طوبى الجزء الاول

تابع

#طوبى "أقحوان وفلة وياسمينه"
#جمان_فريد
#الجزء_الحادي_والثلاثين" المواجهه2"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
في نفس الليله...
قبلها بساعتين..
كانوا البنات مقعمزات في دار المعيشه طوبى واريج وغرفه وآلاء....
مشغلين الراديو ع احدي القنوات اسمه..
"مسك الليل"
يجي كل خميس في الليل..
يقدم فيه مهند ولد إياد..
كان صوته هادي ومميز جدا وهو يتكلم..برنامجه عند هلبه ناس يعتبر منفس وعنده جمهور كبير هلبه...
مهند
"العلاقات الاجتماعيه تغيرت لأن اخلاق الناس تغيرت واخلاق الناس تغيرت لأن الظروف تغيرت..
الظروف ولت صعبه..الواحد توا همه الوحيد كيف يكسب رزقه ورزق صغاره..كيف يوفر كل شي ومايخليهم يحتاجوا شي..
تلقاه ديما تحت ضغط نفسي..يفش غله في زوجته..وهي تفش غلها في الصغار...
وكله ينعكس ع الاجتماعات الاسريه بعدين وين يتلاقوا الصغار عندهم طاقه عنف رهيبه يفرغوها في بعض..
وكان علقوا في بعض يعلقوا معاهم حتى الكبار وتصير مشاكل توصل لقطع الرحم..
وهني فعلا معاد في حد يتحمل حد..
اكيد ملاحظين الناس اللي تطلع لأعمالها ولا للقرايه..
الوجوه مكشرة والعيون تفنص تحس كان حد قال لحد صباح الخير يضاربوا...
سبحان الله زمان ماكانش هكي الحال..هو صح اني مش من الجيل الاول..بس نسمع ونعرف..وبصراحه اكثر عايش في شارع ناسه لتوا قاعدين زي زمان..ود وتراحم يتفقدوا في بعض يحنوا ع بعض..
مرات وين تلاقيهم الصبح مش بس يصبحوا عليك يعزموك ع الفطور..
جارنا الله يذكر بالخير يحكيلي..قال كنا زمان نتلاقوا عند السنفاز نقسموا ع بعض..نعزموا في بعض..وماتحس ببنة فطورك كان لما يشاركك فيه حد..
وتوا في عصر الكريب والبريوش..خليها ساكته وخلاص..."
وطلع فاصل موسيقي..
طوبى:والله كلامه واقع..
اريج:ياريت يحكي ع الناس كيف بدت طوق ع بعضها وكل شي واخدينه بالماديات وخلاص..
آلاء شبحت لأريج وكان في باين في نظرتها مسحة حزن...
رجع مرة تانيه وهو يقول..
"وفي حاجه تانيه صايرة في وقتنا هدا بالذات..هو تفاوت المستوى المادي..يعني المجتمع كثروا في الاغنياء هلبه بالتوازي مع كثرة الفقراء.. شبه انعدمت الطبقه المتوسطه وهادي كارثه بحد ذاتها يعني الناس تبدا تخش عادي جدا ع الحرام بش تقدر تجاري الفئة التانيه...
بالذات بعد كثرت بين قوسين الفخفخه..مناسباتنا كلها ولت مبنيه ع الفخفخه"
غرفه بضحكه؛سمعك روجه..
ابتسمت اريج...
"اعراس لمات..حتى العزوات..الناس ولت توا طوق ع بعضها حتى في العزي...
يعني السؤال اللي يطرح هني شن اللي خلانا هكي!؟
والجواب واضح..ظروف الوقت هدا...
ضنك العيش....
راهو الفقر اكبر مصيبه..
يخلي اللي يشبع بعد جوع يولي قمة في الغطرسه والتكبر..
ويخلي اللي عايش في القله يولي وحش بش يحصل الفلوس..
تنهد وقال...وهدا كله في النهايه اثر ع اخلاقنا ووصلنا للحال اللي حني عليه توا...
سامحوني نكدت عليكم الليله..بس مافيش مهرب من الواقع مافيش مهرب من مواجهه المشاكل ومحاولة علاجها..
هو اني مش حنصلح الكون صح..بس نحاول ندير ولو شي بسيط لعله يغير ولو شويه من الواقع..
