طوبى الجزء الاول

التاسع والعشرين

# طوبى "شارع القهوة"
#جمان_فريد
#الجزء_التاسع_والعشرين" عاصفه فبراير"
الله أكبر..الله أكبر..لاإله إلا الله
الله أكبر الله أكبر ولله الحمد...
أحيوا سنة التبكير في هذه العشر المباركه..
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
في جو مغيم...
وريحه الدنيا كلها مطر...تنبأ بقدومه
وصت هالأجواء القاتمه
كان واقف يستنى فيها..
ويتفكر في اللقاءات اللي جمعتهم ع انفراد..
مافيش لقاء فيهم خلا ذكرى حلوة..
كلها ذكريات تفتح في جروح القلب وتوجعه..
القلب اللي دقاته تتلخبط لما يشوفها..
واهي جايه وهو يشوف فيها تقدم ناحيته..
ملامح وجهها كانوا هما ملامح وجهها في اللقاءات السابقه..
ملامح توتر ع ضيق..
مافيش لمحة للإبتسامه نهائي...
اساسا ظروفهم..وضعهم..واقعهم..مافيشي حاجه ترسم الابتسامه ع الوجه..
هو كان واقف وحاط ايديه ورا ظهره لما وصلت فرد ايديه ووقف بإعتدال اكثر..
وهي وقفت قدامه وقالت:خير مهدي شن تبي؟
المهدي ابتسم ع جنب وقال:وعليكم السلام ورحمة الله وبركاته..
غمضت عيونها وفتحتهم وقالت:السلام عليكم..خش في الموضوع طول ماعنديش وقت نضيعه..
رفع حواجبه تعجبا وقال:ماعندكش وقت ضيعيه وانتي ضيعتي من عمري وعمرك 13 سنه!
تنهدت وقالت:مهدي انت جايبني بش تقول نفس الكلام!
المهدي:لا..مانبيش لانعاتب ولانلوم..مانبيش نضيع الوقت اكثر من هكي..سدرة..نبيك..نبي نتزوجك..
هي فتحت عيونها ع وسعهم بصدمه..
المهدي:ايه ماتشبحليش هكي ماقلتش حاجه غلط ولاحرام..
سدرة:لاقلت حاجه غلط وستين غلط..تبيني نبني حوشي ع خراب حوش صاحبتي!
المهدي؛ومن قالك هكي! اني مش حنطلق عايشه..
سدرة انصعقت وقعدت تشبحله بنظرات عدم استيعاب
المهدي:وبرضو ماتشبحليش هكي ماقلتش حاجه غلط ولاحرام
سدرة بإنفعال؛لاغلط وحرام والف غلط وحرام...انت ماكنت عادل وهي ع ذمتك بتولي عادل لو جبتلها ضرة!
المهدي:السنين هادي كلها كنت نعامل فيها بما يرضي الله وعمري ماقصرت في حقها اللي نقدر عليه درتهولها..بس قلبي الله غالب ماليش عليه سلطان مانقدرش نتحكم فيه لو نقدروا نتحكموا في قلوبنا مرات يكون حالنا احسن من هكي..رفع ايديه جنبه وقال..ممكن مش عارف...نزلهم وقال..اللي نعرفه اني نحبك حب محفور فيه حفر..انتي مسيطره عليه سيطرة تامه..حبك يجري في دمي زي الهوا يابنت الناس نرقد ونوض واني عايش ع امل انك تكوني ليا كيف مش عارف..بس قلبي مايبيش ييأس ياسدرة..واني لما تجي قدامي فرصه مش حيخليني نريحها..صدقيني انتي وعايشه حنعاملكم زي بعض مش حنقصر عليها ولاعليك وربي يشهد ياسدرة..قدملها خطوه وقال..انتي بس قولي باهي
كلامه حرك فيها المشاعر والاحاسيس الراكده وخلا قلبها ينبض بسرعه وبقوة..وكانه يبي يطلع منها ويمشيله
بس عقلها كان حضوره اقوى..اخلاقها..طيب اصلها..التربيه الصح اللي تربت عليها..
سدرة بنظرة مكابرة؛اني نبي نفهم حاجه وحده بس كيف سولتلك نفسك تجيني وتعرض عليا عرض زي هدا!؟..انت لو تعرف سدرة صح..متوقع انها حترضى بحاجه زي هادي!؟ حترضى تنزل ضرة ع راس مراة تانيه بغض النظر عن لو كانت صاحبتي او اي مراة غيرها....مستحيل..ماندريهاش لأي مراة غريبه مانعرفهاش يابال صاحبتي..اللي نعرف انها تحبك اكثر من روحها..ونعرف انها مجروحه منك وتعاني في جرحها هدا اللي اني سببه..كنت نحسابك تعرفني كويس يامهدي خسارة...
المهدي؛لانعرفك كويس اكثر مما تعرفي نفسك وعارف اني قاعد فيك قاعد ماطلعتش منك لامن قلبك ولامن دمك اللي انتي كنتي تقوليلي اني قاعد نمشي فيه..عارفك وعارف انك مش حتتحملي تشاركني فيك غيرك..عارف انك تبيني ليك بروحك..هدا الكلام اللي ماتقدريش تقوليه ع خاطر صاحبتك تخافي نقولك نطلقها..
سدرة:مش حديرها ولااني نخليك ديرها..
