طوبى الجزء الاول

الجزء السادس

طوبى "شارع القهوة"
#جمان_فريد
#الجزء_السادس "ياعوزتي فيك"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
"هدا شني"
قالت هالكلام وردة بعد ماناضت مفجوعه وهي تسمع في صوت العياط..
ولطفي جنبها حتى هو فاق ع صوتها وقال:خيرك!؟
وردة وهي تسمع؛صوت عياط..
قعد لطفي يحاول يسمع بعدين ناض قعمز وقال:صح صوت عياط..
ناضت وردة من سريرها ومشت طلعت من الدار..
فاتت من قدامها وردة تجري وهي تلبس في شاربتها وتقول:صوت عياط يام..
وردة ولت خشت وقعدت دور بإرتباك لين لقت شاربتها لبستها وهي تقول:لطفي اقعد مع البنات..
ومشت طلعت تجري..
ولطفي مقعمز وباديه ع وجهه ملامح القلق وهو يقول:يالطيف يارب..
🌻طلعوا سدرة وامها من الحوش..
ع طلعة مغليه ومعاها خديجه ونسرين..
وصفيه حتى هي طلعت من الحوش..
مغليه وهي تأشرلهم القدام:من حوش صبري جاي..
وطلعوا كلهم يجروا..
وطلعت نجمة حتى هي من حوشها وبناتها معاها .
والرجاله حتى هما طلعوا وقعدوا واقفين قدام الحياش يراجو يعرفوا شن في..
وين وصلوا النساوين قرب حوش فايزة...
شافوا احمد وخوته واقفين في الباب..
مغليه:شن في ياولدي..
احمد وع وجهه ملامح الألم قال:عمي صبري توفى..
شهقوا كلهم بصدمه..
وخشوا البنات يجروا لصاحبتهم ووراهم النساوين..
"وووه عليا يابوي وووه ياعازتي فيك ياوبيي كسرت ظهري ياوبيي"
لقوها تعيط وتخبط قدام باب داره وعائشه تحاول تشدها وهي تبكي معاها..
سدرة ودموعها طاحوا؛فايزة.
فايزة وهي تبكي وتعيط؛بوي ياسدرة بوي بوي الحنين والباهي فيا بوي اللي مدللني بوي اللي حامني بوي راح بوي اللي قالي بنديرلك عرس الشارع كله يحكي بيه...راح قبل ليفرح فيا راح..ياعازتي فيك يابوي ياعازتي ياعازتي...
وقعدت تخبط ع وجهه وسدرة شدت ايديها بقوة وضمتها غصب عنها وهي دف فيها وتقول:خلوني نعيط ع بوي خلوني نعيط...
عائشه:ترحمي عليه يافايزة تعذبي فيه انتي هكي..
فايزة وهي تعيط؛ياعذابي عذاب من بعدك يابوي ياعذابي عذابي...قزنتني يابوي..خلتني ياظهري من ليا ظهر غيرك..
وسدره غلبتها وضمتها بقوه وهي تبكي وتقول:الله يرحمه الله يغفرله الله يجعل مثواه الجنه..
ونسرين وعائشه يبكوا بالعبرة..
ومن جهة تانيه النساوين خشوا ع مشتده وسط الحوش.
لقوها مصدومه وهي تقول:كان راقد لابيه لاعليه ناض فجأة وقعد يشهق ويشهد معاش عرفت شن ندير معاش عرفت روحه طلعت قدام عيوني مات قدام عيوني..والله لابيه لاعليه والله ماكانت فيه والله ماكان يشكي من حاجه لاضغط لاسكر مافيه شي..راح راح هكي قدام عيوني..راح...
خبطت ع رجليها وقعدت تقول..وووك عليا وووك عليا ووووك عليا ...
والنساوين حداها يبكوا وصفيه ومغليه يحاولوا يهدوها..
وصفيه تقول وهي تبكي:قولي الله يرحمه قولي الله يرحمه...
غمضت عيونها بشده وقالت بحسرة:الله يرحمه الله يرحمه عمره ماوجعني عمره ماقهرني عمره ماقصر معاي...ع طبعي الواعر كان متحملني ويساير فيا ويبصر عليا ويضحك فيا...وووك عليا راح صبري راح وووك عليا ياناس عازتي عازة وقهرتي قهرة من بعده..
🌱وصوت النحيب والنواح والندب مابطلوش..
لين جو خاشين نساوين ولاد صبري وقعدوا يعيطوا عليه حتى هما..
وشويه وخشوا ولاده وطلعوا من دراه...
في وسط الحوش..
فايزة وصاحباتها شداتها بالسيف؛لالاا بوي لالا بوي ماطلعوشي لا..
جبدت روحها منهم بكل قوة وطلعت تجري وراهم..
وماقدر حد يطلع وراها كان سدرة..
طلعت للشارع من غير حجاب وهي لابسه توته شتويه..
لقت السيارة اللي حطوا فيها بوها مشت..
طاحت ع ركابها وقعدت تخبط وتعيط وتقول:علاش ياربي علاش علاش درت فيا هكي علاش علاش خديت مني بوي علاش عارفني ماليش غيره علاش دير فيا هكي..
جتها سدره قامتها بكل جهدها واحمد طلع يجري من حوشهم وين سمع صوتها شافها بهالمنظر قال بصوت عالي:دخلوها دخلوها داخل..
وسدرة بقوتها كلها خدتها ودخلتها داخل..
واحمد قدم للباب ورده بعدين مشي يجري ركب سيارة ولحق نساباته وقلبه يتقطع تقطيع ع فايزة..
فايزة اللي من كثر العياط والتخبيط لين اغمى عليها ومافيقوها الا بالسيف..
ودخلوها صاحباتها لدارها وسكروا عليها..
وقعدت عائشه تقرا حداها في القرآن بصوت خاشع حزين..
خلا فايزة تهدا بس دموعها مابطلوش نزول  وصاحباتها يبكوا معاها بصمت..
لين تعبت فايزة وغلبها نوم الحزن..
البنات خلو عائشه جنبها..
وناضوا يعولوا مع الجيران ع حاجة العزي...
🌱وفي ديننا الحنيف لايجوز الاكل والشرب في حوش اهل العزاء واقامة الولائم لأن اهل الموته مش باب الشي هدا..بس مع الاسف عادات وتقاليد مشت فينا وياريتها غير خفت لامع الوقت زادت وولوا بتفننوا في ضيافة العزاء زي العرس بالزبط🌱
روحت وردة للحوش هي وصفيه بس بيديروا سفنز وخبزة...
