طوبى الجزء الاول

الجزء الثاني والخمسين 2

#طوبى "أقحوان وفلة وياسمينه"
#جمان_فريد
#الجزء_الثاني_والخمسين"Pinka2"
《معظم أحداث هذه الرواية حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
"جيت بكري لأني مستعجل وراي طيارة ع السريع عطيني ردك"
صابرين بإبتسامه:موافقه..
ابتسم وقال:حلو..
وحطلها كرته ع الطاوله وقالوا:يوم الاحد الجاي مروح الاحد اتصلي بيا نزيدوا نهدرزوا..
قدمت خدت الكرت وهي بطير من الفرح وقلبها يدق بقوة..
مختار بإبتسامه؛فرحتيني هلبه..
هي بإبتسامه قالت؛لهالدرجه..
رفع حواجبه وهو يقول؛واأكثر..
ضحكت بعدين قالت؛نبي نعرف اسمك..
وهو مبتسم قال؛شوفيه..واشر بعيونه ع الكرت..
هي قامت الكرت قرت الاسم..
"مختار علي"
وهو قال بإستعجال؛سلام ياحلوة نتلاقوا..
ومشي طلع من حداها وهي معاه بعيونها وحست بشي منها مشي معاه...
☘☘☘☘☘☘
"وهذا نظام متبعينه في مدرستنا مش حتلقوا المدارس التانيه ماشيه"
:كويس كويس..نبي نعرف حضرتك انتي شن وظيفتك بالزبط..
نجاح وهي تحاول تخفي ارتباكها:كنت ندرس وتوا حولوني احتياط ليا في المدرسه هادي فوق 13سنه..
شبحوا لبعض بعد واحد فيهم هز راسه وقال:تمام..
وحده معاهم قالت:اسمك معليش..
نجاح؛نجاح الصيد الجعفري..
هزت راسها وهي ساكته..
غيرهم قال:تمام تمام..ربي يعاونكم..
نجاح بإبتسامه؛ان شاء الله..
وسقدتهم نجاح برا المدرسه بعدين خشت داخل..
خدت نفس وزفرت براحه..
وجتها زميلتها وهي تقول:والله ماتقول الامديرة المدرسه..
نجاح بفرحه:جديات!يعني عرفت نتعامل معاهم وتكلمت كويس..
:فوق الكويس..
ضحكت وقالت:باهي الحمد لله..خفت ضحكتها وقالت..لكن كذبت عليهم كذبة ان شاء الله تعدي ع خير قلتلهم الادارة ماشيين للوزارة عندهم خدمه..
:ان شاء الله تعدي..
تنهدت وقالت؛شكلهم معطلات وانت نبي نروح خلاص..
:اسمعي نصيحتي روحي وحولي من راسك حكاية انك تسيبي المدرسه اصبري شويه..
نجاح:عطلة نص السنه قريب اتم ولازم نكون مسجله قبل ليبدا السمستر الجديد..
:تقدري تجي تاخدي نسخ من وراقك المطلوبه اما الملف خليه في مكانه ماتسيبيش العام مهما صار ديما هو الاضمن..
نجاح سكتت وهي مضايقه..
☘ماكانتش تبي تنتقل للخاص ولاغيره..هي تبي توقف مؤقتا لأن لو صار ودارت العمليه حتقعد فترة طويله في الحوش☘
🍃روحت للحوش وهي تخمم ومش عارفه شن دير..
مالقتش مع من تهدرز وتاخد استشارته..
وكالعاده شغلت نفسها بالذكر وقعدت طلع في الحوايج اللي بتلبسهم ليلة كسوة بنت جيرانهم..
خشت عليها امها وقالت:بتمشي الليله؟
نجاح:ايه..
نجمه:تحسي في روحك باهيه..
نجاح:ايه يام الحمد لله كويسه..
نجمه؛باهي الحمد لله..بتمشي عواطف ولابتخط..
نجاح بإبتسامه تهكم؛شن نسيتي انها التزمت..
نجمه؛تو انتي مصدقه انها التزمت شن هالالتزام اللي يجي بين يوم وليله!..تي هي مخرومة مسلسلات..الهنديات ماتنوضش من قدامهم..
نجاح؛يام انتي عارفتيها خيرها علاش تسألي؟..يام العراس اللي قعدنا نحضروا فيهم فالشارع عراس بنات اولامس كانوا يلعبوا في الشارع ووين نفوتوا من حداهم نعطوهم فلوس ولاناخدولهم شكلاطه..طوبى قريتها في المدرسه..بنت قاجا مازال اصغر من طوبى وحتى هي قريتها اميمه وغرفه حتى هما قريتهم..كنت نتخيل في روحي متزوجه وجايبه زيهم..وفات العمر وهما اللي تزوجوا وقريب يديروا صغار واني قاعده نتخيل..نزلوا دموعها وقالت..اللهم لااعتراض كله قسمة ونصيب عارفه..بس انتي يام ربي يهديك ساهمتي في الوضع اللي وصلناله..
نجمه وهي تبكي:اني!..
نجاح رشفت وقالت؛ايه يام..لما رفعتينا لهديكا المراة بش نديروا التصفيح من خوفك علينا نخسروا شرفنا يوم من الايام..وبسببه خسرنا احلى سنين عمرنا..
نجمه:اللطف يابنتي..هدا نصيب راهو..شوفي اللي مصفحات معاكم في الشارع كلهم تزوجوا..
نجاح:ومن فيهم تريحت يام في حياتها ماهو يوصلنا شن يصير معاهم..واولهم مرت ولدك...باهي ع الاقل هما تزوجوا وداروا صغار..لكن حني اللي اندارلنا اثر فينا هلبه يام هلبه..
وقعدت تبكي..
نجمه وهي تبكي:الله غالب يابنتي نحساب روحي درت حاجه باهيه..ووالله لو كنت نعرف انه بيوصلكم لهالحال مارفعتكم..حني زمان هلبه حاجات ماكنانعرفوها يابنتي وقتنا غير وقتكم..
شافت نجاح امها كيف حاسه بالذنب وتبكي وجعها قلبها..
مسحت دموعها وقالت:سامحيني يام عارفه قصدك ونيتك غير قلبي كان مليان وفرغته بش نرتاح..
نجمه بألم؛سامحيني يابنيتي..
جت لأمها باست ع راسها وهي تقول؛مسامحاتك يام دنيا وآخره..اطلبي من ربي السماح وديما استغفري ..
نجمه بألم:ان شاء الله ربي يسامحني كنت جاهله..ولااني معقوله نود لبنياتي طياح السعد..!
نجاح ضمتها وقالت:عارفه يام والله عارفه سامحيني كلام طلعته من غير مانفكر فيه..
نجمه؛ياريت نقدر نديرلكم حاجه نصلح بيها غلطي لكن الله غالب مافي يدي شي
نجاح:لافي يدك اقوي شي يام..الدعاء..ادعيلنا ديما
ربي يعطينا راحة البال في كل وقت..
نجمه:ربي يريح بالكم ويقوي سعدكم يابنياتي.
نجاح وهي ترشف:آمين يام...آمين..
☘☘☘☘☘☘
وفهالوقت..
كانوا خديجه ونسرين طالعات للسوق بشروا في حاجات البيان اللي بيرفعوه لأريج..
خديجه:بيديروه في حوش جدها؟
نسرين:ايه حوشهم صغير وحتى جنانه مش كبير..
خديجه؛تو بيقعدوا يعجبوا عماتك ونساوين عمامك..
نسرين؛طز فيهم..
خديجه:كله كوم وكان سمعوا بالقصة اللي صارت مع ام الصفرا هديكا تشوفي الدوة اللي بيطلعوها ناقمين علينا نقمة سودا ع خاطر فتنا بناتهم وخدينا برانيات..رتيهم انتي يوم العشي كيف يشبحولهم..
نسرين:قتلك طز ياخديجه معاش دورهم..
خديجه؛شن معاش ندورهم هادي وهما قعدوا يلقحوا ع نساوين خوتك اللي ماحملوش لتوا..
نسرين وقفت وهي تقول:امتى!؟
خديجه:يوم العشي..راما سمعتهم وقالتلي..
نسرين وهي مصدومه:مصح وجوههم اللي يسمع يقول ليهم السنين..
خديجه؛هدا غير تلقيحهم ع مصيبة نجاة..
نسرين بضيق:مانبيش نذكر ان الجالي واخدها..
خديجه؛مصيبه جابها لروحه ولينا..
نسرين؛توجعلي في قلبي طوبى والله ماتستاهل..تعرفي المده اللي فاتت كانت تجري وتوتي بش ديرله عيد ميلاده وطلبت مني نساعدها..مسكينه تحسيها تبي تفرحه وتسعده وبس..
خديجه بضيق:المشكله كلها في خوك الاغبر مايبيش يخليها هالنكبه هادي..
نسرين؛كان يسيبها ضيعه ياخديجه..
بغضب قالت:اه بس لو ربي يعطيني فيها فرصه نخليها هي اللي تطلب الطلاق وتطلع من حياتنا بإرادتها..
تنهدت نسرين وقعدت تشوف في البدالي..
وخديجه تفكر..
عقدت نسرين حواجبها لماتفكرت حاجه مهمه التفتت طول لاختها وقالت؛ايه حقه في حاجه صارت نسيت نقول عليها..
خديجه؛شن هي؟
نسرين:السبت اللي فات مشيت لإيناس المصورة ناخد منها الالبومات والفيديوهات..
خديجه بتهكم؛واخيرا..
نسرين؛تي غير اسمعي شن صار..وين خشيت عليها لقت عندها وحده قريبتها ولا صاحبتها مش عارفه وشورها شايفتها وهي تخدم ع الفيديو وشكلها ايناس مصورتكم لما ترقصوا وصابرين معاكم..
خديجه بآنتباه:ايه!
نسرين:سألتني شن تقربلنا قلتلها اخت مرت خوي..سألتها كان تعرفها تعرفي شن قالتلي..!؟
خديجه؛شن قالت!؟
نسرين؛قالت كانت تخدم معاي وكانت مصاحبه واحد دارتله حاجه بش تنتقم منه قولي من هو ؟
خديجه بنزفزة:تي تكلمي طول عاد..
نسرين:الجالي..
خديجه بصدمه؛كيف!
نسرين:هي شايفه خوتك الزوز في الفيديو وبش تعرفي انها متأكده من كلامها قالت الكبير فيهم..
خديجه قعدت تفكر وهي ساكته..
نسرين؛اني معاش فهمت شي ولاعرفت شي من شي..كيف يصاحب اختها وبعدين ياخدها معقوله الجالي يطلع حقير هكي!
حركت راسها بالنفي وقالت؛لا مش هكي الحكايه..الجالي زمان كان كارههم ومش طايقهم..اللي صار بين نجاة والجالي صار بعد موت طاهر..
نسرين؛باهي شن تفسري اللي قالاته..
