طوبى الجزء الاول

الرابع والعشرين

# طوبى "شارع القهوة"
#جمان_فريد
#الجزء_الرابع_والعشرين"صدمة العمر"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
في وسط الصاله..
مقعمزة مربعة رجليها وحاطه عليهم اللاب التوب..
دايره كفوفها ع بعض وحاكتهم ع فمها وملامح القلق مسيطرة ع وجهها...زي ماالقلق نفسه مسيطر ع قلبها..
حواليها بنات عمها وخوها وامه واقفين..وجدها مقعمز..
كانوا كلهم يراجو معاها في النتيجه..
☘وفي الحوش اللي في جنبهم..
بنت عمها الليئمة.
مقعمزة في دارها وهي خايفه وتراجي في اتصال صاحبتها اللي عابية عليها تشوف النتيجه...
رن تليفونها..كانت صاحبتها..طول ردت..
غرفه بخوف:هاه كم وحده..
"كلهم يابنتي كلهم والمعدل في الأرض اكيد بيعطونا انذار"
غرفه بخوف:غبارتي غبارة..
"اني بنقول صفيت وخلاص"
غرفه:ايه..حتى اني بنقول صفيت..خل نلحق نقول لسدرة بش ماتكلم حد يشوفلي النتيجه..
وسكرت منها وطول اتصلت بسدرة...
🌻فهالوقت..
طلع قدام اميمه ع الشاشه اسمها والنتيجه معاها.
فتحت عيونها ع وسعهم تشبح فيها زين..
بعدين ضحكت ودموعها عبو عيونها وهي تقول:صفيتهم كلهم..شبحتلهم..كلهم صفيتهم وبمعدل!!
صفيه وسدرة قعدوا يزغردوا..
وطوبى جت لأميمه وهي تبوس فيها قالت:مبروك حبيبتي مبروك..
اميمه وهي تضحك من الفرحه:الله يبارك فيك بيبو..
علي الواعر وهي يخط بعكوزة ع البساط قعد يقول بإبتسامه:ماشاء الله ع بنتي ماشاء الله..حتى هي اميمه الواعر..
بعدت عنها طوبى وهي حولت لاب توبها وناضت لجدها..
وباست ع راسه وقالت:لولاك بعد ربي ماوصلت هني ربي مايحرمني منك..
علي:ربي يحفظك يابنتي ربي يحفظك..
وكلهم يشبحولهم بإبتسامه..
يوسف:تعالي ياقطوسه تعالي..
ضحكت وجت لخوها وهو ضمها وباس راسها وقال:موفقه دوم ان شاء الله...
بعدت عنه وهي تشوفله قالت:آمين..حتى انت عجل بعرسك هيا نبوا نفرحوا بيك..
سدرة كيف جت بتكلم رن تليفونها لقتها غرفه..
شبحت لأميمه وقالت؛ترا بالله ميمو شوفي نتيجه غرفه اكيد متصله توا تبي تعرف..
اميمه هزت راسها وقالت:حاضر..
ومشت قعمزت ورا اللاب..
ودورت ع رابط كلية غرفه وخشت عليه وقالت:رقم قيده..
سدرة:ايه اهو مسجلاته هني..
فتحت سدرة ورقه صغيره في يدها وقعدت تسميلها فيه..
واميمه كتباته..
ومازال غرفه ترن..وسدرة ماتردش..
وهي تشوف لأميمه وطوبى معاها..
لاحظوا ان وجهه اميمه تغير..
طوبى:شني اميمه!؟
اميمه قامت عيونها وشافت لسدرة..
صفيه؛قولي يابنت بنت عمك تراجي..
سدرة اللي بدت تعصب:قولي قولي اميمه شن ماكانت قولي..
بلعت اميمه ريقها وقالت:للأسف ماصفتش ولا ماده ومعدل ضعيف هلبه..
يوسف:بتحصل انذار هادي..
طوبى بضيق وتساؤل:انذار!؟
يوسف:ايه هدا نظام كلية العلوم يعطوا زوز انذارات بعدين فصل...
صفيه وهي تحاول ترطب الجو:معليشي تعوضها ان شاء الله..
سدرة؛معاش فيها خلاص..بوي اساسا قالها كان مانفعتش تقعمز لين يجيها نصيب..
يوسف:دخلوها معهد..
سدرة:لامعهد لاعينها مش متاع قرايه هادي..
شبحت لأميمه وقالت؛مبروك حبيبتي..
ولفت ومشت وطلعت من حداهم..
وطوبى قالت:بالسلامه..وهي متوترة ولحقت اختها طول..
علي الواعر:البنت هادي طالعه لخوها..
شبحوله..
لقوه يشبح للتلفزيون وباينه في عيونه نظرة غضب واضحه...
☘هي نفسها نظرة حفيدته سدرة اللي ماشيه مندفعه للحوش بعصبيه..
وطوبى وراها تقول:بالشويه سدرة بالله عليك ماتضربيهاش..
سدرة رفعت يدها وقالت بحده:ممكن تسكتي!
سكتت طوبى وهي خايفه..
وصلوا في الباب وخشوا الزوز ورا بعض..
لقوها قدامهم..
كانت مبتسمه بإرتباك وهي شاده تليفونها في يدها..
وطوبى تشبحلها بضيق..
غرفه:صفيت سدرة توا صاحبتي كلمتني وقالتلي..
طوبى مطت شواربها لداخل بأسف ومررت نظرها ع يمينها.
اما سدرة تمالكت اعصابها وقالت:صفيتي!؟ كلهم؟
غرفه ارتبكت من نظرات سدرة واضح انها مكذبتها:لا خليت وحده والباقي صفيتهم..
سدرة قعدت تشبحلها وهي تقرض بسنونها في فمها من داخل..
دامت النظر ليها...
زادت خافت وشبحت لطوبى..لقتها تشوفلها بنظرات اسف..
رجعت شافت لسدرة وقالت:خيركم!؟ اميمه سقطت!!؟
سدرة؛اميمه! ياريتك جيتي في ربعها اميمه..صفت موادها كلهم بمعدل ورفعت راس ماليها....اني بس نبي نعرف انتي شن ناقصك عنها بس..ربي عطاك بو دللك دلال ماصار عمره مانقص عليك حاجه..عايشه في وسط عيلة اللي يضرب فيهم التاني يضم ويطبطب..اللي تبيه واللي خاطرك فيه تاخديه ويجيك لعندك..عكس اميمه اللي عاشت محرومه وياما شافت في حياتها من صغرها ومع هذا ديما متفوقه ديما قايمه راس بوها اللي عمره ماحن عليها..علاش انتي هكي وهي هكي..الغلط من من مني قوليلي...منا حني ماعرفناش نربوك..ولا انتي هكي ربي خالقك نبي نعرف بس..
