طوبى الجزء الاول

الجزء الثاني عشر

# طوبى "شارع القهوة"
#جمان_فريد
#الجزء_الثاني_عشر"بنت الريح2"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
"يام بنت ماشاء الله عليها بنت ريح يام...عجبتني هلبه"
تبرة:شوقتني نشوفها!..
الفاندي:غير نحصل منهم الموافقه تو نرفعك انتي والبنات..
تبرة بإبتسامه:باهي...هي خش تسحر لحق قبل الامساك..
الفاندي:لا يام متسحر ومعبيها عندهم..وغمز بعينه..
تبرة بضحكه:شكلها فالحه!؟
الفاندي:ليرة ذهب يام..ذهب ذهب...
تبرة:ربي يجعلها من نصيبك..
ابتسم وقال:آمين...ومشي من حداها..
وهي تنهدت وشبحت للسبحه متاعها وقعدت تسبح..
🌻🌻🌻🌻🌻🌻
"خيرك تضحكي هكي...ياسر عاد.....سدرة!؟؟"
سدرة وهي تضحك:ووه عليا....قداش ليا ماضحكتش هكي..عطيك الهني ياوسيفه..
يوسف بتعجب:تو شن يضحك في اللي قلته!!؟
سدرة سكتت وهي شاده ضحكتها وقعدت تشبحله وهي ترمش في عيونها بعدين قالت...تشبحي فيا كويس ولا تعرفني زين ولاماتعرفنيش اختك اني ولا توامه اني وياك ياراجل....هكي اني سدرة سدرة...متوقعني نفكر في واحد زي الفاندي..قصدي ننحطوا حدا بعض يايوسف!؟
مرر نظره عليها بعدين ضحك وقال:الحق لا..بس هو كراجل يمشي معاك دمه حامي وشخصيته قويه زيك بالزبط..
سدرة:فرقة القوة اللي عندي كان اللي تشوفوا هدا تحسابوه قوه راهو وهم...وبعدين ستايل متاعه منظره هكي لالا وخيي سكره الموضوع منك ليك..
يوسف:زيدي فكري قعمزي معاه مرات يعجبك..
حركت راسها للخلف حركه بسيطه بعدين:لالا سلم وخيي هو ولاغيره اني الزواج مسكرة عليه بالطابية الحمرا اني عايشه عمري لبوي ووخياتي...
يوسف بحزن؛حرام عليك نفسك..
شبحتله بألم وقالت:مجبورة..امي وصتني...
وجي بين عيون سدرة هداكا اليوم..ووصية امها اللي قالتها وهي تلفظ في انفاسها الاخيره..
حركت راسها بالنفي وقالت:قوله سدرة مش للزواج..سدرة ربي خلقها لغيرها ماخلقهاش لروحها...
تنهد يوسف وقال:براحتك...
🌻وفي الحوش اللي جنبهم...
كانت اميمه في دارها نايضه..
تشبح لوجهها في المرايه وتبكي..
وتتوجع لما ينزلوا الدموع ع جروح خدودها...
قعدت تفكر كيف بتمشي غدوة للمدرسه..وغدوة عندها اختبار!
فجأة دق باب دارها..
اميمه:امي..
انفتح الباب وخش حسين..لما شافها انصدم..
قدملها وقال؛خيره وجهك!!
قعدت تشبحله بنظرات ضعف مغرقتهم الدموع..
حسين بغضب؛بوي ضربك!
هزت راسها ودموعها ينزلوا وهي تتوجع..
حسين:علاش!؟
اميمه بنبرة باكيه:ع خاطر بزعت العصير...
حسين مايقدر يدير شي لبوه ولايقدر يواجهه..
ماقدرش غير علي شي واحد...
حسين؛راجي شويه....
ومشي طلع من حداها...
واميمه بدت تفرك في ايديها في بعض من الخوف..
وماهي الا لحظات وخش الحاج علي ووراه حسين وصفيه..
صفيه:علاش هكي ياحسين بس!
حسين بإنفعال مشي لاخته وشد وجهها وقعد يوري في جده:شوف شن دارلها ع خاطر بزعت العصير شوف...
علي قعد يشبح لوجه اميمه وهو مصدوم..
والبنيه ترعش وتبكي..
خبط علي بعكوزه ع الارض من الغضب ومشي طلع من حداهم..
صفيه:عمي صل ع النبي..
حسين:اسكتي يام خلاص لهني وياسر..
امه ضرباته ع ذراعه وهي معصبه..
هو ماعدلش وقعد يلحق في جده مع امه..
لين خشوا لدار النوم..
قدم علي للسرير وقعد ينخص في ولده بالعكوز وقال:نوض..نوض اطلع برا نوض..
ناض عبد المطلب مفجوع:خيرك يابوي شن في!!؟
علي:شن اللي دايره في وجه بنتك هذا شن !!؟
عبدالمطلب:هاك قلتها بروحك يابوي بنتي..
رفع حواجبه علي وهو يقول:صار انت هكي!! مالا خلاص حتى اني الحوش هذا حوشي ومعاش نبيك فيه..
عبدالمطلب:بوي!!
علي:خليتك ع راحتك هلبه..حتى حوشي سلمتهولك وقعدت فيه زي الضيف علاش!! قلت ولدي الكبير لازم نساعده ونديرله قدر لكن انت طلعت ماتستاهلش...توا تطلع من حوشي توا...مانبيكش فيه..
عبدالمطلب:راك قاعد تغلط يابوي!
علي؛كلمة تانيه قسما بالله العظيم نحرمك من حقك فالورث..
عبد المطلب خاف هلبه..طول ناض من مكانه ومشي للدولاب بيطلع حوايجه وهو يقول:حاضر يابوي حاضر..
قعد يشبحله بوه بنظرات غضب وقال:حمار..
بعدين التفت لحسين وصفيه وقاللهم:اطلعوا...
طلعوا هما الزوز..
وحسين راضي تمام الرضا ع اللي صار..
بس صفيه كانت مضايقه وخايفه من عبد المطلب يزيد يحقد ع صغاره..
☘وشويه وطلع عبدالمطلب مع الفجر من الحوش...
وخوه لطفي وهو ماشي للجامع شافه وهو طالع بشنطه وماشي بسيارته..
