طوبى الجزء الاول

الجزء الأول

#طوبى "شارع القهوة"
#جمان_فريد
#الجزء_الأول
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها ..
وصلوا على الحبيب🌼
بسم الله توكلت ع الله...اللهم اجعل كل حرف فيها شاهد لي لاعلي..واجعلني انفع ولاأضر...
☕☕☕☕☕☕☕☕☕☕☕☕☕☕☕☕☕
"وهادي هي قيمة سين"
عائشه:تمام...فهمت..خل نشوفوا لبعدها..
سدرة؛تمام..بعدين قامت عيونه في فايزة ونسرين..
وعائشه شبحتلهم حتى هي..
فايزة وهي شادة وجه نسرين تقول:معاش ترمشي ياهمي..
نسرين وهي خايفه؛بدخليهولي في عيني..
فايزة؛مش خاش في عينك ماتخافيش ...ايوه ايوه خليك هكي.....
وقعدت تكحل فيها لين كملت...وخرت عنها وقالت بإبتسامه..الله محلاهم كيف بانوا..
نسرين بفرحه؛حقه!؟
فايزة؛اهو حتى اسألي البنات..
شافولهم..
فايزة؛شن رايكم؟!
سدرة تهكما؛رأي انكم بتجيبوه كعك هكي كبره..
ودارت حركة بإيديها..
فايزة بضجر؛ووواك منك سدره خلاص قرينا لين عيينا وملينا.. ابتسمت بحماس وهي تقول..غير هيا هيا قوليلي شن رايك..
عائشه؛من وين جبتيه المكياج خنبتي من امك كالعاده..
سدرة؛ياحليلها غير تروح تلقى الشبشب يراجي فيها..
فايزة:امي مادورش فيه المكياج في رمضان يامنكدة انتي وياها..
نسرين:هييي انتي وياها اشبحولي هني طالع عليا ولالا؟!
سدرة؛خيي يدره الكبد...هي عيشة بالله..
شبحت عيشه للكتاب وقعدوا يحلوا في المسائل..
فايزة؛منكدات..
نسرين ناضت ومشت وهي تقول:خل نشوف بروحي..
ومشت طلعت من الدار وتوجهت لمراية الممر...
شافتلها ابتسمت بإندهاش وقالت:عطيها الهني والله تعرف ترسم!
ع جية مطيرة وين شافتها تفاجئت وقالت؛حيي شن هدا اللي في عيونك؟
نسرين بضحكه؛فايزة كحلت عيوني..
مطيرة وهي مبتسمه بتعجب؛ريت مايطلع منها هالفايزة!..ناديهالي نادي..
نسرين بضحكه:باهي.
ومشت لدار سدرة..
ومطيرة تشوفلها وتقول:خل ندلع رويحتي شويه..
لحظات وجت فايزة....
فايزة؛نعم عمتي مطيرة؟
مطيره:اسمعي جايبه معاي مكياجي كان خليتك تمكيجيني طلعيني قنينه؟
فايزة بحماس؛وتهبلي...
شدتها مطيره من يدها وجبدتها وراها وهي تقول:هي تعالي..
ونسرين ضحكت ومشت ولت للدار خشتلها وبدت تقرا مع البنات..
~~~~~~~~~
"غير تروحي فايزة مخطرك الاسود الليله"
هادي مشتدة ام فايزة بعد مااكتشفت جريمة بنتها....
مشتده بإنفعال وغضب شديدين؛كيف بنمشي للناس ووجهي هكي تقول مجبوده من قبر!!..ماحازك مني بوك يافايزة ماحازك مني حد..
🌱وفايزة تزين في مطيرة بروقان وانسجام مع موهبتها اللي عندها من الصغر..تعشق الزينه والاهتمام بالجمال...
كل شغفها بهالعالم..وعنده طموح تكون خبيرة تجميل كبيرة مستقبلا لهدا اخر همها القرايه..وديما تنجح بالدف..🌱
كملت فايزة شغلها لمطيرة...ومطيرة عجبها هلبه شغل فايزة
ووراته حتى لوردة اللي مدحت وشكرت في فايزة هلبه..
وهالكلام الحلو كان يرفع في معنوياتها ويزيد تعلقها بهالهوايه..
ويكبر حلمها بيها كل دقيقه...
🌻سدرة بإزدراء:جيتي ع الفاضي ياخايبه..
فايزة بضحكه استفزاز؛بالعكس ع المليان ماخلوا ماشكروا في شغلي امك وعمتك..
عائشه:والامتحانات ياللا!؟ الفترة التانيه بعد العيد راهو..
فايزة؛تو تغششني نسرين..
عائشه:استغفر الله..
سدرة تهمكا؛كان ع عباك ع بن ضو!؟
نسرين بضحكه؛وذنك..والله فهمت هلبه حاجات منكم..
سدرة بتنهيده؛ان شاء الله..
فايزة؛تي هيا وينه ولد عمك هدا جمدنا..!
دق باب الحوش..
سدرة قدمت بتفتح الباب وهي تقول؛اهو..
فتحت الباب لقت يوسف واقف يراجي فيهم..
يوسف:هي اطلعوا..
طلعت معاه سدرة والبنات وراها..
شافوا المهدي مقعمز قدام المطحن مع ولاد الشارع...
نسرين مشت طول للحوش وراسها لوطا...
والباقي كملوا طريقهم..
والمهدي مع سدره بعيونه ونظراته كلها غيره..
لولا انه عارف ان يوسف خوها بالرضاعه ماخلاشي يفوت من جنبها...
وطول الطريق وسدره تهدرز مع خوها وعائشه وفايزة وراهم..
سدرة:لابالله وسيفه شد في قرايتك هادي مستقبلك راهو..
يوسف بإبتسامه:إن شاء الله إن شاء الله...
عائشه:تصبحوا ع خير ..
وصلوا قدام حوش الشيخ جويده...
ومشت عائشه فتحت الباب وخشت..
والبنات يقولوا:قدامك كل خير..
بعدين مشت فايزة للحوش وهي تقول:صح سحوركم تصبحوا ع خير..
سدرة ويوسف؛وسحورك..
بعد ماتأكدوا انها خشت للحوش..
لفوا وروحوا...
واحمد واقف قدام دكانه يتبع في يوسف بعيونه بنظرات كلها غيره..
جاه زبون وقال:مازال في خبزة..
احمد بنرفزة:مافيش..
؛باهي شن هي هادي!..
احمد بنفاذ صبر؛يابسه..
:باهي وسع بالك...! ومشي..
