طوبى الجزء الاول

الجزء الحادي والأربعين

(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_الحادي_والأربعين"تحدي"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
"شني هدا!؟"
قعمزت وهي تقول:شن تشوف فيه؟
الجالي شبحلها وهو مصدوم قال:امتى هدا..يبان قديم؟
خديجه:امم في سنة الاولى من زواج طاهر ونجاة..دخلت اختها للحوش وكانت ناويه دخلها للعيله بس اللي صار ان اختها كانت تنقز بين الحبال..
الجالي بلع ريقه وقال تلقائيا:شن دخل نجاة في افعال اختها..نجاة شي واختها شي تاني..
خديجه عقدت حواجبها استغرابا وقالت:نجاة نفسها اللي زمان كنت تقول عليها شيطانه ومش ساهله وتخطط لكبير!
سكت وهو يشوف لأخته بصدمه وعصبيه وجسمه يرجف من الغضب..
خديجه:حتى انت غيرت نظرتك فيها!؟ وحده زي هادي ساهل عليك تاكل بعقول الكل حلاوة الا اني..وانت..هادي كلبة فلوس همها كله الفلوس وبس هدا علاش قاعده تتلصق عليها..والباين حاطه العين ع المهدي..
الجالي لوح الصور بغضب وقال:سكري فمك..
خديجه رفعت حواجبها متصنعه التعجب من ردة فعله..
وهو ناض وقال:راك وليه زي زيها واللي تقولي قذف محصنات ردي بالك..
خديجه:اها المحصنه..المراة المتزوجه...لاياخديجه حتى المراة سبقلها الزواج محصنه..الله يرحمك ياطاهر انت اللي وسختنا بشكالات زي هادم..
الجالي معاش قدر يتحمل قال بعصبيه:قتلك سكري فمك سكري..وجبد تحفه ع الطاوله وكسرها..
هي قعدت تشبح للتحفه المكسورة وهي تقول:علاش العصبيه هادي كلها..ناضت وشبحتله وهي تقول..خيرك حامق لهالدرجه!...مارضيتش فيها لأنها كان مرت طاهر اقرب واحد من خوتك ليك!؟
الجالي قعد يشوفلها وعيونه متوسعات وكلهم غضب...
خديجه:جاوب علاش حامق ع خاطرها هكي وانت قبل اقل من سنه ماكنتش تسلم عليها حتى السلام!
الجالي:من الاخير..قولي شن عندك؟
خديجه:اللي عندي قلته نجاة حاطه عينها المهدي وتبيه يردها.
شد اخته بقوة من ذراعها وهو يقول بغضب:تعاويها مرة تانيه تندمي!
خديجه:نندم!!!علاش؟؟!...
طلقها وجي بيمشي يطلع..
"علاقه ولازواج"
وقف في مكانه للحظات..بعدين التفت لأخته..
خديجه؛في الحالتين غلطه حتدفع ثمنها غالي هلبه وانت فاهم قصدي كويس..
قدملها خطوة ورفع حاجبه وهو يشوفلها بتحدي..
خديجه بأسف:ياخسارة ياجالي اخر حد توقتعه يطيح في فخ نجاة وتقدر تضحك عليه بسهوله..
هي كانت قاصده تستفزة تبي طلع الاعتراف من فمه..
والجالي ساهل يستفز لو حد وصل في ذكائه وشخصيته قاللها وكأنه يتحدى فيها:اني اللي قعدت نجري في جرتها هي ماكانش في بالها شي نهائي.
ضحكت سخريه وقالت؛يمشي عليك مش عليا اني..خططت مليح وعارفه شن تبي..عارفه ان الزواج مستحيل يصير تقوله خل نطيحه بطريقتي ومش مهم حرام ولا المهم..
قاطعها وقال..
"مرتي"
سكتت وضيقت عيونها وهي تشوفله..
وهو مازال يشوفلها بنفس نظرة التحدي..
ضمت شواربها لداخل...ونزلت عيونها وقعدت تمرر فيهم يسارها بعدين قالت؛مرتك..
الجالي:ايه..ولينا فوق 5شهور متزوجين..
قامت عيونها فيه وقالت تهكما؛تقول وانت مفتخر بيها..ياعيني..وكأنك درت انجاز..
عقدت حواجبها وقالت..اني بس نبي نشوف شكلك هادي لما تواجه امي..
ملامح وجهه تبدلت شيئا فشيئا للقلق وهو عاقد حواجبه..
خديجه:امي لو تعرف يالجالي تنقلب انسانه تانيه..شن انسانه!..امي حتولي وحش..حتنسى انك ولدها..كل اللي مريت حتحطه ع تركينه وتبدا تحارب فيك حرب مايديرهاش عدوك وانت تعرفها كويس..أما بوي..مانبيكش تتخيل شن ممكن يدير بوي اني حنوفر عليك ونقولك..اقل حاجه حيديرها انه يتبرا منك هدا اقل شي...
وكان تبرا منك يالجالي..تولي زي ماجاباتك امي في الدنيا هادي معاش تكسب حاجه..حتى الحوش متاعك هو مساعدك في نصك..منصبك في الشركه من وصلك ليه!؟ ايه صح انت مهندس ممتاز وشاطر وشغلك كويس لكن لمية سنه القدام ماتحلمش توصله المنصب اللي انت فيه كان مش من معارف بوي في الدوله توا...وقتها برا عيش معاها في الشقه اللي في*******..اللي مش عارفه علاش حاسه انك كاتبها بآسمها لأنك معمي فيها ع الآخر..ووقتها وريني كان قدرت تكمل معاك وانت حفيان منتف ماعندك حاجه...
