طوبى الجزء الاول

الجزء العشرين

# طوبى "شارع القهوة"
#جمان_فريد
#الجزء_العشرين"20ابريل1"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
طلعت من باب الحوش اللس قعد مفتوح بعد ماجت بنتها..
وقعد تعيط وتنادي؛ياناس زودولي بنتي بتموت...
سمعوا عياطها..
اللي طلعوا من الرواشن واللي من حياشهم..
ومنهم المهدي اللي كان طالع لخدمته ..
بس لما شافها وسمعها مشالها يجري..
وامه طلعت وراه تجري..
المهدي وهو مفجوع:خير ياخالتي خير!
صفيه وهي تبكي؛بالله عليك ارفعها للمستشفى مافي حد قاعد..
المهدي هز راسه وقال:حاضر حاضر..ومشي يجري لسيارته..
خشت صفيه تجري..ومغليه وراها..
مغليه:خيرها اميمه شن صارلها..
صفيه وهي تبكي:مش عارفه يامغليه روحت من الجامعه تبكي وتعيط وبعدين هدت وناضت بتخش الحمام طاحت من طولها.
خبطت مغليه خدها وقالت:ياحليلي..
وصلوا في دارها..
شافتها مغليه وهي طايحه..
وحداها جدها يمسح ع شعرها وهو يبكي بدموعه صمتا..
مغليه؛ان شاء الله مافيها سو ياعمي الواعر..
علي بصوت مخنوق:كان نعرف من كسر قلبها بس نكسرله رقبته بإيدي..
مغليه سكتت وهي تشوف لأميمه بألم..
"خالتي صفيه"
طلعت مغليه ووصلت برا وهي تقول:تعالى ارفعها وطلعها ولدي البنت مغمى عليها..
المهدي:الله غالب مافيش حل..
حول من رجليه وخش داخل وهو يقول:ياالله..
امه وصلاته للدار..
خش شافها كيف طايحه قال؛سامحنا جدي علي..
وقدم لأميمه ورفعها..
وعلي وصفيه يشبحولهم..
ناض علي بعكوزه وقال:بنمشي معاكم..
وصفيه طلعت تجري ورا المهدي وهي لابسه جلابيه فوق قفطانها ماسكرتش ازارارها ومحرمه مربوطه ربط..
ووراها الحاج علي وهو لابس كشابيه شتويه ويحول يمشي بسرعه بش يلحقهم..
اما مغليه..
قعدت دور ع الحوش وتشوف كان في شي ع النار ولافي شيشمه مفتوحه ولافي شي عالق في الضي..
بعد ماطمنت ع الحوش طلعت وراهم وسكرت الباب..
لقت المهدي راكب وجنبه الحاج علي..
ومن الخلف صفيه وبنته راقده ع رجلها..
تحرك المهدي طول..
ومغليه مشت لحوشها وهي تشوف للسيارة وتقول بحزن؛عوينه والله عوينه..
"مغليه."
شبحت مغليه لحوش نجمه لقتها فم الباب مشتلها طول..
☘☘☘☘☘
والمهدي في الطريق كان واجعه حال اللي معاه بالذات علي الواعر اللي كان يبكي ويقول..
"كان نعرف من اللي كسر قلبه نكسر رقبته بيدي"
يقول ويعاود فيها..
خاف المهدي على حالة اميمه وماباش يطول الطريق بش يوصل بيها لمستشفى عام..
طول خش بيها لمصحه قريبه..
نزل يجري منها وهو يقول؛حالة اسعاف..
شويه وطلعوا يجروا بالباريلا..
حطوا عليها اميمه..
وخشوا بيها يجروا وامها معاها...
اما المهدي رجع ركبت لسيارته درسها في مكان بعيد..
بعدين نزل هو والحاج الواعر ومشوا خشوا للمصحه..
☘☘☘☘☘☘☘
"سنه حلوة ياجميل..
سنه حلوة ياجميل
سنه حلوة عموري
سنة حلوة ياجميل"
داليا تغني لعمر في المطعم اللي حجزتلهم فيه وقدامها تورته عليها شماعي ورقم 21...
تغنيله..
وهو في عالم تاني..
مش قادر يحول من عيونه الموقف اللي صار..
"عمر"
قام عيونه وشبح لداليا..
داليا؛هيا طفي الشموع خيرك!
شبحلهم..بعدين قرب منهم ونفخ بغل وطفاهم..
داليا بضحكه:قريب طيرت الطورطه..
عمر رجع سرح ومعاش دورها..
داليا استغربت وقال؛عموري خيرك!؟
عمر تنهد وقال؛لازم نطلع داليا توا بنلحق ع محاضرة مهمه..
داليا شبحتله شويه وقالت؛مش عاجبني حالك بكل بكل عمر..
هو فرك يده بجبهته وقال:في امور صايرة معاي شاغلتني والقرايه حتى هي..
داليا؛عمر يدك ترعش!
نزلها وشافها وقال؛مافي شي غير متوتر..صحيتي داليا ع كل شي..وناض..
داليا:اصبر تاخد هديتك..
وحطت قدامه كيسه صغيره خداها وقال:شكرا..سلام..
ومشي..
داليا وهي تشوفله:مش بلاش هدا صايرة معاه حاجه..رفعت حواجبها ونزلتهم بعدين تنهدت وقالت؛خل نكلم البنات يجوا ياكلوا معاي الطورطه...
