نبيله؛لالالا والله ابدا..حتى اني لما جيت بنزلق صلحته بسرعه ركبتني عقده..
هو ارتاح وقال:تمام..المهم زي ماقتلك ماتجيبش سيرته بكل بكل..وشوفيهالي البنت كان عاجباتك..
نبيله ضحكت بحماس وقالت؛خل نفوت يومين بعدين نكلمهم ويارب يصير منكم..
عبد الرؤوف وهو يشوف لأخته ابتسم اببتسامه غريبه وقال:ان شاء الله..
☘☘☘☘☘
"كارهه الجناح مانبيش نبات فيه"
عائشه؛تجي تباتي عندي؟
نجاة حستها فرصه وجت لعندها؛لو مافيهاش مشكله..
عائشه؛لاعادي المهدي ينزل يبات لوطا..
نجاة؛ان شاء الله مايضايقش مني بس..
عائشه؛لالا بكل مادوريش..
ع جية مغليه؛نجاة البسي ع راسك وبري لعمك في المربوعه..
لبست وشاحها وقالت:حاضر..
وناضت ومشت طلعت من حداهم..
مغليه:شن كانت تهدرزلك..
عائشه؛قالت ماتبيش تبات في جناحها قلت تجي تقعد عندي الليله..
مغليه؛كويس..
☘وصلت نجاه في المربوعه..
دقت الباب وخشت وهي تقول؛السلام عليكم..
لقت سلافها كلهم فيها..بس ارتبكت وين شافت الجالي اللي كان لاهي بالتلفزيون يتفرج ع الاخبار الرياضيه..
محمد شنيبه؛خشي بنتي خيرك واقفه في الباب هكي..
هي مشت خشت وقعمزت حدا شيبانها بمسافه..
محمد؛قولي..خيرك شديتي رجلك معاش جيتي..
وسلافها كلهم يشبحولها ماعدا الجالي اللي كان اكثر من مركز
معاها..
نجاة بحزن؛الوضع تغير معاش زي قبل..
محمد؛لامافي شي تغير يابنتي..انتي قاعده زي انتي عندي يخي اعتبريني بوك مش عمك ومغليه اعتبريها امك..وهادم كلهم خوتك والبنات خواتك..
نجاة:بارك الله فيك ياعمي..
المهدي:اي شي تحتاجيه قولي طول..كلمي البنات يقولولي واني حاضر.
نضال:ماتفكري في شي مرت خوي..
عمر:والصغار بإذن الله مش حتنقصهم حاجه وحني موجودين..
الجالي لاتعليق وقاعد يشوف للتلفزيون وبس..
نجاة:بارك الله فيكم كلكم والله ربي يحبني اللي جابني ليكم..
محمد شنيبه:الطيب يطيح في الطيبين اللي زيه يابنتي..
نجاة:تسلم ياعمي..
محمد:باهي قولي ماتبي شي ماناقصك شي؟
نجاة؛لا ياعمي الحمد لله كل شي عندي..
محمد هز راسه وقال:تقدري تخشي داخل..
هي ناضت بتمشي وعيونها يسرقوا في النظر للجالي اللي مادورهاش...
طلعت وهي مضايقه وحاسه بشعور مزعج للغايه..
☘بعد ساعه..
ركبت مع بنتها وولادها لحوش المهدي بتبات فيه..
وين خشت الشقه انبهرت بيها وبأثاثها كان كل شي غالي وحلو..
ودار النوم كانت قصه بروحها..
شافتها لما دخلتها عائشه تحط ولدها في سرير سدرة اللي قاعد في مكانه..
بعدين مشوا باتو في دار المعيشه..
راحت عائشه في النوم..والصغار معاها..
بس نجاه قعدت سهرانه وماقدرتش ترقد..
بين عيونها الجالي..بحركاته بكلامه بتصرفاته..
يخطر عليها زمان وتوا..
الشخصيه الطموحه الحاده الشرسه اللطيفه الحنونه المغرورة
مزيج من صفات في شخصية الراجل اللي يعجب نجاة بمعنى الكلمه..
حبت طاهر صح بش شخصيته ماكانتش تعجب فيها..كان طيب زياده ومتنازل هلبه وماعنداش طموح ...
عكس الجالي تماما..
بعدين قالت في نفسها..
"نجاة خيرك جاك..شن اللي قاعده تفكري فيه هدا!؟ ماتكونيش غبيه..الجالي مش زي المهدي ماعنداش كلمه مع امه وبوه عكس المهدي اللي عنده كلمه مع الكل..
هدا لو جاهم وقال بنتزوج ماحد يقدر يقوله كيف..حكمي عقلك من غير غباء فكري في مصلحتك ومصلحة صغارك"
تنهدت بعدين رقدت ع جنبها..
غمضت عيونها...
《 بتقدر عليهم بروحك؟
ابتسم ابتسامه جذابه وقال:بنرفعوك معانا!》
ارتسمت ع وجهها ابتسامه وهي مغمضه بعدين فتحتهم..
