طوبى الجزء الاول

الجزء السابع والخمسين

#طوبى "جنة طوبى"
#جمان_فريد
#الجزء_السابع_والخمسين"بلا وداع"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
يوم الجمعه..
الساعه 7:30صباحا..
ماكان في حد في الحوش فايق غيرهم هما الزوز..
هي في الكوجينه دير في القهوة...
قهوتهم..الزعيم..
وهو كيف نزل من الجناح ومشي خش عليها للكوجينه..
شافها واقفه ع الرخامه وعاطياته بالظهر..
مشي قعمز ع الكرسى ورا الطاوله وهو قعد يشبحلها..
تفكر اللي صار امس..
اللي قدر يتفكر تحديدا اللحظه اللي ضماته فيها وقعدت تقرا عليه..
فهم انه وقت جاته الحاله ناداها هي وهما كلموها ..
غير عيونه عنها وسرح في الفراغ وقعد يفكر في المصيبه اللي نزلت عليه كيف بيدير فيها!؟...
هي فهاللحظه خدت السفره والتفتت وجاته بيها..
حطتها قدامه وقعمزت مقابلاته..
شبحلها وقال؛حسيتي بيا لما خشيت؟
هي قالت؛ريحتك..ريحة عطرك..
ابتسم وخدي فنجان القهوة وشبح للسفره وهويقول؛استاحشتك نشوف الفل في السفره الصبح..شبحلها وقالت..استاحشت نفيق الصبح واني نشم ريحة الياسمين اللي يعلق فيا لما نرقد عليه..استاحشت نشوف ضحكتك ونسمعك تتكلمي وصوتك فيه نغمة فرحة هكي تخليني "بوزتيف" اليوم كله...عارف والله عارف اللي قاعده تمري بيه وحاس بيك..لكن...
قعد يشبحلها بنظرات حد عاجز عن التعبير..
بعدين غير عيونه عنها وشرب من فنجانه وقعد ساكت..
هي بضيق ردت عليه؛نبيك تتعود..
شبحلها..
تنهدت بضيق وقالت؛قصدي تتعود ع وضعي الجديد..في غياب سدرة ربي يردهالنا في هلبه حاجات تغيرت..يعني بوي حيقعد بروحه صح عمتي معاه لكن ماتقدرش دير شي بروحها..اصلا انت مش حيتغير عليك الوضع اكتر ايام الاسبوع تروح من الخدمه متأخر واني نقعد بروحي..وبشي من الخجل قالت..وصراحة نخاف هلبه غير مانبيش نقولك..
هو قال؛تمام بس في ايام نروح فيهم بكري نبي نروح نلقاك قدامي الحوش مانخشلاش وانتي مش فيه..
هزت راسها وقالت؛تمام..نمشي في الايام اللي تروح فيها انت متأخر شن رايك؟
وافق ع مضض وهز راسه وهو ساكت..
هي بشي من التردد قالت؛وحاجه تانيه..
هو قعد يشبحلها ويراجي فيها تتكلم..
هي خدت نفس وقالت؛مدرسة سدرة اختي تبي حد يمسك مكانها ويمشيها..واني تخصصي نفسه تخصص سدرة يعني نقدر نمسك الادارة..
الجالي ضيق عيونه وقال:انتي!؟..ضحك وقال..شن تحسابي الادارة صبلي نشرب..
بدت ع وجهها ملامح الجديه وقالت بنبرة مختلفه؛عارفتها مش ساهله ومش مستحيله نستفيد من خبرة غيري وتو نتمكن..انت الادرى بالحاجه هادي..
هو بإستغراب؛اني!..
طوبى:ايه انت استلمت الشركه اللي انت تخدم فيها في عمر صغير..
ضحك وقال؛ايه..بس قبلها خدمت وتمرست وماكانش عمري 20سنه..راك مازال طفله كان مشيتي  يحسابوك طالبة جديده..وقعد يضحك..
هي قعدت تشبحله كيف يضحك بعدين قالت؛بس اني متزوجه..ومادامني متزوجه يعني معاش صغيره..
هو هدا ضحك وقعد يشوفلها شويه بعدين ابتسم وقال؛نبصر عليك..
طوبى:عارفه..بعدين بنظرات رجاء قالت..شن قلت..؟.
خدي الفنجان وشرب منه بعدين قال:وقرايتك؟
طوبى ؛نقدر نوفق بيناتهم..
الجالي:طوبى لو لقيتك مقصرة في حوشك بتفوتي..
هي بلهفه:يعني باهي!؟
هز راسه وهو ساكت..
شدت ساعده وقالت بإبتسامه؛ربي مايحرمني منك..
حط يده ع يدها وقال:همي كله راحتك قلبي واللي تبيه اني نديره..وراهو الفترة اللي فاتت قعدت بعيد عليك بش مانضغطش عليك..عارفه في حالة الحزن تحبي تقعدي بروحك..
هزت راسها وقعدت ساكته..