☘وعمر طلع لسيارته وركبها..
ولوح هدية داليا في الكرسي اللي فجنبه..
بعدين شبحلها...
ويجي بين عيونه الجاكيت اللي خياطته اميمه..
《 اني فصلتها وخيطتها والقياسات خديتها بنظر العين يارب تجي عليك..والاهم تعجبك...》
غمض عيونه بشده من الألم اللي حسه بقلبه..
بعدين فتحهم وهما يلمعوا بالدموع...
شبح القدام وتنهد بألم من وسط قلبه بعدين شبح القدام..
وشغل سيارته وهو يحرق في العجل...
☘☘☘☘☘
"صايرة معاها مشاكل"
صفيه:والله في الحوش مافي حاجه يادكتور..هي طلعت مز الحوش للجامعه وعين الله عليها...فجاة روحت بكري وهي تبكي وصايرة فيها حاله..
هز الدكتور راسه وقال:بنتك متعرضه لصدمة نفسيه...
خبطت صفيه بإيديها ع وجهها..
علي:كيف يادكتور حالتها خطيره!؟
الدكتور:لامش خطيرة بس مش عاديه نبيكم تطمنوا حني درنا اللازم وتوا وضعها مستقر..
صفيه قعدت تبكي..
وعلي قال:باهي كيف بيصير فيها يادكتور توا..
الدكتور:بنديرولها دخول لازم تقعد ع اقل تقدير ثلاته ايام..
هز علي الواعر راسه وهوساكت..
الدكتور:لاباس عليها..
ومشي من حداهم .
والحاج علي يرد عليه وهو يفكر في حال حفيدته..
قدملهم المهدي وقال:ان ان شاء الله خير!
علي بلع ريقه وقال:والله ماني عارف ياولدي..قال عندها صدمه نفسيه..
المهدي عقد حواجبه بضيق بعدين قال:تعالى معاي..
حاوطه ومشي بيه وقعمزه ع الكرسي..
علي بألم:قالت كسرولي قلبي..قالتها..كان نعرف من هما بس..ااخ كان نعرف..وخبط بيده ع رجله بغضب..
المهدي:هدي روحك هدي تو يرقى ضغطك ولاالسكر..
وصفيه مقعمزة تبكي وتشبحلهم وهي تقول:ياولدي الصدمه النفسيه تنوض منها بنتي كويسه مايصيرلها شي!؟
المهدي:ياما مروا بيها ياخالتي وطلعوا منها عادي مافيهم شي كله يرجع للوضع النفسي بس..
علي:اني قلتلها بنرفعك معاي العمرة في رمضان..لكن توا خلاص غير تنوض بس..
صفيه ببكي:يارب تنوض منها مافيها لاسو لاسويه..واللي كسر قلبها اجعل قلبه مكسور واجعله معتور ياربي..
🌻🌻🌻🌻🌻
الساعه 1:00ظهرا..
خشت سدرة لشارع القهوة بسيارتها ومعاها طوبى..
وغرفه اللي اتصلت بيها تجيها بعد مالغوا وحده من محاضراتها..
اول ماوصلت قدام حوشهم..
نزلت بتفتح الباب..
"سدرة"
التفتت سدرة لمصدر الصوت لقتها مغليه جايه من حوشهم..
وخواتها يشوفولها وهما مستغربات..
قدمتلها سدرة لين وصلت فيها..
سدرة:كيف حالك خالتي مغليه..
مغليه بحزن:الحمد لله..نبي نقولك ع بنية عمك اميمه.
سدرة بقلق:خيرها!؟
مغليه؛بكري ياناري رفعها المهدي مع امها وجدها للمستشفى مغمى عليها..
سدرة بفجعه:ياحليلي خيرها!
مغليه؛والله ماني عارفه يابنتي..
سدرة بخوف:بالله خالتي اتصلي بولدك اعرفيلي منه هما وين بالزبط.
مغليه؛حاضر..
وقامت تليفونها واتصلت بالمهدي..
رد عليها طول..سألاته هما وين عطاها اسم المصحه..
وطول مغليه عطاته لسدرة.
مشت تجري ركبت للسيارة وسكرت الباب وهي تقول:اميمه رفعوها مغمى عليها ..
غرفه انصدمت..
وطوبى انفجعت وقالت:خيرها!.
سدرة:مش عارفه مش عارفه شي..
وطول تحركت سدرة..
وغرفه في جنبها تفكر بخوف..
وطوبى كانت خايفه هلبه ع اميمه..
حركت عيونها لغرفه لاحظت انها متوترة..
وزادت خافت ليكون ليها يد في اللي صار لبنت عمهم..
☘☘☘☘☘☘
وصلوا للمصحه..
وسألت سدرة عن اميمه ودلوها ع مكانها..
مشت تجري هي وخواتها.
وصلوا للدور اللي فيه اميمه..
بعدين للممر اللي فيه حجرتها..
شافوا مرت عمها وجدها.
مشتلهم تجري وخواتها وراها..
سدرة:خالتي صفيه..
صفيه ناضت وهي تقول ببكي:سدرة..
وعلي يشوفلهم..
جاته طوبى وقالت:شن حالك جدو..
هز راسه بدون مايتكلم...