خديجه؛في قصة طويله وراه...اسمعي عطيني رقم ايناس..
نسرين؛شن بديري؟
خديجه؛نبي نتفاهم اني وياها بش تجي تصور بيان نضال..
نسرين رفعت حواجبها تعجبا..
خديجه:هيا هاتي الرقم..
تنهدت وهي متعجبه وطلعت تليفونها وحطت ع رقم ايناس ومداته لخديجه..
خديجه خدت التليفون ونسخت الرقم وبعتتاه لرقمها بعدين مدتلها التليفون وقالت:هيا خل نشوفوا شن عندهم كان لقينا حاجه باهيه ناخدوها كان هدا نشوفوا غيره..
وقعدوا الزوز يدوروا ع بدلة حلوة بش ياخدوها لأريج...
🍃اللي وهي فالمصحه تجيها مفاجأة لاع بالي وع خاطر..
مقعمزة في الكافتيريا تاكل في بريوش هي وزميله ليها..
يجيها واحد رافع بوكس كبير..
لقت انتباه الموجوين كلهم..
وصل في الطاوله اللي مقعمزة فيها اريج..
وقال:ابله اريج التاجوري..
شافتله وهي مستغربه:نعم تفضل!؟
:تفضلي..وحط البوكس ع الأرض..
اريج:هدا شنو؟.
:شوفي الورقه اللي عليها تو تعرفي نستأذن..
ومشي من حداها..
واريج تشوف للبوكس..وكلهم يشبحولها..
زميلتها:من مني روجه زعمه خطيبك؟
غمضت عيونها وضحكت بعدين فتحتهم وقالت:هو مافيش غيره..
ناضت وخدت الورقه وقعدت تقرا
(من Nلعزوزته A شوفي شيباينك شن واخدلك ياصقع)
اريج:غبارتي السودا كان خلاهم في الصفحه يكتبوا نفس الدوة! .
صاحبتها بضحكه:هو..
اريج وهي تفركس في تليفونها:اي هو يرزيني في الهم..
وخشت ع الفيس وطول ع صفحة الوفاق..
لقت اخر منشور منزلينه من 20دقيقه..
كانت صورة لبوكس فيه لبسه وشنطه وحذاء وموبايل وسلة صغيرة معبيه فستق..
مكتوب فوقها..
(من Nلخطيبته A )
وبس...
ضحكت وقالت:طلع عاقل شويه الحمد لله..
قعمزت وهي تشوف فالصورة كويس..
عجبها اللي واخده كله ذوق اريج ومناسب لشخصيتها..
~~~~~~~
"وماركه يابنتي مش أي كلام"
اريج:مش هامتني ماركه ولالا اللي فرحني ان عارفني كويس وعاجباته كيف مااني ومايبيش يغيرني.
آلاء:اني عندي اهم حاجه انه خلاك تغيري شقفة هالنقال اللي عندك من عام الفقر..
اريج:والله ماهاين عليا نغيره تحمل معاي هلبه مسكين..
آلاء:ماك فقريه..
عكرشت اريج وجهها بإزدراء..
بعدين قعمزت ع السرير وقالت:خل نخش ع الصفحه ونشوف التعليقات..
الاء:كلهم معلقين ع الفستق..
اريج بضحكه:عارفاته هالشعب الكوميدي بسلامته..
وخشت اريج ع الفيس ولهت بيه..
وآلاء قعدت تشبح للهديه اللي جابها نضال بنظرات غيره..
هدا مازال ماخدهاش وجابلها هكي! مالا بعد ياخدها شن يجيب!؟
وكل مالها تزيد ندم ع ارتباطها بمهند..
☘ومهند فهالوقت..
كان في الاذاعه يخرج في برنامج تاني يقدم فيه احد زملائه..
وقت الاستراحه..
خش ع الماسنجر وقعد يشوف كان آلاء بعتتله حاجه..
كان في الخاص متاعه آلاف الرسائل من المعجبات بس هو ماكانش يدور في الا في رساله وحده من الانسانه اللي قاعد يغرق في حبها وهو فاقد السيطرة ع مشاعره..
وكل ماتزيد تبعد عنه يلقى روحه يجري وراها بدون مايحس..
لما مالقاش منها رساله ضايق ع الآخر..
بس جاته جديد رساله فتحها طول لما قري منها
(اني اكابر صاحبة آلاء)
شاف رسايل وصلوه منها قبل هالرساله فيهم سلام وسؤال عن الحال..
رد عليها.
(اهلا وسهلا تفضلي)
(اسفه ع الازعاج بس كلمتك بخصوص شغل وقلت اكيد حتساعدني لعيون صاحبتي)
(ان شاء الله نقدر نساعدك..)
(تمام..برنامجك أشهر من نار ع علم وقريب طرابلس كلها تابع فيه..ماما من جديد فاتحه بوتيك وتبي دير اعلان وفي نفس الوقت ترعى برنامج مشهور..فكرت في التلفزيون بس اني اقترحت عليها الراديو قاعد خير والناس دور فيه اكثر من التلفزيون وجي في بالي برنامجك)
هو بعد قري رسالتها قال
(تمام مافيش مشكله)
(فرحتني هلبه الحق..بس في عندي فكره لو دير فقرة هكي فيها اسئله للجمهور وطلع فايز بالقرعه الجائزة متاعه تكون كوبونات من البوتيك)
(حلو..حلو)
(ماعرضوش عليكم قبل فكرة زي هادي؟!)
☘ياما عرضوا محلات وشركات وغيرهم يرعوا البرنامج يطبقوا نفس فكرة اكابر بس هو رفض..وتوا وافق بس لأن أكابر صديقة آلاء☘
(لاعرضوا عليا ورفضت..بس انتي مانقدرش نرفض طلبك لأنك من طرف آلاء..هي تعرف)
قعدت تكتب وعطلت في الرد..
والباين انها كانت تكتب وتمسح..بس في الاخير بعتت.
(لالا ماتعرفش بس اكيد حنقوللها)
(تمام..تعالي انتي او الوالده او اي حد من طرفكم لمكان الراديو بش نزيدوا نتفاهموا.)
(ان شاء الله غدوة شن رايك)
(غدوة يومي كله في الاذاعه خلاص تفضلي في أي وقت)
(شكرا استاذ مهند)
(العفو)
حط التليفون وشاف الساعه وقال:خلاص تم الوقت..
شاف لزميله واشرله انهم بيرجعوا...
ورجع بث البرنامج بعد االفاصل..
☘☘☘☘☘
وفي حوش محمد شنيبه..
كانت طوبى متوسطه نسرين وخديجه توريلهم في صور حفل ذكرى ميلاد الجالي..
ونجاه بحداهم وتشبحلهم وهي شاده دموعها بالسيف..
هذا تاني مرة تنساه فيها...
خديجه بضحكه؛الله ع الجالي كيف طالع في اللبس.
نسرين بإبتسامه؛صغراته هلبه..
خديجه:ايه..محلاك ياطوبى..ربي يعقد عسلكم ويهنيكم ويبعد عنكم بنات وولاد الحرام..
نجاة شبحت لخديجه بحده ونسرين تشوف لنجاة وقالت..
حلوة صبغة شعرك نجاه..
ابتسمت مجامله وقالت؛عيونك الحلوة..
طوبى وخديجه قعد يشبحولها..
نسرين:قاصة شعرك هلبه المرة هادي..
مسحت ع شعرها اللي دايراته ذيل حصان وقالت؛مليت من الطويل قلت نغير..
ع خشة الجالي لماشافها شن دايره في شعرها انصدم..
وخواته قعدوا يشبحوله وهما مصدومات كيف خش وقعد واقف يشوفلها وهي من غير حجاب..
طوبى بتعجب:جالي!؟
هو استاقظ وطلع وهو يقول:اسف..
غيرت طوبى عيونها لنجاة لقتها منزله وهي مبتسمه ابتسامة خجل خفيفه..
حست بشي تجمع في صدرها كتم انفاسها..
خديجه ونسرين لاحظوا نظراتها..
شبحت الكبيره لنجاة وقالت؛خيرك ماتتحشميش ع وجهك انتي كم مرة قلنالك اقعدي بحجابك وانتي في الصاله كل مرة دايره هالحركه لواحد من خوتي لين كرهتيهم يخشوا للحوش من اصله.
نسرين قعدت تشبح لنجاة وهي عاقده حواجبها بغضب..
نجاة ؛الغلط منهم هما مش مني عارفين الحوش من فيه مفروض يستأذنوا قبل ليخشوا..
نسرين؛وخيره طوبى قاعده بحجابها ليها ساعه لتوا ماحولتاش ماهو حاسبه حساب للي في الحوش..
طوبى وهي تسمع فيهم شن يقولوا وتشوف لردود افعالهم وردة فعلها حست ان الحركه كانت عفويه من الجالي..
بس نجاة هي اللي مش مزبوطه..شبحتلها وقالت؛مادامك عارفتيهم ينسوا ويخشوا حجابك معاش تحوليه وهكي لاتحرجيهم ولاتحرجي روحك..
حطت نجاه وشاحها ع راسها وقالت؛تمام تمام اسفه بس حركتي عاديه وعفويه من غير قصد بس ماتفهميش غلط يعني..
وناضت وهي تقول؛ماشيه لجناحي نوتي حاجاتي لما توتى الغدي ابعتولي سدرة..
ومشت طلعت من حداهم عادي وكأنها مافي شي صار..
وطوبى معاها بعيونها وحاسه بشعور مؤلم ومخيف مش قادرة تتخاطاه .
بعدين ناضت وهي تقول:خل نمشي نشوف عيشه في الكوجينه..
ومشت طلعت من حداهم وهي مخنوقه ومضايقه..
راجوها لين طلعت وخديجه قالت بهمس..
هالعقرب مش ناويه تجيبها البر..
نسرين بضيق:مقطعه قلبي طوبى..ريتيه وين خش شافها كيف تنح فيها نبي نعرف كيف مازال يشبحلها وعنده وحده زي طوبى..
خديجه بتهكم؛هادوا الرجاله حبيبتي مايلمى عينهم كان التراب..
سكتت نسرين وهي تفكر في كلامها اللي متفقه معاه تماما...
☘ومرت الساعات ع طوبى وعقلها مايبيش يبطل تفكير ومرة مرة تشوف لنجاة وهي تفكر..
زعمه كانت حاطه عينها الجالي وتبيه!؟...
كل حركاتها اللي شافتهم منها يوصلوها لهالنتيجه..
🍃وفي حوشها خديجه وهي مقعمزة تتغدا مع راجلها تفكر في اللي حكاته اختها نسرين وهما في السوق..
وبش تفهم اصل القصه قررت انها تمشي للمصوراتيه اليوم اللي بعده..
بعد مانهت تفكيرها فهالشي شافت لراجلها..
لقاته يحرك كاشيكه في الصونيه وهو يشوفله ويفكر..
خديجه:محي تغدا..
