طوبى الجزء الاول

تابع والاخير

طوبى "أقحوان وفلة وياسمينه"
#جمان_فريد
#الجزء_الرابع_والخمسين"30ينايرالأخير"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
الأحد..
28يناير سنة 2018..
عائشه ممتدده ع سرير الكشف..
والدكتورة تفحص في بطنها كامله بجهاز الإيكو..
عقد حواجب الدكتورة خلت عائشه تحس بالقلق..
وخرت الدكتورة وقالت للممرضه:عطيها مناديل..
ومشت ولت قعمزت ع مكتبها وهي تشوفلها بقلق..
بعد ماكملت عائشه مشتلها وقعمزت قدامها وقالت؛شني دكتورة..
الدكتورة؛عاودي قوليلي الاعراض ..
عائشه بلعت ريقها بخوف وقال؛كبدي تزهق هلبه وماعنديش نيه في الماكله..نتعب كان كليت ونشبع بسرعه وديما عندي القداد..نرجع هلبه بالذات في الصبح..
الدكتورة:في دم ينزل مع القيء..
عائشه:ايه...وبطني ديما منفوخه ومعبيه غازات وتوجع فيا..والبراز لونه اسود غامق ومرات ينزل معاه دم..
هزت الدكتورة راسها وقالت؛اني شاكه في حاجه تمام بعد نتأكد منها حنقولك عليها..وبس نتأكدوا منها لازم نديروا حاجتين..
صورة رنين..ومنظار للمعده..
عائشه خافت هلبه وقالت:بالله دكتورة قوليلي كل شي..
الدكتورة:ماتخافيش ياعائشه نتأكدوا قبل وبعدين يصير خير إن شاء الله..
بلعت ريقها وقالت؛باهي امتى نقدر نديرهم؟
الدكتورة؛لو فيها كيف اليوم التصوير وغدوة ان شاء الله عملية المنظار ياعائشه..ضروري اليوم وغدوة...
هزت راسها ودموعها عبوا عيونها وهي تقول:خلاص اليوم..
🍃وقعدت عائشه تستنى برا حجرة الدكتورة تراجي فيها امتى تجيها وترفعها بش دير الفحوصات المطلوبه..
جت الدكتورة وقالت:عائشه هيا نوضي..
ناضت وهي تقول بضيق:هيا..
🍃ومشت مع الدكتورة لغرفة تصوير الرنين..
او الطبقي المحوري...
خشت بيها داخل..
والممرضة المسؤوله عن الجهاز ساعدتها لعند ماتمددت ع سرير الجهاز وخشت داخل...
وحل الظلام ع عائشه..
للحظه حست روحها وكأنها في القبر..
بروحها مامعاها حد..
لابوها لاامها لاراجلها لاصغارها لاخوتها لاصحابها...
في هداكا المكان المظلم الضيق..
من حيونسها..
من اللي حينوره عليها..ويوسعه؟
مافيش في من الدنيا حترفعه معاها غير شي واحك بس اعمالها سيئة ولاحسنة..والباقي كله حتخليه..
سرحان عائشه بتفكيرها ماخلهاش تسمع في الصوت الطالع من الجهاز شن يطلب منها دير..
استاقظت لما كلمتها وحده وهي تقول..
"عائشه تسمعي فيا"
عائشه:نعم؟
"ديري زي مانقولك توا بالخطوة"
عائشه؛حاضر...
🍃🍃🍃🍃🍃
بعد كملت وطلعت من غادي..
قالتلها الدكتورة؛ضروري جدا تجي غدوة للمنظار ياعائشه..
عائشه وملامح القلق مافارقتش وجهها؛بإذن الله..
الدكتورة:ان شاء الله خير ياعائشه..
وهي تحاول تخفي قلقها قالت:إن شاء الله...
🍃ومشت طلعت من العياده والهواجس والافكار ترفع فيها وتجيب...بس مشهد دخلوها لجهاز الطبقي المحوري قعد في عقلها وبين عيونها...
☘☘☘☘☘☘
"مش عارفه شن ندير يانضال نقول ولانفوت"
نضال تنهد وقال؛تبي رأيي لازم تقولي هو خوها ومن حقها تعرفه ويعرفها...
اريج بضيق؛بس اني ماارتحتلاش يانضال هو من اول ماخش حياتنا فرق بين خالاتي وامي وزياده خدمته مع عمي..تأففت وقالت..مش متريحه خايفه وعمري ماخفت في حياتي هكي..
عقد حواجبه وقال؛بستاشيو..اوفر شويه ياعيوني..هدا خالك في النهايه مهما كان في مشاكل بينه وبين خواته يقعد خوهم مستحيل يضرهم..
شبحتله شويه بعدين قالت:هكي تقول؟!
نضال؛انتي افتحي الموضوع مع خالتك سدرة قبل واللي تقولك عليه ديريه..
اريج؛وهدا اللي بيصير..
هو قال؛نحبك..
شبحتله وقالت؛وقته..
نضال؛في كل وقت وقته..نحبك ياشمطائتي..
قعدت تضحك وهي تقول؛خلي اللغه العربيه في حالها..
هو قال؛تمام فوتيها وجيبي الشيت نشرحلك السؤال اللي قلتيلي عليه..
اريج؛ايه حقه فكرتني بيه..خدت الشيت وفتحت ع المسأله وعطتهوله..
هو خداه وقال؛تعالي ياهمي الثقيل..
ضرباته بمرفقها ع ذراعه...
توجع بضحكه وقال؛ركزي معاي..
اريج؛قبلها..نضولتي..
شبحلها بحب وقال:روحي..
اريج؛بتجي في الامتحان المسأله هادي قول ايه ولا لا؟
هو بحب:نعلي من هالعيون السماح..
اريج بضحكه:قولي ياسامط..
نضال؛نسيت..
رفعت حاجبها وقالت؛نسيت!؟
نضال بنبرة غزل؛من عيونك عيونك نسوني اسمي..
غلبتها الضحكه وهي تقول؛اشرح اشرح خير مانفقصلك شويه هالعيون اللي في وجهك..
نضال؛صقع عليك عيوني ذباحات..
اريج بضحكه؛ياعطك مايذبح عدوينك اشرح خير مانوض..
نضال بإبتسامه؛باهي ركزي معاي ياعويناتي..
ابتسمت وهي تتأمل فيه كيف يشرح وقلبها يرفرف وسط ضلوعها..
كل يوم تزيد تحبه اكثر من اليوم اللي قبله🌸
🌸واختها..
ولت تفكر في خطيبها هلبه..وتتشوق لشوفته وسماع صوته..
خدي مهند حيز كبير في حياة آلاء وهي مش حاسه..
وهو كان ملاحظ هالشي...وعارف من البدايه انه حيخليها تنجذبله وتميله ومع الوقت اكيد
حتحبه..
☘بس في من قاعد يراقب في نمو هالحب قدامه..ويبي يقلعه من جذوره وينهيه ع الأخر..
🍃في مكان عام..
كان مهند مجتمع بأصحابه..
هدرزوا شويه بعدين هو لهي بتعليقات طلب فيه من الجمهور يقترحوا عليه موضوع يناقشه الحلقه الجايه..
شويه شاف تعليق لأكابر..
"الخداع اهم موضوع لازم تحكي عنه الحلقه الجايه "
دار لايك بدون مايرد..
هي بعتتله..
تنهد بملل بعدين فتحه..
(هاي..)
(اهلا )
(شن جوك)
(تمام)
وطلع من الماسنجر ودار الوضع صامت ولهي مع صحابه شويه..
بعد عشرة دقايق...
رجع بيشوف التعليقات..
لقي اكابر باعتتله هلبه رسايل..
(العنوان اللي اقترحته مهم هلبه لو خليته موضوع الحلقه الجايه يفتح عيونك وعيون هلبه ناس عن حاجات غافلين عنها)
(مهند)
(مشغول)
(مش حلوة منك تفوت رسايلي وماتردش)
رد عليها وقال
(مقعمز مع اصحابي وانشغلت معاهم شويه)
(خلاص تو نحط اقتراحك في القائمه شكرا)
(علاش تكلم فيا هكي)
مهندفي نفسه"عليك حصله"
(مش عارفه علاش حاسه ان آلاء قالتلك حاجه عليا صح).
(غير شن تقولي ياأكابر مافيش منها الدوة هادي بكل)
(لافي منها واني نعرفها الاء كويس غيورة متملكه)
(اكابر ياادوي كويس يافوتيني بكل)
قعدت تكتب وتمسح..
وهو طارتله منها فاتها..
ورجع لهي مع صحابه مرة تانيه..
☘☘☘☘☘
"نجوحه"
نجاح وهي تقرض في السلاطه؛نعم؟
عواطف؛عارفه انك تعبانه والخدمه معاش خلت فيك جهد لكن مافيهاش كيف بترفعي اني للمركز اليوم..
نجاح؛علاش شن عندك..
عواطف؛خدمت في عيادة جديده الدوام يبدا فيها من بعد العصر لآذان العشاء..
تنهدت وقالت؛باهي مافيش مشكله..
وكملت تقريض السلاطه..
وعواطف استغربت في ردة فعلها الهاديه لانها تعرف نجاح ماتحبش تنحط تحت الضغط..
سكتت ومابتش تعلق ماصدقت رضت ترفعها عادي من غير مشاكل..
كملت نجاح السلاطه وقالت؛هيا سقي..
عواطف:باهي..
ومشت بسرعه بتسقي الغدي..
☘وفي الصاله..
امهم مقعمزة وحداها راما تستجوب فيها..
نجمه:وماعرفتيش وين بيمشوا؟
راما؛بيخطبوا لخالي عمر.
نجمه بصدمه؛لمني؟!
راما؛هكي سمعتها تقول بيخطبوله بنت خالها واسمها دنيا ومطلقه..
نجمه وهي مصدومه؛واك يامغليه واك واك واك منك..
راما؛حتى اني استغربت خالي عمر متزوج علاش بيخطبوله وحده تانيه!؟..اكيد بيطلق مرته لأن ماما ديما تقول..ان شاء الله يطلقها هالجربه..
نجمه بتهكم؛اميمه جربه طيح سعدهم لقينه في قرارهم حرام فيهم..
راما قعدت تسمع فيها وهي ساكته..
ع جية عواطف وهي نقول؛يام بوي قالك بيجي ع الغدي ولابيعطل؟
نجمه؛معطل..غير تعالي اسمعي بنت خوك شن تقول..
قربت منهم وقالت؛شنو؟
نجمه؛مغليه بتخطب لعمر ع اميمه..
شهقت بصدمه وحطت يدها ع فمها..
نجمه؛واليوم ماشيين..
حولت يدها وقالت وهي مصدومه؛ريتي ريتي!؟ ياكبدي ياكبدي..دباير مغليه ولاكنتك؟
حركت راسها بالنفي وقالت؛لا..دباير مغليه نعرفها كيف تفكر...
☘ونجمه مش حتعرف مغليه اكثر من صفيه اللي كانت يوم من الايام صاحبتها..
او صفيه هكي كانت تظن...
🍃بدون علم حد..
صفيه خدت بعضها ومشت لحوش شنيبه..
دقت الباب...
فتحلها محمد ولد المهدي سلم عليها وسلمت عليه..
وسألاته..
"حناك قاعده"
قاللها..
"ايه قاعده تفضلي"
وتخش صفيه وهي متعشمه خير جارتها القديمه وصاحبتها وعاد بينهم عشرة عمر لاهي سنه ولاتنين..
لما خشت للحوش..
نادت..
"مغليه"
🍃ومغليه وقتها كانت في الكوجينه تشوف في غداها اللي حاطته ع النار..نسرين طالعه مش في الحوش..
لما سمعت صوتها..
فرحت..فرصه وجتها لعندها..لايمكن ضيعها.
طلعت من الكوجينه..
لاقتها واقفه حدا الصاله..
ابتسمت صفيه وقالت:شن حالك مغليه..
مغليه:الحمد لله..
جتها صفيه وسلمت عليها بالخد..
ومغليه سلمت من فوق نفسها..
بعدين قالتلها؛تفضلي..
واشرتلها ع الصاله..
ابتسمت وهي تحاول تخفي توترها..ومشت خشت للصاله..
ومغلية وراها..
مغليه وهي ماشيه تقعمز؛تفضلي قعمزي..
قعمزت صفيه..
ومغليه مشت قعمزت مقابلتها وقالت:خير ان شاء الله ياصفيه؟
تنهدت صفيه وبدت تتكلم بشي من الارتباك وهي تحاول ترتيب جملها:مغليه..اني وياك جارات من عمر وكنا زي الوخيات ربينا صغويرتنا مع بعض وتعبنا وياما صار معانا مشاكل وحليناها مع بعض..
مش حنغلبوا في مشكله بنتي وولدك..
مغليه تسمع وهي ساكته.
وصفيه كملت تقول والتوتر بدي واضح عليها؛هما صغار يامغليه مازال مش عارفين مصلحتهم وجيلهم مش زي جيلنا..هما يبوا من يوريهم ويعقلهم ويعرفهم مصلحتهم..
كبار يعني فاهمين الدنيا اكثر منهم وعارفين ان اول سنة زواج صعبه هلبه يامغليه لازم يسايروا بعض ويفوتوا لبعض ويتفاهموا مع بعض...
سكتت شويه وهي تشوفلها بعدين قالت:لاأني نبي خراب حوش بنتي ولاانت تبي خراب حوش ولدي..خلينا نصلحوا بيناتهم وندحروا الشيطان اعوذ بالله منه..
سكتت وهي تراجي فيها تتكلم ومغليه ولاحركت ساكن..