مشي لحوشه طول بش يفهم شن فيه..
علي الواعر:خليه يتربى شويه ويصرف من الفلوس اللي حاطهم ع قلبه...
لطفي:لكن رمضان يابوي وخاشين على عيد..
علي:يعرف رمضان ولاعيد هو..خش شوف وجه البنت خش..
تنهد لطفي بضيق وقال:لاحول ولاقوة الا بالله...
☘☘☘☘☘
مقعمزة قدامها تلبس فيها فشاربه تحاول درق بيهم اثر الجروح...
صفيه:هيا بنتي البسي كبوطك..
مشت وحزن الدنيا كله في وجهها...
خدت كبوطها ولبساته..
وخدت شنطتها ومشت بتطلع من الحوش..
وامها وراها...
لين سقدها برا الحوش بكل..
سكرت اميمه الباب...
ع طلعة نضال وعمر من حوشهم..
اميمه لما شافت عمر نزلت راسها و وقعدت تمشي بسرعه...
هو شافها ضحك بصوت عالي وقال:نضال شوف شوف الشينه شن لابسه محرمة حناي!!
نضال قعد يضحك..
عمر حط ايديه حوالين فمه وقعد يقول:شينه شينه..اميمه مافيش شينه زيها الا عواصف..
ع فتحة سدرة لباب حوشهم بش طلع السيارة كانت تسمع فيه وتشوف لاميمه كيف موطيه راسها وبتبكي..
سدرة بغضب:انت امتى تكبر وتتحشم ع وجهك..
نزل عمر راسه لوطا وكالعاده مايقدرش يشبح حتى الشبح فالسدرة..
سدرة:تعالي ميمو حبيبتي تعالى..
جتها اميمه قالتلها سدرة:بري اركبي السيارة..
مشت طول للسيارة..
ع طلعة الجالي ووراه المهدي من الحوش..
شبح لسدرة كيف لابسه كبوط فرو مسكر فيه حزام طويل لحد الركبه وتحت سروال..وحاطه نظاراتها فوق الوشاح..وفي يدها شاده النقال..
قعد واقف يشوفلها وبس..
اما هي شبحت للجالي وقالت:يالجالي انت اعقل واحد في حوشكم شد لخوك عمر خيرله قوله يخلي اميمه في حالها..
الجالي وهو يشبح في المهدي:ماعليكش فيه تو نتفاهم معاه..
سدرة:خلاص الموضوع عندك..
ولفت ومشت لسيارتها.
والمهدي مازال قاعد يشبحلها..
الجالي شبح لعمر:خلاص ياراجل اعقل انت وياه..
عمر بنرفزة؛خلاص فهمنا..
شبحله المهدي وجبده من قفاه وقاله:مازال تشبح للبنت ولاتفوت من ركنها تشوف..
ع طلعة سدرة بالسيارة..شافاته قالت بهمس:ثور..
وكملت طريقها ....
طلق المهدي عمر وهو يشوف للسيارة وقاله:اقلب وجهك..
مشي عمر وهو يتحسس في رقبته ومعصب..
ووراه نضال..
والجالي وراهم وهو شاد ضحكته..
لحظات وطلعت عائشه من الحوش..
المهدي لبس نظاراته وقال:هيا اركبي..
ومشي ركب.
وهي ركبت بعده وقالت:مهدي..
سكر باب السيارة وقال:نعم..
عائشه:تو انت مش قلتلي حصلتلك تعيين وقبل بعد المرواحه من تونس بتخليني نخدم!؟
المهدي:شفتك سكتي قلت بالك ماتبيش..
عائشه:لانبي..
المهدي هز راسه وقال:تمام..لكن الخدمه في المدرسه اللي هني..
عائشه:ايه عارفه..
سكت شويه وقال:بعني..المدرسه اللي تخدم فيها بنت جيرانا..
شبحتله وقالت:اها فهمتك..لالا مادورش عادي..
المهدي من داخل حس بشي من الفرح مادام عائشه بتخدم مع سدرة في نفس المدرسه بيولي عنده سبب قوي يشوفها فيه فمكان العمل..
بس من برا تظاهر بإن الموضوع مش مهم عنده وقال:تمام مادام انتي تبي هكي براحتك..
وشغل السيارة وتحرك..
وهي تشوفله مرة مرة وعقلها يفكر...
☘☘☘☘☘☘
الساعه 2:30ظهرا...
المطر تصب...والجو شتوي بآمتياز..
بس في من عنده صيفت بقوة...
الفاندي:قولي سبب يخش دماغي...مش عاجبها يعني!؟
يوسف:والله زي ماقتلك يافاندي هي ماشيه بوصية امها ع قد ماجوها ردت ع خاطر وصية امها..
الفاندي:الله يرحم امها..حرام عليها الوصية متاعها غلط ضيع في عمر بنتها والله حرام..حتى عند ربك..
يوسف:هذا اللي صار..
الفاندي:باهي علاش ماقلتهاش الدوة هادي من امس!؟
يوسف؛قلت مانبيش نسكرها طول...
ضيق الفاندي عيونه وقال:مش عاجبها ولا!؟
ضحك يوسف وين تفكر كلام سدرة عليه وقال:علاش مصر ع الكلام هذا!!؟ صدقني سبب رفضه هو نفسه اللي قتلك عليه..
هز الفاندي راسه وقال:إن شاء الله خير...إن شاء الله خير..
ويوسف يشوفله وهو يغلب في ضحكته ومايبيهاش تطلع وين تخطر عليه ردة فعل سدرة...
🌻🌻🌻🌻🌻
وسدرة مروحه في الطريق بخواتها وبنت عمها..
شافت نسرين وهي نازله من سيارة تاكسي وهي تضحك..
استغربت!!
ونسرين وهي خاشه للزنقه شافتها...
سدرة درست قدامها ونزلت المرش وقالت؛اركبي..
ابتسمت نسرين ومشت ركبت جنب سدرة وحطت طوبى في حجرها .
نسرين:كبرتي ياطوبى هلبه الله يبارك..
سدرة:شن جو..
نسرين شبحتلها وقالت:تمام...التفتت للبنات وقالت..شن جو..
غرفه:مليح..
اميمه:باهي..
نسرين بضحكه:شن ميمو بتتحجبي..