فاصل..وراجعين مع اتصالاتكم مستمعينا"
☘☘☘☘☘☘
"اني مش فاهم شن غيرها معاي هكي البنت مش طايقه تشوف وجهي"
اميمه؛اهدا حسين شويه انت لازم تفهم ان في حاجات تغيرت فالسنين هادي..
عقد حواجبه وقال بعصبيه:قصدك في حد في حياتها!؟
اميمه حركت راسها بالنفي وقالت:لاالا مش هكي..طوبى فهالسنوات يعني ولت ملتزمه شويه حتى تعاملها مع يوسف تغير معاش تهدرز زي زمان..تسلم سلام لااكثر وهي تبي تبينك ان ولت في حدود معاش في شي قاعد زي قبل..
هو قعد يفكر في كلامها ومازال من داخله منفعل كان يبي يصدق كلام اميمه مايبيش يفكر في غيره..
شبحلها وقال:هكي تقولي؟
اميمه؛ايه ومتأكده..
حسين؛باهي اني نبي نخطبها..
اميمه:عمي حيسكر الموضوع مافيش خطوبه لبعد التخرج..
حسين؛كيف!؟ بنراجي اكثر من هكي!
اميمه:شن جديده عليك عقلية عمي ياحسين!؟
تنهد بضيق وقال؛خايف يااميمه..خايف يقولوا كبير عليها..خايف مانكونش في بالها ويكون في بالها غيري..
اميمه؛حسين خليها ع الله ثم النصيب..
حسين؛واني كلمة نصيب هادي نكرهها يااميمه..
تنهدت اميمه بقلق لأن في داخلها نفس الخوف ناحية قصتها هي وعمر...
حسين؛اني بنراجي يفوت عرس يوسف بعدين نفتح مع عمي الموضوع..
يدوب ابتسمت وهزت راسها موافقة لكلامه...
☘☘☘☘☘
الساعه 1:00ليلا...
"في نهاية الحلقه نبي نشكركم ع حسن الاستماع ع مشاركتكم الممتعه وع هدرزتكم الحلوة وان شاء الله نكونوا اشعلنا شمعه خير من لعن الظلام..
وفي الختام..
نهدي هالأغنيه...
لمن سكنت قلبي وهي لاتعلم..."
واشتغلت الاغنيه..
اريج وهي راقده وطارحه شعرها المخده قالت؛نموت ونعرف من هي اللي يحبها مهند يابختها بنت الذين..
غرفه؛ان شاء الله غير تطلع تستاهل..
طوبى؛مهند قلبه طيب ونيته بيضا اكيد ربي حيطيحه في وحده زيه...
وآلاء حداهم راقده بالنوم ماكملتش البرنامج معاهم.. ☘☘☘☘☘☘
الساعه 8:00صباحا..
واقفه في الكوجينه طيب في القهوة..
بعد ماكملت..دارت لروحها سفره حطت فيها فنجان والبكرج..
ومشت طلعت للجنان..
وين طلعت مررت نظرها ع الجنان لين ثبتوا ع خوها..
اللي لقاته داير كرسي ومقعمز تحت شبحرة ليم كبيره ويبان سرحان..
استغربت ماتعودتش بيه الجمعه يكون فايق فهالوقت..
قدمتله...
وصلت فيها وقالت:صباح الخير..
هو رمش عيونه بشي من البطئ بعدين قال:صباح النور..
ركزت في ملامحه وقالت:مش راقد صح..
تنهد وقعد ساكت..
هي مدتله السفرة وقالت:شد..
خداها منها..
وهي مشت خدت كرسي قرباته وقعمزت مقابلاته خدت السفرة منها وحطتها ع رجليها وصبت فنجان قهوة وقالت:هدرز..
شبحلها شويه وقال:تو مش قداش تزني عليا في حاجتين تبيهم مني ..
بعد مارشفت من القهوة نزلت الفنجان وهي تقول:اممم..
انك تسيب الكتيبه..ونحولوا من الحوش..
هو قال:واني قررت نديرهم الزوز..
هي بصدمه:الزوز في مرة!؟ لالا في إن مش بلاش..
هو بتذمر قال:اياه علينا عاد..الواحد معاش عرفلك يانبيله كان قلت لا وووه..وكان قلت باهي وووهين..