الجالي كان وهو يسمع في كلام خديجه يخاف اكثر..ويشوف فيه وكأنه واقع صاير قدامه..
خديجه:راك تقول خديجه مش حطلع شي..لا والله حنطلع ونص يالجالي ولا نخلي خوي ولد ام وبوي يطيح هالطيحه السودا...جالي..رفعت يدها وفي ضامه كل اصابعها ماعدا السبابه والوسطى وقالت..عندك حل من الزوز..ياطلق نجاة..
ياتقعد معاها وتتنازل عن كل شي يخصك ..
الجالي وهو يشوفلها قال:حتى انتي همك الفلوس..
نزلت يدها وقالت؛اكيد رزق بوي مش حنخلي وحده زي نجاة تلعب بيه..
الجالي:مش مطلقها..
خديجه شبحتله بكبر وقالت؛معناها ودع الجالي شنيبه لغير رجعه...
الجالي كان مقتنع بكلام اخته تماما بس مش هاينه عليه نفسه يبان جبان ومش قد مواقفه لهدا تحداها تحدي كاذب وقال..مش مطلقها..
ومشي وخلاها وهو في قمة الغضب والتوتر..
طلع من الشقه وخبط بابها بقوة..
هي ابتسمت بثقه وقالت:حدير اللي نبيه ياالجالي..
☘والجالي لما طلع من حوش الصيد..
مشي طول لسيارته ركبها وتوجه لعمارة نجاة...
☘☘☘☘☘
"كولي يامراة من غير هبال"
غرفه بحزن:والله ياسدرة ماخاطري حتى في العسل..
سدرة؛نهار احرش تبي تموتي ع خاطره!
غرفه قعدت ساكته مش قادرة تناقش..
سدرة؛قوي روحك ياهبله الرجاله مايبوش اللي دير ع خاطرهم هكي..عيشي وطنشيه ولو فيه خيره ليك حيجيك لعندك يردك...وبعدين انت هلبه عليه من الاخير مش خاشلي راس ولاقابلاته..
غرفه:لا والله ياسدرة طيب وحنين وكويس واني اللي غلطت في حقه لما طلعت من وراه نستاهل..
سدرة:فهمنا انك غلطتي لكن مش هكي..شوفي غريفه نكذب كان نقولك اني شفت الحب في عيون هالراجل ليك..ديما نحس فيه يشبحله بغل زي اللي حاقد عليك..
نزلوا دموع غرفه مسحتهم ومابتش ترد..
سدرة؛ومازال مش راضيه فيه..!
دق باب الدار كانت اميمه اللي قالت:السلام عليكم..
غرفه وسدرة :وعليكم السلام..
مشت اميمه قعمزت جنب غرفه وقالت:شن جوك اليوم..
غرفه:زي ماتشوفي.
سدرة:اليوم لاتبي تاكل ولاتشرب..
اميمه شبحت لغرفه شويه بعدين قالت:معليشي تخليني معاها شويه..
سدرة مررت نظرها عليهم وقالت:باهي..المهم قنعيها تاكل..
اميمه بإبتسامه:حاضر..
ومشت سدرة طلعت وسكرت الباب..
اميمه:حاولتي تكلميه..
غرفه:لما قالي بنبعت شناطيك معاش دورته..
اميمه:باهي وينهم شناطيك؟
غرفه قعدت تشبحلها وهي ساكته..
اميمه:ماتصدقيشي هدا قاعد يحبك واللي صار بينه وبين حسين اكبر دليل...شوفي ان نحس اللي صار بينكم هدا فيه فرصه ليك وليه وانتم بعاد عن بعض تقربوا لبعض..
امس قلتيلي اتبعت معاه اسلوب الدحنسه..ضحكت وقالت..وحستيه متجاوب معاك ولا..خلاص كملي بيه..
غرفه:نحس فيه هالمرة كارهني رسمي كيف بيتجاوب معاي..
اميمه:قولي زعلان منك مش كارهك..شايل في قلبه عليك لكن كره لا ياغرفه صدقيني..
غرفه:باهي تتوقعي يردني؟
اميمه:خل نعطيك سحر يجيبلك رؤوف لعندك.
غرفه:سحر!؟
اميمه بضحكه:ايه سحر اني نفسي جربته..بس سحر حلال ربي مبارك فيه..
غرفه:شن هو؟
اميمه:اقري البقرة...سورة البقرة اقريها يوميا كل ماتكوني فاضيه شدي مصحف اقريها ولانزليها في تليفونك واقريها..
مش بس اللي تبيه يجيك..نفسيتك ترتاح وتحس روحك ديما وليتي احسن..
غرفه من اليأس ماخشش راسها هلبه كلام بنت عمها..
اميمه:الرسول قال"اخدها بركه"..يعني اللي يشده ويمشي بيها ويحافظ عليها حيباركله ربي في كل شي في حياته ياغرفه..الرسول يقول كذب ياغرفه!؟.
غرفه:حاشاه..
اميمه:خلاص شديها من اليوم..واني كل يوم حنبعتلك رساله نذكرك تمام..وبعدين انتي تبدي تفكريني شن رايك؟
غرفه شبه بدت تتحمس وقالت؛تمام..
ابتسمت اميمه وقالت:ومع الدحنسه تمشي الأمور..
ضحكت غرفه..
اميمه بضحكه:هي تغدي مش جعانه!!؟
غرفه:الحق بنموت بالجوع..بس بري جيبي كاشيك وسايريني
اميمه:باهي..ابدي كولي جايه...
ناضت اميمه ومشت طلعت من الدار..
وغرفه تنهدت براحه وبدت تاكل..
☘☘☘☘
"انزلي توا"
نجاة بقلق:باهي فهمني شن صاير!..