غرفه وعيونها مليانات دموع:علاش الكلام هدا كله شنهو اللي درته بش تقولي هكي..ع خاطر ماصفيتش موادي..ايه اني هكي مانبيش نصفي مانبيش نسمع كلاكم عناد فيكم كلكم اللي تقارنوا بيني وبين هديكا الهبله لين خليتوني نكرهها..وغير عن هكي معاملتكم الفرق اللي ديروا فيه بيني وبين اهيا..واشرت ع طوبى..
طوبى انصدمت..
غرفه ودموعها ينزلوا:تقول هي بس اللي امها ماتت وخلتها قعدتوا تعاملوا فيها تقول مافيش غيرها فالحوش واني ديما ع رف نكرة ماليش وجود...الناس كلها كويسه الا غرفه عندك انتي بالذات ياسدرة لين خليتيني نكره روحي..ماتلومونيش انتي وبوي ع اي تصرف يطلع مني انتم اللي خليتوني هكي..
رفعت سدرة حاجبها وقالت؛كملتي..مسرحية المظلوميه متاعك كملت خلاص!؟ اطلعي منه الجو هدا ياغرفه اني اللي نعرفك كويس انتي تحبي نفسك بس..همك راحتك بس..وماتبيش حد احسن منك..لااميمه ولاغيرها..واختك مسكينه اللي قلتي دايرة الفرق بينك وبينها..نسألك بالله في مرة قلتيلي بنمشي نلعب عند بنات الجيران وقتلك لا..
طوبى ديما نقوللها لا يايجوك هني لا..
كم مرة رفعك بوي لصاحباتك وين مايكونوا ولا مرة منعتك ولاهو منعك..
لكن طوبى حتى للمدرسه مع صحباتها ممنوع تمشي..
وانتي في عمر طوبى كنت تاخدي معاك في فلوس مرات خمسة جني بحالها وين تمشي المدرسه..
طوبى ممنوع عليها ترفع قرش الا اذا طلبت منها المدرسه وفطورها كله من الحوش يجي خاطرها في الشيبش والشكولاته واني نقول لا...
وانتي زطتي فيهم وانتي اصغر منها لتوا..
انتي كل ماترفعكم المدرسه رحله نقوللك بري ونعطوا فيك فلوس..
نسيتي طوبى شن دارت ع خاطر رحلة بتمشيلها وهي صف رابع..ع قد ماترجتني قلت لا..وقلت ممنوع تطلع رحله مع المدرسه ممنوع تمشي لمكان اني مش معاها فيه اخطى المدرسه..
مقيده بالقيود هادي كلها ومحرومه من الف حاجه مع هذا ولا مرة جتني وقالت علاش تعاملوا في غرفه خير مني..
وكانك ع اليتم..نزلوا دموع سدرة وهي تقول..انتي حافظه شكل امي وصوتها..يمي دويتي معاها وهي دوت معاك ياما مشطتلك شعرك وساوتلك حوايجك وسقداتك للمدرسه وعاناتك وانتي مريضه..ودلعاتك وغنتلك..تتفكري..غرفه غرفيتي..بنيتي وصغيرتي..دلولتي وونيستي غرفه ياغريفتي..
لكن طوبى شن عاشت من هدا كله قولي..
سدرة تتكلم وناسيه وجود طوبى اللي كان كلام سدرة موجع لقلبها الصغير هلبه..بالذات وين تكلمت عن امها..
مااستاقظتش الا لما طوبى انهارت بالبكي..
التفتت عليها وقالت بفجعه:حي عليا والله نسيتك..
وجتها وضمتها وطوبى تبكي في حضنها بالعبرة وهي تشد فيها بقوة..وهي تقول بنبرة فيها احتياج وألم الدنيا كلها..
"ماما...ماما"
حتى قلب غرفه القاسي تصدع لما سمعت نبرتها..
لفت وهربت طول للدار وسكرت عليها وقعدت تبكي..
وسدرة تحضن فيها بقوة وهي بنبرة باكيه؛سامحيني ياعمري سامحيني..
وماهدت طوبى الا بعد وين..
ورقدت من الحزن ع رجل اختها في الصاله...
ناضت من حداها سدرة بهدوء وحطتلها تحت راسها مخده..
ومشت قعمزت في الجنان بش تبكي براحتها..
🌻🌻🌻🌻🌻🌻
"غلطة تانيه يامحي صدقيني نخفيك من ع وجه الارض مش تقول هادي تدوي وخلاص"
محي الدين؛صلي ع النبي خلاص..قلنالك نزوة وعدت ع حالها..
هزت راسها ورفعت تليفونها اتصلت بالمهدي ومشت لدار النوم...
ومحي في نفسه يقول..
"لو كان حاجتك عند الكلب قوله ياسيدي"
~~~~~~
المهدي:مرة تانيه اني نتصرف ياخديجه..
"لالاخلاص توا انقرص قرصه باهيه"
المهدي:ان شاء الله يتعلم..
"ماتخممش عليا وخيي..ربي مايحرمني منك"
المهدي؛ماتبي شي تاني؟
"سلامتك بس ياغالي بالسلامه"
المهدي:وعليكم السلام..وسكر..
ورجع ركز مع اللاب اللي كان فاتح فيه الفيس ويقرا في الاخبار الاقتصاديه اللي تخص البلاد..
ع جية عائشه:مهدي نوض الغدي واتي..
تنهد وحط اللاب توب ع تركينه وناض..
هي مشت..وهو مشي وراها...
وصلوا في الكوجينه..
لقي ولاده مقعمزين يراجو فيهم..
قعمزوا الزوز والمهدي قال:بنت بوها راقده..
عائشه:ايه غديتها وعطيتها مرضعه رضعتها ورقدت..
المهدي هز راسه وقال:بسم الله..
وبدي ياكل وعائشه والصغار سموا وبدوا ياكلوا..
المهدي وهو ياكل؛شن حال فايزة وبناتها؟
عائشه:الحمد لله كويسين بعد قعدوا في الحوش هدا نفسياتهم تحسنت..
سكت المهدي وهو يفكر في كون الحوش اللي قاعده فيه فايزة لسلطانة قلبه وهي عطاته لصاحبتها..
تنهد وقال:في بالي حاجه..
عائشه:شني..
المهدي:لو بعدين العشيه نطلعوا للفروسيه ونرفعوا معانا البنات ..
عائشه ابتسمت وقالت؛ياريت..
المهدي:خلاص اتصلي بيها بعدين وشوفيها وقوليلي..
عائشه:إن شاء الله...
☘وماصدقت عائشه كملت غداها واتصلت بفايزة وقالتلها
وفايزة بعد محاولات اقناع وافقت...
بعد العصر كانوا المهدي وعيلته واتيين..
وطلعوا كلهم حتى من سدرة المهدي معاهم في كرسوتها..
مشت عائشه لحوش فايزة بش تاخد البنات..
وولادها ركبوا السيارة..وهو حط الكروسه في الكوفني وسدرة في حضنه..