لقت وردة طوبى وغرفه نايضات وبوهم مفطرهم..
اول ماجت هو مشي طلع طول..
طوبى لما شافتها امها جتها تجري وهي تقول"ماما"
خدتها امها ورفعتها فوق وقعدت تبوس فيها وتقول:ياعيون ماما..
غرفة؛من مات ياماما..
وردة بحزن:عمك صبري بو فايزة..
غرفه بألم؛ياناري...
شويه وفتحت لغرفه التلفزيون تتفرج..
ومشت غيرت لطوبى ودارتلها مرضعه وقعمزتها حداها في الكوجينه وبدت ادير في السفنز...
🌻اما مغليه..
روحت لحوشها واتصلت بنساوين تعرفهم.يجوا يديروها وجبة العزي لجيرانها...
وانتصبوا الخيم قدام حوش صبري الخويلدي..
والحوش تعبا ناس..
مع قرب الظهر..
الرجاله كلهم مشوا للجنازة...
ومابوش الولاد يجيبوا تابوت بوهم للحوش لأنهم عارفين شن بيديروا امهم واختهم...
🌱فايزة بعياط:علاش باهي علاش خلونا نشوفوه اخر مرة حرام عليهم علاش يديروا فينا هكي..
عائشه:لانك مش صابرة يافايزة حتقعدي تندبي وتخبطي حداه وتعذبيه يافايزة كان تحبي بوك حق يافايزة ادعيله قولي ياربي ارحمه واغفرله ياربي اجعله مثواه الجنه هدا اللي يبيه منك بوك..
فايزة ببكي وهي حاطه يدها ع صدرها:نار راكبه فيا ياعائشه نار شن بيطفيها بوي هدا راهو .
عائشه وهي تبكي:قولي يارب صبرني قولي يارب نزل عليا الصبر....
فايزة من وسط قلبها:ااااه ياربي...يارب الصبر يارب...صبرني ع مصيبتي..
عائشه:نوضي حبيبتي نوضي توضي وصلي وادعي لبوك ربي يثبته عند سؤال الملكين في القبر نوضي..
هزت فايزة راسها وعائشه ساعدتها ونوضتها ومشت دخلتها للحمام...
توضت فايزة وهي تبكي ومازال مش مستوعبه اللي صار..
مش مستوعبه ان اغلى انسان ع قلبها راح خلاص..
بوها كان الوحيد اللي يحس بيها ويحن عليها ويحامي عليها ومش مخلي حد من خوتها يوصل فيها..
وتوا بعد راح ياما حتشوف ايام صعبه من بعده...
🌻طلعت من الحمام ومشت خشت لدارها..
لبست جبه ومحرمه..
وبدت تصلي وهي تبكي...
وفي كل سجده تدعي لبوها ربي يثبته عند السؤال..
وتدعي ربي يغفرلها ع اللي طلع منها وقت الصدمه..
وحست روحها بعد الصلاة استكانت شويه وارتاحت...
🌻لكن خطيبها احمد مش مرتاح وخاطره يشوفها ويطمن عليها لكن مش قادر..
بعد ماروحوا من الجنازة قعد يعول مع خوتها ويستقبل في المعزين مع الجيران والاقارب ومش عارف علاش قلبه مش مستريح من ناحية خوتها بكل..
🍀وعدوا ثلاثه ايام من العزي..
الغدي والعشي كل مرة ع حد من الجيران..
لكن يوم فرق السو كله كان ع مغليه...
مشتده وع وجهها ملامح الحزن:تعبناك وكلفناك يامغليه..
مغليه:شن تقولي يامشتده رانا عيله وحده مش جيران بس..
نجمه في نفسها "عطيك كيه مادوري كان فالشكرانيه"
مشتده؛تسلمي يامغليه تسلمي...
~~~~~~
في الكوجينه...
اخت احمد:فايزة احمد قالك اي شي تحتاجيه قولي طول
فايزة بإبتسامه باهته:ربي يحفظه..
:راهو والله مشغول عليك هلبه وقالك ردي بالك من روحك واصبري..
نزلت دمعه من عين فايزة وهي تقول بنبرة باكيه ان شاء الله...
🍀🍀🍀🍀🍀
وعلى ايام زمان ..
حوش العزي مايخلاش من الناس من شهر لشهرين القدام..
كل يوم في الصبح والليل يجوا الناس..
والجيران في منهم يبات ومن منهم من الصبح يمشي ويروح في الليل...
ومنهم وردة اللي كان عندها طوبى صغيره هلبه وقتها وتبي رعاية واهتمام..
واختها سدرة مش قادرة تخلي صاحبتها في محنتها ..
حتى بعد ولت تمشي للجامعه اول ماتروح تمشيلها طول زيها زي عائشه زي نسرين...
وبعد ماعدوا شهرين ع العزي...
في هداكا الوقت طلعت الناس من عام 98 وخشت في 99...
🌻في الجامعه..
عائشه؛مش اليوم للمعهد مع نسرين..
سدرة:باهي اهو بدت تطلع من الحزن شويه .
عائشه:لكن تعرفي مش مستريحه لخوتها مش عارفه علاش حاستهم ناويين بيعة الحوش بعد ماأمهم تكمل عدتها .
رفعت سدرة حاجبها وقالت:من تلقيح اللفاعي نساوين خوتها فالعزي زبطتها..اصلا خوتها عافنين من زمان...
عائشه بقلق؛باهي كيف بيصير فيهم هي وامها .
تنهدت سدرة وقالت؛الله اعلم...
🌻🌻🌻🌻🌻
في حوش عبد المطلب..
كانوا السلفات مع بعض ومعاهم حماتهم يهدرزوا..
مطيرة؛طبيعي بيديروا لقطه يايجي وحده فيهم يقعمزلهم فيه يايبيعوه ويتقاسموا حقه ويخلوا امهم واختهم يقعدوا عند  واحد فيهم اما بش يخلوا زوز نساوين عايشات بروحهم مستحيل..
وردة تنهدت بألم وقالت؛ياناري عليهم وخلاص..
صفيه بحزن؛ربي يلطف بحالهم..
وحداهم بمسافه..
في الدار...
اميمه وغرفه يكتبوا في الواجب وحداها حسين يقرا..