المهدي بإنفعال؛سدرة افهمي حرام عليك اللي قاعد يضيع من عمري وعمرك..حرام اللي قاعد يصير فيا اني وياك توا ربك عاطينا فرصه علاش تبي ضيعيها علاش ديما ديري فيا هكي قوليلي
سدرة ابتسمت بألم وقالت:تعرف شن مشكلتك يامهدي..انك ماتفكرش الا في نفسك بالدرجه الاولى ومشاعر اللي حواليك تجي بعد مشاعرك..واني عكسك بالمرة..نفكر في غيري ومانفكرش فنفسي..مانبيش نحط راسي ع مخده في ليله واني مبكيه ولاواجعه قلب حد اوقاهره حد بقصد ومن غير قصد..انت توا قاعد تحصد نتيجه افعالك الانانيه المتهورة يامهدي..افعالك اللي ضيعتنا من بعض للأسف..اني مانبيش نقارنك بحد غريب بس بنقارنك بخوك عمر..عرفت قصته كامله هو وبنت عمي..وعرفت شن دار ع خاطرها وعرفت قداش هو متمسك بيها ومصمم عليها وعرفت ان هو اختار يبعد ع خاطرها وانه مااستسلمش لغروره وتكبره لما هي رفضاته بطريقه اقسى مية مرة من الطريقه اللي رفضتك بيها..عمر خوك فكر فيها هي وبس ع حساب نفسه واختار انه يصبر بش يوصل فيها فالوقت اللي ربي يبيه...قارن نفسك بيه وباللي درته لما كنت قريب من عمره وحتعرف انت شنو يامهدي..وحتعرف حجم الغلط اللي ارتكبته وقاعد تدفع في ثمنه سنين ومازال ماتمش.. المهدي كان يسمع فيها وكل كلمه تقول فيها كانت تصيب فيه في مقتل..كلامها كله صح..كلام حول من ع عيونه غشاوة حالت بينه وبين انه يشوف نفسه ع حقيقتها..
يشوف لأخطائه ويقدرها صح..ويعرف عيوبه اللي تلزم اصلاح...وتوا شاف كل شي...
بس مع هذا كله...حبه ليها زاد..زاد..عشقه ليها استبد قلبه وروحه ونفسه استبداد...
والندم يعذب فيه عذاب لايوصف..كيف مراة زي سدرة بدلها وضيعها من يده..اللي زي سدرة مفروض يقعد ع خاطرها اعزب طول عمره لو ماجابهاش ليه النصيب..
سدرة ودموعها عبوا عيونها:مهدي..خلاص سلم للأمر الواقع والمكتوب...اني وياك مش لبعض..ماناش نصيب بعض يامهدي مهما صار....
غير عيونه عنها وهو شاد دموعه بقوة وقلبه يتمزق تمزيق..
وهي ابتسمت وقالت بنبرة وجع..
"مش كل حاجه نتمنوها..تصير"
شبحلها..
سدرة؛خليني مجرد ذكرى حلوة...وعيش لحاضرك..عيلتك مرتك صغارك...صدقني لو كنت مكانك مستحيل نفرط فيهم...
نزل عيونه وقعد يشبح لصوابع يده اليسار اللي يفتح فيهم ويسكر..
هي ماركزتش عليه..
وختمت هاللقاء وهي تقول:هادي اخر مرة يصير فيها بينك وبيني كلام زي هدا..من اليوم وغادي اني بنت شارعك وغريمتك في الكار وبس..
قام عيونه وشبحلها بنظرات الم..
هي هربت من نظراته وقالت:السلام عليكم..
ولفت ومشت وخلاته وقلبها موجوع ع الأخر..
ودموعها اللي حبستهم هلبه افرجت عنهم وقعدوا ينهمروا انهمار..
وهو يشوفلها كيف قاعده تبعد وتبعد..لين اختفت..
فجأه..
حط يده ع قلبه..ووجهه بدي لونه يشحب..
قعد يدور بعيونه ع كرسي لين لقاه وقعمز عليه...
وقعد يدلك فيه ويثني في ذراعه ويفتح فيها..
عاود كرر الحركه هادي هلبه لين بدي يحس بتحسن بعض الشي..
بعدين خدي نفس عميق وزفر..
وناض..ومشي طلع من النادي لسيارته..
ركبها من هني..المطر بدت تصب من هني...
تحرك بالسيارة....
والمطر زادت غزارة..شغل المسحات...
وقعد يشوف للطريق...
وشويه وبدي يردد في ابيات حفظها عن ظهر قلب في سنين الفراق...
أراك هجرتني هجرا طويلا..
وماعودتني من قبل ذاكا...
عهدتك لاتطيق الصبر عني..
وتعصي في ودادي من نهاكا..
فكيف تغيرت تلك السجايا..
ومن هذا الذي عني ثناكا..
حين ارد الطرف ادير عيني..
افتش عن مكانك لاأراك..
حبيبي حتى غبت عني..
هل تعلم لي أحدا سواك...!؟
🍃وهي تسوق في سيارتها تحت المطر..ومشغله حتى هي المسحات..وهي تبكي بألم ..من حب ماباش يموت وقاعد بوجعه مرافقها سنين من عمرها وكبرها معاه...
🍀🍀🍀🍀🍀🍀
ويمروا يومين من هداكا اليوم..
ومازلنا في الحب...وجهه التاني القاسي..هجر..فراق..خذلان..
خداع..الخداع...
الخداع في الحب يشبه الخيانه..
انسان تحبه بكل مافيك..وتبني معاه مستقبل وترسم مع حبه احلام حلوة بريئة...وتكتشف ان هو كان يخدع فيك ويضحك عليك..وعمره ماحس اتجاهك بأي شعور..بل كنت بالنسبه ليه مجرد تسليه..تسلى بيك وبعد مل منك قرر يرميك..
حجم الاهانه هني صعب وصفه لكن يمكن تخيله..
بالذات لو كان متوجه للراجل..شن ينسيه شن يبرد ناره!
هذا حال المبروك..اللي كان حابس روحه في داره مايبي يكلم حد ولايشوف حد..
وامه واخته قلوبهم تقطعت ع حاله..
امه بقلق شديد؛ليه يومين في المستشفى عايش ع التغديه بس وتوا من لما روح مايبيش ياكل تو يولي  ضغطه يهبط مرة تانيه ومانعرفش شن يصير فيه...بالله يابنتي حاولي معاه تربحي ع خاطري..