سدرة:شكلها هكي..احسن خل تتعود من توا الحجاب حيلبسوه فالاعدادي خلاص هداكا هو..
غرفه:مازال سدرة..
فنصت فيها سدرة من المرايه وقالت:مازال عينك خلاص كبرتوا..
سكتت غرفه وهي معصبه..
واميمه تشبحلها..
ونسرين تضحك..
طوبى:حلوة المطر..
شبحوا برا لقوا المطر بعد وقفت رجعت تصب..
نسرين بضحكه:انتي حلوة..
ابتسمت طوبى..
وصلت سدرة قدام حوشهم وقالت:انزلي معانا نبي نهدرز عليك..
نسرين عرفتها في شن تبيها ابتسمت وقالت:باهي..
🌻وخشت معاهم حوشهم....
بعد مااميمه روحت لحوشهم تجري بش ماتنجبرش تحول الشاربه ويشوفوا وجهها..
خشوا غرفه وطوبى لدارهم يبدلوا..
وسدرة ونسرين قعمزوا في الصاله يهدرزوا..
سدرة:شن قصة التاكسي اللي نازله منه تضحكي.
ضحكت نسرين وحكتلها كل شي بالتفصيل..
سدرة؛مش خايفه يشوفوك خوتك؟
نسرين:تاكسي رفعني ولاجابني عادي..
سدرة:باهي لهالدرجة واثقه فيه!؟
نسرين:لتوا ماشفتش منه ولاحركة غلط ياسدرة محترم هلبه ويبيني بجديات..
سدرة؛قوليله يخطبك كان يبيك بجديات..
نسرين؛وهو مستعد غير اني نقول مازال خل يتم موضوع اختي خديجه مع محي بش نديروها حوسه وحده..
ابتسمت سدرة وقالت:واضح انك حبتيه..
نسرين بإبتسامه:هلبه..اول مرة نحب في حياتي..
سدرة:ربي يوصلكم لبعض..وياريت لو احتجتي في يوم تجي يانسرين مافي شي يستاهل تقطعيني ع خاطره..تشبحي فيا في حالي كافيه خيري شري..
نسرين عيونها تعبوا دموع قربت لصاحبتها وضمتها وقالت:آسفه..بش مش قادرة نغلب ع مصلحة خوي شي..
بعدتها سدرة وقالت:اني عمري ماضريت حد ولاحنضر حد..ولو شفتي شي ماعجبكش..فالتفتي ع خوك هو الاول..
تنهدت نسرين وقعدت ساكته..ماعندها ماترد ع كلام صاحبتها عندها الحق..المهدي هو اللي قاعد يجري في جرتها..
غيرت سدرة السيرة وقالت:شن اخر اخبار خديج!
نسرين ضحكت وقالت:خلاص معاش طول...
🍀فهالوقت خديجه..
دايرة روحها راكبه ضم في ديار خوتها..
وفي دارهم كان في روشن مطل ع حوش الصيد.
يفتح ع دار محي..
كانت واقفة ع روشنها دايرة روحها تنفض في المخاد..
والمطر تصب!
وهو واقف ع الروشن يشوفلها ويوزع في ابتسامات..
بعدين اشرلها ع يده وكأنه يلبس في خاتم..وكمل الاشارات وكأنه يقوللها..
الليله جايين يخطبوك..
هي تفاجئت وطارت من االفرحه..
ابتسمت بفرح وخجل..
وهو أشرلها تقول لأمها...
هزت راسها وخشت وسكرت الروشن وغطاته بالستار..
ومشت تجري نازله تخبر امها..
مغليه بضحكه:توا كيف سكرت من نجمه..
خديجه بضحكة فرح:معناها خلاص!..
مغليه وهي تضحك؛خلاص واخيرا بنفتكو منك..
خديجه ضمت امها وقالت:بنسكن حداك مافيهاش كيف..
قعدت تضحك مغليه وهي ضم فيها وتضرب فيها ع ظهرها وعيونها معبيات دموع...
🍀🍀🍀🍀🍀
وانخطبت خديجه لمحي الدين رسمي واتفقوا يكون العرس الصيف الجاي لا..اللي بعده لين يكمل محي الدين الشقه متاعه اللي دايرها فوق حوش اهله...
نسرين هني اختارت تأجل كلام في موضوع الخطوبه لبعد رمضان...
اللي خلاص فيسع ماأيامه عدت وودع شارع القهوة...
بس قبل مايودعهم صلح بين عبدالمطلب وبوه وخلاه يحضر معاهم العيد...
🍀🍀🍀🍀🍀
وعقد الايام ينفرط بسرعه...
ويطلعوا من 2001...ويخشوا ل2002...
والحياة كل مالها تتقدم..وتتغير معاها هلبه حاجات منهم نفوس الناس..
اهل احمد رافضين وجود فايزة حتى فالعيد لما جتهم قابلوها مقابله سيئة خلت راجلها قرر معاش يجيبها ليهم مرة تانيه..
لكن لما رفع لأمها..
لاحظت فايزة ان امها حالها كل يوم لتالي في حوش خوها..
ففكرت تاخد قرار لابد من مشاورة احمد فيه قبل..
فايزة:صدقني مش حثقل علينا هي بتقعد دويرتها بروحها..
احمد بإبتسامه:متوقعتيني نقول لا!؟..
فايزة:مش عارفه..يعني حني مقاطعين ماليك ونجيب امي تقعد معاي في الحوش!؟
احمد بإبتسامه:ماتفكريش هكي بكل..امك امي..ونحطها ع راسي من فوق ومستعد من غدوة نجيبها تقعد معانا..
فايزة بإبتسامه:ربي مايحرمني منك ياأحمد والله العظيم نحبك نحبك...ريشاته من شعره وقالت..نحبك..
احمد بضحكه:هذا شنو؟!
فايزة بضحكه:مش عارفه كيف نعبر!
قعد يضحك احمد..
فايزة:اممم باهي طلب بسيط..
احمد عقد حواجبه وقعد ساكت..
فايزة:واضح انك عرفته...عادي احمد هلبه نساوين يخدموا مزينات وبعدين اهو تحت العمارة...
احمد بحزم:اخر مرة تدوي معاي في الموضوع هدا تمام!؟
فايزة تنهدت بإبتسامه قالت:حاضر...