سدرة ضمت صفيه بعدين بعدت عنها وقالت:شن صارلها!؟
صفيه ببكي:مش عارفه شن صارلها..روحت بكري من الجامعه وخشت تبكي وطول لدارها وسكرت عليها وقعدت تبكي بعبرتها وتعيط وتقول كسروا قلبي..
شبحت طوبى لغرفه..
لقتها زادت توترت وباين في عيونها نظرات خوف..
تعبوا عيون طوبى دموع وقعدت تشبحلها بحده..
سدرة قعدت ساكته وهي تفكر..
صفيه؛وتواالدكتور قال جتها صدمه نفسيه..
سدرة؛اشبح شن صاير معاها في الجامعه..
علي:غير كان نعرف من كسر قلبها..نكسر رقبته بيدي.
وشدت ع قبضة يده بقوة..
وغرفه تشبحله بخوف وطوبى مازال تشبحلها بحده..
صفيه ببكي:حسبي الله ونعم الوكيل حسبي الله ونعم الوكيل..
غرفه مشت وقفت ع الحيط وهي حاطه ايديها ورا ظهرها..
والخوف مسيطر عليها..
شبحت لطوبى..لقتها تشوفلها بغضب..
استغربت..
وطوبى غيرت عيونها عنها وشبحت لجدها وقعدت تمسح ع راسه..
طوبى:تو تولي كويسه جدي ماتخافش..
علي:يارب يابنتي..يارب..
ع جية المهدي بيشوفهم..
شبح سدرة وخواتها..وقف ع بعد مسافه وقال؛اني ماشي جدي..
غرفه وطوبى وصفيه شبحوله..
بس سدرة مابتش تشبحله..
وهو كذلك كان غاض بصره عنها..
علي؛بارك الله فيك يالمهدي..
صفيه؛ربي يفتحها عليك ويحفظلك عويلتك..
المهدي:ماعنديش فيه جميله جيرانا انتم وحني عيله وحده من زمان..ماتبوا شي..
علي:بارك الله فيك..
صفيه؛صحيت ولدي..
المهدي هز راسه وقال؛ان شاء الله لاباس عليها..
ولف ومشي..
صفيه وعلي وطوبى:لايوريك باس..
سدرة بعد مشي قعدت تشبح للمصحه وقالت في بالها اكيد يبوا فلوس..
شبحت لصفيه وقالت:شويه وجايه..
ومشت من حداهم...
وغرفه تبع فيها بعيونها وهي خايفه...
نزلت سدرة للحسابات..
وجت بتفتح دفعه ع حساب قعاد اميمه في المصحه..
الموظف:مدفوع الحساب كامل..
سدرة:كيف!؟
الموظف:دفعه واحد اسمه المهدي محمد المهدي شنيبه..
سدرة مررت نظرها حواليها بعدين هزت راسها ومشت..
🌻🌻🌻🌻🌻
وسمعوا بوها وخوتها باللي صارلها..
طول مشوا للمصحه ..
خشولها التلاته..
عبدالمطلب:مش عارف الواحد لأمتى بيقعد يعاني بس.
حسين بغضب قال:مش وقته الكلام هدا بكل يابوي..
سكت عبدالمطلب ويوسف يشبحله ع جنب بحده..
كان حسين جاي بلبسه العسكري..
وكان باين هو يتبع لمني في الجيش...
كل اللي يشوفه كان يخاف تلقائي..
وصلوا في الممر اللي فيه دار اميمه..
غرفه شافت حسين قلبها فر شوق وخوف في نفس الوقت..
فاتوا من قدامها ويوسف يسأل:شن صار فيها بعد ماحطيتها 
صفيه قعدت تحكي في اللي صار بالتفصيل..
يوسف:وتقولي دايخه ماداخيه...كان نعرف من وصل فيها بس!
حسين بغضب:قسما بالله نمسحه مسح..
غرفه قعدت تبلع في ريقها وخلاص..
لطفي:المهم توا اختكم يولي حالها باهي وبعدين ساهل..
التفت لسدرة وقال:بنتي خودي خواتك وروحوا...
سدرة ناضت وقالت:حاضر..
عبدالمطلب وهو يمرر في نظره ع المصحه:علاش جبتوها هني!؟
كلهم شبحولها..
وسدرة قالت بشي من الحده:دفع حساب تلاته ايام بلياليهم المهدي ولد شنيبه..
علي شبحلها طول..
اما الاولاد فكانوا يشبحوا لبوهم بحده..
سدرة:ان شاء الله لاباس عليها خالتي صفيه..وبالله عليكم شن ماصار خبروني..
صفيه:لايوريك باس بنتي ..
مشت سدرة وهي تقول:السلام عليكم..
وغرفه لحقتها طول..
طوبى:لاباس ع اميمه خالتي تنوض بالسلامه..
ابتسمت صفيه من بين دموعها وقالت:ان شاء الله بنتي ان شاء الله..
مشت طوبى وهي تقول:السلام عليكم..
وحسين يتبع فيها بعيونها لين طلعت من الممر..
☘☘☘☘☘
طول الطريق...وهما ساكتين...
لعند مارن تليفون سدره..
درست السيارة ع تركينه وردت..
سدرة:ايوه فردوس..