وفجأة بدت ع وجهها ملامح البكاء ودموعها نزلوا بصمت..
هو مسحهم وقال؛خلاص حبيبي..ياسرك بكي مايغير شي راهو..ادعيلها بس..
رشفت وهزت راسها موافقه لكلامه..
وهو يشوفلها بضيق ع حالتها بعدين رسم ع وجهه ابتسامه وقال:اقعدي للغدي ع خاطري بعدين امشي لحوش بوك..
مسحت دموعها ويدوب ابتسمت مجامله وهي تقول؛حاضر..
☘☘☘☘☘☘
"وكان نوضت وحده فينا وخبرتها"
مطيره وهي توتي في الفطور:عارفينها وين بتمشي راجلها هني قدام وجهها لما يقوللها تعالي بتمشيله وانتي بروحك اعرفيها..
فردوس:عارفه..بس انس خفت عليها عارفه وضع نفسيتها كيف بعد اللي صار لسدرة فكرت في حاجه..تأففت وقالت..استغفر الله وخلاص..
مطيره بفزة؛بعيد السو..
رفعت السفرة وهي تقول..جيبي الخبزة..
مشت طلعت...
وفردوس خدت سلة الخبزة ولحقتها...
☘☘☘☘☘
"بروا انزلوا انتم"
محمد بقلق؛قصدك امي مريضه للدرجة هادي!؟.
المهدي؛برده وحصلتها ع بطنها اكيد بتعبها..انزل انت وخوتك وكان بتركبوا اركبوا بعد الغدي..
هز محمد راسه وهو يقول؛حاضر..ومشي وفي داخله قلق ماقدرش يعبر عنه..
اما بوه..
ولى لدار النوم خشلها..
لقاها مازال راقده بالنوم..
خشلها وقعمز حداها ع السرير وخدي تليفونها وخش ع النت يبحث عن اهم اسماء أطباء الأورام في تونس...
☘☘☘☘☘
الساعه 1:30ظهرا..
في  دار المعيشه في حوش شنيبه..
خديجه؛معاش ديروا هكي قدامها وردوا بالك يام تقوليلها كلامك هدا...بعدين ترفع خشمها وتقعد تتمنن عليه وعلينا وتحساب روحها صاحبة فضل..لازم تعرف ان هدا واجبها تجاه راجلها مادارتش حاجه خارقه...هلبه يديروا زيها وخير منها..في اللي يعانوا في مشلولين ومبتروين وفي اللي طول الوقت عقله مش معاه..وخيي لولا حالته هادي خديناله اللي تسوى مية منها..
مغليه وهي تسمع في خديجه شويه الامتنان والخجل اللي كانت حاستهم اتجاه طوبى انمسحوا..واقتنعت قناعة تامه بكلامها..
اما نسرين اللي كانت مضايقه لأبعد حد مابتش تناقش خديجه بش ماتعلاش اصواتهم وتسمع طوبى..
خديجه؛ياحنه تتخيل اللي صاير مع الجالي.صار بعد ماتزوجوا..راجلها ولازم تقعد معاه ع الحلوة والمرة..
مغليه:مزبوط كلامك صح..هدا واجبها..
خديجه؛وفهميه لبوي كلامي هدا وخليه يقعمز ويهني روحه حتى هو..خليكم عاديين جدا وكأن مافي شي صار..
مغليه؛خلاص تو نشده ما يروح من الصلاة ونكلمه..
تنهدت خديجه وقالت؛واللا التانيه وينها؟
مغليه بتهكم؛خوك بعت صغاره الصبح يفطروا هني وقالي قبل ليمشي للصلاة احسبونا في الغدي عيشه مريضه شويه..
خديجه:عليك علامة خايبه تعلمها حتى هو جو الدسدسه اللي يديروا فيه واضح تتوحم..
مغليه؛ياودي ماظنيش ياخديج..شكلها معدتها متعبتها..
خديجه؛انتي اللي طيبه وع نياتك يام..
نسرين؛باهي خلاص خديجه اسكتي سدرة هني تو تسمعك..
رفعت حاجبها وقالت؛وينها هي؟
نسرين؛تقري فيها طوبى في الصاله..
🍃وفي الصالة..
طوبى:في حاجه مش واضحه؟
سدرة بإبتسامه؛لالا خلاص فهمت..
ابتسمت وقالت؛باهي حلي باقي التمارين بنفس الطريقه خل نمشي نشوف الغدي..
سدرة؛باهي..
ناضت طوبى وهي تقول؛شويه وجاياتك..
ومشت طلعت من الصاله..
وتوجهت للكوجينه...
وين خشتلها وشمت ريحة التطييب حست بالغثيان..
حطت يدها ع فمها شويه بعدين حولتها وهي تقاوم في شعور الغثيان..
وقفت ع الغدي..
حببت الكسكسي..وهي منقرفه من الريحه هلبه..
بعد كملت تحبيب الكسكسي حببت الرز اللي داراته ع خاطر نضال..