وهو غمض عيونه بعصبيه وتنهد بعدين فتحهم وخش داخل...
🌱وفايزة خشت للحوش وهي رايقه وجوها حلو..
لكن..
"روحتي ياسفتوله"
كل المشاعر الإيجابيه اللي كانت تحس بيها تبخرت في لحظه  وحلت محلها مشاعر الخوف..
بإرتباك ردت ع امها تقول:خيرك يام شن في؟!
مشتده جتها وهي تقول بعصبيه:شن في يام!..وشدتها من شعرها وهي تقول..طلعي المكياج يامعفنه..طلعي..
فايزة وهي تتوجع؛مكياج شنو يام!..
قرصتها من ذراعها وهي تقول؛طلعيه خير ماوالله نبعت لخوتك يجوا يوروك ..
فايزة وعيونها يدمعوا من الألم:آااي يام اطلقي بالله عليك..
وامها تزيد تقرض بقوة..
فايزة بألم:خلاص خلاص..اهوا في الشنطه..
طلقتها امها وخدت الشنطه..
وهي فاتت تجري لدارها خشت وسكرت عليها الباب وقعدت تبكي..
ومشت وقفت ع المرايه وحولت الجاكيت اللي كانت لابساته..
بعدين رفعت كم الماليه وشافت ذراعها ع المرايه وزادت بكت وهي تقول؛علمت علمت...حرام عليك يام علاش هكي بس! 
"مازال ياسفتوله غير يروح بوك بس...حتى لحوش الحازة ماخلتيني نمشي والمراة قالتلي تعالي"
وفايزة قاعده تشبح ليدها وتسمع فيها شن تقول وهي تبكي...
🌱🌱🌱🌱🌱
خشت سدرة للمطحن بعد ماروح بيها يوسف...
وبدت تخدم ع الماكينه وتطحن في القهوة وضيفلها في الحبهان وتشم في ريحتها وتبتسم تلقائيا...
طلعت رساله المهدي من جيب كبوطها...
وفتحت الظرف وطلعتها وبدت تقرا فيها..
(سدرتي...جنتي وناري...سلمي وحربي...حبوري واحزاني...في كل يوم ازداد حبا وشوقا..وانتظارا لذلك اليوم الذي يجمعني بك تحت سقف بيت دافيء ليصبح يومي كله انتي دون فراق ولاأبتعاد..
في كل يوم يقترب ذلك الحلم من تحقيقه شيئا فشيئا..
هاأنا الآن في اخر سنوات دراستي في الجامعه وكما قطعت وعدا على نفسي قبل ان يكون لك بعد اتمام دراستي سأخطبك من فوري دون أي تأخير...فأستعدي...
قبل ان انسى..اجتهدي في الدراسه ولاتتقاعسي عنها واتركي عمل المطحن الآن...اخشى ان تعيدي السنه ويطول انتظاري اقسم لك حينها اني سأتزوجك رغما عنك ولن انتظر اكثر...
انفاسك...المهدي)
سدرة بضحكه؛ياأكسجين انت ياللي من غيرك مانقدرش نعيش...وقعدت تضحك..بعدين تنهدت بإبتسامه وقالت..ايه والله مانقدر نعيش من غيرك...
🌻وهو فهالوقت..
كان في المطحن يطحن في القهوة ومقعمز يقرا...
كان شاد يإيديه ورجليه...المهم يصفي مواده ويتخرج بش يخطب سدرة طول..
لأن لطفي حالف مايعطيش سدرة الا لراجل متعلم يساعدها تكمل قرايتها يقدرها ويوقف معاها..
ايام كان المتعلم صاحب عقل متفتح وتفكير راقي...
برغم ان المهدي شخصيه مليانه متناقضات...
لين وجهين في الحياة..وطبعا هدا مش بمفهوم النفاق او التلون..
لا..
الوجهين للي ليه في الحياة...واحد منهم ايجابي محبوب..
والتاني سلبي منفر...ومايطلعش الا في مواقف معينه..
ووللأسف غالبا يخلي يخسر هلبه حاجات ويندم بعدين...
🌱🌱🌱🌱🌱
وتعدي هالليله.....
بس كانت عكس ليالي رمضان اللي توا..
رمضان ايام الشتي والقرايه لياليه طويله ويمشي هلبه منه في النوم وبالسيف تنوض الناس تتسحر بسرعه بش ترجع لفراشها الدافي.....
ومن ليل رمضان لنهاره....
اللي كانت سماه مغيمه...وينذر بجية مطرة قويه....
البنات كانوا ماشيات للمدرسه ع رجليهم...
القدام سدره ومعاها يوسف اللي ماشي للمدرسه حتى هو..
وورا عائشه ونسرين وفايزة اللي كانت تتحجب بس نهار رمضان..
فايزة بضيق:خلتني غصب عني نوض نتسحر خفت لو مانضتش بوي ينشدها وتقوله ..
عائشه بالتشديد ع الحروف:تستاهلي.
فايزة:خزي معفنه..
ونسرين تمشي بحداهم وهي شبه راقده...
وبعد ماقطعوا مسافه لاباس بيها..
وصلوا للمدرسه..
سدرة؛بالسلامه وسيفه..
يوسف:بالسلامه...ومشي لمدرسته..
التفتت سدرة لفايزة وقالت؛ايه شراده احكيلي شن دارت فيك خالتي مشتده نبي نتشمت.
فايزة؛لئيمه من يومك..
سدرة؛لئيمه ولابرتقاله!؟
ضحكوا عائشه ونسرين..
فايزة:وووه عليا كان يندري عليك المهدي دمك قطران هكي يفوتك طول..
سدرة بثقة:مايقدرش ياماما والله مايقدر..
نسرين؛ولاانتي تقدري ياعيوني...
فايزة قعدت تضحك بإستفزاز..
سدرة؛شن نوضك انتي كملي نومك..
نسرين ثاوبت بعدين قالت:غير نوصلوا للفصل...
ومشوا طول ركبوا للفصول بدون طابور لأن ايام رمضان في بعض المدارس ماكانش في طابور صباحي...
🌱وفي الوقت اللي فيه الطلبه يكونوا في مدارسهم...
كان حسين دايرة طاوله ييبع عليها في الخضرا...
اغلب ايام رمضان كان مسيب المدرسه ويخدم لين يجي وقت الخدمة في المطحن يمشيله طول....
وطبعا مافي حد من عيلته يعرف بالحاجه هادي...
🌱🌱🌱🌱
الساعه 12:00قبل الظهر..
