طوبى الجزء الاول

تابع

#تكملة_الجزء_السادس_والأربعين
#طوبى "اقحوان وفله وياسمينه"
#جمان_فريد

ومر عليهم يوم جميل بنهاره وليله...
حضروا حفلة الفندق..وطوبى لبست فيها عبايتها البيضا المطرزة الواسعه ولبست وشاح ابيض وطلعت فيهم مميزة هلبه وكأنها لابسه فستان زفاف..
والجالي لابس بدله انيقه...
جابولهم تورته وقصوها..وجابولهم هدايا..
حديده ذهب للعروس..
والعريس ساعه ماركتها غاليه..
وخدت طوبى مع الجالي هلبه صور "سيلفي".
بعتتهم لخواتها وعمتها وبنات اختها...
🌸وسدرة هديكا الليله تفرجت عليهم وهي فرحانه ع الاخر..
وتحمد في ربي وتعاود...
حتى انها ليلتها رقدت وهي مرتاحه ع الآخر..
ليها سنين مارقدت مرتاحه زي مارقدت في هالليله..
ويعدوا كم ساعه..
والحوش كان في حالة من الهدوء والسكون..
لعند ماجت الساعه..
2:30بعد منتصف الليل..
ناضت سدره فجأة قعمزت..
حست بأن قلبها بيوقف...
ناض وقفت وهي مذعورة تقول:عمتي!..عمتي!..
ناضت مطيره مفجوعه وهي تقول:خيرك ياسدره..
سدرة بذعر؛بنموت..بتموت.
طلعت من الدار وهي حاطه يدها ع صدرها وهي تقول:بنموت..بنموت..
مطيره وهي مفجوعه:شن جاك ياسدره شن جاك..
قعدت سدرة دور في الحوش وهي تقول بتفر فران..
وكأن الموت قاعد يجري وراها وهي تهرب منه..
مطيره عيطت ع طول حسها وقالت:لطفي!..
ناض لطفي مفجوع..
سمع سدره تقول بعياط..
"بنموت"
وبعدها مطيره تنادي بأعلى حسها..
"لطفي"
وقف بسرعه وطلع يجري من المربوعه وجاهم..
خش عليهم لقي سدرة حاطه يدها ع صدرها وتعيط وتقول..
"بنموت"
لطفي بصدمه؛خيرها سدرة!
مطيره وهي تبكي وترعش:مش عارفه..
جاها بوها شدها بيوقفها..
هي زادت عيطت وهي تقول..
"بنموت"
جي بيحضنها دفاته..
وقعدت تخبط ع صدرها وهي تقول..
"بنموت"..
وبوها يشوفلها بصدمه وهو يرعش مع مع بعضه..
ومطيره تبكي وهي مفجوعه...
فجأة...
وفي لحظه بدون سابق انذار..
طاحت ع الأرض بدون ماتنطق بكلمه...
🍃في نفس اللحظه..
فاق المهدي وهو يشهق وكأنه كان غارق وطلع..
فاقت معاه عائشه مفجوعه قالت:مهدي!
هو حط يده ع قلبه اللي كان نبضه متسارع...
وعيونه متوسعات ع الآخر من الخوف...
ووجهه يتصبب عرق....

#الجارح_وياسمينه
#طوبى