طوبى الجزء الاول

تابع

(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_الثامن_والأربعين"في الداخل4"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫🚫ملاحظه🚫🚫
اي تعليق عنصري حيتم حظر صاحبه
اي تعليق فيه سخريه ع ثقافه الطوارق حيتم حظر صاحبه
واني هني نكتب في الحوارات باللغه الامازيغيه التارقيه لأعزائي التوارق مش لغيرهم احتراما ليهم وحبا لثقافتهم
نتمنى تكونوا قريتوا هالملاحظه كويس..وشكرا ع تعاونكم مسبق🌸
☕☕☕☕☕☕☕☕☕☕☕☕☕☕☕☕☕
بلعت ريقها وهي تشوفلها من الخوف..
نزلت درجه..وبعدها التانيه وهي تشوفلها..
لين وصلت في اخر درجه..
قعدت تشوفلها بنظرات خوف فيهم كره واضح..
نزلت عيونها ليدها..
لما شافتها اشرتلها بيها ع الصاله..
وكأنها تقول" تحركي قدامي"...
هربت بعيونها عنها ونزلت اخر درجه ومشت بسرعه للصاله وخشتلها..
شافتها اميمه وهي خاشه لاحظت ان لون وجهها مخطوف..
وعيون نسرين معاها وهي ماشيه لمكانها لين قعمزت..
لما قعمزت طوبى شافتلها بنظرة سريعه بعدين رجعت تشوف لأختها وبنات اختها وهي تهدرز معاهم..
اميمه وهي تشوف لنجاة..حست انها مش طبيعيه..
وكأن صار معاها شي خوفها..
غيرت عيونها عنها ومررت نظرها ع الصاله..
ثبتوا لما جو ع بابها..
لما شافت حماتها خديجه خاشه وهي تمشي بكبر..
لابسه بدله رسميه سروال لونها اسود ع بلوزه بيضا فيها ربطه حلوة ع الرقبه ونازله لعندالبطن..
ودايرة لشعرها تسريحه بسيطه لكن حلوة..
وفي رجليها حذاء اسود كعبه رقيق...
طلة راقيه....خلت الانظار تتوجه عليها وهي ماشيه تسلم ع الحاضرات..
امها لما شافتها طارت من الفرحه بس دارت روحها عاديه قدام الموجودات..
ونسرين قعدت تلحق في بعيونها وتراجي امتى تكمل سلام..
سلمت خديجه ع الحاضرات كلهم..
لين وصلت في العرايس.
خديجه وهي تسلم ع اميمه بالخد:حمد لله ع سلامتكم..
اميمه وهي مبتسمه مجامله:الله يسلمك..
طلقتها ومشت لطوبى وقعدت تقول:الله يبارك الله يبارك..ع اناقه ع الجمال ع الدلال..كلا الجالي داعيتله امي في ليلة قدر..
ضحكت طوبى بخجل..
وغرفه واريج والاء كانوا مبتسمات بفرح من كلامها عليها..
بس اميمه وامها ضايقوا..
وريما لاحظتهم..
خديجه وهي تسلم ع طوبى:حمد لله ع سلامتكم حبيبتي.
طوبى وهي تسلم عليها:الله يسلمك..
بعدت خديجه وهي تقول بضحكه:كلمني راجلك في شهر العسل يسأل..هدرزنا شويه من هني ومن هني المهم في نص دوة بدل مايقول ياخديجه قال ياطوبى..
ضحكوا..وطوبى كانت تضحك وهي متحشمه..
خديجه بضحكه:واخده عقله..وعلاش لا ياحنه..جميله..وكيوت..وصغيرونه..
وشبحت بطرف عينها للمكان اللي مقعمزة فيه نجاة ..
ونجاه كانت متجنبه تشوفلهم بس تسمع في كلامها وهي تسحن من داخل..
طوبى بإبتسامه:تسلمي خديجه هدا من ذوقك..
غرفه بإبتسامه:حتى انتي ماشاء الله عيني ماضرك.
خديجه بإبتسامه؛تسلمي حبيبتي ربي يحفظكم..
مررت عليها نظرتهم بإبتسامه بعدين لفت ومشت..
فاتت من قدام نسرين ومشت طلعت من الصاله..
ونسرين لحقتها بعد لحظات..
ومافي مركز معاهم غير اميمه ونجاة...
☘نجاح:اهي جت كنتك..
نجمه:عارفتها بتجي ماتبيش تجيب ليها ولماليها الدوة...
☘☘☘☘☘
وخديجه فهالوقت خشت لدارهم زمان..
وخشت وراها نسرين وسكرت الباب
بعدين وقفت قدامها وقالت: هو سؤال واحد ونبي عليه اجابه واضحه..خوك الجالي شن في بينه وبين نجاة؟
خديجه ربعت ايديها وقالت:قبلها انتي قولي شن الدوة اللي سمعتيها وخلاتك تكلمني الصبح وانتي ترعشي وتصري عليا بش نجي؟!
نسرين بتوتر:خوك الجالي سمعته وهو يتكلم بالتليفون فجنان واني في الحمام...كان يكلم في نجاة ويقوللها في كلام مايصلحش الا بين الراجل ومرته..شن في بينهم ياخديجه قولي وريحيني
تنهدت خديجه وقالت:زي ماقلتي..
"راجل ومرته"
نسرين قعدت تشبح لأختها بصدمه ودموع طول جروا في عيونها وطاحوا..
وخديجه تشوفلها وتراجي في ردها..
اللي جي منها وهي في حالة صدمة شديده:حي غبارة سودا..غبارة مغبرة!..نهار احرف اسود..!..
خديجه:مش لهالدرجه عاد!.
نسرين وهي مش مستوعبه :كيف مش لهالدرجه كيف!؟ ماسد خوك مريض فوقها يطلع متزوج!؟..تعرفي انتي شن اللي بيصير لو طلع هدا كله!؟ تصير حرب فاهمه حرب بتحرقنا كلنا..
خديجه بسخريه:اوووف..حرب! يالطيف!؟
نسرين خبطت بيدها ع وجهها وقالت:كيف انت مش واعيه للي قاعد يصير!؟ مش مفكرة شن مازال بيصير القدام..
خديجه:ماصاير شي ومش حيصير شي غير الخير بس..
خوك حيشفى ويتعلق بمرته ومش حيشوف معاها حد..
وحيطلق الشيطانه الشارفه هديكا..وبعدين ندبرلها مايخليها تنتلف من حياتنا بكل..هدا بس اللي بيصير.
نسرين؛شن ضمنك انتي قوليلي شن ضمنك ان اللي قلتي عليه كله حيصير!؟
خديجه:حالة خوك..خوك طاير بطوبى بيهبل عليها وهو قبل كان رافضها ومايبيهاش...زي ما صار وتغير الجالي..حيصير الباقي كله بعدين..
نسرين ودموعها ينزلوا:باهي انتي شفتي نجاة وتصرفاتها تصرفات وحده تبي تكشف كل شي...
خديجه:هالحيوانه خليها عليا نعرف طبها..المهم انتي خليك عاديه زي قبل ماتعرفي شي..امي بالذات مانبيها تعرف شي..لأن ردة فعلها حتكون متهورة..وتخلي هديكا الحقيره في المقابل دير ماأكبر وتفضح كل شي.