زادت توترها وسألتها وهي تقول:شن قولك يامغليه؟
تنهدت مغليه وقالت؛والله شن بنقولك..ولدي هو اللي يبي الطلاق توا ياصفيه..
🍃وعمر كان نازل من الدار سمع اخر جمله قالتها امه..
نزل لوطا وقرب من الصاله وهو يسمع..
صفيه؛ماهو قتلك يامغليه نبوا نصلحوا بيناتهم..
مغليه؛واني مانبيش ياصفيه..
قعدت صفيه تشبحلها وهي مصدومه..
ومغليه مكمله تقول؛مراة مش محترمه راجلها تنزل في صورها عن النت وتنزل في كلام كله تلقيح عليه وعلينا شن مازال بنشروا فيها..
صفيه؛حطي روحك مكانها يامغليه اللي صارلها مش شويه!
مغليه:اني قبل جبتك هني وحكيتلك بنتك شن دايره..بنتك مش محترمه حد اني عزوزتها ام راجلها وين نكلمها ع حاجه قريب تاكلني وراجلها مش معبراته ولادايرة لكلامه قيمه..
وحده زي هادي لاتلزم ولدي ولاتلزمنا..وخل نعطيك علم بحاجتين..لولا ان بنتك مايجوزش تطلق توا راهو قداش ليه مطلقها..والحاجه التانيه وبش تعرفي ان ولدي خلاص معاش يبيها..اليوم ماشيين نخطبوله بنت خوي..
اللي سمعاته صفيه كان بمثابة الصفعه نزلت ع وجهها ع غفله...خلت عقلها ينشل للحظه عن التفكير وهي تقول..
بتخطبوله!؟
مغليه بكبر:ايه..
تبدلت ملامح وجه صفيه من الصدمه للحده..
رفعت راسها شويه وشبحت لمغليه بنفس نظرتها الا ان نظرة صفيه كانت غارقه بالدموع وقالت:صدقت بنتي..ولدك عمر مايناسبهاش..
رفعت مغليه حواجبها شويه وهي متعجبه..
اما هو الجمله هادي سببتله عقده..
وين يسمعها يجن جنونه..
خش عليهم وهو يقول بنبرة متعجرفه:اني اللي ماتناسبيش عيلة فضايحهم لتوا الناس تعدي بيها في القهوة والشاهي..
ابتسمت مغليه ابتسامه مكر خفيفه وهي تشوف لصفيه..
اما صفيه شبحتله بنظره كلها غضب وكره..
بعدين ناضت وقفت وهي تشوفله وابتسمت في وجهه وقالت؛انت عارفنا كويس ياعمر زي ماعارف بنتي كويس
بنتي اللي خلاتك من قهرتك بتاخد عليها قبل لطلقها بالك تقهرها شويه زي ماقهراتك..مسكين..تي والله والله..وبصبعها ع عينها وقعدت تنزل فيه ع خدها وهي تقول..لتبكي ع بنتي دم..دم تبكي
وغيرت نظرها لمغليه وهي تقول...وامك شاهده...
شبحتله تاني وقالت...وتفكر كلامي هدا كويس انت وومياتك..
ومشت طلعت وهي في قمة الغضب..
وخلت عمر في حالة من القهر..
من داخل كان عارف ان كلامها حيصير بس مايبيش يعترف حتى لنفسه..
مغليه وهي تشوفله قالت؛مادورهاش هي وبنتها اللي حينقهروا واميمه ع عدد شعر راسها حتندم وقول قالتها امي..
عمر شبح لأمه وقال؛ بنعقد ع بنت خوك نهار نطلقها يام ..نهار نطلقها وتو نشوفوا من اللي يبكي دم بعدين..
ومشت طلع من جنب امه والغضب عامي عيونه وولى ركبت لداره..
ومغليه قالت بوعيد؛تو نوريك انتي وبنتك ياصفيه اصبري عليا شويه بس..
🍃🍃🍃🍃
وصفيه بعد طلعت من حوشهم..
حست براحة عجيبه..ممكن لأنها طلعت اللي في قلبها وقعد تاخد بثار كرامة بنتها ولوشويه..
مشت طول لحوش سلفها..
دقت الباب بقوة...
سمعت مطيره تقول...
"مني..مني"
خدت نفس وقالت:صفيه..
فتحت مطيره الباب شافت حالتها..
كيف وجهها شاحب وعيونها مدمعات بقلق قالت؛خشي صفيه خشي..
وخشت صفيه..ومطيره سكرت الباب..
☘☘☘☘☘
روح مهند من لقائه مع جماعته بعد ماتغدوا مع بعض..
وماشافش لتليفونه نهائي..
ركب السيارة وتوجه لحوشهم..
وطول الطريق كان يسمع لفنانه المفضل..
ويغني معاه..
ولانظره شغلتلي بالي او سحرت قلبي مرة..
مابعرف شو غير حالي وشو صار في من نظرة..
وقعد يدندن لين قرب يوصل للمنطقه اللي يسكن..
فيها..
خشلها..
ووصل في حوشهم..
خش بالسيارة..
بعدين نزل منها وتوجه لداخل الحوش..
🍃مهند؛خلاص تميت فيه؟
اياد بإبتسامه؛يوم الخميس بنحولوا..
مهند بضحكه؛يوم الفضانيه..غمز بعينه وقال..معاش نقدروا ع فراقهم بعد ولوا لينا..
ضربه بوه بقبضه ع وجهه بخفه وهو يقول بضحكه:تحشم ياتافه..
ضحك مهند وقال:بنخش نرقد ياعريس نوضني لمايذن العصر..
سكر عيونه وفتحهم بمعنى"باهي".
ومشي ..ومهند مشي للدار وفي داخله فرحة لاتوصف..
خش وسكر عليه دار..
بدل حوايجه بعدين طلع للحمام شويه..ورجع من جديد للدار..
خش لسريره وفي يده تليفونه..
لقي مكالمه من آلاء..ابتسم وقال؛ياويلك مهند..
شاف في الاشعارات رساله من اكابر تأفف..
بعدين فتحها يشوف شن كاتبه وبيديرلها حظر..
قراها.
(انتي اللي ادوي معاي كويس وماتكلمنيش ع خاطر وحده زي الاء هكي)
(ياريتها غير تستاهل تي هي انخطبتلك بونتوا في حبيبها يكون في علمك )
(ولو مش مصدقني أسأله ع وليد التاجوري وشوف شن تقولك)
ومابعتتش رسائل تانيه غيرهم..
بس هدا يكفي ويزيد..كلامها هدا خلا مهند مصدوم..
لكنه ماصدقش في آلاء..ومع هدا لازم يواجهها ويفهم منها..
حظر أكابر..
ودار سكرين للمحادثه..
وبعتها لآلاء ع الماسنجر..
🍃وآلاء وقتها كانت في دارها..
راقده في سريرها وهي شاده تليفونها..
خاشة ع صفحة مهند وتتفرج ع صوره وع وجهه ملامح ابتسامه حلوة..
فجاة جتها رساله منه..
وهي مش حاسه بنفسها ملهوفه فتحتها..
كانت صورة المحادثه.
اختفت ابتسامتها وهي تقرا فيها..
تسلل الخوف لقلبها وسيطر عليه..
ودقات قلبها تسارعت..
اتصل بيها..
بلعت ريقها وفتحت الخط وهي تقول؛آلو..
"أيوه آلاء شن جو"
آلاء؛تمام شن جوك انت..
"تمام الحمد لله"
آلاء؛مهند شن هدا اللي بعتهولي؟
"قرتيه ولا...ترا فسريلي"
الاء؛شن نفسرلك قصدك انت مصدق الكلام
التافه هدا؟
"لامش مصدق..بس نبي نعرف من هو وليد التاجوري قريبك؟"
آلاء وهي تحاول تتغلب ع خوفها:ايه ولد عمي وكان يبي يخطبني بعدين ماصارش وكل حد مشي ع حاله ..
هو قعد ساكت من تكلمش..
وهي خافت من سكوته قالت..
تفكر كان كلامي حق ولاكذب؟
تنهد وقال...
"لانبي نتفكر كان شفته ولد عمك هدا في فاتحة اختك ولالا"
هي زادت خافت وقالت؛علاش؟
"هكي نبي نعرفه"
آلاء؛مهند لشن تبي توصل..
"مانبي نوصل لشي ياآلاء اظني من حقي نستفسر ونعرف نبيك تحكيلي القصه كامله"
آلاء ودموعها في عيونها؛مافيش قصة يامهند صغار عم وكان بيصير بينهم نصيب لكن ربي مارادش..
"آلاء كان في بينكم شي خليك صريحه معاي ديما نقولك نبيك صريحه في كل شي"
هي بإنفعال من خوفها قالت؛ايه..ايه..تريحت توا..ونزلوا دموعها..
"هدا علاش مش قادرة تحبيني صح؟"
آلاء:مهند ماتلخبطش الدنيا في بعضها مهند..
"مالخبطت شي ياآلاء هو سؤال ونبي عليه اجابه واضحه وصريحه.."
آلاء سكتت ودموعها ينزلوا ورا بعض زي السيل..
من الخوف حاسه قلبها بيوقف.
"تمام ياآلاءمش لازم تجاوبي كل شي ولى واضح..سلام"
وسكر عليها..
هي بصدمه؛مهند..مهند..آلو..آلو..
وشافت للتليفون لقاته سكر عليها قالت؛سكر عليا..!..شن قصده باهي شن قصده!!؟
وعاودت اتصلت بيه وهي ترعش مع بعضها..
نادى لين فصل ماردش..
آلاء بنبرة مرتعشه:ربي ياخدك يااكابر ياحقيره..
وخشت ع المانسجر بعتتله رسالتين..
(مهند)
(رد عليا خل نفهمك)
ماشافش الرسايل..
عاودت اتصلت بيه نادى وماردش عليها..
لوحت التليفون ع السرير وقالت نبرة باكيه:اكابر ياحي.وانه ياسا.فله..وقعدت تبكي..
خشت عليها اريج..
لما شافت حالتها سكرت الباب طول وهي مفجوعه وقالت؛خير بلاك!..
الاء ببكي؛مهند سيبني..دارتها الحقيره اكابر وخلاته يسيبني
اريج؛غير اهدي واحكيلي بالشويه عليك..
هدت شويه آلاء وحكت لأختها كل شي🍃
اريج؛هالمريضه المعاقه!...
آلاء ببكي:وهو يقولي هدا علاش مش قادرة تحبيني ماهو اني بينتله ان عندي ماضي وماباش يدقق علاش تغير موقفه توا!؟
اريج:الو حبيبتي طبيعي راهو اللي داره وبعدين انتي يادراه الكبد مش مبينه للراجل قيمته عندك..
الاء؛شن يبيني نقوله نحبك بالكذب؟
اريج رفعت حاجبها اليسار وهي تقول؛بالكذب..! قصدك هالمناحة اللي دايرتيها وهالحال اللي صار فيك وماتحبيشي مالا كان تحبيه كيف!؟
سكتت آلاء وهي مصدومه وقالت؛قصدك هكي اني!...لالا..بري فوتيني..
اريج:وحتى اني بنفوتك ماعنديش نيه نكد ع روحي خل نكلم زوزي بش يضحكني..
ورقدت ع السرير وتغطت بالبطانيه واتصلت بنضال..
والاء تشبحلها وهي تفكر في كلامها..
وفي الاخير قالت في نفسها..
"مانحباش وماعندي علاش نحبه.."
وحطت تليفونها ع الكامدينو ورقدت وتغطت بالبطانيه..
☘☘☘☘
"ريتي بالله وين وصلت بيهم"
سدرة بكره؛هدا علاش ماكنتش نبيها تاخده..زيه زي خوه دماغاتهم مضروبه..
مطيره بقهر؛اني كبده مسحونه من اللي ينقاللها مغليه الواطيه..
سدرة:يطلع كله من تحت راس خديجه..
شبحت مطيره لسدرة بقلق وقالت؛حسني خفت ع طوبى ياسدرة..
سدرة:لا طوبى راجلها مش زي هالعاهه..الراجل قاري النقص هذا علاش سكن بعيد عنهم..
مطيره وهي تفكر بقلق:ربي يكفيها شرهم يارب ساد اللي جي لبنت عمها..حسبي الله ونعم الوكيل حسبي الله ونعم الوكيل..
سدرة بإنزعاج:اني طايرتلي من امي صفيه شن رفعها غادي علاش طيح من روحها وتمشيلهم علاش تعطيهم فيه فرصه يقولوا للناس بعدين امها جتنا وترجتنا..
مطيره بضيق:حتى اني قلتهالها..الله اعلم كان سمعت اميمه شن دير..
سدرة؛تهبل عليها وتوريها...
تنهدت مطيره بضيق وهي تقول؛لاحول ولاقوة الا بالله..
☘وصفيه..
مش قادرة تحول اللي صار من بالها..
اغلب وقتها سرحانه..والموقف قاعد بين عيونها..
اميمه لاحظتها..بس مااستغربتش قالت في نفسها
" اكيد تفكر فيا وفي حالي"...
علي:اميمه بنتي مدي شيشة زيت الزيتون من حداك..
اميمه؛جدي مش باهي تكثر منه..
علي:شويه نكمل بيه الخبزة..
اميمه؛حاضر..وفتحت الشيشه وصبت لجدها شويه..
علي:احسنتي..وبدي ياكل..
وهي سكرت الشيشه وحطتها جنبها ورجعت تشرب من مق القهوة..وفي يدها آيباد تقرا منه في بحث طبي..