وبعد كملت مشت بسرعه طلعت من الكوجينه وخشت للصاله..ومازالت باينه ع وجهها ملامح القرف..
طوبى؛كملتي؟.
سدرة وهي تكتب؛شويه بس..
قعمزت طوبى وخدت تليفونها من ع الطاوله وهي تقول؛تمام..
خشت ع التطبيقات..
تحديدا لتطبيق معين..فتحاته وقعدت تشوف فيه..
تفاجئت هلبه وين ركزت ع حاجه فيه كانت فايته عليها وناسيتها..
وفي نفسها قعدت تقول"43 يوم!!...فات الموعد قريب ب...15يوم...!"
قعدت تفكر هلبه...
والنتيجه اللي وصلتلها..خوفتها هلبه وضايقتها في نفس الوقت وقالت بضيق:مش وقته بكل..
شبحتلها سدره..
غمضت عيونها وقالت بندم؛استغفر الله..استغفر الله العظيم واتوب إليه..
سدرة؛خيرك ابله طوبى؟
شبحتلها وقالت؛شي حبيبتي..شني كملتي؟
سدرة؛ايه..وناضتلها بالكراسه ومدتهالها..
وطوبى خدتها وقعدت تشوف في الواجب وعقلها في عالم تاني..
☘☘☘☘☘
ومع الساعه 2وربع روحوا الرجاله من صلاة الجمعه..
في الشارع..
كانوا الجالي ومهدي ماشيين مع بعض وهما مروحين..
ووراهم بمسافه مش كبيرة...
عبد القيوم كان ماشي بروحه وعيونه ع الجالي..
يشوف فيه كيف يمشي ويتكلم وكأن ربي ماخلقش غيره..
الناس التانيه غير عبد القيوم مايشوفوش للجالي بهالنظره لأنهم مايعرفوش حقيقته اللي يعرفها عبد القيوم كويس..
لكن اللي كان قاهر عبد القيوم..
ان حبيبة عمره...نصيب واحد زي الجالي..
"خيرك معاش تعدل"
شبح يساره بعدين شبح القدام وقال؛شن حالك..
حسين؛انت اللي شن حالك وشن صار فيك وشن اللي خلاك طلعت من الشارع بعدين وليت؟..
تنهد وقال؛مافي شي ينحكى ياغالي هي بالسلامه..
ومشي بإتجاه الحوش وخشله وحسين واقف يشوفله بإستغراب...
فات ربيع من جنبه ومشي ورا عبد القيوم وهو ينادي:عبدو..
وخش داخل..
اما حسين وهو مستغرب مشي كمل طريقه للحوش..
☘وهو ماشي فات من جنب الجالي والمهدي اللي خشوا للحوش..
المهدي:راكب نبدل..
الجالي هز راسه وقال؛تمام..
مشي المهدي في طريقه..
والجالي خش للحوش..
شويه وخشوا وراه نضال والحاج محمد..
نضال:كان تخليها غدوة الصبح ياحاج..
محمد؛لازم اليوم يوصلوا هدا الموعد اللي عطيته للراجل..
نضال هز راسه وقال:تمام..تمام..
ومشي بسرعه للدروج وركب..
اما بوه كمل طريقه لدار المعيشه وهو يسمع في صوت الهدرزة جاي منها..
وهو ماشي..
فات من قدام الكوجينه..
اللي فيها الجالي مع مرته وهي تسقي في الغدي.
الجالي:حطي الموزة راك تنسي..
طوبى اللي كانت مش طايقه تشم ريحة الماكله قالت؛باهي..
الجالي:المشروب ديري بيبسي وبتري..
هزت راسها وقالت؛حاضر..
هو بعد ماعطاها توصياته مشي طلع من حداها..
وخلاها توتي في الغدي وهي معصبه من حمواتها اللي ولا وحده فيهم كلفت نفسها ودارت معاها حتى السلاطه..
"مرت عمي"
طوبى وهي تحط في الكواشيك؛خش محمد خش..
خش محمد وقعد واقف في الباب وهو يقول؛واتي غدي التارقي..
هي ردت تقول؛هونا ع الدولاب بعدين تعالى ارفع غدي امك..
محمد:تمام..
ومشي خدي السفرة وطلع..
☘☘☘☘☘
علق فرملته وهو يقول..
الصيد؛افتحي الموضوع مع نجاح قبل وشوفي رايها كان البنت قالت باهي بنعطيها الراجل كويس ماينردش..
نجمه بضيق:حتى اني عاجبني لكن عواطف ياحاج..
قاطعها وقال؛عواطف مفروض تفرح لأختها بالك تلحقها..مشي قعمز ع السرير بيحول شخشيره وهو يقول..معاش نبيهم يقعدوا في رقبتي اكثر ماقعدوا..
سكتت نجمه وهي تفكر بضيق في وضع بناتها..
الصيد؛اطلعي قوليلهم يسقدوا ارواحهم غدي الجمعه مايعطلش..
نجمه؛حاضر..
ومشت طلعت من حداه...