☘☘☘☘☘☘
"صباح الخير ابله سدرة"
سدرة:صباح الخير ابله عهود..
ومشت بطريقها لحجرة المدرسات..
خشتلها وهي تقول:صباح الخير..
وسكتت وهي متفاجئه لما شافت عائشه مقعمزة وسط المدرسات..
الابله المصريه قالت:جتلنا زميله جديده ابله سدرة..
ناضت عائشه وجت لسدرة وهي تقول:نعرفوا بعض..
وصلت لسدرة وسلمت عليها بالخد..
وسدرة سلمت عليها عادي وقالت؛كيف حالك..
عائشه:الحمد لله..شن حالك انتي..
سدرة:الحمد لله..
وحده من الابلات :من وين تعرفوا بعض؟
جت بترد عائشه وهي بتقول:صا..
قاطعتها سدرة وقالت:بنات شارع واحد..
عائشه قعدت تشبحلها..
وسدرة مشت بتاخد الكراسات متاع الطلبه وهي تقول:قعمزي مش باهي ليك الوقوف هلبه راك حامل..
الابلات بأصوات متقطعه:ماشاء الله..تنوضي ع خير..
مشت عائشه قعمزت وهي تقول:عندك حق..نفس كلام راجلي قالي مادابيك ماتوقفيش هلبه..
سدرة ابتسمت بتهكم وقامت الكراسات..
الابله المصريه:متجوزين جديد!
عائشه وهي تشوف لسدرة:4شهور..
وسدرة خدت الكراسات ومشت طلعت من الحجرة..
شدت دموعها بقوة وهي تقول بأسف:ياخسارة وخلاص..ياخسارة..لكن كله منه هو..مش مسامحاته لين نموت..
🌻🌻🌻🌻🌻
وهو وقتها..
كان في محلات مواد البناء متاعهم يخدم مع بوه...
شويه خش عليهم واحد وقال:السلام عليكم..
شبحوله وردوا السلام..
جاهم وقف عليهم وقال:ان شاء الله غير مش مشغولين..
المهدي وقف ع حيله بعد ماكان متكي ع المكتب وقال:لاتفضل خوي..
محمد:شن طلبك..
الراجل قعمز وقال؛والله جيت بنسألكم عن ناس بحكم انكم جيران..
رفع المهدي حاجبه وقال:عن مني بالزبط؟
الراجل:عيلة الواعر..
محمد:علاش!؟
الراجل:والله نبوا نسابوهم وجينا ننشدوكم عنهم..
المهدي:ماعندهمش بنات..
بوه شبحله وفنص فيه..
الراجل:لاعندهم وحده كانت شاده مطحن القهوة متاعهم سماها سدرة المنتهى..
محمد:ايه مزبوط..شبح للراجل وقال..البنت ماعندنا مانقولوا فيها يازين ماتختاروا وماليها عز من تعرف ومن تعاشر..
المهدي مشي طلع من المحل مرة وحده..
والراجل استغرب فيه
وبوه يرقع في الحركه وهو يقول:مادورش بروا اخطبوا وانتم مطمنين. شويه والراجل طلع من المحل وهو فرحان..
ويلحقه المهدي ويشده من مرفقه وهو يقول:فوتوها بنت الواعر..
:علاش خيرها فيها عيب..
شد ع مرفقه بقوة وقاله:لافيها ولاعمره يكون فيها عيب..غير فوتها وخلاص..
الراجل لما شاف ردة فعل فهم انه يبيها..
هز راسه وقال:تمام...تمام..وفك ذراعه ومشي..
المهدي خدي نفس..بعدين مسح ع شعره للخلف ولف ومشي ولى للمحل...
وقعد فيه ع نار يراجي في موعد مرواح عائشه..خاف الراجل يمشي لسدرة في المدرسه ويشدها يكلمها في المرواح هكي عقله قاله..
وجي وقت المرواح ومشي غادي طول...
🌻🌻🌻🌻🌻
فهالوقت..
في سيارة التاكسي متاع فؤاد..
فؤاد:ماعنديش مشكله بكل مستعد اليوم نجيب امي..
نسرين بإبتسامه قلق:فؤاد من توا نقولك مرات اهلي يشدوا معاك شويه.
فؤاد بإبتسامه؛ولايهمك نتحمل كل شي ع خاطرك..
نسرين ابتسمت وقعدت ساكته..
وهو قاللها:بإذن الله تكوني ليا يانوسة..
نسرين:يارب..
تنهد وشبح القدام وشغل السيارة وتحرك...
☘☘☘☘☘☘
في الساحه..
وقت المرواح...سدرة كانت ماشيه بطريقها لسيارتها..
وهي ماشيه شافت شخص حست روحها تعرفه..
قامت نظاراته شويه وقال بصوت هامس:هذا شن جابه هني!!؟
رجعت نظاراته ومشت بطريقها لسيارتها دارت روحها ماتعرفاش..
بس هو ناداها..
"ياابله..ابله سدرة"..
وقفت سدرة مجبورة..
وهو جاها وقف قدامها وقال:مساء الخير..
سدرة وهي حاطه ايديها ع بعض ترد عليه وتوزع في نظرها من تحت النظارات ع الساحه:مساء الخير تفضل..
الفاندي وهو مبتسم ع جنب:ردي بالك ديري روحك مش عارفتيني اني بالذات ماننتساش..
سدرة؛لواه..من وليت..صدام حسين!
هو ضحك وقال؛والله ماك عاديه باهي اقسم بالله..
رفعت سدرة حواجبها وقالت:نعم!؟
الفاندي بضحكه:اقسم بالله اول مرة نتلخبط هكي قدام بنت..ع المهم خل نخش في الموضوع طول..علاش رفضتيني..
سدرة؛قصدك نسيت شن قالك يوسف في تلاته شهور!؟
الفاندي بإبتسامه:ماخشش راسي.
سدرة؛انت حر..مش مهمتي ندخله لراسك بالسيف..
الفاندي:مش عاجبك صح!؟
سدرة؛شوف انت ولاغيرك اني مش متزوجه بكل اني نادرة حياتي لعيلتي وبس..ماتعبش روحك معاي..
الفاندي:وهذا عند ربي حرام راهو..
