طوبى الجزء الاول

تابع

(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_الثالث_والأربعين"إلا أنت4"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
مقعمزة قدام المرايه..
تلف في شعرها بمحرمه بعد ماغطاته بكيسه لأنها دايرتله حمام زيت..
كملت ولمت الحوسه في الدار..
بعدين مشت للحمام غسلت ايديها كويس..
وولت من جديد للدار..
اول ماخشتلها رن تليفونها..
مشت للسرير متاعها وخداته..شافت المتصل..
بدي وجهها يحمر شويه شويه..وابتسمت..
قعمزت ع السرير وردت..
طوبى:السلام عليكم..
"وعليكم السلام والرحمه..شن جو"
طوبى:تمام الحمد لله شن جوك انت..
"معاش تسألني عن جوي لما نكلمك ولا لما نشوف حاجه حلوة جايتني منك"
طوبى قعدت تسمع فيه وهي ساكته..
مرتبكه..متوتره...وفي نفس الوقت حابه الشعور اللي عايشاته حاليا..
"تعرفي نسيت ان طلبتها منك..قلت في بالي مرات ماتفضاش ديرها مرات تقول شن صحيح الوجه هدا اللي خاش ببرادته"
ضحكت وقالت؛لاعلاش بنقول هكي عادي..يعني انت في النهايه خطيبي واني خطيبتك وجيران وفي شارع واحد عادي جدا تطلب مني حاجه زي هادي..
"خطيبي...محلا ياء الملكيه في اخر هالكلمه"
سكتت طوبى وهي مبتسمه بخجل..
هو عرفها تحشمت ضحك وقال..
"لكن المبروشه حاجه خيال كالعاده..يسلموا ايديك اللي مايعرفوش يديروا كان الحاجه الحلوة"
طوبى بخجل شديد؛شكرا.
هو ضحك وقال..
"عقد الفل انتي درتيه"
طوبى:اكيد..بس يعني كنت نبي نديرلك واحد اكبر غير مافيش وقت..
"بالعكس عجبنى هلبه..علقته في الدار "
طوبى بإبتسامه؛باهي كويس انه عجبك..
"مادام منك حيعجبني..طوبى"
طوبى وتفرك في راحة يدها اليسار بأصابعها من التوتر:نعم..
"الله ينعم عليك..شن نوعه تليفونك"
طوبى حولت تليفونها من ع وذنها وشافتله شويه بعدين رداته وقالت؛جالاكسي J5 2016..
"اها تمام.."
تنهدت طوبى وقالت؛كنت برا؟
"ايه كيف خشيت الحوش"
طوبى؛عمل ولاعادي..
"لامش عمل..مانقعدش في الخدمه ديما لوقت متأخر اقصى شي الساعه 5 العشيه..مرات لما تكون في خدمه هلبه..اجتماعات نروح في الليل"
طوبى:فيها سفر خدمتك..
"في البلاد من مدينه لمدينه..قليل النادر مايكون في سفر برا البلاد"
طوبى هزت راسها وقالت؛تمام..
"طوبى انتي امتى تكملي"
طوبى:سنه هادي لا اللي بعدها..
"سنتين مازال تمام..شن تخصصك"
طوبى:في كلية التربيه قسم رياض اطفال..
"جديات!!..نتفكر لما نجحتي شهادة ثانويه كنتي من الاوائل بوك دار مهرجان ع نجاحك..توقعت تقري طب"
طوبى ابتسمت وقالت:شوف اني من واني صغيره كنت نبي نكون مدرسه زي اختي سدرة..بس بعدين كل ماقعدت نكبر طريقه تفكيري تتغير واهدافي بدت محدده اكثر..واني نحب الصغار هلبه نعشقهم..فاخترت نخش رياض اطفال...
"خشيتي التخصص هدا لأنك تحبي الصغار بس!؟"
طوبى:ايه..لأن مرحلة الطفوله اللي تسبق القرايه اهم مرحله..
المرحله هادي كيف بنقولك...يعني بلغة المهندسين..هي مرحلة وضع حجر الاساس لمشروع بناء الانسان..اللي يتعلمه في هالمرحله يقعد معاه لأخر حياته..واني يعني صاحبة تجربه قريت في روضه واللي تعلمته فيها مأثر عليا لتوا..
فيعني حاطه في بالي اني حنعلم الصغار بعدين هلبه حاجات وهما في العمر نغرسها فيهم غرس بش كل مايكبروا تكبر معاهم..ضحكت وقالت..ان شاء الله فهمت عليا بس..
"فهمت وهلبه"
طوبى بإبتسامه:وحاجه تانيه يعني كيف انت استغربت التخصص متاعي رغم اني في الثانويه كنت من الاوائل..اني لما نخش شي لازم ندير جهدي فيه مش لأني بنخش تخصص مايحتاجش معدل عالي ناخدها بالجو...