☘☘☘☘☘
"كان بتاكل كول"
ربيع؛هو جايك انت..
عبد القيوم؛ماعنديش فيه نيه..
وفتح الدولاب وطلع منه حكة تن..
ربيع وهو يشوفله بإستغراب؛عبد القيوم خيرك؟ ملاحظك مش طبيعي من هداكا اليوم..
وقف اللي يدير فيه وشبحله بتساؤل وهو عاقد حواجبه..
ربيع:اليوم اللي طاحت فيه بنت الواعر...
ملامح وجهه تغيرت وبدي ع وجهه الارتباك..
غير عيونه عنه وقعد لاهي بغداه اللي يدير فيه من غير مايعلق بكلمه...
هز ربيع راسه وقال:تمام..امتى تحس روحك تبي تحكي كلمني..سلام..
ومشي طلع وخلاه وهو متوتر ومعصب في نفس الوقت..
حتى غداه اللي داره خلاه...
شبح للسفرة اللي بعتوها حوش شنيبه...
وفي لحظه..
تخيل..
لو تكون هي مدايرة الغدي..
وان الغدي اللي جاه قبل يكون حتى هو من ايديها هي..!
قدم للسفرة وهو يشوفلها..
بنظرة فيها رغبة شديده انه ياكل اللي في السفرة كله ومايخلي شي...
وفي لحظه كذلك..
تبدلت نظرة عيونه الراغبه لنظرة نفور شديد..
خلاته ياخد السفره ويطلع بيها من الكوجينه ويرفعها لوجهة معلومه...
☘وفي حوش شنيبه..
كلهم تغدوا من الغدي اللي داراته طوبى وهما مستمتعين بنفسها الحلو في الطبخ..
بينما هي كانت تاكل بالسيف...
وتشارك فيهم في احاديثهم مجامله..
وهما كانوا عاديين جدا يهدرزوا ويضحكوا وجوهم عال العال ولاكأن في شي صاير...
وكان نفس الحال للقاعدين في المربوعه..
وفي مكان طوبى كان المهدي..
اللي ياكل معاهم مجامله وعقله مع مرته..
🍃اللي قاعده فوق تقرا ع شيشة ميه في الرقيه...
وبعدمارقتها قعدت تشرب منها ع أمل ان اوجاعها تهدا حتى شويه وتشد روحها للموعد مع الدكتورة...
☘☘☘☘☘☘
"اني بنمشي بنرقد كابس عليا النوم"
مغليه؛بري ارقدي بري..
ناضت نسرين ومشت طلعت من الدار..
خديجه؛خلاص سدره معاش تبي؟
سدرة:ايه عمتو..
خديجه حولت من غليها الشرشاف وقامت السفره ومشت طلعت بيها من الدار..
وطوبى لمت الشرشاف ومغليه تقوليلها:وتي الشاهي للرجاله..
طوبى؛حاضر..
ناضت بالشرشاف وهي تسمع في مغليه تقول لسدره..
"نوضي اغسلي فمك بنتي"
طلعت طوبى من الدار وتوجهت للكوجينه..
وتجي خديجه من الكوجينه وهي متوجهه للدار..
طوبى وصلت في الكوجينه وخشتلها..
حطت الشرشاف ع تركينه..
سخنت الشاهي وجهزت سفره..ورنت ع الجالي..
شويه جاها محمد..
"الشاهي واتي"
تنهدت طوبى وقالت؛خش محمد..
خش عليها لقاها تلم في الماعين ع بعض..
قال:ربي يعاون..
طوبى:سلمك..اهيا..واشرتله ع السفره..
هو خداها ومشي طلع بيها وهو مضايق..
حال طوبى وهي حاصله بروحها في الكوجينه فكره بحال امه قبل..
وطوبى كانت مضايقه ع الآخر لانها منجبره تكمل جميلها بدون ابداء اي اعتراض حتى بملامح وجهها..
حرفيا طوبى كانت تتجنب في المشاكل وتخاف منها خوف مش طبيعي...
☘☘☘☘☘
بعد العصر...
طلع المهدي بعائشه من الحوش..
وفهموا الصغار انهم طالعين يغيروا جو..
وطبعا هالمعلومه وصلت للعزوز وبناتها..
🍃خديجه وهي مبتسمه بتهكم؛شكله رافعها تشوف وضع الحمل..
طوبى وهي متفاجئه:عيشه حامل؟
خديجه:ايه ياحنه ودسدس خايفه من العين..
مغليه بتهكم؛خدينا عليه ياخديج..
نسرين بضحكه؛ردي بالك ديريها طوبى بش ماتنحطيش في القايمة السودا..
مغليه؛مبردك انتي والدوة اللي تدوي فيها..
ونسرين تضحك..
خديجه؛لالا نانسي طوبى ماديرهاش مش ليهل الحركات هادي..
ابتسمت طوبى مجامله وهي تحاول تخفي توترها..
نسرين بضحكه؛عارفتها غير نبصر عليها..