نسرين قعدت ساكته وهي تفكر..
خديجه:نسرين!
غمضت عيونها بألم بعدين فتحتهم وقالت:اااه ياربي الطف بينا وبعد علينا العار والشتات..
خديجه؛آمين..المهم زي ماقتلك ماتعرفي شي..وتوا بتطلعي تعدلي مكياجك وترسمي ابتسامه ع وجهك وتخشي تجاملي الناس..لاتندري ع شي..ولاتعرفي شي..ولاسمعتي بشي..
نسرين قعدت ساكته ودموعها مازال ينزلوا بدون ماترد..
خديجه؛نسرين..نكلم فيك!..
تنهدت نسرين..بعدين مسحت وهي تهز في راسها بالموافقه..
خديجه؛ايوه هدا صح..ومشت فتحت الباب وقالت..زبطي وجهك كويس والحقيني..
وطلعت وسكرت الباب وراها وتوجهت للصاله وخشتلها...
☘☘☘☘☘
بعد المغرب..
تعبت مربوعه حوش شنيبه الكبيره الخارجيه بالضيوف..
وع راسهم..حوش نساباتهم عيت الواعر..
ونساباتهم عيت الهادي..وعيت الصيد..
وكذلك كانوا موجودين ...
عبد الرؤوف عديل الجالي..وربيع الجار القديم..
وعبد القيوم الساكن الجديد اللي خدي في قلوب سكان الشارع مكانه في وقت قصير..
وباقي الحضور من الأقارب والأصحاب..
الحال عند الرجاله ماكانش خير من الحال عند نساوين..
عبد القيوم اللي جي ع خاطر المهدي ماكانش طايق يقعمز في مكان فيه الجالي بعد اللي شافه اليوم..
كان مشمئز منه ومش متحمل يسمع صوته..
وربيع..
كانوا عيونه اغلب الوقت ع حامد اللي مقعمز مع عديله محي ويهدرزوا..
كان نظرات ربيع ليه نظرات عدم تقبل وفيها شي من الازدراء...
بس حسين كان عكس كل الحاضرين..
مقعمز وكله شموخ..ولاكأنه جاي يبارك لغريمه اللي خدي منه حب عمره..
يهدرز ويضحك واللي يشوفه يقول هدا ماصابه هم ولاجي جنبه..
وعبد القيوم كان ملاحظه..
يمرر في نظره بينه وبين الجالي..ويلاحظ مدى الفرق الشاسع بينهم..
واحد يتصنع في الوقار والحكمه..
والتاني كل صفة حسنه ظاهره عليه من غير يتعب نفسه بش يوريها للناس...
وسط هالجو..
كان في راجل يتكلم ع حال الناس كيف تغير وكيف انقلبت موازين الأمور عندهم...
:توا الناس يحكموا عليك باللي عندك يقيموك بفلوسك ومركزك معارفك..معاش في حد يدور في الاخلاق والبيتيه والدين خلاص...
:صدقت..نعرف واحد غارق في الحرام لوذانه وماتلقى كان اللي يقدر فيه ويبجل فيه تبجيل...
:قالوها المصاروة..معاك قرش تسوا قرش..
ربيع بإبتسامه قال:هي ماولتش بالفلوس بس..نعرفو اللي يدير في روحه من اهل الخير والصلاح..تشوف افعاله تقول هدا لاقبله ولابعده..ومن داخل وسخ الدنيا كلها فيه
علي الواعر؛مزبوط مزبوط كلامك مزبوط
ربيع شبح لعلي الواعر بدهشه مش مصدق انه قال كلام عجبه ووافقه عليه..
والمهدي كان يشوف لردة فعل ربيع وهو شاد ضحكته....
غير عيونه لعبد القيوم لما تكلم بعد صمت دام طويلا..
عبد القيوم:فعلا واجدين في وقتنا هذى اللي يدرقوا في الرذيله اللي غارقين فيها بالفضيله الوهميه...ويعيشوا بين الناس عمر وهما ع هالحاله اللي ينشدوه عنهم يقعدوا يشكروا فيه من اليوم لبكرا وماكذبوش لأن هذى اللي يشوفوا فيه منه والباين عليهم..لكن بعد العشرة يبانواع حقيقتهم صعب عليهم يقعدوا يمثلوا 24ساعه..لازم اللي داخل يطلع..
الجالي كان يسمع فيه وهو يتكلم
ضايقه كلامه هلبه..وخلاه مش طايق عبدالقيوم..
والموجودين كانوا منصتين لكلامه..عجبهم هلبه وفي نفس الوقت الاسلوب جذبهم..
وهو متابع يقول:المشكله ان النماذج هذي..خربوا ع الناس الكويسه بالفعل من برا ومن داخل..بدينا توا وين نعرفوا حد كويس واجد نقولوا الله اعلم شن مدرق من بلي..
حسين:صح..لاحظت الشي هدا بين الملتزمين او الناس المتدينه..تلقى واحد مقصر السوريه ومشمر السروال ولحيته واصله لبطنه والسواك 24ساعه في فمه وين تحكي عليه قريب تقول رضي الله عنه..والبلي اللي يدير فيه هو الكافر مايديراش..الناس هي خلتنا نشوفوا ان الملتزمين كلهم ع نفس الشاكله
المهدي:لأنهم كثروا هلبه اللي حكيت عليهم..
واحد من الحاضرين قال:في كل مكان تلقاهم للأسف شوهوا صورة الالتزام..
عبد القيوم:نقولك...البنادم ع داخليته..لو كان من داخل انسان سليم فطرته سليمه نيته باهيه قلبه نظيف ولاالعكس انسان مش مزبوط نيته سودا قلبه مريض حيغلبه اصله ويطلع يطلع وسبحان الله في امارات ربك يطلعهن ع البنادم يخليك تميز بيهن بين الباهي والعطيب
يقولك...
وقعد يلقي في ابيات شعريه وهو يوزع في نظره ع الحاضرين وإلقائه كان بحركة اليد
أومارة العطيب اتبان فالتسليمه
                        ومن اول جواب اتبان للنشّاد
عليه اتغلّب عادتا القديمه
                          مصير كل حي ايعود للمعتاد
لصيف المزوّق موش دايم ديمه
                        اللون الطبيعي هو اللي قعّاد
واخر بيت قاله وهو يشوف للجالي...
نصاع البياض اتسيرله تظليمه
                      ايعود للسْواد انكان لصل سواد...
ورسم ع وجهه ابتسامه..
ردها الجالي بكبر مصطنع ومن داخله كان متوتر من الحديث بشكل عام..
والحاضرين قعدوا يقولوا لعبد القيوم..
"سلمت وصح لسانك.."
وهو يرد عليهم..
"تسلموا..تسلموا"
ماعدا علي الواعر اللي كان مدقق ع كل شي..وعيونه قعدوا ع عبد القيوم وهو يفكر في كلامه...
☘☘☘☘☘
وداخل الحوش..
في الصاله...
كان الوضع مازال فيه شي من التوتر..
من ناحيه نجاة وحمواتها..وسلفتها الجديده اميمه..
