طوبى الجزء الاول

تابع

(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_الحادي_والخمسين"اهرجو يناير3"
《معظم أحداث هذه الرواية حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫🚫ملاحظه🚫🚫
اي تعليق عنصري حيتم حظر صاحبه
اي تعليق فيه سخريه ع ثقافه الطوارق حيتم حظر صاحبه
واني هني نكتب في الحوارات باللغه الامازيغيه التارقيه لأعزائي التوارق مش لغيرهم احتراما ليهم وحبا لثقافتهم
نتمنى تكونوا قريتوا هالملاحظه كويس..وشكرا ع تعاونكم مسبقا🌸
☕☕☕☕☕☕☕☕☕☕☕☕☕☕☕☕☕
رن تليفونه...
وقعد يرن..ويرن..
وهو مايسمع في شي غير دقات قلبه..
كان مأسور في لحظه اللقاء مش قادر يطلع منها..
خايف لو طلع منها تطلع حلم من احلام اليقظه اللي ياما حلم بيها وهو فايق..
يفصل الاتصال..ويرجع مرة تانيه..
ويقعد التليفون يرن..ويرن..
وهو ع حاله...
لعند ماجاه واحد..نكزه من ذراعه وقال:ياخوي..
هو هني استاقظ..
شبحله..
:هاتفك ليه ساعه يشرين..!
هو قعد يشبحله شويه مازال قاعد مش واعي للي حواليه..
سمع تليفونه يرن للمره التانيه انتبهله..
رفع حواجبه وقال:اها..الهاتف..!
وطلعه من جيب السروال وعيونه تحركوا بإتجاه القطوسه اللي تاكل من الدجاج اللي حطاته..
بدت ع وجهه ابتسامه حلوة..ابتسامه فرح..وحب..
غير عيونه عنها بالسيف وشاف للتليفون لقي المتصل واحد من زملائه في العمل..
فتح الخط ورد..
عبد القيوم بنبرة فرح:ايوه ياغالي..
"تي وينك ياراجل الساعه تمت!؟"
هو رفع يده اليسار اللي فيها الساعه شافها بعدين ضحك وقال:مسافه الطريق ونكون غادي..
"استعجل"
هو بضحكه قال:حاضر حاضر...
وسكر بعدين رجع شاف للمقعد..
وتخيلها وقت اللي كانت مقعمزة عليه..
شعور الفرح اللي كان حاسه متخليه متمني يحضن اللي يشوفه قدامه..
واخيرا..واخيرا لقاها...
وأمله في أنه حيلقاها يوم من الأيام ماخابش..
احساسه انه حيوصل فيه يوما ما ماخابش..
حط تليفونه في جيبه وهو يمرر في نظره ع مبنى الكليه..
اللي كان يبان قديم وعادي..
بس عيونه شافوه احلى من مبانى كليات جامعه هارفرد..
لأنها تقرا فيها...
خدي نفس بعدين مشي بيطلع والفرحه مخلياته حاس روحه طاير طيران..مايمشيش ع الأرض..
طلع منها ومش متمني يطلع..
وصل في سيارته وبيركب ومش هاين عليه يمشي ويخليها..
وهو واقف ع سيارته شبح للمبني وقال بإبتسامه؛المهم عرفنا مكانها..
وفتح باب السيارة وركب..
شغلها وتحرك طول...
☘☘☘☘☘
مقعمزة في مقاهي النسائي...
كان عندها موعد مع حد..حدداته يوم الأمس بعد ماخدت قرار مصيري بالنسبه ليها..
لحظات ووصل الطرف التاني للقاء..
وقفت عليها وقالت:السلام عليكم..
نسرين وقفت وهي مبتسمه مجامله وسلمت عليها وهي تقول:وعليكم السلام..كيف حالك استاذة نبيله..
نبيله بإبتسامه:شن استاذة هادي حني جيران!..
ضحكت نسرين وقالت:باهي تفضلي قعمزي..
قعمزت نبيله وهي تقول؛شكرا..
ونسرين قعمزت وهي تقول:كيف حالك اليوم؟
نبيله؛الحمد لله..انتي كيف حالك؟
تنهدت بألم وقالت؛مش باهيه بكل..
ملامح وجه نبيله تبدلت للألم تأثرا بملامح وجه نسرين ونبرة صوتها..
نسرين:خل نطلبك حاجه قبل..قولي شن تبي تشربي..
نبيله هزت راسها وقالت:ليمونادا..
نسرين طلبتلها العصير اللي تبيه..
ونبيله تشوفلها وهي مركزة ع ملامح وجهها باين فيه اثر البكي..
شبحتلها وقالت؛سامحيني خشيت في الموضوع من غير مقدمات..
نبيله؛انتي لتوا ماقلتي شي..
شبحت نسرين للطاوله شويه بنظرات ضيق..بعدين قامت عيونها اللي تعبوا دموع فيها وقالت:راجلي مش نس.ونجي وعينه زايغه بس..راجلي واحد نج.س وف.اسد اخ.لاقيا..عرف عليا هلبه..وكانت علاقاته كلها علاقات وسخه زيه..
لما عرفت بأول علاقته بعد ماجبت اول عيل ياما صار فيا واجهته واني مح.روقه منه وهو كان بارد لأبعد حد ولاكأنه داير حاجه..
قالي اني مش اول ولاأخر واحد يدير هكي وياما منهم هكي رجالتهم وعايشين معاهم ومش مدورين الحاجات الت.افهه هادي..بكل برود يتكلم برود شديد ق.هرني..
