طوبى الجزء الاول

تابع

# طوبى "شارع القهوة"
#جمان_فريد
#الجزء_الثامن_والعشرين" قبل العاصفه الأخير"
الله أكبر..الله أكبر..لاإله إلا الله
الله أكبر الله أكبر ولله الحمد...
أحيوا سنة التبكير في هذه العشر المباركه..
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
خشت للحوش بعد مافتحلها نضال..
سلموا ع بعض وهدرزوا شويه وهو شاف ولد خوه ولعبه بعدين طلع وهي خشت داخل..
قعدت تمشي لين وصلت في الصاله..
كانوا فيها خديجه ومغليه يهدرزوا..
خشت وقالت؛السلام عليكم..
مغليه وهي مبتسمه؛مرحبتين مرحبتين..
جتها نجاه سلمت عليها وعطتها حمزة..
بعدين جت لخديجه وسلمت عليها وقعمزت جنبها..
نجاة؛شن حالكم..
الزوز بأصوات متقطعه؛الحمد لله..
خديجه برفعة حاجب:خيرك غطستي بعد حفله السبوع؟
نجاة؛ميزو سلامته تعبني هلبه والجو زي ماتشوفي بدي يصقع خفت نطلع بيه يمرض..
مغليه؛عندك حق..
خديجه؛مش قاعده معاك اختك؟
نجاة؛صابرين على شن بتلحق لتحلق قرايتها ولاخدمتها ولاالحوش ولاحمزة هلبه عليها..اليوم مشت بتقعد عند اختي مروة..
مغليه:وعزوزتك معاش مشيتولها ولاجتكم..
نجاة:لامشينا من الصبح روحنا بعد العشي..
مغليه؛شن تقول ع السبوع؟
نجاة؛مابتش تجيب سيرته بكل ولااني تكلمت عليه خفت تحذف كلمه هكي ولاهكي..
مغليه؛احسن..
ع خشة عائشه وفي يدها سدرة؛السلام عليكم.
خديجه:وعليكم السلام..نزليها خليها تجري..
نزلتها عائشه..
خديجه؛تعالي سدو ياعيوني..
ومشتلها البنت تجري تحبها هلبه وواخده عليها..
خدت خديجه وقعمزتها في حجرها...
سلمت عليهم عائشه كلهم بعدين مشت قعمزت حدا عزوزتها..
عائشه:شن حالكم خديجه ونجاة؟
الزوز باصوات متقطعه:الحمد لله..
نجاة:شن حالك انتي..
عائشه:الحمد لله..
خديجه لنجاة؛غريبه كيف طلقك طاهر بروحك!
نجاة؛ماهو اليوم عنده خدمه هلبه وبيروح متأخر مش حيقدر يجيبني هني بري في سيارتك..
خديجه؛اهاا...
نجاه ملاحظه ان خديجه تتهكم بس تجاهلت تهكمها وقعدت تهدرز عادي وكأنها مش فاهمه شي..
مغليه؛شن حال خالتك عويشه؟
عائشه؛والله تاعبه بكل ياعمتي ان شاء الله خير وخلاص..
مغليه؛لاحول ولاقوة الا بالله ربي يشفيها مسكينه وتعيد مع عويلتها..
عائشه:آمين..
نجاة؛بالله بنسألكم..جارتكم سدرة هي اللي ماسكه المطحن متاعهم..
كلهم قالوا:ايه..
نجاة:بجديات اني معجبه بيها وبشخصيتها..
مغليه؛مسكينه انجبرت تكون هكي بعد ماخوها هج وخلاهم..
نجاة بإستغراب:خوها؟
مغليه:ايه لطفي الواعر عنده راس ولد البكري هو والمهدي نداد وزمان كانوا صحاب..الولد كان يبي يطلع برا البلاد مايبيش يقعد فيها وامه الله يرحمها وبوه مابوش وهو سكر راسه ومشي وخلاهم امه مسكينه ماتحملتش فراقه توفت..
نجاة:قداش ليه برا؟
خديجه؛ممكن فوق 15سنه.
نجاة:اها..
مغليه؛وسدرة خدت مكانه ومكان امها في نفس الوقت قامت مع بوها الحمل وربت وخياتها..
نجاة:عندي الحق ننعجب بيها..جميله وشخصيتها قويه ولو ولت ام حتكون ام كويسه..
مغليه:ع قد ماجوها خطابه كانت ترفض ع خاطرها خواتها..لين كبروا شويه..انخطبت وانقرت فاتحتها مفروض توا توتي لعرسها لكن الله غالب..
نجاة:الحق...خالاتي شافوها في السبوع عجبتهم هلبه وفكروا فيها لولد خالي..هو مطلق وعنده بنيه قاعده مع ماليه وليه سنين قاعد غير من زواج مش لأنه مايبيش لا بس مالقاش وحده مناسبه وهما شافوا انها تناسبه حتى من ناحية العمر..
عائشه:مااعتقدش سدرة توافق اللي يفتح معاها موضوع الزواج تسكره..
مغليه؛خل نجربوا حني ونشوفوا بالك يصير نصيب..خلاص نجيوه اني تونكلم عمتها وهي تشوفها..
نجاة بإبتسامه:ان شاء الله خير..
☘☘☘☘☘
"لالا اني مش متاع عواله الحق لانظف بطن لانعصد بازين بش نفتلك في السلايط"
"قصدك ماتعرفي ديري شي"
غرفه؛خواتي مسميني البايره ويقولوا مابعد الراجل اللي بياخدك يموت بالشر..
ضحك وقال..
"عادي تتعلمي عنده بعدين"
غرفه:مسكين ياما يتحمل بياكل المحروق والمالح والشايط ياقعاده مكمل فلوسه في ماكلة المطاعم"
"عاد يطيب هو لين هي تتعلم"
ضحكت غرفه مجامله وهي تقول في نفسها"مايبيش يفهم"
"عندك علم نعرف نطيب حتى العصبان ندير فيه..وين نطلع مع الولاد زردة يعتمدوا عليا اني في حكاية الماكله"
غرفه"مااتفاجئتش والله":شن تعرف دير تاني؟.