"حلو...بس احني مشكلتنا في العقليه متاعنا يعني اللي يجيب معدل قوي لازم يخش طب ولاهندسه..التخصصات تانيه بالنسبه لينا درجة عاشرة"
طوبى؛صح..انت توا خشيت هندسه لأنه تخصص درجه اولى؟
ضحك وقال..
"لا لإني نحبها.."
طوبى ابتسمت وقالت؛هدا علاش ناجح فيها..
"تو انتي شن كنتي تسمعي عني شن يقولوا الناس عليا قدامك..انتي شن انطباعك عليا"
طوبى حكت رقبتها وقالت:الناس كلها تشكر فيك ناجح محترم خلوق عنده حكمه..احسن ولاد عيلة شنيببه..وهكي..
"وانتي"
طوبى:من غير زعل..
ضحك وقال..
"مانضمنلكش بس قولي عادي نحاول نتقبل"
طوبى ضحكت بعدين قالت:متكبر شويه..فيك غرور..
"اني!؟"
طوبى؛ايه مش زي خوتك..نحس في المهدي ونضال وعمر ع طبيعتهم اكثر منك انت 
"يعني اني متصنع مثلا"
طوبى؛لا مش متصنع..بس يعني داير لروحك برواز خاص ماتبيش الناس تشوفك برا منه....
"تو اني هكي ياطوبى حسيتي اني نتعامل معاك هكي قبل"
طوبى:نحس فيك كنت تحب تضحك عليا زي اللي شايفني قاعده طفله مانعرف شي..بصارتك عليا ومناشبتك واسلوبك معاي كانوا يبينوا هالشي..وهادي بروحها علامه توضح انك شخصيه فيها شي من التعالي..
هو قعد ساكت..
وهي كذلك سكتت وتراجي في رده..
تنهد وقال..
"صراحه اني متفاجئ فيك هلبه..انتي معديه عمرك بمراحل بعقلك هدا"
طوبى بضحكه:وهدا دليل تاني ع صحة وجهة نظري فيك..
ضحك وقال..
"تمام اني اسف لو ضايقتك بتصرفاتي قبل..بس يشهد ربي اني كنتي تعزي عليا هلبه ونحب ناشبك بالقصد لأن ردة فعلك حلوه هلبه لما تتنرفزي...ع فكرة انتي نرفوزة شويه"
طوبى؛مانحسش في روحي في هكي مش عارفه..
"ياودي تو نعيشوا بعض وكل واحد يشوف التاني زين بعدين ويعرفه كويس"
ابتسمت طوبى بخجل بعدين قالت:تمام..بنسكر توا...
"ياساتر بالدقيقه والثانيه حاسبتها الساعه11 ميت موت سكرنا خلاص"
قعدت تضحك وهي تقول:تصبح ع خير.
"وانت من اهله ياطوبى هانم"
نزلت التليفون وسكرت وهي تضحك..
الشعور اللي كانت تحس بيه وقتها مريح هلبه..ومخليها يوم عن يوم تتقبله اكثر وتتعود عليه اكثر...
☘اما هو فكان عايش معاها شعور عمره ماعاشه قبل..
شعور يختلف تماما عن اللي عاشه مع نجاة..شعور نساه في نجاة نفسها..اطفى توهج نجاة ومسح بريقها في عيونه...
🍃ونجاة كانت ملاحظه عليه هالشي كويس..
كانت حتنجن ومش عارفه كيف دير بش ترده ليها قبل ليضيع منها نهائي..
☘☘☘☘☘
في وحده من المنتزهات..
كانوا صغارها يلعبوا في الالعاب..
وحداها ولدها الصغير في كروسته...
وهي تسمع في اختها شن كانت تقول..
صابرين:تعرفي كيف تجيبيه بكيد النساء عزيزتي..
نجاة بإنزعاج؛كيد نساء شني انتي التانيه معاش ينفع بكل..
صابرين:لاينفع...حركي غيرته هبليه..امشي للخدمه وانتي ع اخر طرز..لبس ميكاب عطور...خلي العيون تاكلك وين تشوفك..وهو اكيد مش حيتحمل لأنك في النهايه مرته ووقتها تعرفي كيف تسلحبيه مرة تانيه..
نجاة:بس هدا يقعد مؤقت ياصابرين..مؤقت...الفرخه هادي اللي اسمها طوبى واضح انه بدت تعجب فيه وبدي يميللها..
صابرين:شن غير رايه فيها؟
نجاة؛ماكانش يعرفها كويس..اني نفسي مااقتنعتش بكلامهم عنها البنت...وسكتت وهي منغاضه ع الآخر..
صابرين؛تمام نجاه...انتي توا لازم تخدمي ع حاجه وحده انك تحافظي ع زواجك..اعرفي كيف تجبدي راجلك ليك من غير جو النكد الزايد الرجاله اسهل طريقه طفشيهم بيها النكد يانجاة...ماتعطيشي الفرصه..للمره المليون نقولك تحملي تحملي تحملي بس توصلي..تحكمي في اعصابك ومشاعرك..