صفيه وهي تخيط في كم كبوط بنتها؛اهو بنتي قريب نكمل.
اميمه "بنتها":ماما وقت....
قطعت صفيه حيط السلك بسنونها..بعدين ربطت اخره في فالخياطه.. وفردت الكبوط وقعدت تشوف فيه...
بعدين قالت؛هي تعالي البسي...
وجتها اميمه وقعدت تلبس فيها وبعد ماكملت...
قالت اميمه؛امي ماعنديش قلم..
صفيه؛كيف! مش خدالك بوك قلم يومها..
اميمه بضيق؛خنبوه مني..
صفيه بتهكم؛سلمك فالحه...
اميمه؛باهي ماما نبي قلم..
صفيه تنهدت بضيق وقالت؛راجي شويه..
وناضت ومشت لدارها..
واميمه مشت خدت شنطتها...
شويه وجتها امها وهي تقول؛خودي بنتي هدا دينار اشري بيه قلم واللي يفضل رديه..
اميمه:باهي..
خدت البنيه الدينار وهي فرحانه اول مرة تشد دينار بحاله..
لبست سبيدروها اللي باد من كثر الاستعمال...
ومشت طلعت من الحوش..
صفيه؛حطي برنوسك ع راسك...
اميمه؛باهي..وحطت برنوصها ع راسها...
صفيه؛ردي بالك من الفلوس..
اميمه؛باهي..
وسكرت الباب..
ومشت بطريقها لحوش عمها..
وصلن فيه ودقت انفتح وطلعت غرفه..
غرفه؛هيا بسرعه..
اميمه؛هيا..
وطلعوا يجروا بإتجاه المدرسه والمطر تبشبش عليهم...
وين وصلوا في المدرسه..
كانوا طالبات الثانويه طالعات...
والصغار وين يشوفوهم يبدوا يغنوا..
"صغار الصبح يبوا الدبح"
عائشه بضحكه؛غير شن درنالكم بس..
سدرة:كان نشدهم واحد واحد نقص لساناتهم...
"سدرة"
فايزة بإبتسامه؛امورات..
سدرة:خشي بسرعه تحركي..
غرفه؛باهي..
وخشوا يجروا الزوز..
وهما طلعوا من المدرسه..
نسرين؛حسها خوفتني ابلة الرياضيات..
سدرة؛شهادة ثانويه حبيبتي هادي اكيد القرايه بتكون اوعر..
فايزة؛اني مش مدورتها بكل غير ننجح ونخش دورة المكياج متاع نجوى الرقيعي ومرات نخدم معاها..
عائشه:يخلوك خوتك؟
فايزة؛طز فيهم المهم وبيي راضي..
نسرين؛سعدودك بوك دايرلك شخصيه قدام خوتك مش زينا حني عطينهم الضي الاخضر يديروا فينا مايبوا حتى الجالي بدي يتفرعن...
سدرة؛لازم يكون لخوتك الولاد قدرهم يا نسرين..ياريت عندي خوت زي خوتك تمنيت راهو عبينا عليه في هلبه حاجات..
سكتوا البنات وهما مضايقات..
فايزة خطروا عليها خوتها اللي يتعاملوا معاها بشده وقسوة وكأنها مش اختهم..
وعائشه اللي يتعاملوا معاها خوتها وكأنها خدامه لااحترام لاتقدير...
اما نسرين فكان واجعها حال سدرة المجروحه من خوها مختار اللي خذلهم وارتكب في حقهم غلط كبير الناس كلها سمعت بيه ووطالهم روسهم...
كسر صمتهم صوت يوسف وهو يقول؛السلام عليكم..
ردوا عليه..
وقدمتله سدرة وقعدت تمشي هي وياه والبنات وراها وهما يهدرزوا..
لين اللي هدا وصل لحوشه...
🌱🌱🌱🌱
الساعه 3:30بعد الظهر..
طلعوا طلبة الابتدائي من المدرسه ومن بينهم بنات العم..
غرفه واميمه...
وغرفه تهدرز ماتبيش تسكت بكل...
غرفه:بابا قال بيشريلي قفطان منفوخ زي متاع سالي..
اميمه؛حقه!؟
غرفه:ايه.. حقه شرالي خاتم ذهب يهبل قالي تو نعطيهولك تلبسيه في العيد..والكندرة قتله نبيها طقطق يابابا قالي باهي..
اميمه تسمع ومتشوقه وخاطرها في كل اللي قالت عليه غرفه بس من وين بيجيها مسكينه..!؟
وصلوا الزوز قدام دكان مفتوح..
غرفه؛بنشري حلوة كاكاويه ..
ومشوا الزوز خشوا للدكان...
اميمه قعدت دور بعيونها ع الاقلام..
بس رغبتها خلتها تركز ع حلوة الكاكاويه اللي عمرها ماذاقتها تشبح في بنات فصلها ياكلوا فيها وهي تتسهف وغرفه تشري قدامها وتاكل وماتعطيش فيها...
قعدت محتارة بين رغبتها..وبين اللي مفروض ديره..
بس تقعد طفله..ومسكينه محرومه...واللي تنحرم منه لما تحصل فرصه انها توصل فيه مش حتتردد..طفله..
طلعت الدينار ومدت للراجل وقالت؛حتى اني نبي..
غرفه شبحتلها بتعجب..
والراجل خدي منها فلوس ومدلها...
وبعدين طلعوا هما الزوز...
قعدت اميمه تاكل في الحلوة في الطريق...تبي توصل للحوش قبل لتكملها...
بس للأسف مقدر ان عيون بوها تشوفها وهو واقف ع سيارة تبيع في الخضرة...
جاها بسرعه وشدها من الرقبه متاع لباسها المدرسي وقال:شن هدا؟
البنت وهي ترعش؛حلوة..
وغرفه تشوف لعمها بخوف..
عبدالمطلب بحده؛من خداهالك؟
غرفه؛هي خدتها كان عندها دينار..
فنص عبدالمطلب وقال:دينار!!من وين جبتيه الدينار ياكلبه..
وضربها كف..
وجبدها وهي بدت تبكي بفجعه...
وغرفه ماشيه وراهم وهي تاكل في الحلوة متاعها...
لين وصلت للحوش وعمها فايت قدامها بأميمه وهو يهزب فيها..
دقت غرفه ع الباب..
شويه وفتحتلها سدره...
خشت وهي تقول:عمو عبد المطلب شد اميمه وعطاها كف ع خاطر خنبت منه فلوس!
سدرة سكرت الباب وهي تقول بصدمه؛كيف!؟
غرفه:ايه والله..