"قلت انزلي تنزلي معاش تكثري دوة"
نجاه:باهي باهي هاني نازله..
سكر عليها وهي ترعش وتقول..ياربي شن فيه شن جاه..
خدت وشاحها وعبايتها وطلعت لولدها وبنت اللي كانوا قدام التلفزيون قالت:ماما ردوا بالكم من خوكم شويه وجايه..
الزوز قالوا:حاضر..
ومشت بسرعه طلعت من الشقه وسكرت الباب.
ونزل لوطا تجري...
☘☘☘☘
"هدا هو المحل وفي وسطه الدار اللي بتبات فيها"
:عيش خويا ناس الحومه شن جوهم طباعهم مزيانه ولا...
:مافيش احلا من طباع ناس شارع القهوة حتعيش بيناتنا تقول ليك عمر هني انت حتدلع اخر دلع واسأل يوسا..
شبح الشاب التونسي ليوسا اللي يخدم في الميكانيكي بعدين قال:ان شاء الله الواحد متغرب مادا بيه ماتتلاقاش عليه الغربه والمعامله كيف ماتقولوا انتم شينه..
:لاحني ناس مزيانين ومعاملتنا مزيانه ومن اليوم حتشوف كلامي قدامك واقع..
:ان شاء الله ان شاء الله..
:هي نخليك توا..
:توكل شوف حالك اني تو نشوف الوضع بروحي وكان استحقيت شي نكلمك طول..
:تم..السلام عليكم..
:وعليك السلام..
مشي الراجل صاحب محل الحلاق..
وخش التونسي اللي مأجره داخل قعد يشوف للحاجات اللي فيه والعده عجبه ع الآخر...
وقال:الامور مريقله..الحمد لله..بس اهم شي الناس ان شاء الله يكونوا ناس باهيه ويحبوا التوانسه..
فجأة دق باب المحل..
:تفضل..
خش المهدي وقال:السلام عليكم..
:وعليكم السلام..
المهدي:انتي التونسي اللي اجر المحل هدا؟
:انا هو..
المهدي قدمله ومد يده وقال:مرحبتين بيك في شارع القهوة
ابتسم وصافحه وهو يقول:وبيك يا..
ابتسم وقال:المهدي شنيبه..
:فراس..فراس الطرابلسي..
المهدي:بجوده..
فراس:وبيك...
المهدي:المطحن متاعنا وقهوتنا هما هادم مقابلينك تبي اي حاجه تفضل..
فراس:يعيشك..
المهدي هز راسه وقال:تسلم..طلق يده وقال..نستأذن..
فراس:خود راحتك..
المهدي:نحسك تدوي ليبي كويس..
فراس:ليا سنين في ليبيا وسكنت في برشا مناطق وتعايشت مع ناسها وكلامهم خديت عليه يعني تعلمت نحكي بيه بش يفهموا عليا..
هز المهدي راسه وقال:ع العموم مرحبتين بيك بين ناسك واهلك مرة تانيه..
فراس:الله يبارك فيك..
المهدي:السلام عليكم..
مشي المهدي طلع..وفراس قال...بداية مبشرة..
☘☘☘☘
بلعت ريقها من الخوف وقالت:والله القصه قديمه واني ماكانش عندي بيها علم حتى خديجه لما واجهتها بيها اني كنت مصدومه..وضربتها اختي هادي حتى الضرب..
الجالي بغضب:معاش لقت كان راجل اختي!؟ والله اعلم ع من كانت مخططه ترمي شباكها..المهدي ولا!؟
نجاة دموعها نزلوا وهي تقول:اني شن دخلي ياجالي شن دخلي بعدين اختي اهي قدامك تزوجت وتوا لاهيه بحياتها..
الجالي شبح القدام وهو معصب ع الآخر..
نجاة:جالي ماديرليش هكي اشبحلي..
الجالي:خديجه عرفت..
ضمت نجاة شواربها لداخل بعدين شبحت القدام ومسحت دموعها وهي تقول..توقعت..
شبحلها وقال..ان شاء الله منك انتي!
شبحتله وقالت؛شن فيا مهبوله!
الجالي:حركاتك ونظراتك انتي ماتهنيش روحك..
نجاة:اني حاولت ع قد مانقدر نخلي كل شي في السر بس قتلك قبل اختك هادي واعره مايفوتها شي..
هو قعد ساكت والغضب ياكل فيه من داخل..
نجاه:شن قالتلك؟
الجالي:ياما قالت..
نجاة:طز..
شبحلها..
نجاة:ايه طز..اني وياك مادرناش حرام خلي الكل يعرف..
هو قعد يعجب عليها بعصبيه وقال..اني وياك مادرناش حرام خلي الكل يعرف..بغضب تابع يقول..لو بوي عرف عليك السلام اني مهما ندير نقعد ولده لكن انتي شني..راهو يقدر يجبرني نطلقك وبعدين ياخد منك الصغار ومعاش يخليك تشوفيهم لين تموتي..
نجاة وهي مصدومه ودموعها في عيونها:ساهل عليك تخليني!
هو بغضب قال:كان خدي اللي فوقي واللي تحتي وقعدت ع الحديده مازال ترضي بيا..
نجاه ماردتش..سكتت..
هو ابتسم تهمكا وهز راسه وشبح القدام وقال:هاه شفتي كيف لامن مصلحتي ولامصلحتك اللي بيصير بعدين لو تحديناهم...
نجاة ودموعها ينزلوا:يعني شن بيصير توا!؟
الجالي:لازم نبعدوا فترة ونفكروا شن لازم نديروا...وبعدين كل حد فينا يقرر قراره ويقوله للتاني..