علي شبح لصفيه وقال؛صفيه..
ماردتش عليه..
شبحتلها اميمه..
هو عاود كلمها:صفيه..
استاقظت وشبحتله وقالت؛نعم عمي..
علي؛كلمي يوسف يجي يبات هني الليله بوه يبيه هو يخدمه حسين مرة مرة ينتور عليه مش يوسف باله واسع..
صفيه:اميمه كلمي خوك .
علي فهم على صفيه وعذرها..
واميمه قالت:حاضر..
ناضت وهي تقول؛بنمشي نتكا في الدار شويه لما يذن المغرب نوضيني..
اميمه:حاضر..
وقعدت معاها بعيونها لين درقت بعدين شبحت لجدها وقالت؛صايرة حاجه جدي!؟
حرك راسه بالنفي وهو يقول؛واني قاعد ماصار قدامي شي ..
اميمه هزت راسها ورجعت لهت بالآيباد..
☘☘☘☘☘
طلعت نجاح بسيارتها من الحوش وهي رافعه امها لمركز العلاج الطبيعي..
بعد ماقطعت مسافه مش طويله..
وصلت بيها غادي..
درست سيارتها..ونزلوا هي وامها وخشوا للمركز..
وطول لقسم النساء..
وبدت امها جلستها...
وهي قعدت بروحها تراجي فيها..
وطبعا المسبحه في يدها..
شافت الرقم اللي وصلتله وهي تردد طول اليوم في تاج الذكر..كان 700..
رقم ماكانتش تحلم توصل لربعه في اليوم الواحد..
بس من بعد ماتعودت عليه ولى سهل عليها توصل لالف وفوق في اليوم..
ومعروفه كثرة الذكر..ثوابه..وبركته اعظم..
وهي لاهيه تردد فيه بحركة الشفايف..
🍃جي واحد ومعاه مراة كبيره في العمر..
قعمزها وقال؛خليك شويه لين يجي دورك..
هي..
لما سمعت صوته...جاها زي صوت تعرفه بس نست لمن يكون..
شبحت طول للراجل اللي تكلم..
ضيقت عيونها وهي تشوفله حست شكله مار عليها قبل..
وهو..
غير عيونه عن المراة وجي بيشبح لباب غرفة العلاج..
جو عليها..
اتفاجئ ع الآخر قعد يشبحلها وخلاص..
هي لما شافلها..عرفاته..
توسعوا عيونها بمفاجأة..
بعدين غيرتهم عنه طول وشبجت لخاتم التسبيح وقعدت تردد في تاج الذكر ومازال متفاجئه..
هو ارتسمت ع وجهه ابتسامه المفاجاة..
قعمز جنب امه وقال:يام ريتيها البنت اللي غادي..
واشرلها بعيونه..
امه شافت وين يشبح وركزت عليها بعدين قالت؛خيرها؟
:مش متفكرتيها يام؟
زادت ركزت فيها اكثر وقالت:هو اني رايتها قبل لكن مش متفكرتها من تكون؟
:يام تتفكري في البنت اللي كان عاقد عليها مراد ولد اختك..
شبحتله وقالت؛ايه صح..اختها ولا اللي قبل تبي تخطبها..
ورجعت شافتلها مرة تانيه..
عبد الحفيظ وهو يشوف لنجاح بإبتسامه؛ايه هي يام..سبحان الله قاعده زي ماتغيرتش بكل..
:صح ماكبرتش بكل..
ونجاح كانت حاسه انهم يشبحولها توترت هلبه..
ومعاش عرفت شن تقول من الذكر..
وقفت شويه..وقعدت ساكته وهي في نفسها تقول..
"استغفر الله العظيم شن جابني اليوم بس كله من عواطف"
"بنيتي"
نجاح في نفسها"هادي تكلم فيا اني"
"تسمعي فيا"..
نجاح بإحراج شبحتلها وقالت؛تكلمي فيا؟
عبد الحفيظ لما شاف وجهها كله حس بشعور من حلاوته ماينوصفش..
:ايه..شن سماك؟
نجاح وهي تحاول دير روحها عاديه وتتجنب تشوف لعبد الحفيظ؛نجاح..
؛ايوه نجاح..كيف حالك وكيف حال امك..
نجاح؛الحمد لله....
:شكلك ماعرفتنيش..
نجاح؛لاسامحيني ماعرفتكش..
هو شد ضحكته عارفها كذبت..
امه بإبتسامه:اني خالة مراد اللي كان عاقد ع اختك..اللي جيت بعدين خطبتك لولدي وردتينا..
وجهها ولى احمر وقالت؛اها..ايه تفكرت توا..
:شن حالك وشن حالها اختك تزوجت؟
نجاح ابتسمت بأسف وقالت؛بعد اللي راته مازال تفكر في الزواج؟!
انحرجوا عبد الحفيظ وامه..
بعدين امه غيرت الموضوع وقالت؛وانتي؟
ركز عبد الحفيظ معاها..
نجاح حركت راسها بالنفي وقالت؛ماجاش النصيب..
امه شبحتله وهي تقول؛ربي يبعتلك نصيب يستاهلك..
وهو يشوف لنجاح بإبتسامه فرح واضحه..
اما هي غيرت عيونها عنهم وهي خجلانه وشافت لخاتم التسبيح وقالت؛تسلمي..
قعدوا ساكتين..
وهو يشوفلها..
شويه امه نخصاته وقالت بهمس:غيب شويه..
هو شبح لأمه وفهم عليها..
بعدين ناض وهو يشوف لنجاح..
ابتسم..ولف ومشي..
ناضت امه ومشت قعمزت جنب نجاح وقالت؛علاش جايه هني؟
نجاح ارتبكت وبان عليها وهي تقول؛امي..عندها ظهرها..الفقرات متاع ظهرها..ضغط فقرات..
ام عبد الحفيظ؛نفس الحاله...
نجاح؛لاباس عليك..
؛الله لايوريك باس..هدا العمر يابنتي تبدا بالحاجه فينا تشكي وكل مرة طيح فينا حاجه..اني مشكلتي كل شي عليا..
بناتي كلهم واخدات والحوش كبير ويبي من يخدمه..
نجاح؛ماعندكش كناين..
:عندي بس ساكنات بعاد عليا وحيده بس كانت معاي الله يرحمها..مرت عبد الحفيظ.
وجعها قلبها وقالت:لاحول ولاقوة الا بالله من شن ماتت؟
؛وهي تجيب في وليدها صارتلها مضاعفات مسكينه وتوفت..
نجاح بألم:الله يرحمها ويغفرلها..
:الله يرحمها..وقعدت اني نعاني وليد ولدي أوفا..اسمه مصطفى ع اسم جده راجلي..
نجاح؛ربي يحفظه..
؛سلمك..عمره 4سنين..ع قد ماحاولت في بوه يتزوج مرة تانيه ماباش..قالي مانجيبش لولدي مرت بو تبهدله..
نجاح؛عنده الحق..
:بس عاد مش كلهم عافنات..والله في اللي تعامل صغار راجلها تقول هي اللي جايبتهم..
نجاح هزت راسها وهي ساكته..
؛اني كبرت وهاني قاعده نعاني معاش نقدر ع معاناة الصغار ومانقدرش نقوله عارفاته بيحرج ومرات يطلع بولده من الحوش بكل..ربي يهديه من عنده ويغير رايه..
ونجاح تهز في راسها وخلاص ماتبيش تعلق..
🍃عبد الحفيظ يشوفلهم من بعيد..
وخايف من امه تلبز معاها في الدوة..
مشالهم طول..
ولما قرب يوصل فيهم طلعت نجمه وهي دايخه شويه والممرضة شادتها..
ناضتلها نجاح وقالت؛خيرها؟
الممرضه؛طبيعي ماتخافيش..
نجاح:يما؟
نجمه بشي من التعب:عادي عادي بنتي مافيا شي..
وخدتها قعمزتها ع الكرسي..
الممرضه:الحاله اللي بعدها..
عبد الحفيظ:خشي يام..
ناضت وهي تقول؛ان شاء الله لاباس..
الزوز ردوا عليها؛لايوريك باس.
ونجمه قعدت معاها بعيونها لين خشت داخل..
شبحت لبنتها وقالت؛شايفتها هادي قبل..
قعمزت جنبها وقالت؛شن تحسي في روحك توا؟
نجمه وهي مضيقه عيونها؛كويسه كويسه..وين رايه هالمراة؟
شافت نجاح لعبد الحفيظ...
هو ابتسم وقال لنجمه:لاباس عليك خالتي..
شبحتله نجمه بإستغراب وقالت؛لايوريك باس..
هو هز راسه ومشي ..
ونجمه معاه بعيونها وهي تقول:هدا مني؟كلمني وكأنه عارفني؟
تنهدت نجاح وقالت:هدا يام ولد خالة هداكا اللي كان خاطب عواطف..
نجمه؛ايوه..امه اللي خشت توا..هادي اللي جت خطباتك مرة..ليه هو قصدك؟ هدا اللي مشي توا؟
نجاح ؛ايه يام..
نجمه؛الله ع الدنيا!..تعرفي الراجل هدا شن داير لخوك محي؟
نجاح بتعجب؛هدا!؟ شن دار؟!
نجمه؛لما خوك دار حادث ونزف هلبه والمصحه طلبت دم وقتها هواللي تبرعله..
نجاح وهي مندهشه؛كيف!؟
نجمه؛قال بوك تلاقينا صدفه غادي وهو شكله شافهم وعرفهم وجاهم طول ووين طلبوا الدم هو قال اني نعطيه..
نجاح تسمع في امها شن تقول وهي مندهشه هلبه..
شافت للاخر الممر مالقتاش شبحت لأمها وقالت؛وخيركم ماحكيتوش قبل..
نجمه؛وشن تبيني نحكي وعلاش؟!..لكن بوك قال كان في المصحه ع خاطر ولده ابصر شن صايرله نسيت..
نجاح:ايه صح عنده وليد لكن مرته توفت..
نجمه شبحت لنجاح شويه بعدين هزت راسها وقالت؛الله يرحمها..
تنهدت نجاح وقالت؛شن توا باهيه نوضوا نروحوا؟
نجمه؛ايه باهيه الحمد لله..نوضيني.
ساعدت نجاح امها بش ناضت ومشت هي وياها..
🍃وين قربوا يطلعوا من المركز تلاقوا مع عبد الحفيظ..
شاف لنجاح وهو مبتسم..
هي ارتبكت وغيرت عيونها عنه..وامها ركزت بس دارت روحها ماشافت شي..
وطلعوا الزوز من المركز..
☘☘☘☘☘
واقفه في الكوجينه تحط في اللمسات الاخيره ع حلو قهوة العشيه..
خشت عليها امها وقالت؛ماجاكم حد؟
صفاء:خالتي جابتلنا صونيه كسكسي عسلوز ليك انتي..
فايزة بإندهاش:والله العظيم امس جي في خاطري وقعدت نفكر امتى نديره..وينه.
صفاء بإبتسامه؛فالكوشه..
مشت طول فايزة طلعاته من الكوشه وحولت الغطا وهي تقول؛ياروحي ياسديرتي مافيش داراته ماحسبتنيش فيه..
وصفاء تسمع فيها وهي تزين في الكريب بشرايح الفرواله..
خدت فايزة كاشيك وقعمزت ع الكرسي وقالت؛يوم الخميس فضانيتها..
صفاء بإبتسامه؛ربي يكملها ع خير..
فايزة بإبتسامه؛آمين..وبدت تاكل..
وصفاء مشت للثلاجه فتحتها بطلع منها فازو العسل..
خداته وسكرت الثلاجه..
بعدين مشت بيه للكريبات وهي تتفكر في اللي فالسوبر ماركت..
ضحكت ضحكة خفيفه غير مسموعه..
بعدين كملت بيه زينة الكريب..
☘☘☘☘☘
"عمري راك تنسى ترفع السيارة"
الجالي؛باهي باهي..فهمنا كم مرة بتقوليلي..
نجاة؛ماهو لما تمشي للعبتك تنسى حتى اسمك..
شبحلها بربع عين..
بعدين خدي جاكيته وحطه ع يده وهو يقول:غدوة تاخدي الاجازة..
نجاة:ok..
فتح الباب وقال؛ماتبي شي..
نجاة؛سلامتك حياتي..
مشي طلع وسكر الباب..
وهي مشت دارت دورة ع الشقه...بعدين خدت شنطتها وروحت..
🍃في الطريق..
الجالي جاه اتصال من طوبى..
=ماشي لشارع القهوة بنحلق..
"باهي امتى مروح"
الجالي:بعد المغرب قلبي..خيرك خايفه؟
"لالا علاش بنخاف غير كسدت بروحي"
الجالي:بعد المغرب نكون في الحوش عمري...
"تمام رد بالك ع روحك..في امان الله"
الجالي:سلام قلبي..
وسكر..بعدين تنهد وزاد السرعه..
🍃وهي في الحوش..
ماكانتش مكسده..كانت خايفه..
اول مرة تقعد بروحها لهالوقت..
بعد ماسكرت منه...مشت للمنظومه..
خدت CDقرآن للقارئ مشاري العفاسي..
وحطت في المنظومه..وشغلتها..
وبدي تلاوة سورة النور..
وهي بش تشغل نفسها قررت ضم دار النوم ليها هلبه ماقلبتهاش..
🌸وهي ضم فيها وترتب في حاجاتها..
طاحت في يدها صورة..
لأمها وخواتها خدوها في عرس فردوس..
كانت تتأمل في الصورة هلبه..