"ايوه سدره خيرها اميمه"
سدرة؛مسكينه هالبنت اشبح شن صاير معاها في الجامعه دارلها صدمه نفسيه..
قعدت طوبى تشبح لغرفه بحده..
"لاحول ولاقوة الا بالله..هي مسكينه انطوائيه ومش واخده ع المخالطه هلبه ماتعرفش تتعامل مع الناس"
سدرة؛ايه مسكينه ماشيه بنيتها...واللي يمشي بنيته في زماننا هدا ياكل على راسه..انتي من قالك حقه!؟
"كلمتي عمتي مطيرة وهي تبكي وصايره فيها حاله قالت تراجي في راجلها يروح بش يرفعها للمصحه..اني بنمشي بعدين وقت الزيارة"
سدرة:كويس..
"وينك انتي؟"
سدرة:كنت في المصحه مع البنات وتوا مروحه بيهم..
"تمام بعد تروحوا اتصلي بيا"
سدرة؛ان شاء الله...بالسلامه..
"بالسلامه"
وسكرت سدرة ورجعت كملت طريقها لين وصلت للحوش..
اول ماخشت اتصل بيها راجلها يسأل عن اخر المستجدات..
قعدت تكلم في الجنان..
وغرفه وطوبى خشوا للحوش..
طوبى؛غرفه..
غرفه وهي ماشيه بإتجاه الدار:خيرك..
"ليك علاقه باللي صار لاميمه"
وقفت غرفه في مكانها بعدين التفتت وقالت:شن تقولي انتي!؟
طوبى:عارفه ان في بينها وبين عمر حاجه..واستغربت هلبه لما عرفت لان عمر مايحبش اميمه بكل وديما يتسهوك عليها..وانتي وعمر صحاب..
غرفه بخوف وارتباك؛انتي خيرك شن تفتفتي!؟
طوبى:خيرك خايفه هكي..خيره وجهك ولى اصفر!؟..
بلعت غرفه ريقها وهي تشوفلها..
طوبى؛مش حنقولك شي تاني غير حي عليك من ربي ياغرفه..
ومشت طوبى من قدامها..
جبدتها غرفه من شعرها اللي مغطيه الوشاح وقالت:انتي يافرخه فوتيني خيرلك ماتخلنيش تحط راسي من راسك ونكرهك في عمرك فاهمه..!؟
طوبى قعدت تشبحلها بحده وعيونها معبيات دموع..
دفتها غرفه وقالت:ناقصني فرخة زيك انتي.
ومشت لدار وخشت وسكرتها عليها..
وخلت طوبى واقفه تشوف لباب الدار ودموعها ينزلوا...
🌻🌻🌻🌻🌻
الساعه 6:30 مساء..
زحمه في صالة حوش شنيبه..
البنات بصغارهم ومعاهم الكنه...
يوتوا لذكرى ميلاد بنت نسرين..
بس كانوا يحكوا ع اللي صار لأميمه..
خديجه:عيطوا عليها مسكينه ياريتها قعدت داسه روحها في حوشهم.
نسرين:قداش وجعتني ياناري ان شاء الله تطلع منها من غير سو..
مغليه بضيق:والله من بكري عقلها عندها قداش خاشه خاطري هالبنيه..
عائشه:ربي يشفيها ويعافيها...
شويه جت فرح بنت نسرين وقالت:هيا ماما الدنيا ظلام..
نسرين؛هيا ياماما هيا..غريبه عمر عطل هلبه..
مغليه:كلمته باقي قال بيقعد عند واحد صاحبه يقروا..
نسرين:مالا خلاص..هي نوضوا..
ناضوا كلهم ومشوا للطاوله المحطوط عليها التورته وكل مالذ وطاب وبدوا يحتفلوا بذكرى ميلاد فرح..
🌻وفي حوش جيرانهم..
كانت سدرة مقعمزة برا مع طوبى..
يجرخوا في حبوب الزيتون بش بيطبوه..
سدرة؛ياخوفي كان ماضاحك عليها واحد..
طوبى قعدت تشبحلها..
سدرة:البنيه ع نياتها ينضحك عليها بسرعه..
طوبى:سدرة..
سدرة وهي لاهيه:هاه.
طوبى:اشبحيلي بنقولك حاجه مهمه..
شبحتلها سدرة..
طوبى بضيق:راهو اميمه...تحب واحد..
سدرة بإنتباه:ايه!
طوبى:والواحد هدا نعرفوه..
سدرة بنرفزة؛خيرك تعطي فيا بالقطاره قولي اللي عندك طول..
طوبى تنهدت وقالت:عمر..
سدرة:من عمر!؟
طوبى:ولد عمي محمد شنيبه..
فتحت سدرة عيونها ع وسعهم بصدمه..
طوبى:وراهو في بيناتهم كلام هكي فهمت لما سمعتها تحكي عليه لغرفه..
سدرة:وغرفه تعرف!؟
طوبى بربكه:ايه اميمه تحكيلها تعرفيهم صاحبات..
سدرة بصدمه:خلاص معاش لقت الا هالمعفن المزظن تحبه خليت من الرجاله!؟...ولا هو هالوسخ من امتى عاجباته اميمه ولايطيقها هو...!؟
رفعت الموس وقالت؛هو هالكلب هو حاشا خلقة ربي..هو اللي ضاحك عليها هالتافه..لكن باهي..وربي المعبود نوريه وتو يشوف..