ويجيهم صوت عمهم العالي وهو يعارك..
"من وين جبتيه الدينار من وين خديتيه"
صفيه وهي ترعش؛والله العظيم مرة جي الراجل متاع الخبزة اليابسه والله عطيته اللي عندنا عطاني ثلاته دينار والله العظيم..
ع خشة بوه عليهم وهو يقول بنهر؛بعد هالعمر اللي عاشاته معاك في القله والبهدله جاي تخنب فيها ياسفتول!
وصفيه تبكي وهي ضامه بنتها..
عبدالمطلب كتم غضبه غصب عنه وهو يقول؛ماخنبتهاش يابوي سألتها بس من وين جابتهم..
الحاج الواعر؛عندك باهي هكي ترعش فيهم فهالأيام المباركه!..امشي انتلف اطلع...اطلع..
عبدالمطلب:بوي!..
الحاج الواعر بغضب شديد؛قلت اطلع..
هز عبد المطلب راسه ومشي طلع من الحوش وهو معصب..
وعلي الواعر التفت عليهم وقال؛معليشي بنتي معليشي صبري روحك..الله غالب هدا ولدي ماعندي ماندير..
صفيه تحشمت من شيبانها ومسحت دموعها وقالت؛سامحنا قلقنا راحتك..
علي الواعر؛بري سلم بنتي بري كملي باقي حوستك وخلي اميمه معاي اني تو نطيب خاطرها..
صفيه؛ربي يطول في عمرك ياعمي..بري لجدك بنتي..
بعدت عنها اميمه ومسحت دموعها ومشت لجدها اللي شدها من يدها وقال؛تعالي..
مشت صفيه للكوجينه..
وعلي الواعر قعمز حفيدته جنبه وقعد يهدرز عليها ويطيب في خاطرها...
🍀وبري ياأيام وتعالي يايام...
وجي يوم سبعه وعشرين رمضان..خلاص قرب العيد..
وهدا ويه اغلب الناس تطلع تشري دبش العيد..
🌻فردوس:اني نبي بلوزة وقونه زي اللي خدوا منهم عواصف واجتياح..
وردة وهي تعجن في المقروض وتشبح لبنتها ع جنب قالت: سماهم عواطف ونجاح..
فردوس؛ع المهم نبي زيهم بالزبط..
سدرة؛شن تحسابي بوي انتي راقد ع ع كنز!
فردوس:من كثر مانشروا حني من العيد للعيد ناخدوا حاجه مقومه وفي الصيف زوز توت وحاجه ماتسواش تبي حتى فالعيد نشري هربوده.!
وردة؛من امتى بوك ياخدلكم في هرابيد يافردوس!
فردوس بنرفزة؛بالله فكيني يام..
سدرة وهي تشوفلها بعقدة حواحب؛خلاص اشري ماتبي اني مانبيش لبس عيد..
وردة؛العفو!
سدرة؛يام ماعندي ماندير بيها لبسة العيد معاش صغيره اني..
وقفت عجن وقالت؛كلكم تشروا يعني كلكم ايوه عمرها ماصارت ولاتصير بنات لطفي الواعر يبانوا ناقصات قدام الناس..
سدرة؛مش هكي يام.
وردة بحزم معاش تناقشيني سدرة خلاص..وانتي ع قد الفلوس بتاخدي وتسكري فمك..
فردوس تأففت بغضب ومشت طلعت من حداهم.
تنهدت امها بضيق وقالت؛امتى بدير عقل هالبنت..
سدرة؛يللا ربي يهديها...قوليلي يام شن بديري تاني..
وردة؛اعجني كعك حلو...
سدرة:حاضر....
🌱وفي الحوش اللي جنبهم..
عبدالمطلب؛وشن تحسابيني قاعد ع بنك روما! اللي حطيته في سريت الحلويات بروحه يهد الحيل..
صفيه؛معقوله ياراجل البنيه تعيد بلبسه من غير كندرة كيف جت هادي!..
عبد المطلب؛هدا اللي عندي..دبري خودي من حد ولاديري حل اني معاش عندي فلوس..
ومشي طلع من حداهم...
صفيه بعد طلع قالت بغضب مكتوم:ان شاء الله معاش يولي عندك..مش ساد خدالها هربوده ماتسوى من سوق الجمعه ماني عارفه كيف بنلبسهالها بنيتي في العيد..ناري عليها...
🌱وفي الحوش اللي قدامهم..
نسرين؛شن عجنتي يام..
مغليه؛مقروض وقرينات وغريبه..
نسرين؛اللمه في حوش
نا العام هدا..
مغليه وهي تغسل في ايديها:ايه.
ع خشة خديجه؛اقنعت المهدي يرفعنا للسوق..
نسرين؛عندك قوة اقناع رهيبه..
خديجه بغرور؛طبعا ياماما مالا شنو حتى اني خديج..
مغليه؛هي انتي وياها ابدوا وتوا صفرة البسيسه..
نسرين؛حاضر...
🌱🌱🌱🌱
الساعه 11:00ليلا..
في احد الاسواق المعروفه انذاك ..
كانت الدنيا زحمه ودوشه واصوات متداخله في بعضها..
وعالم مخلطه..
وهالشي اللي خلا احمد يلحق فايزة لطلعه السوق بعد شافها شن لابسه وشن حاطه ع وجهها..
سدرة؛خل نخشوا نشوفوا هدا..وشدت يد غرفه بقوة..
وخشت هي والبنات...
واللي هدا توزعت في مكان وقعدت تختار...
فايزة وقفت ع بدله قونة قصيرة شتويه عجبتها هلبه..
شويه جاها واحد قال..
؛يابنيه يابنيه.
هي تجاهلاته ودايرة روحها لاهيه في اللبسه..
:غير اشبحيلي شويه بس..
"تفضل ياخونا شن عندك هني"
هي طول شبحت لصاحب الصوت..
:وانت شن دخلك..
احمد برفعة حاجب؛بنت جيرانا هيا..
بإحراج رد عليه يقول:اها مالا سامحنا ياخوي..
ومشي ع حاله.
احمد شبح لفايزة بحده وقال؛عاجبك هكي!
فايزة بإنزعاج؛فوتني ترا...ومشت..
هو لحقها وقعد يقول؛لامتى بتقعدي هكي قوليلي دايرة ماتبي ومش مدورة كلام الناس عليك وع ماليك..
فايزة وهي هاربه؛اللي يسمعك يقول مدايرة عار..احترم نفسك خيرلك..