وركزت بنظرها ع سدرة اللي حاطه راسها ع كتف امها وهي مبتسمه..
وورده تشوف للصورة وهي مبتسمه..
دمعوا عيون طوبى..وفيسع نزلوا..
مسحتهم وهي ترشف وبعدين دست الصورة...
☘وفي حوش بوها..
كانت سدره تقلب في دار نوم بوها وامها..
فتحت جهة دولاب امها اللي قاعد فيها حوايجها وكل شي يخصها..
طلعتهم وحطتهم ع السرير..
ومسحت الدولاب كله..بعدين ردت بالحاجه وهي تعطر فيهم بعطر الياسمين..
وبعد كملت سكرت الدولاب..
وجت لدولاب بوها حتى هو رتباته كله..
بعدين غير ورغان السرير..
وكنست الدار بالمكنسه الكهربائيه..
وطلعت منها وسكرتها..
وكان يجيها نفس الاحساس كل ماضم هالدار..
وين تكون فيها وهي ضم تحس كأنها رجعت بالوقت 21سنه لتالي..
تسمع في صوت امها..وهدرزتها..واوامرها وتكشخيها وضحكتها...
وبمجرد ماتطلع منها ترجع للواقع..
الباهت..اللي انسحبت منه كل الالوان الزاهيه بعد موت امها..
تنهدت وملامح الحزن باديه ع وجهها ومشت...
☘☘☘☘☘
وصل الجالي للشارع...
درس قدام الحلاق..
شاف جهة حوش المهدي لقي عبد القيوم طالع منه ومتوجه للقهوة..
قعد يلحق فيه بنظراته الحادة..
بعدين نزل من سيارته ومشي توجع للحلاق وخشله...
☘☘☘☘
فاق مهند من نومه..
وصلى العصر..
بعدين دار لروحه قهوة..ومشي شربها في الصالون..
وتليفونه في يده..
شاف اتصال آلاء اللي جاه وهو راقد..
تنهد...بعدين اتصل بيها..
فصل عليه الخط طول..
استغرب..
عاود اتصل مرة تانيه صار نفس الشي..
عقد حواجبه باستغراب..
ووخش ع الماسنجر بيبعتلها رساله لقاها دايرتله حظر..
رفع حواجبه شويه وهو عاقدهم..
بعدين خش ع جهات الاتصال..
حط ع رقم اريج كتب رساله وبعتها...
🍃أريج وقتها كانت في الكوجينه تعلم فيها امها كيف دير رز بالخلطه اكثر اكله يحبها نضال..
جتها رساله قالت بضحكه:نسيبك يراجي امتى نبعتله الصورة..
ضحكت وقالت:قوليله كان يقدر يجي ياخد حصته..
اريج بإبتسامه:باهي..
ومشت خدت تليفونها من فوق وحده من الطواسي المحطوطات في الرفوف..
استغربت وين شافت الرساله جايه من مهند..
فتحتها..
(اسف اريج بس نبيك تقولي لاختك تحول الحظر)
اريج:هالزفته..
فردوس:شني؟
بارتباك قالت:ع التغطيه زفته..
ومشت طلعت من حداها للدار طول.
فتحتها ع اختها..
لقتها حاطات السماعات في ودانها تسمع في الاغاني وشاده كلينكس وتبكي..
اريج؛حولي السماعات..وقعدت تأشر عليهم
حولتهم وقالت بحده:شن تبي؟
اريج؛مهند قالك حولي الحظر..
فنصت وقالت؛اتصل بيك..
رفعت التليفون وقالت؛بعتلي رساله..
الاء:ماتعدليش عليه..
اريج؛بلاعبط انتي حولي الحظر وردي ع الراجل..
الاء: مادخلكش بيا واطلعي برا...
اريج؛مش دارك بش طلعيني منها حبيبتي..
الاء حطت السماعات وقعدت تغني بصوت عالي بش ماتسمعهاش شن تقول..
اريج بإزدراء:تو تريحه من يدك وتقعدي تبكي عليه بعدين..متخلفه..
ومشت طلعت وجبدت الباب وراها..
وهي رجعت تبكي مرة تانيه..
☘☘☘☘☘
"مرتاح هني"
فراس التونسي:الحمد لله..
الجالي:كان في حد ضايقك ولافي يوم احتجت حاجه تعالي طول..
هو بشي من التردد قال؛هو عندي مشكله في المصرف تنجم تحلها زعمه؟!
الجالي؛في اما مصرف؟
فراس:الصحاري..
الجالي:عندي معارف غادي قولي شن مشكلتك ..
فراس فرح ع الاخر لأن المشكله هادي دارت ازمة ماليه لعيلته اللي قاعده في تونس..
وبدي يحكي للجالي عنها..
🍃وبعيد عنهم شويه..
في قهوة الزعيم..
ربيع:امي معاش تبيني نبات برا الحوش تقولي اللي يسكن بروحه يلتبس..
قعدوا يضحكوا عبد الرؤوف وعبد القيوم..
عبدالقيوم بضحكه؛قوللها عشت عمر وحدي في الغربه..
ربيع؛قلتلها قالتلي الاجانب مايلتبسوش..
عبد الرؤوف:هدا ع اساس انك محسوب عليهم..
ربيع؛ع قولت امي وخير منهم..
عبد الرؤوف؛شن هو اللي في العين امه غزال ياعبدو..
عبد القيوم:طرزان..
قعد يضحك عبد الرؤوف ..
ربيع؛تي غير لا ياليو وبراد انت وياه
مسح عبد الرؤوف ذقنه وقاله وهو يرقص في حواجبه؛والله مايجوا في ربعي..
ربيع؛عليك فاتشه استغفر الله العظيم وخلاص..
وعبد القيوم يضحك عليهم هما الزوز..
"خير ياحاج علي"
الثلاته شبحوا لعلي الواعر اللي سلم واحد من الجيران وهو فايت..
ردله السلام وكمل طريقه وهو يمشي بعكوزه اللي يخبط ع الارض..
عبد الرؤوف:الراجل هدا هيبه تمشي ع رجليها..
ربيع:ليالي الحلميه رهبه وهيبه من يوم يومه..
عبد الرؤوف شبحله وقال؛ايه حق علاش تسموا فيه ليالي الحلميه..
ربيع بضحكه؛لما عرضوا المسلسل كان فيه شخصية تشبهله فيه مثلها يحي الفخراني زيه بالزبط كيف يمشي ويتكلم بالعكوز ..والزوز شقر...
عبدالرؤوف:تفكرته المسلسل سليم البدري قصدك..
ربيع:عليك نور.سليم البدري...
عبد القيوم؛مش صحاب انا والتلفزيون..بس الحاج علي راجل مصنع ممنع وولده الحاج لطفي كيفه مايتخيروش عن بعضهم..
عبد الرؤوف:صح..شبح لعبد القيوم وقال..مازال مصر تسيب الشارع..ماطحتش في غية شارع القهوة..
عبد القيوم ابتسم بأسف وقعد ساكت وهو يشوف لفنجان القهوة..
وربيع يشوفله بضيق..
"تارقي"
تبدلت ابتسامة عبد االقيوم من الاسف لشي من التهكم وشبح اللي ينادي فيه وقال:اهلا..
الجالي:شن جو ياتريس.
ربيع:تمام..
عبد الرؤوف:مش مليح ياعديل وفيه حرج نعزموكم ماتجوش..ولاقلتوا تعزمونا..
الجالي:حني عزمنا الاولين ياعديل..وانتم مابيتوش تجوا..
عبد الرؤوف:كلمتني انت!؟ماكلمتنيش بكل..
الجالي ماباش يكثر نقاش بش مايطلعش هو الغالط وقال:عندك حق وعليا حق سامحنا ياغالي وليك مني احلى عزومه الاسبوع الجاي الاسبوع هدا مشغول ومسافر في اخره..
عبد الرؤوف هز راسه وقال:ربي يعاون..
الجالي:تسلم..شبح لعبد القيوم وقال..شويه تارقي..
ناض عبد القيوم ومشاله..
وهو مشي طول لحوش خوه..
طلع عبد القيوم ولحقه..وعيون عبدالرؤوف وربيع معاهم لين ادرقوا..
🍃خش الجالي للحوش وقف في الجنان..
التفت وحط ايديه في نصه وهو يشبح لعبد القيوم وهو مضيق عيونه..
عبد القيوم حط ايديه في جيوب سرواله وقاله:خير؟
الجالي:شن قصدك بيها الحركه اللي درتها يوم بعتت اللوحات؟
عبد القيوم:خير...
الجالي:جاوب كويس..
عبد القيوم:لما تدوي كويس..
الجالي حط يديه في جيب البالطو طلع الفلوس ولوحهم عند رجليه وقال:اني كنت نبي ننفعك لكن انت ماتستاهلش..
عبد القيوم بضحكه:وحتى انا كنت نبي ننفعك والله لكن انت....ولا بلاش احسن..
قدمله خطوه وقال:اسمع انت ماتشريش معاي مشكله احسنلك كان تبي تقعد هني..
عبد القيوم ابتسم تهكما وقال؛الاسبوع الجاي بنسلم الشقه لصاحبها..والقرار هذى مالكش دخل بيه..وصدقني..حط صبعه ع صدره وقال..انا لو نبي نقعد..دير مادير مش حطلعني من هنا..
شبحله الجالي بنظرات حاده للحظات..
بعدين مشي بيطلع..
لكن وقف لما سمعه قال
"الفلوس تو نصدقهن عنك بالك ينظف قلبك ويخفن ذنوبك"
التفت الجالي وشبحله بنظرة حقد وأشر عليه بسبابته وهويقول؛احمد ربك اللي خلاك بتطلع من هني بإرادتك..
بعدين مشي بيطلع وقبل ليطلع خبط الباب بقوة..
عبد القيوم بإستياء:ربي ينجي هذيك المسكينه منك..
غير عيونه للفلوس..
بعدين طبس خداهم ومشي ركب للشقه...
☘☘☘☘☘
في الطريق..
خديجه تسوق في السيارة..
وامها راكبه جنبها امها..ومن الخلف نسرين..
نسرين؛ماصدقوا عيت خالي..
مغليه؛قداش ليهم يتمنوها..
خديجه:دنيا بانت في وجهها الفرحه..
مغليه:وعلاش ماتفرح ياحنه كانت تحلم بيه بواحد زي عمر ولدي يخطبها..
خديجه بضحكه؛ولافي خيالها..
نسرين:باهي وبعدين..
مغليه؛غدوة بندير دورة ع الجيران زي اللي ندير فيها ديما نشوف كان في حد يبي حاجه يبيها..ولاعنده مصلحه يبي يقضيها..
خديجه؛عاد عواصف ماتوصيش حريص حتلقيها ناشرة القصة في الشارع كله..
نسرين؛اني نقول كان تفكونا من المشاكل ووجع الراس خلوه يطلقها بهدوء وكل حد يمشي ع حاله..
مغليه؛وانتي ياذقن تحسابيها بعد تطلق بتسكت زي ماساكته توا.
خديجه؛تبي تدوي بينا هي وامها وين ماتمشي شي صار وشي ماصارش..
نسرين قعدت ساكته وهي مضايقه..
مغليه:هي قاعده تلقح ع النت والناس تشوف فيه كله..
خديجه:صدقتي يام..هي الباديه..
تنهدت نسرين بضيق وقعدت تشبح للروشن..
وامها واختها يخططوا مع بعض كيف يعطوا لأميمه درس عمرها وحياتها ماتنساه..
☘واميمه غافله ماتندري ع حاجه..
قاعده تشغل في نفسها بخدمتها بش تنسى جرحها الكبير..
وماتجيبش علم اللي قاعد يصير في المستشفى ..
والقصص اللي بدت تطلع عليها..
ووصلت لراجلها..
🍃"ايوه كابتن عمر شن جو"
عمر:تمام..شن صار معاك ابتهال؟"موظفه في الخطوط اللي يخدم فيها"
" والله ماعارفه شن نقولك..سألت عليها بنت خالي وقالت تعرفها..وقالت في دوة طالعه عليها ان في دكتور مهتم بيها هلبه وحاط عينه عليها وهي وياه صحبه وفي من يقول في بيناتهم شي "
مشاعر الغضب والكره تحركت بقوة اتجاه اميمه كره اليوم اللي حبها فيه..
"اسفه عمر بس هدا اللي وصلني والله مازدت كان النفس.."
بلع ريقه وهز راسه وهو يقول بصوت مخنوق؛تمام..تمام..المهم الدوة بيناتنا ابتهال..
"عيب عاد كابتن مستحيل تطلع مني حاجه"
عمر:صحيتي ابتهال..
:ولايهمك..سلام"
عمر؛سلام...وسكر عليها..
نزل التليفون وشد عليه بقوة من الغضب..
وهو يشد ع سنونه بقوة بعدين حدف التليفون وطلعت منه آهه كلها غضب..
وحط يده في فمه وعض عليها وقعد يبكي بقهر شديد..
☘☘☘☘☘☘
الساعه 11:00ليلا..
مقعمزة ع السرير وهي عاطياته بالظهر..
وهو كان يحول في جواربه من رجليه..
بعدين مشي بيخش للسرير..
عائشه:مهدي..
هو تنهد وقالت:نعم..
شبحتله وقالت:غدوة بعد مانطلع من المدرسه بنمشي للسوق نشري عبايات جدد..
تمدد وعطاها بالظهر وهو يقول:المهم بلغي الصغار..
عائشه؛قلتلهم..
ماردش عليها تغطى وغمض عيونه..
هي تنهدت بكتمان..وتمددت حتى هي وعطاته بالظهر وتغطت..