بينما طوبى تهدرز مع اريج في موضوع يخصها..
طوبى:وانتي علاش رفضتي.
اريج:مازال بكري..
طوبى رفعت حاجبها اليسار وقالت:علي بيبو روجه؟
اريج بآنزعاج:يييه عليا قداش اني مفضوحه..
ضحكت طوبى وقالت:الجالي قالي يبي يتزوج..
اريج قعدت تشبحلها وقلبها يدق بقوة.
طوبى بإبتسامه شقاوة:معناها استعدي..
اريج ووجهها احمر:ومن قال يبيني اني..
طوبى:ياسر منه الاستعباط متاعك هدا..عارفتيه يبيك انتي ومايبيش غيرك..
اريج غيرت عيونها عن طوبى وقعدت تمرر فيها ع الحاضرات وع وجهها ملامح ابتسامه خفيفه..
ضربت طوبى بمرقفها ذراع اريج وهي تقول بضحكه؛بنولوا سلفات..
اريج بإنزعاج مصطنع والضحكه غالبتها:خلاص عاد..
وطوبى تضحك عليها..
بعيد عليهم شويه كانوا الاء وغرفه يصوروا في سليفي حدا ديكورات حلوة..
ويصوروا في الديكورات وينزلوا ستوري..
❤وستوريات آلاء يشوفوا فيهم مهند ووليد..
مهند كان متشوق ليوم الخطبه اللي من بعد يقدر يتفاعل عادي ع اي شي تنزله بدون رسميات..
أما وليد فكان منقهر هلبه ويتمنى لو اللي صار بينه وبين آلاء يكون مجرد كابوس وحيفيق منه..
يحبها هلبه..حب كبير من وهي صغيره..ومش قادر ينساها ولايتخيلها تكون لغيره...
☘☘☘☘☘
جي وقت عشي الحفله..
النساوين كان عشاهم نظام صواني..اما رجاله قعاد..
واللي يعول ويجري الواقفات وبنات محمد شنيبه يشرفوا عليهم..
في الصاله..
كانوا الحاضرات باديات يتعشوا..
ونجاة تاكل بالسيف وهي تشوف لطوبى كيف مقعمزة تاكل وحداها جارتهم نجاح تهدرز عليها..
☘نجاح بإبتسامه: سبحان الله الوقت يجري...امس بس كنتوا صغيرات تلعبوا بكنادرنا وتريحوا فيهم وحني نقعدوا ندوروا بعدين..
ضحكت طوبى..
نجاح وهي مبتسمه؛ربي يهنيكم ويسعدكم..
طوبى بإبتسامه:آمين..والفال ليكم انتي وعواطف..
ضحكت بحسرة وقالت:لا اني وعواطف خلاص راحت علينا..
طوبى؛من قالك تعلمي بالغيب؟!
نجاح:لااعوذ بالله..بس يابنتي هدا قسمنا ونصيبنا من الدنيا والحمد لله ع كل حال..
طوبى وجعتها هلبه وهي تشوف فيها كيف تتكلم ولمعة الدموع في عيونها..
قالتلها:علاش اليأس والاحباط هدا!اكبر منكم بوين جاهم نصيبهم وعايشات..
نجاح بإبتسامه ألم:اني ولا عواطف نبوا الزواج بش نديروا عيله..وتوا خلاص فات وقتنا..
طوبى:انتي كم عمرك ابله نجاح! قاعد مافاتش الاربعين..مازال تقدري تجيبي صغار..
نجاح بضحكه:نقدر شني بابنتي..راهو اللي زيي الحمل والولاده خطر عليهم
طوبى:مش شرط ومش قاعده ياما منهم اللي حملوا وجابوا في هالعمر..خلي عندك قوة ايمان بربي وحسنة ظن بيه ماتعرفيش شن مدرقلك القدام..
تنهدت نجاح وقعدت ساكته..
حطت طوبى يدها ع كتف نجاح وقالت:حاولتي قبل تقري البقرة 
ضحكت وقالت:حفظتها حفظ..
طوبى:بالك لما تغيري النيه يتغير معاها كل شي..الرسول قال اخذها بركه وتركها حسره...
انوي انك تقريها بش تاخدي بركتها..في صحتك في وقتك في رزقك حتى في عبادتك ونفسيتك..
احسني ظنك بربي وخلي عندك يقين قوي ان حيختارلك الاحسن ويرضيك بيه..حتى لو حق مش كاتبلك الزواج في الدنيا تكوني من داخلك راضيه ومرتاحه ومعاش يوجعك الموضوع هدا..
نجاح كانت تسمع لطوبى وهي متأثره بكلامها وتفكر فيه..
طوبى:المهم انتي داومي عليها مش شرط كل يوم حتى كل تلاته ايام زي ماجي في الحديث..وديري معاها ختمه هادي طبعا لازم تكون كل يوم..حتتعبي في الاول صح بس بعدين صدقيني مش حتقدري تستغني عنهم..
نجاح بإبتسامه قالت:محلاك ومحلا كلامك..
طوبى بضحكه:انتي الحلوة..
ضحكت نجاح بعدين قالت:ان شاء الله نبدا فيهم من الليله..
طوبى:اهم شي ماتقعديش تستني امتى اللي تبيه يصير وتتوقعي ان كل شي تبيه حيصير في رمشة عين..
مرات ربي يكون قاسملك خير من اللي تتمنيه..راحة البال..
اللي ياما منهم متزوجات وبصغارهم فاقدينها..يامنهم يلعبوا بالفلوس لعب ومش محصلينها..راحة البال حتى في وقت الشده تلقيها تكوني في عز الشده متاعك لكن بالك مرتاح ومطمنه وواثقه ان ربي مش حيخليك..
نجاح؛ونعم بالله..
طوبى:وبنزيد حاجتين حتى هما تمسكي بيهم..
ذكر..لاإله الا الله وحده لاشريك له..
كملت معاها نجاح وهي تقول:له الملك وله الحمد وهو على كل شي قدير..
طوبى:ايوه هدا تاج الذكر هدا في كل وقت نردد فيه نلقى روحي ساكته نبدا نقول فيه..ماتتصوريش قداش كان اثره كبير عليا في كل شي فحياتي
وحاجه اخيره دعاء قوليه في كل اوقات الاجابه والسجود اني متمسكه بيه هلبه المده الأخيره وماندعيش لنفسي بغيره..
"ياذا الجلال والاكرام اكرمني بعطاء ليس له حد ولاند"
نجاح عاوداته بش تحفظه:ياذا الجلال والاكرام اكرمني بعطاء ليس له حد ولاند..
طوبى:وربي يعطيك احلى حظوظ الدنيا والآخره..
نجاح بإبتسامه:ويشرح صدرك كيف ماشرحتي صدري بنتي..الله يبارك عليك..
طوبى بإبتسامه؛سلمك..
🌼محلاك ياطوبى..ومحلا الناس اللي زيك..ياقداش ولوا نادرين في الدنيا..ناس ربي القى عليهم محبه منه وانصنعوا على عينه...وقلوبهم ديما ليه..
🕸لكن لابد يكون لكل موسى فرعون يتربص بيه بش يأذيه..اويقضي عليه..