" مكرونه بجميع انواعها..رز جاري مبوخ بلاو..كسكسي رشده بأنواعها حتى هي"
غرفه:حي العار اني باالله نقلي دحيه..
ضحك وقال..
"تتعلمي تتعلمي..ميسم معليشي بنسكر توا نشوف الزباين وفي الليل نهدرزوا.."
غرفه؛تمام باي..
وماراجتاش يرد عليها طول سكرت..
قلبت عيونها بنفاد صبر بعدين قالت:كيف بنفتك منه هدا!
"زبطتك تكلمي في واحد"
غرفه؛انتي سوسة السوسات..
سكرت طوبى الباب وقالت:حي عليك من سدرة كان تعرف..
غرفه:ومن بيقوللها انتي..
طوبى برفعة حاجب:مرات..
غرفه؛من غير جو زايد طوبى..
طوبى قعمزت وقالت؛باهي منو هدا يقرا معاك؟.
غرفه:تؤ..واحد وخلاص..
طوبى:متأكده انه جدي معاك مايلعبش..
ضحكت غرفه ضحكة طويله بعدين ناضت ومشت فتحاته وطلعت وهي تقول:الله عليك طوبى وخلاص..
وطوبى تشبحلها بقلق وهي تقول؛تبي تنسى حسين..
☘☘☘☘☘
الساعه 9:00ليلا..
خش لطفي عليهم وهما في دار المعيشه قال:بوي قال يبي الفطور في حوشه غدوة..
مطيرة:اياااه معناها ناوي يذب.ح غدوة..
لطفي؛ايه اللي بيصدقه عن امي..واني بنذب.ح وبنصدق عن وردة..
كلهم قالوا:الله يرحمهم..
لطفي؛شن العشي واتي..
سدرة؛نوضي غرفه حطي العشي..
ناضت بدون ماتعلق ومشت طلعت من حداهم..
وهو مشي لداره..
☘وتعدي الساعات..
ويجي وقت السحور...
واغلب الناس عاشت اجواء رمضان هديكا الليله...
الحاج علي بعد صلى الفجر..
خلا التلفزيون قناة سعوديه واتكى حداه وقعد يتفرج ع الحجاج وهو يردد في التلبيه معاهم لين خداه النوم...
وتاني يوم..
اللي كان احلى ايام السنه واعظمها روحانيه...
ناضوا صفيه ومطيره وقعدوا يدوروا ع المربوعه ع خاطر صحاب حسين وصحاب بيجوا يفطروا عندهم..
صفيه:وصلت بيناتهم للشيطان الرجيم وحزها عمي في الاخير وقال:كل شي عليا انت اطلع منها ومادخلك بشي.
مطيرة:هو مايبيش يصرف هو حر لكن توصل بيه يدخل حتى فالولاد لاهلبه هكي.
صفيه:سامحيني يامطيرة بس خوك مريض رسمي هو مايبيش يصرف ومايبيش غيره يصرف..ديما نازل في لطفي علاش ياخد في هادي علاش ياخد فيه شن يدير بيها الصيانه يديرها..علاش ياخد لبنته سيارة..
مطيره:لارسمي ولى مرض هدا..
صفيه بضيق:مش طالعلكم بكل ماتقولش خوكم ولاتقول الحاج علي بوه...
مطيره:جداي رحمة الله عليها رباته وهديكا كانت جلده مايطلع منها شي وهو خدي طباعها..
تنهدت صفيه وقالت:الله يرحمها وخلاص مانقدر نقول شي تاني..
☘وكملوا ضمان ع الساعه 11..
وناضت سدرة...توضت وصلت الضحى..
بعدين خشت معاهم الكوجينه..
وبدوا يوتوا في الفطور..
وقبل الظهر بربع ساعه..
ناضت اميمه ونوضت طوبى..وحاولت في غرفه بس هديكا قعدت حاضنه مخدتها وغارقه في النوم..
آذن الظهر...
الشباب وعمهم وجدهم توكلوا للجامع..
وعبد المطلب كسل وصلى في الحوش..
اما النساوين صلوا مع بعض ماعدا غرفه..
بعد الصلاة..
ولو مطيرة وسدرة وصفيه للكوجينه..
واميمه وطوبى قعمزوا يقروا قرآن...
وصوت التلبيه مازال مسموع في الحوش كله..
☘زي ماصاير في حوش شنيبه..
هالمرة نجاة وعائشه تعانوا مع بعض في تجهيز وجبة الفطور..
ومغليه مسكرة ع روحها الدار تقرا في القرآن...
في الكوجينه..
كانت عائشه تردد في الذكر هلبه...
واغلبه كان تاج الذكر
"لاإله إلا الله وحده لاشريك له له الملك وله الحمد وهو على كل شي قدير"
افضل ذكر ينقال يوم عرفه..
اما نجاة فكانت تشتغل وهي تفكر كيف بتلعب لعبتها مع عائشه...
وين الناس اللي غارتها الدنيا..
للناس اللي تفكر فيها وفالاخره..
اللي اغتنموا الساعات بين الظهر والعصر وقعدوا يدعوا من قلوبهم وكأنهم واقفين ع جبل عرفة..
والله سبحانه نازل للسماء الدنيا نزول يليق به..قريب هلبه هلبه..ويسمع في الدعوات والمسائل...
دعوات اميمه بأن ربي يوصلها للي تبيه..ولوكان في عمر خيره ليها يجعله من نصيبه..
دعوات سدرة..
بالرحمه لأمها..وبالحفظ لأختها طوبى اللي كانت خايفه عليها خوف كبير...
وطوبى..
دعتلهم كلهم...وكالعاده تنسى في نفسها بدون ماتحس..
☘☘☘☘
قبل المغرب بلحظات...
حسين:هي بسرعه هاتي..
مدت سدرة السفره وقالت:هاك هي..
خداها ومشي طول..