وطوبى تحوس عليهم وتبي تاخد من كراساتهم..
اميمه بضحكه:تي حولي ياطوبى..
ابتسم حسين وهو يشوف لطوبى كيف تتلاحق في كراسة اميمه...
بعدين سيبتها وجت لغرفه...
غرفه عيطت في وجهها وقالت:هيييه..ودفتها..
جت طايحه..
اميمه:حي حراام!
وفز حسين من مكانه وقام طوبى خاف انها تبكي..
لكن طوبى مابكتش قعدت تشبحله بعدين شدت خشمه وقالت؛لا..
هو قعد يضحك ويقول:لا على شني بس وانتي وين طيرلك تقولي لا ..
طوبى:لا..
وحسين يضحك وخلاص..
بعدين مشي بيها لوسط الحوش...
وردة؛خيرها شن دارت عارفتها ماتهنيش روحها مزقت لسدرة مذكرتها يومها..
ضحكوا ومطيره قالت:ربي ينجيها..
حسين وهو يدور في شنطتها بنعطيها كراسة كشكول تاخد فيها راحتها..
ضحكت وردة..
وهو طلع كراسه وقعمز طوبى قدامهم وحطلها الكراسه..
وقال:هي شركي براحتك .
وناض وهو يضحك ومش طلع من حداهم..
وطوبى معاه بعيونها وردة؛مادام شبحت هكي معناها مازال في حاجه في راسها..
وفعلا ناضت طوبى وطلعت من حداهم دب ع رجليها..
وهما يراقبوا فيها..
مطيرة بضحكه:زعمه شن مازال تبي..
🌼وخشت عليهم طوبى للدار..
غرفه لما شافتها قالت بإنزعاج:ايييييه!..
حسين بضحكه:شن مازال تبي..
ومشتله طول..وقعدت تتلاحق في يده تبي تاخد البيرو..
قعد يضحك وخداها مرة تانيه وناض بيها ومشي لوسط الحوش مرة تانيه..
وردة؛هبلتكم الشويطنه هادي..
حسين بضحكه:زي العسل ربي يحفظها..
وحطها قدام الكراسه..
وطلع قلم وعطاهولها..
خداته بلهفه..وبدت تخربش ع الكراسه..
وهما يضحكوا عليها..
حسين؛مستعجله ع هم القرايه..
وهي تخربش وتقلب في الصفحات وتقلد شن يديروا اللي اكبر منها...
🌻وبعد روحت للحوش..
سدرة بضحكه:احسن حل داره حسين..
وردة وهي مبتسمه:ربي يحفظه يعرف يتعامل مع الصغار..
سدرة:طوبى بالذات خدت قلبه يتعامل معاه تقول بنته..
وغرفه تسمع فيهم والغيرة تاكل في قلبها لأنها ملاحظه ان الاهتمام كله ولى بطوبى وبس بعد ماكانت هي المدلعه..
وردة:معاش جت فردوس..
سدرة:ماهو ايام العزي جت هلبه اكيد توا بتشد روحها.
وردة؛وجهها ماعجبنيش في العزي مش عارفه علاش نحس فيها حامل..
سدرة:وعلاش ماتقولش..
وردة؛بالك ماتبيش تشغلني..
🌻🌻🌻🌻🌻
"هي نوضي حبيبتي اشربي عصير"..
قعمزت فردوس وهي تقول؛رقدت اريج..
مصطفى:خدتها اختي وقالت خليها تبات عندنا مادام فردوس تعبانه..
فردوس؛والله متحشمه منهم مش ساد غداي وعشاي هما يديروا فيه..
مصطفى؛حبيبتي راك كنتهم مرت ولدهم يعني بنتهم وزي مايديروا لخواتي وين يتعبوا يديرولك..
فردوس:صطيفه كان تخليني نمشي لحوش ماليا خير..
مصطفى؛اني قتلك قبل بيات برا الحوش لا اقعدي هني واتعبي في حوشك واني نعانيك..
ابتسمت سدرة وقالت؛والله ماحصلتك كان بدعاوي امي باهي..
مصطفى بضحكه؛وبهدوكا الكلمتين اللي قلتيهم وين جيناكم في العيد.. ضروري تجوا تتغدوا يعني ضروري نقعدوا نكردوا عمرنا كله
فردوس بضحكه؛بتقعد شادهالي لأمتى .
مصطفى بضحكه:عمرك كله...
🌱🌱🌱🌱🌱
"ماشاء الله حوش الواعر وسعوا المطحنه وغيروا فيها هلبه حاجات"
محمد؛ولت مطلوبه هلبه حتى برا طرابلس ونشدت جماعة عندي في الشرق قالي واكله سوق القهوة كله..
المهدي:من حقهم ينافسوا .
مغليه؛وحتى نافسوا مش تقعدوا تتفرجوا وخلاص..
محمد:اني توا خلاص بنفتح محل مواد البناء في ****** مش لاهي بيها..
المهدي؛صنعتك وصنعة جدي مش مخليها..
محمد؛انت والجالي عابي عليكم فيها ..
هز راسه وقال؛باهي بوي شن صار في هداكا الموضوع..
مغليه:لالا شن بيفتح فيه موضوعك توا مش وقته بكل.
المهدي:يام نبي كلمة بس..
محمد؛هما برواحهم مش حيقبلوها منا يامهدي صبري رحمة الله عليه مازال ماسكرش العام راهو .
ماقدرش يناقش بوه وامه اكثر من هكي من باب الحشم..
ناض وهو يقول:باهي باهي..تصبحوا ع خير..
ومشي طلع من حداهم وهو معصب..
بوه قعد يشبح للباب اللي طبع منه شويه بعدين شبح لمغليه وقال؛بيني وبينك حاس لطفي مايبيش المهدي لبنته..
مغليه برفعة حاجب؛ولوى ياسيدي هو يلقى خير منه؟!
محمد؛ولدك عصبي هلبه يامغليه وهالعيب مفسد عليه..
مغليه؛وينه الراجل اللي مش عصبي!؟
محمد؛ولدك بزايد كان ناض عليه البوري معاش يعرف حد يقعد يخبط ويكسر وخلاص..ناسيه انتي شن دار في خديجه قبل مش حدف عليها طاسه مرش جت ع وجهها جرحاته..ومرة عطي خوه عمر طريحه قرب مات تحت ايديه..هادم خوته وهكي داير فيهم كيف بنت الناس..