نجاة:باهي وبعدين..
صابرين؛بعدين خليه لبعدين اهم شي توا لازم تكوني عاقله وتتصرفي بذكاء..لما تحسسي الجالي انك متقبله اللي قاعد يصير وتحسسيه ان راحته مهمه عندك..في من تكلم وين كنت من شفت الاسئله هادي حوليها من قاموسك بكل بكل..
خليك المراة اللطيفه المريحه اللي ينسى معاها همه ومايقدرش يستغنى عنها...وحاولي تحملي نجاه..
نجاة وهي تفكر في كلام اختها:نحاول..نحاول...
🍀🍀🍀🍀🍀
وتمر الأيام....
والجالي كل ماله يزيد ينشد لطوبى لدرجة انه مش قادر يتخيل يعدي يوم مايكلمهاش فيه او يشوفها..
هداها هاتف جديد نوع "آيفون" تقبلت منه الهديه وردتها بساعه...الجالي قبلها منها بس لأنها منها هي وقعد يلبس فيها هي بس...
ونجاة كانت تنفد في وصايا اختها..اللي خلت المشاكل تكبر بينها وبينه بالذات بعد جت في يوم للشركه وهي قمة في الفتنه...كان حيطلقها لكن هي قعدت تترجا فيه وجعاته ولقي روحه حان عليها ومسامحها..
ومن وقتها ولت مطيعه اكثر من قبل ومعاش سببتله اي ازعاج..بس مع روحها كانت مقهورة وتسحن وتفكر بخوف في اللي حيصير فيها القدام لما الجالي يتزوج طوبى...
🌸من جهة تانيه..
دارو في كلية الطب حفل تخرج دفعة اميمه..
الحفله حضرها جدها وخوها يوسف وعمر راجلها..
هي الخريجين في تخصصها لبسوا ملابس اطباء الجراحه واليونيفورم الابيض والسماعات تحت بدلة التخرج...
بعد ماوزعوا عليهم الشهايد..طلعوا برا وحولوا الكابات وصوروا مع بعض بلبس المهنه...
كان منظرهم حلو بالمرة..
وعيون عمر المغرمه مافارقتش اميمه للحظة..
اعجابه بيها كل ماله يزيد..
بشخصيتها بطموحها..بكفاحها في قرايتها..كيف غيرت من نفسها وطورت من شخصيتها..
واصبحت محط اهتمام واحترام محيطها..
كان فخور بيها هلبه...ويحمد في ربي اللي خلا وحده زيها من نصيبه...
طبعا بعد الحفله كانت مع جدها علي الواعر..
او بالأحرى جدها مايبيش يخليها مكر في عمر...
وعمر كان عارفه..واميمه كذلك اللي كان عاجبها الجو اللي يدير فيه جدها لعمر...
جابت مصورة للحفله..
خدتلها هلبه لقطات مع جدها وفي اكثر من مكان في الكليه...
وعمر يتفرج من بعيد وخلاص...
ومش بس عمر...العيون اللي قعد بس نصيبها من اميمه النظر بحسره..
معاها وين ماتمشي وكانت فرحانه بس لأن هي فرحانه..
☘علي:خلاص بريله..
اميمه بضحكه:مني..
علي:الجرو ولد شنيبه..
اميمه عقدت حواجبها وقالت بضحكه اعتراض:جدي!
علي بغيظ:كلب في مرة وحده..
اميمه ضحكت بإستسلام ومشت لعمر..
وعمر يشوفها كيف تضحك فهم ان جدها كان نازل فيه..
وصلت فيه..
هو حط يده وراها وقرب باس جبينها بعدين قال:مبارك يااحلى دكتورة في الدنيا..
اميمه بضحكه:الله يبارك فيك يااحلى كابتن طيار في الدنيا..
ضحك وقال:فرحان بيك هلبه ياعمري وفخور بيك ورافع راسي..لما سموا اسمك وشفتك وانتي تاخدي في شهادتك زدت حبيتك اكثر واكثر ..
اميمه وعيونها اللي لونهم ولى اخضر تعبوا دموع وقعدت تقول:حبيبي انت..
باس جبيتها مرة تانيه وقال:ماننحرم من هالعيون ياربي..
اميمه؛ولامنك حبيبي..
بعدين التفتت نادت ع المصورة وقعدت تاخدلهم في لقطات مع بعض...
والعيون هديكا تشوفلهم بحسرة بعدين قال صاحبهم..
"ان شاء الله ديما سعيده وفرحانه"
🍀وروحوا لشارع القهوة بالنوبه...
اللي هيجوا عليها ولاد الشارع...
واول نوبه يحضرها ربيع اللي هيج فيها لين قال بس...
🌸البنات من روشن دار الخزين اللي فوق السطح..