ع جية يوسف بعده:العصير ياعيله..
طلعت اميمه السفره وقالت:اهوا..
خدي السفره ومشي طول..
مطيره:هي تعالوا انتم المغرب ع وشك..
ومشت..
وهما طلعوا وراها..
☘في حوش شنيبه..
"بسرعه يانجاة المغرب خلاص"
نجاة وهي طالعه بالسفره:اهو جيت عمتي..
وهي طالعه يفوت الجالي بسرعه قريب ناش السفره طيحها.
هي طلعت منها عيطه..
وهو شبحلها بحده..
نجاة بفجعه؛قريب طاحت!
هو فات بدون مايعبرها..
وهي قعدت تشوفله بشماته وقالت:علامات الضرب قاعده ع وجهه..
"نجاة خيرك عيطتي"
نجاه:فاتت من قدامي حاجه حسبتها زقرولو..
ومشت للصاله وخشتلها بالسفرة..
☘☘☘☘☘
ذب.حوا علي وولده ضحايا الصدقه...
فرقوا منها ع الجيران والباقي خلوه ليهم داروه شوا...
سدرة:سكرت راسها وقالت عشاي بنديره في حوشي مع بناتي..بعد الفطور تو نجوكم نباتوا عندكم..
صفيه؛بقولي كان تتزوج خيرلها مش قعادها بروحها هي وبناتها..
مطيرة:الله ينور عليك ياصفيه وهدا اللي نفكر فيه..
سدرة؛ومن واصل فيها هي وبناتها؟
مطيره؛ماوصلوش فيها توا يوصلوا فيها بعدين ياسدرة اني مارحمونيش من لساناتهم يابال هي مراة صغيره وعندها بنات!
سدرة؛طز فيهم الناس كان الواحد بيدير لكلامهم راس مال معاش يعيش بكل..
صفيه:يابنتي خليك في الواقع صعب عليها تقعد هكي..راهو مراة صغيره.
سدرة؛كلامكم مش خاشلي راس معليشي معاش تناقشوني.
وقعدت تاكل بعصبيه..
وهما يشبحولها بإستياء..
شويه ناضت وقالت: خل بنروح الحوش ندوش ونجي بعدين..
ومشت طلعت من حداهم..
صفيه؛خيرها حمقت هكي..
مطيره:مسها حتى هي الكلام ..
صفيه؛بس حني ندووا لمصلحه..
مطيره بحسرة:صح..بس يقعد كلام واعر مايحس بيه كان يمسه..
☘☘☘☘☘
خشت سدرة لحوشهم اللي كان فاضي..
سمعت صوت التليفون الأرضي يرن..
استغربت..
ومشي بإتجاه المربوعه..
وصلت فيه..رفعت السماعه وردت..
سدرة؛آلو..
مافيش رد..
سدرة؛ايوه...من يتكلم..
لارد..
سدرة:استغفر الله العظيم..
ووين جت بتسكر..
"سدرة"
كل شي فيها حساته وقف حتى قلبها ماحست بنبضه..
عيونها جحظوا..
وتعبوا بالدموع...وفمها بدي يرجف..
"سدرة ردي"
رجعت لوعيها وقالت بحده:من معاي
"عارفه من معاك كويس ياسدرة"
سدرة:لا مش عارفه ومانبيش نعرف..
"واني مانبي شي غير نعرف شن اخباركم شن دايرين.."
سدرة؛بصفتك منو..
"سدرة ارجوك مش ناقص والله ماناقص..سادني اللي فيا"
سدرة:مالاناش علاقه بيك ولاانت ليك علاقه بينا لازم تعرفي ان لطفي الواعر عنده اربعه بنات ماجابش غيرهم"
كان صوته باين فيه التعب ونبرته باكيه قاللها..
"باهي باهي..اني بس نبي نعرف انتم كويسين ولالا"
سدرة:مادام انت بعيد حني في احسن حال...
وسكرت الخط في وجهه...
"سدرة"
انفجعت..وطول فصلت خيط التليفون من الضي..
ومشت بسرعه وطلعت من المربوعه وهي تمسح في دموعها بقوة وتقول:نعم بوي..
لطفي:وين كنتي..
سدرة خدت نفس وقالت بشي من الربكه:في المربوعه كنت نكلم في مدرسه معاي..ماهو تليفوني مافيشي شحن..
هو هز راسه وقال:باهي خشي حدديلي البدله العربيه وعلقيها في الدار..
سدرة؛حاضر..
ومشت من حداه...
خشت للدار..
وهو مشي بيولي لحوش بوه..
تلاقى هو وطوبى جاية تجري. وفيدها تليفون يرن..
وقفها وقال؛خيرك تجري؟
طوبى:تليفون سدرة نساته غادي صاحبتها تتصل..شويه بوي قبل يفصل..
ومشت بسرعه خشت للحوش..
وهو قعد في مكانه واقف يفكر..
《 في المربوعه كنت نكلم في مدرسه معاي..ماهو تليفوني مافيشي شحن..》
غير عيونه عن باب حوشه بعدين كمل طريفه وهو مازال يفكر..
🌻🌻🌻🌻🌻
الساعه 11:00ليلا..
مقعمزات في وسط الحوش يهدرزوا..
ماعدا مطيرة وفايزة اللي كانوا في الكوجينه..
فايزة؛عمتي سوا اياد ولاغيره اني موضوع الزواج لاغياته من راسي نبي نعيشي لبناتي وبس امانة احمد في رقبتي..
مطيرة؛الحياة مش ساهله ع ارمله عندها بنات يافايزة..
فايزة ودموعها في عيونها:الحياة ورتني وجها البشع ليها وقت ياعمتي مش حيمر عليا اسوأ من اللي عدى..واللي يقول الارمله ماتقدرش تكمل حياتها من غير راجل حنخليه يشوف العكس..
تنهدت وقالت:باهي وبناتك.؟
فايزة:بناتي مش حندخل عليهم راجل غريب مهما كان كويس حنربيهم ونعلمهم ونكبرهم ونزوجهم لأحسن رجاله رجاله يكونوا زي بوهم بالزبط..