نجاة شبحتله وقالت:اني قراري من توا واخداته مش حنخليك لوشن يصير وماليك غصب عنهم حيرضوا..
ونزلت من السيارة وهي معصبه..
وهو تحرك طلع من العمارة وهو يحرق في العجل...
☘☘☘☘☘
الساعه 8:45مساءا..
في حوش لطفي الواعر..
تحديدا الكوجينه..
لطفي:الراجل زي اللي متحشم..
مطيرة وهي دير فالدلاع:طبيعي اول الايام هكي بعدين يخش فينا عادي..
كملت..وسلفرت صونيه الدلاع وحطتها في سفرة عشي الحلاق التونسي..
ورفعت السفره ومدتها لخوها..
خداها منها وقال؛عطيك الصحه..
ومشي طلع من حداها...
☘اما في حوش بوه...
اللي كان عايش فيه هو وعيلته..
كان عبد المطلب في دار النوم مسكرها عليه...
طلع صرة دبش وحطها ع السرير..بعدين فتحها وحول الدبش وطلع من تحتهم شنطه سامسونايت..فتحها بالرقم السري..
كانت مليانه فلوس دينار ع دولار المنحه اللي تنزل لكل كتيب حصل من يسحبها وجابهاله..
وهو خداها طول دسها مع باقي الفلوس اللي كانوا اغلى من روحه عليه...
وين يشوفهم يكثروا فرحته مايعرفش وين يحطها..
سكر الشنطه بالرمز..وحط عليها الدبش وربط الصرة..
بعدين رفعها وحطها في الدولاب في مكان مدغرق زي مانقولوا..وسكر عليهم بالمفتاح...وحطه في جيبه..
دق باب الدار..
مشاله وفتحه..
خشت صفيه وقالت؛هاه في شن تبيني؟
عبد المطلب؛ولدك يبي يجي بعياله هني..
صفيه:اني قلت ماتخشليش حوش..
عبد المطلب:لما يولي حوشك ياللا احكمي واطلقي فيه..
صفيه:باهي علاش جاي تكلم فيا كان هكي!؟
عبد المطلب؛مانبيكش ديري للولد مشاكل لما يجي هني روحك خيرلك..
صفيه:توا وليت حنين فيه وتبيه..متأكده ان في وراها مصلحه..
عبد المطلب:عيب نمد عليك ايدي بعد هالعمر..
صفيه ابتسمت بتهكم ومشت طلعت من الدار..
عبد المطلب:اني مفروض نخش الجنه اللي صبرت عليك الصبر هدا كله...ومشي طلع من الدار حتى هو وسكر الباب..
☘☘☘☘☘
"قتلك الحقيرة طلعت ناسختهم شيطانة الرجيم"
صابرين بتوتر؛هدا علاش سكتت السنين هادي كلها عليهم.
"كيف ندير توا ياصابرين دماغي واقف"
صابرين بخوف:اني اكثر منك خايفه يعرف مراد وانتي تعرفي شن كان لعيلة راجلها زمان والله حوشي يخرب يانجاة...
"كيف يعني حتى انتي بتخليني!؟"
صابرين:اكيد لا..بس اهدي وخليني حتى اني نهدا ونعرف نفكر كويس..حماتك هادي اكيد حاسبه حساب كل شي مايفوتها شي مواجهتها صعبه هلبه..
"اني خايفه ياصابرين خايفه لو الجالي يطلقني عارفاته مش حيفرط في عيلته ع خاطر حد"
صابرين سكتت شويه بعدين قال:نجاة انتي ماحملتيش..
سكتت نجاه...
صابرين؛شوفي روحك يانجاه مرات تطلعي حامل مش قلتي وقفتي عن حبوب المنع..
"ايه صح وقفت المدة الاخيره بس يعني نبي شوية صبر ع مانعرف"
صابرين:يارب تطلعي حامل تعرفي كان طلعتي حامل وخشومهم في اللبز يرضوا بزواجكم..
"يارب نطلع حامل يارب"
صابرين؛يااارب...
🍀🍀🍀🍀🍀🍀
وتعدي الايام..
ونجاة تحسب يوم ورا يوم...
الايام اللي عدت والجالي بعيد عنها حتى هاتفيا ماتواصلش معاها..
خوفه من خديجه كان كبير..وكل يوم كان يراجي في سره ينفضح عن طريقها..
يعني عايش في حالة من التوتر..مخلية نفسيته تتعب ولولا الدوا اللي ياخد فيه راهو انهار..
ونضال كان يراقب في وضعه وكذلك يراجي في خديجه شن دير...
خديجه اللي كانت حاطه عيونها ع الكل..
ع الجالي....ونجاه...
وطوبى...
علاش طوبى!؟
طوبى اللي كانت تراقب فيها شبه يوميا من روشن شقتها وهي طالعه الصبح وهي مروحه..
مركزه ع كل شي فيها..وبدت تفكر فيها جديا بش تولي كنة عيلة شنيبه...
خديجه وهي واقفه في الروشن:مافيش غيرها...طوبى..
☘☘☘☘☘
تاني يوم ..
من بعد كم يوم مروا..
نجاة مشت لعياده خاصه دير فحص حمل..
وطول الوقت تدعي انها تطلع حامل...
☘الدكتور؛مافيش حمل مدام..
نجاة ودموعها في عيونها؛متأكده دكتورة!..حطت يدها ع بطنها وقالت..باهي ديريلي ايكو..
الدكتورة:برغم منطقيا وع حسب كلامك مستحيل يكون في عمل..بس تفضلي بش نشوفوا بالجهاز..
طول نجاة ناضت وهي ملهوفه..
ومشت تمددت ع السرير..