وماكانش هدا كلامه بروحه..امي واختي قالولي نفس الشي..
قالوا اقعدي ع قلبه وماتطلبيش الطلاق لأنك انتي الخاسرة الوحيده..
سكتت شويه وهي تمسح في دموعها..بعدين خدت كلينكس وقعدت تمسح في انفها..
نبيله قالت:علاش قالولك انتي الخاسرة الوحيده؟
خدت نفس بعدين قالت؛لو اطلقت حنقعد نعاني في العيل بروحي ومعاش يجيني حد..وهو يتزوج ويعيش حياته وكأنه ماصار شي..
ابتسمت نبيله تهكما..
نسرين؛بلعتها ومشيت ضغطت ع روحي وكملت معاه..عشت معاه حياة اقرب للم.وت...كنت نلهي في روحي بالطلوع ودهوير والسفر واللبس والحفلات والعزايم..كنت نعوض في روحي بفلوسه..كنت نحساب روحي قويه لدرجة اني نقدر نعيش معاه واني عارفه انه يخون فيا كل ساعه ومانهتمش..
نتجاهل في نظرات الناس وغمزهم ولمزهم وكلامهم في وجهي ومن وراي..نتجاهل من برا بس ومن داخل قاعده ن.دمر..تعرفي حتى لما قلت لأمه ع اللي يدير فيه كذبتني وقالت ولدي مايديرش هكي ولما جبتلها دليل قالتلي انتي المهمله والمقصرة انتي اللي خلتيه يدير هكي..
واني نعترف اني مهمله شويه بس مش فحقه هو..كنت نشري ونلبس ونقص في شعري ونصبغ ونغير من روحي بش نعبي عينه وهو ولاحاجه اثرت فيه..لدرجة انه حسسني بالنقص حسسني اني مراة ماتعبيش العين وماتنحبش
سكتت وقعدت تبكي بصمت..
ونبيله تشوفلها بملامح وجه متجهمه ونظرات عيون فيها حزن..
رجعت تكلمت نسرين وهي تقول؛حاول يخوني مع اقرب صاحباتي ليا..فايزة تعرفيها..
رفعت نبيله حواجبها..
نسرين:شفته بعيوني وهو شادها يقوللها نطلقها وناخدك..هي طبعا ماعطتاش مجال..بس خلاني نقاطعها وخلاها تقاطعني سنين....
تنهدت من قلبها بحسره وقالت..ولإني عديت هدا كله وفوته تمادى بزياده..ووصلت بيه يجيب النساوين لحوشي ويخوني في داري..تخيلي..
نبيله هزت راسها وهي ساكته..
نسرين؛لما عرفت واجهته وطلبت الطلاق..وهو كانت هادي اكثر حاجه يستنى فيها..بس لما طلبته قال مش مطلق..
قالي لوسكرتي راسك ع الطلاق نطلقك بفضيحه تخيلي!
خفت هلبه..وقعدت معاه نرقد في دار بروحي وهو بروحه..
مش طايقاته مش طايقه المكان اللي حاويه معاش قادرة نتحمل خلاص..لأمس..امس بس سمعته يكلم في وحده ويحدد معاها في موعد..وصلت بيه انه يدير حاجه زي هادي قدامي..شوفي..وقعدت تبكي..
ع جية النادله جابت طلب نبيله وحطاته قدامه..
نبيله؛شكرا..
مشت..
ونسرين هدت شويه وقالت:اني معاش نبي نقعد معاه اكثر من هكي..نبي نرفع عليه قضيه وفي نفس الوقت خايفه يدير اللي قال عليه ويطلقني بفضيحه..كيف ندير بالله عليك قوليلي..
تنهدت نبيله وقالت:لو رفعتي عليه قضية طلاق فحيكون طلاق الضرر..لأن زوجك تسببلك بضرر باللي يدير فيه..بس لازم تثبتي الضرر هدا..
خطر ع بال نسرين الفيديوهات اللي عند ربيع قالت:في فيديو..
نبيله:للأسف القاضي مش حياخد بيه كإثبات لازم يكون في عندك شهود ع الضرر اللي تسببلك فيه زوجك..
نسرين بصدمه:ومن وين بنجيبهم الشهود!؟
نبيله:للأسف هذا القانون الفيديوهات والصور ماياخدوش بيها كدليل قاطع..تلزم اثباتات اقوى..وفي حالتك انتي لابد من وجود شاهد راجل او مراة..
نسرين قعد تفكر وهي مصدومه ماتوقعتش ان الوضع يكون صعب لهالدرجه شافت لنبيله وقالت:باهي المراة اللي يضرب فيها راجلها واللي حابسها ومايصرفش عليها ومجوعها هي وصغارها منين يجيبوا شهود !؟
نبيله ابتسمت تهكما ونزلت راسها بدون ماتعلق..
نسرين:مافي شي في البلاد هادي مع المراة كل شي ضدها..الناس القانون..مافي حد يجي معاها ويدعمها طالب بحقها..كلهم يقولوا اصبري تحملي اسكتي..وكان عندها صغار تتكتف تقعد مجبورة بدال المرة الف انها تصبر وتتحمل..
نبيله؛انتي تبي حضانه صغارك؟
نسرين:لا..
تفاجئت نبيله..
نسرين؛صغاري مايبونيش..
عقدت نبيله حواجبها بإستغراب..
ابتسمت بألم وقالت:هو وامه عرفوا كيف ينفروهم مني ويكرهوهم فيا عارفه اني لما خيرتهم اختاروه هو وامه!..
نبيله قعدت تفكر في كلامها وهي موجوعه ع حالتها..