مغليه:لاعاد انت درته مهبول..
محمد؛مرات يولي مهبول واني الله عاذرهم الناس لو ردوه..
مغليه؛كثرت هلبه يامحمد مامنهم اللي يتمنوا المهدي..
محمد تنهد بملل وقال:تصبحي على خير..
وناض ومشي طلع من حداها..
مغليه؛وهما يطولوا المهدي ولدي ياخد بنتهم مفروض يبوسوا ايديهم وجه وقفا..
🍀🍀🍀🍀🍀
ومروا شهرين تانيات ومعاهم عشرة ايام..
رمت فيهم مشتدة العده...
وولادها زي ماتوقعوا سكان شارع القهوة كانوا ناويين ع نيه...
🌻في دكان أحمد..
خو فايزة الكبير؛تعرف وضع البلاد انت وحني مضايقين الحق..
خوها التاني؛وفي من يبي يضمن بدير حوش باهي ع روحه زيي اني نشري قطعة ارض ونبدا نبني هليها..
احمد وهو عاقد حواجبه؛مافهمتش لشن تبوا توصلوا..
خوها الكبير:نبي نبيعوا حوش العيله ونتقاسموا الورث واني نبي ناخد امي تقعد عندي وانت تزوج فايزة..
احمد قعد ساكت وهو يمرر في نظره عليهم..
خوها الصغير؛خودها حتى هي حوش ايجار زي مااني داير توا..
خوها الكبير:ولا حتى في دار مع ماليك لين تلم حق الشقه اللي تبي تاخدها..
احمد كان يتمنى لو ينوض يضربهم ضرب معاش يفيقوا منه مرخصين اختهم وبايعينها ولاكأنها اختهم...
وهو ماقدرش يتحمل فيها قاللهم؛اصلا اني قبل ناوي نفتح معاكم الموضوع بس توقعت ماترضوش..
خوها الوسطاني:وعلاش مانرضوش مش طالب حاجه غلط انت..
احمد؛اني ماعنديش اي مشكله..
خوتها قريب طاروا من الفرحه بس دارو رواحهم عاديين قدامه..
~~~~~~~~
"حتى اني قبل بنقولك دير هكي حسيت من كلام نساوين خوتها انهم يبوا يبيعوا الحوش "
احمد؛ماندريش عليهم كان يبوا يبيعوا الحوش ولالا اني الحق مش عاجبني قعاد نساوين في الحوش بروحهم قلت ناخدها حتى في ايجار وامها ياخدوها ولادها ملزومين بيها"
امه:وعلاش الايجار ياكبدي اهي دويرتك كسر فيها وعدل وديرلها حمام ويبدا عندك جناح بروحك..
احمد؛هكي تقولي يام..
امه:ايه تصرف شويه ويقعدوا باقي فلوسك للشقه خير ماتفلقهم في الايجارات..
هز راسه وقال:ان شاء الله خير..
🌻🌻🌻🌻🌻
"تبوا تبيعوا الحوش"
؛وطي صوتك خيرلك..
فايزة؛كيف نوطي صوتي كيف..وين بنمشوا اني وامي؟!
ومشتده ساكته ولاكلمه..
:وطي صوتك خير مانوضلك..
فايزة؛لامانيش موطيه صوتي ومانيش عايشه مع ولا واحد فيكم مع العقارب نساوينكم..
جي بينوضلها خوها شده خوه التاني وقاللها:انتي بياخد احمد وامي بتقعد عندي..
قعدت ساكته وهي مصدومه..
:كلمناه اليوم وقال ان الموضوع في باله من قبل..
ابتسمت تهكم وقالت؛قلتوله تعالى خود اختنا مش مستعدين نتحملوا مسؤوليتها طيحتي قيمتي وقيمة رواحهم..
قدملها خوها وعطاها كف وهو يقول:مسخه حيوانه.
هي شدت خدها وشبحت لأمها وقالت؛تكلمي يام قولي حاجه خير ساكته انهنت وانضربت قدامك وانتي ساكته..
مشتده؛خوتك عندهم حق حالهم ضايق ويبوا يوسعوا ع ارواحهم..
ناضت فايزة وقالت:هذا اللي متوقعاته منك من يوم يومك في صف ولادك راح اللي ديما واقف معاي ويحامي عني ودايرلي قيمه..راح..
ومشت تبكي وهي تقول:عوزتني يابوي بموتك كسرت ظهري..
وخشت لدارها وسكرت عليها وقعدت تبكي بعبرتها وهي تقول...عوزتني فيك يابوي عوزتني...
🌱وفعلا غالبا يكون موت الاب كسر ظهر لبناويته بالذات اللي حالهم من حال فايزة خوتهم زي قلتهم خوت العازة ع قولتنا🌱
🌻🌻🌻🌻🌻
"رخصوني قدامك يااحمد رخصوني مازال بديرلي اعتبار ولاتحترمني انت بعد هكي"
احمد بصدمه؛معقولة فايزة هادي نظرتك ليا !!؟ خسارة والله ماعرفتي قيمتك عندي لتوا..ولاعرفتيني يافايزة..
فايزة بضيق؛مافيش راجل يحترم مراة خوتها يديروا فيها هكي غدوة لما نولي مرتك تقعد تعاير فيا بيهم..
احمد بإنفعال:نبدا مش راجل ومش ولد اصل ومش متربي يافايزة..
فايزة؛حاشاك ياأحمد..
أحمد؛اقسملك بالله يافايزة ماتحسي معاي بحاجه توجعك والله نحطك تاج ع راسي يافايزة واللي تبيه نديره..قرايتك عندي تكمليها وكان تبي تخدمي ماعنديش مشكله...ضحك وقال وصاحباتك مش حارمك منهم...ياخي حتى نفكر نتزوجهم كلهم بش يقعدوا معاك..
فايزة قعدت تضحك..
احمد بإبتسامه؛ايوه اضحكي ورب العزة ماشفت احلى من ضحكتك في حياتي...
ابتسمت بخجل وقالت؛ماتاخدش راحتك هلبه..
ضحك وقعد ساكت..
ونسرين نتفرج عليهم وهي حاطه يدها تحت خدها وتتنهد وتقول:امتى نعيش قصة حب حتى اني بس..!
🌻🌻🌻🌻🌻
"مسكينه بتطلع هكي بلاعرس"
مطيرة وهي تحرك والطنجره:سحيقة الخوت اللي هكي خزي وتفي...