وبدوا دموعها ينزلوا...
☘☘☘☘
"ايه عزمتني واني تعذرت"
عبد الرؤوف؛امتى!؟
غرفه؛الاسبوع اللي فات..
عبد الرؤوف؛علاش..!؟
قعدت ساكته وهي عاقده حواجبها بضيق..
عبد الرؤوف رفع حواجبه وقال؛ايوه ايوه..نهار مشولها ماليك..
مابتش ترك..
ضم شواربه بأسف بعدين حرك راسه يمين ويسار..
مشي للدولاب وخدي مخده وجبد بطانيه طيع باقي البطاطين والمخاد ومشي طلع من الدار..
غرفه بتذمر:علاش هكي علاش الهم..
"بضمي فمك ولانجيك"
تأففت وقعدت تمتم وناضت للحاجات اللي طيحهم بش تردهم للدولاب مرة تانيه..
☘☘☘☘☘
تاني يوم...
29يناير..سنة 2018..
الساعه 11:00صباحا..
كانت عائشه في العياده تدير في الكشف بالمنظار..
حالة عائشه كانت معروفه للدكتورة من البدايه..
بس الفحوصات هادم دارتهم بش تعرف بعض المعلومات المهمه قبل لتصارح عائشه بيها..
بش يكون تشخصيها دقيق جدا...وفي نفس الوقت كانت تبي تهيأ نفسيتها بتوقع الأسوأ..
🍃بس ماكان في حد مهيأ نفسية اميمه لتوقع الاسوأ ..
هي اصلا ماجاش في بالها انها حتشوف أسوأ من اللي شافاته..
طلعت من حجرة كانت تشوف فيها حالة جمعت عنها معلومات قبل لتخش العمليه..
وهي طالعه قابلتها ممرضة قالت..
دكتورة راجلك يراجي فيك لوطا قدام الكافتيريا..
حاولت دير روحها عاديه قدام الممرضه وقالت؛تمام..
ومشت من حداها للمكتب سلمت ملف المريضه لواحد من الدكاترة..
ومشت بعدين طلعت من القسم للمصعد..
خشتله ونزلت للدور الاول..
طلعت منه ومشت بإتجاه الكافتيريا..
وين وصلت فيها وشافت برا..
لقاته لابس زي قائد الطياره..
حست بوجع في قلبها بس تجاهلاته
ومشت طلعتله
وقفت عليه وقالت؛شن تبي!؟
شبحلها شويه بنظرات كلها برود وقال:جيت بنقول كلمتين وبنمشي ع حالي
نبرة صوته ونظراته خلوها تحس بضيق مفاجئ..
حست قلبها مقبوض..
عمر:اكبر غلطه غلطتها في حياتي اني حبيت وحده زيك ماتستاهلش مني اللي درته ع خاطرها كله...ماتستاهليش مني اني نتمسك بيه ونقعد نجري في جرتك ونطلب في السماح..وحده زيك هلبه عليهاهدا كله..لهدا بعد تعدي الحالة اللي انتي فيها حنطلقك..وكلت محامي وهو اللي حيدير الاجراءات كلها عني...
وحقوقك حيوصلوك وهذا كرم اصل مني لأنك ماتستاهليش..
بس قبلها ياريت تراعي انك قاعده ع ذمتي للأسف...
ولبس نظاراته بعدين مشي .
وخلاها جامده في مكانها..كل شي فيها جمد..
جمد عقلها عن التفكير..
قعدت تشبح في الفراغ وكلامه يتردد في وذانها..
صدمها..ايه..صدمها..
من داخلها كانت متوقعه انه حيحارب بش ترجعله..
انه مش حيطلقها بإرداته..مش حيستغنى عنها بسهوله هكي..
برغم من كل شي..
هي قاعده تحبه..تحبه ومازال ماطلعش من قلبها..
سيباته وهي واثقه من نفسها..
بس هالثقه انهارت بعد هالموقف الصادم..
تحركت..مشت خشت للمستشفى..
اللي كانت مزدحمه..ومعبيه دوشه..
بس هي كانت حاسه روحها بروحها ماتسمعش الا في صوته..
اللي يشوفها وهي تمشي يقول هادي عاديه مافيها شي..
ثبات الظاهر كان يخفي انهيارات الباطن..
قعدت تمشي وتمشي لين خشت لممر فاضي مافيه حد..
وقفت في نصه..
وقعدت تاخد في النفس وطلع..
بدت تبان ع وجهها ملامح البكاء..
الدموع عبوا العيون وقعدوا يطيحوا ورا بعض..
وهي تاخد في شهيق وزفير..
وقفت..وغمضت عيونها بشده..
وحطت ايديها الزوز ع فمها وانهارت بالبكي.
قعدت تبكي بكتمان ماتبيش صوتها يطلع حتى لنفسها..
بكت لين انحنت بظهرها القدام وهي كاتمه صوتها بإيديها..
بكت لين طاب مافي خاطرها..
ولما وقفت بكي..
مسحت دموعها بقوة..
وطلعت بلبس المستشفى منها..
ومشت للبركيدجو ركبت سيارتها شغلتها وطلعت طول من المستشفى..
☘☘☘☘☘
"هاه شن تحسي روحك توا؟"
عائشه بشي من التعب:كويسه..شني يادكتورة قوليلي شن طلع عندي بالله عليك قوليلي وريحيني..
الدكتورة؛يوم الاربعاء بإذن الله..تعالي للعياده ومعاك زوجك ضروري يكون موجود تو نشرحلكم الوضع كامل..
عائشه؛باهي علاش ماتبيش تقوليلي انتي تعذبي فيا هكي يادكتورة..
تنهدت وقالت؛انتي عندك مشكله في المعده وتبي علاج طويل مانقدرش نعطيك معلومات اكثر من هكي الا بعد مانشوفوا نتائج الفحوصات والتحاليل..فهمتي عليا ياعائشه..
هزت راسها وهي مضايقه ع الآخر بعدين قالت..حاضر.
تو نجي اني وياه يوم الاربعاء..
الدكتورة:بيجي هو يروح بيك؟
عائشه:لا مرت خوي اللي جابتني هني الصبح.
الدكتورة؛ايه عرفتها..لاباس عليك ياعائشه..
عائشه:لايوريك باس دكتورة..
🍃وجتها مرت خوها وروحت بيها للحوش.
استغلت ان الوقت كان بعد الظهر والصقع مافي حد برا..
مشت طول ركبت للشقه..
بدلت..ورقدت طول...
☘☘☘☘☘
الساعه 7:00مساءا..
بعد المغرب..
كان لطفي مروح من الجامع بروحه بوه روح قبله وهو قعد غادي مختلي بالقرآن..
في الفترة الأخيره حاس بشعور مش مريح مخليه قلق طول الوقت..
وقاعد يطرد فيه بقراية القرآن والعباده..
وهو متوجه لحوشه.
درس محمد شنيبه قدام المطحن متاعه ونزل وهو ينادي:حاج لطفي..
المهدي من المطحن..ونضال من القهوة ركزوا معاهم..
وقف لطفي بالغصب وكان باين في وجهه انه واخد منه موقف..
قص محمد شنيبه الطريقه ووصل فيه وهو يقول..
=السلام عليكم..
ومد يده..
صافحه لطفي وهو يقول؛وعليكم..
محمد:شن حالك وحال الصحه..
جبد لطفي يده وحطه مع يده التانيه ورا ظهره وقال:الحمد لله..
لاحظ محمد انه يكلم فيه من فوق نفسه قاله..
=موطي العين علينا يانسيبي..
لطفي؛ماعنديش علاش!
محمد ابتسم وغير عيونه عنه وهو ساكت..
لطفي:بعد اللي صار في بنتنا لاكلفت نفسك وجيت ولااتصلت ولادرتلنا اعتبار اني وبوها وجدها...حتى عيالك مادوروش بكل..مش فاهم اني هدا شن معناه قلة تقدير واحترام..ولاقلة عرف..!؟
محمد:اهدا شويه يالطفي وصل ع النبي..الموضوع مش هكي بكل..اني كنت نراجي لين الوضع يهدا شويه بعدين نجيكم بروحي ونطلب منكم السماح...
لطفي؛من جدها علي اطلبه يامحمد..
محمد:وحني فيها يالطفي..
تنهد لطفي بعدين قال؛تفضل..
محمد؛يزيد فضلك..
ومشوا مع بعض لحوش الحاج علي..
~~~~~~~~~~
علي وهو عاقد حواجبه ومبتسم بتهكم؛مافيش داعي نفكرك شن درتوا يامحمد بش رضيت نعطيكم حفيدتي..
محمد وهو مبتسم مسايرة؛مش ناسي..واني اليوم جيت نقولك ماتمنيتش يصير هكي الله غالب ماباليد حيله..والباين من البدايه مافيش نصيب بينهم..
علي:هدا اللي ماباش يفهمه ولدي حفيدتي مش ليه بكل..هلبه عليه ان شاء الله يكون فهمها توا..
حسين كان جده ماسحله ع كبده مستمتع ع الآخر..
ولطفي مركز مع محمد وردة فعله..
محمد؛فهمها ياحاج وقرر يطلقها خلاص وكل حد يمشي ع حاله..
علي الواعر ضحك تهكم وقال:طيب فينا والله..
ابتسم محمد وقال:وربي يعوضها ويعوضه خير..
لطفي:آمين..
محمد بإبتسامه؛لكن قاعدين نسابه راهو..
علي:اهو طوبى بالذات لو انمست منها شعره قسما بمن رفع السماء بغير عمد نهد الدنيا فوق روسكم..
رفع محمد حواجبه..
لطفي:بوي صل ع النبي..
علي وهو يشوف لمحمد بحده:عليه الصلاة والسلام..
حسين:عمي محمد..خود كلام جدي بعين الاعتبار وردوا بالكم كان مشيناها ع خير توا يولي الوضع عندكم عادي..لا ياعمي صدقني مش حيكون عادي بكل..وان شاء الله ما مانضطرش نفكرك بكلامي هدا..
محمد قعد ساكت شويه بعدين قال؛حني جيران وعشرة عمر ونسابه ولهالاعتبارات هادي كلها مش حنرد..ع العموم..حق بنتكم حيوصلها..وان شاء الله خير..
وناض..
علي وحسين قعدوا يشبحوله..
وهو قال؛السلام عليكم...
ومشي بيطلع ولطفي وراه..
علي بصوت منخفض:خزي ع المالكه..وع المنظر..
وحسين قعد يشبح لجده وهو يفكر في طوبى هل عواقب اللي صار بين عمر واميمه حيولي عليها هي؟
🍃محمد:الحاج علي عندي زي بوي..لكن حسين متمادي هلبه يالطفي..
لطفي؛هادي اخته وانضربت شن متوقع منه ياحاج..!؟
تنهد محمد وهز راسه بعدين قال:تصبح ع خير يالطفي.
لطفي:قدامك كل خير..
فتح الباب وطلع ولطفي سكر الباب وراه وهو يفكر بقلق في وضع بنته طوبى بعد اللي صار..
🍃🍃🍃🍃
"افتكت منه وربي يعوضها خير ان شاء الله"
لطفي بضيق؛زعما طوبى مايصير فيها شي حتى هي بعدين..
جاته سدره بطاسة البابونج وهي تقول:ماتخافش وبيي الجالي راجل مافيش منه حاطها ع كفوف الراحه شن ماتبي يديرلها حتى اللي ماتبيشي..علمها السواقه وشرالها سيارة..
لطفي شرب من البابونج وقعد ساكت وهو يفكر..
سدرة طبطب ع ظهره وقالت؛ريح بالك وماتخممش طوبى مافيش خوف عليها..
شبحلها..وهي قعدت تشبحله بعدين غمضت عيونها وفتحتهم طمن فيه..
وهو هز راسه ورجع يشرب في البابونج..
مشت من حداه وهي تقول؛تتعشى بازليا؟
لطفي؛ديري..
سدرة وهي دور وطلع في الحاجات اللي بطيب بيهم؛كملني خالي محجوب..
لطفي:اياااه قصدك روح هو؟
سدرة بضحكه:ايه روح واستقر هني خلاص..واللي فهمته ان بيشد منصب في البلاد..
لطفي:حتى وين تفكر يتصل بيكم قعد يحكي ع روحه..
سدرة:لاوالله..اني اللي قعدت نقصقص..
لطفي ضحك ضحكه خفيفه..
سدرة:تعرف بوي..هما صح خوالي وخالاتي بعد توفت امي نسونا بكل واني كرهت نسمع طاريهم...بس وين كلمني خالي محجوب قلبي لهفله حد من ريحة امي وكأن امي اللي كلمتني..ودمعوا عيونها..
لطفي وهو مبتسم بحزن قال:الله يرحمها..
رشفت وقالت لبوها:نعطيك رقمه تعزمه ع الفضانيه؟
شبحلها وهو يفكر..
كان واخد موقف قوي من عيلة وردة اللي نسوا صغار بنتهم بعد موتها ولاكأنها خلت صغار وراها..
لكن رغبة سدرة في وجود حد من ريحة امها في مناسبه تخصه خلاته يتنازل عن موقفه.
ابتسم وقال:حاضر..
وهي ابتسمت بفرح..بعدين خدت البصله وقعدت تقشر فيها..
~~~~~~~~
"افتكيتي منه عرة العرر ع قولت المصاروة"
اميمه وهي مبتسمه بحسرة؛مش عارفه قداش بياخد من عمري اللي صار..
مطيره:ماواخد شي يابنتي بتعيشي حياتك بعدين وتكملي مشوارك ويجيك سيد سيده..