وقف بعدين ع السيارة وهو يلاعب في بنته ويراجي في مرته وبنات فايزة..
فهالوقت طلعوا سدرة وطوبى من الحوش بيمشوا لحوش فايزة..
طوبى جو عيونها ع بنتها المهدي..
كانت حلوة جدا...شقرا والشمس عاكسه عليها مخليتها تبرق..
دبدوبه لابسه فستان احمر صيفي..وعندها شعيرات حلوات مزينتهم بكارونه يستيك فيها وردة كبيرة..
نطف قلب طوبى عليها وقالت لسدرة:بالله عليك سدرة خليني نمشي نشوف بنت المهدي شويه..
سدرة ماكانتش شايفتهم لين طوبى كلمتهم..
شبحت جيهتهم شافت البنيه تضحك..
سدرة بضحكه:ياعمري محلاها...بري بري لكن ماتعطليش..
طوبى بفرح:حاضر..
مشت سدرة كملت طريقها..
وطوبى قصت الطريق وجتهم..
طوبى بإبتسامه:عمو مهدي شن حالك..وعيونها ع البنيه.
المهدي:اهلا..اهلا..
طوبى:ياحلاتي الله يبارك عليها..بالله شويه نشدها..
ابتسم ونزلها لطوبى..
خدتها وهي تقول:بسم الله..ياروحي ياروحي..الله يبارك الله يبارك..عسل ياربي..
المهدي:حتى انتي كنتي هكي..
طوبى بضحكه:مستحيل نكون بحلاوتها..هادي سدرة مازيها حد..
في لحظه حست روحها عكت..حاولت تحافظ ع ابتسامتها سرقتله نظرة لقت ابتسامته خفتت وزي اللي سرح.
طوبى وهي تحاول تخفي ارتباكها:محلاك محلاك...ايه ايه..كغااا..
ع جية سيارة الجالي...
درس قدام الحوش ونزل...
كان لبس ع كتفه شنطته اللاب توب متاعه وجاهم وهو يقول:شن جو..
محمد:اوو عمي..وينك امس ولا خفت وغمزله..
الجالي حط يده ع وجهه وقال:خفت عينك يامعفن..
ومحمد يضحك..
طوبى:لا الباين خفت حق يالجالي وين تقدر ع حمودي انت..
الجالي حط ايديه في جيوب سرواله وقال بإبتسامه:باهي ع شن نحكوا حني..
المهدي:حصلت..
طوبى:اللي هو المهم ماتقدرش تغلب حمودي في شي..
محمد:صقع عليك نصي هادي تعرفني كويس..
قعدوا يضحكوا..
الجالي بضحكه:لسان ولدك هدا لسان واحد في عمري..
المهدي:حتى هو ولد المهدي..
الجالي:اياااح..
طوبى:غلبناك خلاص برا خش للحوش..
الجالي حول نظاراته وقال:حي عليك يا طوبى حي من محرضك عليا!!؟
قعدت تضحك..
المهدي بإبتسامه:رقدت سدرة..
شبحت طوبى لسدره المهدي لقتها راقده في حضنها.
الجالي:استاحشتها هلبه وانتم شكلكم طالعين ومش مروحين الا فالليل..
المهدي:ايه وليا ساعه نراجي في عايشه تجي مع بنات بنت الخويلدي..
طوبى:بيمشوا معاكم؟
المهدي:ايه يغيروا جو شويه..
الجالي:احسن مادرت..
ع جية عائشه بصفاء ومروة..
قعدوا يشبحولها كيف قصت الطريق بيهم لين جوهم..
عائشه:كيف الحال طوبى..
طوبى:الحمد لله..
عائشه:اختك تراجي فيك..
طوبى:باهي خودي..جتها عائشه وخدت منها بنتها..وهب قالت..هي بالسلامه..ومشت..
كلهم باصوات متقطعه:سلام..بالسلامه..
مشت عائشه ركبت وهي تقول:كيف حالك يالجالي..
الجالي:الحمد لله..شن امورك انتي..
عائشه سكرت الباب وهي تقول: الحمد لله..
ركبوا البنات للسيارة.
طبس عليهم ع الروشن الجالي وقال:صفاء مروة شن جو.
الزوز قالوا:الحمد لله..
ركب المهدي وقال:هي نشوفك بعدين...
وخر الجالي وقال:سلام..
وتحرك المهدي..
والجالي لف وخش للحوش..
وين وصل في الباب الدخلاني حول كندرته وخش وهو يغني..
دايما دموع..دموع..دموع...
"اعوذ بالله من الشيطان من الرجيم"
الجالي بضحكه:خيرك!
مغليه:شن خيرك هدا الصبح ع صبح ربي الفتاح..
الايام الحلوة مابترجعش تاني..وانت توا ديما دموع غنوا باهي ولااسكتوا..
الجالي بدي يصفق وهو يغني:اميمه ياوداده اميمه ياودادة اميمه ياودادة ياضي الحوش وميعاده..
مغليه بضحكه:هدا الغني..
سمعوا باب الحوش انفتح وتسكر..
بعدين سمعوا صوت نضال يعني..
طعم الحب تغير..وقت الفرح قصير...
مغليه:اعوذ بالله منكم اعوذ بالله...
والجالي يضحك..
ع خشة نضال:اوووو سلمان خان..اوو ام سلمان خان..
مغليه:اسمع الغني المعفن معاش تغنيه معاش تغمولي ع قلبي.
نضال بضحكه:حاضر...
سمعوا باب الحوش انفتح وتسكر..
وماسمعوا شي تاني لين خش عليهم عمر وهو يغني. ..
صابر ع اللي بيجرالي..وإنتي لاليكي عزيز ولاغالي..
وفات من جنبهم وركب الدروج ولاكأنهم موجودين..
وهما معاه بعيونهم لين ادرق..
نضال تنهد وقال:ربك يفرج..شبحلهم وقال..المهم صفيت موادي كلهم وبمعدل..
الجالي:عطيني رقم قيدك نتأكد بروحي...
نضال:عرفتك بتقولها..جي جنبه وفي يده تليفونه..
فتح النت وخش ع الرابط بعدين كتب رقم قيده..
طلع اسمه ومواده والدرجات..
الجالى وهو مندهش:ماشاء الله!
نضال بغرور:قلتلكم اني دماغي ماعند حد...
مغليه بإبتسامه:الله يبارك على وليدي..
نضال :بحبك كتير..
ومشي للدروج ركب وهويغني:ناجحين وفرحانين..
ضحكوا امه خوه..بعدين شبحت مغليه للجالي وقالت..
مغليه:خالتك كلمتني قالت الجالي تغدا عندي..
الجالي:ايه كنت في جيهتهم مشيتيلها..
مغليه:والله مانحكيلك قداش فرحت بجيتك..عارفها تعزك هلبه..
الجالي بإبتسامه:ربي يحفظها..