شبحتله من فوق لتحت وقالت؛حرام!؟
الفاندي:شكلك هازيه عليا هلبه..نفهم في الحلال والحرام وعارف حدود ربي..
سدرة تنهدت وقعدت ساكته..
الفاندي:اني راجل عمري ماقربت حرام ونعرف العيب كويس..وردبالك تحسابي ماعنديش شهاده..لاعندي متخرج من كلية الآداب راهو..
تفاجئت سدرة..
الفاندي:لكن شهادتي ماديريلي شي خدمت في صنعه بوي وجدي ونطقطق هني وغادي يعني راجل خادم ع راسي وعابي ع روحي..ونبي وحده تكون زيي هكي بنت بلاد تتحمل مسؤوليه نعبا عليها وتعبا عليا...وتكون راجل برا ومعاي اني بس مراة..
سدرة؛ان شاء الله تلقاها..
الفاندي قدملها وقالها؛شن تبي ندير بش تقولي باهي.
سدرة:ياخوي قتلك اني مش متاع زواج كيف تبي تفهمها هادي..
وهالوقفه والنقاش كانت تتفرج عليهم عائشه وهي تراجي في راجلها..
اللي خشت بسيارته للمدرسه وهو يدور بعيونه في سدرة..
واللي خافه منه شافه بس كان فوق التوقع.
درس السيارة ونزل..
جاته عائشه وقالت:هيا..
المهدي وهو يشبح لسدرة؛شن يبي منها هدا!؟
عائشه:وانت شن دخلك بيها!.
حول نظاراته وشبحلها بنظرة غضب..
عائشه بخوف:مادخلش روحك في مشاكل..
المهدي:تي هدا اللي ضرباته ع راسه مرات جاي يهدد فيها..
التفتت عائشه وشبحتلهم...
وهو مشالهم طول...
وصل فيهم وسمع سدرة تقول
"اني مانبيش نتزوج"
وهو رد عليها وقال..
"زيدي فكري يالسدرة زيدي فكري"
وماينديرش على روحه الا وفي حد جابده من سوريته ويجر فيه برا وهو يقوله:تعالى جاي تعالى..
والفاندي يشبحله من فوق لتحت..
سدرة خبطت بإيديها ع وجهها وقالت؛ياحليلي..
شويه جتها عائشه وقالت؛كله منك كله منك انتي..اطلعي من حياتنا خلاص..
سدرة بصدمه:شن جابني ليها حياتكم اني..
عائشه بإنفعال:كان صارت حاجه في راجلي مش مسامحاتك لين نموت..
ومشت وخلتها..مصدومه..مش قادرة تنطق ولاتتحرك من مكانها..
وبرا المدرسه..
لما وصل المهدي بالفاندي برا:قبل مش اني اللي ضاربك هذا علاش نضت منها..
الفاندي ابتسم بتهكم وقال:والله!..
وضرب راسه براس المهدي..
وخلا المهدي يوخر للخلف ويده ع جبهته..
الفاندي قدمله وقاله:خليك في اللي عندك يازعيم اللي مض عندك مادخلكش بيه..
ويجي للفاندي بوكس ع وجهه..
رده بسرعه بكل قوة...
لين خلا المهدي يوخر مرة تانيه وهو حاط يده ع خشمه..
جوهم الناس يجروا وقعدوا يحزوا فيهم عن بعض..
الفاندي:اسمع كلامي خيرلك..
المهدي:وربي يجي يوم وتحصل ومايفكك مني حد..
"مهدي"
شبح طول لمصدر الصوت..
لقي عائشه واقفه فم المدرسه شاده بطنها وتبكي..
فك روحه من الناس ومشالها يجري..
شدها ومشي بيها وهو يقول:خيرك خيرك! ماصار شي!..
وركبها السيارة وطلع بيها يجري من المدرسه لأقرب مستشفى..
وخلوا سدرة في السيارة تبكي ومنهاره وياما صاير فيها..
بس ماطولتش في البكي هلبه..
وفيسع طلعت بسيارتها لمكان فكرت هلبه قبل لتمشيله..
☘فهالوقت..
غرفة واميمه بعد ماراجو سدرة هلبه اما طوبى..فإدارة الروضه بعد مااتصلت بسدرة هلبه وماحصلوهاش اتصلوا بلطفي وحصلوه وبلغوه بش يجي يروح بطوبى..
وهو انشغل هلبه ع سدرة...
🌻وسدرة كانت واصله لمحلات البناء متاع عيلة شنيبه..
درست السيارة قدامهم..
ونزلت ومشت خشت داخل..
سألت ع مكان محمد شنيبه...دلوها عليه..
ومشتله طول...
هو لما شافها تفاجئ هلبه..
محمد:خير بنتي ان شاء الله خير..
سدرة وهي لابسه نظاراتها:نبيك في كلمتين ضروري ياعمي محمد بالله عليك..
محمد شبحلها شويه بعدين هز راسها وقال:تعالي..
مشي هو وياها لتركينه مستخطيه..
محمد؛شن في يابنتي!؟
سدرة حولت نظاراتها وقالت؛عمي محمد بالله عليك شد ولدك المهدي عندي..قولوله يلهى في عيلته يلهى في حياته ويخليني في حالي ارجوك مانبيش تجيني الدوة معاش نبي وجع راس ومشاكل..اني لتوا مانبيش ندخل بوي في الموضوع بش مانخسروش جيرتكم..بالله عليك دير حل مع ولدك منك ليك..
محمد وهو مضايق ع الآخر هز راسه وقال؛حاضر يابنتي حاضر..جيتك لعندي هني كبيرة هلبه واني نعاهدك من اللحظه هادي المهدي معاش يقيم عيونه فيك..
سدرة:ياريت ياعمي محمد ياريت..رشفت وقالت..سامحني غششتك بس ماكانش في يدي حل تاني غير هدا..
محمد:واحسن مادرتي...
☘☘☘☘
ومشت طلعت من عنده سدرة وهي حاسه روحها منهكه..
ركبت سيارتها وعقلها عند عائشه..
خايفتها تكون خسرت عيلها ويحملوها هي ذنبه..
فتحت شنطتها وطلعت نقالها لقت مكالمات فائته..
فتحتهم لقت اخرهم من بوها..
غمضت عيونها بشده بعدين فتحتهم واتصلت ببوها..
وهو طول رد..