وفرعون طوبى نجاه..اللي كانت بتموت حسد وغيظ وحقد ع طوبى..
ابتسامة طوبى المبتهجه اللي تخليها تحس انها اسعد وحده تبي تمسحها..تبي تقتلها...تنهيها...
نجاة ماكانتش تغار ع الجالي منها بس..
كانت تغير منها لحد الحسد لأنها مقبوله بين الناس مرغوبه جميله فيها كل المميزات اللي تخليها محط اهتمام وثناء الجميع..واهم ميزة عند طوبى عارفه روحها نجاة مهما دارت مش حتقدر تملكها..
طيبه القلب..وصفاء النيه...
☘☘☘☘
"ان شاء الله ديما حوشكم عامر بالفرح"
المهدي:آمين..وان شاء الله نفرحوا بيك حتى انت وديرلنا عرس تارقي في شارع القهوة..
عبد القيوم بإبتسامه:اها وقدام حوشكم نديروا المبارزة بالسيوف..
المهدي بإبتسامه استغراب:مبارزة بالسيوف!؟
عبد القيوم بضحكه؛هادي عاده عندنا تو نحكيلك عنها نهار تاني..خليني توا نعدي نرقد تميت نشوف في الدنيا مخاد وبطاطين وزياده بكرا عمل وقصه وهرجه..
ضحك وقال:تمام..تصبح ع خير..
عبد القيوم بإبتسامه؛قدامك كل خير..
مشي المهدي مع عبد القيوم يسقد فيه..
لما وصلوا للباب..
خش الجالي بقفص منظره حلو..فيه سلاحف وقطاطيس..
المهدي بضحكه:عقاب العيله..
الجالي ضحك وقال:عمي لطفي قالي كلمت اختها الصبح ووصتها تبعتهم..
هما يتكلموا وعبد القيوم عيونه ع القطاطيس والسلاحف وهو مبتسم ابتسامه خفيفه..
تلاشت لما شاف للجالي بعدين قال:تصبحوا ع خير..
المهدي بس اللي رد:قدامك كل خير..
ومشي عبد القيوم طلع..
التفت الجالي للباب بعدين شبح للمهدي وقال:امتى عرفتوه هدا بش دخلوه الحوش وتعزموه ع المناسبات..
المهدي عقد حواجبه وقال:علاش ماخشش مزاجك..
الجالي:وماارتحتلاش..داير روحه مثالي يعطي في محاضرات ويتفلسف وتلقى اللي دايره هو بالدرقه مايديره شيطان..
رفع المهدي حواجبه تعجبا..
والجالي كمل يقول:ديرله حدود لين تعرفه كويس..
ومشي خش داخل..
تبعه المهدي بعيونه وهو يقول؛تبي احكامه ع الناس متسرعه...
☘☘☘☘☘
وداخل عند النساوين مازال الحفله في عزها..
كانت نسرين دايرة فقرة حلوة فيها..
وقفت العرايس وعطت كل وحده فيهم مايك..
نسرين:بنخلي التاب قدامكم في كلمات الاغنيه في تشتغل موسيقي بس..وانتم تغنوا تمام..عارفينها ولا؟
الزوز وهما يضحكوا قالوا:ايه..
نسرين بإبتسامه:تمام..
وحطت قدامهم التاب ع قاعده طويله فيها عمود طويل..
بعدين اشرت ع وحده من الوقفات تشغل الاغنيه..
عيون نجاة توسعوا ع الآخر وين سمعت الموسيقي..
وقعدت تسمع بدون ماتشوفلهم وهي مصدومه..
وخديجه واقفه من بعيد شويه وهي مربعه ايديها وتشبح لنجاة بإبتسامة شماته..
نسرين:هي ابدوا..
طوبى واميمه..
يما يما انا غزالي وين نمشي بيه..
يما انا غزالي وين نمشي بيه..
نخصت اميمه طوبى بمرقفها بش تبدا الاولى..
طوبى بصوت جميل..
غزالي نحطه في عيوني ونسكر الهدوب عليه..
الزوز..
يما يما انا غزالي وين نمشي بيه..
اميمه بصوت حلو..
غزالي نحطه ف قلبي و نـسـكر بالقفل عليه
الزوز..
يما يما انا غزالي وين نمشي بيه..
نسرين وهي مبتسمه:موسيقى توا...
وقفوا غني..
وقعدوا يرقصوا في مكانهم..
شويه قدمت طوبى لراما وفرح ونوضتهم وقعدت ترقص معاهم...
والسدرات الزوز يرقصوا من غير ماحد يقوللهم...
والحاضرات كلهم يصفقوا وهما معجبات بالعرايس هلبه..
وين قربت تم الموسيقى ولت طوبى وقفت حدا اميمه ..
اول ماتمت بدي تغني..
يما راني مغياره مــا نبي لحد نوريه
الزوز..
يما يما انا غزالي وين نمشي بيه..
اميمه..
غزالي نحطه ف صباعي و نحط الخاتم عليه
الزوز..
يما يما انا غزالي وين نمشي بيه..
طوبى..
مجنونة راني ف حبه والله مــا نسلم فيه
الزوز..
يما يما انا غزالي وين نمشي بيه..
نسرين بضحكه؛تهبلوا..موسيقي توا..
قعدوا يرقصوا عليها الزوز وهما في مكانهم..
طوبى رفعت يدها اللي فيها المايك وقعدت تلف وهي ترقص..
وكلهم ملاحظين قداش تبان فرحانه لأنها تتصرف بتلقائيه..
حالتها هادي طمن في قلب مغليه هلبه حست ان ولدها بادي يتحسن اللي ماصار فيه شي خلال الايام اللي فاتوا..
وان مرته  مادامها سعيد معناها حتى هو سعيد..
🌸غرفه بإبتسامه:عمري ماشفت بيبو هكي..
اريج:ولا اني..تحسيها فرحانه هلبه حتى لما تدوي باينه الفرحه في نبرة صوتها..
الاء:صح تبان خير من اميمه اللي واخده عمر عن حب..
غرفه؛حتى اني حسيت ان جو اميمه مش ولابد..
اريج قالت:ان شاء الله خير..
☘ونجاه حداهم بمسافه بسيطه تسمع فيهم شن يقولوا وتزيد تنقهر..شاده دمعتها بالسيف...
اميمه...
غزالي ماعندي غيره يا يما وين نهرب بيه
طوبى..
لـو يطلب روحي و عيوني يستاهل راني نعطيه
الزوز مع بعض...
يما يما .. أنا غزالي وين نمشي بيه...
☘☘☘☘☘
"حتى راجلي"
حتى راجلي
اميمه...
يدلل فيا ..
حتى راجلي
طوبى
يموت عليا ..
حتى راجلي
اميمه..
يغار عليا ..
حتى راجلي
طوبى
دومه عليا ..
حتى راجلي
☘والصاله مقلوبه واغلب الحاضرات شايشات ويرقصوا..
حتى اللي مش متزوجات..
غرفه قعدت ترقص وهي مقعمزه..
اما نجاة فكانت حاسه ضغطها وسكرها ارتفعوا من السحن...
وكله كوم ومغليه كوم تاني...
اللي كانت دور  بين الحاضرات وهي تقول..