حط الكاشيك وتنهد بعدين قال:نبي نعرف من اللي كان يبي يطيحني في كمين..شن يبي مني..
خديجه:قتلك خل الموضوع هدا عليا اني تو نعرفلك.
عقد حواجبه وهو يقول:كيف بتعرفي!؟
خديجه:محي انت عارف صاحباتي ومعارفي كويس ..
محي:الموضوع يخصني خديجه..
خديجه:وشن اني وشن انت..راجل ومرته ومراة وراجلها..
محي:خديجه..سادتني الجمايل اللي مركتبهالي لليوم..
ضحكت وقالت:والله ياغالي ماتقدر دير حاجه من غيري ولاحتعرف من اللي كان يحفرلك الا بيا اني..لو خليتك دور بروحك حتدور دور وتوليلي مرة تانيه تقولي نبيك تساعديني..
ضحك وحرك راسه يمين ويسار..
خديجه؛تغدا وريحلي روحك..اني تو نعرف مني ونقولك وبعدين انت حاسبه باللي تبيه..
تنهد وقال:باهي..خلينها عليك ونشوفوا شن يطلع معاك..
ابتسمت وقالت؛تغدا تغدا..ورد بالك لتنبعج مرة تانيه..
قعد يضحك..
وهي ولت تاكل وابتسامتها ع وجهها..
☘☘☘☘☘
بعد العصر..
كانت طوبى في جناحها توتي في مكياجها والبدله الصغيره اللي بتلبسها..وبالها مشغول..مش قادره تحول من عقلها اللي صار..
🍃وضرتها لوطا في جناحها حتى هي..
تمشي وتجي وهي تتصل براجلها اللي مايبيش يرد عليها..
يفصل وتعاود...
☘وهو خش للحوش فيده تليفونه اللي حاطه ع الهزاز..مشي لف ع الحوش ووقف وراه..
في الوقت..
اللي كانت فيه عائشه طالعه دخل في المفارش اللي كانت ناشرتهم وبتركب بعدها لطوبى بش تساعدها..
وهي تنزل فيهم..سمعت
"مادام مارديتش عليك معناها مانبيش نكلمك ماتفهميش"
عائشه في نفسها"الجالي!"
قعدت واقفه غصب عنها تسمع..
🍃الجالي:مانبيش نسمعك..
"باهي كل عام وانت بخير"
ضحك بسخريه..
"والله راح عن بالي مش عارفه كيف..اصلا مانلامش اللي درته فيا نساني نفسي"
الجالي:اللي درتيه انتي في روحك مش اني لا وفوقها قاصة شعرك يعني بايعه بكل انتي..
"نبي نستفزك"
الجالي:ايوه وشن بتحصلي من هدا كله!! بطليها حركاتك الرخيصه هادي بطليها راك قاعده تقطعي في الحبال اللي بيني وبينك كلها..تي هي شعره قعدت شعره وانتي مصرة تقطعيها..
بدت تبكي وهي تقول.
"نحبك افهم نحبك..درت هدا كله لأني نحبك ونبيك ليا بروحي "
الجالي:ليك بروحك مستحيل..اسمعي جاي..تبي تقعدي ع ذمتي لازم ترضي بالأمر الواقع..
"نرضى بالأمر الواقع!"
الجالي:ايه.
"تمام ولعبتك هديكا لو عرفت حترضى بالأمر الواقع"
الجالي:عرفت ماهو أسوأ وزادت تمسكت بيا.
"قول صخفت عليك ووجعتها"
الجالي من شدة الغضب جي بيعلي صوته بس دارك نفسه وحافظ ع مستوى صوته وهو يقول:وربي يانجاه تزيد النفس تاخدي كلمتك..
سكتت مرة وحده..
الجالي:حاولي ماتخلنيش نشوف وجهك..
وسكر عليها..
غمض عيونه وهي يحاول يهدي نفسه..
فتحهم لما حس انه هدي بعض الشي..بعدين مشي بيطلع من الحوش مرة تانيه..
وخلا عائشه واقفه في مكانها وهي شاده الشراشيف وتحت تأثير الصدمه..
طلع متزوجها حتى الزواج مش مجرد علاقه...!
☘☘☘☘☘
"الجو برا قنين مش صقع هلبه"
عبد المطلب وهو يتكلم بصعوبه:نمرض..
يوسف:بنلبسك كويس مش مطلعك هكي..
وقعد يلبس فيه كل مرة حاجه..وبعد كمل رفعه وحطه ع الكرسي المتحرك..
تأنيب الضمير هو اللي قاعد يحرك في يوسف محمل نفسه مسؤولية اللي صار ومش قادر يسامح روحه..
حط ايديه ع مقابض الكرسي الخلفيه وبدي يدف في الكرسي..
طلع بوه من الدار..
وعبد المطلب كان خايف تقابله صفيه وتعطيه نظرة من نظرات الشماته والكره اللي عوداته عليهم لما تشوفه صدفه..
لكن هالصدفه ماصارتش..
وطلعه ولده في الجنان وقعد يدهور بيه..
وعبد المطلب يشوف للمناظر حواليه بشوق من اول ماجي للحوش ماطلعش من داره الا الحمام..
يوسف:تو قريب يخش الربيع ونطلعوا كلنا زرده حني وحوش عمي..
عبد المطلب بصعوبه؛ماتكسرش...فلوسك..
يوسف ضحك وقال؛مش بروحي نشتركوا فيها..
عبد المطلب:ماعندي...شي..
يوسف في نفسه"لاإله إلا الله وخلاص"؛يابوي حني مانبوا منك شي كان يولي حالك باهي بس..
عبد المطلب؛صد..قتك..
حرك يوسف راسه يمين يسار بدون مايتكلم..
وقعد يمشي فيه وهو ساكت لعند مالفوا ع الجنان كله ووصل في باب الحوش اللي خش منه الحاج علي..
وين شافه..
عبد المطلب وطى راسه من الخوف..
اما علي برغم نظراته القاسيه الا انه قلبه وجعه ع ولده لما شافه بهالحاله..
غير عيونه عنه ومشي طول خش داخل..
ويوسف كمل الطريق ببوه وهو مضايق..
☘وخوه وهو لابس بدلة الصاعقه..
ورتب مزينه كتافه..
خش للمستشفى اللي تخدم فيها اخته بش يعطيها حاجه.
ركب المصعد اللي وصله وين ماأخته موجوده..
قعد يمشي وهو يدور بعيونه لين لقاها واقفه ع صديقتها حسناء..
والانظار كلها عليه رجاله ونساوين..
حسين؛دكتورة..
شبحوله الزوز.
عيونه جو في عيون حسناء اللي لما شافاته بهيئته هادي ماقدرتش تحول عيونها عنه..
هو غير عيونه لأخته وقعد يشوفلها كيف جايته..
وين وصلت فيه قالت؛اهلا
حسين؛شن جو
اميمه؛تمام شن جوك انت
هز راسه وقال؛بنمشي خدمة برا طرابلس وبنروح الاحد كان سافر راجلك هالفترة عندك يوسف كلميه وتفاهمي انتي وياه..مدلها ظرف ابيض وقال..هدا عطيه تصرف منه هو..
خدت اميمه الظرف وقالت؛حاضر..
حسين؛حاولي ديري لبوك شي ركبتي ولانزلتي يااميمه يقعد بوك..
غمضت عيونها بشده وهزت راسها بإيجاب..
حسين؛معليشي كله لله..
فتحت عيونها وقالت؛لاإله إلا الله..
حسين؛ماتبي شي..
اميمه؛سلامتك بس رد بالك ع روحك..
هز راسه وقال؛هوينا..
غير عيونه وشبح لحسناء لقاها تشوفله لما شافها انحرجت وغيرت عيونها..
هو طول لف ومشي وبين عيونه عيونها..
تشبهوا في لونهم عيون يحبها هلبه...
واميمه مشت ولتلها وقالت:بيطلع برا طرابلس خدمه..
حسناء:هو كان من الثوار ايام الثورة..
ضحكت اميمه وقالت؛خوي كان في اللواء المعزز..
انصدمت حسناء وقالت:وكيف يخدم تحت الدولة توا؟
اميمه ابتسمت وقالت؛مجبور..
سكتت حسناء وهي تفكر بضيق..
اميمه:اني وامي مش حنرتاحوا لين يتزوج ويستقر..
حسناء:علاش هو مايبيش يتزوج؟
اميمه؛مش ناوي لتوا..
حسناء:ربي يطيحه في بنت حلال تستاهله ويطمنكم عليه..
اميمه بإبتسامه؛آمين..
ع جية قصي فات من حداهم وهو يقول؛وراي..
شبحولها الزوز بضيق ولحقوه..
قصي:اميمه عملية مريضة الزايده تأجلت للساعه تسعه..
اميمه بصدمه:هلبه تسعه دكتور.
وقف والتفت شبحلها وهو مضيق عيونه..
وقفوا الزوز..
قصي:اميمه علاش اخترتي الجراحه!؟ علاش خشيتي طب اساسا!؟ ماهوخدتيها من قصيرها وخشيتي معهد معلمات وطلعت مدرسة المهنه الوحيده اللي تناسبك مدام هدا وضعك!..
الكلام كان قاسي ع اميمه واستفزها بس ماعرفتش بشن ترد عليه.
قصي:اللي تاخد راجل مش عاجبه وضع مهنتها تقعمز في الحوش وتعطي المجال لغيرها..
ولف ومشي..
وحسناء تشوف لأميمه كيف تشوفله بحده ودموعها في عيونها..
بعدين قالت؛بري حسناء تو نلحقك..
حسناء وهو تشوفلها بقلق:باهي..
ومشت..
واميمه مشت من الجهة التانيه وهي طلع في تليفونها من جيب بالطوها..
اتصلت بعمر...
نادى مرتين ورد.
"ايوه قلبي"
اميمه:هلا حبيبي شن جوك توا؟
"تمام ياعمري مستاحشك بس"
تنهدت وقالت؛عموري..
"عيونه"
اميمه؛العمليه الاخيره اليوم تأجلت للتسعه يعني تعالى الساعه 11..
سكت ...
اميمه:عمر..سمعتني..
"قصدي اميمه الوضع هدا مايمشيش معاي"
اميمه؛مجبورة عمر شن بندير هادي خدمتي وانت عارفها من البدايه..
"مش لدرجة مانشوفكش بكل كان في الليل..واهو حتى في الليل بتخدمي مش وضع هدا"
اميمه؛وخيرك انت تسافر بالأيام ياعمر مرات يفوت اسبوع مانشوفكش فيه لااعترضت ولاشكيت لاني من البدايه عارفه طبيعة خدمتك وراضيه بيها..
"في فرق بيني وبينك"
اميمه:لامعليشي عمر مافيش فرق الزوز تفاهمنا ع كل شي من البدايه اني قاعده ع اتفاقنا لكن انت بادي تتنصل..