الدكتور فحصتها وقالت:شفتي الشاشه قدامك..شفتي كيف فاضي مافي شي باين..مافيش حمل يامدام مافيش نهائي...
🍃🍃🍃🍃
روحت نجاة لشقتها وهي منهارة...
ماوقفتش بكي..بكت عمرها مابكت زيه في حياتها..
حست ان كل شي بينها وبين الجالي انتهي خلاص معاش امل من استمرارهم مع بعض..
خشت الشقه متاع صغارها اللي قاعدين عند اختها ..
كانت خطواتها وهي تمشي محبطه تماما..
وصلت في الكنبه..انهدت عليها..وشنطتها طاحت من يدها وهي تشبح في الفراغ بنظرات مليانه يأس..
ودموعها زي السيل...
فجأة..
رن جرس الشقه..
ناضت فزت وهي تقول بلهفه:الجالي!
ومشت تجري للباب وفتحاته طول..
وانصعقت لما شافت من واقف وراه..
حولت خديجه نظاراتها واشرتلها وهي تقول:حولي..
بعدت نجاه وهي تبلع في ريقها من الخوف...
خشت خديجه..
ونجاة سكرت الباب..
خديجه وهي دور بعيونها في الشقه:وين الصغار..
جتها نجاة وهي تقول بصوت مبحوح:عند اختي..
التفتت شبحتلها وقالت:الجالي بيجي..
حركت راسها بالنفي وقال:الجالي ليه اسبوعين معاش جي..
ابتسمت خديجه ع جنب ومشت كم خطوه ووقفت قدام نجاة وقالت؛شوفي.قلبي الطيب هو اللي خلاني ساكته لتوا..وحتى..معرفتي بخوي انه مايحبش من يمشي كلمته عليه..يعني هو مخليك ع ذمته لسبب واحد..ارضاء لغروره وبس..
نجاة تسمع فيها وقلبها من داخل كان يذرف في دموعه دم...
خديجه تنهدت وقالت:نجاة..اني بنقعد ساكته تمام ومش حنتكلم بس بشرط...
نجاه وهي تشوفلها قالت:شن هو..
خديجه؛هما شرطين مش شرط...اولهم تقعدي ع ذمة الجالي لكن في السر..تانيهم وهو الأهم...ترضي..ان الجالي يتزوج في العلن...
حست نجاة وكأنه في حد جبد قلبها من مكانه..
خديجه:الجالي خيرة خوتي وفي من يحلف براسه وهلبه يتمنوا يناسبهم وهلبه يراجو فيه يفتح موضوع الزواج ويقول نبي نخطب..قهرة والله شاب زي الورده زيه هو..ياخد عزوز شارفه اكبر منه بسنين وعندها صغار..القهره هادي من غير شر تمرض بوي وتقتل امي..واني بعدها يانجاة مش حنرحمك ندير فيك عبيتر مايندار..
بلعت نجاة ريقها بخوف ودموعها ينزلوا..
خديجه بحقد:اختك الصايعه هديكا نخلي راجلها يرزيها في عمرها..نفضح بيكم..نشهدر بيكم ونخلي حتى اختك الكبيرة تطلق وعيلتها تتشرد..
نجاة شدت ع قبضة يدها بقوة...
خديجه بتحذير:اسمعي الكلام يانجاه اسمعي وخليك مطيعه وفكري في مصلحتك ومصلحة خواتك..ومادامك رضيتي بوضعك مع الجالي من البدايه بتكملي وانتي ساكته وراضيه وتضحكي..
نجاة تسمع فيها وكانت متمنيه لو تقدر  تقتلها وترتاح منها..
بس الخوف الشديد منعها..
خديجه؛شن قلتي!
نجاة مادارتش اي ردة فعل..
شدتها خديجه من ساعدها بقوة وقالت؛تكلمي!
هزت راسها بسرعه وقالت وهي ترعش:باهي باهي..
طلقتها خديجه بقوة وقالت؛ياويلك..ياويلك وياويل خواتك لو فكرتي تلعبي معاي...
دفتها من قدامها ومشت فتحت باب الشقه وطلعت وجبداته بقوة وراها..
ونجاة بعد ماطلعت خديجه...
غمضت عيونها بشده وصاحت بألم تقول:آااه...
كانت بألم وقهر..وذل..
فتحت عيونها وبدت تخبط في الشقه وتكسر وهي تبكي بالعبرة وطلع في آهات قهر من وسط قلبها..
~~~~~~~
مراد:مش حال هدا ياصابرين احني اتفقنا يومين في الاسبوع بس..
صابرين؛اختي صارلها ظرف شن تبيني ندير نخلي صغارها في الشارع!
مراد؛دبر حل لروحها مش كل شي ع حساب راحتي...
ومشي طلع من حداها وهو معصب للحمام..
وصابرين كانت مضايقه هلبه اتصلت بأختها اكثر من مرة ماردتش عليها لهدا انجبرت تاخد الصغار وتمشيلها للشقه..
☘وين وصلت غادي وفتحت الباب وخشت مع الصغار.
صدمهم كلهم منظر الشقه..
شدت معاذ كويس وقعدت تمشي داخل وهي تنادي:نجاة..يانجاة...تعالوا هني حبايبي ماتمسوا شي بروا لداركم..
جوري:نبي ماما..
صابرين:باهي خشي مع حمزة للدار وشويه تجي ماما..
مشوا خشوا الزوز لدارهم وهما خايفين..
وصابرين مشت لدار النوم..
وين خشتلها لقت نجاة مقعمزة ع الارض جنب السرير..
وحاطه راسها ع حافة السرير..
وفيدها تليفونها تشبحله وهدي دمع..