وردة؛ربي يسامحهم وخلاص..
مطيره؛واللي يجيه ولد يفرح ويذبح ويقعدوا يزغرطوا ع جيته شهر القدام...
وردة خطر عليها مختار قلبها وجعها..
سدرة؛طوبى وين طالعه تعالي هني..
طوبى:لا..
سدرة:عليك عناد فيك..
وجتها ورفعتها فوق..
شدت طوبى خشمها وقالت بلغة طفوليه؛سدرة خيي..
سدره شهقت..
ووردة ومطيره يضحكوا...
سدرة بزعل طفولي؛بري معاش نحبك..
ضمتها طوبى وقالت بلغه طفوليه:نحبك..
هي ضمتها بقوة اكثر وقالت:واني نموت فيك..
وقعدت تبوس فيها ..
ع خشة لطفي قال بضحكه؛كلمتيها ماخليتيلنا شي..
سدرة؛عسل هالفرخه..
طوبى بفرح:بابا..
لطفي:ياعيون بابا تعالي...طاحت عليه وخداها في حضنه وقعد يبوس فيها..
سدرة؛شن صار فيك مع الراجل متاع السوق اللي بيفتحه جديد..
لطفي؛لاخلاص اتفقنا قهوتهم من عندنا..
ابتسمت سدرة وقالت:الحمد لله..
مطيره:ربي يفتح عليكم ويزيد يوسعها...
لطفي بإبتسامه:آمين..
ووردة تشبحله وبس وهي مبتسمه ابتسامة وجع...
🍀🍀🍀🍀🍀
🍀بعد مرور شهر....
"بتطلع زي الهجاله من حوش بوها"
نسرين؛لاحول ولاقوة الا بالله ..
خديجه؛قداش تصخف الحق مسكينه كل يوم نتأكد ان ربي يحبني اللي ماجابش نصيبي لتوا اكيد داسلي حاجه باهيه.
نسرين:وهلبه ماشاء الله ع قيس نيتك..
خديجه:والحمد لله...هي هاتي الروج..
مدت نسرين الروج لخديجه ومشت طلع في محرمه بس تلبسها...
"هيا بنات"
خديجه؛هي شويه يام بس..
🌻في الحوش اللي جنبهم...
عواطف؛الغسيل بشامبو الصفاء خلا شعري ليفة ماعين..
نجاح؛مادكيش في راس الشامبو من يومه شعرك هكي.
عواطف؛طيح سعدك ومزالك شعرك ميه تنزل ع كتافي نزول غير الشامبوات المعفنات فسدوه ..
نجاح؛ايه صح باين هلبه..
ضربتها ع ظهرها وقالت؛تكذبي فيا..
نجاح بوجع:اي حقيرة ايه كذابه شعرك ليفة ماعين باهي حتي يومها خوك محي امي قالتلك برا اشري ليفه ماعين قاللهم خودوا مش شعر عواطف..
عواطف؛نهاره احرف..
ومشت طلعتله..
ضحكت نجاح ومشت فتحت دولابها وخدت الريحه وبخت منها ...
وطلعت تجري لدار امها..
ولت عواطف وهي تقول؛يانجاح ياكذابه ياحيوانه..وين خشت للدار شمت عطرها..
فنصت عيونها وقالت؛حي ع امك حي..
ومشت طلعت تجري لدار امها عرفتها غادي..
ونجمه تلم في شعرها كودة بعد مشطتها..
ووراها نجاح تشوف في وجهها...
عواطف:ياحقيرة باخه من صنتي..
وتاخد الخلاص من ع الزيانه بتضربها..
ونجاح درقت وراها وهي تقول؛يما يما..
وقعدت عواطف تتلاحق فيها وتضرب فيها وامهم في ونصهم تعيط وتقول؛ووه عليا حي عليا زودولي بيقتلوني..
عواطف:لما نشردك ياحقيره..
نجاح؛بري ياشعر الليفه..
طلعت نجمه من تحتهم وخدت جلابيتها وقالت:ان شاء الله تقتلوا بعضكم ونفتك منكم..
وطلعت من الدار..
هما استاقظوا وقالوا:حي بيفوتنا العرس..
وطول وقفوا ع المرايه قعدوا يساووا في ارواحهم...
🌻🌻🌻🌻🌻
وطلعت سدرة مع امها وخواتها وعمتها مطيره وقدامهم صفيه معاها اميمه..
ع جية الحاجه هاله السوريه..
موصلها ولدها ..
وعيون المهدي وهو مقعمز في المطحن انفتحوا عشرة على عشرة...
هاله:السلام عليكم..
وردة؛وعليكم السلام..
اياد بإبتسامه؛اهو سلمتكم الامانه..
وردة بإبتسامه؛في عيوننا..
اياد؛بارك الله فيك خالتي..
ولف ومشي اياد وعيون المهدي ع سدرة لقاها ماشيه وهي ضامة طوبى وفايتاته..
هاله؛كيف حالكم .
كلهم ردوا؛الحمد لله..كيف حالك انتي..
هالة:الحمد لله...
ع طلعة نسرين وخديجه ومغليه ومعاهم الجالي بش يوصلهم...
وحسين طلع بش يوصل نساوين عيلته..
جي طول لسدرة وقال؛ترا طوبى شويه..
ضحكت ومدتهاله...
هو خداها منها وقال:شن جو ياكاتولي..
طوبى؛لا..
ضحك وقال؛راقيتلك معناها..
وغرفه تشوفلهم بغيره..
قربوا مغليه وبناتها من نساوين عيت الواعر وسلموا ع بعض وقعدوا يهدرزوا..
وجي الجالي لحسين وقعد يلعب في طوبى..
الجالي؛شني يابطه اها شني يابطه..
طوبى قالت بلغة طفوليه:بطه..
ضحكت حسين وقال؛تلقط في الكلام فيسع..
الجالي:اول مرة نشوف بنيه هكي زي اللعبه..
حسين؛تخش الخاطر طول..
الجالي؛بالذات لما تضحك..تاكل شكلاطه عادي..
التفتت سدرة وقالت:لاجالي تو ترون حوايجها..
قدملها وقال؛عطيهالها بعد تروحوا..
خدت منه طرف الشكولاته وداساته في شنطتها وقالت؛صحيت...
وخر وشاف مع قفطان طوبى  شنطه..