ابتسمت ومطيرة وقالت:تبي الحق عجبتيني..ربي يكون معاك ويقويك..
فايزة وهي تمسح في دموعها قالت بإبتسامه:يارب...
مطيره:هي تعالوا نطلعوا قبل لتجيني صاحبتك تاكلني..
ضحكت فايزة ومشت طلعت ومطيره معاها..
مشوا قعمزوا وسط الحوش..
كلهم كانوا يهدرزوا..بس سدرة مش معاهم بكل تشبح في الفراغ وسرحانه ..
ركزت عليها طوبى وقعدت تشبحلها..
بعدين شبحت لفايزة راجتها لين تشبحلها.
وين شافتلها فايزة..اشرتلها طوبى بعيونها لسدرة..
هي شبحتلها ولاحظت حالتها..بعدين قربتلها وقالت:سديرة..
سدرة ماردتش...
فايزة:اهوو..سدرة..
شبحتلها وقالت:اممم..
فايزة:خيرك سرحانه وساكته في حاجه؟
سدرة حركت راسها بالنفي وقالت:لا...شن صار مع عمتي..
فايزة:حاولت فيا ع الفاضي..
سدرة:قلتلها ..
فايزة؛باهي ماتغيريش الموضوع واضح فيك شي سدرة..
سدرة:شن بيكون فيا يافايزة! غير شكله الصيام تعبني..بنتكى حداكم شويه..
ومشي رقدت ع المندار وعطتهم بالظهر..
فايزة قعدت تشبحلها شويه بعدين شبحت لطوبى..
وطوبى تشوفلها بقلق ...
☘وعدت هديكا الليله ع سدرة وهي تبكي..
كل ماتتفكر نبرة صوته وطريقة كلامه يوجعها قلبها..
لكن لايمكن تتوجع عليه اكثر من وجعها ع امها اللي قاعد موتها قاهرها لهاللحظه...
وبعد هالليله..
جي يوم العيد..
اجوائه نستها شويه..وانسجمت مع اجوائه وولت زي ماكانت..
☘اما في حوش شنيبه..
فكان الجو حلو ومشي اليوم بدون مايكون فيه اي منغص..
حتى ان الجالي وطاهر تبادلوا مع بعض اطراف الحديث..
وهالشي فرح طاهر هلبه..
بس مازال حقد نجاة قائم عليه..
🍃في شقتهم...
نجاة؛وانت علاش فرحان هكي تقول والديك؟
طاهر بإستغراب:كيف انتي مش عاجبك اللي ولينا لبعض ولاكيف!؟
نجاة خافت واداركت نفسها:لامش قصدي ياطاهر..بس حتى لو كان خوك لازم يفهم انك انت الكبير وهو اللي مفروض يدور رضاك مش انت..
قعد يشبحلها شويه بعدين غير عيونه عنها وقعد يغير في حوايجه..
وهي مشت لولدها تغيرله ومرة مرة تشوفله وهي عارفاته يفكر في كلامها..
☘☘☘☘☘☘
"روجه شوفي"
جت اريج لأختها وشافت شن عندها..
اريج؛شنو هادي؟
الاء وهي رافعه حاجبها؛سلسال..
اريج:سلسله من غير تجعوين..
الاء:المهم باعته هداكا شكله..
اريج؛قصدك وليد؟.
الاء؛امم شكله حطه في شنطتي لما خليتها داخل..
اريج:وشن بديرلها؟
الاء:تو يشوف شن نديرلها..غير يفوت غدوة.
وفاتت هالليله..وجي غدوة ياآلاء وكانت لازم تاخد استشارة خالتها...
~~~~~~~~
طوبى:رديه مع وحده من خواته..
الاء:اني بنرده اكيد بس نبي نرد بطريقه قويه.
اريج بفضول:شن في بالك؟
الاء بضحكه:فلونه..
اريج بضحكه:لاحرام عليك للوش البنيه عاجبها بجديات..
الاء:تي عادي مقلب ع خفيف..
طوبى:فكرتيني بوحده نعرفها..
شبحولها هما الزوز..
طوبى:ديري اللي بديريه لكن حطي في بالك تو يجي من يرده بعدين..
الاء:ع قولت خالتو روفي..تفلفيس..
ضربتها طوبى بالشنطه ع راسها وهي تقول:عليك وعلى روفي متاعك..
واريج تضحك ع منظر اختها وهي تتحسس في راسها..
🍀وفعلا..
دارت الاء مافي راسها..وعطت السلسله لبنت عمتها ع اساس انه من وليد اللي كانت معجبه بيه وهو مايندريش عليها..
وتلاقوا مرة في حوش العيله وشاف عليها السلسال وهي طول جاته تشكر فيه وعيونها يلمعوا بالفرح..
جاته صدمه من حركة آلاء..وماتوقعهاش تكون لئيمه ومتكبرة لهالدرجه...
☘ومعذرة لصاحب المثل الشهير وان نقلناه بتصرف...
من شابهت خالتها ماظلمت..
🌻في نفس مكان اللقاء..
في كلية العلوم..
غرفه وهي ترد في سندويتش الشاورما ع مبروك؛لالا مانبيش اني الفترة هادي قاعده نقص عقدوني خواتي وهما يقولوا سمينه وسمنتي..
هو نزل يده وقال:بالعكس جسمك كويس مانشوفش فيك سمينه..
غرفه في نفسها"كانك تشوف راك شفت لروحك":مش عارفه اني مش راضيه عليه الحق ونبي نقص..
هو توا بس حس بشي ضايقه..لكن حسن نيته وظن الحسن في غرفه ماخلوشي يلاحظ انها قاعده تلقح عليه..
شويه ضحك وقال:فوتي ومعاش تعدلي ع حد ماتخلي شي في خاطرك ع كلام الناس..هدا اللي ماشي بيه اني..
ومكمل ضحك وهو ياكل في الشاورما..