نبيله:اني استغربت ومن حقي يعني الزوز جو في مرة وبدون مقدمات بعد كنت رافض بشده..طبيعي بنشك مبروك..
عبدالرؤوف:عبدالرووف مش مبروك سنين واني نعلم..وبعدين خلاص ياستي تريحي..ماصارش وليت في كلامي..
ضحكت وقالت؛باهي خلاص ياعبروف..اني ماصدقت راهو وفرحانه بنطير اللي خديت هالقرارات..بس نبي نسأل مكان السكن برا سوق الجمعه زي مانبي صح..
هز راسه بإيجاب..
نبيله ابتسمت بألم وقالت:كويس..
☘بعد موت امها معاش متقبله الحوش ولاالمنطقه....تبي تطلع منهم بش يتبدل حزنها ومعاش يتجدد كل يوم"
عبد الرؤوف:وتي روحك خلال الايام الجايه بنرفعك تشوفي المنطقه والحوش..
نبيله؛قصدك خديت حوش؟
هو شبح في الفراغ وقال:قريب ان شاء الله قريب..
☘☘☘☘☘☘
وفهالوقت..
في شارع القهوة...
كانوا الجيران ملتمين في حوش شنيبه يطيبوا توا وجبة عشي مرواح الحجاج...
حبت مغليه فهالمناسبه ترد ايام زمان..
وفي نفس الوقت كان عندها غرض تاني وهو الأهم..
مغليه:نقعدوا جيران وصحبه وعشرة عمر ياصفيه والعشرة ماتهونش لاعليا ولاعليك..
صفيه بإبتسامه:هدا كلامي يامغليه واهو الحمد لله ولدي روحلي طيب وولادك حداك طيبين وربي يدومهم علينا..
مغليه بإبتسامه:اللهم آمين..
والجارات حداهم يعولوا ويشوفوا فيهم وهما فرحانات برجعتهم..
بالذات مطيرة ونجمه...
نجمه لأنها تعز صفيه وياما صلحت بينها وبين مغليه زمان...
برا من المخزن اللي يطيبوا فيه النساوين الكبار..
في الحوش..
"سلم ضمامات الحايس..ان شاء الله نشوفوهم عرايس"
ضحكوا البنات اللي كانوا يضموا ويرتبوا في الصاله ....
بنات الواعر مع بنات فايزة...
طوبى؛نسرين الستار هدا مش ماشي مع الجلسه.
اريج؛والله نفس الشي جيت بنقوله..
نسرين:هو في غيرهم تو نجيبهم لحظه بس..
غرفه:مجرئك يابنتي..
طوبى:اني ع خاطرهم مانبي حد يعلق عليهم..منظرهم مع بعض مش حلو بكل اللي يشوفهم حيعلق..
صفاء:كان نعرف ذوق مني..
ع خشة نسرين بالستاير...
آلاء:نانسي من مركب الستاير ع الجلسه..
نسرين:امي..
شبحوا لطوبى..
وطوبى دارت روحها ماسمعتش..مشت للستاير بش تختار وهما يشبحولها وشادين ضحكتهم بقوة...
طلعت واحد من الستاير وقالت:هدا الانسب..
كلهم قالوا:صح..
نسرين وهي تشوف للجلسه؛والله عندك حق..
طوبى:عندكم مكواة بخاري..
نسرين:ايه..في دار الكوي تعرفي مكانها..
خدت طوبى الستار وقالت:شويه ويكونوا واتيات..
ومشت طلعت من حداهم..
نسرين؛ماشاء الله عليها تفهم في التنسيق هلبه..
غرفه؛طوبى تفهم في كل شي الله يبارك..
☘وصلت طوبى في دار الكوي..
لقتها مردودة فتحتها طول وانصدمت..
كان فيها الجالي مقعمز وهو لابس شورت للركبه وتوب من غير كمام ووجهها باين فيه النوم وشعره منكوش...وحاط ع رجليه اللاب توب ويخدم..
هو لما شافها خاشه انخلع..
طوبى بإحراج:اسفه والله مانحساب في حد هني..سامحني..
ومشت بسرعه هاربه..
هو قعد يساوي في شعره قال:عليك موقف حقير الزفت كله من الحيوان نضال قتله اول ماينوض ينزل ينوضني التافه..
☘في الصاله..
خشت عليهم طوبى وهي محرجه..