اريج: شكله ربيع هدا مطرشق..
الاء بضحكه؛وتلاقى مع نضال...
طوبى بإبتسامه:محلاهم يوسف وعمر كيف يرقصوا مع بعص..
اميمه كانت تشوفلهم وهي مبتسمه..
اريج:الجالي تقول رئيس حكومه مربع ايديه ويتفرج وهو مبتسم برسميه..
طوبى:الجالي من يومه هكي رزين وشخصيه..
البنات مع بعض:اشييييه..
ضحكت طوبى وقعدت تشبحله كيف واقف يتفرج عليهم وهولابس نظارات..وجنبه المهدي حاط ايديه ورا ظهره ويتفرج عليهم..
وكانوا يضحكوا ع حركات نضال وربيع ومحمد المهدي...
نضال اللي اريج كانت معاه بعيونها وتضحك عليه بصمت وفرحانه لما شافاته رجع جوه حلو زي قبل بعد ماتغير لفترة بسبب اللي صار بينهم أخر مرة..
🌸وبدت صور حفل تخرج تنزل ع الفيس...
نزلت صور ليها وكلهم كانت عاطيه فيهم بالظهر...
وحسين كان يتفرج عليهم وهو فرحان بيها وعلقلها تعليق حلو اثر في كل من قراه وتفاعلوا معاه كلهم ماعدا طوبى اللي اكتفت بتفاعل مشاعرها...
(اختي وفخري ونيشان اللي علقته ع صدري من قبل لنولي عسكري..دمتي ناجحه متفوقه متميزة...دمتي فخر لخوك حسين)
🌸وبعيد عنهم...
كانت غرفه عايشه احلى ايام حياتها مع عبد الرؤوف..
القسوة والجفاء والحرمان اللي شافتهم معاه اول زواجهم..
انقلبت لدلال مابعده دلال..
كان يلقى مايخليهاش تمشي ع الأرض..
اللي في خاطرها يجيها طول..حتى لو حطت عينها عليه من غير ماتتكلم..
وهي كل ماله تحبه وتموت عليه اكثر واكثر...
☘"قال بنعيدوا غادي"
سدرة:وشن بنته العيد غادي ياكبدي!
"حتكون بنته زي العسل دامهم مع بعض ياسدرة"
ضحكت سدرة وقالت:والله ماقلتي الا الصادقه..ربي يهنيهم ويسعدهم دوم ويصرف عنهم كل شر..
"اللهم امين.. هي مانعطلش عليك.. سلمي ع العيله وكل سنه وانتم طيبين"
سدرة؛ يوصل..كل عام وانتي بخير يانبيله..بالسلامه
"بالسلامه"
سكرت سدرة ومشت خشت للكوجينه وقالت:مش مروحين لبعد العيد..
طوبى؛مش قتلك غرفه قالت مددوها شهر...
سدرة تنهدت وقالت؛ربي يهنيهم ويسعدهم..
طوبى:اللهم آمين..خشي قعمزي في الصاله مع بوي وعمتي شويه وجايبه القهوة...
مشت سدرة طلعت من حداها..
وهي قعدت تجهز في السفرة..ولما كملت..
جابت ورد الفل ونثراته في السفرة بطريقه حلوة..
ولما جت بترفع.
جتها رساله ع تليفونها..
طول مشت خداته من فوق الدولاب..وفتحت الرساله..
(جمليتي..نبي نتعشى من ايديك)
ضحكت وقالت؛ياربي شن بنديرله..شن بنديرله!؟
خل نديرله شاورما...
بدت تكتب بعدين بعتتله..
(شاروما)
بعتلها..
(ان شاء الله سم سقوطري المهم انتي دايرتيه)
وطوبى تضحك وتضحك لين عيونها دمعوا..
بعتتله (بعيد السو..) وفي جنبها رموز تعبيريه ضاحكه..
بعدين حطت التليفون في مكانه..
ومشت خدت السفره طلعتها للصاله..
بعدين ولت بسرعه طلعت من الفريز صدور دجاج وحطتهم في الميه...
☘هو فهالوقت..
درس السيارة داخل العماره اللي ساكنه فيها نجاة وصغارها..
نزل ونزل معاه بضاعة جايبها..
وركب بيها فوق..
وصل في الشقه وحط الحاجات  قدامه..ورن الجرس..
لحظات وسمع جوري تقول..
"منو"
الجالي:عمو الجالي افتحي..
فتحت البنيه الباب وقالت:عمو..
هو خداها ورفعها في حضنه وقال؛ماما قاعده..
ع جية نجاة لما شافاته طارت من الفرحه..
نجاة بإبتسامه:اهلا جالي تفضل.
الجالي:اهلين بيك..كيف حالك..
نجاة:الحمد لله..خش مانقعدش برا..
الجالي:لا والله سامحيني مستعجل..