احمد؛حاشاك من العار..لكن والله الا غلط يافايزة لبسك وشكلك غلط..
وقفت والتفتت وقالت بحده:طالعه من الحوش قدام عيون بوي ومدام هو راضي طز فيهم كلهم واولهم انت ..وياريت معاش تلحقني ودير زي الصايع اللي بكري..
ومشت وخلاته وهي معصبه...وخلاته موجوع ومعصب منها ومحتار شن يديرمعاها..
يحبها ويبيها بنيه صافيه ومش راضيه حالها ومش قادر يدير لها شي مدام هي ماتشوفش فيه..
ماقدرش يمشي ويخليها قعد وراها وعيونه مافارقوهاش..
من جهة تانيه...
كانت فردوس لاهيه مع نسرين يدوروا شن ياخدوا..
وسدرة لاهيه مع غرفه..
سدرة؛خلاص غرفه هدا طلبك..
غرفه بعيون يلمعوا بالفرح؛ايه..
سدرة؛باهي..وخدت القفطان اللي كان سعره غالي وانجبرت انها تتنازل عن لبستها متاع العيد باش ماينكسرش خاطر اختها..
"ماخديتي"
ابتسمت وهي منفجعه بعدين قالت؛خلعتني!
ابتسم ع جنب وهو داير روحه يتفرج ع الدبش:شن حالك..
سدرة وهي دايرة روحها تشوف في الحوايج؛الحمد لله..شن حالك انت...
المهدي؛الحمدلله..شكلك مش ناويه تاخدي..
سدرة؛نحس في روحي كبرت عليها..
المهدي:امي ماقالتش كلامك هونا خدت هي الاولى..
ضحكت وقالت؛ربي يحفظها..
المهدي؛تسلمي...خيرك حاسك مش مزبوطه وجهك مش عاجبني.
سدرة تنهدت وقالت:وطلعت وخليت امي تبكي خاطر عليها مختار..
المهدي؛ربي يهديه عمي لطفي هو اللي مايبيش يسامح..
عقدت حواجبها وقالت؛يسامح ع شني..عمله زي هادي والله ماتنغفر..لو مكان بوي مزقت ورقته من الكتيب..
المهدي؛سدرة مش هكي..مفروض انتي تحنني قلب بوك مش تزيدي تغلظيه..
سدرة؛ولامرة دويت قدام بوي كلام مكتوم وطلعته بس..
المهدي؛معليشي تفوت بإذن الله تفوت وكل شي يرجع زي ماكان..
سدرة تنهدت وقالت:ان شاء الله..
ابتسم المهدي وقال؛عجبتني الشاربه هادي تمشي معاك..
يدوب شبحتلها سدرة ع جنب وابتسمت .
المهدي شبحلها بطرف عينه وقال:حلوة؟
هي هزت راسها بإيجاب وقالت؛تو نويللها..
وطبست راسها مالقتش غرفه قعدت دور عليها بعيونها لقتها مع فايزة مشتلها طول..
هو قعد يتبع فيها بعيونه وهو مبتسم..
🌱🌱🌱🌱🌱
في وسط حوش محمد شنيبه...
كانوا الجارات ملتمات وفي وسطهم صفر كبار..
اللي تنقش في المقروض..
اللي تكركب في الغريبه.
اللي دير في الكعك الحلو..
واللي تنقش في القرينات..
وردة أسطى في المقروض..
وصفيه تعاون فيها...
ومشتده تحب دير الغريبه هدا علاش قعدت عليها..
وتعاون فيها فيها عتيقه..
والقرينات شادتهم جارتهم نجمه ومعاها جارة تانيه..
نجمه؛والله الفجي فيها مسكينه حالها ماتوديه للعدو..
وردة؛راجلها هدا ماينحسبش ع الرجاله اللي ملوح مرته وصغويرته ولادورهم في رمضان ولاعيد..
نجمه؛امه حاشاك محراك شر معبيه راسه وقالتله ماتصرفش عليها بش تولي غصب عنها...
وردة؛ياويلها من ربي..
مغليه؛لكن هي زنت ع خراب عشها مابتش تساير مراة كبيرة في عمر امها..
وردة:ظالمه هادي يامغليه..
مغليه؛معلشي مراة كبيره وكان امها تتحملها عادي وتفرض ع الغير يتحملها..
صفيه؛مش هكي يامغليه..المراة زمطتت هلبه وياما حضرتني في مشاكلها هي وعزوزتها العزوز هي اللي ماتبيش الخير..
مغليه؛ماتقنعنيش ان في كنه كويسه وعزوز حرفه كذب الهم كله يجي من الكناين زي هديكا غزاله مش قالوا مخليه عزوزتها بروحها في دار والماكله تلوحلها فيها تلويح تقول كله حاشا المصنتين..
كلهم بأصوات متقطعه؛حاشاك من السو..
وردة؛زي مافي العافن في الباهي ومش كلهم زي بعض يامغليه..اني توا اللي قاهرني الصغويره ياناري ماظني فلوس البوريك اللي كانت تبيع فيه امهم يحيبلهم دبش عيد..
نجمه؛دبش عيد مساكين فرقة حالهم..
وردة؛والله مايجي منه صغويرة الشارع كلهم يعيدوا وهما لا..
مغليه؛بوهم ملزوم بيهم ياوردة..
نجمه بنبرة فيها شي من رمي الكلام؛مامنهم اللي زيه نسوا صغارهم ومعاش دوروهم في جرة تمحيش الاناثي الله لاتسامح من يفرق بين صغويرة وبوهم..
صفيه ووردة شبحوا لمغليه لقوها تشوف لنجمه بحده..
ونجمه تنقش في القرينات وتحط فق السفرة ولاكأنها قالت حاجه..
مشتده؛اهو تمت السفره هادي كلموا واحد من الولاد يرفعها للكوشه..
طلعت مغليه سيبت اللي دير فيه..
ومشت رفعت السفره وع وجهها تبان ملامح العصبيه..
وطلعت...
صفيه:خل نرفع سفرة المقروض هادي واتيه..
ومشت ورا مغليه..
في الممر..
مغليه ؛هادي اللي ردتيني اني وياها وقلتيلي صفي نيتك ناحيتها يامغليه!
صفيه؛مادوريهاش خليك انتي الكبيره يامغليه..
هزت راسها وهي ساكته وفي داخلها تهدد وتتوعد...
وصلوا في الباب وبدوا ينادوا..
مغليه؛جالي..
صفيه؛حسين..
خشوا يجروا من برا...