غرفه غيرت عيونها وشبحت للطريق وهي تقول في نفسها..
"شن اللوح البارد هدا ياربي مافيش طريقه نخلص بيها منه"
بلع مبروك وقال:ميسم..
شبحله وقالت:امم..
مبروك وهو يشوف للطريق:شن رايك فيا؟
غرفه فاجئها السؤال وعطلت في الرد..
شبحلها وقال:امم..شن رايك؟
غرفه:كويس..يعني انت واحد كويس..
مبروك:وشن تاني..
غرفه:وطيب..
مبروك ابتسم وقال:وشن تاني؟
غرفه بضحكه:خيرك.!؟
مبروك:غير بجديات شن رايك فيا..يعني اني لو فكرت نخطب تقولي يابختها ولامابعدها..
غرفه وهي تفنص:مابعدها.
هو ضحك وقال:جديات علاش!؟
هي قالت:لانبصر عليك..انت كويس زي ماقتلك واللي تبي تخطبها اكيد محظوظه بس ماتنساش تعرفني عليها..
هو ابتسم وقال في نفسه"شكلها غارت"
غرفه"يارب يطلع يقصد غير مش اني يارب"
مبروك وهو مبتسم:تو يجي وقتها ونعرفك عليها..
هي ابتسمت مجامله وشبحت للطريق..
وهو شبحلها وقال في نفسه"ااه لو تعرفي قداش نحبك"
مبروك؛ميسومه.
شبحتله وهي مش طايقه روحها قالت بإبتسامة مجامله:امم
مبروك:ملاحظه ان اسمي واسمك يبدوا بنفس الحرف..
هزت راسها وهي مبتسمه بالغصب ونقول:امم صح..
هو حط يده في جيب جاكيته وطلع سلسله في حرفين M لاصقات في بعض وكانت ذهب..
غرفه لما شافتها انذهلت وقالت:تهبل..
هو شبحلها بنظرات كلها حب وقال؛نحبك..
هي عيونها قريب طلعوا من الصدمه ماتوقعتش يجيبهالها هكي..
مبروك:ونبي نخطبك..تعرفي ان عندي شقة واتيه فوق حوش اماليا وماناقصني شي والحق ياربي انتي وليتي معاي وين مانمشي مش قادر نحولك من تفكيري اقسم بالله حتى النوم..النوم..والله معاد قادر نرقده..
غرفه"حي ع نهارك الاحرف ياغرفه كيف بديري توا":صدمتني الصراحه صدمتني هلبه..
مبروك ضحك وقال:عارف..وقلبي يقولي هكي احساسي انك تبادلي فيا نفس الشعور غير متحشمه تقولي..المهم..ماتخافيش ع قرايتك وعد مني وربي شاهد عليا نساعدك تكمليها..مانيش مانعك من شي اي حاجه تبيها وخاطرك فيها مش حنقولك عليها لا..خدمه اخدمي سواقه سوقي تبي تواصلي صاحباتك عادي..وعد مني ندللك دلال نتحدا راجل في الدنيا يدللة لمراة ياميسم انت بس قولي باهي..
غرفه"حي عليا حي كيف ندير!؟":نقولك عطيني وقت نفكير ونرد عليك..
هو قعد يشبحلها بصمت..
وهي تشوفله ومن داخل خايفه..
شويه ابتسم وقال:تمام خودي وقتك تمام...عارفك في الاخير شن حتقولي..بس عادي تغلي ودلعي ياستي..وقعد يضحك..
وهي تشوفله وهدا وين حست روحها طاحت في ورطه..
☘☘☘☘☘
الساعه 5:00عصرا
واقف قدام المطحن متاعه يتفرج ع مطحن جيرانهم كيف يغيروا في اللافته متاعهم..
من مطحن جنه للقهوة...
ل..مطحن جنه للقهوة بجميع انواعها والمكسرات ..
غير عيونه عن اللافته وشاف مديرة المطحن كيف واقفه بين جدها وبوها ومعاهم خوها وجارهم الدكتور غريمه..
شويه شافها تكلم فيه..وهو يرد عليها ويأشر ع اللافته..
بعدين شافهم ضحكوا..ولطفي طبطب ع ظهر اياد وهو يضحك..
اللي يخدموا عنده في المطحن كانوا مركزين معاه..
هو معاش تحمل يشوف اكثر من هكي..
مشي طول من قدام المطحن...
وخش للحوش..
ومشي بش يركب لداره ويقعد فيها شويه لين يهدا..
وين فات من قدام الصاله سمع حديث لأمه مع نجاة مرت خوه..
وكان يحساب هما بس الموجودات في الصاله...
مغليه: عمتها قالت...سدرة رافضه ماتبيش بكل..
نجاة:علاش باهي يعني بتقعد عمرها كله هكي!
مغليه:والله هي حرة كل شي بالسيف يابنتي الا الزواج..
نجاة:ايه عارفه بس نبي سبب مقنع نقولهولهم الراجل كلموه وعجبه الموضوع وكان يبي يشوف سدرة..
مغليه؛الله غالب يابنتي مافيش نصيب..
نجاة تنهدت بعدين قالت؛باهي شن رايك نحاول معاها اني؟
عائشه اللي كانت مقعمزة بحداهم وتسمع بصمت تكلمت وقالت بتساؤل:انتي!؟
نجاه:ايه ونبيك تمشي معاه وتحاول تقنعيها..
مغليه شبحت لعائشه وقالت:خلاص بري معاها مرات ربي كاتب نصيب صاحبتك ع يدك..
نجاة:هيا عويشه تكسبي اجر الراجل وبنته...
عائشه وافقت ع مضض وقالت؛باهي..راجي نركب نلبس جلابيتي..
وهي ناضت من هني...
ويخش المهدي من هني وهو في قمة الغضب والغيره قال لمرته:قعمزي لوطا..
هي انصدمت..
وامه ونجاه انخلعوا..