جبتلك بضاعه ترفعيها معاك لحوشنا يوم الوقفه..وغدوة بإذن الله بنجي نطلع الصغار ناخدلهم حوايج..
نجاة بلعت ريقها ودموعها معبيات عيونها ابتسمت بالغصب وقال:باهي..
هو نزل جوري وقال:غدوة نطلعوا مع بعض موتيلكم مفاجات..
قام نظراته شويه وغمز لجوري..
وهي صفقت وقالت:امتى يجي غدوة..
ضحك ولبس نظارته وشبح لنجاه لقاها تشوفله بنظرة وجعاته..
ابتسم وقال:تو نهدرزوا..وطبس وخدي الحاجات ودخلهم داخل...وهي تشوفله بألم وشوق ودموعها بينزلوا خلاص..
بعد مادخل الحاجات قال:السلام عليكم..
ومشي نزل من الدروج..
وهي طلعت وراه قعدت تشبحله ودموعها ينزلوا..
جوري:ماما عمو جابلنا شكلاطه..
مسحت دموعها وهزت راسها..وخشت للشقه وسكرت الباب...
☘☘☘☘☘
روحت هي وولدها من السوق..
خشوا للحوش وولد في يده اكياس عليها علامات ماركات مشهورة...
ع وجهه باديه ملامح الفرح..
ومش مهتم لملامح الهم المسيطره ع وجهه امه..
لاقتهم اخته لما شافتهم قالت..
آلاء:اووو عزو..وريني شن خديت وريني..
معتز بإبتسامه:تعالي شوفي..
امهم قعدت واقفه تشبحلهم..
وهو يوري فيها وهي تمدح وتشكر في ذوقه اللي هد حيل امه...
آلاء:كله واااو عزو...
معتز:جديات!
آلاء:والله حاجه صح..
تنهدت فردوس وقالت؛توا وقفتني عمتك في السور وقالت العيد السنه هادي في حوازة عمك..
شبحتلها بصدمه وقالت:علاش!؟
فردوس:مانيش عارفه..
آلاء بنرفزة:شن ماعندناش وين نذبحوا وحني ساكنين في سانيه هكي كبرها!
فردوس:غريبه..توقعتك تفرحي غير يقولوا بنمشوا حوازة عمك كان تلقي طيري غادي..
آلاء قعدت تشبح لأمها كيف تتكلم وهي متنرفزة بعدين قالت؛سحيقتهم وسحيقة اللي عندهم..
ومشت خشت للدار..
فردوس بإستغراب؛خيرها اختك؟.
معتز خدي الكياس ومشي لداره وهو يقول:مش عارف..
وخلا امه تفكر في ردة فعل بنتها اللي كانت غريبه عليها جدا...
☘☘☘☘☘
الساعه 9:00ليلا..
واقفه قدام الباب وفيدها كيسه وتستنى..
رن تليفونها..
فتحت باب الحوش..
درست سيارته قدامه مباشرة..
ابتسمت وطلعت مدتله الكيسه من الروشن وقالت:صحتين..
هو خداها وقال:ع قلبك جميلتي..
ابتسمت بخجل وقالت؛تصبح ع خير..
وخشت سكرت الباب..
وهو ضحك بعدين تحرك لحوشهم..
وعيون المهدي وهو مقعمز في المطحن وع وجهه باديه ابتسامة حسرة..
☘والجالي في جنان الحوش..
قعمز وحط الكيسه ع الطاوله..
الجالي:الله ع الريحه الله..
وطلع سندويتشات الشاورما اللي كانت لافتهم طوبى بالسلفر..
خدي وحده وفتحها وطول كلي..
غمض عيونه وهويقول:اممم..امم..ياربي شن هدا...!
فتح عيونه وطلع تليفونه من جيبه واتصل بيها..
ردت عليه...
"عجباتك"
هو قال؛عادي العرس لبعد العيد ع طول..
قعدت تضحك طوبى..
🌸واستمروا يهدرزوا هما الزوز والجالي يناشب فيها مازحا..
وهي مرات تضحك ومرات تعطي في ع راسه وهو ع قلبه زي العسل...
☘ونجاة تبكي عليه وهي راقده زي الميته ع سريرها...
تتفكر كيف تعامل معاها اليوم وكأنهم مش اكثر من كنه وسلفها...
حاليا مجبرة تتحمل وتصبر..وتتجنب اي شي يثير غضبه ويعطيه فرصه انه يخليها...
بس لأمتى بتقعد حبيسة الصبر والخوف!!!؟....
🍀🍀🍀🍀🍀
ويخش شهر ذي الحجه...
وبدت صيامهم طوبى ومعاها عمتها مطيره..
هما بس في حوش الواعر اللي بيتوا نية صيامهم التسعه كاملات السنه هادي..
ومن حوش شنيبه...الجالي وعائشه مرت المهدي...
الجالي قرر يصيم بسبب طوبى اللي رغباته في صيامهم بطريقه غير مباشرة من كثر ماتكلمت ع نيتها صيام الأوائل من ذي الحجه لأول مرة..