مشت صابرين حطت معاذ في سريره وجت لأختها قعمزت جنبها ع ركابها وقالت:نجاه..
نجاة بصوت لايكاد يكون مسموع:تبيني نسلم فيه...نخليه ياخد مراة تانيه..نخلي وحده غيري تشاركني فيه..اااه ياصابرين بنموت..
صابرين:من كلمك؟
نجاة:خديجه..جت هني...وغمت وجهها في السرير وهي تبكي بقهر..
واختها تشوفلها بألم ودموعها نزلوا ...
☘قعدت معاها لين خلتها رقدت..
بعدين خشت للدار ع الصغار لقتهم راقدين..
طلعت وضمت الشقه كلها وكنستها...
اتصل بيها راجلها استعجلها..
طلعت طول...بس وهي نازله بعتت للجالي رساله...
🍃🍃🍃🍃🍃
الساعه 11:00ليلا..
فاقت...فتحت عيونها شويه شويه..
جو في عيونه...
عيونه هو !؟
كيف بديت نهلوس بيه!؟
الرحمه يارب..
"صح النوم"
لاوالله هو هدا صوته...
نجاة وهي مندهشة؛جالي..
الجالي بإبتسامه؛روح الجالي..
بدت ع وجهها ملامح بكاء..وهو احتواها بحنانه عليها اللي ماحستاش مع حد غيره هو..
شدت فيه بقوة وكأنها خايفه ياخدوه منها..
وكأنهم توا حيسلموه لشريكتها..
بكت بكت...وياكثر مابكت اليوم...
~~~~~~~
الجالي:تمشي تزوجها لمحي الدين..
ضحكت نجاة..
الجالي؛شن تحسابي انتي تقدر تمشي كلمتها عليا ولايقدر حد في الحوش يتحكم في حياتي..
نجاه؛باهي كيف بدير بتقول للكل ان حني متزوجين..
سكت شويه بعدين قال؛تو نتصرف..
تنهدت نجاة بقلق...
هو مسح ع شعرها وقال؛ماتفكري في شي خلي عندك فيا ثقة نوجا..
شبحتله..
هو ابتسم وقال؛تمام..
ابتسمت من وسط دموعها وهزت راسها بآيجاب...
☘بعد ساعة ..
روح الجالي..
وطول ماهو يسوق في الطريق يفكر شن يدير..
ماعنداش القدرة والقوة ع مواجهة امه وبوه..كل اللي قاله لنجاة..قاله بش يحافظ ع صورته كرجل عنده شخصية مستقله ومايقدر حد يتحكم فيه...
وصل للحوش..
خش بالسيارة لداخل..
وكالعاده اللي لزمتها خديجه الفترة الاخيره..
مراقبته من روشن دارها...
رفعت حواجبها ونزلتهم وهي تتنهد بعدين قالت بصوت هامس؛مافيش قدامك غير هالحل ياخديجه...
☘☘☘☘☘
تاني يوم..
بعد العصر...
في حوش عبد الرؤوف...
نبيله:رجاءا ماتدخلش فيا..
عبد الرؤوف:نبيله انتي هكي تفسدي اللي ندير فيه..
نبيله لبست كندرتها وبتطلع..
عبد الرؤوف بإستسلام:باهي راجي شويه..
وقفت بدون ماتشبحله..
طلع تزدانه وخدي مافيه من فلوس ومدهم وقال:عطيهولها..
هي التفتت خدتهم بعدين حطتهم في  شنطتها ومشت طلعت..
اما هو حط ايديه في جيوبه وتنهد وقعد واقف في مكانه..
☘طلعت نبيله من الحوش..
ومشت بطريقها لمحل المواد الغذائيه اللي في الشارع...
فاتت من قدام الحلاق..
شبحلها وابتسم.
زي ماابتسم نضال اللي كان واقف في القهوة..
هي خشت للمحل..
وقعدت دور فيه ع احسن انواع البسكويت والكيكات..
وقعدت تعبي وتحط..بعدين خدت شكولاته بأنواع مختلفه..
وعبت كيسه شيبسات..
وطلعت من المحل ومشت لحوش الواعر..
ع طلعة محمد شنيبه من الحوش..
شافها وقفت قدام الحوش..
ابتسم..وبدي يسمح ع لحيته..
محمد المهدي جي يجري لعمه وقال؛الحق الزير سالم طلع..
ضرب نضال ولده خوه وع قفاه وهو يضحك قال:تحشم ياكلب..
ومحمد المهدي قعد يتحسس في قفاه وهو يضحك..
والزوز يشبحوا للجد والجارة...
انفتح باب حوش الواعر...
خشت نبيله للحوش..وتسكر الباب..
تنهد محمد شنيبه وحرك راسه يمين ويسار آسفا..
وولده وحفيده يشبحوله ويضحكوا..
ركب سيارته ومشي...
ومحمد ونضال معاهم بعيونه..
نضال:ناري عليك ياموغا..
محمد بضحكه؛نظراته في تطور..الموضوع مش مطول ويولي الحاج متولي..
نضال؛مفروض الواحد وين يجي يتزوج ياخد وحده بردع اربعه بش مايفكرش ياخد غيرها..
محمد:وانت ترضى بوحده!!
ابتسم برفعة حاجب وقال:اللي حطينا عليها بردع اربعين..
محمد بإندهاش:قصدك خلاص تبنا!!؟
نضال؛والله ياوليد خوي جتنا اللي توبتنا..
محمد بضحكه؛صحه ليها ياسي..بتعرفني عليها ولا؟
نضال؛ياجحش بطل طروح عارفها اكثر مني..