"الدوة ع التليفون ماديرش حل لما نجي نروح بيك تو نتصرف"
وسكر عليها.
تأففت بغضب..ونزلت تليفونها حطاته في جيب البالطو بعدين لفت ومشت بتلحق قصي وزميلتها..
☘☘☘☘☘
الساعه 7:30بعد المغرب..
وبعد الصلاة...
قعدت عائشه تلبس في طوبى البدله الصغيره وهي شاده دموعها بالسيف..
ومش عارفه كيف قعدت الساعات هادي كلها متمالكه نفسها وساكته بعد اللي عرفاته..
وجعها قلبها ع طوبى الغافله اللي ماتندري ع شي..
وجعتها صاحبتها سدره اللي لأخر مرة تقول انها تريحت ع خواتها وبنات اختها ومعاش عندها شي تخاف عليه لو خلاته بعدها..
تفكرت لما سدرة وصتها ع طوبى وقالتلها..
"ديريها اختك الصغيره وخليك في مكاني لو درقت عيني"
باهي كيف بدير توا..شن في يدها..
الموضوع كبير هلبه..لو طلع حيدير مشاكل كبيره مش معروف كيف حتكون اخرتها..
حتخرب هلبه بيوت..وحتصير عداوة كبيرة بين العيلتين..
عائشه الملتزمه حتفكر باللي تعرفه في الدين..
يعني حتختار تسكت بش تدفع ضرر اكبر..
مرات هما بين بعضهم بعدين يحلوها بطريقه او بأخرى..
اما هي لو طلعت اللي عرفاته توا حتكون العواقب وخيمه...
اختارت عائشه السكوت بش ماتكونش سبب لكوارث متلاحقه..
وقالت في نفسها..
"سترهم ربي..ويكشف هو سترهم كيفما شاء"
طوبى:شن رايك طلعت عليا؟
عائشه بإبتسامه تخفي الألم؛الله يبارك عليك الأخضر طالع عليك يجنن..
طوبى بإبتسامه:مانحباش هلبه سدرة جبرتني ناخده..
عائشه؛عارفاته يطلع عليك بالذات ع لون عيونه..
ومشت تاخد الكاب من ع الشماعه..
شبحت طوبى للمرايه:زعمه يعجب الجالي؟
عائشه ضم شواربها لداخل بألم..بعدين رسمت ع وجهها ابتسامه ولفت ومشتلها وهي تقول؛يعجبه ونص لو تلبسي شكارة خيشة تطلع عليك..
ضحكت وقالت:حتى هو قالها..مدتلها التليفون وقال:صوريني بش نبعتهاله..
ابتسمت وقالت؛باهي..
خدت التليفون ..
وطوبى عدلت وقفتها وابتسمت..
وخدتلها عائشه لقطه حلوة..
بعدين مدتلها التليفون وقالت:شن رايك؟
طوبى شافت الصورة وقالت بإبتسامه؛حلوة هلبه يسلموا..
خل نبعتهاله..
وبعتتها ماسنجر...
لحظات ووصلتها منه رساله..
(الصمت في حضرةالجمال جمال)
ضحكت..
وعائشه تشوفلها بحزن وهي تلبس فيها الكاب..
🍃وضرتها كذلك صورت وهي لابسه فستان جريء زي عادتها وين جت بتبعتها انصدمت لما لقاته دايرلها حظر..
كادت تحذف التليفون ع حيط من الغضب بس تمالكت نفسها وحافظت ع شويه الهدوء اللي عندها وتحاول فيه بطرق تانيه..
☘ومشوا مع مغليه..
هما ونسرين واللي رفعهم نضال..
☘وين خشت طوبى وهي لابسه البدله الصغيره اللي كان لونها اخضر هافت اقرب للون الفستق..
الانظار كلها توجهت ليها..
فوق الجمال ربي يعطي لبعض عباده قبول غير عادي..
يخليهم مبهرين بزياده في عيون خلقه والناس ماتشوفش زيهم حتى لو كان في اجمل منهم في نفس المكان..
دورت طوبى ع عيلتها..
لقت غرفه ومطيره بس..
وكل وحده فيهم مقعمزة في تركينه وهني طوبى استغربت.
جوها الزوز مع سلموا عليها..
مطيرة؛الله يبارك عليك بنتي طالعة زي الغزاله خل نصورك لسديرة..
وغرفه تمرر في عيونها ع الحاضرات ومتجاهله كلام عمتها..
مطيره؛اهو خديتلك صورة قنينه..
طوبى:علاش ماجتش سدرة؟
مطيره:قالت بتمشي للصاله غدوة..
طوبى هزت راسها وهي ساكته..
غرفه:اميمه مش جايه؟
طوبى؛عندها خدمه اليوم كله غدوة ان شاء الله جاية للصاله..
غرفه بإبتسامه:ربي يعاونها..
شويه جت نسرين وقالت؛كيف حالكم اليوم..
الزوز ردوا عليها:الحمد لله..
نسرين:هيا طوبى تعالي قعمزي مع الصدارات..
وخدت نسرين طوبى لصفة الصدارات وقعمزتها..
وعيون نجاح عليها كانت تشوفلها بإبتسامة حب وامتنان ومتمنيتلها السعاده من قلبها..
عكسها نجاة اللي كان تلقى تنهي حياتها فهاللحظه..
شبحت لمغليه لقتها تشوف لطوبى وهي تشكر فيها لوحده من الجارات وهي تتباهى..
وكل ماله قلب نجاة يزيد حقد عليها..
☘☘☘☘☘
(يعني عجبوك)
(حلوات طلع عندك ذوق ياضرسان)
(تشكري في روحك انتي عارفتيه ذوقك)
بعتتله رموز تعبيريه ضاحكه..
رد عليها يقول..
(بيانك كله ذوق خديجه راهو)
(حلو ذوقها خديجه)
(مايشبهش ذوقك بكل راهو)
(عاد بنخش مرحلة تانيه في حياتي تبي تغيير)
(جديات فستق فرحانه اللي بتولي مرتي)
قعدت تضحك..
(نكلم فيك ياشمطاء ردي)
(عادي يعني علاش بنفرح)
(مش متوقع منك غير الرد هدا كان رديتي رد حلو معناها تليفونك مش عندك)
قعدت تضحك..
(بستاشيو الولاد جو نهدرزوا بعدين)
(ابعتلي نتيجة المبارة)
(احسن حاجه فيك جيتي تبعي في الكورة وتحبي الفرق اللي اني نشجع فيها )
(من حسن حظك بش كان خسروا مانفشش غلي فيك نواسيك وتواسيني)
(شن رايك نديروا العرس مرة وحده)
وهي تضحك قعدت تكتب..
(برا لصحابك برا ياطرشوق)
بعتلها رمز تعبيري قلب احمر..
ونهي المحادثه..
ابتسمت من قلبها وشافت لآلاء لقتها تتراسل حتى هي ع بالها مع مهند..
رجعت تاني خشت ع الفيس وكسدت عليه..
أما آلاء..
(وليد معاش تحاول)
(انتي تبيني زي مااني نبيك آلاء معاش تكابري)
(انت اللي ضيعتنا من بعض)
(لالامافي شي ضاع قلبي انتي تشجعي وافسخي وشوفي شن ندير)
(من الأخير وليد مش حنديرها لين نضمن ان مافي حد يقدر يعفس في موضوعنا غير هكي ماتفكرش اني ممكن نفسخ ونرجعلك)
وطلعت من المحادثه ودارتله كتم..
جتها رساله مهند..
بدت ع وجهها ملامح الضيق..
بس فتحتها..
(مرجانتي)
ابتسمت بإستغراب وردت.
(نعم؟!)
(نعم هادي ع شنو بالزبط)
ضحكت وردت.
(ع مرجانتي هادي مالقيت كان المرجان تشبهني بيه)
(لأنه حجر كريم مايشبهش غيره نص متحجر والنص التاني حي)
(شن قصدك)
(قصدي انك زيه نص فيك قاسي هلبه والنص التاني رهيف..اني شفت النص القاسي بس صح..لكن لمحت في عيونك النص التاني)
هي قرت هالرد اكثر من مرة وحست بشعور غريب وهي تقرا في الكلام..
(شكله الكلام معقد وخشت بعضها عندك)
(قصدك اني غبيه ومانفهمش)
(ياستي اني اللي مانعرفش نشرح ونعبر)
(ديما تحسس فيا اني سطحيه وتافهه)
(لو نعطيك عيوني تشوفي بيهم روحك معاش تقوليه كلامك هدا بكل..)
"آلاء"
انفجعت وردت بنرفزة؛شن تبي يادراه..
اريج؛نوضي تعشي يادراه انتي ..
الاء:مانبيش وفوتيني..
اريج:ربي يهديه نسيبنا بيرقدك جعانه..
ومشت طلعت وآلاء تجاهلتها ولهت بالمحادثه..
(نسأل سؤال)
(اسألي)
(شن اللي عاجبك فيا)
(بصراحه ومن غير زعل)
(ياريت ومش حنزعل)
(وعد)
(وعد قول)
(ولا حاجه)
بصدمه ردت..
(من جدك انت)
(قتلك من غير زعل)
(باهي علاش خطبتني كان مش عاجبك فيا شي)
(اسأليني سؤال تاني)
(خليت فيها اسئله انت)
(باهي اني نعطيك السؤال وانتي عاوديه)
(اللي هو)
(شن تحب فيا)
ابتسمت وعاودت السؤال متاعه..
(شن تحب فيا)
(كل شي)
ضحكت بتعجب وقالت
(كيف جت هادي)
(تجي عادي ينحب البنادم اللي كله عيوب ومرات ينحب اكثر من اللي كله ميزات)
(اني كلي عيوب)
(ركزتي ع هادي وماركزتيش ع ينحب)
(تعرف صعب عليا نفهمك صعب حتى نتكلم معاك)
(انتي اللي تصعبي فيها صدقيني خليك معاي ع طبيعتك اني مانبي منك شي تاني غير انك تكوني ع طبيعتك وبس..)
معاش ردت عليه قعدت تقرا في كلامه وتفكر..
فعلا هي ديما حاساته انسان عميق وواعي زياده ع اللزوم وهي عكسه تماما..لهذا تتحاشى تاخد وتعطي معاه..
(آلاء)
تنهدت وردت
(نعم)
(نحبك)
قعدت متنحه وهي تشوف فالكلمه وكأنها اول مرة تجيها من حد
(تعرفي علاش طلعتها توا)
(علاش)
(بش تعرفي انتي شنو عندي ومعاش يقعد في حواجز بيني وبينك)
(باهي اني عارفه انك تحبني مهما كابرت واضح عليك من غير ماتقولها)
(تمام بس كنتي تراجي فيا نقولها)
عضت ع شاربها وهي مبتسمه..
(راني فاهمك اكثر ماانتي فاهمه نفسك )
(باهي يافهيم انت)
(نضحك توا..وع فكرة ضحكت اكثر من مره)
(هادي بدل الايموجي)
(ايه مانحبش نديرهم)
بعتتله رموز تعبيريه ضاحكه..
