طوبى الجزء الاول

تابع

(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_الثاني_والأربعين"ع خاطر الياسمين2"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
"سامحونا جينا من غير موعد وعطلناكم عن مشواركم"
مطيره:لامش مشكله تفضلوا في أي وقت مش بيناتنا..
مغليه بإبتسامه:يزيد فضلك يامغليه..
مررت نظرها ع مطيره وسدره وقالت؛حالكم باهي..
الزوز قالوا بأصوات متقطعه:الحمد لله..
خديجه:خيرها غرفه بتمشولها في حاجه ولاغير بتهدرزوا..
سدرة:لابنهدرزوا عادي..
خديجه هزت راسها وهي ساكته..
مغليه؛شن حال الحاج علي ولطفي وباقي العيله؟
مطيره:اللهم لك الحمد في خيار الخير..شن حال الحاج محمد والولاد..
مغليه:الحمد لله كلهم كويسين..تنهدت وشبحت لخديجه.
خديجه بإبتسامه:ابدي يام..
ابتسمت مغليه وشبحت لمطيرة وسدرة وهما الزوز مستغربات.
مغليه:شوفوا يامطيره وياسدرة يابنتي..حني جيران وعشرة عمر..عشنا مع بعض الفرح والحزن..وربينا صغارنا مع بعض ونعرفوا بعض كيف كيف..
خديجه:وقداش تمنينا العلاقه تتعدا حدود الجيره في الاول ربي ماكتبش بس بعدين سخر وكان لينا نصيب فيهم وخدينا اميمه..
مغليه:وصفيه صاحبتي وحبيبتي ووخيتي..وورده الله يرحمها كانت اعز من الأخت..وقداش خاطري ندير وحده من بناتها كنه..ماكتبتش في سدرة..لكن الباين ربك كاتبها في غيرها...بنيتكم طوبى الله يبارك عليها..
خديجه:بصراحه عاجبتني ع الآخر هاديه وعاقله وفالحه وتتحمل مسؤوليه المواصفات اللي يبيهم الجالي بالزبط..
سدرة:الجالي!
مغليه:ايه الجالي والحق ياربي..هو اللي بعتنا هني لما نوي الزواج قال يام لاتمشي يمين ويسار نبيك تمشي طول لحوش عمي لطفي..
خديجه؛وعاد عمي لطفي مافيهم تناسب الجالي غير طوبى..والله فرحت من قلبي لما قال عليها..
مغليه:والله حتى اني..وعاد انتم تعرفوا الجالي كويس متربي ع ايديكم ولدكم مش غابيين فيه..ومابنقعد نشكر في ولدي..شهادتي فيه مجروحه..بس انتم شايفين وعارفين كل شي ماخافي عليكم شي من الجالي...
سدرة وهي تسمع فيهم شن يقولوا..
قعدت تردد في راسها جمله وحده بأكثر من صوت..
《اعطيها لراجل الظاهر متاعه زي الداخل》
ضربات قلبها تسارعت وبلعت ريقها وحست بحماس رهيب للموضوع ولولا قدرتها ع التحكم في نفس راهي ابدت رايها بالموافقه ع طول..
ع جية طوبى من الكوجينه بالضيافه..
وين شافوها خاشه كلهم قعدوا يشبحولها..
مغليه بإبتسامه عريضه:الله يبارك الله يبارك..
طوبى بإبتسامه؛سلمك..
ومدتلها الضيافه هي الأولى..
مغليه:سلمها ياربي..
بدت طوبى تستغرب..ومدت لخديجه..
خديجه خدت منها وهي تشوفلها بإبتسامه وتقول:شكرا حبيبتي..
طوبى:العفو..
ومشت عطت لعمتها اللي كانت تشوفلها بإبتسامه..
بعدين عطت لسدرة..
خدت منها سدرة وقالت من تحت سنونها:حطي السفرة وخشي داخل..
طوبى تأكدت من اللي بالها..هزت راسها ومشت حطت السفره..
بعدين طلعت من حداهم...
وين وصلت في دارهم سمعت تليفونها يرن..
خشت وهي تقول؛اللي في بالي صح متأكده..