مغليه؛سرت كبوطك سرته تو تجيك بردة ع صدرك ياهمي..
الجالي:حاضر..وسرت كبوطه بعدين فال..هاتي يام..
خدي منها الصفرة وحطها ع راسه وطلع ..
مغليه بالشويه عليك..
بعدها مدت صفيه السفرة لحسين؛قوله ردبالك تصهدها..
حسين خدي السفرة وقال:حاضر يام..
وحطها ع راسه وطلع حتى هو..
وكان الشارع كلهم شباب صغار ماشين جايين بسفر الحلويات..
🌱وفي السوق..
كملوا البنات شري دبش..
فردوس وهي فرحانه؛هذا وين تريحت..
فايزة بضحكه؛حتى اني..
خديجه؛سدرة بس اللي ماخدتش..
سدرة؛مانبيش..
قلبت خديجه عيونها وهي ساكته..
نسرين؛ويييه..مازال حنة امي..
فردوس:فكرتيني..
سدرة؛ع اساس انتي بتحنيها...!
ضحكوا البنات..
وفردوس مطت شواربها بملل وقعدت ساكته..
وهما ماشيين ..
في واحد حط عينه ع سدرة..
لحقهم وجاها...
:ماشاء الله والله ماشاء الله..
سدرة قعدت تمشي بسرعه والبنات معاها..
وهي خايفه من المهدي لو يلاحظ.
والشاب مازال في جرتها...
نسرين:غبارتنا غبارة المهدي!..
:غير شويه بالله عليك والله عجبتني...
وتجيه جبده من رقبته وبعدها بونيه ع وجهه ويلحقها كف..
والشاب معاش وعي بالشي الضربات تنهال عليه وخلاص..
سدرة بصدمه؛مهدي!..
نسرين؛مهدي خلاص يامهدي..
خديجه وهي تندب؛ياحليلي هي..
والمهدي بصوت غاضب مخيف؛تحركي انتي وياها...
هما هربوا طول وسدرة قعدت واقفه ولت نسرين جبدتها..
والمهدي يضرب وهو يقول؛كان مافيش من رباك اني نرييك ياكلب..
وجوهم يحزوا فيهم عن بعض .
ومافكوا الشاب من ايدين المهدي الابالسيف والشاب وجهه كله دموات..
شويه جاه احمد قعد يهدي فيه بعدين طلعوا الزوز من السوق...
وين وصل برا..
لقي سيارة يوسف واقفه وبنات عمه واخته سدرة فيها..
كانت  تشوف للمهدي وقلبها يدق بقوة خوف عليه..
هو ماباش يشوفلها مشي ركب السيارة اللي كانوا فيها..
خديجه ونسرين ومعاهم فايزة..
يوسف؛شن سبب العركه..
فردوس من الخوف قالت:مش عارفين.
يوسف؛اكيد في حد ناشبكم..
سدرة وهي تشوف لسيارة المهدي:خلاص يوسف بالله عليك تحرك..
تنهد يوسف وهو مضايق وتحرك طول..
وتحركت سيارة المهدي وراههم..
كان المهدي طول الطريق ساكت ومن داخل قايمه في داخله عاصفة غضب..
وخواته من داخل يندبوا لانهم عارفين تو بيفش غله فيهم..
اما سدرة فكانت مضايقه ع الاخر من الموقف اللي صار وعارفه المهدي بيحط عليها اللوم لانه مايحبش طلعة والسوق وحاول يمنعها عنه قبل لكن ماقدرش..
لان مافي حد يقدر يفرض شي ع سدرة غير لطفي الواعر بوها..
خشوا لشارع القهوة..
ودرسوا الزوز قدام حوش محمد شنيبه..
نزلوا البنات وطول خشوا للحوش بعد مانسرين فتحت الباب..
اما اما يوسف جي للمهدي وهو يقول:شن صار غادي..
مهدي؛شي مادورش..
ع جية احمد وصل فيه وقال؛شن جو توا..
المهدي:تمام..
شويه فات قدامهم الجالي رافع سفرة الكعك..
المهدي:جالي تعالى..
جاه الجالي بالسفره..
وبدي المهدي ياخد في طروف كعك وهو يقول للي معاه :تفضلوا ياولاد..
وهما عاد ماعندهمش مانع خدوا ماكتب الله..
بعدين المهدي قال؛هي برا..
الجالي بصوت منخفض:غير شن خليتوا فيه..
المهدي؛تشربوا قهوة..
احمد؛ياسلام..
يوسف بضحكه؛مانقولش لا..
ع فوتة ولد رافع سفرة فوق راسه..
المهدي:رضا تعالى تعالى..
جاه الولد طول..
المهدي بإزدراء:لاالغريبه مش صحاب اني وياها..
يوسف؛تحصل في الرقبه..
احمد؛توكل ع الله توكل..
الولد في نفسه"الحمد لله"
المهدي:مجدي تعالى تعالى...
وجاه طول...
لقوه رافع بشكوطي "بسكويت" بالسكر..
وبدوا ياخدوا ويحطوا فوق السيارة..
المهدي:هي برا...
ومشي الولد وهو قريب يبكي..
ع فوتت ولد تاني شافهم شن يديروا طلع يجري..
المهدي؛تي باهي باهي يابورا تو نحصل عليك....ان شاء الله تتكردس بيها...
ويوسف واحمد يضحكوا..
ومسكين مالحقش يكمل طريقه ويجي طايح بالسفره واللي فيها كله جي لوطا..
احمد بصدمه؛حي ع امه!
ويوسف حط يده ع فمه وهو مصدوم..
المهدي بإبتسامة ثقه:ماشي نجيب صونيه وجاي..
ومشي..والشباب يضحكوا...
🌱داخل..
انضموا الصبايا للنساوين وقعدوا يعاونوا فيهم..
وردة بضحكه:عطيهم الهني وخلاص..
مغليه:والله الحلويات اللي نديرهم ندس فيهم فالدسه الجن الازرق مايوصلها بش مايطقش فيهم المهدي..
مشتده؛اللي بياخدها تشدها ع الحلوات وخلاص..
مغليه بإبتسامه:حتى هي شاطره فيهم..
ابتسموا النساوين...
والبنات قعدوا يشبحوا لسدرة اللي كانت بذوب من الخجل قدام امها..
وامها دايره روحها مش مركزة ولاهيه باللي دير فيه..
خديجه؛خالتي نجمه وين عواطف ونجاح؟
نجمه:ياحنه طالعات الصبح للسوق وهما صايمات وماروحوا الا قبل الفطور..