ورجعت تفكر فيه ونست كل الكلام اللي قالاته في نفسها قبل شويه...
☘☘☘☘☘
تاني يوم..
الساعه 9:00صباحا..
طلعت بسرعه بش بتلحق تطلع قبل لهو يطلع لازم تكون قبله في الشركه...بس انصدمت وين لقاته واقف ع سيارته وهو عاطيها بالظهر ويتكلم بالتليفون..
وبدي قلبها يدق بقوة..
مشت ناحية سيارتها..
هو شافها نهي مكالمته بسرعه وشبحلها وقال:قاعده لتوا يابش مهندسه..
شبحتله وقالت؛صباح الخير..
الجالي:صباح النور..في حالة ماسبقتنيش وخشيتي الشركه قبلي مش حنخليك تخشي اليوم..
ومشي ركب السيارة..
هي عرفاته يتحدى فيها..
ركبت السيارة طول..
انفتح الباب السحاب..
طلعت هي الاولى و وهو ضحك وطلع وراها...
طلعوا من شارع القهوة وهي اللي سابقه..
بس بعدين الجالي سبقها ..
وهي قعد تحاول تسبقه لين فاتاته..
وهو يضحك وبس..
نجاه؛من يحساب روحه راني نجاة المعلول ياباشا..
شويه سمعت صوت كاظم الساهر يغني..
"احبيني بلاعقد"
شبحت جنبه لقاته جنبها بالزبط كان يشبج الطريق من ورا نظاراته..بعدين زاد السرعه وفاتها..
وهي استاقظت بسرعه ولحقاته..
لين خشوا الزحمه..
وصل هو الاول وهي بعده..
جت جنبه وشبحتله..
وهو شبحلها ابتسم ع جنب بعدين شبح القدام وتحرك لأن الطريق بدت تتحرك...
نجاة ضربت الدومان وقالت:خيرك موليه مسبوهه هكي!
ولحقاته لين طلعوا من الزحمه..
هو كان سابقها..
وهو تحاول تسبقه..لين خشوا طريق تانيه كانت فيها اشارة..
نجاة بتذمر:اللي يشوفهم كلهم كيف طالعين بكري يقول الخدمه مقطعه بعضها فهالبلاد..
قعدت تقدم شويه وتبي توصل في الجالي..
وهو يشبحلها من مرايه السيارة ونفس الابتسامه ع وجهه..
ولت الارقام متاع الاشارة خضرا..
تحرك وهي وراه..
والطريق بعد هكي كانت فاضيه..
هو زاد السرعه وهي كذلك وقعدت تحاول تسبقه ماقدرتش..
ع قد ماكانت تبي تسبقه ع قد ماعجبتها سواقته متهورة بعض الشي بس فيها احتراق وكأنه في سباق..
زاد استفزها وخلاها تزيد السرعه..
لين قريب خشت في واحد..
دارت هي وياه فرينو..
وهو فرن معاهم ونزل من السيارة ومشالها يجري..
الجالي:خيرك خوي قاعد راقد!
؛هي اللي تجري ماتشبحش فيها!؟
نجاة؛حصل خير الغلط مني ان شاء الله ماصارلها شي سيارتك..
؛ولا يهمك..
الجالي:باهي توكل..
الراجل شبح للجالي من فوق لتحت بعدين مشي.
والجالي مشي لسيارته من غير مايكلمها بس كان معصب..
ركب وتحرك طول..
وهي تحركت وراه وكانت فرحانه باللقطه اللي صارت هلبه برغم ان معناها ماكانش واضح هلبه..
شافاته يسوق عادي عرفاته طلع من المود..
قعدت تسوق عادي حتى هي لين وصلوا للشركه..
خشولها..ودرسوا سيارتهم في الموقف متاعها...
نزل الجالي ومشي..
وهي نزلت ولحقاته وقالت:هاه نخش..
الجالي بدون مايشوفلها؛بتخشي في كل الحالات..
نجاة؛عارفاتك كنت قاصد تتحداني لااكثر..
وقف في مكانه وحول النظارات وقال:هي الابتسامات والهدرزة هادي لكل من هب ودب!
نجاة؛نعم!
الجالي:اسمعي الجو هدا مانحباش..في الخدمه امنا وسلمنا قلنا خدمه ولازم تتعاملي فيها هكي..لكن برا منها لازم ديري حدود..
رفعت حاجبها وقالت؛ع اساس شنو؟!
رفع حاجبه وحط نظاراته ع صدغ راسه وقال؛عقلي هكي يبي..
بعدين مشي وخلاها..
وهي بعد مشي رسمت ابتسامه حماس وفرح ع وجهها ولحقاته طول...
☘☘☘☘☘☘
جامعة طرابلس..قاطع ب..
كلية الاقتصاد..
في احدي مدرجاته...
اريج:يابنتي 4فردات خبزة بدينار انتي مستوعبه الوضع اللي وصلناله...والسنيورة تتشرط..