غير عيونه لنجاة وقال:ياريت يامرت خوي معاش تخشي في مواضيع ماليكش بيها علاقه من يتزوج من يطلق هادي امور ماتخصكش الهي في راجلك وولدك بس...
مغليه بصدمه؛مهدي!
المهدي قعد يشبح لامه وعيونه تقدح شرار من الغضب..
بعدين غيرهم عنها ومشي طلع من الصاله بسرعه..
والغضب مسيطر عليه تماما ولاغي عقله..
طلع من الحوش بكل وكان في نفسه حالف لو شاف اياد مازال واقف معاهم بيمشي طول يفش غله فيه..
طلع..
ومالقي حد..بش شافها هي واقفه في المطحن وتشوف في كيس قهوة وتشم فيه..
سدرة؛مش عاديه..خليها عندي نجربها في الحوش..
العامل بإبتسامه؛تم ياأبله..
سدرة؛روحوا حتى انتم بكيس كيس وشوفوا راي ماليكم وقولولي..
هما بأصوات متقطعه قالوا:بارك الله فيك..
هي غيرت عيونها لبرا المطحن..
جو عيونها ع المهدي..
كان واقف يشبحلها ونظرات كانت تعرفهم كويس...
قلبها فجأة بدي يدق بقوة لما شافاته يقص في الطريق وجاي ناحيتها...
ناضت وقفت..
وهو وصل فيها وخش للمطحن وقعد يوزع في نظره عليه وهو يحاول يهدي في نفسه وقال:مبارك التطورات..ومبارك الشريك.
وشبحلها وهو مبتسم ع جنب تهكما..
سدرة بإستغراب؛ع التطورات الله يبارك فيك..لكن الشريك هدا شن موضوعه.
اشر ع نفسه وقال ساخرا؛تسألي فيا اني!
سدرة؛ايه لأني مانيش عارفه ع شن تدوي..
هز راسه وقال:اها..تمام تو نقربلك الدكتور اياد..
عقدت حواجبها وقالت؛مطحن الواعر للواعر وولاده مافيش ليهم شريك ولاحيكون..
المهدي؛معناها هو بيغير الكار متاعه!
سدرة شبحتله شويه..بعدين مشت خشت داخل وهو يشوفلها وقلبه والعه فيه نار مابت تخمد..
شويه وطلعت عليه وعطاته كيسه فيها انواع القهوة اللي هما داروها ومدتهاله وقالت؛جربوها وعطونا رايكم..
هو قعد يشبحلها..
واللي يخدموا في المطاحن الزوز يتفرجوا ع اللي قاعد يصير..
المهدي مد يده وخدي منها الكيسه..بعدين هز راسه وقال:حاضر..
ومشي طلع من المطحن..
وهي واقفه تشوفله بغضب..
وهو وصل للمطحن وخشله وبدي يهزب في العمال متاعين مطحنهم ومش مهتم للزباين اللي جو يشروا..
قعمز ع الكرسي وحط الكيسه وقعد يشبح جيهتها..
شافها طالعه من المطحن وماشيه لحوشهم..
وعيون عائشه االي كانت واقفه ع روشن دارها تشوفلها..
ودموعها ينزلوا وحده ورا التانيه....
☘بعد مرور ساعات...
عند الساعه 10:10ليلا..
ركب لشقته...فتح الباب وخش..
ع غير العاده ماشمش ريحة تطييب..
عقد حواجبه وهو مضايق..
سكر الباب..وحول من رجليه..وخش داخل..
كان يمشي بهدوء..بس في الحقيقه هو كان في قمة التوتر..
قعد يدور بعيونه...لمحها مقعمزة في الصاله..
تردد قبل ليخش..
بعدين حسم امره وخشلها وقال ببرود مصطنع..
المهدي؛نوضي حطيلي عشي..
عائشه قعدت تشبحله بنظرة زادت وتراته بس مابينش..
المهدي:مادرتيش عشي؟ مشكله تو نقول لنضال يجيب معاه وهو مروح..وجي بيمشي بس هي وقفاته لما قالت..
عائشه:هو هدا!مافي شي تاني تبي تتكلم عليه غير العشي؟
المهدي شبحلها وهو يقول:شن قصدك؟
عائشه ابتسمت سخرية واندهاش:وتسأل شن قصدي وكأنه ماصار شي!؟..هزت راسها وقالت..عندك حق يامهدي عندك حق..اني اللي خليتك هكي..انت اللي خليتك تقلل من قيمتي واحترامي لين ساويتهم بالوطا وعفست ع كرامتي معاهم..
اني اللي مشيتلك حاجات مافي مراة تقدر تمشيهم وخليتك توصل بيك ودير اللي درته اليوم..
اني اليوم بس يامهدي تأكدت اني ولاحاجه بالنسبه ليك مش دايرلي اعتبار حتى ع اني ام صغارك..حطتيني في احقر تنحط فيه المراة قدام اللي يسوى واللي مايسواش ومافكرتش فيا ولافي شعوري بكل..همك كلها مشاعرك انت وبس..
اشرت عليه وقالت ودموعها ينزلوا...طول السنين هادي انت عايش معاي بعذاب الضمير قاعده ع ظهرك ذنب تحاول تكفره ع قد ماتقدر..بسببك انت اني درت حاجات في حياتي ماتوقعت نديرهم..بسببك قهرت صاحبة عمري وبكيتها بش نحافظ وياريتك غير تستاهل..انت يامهدي توا حاط في رقبتك ذنبي وذنب سدرة اللي درته فينا قتل فينا هلبه حاجات من داخل معاش ترجع تعيش خلاص..
بنبرة باكيه وحازمه كملت تقول...اني وياك مفروض من زمان متفارقين يامهدي..بس يقولوا..ان تصل متأخرا خيرا من الاتصل ابدا..واني حنتحدى بوي وخوتي والناس كلها وحنقولك..نبي الطلاق يامهدي..ومش حتنتنازل عنه لو نموت يامهدي..
وناضت ومشت بتطلع وين وصلت فيه خبطت كتفها بكتفه بقوة ومشت من حداه وهي تبكي..