وخدت تليفونها من فوق الكامدينو وردت..
طوبى:ايوه روفي..
"وينكم يابنتي لتوا من بكري نراجو راهو"
طوبى:وحني طالعين طبوا علينا عمتك مغليه وخديجه بنتها..
"علاش شن عندهم جايين"
طوبى:شكلهم جايين يفتحوا موضوع الجالي رسمي..
"حيي!..يعني مصرين..او مرات الجالي نفسه مصر..شكله طايح فيك يابنت"
طوبى:ولا مرة حسيت بهالشي ولالاحظته عليه نحس فيه معاي عادي..
"هو الجالي هكي جدي ورزين مستحيل يبينلك حاجه"
طوبى:بالعكس يعامل فيا ديما زي الصغار ويبصر ويضحك عادي مانحسش فيه يفكر فيا بشكل تاني..
"مالا شن يديروا امه واخته عندكم"
طوبى:ماهو هما يبوا..
"وشن جايين يخطبوا من وراه؟!"
سكتت طوبى ماعرفتش شن ترد..
"صدقيني الا طايح فيك غير مش مبين..الله ياطوبى حظك من السمي كان خديتي الجالي..الدنيا كلها تحسدك عليه"
طوبى:لهالدرجه هو كويس!
"خير بلاك انتي قاعدع صايمه!..نسيتي شن دار ع خاطرك"
سكتت طوبى وهي تفكر..
من داخل كانت زي اللي مقتنعه بيه..بس في شعور من الخوف يصارع في هالاقتناع..
بعدين قالت في نفسها..طبيعي الخوف هدا..
"طوبى الو"
طوبى:معاك معاك..
☘☘☘☘☘
سدرة:والله اليوم بس كانوا يكلموا فيا ناس يبوها حتى هما..
خديجه؛عطيتهم كلمه..
سدرة:الحق لا تعارفنا بس..
مغليه:اني لو كنت مكانكم..حتنختار اللي نعرفه كويس زي كف يدي..اللي تربا قدامنا وعارفيه وعارفين اهله واخلاقهم كويس..
خديجه:تعطي وعينك مغمضه..
تنهدت سدرة وقالت؛والله شن بنقوللكم..الموضوع في النهايه يرجع للبنت وبوي هما اصحاب القرار وشن مايقولوا يمشي..
مغليه:هو هدا..وحني نراجو في الرد..
ناضت مغليه وقالت:هي مالا نخلوكم تمشوا لمشواركم..
مطيره:غير اقعدوا هدرزوا..
مغليه بإبتسامه:في الفرح ان شاء الله..
خديجه وهي نايضه تساوي في وشاحها قالت؛ربي يقدم اللي فيه الخير..
الزوز قالوا:آمين...
ومشوا طلعوا وهما طلعوا معاهم بش يسقدوهم...
~~~~~~~~~~
طوبى:اني فهمت منها لما جت كلمتني انها منها ليها جت تكلمت ولدها مش باعتها..
نبيله:مدام جوكم مرة تانيه وطلبوا رسمي غالبا هو اللي يبي ومصر..
غرفه؛حتى اني قلت نفس الكلام..
مطيره:الحق ياربي الجالي وليدنا ومربينه ونعرفوه كويس كويس..راجل بمعني الكلمه عينه ديما في الوطى..رزين عاقل عمرنا مارينا منه العيبه..
غرفه:بجديات طوبى بجديات ربي يحبك..
نبيله:طوبى انتي مفكرة في الزواج توا..
طوبى نزلت عيونها وهي محرجه قالت:ماعنديش مانع..
سدرة؛يعني بمن مقتنعه فيهم...الجالي ولا الشاب هداكا..
طوبى:الموضوع هداكا نبيك تنهيه..اما موضوع الجالي عطيني فرصه نفكر فيه.
سدرة هزت راسها وقالت:باهي..باهي..
نبيله؛ربي يقدم اللي فيه الخير..
كلهم قالوا:آمين..
وكملوا هدرزة في الموضوع هدا وفتحوا مواضيع تانيه وطوبى يدوب تشارك..