مغليه:اركب بدل وانزل احكيلي عنها وشن هدرزتوا...
الجالي بضحكه:حاضر..
ومشي ركب..
وهي مشت لدار المعيشه...
🌻🌻🌻🌻🌻🌻
"هاه شن رايك يام"
صفيه:والله كان بنيه كويسه مايهمنيش هي من وين المهم متفاهمين.
اميمه بإبتسامه:مش قتلك..
يوسف بإبتسامه؛باهي تتوقعي بوي يعارض؟
صفية:ولابوك ولاجدك...مايدوروش في الحاجات هادي..
يوسف:يعني نخش عليهم بقلب قوي..
صفيه بإبتسامه:برا..
ناض يوسف ومشي للمربوعه..
صفيه شبحت لأميمه وقالت:تعرفيها انتي..
اميمه:ايه كلمتها كذا مرة لطيفه وكويسه هكي حسيت..
صفيه:ان شاء الله تطلع بنت حلال تخاف ربي..
اميمه:يارب..
بعد لحظات....
سمعوا صوت زكرة جاي من برا..وكأنه قدام حوشهم..
صفيه:هدا شني!؟
اميمه وهي تسمع بإستغراب:كأنه قدام حوشنا..
شويه وسمعوا صوت زغاريد يعرفوهم كويس..
صفيه واميمه:مطيرة..عمتي!.
"اطلعي يادكتورة عيت الواعر اطلعي.."
ناضت اميمه وهي تضحك..مشت تجري لدارها لبست مصليه
وامه لبست محرمه وربطتها ربط وطلعوا الزوز يجروا..
لقوا مطيره واقفه في الجنان ترقص بروحها..
والزكرة تخبط برا...
مشت اميمه تضحك لعمتها وهي تقول:شن هدا عمتي قاعده في اول الطريق راهو ماوليتش دكتورة..
مطيرة :واني في كل عام تنجح فيه بنديرلك هكي لين تولي دكتورة..وضمتها وقعدت تبوس فيها بالخد..
واميمه تضحك وهي تحضن فيها..
شويه وخشوا سدرة وطوبى للحوش..
سدرة:من جايبها عمتي انتي ولاحسين؟
صفيه:حسين برا؟!
مطيرة:ايه كلمته جاني وقتله ع فرقة الزكرة وهو تفاهملي معاهم..
صفيه؛يطول في عمرك يامطيره ربي يفرح قلبك..
"ااااه ااااه ااااه اااه واااه ياويلا"
وقعدت ترقص مطيره وهي تسمع في غني الشباب برا..
وهما يضحكوا ويصفقولها..
..برا...
الشارع منقلب..
حتى اياد وولده مهند واقفين من بعيد يتفرجوا..
ومن بعيد عمر واقف في الروشن يتفرج وعقله ماجابلاش خير..
ونضال زادها...
نضال:ماسمعتش بيوسف خطب وحسين قال اني مازال مادورنيش.
ومستحيل يكون جدي علي فكر يديرها بعد هالعمر..
مافيش غير اميمه انخطبت..ومش بعيد انقرت فاتحتها..
عمر التفت وقعد يشبحله بحده وهو يغلي من داخل..
نضال:مافيش غير هالتفسير ..
عمر طول مشي طلع من الدار..
ونضال قاعد واقف يتفرج وهو يضحك ع خوه...
طلع عمر من الحوش..
لقى الجالي برا يتفرج..
عمر:شن في..
الجالي:شكلها اميمه انقرت فاتحتها!؟
عمر خلاص قريب انجن مشي بيطلع شده الجالي وهو يقول بضحكه؛نبصر عليك..طلعت نتيجتها وقالوا وصفت موادها كلهم بإمتياز..
غمض عمر عيونه براحه وقلبه هدي شويه..
والجالي يضحك...
فتح عيونه وشبحله ع جنب وحرك راسه يمين ويسار..
بعدين قعد يتفرج ع جو الزكرة..
ابتسم وهو يتخيل في اميمه كيف فرحانه توا..
حس بالفرحه غمراته في هديكا اللحظه لفرحته..
واخته خديجه تشبح فيه من روشن حوشها وواجعها حاله..
اما حمواتها كانوا يتفرجوا من روشن دارهم وهما يقولوا..
عواطف:باهي اللي جت فنجاح هالمرة مش عرس..
ضحكت نجاح وقالت:ايه..
عواطف:لما يصير منا اني ومراد..يارب يارب يارب..حنجيب نوبه تقعد تخبط تلاته ساعات ورا بعض.
نجاح؛يهون عليك انتي!
عواطف:لايهون ياحنه صرفت فلوسي في حاجة تستاهل...
سكتوا شويه بعدين قالت نجاح..
نجاح:لكن عيت الواعر ولوا شادين توكة المناسبات في الشارع..
عواطف:نهار فاتحه..نهار بيان..نهار نجاح...
"الله وحد صمد ربي ماكيفه حد"
رفع الزوز حواجبهم وشبحوا لبعض...
🌻وعاشت اميمه معنى الفرحه يومها..
لكن بنت عمها عاشت النكد ع اصوله حابسه روحها في الدار تسحن وتحرق من الحسد..وفي نفس الوقت خايفه من بوها..
🌻🌻🌻🌻🌻🌻
"طوبى بالله بري جيبي حرارات البصله من الحوش"
طوبى:حاضر..
ومشت طول طوبى بتطلع من الباب الفاصل..
شافت حسين عاطي بالظهر ويشوف لتليفون..
سرعت خطواتها وكانت تبي تهرب بس هو حس بيها والتفت شافها..
ملهوف قال؛طوبى..طوبى.
وقفت مجبوره وهي تشوفله بضيق..
هو جاها وقف قدامها وحط ايديه في جيوب سروال الصاعقه وقال؛مازال زعلانه..
طوبى:لا..
ابتسم وقال:يعني سامحتيني؟
طوبى:لا..
عقد حواجبه بإستغراب وقال:كيف!؟
طوبى:يعني نسيت اللي درته معاش مزعلني لكن مش مسامحه عليه ياحسين.
حسين؛باهي انتي تعرفي اني قداش نخاف عليك ولا...
طوبى:لو حق تخاف عليا مفروض حميتني منك انت اول واحد..
صدمه كلامه تفاجئ فيه ديما بردوده تدهشه..تخليه مش مستوعب ان هالردود تطلع من بنت صغيرة..
خلاته غارق في لحظه انداهشه..
ومشت خشت لحوشهم وسكرت الباب..
من داخلها طوبى ضايقت من تعاملها مع حسين ماتعودتش تكون قاسيه مع حد بس لأنه حسين بمثابة الاخ الكبير عندها حست انه خذلها بتصرفه ومعاش قدرت تشوفه زي ماكانت تشوف فيه زمان...
☘☘☘☘☘☘☘
🌻وطيبوا الكسكسي والبازين..
وكل من شي كان من حوش لطفي ومن مطيرة ومن حسين اللي جاب زوز سقايط..