:حاضر يام والله نشوفه انتي ماتخوفيش روحك زياده هو مش حمل تصير فيك حاجه يام..
:باهي غير انتي بري شوفيه..
:حاضر يام حاضر انتي خشي لدارك تريحي قبل..
:باهي باهي..هاني خاشه...
ومشت خشت لدارها..
وهي خدت نفس بعدين مشت للكوجينه دير لخوها ماياكل..
☘وهو كانش عنده رغبه في الحياة كلها مش غير فالماكله..
وجع قلبه وكرامته افقدوه الشعور بأي شي فالدنيا غير الألم...
شبح جنبه..
ع الكامدينو اللي جنب سريره..
جنب صورته هو وامه ..
كان في منديل مطروح عليه وردات فل يابسات وذابلات..
جت بين عيونه الذكري اللي تخصهم..
كان هدا اليوم...هداكا الصبح احلا صبح في حياته..
🔺️في وقت سابق..
كان جايها للكليه الصبح يبي يشوفها..
كان يراجي فيها في نفس المكان..
ويشوف للمكان اللي بتجي منه..
شويه شافها جايه تجري وهي تشوفله وتضحك..
ومن كثر المجهود في الجري خودها احمروا..
كان وجهه باين لطيف للغايه..
وصلت فيه وقالت:صباحو بيكو..افتح ايديك ترا..
هو فتح ايديه وقال:صباح الورد خيرك جايه تجري..
صبت في ايديه من ايديها وردات فل وقالت:شم ريحة الفل متاع حوشنا مافيش منه...
هو ابتسم وقال:باهي قعمزي..
غرفه:لااسفه بيكو مانحسابش عندي محاضرة نسيتها بكل فكروني بيها البنات..سلام توا..
مبروك؛باهي امتي تطلعي..
غرفه:بعد ساعه..
مبروك؛نستناك..
هي رفعت كتافها ونزلتهم وقالت:ع راحتك..سلام..
ومشت تجري..
هو بصوت عالي قال:مستنيك..
وهي تجري مدتله إبهامها بمعنى..تمام..
وهو ضحك بعدين قال:ربي يحفظك وخلاص..
🔺️في الوقت الحاضر..
《ياناري يسخف خايف عليها ومشغول مسكين وهي تقوله مريضه وعندي بردة"
"وهو زي العبيط مصدق"
"مش زي العبيط عبيط يابنتي..ولصقه وعش ودراه كبد..ع قد ماقلت ودرت مايبيش يفهم اني مانبيشي.."》
جبد بيده المنديل وطيحه باللي فيه ع الأرض..
وقعد يعفس عليه برجله بكل غل ودموع عيونه غلبوه..
☘قهر الرجال الله لايوريه لرجالنا☘
كان المبروك وهو يعفس ع الفل يقول بحقد..
حقيرة..واطيه..شيطانه..كلبه بنت ستين كلب..
انفتح الباب وخشت عليه اخته وهي مخلوعه..
قعدت تشوف فيه شن يدير وتسمع فيه شن يقول..
كانت مصدومه فيه هلبه..
؛مبروك!...مبروك!
هو وقف وشبحلها..
شافت الدموع تنزل من عيونه زادت انصدمت..
عمرها في حياتها ماشافت خوها يبكي الا لما كان طفل صغير..هو اصلا كان يكره البكي للراجل..كان ديما يهزا ع الراجل اللي يبكي..
وهو توا يبكي..ودموعه تنزل زي السيل..
نظراته ليه فهم مغزاهم..
نزل راسه ودرق عيونه عنها وقعد يقول:اطلعي..
قربت منه وقالت؛شن صاير معاك مبروك قولي..
مبروك؛قتلك اطلعي..
هي مابتش تصر عليه..
طلعت وسكرت الباب..
هو بعد ماطلعت..ماقدرش يتمالك نفسه اكثر من هكي من حرقة قلبه والقهر اللي يحس بيه انهار بالبكي..
وصوت بكاه كان مسموع...يقطع القلب..
بكي المقهور..يامصعبه..
فتحت اخته الباب وجاته وهي دمع وقعمزت حداه وضماته وهو عاطيها بالظهر وقعدت تقول:خلاص حبيبي خلاص..والله مافي وحده تستاهل تقهر روحك ع خاطرها.
هوحط يده ع عيونه وزاد بالبكي وقعد يقول بقهر..
"دارت خوك مضحكه مضحكه"
:الله ينتقم منها حسبنا الله ونعم الوكيل فيها
بنبرة مخنوقه؛كانت نيتي صافيه معاها وربي شاهد من وسط قلبي حبيتها..وهي طلعت دايرتني جو..وكساد..مضحكه ليها ولصاحبتها...
:الحقيره هادي غير قولي من هي قولي وين نلقاها والله العظيم نخليها تندم ع اليوم اللي جت فيه للدنيا..
التفت وقال؛ردي بالك بعدين تقول ماعرفش ياخد حقه بروحه بعت اخته...
هي مسحت دموعها وقالت:علاش انت ناوي دير حاجه..
تنهد بقهر وقال..ماعندي مانديرلها موكل عليها ربي وربي مايخلي حد..
اخته ضماته وقالت:هي الخاسرة والله هي الخاسرة..
وهو حط راسه ع كتف اخته وعيونه ع زهره فل يابسه نجت من غضبه...
☘☘☘☘☘
"مفهوم"
"مفهوم"
نجاح؛تمام افتحوا كتباتكم خل نأشرلكم غ الدروس المهمه اللي بتخش في الامتحان..
فجأة دق الباب..
وخشت ابله الاشراف وقالت:ابله نجاح تعالي شويه..
نجاح مشت طول طلعت مع الابله..
برا...
الابله:في عندك حد لوطا جي يبيك.
نجاح؛مني؟
الابله:قال نبي ابله نجاح وخلاص ماقال شي تاني..
نجاح بإستغراب:توننزل غير نكمل حصتي ماقعد فيها شي..