مغليه؛غير عجلوا بنتي نبي نفرح بصغويرة الجالي..
طوبى هزت راسها وقالت: ان شاء الله..اصلا خلاص بعد السمستر هدا ان شاء الله..
هما قالوا بأصوات متقطعه؛إن شاء الله..
ع خشة سدره بكراسة الواجب قالت؛ابله طوبى خلاص كملت..
طوبى؛ترا هاتي..
خدت منها الكراسه وقعدت تشوف فيها..
ومغليه تشوفلها..
طوبى؛الله يبارك عليك سدره..
سدرة؛كله صح؟
طوبى بإبتسامه:ايه كله صح..ربي يحفظك..
مغليه؛ويسلمك..
ناضت طوبى وهي تقول:تسلمي عمتي..معليشي عمتي توا بنمشي لحوش بوي..
مغليه؛بري بنتي بري وسلمي ع خواتك وعمتك وان شاء الله ربي ينوض سدرة عاجلا غير آجل..
طوبى ودموعها عبوا عيونها:اللهم آمين..
وخديجه ونسرين قالوا معاها؛آمين..
☘☘☘☘☘
في الشارع...
كانوا ولاد الشارع يلعبوا في الكورة..
ومنهم يزن ولد المهدي ومعتز ولد فردوس..
ونضال يتفرج عليهم من الروشن ويشجع في نسيبه..
نضال؛ايوه عزو ايوه وريهم ياطاحونه..
محمد المهدي؛لقاق ياعم..
نضال؛لقاق عينك ياجح.ش..
محمد بضحكه؛والله مايعرف يلعب..
نضال؛ماك تشجع في خوك بتقول هكي..
محمد بضحكه؛هو وخوي في نفس الفريق..
نضال تجاهل كلامه و قعد يشجع في نسيبه وهو يقول بحماس:ايوه ايوه ايوه..اووو..معليشي معليشي تعوضها عزو..
ومحمد يشوفله ويضحك..
🍃وحداهم بمسافه طلع عبد القيوم من الحوش بيمشي يقعمز في القهوة..
وهو ماشي شاف ولاد الشارع وهما يلعبوا في الكورة..
ابتسم ابتسامه خفيفه ومشي خش فيهم خدي منهم الكورة وقعد ووقف قدامه وقعد يلعب بيها برجله اليمين..
الولاد وقفوا وهما يتفرجوا عليه بإعجاب ومتعه..
ونضال يقول وهو يصفق:ايوه تارقي ايوه..
وكله من مقعمز برا في القهوة يتفرج..
يزن وهو يراقب فيه:15..16..17..
ومحمد مربع ايديه ويتفرج بتركيز وهو مبتسم..
كان عبد القيوم يطلع في المشاعر السلبيه اللي في داخله يبي يخفف شي من حالة الغضب والعصبيه اللي هو فيها..
شبح للولاد لقاهم يتفرجوا عليه ومندمجين..
ابتسم..بعدين قال:من ياخدها..
وضربها كرة ارضيه..بس كانت بعيده وسريعه..
تخطتهم كلهم ووقفت عند رجليها..
هو لما شافها وين وقفت..
وقف الوقت عنده...زي كل مرة يشوفها فيها..
🍃تصير..ويكون في حياتك انسان..
مجرد ماتشوفه..يفصلك عن كل شي..
عن الوقت..والمكان...عن العالم والحياة كلها..
قيمة عندك..في قلبك وحياتك..اكبر من الدنيا بكل شي فيها..
بزمانها بأماكنها بكل شي فيها..كل شي..
تعشقه لدرجه تخليك تحس اللحظه اللي مرات تكون مش اكثر من ثواني معدوده ع اصابع اليد الوحده...ساعات...
وتخليك تحس ان مافي حد في الدنيا موجود في هديكا اللحظه غيرك انت وياه...
وهدا كان حال التارقي مع أم العيون الحايره..
العيون اللي ماانتبهتش لوجوده حتى...
"خالتي"
ورجع تحرك الوقت حركته الطبيعيه..
وشافت طوبى لمعتز..وضربتله الكورة ضربه مش قويه هلبه..
ومشت كملت طريقها..
هني عبد القيوم طول استاقظ لروحه..
غير عيونه عنها وهو حاس بشعور بشع ومؤلم لحق الشعور الحلو اللي كان يحس بيه..
ولف وجهه عنها وعطاها بظهرها وقعد يشوف لسيارته بنظرات كلها ضيق...وحواجبه كانت معقوده..
اما هي وصلت لباب حوش بوها..فتحاته وخشت..
سمع صوت الباب..
مشي طول لسيارته وركبها..
هدا كله والحركه في الشارع ولت لما كانت عليه..
الولاد ولوا يلعبوا..ونضال رجع يشجع ومحمد يناشب فيه..
وهو تحرك بسيارته بسرعه بش يطلع من الشارع..
ومش عارف بعيون ربيع اللي كانت تراقب فيه وهو واقف قدام المطعم متاعه...