نسرين؛بس اني توا حامل..عادي نطلق واني حامل صح؟يقولوا الحامل لايقع عليها الطلاق!...
نبيله؛اني مش عارفه الناس منين تجيب في الكلام هدا!؟
الحامل يقع عليها الطلاق عادي وعدتها مدة حملها..المراة مايقعش عليها الطلاق في حالتين بس..الحيض والنفاس..
نسرين هزت راسها وهي تفكر..
ونبيله قالت؛انتي قلتي انه حاول في فايزة ولا؟
شبحتلها وهزت راسها بإيجاب..
نبيلة:ممكن تكون شاهده معاك..
قعدت تشبحلها نسرين وهي تفكر بعدين قالت:باهي وكان كذبها وقال صاحبتها ومتفقه هي وياها..!
نبيله قعدت ساكته شويه بعدين قالت:فعلا لازم الشاهد يكون مقنع هلبه للقاضي..يعني لازم دوري ع حد يشهد معاك وشهادته مايكونش فيها تشكيك..
نسرين فكرت في ربيع..بس مستحيل تجيبه شاهد شهادته حتجيبلها مشاكل ليها اول ماليها اخر..
استبعداته تماما..
بس فجأة جي بالها شخص تاني..
شبحت لنبيله وقالت:عمته..
نبيله بتعجب؛عمته؟
نسرين؛عمته مراة حقانيه هلبه فوق ماتتصوري تشهد حتى ع روحها..مشهوره في العيله بقصة شهادتها ضد خوها اللي بصم مرته ع وراق تنازل عن ملكية ارض ليها بالغصب..
نبيله؛شهدت في المحكمه؟
نسرين:ايه شهدت في المحكمه وخوها انحبس..
نبيله:علاقتها بالعيله شن شكلها؟
نسرين؛كويسه وكلهم يقدروا فيها حتى منه هو...
نبيله؛وامه؟
نسرين:امه قريب تقدسها.
نبيله؛وهي تعز ولد خوها هلبه اكيد..
نسرين؛ايه..بس اني متأكده لو عرفت اللي يدير فيه مش حتوقف معاه..
نبيله:شن يضمنلك..
نسرين:القصه اللي حكيتهالك..
نبيله؛في فرق بين خوها وولد خوها مرات مايهونش عليها..
قعدت ساكته نسرين ومش عارفه شن ترد حاسه روحها يأست..
نبيله؛نسرين اني نبيك وين تجي ترفعي القضيه تكوني ضامنه انها رابحه مليون في الميه مش بس تطلقي وتخلصي لا حتاخدي حقك كامل..
شبحتلها شويه بعدين قالت:خلاص اني بنرفعها وحنمشي في الاجراءات ومش حيعرف حد غيرك انتي..
نبيله:وقصة الشهاده؟
نسرين بتحدي؛خليها عليا اني..المهم حنقعد ع
تواصل معاك الفترة هادي ونخبرك شن يصير معاي..
نبيله هزت راسها وقالت:تمام...حتوكليني وبعدين نبدوا في الاجراءات..
نسرين:تمام..
☘المسأله ولت عند نسرين مسألة حياة او م..وت بأي طريقه كانت حتطلق من حامد بعد تنازلت عن وجود صغارها معاها معاش عندها شي تخاف عليه ولاتخسره..المهم تسترد كرامتها من تحت رجلين راجلها الفا..سق☘
☘☘☘☘☘
"تفضل"
خدي منها ظرف الفلوس وهو بيبكي ويقول:بارك الله فيك يافايزة بارك الله فيك وخيتي طلعتي خير مني طلعتي خير مني يافايزة..
فايزة ماأثرش فيها شي من اللي قاله وقالتله بجفاف وبشدة لهجه:اخر مرة تجيني وتطلب مني شي صدقني حنردك بطريقه احرف من اللي رديتك بيها اول مرة..
هو قال:لالا بارك الله فيك مانبي شي تاني غير ولدي يبرا بس...مش ناسيلك جميلك هدا حيقعد معلق في رقبتي طول عمري يافايزة..خل نمشي نفرح امه مسكينه..
ولف ومشي لمرته اللي كانت واقفه بعيده عنهم في ممر المستشفى وعيونها عليهم..
لماوصل فيها راجلها قالت:شن قالتلك لما عطاتك الفلوس؟
بغضب رد عليها وهو ماشي:ت.في ع الوقت اللي خلاني ننذل لع.قاب مزينه..
وهي ماشيه معاه قالت:كان حاجتك عند الك.ل.ب قوله ياسيدي خليها تن.بح مادورهاش المهم وليدي ربي يشفيه ويرفع عنه..
هو تنهد وقال:آمين..
☘وفايزة قعدت واقفه تشوفلهم وهما ماشيين لين درقوا عنها..
تنهدت..بعدين لفت ومشت وهي تقول بصوت منخفض:لوجه الله بس..كلا انتم ماينفع فيكم خير..
☘☘☘☘☘
طلعت من قاعه الامتحان ومشت وين ماواقفات صاحباتها..
وهما يشبحولها كيف جايتهم..
وحده منهم قالت؛زي ماقتلك..
:تمام..
وصلت فيهم وقالت:ها شن جو الامتحان..
:حلو الاسئله ساهله..
آلاء:اها باهي كان هكي من كثر ماكان ساهل خفت نطلع نرعى..
ضحكت التانيه وقالت؛لالاماترعيش ساهل هالمرة..
:شنو آلاء وأكابر متفقات..
واشرت ع شناطيهم..