"الله يبارك..اللهم صل ع النبي"
خايفه ع كناينها من العين..
"حتى راجلي"
اميمه...
يا صونه ليا ..
حتى راجلي
طوبى بضحكه..
جياب التومه ..
خديجه بصوت عالي:آمين...
ونجاه تشوفلهابحده...
والحاضرات وطوبى يضحكوا...
حتى راجلي <3
اميمه...
ياربي دومه ..
فجأة..
جت تجري خديجه خدت منها المايك وقعدت تغني...
حتى راجلي..
جياب الهندي ..
حتى راجلي
مرواحه عندي ..
حتى راجلي  
جياب الحلبه ..
حتى راجلي ...
رومنسي هلبه ..
وكلهم يضحكوا عليها كيف تغني وترقص فيها ودير في حركات "جكترة" بعيونها كله كانت دير بالجو بس في نفس الوقت كانت تبي تقهر نجاة قهر ماصار الليله..
اما اميمه فكانت حاسه انها حتشوف من خديجه ايام حلوة هلبه تحسد عليها...
وامها ملاحظه هالشي بقلق..
☘☘☘☘
وجت اهم لحظه في الحفله كلها عند مغليه..
كانت تمشي بإتجاه كناينها وفي يدها اليمين شاده زوز علب مجوهرات..
وصلت فيهم..
عطت واحد لنسرين.
والتاني فتحاته وعطاته لأميمه وهي تقول:هادي هديه عمك محمد..
اميمه بإبتسامه:ربي يحفظه ويطول في عمره..
ابتسمت وجت لطوبى..مدتلها نسرين العلبه التانيه.
خدتها وفتحتها وهدتها لطوبى:هادي هدية عمك محمد..
طوبى خدتها وهي مبتسمه؛ربي يطول في عمره ع الطاعه..
مغليه:وروا هدية عمكم للنساوين..
نسرين؛دوروا عليهم بالوحده ووروهم..
طوبى واميمه:حاضر..
ومشوا قعدوا يلفوا ع الحاضرات بالهدايا...
اريج:هدا شن يقولوله!؟
ضحكت غرفه وقالت؛تفشخير عمتك خودي عليه من توا..
الاء بضحكه:تخيلي اريج هدا مصيرك في النهايه..
ضحكت بمشاغبه وقالت:كان فيها ذهب مستعده ندور بيه حتى ع شارع القهوة بيت بيت دار دار زنقه زنقه..
وقعدوا يضحكوا التلاته بكتمان..
بعد ماداروا دورتهم العرايس.
ولوا لمكانهم..
وغرفه ناضت وجت لطوبى..
غرفه:معليشي نبي نلبس طوبى هديه سدرة..
تعبوا عيون طوبى دموع..
نسرين بإبتسامه؛عادي حبيبتي ديري اللي يريحك.
غرفه:تسلمي..
فتحت بعدين علبة التعليقه...وبدت اطلع بالحاجه وتلبس في طوبى
خديجه تسائلت؛شني نسرين؟
نسرين بصوت عالي لان خديجه بعيده عليها:تلبس فيها في هدية سدرة..
خديجه هزت راسها وهي ساكته..
وغرفه تلبس في طوبى..
وطوبى دموعها ينهمروا من عيونها مش قادره تتحكم فيهم..
اميمه بإبتسامه:ربي يخليكم لبعض..
طوبى وهي تسمح في دموعها:يارب ويسعدها ياربي حبيبة روحي..
نسرين وهي متأثره هلبه قالت:آمين..
غرفه مسحت دموعها ورشفت بعدين قالت:نحولك السلسله هادي..
طوبى :لالا ماتحوليهاش خليها..
نسرين:كيف بتلبسي عليها سلسلة التعليقه تطلع مش حلوة..
طوبى:مش مهم..هي لبسيني غرفه..
غرفه:حاضر..ولبستها العقد..
نسرين:جاياتك هديه؟
طوبى ابتسمت بخجل من بين دموعها..
ابتسمت نسرين وقالت:من الجالي..
هزت طوبى راسها بإيجاب وهي مبتسمه..
ونجاه كانت تشوفلهم وتسمع فيهم وعيونها ع سلسال اسم..
"طوبى"..
☘☘☘☘☘
وتمت الحفله..
وروحوا المعازيم..
وماقعد في الحوش غير اهله..
سلموا غرفه واريج وآلاء على طوبى..
بعدين طلعوا بيروحوا ونسرين سقدتهم..
☘وفي الجنان كان موجود نضال..يركب في لامبه ضي جنب الباب..
كمل ونزل من السلوم..
سمع صوت يعرفه ويحبه..
التفت طول..
شافها مع اختها ومعاهم وحده مختمره ونسرين تسقد فيهم..
لما جو تحت اللامبه اللي فم الباب الدخلاني..
بدون مقدمات اطربقت..
عيطوا كلهم حتى نضال عيط معاهم من الفجعه لأنه كان مركز مع اريج..
طاحت اللامبه جنب اريج غمضت عيونها وسكرت وذانها وهي تقول:اشهد ان لا إله الا الله...!
الاء جبدتها وقالت بعيطه:اختي..!
نسرين بضحكه:لامبه مش رمانه!..
غرفه وهي حاطه يدها ع صدرها:ووك عليا عليك فجعه..
جاهم نضال وفي يده مكنسخ وهويقول:في وحده واقفه معاكم عتبه نعرفها..
نسرين شدت ضحكتها..
اريج تشوفله بطرف عينها وهي مضيقتها..
نضال بضحكه وهو يكنس في بقايا اللامبه قال:شن رايك يانسرين نفوت ولانكمل..
نسرين بضحكه:لالا فوت خير ماتنتحس..
نضال وهو يشوف لأريج بإبتسامه:زعمه..
نسرين:اني هكي نقولك..
والاء وغرفه وهما مبتسمات قعدوا يشوفوا لأريج..
وهي منزله عيونها لوطا ووجهها احمر من الخجل..
وتنتف في كمل عباية آلاء..
نضال؛ياودي مانقدروش حتى بنحسها راضيين بيها..
نسرين بضحكه؛باهي ياخفيف برا جيب لامبه تانيه بش تركبها..
نضال:قبلها قولي آمين.
نسرين بضحكه:آمين..
نضال رفع ايديه وهو ماشي ودعي:معاش تخش لحوشنا الا بالفيلو يارب العالمين..
وخلا نسرين والاء وغرفه يضحكوا..
واريج شاده ابتسامتها بالسيف وقلبها يفر فران...
نسرين؛ربي يجيب مافيه الخير..
غرفه:ان شاء الله..
ومشوا للباب ونسرين معاهم...
طلعوا من الحوش..
ونسرين سكرت الباب ولفت بتخش ع جية نضال باللامبه..
قالت بضحكه:خلاص نويت .
نضال:بعون الله غير الحاج يفكنا من تسكير الراس..
نسرين:اقعد زن عليه لين يقول باهي الزن ع الوذان امر من السحر..
وخشت داخل..
وخلاته يفكر في كلامها...
☘☘☘☘☘
"لو تشوفيها ياخويله قداش فرحانه عمرها ماريتها هكي"
سدرة ودموعها في عيونها وهي مبتسمه بحب:ياروحي ان شاء الله دوم فرحانه يارب..