طوبى كانت حاطة اهداف بتحققهم في هالأيام..
اولهم ختم القرآن في تسعه ايام...
تانيهم انها تشارك في دفع صدقات للصندوق الخيري متاع الشارع بش يشروا اضاحي للناس المحتاجه..
واخرهم انفقت هي وعمتها يتبادلوا ع مشتده وقت غياب فايزة..بس تكسب اجر العنايه بها..
هدا غير الاذكار اللي تمسكت بيها هلبه وضاعفتها.
بالذات تاج الذكر اللي وصلت بيها تقوله في اليوم حوالي ألف مرة..
كانت تعرف ان الأعمال اجرها مضاعف في الأيام المباركه لهدا استغلتها خير استغلال..
والله سبحانه وتعالى يشوف في عملها..يشوف فيها كيف قاعده تحاول تتقربله ودير في هدا كله بقلب صافي ونيه صافيه...بش يرضى عنها ويقربها..
ولله در اللي زي طوبى اللي قال عنهم ذو الجلال والإكرام...
¤والذين ءامنوا وعملوا الصالحات طوبى لهم وحسن مئاب¤
🌸🌸🌸🌸🌸
التاسع من ذي الحجه...
الساعه 12:00قبل الظهر..
في الدار اللي كان قاعد فيها يوسا تلفزيون وربيع جاره موصله خيط من الستالايت متاعه بش يتفرج ع القنوات اللي يبيها..
هو وقتها كان حاط ع وحده من القنوات الناقله لأعظم حدث يصير كل عام الوقوف بعرفه...
وهو يتفرج كان يشوف في مشاهد لناس فوق الجبل تدعي وهي تبكي..تأثر بيهم هلبه..
تأثر بيهم وهو يتفكر اللي قراه عن اليوم هدا في الكتاب اللي هدتهوله طوبى...
اكثر شي شد يوسا لدين الإسلام..
هو ان الاتصال بالخالق وطلب المغفره والعون ماكانش يبي واسطه لابابا ولاقسيس ولاراهب...
الاتصال بالله عند المسلمين كان يبي بس قلب حاضر..
وهو القريب الذي يجيب دعوة الداعي اذا دعاه...
وبش يغفر الذنب يكفي الندم الصادق...
يوسا فهم ان اله خلق قلوب جميله زي قلب طوبى اللي رغباته في الاسلام...
هو بذاته جميل لدرجة مايتسوعبهاش عقل...
لذلك الابصار لاتدركه..
وجعل النظر اليه اعظم جائزة في الجنه...
قعد يسمع في العبارة اللي تتردد وتتكرر بإمعان...
لبيك اللهم لبيك..
لبيك..لاشريك لك..ليك..
ان الحمد والنعمه لك والملك...لاشريك لك...
لاشريك لك...
واحد لا ثاني له..
فرد لم يلد ولم يولد ولم يكن له كفوا احد...
لا ثالث ثلاته...ولاولد له...سبحانه وتعالى عما يصفون...
قام يده وحطه ع الصليب اللي معلقه في رقبته ودموعه عبوا عيونه وهو يشوف في الحجاج ويسمع...
لبيك اللهم لبيك..
لبيك لاشريك لك لبيك...
إن الحمد والنعمة لك والملك...
لاشريك لك...
جبد السلسله بقوة من رقبته وقطعها...
والدموع انهمرت من عيونه..
كان حاس بشعور يستحيل وصفه من جماله...
ناض من مكانه ومشي طلع من داره..وسكر وراه الباب..
وتوجه طول لحوش لطفي..
كان وقتها محمد المهدي برا واقف ع واحد من صحابه يهدرزوا..
انتبهله وين سمعه يدق ع حوش لطفي..
☘وفي حوش لطفي..
كانوا سدرة ومطيره في الكوجينه باديين يطيبوا في الفطور..
وطوبى مسكرة عليها الدار..
كانت تختم في القرآن...
ولطفي كان مقعمز في الصاله يتفرج ع وقفه عرفة وهو يردد في التلبيه..
سمع صوت الباب الخارجي يدق..
نقص الصوت بش يتأكد..
ولما تأكد..ناض ومشي بيطلع ع جية مطيره تقول...
:الباب يطق ..
لطفي وهو ماشي:سمعته...
طلع برا..ومشي للباب الخارجي طول وهو يقول..
مني...؟!
"يوسا عمي لطفي"
فتح لطفي الباب وقال:اهلا يوسا تفضل..
يوسا ودموعه في عيونه:شكرا..
وخش داخل..
ولطفي سكر الباب وقال:تفضل تفضل..
يوسا:نبي نقول حاجه ضروري..
لطفي بإستغراب:ان شاء الله خير قول..!
يوسا:نبي الاسلام عمي لطفي..