أكابر صاحبتها ضحكت وهي تقول:وين زي بعض ياحبيبتي..
قدمت لآلاء وقالت:ترا هاتي بيبي..
عطتها آلاء الشنطه وهي مستغربه..
خدت أكابر الشنطه ورفعت شطنتها ولصقتها فيها وهي تقول:شوفي بيبي قارني واضح الأصلي من المقلد..متاعي اني ماركه مش مقلده..
خدت آلاء شنطتها وهي مضايقه قالت؛مالهاش لزوم حركتك هادي..
اكابر؛اسفه بيبي بس كنت نعلم فيها تفرق بين الماركه والمقلد بس..
آلاء ابتسمت بعصبيه وشبحت لصاحبتهم الثالثه وقالت:ان شاء الله عرفتي الفرق!..
رفعت البنت حواجبها ونزلتهم وهي متعجبه..
شبحت آلاء لأكابر من فوق لتحت بعدين مشت وخلتهم..
ضحكت وحده فيهم واكابر وهي تشوفلها قالت؛بالك تنزل خشمها اللي رافعاته ع الفاضي..
وآلاء وهي ماشيه كانت معصبه ع الآخر دموعها نزلوا..
وهي شاده صوت بكاها...
شويه رن تليفونها..
فتحت الشنطه بعصبيه وطلعت التليفون لما شافت المتصل
ردت طول بعصبيه وهي تقول:شن تبي انت مازال تبي مني برا الهى بخطيبتك..
"آلاء خيرك تبكي!"
الاء:شن دخلك بيا نبكي ولانموت فوتني..
وسكرت عليه..
رن مرة تانيه شافت المتصل حاولت تكون هاديه..
فتحت الخط وردت..
آلاء:ايوه..
"ايوه آلاء خيرك تبكي"
هي تفاجئت بالسؤال حاولت تخلي صوتها عادي مش حيلاحظ انها تبكي من كلمه وحده قالتها..
"آلاء كملتي امتحانك؟"
آلاء؛إيه..
"تمام"
سكر عليها..
هي نزلت التليفون وقعدت دور بعيونها لين شافاته جاي من بعيد..
زي ماشافاته اكابر اللي كانت معجبه بيه لدرجة لاتوصف..
قعدت تشوفله كيف جاي لآلاء ونظرات عيونها كلها غيرة..
وصل فيها وقال:أول شي السلام عليكم..
آلاء وهي منزله عيونها:وعليكم السلام..
مهند؛آلاء قيمي راسك...
قامت راسها بس كانت هاربه بعيونها عنه وهي ترشف..
مهند؛آلاء أشبحيلي..
نزلت دموعها مرة تانيه مسحتهم..
مهند وهو مشدد ع الحروف؛آلاء..اشبحيلي..
رفعت عيونها فيه..
مهند وهو عاقد حواجبه:خيرك؟
آلاء:الامتحان..
مهند:آلاء نعاود نسألك مرة تانيه خيرك..
وهي تشوفله قالت:تعاركت مع البنات..
مهند:شفتكم..تقدري تقوليلي ع شني؟
آلاء نزلت عيونها وهي تقول:كان نقولك تقول عليا سطحيه وتافهه..
مهند:امتى قلت هكي امتى سمعتيني قلت عليك كلام زي هدا..الدوة هادي في عقلك انتي بس..
رفعت عيونها وقالت:باهي بنحكيلك لأنك مصر تعرف...
☘وحكت اللي صار بينها وبين أكابر☘
مهند:هي تافهه وسطحيه مش انتي..
آلاء بحزن:لكن قهرتني هلبه..اصلا ديما تتقصد تهيني ديما..
مهند:وانتي مازال مصاحبتيها!
سكتت ماعرفتش شن ترد..
ابتسم وقال:شن رايك تفوتيهم صاحباتك كلهم وتصاحبيني اني بش .
ضحكت من بين دموعها وقالت:معناها لازم تولي تفهم في الموضه واللبس والمكياج..
مهند خدي شنطتها وقعد مركز فيها وهو يقول:نفهم شويه مش هلبه..غوتشي..
خدتها منه وقالت:واضح مقلده؟..
مهند:خلاص توا فوتي وقوليلي فاضيه خلاص؟
آلاء:ايه.
مهند؛خلاص خلينا نمشوا نقعمزوا نهدرزوا شويه نحكيلك ع موضوع الحلقه الجايه وانتي تعطيني رايك..
آلاء بإبتسامه:باهي..
ومشت هي وياه..
وعيون اكابر اللي كلها غيره عليهم..
مش بس عيون آلاء..حتى عيون وليد اللي كان موجود من قبل مايطلعوا من الامتحان..
ون.ار الغيره تاكل في قلبه..
☘☘☘☘
الساعه 4:45بعد العصر..
والسمي قاعده مسحبه وقرة العنز فارضة سيطرتها..وفي من يدعي  المطر تصب بش يدفى الجو..
وهو العاشق لهالفصل واجوائه...
زاد عشقه اكثر واكثر....
فيه هو تحقق فيه حلم رافقه سنين كان يشوف فيه بعيد هلبه..
والقدر قربه فهاليوم اللي مش حينساه عمره كله..
خش لشارع القهوة بسيارته وع وجهه ابتسامه فرح لاتوصف ولت من تقاسيم وجهه اليوم مافارقته...
درس السياره قدام الحوش ونزل منها وهو يقول بصوت عالي مفخم:ربيع..
ربيع وهو يشوفله بإبتسامه رد عليه بنفس الطريقه:عبدو..