:تمام..
ومشت الأبله..
ونجاح مشت خشت للفصل..
اشرت لطالباتها ع الدروس المهمه...
ومجرد ماهي كملت رن الجرس..
طلعت طول تشوف من هو الضيف المجهول..
اول ماوصلت تحت..
تفاجئت ع الآخر وين شافت هالضيف..
اللي كان هو..عبد الحفيظ..
لما شافها ابتسم..
هي قدمتله وعلامات الارتباك والخجل باديات ع وجهها..
وصلت فيه وقالت:السلام عليكم..
هو قال؛وعليكم السلام ياأبله..اول شي شن حالك؟
نجاح:الحمك لله..
ضحك وقال: حتى اني حالي باهي والحمد لله..تاني شي نبيك في موضوع ضروري..
نجاح هزت راسها وقالت:تمام..بس برا لوسمحت..
عبدالحفيظ بإبتسامه:تمام..
ومشي طلع..وهي وراه وكانت متوترة..
وصلوا برا..
وقفوا الزوز مقابلين بعض.
عبدالحفيظ؛علاش رفضتيني؟
نجاح؛بصراحه..مش مرتاحتلك..
عقد حواجبه وهو محافظ ع ابتسامه قال بتساؤل:علاش!؟
نجاح بلعت ريقها وتشجعت اكثر وقالت:بصراحة اكثر وماتزعلش مني اني نشوف في علاقه ولد خالتك بأختي واضح عليه انه خاش ع طمع...كل شي يقول هكي..بس للأسف اختي ماتبيش تشوفه ع حقيقته..
هو اختفت ابتسامته وقعدوا حواجبه معقودات وهويقول:وان فرض مجرد فرض ان كلامك صح..شن اللي خلاك تقولي اني خاش ع طمع حتى اني؟
نجاح:توا مافي شي بس مانعرفش بعدين شن يطلع.
عبد الحفيظ:يعني انتي لهالدرجه مش شايفه ان فيك حاجات تنحب!؟
نجاح:الواقع يقول هكي..كبيره ومش زي بنات هالوقت شن اللي يخليك تاخد وحده قريبه عليك في العمر وفاتت الثلاتين..تقدر تاخد وحده مواليد التسعينات والف حوش يعطوك..
عبد الحفيظ:هادي نظرتك انتي وهدا الواقع الموجود في راسك بروحك..في رجاله يدوروا ع اللي تناسبهم في العمر والتفكير بش يعرف يدير معاها عيله ويربي صغار..
نجاح قعد تشبحله بعدم اقتناع..
عبد الحفيظ:عيونك يقولوا ان كلامي مش خاش راسك..
غمضت عيونها وفتحتهم بمعنى ايه..
عبد الحفيظ ابتسم وقال:تمام..اني مانبي شي ولاشي..الحوش بنكمله بروحي كل شي يلزمك عليا اني..انتي حرة بعدين بتخدمي بتقعدي هدا شي يخصك ومش حنخليك تصرفي ع الحوش ولا على نفسك شي حتكون مسؤولة مني في كل شي..
نجاح قعد تشبحله بنفس النظرات..
عبد الحفيظ؛ومازال مش مقتنعه!..يعني مافكرتيش كيف راجل قعد قريب سنه ماارتبطتش بعد رفضيه ولما ولى جاهز للزواج مامشاش لغيرك واختارك انتي تكوني شريكة حياته انه فعلا صادق معاك ويبيك لشخصك..يعني لو قال انه يحبك مش حتصدقيه؟
نجاح:قتلك من قبل اني انسانه واقعيه
عبد الحفيظ؛لا مش هكي الانسان الواقعي..الانسان الواقعي وهو اللي يشوف الواقع زي ماهو مش زي مافي عقله وتفكيره انتي يانجاح متشائمه..
هي بتعجب؛متشائمه!
هز راسه وهو مبتسم..
هي رفعت حواجبها بعدين عقدتهم وقالت:باهي بنسألك سؤال ونبيك تجاوبني بصدق..
عبدالحفيظ بثقه؛اسألي..
نجاح:ولد خالتك..نيته صافيه مع اختي مايضحكش عليها؟
هو وجهه تغير لونه وبعد عيونه عنها وقعد يوزع في نظره قدامه..مط شواربه للأسفل بعدين قال:مش عارف...
ابتسمت نجاح ابتسامه خفيفه وقالت؛عبد الحفيظ
شبحلها وقلبه زادت قوة نبضاته لما قالت اسمه ..
نجاح؛شوف غيري اني مانصلحش بيك..
ومشت طول خشت داخل وخلاته..
بعد ماعطاته ردها بشكل مفاجئ اشبه بصفعه جت ع غفله..
يبيها ويحبها وصادق معاها بمعنى الكلمه بس هي بسبب ولد خالته مش قادره تأمنله...
~~~~~~~~~
مراد؛وشن علاقتي اني كان البنت طلعت احدق من اختها..
عبد الحفيظ بغضب:اني نيتي معاها صافيه ماتساونيش بيك..
مراد تهكما:ماكانتش هكي في الاول..
عبد الحفيظ؛مانبيش ندوي معاك ..الحاجه الوحيده اللي نبي نعرفها شن ناوي دير مع عواطف..
مراد؛الحوش وكملته معاش عندي ماندير بيها اصلا حني الفترة الاخيره كترت بينا المشاكل ومافي حد طايق التاني بنطلقها خلاص..
عبد الحفيظ؛وبعدين شن بدير..
مراد بان عليه الارتباك بس حاول يخفيه لما قال:والله هدا شن يخصني مش مجبور نحكي كل شي بنديره..
مرر عبد الحفيظ نظره عليه من فوق لتحت بإزدراء..
بعدين مشي وخلاه..
ومراد قعد معاه بعيونه وهو يشوفله بقلق..