استغربوا ونسرين قالت:خيرك طوبى..
طوبى بإحراج؛الدار مش فاضيه..
نسرين؛كيف!..
ومشت طلعت بسرعه...
غرفه بضحكه؛من لقيتي..
طوبى:الجالي هارب من الادغال..
البنات انفجروا ضحك..
وهي تفنص فيهم وتقول:اسكتوا يامتاعات العار!
☘نسرين:شن رقدك هني انت..
الجالي وهو محرج؛المكيف متاع داري فسد..المهم دبري كيف تجيبلي بش خل نلبس ونطلع..
نسرين وهي شاده ضحكتها:هي شويه بس.
ومشت طلعت وهي تضحك..
☘☘☘☘☘☘
حطت السفره وقالت؛اهو الفطور جدو...
علي:عطيك الصحه..وبدي يفطر..
وهي تتفرج عليه وفي فمها كلام تبي تقوله ومش عارفه كيف..
علي؛تبي نمشي غادي؟
انصدمت وقالت؛نعم!
علي؛لحوش شنيبه تبي تمشي؟!
اميمه قعدت تشبحله شويه بعدين قالت:لانبي نقعد معاك اليوم ونديرلك البازين باللبن غدي شن رايك..
ابتسم علي وقال؛صحة لبنت جدها..انتي بالذات مانيش عاطيك بكل..مافيش راجل حيعرف قيمتك بكل الوقت اصلا الوقت هدا مافيشي رجاله..
هي ابتسمت بصدمه وقالت:امم صح..عندك حق جدي..
علي الواعر؛اكيد عندي حق مال شني..
وهي خدت طاسة العصير شربتها وهي مضايقه..
☘☘☘☘☘
الساعه 5:46عصرا..
كملوا التجهيزات كلها...
وقعد فم السقيفه وفم الحوش تسيق فيهم اريج..
في الجنان..
نضال كان واقف يصور في روحه بش بينزل صوره ع الانستقرام...
كان لابس عربي وبكامل اناقته وفرحان اللي لبسه قعدت مساويه ونظيفه لهالوقت..
واريج تسيق وصلت برا وهي تقول؛مافيش فتحه نطلع منها الميه خل نطرها تنطير وخلاص..
وسحبت السياقه للخلف بعدين القدام بقوة بش طلع الميه اللي كانت مخلطه تراب ع شي اسود..
نضال وهو يصور؛ايوه هكي تمام...
فجأه فنص عيونه وقال؛هدا شني!
التفت وشبح تحت لسوريته لقاها في منظر يرثى له..
وهو مصدوم رفع راسه وشبح فم الباب..
شافها واقفه تقول:حول من هني ولااطلع برا ولادير لروحك حل..
نضال:همجيه..وغجريه ولاعندك اسلوب ..
هزت راسها بلامبالاة وقالت؛باهي باهي..تسقد توا هيا..
نضال بعناد؛قاعدلك مانيش متحرك وريني شن بديري؟
اريج؛حاضر تو نوريك..
وسحبت السياقه مرة تانيه..
هو فنص وقال؛تي لا يا....وهرب يجري وطلع من الحوش بكل..
اريج:اهبل...وقعدت تسيق لين كملت شغلها وخشت داخل...
☘☘☘☘☘
فهالوقت..
في مطار معتيقه..
كانوا الجالي وطاهر مع بعض واقفين يراجوا في المهدي وعائشه..
شويه وبانوا عليهم هما الزوز..
عائشه بالملايه والخمار..والمهدي كان لابس عربي...
وين شاف خوته ابتسم وحياهم بحركة اليد وهما ردوا عليه..
وصل فيهم..
ضمه طاهر هو الاول..
طاهر:حاج حمد لله ع السلامه..
المهدي بضحكه؛الله يسلمك..
طاهر:شن جو رحلتكم..
المهدي؛شن بنقولك..يللا المهم عدت ع خير..
ضحك وقال:باهي الحمد لله..
وخر عنه وجاه الجالي وقال:الحمد لله ع السلامه حمد لله ع السلامه حاج المهدي..
المهدي:الله يسلمك..
وعائشه بعيده عليهم شويه وتشبحلهم..
☘بعد السلام..
طلعوا من المطار وركبوا سيارة الجالي..ووراهم طاهر بسيارته..
