طوبى الجزء الاول

تكملة

#طوبى " أقحوان وفلة وياسمينه"
#جمان_فريد
#تكملة_الجزء_الحادي_والخمسين " أهرجو يناير"

حسست طوبى ان الجالي في شي قاعد يخاف منه..
شي مدرق لو طلع للعلن حيفرق بينها وبينه..
هي كانت تهرب من افكارها ماكانتش تبي تصدقها..
تقول اللي في عقلها كله وسواس مش اكثر..
بس تصرفات الجالي قاعد تثبتلها ان اللي في عقلها مش وسواس..بل هي شكوك مبينه ع اساس..
يعني مش من فراغ...
كانت طول الوقت تساير فيه..
لين ركبوا السيارة وتوجهوا للعمارة..
هو قال؛عندك ليك مفاجأة..
خدي CDوحطه في مسجل السيارة وشغله..
اشتغلت موسيقي لأغنيه تعرفها طوبى كويس..
شبحتله وقالت؛فيروز..
الجالي بإبتسامة؛جارة القمر..
الاغنيه الجالي ماكانش عارفها..
بس طوبى تعرفها كويس..
بدت وطوبى بدت تغني معاها...
🍃 بتسأل عليّي كتير وبتحبني
بعرف هالحكي .. حافظة هالحكي
كل الحكي حلو .. ومع إنّو حلو
ليش بيضلّو إحساسي يقلي لأ
في شي بدّو يصير .. في شي عم بيصير
☘هو وتراته الكلمات وصوت طوبى وهي تغني بإحساس وكأنها عايشة كلمات الأغنيه...
🍃بتمرق عليّي كتير وبتخصّني
بعرف هالقصص .. حافظة هالقصص
كلّ الـ قلتو حلو .. ومع إنّو حلو
ليش بيضلّو إحساسي يقلي لأ
في شي بدّو يصير .. في شي عم بيصير
في شي عم بيصير
🍃🍃🍃🍃🍃
وصلوا قدام العمارة..
الجالي؛اتصلي بيها..
طوبى؛تمام..
واتصلت بنجاة..
☘فوق..
نجاة لما سمعت تليفونها رن..
خشت تجري للدار خدت التليفون من ع الزيانه..
لقت طوبى هي اللي متصله..
رفعت حاجبها وردت؛ايوه..
"نجاة حني قدام العمارة"
نجاه:اها تمام..قولي للجالي يركب ينزل معاذ..
طوبى شبحت للجالي بعدين قالت؛تمام..
وسكرت...
🍃طلعت نجاه من الدار وهي تقول؛هي ماما حمزة جوري عمو جي..
طلعوا من دارهم ووراهم صابرين رافعه معاذ في غمرها..
نجاه؛بروا قعمزوا حدا المدخل..
الزوز قالوا:حاضر..
ومشوا وين ماقالتلهم..
نجاه؛جايب معاه لعبته بلعاني خايف لما نخليه يعيش في رعب ليله مع نهاره..
رن الجرس..
نجاة؛اهو جي..
ساوت شعرها..
ومشت للباب..
فتحاته وهي مبتسمه..
بس سرعان ماتلاشت ابتسامتها لما شافت اللي واقف قدامه..
مررت طوبى نظرها عليها..بعدين ابتسمت ورفعت يدها لوحت بيها وهي تقول؛سلام..