مركزة بس ع سدرة اللي حستها متوتره وكأنها قاعده ع نار..
وفهمت انها تبيها توافق...
لكن سدرة كانت عايشه حاله من القلق..
تبي تعطيها وتتهنى عليها وفي نفس الوقت كانت خايفه...
☘☘☘☘☘
"وهما شن قالوا"
مغليه؛شن بيقولوا اكيد مش حيعطوا الجواب طول بيردوا الشيرة ع البنت وع بوها..المشكله البنت مرة مكلمتها وقالت نشوف في الجالي زي خوي الكبير..
محمد شنيبه:قداش بيناتهم فرق؟
مغليه:13عام بقولي..
محمد؛لامش هداكا الفرق باهي..
مغليه:خايفه ترده..
محمد:كله ع النصيب..ونتمنى من ربي توافق..بالك ع ايديها يصير الشي اللي ماقدرناش عليه..
مغليه ودموعها في عيونها:يارب...
☘والجالي في داره..
مقعمز في الفيرندا وهو يتكلم بالتليفون...
الجالي:ولافكرت نسأل ولانعرف وان شاء الله البنت تسكر راسها وترفض..
"مرات نقول يارب توافق هي خير من غيرها"
غمض عيونه وزفر بقوة..بعدين فتحهم وشبح جهة حوش الواعر...
ووقتها طوبى كانت واقفه ع عراجين ورد الفل..
وتشوف جهة حوش شنيبه وتهني بصوت مسموع ليها هي بس..
عندي امل فيك.
عندي ثقه فيك..
شوبدك يعني يكون اكثر فيك...
تنهدت وقالت:الجالي..كويس وطيب وفيه خير..الموقف اللي داره ع خاطري بروحه ساد..عرض نفسه للموت...غير عن هكي دمه خفيف..ويحب الاطفال..ويحب المبروشه..ضحكت..
بعدين تنهدت وقالت..لكن مازال مانعرفش هو كيف يفكر شن شكل عقليته..شن نظرته للحياه..شن يحب وشن يكره..
ياااه..اني مانعرف عنه شي..!
سكتت وهي تفكر بعدين قالت:بس صفاته الظاهرة تبين ان داخليته كويسه هلبه..انسان يخاف ربي وهدا اهم شي..
مررت نظرها ع المكان جو عيونها ع الياسمينات...
سكت فمها وقعدت تقول في نفسها..
"انتي توا ياطوبى خلاص لازم تفتحي الطريق لسدرة اختك وتخليها تعيش حياتها ساد ماحبستها معاك السنين اللي فاتت هادي كلهم...اااه ياريت لو تصير معجزة وترجع لحب حياتها.."
ابتسمت بألم وقالت؛معجزة..
☘☘☘☘
في دار كل حد فيهم راقد ع مندار مقابلين بعض ويهدرزوا..
غرفه؛ماينفعش لطوبى غيره هو..
عبد الرؤوف:الحق مانعرفاش زين زين بس هكي يبان راجل محترم ورزين...تبي نزيد ندور وراها..
غرفه؛غير ع الفاضي الراجل كلنا في الشارع عارفينه كويس من صغرنا..
عبد الرؤوف:مادام هكي خلاص توكلوا ع الله..
غرفه:ان شاء الله هي توافق..
عبد الرؤوف: ان شاء الله خير..
سكتوا شويه وكل حد فيهم سرح بتفكيره..
بعدين هو قال:اختك سدرة والمهدي علاش ماصارش منهم..
غرفه:ع خاطر وصية امي..
عبد الرؤوف:وصية امك؟
غرفه:الله يرحمها قبل لتموت وصت سدرة علينا بالذات طوبى كانت صغيره هلبه هلبه..ممكن عمرها عام ونص سدرة حست ان الزواج مش حيخليها توفي حق الوصيه نهت كل شي بينها وبين المهدي..
عبد الرؤوف:باهي علاش بعدين رضت بالفاندي..
غرفه؛كنا كبار وقتها..وغير هكي شرطت عليه يسكنوا في الشارع وهو قال باهي وخداها حوش هني..هدا اللي ساكنه فيه فايزة وفيه المعمل متاع الاكل الشعبي..