مطيره بضحكه:دارت مغليه سبرها..
غرفه؛مالا شنو..
اريج؛معيشه روحها في جو السلطانه الام..
ضحكوا..
وسدره قالت:شن شكل تواكمهم..
آلاء:يخوخموا تشوف واحد تنسي التاني..
فردوس بإبتسامه:دوم عليهم وبهناهم..
كلهم قالوا:آمين..
وغرفه تشوف لفردوس وهي تفكر كيف وامتى بتفتح معاها موضوع مختار...
☘☘☘☘☘
فتح الباب وخش عليها الجناح وفي يده باكو كرتوني وهو يقول:ترا قولي شن جبت معاي..
طوبى اللي كان واقفه ع المرايه وهي تحول غي التعليقه شبحتله بضحكه وقال:بعتوهم؟
الجالي سكر الباب برجله وقال بإبتسامه:بوك جابهم..
طوبى:ياعمر يابابا..
وجاته وقفت قدامهم وقعدت تشوف فوسط الباكو..
شافت سلاحفها وهما خاشات في بيتهم..
ضحكت وقالت:رقدوا..
خدت منه الباكو وقالت:وبينكا وعليتها..
الجالي:لوطا في الجنان درت وسط باكو اكبر من هدا وفرشت تحت شرشاف دخلتهم كلهم في وسطه راقدين توا..
طوبى وقفت ع روس صباعها وقرصت خده وهي تقول:سلملي راجلي اللي غنيت عليه اليوم لين رقبتي انبحت..
ضحك الجالي وقال:غنيتي!؟
طوبى بضحكه:ايه جو دايراته نسرين لكن حلو..
ومشت بتحط الباكو ع تركينه وهي تهدرز مع سلاحفها:جرينيا لالي لولي..نوضوا استاحشتكم..نبي نشوفكم..
والجالي يتأمل فيها قلبه طاير وسط ضلوعه..
شويه تفكر اللي صار اليوم..حس بضيق شديد..
تبدد لما طوبى جاته وهي تقول:تصدق..استاحشتك هلبه..
ضحك ضحكه خفيفه وهو يشوف لعيونها الحايره...
☘اللي مسهره عبد القيوم وحرماته الراحه وهو يتخيل في اللحظه اللي حتجمعه بيها..
🍃مجنون ياعبدو🍃
☘☘☘☘
"شني!!!؟"
غرفه بصوت منخفض:وطي صوتك تو يسمعوك..
فردوس وهي مصدومه:باهي امتى!؟
غرفه:امتى ماانتي تبي..
فردوس سكتت وهي تفكر بعدين قالت:خل نقولوا لطوبى متمنيه تشوفه اكثر منا كلنا..
غرفه:لاطوبى لا..مادرقش في حاجه ع سدره انتي تعرفيها وحني مانبوش سدرة تعرف بكل..
فردوس بضيق:بس حرام مسكينه ريتيها كيف راسماته حتى الرسم..
غرفه:وريتي درت فعل سدرة لما شافت رسمتها!..فكينا فردوس بالله عليك..خلينا نشوفوه ونسمعوا وبعدين نقرروا...
فردوس مررت نظرها حواليها وهي تفكر بعدين شبحت لغرفه وقالت:باهي..
غرفه:امتى؟
فردوس:نهار التلاث نقولوا ماشيين للعطريه في ****** بس ناخدوا دوا عرب ليك انتي..
غرفه:لالا..تو عمتي تقول بنمشي معاكم...نقولوا بتمشي معاي لمحلات روفه ناخدلك حوايج..
هزت راسها وقالت:باهي..
غرفه:خلاص تو نقول روفه يكلمه ويحدد معاه الموعد...
☘☘☘☘☘
في جناح نجاة..
مقعمزة حماتها ع كرسي الزيانه..
وهي واقفه عليها تسمع فيها شن تقول..
خديجه:بتشدي شقتك ومعاش تجي هني الا لما الجالي ومرته مايكونوش هني..ونفضل ان جيتك تكون مرتين في الشهر..
نجاه؛عمي يبي الصغار..
خديجه: لما ينشد عليهم بوي اني نمشي نجيبهم  ونخلي عمهم نضال يروحلك بيهم..
نجاه قعدت تشبحلها وهي ساكته..
خديجه؛خيرك تشبحيلي هكي..وقلدتها..بعدين قالت بصرامه..سمعتي شن قلت!؟
بلعت نجاه ريقها وهي متمالكه اعصابها بقوة وقالت:حاضر..
ناضت خديجه وقالت:راهو قاعدة نوسع في بالي معاك لعيون صغار خوي..ماتخلنيش نحول الرحمه من قلبي بكل..
نجاة هزت راسها وهي شاده دموعها بقوة..
شبحتلها من فوق لتحت بعدين قال:ارقدي ماتسهريش خيرلك..
ومشت من حداها وطلعت من الجناح..
غمضت نجاة عيونها بغضب وقالت؛معاش قادره نتحملها الواطيه هادي..
فتحت عيونها وقعدت تتنفس بعصبيه وتقول: تو نحولكم  من طريقي انتي وهديكا الفرخه غير اصبري عليا شويه بس..
☘☘☘☘☘
تاني يوم ..
الصبح..
كانت نسرين فايقه بكري دير في العصيده للعيله..
وحداها الصغار مقعمزين يشربوا في كاكو وحليب وياكلوا في البريوش..
ونضال يدحنس عليهم وياكل من هديكا وهادي..
سدرة المهدي:عمو كملتها عليا..
نضال:ياما جايبلك شكلاطه وبطاطا وجيلاطي استخسرتي فيا عضه بريوشه صغيره..
سدرة:هادي عضة تمساح عمو حتى يدي قريب كليتها..
ونسرين تضحك..
نضال؛تمساح!! مالا بري ياوشواشه..
قعدوا يضحكوا الصغار..
سدرة:مش وشواشة اني..
نضال:لا اني تمساح!؟
سدرة حامد:مش انت خالو العضة متاعك..
سدرة المهدي:ايه صح.
نضال:اها..بعدين قال..لكن انتي وشواشه..
سدرة بإنزعاج؛عمتي!..
نضال:بري انتي وعمتك..
سدرة:تو نحرش بابا..
نضال:بري انتي وبابا..لالا نبصر عليك ردي بالك تعاوديها لبابا..
نسرين:نوض من هني نوض جبتلي الشقيقه..
نضال ناض وهو يغني:ياليلي ياليلا..
قعدوا الصغار يغنوا معاه..
ابتسم بحماس وقعد يعني معاهم..
نحب نطير نطير لفوق..يحبوا يقصولي جناحي
نسرين:ووك عليا راسي!
☘مغليه طلعت من الصاله تجري جتهم للكوجينه:حي عليك نهارك احرف بوك نايض وراسه مصدع وجنونه راكبات..
علا صوته وهو يغني ويأشر للصغار يعلوا صوتهم..
والحوش انقلب..
مغليه غمضت عيونها بإنزعاج :ووك عليا..
☘في جناح الجالي..
طوبى بضحكه؛نضال مدايره حفله ع الصبح..
الجالي بضحكه:يستفز في بوي..