(نضحك توا)
حطت يدها ع فمها وقعدت تضحك من جدها..
شويه بعتلها..
(يللا نرجعوا للسبب اللي كلمتك ع خاطره..كلمتني صاحبتك)
اختفت ضحكتها وعقدت حواجبها وبعتت.
(من هي)
(اسمها اكابر تقريبا)
رفعت حاجبها وبعتتله..
(شن تبي)
☘وحكالها شن مضمون المحادثه اللي دار بينه وبين أكابر..
(شوف هي ماحكتليش تمام بس انت احسن مادرت انك وافقت)
(راك تقوليلي هادي وحده من اللي تعاركتي معاهم يومها)
(ايه..ونبيها تعرف اني احسن منها وحنخلي مصلحتها تمشي ومش واقفه فيها)
(حلو..يعجبني القوي)
ابتسمت وبعتت..
(بس بنطلب منك طلب ماتقوللهاش اني نعرف تمام)
(علاش)
(في راسي حاجه نبي نوصلها)
(تمام ماعنديش مشكله نكون الكوبري اللي يوصلك)
(حاشاك مش قصدي)
(قلت ماعنديش مشكله علاش تبرري خليك معاي ع طبيعتك قلنا)
(تمام)
(هي توا بنخليك مشغول شويه..تفكرني مرة مرة مش تنسي)
ضحكت وبعتت..
(تمام..باي)
(سلام)
تنهدت بعدين حطت التليفون ع الكامدينو وهي مبتسمه قالت؛والله فيه جو..مش بطال بس خسارة ناقصه هلبه حاجات اني نبيها..
وناضت ومشت بتطلع من الدار وهي تقول؛جعانه..
☘☘☘☘☘
الساعه11:15ليلا
في الطريق..
عمر:تمام اني مش ضد خدمتك بش وضعها يخوف يااميمه افهمي..
اميمه وهي منفعله؛مش حاجه جديده كله واضح ومعروف من الاول..زي مااني راضيه بوضعك حتى انت لازم ترضى بوضعي.
عمر:تمام اني مانبيش نكمل النقاش العقيم هدا وبنسكت..لكن سكوتي مايعنيش اني سكرت الموضوع..
غمضت عيونها وهي تحاول تهدي نفسها بعدين فتحتهم وهي تشبح للطريق..
وقعدوا ساكتين..لين وصل للحوش..
خش بالسيارة للقراج..
اميمه:بنركب طول ماعنديش حيل للمسايرة والمجاملات..
شبحلها شويه بعدين قال:ترا ركزي ع اللي طلعي فيه من فمك..
تنهدت وقالت؛اسفه..
فتحت باب السيارة ونزلت..
وهو نزل وراها..
لقاها طول مشت بإتجاه دروج الشقه..
ماباش يجبرها ع شي..بس مش حيسكت ع تصرفاتها..
ومشي لحوش ماليه يشوف أمه..
وين خش داخل سمع امه تهدرز مع خوه الجالي في الصاله
خش عليهم وقال:السلام عليكم.
الجالي؛هادي الجيه..
مشي قعمز حدا امه وقال؛ايه روحت بأميمه من المستشفى..
هما الزوز بصدمه:توا!!..نعم؟!
هو ارتبك وقال؛هادي خدمتها..
الجالي؛عليك خدمه..
مغليه؛وانت كيف ساكت ع الوضع هدا راك تقولي عاجبك..عريس ماليكش هلبه مسكر شهرين مرتك ماتقعدش في الحوش بكل شن هالعيشه هادي..!؟
عمر:يام في البدايه هكي بعدين لما تبدا تخدم مزبوط يتحدد وقت خدمتها..
الجالي:شن تخصصها هي؟
عمر:جراحه..
الجالي بتهكم؛تويتحدد ان شاء الله..
مغليه:قولها تغير تخصصها دير حل علاش مزوجاتك اني كان بيقعد هدا حالك..
الجالي؛لو منك حياة زي هادي مانعيشهاش..تعرفي يام لما نروح تاعب من الخدمه..نشم ريحة الحوش كلها مطهر ع معطر شي يفتح النفس نلقى غداي واتي ومستف ومنظم في صفرة تخلي عينك تشبع..نلقى حوايجي محطوطات ع السرير يراجو فيا..
مغليه:هادي المراة الصح اللي دور في راحة راجلها...
عمر بضيق:كل وحده ووضعها..وبعدين اني نغيب عنها بالسبوع مرات..
الجالي:ماهو هدا الهم تغيب عنها بالسبوع والاسبوع اللي تروح فيه ماتقعدش..
مغليه؛ااخ وخلاص اسكتي يامغليه ماتتكلميش..
ناض معاش تحمل يسمع اكثر هكي قال:يسترالله..تصبحوا ع خير..
ومشي طول طلع من حداهم..
مغليه؛ريته ماعجباش كلام الحق
الجالي:لايام مقتنع بيه غير يكابر..
ناض وقال..خلاص اني يام شحني تم بنركب نرقد..
مغليه بإبتسامه؛برا ارقد وارتاح تصبح ع خير..
الجالي:قدامك كل خير..
ومشي طلع من الصاله..
سمع صوت حركه شبح ايمينه لقي نجاه واقفه قدام الجناح وهي قاعده بالفستان اللي مشت بيه دايرة روحها بدخل كندرتها اللي نستها برا..
هو لما شافها عقله طار من مكانه..
خشت وسكرت الباب..
هو قعد رجل تقدم ورجل توخر..
بس عقله خلاه ياخد احتياطه يركب يشوف طوبى قبل كام لقاها راقده ينزل..
وفعلا ركب طول..
ووصل في باب الجناح..
فتحه وخش...
ويوقف في مكانه جامد من غير حركه..
شاف قدامه مراة مختلفه تماما هالمرة كل شي مختلف..
كانت مقعمزة قدام المرايه تدهن في ايديها..
شبحتله..
هو سكر الباب وقال:تعرفي شن احلى حاجه فيك؟
هي بإبتسامه:شني!؟
الجالي بنظرات اعجاب؛انك ديما تفاجئي فيا...
ضحكت بخجل..
☘طوبى حست بالخطر والاستنتاج اللي وصلتله خلاها تتحرك بسرعه بش تحافظ ع اهم شي تملكه في الوقت الحالي زوجها..حتى لو ماكانتش تحبه بس هو سبب استقرارها اللي مخلي عيلتها وبالاخص امها التانيه مرتاحين عليها..وهي حدير المستحيل بش ماتفسدش راحتهم ولو ع حساب نفسها☘
🍃واقعدي يانجاة راجي لين يطلع عليك الصبح ومش حيدق بابك حد..
☘☘☘
وعمر اللي فتح باب شقته وخش وهو حامق وناوي يطلع غله كله في اميمه..
وين خش دار النوم..
لقاها راقده ع السرير بحوايجها..غارقه في نوم..
نوم حد تاعب..اجهد نفسه واستهلك كل طاقته..
صح معصب منها وزاد عصب لما شاف حالتها توا بس في نفس الوقت وجعاته..
لكن اكيد مش حيتنازل عن الموقف اللي بياخده منها.
☘☘☘☘
هي مع الفجر فاقت..
لقاته من حداها قالت في عقلها انه راقد برا..
طنشت..مشت خدت حوايج من الدولاب..
خشت الحمام دوشت..بعدين طلعت صلت الفجر..
وبعد الصلاه قعمزت قرت وردها..
وبعدين مشطت شعرها وحطت شويه زينه ومشت طلع من الدار بش تفيقه يصلي..
مالقتاش في الصالون..استغربت..
ولت للدار خدت تليفونها واتصلت بيه..
رد عليها.
"نعم"
اميمه حطت يدها في نصها وقالت:الله ينعم عليك وينك!؟
"كنت في الجامع"
ضيقت عيونها وقالت:وين بتت امس!؟
"في المربوعه"
رفعت حواجبها وقالت؛لوطا صح!
"ايه"
هزت راسها وقالت بتهكم:احسن بعد عمر استمر..
وسكرت عليه ولوحت تليفونها ع الزيانه..
بعدين مشت طلعت للكوجينه وهي معصبه بش دير قهوة..
☘☘☘☘☘
الساعه 11:30صباحا ..
في الكوجينه..
طوبى مغليه مقعمزة وطوبى واقفه عليها وهي شدة السله اللي فيها بينكا وشنطة في يدها..
مغليه؛بتمشي اليوم..
طوبى:ايه عمتي بنتغدا عندهم وبعدين نوتوا رواحنا..
"يام"
مغليه:خش مهدي خش.
خش المهدي وهو يقول:السلام عليكم..
ردوا عليه:وعليكم السلام..
المهدي؛شن حالك طوبى..
طوبى:الحمد لله عمي مهدي شن حالك انت..
المهدي:الحمد لله..وين شاده الرحال.
طوبى بضحكه:لحوشنا..
ابتسم..
مغليه؛باهي من بيرفعكم للصاله..
طوبى:الجالي..
مغليه؛باهي بري وسلمي ع وخيتك وعمتك..
طوبى:يوصل عمتي..السلام عليكم..
ومشت طلعت..
مغليه؛سدرة كان تلقى تسكنها عندها وين تجي لازم تخليها تقعد عندهم نهار كامل..
المهدي؛بنتهم يام..
مغليه:لاهادي ولت متسميه ع ولدنا يعني بنتنا حني..
لف يده تحت صدره وحط مرفق يده التانيه عليه واليد حطها ع خدها وهو يقول متسائل بتهكم؛ وخيرها خديجه 24ساعه هني!؟
مغليه؛هي تجي هني مانكر فيها..
نزل ايديه وقال؛كان مش عاجبك راك عاركتيها..
مغليه؛ووااك ياكبدي وانت ماينحكاش معاك بكل لازم طلعني غالطه..
ضحك وقال؛مانطلعش فيك غالطه ياغاليه نوري فيك حاجات انتي ماتشوفيش فيهم..
مغليه؛طلعتني عميه ومانشوفش..صحيت..
ضحك وهو يقول:وواك ياكبدي وانتي ماينحكاش معاك بكل لازم طلعيني غالط..
مشي بيطلع وهو قاعد يقول..ووواااك..
وامه تضحك وتحرك في راسها يمين ويسار وهي تقول؛خزي معفن..
☘وهو كان متوجه للمربوعه بش يطل ع بوه..
بس وقف في نص الطريق لما شاف نجاه جايه من جناحها..
هي لما شافاته خافت جت بتكمل طريقها للكوجينه..
وقفها لما قال..
"استني"
تشجعت وشبحتله..
هو قدم خطوه بعدين وقف وقال:شن قتلك اني اخر مرة..
نجاة:ماجيتش من كيفي عمي وعمتي شدوا فيا..
المهدي:تمام تو نخليهم هما اللي يقصولك..