فرقوا ع الجيران صونيه صونيه..
ولحوش شنييه زوز صواني وحده بازين ووحده كسكسي لأن محمد والمهدي يفضلوا البازين..
في المربوعه..
محمد وهو يمرس:هذا اللي ينقال عليه بازين صح..
وكلي من قرن الفلفل بعدين حط في همه لقمه بازين بالبطاطا..
والمهدي ياكل وهو يصارع في قلبه اللي يقول سدره دايرة حاجه فيه..
وفعلا هي اللي عجنت العجينه وطيبتها وكركبتها في الصواني..
وفي الكوجينه..
الجالي وعمر تقول عمرهم ماكلوا كسكسي قريب..
مغليه:خيركم اللطف عايشين في مجاعه..
الجالي وهو ياكل؛سحر عند حوش الواعر في تطييب مافهمتاش كيف..
وعمر ياكل وخلاص..
تخلطت عليه..
كسكسي دايرينه نساوين الواعر اللي مافيش زي طعامهم..
والسبب فرحة نجاح حبيبة القلب...
مغليه سهفوها..خديت كاشيك وقعدت تاكل معاهم..
ونضال جاهم وقف في الباب وقال بنرفزة:كان نعرف علاش ماداروش رز مايعرفوش اني ماناكلش في غيره!؟
☘☘☘☘☘
مهند:الله يابوي الله...شن هدا؟!
اياد بضحكه:اما احلى شيخ المحشي ولاالكسكسي..
مهند:تي شن جاب لجاب..
ضحك اياد ورجع ياكل...
☘وغرفه حتى هي حسبوها في صونيه..
توقعت سدرة وين تروح تلقاها في مكانها..
انصدمت وين لقتها ممسوحه مسح..
مشتلها للدار..خشت عليها وقالت؛كلتيه ولالوحتيه..
سكتت وين شافتها حاطه السماعات في ودانها وترقص وتشرب في مشروب..
قعدت واقفه متنحه وخلاص..
لين شافتها غرفه صدفه...جمدت في مكانها وحولت السماعات..
سدرة وهي تحاول تستوعب:كليتي اللي في الصونيه ولالوحتيه..
غرفه؛علاش نلوح فيه نعمه ربي لما شميت ريحته عرفتك انتي مطيبتيه ماقدرتش نقاومه..
تنهدت سدرة وقالت:اسمعي جاي اني بنعطيك فرصة تانيه ومش حنقول لبوي ع نتيجتك وتفاهمت اني وجدي مايقولش لبوي تمام...وقال كان عوضتها السمستر الجاي ناخدلها سيارة زي اميمه..
غرفه بفرحه:جديات!
سدرة:تعرفي جدك انتي كلمته كلمه..
جتها تجري باستها وقالت؛تعرفي انتي احلى اخت في الدنيا..
سدرة؛ماهو بكري شويه كنت ظالمه وماننفعش..
غرفه بضحكه:خلاص سوسو انسي وخلي قلبك كبير..
هزت سدرة راسها ومشت طلعت من الدار..
وغرفه رجعت حطت السماعات وكملت رقيص وحكة المشروب في يدها..
خشت عليها طوبى وهي جايه من الحمام تفاجئت وين شافت حالتها..
مطت شواربها للأسفل بتعجب..
ومشت وقفت قدام المرايه وحولت المنشف عن شعرها وقعدت تنشف فيه..
🌻🌻🌻🌻🌻
"حطيتلك الموزة"
الشامس وهو يشبح لقصعة الكسكسي قال؛عارفتيني بناكل هدا كله؟!
مطيرة بضحكه:بناكل معاك ماكليتش غادي..
فتحت حكه عصير وحطتها جنبه وقالت؛-وهدا عصيرك..
وفتحت لروحها حكه وقالت:وهدا مشروبي..
وقعمزت قدامه وقالت؛هي سمي ابدا..
الشامس سمى بالله وبدي ياكل ويسمع فيه بحب وهي تحكيله عن اجواء الزكرة...
🍀🍀🍀🍀🍀
•••بعد مرور عدة ايام••••
نجاح وهي تتكلم بالتليفون؛بارك الله فيكم..ان شاء الله مانفقدك يارب...بالسلامه..بالسلامه...
سكرت ومشت للدار خشت ع عواطف لقتها تكلم في مراد..
سكرت الباب وقعدت تأشرلها..
نزلت التليفون وقالت بهمس:خيرك؟
نجاح؛قوليله يقول لولد خالته موضوعك تم وامورك مشت..قوليله يمشي ل******** ويقول اني جاي من طرف **** وبس..وحيسلموه شغله..
ابتسمت بفرح وقالت:هي شويه بس..
وردت عواطف ع مراد وبلغاته..
وهو سكر من عواطف وطول واتصل بولد خالته..
مراد:ايوه يانمس..
"شن جو مراد"
مراد:الجو كله عندك في تقعميزة وحده لخبطت البنت وخليتها تلقالك خدمه في احسن مكان..
"كيف كيف عاود عاود"
مراد:توا كنت نكلم في عواطف قالتلي قوله اموره مشت وموضوعه تم..وقوله يمشي ل****** ويقول اني جاي من طرف**** وتو يسلموه شغله...
رد وهو مندهش..
"بارك الله فيها"
مراد؛هي ياسيدي بحبح ومبارك عليك..
"الله يبارك فيك..تصبح ع خير"
مراد:تصبح ع خير..وسكر...
بعدين قال بنبرة حسد واضحه..من يومه حظه يفلق الصخر..مش اني اللي قعدت نجري ليا شهورفي جرة هالعزوز الشارفه وماحصلت شي..
🍀🍀🍀🍀🍀🍀🍀🍀🍀🍀🍀🍀🍀🍀🍀🍀🍀
وقعد يجري مراد ثلاته شهور تانيات..
لين قبلت عواطف بالخطوبه وقراية الفاتحه..
فتحت الموضوع مع اهلها امها عارضت وتعاركت هي وياها..
لكن بوها وخوها مابوش يوقفوا في وجهها وقبلوا بالموضوع كله..
وبعت مراد امه وخواته اللي كانوا متحمسين اكثر منه اهو حصلوا كنه تخدم وتصرف..
وبعد النساوين جو الرجاله وفضوا في عواطف..
وتحدد موعد قراية الفاتحه بداية شهر التمور...شهر عشرة..
☘خلال هالفترة خلاص..
رمت فايزة عدتها..وكانت مخططه وقت العده بدير هلبه حاجات بعد ترميها..
واولهم انها تولي لعملها..
وفي أول يوم...
رفعت بناتها الكبار الزوز للمدرسه...
وخلت تاله عند صفيه يإعتبار ان الكل لاهيين اللي في مدارسهم واللي في جامعاتهم..
ومشت للخدمه...
اول ماوصلت غادي عزوها زملائها..