ونزلت في الزيتون بغل غلها ..
وطوبى تشبحلها بخوف...
☘☘☘☘☘
في المستشفى..
كانت اميمه فايقه مالهاش عشرة دقايق..
بس مابتش تكلم حد ولاترد ع اسئلة حد..
سرحانه في الفراغ وخلاص..
وكأنها في وسط كهف مجهول مظلم..
وتسمع في كلام يتردد صداه في جدران هالكهف..
《 بجديات اميمه انتي يعني..مسكينه..من يومك ومش عارف لامتي بتقعدي هكي..
كيف صدقتي ان اني عمر..ممكن يشوفلك انتي اميمه العبيطه اللي ماتعرفش راسها من رجليها..يابنتي من جدك انتي يعني تموا البنات من الدنيا بش نشوفلك انتي!
كل مافي الموضوع ان اللي صار كله مقلب درناه فيك اني وغرفه بنت عمك قالتلي اميمه تحبك ماتحبك واني عاد عجبني الوضع وقلتلها خليني ندير فيها مقلب وخليه بيني وبينك..
بس امس كلمتني وقالت معاش طول معاها بش ماتنصدمش فيك صدمة قويه..والحق بعد شفت شن درتي اليوم قلت لا عندها حق غرفه لازم ننهيها..》
مش قادرة تنسى كلامه..مش قادرة ماترجعش تسمعه بدل المرة الف مرة..
دموعها قعدوا ينزلوا ويبللوا في مخدتها...
وحداها امها وعمتها يشبحولها بحزن وهما ساكتات..
قعدت اميمه ع هالحال لين آذن المغرب..
سمعت الآذان التفتت ع امها وعمتها...
الزوز قالوا:تبي حاجه!؟
اميمه:نبي نتيمم بش نصلي..
صفيه:بعد تكمل التغذيه صلي بنتي.
اميمه:فاتوني هلبه صلوات..
مطيرة:ليك عذرك بنتي ليك عذرك..
اميمه شبحتلهم شويه وفجأة تفكرت حاجه مهمه...
《 وازيدك من الشعر بيت...في ناس لزموها..كشفت لهم مكائد ومؤمرات..وكشفت لهم حقائق بعض من البشر اللي في حياتهم..بعدت عنهم ناس فيهم شر لهم...وقربت منهم ناس فيها كل الخير لهم..
السر وين السر...في سورة البقرة نفسها..》
اميمه؛نبي مصحف..
مطيرة:عندي في شنطتي واحد صغير..
وناضت عمتها وهي تفتح في شطنتها طلعت المصحف وعطتهولها..
خداته اميمه وفتحت ع سورة البقرة وبدت تقرا بهمس..
ودموعها ينزلوا ورا بعض..
وامها وعمتها يشوفولها وقلوبهم تتقطع عليها...
🌻🌻🌻🌻🌻
"همك كله الفلوس عقلك كله في الفلوس"
عبدالمطلب:بوي ماقلتش غلط الخاص فالحين في اللهت بس البنت يبدا مافيها شي يطلعوا فيها ستين علة بش يلهتوا...
علي الواعر:عطيك مايلهتك انت ويفكني منك..
عبدالمطلب بإنزعاج:تو علاش الغلط بالله عليك!؟
علي:اسمع جاي من اليوم وبرا غادي اميمه معاش ليك دخل بيها..كل شي يخص اميمه كل شي اني نتكفل بيه انت اطلع منها بس..
عبدالمطلب قعد ساكت..ومن داخل يزغرد من الفرحه..
مشي عنه بوه وهو يقول:كواسم معفنه..
هو مط شواربه بملل ومشي طول لداره...
🌻🌻🌻🌻🌻
وقاعده اميمه تقرا في سورة البقرة..
وماوصلت في اخرها الا وهي حاسه ان في عافيه تسللت لجسدها..وبطبطبه حنينه ع قلبها..وبمسحه كلها لطف مسحت ع روحها...
هي كملت من هني دق الباب من هني..
صفيه:تفضل..
انفتح الباب وخش الدكتور شاف اميمه كيف تقرا في المصحف ابتسم..
جي وقف في اخر سريرها وقال:اميمه..
سكرت المصحف وشبحتله..
شاف عيونها ولونهم الاخضر الزمردي ابتسم وقال:شن حالك توا..
ابتسمت ابتسامه خفيفه وقالت:الحمد لله..
الدكتور بإبتسامه:الحمد لله ع كل حال..مافي حاجه في الدنيا هادي مستاهله من بنادم يحرق دمه عليها لاالبشر ولاالماديات ولاأي شي..
اميمه بحزن:عندك حق..
الدكتور:لالا بالله عليك فكينا الوجه هدا..الحزن والبكي اني نكرههم بالذات ع وجوه الحلوة..
التفت وشبح لامها وعمتها وقال:ولا.
ضحكوا وهما يشوفوا لأميمه..
اميمه تحشمت بس ماابتسمتش نهائي..
شبحلها وقال:معاش تخلي شي يزعلك اميمه تمام..
اميمه:ان شاء الله..
الدكتور شبح لكيسة التغديه قال:تمت هادي..ومشي حولها بروحه...
وامها وعمتها لاحظوا اهتمام الدكتور بيها..
هو وخر وقال:ان شاء الله لاباس عليك..