ضحك ومشي فتح باب السيارة الخلفي..
وطلع منه سفرة بكلاوة طويله..
حطها فوق السيارة وسكر الباب..
ربيع:تارقي شني مني؟!
عبد القيوم خدي السفرة ومشي للقهوة وهو يقول:تعال تعال..
جاه وهو يقول:شني مالا حلو مشكلة الضي!؟
عبد القيوم بضحكه:من بعد اليوم معاد بنقول ع شي مستحيل كل شي في الحياة هذي ممكن..
وخش للقهوة وهو يقول:السلام عليكم.
الموجودين كلهم ردواعليه:وعليكم السلام..
ع طلعة نضال من داخل وهو يقول:اوووو شكله اليوم التارقي صايرة معاه حاجه مليحه.
حط السفرة ع طاوله فاضيه وبدي يحول في غلافها وهو يقول:فوق المليحه بوين يانضال بوين..
ربيع:قلت شكله مشكلة الضي انحلت..
نضال:لا هادي تبي ذ.ب.ح وكسكسي ياتارقي..
عبد القيوم:ترا انسولي الضي شويه بالله وهي فرقوا معاي ..
وخدي زوز طروف ومشي يفرق ع الموجودين.
هما بدوا يفرقوا معاه وهما يقولوا..
نضال:باهي قوللنا شن المناسبه بش نفرحوا معاك الواحد بدي يشحت في الفرح شحاته الايام هادي..
ربيع بضحكه:والله صدقت..
عبد القيوم:انتم تحقوا فيا فرحان وطارب ولا..؟! هضا مش سبب بش يخليكم تفرحوا!؟..
ضحكوا وقال نضال؛لاوالله واقوى سبب..دووم ياغالي دوم وربي يفرحنا مافرحك..
ربيع:آمين..
وقعدوا يفرقوا ع الموجودين في القهوة..
ع جية المهدي شافهم شن يديروا..
قعد واقف يتفرج عليهم وهو حاط ايديه ورا ظهره تسائل وهو يقول:من دار فاتحة من ورانا؟
عبد القيوم؛يسمع منك ربي..
ربيع؛قصدك تبي ديرها من ورانا!؟
مش خدي طرف بكلاوة وقال؛مانديرها من غيركم..
وطلع للمهدي وقف قدامه وقال بصوت مسموع للمهدي بس:لقيتها..
ومدله طرف البكلاوة..
المهدي وهو متفاجئ خداه وقال؛ع البركه ع البركه..
طبطب ع كتف المهدي وولى خش داخل..
المهدي؛صحه ليك والله صحه ليك..
نضال:لاااا..هدا ليس عدلا ع قولة بنت اختي نبوا نعرفوا حتى حني..
ضحك عبد القيوم وقال؛تمت..في غيرها..
ربيع؛لا والله شكلها كبيره هلبه ابونضل..
نضال:هلبه..
طلع عبد القيوم من القهوة وهو يضحك..
شاف صغار الشارع مروحين من المدرسه بنات وولاد..
فنص وعقد حواجبه وهو يقول ب.زج.ر:صبي مكانك انت وياها..
الصغار جمدوا من الخوف..
ومنهم تالة بنت فايزة وسدرة بنت المهدي..
سدرة بخوف؛بابا..
المهدي:مافي شي بابا ماتخافيش..
ع جية عبد القيوم بكيسه معبيه شكولاته..
سدرة بفرحه:كيكات!!!..
المهدي:عطيها زوز..
عبد القيوم:شن رايك نعطيهلها كلها؟
المهدي؛هدا الصح..
عبد القيوم ضحك..وقعد يفرق عليهم في الشكولاته وهما ياخدوا وفرحانين..
التونسي طلع من الحلاق بعد ماطلع من عنده زبون وقال؛شنو ياعبدو ناسينا ياغالي!؟
عبد القيوم؛لا والله مانسيت واحد..ثواني بس..
ع خشة سيارة الجالي للشارع..
شافه وهو يفرق ع الصغار في الشكولاته..
درس السيارة قدام الباب ونزل منها والتفت جيهته وقعد يشوف فيه شن يدير..
هو بعد مافرق ع الصغار قال؛هي عدوا روحوا..
مشوا الصغار..
وهو ولى بباقي الكيسه وحطها فوق السياره..
وطلع منها سفرة بكلاوة مدورة..
ومشي بيها طول للتونسي..
وقف قدامه وقاله:تفضل ياغزال الحومه..
ضحك التونسي وخدي طرف وهويقول؛المناسبه؟
عبد القيوم؛وصلت في حاجه تمنيتها واجد.. ومشي بسفرة البكلاوة لصاحب الغذائيه..
والتونسي يقول:الفال لينا ربك يوصلنا..
التارقي؛آمين..
وعطي لصاحب الغذائيه..والتارزي.
وصاحب الورشه ومعاه العمال ع راسهم بلال..
بلال؛اللهم اسعده ديما..
عبد القيوم بضحكه؛يارب..
ولف ومشي بيولي للقهوه قابلوه زوز من اهل الشارع فرق عليهم..
بعدين مشي للقهوة..
الجالي مشي جيهتهم وقف ع المهدي وقال؛خيره هدا.
المهدي:انت خيرك لاوي السمرا ع الحمرا..
الجالي وهو يشوف لعبد القيوم:لابالعكس جوي مليح..
علا صوته وهو يقول؛فرحنا معاك ياتارقي..
ملامح الابتسامه ع وجه عبد القيوم تعكرت ..