~~~~~~~~~
"شن تبي تقول مراد خليك واضح"
مراد بالتليفون؛خوك نحس فيه بيديرلنا مشاكل..
"لامايدير شي تريح"
مراد؛خيرك تكلمي فيا هكي!؟
"نحس فيك بتبدا ديريلي في الجو اللي دير فيه لعواطف بش طفشني"
مراد؛لاحول ولاقوة الا بالله خيرك انتي شن جاك بعد اللي درته هدا كله ع خاطرك تقولي الكلام هدا!؟
"اسمع مراد من الاخير اني وضعي مع اهلي ولى بايخ واني قاعده نرفض في الخطاب واحد ورا تاني وبدوا يشكوا فيا..دبر يامراد دير حل اني راهو فديت"
مراد؛خلاص خلاص صدقيني خلاص حننهيها معاها خلاص..
"امتى "
مراد؛قريب حبيبتي قريب..
هي تنفست بعصبيه وقالت..
"تمام باي"
وسكرت في وجهه وقالت؛تو نتصرف بروحي..
☘☘☘☘☘
ومع العشيه..
كانت نجاة جايه ومعاها اختها صابرين يزوروا في مغليه اللي كانت واخده برده..زي مانقولوا يطيروا عليها في السو..
مغليه؛الحال كما هو عليه..المراة شاده في الطلاق وهو مايبيش يطلق ولايبي من يخش في حاجه..حتى بوه تحشم مع بوها وصار بيناتهم دوة وروح هني وتعارك مع المهدي عركه لقلب السمي..
صابرين؛ياروحي اكثر من يوجع الصغار..
مغليه:ايه والله يابنتي بالذات محمد يارويحتي باين في وجهه الهم..
نجاة؛مش عارفه علاش حاسه روحي السبب ضميري مش مريحني ياعمتي..والله مرات اني نخش في الموضوع ونكلم عيشه من غير ماسلفي يعرف..
مغليه:لالالا بنتي ردي بالك والله بعدين يقلبها ع روسنا ويلبزها معاك اكثر من قبل ريتي العرض بروحك يومها.
نجاه وهي تتنهد بضيق مصطنع:الله غالب الواحد ماعنده كان الدعاء ربي يهدي سرهم...
مغليه بضيق:ايه والله..
شويه وناض حمزة.
ناضت وهي تقول:خل نوض نديرله مرضعه..
مشت بعد ماعطت نظره ع جنب فهمتها..
وقعدت تشبح وهي ماشيه لين طلعت..
بعدين شبحت لمغليه وقالت؛خالتي بنقولك حاجه بس بالله عليك ماتقولي لنجاة اني قتلك..
مغليه بقلق:ان شاء الله خير!
صابرين؛يومها عزوزتها الله حسيبها ماخلت ماقالتلها جابت القديم والجديد.
مغليه:علاش.
صابرين؛من لما جت وهي تعلق ماعاجبها شي هادي خيرها هكي..الدولاب هدا علاش حاطه فيه كذا..البساط هدا مفروض تغيريه ومن هالكلام..نجاة سايرتها هلبه لين وصلت في الربايه يالاش نجاة قالتلها خلاص رتبي انتي ع راحتك ..
وتولع فيها وتقول مش متربيه وماتنفعش ومانبيكش من الاول..لكن مغليه هي اللي جاباتك بلعاني فيا اصلا الاشكال هادم من يعرفها غير مغليه..
مغليه؛الحقيرة عافنة النسي..
صابرين؛ياما صار فيها وخيتي يومها لين حليبها جف بكل..
مغليه؛لاحول ولاقوة الابالله المراة هادي مريضة نفسيا..
صابرين بحزن مصطنع:بالله ماتعاودي لنجاة حاجه توريني..
مغليه هزت راسها وقالت:باهي باهي..
ع خشة نجاه قالت؛شن تبوا العشي عمتي؟
مغليه؛لاقعمزي تريحي بنتي تو نوصوا ع العشي من برا..
قعمزت وعطت المرضعه لأختها وهي تقول:علاش عمتي الخساير نديروا هني وخلاص..
نغليه بإبتسامه؛لا اليوم راحه لينا كلنا..
ابتسمت صابرين..
ونجاة قالت بإبتسامه:كان انتي تبي هكي باهي..
مغليه"والله حرام فيها هاللطفيه كنة زي هادي"
☘☘☘☘☘☘
"تو انتي ناديتي عليا نجيك بش تقولي هالقطاف الزايد!"
خديجه؛مش قطاف زايد المراة تربيها مراة يامهدي حني نساوين ونعرفوا بعض كويس..
ناض وقال:احتفظي بنصايحك لنفسك..
خديجه؛باهي كان قتلك بنخطبولك سدرة .
شبحتلها وابتسم متهكما وفي عيونه نظرة حزن بعدين قال..تصبحي ع خير ياخديجه تصبحي ع خير..
ومشي..
وهي ناضت لحقاته وكانت تحرك في راسها يمين ويسار اسفا...
المهدي:باي خالو..
محمد وراما من قدام كراساتهم وهما في الصاله:باي خالوا..
فتح باب الشقه وطلع..
وهي وقفت قدامه وقالت:تصبح ع خير.. تنهدت..بعدين ولت خشت وسكرت الباب...
☘☘☘☘☘
تاني يوم...
الساعه 11:00صباحا..
نجمه:بنمشوا اني ونجاح وعواطف هونا عندها خدمه النهار كله ماتقدرش تمشي..نبيك ديري غدي شيبانك وسلافك باهي..
خديجه:من غير ماتوصي عمتي..
نجمه بإبتسامه:ربي يحفظك بنتي..هي خل نمشي نوتي روحي..
ومشت نزلت من الدروج..
وخديجه خشت لشقتها...
☘☘☘☘☘
الساعه 2:30ظهرا..
طلعت طوبى من الكوجينه بسفرة الغدي لبوها..
خشت للصاله لقت بوها يتفرج ع الاخبار..