سكتت اميمه وهي حاسه روحها مخنوقه ودموعها في عيونها..
صفيه ودموعها ينزلوا:والله يابنتي حيندم اشد الندم وينقهر اكبر..اصلا كانه مش مقهور راهو.....وسكتت..
شبحت لأمها وقالت؛قولي اللي عندك طلعي اللي من امس قاعده درقي فيه ماما..
شبحت مطيره لصفيه بضيق..
صفيه مسحت دموعها وربعت ايديها وقالت:خطب قريبته..
ابتسمت بتهكم وقالت:اشاعه مطلعينها خواته زي ماداروا قبل..
صفيه؛لامش اشاعه....
مطيرة وهي تشوفلها بحزن:حتى اني سمعت بيها ومن حد قريب عليهم..
قعدت اميمه تمرر في نظرها عليهم..
غرقوا عيونها بالدموع وفاضت..غيرت عيونها عنهم وقعدت تشبح في الفراغ وهي مش مستوعبه..
معقوله ماطلعش في قلبه ذرة حب ليا..!؟
لهالدرجة مانسوى عنده شي!؟..
ومع هالأسئله اللي تتردد في عقلها كان قلبها يوجع فيها بقوة وكأنه قاعد يتكسر لأجزاء وأجزاء...
☘حالة اميمة مش غريبه..حالة اميمه مروا بيها هلبه..بالذات لما يكون في حب...
المراة تسيب وتطلب الطلاق...
ويكون في داخلها شي بسيط يتمنى تمسك الطرف الأخر بيه ولوشويه..
ولما يصير العكس تحس بخذلان رهيب....
يطفي فيها شي حلو..ممكن مؤقتا...وممكن لنهاية العمر...
🍃وفي حوش وحده من سكان شارع القهوة..
كانوا اغلب الجارات مجتمعات عندها جاين يتحمدولها ع سلامة ولدها اللي دار عمليه صعبه ناجحه..
وع راس الموجودات مغليه..اللي راجلها تكفل بدفع فلوس العمليه..
اول الجمعه..كانوا يهدرزوا ع مواضيع مختلفه..
لكن في اخرها وحده فيهم قالت..
:حق اللي سمعناه يامغليه؟
قالتلها:شن اللي سمعتيه؟
:ياحنه قالوا ولدك عمر بيطلق بنت الواعر حق؟
الموجودات كلهم كانوا يترقبوا في اجابه مغليه..
وهي تنهدت وقالت؛ايه حق..
اغلبهم اندهشوا ومنهم عتيقه ام عائشه اللي ماجابتلهاش بنتها سيرة ع الموضوع هدا بكل..
؛اللطف ياربي خيرهم ليهم تلاته شهور بس ؟!
مغليه:شن بنقولك الله غالب وخلاص..
:ياودي اني سمعت ان هي وامها طلعوا خانبين فلوس بوها.
:لالالا صفيه ماديرهاش..
:معقوله يامغليه هالكلام؟
مغليه؛مانبيش نكثر دوة في الموضوع..المهم ولدي بيطلقها وامس خطبناله بنت خاله..
كلهم انصدموا..
ووحده فيهم قالت؛لهالدرجه!؟
مغليه:يعلم الله بنفسية ولدي شن صاير فيها مفروض عريس توا وعايش احلى ايامه لكن قدر الله وماشاء فعل خطبناله قبل يطلق بش يكون فال خير عليه ويثبت على هادي ان شاء الله..
هما بأصوات متقطعه..
"لاحول ولاقوة الا بالله..ربي يعوضه خير"
مغليه؛يللا هكي ربي يبي والحمد لله ع كل حال..ناضت وهي تقول..حمد لله ع سلامة وليدك مرة تانيه وان شاء الله هدا حد السو..
:بارك الله فيك يامغليه وبالله سلمي ع الحاج محمد وقوليله الله يسخرلك عباده..
مغليه بإبتسامه؛آمين..آمين..هيا تصبحوا ع خير..
ردوا عليها كلهم
"قدامك كل خير.."
ومشت طلعت وصاحبة الحوش تسقد فيها..
وناضوا زوز نساوينهم لحقوهم..
بيطلبوا من مغليه خدمه اوقضاء مصلحه..
وهي كالعاده تسمع منهم وتعطيهم وعود وتمشي بيها طول لراجلها..وهو اللي يقدر عليه يديره..
اغلب احياش الشارع جمايل عيلة شنيبه مغرقتهم...
☘وفي النهايه اللي لله يقعد واللي يكون لغيره يولي هباءا منثورا☘
☘☘☘☘☘
ومن شارع القهوة..
لشارع من شوارع حي الاندلس..
كان التارقي في واحد من حياشه..
ع قد ماحاول يبرد نفسه..ويكون هادي..ويقبل الامر الواقع..
ماقدرش يستمر..
ولقي روحه ماشي للحوش اللي يظن انه لأم العيون الحايره..
يبي يسمع ردهم من فم بوها لوذنه..
:والله شن بنقولك مافيش نصيب ..
عبد القيوم؛السبب؟
:البنت تبي تكمل قرايتها..
عبد القيوم؛ماعنديش مشكله تكمل قرايتها انا قلت قبل اللي تبيها ديرها تكمل قرايتها وتخدم وانا نصبي معاها وندعمها..
الراجل بشي من الاحراج؛البنت ماتبيش الزواج توا..
عبد القيوم؛تمام..خطبه بس لين تكمل قرايتها..
تنهد الراجل وقال؛ياولدي من الاخير ماليكش نصيب عندنا..
عبد القيوم شبحله شويه بعدين ناض وقف وهو يقول:مش مشكله..سامحني ازعجتك..
الراجل ناض معاه وقاله؛ولايهمك..
ومشي عبد القيوم طلع وراجل سقده برا..
ركب سيارته وتحرك طول..
من برا كان يبان عادي جدا...مظهره قوي..وجلف كالعاده..
بس من داخل كان عباره عن حطام..
ومشاعر الخذلان..والخيبه..والحسره معبيات قلبه..
وتقعد دمعة عبد القيوم صعبه لدرجة ان لمعتها ماتبانش في عيونه..وكأن عيونه من غير مدمع..
برغم انه في حقيقته انسان حساس أي موقف مؤثر يتأثر بيه..كل موقف صعب يحسه بقوة..
ومافيش اصعب من اللي تعرضله عبد القيوم اليوم..
اصعب شي يمر بيه في حياته كلها...
ومع هدا مابانتش في عينه لمعة الدمعه..
🍃يومها..
ماروحش لشارع القهوة وهو يدور بسيارته في شوارع طرابلس..
وهو يفكر..عقله مابطلش تفكير..
وبرد الليله هديكا ماقدرش يبرد ناره حتى شويه..
🍃ولاقدرت عائشه..
تبان عاديه قدام صغارها..
التعب والتخميم واضحين في وجهها طول الوقت..
وهي مقعمزة في الصاله سرحانه..
خش عليها ولدها الكبير..
مشالها قعمز جنبها وقال؛يام..
مسح ع شعرها وقال مرة تانيه..امي..
شبحتله وابتسمت بالغصب وهي تقول:نعم امي؟
محمد؛نشوف فيك مش مزبوطه يام اليوم بكل خيرك؟
عائشه؛شويه ارهاق من الخدمه بس..
محمد؛لهالدرجة الخدمه متعباتك يام مخليه وجهك شاحب هكي وعيونك ذابله..
عائشه؛مالا شن تحساب التدريس ساهل؟
محمد؛يام فوتيها الخدمه كان متعباتك هكي!؟
هزت راسها وقالت؛نفكر فيها..
مسح ع شعرها تاني..بعدين قال؛تعالي..تعالي..
وضمها في حضنه وهو يقول؛مش مستغنيين عنك يام بالله عليك ردي بالك ع روحك...
هي كانت حتنهار بالبكي بس شدت روحها بقوة..
شدت في ولدها وغمضت عيونها ..
وهو قعد يمسح ع شعرها وظهرها..وبدون ماتحس رقدت..
هو حس بيها رقدت ماباش ينوضها..قعد هالحاله ..
لين روح بوه..
وين جي فايت من قدام الصاله شافهم..
وقف قدامها وقال:خيرها!؟
محمد؛تعبانه شويه..
شبحلها شويه بعدين خش وجاها..
طبس عليها وحط يده ع كتفها وقعد ينوض فيها؛عايشه..عايشة..
فاقت..وشبحتله..
المهدي:نوضي ارقدي في الدار..
هي بعدت عن محمد بعدين ناضت وقفت.
داخت وكانت حطيح شدها المهدي وهو محاوطها وقال:عايشه خيرك..
حركت راسها بالنفي وقالت؛مافي شي ناقصه نوم..
ومحمد يشوفلها بقلق..
المهدي:باهي تعالي..وقعد يمشي بيها للدار وهو يقول..خش ارقد محمد..
محمد؛حاضر..
ومشي وراهم وهو يشوف لأمه بحزن..
بعد ماخش بيها بوه للدار هو مشي لداره..
🍃والمهدي مشي بيها للسرير.
رقدها وغطاها..
وهي ع راس لسانه اللي صار معاها اليومين اللي فاتوا..
تبي تحكيله بس مش عارفه شن اللي منعها..
تعبها..او رغبتها الشديده في النوم..
شويه وراحت في النوم..
وهو بدل حوايجه..
ومشي بيرقد..
خش للسرير وقعد مقعمز..
وبدت رحلة عذاب العاشق وسهر الليالي..
شبح لروشن دارهم اللي يطل ع حوش سلطانه القلب..
وقلبه التعبان كله خوف من اليوم اللي حتنخطب فيه رسمي...
🍃وهي هديكا الليله..
كانت سهرانه..
زي كل الليله من تلاته شهور..
النوم صعب عليها..
خدت ألبوم صور قديم مدسوس في دولابها..
قعدت تتفرج عليه..
ع صور ليها هي وبوها وامها..وخواتها..وحوش عمها وجدها..
صور ليها مع صحباتها من الطفوله ليوم فاتحتها هي والفاندي..
تلقائيا كانوا دموعها ينزلوا وهي تتفرج وشعور رهيب بالحنين للماضي متملكها..
☘☘☘☘☘
"ماأتصلش وقال تعالى"
طوبى:هي زياره عاديه مش بالعزومه جالي..
الجالي؛حبيبي خليني نعزمه الاول بعدين نمشيله لحوشه..انتي بري لأختك عادي نحطك عندها امتى ماتبي ونروح بيك في الليل..
طوبى شبحتله شويه بعدين قالت؛خلاص مش حنصر عليك براحتك..
ابتسم بعدين قرص خدها وقال:هدرزيلي شن صار اليوم في الكليه..
طوبى؛مافيش جديد عادي زي قبل..
فجأة رن تليفونه..
شبحوله الزوز..بعدين هو مد يده وخداه مع ع الكامدينو..
طوبى:احمد حميدا؟
هو شبحلها بصدمه وقال؛من وين تعرفيه؟
طوبى؛ديما يتصل بيك خفظت اسمه..
شبح للتليفون وفصل عليه وقال؛واخد نفاخ لما يبي مني مصلحه يعشش..حطه صامت بعدين رده للكامدينو وقال..خلاص ارقدي قلبي ورانا نوضة بكري..
هي حطت راسها ع المخده وعيونها عليه..
وهو حط راسه ع المخده وقعد يشبحلها..
ابتسم وقال؛نحبك موت..
طوبى ابتسمت وقالت؛خديت الدوا..
غمض عيونه وفتحهم بمعنى
"ايه.."
وخدي يدها وباسها..
وهي تشوفله بإبتسامه ظاهرها حلو..
لكنها تخفي وراها شعور كبير بعدم الاطمئنان مهما حاولت تتجاهلها يفرض وجوده وبقوة...
☘☘☘☘☘
"بنقعد وراها لين نخليها تعرف بروحها بروحها"
صابرين؛مشكلتك في هالجالي لو صار وعرفت وانقلبت الدنيا بعدين تتوقعيه مازال يكمل معاك..
نجاه؛غصب عنه..
صابرين؛نجاة كان تسمعي كلامي ياوخيتي وتفكي روحك منه وتلتفتي لخدمتك..تخدمي ع روحك وديري اسم كبير في مجالك صدقيني خيرلك من وجهه..
نجاة؛مش عارفه علاش ماتبيش تفهمي اني نحبه..نحبه يابنادمه مانبي شي في الدنيا غيره..
صابرين بإزدراء؛يرزيك في هالحب..
نجاه؛صابرينا الهي في حياتك حبيبتي ومالكش علاقه بيا تمام..
صابرين بنرفزة؛ملحي..
وناضت من حداها وخلتها بروحها..
تخطط بش توصل لهدفها في اقرب وقت...
🍃🍃🍃🍃🍃🍃🍃🍃🍃🍃🍃🍃🍃🍃🍃🍃🍃
30يناير سنة 2018
يوم الثلاثاء..
هاليوم الجو كان فيه صحو..
يعني حلو..السمي شبه صافيه..والشمس في قلبها..
ومش مصقع هلبه ولادافي هلبه بين البينين..
ومع الساعه12قبل الظهر...
كانت غرفه مع حماتها يحطوا في لمساتهم الاخيره ع الغدي اللي بدو فيه من الصبح..
غرفه؛خلاص كملنا..
صبت نبيله فنجان قهوة وحطاته قدام غرفه وهي تقول:بعدين سخن وطلع بس..
قعمزت غرفه وخدت الفنجان ورشفت منه..
ونبيله صبت لروحها فنجان وقعمزت ..