تنهد بعدين رسم ابتسامة مجامله والتفت وهو يقول:تاكل حلو؟
الجالي بإبتسامة كبر؛نحبه هلبه..
عبد القيوم؛عطي لخوك طرف يانضال..
خدي نضال طرف ومشي للجالي وقاله:خود..
خدي الجالي منه وهو يشوف لعبد القيوم وهو يشبحله بإبتسامة مجامله..
كلي منها وشويه وقال:من وين واخدها؟
المهدي ركز ع خوه..
عبد القيوم:والله ياغالي دلوني ع احسن مكان يدير فيها خديتها منه..
الجالي؛اللي دلك مايفهمش فيها..ومشي حط باقيها في قردل قمامه قريب ع المقهى..
بعدين مشي للحوش..
وخلاهم ثابتين ع لقطه من الموقف اللي صار..
نضال شبح للمهدي..
اللي كانوا عيونه ع الجالي لين خش للحوش..
شبح لعبد القيوم..
لقاه واقف وهو حاط يده اليسار في نصه وعيونه ع البكلاوة وهو مبتسم...ومن داخله كان مق..هور اللي خلا واحد زي الجالي ياخد منها..
ربيع ضحك وهو يحاول يرطب الجو قال؛خلاص معناها الليله عشانا عندك يا تارقي..
المهدي قاعدين عيونه ع عبد القيوم وهو يراجي في رده..
شبح عبد القيوم لربيع وقال بإبتسامه؛مرحبتين بيكم..
ع جية سيارة حسين..
كان مروح ببوه من المستشفى ومعاه عمه لطفي..
وصلوا للحوش وخشله بالسيارة..
وهما يشبحوا جهة الحوش..
☘وفي داخله..
ماكان في حد طالع يستقبل في عبد المطلب..
نزل حسين وطلع اللكرسي المتحرك من الكوفني..
ولطفي نزل فتح الباب من جهة خوه..
جابله حسين الكرسي..
وتعاونوا عليه هما الزوز ونزلوه وركبوه الكرسي 
عبد المطلب كان محطم نفسيا وحاس بضعف وعجز من داخل نفسيا اكثر من الضعف ووالعجز اللي صابوا جسده..
دخله دف بيه حسين الكرسي وخشوا للحوش..
ماكان في حد مدوره ولامهتم لوجوده..
مافي من قابله لهفه وخوف وقاله..حمد لله ع السلامه..
وصلوا بيه للدار اللي بيقعد فيها..
دخله حسين وهو يقول:هادي دارك بوي..
هز عبد المطلب راسه وهو مش قادر يتكلم..
ولطفي خوه يشوفله بألم وهو متأسف ع الحال اللي وصله..
🍀فهالوقت.
كانت بنته اميمه في المستشفى..
انهكت اليوم في الخدمه..
وانهكها التفكير المستمر في حالها ووضعها مع عمر..
كانت واقفه مع زملائها ع الدكتور قصي اللي كان يشرحلهم عن حالة بيديرولها عمليه فاليوم التالي..
لاحظ اميمه اغلب الوقت سرحانه ومش معاهم..
بعد كمل قال:تمام شباب نشوفكم غدوة ان شاء الله..
كلهم باصوات متقطعه؛ان شاء الله..ان شاء الله دكتور..
اميمه مشت طلعت من غير ماتتكلم..
هو طلع وراها وناداها؛اميمه..
تنهدت بتعب والتفتت وشبحله وقالت؛نعم دكتور؟
قصي:ماكنتيش معانا بكل ..
اميمه بضيق:اسفه دكتور بس الفترة هادي ظروفي ملخبطتني شويه.
قصي:دكتورة انتي بتولي جراحه لازم تتعلمي تفصلي حياتك الخاصه عن الخدمه ارواح ناس حتكون بين ايديك..
اميمه هزت راسها وقالت:عندك حق دكتور..
☘ومن اخر الممر..
يجي عمر وهو لابس زي كابتن الطيارة..
جاي من المطار للمستشفى طول..
شافها واقفه تكلم فيع يعرفه المسؤول عن مجموعتها..
بس وقفته عليها ماعجبتاش..
اميمه لأنها عاطيه بالظهر ماشافتاش..
لكن قصي لمحه..رسم ع وجهه ابتسامه ود وقال:ماضايقيش روحك اني وراك وحنساعدك عارفك مجتهده وحتوصلي يوم من الايام لمكانه تستاهليها اللي زيك مفروض عليها نوقفوا معاهم..
اميمه ابتسمت مجامله وقالت:شكرا دكتور..
وقف عمر قريب عليهم وع وجهه واضحه ملامح العصبيه قال:السلام عليكم..
التفتت اميمه وهي متفاجئه قالت:عمر!..
عمر:خلاص كملتي خدمه؟
اميمه؛ايه..
عمر بشي من العصبيه:هيا وتي روحك وتعالي..
اميمه انحرجت من الاسلوب اللي كلمها بيه قدام قصي قالت؛باهي ومشت خشت للمكتب..
وقصي يشوفله من فوق لتحت..
اما عمر رفع حاجبه بكبر وحط ايديه في جيوبه ومشي تباعد عنه شويه..
قصي"مادامه هكي حيوصلك للي تبيه بسرعه ياقصي"
شويه طلعت اميمه ومشت بسرعه وهي معصبه..
وعمر لحقها وهو يقول:اميمه اميمه..
هي قعدت تمشي ومابتش ترد عليه..
جي جنبها بالزبط وقال:شن الحركات هادي .
اميمه وهي معصبه:اسأل روحك..
هو سكت وقعد يمشي معاها..