هو غمض عيونه بتعب..
بعدين فتحهم ومشي قعمز ع الصالون..واتكي ع مسند بظهره وقعد يشبح في الفراغ وهو يفكر..
وهي قعدت تلم في حوايجها وحوايج بنتها..
وبعد ماكملت لبست الجلابيه والشاربه
وجت لسدرة..قامتها ورفعتها في غمرها..
ورفعت شنطتها ومشت طلعتله..
خشت عليه وقالت؛نوض ارفعني لحوش ماليا..
المهدي:عايشه...
قاطعاته وهي تقول بنفاد صبر؛نوض ...
هو ناض وقال؛بترفعي معاك البنت.
عائشه:بنتي ماتقعدش بعيده عليا والولاد يعرفوا حوش جدهم..
ومشت...لحقها...
نزلت الشنطه وحطتها حدا الباب وفتحاته..
لما رجعت بترفعها هو جي بيقيمها..
جبدتها منه بقوة..
المهدي:ثقيل عليك..
طلعت وهي تقول...
"تحملت ماأثقل"
سكت ومعاش قدر يتكلم..
ماعنده مايقول..
طلع وسكر الباب..
وقعد ينزل وراها وضمير مش مريحه من تأنيب والوجع..
لأنه الجاني الوحيد عليها...
وياريتها كانت جناية وحده بل اكثر من جنايه..
طلعوا من الحوش...
بدون مايشوفوهم الولاد اللي كان يلعبوا ع بلاستيشن متاع عمهم في حوش جدهم...
بس شافتهم جدتهم مغليه..
تنهدت بضيق وقالت؛ان شاء الله ربي يسامحنا ويسامحك ياولدي..
☘بعد ركبوا السيارة..
توجه بيها لحوش بوها وهي طول الطريق تبكي بصمت وتمسح في دموعها..
وصل لحوش بوها درس قدامه ونزلوا..
هي خشت داخل ببنتها والشنطه اللي لما شافوها بوها وخوتها قريب طار عقلهم..
جويده:غير شن صاير ياولدي فهمني!
المهدي:مشاكل عاديه بين مراة وراجلها..اسمع ياحاج وولادك يسمعوا..مانبي حد يمد يده عليها ولايقربها شن ماقالت شن ماسمعتوا منها..قسما بالمولى نسمع بيها مضروبه ولاصايره فيها حاجه نحبسكم كلكم وتعرفوني نديرها..
واحد من خوتها قال:باهي من حقنا نعرفوا شن صار!
المهدي:لا مش من حقكم ولاحق اي حد يخش بيني وبين مرتي...وهاني نبهت ياحاج..
ومشي وهو يقول...تصبحوا ع خير..
طلع من الحوش..
وهما مشوا طول خشوا لعائشه بيفهموا منها شن صاير..
لقوها حابسه روحها في دارها حتى امها ماخلتهاش تخش..
حاولوا فيها بس مابتش ترد عليهم..
اضطروا يخلوها براحتها غصب عنهم..
☘☘☘☘☘
"وووك ع الموقف"
نجاة بضحكه:جتني ع الطبطاب زي مايقولوا والله ماتوقعت يصير هكي..
"حظك حلو..باهي زعمه شن بيصير توا"
نجاة؛مش عارفه..بس اكيد مش حتعدي هكي صدقيني وحيكون فيها الطلاق..واهي مرت المهدي شافت شن تقدر اديرلها نجاة المعلول..
🍀🍀🍀🍀🍀🍀
ومرت الايام...
وعائشه في حوش اهلها ماقدر حد يجي جيهتها ولايكلمها.
وامها ع قد ماحاولت فيها ماقدرت تعرف منها شي..
وولادهم المهدي فهمهم ان امهم ماشيه تغير جوها في حوش جدهم..
مشت ع يزن بس محمد لا..
لانه مشي لأمه يزور فيها لاحظ عليها اثار الحزن والبكاء بس ماتجرأش يسألها...
طلع الخبر لصاحبات عائشه..
حاولت نسرين تدخل بس المهدي منعها زي مامنع امه وبوه يخشوا فيها..
عكس خديجه اللي كان عاجبها اللي صار واساسا راسمه في عقلها مخطط تزوج بيه المهدي مرة تانيه بش تكسر خشم عائشه واللي صار سهل عليها هلبه..
فايزة لما سمعت اتصلت بعائشه وحاولت تفهم منها وعائشه مابتش تقوللها شي مشاكل عاديه وخلاص..ماتبيش حد يسمع بقصه الطلاق بش ماتصيرش محاولات اصلاح..
تبي المهدي يطلق بهدوء..
اما سدرة لما سمعت حست ان اللي صاير بيناتهم هي السبب فيه بشكل اول بآخر..
لهدا فضلت تقعد بعيد وماتبانش في الصورة نهائي...
🍀🍀🍀🍀🍀
شهر الكانون...12...سنه 2010...
قدام كافتيريا الهندسه...
مقعمزة غرفة مع صاحباتها ع وحده من الطاولات..
ويراجو في صاحبتهم تجي بالفطور..
غرفه:جعانه بنموت امس ماتعشيتش.
:انتي اللي تخسري فيه في الليل تعوضي فيه فالنهار رجيم عيني..
غرفه:بالله اسكتي نفسيتي صفر من الامتحانات خايفه خايفه..
فجأة رن تليفونها..
شافت المتصل وقالت؛ووووك عليا ياربي كيف بنخلص منه بس..
:قوليله مانبيش وخلاص..
غرفه:لصقه هدا والله يقعد وراي وراي بش نوافق عليه..
فصل وعاود..
غرفه:مش قتلكم..
☘هو كان في المحل متاعه..
مقعمز ويشوف للسلسله وكان حاس بشعور ضيق وخوف من تهرب غرفه منه..مايبيش يعترف بينه وبين نفسه انها رافضاته بس مش قادرة تقوله..
يقنع في روحه ويقول انها متحشمه وخلاص..
