طوبى الجزء الاول

تكملة

# طوبى "شارع القهوة"
#جمان_فريد
#الجزء_الثالث_عشر"قلوب معلقة2"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
...بعد مرور أربعه أيام...
🌻في حوش الواعر..
الساعه 6:45صباحا..
كانت من روشن الكوجينه متاعهم تفوح ريحة القهوة..
قهوتهم..قهوة جنه...
تخلطت ريحة القهوة بصوت يغني في اغنيه يسمع فيها فالراديو...
صباح الخير ياوطنا يسير بمجده العالي إلى الأعلى..
وياأرضا عشقنا سفحها والنخل والشطئان والسهلا..
طوبى:الله عليك ريحة الريحة بروحها تكيف..
وخدت البكري..
وصبت في ثلاثه فناجين قهوة..
فنجان لبوها..وفنجان لسدرة..وفنجان لغرفه..
وهي طبعا ممنوعه عليها المنبهات بكل انواعها..
بعد ماكملت..مشت طلعت للجنان خدت وردات فل من الشجرة اللي عندهم..
وخشت زينت بيهم السفرة..
بعدين خدتها وطلعت بيها للصاله..
كان بوها مقعمز يتفرج ع الاخبار..
طوبى:بابا..
التفت شبحلها:ايوه جت في وقتها..
حطت قدامه السفره..
ضحك لطفي وقال:الله ع الحركات والجو الحلو..
ضحكت بعدين قعمزت جنب بوها وقالت:بابا بنطلب منك طلب..
لطفي:عيوني لبنتي..
طوبى بإبتسامه:يسلموا عيونك يارب...
🌻في دار خواتها..
سدرة تمرر في نظرها ع لبسة غرفه قالت:مش كأن القونه ضيقه شويه..
غرفه:لالا مش ضيقه بعدين اني بنلبس فوقها الطرف هدا..
سدرة شبحت للطرف اللي قالت عليه غرفه..هزت راسها بعدين مشت طلعت من الدار..
تأففت غرفه وقالت بهمس:عليك خنقه..!
☘خشت سدرة للصاله..
طول طوبى ناضت وطلعت بسرعه..
لحقتها بعيونها وقالت:خيرها!؟
لطفي:غير قعمزي اشربي القهوة من ايديها..
قعمزت سدرة وشافت الجو اللي في السفرة قالت:في من وراها حاجه الحركه هادي..
قعد يضحك لطفي..
شبحتله سدرة وقالت:صح ولا!.
لطفي بضحكه:ع خاطر بوك خليها اليوم تمشي مع صاحباتها ع رجليها..
سدرة بضيق:مانقدرش نطلقها بروحها يابوي..
لطفي؛فاهم عليك لكن مايجيش هكي يابنتي تخنقي فيها راك..
سدرة قعدت ساكته وهي مضايقه..
لطفي:هي قالت اليوم بس..
سدرة تنهدت وقالت:طوبى...ياطوبى..
لحظات وجت طوبى وهي لابسه البدله الاعداديه..حطت شعرها ورا وذنها وقالت بترقب:نعم..
سدرة:اليوم بس بغير اليوم هذا ماتحلميش..قسما بالله معاد صايرة واهو قدام بوي..
ابتسمت طوبى بفرح وقالت:حاضر...
وخشت داخل تجري..
لطفي بضحكه؛ربي يحفظها..
سدرة ابتسمت وقالت:آمين...
🌻ولبست طوبى وشاحها الابيض وخدت شنطتها..
وطلعت..بوها لاقاها عطاها فلوس خدتهم..
ومشت طلعت من الحوش..لبست سبيدروها..
وبعدين طلعت من الباب الخارجي..
ووقفت قدامه تراجي في صاحباتها..
وهي واقفه برا...
طلع الجالي من الحوش بسيارته..
شافها وقف وقال؛صباح الوردات..
طوبى اشرتله بيدها وقالت بإبتسامه؛صباح الخيرات..
ابتسم الجالي ومشي في طريقه..
هي تبعت السيارة بعيونها بعدين غيرتهم عنها وشبحت للطريق من الجهة التانيه..
تفاجئت وين شافت سيارة جيش عاليه جايه..
خافت منها وغيرت عيونها للجهة التانيه من الطريق..
حست صوت السيارة قاعد يقرب منها زادت خافت اكثر..
لين درست قدامها..
حركت عيونها ببطء وقلبها بدق بقوة من الخوف..
نزل مرش السواق..
هي وين شافاته عقد حواجبها بخوف وبعدت عن السيارة..