طوبى ضحكت وشبحت للمرايه وهي تلبس في وشاحها بعدين قالت؛جولي برنامج الآذان اللي عندك عجبني ابعتهولي..
الجالي وهو يلبس في شخشيره:حداك التليفون..
طوبى كملت لبس وشاحها بعدين خدت تليفونها وتليفونه وقعمزت ع السرير..
دورت البرنامج وبعتاته بعدين قالت؛ايه حقه بناخد منك الصور متاع ايه صوفيا..
الجالي وقف ومشي للزيانه بش يمشط شعره:حلوتي خودي من غير ماتقولي.
ابتسمت..بعدين خشت ع الاستديو وحطت الصور وقعدت تشوف فيهم...شويه عيونها جو ع صورة الطقم..
عقدت حواجبها وحطت عليه..
قعدت مركزه فيه  لحظات وجي بين عيونها الطقم اللي لابساته نجاه..
حست بشعور غريب..ومخيف في نفس الوقت..
شبحتله بعدين قالت؛شن هدا جالي..
التفت وهي مدتله التليفون..
ضيق عيونه وهو يشوف للصورة بعدين فتحهم وسعهم..
طوبى:قبل بتاخدهولي!؟
بسؤالها هدا عطاته راس الخيط وهو كمل:ايه بس لما وريته للبنات قالوا فوته مايطلعش عليها..
رجعت تشوف للصورة وهي تقول:شفت واحد زيه بالزبط لبساته نجاه..
توتر هلبه وفيسع رد عليها:شكلهم قالولها عليه خداته.
طوبى:صح..يمشي معاها هي اكثر مناسب لعمرها..
الجالي ابتسم بالغصب وهز راسه موافقة لكلامها..
وقفت وهي تقول:وصل..مدتله التليفون وقالت:شكرا جولي..
قبل جيبنها وقال:معاش تقوليلي شكرا..اني ع حسابك بكل ماعندي..انت اغلى من كل شي عندي..
"نحبك...
نحبك هلبه طوبى.."
وخداها لقلبه بقوة..
وطوبى اللي اول مرة تسمع منه كلمة نحبك..
فرحت صح..بس فرحتها خالطها شي من الخوف..
تباعدت وقالت بإبتسامه:هي خل ننزلوا قبل تفوتنا عصيده نسرين..
ومشت طلعت قبله..
هو حط ايديه في نصه وغمض عيونها بشده بعدين فتحهم بغضب وقال:غبي..حمار...
وجي بيمسح الصورة بس بعدين تراجع خاف لو جت بتشوفها تاني وتلقاها محذوفه يخش الشك قلبها...
تأفف بإنزعاج..بعدين مشي طلع من الجناح وسكر الباب..
☘لوطا..
خشت طوبى وهي تضحك للكوجينه..
شافت نضال داير مع الصغار فرقه..
واللي يغنوا فيه ضحكها هلبه..
انا انا فروجه الدب..انا اسمي فروجه الدب..
الصغار..
هو هوفروجه الدب...
وطوبى ميته بالضحك ع نضال..
ع خشة الجالي:خيره هدا!؟
اشر ع الجالي وقال:هو هو الدب...
الصغار كانوا يخافوا من الجالي ويتحشموا لهدا قالوا لنضال..
انت انت انت الدب..
وقعد الجالي يضحك هو مرته ونسرين توزع في القعاد ع الصفر وهي تضحك..
ع جية عمر يجري ووراه مغليه واميمه..
عمر:بوك جاك جاك برا روح..
طلع نضال يجري...
وهما يضحكوا..
ع جيه محمد شنيبه بطرف لوحه وهو يقول بغضب:وينه الضايل هدا وينه..
مغليه وهي تشوف للوحه بخوف:طلع اشبح وين مشي..
محمد شنيبه:تو يحصل..
نسرين:هيا بوي كم تفطر عصيده..
رد عليها بعصبيه:جيبوها للمربوعه...ومشي طلع من حداهم..
طلعوا ضحكاتهم اللي كانوا حابسينها..
ونضال طلع راسه من الروشن وهو يقول:مش اني عيل ومازال بكري عليا..خلاص يتحمل..
وهما يضحكوا..وامه تحرك في راسها يمين  ويسار وهي تضحك...
☘☘☘☘☘
قعمزوا النساوين في دار المعيشه بالصغار وفطروا العصيده..
وطول الوقت وخديجه تمرر في نظرها بين نجاة واميمه..
اما نسرين كانت تتجنب تشوف لطوبى..
كارهه روحهاومعتبرة نفسها مشاركه في ذنب لايغتفر..
وخوفها كبير هلبه من اللي حيصير القدام..
☘جوري:ماما نبي نغسل يدي..
نجاة سيبت العصيده وهي تقول:حاضر ماما..وناضت ومشت طلعت ببنتها وعيون خديجه معاها...
شويه وناضت اميمه..
نسرين:زيدي..
اميمه بإبتسامه:لاخلاص الحمد لله..
طوبى:هي ماعندهاش عليها كلتها ع خاطرك..
نسرين:ياريتك قلتيلي راهو درتلك حاجه تانيه..
خديجه:تنوض دير بروحها الكوجينه قدامها توا هو من العيله خلاص..
اميمه اختفت ابتسامتها بعد سمعت كلامها..
وطوبى شبحت لمغليه تراجيها تقول الكلام اللي قالاته قبل مايمسوا شي لين يسكروا شهر..
بس مغليه كانت تاكل وهي ملتزمه الصمت..
رجعت اميمه ابتسمت وهي تقول:صح عندك حق..
وناضت وهي تقول..عطيك الصحه نسرين..
نسرين وهي مبتسمه بضيق:سلمك حبيبتي.
ومشت اميمه طلعت وعيون طوبى معاها..بعدين غيرتهم لخديجه وهي مضايقه ورجعت تاكل...
☘اميمه وهي طالعه من الدار مضايقه..
توجهت للكوجينه بش بتغسل يدها فيها..
وين خشت..انصدمت باللي شافاته..
نجاه مقعمزة وبنتها في حجرها..
وعمر واقف عليها وهو رافع ولدها معاذ ويهدرز معاها..
عمر؛معاش تخليه يشد الايباد والتليفون هلبه يزيد يأزم وضع عينه..
نجاة بضيق:الحق ياعمر اني وليت مش قادره عليه..معاندي ويسكر في راسه هلبه وعصاب عصاب مانحكيلك..
عمر:ماهو ادلع هلبه...
نجاة:لا والله ماطلع هو طبعه صعب..يبي راجل فوق راسه ياعمر.
اميمه خشت وهي تغلي ومشت طول للاوندينو وعمر يتبع فيها بعيونه وهو يقول:حبي شن فطرتي!؟
نجاة:عصيده معانا..
التفتت اميمه وشبحتلها شويه بعدين شبحتله هو وقالت:فطرت..
عمر نزل معاذ لوطا وجاها وهو ويقول:ماتحبيهاش انتي..
اميمه وهي نجبد في الكلينكش من اللفافه متاعه:عادي مش مشكله..
عمر:لالا مش عادي..في مطعم هني يدير في فطور تو نكلمهم..
اميمه وهي تمسح في ايديها:عمر خلاص مافيش داعي..