عبدالرؤوف:عرفته..بس عندك علم لتوا المهدي غاويها..
غرفه:تي مني ماعنداش علم الدنيا كلها تعرف..
عبد الرؤوف:واختك..
قعدت تشبحله غرفه وهي ساكته..
هز راسه وقال؛فهمت عليك..
ورجعوا سكتوا مرة تانيه بعدين هي قالت..
غرفه:تعرف حني في عليتنا معروفين بالوفاء..بالذات رجالتنا..زي بوي وزي جدي...تعرف جدي قداش ليه سنه وحداني 40سنه...لتوا قاعد قلبه عند حناي أم العز كان يعشقها هلبه هلبه..وبوي بعد وفاة امي شوفي لتوا قريب 19سنه ولامرة جاب سيرة الزواج..ديما يقول ربي ماعطانيش نصيب في غير وردة ومانبيش غيره..
هو بإبتسامه؛نادرة الفصيله متاعكم..
غرفه بفخر؛من غير شك..حني لاننسوا ولاننتسوا..
هو قعد يشوفلها وهو ساكت..
وهي استاقظت لروحها شن قالت حتى من ملامح وجهها تغيروا للضيق..
هو تنهد وقال: تو نوضك ع الآذان..تصبحي ع خير..
وعطاها بظهره..
وهي خدت نفس وقالت..
"نحبك"..
هو طول التفتلها..
غرفه وعيونها مليانات دموع؛والله نحبك نقولها فيها بقلبي بيكو نطلع من وسط قلبي من داخل..صدقني..
شبحلها بنظرات ألم..بعدين رجع عطاها بالظهر وقال؛بنرقد..
وهي قعد تشبحله ودموعها ينزلوا وقلبها موجوع..
بس مش أكثر من وجع قلبه هو....
☘☘☘☘☘☘
بعد الفجر..
في الجنان..
لطفي وهو متفاجئ:الجالي!؟
سدرة:ايه يابوي الجالي شن رايك؟
لطفي؛اختك في الاول شن رايها؟
سدرة؛قالت نفكر بس حسيتها بتوافق..انت شن قولك..
لطفي:بصراحه الجالي عاجبني هلبه راجل خلوق ومحترم ورزين وغير عن خوته كلهم..
☘ورأيه هدا سمعاته طوبى  وهي واقفه في روشن الكوجينه وزاد اقنعها بالجالي...
ومش بس رأي بوها..
•••••••••••
فايزة؛الحق اني تحمست هلبه لموضوع هدوكا الناس لكن نقولك الجالي خير اللي تعرفيه خير من اللي ماتعرفيشي..
••••••••••
صفيه:الجالي مربياته مع حسين راجل ماشاء الله عليه شارع القهوة يشهدله كله..الحق وردة الله يرحمها داعيتلك بالخير قبل لتموت...
•••••••••
يوسف:الجالي من يومه فزاع وراجل واخلاقه كويسه ماغير نقولك توكلي ع الله..
••••••••
فردوس؛وعيونك مغمضه قولي باهي مهبوله لتقول للجالي لا..
•••••••••
اريج؛جنتل الجالي ورزين وشخصيه ساد الموقف هداكا ياطوبى هدا الراجل اللي تأمني ع روحك معاه في وقتنا هدا...
☘☘☘☘☘
طوبى:قعدت انت بس ياجدي..شن رايك..
علي تنهد وقال:الحق نقوله..اني مانقبل عيلة شنيبه هداكا القبول وقاعد مش راضي ع موضوع بنت عمك..لكن الجالي والحق يابنتي قداش تمنيت ياخد وحده فيكم وربي استجاب..راجل بمعنى الكلمه وعاقل..شفتله بعيونه موقف بينت انه راجل ينشد فيه الظهر..نرتاح عليك معاه...
خدت نفس وهزت راسها وهي تزفر بعدين قالت؛إن شاء الله خير..
وبعد ان استشارت استخارت..
بس وهي تدعي في دعاء الاستخارة ماكانتش مسلمه الامر لله تسليم تام...كانت شبه موافقه وخلاص..