جويده:طولوا هلبه..
خديجه؛تلقي كل وحده فيهم ادور في لبسه خير من التانيه..وضحكت ..
واللي حواليها شدوا ضحكتهم..ماعدا امها اللي طلقتها قصدا..
نجمه:اهم شي انتي لقيتي حاجه تجي عليك ضاعفه بكل ياخديج شكلك تخممي .
خديجه؛وع شن بنخمم الحمد لله عايشه في خيار خيري..
نجمه:ياهي طمنتيني..
مغليه شبحت لصفيه..
وصفيه تغمض في عيونها وتسكر..بمعنى..معليشي..
سكتت مغليه وبلعتها..وخديجه كذلك بلعتها بس مؤقتا..
وسدرة تراقب فيهم...
غيرت فردوس الموضوع لما قالت؛وين عويشه نحساب بنلقوها هني..
جويده:عويشه تصلي في القيام فالايام الاخيره ماتطلعش بكل..
كلهم بصوت واحد:عطاها ربي...
وكملوا بعدين شغلهم اللي قعدوا فيه للساعه اربعه الصبح...
وبعدين اللي هادي خدت حصتها وروحت وطبعا تقاسموا ع بعضهم انواع الحلوات...
بس قبل لتطلع سدرة شدتها نسرين..
🌻نسرين؛خودي..
سدرة بإستغراب؛شن هدا!؟
نسرين؛ماراضلكش تقعدي من غير لبس عيد.
سدرة بصدمه:علاش !؟ قتله مانبيش !
نسرين:خودي بابنتي شراهم خلاص..
سدرة شبحت للكيسه شويه بعدين قالت؛هاتي..وخدتها...
نسرين رفعت ايديها وقالت؛ياربي ياربي نبيه زي خويا ياربي..
ضحكت سدرة وقالت:تصبحي ع خير...
وجت بتطلع جي خاش..
قلب وجهها عليها وخش..
وهي ضايقت ومشت طلعت طول..
نسرين شدت ضحكتها وقالت؛مهبله...
🌱🌱🌱🌱
وبعد روحوا وردة وبناتها...
طول فردوس خشت فراشها تحت البطانيه الدافيه..
وغرفه كذلك...
اما سدرة بعد السحور وصلاة الفجر..
قعمزت لأمها تحني فيها..
سدرة؛رفعتلها عشرة اكياس قهوة..
وردة:خديتي منها فلوس..
سدرة؛مال شنو يام خدمه هادي مش فاتحينه سبيل..
وردة ابتسمت وهي تشوفلها كيف تحني فيها..
قامت سدره عيونها شافت امها كيف تشبحلها..
ابتسمت وباست رجل امها اللي مش محنيه بعدين قالت:قولي شن عندك ورديتي قولي..
وردة بإبتسامه:كان جاك المهدي خطبك تقولي باهي..
ارتبكت وتحشمت ومعاش عرفت شن تقول..
وردة؛عاجبني هلبه راجل بمعنى الكلمه ومتعلم ومستقبله مضمون وعينه عليك من صغرك ..
سدرة وهي متحشمه:مش وقتها المواضيع هادي يام ...
وردة بضحكه:نراجوك تكملي الثانوي ونشوفوا شن يصير..
سدرة وهي بذوب من الخجل:حركي رجلك هكي يام..
حركتها وردة وهي تشوف لسدره وتضحك...
"صحة صحه"
شبحوله وابتسموا..
ووردة قالت:سلمك..ماجاكش نوم؟
لطفي:لاخلاص بنرقد غير درت دورة ع المطحن..هي ربي يعاون..
وردة بإبتسامه؛تسلم..
وسدرة تحني في امها وهي مبتسمه...
~~~~~~~
خديجه:يام ماترقديش..
مغليه والنعس غالبها؛لا مش راقده..
نسرين؛يام نجيبلك قهوة..
مغليه؛جيبي جيبي..
خديجه:لا مصحصحه هلبه يام..
مغليه وهي مش واعيه لروحها؛ايه ايه...
قعدوا يضحكوا عليها وهي خلاص بترقد....
~~~~~~~
فايزة وهي تلف في رجلين امها:واخيرا واخيرا...
مشتده:ساويلي المخده بنرقد..
فايزة ناضت وساوت لأمها المخده..
بعدين فرشت حداها ورقدت...
~~~~~
جويده؛ربي يرضى عليك دنيا وآخره ياعويشه..
عائشه؛يارب...غدوة بإذن الله نحنيلك شعرك..
جويده؛ان شاء الله...قوليلي بنتي راضيه ع القفطان اللي جابه بوك..
عائشه؛راضيه يام وعاجبني هلبه ..
جويده؛ريحتيني يابنيتي...
عائشه؛خل نساويلك مخدتك بش ترقدي يام...
وساوتلها المخده ورقدت جويده وهي تدعي لبنتها...
وعائشه رقدت حداها...
وكل وحده من البنات...
ماجاهاش النوم وهي تفكر في الامتحانات اللي بعد العيد..
ماعدا سدرة اللي كانت تراقب في جسم امها كيف يتحرك
عرفتها تبكي...تبكي غياب مختار اللي هلك قلبها....
تنهدت وقالت في نفسها"يارب فرج"
🌱🌱🌱🌱🌱
تاني يوم....
الساعه11:00صباحا...
"طالع"
محمد وهو يلبس في كندرته؛ايه شن تبي..
مغليه؛نبيك ترفعني للسوق..
التفت وقال؛تو مش بناتك امس كانوا في السوق!
مغليه؛نبي حاجه اليوم خطرت عليا..
محمد بتذمر:لاحول ولاقوة الابالله...
مغليه؛وخيرك شن وراك ولاعندك مشاوير تانيه!؟ ورفعت حاجبها...
محمد ماعنداش طاقه يخش معاها في جدال لهذا قال؛لاتانيه لاتالته..بري البسي وهيا..
مغليه؛ماهو من الاول..
ومشت بتلبس..
وهو يقول؛ربي يصبرني ع مابلاني..
🌱ورفع محمد شنيبه مرته للسوق...
خدت لبس صغار ...وبعدين قالتله يخطموا ع حوش جارة في اول الشارع..
~~~~~
مغليه؛امس بس سمعت بيك والله ووجعني حال الصغار نضت من الصبح قلت لعمك يرفعني للسوق والله مايهنالي عيد وصغارك محرومين من فرحة العيد..
الجارة بنفس مكسورة:بارك الله فيك خالتي مغليه..