"تي وينك يابنتي وينك"
سدرة؛هاني مروحه بوي ماتخافش مافي شي يخوف..غير حسيت روحي تعبانه شويه مشيت المستشفى قست ضغطي وحللت..
"باهي وينك انتي خل نجيك"
سدرة:لالا ارتاح وبيي اني جايه في الطريق..
"تقدري تسوقي!؟"
سدرة؛ايه نقدر بوي نقدر..هي بالسلامه..
"ردي بالك ع روحك..بالسلامه"
سكرت من بوها وردت التليفون للشنطه وتحركت طول...
☘☘☘☘☘☘
"لاالحمد لله مافي شي تخافي منه ياعائشه البيبي في احسن حال"
عائشه والمهدي:الحمد لله..
الدكتورة:بس بردو نقولك ردي بالك حاولي ماتنفعليش هلبه وماتعصبيش..
عائشه للمهدي:سمعت الدكتورة!
المهدي هز راسه وهو ساكت..
الدكتورة وهي تشوف لوجهه:انزل لقسم الاسعاف بش يعالجوا جروحك..
شبح للدكتورة شويه بعدين هز راسه بإيجاب..
وفي قلبه يقول..
ياريت كل الجروح يقدروا يداووها في الاسعاف...☘
🌻🌻🌻🌻🌻🌻
والقصة ماتمتش لعند هني..
لما روح المهدي بمرته وشافوا وجهه امه وخواته انصدموا..
وعائشه ماقالتش نسكت حكت اللي صار كله..
هو هني طارتله منها..
~~~~~~~~
عائشه:وعلاش انت طايرتلك هكي وين الغلط في اللي حكيته!؟ شفت بنت جيرانكم واحد يضايق فيها فزعتلها...وين الغلط في كلامي!؟
المهدي:مش كل شي ينحكى..ومرة تانيه لما يسألوا عن حاجه تخصني في حضوري اني نجاوب مش انتي فاهمه!؟
تنهدت عائشه وهي تحاول تكون هاديه وقالت:حاضر..بس ماتعصبش عليا ع خاطر عيلك..
هو شبح لبطنها بعدين شبحلها ومشي خش للحمام..
بعد ماخش قالت..يفور شويه ويهدا المهم اللي نبيه يوصل وصل...
🌻🌻🌻🌻🌻
"بوك قالي تعالي اقعدي حداها مريضه اني ماشي لتاجورا"
سدرة؛ربي يهديه كبرها وهي صغيره تعب عادي عمتي..
مطيرة؛لامش عادي بنتي وجهك مولي زي البزار..حاسه في شي صاير معاك وماتبيش تقولي..
تنهدت سدرة وهي تقول:مافي شي عمتي مافي شي..
فجأة..
سمعوا صوت دق قويه ع الحوش..
مطيرة:يالطيف هدا مني!؟
طلعت غرفه تجري بش تفتح الباب..
سدرة:ان شاء الله خير!..
لحظات وسمعوا صوت مغليه تنادي..
"سدرة"
ناضت مطيرة وقالت؛هادي خيرها تلعلع هكي!!؟
وناضت معاها سدرة  وهي خايفه ليكون صار لعيل عائشه حاجه...
وصلوا في الباب الدخلاني..
لقوها واقفه قدامه لابسه عبايه ووشاح ومربعه ايديها وباين في وجهها الشر..
وصلوا فيها وهي لما شافت سدرة قالت..
مغليه:انتي شن تبي بالزبط من ولدي ومرته! تبي تخربي عيشته ولاكيف فهميني!؟
سدرة؛مش اني اللي نبي نخرب عيشته ولدك هو اللي يبي يخربها بروحه..
مغليه:ايوه ديرله حركاتك واجبديه وخليه يدخل راسه في مشاكل ع خاطرك بعدين قولي هو..
مطيره:لا...لهني ووقفي عندك...بري ياماما شحطي عروقك ع ولدك وشديه هو اللي من يوم يومه يجري في جرة بنتنا ولاناسيه العبيتر اللي داره ع خاطرها!! تي هو حتى لما خدي خدي بعد رداته..ومن حرقته خدي صاحبتها بش يحرقها..وتوا قاعد يقول ياندايمي وولى يجري في جرتها..مادرقي عين الشمس بالغربال يامغليه..وانتي تعرفي كويس من هي سدرة والشارع كله يعرفها...عمرها ماتولي تاكل فضلتها...
سدرة قعدت تشبح لمغليه بنظرات كلها كبرياء..
ومغليه شبحتلها بعدين شبحت لمطيره..وبعدها لفت ومشت طلعت من الحوش وجبدت وراها الباب بقوة..
التفتت مطيره لبنت خوها ضمتها وقالت:هذا اللي كان ناقص..مادوريش قطافهم بنتي هما كاذبين الكذبه ومصدقينها...
سدرة قعدت تحضن في عمتها وهي مغمضة عيونها..
والدموع ينزلوا وتمسح فيه...
~~~~~~~~~~
"البنت جتني غادي تشكي منك قالت شد ولدك عني قوله يلهى في حوشه ويخليني في حالي"المهدي واقف قدام بوه ويشبحله بحده وهو مربع ايديه..
وامه وخواته يسمعوا وهما في الصاله..
وخوته الولاد واقفين عند الدروج..
ومرته تسمع وهي واقفه ع دروج شقتها..
محمد:ياولدي لأخر مرة نحذرك..ياتحول بنت الواعر من راسك..ياإما ترحل من هني..مانبيش نتقاطع اني وجاري ع خاطر جو الفروخ متاعك..
المهدي:بوي ارجوك رد بالك من كلامك..
محمد بإنفعال:انت اللي رد بالك من افعالك ياوقح..وتوا برا انتلف من قدامي انتلف..
مشي المهدي وهو يفتح في ايديه ويسكر فيهم من العصبيه..
وهو ماشي باتجاه باب الفاصل..
جبد مزهريه طيحها كسرها..
بعدين ركب لشقته...
وفوق ..كمل باقي حفلة التسكير..
وعائشه حابسه روحها في دار النوم.
وكانت مقعمزة ع السرير تشبح جهة الروشن ودموعها ينزلوا..
شويه وهدي المكان..
معاش سمعت حسه..