قعدوا يرشفوا في قهوتهم بصمت..
شويه خطر ع غرفه تسأل نبيله سؤال..
شبحتلها وقالت؛بلبلة..
نبيله؛امم .
غرفه؛في بالي سؤال ليه وقت وتحشمت نسأله بس توا عندي فضول نعرف اجابته..
نبيله:شن هو..
غرفه:هو خصوصي شويه لو ماتبيش تجاوبي عليه عادي..
ضحكت وقالت؛خليتي عندي فضول نعرفه شن هو؟
غرفه وهي مبتسمه بتساؤل:علاش ماتزوجتيش لتوا؟
نزلت نبيله عيونها لفنجان القهوة وقعدت ساكته..
غرفه:اسفه شكلك تعمقت هلبه..خلاص انسي اعتبريني ماسألتاش..
شبحتلها بإبتسامه؛لاعادي اصلا مافيش حاجه تدرق في الموضوع هدا..تنهدت وقالت..زمان هلبه..لماخشيت للجامعه..
غرفه بحماس:يقرا معاك؟
نبيله بضحكه:لا..ياستي حني زمان كان الوضع عندنا Free مافيش ضوابط زي توا..كنا نديروا في اصدقاء شباب.
وتبدا عندنا شله مختلطه عادي بس كل حد بإحترامه..
في واحد من الشلة اللي كنت فيها..كانوا عنده صحاب متوزعين ع الكليات..وكانوا يلموا في بعضهم وكل مرة يجتمعوا في كليه..لين جي يوم وجو لكليتنا..
سرحت بتفكيرها وهي مبتسمه وقالت..وهدا كان اول يوم شفته فيه..كان منطلق وبصايري وجو حلو هلبه..عرفنا عليه زميلي وقتها...سبحان الله عجبني طول بدون مقدمات..
غرفه بفضول وهي منسجمه؛قنين؟
نبيله بضحكه؛هلبه..بس اللي عجبني فيه جوه واسلوبه وخفة دمه..كان هدراز وبصايري..بصارته رزينه شويه ومرات محرجه لما تكررت اللقاءات حسيته جوه عادي مع الكل الا معاي اني زي اللي حاط حدود بيني وبينه..وقتها قلت في خاطري شكله يايخاف مني يامستثقل دمي..
غرفه بفضول؛وبعدين؟
تنهدت وقالت:في مرة مابيتش نقعد معاهم قعدت مقعمزة بعيد عنهم بروحي لأن معاملته ليا ضايقتني حسيت وكأني ثقيله ع قلبه..
بس ماقدرتش نمنع روحي اني نشوفله يومها..وكم مرة شدني واني نسرقله في النظر..
ومانندريش عليه الا وهو مسيبهم وجايني اني كذبت عيوني وقلت اشبح لمن جاي وراي..
برغم ان وقتها ماكان في وراي شي ..
ولما وقف عليا هدا وين تأكدت انه جايني اني..المهم..
قالي..خيرك تشبحيلي..
واني ووك عليا وقتها قريب تبخرت من الحشم قعدت ندعي ع روحي..يزريني فيك يانبيله..
ضحكت غرفه..
وهي متابعه تقول؛عطيك فقصه في عيونك يانبيله..
وهو يقول..من بكري وانتي تشبحي وكل مانجي هني نشد فيك تشبحيلي من تحت..
واني ياكبدي بنبكي وقتها خلاص..
وغرفه تضحك..
نبيله بضحكه؛جيت بنوض وبنخليه يهدرز بروحه..مش هو قالي تكلمي...تبي تولي محاميه وماتعرفيش دافعي ع نفسك..واني سمعت هالكلمتين ولعت فيه..وقتله لأنك ضحك فيا هدا علاش نشبحلك..
غرفه بدهشه؛ووووه!
نبيله بضحكه؛هو عاد ضحك وقالي..كان ركزتي شويه راك زبطتيني نشبحلك حتى اني..مش لانك ضحكي..لأنك عاجبتيني..
غرفه؛يما قلبي..وشن صار فيك بعدها..
نبيله بآبتسامه؛مشيت وخليته..وبعدها قعد يكلم في صحباتي ويقول كلموها..اني في الاول رفضت بعدين رضخت..وطبعا وقتنا زمان لو ارتبطوا زوز لازم تكون علاقتهم جديه مافيش جو تسليه وضياع الوقت..او بالاصح في بس قليل النادر..المهم ارتبطنا وكان بدايتنا مع بعض تعارف..عرفنا بعض وتعودنا ع بعض..هو كان في كلية الآداب حول قانون ع خاطري وقعد معاي طول وقت الدوام..
ساعدته في القرايه بحكم اني سبقته بسنه والحق هو كان اشطر..وقعدنا مع بعض نخططوا لحياتنا بعد التخرج..
تخرجت اني قبله وهو بعدي..
وبعد التخرج جي خطبني..وتبدلت ملامح وجهه نبيله للحزن..
غرفه؛شن صار بعدها؟
ابتسمت بألم وقالت؛ردوه لما عرفوا انه ماعنداش حوش وبيسكني في دار مع اماليه..تعرفي ياغرفه ردوه وجي خطبني بعدها اربعه مرات..وهما يردوا فيه..واخر مرة جرحه عمي بالكلام..ولزه..ومن بعدها معاش نندري عليه بكل..
غرفه بألم؛وااك مشناهم علاش هكي؟
نبيله بتهكم؛ضريبة انك تكوني من عيلة جدودهم كانوا بشاوات وبيين وناس من الطبقه اللي فوق..برغم اننا وقتها كانت حالتنا الماديه عاديه بس الحسب والنسب كان هو الثروة اللي يملكوها ماليا..
غرفه؛شن درتي بعدين؟
نبيله:خديت عهد ع روحي مني ماجاني نرفض..ع قد ماداروا فيا..خوتي ونساوينهم الله يرحمهم وانا نقول زواج لا..
غرفه؛لكن حرام عليك نفسك..هو تلقيه تزوج ودار عيله وانتي قعدتي هكي..
نبيله؛قلبي تسكر بكل ياغرفه..عارفه روحي مش حنقدر نعيش مع راجل تاني غيره خلاص...
غرفه:قلبي وجعني ..كيف انتي!..اسفه نبيله كان قلبت عليك المواجع..
نبيله؛قداش ليها متقلبه ياغرفه..قصة اختك سدرة والمهدي ولد شنيبه برغم اختلافها الجذري عن قصتي بس يتشابهوا في حاجه وحده ان الحب قعد عايش لتوا..
غرفه؛بس سدرة انخطبت مرتين وفكرت تتزوج..
نبيله؛اللي في القلب في القلب ياغرفه..اني اللي نعرف من نظرة عيونها باين عليها اختك..الفرق بيني وبينها ان هي تحاول تنسى بس اني لا..
تنهدت غرفه بضيق وقعدت ساكته..
فجأة...
رن تليفون غرفه..
ناضت خداته من فوق الدولاب وقالت:طوبى وصلت..
ومشت طلعت ونبيله ناضت طلعت وراها..
🌸استقبلوا طوبى..
اللي كانت جايبه معاها علبه شكولاته..
وحافظه فيها مبروشه..وهديه لأختها ..
استقبلوها استقبال حار..بعدين قعمزوا هما وياها في الصاله وقعدوا يهدرزوا..
☘☘☘☘
فهالوقت..
كانت سدرة مقعمزة مع اميمه في جنان حوشهم يهدرزوا..
سدرة:اني اللي نعرف تركيبة عقولهم زيه هو زي خوه الكبير..حيكملوا عمرهم يقهروا في ارواحهم وفي بنات الناس اللي ظلموهم..
اميمه ودموعها في عيونها؛وهو اللي يحب يدير هكي!.
سدرة؛في اللي يدير هكي وفي اللي لا..كل واحد وشخصيته..
اميمه؛الحب يغير ولامايغيرش ياسدرة..
سدرة:مرات يغير..ومرات يطلع حاجات مدرقه في البنادم هو مايعرفهاش عن نفسه..بس يقعد هو هو..طباعه ماتتغيرش..
نزلوا دموع اميمه مسحتهم وهي تقول:غلطتي اني حبيت واحد مايستاهلش..
سدرة:ماغلطة حد..المشاعر هادي مايقدرش يتحكم فيها البنادم..انتي اعتبري اللي مريتي تجربه علماتك..ان الحب مش كل شي في الحياة..وانك لازم تختاري شريك حياتك قبل لتحبيه...
اميمه هزت راسها وقالت؛صح..
سدرة:اميمه اشبحيلي..
شبحتلها..
سدرة:انتي مراة قويه وقد روحك متأكده انك حتطلعي من هالتجربه اقوى من قبل وتقدري تواجهي بعدها هلبه مواقف صعبه وتغلبيها..راك تنسي انتي اميمه الواعر..حفيده علي الواعر..
ضحكت من بين دموعها وهزت راسها بإيجاب..
سدرة؛ايوه خليك هكي..بنت الواعر اللي مايكسرها شي..اشبحي القدام ومعاش تلفتي لتالي وركزي ع هدفك بس..الدكتورة اميمه الواعر..
اخصائية جراحة المخ والاعصاب..
ابتسمت اميمه بإمتنان لسدرة ودموعها تنزل..
وسدرة تقول:خلاص عاد سادك بكي..نزحوا دموعك..
مسحت دموعها وهي تضحك..
وسدرة تقول بإبتسامه؛ايوه خليك ديما ضحاكه بش الدنيا تضحكلك غصب عنها..☘
☘☘☘☘☘
بعد الغدي..
كانت نبيله في الكوجينه توتي في الشاهي وخلت الخوات ياخدوا راحتهم..
طوبى:اني مش حنلح عليك بش نعرف شن صار..لكن اللي نعرفه انك حتجي يوم الخميس ياغرفه..
غرفه؛اكيد بنجي..
طوبى:وبطيحوا حبال السو في بير..
غرفه:خليها للوقت طوبى..
طوبى؛اكثر من هكي!؟ عمرنا ماتقاطعنا هكي قبل فيسع نولوا مهما صاربيناتنا..ع خاطر بوي ياغرفه الايام هادي مهبي ومش عاجبني بكل..
عبوا عيون غرفه الدموع وهي تقول:باهي لما يجي الخميس نتفاهموا..
طوبى:ان شاء الله ومش حتروحي من غادي الا وانتم متراضيات..
غرفه هزت راسها بإيجاب وهي ساكته
ع جية نبيله بسفرة الشاهي..
طوبى بإبتسامه؛سامحينا تعبناك..
نبيله:ايااه ع شني مافي شي من قيمتك..تفضلي..
خدت طوبى طاسة الشاهي وقالت:يسلموا..بارك الله فيك..
☘☘☘☘☘
بعد العصر..
كان الجالي مقعمز في قهوة خوه نضال..
ومعاه ربيع وعبد الرؤوف ومحي الدين يهدرزوا..
والمهدي واقف ع واحد في سيارته يهدرز هو وياه...
ونضال واقف يشوف للطريق ويراجي في حد.
شويه بانت عليه سيارة اريج وهي جايه..
درست قدام حوش جدها..
بعدين نزلت منها وسكرت كويس..
ومشت للباب فتحاته بالمفتاح اللي عندها وخشت وسكرت الباب وراها..
تنهد نضال وقال:إن شاء الله خير..
☘فهالوقت..
كان عبد القيوم في الشقه..
يلم في حاجاته استعدادا للرحيل يوم الغد..
بعد ماكمل..خدي ظرف فيه فلوس...ومشي طلع بيه من الشقه...
☘☘☘☘☘
"وين جدي؟!"
سدرة:هو وجدي مشوا يزوروا واحد يعرفوه راقد في المستشفى..
خشوا الزوز للحوش..
"بخ"
اريج وهي تضحك بفجعه؛منين طلعتي..
طوبى بضحكه:من الصاله..
اريج:صامته..
وحضنوا بعض..
وسدرة تشوفلهم بإبتسامه..
فجأة..حست بهداكا الشعور الغريب..
وكأنها هي مش معاهم..
هما في مكان وهي في مكان..
انسحبت ومشت للكوجينه..
وطوبى خشت بأريج للصاله وبدوا يهدرزوا..
🍃سدرة طلعت طول للجنان تاخد في نفس وهي حاطه يدها ع صدرها..
تلاشت هديكا الحاله...بس قاعده تحس في روحها مش مزبوطه..
☘☘☘☘☘
طلع عبد القيوم من الحوش..
شاف المهدي مشغول..
بعدين شبح جهة القهوة شاف الجالي..
ماباش يمشيلها..
واختار يمشي يقعمز في سيارته ويراجي المهدي..
☘☘☘☘
"خوالي بغبرتها الكلمه طالعه منك"
سدرة بضحكه:بس هدا وين تشوفيه يخش خاطرك طول..
طوبى بضيق:صعب ياسدرة..اللي قاطعونا بعد ماتت امي وقت كنا بامس الحاجه ليهم ماعندنا مانديروا بيهم توا بعد كبرنا وخدينا ع قلتهم...
اريج:مش تفتن خالتي..لكن طوبى عندها حق...عمي نسانا سنين بعد انفقد بوي..وفجأة خطرنا عليه وتفكرنا وصرف ع المناسبه متاعي كلها..لكن ماقدرش يخليني نقبله..
سدرة:تو لما يجي نهار الفضانيه وتشوفوه وتهدرزوا معاه تغيروا رايكم..ساد انه من ريحة الغاليه الله يرحمها تي هادي بروحها تخليني نسامحهم كلهم ونستقبلهم بالأحضان..
ابتسمت وعيونها معبيات دموع وقالت:الله يرحمها..