كان حاط ع قناة الجزيرة...وكانت وقتها تغطي في اخبار الاحتجاجات في تونس..
حطت السفرة وقالت؛بابا غداك..
لطفي شبح لسفرة الغدي وقال؛صحيتي..
طوبى:شن صار فيهم؟
لطفي؛مسكرين روسهم يحولوا زين العابدين..
طوبى:يااه..شوف كف شن دار..
ع خشة سدرة بطاسة ميه لبوها وهي تقول:مش كف اللي دار هكي الاهانه والذل والفقر والعازة اللي دارو هكي..الكف القشه اللي قصمت ظهر البعير ياطوبى..
لطفي تنهد وقال؛صح..
طوبى:باهي زعمه حني نديروا هكي..
ضحكت سدرة تهكما وقالت؛حني! مستحيل مافي حد يقدر يطلع ع القذافي كلنا تربينا ع الخوف اربعين سنه..مافي حد فينا يقدر يقول..بغ فوق..
لطفي:شن الكلام اللي تقولي فيه قدام اختك هدا!؟
طوبى رفعت حواجبها وهي تقول؛اها يعني اني توا بنعاود كلامها برا!؟
حطت سدرة الطاسه لبوها وهي تضحك.
لطفي:مرات تحكي لصاحباتك..
طوبى:بابا اني كبرت والله كبرت العام الجاي بنخش الثانوي..
قعدوا يضحكوا عليها بوها واختها..
بعدين لطفي قال:عمتك بتتغدا في حوش جدك؟
سدرة؛ايه شدت فيها مرت عمي..هي تعالي طوبى بش تتغدي .
ومشوا الزوز طلعوا من حدا بوهم..
☘☘☘☘☘
جامعة الفاتح..
كلية العلوم...
طلعوا من المدرج وهما يهدرزوا...
:الحمد لله جاوبته كله..
غرفه وهي فرحانه:حتى اني مش مصدقه الامتحانات كلهم مشوا يهبلوا..
:حتى حني شدينا هلبه السمستر هدا..
:روفي شوفي هداكا اللي لابش كبوط اسود يشبحلك..
غرفه:يعع شلتوت..
:ايه شن صار في الفقمه..
غرفه؛علاش ذكري فيا يابارده...من لما غيرت الشفره معاش نندري عليه..
:غريبه ماجاكش هني.
غرفه؛تلقيه حس ع دمه واخيرا..
:خسارة كنا محصلين من وراه شكاليط وفطور..
غرفه:جيبيلنا انتي وحده زيه...
:لالا اني مانطيحش كان في الثعلب وخوه..
:الطيور ع اشكالها حبيبتي..
؛تافهه..
وقعدوا يضحكوا البنات وغرفه وجوها فوق الريح ومافيش احلى منه...
☘☘☘☘☘☘
في العياده..
وين ماتخدم عواطف في الخاص..
خشت وحدة قعدت تسأل عنها..لين دلوها عليها..
:شويه وتطلع راجيها هني..
هزت راسها وقالت:باهي..
قعدت وافقه تراجي فيها لين طلعت..
:عواطف..
عواطف شبحت لمصدر الصوت ابتسمت وقالت؛اهلا..
ومشتلها سلمت عليها بالخد.. وقعدت تسأل عن احوالها هي وامها وعيلتها...
والبنت كان واضح عليها الارتباك والتوتر..
عواطف ضيقت عيونها وقالت؛خيرك نحس فيك مش ع بعضك صايرة حاجه؟
خدت نفس واستجمعت شجاعتها وقالت؛عواطف اللي بنقولك توا حيكون صعب عليك هلبه بس سامحيني الظروف مرات يجبر البنادم يدير حاجات مش راضي عنها.
عواطف بلعت ريقها وقالت؛قولي ترا..
~والبنت تحكي..
وعواطف..تسمع في كلام ينقال ورا بعضه ع من الكلام ويخص شني هدا اللي مش قادرة تصدقه ولاقادر عقلها يستوعبه..
حست كل شي في جسمها هبط للحظه كانت حتفقد الوعي..
:اني توا حساته يضحك عليا حتى اني لأنه واخد مني مبلغ بش يأثث الحوش ومن بعد ماخداه بدي يتهرب مني ويديرلي زي مادار معاك بالزبط..
عواطف بعدم تصديق وعيونها مليانه دموع؛كذابه..
:والله عرفتك مش حتصدقي..واهو اثبات..
قامت تليفونها واتصلت بيه وفتحت المايك..
هو رد وقال..
"هاه حبيبتي"
شدت عواطف ع قبضة يدها بقوة.
؛هاه مراد..شن صار معاك بتتصرف معاها اليوم ولاكيف.
"تي خيرك ياعمري شن صايرلك علاش مستعجله هكي مش هارب اني قاعد..وعواطف هادي اللي خلاتك صدقيني هلبه نعطيها كالشو..غير خليني نعرف نتكتكها..."
نزلوا دموع عواطف..حست روحها وكأنها طاحت في بير غريق...
:تمام تمام...باي..
"خيرك مستعجله"
:عندي ماندير..باي"
وسكرت وقالت..سمعتي توا..تأكدتي!؟ لو منك مانقعدش ع ذمته دقيقه زياده..
هي قعدت تشبحلها بنظرات تخوف..
وبدون مقدمات هجمت عليها وقعدت تضرب فيها..
والبنت حتى هي قعدت تضرب في عواطف..
لين جو طبيبات وممرضات حزوهم عن بعض..
عواطف وهي مخبشه في وجهها ووشاحها مجبود لين بان شعرها قعدت تسب وتشتم في بنت خالة مراد بأشبع الألفاظ والشتائم..
والبنت هربت تجري وطلعت من العياده..
اللي داراته عواطف خلا ادارة العياده يتخذوا ضدها اجراء قوي..
فصلوها من الخدمه..
وخلاها تروح ودموعها ع خدها بس في داخلها غل وغيظ كبير كانت تبي طلعه..