بعدين مشت طول لمكتب المدير..
كان المدير يعز احمد هلبه لهدا راعى فايزة وحافظ ع مكانها لين ولتله من جديد..
ارتاحت هلبه بعد ولت لشغلها..
وبدت تخدم بإجتهاد اكثر من قبل..
مشت الايام الاولى تمام ...
...لعند مافي يوم.....
طلعت من مكتبها ومشت تشوف واحد جايها وطالبها بالإسم وماباش يقول اسمه..
وين وصلت قربت توصل فيه انصدمت لما لقاته...
فايزة:خوي حامد!؟
ابتسم وقال:كيف حالك فايزة؟
فايزة بإستغراب؛الحمد لله..خير ان شاء الله علاش جاي نسرين فيها حاجه!؟
حامد:لالا الموضوع مالاش علاقة بنسرين الموضوع يخصك انتي..
فايزة:يخصني اني!؟
حامد:ايه بخصوص حصتك من ورث بوك..
فايزة:ايه قاعده مافهمتش.
حامد:تمام نفهمك..اني عندي صديق محامي داهيه يقدر يجيبلك حقك من عيونهم..
فايزة وهي مش مرتاحه لنظراته؛اسفه بس اني ماعنديش شن ندفعله حتى نصيبي ونصيب بنياتي من ورث بوهم مازال جاناش..
حامد؛والله نجيبه حتى هو ولانخليك انتي وبناتك هكي..
فايزة:لاشكرا ماتعبش روحك وبارك الله فيك اللي فكرت فينا..
ولفت بتمشي هربا منه..
هو شدها من ذراعها..
والحركه هادي شافتها موظفه تخدم معاها وقعدت واقفه من بعيد تراقب فيهم..
هي خافت وجبدت يدها بقوة وقعدت تشبحله بحده..
حامد: اهدي اهدي..خيرك خفتي..ماتخافيش مني فايزة اني عندي مصلحتك اهم من كل شي..
بغضب وبحده قالت:خليني في حالي حتخدمني خدمة العمر...
ومشت طول وهي تمشي بسرعه خايفه..خايفه ليكون حد شافها..
قعدت تمشي وتشبح حواليها...
هي توا معاش زي قبل...العيون عليها وكل حركة محسوبه عليها....
وفوق هكي اللي مش ناويلها ع خير وقاعد يتحرش بيها راجل صاحبتها..
يعني كيف بيصير..بتخسر حتى نسرين!؟
وبعدين ردة فعل نسرين مش مضمونه..مرات تنقلب عليها وتشوه سمعتها..وارد جدا..لان المراة في الحالة هادي لاتعرف صاحبتها ولااختها..
واللي صار بين عائشه وسدرة مش بعيد بش تنساه..
☘☘☘☘☘
فهداكا اليوم..
كانت نسرين توتي في روحها بش تحضر حفلة خوها طاهر..
طاهر ونجاه تحدد موعد عرسهم بعد العيد الصغير ..
وكان يوم عند طاهر...اللي هو دخول..
اما نجاة داراته كامل..وفي يوم الكسوة رفعوها لكن مادارو شي في الحوش..
وهدا كله بطلب من طاهر واصرار منه ماباش يكلف بوه اكثر ماكلفه....
الصاله متاع الحفله كانت مشتركه بين العيلتين لذلك حجزوا في اكبر قاعه في طرابلس..
الحفله جت مرتبه وحلوة..
ونجاة كانت طالعه قمة في الجمال..
خش طاهر للصاله ودار هو وياه جو..حتى انهم رقصوا مع بعض..
وامه مصدومه فيه ربت ولدها ع العادات كويس كيف يدير هكي!!؟
وهني تأكدت اكثر ان نظرتها في نجاة كانت في محلها...
☘بعد ماتمت الحفله..
مشوا نجاة وطاهر لفندق كبير بيقعد فيه ليله واليوم اللي بعده بيسافروا لتركيا...
☘☘☘☘☘☘
وفي يوم تاني....
"حق حق!؟"
خديجه؛ايه ياحنه وبنخطبوهاله بعد يتخرج ان شاء الله.
جارتهم:ماشاء الله..
نجمه:عيلة معروفه وناس واصلين هادو وين طاح فيها عمر..
خديجه بضحكه:وشن بيعرفني اني ياعمتي..
جارتهم؛نحساب قبل يبي اميمه بنت الواعر..
خديجه:لايبيها لاحاير فيها امي هي اللي كانت تبيها عجبتها كيف عاقله وهكي..بس هو سكر راسه وقال مش واخدها امي سكرت الموضوع بكل..
جارتهم:الحق حتى اني استغربت قلت جابهم ليكم..
خديجه:نبي الموضوع يقعد بينا لين يتم العيون عليا..
نجمه في نفسها.."تخفي من العين تحكي لجازيه اللي تمشي ولسانها يمشي!؟ الاا هادي في وراها ان"
جارتهم:سرك في بير..
خديجه ابتسمت وقعدت تشبحلها وهي نقول في نفسها..
"مادابيك توصليها ببهارات"
~~~~~~~~~
:هدا اللي قالاته خديجه..قالت هما فرحوا بينا لما جيناهم وماصدقوا..وقالت خوها هو اللي عفس في الموضوع مايبيش..
صفيه:لاحول ولاقوة الا بالله تو الواحد شن بيقول غير حسبي الله ونعم الوكيل..
الجارة؛تو حقي انتي اللي ردتيهم ياأميمه..
اميمه ناضت وهي تقول؛ضيعتيلي وقت ع موضوع تافه..
ومشت بسرعه لدارها..
صفيه:ماتواخديهاش بس اللي سمعاته قهرها وهو كله كذب مافيش منه حاجه..
الجارة في نفسها متهمكه "واضح مافيش منه حاجه صح وبنتها تدوي وخانقتها العبرة!"
☘وفعلا اميمه لما خشت الدار قعدت تبكي...
بس بعد لحظات هدت روحها وقعدت تمسح في دموعها وتقول لنفسها..
"عارفتيه انتي عارفتيه من الاول علاش انصدمتي علاش تبكي توا قولي الحمد لله اللي بعده عنك"
خدت نفس عميق..بعدين مشت للاب توبها..قعمزت وحطاته ع رجليها وفتحتها وهي ترشف وتمسح في دموعها وتحرك في شعرها..
بعدين طول انشغلت بقرايتها عليه.
☘زي ماعمر قاعد مشغول بقرايته وتدريباته ع قيادة الطائرة...
عمر كان مجتهد جدا واصبح ملفت للآنتباه من قبل الاساتذه..
هدف اللي حاطه في باله انها يطلع برا ويكمل في وحده من دول العالم اللي فيها مجال الطيران ناجح جدا...
هدا كله ع خاطرها..ع خاطر اميمه بش يكبر فيها ويخليها تصدق ان يحبها صادق من قلبه..