نجاة رفعت حاجبها وقالت؛كيف ترا..
عقد حواجبه وضيق عيونه وقال:تتحدي فيا انتي!؟
نجاة؛لا بس نوقظ فيك ع حاجه مانبيكش تنساها انتي لو قلت لعمي شي احسب حساب ردة فعله عليك حتى انت لأنها حتكون اسوأ..
رفع حواجبه وهو متعجب جرأتها..
ابتسمت وقالت؛من رأيي تنسى اللي صار احسن ليا وليك..
شد ع قبضة يده وقال وهو يتوعد فيها؛صدقيني كلامك هدا حندمك عليه ندم مش حتندمي زيه في حياتك..وقحه..
ومشي وهو معصب ع الآخر..
بعد مامشي..خدت نفس..وزفرت..
بعدين مشت خشت للكوجينه..
صبحت ع مغليه وقعمزت هدرزت عليها شويه..
نجاة:بنمشي نجيبهم توا اختي عندها خدمه بعد ساعه..
مغليه:باهي بري مربوحه..
نجاه:الحوش كأنه مافيه حد..
مغليه؛نسرين بكري شويه روحت وطوبى مشت لحوش ماليها والولاد في اعمالهم عمك محمد بس قاعد..
نجاة:باهي اني مش معطله ساعه بالكثير..
مغليه؛سوقي بالشويه عليك..
نجاة بإبتسامه؛ان شاء الله..بالسلامه..
مغليه:بالسلامه..
ومشت نجاة طلعت من حداها...
وهي دارت دورة ع الكوجينه بعدين مشت طلعت منها وتوجهت لدار المعيشه..
اول ماخشت لدار المعيشه..
طلعت نجاه من حيط الممر اللي يرفع للمدخل..
ومشت بهدوء وحذر..
ركبت الدروج متوجهه لجناح الجالي وطوبى..
وصلت فيه..
فتحاته بهدوء وخشت وسكراته بهدوء..
مررت نظرها ع الدار بحقد وقالت:رفعتها معاها..
..بعدين مشت طول لباب الفيرندا..
فتحاته بهدوء..
وطلعت وهي تتفحص في المكان بنظرها..مافي حد ممكن يشوفها من أي مكان..
حنى البالكونه اللي مقابلتهم مسكرة بالسرانتي..
شافت لمحابس الورد..
طلعت من شنطته شيشة صغير..
فتحتها..وصبت منها ع المحابس كلهم والغل معبي قلبها..
بعد ماكملت خشت داخل وسكرت الباب بهدوء..
ومنها لباب الجناح..
طلعت ومشت نزلت لوطا وطلعت من الحوش..
☘ولامن شاف ولامن دري☘
وتمر الساعات...
وتجي الساعه 7:30 بعد المغرب..
كانت اميمه واتيه..
خش عليها عمر شافها كيف طالعه حب طلتها هلبه بس الفستان ماكانش عاجبه لاحظه بسيط هلبه مش لعروسه ماباش يعلق..
حد قاللها:هيا..
وهي بدون ماترد عليه..
لبست العبايه وطلعت..
وهو طلع وراها..
نزلوا لوطا وخشوا للحوش...
لقوا نجاه بالعبايه والحجاب واقفه تساوي لجوري في شعرها..
عمر:ماشاء الله ع حبيبة عمو ماشاء الله..
ابتسمت نجاه..
جوري:حلوة عمو؟
عمر:عسل ياعمو..ربي يحفظك..
واميمه تشوفلها بإبتسامه..
نجاة:شن حالك اميمه..
اميمه بإبتسامة مجامله:الحمد لله شن حالك انتي..
نجاة؛الحمد لله..
ع جية مغليه لما شافتها اميمه قدمتلها وباست ع راسها..
فاتتها مغليه بدون ماتكلمها ومشت للباب وهي تقول؛هيا..
نجاه خدت بنتها ومشت وراهم ومن داخلها بالحركه اللي دارتها مغليه لأميمه..
وعمر جاها وقال بصوت منخفض:شن خسرتي لو خشيتي وسلمتي امس..
شبحتله بحده وعيونها مليانات دموع..
وهو مشي وخلاها وهو معصب منها ع الآخر .
اما هي شدت دموعها وتمالكت نفسها ومشت طلعت وراهم...
☘☘☘☘
وفي الصاله..
تلاقوا كلهم..
نساوين عيت الواعر ماعدا فردوس وبناتها..
وبنات شنيبه وكناينهم..
ونبيله اخت عبد الرؤوف...
كانت اجواء الحفله حلوة بالمرة..
هيجوا فيها هلبه..وع راسهم طوبى وغرفه..
اللي رقصوا مع بعض وعجبوا كل الحاضرات..
ومحط النظر والاهتمام طوبى اللي وين يجوا الناس لطاوله مغليه يسلموا عليها يتفرجوا عليها وع اناقتها..
وبرغم جمال اميمه المميز الا انها ماقدرتش تبرزه لأن طلتها كانت غير موفقه هالمرة..
وخديجه ومغليه طارتلهم منها ع الآخر..
☘☘☘☘☘
الساعه 12:30ليلا..
بعد ماروحوا كلهم خشوا قعمزوا في دار التقعميز..
وكانت معاهم عائشه اللي قعدت تراجي فيهم..
كلهم بيباتوا مع بعض فيها تنفيذا لطلب الحاج محمد..
خديجه:استغفر الله العريس صدمه والله صدمه حرام البنيه صغيره وزي العسل..
نسرين؛علاش شن ناقصه..
نجاة:ماركزتيش انه احول واضح حتى وهولابس نظرات طبيه..
مغليه:واضح زي الشمس عين تقلي وعين تصب في الزيت..
طوبى:بس شكله مرتب وراقي..
اميمه؛ عيبه مش مدرق عنها هي عارفاته وشايفاته ومقتنعه بيه هدا المهم...
طوبى شبحت لأميمه ودموعها عبوا عيونها.
عائشه؛اهم حاجه انه مش مدرق عنها توا تسمعي ببنات جو رجاله تشبحيهم من برا زين ولبس تقولي لاقبلهم ولابعدهم بعد الزواج يطلع البلي كله..
وجوه مغليه وبنات تغير لونهم..
وطوبى وهي تسمع في كلامهم قعدت تشبح في الفراغ ودمعتها ع حافة عينها..
اما نجاة لاحظت ان اميمه وعائشه مايتكلموش بشكل عام..
واضح انهم يلقحوا..
بس تسائلت في نفسها زعما شن عرفوا!؟..
مغليه بعد بلعت ريقها قالت؛يللا ربي يهنيها ..هي نوضوا بدلوا حوايجكم وتعالوا كان بترقدوا..
نجاة:كان تبعتوا لنضال يجيب معاذ..
خديجه؛قعد عنده اليوم اكيد هبله..
مغليه؛نضال باله واسع..
نسرين؛وصليها لبنت اختك طوبى..
ابتسمت طوبى بمجامله وقالت:ان شاء الله..
مغليه:الخميس الجاي كيف هالنهار فاتحه وبيان نضوله الحمد لله رب العالمين هنيت عليكم كلكم..
خديجه:مازال يام اصبري الجدد ماتحكميش عليهم توا..
مغليه:ريتك سمعتي الجالي وهو يشكر في طوبى امس..
كلهم شبحولها وهي ابتسمت بخجل..
مغليه:قالي يما راده بالها من حوشي ومن راحتي قال بدت نراجي امتى نروح للحوش..
خديجه بإبتسامه؛الله يبارك الله يبارك..حتى هي رباية سدرة عملتها كيف تكون مراة صح وربة بيت..
☘ضرب معاني☘
مغليه:الله يرحمك ياوردة..اللي عقب مامات..
كلهم قالوا بأصوات متقطعه؛الله يرحمها..
ماعدا نجاة اللي كانت تشوف لطوبى بنظراتها الحاقده..
☘☘☘☘
رقدت جنب عمتها وهي تقول؛حسيت مغليه راضيه ع طوبى هلبه..
مطيره:وقالبات هي العقرب الكبيره ع اميمه..
سدرة:لاحظت وحسيت امي صفيه جوها مش مزبوط ع خاطر هكي..
مطيرة؛ريته بوي قعد مسكر راسه وماعطاها حاقدين عليها مش ناسيين كيف ردتهم قبل.
سدرة؛نقولك حاجه اميمه ماينخافش عليها هي توا مراة ناضجه وواعيه وشخصيتها قويه ما يقدروش عليها مهما داروا..
مطيره؛ان شاء الله ربي ينصرها عليهم..
وسدرة؛ويبعد عليهم المشاكل هي وطوبى يارب..
مطيرة:يارب..
☘☘☘☘☘
وهديكا الليله..
كلهم رقدوا مع بعض في دار وحده..
ماعدا نجاة اللي كان غفت شويه تنوض مخلوعه وتقعد دور ع طوبى لما تلقاها ترتاح..
بس اخر مرة لقت مكانها فاضي..
قلبها نخصها..
ناضت ومشت طلعت بهدوء من الدار..
مشت للحمام يبان مظلم..
ومنه مشت بإتجاه الكوجينه..
وين قربت من الصاله سمعت صوت ضحك..
قربت منها ووقفت في الباب تسمع..
كانوا طوبى والجالي مع بعض في الصاله..
يوري فيها فيديوهات للعرس خداهم من صحابه اليوم..
طوبى:الله جوكم يهبل..
الجالي؛شوفي توا شن بيصير في هدا..
طوبى وهي نتفرج؛حي عليه!..ويضحك عادي!
الجالي بضحكه؛هادي بصارتنا..
طوبى؛ربي يقطعها البصارة اللي هكي..
نكشلها شعرها وقال؛شفشه..
طوبى:شفشوف..
🍃وخرت وهي في قمة الغضب وبتبكي خلاص..
خشت للجناح..
بكت لين عييت..
بعد هدت قعدت تفكر بعدوء كيف تنفد اللي في بالها اللي عزمت انها مش حتروح قبل لتنفده..
☘☘☘☘
تاني اليوم...
الجمعه..
كانت اجواء لمة عائلية بإمتياز في حوش شنيبه..
تصبحوا ع عصيدة نسرين..
اللي قعدوا يداعكواعليها دعاك صغار وكبار..
وبعد الفطور..
تعاونوا الكناين مع الحموات ع ضمان الحوش..
ووين قرب موعد الصلاة...
اللي هادي مشت توتي في حوايج راجلها للصلاه..
🍃في جناح طوبى..
مشت فتحت باب الفيرندا وطلعت برا تشوف الورد..
انصدمت..لما شافاته كله ذابل..
قعدت تتفحص فيهم كلهم..
طوبى بصدمه؛هادم ميتات...!
ودموعها طول نزلوا..
قعدت واقفه تتفرج عليهم وقلبها واجعها ع الآخر..
ع خشة الجالي للجناح..
شاف باب الفيرندا مفتوح..