بلعت نجاة ريقها وابتسمت غصب وقالت:اهلا..علاش ركبتي انتي ثقيل عليك معاذ..
طوبى:لامش ثقيل ماتخافيش..وينهم الصغار عمهم مستعجل..
نجاة بإبتسامه تخفي بيها غيظها:حمزة جوري..صابرين جيبي معاذ وشنطته..
طلعوا الصغار  وسلموا ع طوبى..
وهي سلمت عليهم بود ولطف..
ع جية صابرين بمعاذ قالت؛اهلا..
طوبى؛اهلا بيك..
هاني العسول هاتي..هي تعالى هي تعالى..
الولد طول جاها..
وهي خداته وقالت بضحكه؛محلا ريحتك..
مدتلها صابرين الشنطه وقالت؛فيهم حاجاته..
خدتها طوبى وقالت؛تمام..
نجاه؛نحس فيك ماتقدريش عليه تو نزله معاك..
طوبى:لا ماتخافيش عليه معاي..هي سلام توا..
التفتت للصغار وقالت..هيا ميزو وجيجي انزلوا..
نزلوا الصغار قدامها وهي وراها..
ونجاه معاها بعيونها لين درقت..
خشت وسكرت الباب ومشت لروشن الصاله فتحت شويه وقعدت تشوف منه..
نجاه؛السيارة مهناش..
صابرين؛خش بيها داخل..
سكرت الروشن وقالت:ريتيها !..
صابرين؛مش ساهله بكل البنت ذكيه مش هبله بكل..
نجاة بغيرة: مش مهم هدا كله..المهم انها بدت تشك ووحده حتعرف عنه كل شي بروحها..
☘ونزلت طوبى مع الصغار للسيارة..
ركبوا كلهم وتحركوا بيهم الجالي لوحده من مدن الملاهي في حداها مطعم..
وفجأة الاطفال التلاته ولو اربعه..
لعبت معاهم طوبى في كل لعبه وهي مستمتعه..
والجالي اللي حصل في معاذ كان معاها بعيونه طول الوقت
لاحظ قداش تحب الصغار وكيف الصغار يحبوها بسرعه وينسجموا معاها...
وين جي وقت العشي..كانت مهتمه بيهم هلبه..
عشتهم هما ونست روحها..
والجالي يتأمل فيها..
وكل اللي يشوف فيه منها ع قد ماكان بحبه ع قد ماكان يضايق فيه..لأنه يحسس فيه انه مايستحقش طوبى..
🍀ومرت هديكا الساعات..
حلوة هلبه ع قلب طوبى..ومن احلى الساعات اللي عاشوها الصغار في حياتهم..
في الطريق رن تليفون الجالي..
شافوا هو وطوبى شاشة السيارة..
احمد حميدا..يتصل بيك..
شبحت للجالي..
الجالي في نفسه"ياكان نحصل عليك بانجاه":اففف مش وقته بكل..
طوبى:رد عليه مرات اتصال ضروري؟
الجالي:صاحبي هدا واحد تافه نعرفه عزابي وشادها في جرة المتزوجين..اللي يقول اعزمني ولللي يقوله هي نطلعوا نهيجوا مش عارف وين..
سكر عليه وقال..فوتي مادوريشي..
هزت راسها وهي طبطب ع معاذ في حجرها..
فجأة..
رن تليفونها..
طلعاته من الشنطه والجالي يشبحلها بطرق عينه..
طوبى؛نجاة..
وفتحت الخط وردت؛ايوه..
"روحنا حني وينكم انتم"
طوبى:في الطريق..
"تمام نستنى فيكم.."
طوبى:تمام...سلاام"
وسكرت وهي تقول؛نجاة تراجي في صغارها قدام العماره..
هز الجالي راسه بدون يعلق..
وبعد ماقطع مسافه لاباس بيها..
وصل للعماره..
خش داخل..
كانت مظلمه لأن الضي هارب..
شغل ضي السيارة..
لقي نجاة واقفه تراجي فيهم.
شبحلها بإمتعاض بعدين نزل وطوبى معاه..
فتح الباب الخلفي وقعد ينوض في حمزة وجوري..
اما طوبى مشت لنجاة بمعاذ وقالت:خوديه العسول..
خداته منها وقالت؛تعبكم؟
طوبى:تعبه راحه..صراحه صغارك هاديين ومش متعبين الله يبارك..
نجاة؛تسلمي..
وشافت للجالي وهو جاي مع الصغار..
حطهم قدامها وقال؛تصبحوا  ع خير عمو..
مررت نجاة نظرها ع لبسهم لقتهم لابسين زي بعض..
طوبى؛تصبحوا ع خير..
جوري:باي بيبو..
طوبى بآبتسامه؛باي جيجي الحلوة..
خدي الجالي يد طوبى وقال بإبتسامه:هيا بنرقد واني واقف..
ومشي هو وياها للسيارة..
ونجاة تشوفلهم بغيظ وغيره..
ركبوا السيارة وتحرك الجالي وطلع من العمارة.
هي هزت راسها وكانت مق.هورة ع الآخر..
فتحت فلاش التليفون وقالت؛هيا ماما..
ومشوا ركبوا معاها وجوري تحكيلها وين مشوا وشن دار وتزيد تق.هر فيها اكثر واكثر...
وباتت ليلتها وهي تبكي وقلبها موجوع...
☘اما طوبى باتت وهي تفكر في كل شي..
كان عايشه حالة حيره وشك وقلبها مقبوض طول الوقت...
☘☘☘☘☘☘
تاني يوم..
الثلاثاء.. 2يناير سنة 2018
الساعه 11:00صباحا..
السمي معيبه مافيش للشمس الا اثر ضي النهار..