قعدوا ساكتين لين طلعوا من المستشفى..
مشوا الزوز للبركيدجو..
هي طول توجهت لسيارتها..وهو وراها..
جت بتفتح باب السواق..
هو شده وقال:هاتي المفتاح..
اميمه بحده؛سيارتي..
عمر:جيبي المفتاح اميمه كان تبي تطلعي من هني بهدوء .
شبحتله بغضب بعدين حطت المفتاح فوق السيارة بقوة ومشت بتركب جنبه..
وركبوا السيارة وطلعوا من حدود المستشفى..
وانفجر فيها عمر..
عمر:شن الاسلوب والحركات هادي كيف تتعاملي معاي هكي قدام الدكتور هداكا..
اميمه؛اسأل روحك..
عمر بعصبيه؛ردي باهي...
اميمه قعدت ساكته ومابتش تتكلم عناد فيه 
شبحلها شويه بعدين ضرب ع الدومان وقال: ملاحظة روحك ملاحظن..ملاحظه كيف وليتي رافعه خشمك ومش عاجبك حد من تحسابي روحك انتي من تحسابي روحك وليتي قوليلي..
اميمه ابتسمت تهكما وقالت:مانحساب روحي شي ولاشي اصلا قدامك وقدام عيلتك اني ولاحاجه..
ضحك سخريه بعدين قال:قسما بالله مسكينه انتي والله مسكينه عندك عقدة نقص تبي علاج..
اميمه شدت روحها بقوة مابتش تبكي قدامه ولاترد عليه..
قعدت تشبح القدام وبس.
وهو كمل يقول وهو معصب:نكلم فيها هني تكلم فيا غادي..
شن هالمراة المتخوخمه اللي طيحني فيها ربي..
وهي تسمع فيه وقلبها كان يتوجع من الألم..
ليها فترة ملاحظه انه متغير معاها وكأنه في من معبيله راسه عليها..وهي تمشي وتفوت وتتجاهل لعند ماوصلت بيه يتعامل معاها بأسلوب يقلل من احترامها قدام الدكتور قصي..ماقدرتش تفوتله...
بس لما لقت ان النقاش معاك ممكن يوصلهم لنقطه لارجوع منها سكتت..
هو بعد ماقال اللي في خاطره قعد طول الطريق ساكت..
كلام امه واخته خديجه ع مشكله الس..رقه اللي صارت لحوش الواعر سمم تفكيره ناحيتها..
وتعليقاتهم بالمقارنات بينها هي وطوبى كان يزيد يشحن فيه..
والمشكله ان طريقه كلامهم ماتكونش مباشرة يعني يعلقوا من غير مايجيبوا سيرتها وهدا اللي مخليه مش قادر يناقشهم..
وصلوا للحوش..
خشوا داخل..
اميمه جت بتنزل هو قاللها؛بري طول لحوش العيله..
نزلت وسكرت الباب بقوة..
طول نزل بعدها وسكر الباب بقوة حتى هو ولحقها...
شافها خشت لحوش العيله..
مشي طول خش بعدها..
قعد يمشي وراها لين وصلت الصاله وخشت..
مررت نظره ع الموجودين فيها..
طوبى عائشه نسرين مغليه..
ومعاهم الجالي والمهدي ونضال ومحمد شنيبه..
اميمه؛السلام عليكم..
كلهم ردوا؛وعليكم السلام..
مشت اميمه لمحمد شنيبه سلمت عليه وباست راسها..
بعدين  مشت طول لعزوزتها وسلمت عليها..
وطوبى معاها بعيونها لاحظت انها مش ع بعضها..
محمد شنيبه؛حمد لله ع السلامه ياكابتن..
عمر بإبتسامه:الله يسلمك بوي..كيف حالك توا..
محمد:اللهم لك الحمد في احسن حال..
عمر:الحمد لله..
بعدين سلم ع خوته كلهم..ومشي لأمه سلم عليها..
مغليه:حمد لله ع سلامتك وليدي.
عمر ؛الله يسلمك يام شن حالك..
مغليه:الحمد لله..شن حالك انت وليدي..
عمر:الحمد لله ع كل حال..
ومشي قعمز جنب خوته..
وامه تشبح لأميمه بطرف عينها..
وهي كانت تهدرز مع سلفاتها وحماتها..
مغليه؛مالا ماحضرتيش بوك لما روح..
كلهم شبحوا لأميمه..
اميمه شبحت لمغليه وابتسمت بالغصب وهي تقول:انشغلت اليوم هلبه الجدول معبي عمليات..
مغليه:باهي ع اقل توا طقيتي فيه انتي وعمر..
محمد؛خيرك مارفعتهاش لبوها..
عمر شبح لأميمه وقالت؛ماقالتش واني مانعرفش انه مروح اليوم..
اميمه قعدت ساكته ماعرفتش شن تقول..
طوبى:حتى اني مامشيتش بعد العشي نمشوا مع بعض..
مغليه:هكي من راسك ياطوبى؟
الجالي بإبتسامه:ماديرش حاجه من غيرما تشاورني يام قالتلي لما نروح من مدرسة تعليم القياده بنمشي نشوف عمي..
مغليه بإبتسامه:عارفتها غير كنت نشوف شن بتقول بس..
ابتسمت طوبى مجامله..
وعمر يشوف لاميمه بحده وهي تشوفله بضيق..
نضال:باهي يام توا شن بيصير في محي راجل خديجه؟
مغليه؛غدوة بيتسقدوا لتونس..
المهدي:والله يتعبوا في الراجل ويقلقلوا فيه ع الفاضي الدكاترة هني داروا اللازم وزياده..