اتصلت بعبد الحفيظ اللي كان رقمه عندها..
وحكتله كل شي بالتفصيل..
وهو جن جنونه لما عرف ان مراد داير علاقه مع اخته..
روح للحوش مايشوف في شي...
عبدالحفيظ وهو في قمه الغضب؛وينها الكلبه وينها وينها بنتك..
امه بخوف:خيرها شن دايره عطيها جدري..
جي لأخته شدها من ذراعها بقوة وقال:تعرفي انها دايرة علاقه مع الكلب مراد..
واخته تشبحله وترعش..
امه:من مراد ولدي اختي!.
هو بصوت عالي قال؛تكلمي ياحيوانه تعرفي!
ع خشة اخته للحوش..
طلق التانيه ومشي طول لصاحبة مراد..
هي قالت بخوف:عبد الحفيظ!.
هو جبدها من وشاحها وطاح فيها ضرب وهو يقول؛تقرني فينا يامسخه..تقرني فينا ياحقيرة يافاسده..
وامه واخته التانيه يحزوا...وهو يدف فيهم ويضرب فيها ضرب مبرح...
وبعد ماسيبها شبه دايخه من الضرب..
مشي لمراد في مكان خدمته..
خشله داخل وضارب هو وياه وحزوهم داخل..وطلعوا عبد الحفيظ برا اللي كان قاعد يتحلف فيه..
☘☘☘☘
خديجه وهي تتكلم بالتليفون:مشوا لحوش اختها عازمتهم..
"اها..كان هكي نجيك العشيه نهدرزوا ع راحتنا.."
خديجه:مرحبتين بيك ميمتي..نراجي فيك..
"باهي بالسلامه"
خديجه:بالسلامه يام..
وسكرت وولت تغسل في الماعين..
فجأة..
سمعت باب الحوش تسكر بالقوة..
استغربت..سيبت اللي في يدها ومشت وقفت فم الكوجينه..
شافت عواطف ماشيه بإتجاه الدار بعصبيه وباين من وجهها انها باكيه.
وصلت في الدار خشتلها وسكرت الباب بقوة لين انتفظت خديجه..
بعدين مطت شواربها للأسفل وولت بتخش..
بس سمعت صوت حاجه طاحت..
عقدت حواجبها بخوف ومشت للدار..
وقفت في بابها وقعدت تنادي؛عواطف..عواطف..
ويجيها صوت عواطف وهي تعيط وتقول..
"كلاب حقراء..جنس واطي..مسخين"
فتحت خديجه الباب وخشت عليها..
لقتها مقعمزة ع الارض..
وفاتحه شنطة بتاتها وطلع منها في الحاجات وتمزق وتلوح وتلوح وتقول..مسخين..حقراء..لعنة الله عليهم كلهم..
خديجه وهي مصدومه قالت:عواطف خيرك!
شبحتلها بنظرات مجنونه..من الصدمه والخيبه الألم..
تاضتلها وهي تقول؛علاش قاعده مع خوي الحيوان عرة الرجاله اللي يخون فيك..اللي مش مقدرك علاش علاش ماخلتيشي قوليلي...خوي كلب كلب كلاب زيه زي الوسخ اللي سماه مراد الملعون..
ومشت للزيانه وطيحت اللي عليها كله..كان كله منه هو عطور ومواد زينه..
بعدين قالت وهي داهشه:زي ماقلتي..النذل خداني ع خاطر الفلوس..ع خاطر القرض..بش نبنيله حوشه هو وحبيبته..
بسخريه قالت..نبني عش الزوجيه متاعهم..اللي نحسابه ليا اني...اللي بنيته معاه بلوكه بلوكه..واني نتخيل كيف بتكون حياتي فيه..
تخيلت روحي واني نطيب فيه..ضم فيه..نبخر فيه..نجري ورا صغاري فيه..نقريهم..نرقدهم..ندير زيكم انتم المتزوجات..
ضحكت وقالت..قداش خاطري نلبس الفيلو ويزفني هو ع اغنيه..وقعدت تغني بصوت باكي..
دقوا المزاهر...يلا..يااهل الخير..تعالوا..
جمع ووفق والله وصدقوا اللي قالوا..
عين الحسود فيها عود ياحلاوة..
عريس..قمر...وعرستوا نقاوة..
ضحكت وكملت تقول..تعرفيني مخرومة مسلسلات مصريه وين نتفرج ع عراسهم نتسهف هلبه ونقول اغنية الزفه هادي بنديرها في عرسي..
حطت يدها تحت ذقنها وقالت متسائله؛قوليلي ترا هلبه اللي طالباته اني..اني نتزوج وندير عيله وصغار!قولي ياخديجه.
خديجه كانت تشبحلها بألم ودموعها ينزلوا..
نزلت عواطف يدها بإحباط وولت تبكي وتقول؛ويقولوا عليا واخده اصغر منها ضاحك عليها وطامع فيها....باهي اني لقيت اللي احسن منه وقلت لا...جاني اللي خير منه وقلت لا!؟
قولوا ياناس جاني الباهي واني قلت لا..لا..وقعدت تخبط ع وجهها وهي تردد في كلمة لا..
وخديجه اللي كانت تبكي جتها شدت ايديها وقالت ببكي:خلاص بالله عليك خلاص..
عواطف وهي تبكي:ياريته الخلاص من عمري ياخديجه..بعد اللي صار فيا...ياريته الخلاص من عمري..
حضنتها خديجه وهي تقول ببكي:معاش تقولي..كلب وطاح عليه حيط افتكيتي منه..
عواطف ببكي؛الله يلعنه الله يلعنه ويلعنها ويلعن  اللي زيهم...
☘ وماهدتش عواطف الا بصعوبه..
تعبت ورقدت ع سريرها بحوايجها اللي كانت بيهم في للخدمه..