اميمه واللي معاها؛لايوريك باس..
ومشي طلع الدكتور من حداهم..
مطيره غمزت لأميمه وقالت؛قنين ولا؟!؟
عضت صفيه ع شاربها وهي تضحك..
اما اميمه ابتسمت مجامله لعمتها وقالت:بنخش الحمام..
ناضت امها وقالت؛تعالي..
نزلت اميمه من السرير..خدتها امها ومشت بيها الحمام..
توضت بعدين طلعت منه..
ومشت قعمزت ع سريرها وقعدت تصلي...
صلت كل اللي فاتها..وخشت عليها صلاة العشاء..
صلتها معاهم بعدين حطت راسها ورقدت...
☘☘☘☘☘
وتعدي الساعات اللي يجي نص الليل..
وهني درس سيارة عمر قدام حوشهم.
شبح لحوش عبدالمطلب..وقلبه ينعصر عصر..
دخل سيارته للقراج..
بعدين خش للحوش..
كان شبه مظلم وهادي..
ركبن الدروج وخش لدارهم..
لقي نضال يقرا...
نضال:باهي اللي روحت..
عمر سكر الباب وقال:شن منوضك لتوا؟
نضال:نقرا الامتحانات الاسبوع الجاي..
عمر قعد يفكر فيهم..بس مش لاقيلهم بال..
عقله مش معاه..
مشي وقف قدام الروشن..زاح الستار شويه وقعد يشبح لحوش الجيران وهويتسائل..
"زعمه شن دير توا وشن صاير فيها"
نضال؛ايه حقه سمعت بأميمه..
التفت بخوف ولهفه وقال:خيرها!
شبحله نضال شويه وقال:راقده في المصحه..
انصدم عمر بقوة..
نضال:قالت امي رفعها المهدي مغمى عليها ماتندري على شي يحسابوها ماتت..
عمر حس بقلبه حيوقف...
ماتوقعش انها حتتأثر لهالدرجه!؟
نضال وهويشوفله:خيرك!؟
عمر مشي طلع من حداه وسكر الباب..
ونزل لوطا ومشي للصاله..
خش وسكرها عليه..
وقام تليفونه واتصل برقم غرفه..
وردت عليه...
عمر:ان شاء الله ارتحتي ياواطيه؟!
"هيه احترم نفسك وتكلم كويس"
عمر:نحترم المحترم وانتي مش محترمه بكل مش عارفه كيف درتي هكي مش عارف!؟
"خيرك انت عندك انفصام في الشخصيه ولاشنو..راجع كلامك ياكابتن وتفكر شن كنت تقول..وبعدين علاش حامق هكي!؟
والله لطحت في العبيطه باهي"
عمر بغضب شديد:العبيطه انتي وامثالك يامريضه..وايه نحبها ونموت فيها..تعرفي علاش..لأن اللي زيها هي بس ينحبوا ياتاعبه..لكن بجديات ممنونك والله ممنونك..لولاك مالقتيش
"حب حياتي"...
وانتي ان شاء الله تبري ياتاعبه.
وسكر عليها وحط رقمها في الحظر..
بعدين حط يده اللي شاد بيها النقال في فمه وقعد يعض فيها بقوة من الغيظ بعدين طلقها وقال:حيوان ياعمر..حيوان...
🌻🌻🌻🌻🌻
تاني يوم..
الصبح...
طلعت سيارة سدرة من الحوش ومعاها طوبى بس..
وين نزلت بتسكر الباب شافت عمر قدام الحوش مقعمز في سيارة..
مشتله طول...
وهو كان يسمع في اغنيه وقتها ومنسجم معاها..
دقت عليه الروشن..
هو لما ظلمت عليه السيارة انتبه شبح للروشن..
شاف سدرة واقفه وهي لابسه نظاراتها السود..
اشرتله ينزل المرش..
نزله طول وقعد يشوفلها قال؛صباح الخير..
سدرة:الله لايصبحك بيه هالخير ولايوجهولك..من يومك حاط راسك براس هالبنيه لين قريب رزيتها في عمرها امس حسبي الله ونعم الوكيل..غير شن دارتلك بس شن دارتلك..والله غير ع ذمة راجل كنت عطيتك زوز كفوف لخبطوا وجهك..وخلوك راجل...خزي...
ع طلعة المهدي من الحوش سمع هزايبها الاخيرة بس..
شافلهم واستغرب هلبه..
هي مشت وشبحتله بعدين غيرت عيونها اللي كانوا مدرقات بالنظرات عنه وقالت..عيلة عديمة احساس..
والمهدي يشبحلها وع راسه الف اشارة استفهام..
ركبت السيارة وتحركت..
وطوبى تشبح لعمر بغل..
والمهدي شبحله شافه تحرك بالسيارة وهو يحرق في العجل
قعد واقف يفكر شن في اللي خلا سدرة تهزب عمر ع الصبح!؟
عقله مااحتاجش يفكر زياد لما ربط اللي شافه باللي صار لأميمه..
وقعد يتسأل في عقله..
"شن دايرلها"..
ومشي ركب سيارته وهو مازال يفكر في نفس الموضوع وتحرك طول..
🌻🌻🌻🌻🌻
اما اميمه..
فكانت فهاليوم احسن من اللي قبله..