محمد:مع المهدي في كلامه مصاريف زايده اللي خداته منهم المصحه فات العشرة آلاف.
مغليه:مش مهم ياحاج الفلوس يمشوا ويجوا المهم صحته البنادم..
نضال؛باهي امتى بيروحوا..
مغليه:الاحد الجاي ان شاء الله..
نضال:ع هكي لازم تبدوا تشقوا بموضوعي..
المهدي:كان تمشوا تعطوا فيها كلمه يام لين تروح خديجه..
مغليه شبحت لمحمد وقالت:شن رايك ياحاج؟
محمد شنيبه؛الراي عند بنتنا طوبى..فيها كيف يمشوا النساوين لحوش اختك ويعطوا كلمه..
طوبى وهي مبتسمه بشي من الارتباك؛والله ياعمي شن بنقولك عمتي تكلم اختي وتشوفها..
محمد؛وهدا اللي لازم يصير..خلاص يامغليه انتي كلميهم وشوفي شن يقولوا..
مغليه بإبتسامه؛ان شاء الله..
ابتسم نضال..
الجالي:الا ع سيرة الخطبه والجو هدا صاحبك التارقي اللي يفرق في البكلاوة بكري خطب حتى هو ؟..
المهدي:لالا موضوع تاني يخصه..
مغليه وهي مبتسمه:بعتلنا منها..
الجالي:وان شاء الله كليتوها؟
نسرين؛وعلاش لا..تهبل ونوعيتها ما شاء الله بكلاوة طرابلسيه صح..
الجالي؛وانتي همك بطنك بس.!
طوبى قعدت تشبحله بضيق..
نسرين بزعل:خزي عليك باهي..
نضال:اني نبي نفهم انت خيرك مع الراجل شن ريت منه !؟
المهدي؛ماخشش مزاجه..
الجالي؛قلت ماارتحتلاش الناس اللي زيه اللي يحاولوا يدخلوا رواحهم بأي طريقه ويديروا في ارواحهم كويسين زياده ع اللزوم مش صافيين..
عمر:بالعكس نحس فيه رسمي شويه مش خاش في الناس كلها ومايفرض في روحه ع حد..
المهدي:مزبوط..
الجالي بإبتسامه ساخره؛ماشاء الله العيله كلها عاجبها الا اني..
المهدي:ديما هكي انت مش اول مرة..
طوبى ركزت في اللي قاله المهدي بعدين شبحت للجالي..
محمد:الراجل محترم وماريناش منه الا كل خير ويعتبر ساكن عندنا يعني قدره من قدرنا..
المهدي:وفوق هكي براني وجاي من اقصى الدنيا ووحداني وماعنده حد...
مغليه:باهي خلاص مش لازم من هالمحاضره هو قال رايه فيه ماقالش بنلزه..
محمد:الجالي وتعرفيه كان ماتقبلش حد يحطه في راسه..
الجالي شاف لطوبى لقاها تشبحله بنظرة فيها استنكار..
رجع شاف لبوه وخوته وهو يقول:شن تقولوا قدام المراة خوفتوها مني.
ضحكوا..
نسرين بإبتسامه؛ماعندها علاش تخاف المهم انت شني معاها واني نشوف فيك حاطها في عيونك..
مغليه؛يعامل فيها زي الملكه..
المهدي؛لأنها تستاهل المعامله هادي..
شبحت عائشه لطوبى بإبتسامه..
وطوبى تشوف للمهدي بإبتسامه وهي تقول:بارك الله فيك عمي مهدي...
محمد؛ماقال الا الحق..كنايني كلهم يستاهلوا احسن معامله واولهم بنت الاصول عيشه بين الشيخ جويده..
المهدي شبح لعائشه وقال:عايشه بروحها ماتنحط جنب حد..
نسرين صفقت وهي تقول:اوووو..
وعائشه كانت تبتسم بخجل وهي تقول:ربي يحفظك عمي ويطول في عمرك...
محمد:ويحفظك بنتي..
مغليه في نفسها" نفختهالنا يامحمد شن يفشها توا"
ناض المهدي وهو يقول:ماتحسبونيش في العشي..
ناض معاه نضال وقال:ماشي لعبدو؟
هز المهدي راسه..
نضال؛ماشي معاك..
الجالي ناض ومشي طلع من الصاله من غير مايتكلم لأنه مش متحمل يسمع شي عن عبد القيوم..
طوبى:نستاذن..
مغليه؛بري بنتي بري..
ومشت طول طلعت ورا راجل..
المهدي:السلام عليكم..
كلهم ردوا؛وعليكم السلام..
ومشوا طلعوا هو ونضال..
محمد؛وين عشانا ياحاجه؟
مغليه شافت لأميمه وقالت:نوضي اميمه جيبي لعمك العشي..
محمد:خلي نسرين تنوض المراة مروحه تاعبه..
عمر:لاتاعبه لاشي بوي..نوضي اميمه نوضي جيبي لبوي عشاه..
ناضت اميمه مجبورة وفي  داخلها كانت في صرخه مكتومه تبي طلعها...
بس من برا كانت تبان هاديه وهي تقول:حاضر..
محمد؛سامحيني في تعبك بنتي..
اميمه بإبتسامه؛تعبك راحه عمي..
ومشت طلعت من وهي شاده ع قبضه يدها اليسار وعائشه لاحظتها وقالت في نفسها"ربي يكون في عونك يااميمه"

#اهرجو_يناير
#طوبى

.....يتبع في التكمله بإذن الله....