☘وفي الحوش..
كانوا يراجو فيهم ع احر من الجمر..
سدرة حضرت في حوش شنيبه جت بعدين زي الضيفه وقعدت مقعمزه مابتش تتحرك بكل..
وعيون نجاة مركزة معاها..
شويه قالت:شن مافيش دربوكه ياعيله نشطوا الجو راهو حلال عادي..
وحده من خالاته؛والله عندك حق..جيبوا دربوكه هيا..
مغليه؛سديرة بنتي بري جيبي الدربوكه في الممر تلقيها..
سدرة؛حاضر حنينه..ومشت وعيونها سميتها معاها كانت تحبها هلبه خصوصا انها تفكر فيها بطوبى لما كانت صغيره..
جابت الدربوكه وخشتلهم وقالت؛من بيدربك..
طوبى؛ترا جيبي سوسو..
نجاه ركزت بعيونها مع طوبى.
مشت سدرة لطوبى وعطتها الدربوكه..
خدتها طوبى وبدت دربك..
ووحده من قريباتهم بدت تغني..
وتوا العاله والصابونه..والحجاج قريب يجونا...
وبدوا يصفقوا ويردوا وراها..
نجاه..
يامبروك عليه حجاجه..وبيجيبلنا حاجه حاجه..
غنتها وضحكت..وهما ضحكوا معاها.
ماعدا خديجه اللي كانت تشبحلها من فوق لتحت..
وقعدوا يغنوا ويصفقوا وسدرة بنت المهدي ترقص في نصهم..
لحظات وسمعوا اصوات الكلاكسات...
مغليه بفرحه؛اهم جو...
☘وناضوا طلعوا الام وبناتها وعتيقه ام عائشه والقريبات القراب هلبه..
اما الباقي وقفوا في الرواشن يتفرجوا..
شافوا المهدي وعائشه خاشين مع بعضهم...
واللي برا كلهم زغردوا لما شافوهم...
رفعت عائشه خمارها وهي مبتسمه...والمهدي يمرر في نظره عليهم وهو مبتسم..
وبدوا يصفقوا ويشتوا...
مرحبتين اهلا آنستو..ياللي بيت الله لمستوا...
خديجه..
بوعين كبيرة لواجه...يامبروك عليه حجاجه..
مغليه
إن شاء الله لايمرض لايهبي..فوق جبل عرفات مصبي..
عتيقه..
عيني ياسلم غاليها....في عرفات دهور بيها..
شبحوا عائشه والمهدي لبعض وضحكوا..
وسدرة تشبح فيهم وهي واقفه في الروشن..
والدموع واقفات في محجر العين...
هو غير عيونه عن عائشه وكأنهم بالقصد خلوه يشوف للروشن...
جو في عيونها..
هي طول ادرقت...
وهو ارتبك..انقلب حاله تماما..حتى ضحكته خفتت وقعد مبتسم مجامله وخلاص..
شويه ووقفهم وقال؛اني طالع..وخدي معاه بنته ومشي طلع..
وعائشه خشت داخل مع النساوين...
~~~~~~~~
عائشه:الحمد لله رب العالمين والله ماحسيت بتعب كله ماشي ساهل..
مغليه؛باهي الحمدلله والمهدي ماتعبش غادي..
سدرة شبحت لعائشه ومازال دموعها في عيونها.
عائشه؛لاالحمد لله ياخد في دواه في وقته ومحافظ هلبه وماتعبش نهائي..
نزلت سدرة عيونها براحه..
وعيون طوبى مافارقتهاش..
قعدت عائشه تهدرز شن دارو والكل مستمعين ومركزين معاها..
وفي من مركز مع سدرة..
بين محب واجعه حالها..
زي فايزة وخواتها وبناتها وعمتها..
وبين فضولي مستمتع بالأجواء هادي..
زي نجاة...
نجاه:ان شاء الله غير دعتيلي ربي يسهل عليا الولاده ونجيب طبيعي..
عائشه بضحكه:دعيتلك دعيتلك..
نجاه؛خلاص حتى اني تو ندعيلك لما نجيب ربي يعقد عسلكم انتي وسلفي لأخر العمر وتزيدوا بيبي حتى انتم..
البعض قالوا:آمين..
وعائشه قعدت مبتسمه مجامله...بعدين شبحت لسدره..