☘☘☘☘☘
"هاه شن قولك؟"
نجاح بصدمه؛من جدك تسألي فيا يام!؟ تبيني نقهر اختي؟
نجمه بضيق:حكاية اختك مع ولد خالته فاتوا عليها سنين بعدين امه قالتلي ان علاقتها بحوش معاش زي قبل ..
نجاح؛مادخليش بيهم يام..اني مانديرهاش ونحرق قلب اختي بش نتزوج ردي عليها وقوليلها ماليكمش عندنا نصيب لاقبل ولتوا..
وناضت ومشت طلعت من الدار بسرعه وهي مضايقه ع الآخر..
في داخلها..هي مايله لعبد الحفيظ وفي شي من الفرح خش قلبها لما عرفت..لكن حبها لأختها كان اقوى..
وصلت في دارهم جت بتخش بس بعدين تراجعت عارفه لو خشت ع عواطف وهي في الحاله حتقعد وراها لين تعرف خيرها..
ولت ومشت للصاله..
قعمزت فيها وهي متوتره ومضايقه ومعصبه..
لحظات وبدت تلقائيا تردد..
"لاإله إله إلا الله وحده لاشريك له له الملك وله الحمد وهو على كل شي قدير"
وقعدت تردد لين هدت نفسها...
☘☘☘☘☘
"يوم الاحد بنمشي ان شاء الله"
هادي طوبى وهي تكلم في نائبة مديرة مدرسة سدرة...
كانت واقفه في الكوجينه..
وحداها اميمه مقعمزة تسمع فيها..
طوبى؛تمام نتلاقوا الاحد ان شاء الله ونحكوا في التفاصيل...تمام...السلام عليكم...
وسكرت وهي تاخد في نفس..
اميمه؛واثقه من روحك تقدريها؟
بدت ع وجه طوبى ملامح التوتر قعمزت وهي تقول:نحس في روحي نقدرها..
اميمه؛باهي علاش تباني خايفه؟..
طوبى بضيق؛خايفه صح لكن  مش من حاجه تانيه..
اميمه بإستغراب وقلق:شن هي؟
شدت ع قبضتي ايديها الزوز  قالت؛شاكه في روحي حامل..
انصدمت اميمه وفي نفس الوقت انوجعت لما تفكرت اللي صار معاها..
طوبى:لو طلعت حامل حق الجالي مش حيخليني نخدم في المدرسه..
بلعت اميمه ريقها وقالت؛حبيبتي..ماتقدريش درقي عليه حاجه زي هادي..
طوبى؛مش حندرق..لكن لو طلعت حق حامل مش حنقوله توا..
اميمه؛لالا بيبو حبيبتي ردي بالك لو عرف بالصدمه حتصيرلك مشكله كبيره..
طوبى؛مش حيعرف صدفه مش حيعرف لين اني نقوله واني قتلك انتي لأني عارفتك مستحيل تقولي..
اميمه بقلق:طوبى..غلط اللي بديريه غلط كبير..
بضيق قالت؛عارفاته غلط..بس مضطرة يا اميمه..اني اكثر وحده تعرف قداش تعبت سدرة ع المدرسه هادي بش وصلتها لأعلى مستوى..مانبيهاش بعد تفيق وتروح تلقى تعبها كله راح ع الفاضي..
نزلوا دموعها وهي تقول؛بالله عليك اميمه ساعديني..نبي الموضوع هدا يقعد بيني وبينك بس لين اني نطلعه..
انوجع قلب اميمه عليها وفي نفس الوقت فكرت ان هكي احسن بالك ربي يبي اللي صار معاها يصير مع طوبى.
هي هكي فكرت وقتها..وعطت لطوبى وعد انها حتساعدها..
اميمه هزت راسها وقالت؛خلاص وعد نساعدك وندس..لكن نبيك تردي بالك ياطوبى..ردي بالك..
هزت راسها وقالت؛تمام..المهم توا نبيك دليني ع دكتورة تعرفيها بش نتأكد ونتابع معاها لو طلع في حمل...
اميمه:تمام تو نعطيك رقم دكتورة تقرب لزميله معاي بس عيادتها بعيده شويه..
هزت راسها وقالت؛تمام..رفعت تليفونها وقالت..ترا ملي عليا رقمها..
اميمه وهي تشوف في تليفونها:مش عندي تو نقول للدكتورة اللي معاي تبعته..
شبحتلها طوبى بتوتر وقالت؛تمام..
☘☘☘☘
وضرتها..
طلعت من شقتها وهي خايفه..
نزلت لوطا ومشت لموقف السيارات اللي في العمارة..
شافت سيارته وهي خايفه مشتلها..
وين وصلت فيها تصنعت القوة ومشت فتحت الباب وركبت جنبه وسكرت الباب..
استغربت وين شافت عند رجليها شكاير..
ووراها شكاير..فيه فواكه وخضرة ولحم ودجاج وحتى حوت وعصائر..