مغليه ماردتش عليها وقعدت تشوف للصغار كيف فرحانين بالدبش وهي تقول؛ياناري كيف فرحوا بيهم  يقطعوا القلب..
والجارة تشبح لصغارها ودموعها في عيونها...
وطلعت من عندها مغليه وهي فرحانه بروحها وتراجي امتى تحكي باللي داراته....
🌱🌱🌱🌱🌱🌱
ليلة العيد...
وردة تخدم ع المكينه متاع الرشده وهي تفرد في عجينة الدبله...
كانت مبدعه فيها مافيش مراة في شارع القهوة ادير في الدبله زي وردة..
كانت دير في كمية كبيرة بش تبعت منها للجيران مع الحلويات اللي عسلتهم..
وبعد مابعتت للكل مش بروحها لنفس الجاره...
~~~~~~
وردة بإبتسامه؛اهم ع السبر..
الجارة بإبتسامه؛عطيك الصحه خالتي وردة..
وردة؛وخودي هادم؟
الجارة شافت الشكارة لقت فيها لبس قالت:شن هدا؟
وردة؛حويجات مش من قيمة صغارك ريتهم في السوق تخيلتهم عليهم خديتهم..سامحيني مش حاجه كبيره ومن قدركم..
الجارة؛شن تقولي ياخالتي غير المحسبانيه سادة..
وردة؛يلبسوهم بالهني ياربي وكل سنه وانتم طيبين..
الجارة بإبتسامة امتنان:ان شاء الله كل عام وانتي حيه وصحيحه..
🌱🌱🌱🌱🌱
وفي الحوش..
كانت غرفه تحط في قفطانها ع الفراش وجنبه توكاتها ولعبتها وباكوا كندرتها وهي تشوفلهم بفرحه وحماس شديد..
وحداها سدرة مقعمزة حاطه قدامها مراية وهي تشوفلها وتحط في شعرها مشابك الشعر ما دارتله دوامه...
وجنبها فردوس اللي كانت سابقتها بالدوامه وراقده وحاطه ع وجهها قناع زبادي..
سدرة:الياغورت بالغلا والكوا انتي اللي تحطي فيه على خليقتك..
فردوس؛مادخلكش..
ع خشة امهم عليهم حولت جلابيتها وقالت:بوكم ماروحش؟
سدرة لبست المحرمه وهي تقول:لايام ماروحش..
وردة؛مالاخل نمشي ندير سواك...
فردوس؛خليلي يما..
فنصت سدرة..
وردة بصدمه؛لاانتي معاش تتحشمي بكل!
فردوس:باهي يام زوجوني بش ندير سواك..
ورده؛اني نمشي لداري خير..ومشت طول..
سدرة بعد مشت امها حذفت ع اختها المشط..
فردوس؛حقيرة..ورداته عليها...
🌱وكانت الاجواء في كل حوش نفس الاجواء كلها استعدادات وابتهاج وحماس وفرحة اطفال...
وفي الشارع الناس تمشي وتجي اللي هدا يلحق ياخد حاجاته في أخر لحظه...
🍀🍀🍀🍀
ومرت الساعات..
وجي وقت صلاة العيد..
سدرة في الكوجينه دير في الفطيره..
وامها توتي في سفرة الفطور...مع الحلويات وقهوتهم اللي ريحتها تنشم في الشارع...
بعد كملوا الحوسه..
قعمزت وردة لغرفه بعد مالبست بش ديرلها شعرها...
وسدرة وفردوس يوتوا رواحهم في الدار..
فردوس؛اللبسه من المهدي ولا؟
سدرة:مادخلكش..
فردوس؛لكن والله ذوقه حلو..
اكتفت سدرة بإبتسامه..
فردوس:اشبحيلي قولي شن رايك فيا..
سدرة شبحتلها وقالت بإبتسامه؛حلوة...
🌻طلعوا بعد سمعوا بوهم جي...
عيدوا عليه...بعدين هو خدي غرفه ع تركينه وقعمز ع روس صباعه وطلع خاتم ذهب من جيب الفرمله ولبسهولها..
غرفه؛محلاااه..
وردة؛تعيش وتجيبلهم..
شبحلها وقال؛ونجيبلك..
ابتسمت وبناتهم يمرروا عليهم نظرهم بإبتسامه...
🌱بعدين مشوا لحوش عبد المطلب بش يعيدوا غادي..
طبعا رفعوا معاهم بضاعه غير الحلويات بش يطيبوا مع بعض..
وين خشوا غادي عيدوا ع الكل...
والجد يعطي فالعيديه ماكتب الله..واللي ياخد خمسة جني هداكا الوقت مازيه حد..
وردة:هاتي غرفه الفلوس ندسهم..
جتها وهي تقول؛حاضر ماما..
واميمه تشبح للبسها وقفطانها وتشوف للخاتم اللي يلمع في يدها..
وهي مسكينه لابسه ماليه ع سروال جنيز واسع ودايره شعرها بستيرشات قدم..
حتى جمالها ضايع في لوحتها المرسومه بعبث...
علي:اني اللي وصلني ان سدرة تخدم في المطحن خير منكم ..
يوسف بضحكه؛الكذب حرام والله ماتغيب جهد..
علي؛تي هادي بنت جدها..وطبطب ع ظهرها..
وسدرة قالت؛من يومي..
لطفي:لاهي يصير فيها كلام تاني..
فردوس:جرب نار الغيره..
قعدوا يضحكوا... وناضوا النساوين بعدين طيبوا الغدي فاصولياء بالوطني ..
وتغدوا ...وبعد الغدي...
روحوا عيلة لطفي لحوشهم...
🌻وردة؛ارقدوا ساعتين بس بعدها نطلعوا نعيدوا ع الجيران..
هزت سدرة راسها بإيجاب ..
وفردوس قالت؛حاضر..
🌻وبعد الغيبوبه المعروفه متاع العيد..
ناضوا وجهزوا ارواحهم...بش يلودوا ع الجيران ويعيدوا...
صفيه؛هيا اميمه بنتي بسرعه..
لبست شاربتها وطلعت..
فهالوقت.
اميمه كانت واخده زر لبدله لأمها لونه ذهبي..
مررت في فتحته خيط وربطاته ع صبعها بان كأنه خاتم..
فرحت بيه هلبه لما شافت شكله وقعدت تحرك في ايديها وهي فرحانه بيه..
"هيا ياأميمه"
اميمه؛جيت ياماما..
ومشت طلعت وهي تجري ومتحمسه...

#ياليلة_العيد
#طوبى

.....يتبع...