محمد وهو يضحك هز راسه وقال؛ايه عارف والصراحه عندك حق بردع اربعين..
ابتسم نضال وهو يفكر فيها...
☘☘☘☘☘☘
"والله اني ماجايه لامعاه ولامعاها اني نبي نحضر رمضان وهي معانا"
سدرة؛والله ياوخيتي كان هو مايبيش مابنلوحوها عليه..
نبيله؛كيف مايبيش..شوفي شن باعت معاي اللي تحبه كله..
سدرة رفعت حواجبها ونزلتهم وهي مش مقتنعه..
مطيرة قعدت ترقع وهي تقول:هي في دار تعالي معاي..
ناضت نبيله وفي يدها الحاجات..
ومشت طلعت من الصاله مع مطيرة...
وتوجهوا للدار..
وصلوا في باب الدار..
دقاته مطيره وقالت:غرفه...
"خشي عميمه"
فتحت مطيره الباب وقالت؛غرفه..
غرفه وهي مقعمزة ع سريرها لما شافت نبيله ناضت وقفت وهي تساوي في حوايجها...
نبيله بإبتسامه:السلام عليكم..
غرفه؛وعليكم السلام..
مطيرة؛نخليك مع حماتك هدرزوا براحتكم..
ومشت طلعت من الدار وسكرت الباب...
نبيله مشت لسرير غرفه وقالت:تريحي...
غرفه؛تفضلي انتي قبل..
قعمزت نبيله...وغرفه قعمزت معاها...
نبيله؛أول شي اني آسفه اللي صار كله بسببي .
نزلت غرفه عيونها وهي تشوف لصوابعها اللي يفركوا في بعض..
نبيله؛اني بس من حرقتي ع خوي..لكن مفروض تعاملت مع الموضوع بحكمة مش بالعاطفه..
غرفه لارد وقاعده ع حالها..
نبيله؛شفتي شن بعتلك معاي..
شافت للحاجات..
نبيله:خوي يحبك هلبه ياغرفه..
شبحتلها..
نبيله؛ومن حبه ليك دار اللي داره..
دمعوا عيون غرفه..
نبيله تنهدت:شوفي..انتي كسرتي في داخله حاجه جهتك تتصلح راهو..مش من اذا انكسر مايتصلحش..حاولي تتقربي منه من جديد حاولي تخليه يتعرف عليك وانتي تتعرفي عليه مرة تانيه..هو ممكن يصدك في البدايه بس صدقيني لو حس انك صادقه معاه حيرجع يفتحلك قلبه وحيحبك اكثر من قبل..
غرفه؛نسألك سؤال..
نبيله:أسألي..
غرفه؛شن اللي غير موقفك هكي في مرة؟
نبيله؛لامش في مرة ياغرفه فات وقت لاباس فيه شفت حال خوي..ومنه فكرت في الموضوع من جميع جوانبه..منها اني عرفتك عن قرب وحبيتك..يعني حتى لو فيك جانب مش حلو شفت فيك جانب حلو حبيته هلبه حسيت انك تستحقي فرصه تانيه معاه...
غرفه نزلت عيونها وشبحت لإيديها اللي ضمتهم لبعض..
نبيله ابتسمت وطلعت من شنطتها فلوس ومدتهم لغرفه وقالت؛هادم منه هو..
ردتهم غرفه وقالت؛قوليله غرفه ماتبيش فلوسك..انت تعرف غرفه شن تبي كويس..
~~~~~~~~~
عبد الرؤوف؛مانعرف شي والفلوس خوديهم انتي معاش نبيهم..
ومشي بيطلع من الحوش..
ونبيله تضحك وهي تحرك في راسها يمين ويسار...
🍀🍀🍀🍀🍀
ومازالت تعدي الايام..
ومعاش ولى يفصل عن رمضان غير اسبوع واحد..
فهالأسبوع قررت خديجه تفصل في موضوع الجالي نهائي..
بس بطريقتها....
الساعه 7:30مساءا...
كان ربيع واقف قدام المطعم متاعه ويتفرج ع العمال كيف يرفعوا في اليافطه..وحداه المهدي..
المهدي:سونيك صار!
ربيع بضحكه:لانه حيكون اسرع مطعم في تجهيز طلبات الزبون..والدليفري.
المهدي:ان شاء الله..ان شاء الله تبدوا بدايه حلوة تستمر معاكم..
ربيع قال:إن شاء الله..
ع جية سيارة نسرين لحوش بوها..
سمعوا صوتها شبحولها الزوز..
درست نسرين ونزلت من السيارة ومشت بتخش للحوش..
ربيع بجرأة:هادي ارملة خوك..
المهدي:وانت تشبحلها!؟
ربيع ضحك بخوف وقاله:عادي والله مانقصد حاجه مجرد فضول بس..
شبحله المهدي بربع عين بعدين شبح للمطعم وقال:لا..
ربيع بإبتسامه؛اسف ياحبيب نحاول مرة تانيه نتفكر اني روحت هدي لاني ننسى ديما..
ضحك المهدي نص ضحكه..
فجأة جتهم الكورة اللي يلعبوا بيها ولاد الشارع..
شده ربيع برجليها..ماتلعبوش في الطريق..
يزن المهدي:باهي جيبها..
ربيع ضحك:اهي جاتك..
ويوخر ويضربها ضربه..
تفوت ولاد الشارع..
وتستقر ع صدر علي الواعر اللي فتح الباب بش بيطلع..
كلهم تبثوا ع اللقطه وهما يترقبوا في مصير الكورة..
علي الواعر كان يشبحلها وهي واقفه قدامه..
بعدين طبس خداها وخش بيها داخل..
ربيع:زعمه شافني!
المهدي بضحكه؛مش عارف..