لقتها تشوف للخاتم في يدها كيف تلعب بيه..
☘واللي صار في السنين اللي فاتوا...تقدم لسدرة خاطب وكان شخصيه مرموقه وهي رفضاته..لكن طلعت دوة في الشارع ان سدرة وافقت عليه..ووصلت الدوة للمهدي..
والمهدي ماتحملش وتعب هلبه...وحتى خش مصحه..
وطلع عنده واحد من الشرايين مسكر...دار قسطره ومن بعد هالقسطره قعد ماشي بالدوا...
وطبعا فترة مرضه سدرة ياما صار فيها قعدت تكلم في نسرين يوميا بش تطمن عليه..
ونسرين وصلت للمهدي ان سدرة دور فيه...وهو قال لنسرين توصللها ان اللي هو فيه منها هي..
وهالجمله سمعتها عائشه صدفه...وكالعاده جرحتها ووجعتها لكن تكتمت وتجاهلت...لأنها خلاص مش حتقدر تغير شي..ولاتقدر تخليه..واختارت تكمل حياتها معاه زي ماهي وترضى بنصيبها☘
☘☘☘☘☘
الساعه 12:30ليلا..
في دار نوم طاهر ونجاة في شقتهم..
نجاة؛حتى اني نبي نمشي عمره طاهر بالله عليك..
طاهر تهكما؛ماناقصك الا عمره..
عصبت نجاه وقالت:طاهر راك زودتها مش لهالدرجه..
طاهر بغضب؛لا لهالدرجه ونص المراة اللي تطلع من ورا راجلها وتدهور في السوق وتهدرز مع الرجاله مفروض تنذبح...
نجاه بعصبيه؛طلعت مع اختي تشري في بتاتها والرجاله اللي تقول نهدرز عليهم هادم اللي يبيعوا في المحل نسأل فيهم زيي زي أي زبونه..ولو ع اني طلعت من وراك انت اللي جبرتني حابسني ومسكر عليا حتى الشمس ماتخش للحوش وانت مهناش..
طاهر:منك ومن عمايلك وتصرفاتك انتي اللي خلتيني نقد الثقه فيك يانجاه..نجاه نصيحه فوتيني اني فوتيني..لإني والله متسبل بتركبي معاي في الدوة كلمتك نعطيهالك..
هي شدت اعصابها بقوة..
وناضت خدت مخده وبطانيه من الدولاب وطلعت ترقد برا..
وهو ماباش يعبرها رقد وتغطا ودمه يفور ويغلي...
☘المشكله اللي حكوا عليها كادت تتسبب في طلاقهم لولا تدخل مروة اختها وراجلها فيها بش ردها وهدا كان قبل عرس صابرين بأسبوع بداية سنه 2016..بس المفاجئه من كان زوج صابرين...مراد اللي كان خاطب عواطف حماة خديجه من قبل...
تعرفت عليه صدفه...وعرفت تجيبه للطريق وخلاته اعمى بحبها وهي بعد ماانخطبتله عرفت عنه كل شي بس مادورتش المهم حصلت راجل تقوده وتتحكم فيه وتمشي حياتهم زي ماتبي هي...☘
🍀🍀🍀🍀🍀
وتمر الايام...
وتبدا الدراسه..
في الكليات...
التحقت آلاء بكلية اللغات في جامعة طرابلس قاطع ب..
واريج كانت تقرا في نفس الجامعه بس سنه تانيه اقتصاد..
اما طوبى فكانت سنه تانيه كلية تربيه قسم رياض اطفال.
من حبها للصغار اختارت تتخصص فهالقسم..وكانت مخططه بعد التخرج تخدم في مدرسة اختها سدرة وتمسك رياض الأطفال...
وفي اول ايام الجامعه...
تلاقوا التلاته في وحده من الكافتيريات..
وطلبوا فطور وقعدوا يراجو ع وحده من الطاولات وهما يهدرزوا..
طوبى:خدت برده وقعمزت اليوم..ومافي حد معاها في الحوش عقلي عندها..
اريج:عمتي وين..
طوبى:مشت مع مرت عمي يشروا بضاعه..
اريج؛اه ايه صح تفكرت امس كلمت امي ع الطلعه..
وهما يهدرزوا وآلاء لاهيه بتليفونها...