لهدا كانت صلاة الاستخارة اللي صلتها مجرد روتين لهداكا مواقف لاأكثر...
☘☘☘☘☘
خش للحوش...
سمع صوت زغاريد امه..
استغرب مشالها لقاها في الصاله شادن تليفونها وتبكي..
المهدي بقلق:يام..
خشلها وجي عندها قعمز قدامها ع رووس صباعه وقال:يام ردي عليا خيرك..
مغليه رشفت وهي تقول؛ماتخافش ولدي ماتخافش فرح فرح..
المهدي ناض وقعمز جنبها وهو يقول:فرحينا معاك..
مغليه:ماهو خطبنا لخوك الجالي وجتنا الموافقه توا..
ابتسم بفرح وقال:الله يبارك الله يبارك..من خطبتوله؟
مغليه:طوبى بنت لطفي الواعر..
خفتت ابتسامة المهدي وهو يشوف لأمه...
طوبى بنت الواعر..اخت سدرة..
بياخدها ولد شنيبه الجالي..خوه هو...!!؟
مغليه؛خيرك تسمرت هكي!
المهدي:طوبى  والجالي!؟
مغليه:معارض!
المهدي حرك راسه بالنفي وقال وهو مازال مش مستوعب:لا مش معارض..بس يعني بخصوص القصه هديكا..
مغليه:خوك الحمد لله السنين الاخيره مولي حاله باهي وانت تشوف فيه بعيونك..المهم طاح في بنية حلال زي طوبى تنسيه كل المرار اللي راه..
المهدي ابتسم بشي من الحزن وقال:إن شاء الله..ربي يكمل ع خير..
مغليه:اللهم آمين...
☘☘☘☘☘
"شن قلت اني ع حكاية النظرة الشرعيه!؟"
مغليه:غير سايرنا وخلاص كلمتين تقولهم وتطلع..
خديجه؛جالي مافيش داعي لتسكير الراس..
شبحلها شاف في عيونها نظرات تهديد..
ابتسم بشي من الغل وقال:حاضر نمشولها نظرتكم الشرعيه..
مغليه حركت راسها يمين ويسار..
وخديجه قعدت تشبحله وهي رافعه حواجبها..
☘☘☘☘☘
الساعه 11:30ليلا..
في دار البنات...
طوبى بتوتر:برغم انه ولد جيرانا ومهدرزه معاه قبل بس حاسه روحي توا وكأني مانعرفاش..
اريج:طبيعي يابنتي..وقعدت تساويلها في طرف وشاحها..
الاء؛بخي العطر هدا يدوخهولك..
طوبى:بعد الزواج ان شاءالله..
ضحكت آلاء..
انفتح باب الدار...
غرفه:هيا طوبى..
طوبى خدت نفس بعدين مشت طلعت وغرفه معاها..
والبنات وقفوا فم الباب يشوفولها بإبتسامه..
تلاقت غرفه بخديجه واقفه فم الصاله..
وسدرة تشوف لطوبى بخوف ممزوج بالحزن..
خديجه:هي تعالي معاي طوبى..
مشت خديجه ومعاها طوبى..
وعيون سدرة معاهم لين اختفوا..
مطيره:غريبه حتى المرة هادي نسرين مش حاضرة!
سدرة؛تلقيها اشبح في شن لاهيه..
فردوس:دمها بارد هلبه مادورش..
وسدرة اللي دمها حامي تفكر شن بيصير مع طوبى داخل..
☘في المربوعه..
خديجه كانت مقعمزة جنب الجالي..
وطوبى مقابلاته..
ماكانش يشبح فيها بكل..
وهي مش قادره تقيم عيونها متحشمه..
هو حاط تليفونه ع جنب وكان يتراسل مع نجاه..
ركزت عليه خديجه شدت يده بقوة شبحلها
فنصت فيه واشرتله براسها ع طوبى .
مط شورابه بملل بعدين ابتسم بتصنع وقال:شن حالك ياطوبى .
قامت راسها وقالت؛الحمد لله شن حالك انت..
الجالي:الحمد لله..ايه ياطوبى شن شروطك شن تبي..