محمد ولد خديجه؛كله منك ياعمي ربيع كان لعبتها ارضيه وريحتنا..
يزن:خلاص توا المباراة تمت وغدوه نشوفواكورة غيرها ياأولاد..
ع طلعته علي الواعر وهو شاد نصاف الكورة بإيديه ومعاهم..
سراق صغير"منشار"
ربيع لما شاف المنشار طلع يجري..وولاد الشارع طلعوا يجروا معاه..
علي:بصطادريه..سفاتيل..خزي..
ولوح السراق داخل وسكر الباب..
ونصاف الكوره مشي بيهم لجردل الكناسه ولوحهم فيه وكمل طريقه..
والمهدي يضحك بكتمان وخلاص..
☘☘☘☘☘
"والله جايه نجري حتى عزوزتي قلت لفرح تقوللها انتي مابيتش نضيع وقت"
مغليه؛اهي اختك جت تكلمي..
ناضت خديجه ومشت لباب سكراته ع مصرعيه...
مغليه؛حست خوفتني يابنتي..
خديجه قعمزت مقابلتهم وقالت:لأن الموضوع مهم هلبه يام..
نسرين؛باهي خشي فيه طول...
خدت خديجه نفس..وبدت تحكيلهم...
☘☘☘☘☘☘
"لو قعد موضوعكم دابكم ودابها ولتوا ماطلعش معناها تزبعر ع الفاضي.."
نجاة؛خديجه واني وياك نعرفوها كويس كان حطت حاجه في راسها معاش تخليها..
صابرين؛ع هكي الموضوع كله واقف ع الجالي..
نجاة؛والجالي مش حيقدر يواجه بوه..
صابرين:يعني حيستسلم لفكرة الزواج العلني ع قولة اخته!؟
نجاه ودموعها في عيونها وقلبها والعه فيه النار:للأسف...لكن مني كانت تكون اللي بيجيبوها لما نكرهها في الساعه اللي بتوافق فيها عليه..
🍃🍃🍃🍃
"نهاري اسود نهاري مغبر"
نسرين بصدمه؛متأكده انتي ياخديجه..
خديجه؛زي مانشوف فيكم مع الاسف..
قعدت تخبط مغليه ع رجليها وهي تقول:الجالي..الجالي يدير هكي!!..ومن وراي ويستغفل فيا يحساب بيحطني تحت الأمر الواقع وبنرضى..
ناضت وقفت وهي تقول:والله والله ماهي صايرة واني حيه ع جثتي يديروا مايبوا..
خديجه؛يام اهدي شويه وقعمزي بالله عليك غير قعمزي..
قعمز مغليه وهي تقول:منين بيجيني الهدوء منين وولدي داير عملة زي هادي!
نسرين:مش قادره نصدق..الجالي ونجاه!
خديجه؛لاصدقي حبيبتي صدقي كله وارد..
مغليه حطت ايديها ع راسها وقالت:ووك حسيت ضغطي رقي..
طلعت خديجه حبة دوا امها من الشنطه وناضت صبت ميه وجابتهولها كانت حاسبه حساب كل شي..
خديجه:خودي يام خودي..
نسرين بقلق:يام..
خدت مغليه الحبه وهي تقول:توا تجيبوه وين مايكون توا نبي نشوفه قدامي توا..
خديجه؛حاضر يام حاضر..غير خودي دواك..
بلعت مغليه حبة الدوا وشربت بعده الميه وهي ترعش مع بعضها..
نسرين؛مازال مش مصدقه الجالي..معقوله الجالي!
مغليه:واني شن اللي قاهرني غير انها جت من الجالي احسن من جبت رضي الوالدين اللي مايعرفش يقول كان حاضر ونعم وكان عارضنا يعرف كيف يرضينا لكن عمله زي هادي عمري ماتوقعت ولاتخايلته يديرها..حي عليا كان ماتكون عارفه علته وتهدد فيه بيها!
خديجه:مش عارفه يام..لكن حتى لو كانت مخوفاته مش حتخوفنا حني شكالها نعرف نتعامل معاهم..المهم توا ولدك الجالي لازم يحولها من راسه بأي شكل..
مغليه:تو نقطع رجلها من الحوش..
خديجه؛لايام ردي بالك انتي هكي بتعطيها فرصه تاخده مرة وحده ومعاش تشوفيه عمرك كله...انتي ونسرين لاسمعتوا ولاريتوا..
استغربوا كلامها امها واختها..
خديجه:لاسمعتوا ولاريتوا بالنسبه لنجاة لأن المخلوقه هادي لفعه ماتعرفوش شن ممكن دير وكيف تستغل معرفتكم بوضعها هي والجالي..
نسرين:وكان خلاته ياخدها غصب علينا.
خديجه مطت شواربها لبرا وقالت:امم..مش حيقدروا الزوز لأن حني حنخطبوله وفي اسرع وقت..في رمضان..
نسرين تفاجئت..
ومغليه تحمست لكلام بنتها وقالت:صح صح هدا الصح..نخطبوله بنية صغيرة وحلوة تنسيه هالعزوز ومايجي منها..
خديجه:نفس تفكيري يام..وتكون بنيه طيبه وع نياتها وصبورة حتى تعرف علته تتحمل وتصبر وتساعده وعاقله تعرف كيف تجيبه ليها..
مغليه:باهي هادي زعمه وين نلقوها؟!
خديجه؛قدامنا يام لاماشيين يمين ولايسار..
عقدت نسرين حواجبها وقالت:من هي!؟
ومغليه تراجي في رده..
خديجه:بنت لطفي الواعر...
"طوبى"

#تحدي
#طوبى

...يتبع....