لطفي بدهشه؛كيف تبي الاسلام!؟ قصدك بتخش الاسلام!؟
يوسا؛نعم عمي لطفي..
الفرحه اللي حسها لطفي وقتها ليه سنين طويله ماحسش زيها..
حضن يوسا وهو يضحك ودموعه في عيونه يقول:الله اكبر..الله اكبر...! الله يايوسا ياولدي قداش فرحتني..
ويوسا مبتسم ودموعه زي السيل..
☘داخل..
في دار البنات..
طوبى:قل أعوذ برب الناس○ملك الناس○إله الناس○ من شر الوسواس الخناس○الذي يوسوس في صدور الناس○ من الجنة والناس○¤
سكرت المصحف..وقال:ياذا الجلال والاكرام اكرمني بان تجعلني من المقربين الذين لهم روح وريحان وجنات نعيم..
"طوبى"
استغربت في الطريقه اللي ناداها بيها بوها..
ناضت حطت المصحف ع جهة ومشت طلعت من الدار..
سمعت زغرودة عمتها مطيره..بعدين سدرة..
طوبى وهي مبتسمه بدهشه:خيركم شن صاير!؟
لاقاها لطفي وهو يضحك ويمسح في دموعه:يوسا استسلم يابنتي استسلم..
حطت ايديها الزوز ع قلبها وهي قالت بذهول:ياربي!
سدرة جتها ودموعها ينزلوا ضمتها وقالت:ربي استجابلك يابنتي انتي...
طوبى بدت تبكي وهي مازال مش مصدقه؛يوسا ولى مسلم خلاص..ولى مسلم....
لطفي بدموع:توا بيمشي معانا للجامع وقت صلاة الظهر ويلقنه الشيخ الشهاده..
مطيره ودموعها في عيونها:يابختك ياطوبى يابختك دخلتي كافر للإسلام..
طوبى ماكانتش مستوعبه هي صح سعت للشي هدا هلبه بس لما صار..ماصدقتش انه صار لأنه شي عظيم..
شي كبير...مش أي حد يقدر عليه..
البنت ماعرفتش تعبر عن فرحتها غير بالبكي..
ضم في سدرة وتبكي وتقول..
الحمد لله ياربي..الحمد لله..
سدرة وهي تبكي :الحمد لله..
ويوسا واقف في الجنان ويسمع..
فرحتهم بيه خلاته يزيد يتأكد انه خدي احسن قرار في حياته في هاليوم المشهود..
رجعوا يزغردوا مطيرة وسدرة مرة تانيه..
وهو يسمع فيهم ويضحك ويمسح في دموعه..
☘زغاريدهم انسمعوا في الشارع..
بدايه بصفيه واميمه اللي مشولهم يجروا..
لعند حوش شنيبه..
☘في الكوجينه..
وعائشه ونجاة يطيبوا في الفطور..
عائشه:صوت زغاريط..
نجاة:حتى اني سمعتهم نحساب روحي نتخيل..
ع خشة مغليه وهي تقول؛صوت زغاريط جاي من حوش لطفي..
نجاة بدت ع وجهها ملامح الكره..
عائشه؛غريبه زعمه شن عندهم؟!
شويه خش محمد وهو يقول:يام..حناي..
قدمت عائشه وهي تقول:شن في محمد؟
محمد وهو مبتسم ودموعه في عيونه؛يوسا النيجيري بيسلم..
عائشه بفرح؛الله اكبر!
مغليه بإبتسامه؛الله يبارك..
ع نزلة نضال والجالي من فوق..
نضال؛شن هالدوشه شن صاير!؟
محمد؛يوسا النجيري بيسلم..
الجالي وهو متفاجئ:قول والله!
محمد بفرح:والله العظيم جي لحوش جدي لطفي قاللهم وجدي لطفي توا طالع معاه ويخبر في ناس الشارع..
الجالي طول مشي من حداهم..
شبحوله بعدين مغليه قالت بإبتسامه؛خطيبته السبب..
عائشه:ايه والله قداش ليها سنه لتوا تحاول وربك راد اليوم..انقذت الراجل من النار..مسحت عائشه ع ذراعها وقالت..لحمي ناض شوك شوك..
وهما يهدرزوا ع طوبى..
ونضال سرق نظرة لنجاة وشاف ملامح وجهها ماتبشرش بالخير..
حس بشي من الخوف وهو يقول..
"يستر الله"
☘☘☘☘
وفي شارع القهوة العيد جي قبل وقته..
والناس طالعه تهني في يوسا ويسلموا عليه ويحضنوا فيه
وهو فرحان ع الآخر بردة فعلهم...
الجالي وهو ضام يوسا:مبارك يايوسا مبارك وربي يثبتك ياغالي..
يوسا:آمين..
قالها بطريقه حلوة وكلهم حبوها منه...
ربيع:اني اليوم بندير فطور جماعي بلاش بهالمناسبه..