ع خشة نضال لنفس الكافتيريا ومعاه صحابه..
قعمزوا ع طاوله ومشي واحد فيهم طلب بعدين ولى قعمز معاهم...
وهما جتهم طلبيتهم..
بيتزا لآء وطوبى وبيتزا وشاورما لأريج...
اريج:جعانه بنموت..فتحت سندوتش الشاورما وبدت تاكل..
وطوبى فتحت حافظه البيتزا وخدت طرف..
اما آلاء...وماادراك ماآلاء..
طلعت من شنطتها كلينكس ملفوف فيه شوكه وموس..
وطلعت طرف وحطاته في صحن طلباته مع الطلبيه..
وبدت تاكل في طرف البيتزا بالشوكه والموس..
اريج وطوبى قعدوا يشبحولها..
طوبى كانت شاده ضحكتها..
واريج تبع فيها بالحركه بعدين قال:العقل نعمه والله..
وآلاء مطنشه ومش معبرة..تاكل عادي وتشرب من العصير ومرة مرة تشوف لتليفونها..
اريج:الواحد مايتبنن الماكله كان لما يخش فيه بإيديه..
وخدت نتشه كبيره من الشاورما وقعدت تاكل وهي تقول..اممم...
وطوبى تضحك عليها..
وآلاء تشوفلها من فوق لتحت..
ومن بعيد نضال كان يشوفلها وقعد يصور فيها بتليفونه..
:انت وهالبنت صراع ازلي مش معروف شن اخره..
:لا والله واضح اخره..يادبلة الخطوبه عقبالنا كلنا..
نضال:هدا اللي مازال اني ناخد وحده هايشه همجيه زي هادي..شوفوا شوفوا كيف تاكل..هادي نخاف كان خديتها نوض الصبح نلقاها واكلتلي يد ولارجل...
ضحكوا صحابه بعدين واحد فيهم قال..
:تو انت شن بدير بيه الفيديو ماتقولش بتنشره..
نضال؛شن تشوف فيا قدامك..في النهايه هادي بنت ناس وبنت جيرانا مانرضاش فيها..نبي نحرق دمها بس..
☘طوبى:هي خلاص اني بنوض نشوف كان المحاضرة صار منها ولالا كان هدا نروح طول..
اريج؛تمام ألبي..كلميني مش تنسي..
طوبى؛تمام...سلام توا..
الزوز قالوا:سلام..
وهي مشت طلعت...
ع خشت وليد ولد عم بنات اختها...
:اللي طلعت توا قداش خاشه خاطري شوفلنا وضعلها يابرو..
نضال؛مش متاع وجيج بنت جيرانا ونعرفها فوتها..
وعيونه مع وليد وهو جاي ناحية البنات..
وقف عليهم وقال؛السلام عليكم..
وجه آلاء تغير..بس تجاهلت تماما ولاكأنها سمعت صوته..
اريج شبحتلها وقالت؛وعليكم السلام وليد اهلا..
وليد جبد كرسي وقعمز..
ونضال قعد معاهم ومعاش ركز ع دوة صحابه..
وليد:انتي اللي دايرة روحك مش مدورة...شن الاخبار..
آلاء تاكل ومش معبراته..
اريج؛شن صاير وليد..
وليد؛اختك وتعرفيها حشيشتها دلع تبي ديما تزعل بس نرضيها..
شبحتله بحده..
وليد؛هدا الحق..
اريج:هي حكتلي اللي صار وانت الغالط نبهاتك قبل وقالت معاش ضيف بنات وتهدرز معاهم وانت ديما تعاكس في طلباتها منك..ماتبيش تتنازل زي ماهي تنازلت وقاعده دير كل شي تطلب فيه منها..
طلع تليفونه وقال:اني مخلي المحادثات باهي ونبيك تقريهم وتحكمي اقسم بالله البنت كانت تبي مني خدمه ليها علاقه الجامعه وانتم تعرفوا معارف بوي فيها وقفت عليا البنت ماقدرتش نردها..
خدت اريج التليفون وقعدت تقرا في المحادثات..
آلاء:تعبت روحك وجيت ع الفاضي اني حاسمه امري خلاص اني وياك لهني وانتهينا..
قعد يشبحلها بحده وهو ساكت..
واريج تمرر في نظرها عليهم..
ونضال يشوفلهم من بعيد...