فتحها وحط فيها فلوس..
حسين؛علاش ياراجل..
الجالي؛ملايكه واول مرة نقابلها من قريب...
التفتت سدرة وشبحت للجالي بإبتسامه بعدبن شبحت لنسرين وقالت؛الجالي بروحه مش زي باقي خوتك.
نسرين التفتت وقالت؛احسنهم واوسعهم بال وعاقل هلبه..
سدرة بإبتسامه؛ربي يحفظه..
خديجه؛وخيني كلهم ربي يحفظهم كل واحد خير من التاني حتى الصغار فيهم..
سدرة:ماقلنا شي ربي يحفظهم كلهم..
نسرين بصوت واطي؛ويحفظلك المهدي..
ضحكوا الزوز..
وخديجه قلبت عيونها..
ووراهم من بعيد نجمه تمشي بسرعه هي وبناويتها..
نجمه:عطلتونا يرزيني فيكم..
نجاح؛عواطف عطلتنا هي وشعرها..
عواطف؛بضمي فمك ولانجيك..
نجمه؛قسما بالله كان ماسكتوا نوقف في وسط هالشارع ونصكها عيطه ونفلق قفطاني ع زوز..
سكتوا هما الزوز..
نجمه:مصايب سود...
🌻وكلهم وصلوا لحوش فايزة..
وخشوا...
وقعمزوا في وسط الحوش..
ماكانش في هلبه معازيم..
الجيران والاقارب بس..
ماكانش في دربوكه ومسجل..
عرس ع الساكت نهار واحد وخلاص...
🌻"شن حالك يامغليه وحال الحاج محمد"
مغليه:الحمد لله في خيار الخير..
:سمعنا المدة اللي فاتت ان ولد راجلك يخش عليكم ويطلع..
مغليه؛ايه الحمد لله يواصل في بوه ووخيينه لكن امه ماعندهاش علم كان تندري ماتخليشي يجي..
مطيرة:مالا شنو حبيبتي اكيد مش حترضى..
مغليه؛يعلم الله ان ماصار بيني وبينها شي وهي اللي جت عليا مش اني وحتى محمد طلقها منه ليه..المهم عندي توا الخوت يواصلوا بعض ويقعدوا مع بعض واني والله مانفرقه عنهم.
النساوين بأصوات متقطعه؛بارك الله فيك...ربي يكثر من امثالك..
وهي منزله راسها ومتحشمه وتقول:تسلموا.
نجمه وهي تشوفلها ع جنب قالت في نفسها "عطيك دي غير كيف ديري فيه هدا بس"
🌻🌻🌻🌻🌻
"ياعمري طالعه تهبلي"
فايزة ودموعها في عيونها:عيونك الحلوة..
عائشه؛ربي يسعدك ويهنيك شرادة.
فايزة بإبتسامه امتننان؛عقبالك عويشه...عقبالكم كلكم .
سدرة:ربي يعوضك بأحمد كل خير..
فايزة:يارب..
نسرين؛ردي بالك تبكي شرداه..
فايزة :مش باكيه..فتحت ايديها وقالت...تعالوا ..
جوها التلاته وضمتهم كلهم..
وخديجه تشبحلهم وهي تقول بضحكه:راك قاعده في الشارع مش طالعه منه..
بعدوا عن بعض  وسدرة مسحت دموعها وقالت:هي اطلعي للناس..
خدت نفس وومشت طلعت وصاحباتها وراها هما يساووا في الفيلو...
وقعدوا يدرجوا فيها لين وصلت لوسط الحوش..
امها وين رتها..زغردت والعبرة خانقتها..
والجارات زغردوا بعدها.....
وقعمزوا البنات صاحبتهم ع كرسي كبير...
وبدوا يصفقوا ويغنوا...
قولوا ياالله عليها...ياماشاء الله عليها..
الله وحد الله عليها ...ياعوينه راك ضريها..
وقعدوا يغنوا ويصفقوا صح بس جو الحزن كان غالب..
وفايزة الضحوكه اللي جوها حلو ماقدرتش ترسن حتى ابتسامه مجامله ع وجهها..
ماهناك ماطولت...يدوب وزعوا عليهم الضيافه وهي جوها اهل احمد وطلعوها...
وصاحباتها يغنولها..
يامبروك عليه خداها ان شاء الله طول العمر معاها..
وقفت فايزة وقالت؛شويه بس..
ورفعت يدها اللي فيها الباقه وبدت تعد واحد اتنين تلاته..
وصاحبتها يضحكوا وعيونهم ادمع...
وحدفت فايزة الباقة ...
حاولت نسرين تلقطها..
لكن جت طايحه عند رجلين عائشه..
عائشه انصدمت..
وفايزة التفتت وشافتها ولأول مرة تضحك من قلبها واللي حواليها يضحكوا..
بعدين التفتن القدام وطلعت مع حمواتها...
ومشوا معاها نساوين خوتها..
وطلعوها برا الحوش وركبوها سيارة احمد ..
ماكانش في مسافه طويله بين الحوشين..
يدوب خطوتين..
ووصلوا للحوش ونزلها احمد ودخلوها للحوش..
غنوا عليها شويه....بعدين مشت خشت دارها وراجلها لحقها..
ام احمد ماكانتش فرحانه ماتمنتش عرس ولدها الكبير يكون هكي..
ومشتده ام فايزة ياما صار فيها بعد طلعت بنتها..
بكت عليها بقهرة بنتها الوحيده وطلعت من حوش هكي...
بس الله غالب هدا المقدر والمكتوب وكل اللي يجي من ربي خير....
🍀🍀🍀🍀🍀
وعرس احمد وفايزة شجع المهدي وبوه يمشوا يفتحوا موضوع سدرة من جديد مع حوش الواعر..
🌻سدرة بقلق؛خايفه يردوه مرة تانيه..
وردة؛بوك قالي مش راده قال بنقوله يأجل الكلام في الموضوع لين تتخرجي بس..
سدرة تنهدت بضيق وقعدت ساكته..
خشت فردوس وهي تمشي بالشويه لأن بطنها كبرت قالت لسدرة؛بالله سدرة دخلي روجه للحمام..
وردة :تو نوض اني..
ومشت وردة خدت اريج للحمام وفردوس قعمزت وهي تقول:ماتخافيش مش حيصير كان كل خير..
سدرة؛يارب..