وتهافتوا ع المصحه الزوار في اوقات الزيارة..
جو فايزة ونسرين وعائشه مع مغليه وخديجه زيارة..
اميمه وين شافت حاجه من عمر ضاق صدرها هلبه بس حاولت تجاملهم ع قد ماتقدر في النهايه هما مالهمش ذنب..
وبعدهم هما..
جو خالاتها كانت علاقه بيناتهم رسميه بس فرحت انهم جو يزروها..
وختمت الزيارة الصبح..عمتها مطيرة..
مطيره:لا والله لما تروحي واني بايته حداها اليوم..
صفيه:والله مانقدر بيقعد قلبي مشغول عليها..
اميمه:روحي امي ارتاحي ع خاطري كان تبي تريحيني امس مارقدتيش بكل انتي..
صفيه:كيف تبيني نخليك ونروح!؟
اميمه؛معاي عميمه..
مطيره:تي خلاص يامراة تحشمي ع وجهك وروحي تقول بتخليها بروحها..
ضحكت اميمه ضحكه خفيفه..
صفيه بضحكه وسط ملامح القلق قالت:باهي تونروح لكن بنقعد نتصل راهو ردوا عليا..
اميمه بإبتسامه:حاضر..
ع خشة حسين..شافها قال؛ماشاء الله ماشاء الله ماشاء الله شمس منورة..
ابتسمت اميمه بحب..
جاها طبس ع راسها وباس جبينها وقال:احسن اليوم؟
هزت راسها وهي مبتسمه..
حسين:باهي باهي..
مطيره:سلم ولدي روح بأمك خلي ترتاح مش تقولولها ديري غدي وعشي خودول من برا..
حسين بضحكه:تمام..هيا يام..
مشت صفيه لبنتها باست جبينها وخدودها بعدين قالت:نتصل بيك ردي عليا..
اميمه بضحكه:حاضر..
حسين:تو نجي في الليل.
اميمه هزت راسها وهي ساكته..
طلعوا حسين وصفيه من الدار وسكروا الباب..
مطيرة:ااه ياكبيدتي ااه..كان نعرف شن صار معاك يابنتي..
اميمه:مافي شي مستاهل تعاركت اني وبنات..
مطيره:خيرهم شن يبوا عطيهم رهمه..
اميمه:عركه ومشت ع حالها ومعاش نبي نتفكرها..
مطيرة تنهدت وقالت:ع راحتك بنيتي..المهم يولي حالك باهي وتطلعي من هني صحيحه..
اميمه:بإذن الله...
شويخ ناضت مطيره خشت للحمام..
ع خشة الدكتور نفسه..
ابتسم وين شافها وقالت؛لااليوم الله يبارك منورة..
اميمه بجديه؛شكرا..
الدكتور:اميمه مواليد كم انتي..
اميمه:90..
الدكتور:شن تقري؟!
اميمه:اعداديات طب..
الدكتور:اوووه صدفه حلوة...نعرفك بنفسي اني اسمي قصي المسعودي ليا تلاته سنوات متخرج ونخدم مع فريق الدكتور اللي اشرف ع حالتك..
هي هزت راسها وقعدت ساكته..
الدكتور وهو يمرر في نظره ع الغرفه قال:-اممم اميمه..عندك تليفون..
اميمه:ايه..
الدكتور ضيق عيونه وقال:ممكن الرقم..
اميمه:لا...
ردها كان حازم احرجه ابتسم وقال:اسف سامحيني..لاباس عليك..
مابتش ترد عليه..
لف ومشي طلع..
ومطيره طلعت من الحمام وقالت:علاش ماعطتيشي الرقم ماشاء الله عليه دكتور وحليوه وشخصيه..
حطت اميمه راسها ع المخده وقالت:بنرقد عمتي اطفي الضي..
تنهدت مطيرة ومشت طفت الضي..
غمضت اميمه عيونها..
ومطيرة مش رقدت ع السرير حتى هي لكن قعدت تشوف لأميمه وقلبها واجعها عليها..
وتأكدت ان اللي صاير فيها وراه ولد مش زي ماهي حكت..
☘☘☘☘☘☘☘
الساعه 7:00مساءا.
المهدي:علاش تهزبك ع صبح ربي هكي كان مافيش حاجه كبيره..
عمر:بيني وبينها يامهدي..
المهدي:ليها علاقه بأميمه القصه ولا؟!
سكت عمر وهو يشوف في الفراغ..
نظرة عيونه المهدي عارفها كويس..نظرة حركت في داخله مشاعر ليه فتره مخدرها..
المهدي:تبي اميمه انت!؟
شبحله عمر طول.
المهدي:قول ماتخافش..
عمر شبحله شويه بعدين:ايه نبيها لكن هي لا...ومشي وخلاه..
المهدي تنهد من قلبه بعدين حتى هو مشي طلع لمطحن القهوة...
🍀🍀🍀🍀🍀
ويمر تالت يوم لأميمه في المصحه..
كان حالها فيه احسن بهلبه..
لهذا اليوم اللي بعده دارولها خروج وطلعت من المصحه..
روحوا بيها للحوش..
العشيه جوهم بنات لطفي كلهم ماعدا غرفه..
هدرزوا شويه ع اميمه بعدين خشت دارها بترقد..
شويه ولحقتها سدرة..