عمر وهو طالع:لافي..
ومشي طلع من الكوجينه..
نجاه بإبتسامه؛يحبك هلبه..
شبحتلها اميمه وابتسمت ابتسامه صفرا وهي تقول؛ واني اكثر..ربي مايحرمنا من بعض..
نجاة:آمين..
مشت اميمه لوحت الكلينكش في الجردل اللي في دولاب تحت اللاوندينو..
بعدين مشت طلعت من الكوجينه..
نجاه برفعة حاجب وهي متعجبه:هادي خيرها!؟ بعدين قعدت تقلد فيها وهي تعجب عليها..ربي مايحرمنا من بعض..
سحيقة...
☘☘☘☘☘
الساعه 11:15صباحا
بعد الفطور..
دخلوا عمر والجالي شناطي الهدايا لنساوينهم..طوبى واميمه وهما قعدوا يوزعوا فيهم..
طوبى:ان شاء الله تعجبك عمتي..
مغليه وهي تشوف للماليه الصوف اللي خدتهالها طوبى:قنينه..
خديجه؛ذوق ونازكه..
طوبى:وهدا وشاح وعطر..
مغليه بإبتسامه:صحيتي بنتي..
اميمه؛حتى حني خدينالك عطر وكندره...
ومدتلها الهدايا .
خدتهم مغليه وهي تقول:صحيتوا بنياتي..
اميمه وطوبى:سلمك عمتي..
نسرين؛هداكا البالطو لمني؟
طوبى بضحكه؛ليك انتي..
نسرين بضحكه:زبطته ذوقي..
مدتلها  طوبى هديتها...وقالت..ابله خديجه خديتلك قفطان ان شاء الله يعجبك..
وخدت الكيسه اللي فيها القفطان ومدتها لخديجه..
خدتها وهي تقول؛ترا نشوفوا...طلعت القفطان وشافاته وهي تقول..يهبل..ذوقك في اللبس فضيع..
طوبى بإبتسامه:فرحت اللي عجبك..
خديجه بإبتسامه؛تسلمي حبيبتي..
اميمه مدتلهم هداياهم.وقالت:هادم ليكم..
خدت نسرين الكيسه وهي تقول:كندره؟
اميمه:افتحي متاعك وشوفيها..
فتحت نسرين هديتها بحماس لما شافتها قالت؛وااو بوت احلامي..
ضحكت اميمه وقالت؛تبيديه بالهني..
نسرين؛سلمك حبيبتي كلك ذوق..
خديجه بدون ماتشوفها هديتها قالت من فوق نفسها:شكرا..
اميمه ابتسمت مجامله وقالت:العفو..
طوبى شبحت لنجاة وقالت:خديتلك حاجه ان شاء الله تعجبك..
ومدتلها الكيس..
خداته نجاه وهي مبتسمه وقالت:شكرا..
خديجه؛شن هي ورينا؟
نجاه ابتسمت بالغصب وطلعت الهديه كان باكو صغير فتحاته لقاته تعليقة ششخان؛حلو هلبه شكرا..
طوبى:العفو..
ورتهم نجاه الهديه ومغليه قالت؛تبيديها بالهني..
اميمه خدت كيسه كبيره وحطتها قدامها وقالت؛من عمر..ديما يقول نجاة دارت معاي خدمة العمر..
نجاة بضحكه؛ربي يحفظه..
خديجه؛شن جابلك ترا.!؟.
ونجاه بدت طلع في الهدايا..
حقيبه بالكندره متاعها وجاكيت شتوي.
نسرين:حي شن هدا ضحكتوا علينا راهو!؟
اميمه بإبتسامه:قتلك عمر..
خديجه:يللا مش مشكله ساعداته بش تزوج اميمه..بس ان شاء الله بعدين مايدعيش عليك..
شبحوا لخديجه..
ونجاه شبحتلها وشافت لأميمه..
خديجه ضحكت وقالت:بصارة حبيبتي بصارة..
اميمه بلعتها وابتسمت وهي تقول:عارفه..
نجاة:شكرا ليك انتي وعمر وربي يهنيكم ان شاء الله..
اميمه:آمين..
طوبى مررت نظرها عليهم بعدين مشت قعمزت..
واميمه حتى هي..
نجاة شافت لطوبى وركزت ع السلسله اللي في رقبتها..
شبحتلها طوبى وقالت:عجباتك؟
تفاجئت نجاه بيها انها مركزه عليها وقالت بضحكه ارتباك:ايه حلوة هلبه..
خديجه قعدت مركزه معاهم..
ونسرين تتجنب تشوفلهم...
اما اميمه كانت تشبح لنجاه وهي مضيقه عيونها..
مغليه الوحيده اللي كانت عاديه..
ابتسمت طوبى وقالت؛كان بودي نقولك تفضليها بس مافيهاش كيف.
نجاه:ولايهمك..
مطت شواربها لداخل بعدين قالت:بنسألك ع التاكم اللي لابستيه امس..من وين خدتيه..
نجاه بلكمها السؤال قعدت تشبح لطوبى ومعاش عرفت شن ترد..
وخديجه لاحظت من ملامح وجهها ان الطقم واخده الجالي طول ردت عن نجاة وقالت؛اها اللي لابساته امس..من محل اني نعرفه دليتها عليه..
نجاة شافت لخديجه..
وطوبى شبحتلها وقالت:نبي نعرف المحل نبي ناخد حاجه شبيهه بيه لاختي فردوس عيد ميلادها قريب..
نجاه:غالي هلبه راهو..
طوبى:ناخد حاجه قريبه منه وبسعر ارخص..
خديجه قعدت تشبح لنجاة..ونجاة تشبحلها..
ونسرين تشوف لأختها..
وعيون اميمه طوبى..
وطوبى تمرر في نظرها عليهم خديجه ونجاه..
فجأة...
خشت عليهم راما وهي تقول:ماما بابا برا يبيك..
ناضت خديجه طول وهي تقول؛هيا هي..
ونجاة ناضت بعدها وهي تقول:خل نمشي نلبس الصغار..
نسرين:مروحين؟
نجاه:ايه..ومشت طلعت من الدار ورا خديجه..
وطوبى قعدت بعيونها معاهم..
غيرتهم لمغليه لما سألتها:بتتغدي في حوش بوك..
ابتسمت طوبى وهزت راسها وهي تقول:ايه..
☘☘☘☘☘
وفي مكان بعيد..
بس في العاصمه..
وسط ساحه كبيره كانت مدينة ملاهي يوما ما..
مقعمز التارقي وهو يمرر في نظره ع الاماكن..ويتفكر في اللي صار فيها من سنين وكأنه امس..
بالحركه..بالنظرة بالكلمه..
كل كلمه قالتها قاعده في عقله..
حتى نبرة الصوت مش ناسيها..
تنهد وقال:وكان يكتبلي ربي نتلاقى معاك من جديد بصدفه تكون اسمح من اللي قبلهن...
صدفه نقعدوا عمرنا كله نحكوا عنها لبعضنا..ونحكوها لعيالنا بعدين..
اااخ...غير امتي بس امتى..حط يده ع قلبه وهو يقول..في شي هنا يقولي اني حنشوفها قريب..