شبحتله..
لقاته يشوفلها..
قعدت تشوفله وهي مش قادره تتكلم مش عارفه هو شن يبي ولافي شن يفكر..
وهو خبرها؛في دكتورة نعرفها كويس كويس تمشيلها هي بس وتابعي عندها وردي بالك وانتي ماشيتلها تخلي حد يتبعك..
هي تسمعله بدون ماتقاطعه..
الجالي؛مانبي حد يعرف انك حامل ردي بالك يانجاه لو وصلت المعلومه لخديجه مانعرفش شن تقدر دير اختي هادي مايقدرها حد كان ربي..
نجاة؛وبعدين؟
الجالي؛بعدين خليه لبعدين..المهم نبيك تعرفي اني نبي العيل زي ماانتي تبيه مانقدرش نفرط فيه ماتخافيش..
نزلوا دموعها وهي تقول؛وبعدين ياجالي قولي بعدين شن بيصير حاجه زي هادي ماتدرقش ديما ياجالي..
الجالي؛بعدين ماتفكريش فيه خليه عليا خلاص..
شدت يده وقالت؛والله نحبك واللي صار قبل..
رفع يده التانيه وقال؛اص..اسكتي..مانبيش نسمع دوة في الحاجه هادي نبي ننسى وانتي انسي..
هزت راسها وقالت؛حاضر..حاضر..نسيته..
سحب يده وقال؛انزلي واركبي للشقة طول وخلي الباب المفتوح..
هي قالت؛باهي..
مسحت دموعها ونزلت من السياره..
ومشت خشت للعمارة وهي مرتاحه بعد ماعرفت ان الجالي مازال متمسك بيها..
ركبت فوق..
وين وصلت لباب شقتها اللي كان مردود..خشت وخلاته مفتوح..
لقت صابرين واقفه تراجي فيها..قالت..
شن صار؟
نجاة حطت يدها ع بطنها وقالت؛يبينا..
ضايق صابرين اللي سمعاته وقطع املها نهائي..
مشت وخلتها..
ابتسمت نجاة تهكما ومشت لدار صغارها وهي تقول؛اطلعوا لعمو الجالي ماما جي..
فرحوا جوري وحمزة وطلعوله..
ومعاذ لحقهم وهو يدب ع رجليه..
هي ابتسمت لفرحتهم وقعدت مقعمزة في دارهم ومابتش تطلع...
☘☘☘☘☘☘
وبعيد عنهم...
كانت عائشه تسمع في كلام دكتورتها في نهاية لقائها بيها..
الدكتورة؛ماتستسلميش عائشه قاومي وخلي أملك في الله كبير..
عائشه وهي مبتسمه بألم؛ونعم بالله..
؛تو نعطيك لزوجك معلومات الاخصائي التونسي اللي نعرفه مادام هو ناوي يعرفك لتونس..
المهدي وفي عيونه لمعة الدموع؛نعرف اخصائي غادي راسلته وتفاهمت اني وياه..
الدكتورة وهي تشوفله:كويس..رجعت شافتلها وقالت..خليك قويه عائشه ربي يكتب اجرك ويشفيك..
هزت راسها وقالت؛ان شاء الله..
وهو يشبحلها بنظرات كلها ألم..
الدكتورة شبحتله وقالت؛تقدر طلعها للسياره وتولي لو سمحت بش نعطيك نتائج عملية المنظار وصور الطبق المحوري..
هز راسه وقال؛حاضر..
ناض وجاها وهو يقول؛هي نوضي عايشه..
ناضت عائشه..
وهو خدي يدها اللي كانت مغطيه بالقفازات السود..
عائشه؛بارك الله فيك دكتورة..
الدكتورة؛مادرت شي ياعائشه حتى واجبي مادرتاش..
عائشه؛لالا ماقصرتيش جزاك الله عني خير الجزاء..
شبحت للمهدي وقالت؛هيا..
وهو مشي طلع هو وياها..
قعدوا ساكتين هما الزوز وفي داخل كل حد فيهم هلبه كلام ماكانتش عندهم قدرة ع البوح بيه..
طلع بيها من العياده وركبها السياره بعدين سكرها..
ومشي ولى للعياده..
~~~~~~~
الدكتورة بشي من الحده؛مابيتش نكلمك قدامها بش مانعبيش قلبها عليك ونزيدها علي مابيها..واضح انك هاملها ومش مهتم بيها بكل لو كانت تهمك راك ماخليت وين رفعتها اول مابدت تبان عليها الاعراض بش ماتكونش ضحية التشخيص الغلط..
المهدي:دكتورة اني درت معاها واجبي وماقصرتش..
؛واضح هدا علاش في كل المرات اللي جتني فيهم كانت بروحها..
غير عيونه عنها وحط ايديه ورا ظهره..
:استاذ مهدي حني النساوين طبيعتنا التضحيه نعرفوا ندرقوا اوجاعنا ومانخلوا حد يحس بينا واللي حوالينا ركزوا شويه بش راهم عرفوا برواحهم..لكن هما داروا رواحهم مايشوفوش ولايفهموا هكي اريحلهم...