☘☘☘☘☘☘
في الطريق ..
وهي مع خوها في السيارة..
كانت تتكلم في التليفون..او تسمع في اللي يكلم فيها..
"ناديه اهو قاعد نحدر فيك تندمي اشد الندم ياناديه ماضيعيش روحك"
ناديه؛قتلك حاضر من حني فالحوش خلاص عاد شامس..
"قعد اعذر من انذر"
وسكر عليها..
نزلت التليفون وقالت:في حاجه صايرة الراجل زي اللي خايف..
ميلود؛قالي المراة شادة فيه ليها شهور وهو يماطل..شكله خاف تشك ان في شي..
ناديه:حتى اني حاسه هكي..
ميلود:ناديه اعقلي تعرفي لو درتي حاجه غلط حسابك عندي اني مش عند الشامس وانتي تعرفيني اني مش طيب زيه..
ناديه قعدت ساكته وقلبها مليان كره لخوها اللي جبرها تاخد الشامس بسبب الشغل اللي خاش فيه معاه وتوا خايف لو يخسره يخسر كل شي..
☘فهالوقت كانت مطيرة تبخر في الحوش استعدادا لإستقبالهم..
والشامس مقعمز في المربوعه ع اعصابه..
قلبه حاسه ان في شي حيصير مش مرتاح بكل..
شويه واتصل بيه ميلود..
ناض وطلع بش يستقبلهم...
وهما خاشين رجع هدد ناديه من جديد وخوها معاه...
وناديه تقول باهي وحاضر من الخوف..
•••مطيرة:مرحبتين مرحبتين..
ناديه وهي تسلم عليها بالخد:رحب بيك يامطيرة شن اخبارك..
مطيرة:ماشيه الحمد لله..انتي شن حالط..
ناديه:تمام الحمد لله..
بعدوا عن بعض ومطيرة تقول:تفضلي تفضلي..
خشوا الزوز..
مطيرة؛والله ليك وحشه يانديوة..
ناديه:ليك اكثر مطيرة..
مطيره:هذا علاش تتصلي ودوري!
ناديه بضحكه:والله ظروف امي تعبانه شويه..
مطيرة:تفضلي خشي تفضلي..
ناديه خشت للصالون وهي تقول:يزيد فضلك..
قعمزوا الزوز ومطيرة قالت...
مطيرة:ايه قالي الشامس عن امك شن حالها توا.
ناديه؛اهو باهيه خير من قبل..
مطيرة؛ربي يتمم عليها الشفي..
ناديه:آمين..
ناضت مطيرة وقالت؛شويه وجايه..
ناديه:ديما متعبه روحك..
مطيرة وهي ماشيه:لاتعب لاسو..
بعد مشت ناديه قعدت تهز في رجلها بعصبيه وهي تتمالك في نفسها...
شويه ومشت طلعت بالضيافه للشامس..
بعدين ولت وجابت لناديه..
وين مدت لناديه تاخد..شافت ناديه في يدها خاتم ذهب جديد وغالي..
ناديه خدت الضيافه وقالت؛جديد الخاتم..
ضحكت مطيرة وقالت:عمك الشامس ياخد ويكركر واني والله مانحب لبس الذهب هلبه بس هدا قعدت لابساته ع خاطره هو..جابه في عيد زواجنا..وقعدت تضحك..
تدوي بحسن نيه مسكينه ماتندري على حاجه..
وناديه حستها وكأنها تتقصد تغيظها برغم انها عارفتها ماتندري ع شي...
وقعدوا اعصابها يزيدوا يركبوا..
واستمرت مطيرة تهدرز ع طلعاتها ومشيها وجيها وسفرتها لتركيا في الصيف وشن دارت فيها..
وكله بحسن نيه هدرزة عاديه بين صاحبات مافيش من وراها اي نيه خبيثه..
بس هدا كله كان يضغك ع اعصاب ناديه..
اللي من غيظها قعدت تاكل في وجبة الغدي بشراهة لين استغربت فيها مطيره...
بعد الغدي..
غسلوا الماعين مع بعض..وداروا الشاهي..
عطوا للرجاله..
وقعمزوا يشربوا فيه ويهدرزوا...
مطيرة؛نديوة..
ناديه:نعم..
ابتسمت وقالت؛يعلم الله اني نعزك من قلبي وحاسباتك كيف وخيتي ومانودلك كان الخير
ناديه بإبتسامه مزيفه:حتى اني والله..
مطيرة:تسلمي يارب..والمهم اني عندي ليك موضوع..
ناديه بإستغراب:موضوع شني .
مطيرة:صلي ع النبي..
ناديه:اللهم صل على النبي..
مطيره:ياحنه في شارع القهوة الشارع اللي يسكنوا فيه ماليا...عندنا دكتور الله يبارك عليه زين وشباب وراجل راقي..بس ارمل وعنده ولد عمره هكي توا قريب 19 عام..
والله عيله الله يبارك عليهم كيف هو كيف ولده واني الحق وديتك لراجل زي هدا..والله نعم الراجل ياناديه واكبر منك مش بهلبه قريب عليك.. مواليد 70...
ناديه قعدت ساكته معاش عرفت شن تقول..
مطيرة؛كانك ع امك اني مستعده نقنعها وتو نقول للشامس يكلمها..هو بروحه قال لازم نقنعوا امها الاول..
انصدمت ناديه وقالت:قلتي للشامس..
مطيره:ايه قتله بش يفتح الموضوع مع خوك..لكن قالي اجليها لين نقنعوا امها وبعدين امك مرضت...
ناديه حست بإهانه كبيرة لكرامتها..حست انها ماتسوى شي عند الشامس..آلة لإنجاب الاطفال..وبس...
لاقدر لاحب لااحترام..
هني خلاص وصلت لأخرها عندها..
ناضت وقفت ومشت من حدا مطيرة..
مطيرة بآستغراب:ناديه!؟
ناديه وقفت في الممر ونادت بأعلى صوتها..
"شامس"
مطيرة قعدت تشبحلها وهي مصدومه..
والشامس وين سمع ناديه تنادي فيه..
ارتعب...
وخوها انصدم..
ناض طول الشامس ومشي طلع من المربوعه...
ومشي للصالون وخش عليهم وهو مخلوع وقال:شن في...
ناديه بضحكه ساخرة ودموعها بعيونها؛مطيرة تبي تخطبني لجيران ماليها ياشامس..
مطيرة كانت تشبحلهم بعدم استيعاب..
شن قاعده دير ناديه..!؟
وكيف تكلم الشامس هكي..!؟
وكيف هو خش عليها من غير حجاب..!؟
وعلاش قالتله هالكلام!؟
هو شبح لمطيرة..
لقاها تشوفله بنظرة عدم فهم...
قلبه بدي يوجع فيه...
ناديه بضحكه ودموعها ينزلوا:تبي تخطبي مراة متزوجه بصغارها لراجل تاني!؟
مطيرة بعدم استيعاب:متزوجه!؟
ناديه:ايه متزوجه..