مشي طلع..
لقي طوبى واقفه ع زهر الاقحوان الميت وهي شداته وتبكي..
الجالي بصدمه؛شن صارلهم!؟
طوبى ببكي:مش عارفه امس الصبح كانوا كويسات مافيهم شي..
الجالي:معاش شفتيهم بكل بعدين؟
طوبى حركت راسها بالنفي وهي تبكي بصمت..
الجالي جاها وحاوطها من كتافها وخش بيها داخل وهو يقول:غدوة تو نرفعهم للراجل نفسه ونفهم منه علاش صار هكي..
سكر باب الفيرندا..
وهي شدت فيه وانهارت بالبكي.
الجالي بألم؛خلاص ياقلبي خلاص تو ديري غيرهم واكثر منهم..
حاول يهديها لين هدت..
بعدين خدت حواجيه وقعدت تحدد فيهم ودموعها ينزلوا وهي تمسح فيهم..
وهو مقعمز ع السرير يشوفلها وقلبه واجعه عليها..
حبتهم وتعودت عليهم فراقهم بالموت مش شي هين عندها..
والفراق بالموت مسبب جرح كبير في قلب طوبى ماباش يبرا..
☘☘☘☘☘
قبل صلاة الجمعه بدقائق..
في شقة عبد القيوم..
خش للدار اللي تعود يشتغل..
ليه هلبه مافتحش الفيرندا وهوا الدار بسبب المطر..
رقا السيرانتي..
وفتح باب الفيرندا..
جو عيونه ع الورد وشاف حالته اللي واضحه وجلية..
ع باله من الاهمال هكي صار فيهم..
فجأه..
سمع صوت القطوسه..
نزل عيونه لقاها واقفه بين حدايد السياج تشبحله وطلع في صوتها..
ابتسم وقال بصوت مسموع ليه هو بس:شن جو ياسمحه
وهي تشبحله وخلاص..
هو ضحك بعدين مشي خش داخل..
وبينكا ولت وين ماكانت راقده...
☘☘☘☘
في الكوجينه..
طوبى بحزن؛مش عارفه شن صارلهم والله امس الصبح كانوا متفتحات ومنظرهم يهبل..
مغليه؛اني الحق يابنتي بعد جيتي معاش رقيت شفتهم..
طوبى ودموعها غلبوها:اني كان نعرف شن صار فيهم بس..كيف ماتوا هكي شن السبب..
جابت نسرين طاسة ميه لطوبى وقالت:هدي روحك واشربي..
خدت طاسة الميه وقعدت تشرب..
وسدرة المهدي وجوري يشبحولها بحزن..
هي بعد شربت شافتهم كيف يشبحولها..
مسحت دموعها وابتسمت بالغصب في وجوهم..
وهما بادلوها ابتسامه مخالطها الحزن...
🍃فهالوقت..
كانت نجاة في جناحها مقعمزة تخطط للتخلص من ضحيتها الثانيه..
دموع طوبى اللي ذرفتهم اليوم ماسدوهاش بش تبرد ع روحها..
تبي تسمع صوت بكاها العالي نبرة القهرة تبي تسمعها..
خططت خلاص..
وجي وقت التنفيذ..
طلعت من جناحها..
ومشت وقعد دور ع الحوش وتشوف في اللي قاعدين فيه شن يديروا.
عائشه واميمه في دار المعيشه..
كانوا يركبوا في غلافات مناديرها الجدد..
فاتتهم..
ومشت للكوجينه.
خشت عليهم ودارت روحها تعاون وعيونها يراقبوا في طوبى كيف تشتغل والحزن مسيطر ع ملامح وجهها والدموع في عيونها..
ولاقال يخف الحقد ولو شويه...
ومش حيخف ولاينتهي الا لما تنزاح طوبى من طريقها نهائي..
روحوا الرجاله من صلاة الجمعه..
الجالي فب الجنان نادى طوبى تطلعله..
طلعت طوبى..
ونجاة طول مشت وقفت في الروشن تراقب فيهم..
لقاته يواسي فيها ويطبطب عليها وكأنها بنته مش مرته..
معاش قدرت تتحمل تشوفهم اكثر..
بعدت عن الروشن وقعد توتي في الغدي مع الباقي وهي تنحرق حرق...
🍃شويه وبدوا يطلعوا في الغدي..
للرجاله وللنساوين..
وهادي احسن فرصة ليها..ضامنه وجود الكل في مكان معين..
بس لازم تعطيهم مكان وجودها ماتختفيش اختفاء مثير للشك..
خصوصا بعد ماجت خديجه من حوشها..بعد ماطمنت ع حال راجلها وشافت طلباته..
وخديجه عاد ماتفوتها الفايته..
نجاة وهي تفكر كان عقلها حينشل بشن حتنشغل وقت الغدي!؟
فجأة..
خشت جوري للكوجينه وهي تقول؛ماما غيري لمعاذ..
شبحت لبنتها وهي تحاول تخفي ملامح الفرح وقالت؛عاملها؟
جوري؛ايه ماما..
نجاة:وينه..
جوري:في الصاله..
مشت بسرعه بتطلع وهي تقول:تغدوا ياعويله ماتراجونيش..
مغليه؛فيه فاضل ولا..
طوبي بضيق:ايه..
مغليه؛خلاص ارفعوا غداكم..
قامت طوبى السفره ونسرين القعد..
ومشوا الزوز طلعوا من الكوجينه لدار المعيشه..
ونادوا الصغار يجوا يتغدوا..
وبهكي ماقعد حد برا..
غير نجاة ومعاذ...
اللي خشت بيه للجناح..
قعمزاته ع الأرض وعطاته التليفون يلهى بيه..
بعدين خدت نفس الشيشة الصغيره من شنطتها..
دستها في حوايجها وطلع من الجناح وسكرت الباب..
ومشت بهدوء..
وفاتت من قدام دار المعيشه ومافي حد كان مقابلها بش يشوفها..
سرعت خطواتها ومشت للدروج..
وركبت..
وصلت في الجناح وخشتله..
🍃فالوقت
اللي خش فيه عبد القيوم للدار بش يسكر الفيرندا..
وين جي شد السيرانتي بينزله..
شاف نجاه وهي مقعمزة ع رووس صوابعها قدام بينكا .
درق وقعد يشوف بالدرقه شن دير..
شاف في يدها شيشه تصب منها في شي ع ماكله بينكا..
وبينكا مبعده عنها..
بعدين ناضت وهي تساوي في سروالها..وحطت الشيشة في جيبه..
ركز عبدالقيوم ع ملامحها كانت تخوف وهي تشوف لبينكا..
بعدين شافها لفت ومشت بسرعه طلعت من الجناح..
هو بعد مشت قعد يراقب في بينكا..
كيف قدمت للماكله متاعها..
شمتها..بعدين قعدت تاكل فيها..
هو ماخداش وقت في التفكير بش يفهم شن دارت نجاه..
بصدمه قال:بتقتلها!
لقي روحه بدون مايشعر طالع يجري من الدار..
ومنها من الشقه بكل..
نزل يجري من الدروج..
بس وين وصل لوطا وقف..
رجعلها عقله وقعد يفكر..
بيمشيلهم شن يقول..
كيف بيحكي اللي شافه!؟
حينحط في موقف صعب هلبه..
حس بالعجز..
وقلبه متألم ع القطوسه وصاحبتها مسكينه..
ياقداش بتشوف قهاير في حياتها..
بغضب وألم ضرب بقبضة يده الحيط وهو يقول:الله يلعنها..
نزل يده وهو يتنفس بسرعه من الخوف والغضب..
وقعد يتخيل في ردة فعل طوبى وهو مايعرفش حتى شكلها..
هي لما راحت خلت راجلها يطلع يدور عليها..
كيف دير لو ماتت..!؟
شبح فوق للحظات..
بعدين ركب الدروج وصل الشقه وخش سكر الباب..
ومشي بعدها للدار..
خشلها وقف ع باب الفيرندا وقعد يراقب في بينكا بالدرقه..
شافها كيف ارتخت ورقدت ع الارض ..
وتبان تتنفس بصعوبه..
شد يد السيرانتي بقوة..وقلبه معصور...
شاف بعدين ماهو أشد واقسى..
بينكا وهي طلع في الروح..
قداش كان مؤلم هالمشهد..مؤلم وقاسي وبشع لدرجة لاتوصف..
معاش تحركت بينكا...هامده تماما...
قعد واقف يشوف ويراجي.
لعلها تتحرك..بالك تنوض..بالك دير اي شي..
المهم ماتموتش..
بس مع الأسف..بينكا ماتت..
روح بريئه ازهقت بدون ذنب..
انتقام وحقد..
حقد ع صاحبتها اللي حتى هي مالهاش ذنب في كل اللي قاعد يصير حواليها..
نزل عبد القيوم السيرانتي وقلبه يبكي ع بينكا وع حال صاحبتها..
كان متألم ألم شديد..كان متمني لو يقدر ينزل دموع من عيونه بش تهون عليه شويه...
بس دمعة عبد القيوم واعره..مانزلتش ع قد ماصار معاه في حياته...
طلق يد السيرانتي..وخدي نفس عميق بعدين زفر..
وقال..حسبي الله ونعم الوكيل..
ولف ومشي طلع من الدار وهو في قمة الحزن.
سكر الباب..
ومشي لدار التانيه..
وين خش شاف لسفرة الغدي اللي بعتوها حوش شنيبه.
اشمئز منها...انقرف..
طبس خداها ومشي طلع بيها من الشقه..
نزل لوطا وطلع للسياره..حطها فيها..
وركب..وشغل السيارة وتحرك طول للهنقر اللي قاعدين فيه العمال...
🍃بعد ماعطاهم الغدي..
روح للشقه..
ومشي طول للدار المقابله جناح الجالي وقعمز فيها..
وقعد يراجي في ردة فعل صاحبة بينكا لما تعرف شن صار فيها..
🍃وهي فهالوقت ..
كانت تغسل في الماعين مع سلفتها اميمه..
وسلفتها...او بالأحرى ضرتها نجاة..
نجاه؛مرات حتى عين ياطوبى انتي ديما تنزلي عليهم..
طوبى بحيرة:زعمه!؟
نجاة:خيرك ياطوبى الناس توا يحسدوك حتى ع ابسط شي ان شاء الله شبشب حمام تشريه جديد..
اميمه تسمع وهي ساكته..
طوبى:ياريتني سقيتهم بميه مرقيه..
نجاة؛في الجديد ان شاء الله..
تنهدت طوبى وهزت راسها بإيجاب وقالت:إن شاء الله..
ع خشة جوري وسدرة المهدي .
جوري:بيبو حقه بتعطيني قطوسه صغيرونه..
شبحتلها بإبتسامه وقالت:ايه..
جوري:امتى
سدرة:قتلك لما تجيب بينكا..