سدرة:نخش نهدرز عليك شويه ولابترقدي خلاص..
اميمه بإبتسامه:خشي.
خشت سدرة وهي مبتسمه وسكرت الباب..
ومشت قعمزت حداها..
سدرة:شن جوك..
اميمه؛تمام..
سدرة:ايوه هكي خليك تمام حتى لو كنتي مش تمام..
تعرفي لما تعودي روحك ع هكي حتولي تمام بالحق..
مثلي انه قويه وان مافي شي يكسرك..ومع الوقت حتولي قويه ومافي شي يكسرك..ماتخلي حد يصخف عليك خلي الناس ديما وين تشوفك تقول ياريتني زيها..
ضعفك وكسرك دسيه ع الناس..وطلعيه لرب الناس بس..
ماذليش نفسك ولاتصغريها الا قدامه هو..
وهو يخليك عزيزة وكبيره في عيون الناس..شوفيني اني..الضربه اللي ماقتلتني زادت قوتني والحمد لله..وكل مانعز نفسي قدام الناس ونذلها لربي..
ربي يرفعني في عيونها ويعلي قدري..
اميمه كانت تسمع لكلام سدرة وهي متأثرة بيه لين عيونها دمعوا..
سدرة:نشوفك حاجه كبيره وبإذن الله القدام حتولي هكي..اهم شي اوثقي في روحك وصدقي نفسك وقويها..وصدقيني حتوصلي لاعلى المواصيل..
ابتسمت اميمه وقالت؛شكرا سدرة..
سدرة:ماعنديش فيه جميل ياقطوسه..
ناضت وقالت؛لوحي كل شي ورا ظهرك ولاتحت رجليك..تمام..
غمضت اميمه عيونها وهزت راسها بعدين فتحهم وابتسمت بإمتنان..
وسدرة ابتسمت ودارتلها حركة بأنفها..
ضحكت اميمه..
وسدرة ضحكت ومشت طلعت..
بعد ماطلعت قعدت اميمه تفكر في كلامها..
~~~~~~~~~
"شن في بينك وبينها علاش مامشتيش شفتيها حرجانه منها لانها مرضت من غير ماتخبرك!؟".
غرفه بضيق:كنت نقرا ياسدرة..
سدرة:هالقرايه المقطعه بعضها..تحركي قدامي تحركي البسي حجابك وبريلها توا..
غرفه بعصبيه مكتومه؛باهي..
ومشت بسرعه وخشت للدار.
فردوس:بالشويه سدرة مش هكي..
سدرة؛ماتبي الا هكي...
🌻🌻🌻🌻🌻
واميمه..
كانت راقده في فراشها وهي شاده شيت تمرر في نظرها عليه..خلاص الامتحانات الاسبوع الجاي..
فجأة دق الباب..
اميمه:خش..
انفتح الباب وخشت غرفه وهي مبتسمه تقول:حمد لله ع سلامتك ميمو خوفتينا عليك يافرخه..
اميمه قعدت تشبحلها..
غرفه:خيرك تشبحيلي هكي زي الهبله!؟
ناضت اميمه قعمزت وهي ساكته..حطت الشيت ع تركينه..
بعدين بالشويه ناضت وقفت..
ومشت بإتجاه الباب وسكراته وغرفه معاها بعيونها..
التفتت عليها اميمه وقالت بإبتسامه؛ماريتش بصحة وجهك في حياتي..
غرفه رفعت حواجبها وهي متفاجئه..
اميمه:انتي مفروض تتجنبي نتلاقوا وياك في مكان واحد بعد اللي صار..
غرفه:خيرك انتي مرضتك اثرت ع دماغك ولاشنو؟!
اميمه:ايه اثرت عليه خلاته واعي اكثر من اللازم للقريب قبل البعيد..اني ربي ماعطانيش خوات بناتك لكن كنت نقول انها عوضني ببنات عمي وبالذات انتي لأني اني وياك في عمر واحد..
عارفاتك ماتحبنيش..بس كنت نقول مع الوقت نخليها تحبني وتقبلني ومع هذا كنت حاطه فيك ثقتي كلها..كنت نقول تقعد بنت عمي فالنهايه..مستحيل ضرني..
اني ممكن نكون عبيطه هني بس..لاني عطيت لوحده زيك مكانه ماتستحقهاش..
اللي درتوه فيا انتي ونسختك الذكوريه لين نموت مش حننساه ياغرفه..تعرفي..وحده غيري ماخلت لمن حكت وفضحت بيك بالذات قدام حسين خوي..ايه ايه عارفه انك حاطه العين عليه لو وحده تانيه غيري راهو مشتله هو الاول وخبراته..
لكن اني مستحيل ندير هكي وهدا الفرق بيني وبينكم.
غرفه كانت تسمع فيها وهي تحرق من داخل وساكته ومش عارفه شن بترد..ماعندها ماترد..
اميمه؛ياريت من بعد اليوم ماتفكريش تشبحيلي حتى الشبح لأني خلاص معاش نعتبر فيك موجوده..وتوا اطلعي برا.
غرفه مشت بسرعه فتحت الباب وطلعت..
مشت اميمه سكرت الباب..
ودموعها نزلوا..
فيسع مسحتهم وولت لفراشها وخدت شيتها وكملت قرايه..

#عشرين_ابريل
#طوبى