ع خشة طوبى للكوجينه وهي تقول بلغة طفوليه؛ميه..
سدرة ابتسمت في عز قلقها وقالت؛من عويناتي..
وناضت ومشت صبتلها ميه..
فردوس:تعالى طوبى ياقلبي تعالي..
جتها طوبى خدتها قامتها وقعمزتها ع حجرها..
سدرة:حي عليك بطنك..
فردوس بضحكة ؛مايصيرلي شي..
وجت سدرة عطت طاسة الميه متاع النايلو لطوبى..
شدتها بإيديها الزوز وقعدت تشرب.
فردوس:ياوخيني هالعسل تكبر بسرعه..
سدرة بإبتسامه:ايه الله يبارك عليها..
~~~~~~~~
لطفي:والله زي ماقلتلك يامحمد بعد تتخرج سدرة هي ليكم اما توا مانبيش نشغلها عن قرايتها...
المهدي شد ع قبضة يده بقوة..
علي الواعر ضحك نص ضحكه وقال:مش عارف على شن مستعجل ياولدي البنت مش هاربه.
المهدي:بصراحه عمي لطفي وجدي علي بصراحه..انتم ماتبونيش..
تفاجئ بوه في سؤاله..
ولطفي قال بضحكه؛شن خلاك تقول هكي بالعكس..انت ماشاء الله عليك يامهدي وفرحان اللي جيت خطبت بنتي بس اني نبي نضمن مستقبلها لاأكثر..
علي:معاش تتسرع في احكامك ولدي.
المهدي :اسف سامحوني بس كم مرة نجي وتردوني خش لعقلي الشك..
لطفي:لاتشك ولاتحط في بالك شي هي مازاللها عام وتتخرج بعد هالعام طول نديروا العرس شن رايك..
تنهد المهدي وقال:ان شاء الله ..
علي الواعر:ان شاء الله خير..
شبح محمد للحاج علي وبان عليه من وجهه انه مش راضي بس ماباش يقول للمهدي أي شي...
🍀🍀🍀🍀🍀
وبري ياأيام وتعالي ياأيام..
وفايزة عايشه ايام حلوة مع احمد وتحول اعجابها بيه لحب بعد عاشراته وعرفاته عن قرب..
بس امه وخواته كان مش عاجبهم دلال احمد الزايد لفايز لكن قاعدين شادين رواحهم لأنهم مازال عرسان في الشهور الاولى..
وفهالشهور كانت طوبى تكبر وتكبر...وتزيد حلاوة وخفة دم وملكت القلوب الطيبه كلها..
لكن اهتمام العيله بيها خلا مشاعر الغيرة تكبر في قلب غرفه..ومافي حد حس بيها ولاركز عليها...
نسرين وفايزة تخرجوا من المعهد خلاص...
وبدوا يدوروا ع خدمه....
احمد يدور لفايزة...
والمهدي يدور لنسرين....
اما سدرة وعائشه لاهيين بقرايتهم خلاص موعد تخرجهم قرب لازم يشدوا بش يكملوا..
ويصير من الناس اللي تراجي امتى ربي يلم شملهم ع خير...
🌻وجابت فردوس ...
وكانت حتى هادي بنيه...وحناها وردة كانت فرحانه ع الاخر لأنها حضرت ولادتها..
واختاروها من الأسماء...آلاء...
ودارولها في حوش بوها اسبوع كبير..
رضت عنه فردوس تمام الرضالأنه كان كامل ماناقصاته حاجه..
وحضراته فايزة اللي كانت طالعه جدا جميله بالبدله والمكياج الكامل... وكانت هادي اول مناسبه تخشلها  هي عروسه.
نسرين:الله فرخة فايزة تسهفي للزواج..
فايزة؛تزوجوا ايه بس ردوا تسكنوا في دار مع حوش العيله..
سدرة؛علاش!؟
فايزة بضيق؛ماتاخديش راحتك وكل شي ع عيونهم حتى شن يدخل للدار يقعدوا عيونهم عليه..
وبدولي في اسطوانة التلقيح يبوني نضم ونغسل ونطيب..
عائشه؛عاونيهم شن المشكله..
فايزة؛نعاون حتى اني هما حسيتهم يبوا كل شي عليا..
سدرة:لالاردي شرادة ماتعطيهمش مجال..
فايزة:حتى اني مش عاطيتهم مجال وبعدين سلم حميده عنده شخصيه معاهم ويخافوا منه..
نسرين؛احسن حاجه..
عائشه؛ربي يكفيك شرهم كان يبوا شر..
البنات:آمين..
فايزة؛شن سديرة زعمه انتي لحقتيني..
سدرة بضحكه؛خلاص معاش قعد شي ونتخرج ونوصلوا في بعض واخيرا..
نسرين:والله حتى المهدي يعد في الايام..
ابتسمت سدرة بخجل..
عائشه؛ربي يكمل ع خير..
نسرين:وعقبالنا اني وياك اللي شكلنا بنعنسوا مع خديجه وعواصف واجتياح..
ضحكوا البنات..
شويه شافوا للصغار يلعبوا..
قعدوا م مركزين عيلهم..
فايزة:يارب نجيب بنيه زي طوبى..
سدرة:واحلى منها ان شاء الله..
فجأة..
لاحظوا غرفه وهي تجري دفت اختها طيحتها..
وطوبى بدت تعيط..
ناضتلها سدرة تجري..
قامتها وطوبى قعدت تبكي وهي فاتحه فمها ومعاش طلعت صوت..
سدرة:حي عليا..
جتها امها تجري خدتها نفخت في فمها..
طلع صوتها وقعدت تبكي..
بعد ماقلب سدرة قريب وقف..
وجت لغرفه ضربتها ع كتفها وقالت:علاش هكي..
غرفه بكت ومشت تجري للدار..
وكلهم التموا ع طوبى وقعدوا يحاولوا يهدوها ويسكتوها لين سكتت لكن كيف...
فايزة بضحكه:شكلها وريثتي هادي..
نسرين:شوفي شوفي كيف فتحت الروج وبتحطه ع فمها..
سدرة؛زابطاته المعفنه من امي..
فايزة:نجيها العسل غير تكبر تو نعلمها..
عائشه؛ريت هالعلامه الباهيه..
فايزة؛تلقى عمرها يابقرة..
سدرة بضحكه؛لمي مكياجك لمي قبل لتلعبلك فيه..
ضحكت فايزة...