يوسا؛نعرف عمال مسلمين يعيشوا في ****** تقدر تبعت لهم الفطور..
ربيع:تم..
وقعدوا ناس الشارع يهنوا فيه ويهدرزوا عليهم وهو فرحان بيهم..
☘ولطفي داخل واقف قدام دار بناويته يراجي في طوبى..
طلعت وفي يدها بوكس سوريه عربيه وكيسه فيها عطر الشيشة الصغيره ومسك...
حطتهم فوق بعض وقالت:قداش ليا واخدتهم واني متفائله يجي هاليوم واهو الحمد لله جي..
خداهم بوها...
بعدين ضمها بيد وحده وباسها ع راسها وقال:ربي يحفظك يابنتي ربي يرضى عليك دنيا وآخره...
طوبى وهي مبتسمه ودموعها تنزل؛آمين يارب العالمين...
طلقها بوها وقعد يشبحلها للحظات..
وهي تشوفله ودموعه ينزلوا...ضم شواربه لداخل بقوة بعدين وهو شاددموعه بعدين مشي من حداها..
وطوبى غمضت عيونه وخدت نفس عميق بعدين فتحتهم وزفرت وقالت من وسط قلبها..
"الحمد لله.."
☘☘☘☘☘
"خود يايوسا هدا من طوبى"
الجالي قلبه بدي يدق بقوة لما سمع اسمها وهو يشوف للحاجات اللي خداهم يوسا من لطفي وسمعه قال..
يوسا؛قول لها سندعيلها هلبه طول حياتي..
هز لطفي راسه وهو مبتسم بألم وفرح..
والناس اللي حواليهم قعدوا يقولوا باصوات متقطعه...
"ربي يحفظها..في ميزان حسناتها.."
والجالي يسمع فيهم ..وشعور اتجاه طوبى كل ماله يكبر..
هو ماكانش فاهم شعوره هدا اذا كان اعجاب..
او مجرد انبهار زي اللي حسه اتجاه نجاة مع الوقت بدي يخف..
لأنه شعور مش مفهوم ماعرفش يترجمه..
كل اللي كان عارفه ومتأكد منه..
ان فرحان اللي طوبى كانت من نصيبه وتخصه هو بس دون عن كل الناس....
☘☘☘☘☘
علموا يوسا طريقة الغسل...
اغتسل...
ولبس السوريه العربيه اللي خداتهاله طوبى..
ودار من المسك وتعطر..
بعدين مشي مع رجالة الشارع للجامع وكان وقت صلاة الظهر قريب..
وصلوا للجامع.
وخشوا بيه داخل..وحكوا للإمام اللي ماسك الجامع قصته..
تحمس انه يلقنه الشهاده بش يصلي معاهم اول صلاة ليه في  حياته..
الشيخ:توا تبي تخش الاسلام يايوسا لازم نوازولك اسم تاني قنين يمشي معاك..
يوسا ابتسم وقال:عند هني اسم...واشر ع راسه..
الحاضرين كلهم يشوفوله بإبتسامه..
الشيخ ببشاشه:شن هو ترا؟
يوسا..
"بلال"
الشيخ:الله اكبر..
والحاضرين عجبهم الاسم اللي اختاره..
واضح انه قاري قصة بلال بن رباح وكان ليها تأثير كبير عليه..
الشيخ؛احسن مااخترت اسم جميل جدا واحسنت التيمن بالصحابي الجليل"بلال بن رباح"..
ابتسم يوسا وهز راسه بإيجاب
الشيخ حاوطه من كتافه وقال:هي توا اسمعني كويس ورد وراي..
يوسا:حسنا..
الشيخ:اشهد..
يوسا:اشهد..
الشيخ:ان لا إله..
يوسا:ان لاإله..
الشيخ:إلا الله..
نزلوا دموع يوسا وهو يقول:إلا الله..
ومسحهم طول..
الشيخ:وأشهد..
يوسا:اشهد..
الشيخ:أن محمدا .
يوسا:أن محمدا..
الشيخ؛عبده ورسوله..
يوسا؛عبده ورسوله...
وصاحوا في الجامع وهما يقولوا 
"الله اكبر"..
والشيخ حضن يوسا...
او اللي ولى اسمه بلال...بعد ماطلع من ظلام حياة مالقاش نفسه فيها..
لنور حياة تانيه لقي فيها نفسه اللي كانت تايهه عنه...
ويابخت من خدي بيده ووراه الطريق...
كل عمل صالح حيدير بلال في حياته فهاللحظه يصب في ميزان حسنات طوبى لأخر يوم في عمره....
وااه يابختك ياطوبى...وياحظك ياطوبى حزت الدنيا بما فيها...
▪️قال #رسول_الله - ﷺ - :

" فوالله لأن يهدي الله بك رجل واحد خيرلك من حمر النعم ".

•📒[ رواه البخاري ]

#الا_انت
#طوبى

...يتبع....