خافت عليه..وفي نفس الوقت خافت تطلع تشوفه...
وقعدوا هالحال للصبح..
لين هو دق باب الدار..
ناضت بسرعه فتحاته..
خش طول وقالت؛وتي حوايجك بنحطك في حوش اماليك..
عائشه بصدمه:علاش!
فتح دولابه وقال:بنمشي لزليطن نقعد فيها 20يوم بنكمل مشروع ليا فترة بادي فيه..
عائشه:باهي..خليني نويتلك حوايجك..
هو تنهد..بعدين هز راسه ومشي للحمام..
وهي طول مشت وتتله الساكو متاعه..
وبخت ع شويه من حوايجه العطر متاعها..
وحطت منها هي وشاح في وسط حوايجه...
بعدين سكرتها وبدت توتي في حوايجه...
بعد الصلاة..
وتوا رواحهم ونزلوا من الشقه...وطلعوا من الحوش..
في السيارة..
المهدي:تو نوصي خوك يرفعك ويجيبك للمدرسه..
عائشه:حاضر..
وصلها لحوش اهلها..ونزل معاها وصى خوتها...
بعدين تحرك طول بإتجاه زليتن....
🍀🍀🍀🍀🍀🍀
ومن عشرين يوم قعد شهر غادي..
خدم فيهم ع مشروع محل ذهب بيخش فيه شراكه مع واحد..
وانشغاله بهالمشروع نسوه اللي صاير معاه كله..
كان اغلب الوقت يكلم في امه ويطمنها..اما عائشه مرة مرة...
وهي مطمنه عليه مادامه بعيد..اكيد كل مايبعد حيبدا ينسى ويولي وتفكيره كله متغير..
🍀خلال هالشهر كانت سدرة عايشه حياتها عادي جدا..
وشاغله نفسها بعملها وعيلتها..ومرة مرة تزرق للمطحن..
وبوها يتغاظى لأن في عملاء ماعرفوش يتعاملوا الا مع سدرة..وبوها خلاها تمشي الشغل اتصالات وبس...
🌻من جهة تانيه...
كانت نسرين قاعده ع نار..تراجي في مرواحة المهدي بش يجي فؤاد يتقدملها في وجوده...
الموضوع ماحكتش لأمها عليه لانها عارفتها حتسكره قبل لينفتح..
ونبهت ع خديجه تسكت وماتقول شي وفعلا خديجه سكتت..
☘وروح المهدي..
وجي اليوم اللي جي فيه فؤاد وجاب معاه امه...
في الصاله..
كانت ام فؤاد مقعمزة توزع في عينها ع الحوش وتبان مبهورة..
ومغليه مش طايقتها...
وخديجه تشوفلها بإزدراء..وعائشه تشوفلها وهي متأكده وواثقه ان الموضوع مش حيصير منه..
شويه وخشت نسرين وهي بكامل اناقتها قالت:السلام عليكم..
المراة:ماشاء الله ماشاء الله..
وناضت سلمت عليها..
ومغليه وكأن في جبل قاعد ع قلبها..
قعمزت نسرين..والمراة قعدت تهدرز عليها...
:بتسكني معاي في حوش واحد بنقعدوا زي الام وبنيتها..
مغليه وخديجه شبحوا لبعض..وعائشه تشوف لنسرين كيف فرحانه...
☘في المربوعه..
المهدي:عندك خدمة في الدوله؟
فؤاد:لتوا لا..
محمد:ماعندكش حوش..
فؤاد:حاليا لا..
المهدي عقد حواجبه وقال:وين بتعيش اختي!؟
تنحنح فؤاد وقال:في البدايه في حوش العيله لين ربي يفتحها عليا..
المهدي:يعني انت جاي تخطب وماعندك شي..
فؤاد:عندي خدمة..
المهدي ابتسم تهكما وشبح لبوه..
محمد؛والله ياولدي شن بنقولك سامحنا ماليكش عندنا نصيب..
فؤاد :عمي اني قاعد نسعى وبإذن الله وحده وحده الامور تتساوى معاي..مافيش مشكله خطوبه توا والعرس حتى بعد عامين تانيات لين نوفر الحوش..
المهدي:كله فهالهوا مافي شي نشدوه بإيدينا..معليشي خوي مافيش نصيب..
فؤاد وجعاته كرامته قاللهم:الناس تشري الراجل راهو..
محمد:تشري الراجل اللي عارف شن معنى الزواج..
فؤاد ناض وقف وهو يقول:قولوا لأمي هيا...
ومشي طلع..
والمهدي ناض وطلع وراه...
شويه وامه طلعت معاه..
وبعد روحوا استلمت العيله نسرين..
المهدي:سؤال نبي عليه اجابه واضحه تعرفي ولالا..
نسرين بخوف:من وين بنعرفه!
خديجه:من وين بتعرفه يامهدي ربي يهديك زيه زي اي حد جي يخطب..
مغليه:ياريتهم ماجو..عليك عيله شن هدا امه واضح عليها مراة شلافطيه..
نسرين بلعت ريقها ودموعها في عيونها..
محمد:ع العموم الموضوع هدا سكرناه مالهمش نصيب عندنا..
المهدي؛ماعنده شي وجاي يخطب في بنات الناس!..
ومشي وهو يقول..هيا عايشه..
عائشه:هيا هي...تصبحوا ع خير..
ومشت ورا راجلها طول..
محمد:هي وتولنا العشي..
مغليه:حاضر..
ومشي محمد للمربوعه..
ومغليه مشت للكوجينه..
وخلوا نسرين واقفه بروحها مصدومه ودمع...
خديجه:قتلك مش حيصير منه..
وطبطت ع ظهرها ومشت وخلتها مازالت في حالة الصدمه...
🌻🌻🌻🌻🌻
"اثبتي يافردوس"
فردوس؛ايدك رزينه يافايزة!
فايزة؛مش رزينه انتي اللي ماتتحمليش..
ع خشة سدرة لقت البنات مدايرات دايرة ويشوفوا لفايزة كيف دير فتله لوجه فردوس..
سدرة:ومنسجمات ياللات!.. اميمه:نحس فيه حار..
غرفة؛ايه صح..
سدرة؛شن ايه صح متاعك هادي!انتي جربتيه!..
فايزة بضحكه:تعالي شويه للجماعه اللي هني شن يديروا..