☘☘☘☘☘
"آه ياربي...آااه"
هادي نجاة تمشي في شقتها وهي تتوجع كان واضح الم ولاده..
وصلت في تليفونهااتصلت بيه اكثر من مرة مايردش..
ماقدرت تتصل بغيره لأنه حالف عليها بالطلاق لو دارتها وطلعت من وراه لأي سبب كان لدرجة ان قاللها..
"اقعدي جيبي في الحوش ولاتطلعي مع غيري"
قعدت دور في الحوش وهي تتألم..
وبنتها جوري واقفه تشبحلها بخوف وهي على وشك البكاء..
☘☘☘☘
عطست تلاته عطسات متتاليه بعدين قالت..
سدرة وهي ترشف:ااه ياربي قداش نكره الزكمه..استغفر الله..
وقعدت تمشي في الحوش وهي تمسح مراياته ودواليبه وتلمع..
سدرة؛مشناها قعدت الحوش..وفوقها بروحي زي البومه..
وهي تشتغل في الحوش بتذمر..
☘درست سيارة فارهه بدايه شارع القهوة..
نزل منها واحد..يبان شخصيه مهمه..
كان لابس بدله رسمه سودا...مشي خش لشارع القهوة..
وهو يمرر في نظره عليه وع وجهه باديه ابتسامه حسره..
والدموع مغرقات العيون..
لاحظ ان في هلبه حاجات نغيرت..بس ريحة القهوة مازالت زي ماهي..
كان الشارع فهالوقت من النهار فاضي وهو عارف هالشي كويس..
وصل في مطحن الجنه..وقف قدامه وقعد يشبحله فرق بين شكله زمان وتوا..بعدين شبح للجهة التاني..شاف ان المطحن التاني تغير اكثر منه لا وفي قهوة جنبه..
رجع شبح للمطحن بعدين حرك عيونه للحوش..
خدي نفس..بعدين قدمله وقلبه يدق بقوة يدق بألم..
وكان احساس بشعور قهر فضيع...
وصل في باب الحوش اللي كان متغير حتى هو..شبح مفتاح الجرس..
طال النظر ليه بعدين رن الجرس..
☘داخل..
سدرة كانت تلمع في الانتري للمرة التانيه..
سمعت صوت الجرس قالت؛يارب حد جاي يهدرز عليا..
حطت اللي فيدها ومشت خدت وشاح لبساته بعدين طلعت وهي تقول..لكن من زعما ماعنداش مفتاح..
وصلت في الباب...
حطت يدها ع اللفته وفتحتها....
وانفتح الباب وهي كانت تجبد فيه...
ولو كانت تعرف من كان واقف وراه راهي ماجتش جيهته بكل...
وين بان عليها وشافته..حست وكأن صاعقه نزلت عليها...
اما هو كان واقف حاط ايديه ورا ظهره وهو يشوفلها بإبتسامه فيها مسحة عجرفه والتكبر..
من رفعة حاجبه اليسار...
وكملها بنبرة صوت اكثر استفزازا؛مفاجأة قاتله صح!؟
وهي مازال جامده في مكانها تشوفله بصدمه ومش مصدقه عيونها.
هوقال؛ماتبيش تسمعي مني ع الهاتف قلت نجي ونحكي معاك وجه لوجه...ومش حنمشي قبل لتسمعي...
فهالوقت.
فتح المهدي باب الحوش بيطلع..
شاف لحوش الواعر..
لقي واحد واقف عاطيه بالظهر فم الباب..
وسدرة واقفه قدامه ومنظرها ماعجباش حس ان في شي...
قعد يقدر خطوه حطوه بهدوء وهو مازال يشوفله ويشوف لسدرة..
وين قريب يوصل فيهم سمعه يقول..
"هاه شني ماتبيش دخليني"
المهدي وحواجبه معقودات بحده؛سدرة شن في؟!
سدرة غيرت عيونها للمهدي...
واللي واقف قدامها ابتسم ع جنب بعدين التفت وشبحله..
المهدي لما شافه انصدم وقال..
"مختار!"
هو التفت وشبح لسدره بحده وشي من الغضب وقال؛ايه مختار يالمهدي....

(مش مسامحه اي وحده تقرا ومانتفاعلش)

#المواجهه2
#طوبى

...يتبع....