شبحلهاوقال؛دكتورة حالتها في منها امل؟.
شبحتله بأسف وقالت؛للأسف الشديد الورم في المرحله الرابعه منتشر في الاعضاء اللي حوالين المعده وواصل للعقد الليمفاويه..مانقدرش نقولك غير ان علاجها لازم يبدا بسرعه..والله على كل شي قدير..
🍃🍃🍃🍃
طلع المهدي من المصحه وكلام الدكتورة يتردد في وذانه..
وجع الضمير..عذاب تأنيبه واعر...
المهدي توا يشوف في روحه الجاني ع الوحيد ع صاحبات العمر اللي يوم من الايام كانوا اكثر من صاحبات..
كانوا خوات..خوات دنيا..
وهو فرقهم..وعذبهم..وكان سبب في اللي وصلوله هما الزوز بطريقه او بأخرى..
ركب السيارة..
وهي تشوفله من ورا الخمار..
شافاته كيف حط الملف في الكرسي الخلفي بعدين قال؛غدوة ماشيين لتونس بإذن الله..
هي قالت؛هكي احسن..نبي نمشي طول ومانبي نودع حد..
شد يدها وقال؛عايشه انتي تعرفي ربي اكثر مني
خلي عندك ايمان ان الله ع كل شي قدير وبإذن الله يكتبلك الشفاء..
هزت راسها وقالت بنفس النبره اللي ردت بيها ع الدكتورة نبرة استسلام؛ونعم بالله..
هو تنهد بدون صوت بعدين شغل السيارة وتحرك...
ورجع بيشد يدها..
هي قالت؛راجي شويه..
حولت القفار من ايديها..وشدت بيهم يده..
هو حس بوجع واصل لاعمق شي فيه..
شد ع يدها بقوة بعدين تحرك بالسيارة وطلع من المصحه...
☘☘☘☘☘
تاني يوم..
الساعه 11:00صباحا..
في الجنان...
مغليه؛ردي بالك ع راجلك ماتغفليش عنه بكل وشن مايقول الدكتور ديري مادوريشي هو شن يبي امشي باللي يقولوا عليه الدكاترة بس..
عائشه؛حاضر عمتي..
نسرين؛ماتنسوش الشاميه التونسيه خاطري فيها هلبه عويشه..
ابتسمت وقالت؛ان شاء الله..
طوبى؛تمشوا وتجوا بالسلامه يارب..
شبحت عائشه لطوبى وعيونها تعبوا دموع..
بدون ماتحس مشتلها وضمتها بقوة وهي تقول:ربي يردلك سدرة..
نسرين قعدت تشوفلهم بحزن..
ومغليه تشبحلهم وخلاص..
طوبى بنبرة مخنوقه:آمين..
بعدت عنها وشدت كتفها بقوة بعدين طلقاته ومشت وهي تقول؛بالسلامه..
كلهم ردوا عليهم: بالسلامه..
وقفت والتفتت وهي تقول؛بالله طوبى شدي لسدرة في قرايتها امس قالتلي ابله طوبى تشرح احسن منك..
مسحت طوبى دموعها وهي تضحك وقالت؛حاضر..
مغليه؛هي اطلعي قبل ماتشوفك..
هزت عائشه راسها وقالت؛بالسلامه..
نزلت خمارها ومشت طلعت من الحوش..
مشت للسيارة لقت ولادها واقفين عليها..
وقفت ع الباب الخلفي وقالت؛قرايتكم ماتهملوهاش مش تشدوها كورة بس..
محمد بإبتسامه؛تمام..تمام..
ابتسمت وقالت؛يزن اسمع كلام محمد وشن مايقول دير..
تنهد بملل وقال؛حاضر..
المهدي من السيارة؛رد كويس..
ارتبك وقال؛حاضر..
ضحكت عائشه ودموعها نزلوا وطول ركبت السيارة..
نضال؛هي خلاص نتوكلوا..
المهدي:توكل..
نضال؛بسم الله..وشغل السيارة..بعدين تحرك طول..
قعدوا عيون عائشه من ورا الخمار ع ولادها لين درقوا من قدام عيونها..
غمضتهم وقعدت تبكي بصمت...
والمهدي حاس بيها بدون مايسمع صوت بكاها..
🍃اختارت عائشه تسافر من غير ماتودع وكأنها مسافره سفرة عاديه وحترجع منها عن قريب زي سفرة الحج..
سافرت عائشه من غير ماتودع حد..
حتى امها وبوها ماسلمتش عليهم..
خافت من الوداع هلبه...كانت تبي تعطي لنفسها ولو بصيص من الأمل انها زي مامشت حتولي...
🍃وركبت الطيارة مع راجلها...
وبعدت حتى هي عن كل حبابها...
بلا وداع....ولالقاء بعده....

#بلا_وداع
#طوبى

...يتبع....