اميمه ابتسمت وقالت:بينكا حامل تاني؟
طوبى بإبتسامه:ايه..وقلت بنعطي زوز من اللي بتجيبهم لسدرة وجوري..
ونجاه تسمع وهي تحط في الماعين في الدولاب وملامح المكر بادية ع وجهها..
سدرة:باهي نبي نشوفها بينكا ماشفتهاش اليوم..
طوبى:قاعده فوق في البالكونه معاش تبي تسيبها..
"طوبى"
نجاة لما سمعت صوت الجالي..سكرت الدولاب..
وطوبى قالت:تعالوا معاي خل نقول لعمكم يركبكم تشوفوها..
ومشت طلعت هي وصغار..
خدت اميمه المكنسه وبدت تكنس في الكوجينه وهي تسرق في النظر لنجاه..
اللي خدت فوطه وقعد تمسح في الدواليب وهي تراجي ع نار تشوف نتيجة اللي داراته..
🍃برا..
الجالي:كان معاش عندك شي تعالي معانا..
طوبى:نكمل حوسة الكوجينه ونلحقكم..
الجالي:تمام..شبح لبنات خوته وقال..هيا ياحلوات وراي..
ومشي ركب وهما ركبوا وراه..
وطوبى قعدت تشبحلهم وهي مبتسمه .
بعدين مشت ولت للكوجينه...
وين خشت شافتهم الزوز شبه كملوا كل شي
طوبى:خلتيولي حاجه درتها معاكم..
اميمه:بري حبيبتي اركبي وارتاحي وجهك اصفر..
طوبى بحزن:الحق نبي نرقد..
نجاه؛اركبي ارقدي وارتاحي معاش في شي خلاص..
هزت راسها وقالت؛تسلموا يارب..
ومشت طلعت من حداهم..
اميمه شبحت لنجاه وقالت؛حتى اني معاش عندي شي نديره..
نجاة مابتش ترد عليها كملت شغلها وعقلها في اللي حيصير بعد شويه...
حطت اميمه المكنسه في مكانها بعدين مشت طلعت من الكوجينه..
🍃فهالوقت..
بعد ماخش الجالي هو والبنات للدار..
قاللهم:اطلعوا شوفوها..
مشوا الزوز وطلعوا للفيرندا..
شافوها كيف متمدده ع الارض..
سدرة بإستغراب:راقده؟
جوري:ايه راقده..
سدرة؛خيره هكي وجهها!؟
الجالي استغرب كلام سدرة..
مشي طلع وشاف بينكا كيف راقده..
حس انها مش طبيعيه..
قربلها وقعمز ع رووس صوابعه حط يده عليها وقعد يمسح عليها..ويداعب فيها بش تفيق..
وهي ولاتحركت ولافتحت عيونها..
سدرة بخوف:عمو خيرها هكي تقول ميته!؟
الجالي شبح لسدره وهو مصدوم وقلبه واجعه..
سدرة ودموعها في عيونها:ميته ؟
🍃وطوبى خشت للدار وكلمة سدرة خشت لوذنها..
قلبها انقبض..
ومشت طلعتلهم بسرعه وهي تقول بفجعه؛خيرها بينكا!..
شبحولها كلهم..
ونظرات الجالي ليها كانت نظرات ألم وخوف عليها..
وهي تشوف لشكل بينكا كيف مولي..
برفض قالت:لالا..لا..
وجتها وقعمزت ع ركابها قعدت تمسح عليها وتفيق فيها وفي تقول بصوت مرتعش:بينكا..بينكا حبيبتي..بنكوشتي..
طاحوا دموعها..ورفعتها في حضنها وباستها وقالت؛بينكا..بينكا...
سدرة بدت تبكي..
شبحتلها طوبى..
والجالي وهو متألم قال؛طوبى..
شبحتله وقالت وهي تقاطع فيه:شن مقعمز هكي تشبحلي!! خودها ارفعها لبيطري دبر دير اي شي ماتخليهاش تموت بالله عليك..
مشت جوري من حداهم وهي تجري..
والجالي قال لطوبى:حاضر حاضر..غير خشي داخل توا بس..
بدت تبكي وهي تقول؛ماماتش جالي ولا مامتش.!!.
سكت وهو ع وجهه باديه ملامح الألم..
طوبى:تكلم قولي ماماتتش ولا..
الجالي:ايه ايه ماماتتش غير خشي بيها داخل..
ناضت بصعوبه وهي شادتها وخشت بيها وهي تبكي وتقول:بسرعه بالله عليك..
🍃هني عبد القيوم خش للدار مرة بعد ماانهى مكالمته مع عمته اللي اتصلت تطمن عليه..
سمع صوت بكي وعياط وسمع الجالي وهو يقول..
"حاضر حاضر"
بعدين سمع صوت باب الفيرندا تسكر..
عرف ان طوبى عرفت بموت بينكا..
تنهد بألم وقال؛ربي يصبرها..ويكون معاها ع اللي جاي..
🍃وطوبى طلعت بالقطوسه من الدار وهي تجري..
والجالي وراها وهو يقول:غير راجي ياطوبى..
نزلت من الدروج بسرعه وهي تقول؛شن نراجي..نراجيها لين تموت.
وصلت لوطا وطول طلعت من الحوش..
والجالي وراها..
ع جية خديجه وهي تمشي بسرعه بعد ماخبرتهم جوري..
شافتهم وهما طالعين بسرعه لحقتهم..
🍃برا.
المهدي كان في الجنان يدير في مكالمه..
نهاها طول لما شاف حالة طوبى...
جاها وهو يقول بفجعه؛شن في ياطوبى خيرك..
طوبى وهي تبكي:بينكا بتموت بالله عليك ارفعها لبيطري خل يلحق قبل تموت..بالله عليك..الجالي مايبيش يعدل عليا..
شبح المهدي للجالي..
لقاه يشوف لطوبى بألم ودموعها في عيونه..
غير عيونه لطوبى وخدي منها القطوسه وقعد يشوف فيها..
هي حطت ايديها الزوز ع صدرها وتشوفله كيف يتفحص فيها وتترقب شن يقول..
وسدرة في نفس الحاله..
وخديجه ونسرين واميمه مغليه وعائشه كانوا واقفات يشوفوله وهما خايفات..
اما نجاة كانت واقفه وراهم تشوف لحالة طوبى وهي حاسه بالثلج يصب ع قلبها..
المهدي شبح لطوبى بألم وقال:ميته..
حركت راسها بالنفي وهي تقول:لالا ماتقولش هكي حرام عليك..
الجالي بألم؛معليشي طوبى تو نجيبلك احلى واغلى منها..
التفتت عليخ وقالت؛شن تقول انت شن تقول...اني مانبيش احلى واغلى منها اني نبيها هي..
جتنا صغيره للحوش ربيتها وكبرتها سنين سنين عشتهم معاها وعاشتهم معاي..كانت معاي وين مانمشي..كانوا يقولوا عليها بنتي..بنتي وتقولي نجيبلك احلى واغلى منها!!؟
صوت بكاها وعياطها..
جاب شيبانيها وباقي سلافها وولاد سلفها الكبير وهما مفجوعين..
شافوا حالها وسمعوا شن تقول..شافوا بينكا والمهدي شادها وعرفوا اللي صار من غير ماينحكالهم..
الجالي اللي كان قلبه متقطع ع حال مرته..
خداها في حضنه وهو يقول:خلاص حبيبتي خلاص..خلاص..
ودموعها غصب عنه نزلوا العيله كلها رجاله..
وطوبى تبكي وتقول:بينكا ماتت ياجالي زي مامات الورد..زي ماماتت امي..
مغليه بألم؛لاحول ولاقوةإلا بالله..
ونجاة تسمع فيها وهي تشوف للجالي كيف ضام طوبى اللي تبكي بعبرتها..بألم..وقهرة..
هو قام عيونه وشبحلها..شاف نظراتها لطوبى حس انها ورا اللي صار للورد وبينكا...
🍃🍃🍃🍃
"خيرك!؟"
سدرة وهي حاطه يدها ع صدرها؛مش عارفه حاجه غمت عليا فجأة..
مطيره:حاسة ضغطك هبط؟!
حركت سبابتها بالنفي وهي تقول؛لالا..
وناضت ومشت للروشن فتحاته ووقفت عليه وقعدت تاخد في النفس..
وعمتها تشوفلها بقلق..
سدره بخوف:عمتي اتصلي بالبنات شوفي..شوفي فردوس ترا..
مطيره بقلق:يارب خير يارب..
وقامت تليفونها واتصلت بفردوس..
وسدرة تسمع فيها كيف تهدرز عليها واضح ان فردوس امورها تمام وماصاير معاها شي..
سكرت منها مطيره وقالت؛ماعندها شي فردوس..
سدرة:اتصلي بنبيله عندك رقمها ولا..
مطيره وهي دور في رقم نبيله:ايه ايه..عندي..اهوا..
واتصلت بيها..
وقعدت تهدرز وتسأل ع غرفه..وكذلك واضح ان غرفه امورها تمام حتى هي..
مطيره:غرفه في خيار خيرها..
تعبوا عيون سدرة دموع وقالت؛شوفي طوبى..
مطيره:ياستير يارب..الناس امهم فاتحين عيونهم فيها..
واتصلت بيها.
ينادي..ينادي..وماتردش.
شبحت مطيره لسدره..وسدرة قلبها انقبض..
مطيره؛ماتردش..
سدرة؛عاودي عمتي بالله عليك..
مطيرة عاودت تاني وهي خايفه..
وكذلك نادى ومارد حد..
بلعت سدرة ريقها وقالت؛اتصلي بنسرين..
مطيره؛ماعنديش رقمها..
شافت سدرة لتليفونها المحطوط ع مسند المندار..مشت خداته..
وهي ترعش قعدت دور ع رقم نسرين لين طلع قدامها..
اتصلت بيها..
ومطيره تشوفلها وقلبها يدق بسرعه من الخوف..
نادى تلاته مرات..بعدين انفتح الخط..
جاها صوت راما باكي وهي تقول..
"خالتي سدرة"
سدرة عقدت حواجبها وقالت؛مني؟فرح!؟
"لااني راما خالتي"
سدرة:خيره صوتك ياراما!؟
"مرت خالو طوبى"
سدرة بعيطه:خيرها!!
فزت وقفت مطيره وحطت يدها ع قلبها..
"لقت قطوستها ميته"
سدرة بصدمه؛ياحليلي بينكا ماتت!
مطيرة بألم؛ياروحي علي بنيتي اكيد بتهبل توا..
سكرت سدره ومشت بسرعه طلعت من الدار وهي بتقول؛بنمشيلها مانقدرش نخليها بروحها..ووك عليا ياقلبي متعلقه بيها هلبه ياروحي..
ومطيره مشت وراها حتى هي ..
لبسوا جلابيبهم وحجابهم ومشوا طول طلعوا من الحوش متوجهين لحوش شنيبه...

#Pinka
#طوبى

....يتبع...