فصل الخط..عاود واتصل بيها للمرة الثالثه...
☘غرفه؛اووف عليك علقه..اسمعوا بنات اسكتوا ..
سكتوا صاحباتها..
وهي ردت وفتحت المايك...
هو بلهفه قال..
"ايوه ميسم وينك خيرك ماترديش ليا يومين نتصل ونبعت في رسايل وانتي ماردتيش بكل شغلتيني عليك.."
صحباتها بدت ع وجوهم ملامح الشفقه بسخريه..
وهي ترد:اسفه بس مرضت شويه اليومين اللي فاتوا..
"لاباس عليك خيرك؟"
وصاحبتها شادين ضحكتهم.
غرفه:بردة عاديه ماتخافش..
"عاينتي؟"
غرفه:ايه ايه وعطوني دوا ناخد فيه..
"اقسم بالله انشغلت عليك هلبه قريب ختشت"
غرفه:اسفه..
"لالا علاش تتأسفي..باهي انتي هكي معناها مامشتيش للجامعه"
غرفه؛جامعة شني يامبروك بس..
"ايه مزبوط عندك حق..بس من خوفي عليك نبي نشوفك ونطمن عليك"
غرفه:اطمن مبروك اني كويسه..
"ربي يزيدك من الشفي..ميسومه علاش معاش تقولي بيكو.."
هي دارت عيونها حوله وطلعت لسانها..
وصاحباتها شدوا ضحكاتهم بالزور.
غرفه وهي مش طايقه روحها:مبروك سامحني بنسكر توا الدوا اللي واخداته يرقد..
"تمام تمام..بعدين نكلمك وبالله عليك ردي"
هي شافت صاحبتهم جايه من بعيد بالفطور قالت بإبتسامه:تمام سلام..
وسكرت المايك ونست تسكر المكالمه وحطت التليفون ع الطاوله...
هو قال:استني ميسم بنقولك ع حاجه تخفف البرده..
و سكت لما سمع...
"هاتي هاتي يابنتي بنموت بالجوع"
"حي عليك يابنتي شدي لروحك راهو تولي زي فقمتك"
"فقمت عينك ياحقيرة"
"حي فاتك الجو كله توا كلمها فتحت المايك وسمعناه شن يقول"
"الله شن يقول"
"ياناري يسخف خايف عليها ومشغول مسكين وهي تقوله مريضه وعندي بردة"
"وهو زي العبيط مصدق"
"مش زي العبيط عبيط يابنتي..ولصقه وعش ودراه كبد..ع قد ماقلت ودرت مايبيش يفهم اني مانبيشي.."
"هو صدق روحه لما عطتيه وجه"
"والله كساد وجو بس وهو قلبها جد..ونحبك وبنخطبك تخيلوني متزوجاته بنات"
"OOOh Noooo"
"وك عليا كان يقعمز جنبي ع الكوشه يصيرلنا زي الزندي دحدح.."
ضحكوا صحباتها..
"تخيلي بعد ماكنتي تحلمي بحسين"
"شن جاب لجاب..شن جاب لجاب يابنتي حسين ضابط الجيش اللي كتافه معبيات نجوم..طول وعرض وهيبه..وسماحه ماريتهاش عند حد..وشخصيه يما نار يفنص فيك تموتي في مكانك..هدا الراجل اللي تتمنى الوحده تكمل حياتها معاه..مش مبروك الفقمه"
"نشهد بالله حسين ولد عمك هدا حكايه غبيه لوضيعيه من ايديك"
تنهدت وقالت..
"يصير خير...ايه سومه قوليلي شن اسمه الروج اللي دايرتيه"
نزل التليفون ببطء..بعدين شبح للشاشه ونهي المكالمه..
وقعد يشبحلها..
اللي يحس مبروك وقتها لايمكن وصفه..
صدمه.تحطم...دمار..احباط..خيبه..ألم ألم فضيع نابع من الروح..االروح كانت موجوعه...والقلب ولى حطام...
والكرامه مسحوقه تحت رجلين البنت الوحيده اللي حبها بصدق اكثر من روحه..وتمناها بنية صافيه..
كان يحسابها بروحها..غير عن الناس..
وللأسف طلعت زيها زيهم..بل احقرهم كله..
ناض ومشي طلع من المحل..
واللي يحس ليه كان عاكس عليه مشيته..
اول حد يشوفه وهو يمشي يقول هدا تعبان..وع وشك السقوط..
قعد يمشي وهو مش حاس بروحك..
وكلامها يتردد في وذانها..
ضحك صحباتها ومخسرتهم..
خلاته مهزله مايسواش نكته تضحك عليها مع صاحباتها..
يااه ع الاحساس بالاهانه...ينخر الروح نخر..
وبعد طول مسافه مشاها بدون مايشعر..
لقي روحه قدام باب الحوش..
مش عارف لو يخش...او يولي من وين ماجي..
بس كان تعبان حاس انه لو كمل خطوة وحده حيطيح ع وجهه..
اصلا ليه يومين ماياكلش من كثر ماانشغل عليها..
فجأة فتحت اخته الباب..
كانت طالعه..
شافاته قدام الباب استغربت وقال؛مبروك!
هو قال بصوت فيه بحه:حولي ترا..
هي بعدت وخلاته يخش..
بس هو لما جي وخطي الخطوة في الاول في الحوش..
انهار وطاح ع وجهه..
واخته جاته بسرعه وهي تعيط وتقول..
"مبروك!"
☘☘☘☘☘☘
في المدرسه..
وقت الاستراحه مقعمزة بين الممرات تصحح في الكراسات..
فجأة رن تليفونها بنغمة رساله..
سدرة؛مني هادي؟
وخداته شافتها جايه من رقم غريب..
فتحتها..
(بعد مانطلعي من المدرسه بري للفروسيه ضروري نشوفك لو ماجيتيش نجيك للمدرسه واللي يصير يصير...المهدي)

#قبل_العاصفه_الاخير
#طوبى

...يتبع