وخديجه ضمت الدار ولمت كل شي وطلعاته من الدار بعيد عن انظار عواطف..
اتصلت بأمها وتحججت بحجه ماتخليهاش تجي..
وقعدت حدا عواطف راده بالها منها..
روحوا صغارها من المدرسه غدتهم ..بعدين ولت لعواطف قعمزت حداها..
وبعد المغرب روحوا نجمه ونجاح...
☘نجاح بصدمه ودموعها ينزلوا:هالنذل الحقير والله من الاول كنت حاسه من اول ماشفته ماارتحتلاش..
خديجه بحزن:خليك معاها يانجاح وماتقوليلهاش كلام يزيدها ع مابيها اختك نفسيتها مدمرة ع الاخر..رد بالك يانجاح..
هزت نجاح راسها وهي تشوف لعواطف بألم..
وخديجه مشت طلعت من حداهم..خدت صغارها  وركبت لشقتها وهي تفكر في حال عواطف اللي يشبه الى حد ما حالها هي....
🍀🍀🍀🍀
ويمر اسبوع كامل...
ياما صار فيه في حوش الصيد ع موضوع عواطف اللي جتها ورقة طلاقها قبل لتطلبها....
وخوتها مشوا لمراد وصار بينهم نقاش حاد كان حيوصل للضرب لولا الناس اللي حزت..
☘محي الدين بغضب؛واحد..وقال لفظ نابي..
خديجه؛هي لم لسانك اني قدامك..
محي الدين؛اسف..لكن هالكلب رقهالي ولد الكلب...كان خاش ع طمع...
خديجه ضحكت نص ضحكه ساخره...
هو شبحلها وقال؛خيرك تضحكي!؟
رفعت حاجبها وقالت؛علاش ممنوع الضحك..!
هو قعد يشوفلها بصمت..
وهي مشت طلعت من حداه ومازال تضحك بإستفزاز..
بعد ماطلعت قال في نفسه"غير امتى يجي دورك ياشيطانه"
☘☘☘☘☘☘
"بن علي هرب...بن علي عرب"
وطاح نظام زين العابدين...
كان شي مش في الحسبان نهائي ولاخاطر ع بال ولاخاطر..
والناس قاعده تابع وتترقب وتشوف شن بيصير..
بعد سقوك بن علي..طلع زعيم البلاد وقتها وتكلم..
☘المهدي:شوف وجهه عليه الموت..
الجالي؛تتوقع يديروها الليبين ويطلعوا عليه!؟
المهدي؛مش عارف..بس ياودي ماظنيش حني مش زي توانسه..التوانسه اغلبهم ناس متعلمه ومتحضرة وعندهم راي..مش زينا حني ماشيين بالبركه وبقانون خاف تسلم..
الجالي:اتفق...
~~~~~~
علي الواعر؛اني صح مانحبله شبح وجه..لكن لو اللي صار مع التوانسه ماينفعش معانا..
لطفي؛راي من رايك يابوي هو بروحه مش حيسيب الكرسي الا بالدم..
عبدالمطلب؛ارتاحوا والله ماصايره حاجه حتي شعب جبان للمليون..
☘وهالكلام قعدت صلاحيته قائمه لأن اللي انعدت من تونس مصر مش جارتها القريب..
واواخر شهر يناير سنه 2011 كانت كلها عند مصر والعالم في حالة ترقب...لين صار اللي صار..وتنحى مبارك...
وبدت الدعوات تطلع للخروج في مظاهرات في ليبيا..
تحددلها تاريخ مميز..
2011/2/17وكان يوم جمعه..
وهني النظام في البلاد دق عند ناقوس الخطر..
وبدي بحملات اعتقالات لناس بعينها..
☘☘☘☘
الساعه 3:00بعد منتصف الليل...
كانوا حوش شنيبه غارقين في النوم...
اللي فاقوا منه مفجوعين ع صوت خبط باب قوي..
نزلوا المهدي والجالي ونضال من ديارهم..
لقوا مغليه طالعه من الدار وهي لابسه حجاب وتقول يارب سترك..بوكم طلع بيفتح الباب..
هما كيف مشوا بيلحقوه..
يوقفوا في مكانهم مصدومين.
لما شافوا مجموعه خاشين بسلاحاتهم ولاسلكيات متاعهم لحوش..
واحد منهم قال:فتشوه كله كله ماتخلوا شي..
المهدي:كيف تخشوا لحوش هكي وتنتهكوا حرمته!؟
واحد منهم قال:سكر فمك..
وانتشروا في كل مكان ومنهم من ركب فوق..
الجالي بصدمه؛خيرهم هادم شن صاير يابوي..
محمد شنيبه وع وجهه باديه ملامح القلق:سألوني عن عمر..
مغليه خبطت بيدها ع صدرها وقالت:حي عليا..!
المهدي مشي من حداهم..
بوه؛وين ماشي..
المهدي:يفتشوا تحت عيونا يابوي..
الجالي بعد سمعه شن قال ركب فوق..ونضال لحقه..
وقلبوا الحوش قلب وهما يفتشوا ماخلوش حاجه في مكانها..
واخر شي قبل مايطلعوا..
:هاتوهم كلهم..
شدوا محمد وولاده...
الجالي:وين رافعين وين..
:امشي وانت ساكت..
مغليه وهي تندب طلعت وراهم: حي عليا حي.
وتشبح فيهم كيف جارين راجلها وولادها بحوايجهم اللي عليهم وهما حفايا..
طلعوا برا الحوش وركبوهم سيارات سودا عاليه معتمه..
وهي طلعت وراهم تعيط وتقول:ووه عليا ووه حي عليا ويت ماشيين بيهم وين..
ومن الجيران من استاقظوا للأصوات وقعدوا يتفرجوا مت ورا شبابيكهم ويسمعوا من ورا بيبناهم ومافي حد تجرأ يطلع ويعرف شن صار....

#عاصفة_فبراير
#طوبى

...يتبع...