مشت سدرة ع الجنب تاني..
لقت طوبى شاده خيط ودير فيه ع وجه اريج..
شهقت وقالت:نهار معكرش!!
وجتها وجبدت منها الخيط وقالت:هذا اللي مازال..
طوبى تحشمت وخافت..
واريج تضحك..
سدرة:شن هالجيل هدا!!!؟
فجأة سمعوا صوت دقان قوي ع الباب..
فايزة وفردوس وسدرة بأصوات متقطعه:ياساتر..يالطيف..منو هدا..
غرفه:نفتح!
سدرة؛لاخليك..
ومشت هي طلعت..
وصلت في الباب الخارجي قالت:منو؟
"افتحي ياسدرة"
فتحت سدرة الباب..
خشت نسرين ودموعها في عيونها؛سكري الباب سكري..
سكراته سدرة وقالت:خيرك!..
نسرين:بالله نقالك شويه ياسدرة..
سدرة:باهي خشي داخل خشي..
خشت هي وياها..
وبانوا ع فردوس وفايزة..
ناضت فايزة وجتهم وهي تقول:خيرك نسرين!
نسرين ودموعها ينزلوا:هاتفك سدرة ارجوك..
طلعت سدرة تليفونها من جيبها وعطتهولها..
خداته ومشت بإتجاه الكوجينه..
وسدرة وفايزة لحقوها..
ضربت ع رقم فؤاد..وحطت التليفون ع وذنها..
نادى مرتين بعدين رد..
نسرين؛فؤاد..
"شن مازال تبي"
نسرين ببكي؛مش قتلك يافؤاد اني مش قتلك..
"قلتي بيشدوا معاك مش يهينوك ويذلوك اقسم بالله اللي داروه فيا بوك وخوك اليوم عمري مااندارلي في حياتي..ندموني ع اليوم اللي عرفتك فيه"
نسرين ببكي:واني شن ذنبي يافؤاد اني والله حبيتك اقسم بالله..
"حتى اني يانسرين لكن كرامتي فوق كل شي..ربي يبعتلك اللي خير مني يملي عيون بوك وخوك..."
وسكر عليها..
نسرين:لايافؤاد لا..
وعاودت اتصلت بيه مرة تانيه قعد يسكر عليها..
انهارت نسرين بالبكي..
وجتها سدرة وقلبها موجوع عليها ضمتها لحضنها..
ونسرين تبكي في حضنها وهي تقول:حرام عليهم اول مرة نعرف حد يحبني في حياتي علاش حرموني منه..
وفايزة قعدت طبطب ع ظهرها وهي تبكي معاها...
🍀🍀🍀🍀🍀
ومن هداكا اليوم انقلب حال نسرين..
ولت منعزله..ومعاش تبي تختلط بحد...
قعدت ع هالحال مش بس ايام...
شهور....لين جي اليوم اللي جابت فيه فايزة...
وكان المولود بنيه...سمتها صفاء..
مشت حضرت لمتها اللي دارتها وطلعت من حالة الحزن اللي هي فيها..
هديكا اللمه حضرتها عائشه اللي كانت في اواخر شهور حملها..
كانت جايه ولابسه عباية خليجيه متاع حوامل اول ماطلعوا وقتها..
ومدندشه بالذهب والمكياج والتسريجه في المزين..
وكانت طول الوقت تضحك وتهدرز عادي جدا..
بس سدرة كانت متحاشيتها تماما..
متحاشيه تشوف لبطنها بالذات...
☘☘☘☘☘
ويجي اليوم اللي يتجيب فيه عائشه..
كانت سدرة يومها طالعه بتقضي مشوار قبل المغرب..
شافت المهدي كيف طالع بيها من الحوش يدودش فيها..
لين وصلها للسيارة وركبها وركب هو..وركبوا معاه امه واخته..
وتحركوا طول للمستشفى..
هداكا اليوم كان اصعب يمر ع سدرة..
ولما جاها خبر ولادة عائشه للمولود اللي كان ذكر زاد وجع قلبها..
وكأنها عطت كل احلامها وامنياتها لعائشه..
🌻واول حفيد لحوش شنيبه اللي تسمى على اسم جده
"محمد"....اندارله عرس مش لمة عاديه..
حضرتها فايزة وعييت وهي تخبر عنها وسدرة هي اللي كانت تسأل بالتفاصيل قصدا..
كانت كل ماتزيد تسمع تقتنع اكثر واكثر ان المهدي خلاص..معاش ممكن يربطها بيه اي شي لو مهما صار....
🍀🍀🍀🍀🍀🍀
واستمرت الحياة..
وكل حد عايش حياته وماشي فيها..
فايزة بعد جابت بنتها لهت ومعاش بدت تطلع من الحوش هلبه...
ورجعت سدرة قعدت بروحها..
او بالأحرى..دارتلها صديقه ولت تهدرز هيا وياه في كل شي..
طوبى...اللي سابقه سنها....
ومخليه كل اللي حواليها بيموتوا عليها...
زي ماعيلة شنيبه..
تعلقوا بأول حفيد ليهم...
"ميدو"
الجده الجده..العمات العمام..
وعلاقته ببوه حكاية تانيه...المهدي اللي تعلق بيه هلبه ويراجي امتى يروح للحوش بش يقعد معاه...
طول هالشهور...
ماجمعش ولاموقف بين المهدي وسدرة..
الزوز وكأنهم كانوا قاصدين تجنب هالنوع من المواقف...
لكن طول هالشهور..
وباب حوش الواعر ينطق..
والخطاب ماشيين جايين ع سدرة...
ناس متسميه..وفي منهم اصحاب مراكز في البلاد..
وهي كانت ترفض وترفض...
حتى من اياد جاب امه وجي خطبها..
وطبعا كان نصيبه الرفض...
الوحيد اللي قعد يتفرج من بعيد ومن قريب الفاندي..
اللي قوى علاقته بالعيله...ولطفي حبه هلبه..
وعلي الواعر اعجب بيه ع الآخر..
الفاندي كان يخطط للمدى البعيد وكان نفسه طويل..
وكل يوم يزيد اصراره ع سدرة ومشاعره تكبر اتجاهها...

🍀🍀🍀🍀🍀

يتبع في تكملة 🫶🏻