اريج:الله يرحمها..خل بنمشي نتوضا ونصلي العصر راحت عليا..
ناضت ومشت حداهم للحمام..
طوبى لسدرة؛نبي نطلع نشوف القطاطيس..
سدرة؛هي نوضي..
ناضت وهي تقول:عمتي امتى تروح؟
سدرة:تيبلك للمغرب وهي تهدرز..
طوبى:معناها مش ملحقه عليها..
ومشوا هما الزوز طلعوا للجنان...
☘☘☘☘☘
"خلاص متفاهمين.!؟"
:متفاهمين..نتلاقوا غدوة ان شاء الله ونتموا الاجراءات..
المهدي:ان شاء الله..
:هي السلام عليكم..
المهدي رفع يده وهو يقول:وعليكم السلام..
ومشي الراجل..والمهدي مع السيارة بعيونه..
"مهدي"..
شبح يساره لقي عبد القيوم قاله:تارقي..شن الامور..
عبد القيوم:الحمد لله ع كل حال..
المهدي ابتسم بأسف وقال:يعوض الله..
عبد القيوم؛قول ربي يصبرك..
شبحله بألم وقال:يصبرنا ..
تنهد عبد القيوم وقال:يعلم الله بمعزتك في قلبي وقدرك عندي..كنتلي صاحب اخ..عمري ماحسيت اني قاعد في مكانك ديما تحسس فيا اني صاحب مكان..مدله الظرف وقال..حقك وبارك الله فيك...
☘☘☘☘☘
"نبي ناخد اهما الزوز نعطي وحده لبنت المهدي والتانيه لبنت طاهر الله يرحمه..عطيتهم وعد ياناري قداش ليهم يراجو"
سدرة بإبتسامه؛كويس اهو اطمنت ع زويز والزويز التانيات يقعدوا لعمتي يونسوها..
ضحكت طوبى وقالت؛ياخوفي تبيعهم..
سدرة وهي تضحك؛ديرها..تنهدت وقالت..نركب نجيبلك السله متاعهم تحطيهم فيها..
طوبى؛تمام..
ومشت سدرة بتركب لدار الخزين..
وطوبى قعدت تلعب مع القطاطيس..
ع طلعة اريج قالت؛نجيهم الكلبوزات..
ابتسمت طوبى..
اريج؛خويله سدرة وين..
طوبى وهي تلاعب في القطوسه؛فوق..
اريج هزت راسها ومشت بتركب وراها..
☘☘☘☘
"قالولي بتسيب طرابلس لكن ماصدقتش"
عبد القيوم؛ماعندي ماندير فيها خلاص..
المهدي؛والخدمه؟
عبد القيوم؛طلبت نقل امتى مايصير منه يصير معاد يهمني..
المهدي:عبد القيوم روح للكفرة اقعد اسبوع غادي فكر بهدوء بعدين قرر..
عبد القيوم:انا كان نقعد في طرابلس اكثر من هكي ننخنق..
المهدي قعد يشوفله بضيق..
عبد القيوم؛والله معاد طايقها يامهدي..
☘والجالي يراقب فيهم وهما يتكلموا وتأكد ان عبد القيوم كان صادق لما قال بيطلع من هني..
ربيع:خسارة..
عبد الرؤوف تنهد وقال؛خيره..خيرة..
☘☘☘☘
خشت لدار الخزين لقت خالتها تنظف في السله قالت..
اريج؛خالتي..
سدرة؛تعالي..
مشتلها ووقفت حداها..
وسدرة قالت؛تبي تنظيفه باهيه..
اريج وهي تشوف للسله قالت:ايه..بعدبن شبحتلها وقالت..خالتي بناخد رايك في موضوع..
شبحتله سدرة وهي مضيقه عيونها وقالت؛موضوع شنو؟
☘☘☘☘☘
"اني بنخلي الشقه فاضيه سنه مش مأجرها لحد مهما صار"
عبد القيوم؛ماتعباش عليا نولي خلاص..
المهدي:صدقني اول ماتحط رجليك في الكفره حتندم..
ابتسم وقعد ساكت..
☘☘☘☘☘
"امتي؟"
اريج؛يوم السبت اللي فات..الح عليا هلبه..وقالي لو ماصار شي..اني نمشيلها بروحي..
سدره واريج تكلم فيها..حست بصدرها ضاق هلبه..
وجسمها مرة سخون ومرة مصقع..
خست هدا كله في لحظه وحده..
اريج؛خالتي قوليلي شن ندير نكلمها ولانفوت..
خدت سدرة نفس وقالت وهي تحاول دير روحها عاديه؛كلميها..قوليلها عادي..
اريج؛اكيد!؟..يعني مش حتصير مشاكل..!؟
حركت راسها بالنفي وقالت؛لا..بريلها توا..
هزت اريج راسها وقالت؛ان شاء الله خير.
ومشت طلعت من حداها..
وسدرة طلعت بعدها ووقفت برا وقعدت تاخد في نفس..
بعدين قعدت تتلمس في ايديها ورقبتها ووجهها..
جهات مصقعه وجهات سخونه..
سدرة بخوف؛ياربي هدا شني!؟
🍃ولوطا..
وصلت اريج في طوبى وقالت..
بيبو ترا سيبي القطاطيس وركزي معاي شويه..
وقفت ع حيلها وقالت؛خيرك ؟!
اريج؛نبيك في موضوع ضروري ونبيك تكون ريلاكس واني نحكيلك
طوبى بقلق؛ان شاء الله خير
🍃وسدرة..
بعد ماحست روحها رجعت لطبيعتها..
مشت بتنزل تجيب حاجه تفرشها فوسط السله..
نزلت من الدروج عادي..
بس وين وصلت في المستراح وقفت فجأه..
الرؤيه تشوشت فجاة..
والالوان تغيرت للأحمر الغامق والاصفر..
تداخلت الحاجات في بعضها..
وكأنها فقدت الاحساس فجأة..
مش حاسه روحها انها عافسه ع الارض..
مش حاسه بشي..
رفعت يدها وحطتها ع راسها وهي تقول في داخلها بذعر..
"ياربي شني هدا..ياربي..ياربي!"
حركت رجليها بتنزل..
مازال مش حاسه بيهم.
لكن بدت تسمع في اصوات غريبه..
الناس تدوي ودوتها مش مفهومه
واصوات عياط متلاحقه..
حولت يدها ع راسها..
لما حست ان كل شي فيها هبط فجأة..
والرؤيه بعدت تضعف لين انعدمت مرة وحده..
🍃اريج؛السبت اللي فات واني فيي المصحه..
سكتت.
لما سمعوا الزوز صوت حاجة طاحت وارتطمت بشي...
طوبى بفجعه:هدا شني!..
اريج؛من دار الدروج!..
الزوز بسرعه مشوا لدار الدروج..
☘☘☘☘☘
"بنفقدوك هلبه"
عبد القيوم؛حتى انا يعز عليا فراقكم..لكن الاكيد حنتلاقوا اخرى..
المهدي بإبتسامه؛اكيد نمشيلك لغادي..
عبد القيوم:مرحبتين..
"سدرة"
شبحوا الزوز لحوش الواعر..
لما سمعوا صوت صرخة طوبى بإسم اختها..
الشارع كلها سمعها..
وعيونهم توجهت بالنظر لحوش الواعر..
🍃طوبى وهي تعيط بهستيربا مقعمزة حدا اختها تفيق فيها وهي تقول بعياط؛سدرة..سدرة...لاالا بالله عليك لا..سدرة..
واريج وهي ترعش مع بعضها وتبكي مشت تجري لحوش الجد علي وقعدت تخبط عليه وهي تعيط..
"حسين..حسين..تعالى"
وقعدت تعيط ع طول حسها..
🍃ربيع وعبد الرؤوف والجالي ونضال طلعوا من القهوة..
والمهدي يقول بنبرة صوت مرتعشه؛شن في؟!..
فجاة..
انفتح باب حوش سدرة وطلعوا منه فايزة وبناتها يجروا..
وصلت في حوش الجد وقعدت تخبط بقوة..
وصفاء مشت تجري لحوش لطفي وتخبط عليه..
وصوت عياط طوبى مسموع في شارع القهوة كله وهي تنادي..
"سدرة"
حتى من بلال وفراس التونسي انفجعوا ومشوا وقفوا حدا ولاد الشارع الملتمين..
الجالي وعبد الرؤوف مشوا يجروا قصوا الطريق..
وقعدوا يخبطوا ع الباب..
والجالي ينادي وهو مفجوع؛طوبى..
وصفاء جنبه تبكي..
فايزة وهي تعيط؛افتحوا الباب افتحوا سدرة خيرها!!..
انفتح باب حوش شنيبه..
وطلعوا نسرين وعائشه وهما مفجوعات.
مشوا الزوز يجروا لفايزة وهما مش فاهمات شي.
وبنات الصيد مع كنتهم يتفرجوا من الروشن..
نجاح بخوف؛يالطيف ياربي يالطيف..
🍃🍃🍃
فتح حسين الباب الفاصل وطلع وهو يقول بفجعه:خيرها سدرة.
اريج وهي تبكي؛طاحت من الدروج ع راسها ودمها يصب..
مشي يجري وهي وراها واميمه وصفيه اللي كانوا مفجوعات.
وين وصل لدار الدروج.
لقي طوبى شاده اختها وتعيط وايديها عليهم اثار دمها..
لما شافوها صفيه واميمه عيطوا..
حسين قعمز ع ركابه جنبها وقعد يشوف في نبضها كان ضعيف..
خشتله اميمه وهي نرعش وتقول بعياط؛ارفعوها توا توا..
حسين بصوت عالي:جيبولي بطانيه!..
خشت صفيه تجري وهي تقول:ياروحي يابنتي ياروحي..
وحسين يشوف لطوبى كيف وجهها ولى شاحب وهي تبكي بصدمه وشاربها تحتاني يرجف..
جت صفيه تجري وقالت؛جبتها.
حسين؛اطرحيها يام..
ورفع سدره بين ايديه..
وقلبه بيتقطع عليها..
فجأة قعدت تنتفض..
عيطت طوبى وهي تقول:لاالالالاااا..ياربي..لا..
حطها حسين في البطانيه ولفها عليها..
ورفعها بالبطانيه وهويقول:افتحولي الباب.
مشت اميمه تجري فتحت الباب..
طلعوا في وجوههم الجالي وعبد الرؤوف..
عيطوا اميمه وحسين؛حولوا!.
وخروا طول..
وطلع حسين يجري بسدره لسيارته..
🍃وعيون المهدي معاه..
لمح سدره شويه من شعرها طالع والبطانيه فيها بقعة الدم..
وهي ملفوفه بالبطانيه بانت عليه وكأنها مكفنه.
الراجل كان في حالة فجعه..ع صدمه..ع عدم استيعاب..
شن اللي قاعد يصير قدامه توا..
يحطها حسين في سيارته من الخلف تركب جنبها اميمه..
وتطلع...
طوبى..
وهي تقول بعياط للجالي..
"هيا هيا هيا ارفعني هيا"
🍃هني..
الوقت وقف...
كل شي وقف...
بالنسبه ليه هو...
عبد القيوم التارقي..
لما شاف اخر شي متوقع يشوفه في حياته..
لا بل ماكانش متوقع يشوفه اصلا..
اللي تعيط وتبكي توا..
اللي خداها الجالي من يدها وطلع بيها يجري لسيارته..
اللي تصرخ وتنادي بإسم اختها...
هي!؟..
مستحيل...!
هي نفسها ام العيون الحايره...
هي نفسها...!؟
رحمتك يارب..
كيف هكي..كيف!..
مرت الجالي اللي فيه عبر الدنيا كلها..
المستغفله المسكينه اللي واجعه حالها..
هي نفسها..
طوبى!!..
ام العيون الحايره..حب حياته..اكبر واعظم امنيه تمناها من ربي...
هي نفسها...طوبى!..بنت لطفي الواعر!؟
كابوس..كابوس...اضغاث احلام..
مستحيل اللي يشوف فيه قدامه توا واقع.
مستحيل..
🍃الوقت واقف عنده..
بس معاهم هما كان في سباق..
طلع حسين يجري بسيارته..
والجالي وراه بسرعه...
وصوت البكي والعياط مسموع في الشارع كله..
نضال مشي بسرعه لأريج.ضمها ودخلها للحوش..
وغرفه طلعت من حوشها تجري وهي تعيط:سدرة سدرة نبي اختي ارفعني لاختي..
ونبيله وراها وهي تبكي بصمت..
عبد الرؤوف وهو متألم خدي مرته ركبها السيارة وشغلها وتحرك طول وراهم..
ونبيله مشت لصفيه ونسرين وعائشه وفايزة وبناتها اللي كانوا يبكوا ويعيطوا في الشارع..
بعدين طلعوا اغلب الجيران ومشولهم..
ووسط هاللي صاير هدا كله..
المهدي كان يسمع في البكي والعياط وبين عيونه منظر سدرة وهي ملفوفه في البطانيه..
وفي نفسه يقول..
"لاياربي اني نقدر ع كل شي..نتحمل كل شي الا الحاجه هادي..خل تتزوج ودير صغار وتعشق غيري وتنساني..لكن....
لاياربي...مانقدرهاش هادي مانقدرهاش"
وبدي نبض قلبه يضعف..ويضعف..
لدرجة انه بدي يسمع فيه وكأنه في وسط وذانه..
لحظات..لحظات بس..
والدنيا ظلمت في عيونه..
وعلي صوت صرخة مغليه هي تقول..
"مهدي"
#يتبع