صاحبتها:باهي شن فيها كان امك خدت من جدك..
اريج:وشن جدي عنده مال قارون! كلهم تلاته مطاحن قهوة ومع ازمه الدولار وضعه تعقد شويه..منين بيجيبلها السيارة اللي تبيها الللا..
:وخيره عمك هداكا..
اريج:غير ينشد علينا هداكا ولايدورنا حتى ع حوازته حناي هي اللي تعزم..
:عم العازة والقهرة..
اريج؛عازة وقهرة بس..
وتنهدت وقعدت ساكته شويه بعدين قالت؛نفكر نفتح دورة احصاء ورياضيات في الحوش ع الامتحانات النهائيه..
:هلبه عليك يااريج شوفي روحك كيف وليتي بتموتي من التعب والارهاق.
اريج؛ماقالتها امي اللي قاعده تشقى ليل نهار نقولها اني اللي قاعده صغيرة بصحتي!..
:مانقول كان ربي يعاونك وخلاص..
اريج؛آمين..شن الماده هادي قريب نكملوا السمستر وماجانا فيها حد..
:قالوا اليوم بيجي..
وهي قالت كلمتها من هني..
ويخش الاستاد اللي بيدرس الماده من هني..
اريج لما شافاته وقف ورا الطاوله...
انفجرت بالضحك..
والقاعه كلها قعدت تشبحلها..
والاستاذ معاهم..
وهي تضحك وتضحك لين دموعها نزلوا..
وهما يشوفولها..
وصاحبتها تنخص فيها وتقول:اريج..
اريج وهي تضحك وتأشر ع الطاوله؛شفتي....اهوا الاستاذ..شفتي مني..وتضحك وتضحك لين ضحكت معاها القاعه غصب عنهم..
صاحبتها وهي تضحك اريج.
اريج وهي تضحك؛ووك عليا ياربي..وضع البلاد اثر عليا....شن اللي قاعده نشوف فيه هدا...وتضحك البنت لين قريب نفسها هرب...
هو قال:كان مازال ماكملتيش اطلعي.
هي هدت ضحك..ومسحت دموعها وقعدت مركزه عليه..
شويه وقعدت تفنص..
لاابدا ماتتخيلش هو..
حول عيونه عنها وشبح لباقي الطلبه وقال...
نضال:انساتي سادتي..معاكم نضال محمد شنيبه معيد في الكليه وجيتكم ندرس الماده في مكانها اللي مش معروف وين حذفته..
ضحكوا..
واريج مازال تشوف وهي مصدومه..
نضال؛ماتخافوش مني اسلوبي في الشرح سلس وبسيط ويخش العقل طول يعني تحفظوا المحاضرة من الشرح وقتي..اني هكي كنت زمان ناخد المحاضرة تعلق في دماغي ومانقراش بكل كان ايام الامتحانات..ونجيب فيها 100 صح العقول تتفاوت بس انتم حاولوا هاه واقروا في كل وقت مش تقعدوا تهيجوا لين يجي يوم الامتحان وتحصلوا وتقولوا استاذ نضال قاللنا..
واحد من الطلبه قال:حتى انت راعينا شويه..
نضال؛راعيك الله ياباتي..اني ماعنديش في الجو هدا بكل لاتقولي خوك في كتيبه ولاعمك في وزراه ولادلاع ابيض..هونا السيارة في البركيدجو بروا كسروها..رصاصه في راسي عطهولي والله ماني مدور حاجه ياتنجحوا بمجهودكم يافوتوا الموضوع ايوه...
وحاجه تانيه..الجو اللي داراته زميلتكم اللي ضاربتها الشمس في عز الشتي يتكرر التاني الدرجات يريحوا في القص..
شبحلها لقاها غمضت عيونها بشده وهي تحاول تتمالك اعصابها..
ضيق عيونه وقال..خيرك بدوخي!؟
نخصتها صاحبتها..فتحت عيونها وشبحتله..
نضال:خيرك انتي مريضه؟
اريج:اني!؟
نضال:لارسمي مش طبيعيه شبحلهم وقال:خيرها ياناري!..
ضحكوا الطلبه..
نضال؛ماعلينا..المهم توا نبوا نخشوا طول في المهم وان شاء الله نلحقوا..
وفتحت اللاب توب متاعه..
وهي تشوفله بغيظ..
هو قام عيونه مررهم ع الطلبه لقاهم لاهيين شبحلها لقاها تشبحلها رقص حواجبه استفزازا..
هي شدت ع يدها وسنونها بغيظ..وعيطت بدون صوت..
شبحتلها صاحبتها وقعدت تضحك بكتمان...
بعدين شبحتله لقاته يشوف للاب توب وهو مبتسم...

(مش مسامحه اي وحده تقرا وماتتفاعلش..واللي بيسأل عن العمليه للأسف تأجلت دعواتكم ربي يسخر الحال)

#شعور2
#طوبى

....يتبع...