الجو كان بارد..البرد متاعه يخش العظم...
والناس بين المدفي ببالطوا او كبوط..
واللي متلحف بشال سميك..
واللي مغطي راسه بطافيه صوف..او طاقيه غليظه توقيه عن الصقع..
كان عبد القيوم واحد منهم..
ع قد مايحب الشتي بس مايتحملش الصقع متاعه..
كان لابس فانيليه صوف سوداع سروال جنيز ازرق غامق..
متلحفه رقبته شال صوف اسود حتى هو..
وعليه بالطو اسود..
ومتقي راسه بطاقيه صوف..
كان ماشي ع رجليه بعد مادرس سيارة بعيد شويه..
خدي اجازة ساعيه..
ليه هلبه ماخدهاش..
وطلع بش يواصل عملية البحث..
خش لوحده من الكليات اللي كانت موجوده في منطقه بعيده بعض الشي..
قعد يمشي فيها وهو يدور  بعيونه..
زحمه..
فيها هلبه..اشكال والوان..
الزحمه..
كان تفقد فيه حماسه بعض الشي..
يخاف وجهها يريح بين الوجوه ومايشوفاش..
يفكر ويقول لنفسه مرات تكون في وحده من الكليات اللي دور فيهم بس من الزحمه ماقدرش يشوفها ولايركز..
بس سرعان ماقلبه يفند توقعات عقله ويقول..
اني نميزها من بين مليون وجه..
لو شفتها حنعرفها..
عبدالقيوم في نفسه..
"البنات يبحتن فيا بطريقه غريبه ع بالهن جاي نكحل
"
طلع نظاراته من جيه الجاكيت ولبسهم وقعد يمشي وهو يقول في نفسه.
"انظنى جبت لروحي الشبهه بزياده..نظارات شني اللي يلتبسن والشمس غايبه..ياعليك كلالي ياعبد القيوم"
ومع هدا مازال يدور..
لين وقف في مكان..
قعد يوزع في نظره منه ع الموجودات..
لو في من يركز فيه اكثر..
حيعرف انه جاي يدور ع حد..
مش جاي يعاكس ولايكحل مانقولوا..
تنهد وهو مضايق...
وقال في نفسه..
"صدق حسين هذي طرابلس واني فيها كيف اللي يدور ع يبره في عرم قش"
حط ايديه في جيوب البالطو..
وقرر يمشي...
بس تراجع في اخر لحظه..
لما حس بشعور غريب اجتاح قلبه..
وخلاه يدق بقوة..
عبد القيوم وهو مستغرب بشده:بسم الله الرحمن الرحيم.!
وقف في مكانه..
وحول ايديه من جيوبه..
ورجع يدور بعيونه مرة تانيه..
وقلبه ماباش يهدا..
مرر نظره..
من اليمين وهو يدور بين الوجوه إلى اليسار...
بس مهناش هي مهناش..مش موجوده بيناتهم....
شويه...
لف وجهه جهة اليسار...
وهو يسمع في نبضاته قلبه واحساسه يزيد يقوى..
التفت...
التفت...والدنيا لفت بسرعه...بعدين وقفت...
وقفت..
ووقف  الوقت..
ووجوه الناس اختفت وجودهم....
اختفت الأصوات...الألوان...
كل شي اختفي...
ماعداها...ماعداها هي..
والمقعد اللي مقعمزة عليه والقطوسه اللي جايه عند رجلها وهي تعطي فيها من سندويتش الطابونه اللي كانت كانت تاكل منه..
كانت لابسه بالطوا مسكر وفيه حزام من النص لونه بني فاتح لتحت الركبه..
تحته سروال جينز ازرق غامق..
ع وشاح لابساته بطريقة الشاربه..بني وفيه خطوط سود مع شنطه سودا صغيره..
ودوسيه وردي محطوط جنبها فيه شيتاتها ومذكراتها..
ووجها نظيف تماما مافيش ذرة مكياج...
طوبى:هي خودي هادي...ماخلتنيش ناكل معاك حاجه..
"بيبو"
قامت راسها وابتسمت لما شافت صاحباتها جايات..
ووصلوا فيها وقفوا عليها..
:هي نمشوا..
طوبى:شويه بس..
ومشت بعيد شويه..حطت فضت من الطابونه الدجاج..
وبشبشت للقطوسه تجي..
وفيسع جت وبدت تاكل..
بعدين ولت لصاحباتها وقال:ساعتين بنقروا راهو..
:ايه زي ماتفاهمنا..
خدت كيسه وحطت فيها الخبزة ولفتها ..
بعدين خدت شيشة الميه وغسلت ايديها بيها..
بعدين طلعت كلينكس ومسحتهم وحداها صاحباتها يهدرزوا..
كملت وقالت:هيا بنات..
وخدت شنطتها والدوسيه متاعها..
ومشوا مع بعضهم وهما يهدرزوا لين خشوا داخل..
🍃خشت داخل..
وخلاته واقف في مكانه..
جامد من غير مايتحرك..
والف شعور في شعور حاسهم في لحظه..
متشابكات...متصارعات كل شعور فيهم يحاول يطغى ع التاني..
صدمه..ع فرحه..ع شوق..ع انبهار...ع عدم استيعاب..
ع عشق...ثارت براكينه الخامده وثورتها كانت عظيمه....

#اهرجو_يناير
#طوبى

....يتبع....

اسفه جدا جدا جدا ع التأخير .