حساته مستعجل ويبي يطلع..
طوبى؛شرط واحد بس نكمل قرايتي..
الجالي:مش مشكله عادي كملي قرايتك..ماعندك شي تاني غيره؟
طوبى:لا قتلك شرطي الوحيد..
خديجه وهي ترقع:طبعا زي ماتعرفي خوي عنده فيلا في ******* بتسكنوا غادي..ولما تجوا لحوش العيله حتقعدوا في جناحه..
الجالي:لما نكون مش فاضي او نطول برا بنحطك ياعندهم يافي حوش اهلك وانتي وراحتك..
طوبى وهي مبتسمه بشي من الاستغراب:تمام..
خديجه كانت تنخص فيه..
فجأة ضحك..
خديجه انصدمت..
وطوبى تفاجئت..
الجالي بش يرقع الحركه قال بضحكه؛ماتبنيش نديرلك قطاطيس في الحوش!؟
طوبى ضحكت وقالت؛لابنرفع معاي بينكا وعيلتها..
الجالي:إيواه..
طوبى:بس بنزيدوا عليهم حاجه خاطري فيها.
عقد حواجبه وقال:شن هي؟
طوبى بلطافه:فكرونه صغيرونه..
هو ابتسم وقعد يشوفلها بصمت..
وجهها كان لطيف هلبه لما تكلمت عن السلحفاه..
الراجل طول شويه..
وطوبى انحرجت ونزلت عيونه..
خديجه نخصاته..
ضحك تاني وقال:ههاهاحاااضر..حاضر..
ضحكت طوبى غصب عنها..
وهو قعد يضحك ويفنص في خديجه..
وهي تفنص فيه..
قامت عيونها شافتهم ماقدرتش تشد روحها قعدت تضحك وتضحك..
وهو يشوفلها..
وطوبى ميته ضحكت..
ضحكها كان مبالغ فيه بسبب مشاعر التوتر اللي كانت عايشتهم....
خديجه وهي تضحك معاها:طوبى..
طوبى وهي تضحك:اسفه......اسفه..
والجالي يشوفلها وبس..
مسحت دموعها اللي نزلوا..
لاحظ ان مافيش ع وجهها ذرة مكياج..
طوبى وهي تمسح في دموعها:اسفه حقكم عليا والله ماكان قصدي..
خديجه بإبتسامه؛ولايهمك..اصلا خوي هدا لما تعيشي معاها ياما جايك من ضحك..
هو شبحلها ع جنب..
نزلت طوبى عيونها وشدت ضحكتها..
هو شبح لطوبى وقال:فوتيها هادي مادوريهاش..
شبحتله طوبى..
ابتسم وقال؛شن جو..
ضحكت تاني..وهو ضحك معاها..
وخديجه تمرر في نظرها عليهم وهي مبتسمه براحه...
☘☘☘☘☘
"وامتى كنتي ناويه تخبريني ان شاء الله!"
خديجه:توا..قبل فكرت نقولك اسبوع العرس بس خسارة مافيهاش كيف..
"تمام..ديروا مايعجبكم بس صدقوني حتندموا هلبه هلبه"
وسكرت عليها..
خديجه؛هدرزي..ومشت طلعت من دارها للكوجينه بش توتي للسحور..
☘☘☘☘☘
"طول جيتك ياقلبي ماتحملتش تعرفي مافيش مقارنه مافيش نهائي"
نجاة بضحكه:لهالدرجه!
الجالي:واكثر..مانقول غير ربي يصبرني وخلاص كيف بننجبر نجاملها ونسايرها..
نجاة:اففف شكله دمها ثقيل للمليون...
هو سكت لوهله لما تفكر...
《 طوبى:بس بنزيدوا عليهم حاجه خاطري فيها.
عقد حواجبه وقال:شن هي؟
طوبى بلطافه:فكرونه صغيرونه.》
تلقائيا ابتسم..
نجاه:هيييه وين سافرت!؟.
شبحلها وضحك وقال:معاك ياقلبي صدقيني ومش حنكون لغيرك عمري كله...

#عخاطر_الياسمين
#طوبى

....يتبع.....