🌻اما غرفه..
فبعد ماروحوا الناس وروحت فردوس ببناتها..
امها مشتلها الدار ورقدت حداها..
غرفه:انتم تحبوها اكثر مني..
وردة؛لابنتي ماتقوليش هكي حني نحبوكم كلكم زي بعضكم..بس طوبى صغيرونه مازالت هدا علاش ندلعوا فيها زي مادلعناك انتي زمان..
غرفه؛حتى اني مازال صغيرونه..
وردة:لا انتي كبرتي خلاص بتخشي صف رابع وبتبدي
ديري امتحانات مش انتي كنتي هكي تقول لما نولي صف رابع بنكبر ونبدا ندير امتحانات..
غرفه سكتت وهي ترشف..
وردة:ديري زي سدرة ردي بالك من اختك ماما باهي اختك الصغيره هادي..
غرفه؛باهي...
🍀🍀🍀🍀🍀
ومازال تعدي الايام..
وعلى رمضان مازال شهر بس...
وقبل رمضان....كملوا عائشه وسدرة قرايه خلاص وناقشوا مشروعهم...
يوم المناقشه كانت سدرة مروحه فرحانه..
قبل لتخش لحوشهم شافت المهدي في المطحن..
ابتسمتله..وكأنها تقوله خلاص بنوصلوا...
وهو ردلها الابتسامه وقلبها طاير وملهوف..وكأنه يقول واخيرا..
فتحت الباب وخشت...
بش تفرح اهلها..
بس فرحتها انخطفت منها فجأة لما سمعت صوت بوها عالي بشكل يخوف..
خشت تجري ومشت للمربوعه وخشتلها لقت امها واقفه ترعش حداه وهو يتكلم بالتليفون..
لطفي بغضب شديد:هالولد امتى تكمل مصايبه امتى تكمل قصرلي رقبتي وطالي راسي بين خلق ربي...............معاش نعرفه يا جبريل اني الولد هدا معاش نعرفه خلاص..
وسكر في وجه الراجل التليفون..
والتفت ع مرته وقال؛ولدك هدا عملنا السيء فهالدنيا ياريتنا ماجبناه .
ووردة تبكي وترعش..
سدرة وهي مصدومه وخايفه: شن دار..
لطفي بإنفعال؛ولدك محبوس في مالطا...ولدك اللي تبكي عليه ليل نهار مش ساده اللي داره فيا كمل عليا بعملته السودا هادي ضارب مالطي ودارله عاهه وحكموا عليه بالحبس عشرين عشرين عام عشرين عام..
سدرة حطت يدها ع فمها بصدمه..
ووردة مصدومه بقوة وحاسه قلبها معاش ينبض قعدت ساكته وخلاص حتى الرمش مارمشت..
لطفي:انسيه ولدك هدا انسيه...خبط ايديه في بعض وقال..اني ماعنديش ولاد..
ومشي طلع من حداهم وهو في قمة الغضب ومايشوف في شي قدامه..
وطوبى واقفه تشوفله وهي خايفه الصوت العالي والعياط خوفها...
قدمت وهي تمشي بخطواتها الصغيرة وخشت للمربوعه
لقت اختها ضم في امها وهي تبكي هي وياها..
وردة وهي تبكي:علاش ياولدي يامختار هكي علاش كل عمله احرف من التانيه علاش دير فينا هكي اني وبوك شن درنالك ياولدي شن درنالك..
وسدرة تمسح ع ظهرها وهي تبكي بصمت..
طوبى لما شافت امها تبكي...بدت تبكي حتى هي..
سمعت امها صوت بكاها..
بعدت عن سدرة وجتها وضمتها ورفعتها فوق وهي تقول؛خلاص ماما ماما خلاص خلاص حبيبتي...
وسدرة تشوفلهم وهي تبكي بصمت...
~~~~~~~~
"سحيقته من خو حشمنا ووطى رووسنا حي عليا كان يعلم مصطفى ياعاري قدامه وخلاص"
سدرة وملامح وجهه متجهمه ودموعها ينزلوا:عارنا كلنا خوك هدا نقطه سوداء في صفحة عيت الواعر ريت ربي يمحيها ويريحنا منها..
"ياريت...شن حال امي توا"
سدرة؛شن بيكون حالها ماغير تبكي وخلاص وبوي خدي وجهه ومعاش روحه...ااااه خرب عليا فرحتي الله لايسامحه..
"إيه والله"..
🍀🍀🍀🍀🍀
ومر اسبوع من لما سمعوا هالخبر وحال الحوش منقلب كله كآبة وحزن..
ولاكأنه رمضان قرب يخش..
وقصة مختار طلعت وانتشرت والشارع كله سمع بيها..
بس مافي حد جي لوردة بش مايحرجهاش...
ورجع تعقد موضوع مهدي وسدرة اللي كل مايقولوا انهم وصلوا في بعض تطلعلهم عقبة تردهم للخلف خطوات...
وفي يوم..
مع الساعه 1:30ظهرا...
كانت سدرة في الحمام دوش...
طلعت منه وهي لافه الفوطى ع راسها وصقعانه بتجمد جو شتي...
شويه سمعت صوت اختها طوبى تعيط..
تبعت الصوت بسرعه كان جاي من وسط الحوش..
خشت تجري لقت امها طايحه وحداها طوبى تبكي..
جتها تجري وقعمزت جنبها وهي تقول بفجعه؛يام...يام..
ردي عليا بالله عليك..
وردة بتعب وعيونها يدوب مفتوحات تردد بتعب:طوبى..طوبى..
سدرة بعياط؛يما خيرك يما شن جاك...خل نوض نكلم الاسعاف..
شدت من يدها بقوة وقالت..طوبى..طوبى...طوبى امانتي عندك...طوبى..ردي بالك منها..
سدرة بعياط؛يما اسكتي..
وردة بتعب:طوبى..ياسدرة طوبى...
🌱وبرا...
قدام مطحن حوش شنيبه درست سيارة المهدي كان كيف مروح من مشوار..
جاه صوت يوسف وهو يقول؛خير يامهدي...
التفت المهدي ورفع يده ووحياه..
وكيف جي بيمشي يخش..
سمع صرخه من قوتها شقت قلبه شق....
صوت سلطانة قلبه وهي تصرخ بأعلى صوتها وتقول....
"يما"

#ياعوزتي_فيك
#طوبى

....يتبع....