الشامس:ناديه..
ناديه؛وعندي ولد عمره عشرة سنين وزوز بنيات توا عمرهم سنه..تبي تعرفي من هو راجلي..
الشامس:ناديه..
ناديه اشرت على الشامس وقالت؛اهوا..هدا راجلي وبو صغاري..
مطيرة حست روحها وكأنها تعوم قريب من دوامه قاعدة تسحب فيها لين طاحت فوسطها ومعاش عرفت تطلع منها..
ناديه؛اكيد توا تقولي لروحك شن تقول المهبوله هادي وصغار شني تحكي عنهم..
خوها نداها بصوت عالي يخوف..
"ناديه"
ناديه:مش الشامس مايجيبش في صغار..
تعالي نفهمك حبيبتي..طول السنين اللي عشتي فيهم معاه كان موهمك بدافع الحب..ان هو العقيم..بس الحق انتي العقيمه مش هو...
مازالت مطيرة في وسط الدوامه تسحب فيها وهي مستسلمه تماما..
عيونها كانوا في عيون الشامس طول ماناديه تدوي..
نظراتها للشامس كانت مش مهمه..
هل هي نظرات صدمه..خذلان...حزن...الم...
ملامح وجهها كانت مزيج من هالتعابير اللي خلت الشامس يحس انها النهايه بينه وبينها..
ناديه؛طول هالسنين كان خايف تسيبيه وبعد تزوجني ع خاطر الصغار زاد خاف اكثر واكثر..وبش يأمن نفسه ويطمن روحه...عرفني عليك وخلانا صاحبات..
وخلاني ناديه العزبا اللي امها ماتبيش تعطيها وخلاك تصخفي عليا وتخطبيني لجاركم الارمل..
خوها جاها وهو في قمة الغضب خش عليهم وجبدها وقال؛تعالي ياحقيرة تعالي..
ناديه وهي طالعه معاه:اني مرت الشامس ليا 11 سنه يامطيرة 11 سنه وانتي غافله...لالا 25 سنه وانتي غافله..
طلعها خوها وقعد يضرب فيها وهي مازال تقول..
"اني مرت الشمس"
لين سمعوا الزوز باب الحوش انخبط بقوة..
الشامس بلع ريقه وقال؛مطيرة..
هي غمضت عيونها ورفعت يدها وقالت:شويه شويه...نزلت يدها وفتحت عيونها وقالت...لما مشينا زمان عاينا..ودرنا تحاليل وانت مشيت خديت النتيجه وتكلمت مع الدكتور..قالك مطيرة عقيمه...وانت جيب كذبت عليا وقلتي انت العقيم..
علاش!!؟
الشامس بألم؛خفت تطلبي الطلاق عارفك مش حتقعدي معاي مالقيتش قدامي غير اني ندير هكي..
ناضت وقفت وجاته وهي تقول؛وتخليني طول هالسنين غافله تشبحلي وانت صاخف عليا معيشني معاك ع خاطر واجعاتك...!
الشامس؛لا قسما بالله لا..اني نحبك يامطيرة ومانقدرش نعيش من غيرك وربي عالم..خليتك معاي لأني مانقدرش نتخايلها حياتي من غيرك..
مطيرة ودموعها في عيونها؛تعرف زمان من غير ماتحلف نصدق فيه شن ماتقول..بس توا لو تحط يدك ع المصحف معاش نصدقك ياشامس..انت كنت هني..وحطت ع صبعها ع عينها..وتوا وليت هني..نزلاته واشرت بيه ع الارض...
طلعت راجل جبان وبلاشخصيه..طلعت كذاب ومنافق ومافيكش امان..
لو طلقتني من اول ماعرفت ان العيب فيا اني وخليتني نمشي في حال سبيلي وانت شفت نصيبك كنت حنقعد محترماتك عمري كله وحافظتلك الود..لكن توا حنقعد كل مانتفكري نقول..تفي...ع هكي رجاله..
الشامس:مطيرة انتي لازم تفهميني قبل..
مطيره؛معاش نبي نسمع منك كلمه حسك معاش نبي نسمعه..تضحك عليا اني..مدايرني مضحكه تجيبلي فيها للحوش نرحب ونأهل ونسهل ونطيب ونضبط ونبوس ونهدرز ونبصر ونود بالهدايا..وهي قاعدة تضحك عليا في سرها وتقولي طياح سعدك..اللي درته فيا ياشامس لااني ولابوي وخوتي نسامحوك عليه..
الشامس وقلبه قريب يوقف؛مطيره استهدي بالله ارجوك انت اسمعيني قبل خليني نقول اللي عيطت..
بأعلى صوتها قالت؛معاش تقول مطيره معاش تقول اسمي معاش نبي نسمعك..
ودفت بيدها زهريه كبيرة واقفه في الصالون طيحتها كسرتها..
مطيرة بغضب شديد:معاش تكلمني معاش تقولي شي..
وخدت تحف ع طاولة الصالون وخبطتهم ع الحيط وهي تقول..
معاش تقولي شي معاش تقولي شي..
الشامس كان خايف عليها تصيريلها حاجه:حاضر حاضر..خلاص سكتت..
شبحتله بحده..بعدين مشتله وشداته من ياقه سوريته وقالت؛توا ترفعني لحوش بوي توا..
الشامس وهو يهز في راسه ويقول:حاضر حاضر..
طلقاته ولفت ومشت بسرعه لدار النوم..
الشامس بخوف:ردي بالك رجليك..
التفتت شبحتله بحقد من فوق لتحت..
بعدين شبحت القدام ومشت كملت طريقها...
وهو غمض عيونه بشده بعدين فتحهم وقال:تو تشوفي ياناديه يابنت ستين كلب..
ومشي طلع من الحوش...
لمت مطيرة كل شي..والذهب كلها خداته معاها لأنها حقها..
ورفعت شنطتها وطلعت من الحوش بدون مانشوف لأي شي فيه حوش اساسه كذب وخداع...
طلعت برا هو جاها خدي منها الشنطه جبدتها منه وركبت بيها من الخلف..
هو تنهد بضيق بعدين مشي ركب السيارة...
وطول الطريق وهو يشوفلها في المرايا.
وهي تشبح للروشن..سرحانه ومصدومه مش قادرة تصدق شي...
بالذات ان هي العقيمه اللي ماتجيش في صغار..
نزلت منها دمعه طول مسحتها ماكانتش تبي تبكي قدامه..
هادو بنات الواعر لايمكن يوروا دمعتهم وكسرتهم للراجل اللي يغدر بيهم...
لكن يامطيرة شن حديري لما تعرفي ان قعدتي سنين مخدوعه حتى في اقرب الناس ليك اللي ماشيتلهم بش ياخدولك حقك....
خوك...وبوك...

#صدمة_عمر
#طوبى

....يتبع....