"طوبى خيرك ماعرفتنيش"
فتحت عيونها ع وسعهم وين سمعت الصوت..
رجعت قربت من السيارة وشافت اللي فيها..
حطت ايديها الزوز ع فمها من الدهشه..
حسين بضحكه:متغير عليك لهالدرجه!؟
حولت ايديها وقالت؛خلوك لوزة مزلطه ماعرفتكش..
حسين قعد يضحك..
طوبى بإحراج:اسفه..بس يعني حلقوك كلك شن هدا!؟
هدا ضحك وشبحلها بإبتسامه وقالت:قصدك خلوني شين!؟
طوبى ابتسمت وقالت:انت عمرك ماتكون شين..
قعد يشوفلها بإبتسامه وعيونه فيهم لمعه واضحه..
طوبى:بالله ماتفهمني غلط حسين ..
حرك راسها بالنفي وقال:مانفهمكش غلط اني..علاش واقفه برا بروحك..
طوبى:بنمشي مع صاحباتي للمدرسه ع رجلينا..
حسين:وكيف تبعتك بروحك..
طوبى:اسكت حسين بالله عليك ماصدقت قالت باهي.
نزل من السيارة وسكر الباب..
مررت طوبى نظرها عليه وهو لابس صاعقه جسمه مولي ضخم وعريض..
طوبى:وليت تخوف حسين!
حسين بضحكه؛حرام عليك والله قاعد اني زي مااني حسين اللي تعرفيه..
فجأة انفتح الباب..
طلع لطفي اللي تفاجئ وقال:تي مني افندينا روح..
ضحك حسين وضم  عمه..
وطوبى فهاللحظه جوها صاحباتها..
طوبى:هيا سلام..
ومشت..
حسين بعد عن عمه وقعد يشوفلها كيف مشت مع البنات وقال:كيف تنطلق بروحها!
لطفي:شن بيصيرلهازيها زي بنات جيلها..
تنهد حسين بقلق..
لطفي:خش خش..
شبح حسين لعمه..يدوب ابتسم وخش داخل..
هو خش من هني..
وغرفه طلعت من باب الكوجينه من هني..
قبل بتجيب كندرتها..
بس وين شافت حسين نست كل شي..
حطت ايديها الزوز ع قلبها وقالت:يما يما يما...ياربي...
ياني ياقلبي...محلاه ياربي محلاه....
وقعدت واقفه تشوفله وهي هايمه فيه وناسيه العالم...
ع طلعة سدرة من الحوش من القدام شافاته وسلمت عليه بالكلام..
سدرة:الحمد لله ع السلامه افندينا هذا وين نور شارع القهوة..
حسين:منور بيكم..شن اموركم شن اخباركم..
لطفي وسدرة:الحمدلله..كله تمام..
سدرة:شن جو روسيا!؟
حسين:اسرار عسكريه هادي مانحكوش عليها..
سدرة:ال...شبحت لبوها وقالت بإرتباك..هي اضرب هي ولينا في الجيش ودرنا اسرار..
يسمع فيها حسين كيف تفترش قعد شاد ضحكته..
"حسين حمد لله ع السلامه"
شبحلها وقال:اوو غرفه..الله يسلمك..شن جوك..
غرفه وهي تشوفله بحب:تمام..ماشيه للجامعه توا..
سدرة قعدت تشبحلها بتركيز وشبه عرفت النظرات اللي في عيونها..
حسين:ايييه الجامعه..ردي بالك وتريسي ع روحك..
غرفه بإبتسامه:ماتخافش عليا..
لطفي:اهم شي تشدي في قرايتي خليك زي اميمه..
تمالكت نفسها بالسيف قدامهم وقالت:ان شاء الله..
سدرة؛اطلعي للباص تحركي..
غرفه؛حاضر..سلام حسين..
حسين:سلام...
ومشت غرفه طلعت من الحوش..
حسين؛هي مالانخليكم ونمشي نشوف العيله..
لطفي طبطب ع ظهره؛غداك عندي ايوه..
ضحك حسين وقال:باهي..
ومشي بجهة الباب الفاصل..
لطفي:ربي يحفظه..
سدرة بإبتسامه:آمين...
🌻هو خش من الباب الفاصل..
شاف اميمه تتلاحق في ورد شجرة الفل اللي عندهم..
ضحك ومشالها بخطوات خفيفه..
لين وصل فيها وغم عيونها بيد وحده..
اميمه:مش يوسف يده مش كبيرة هكي..!حسين ولا..
حول يده التفتت شافاته ضحكت بفرح وضماته وقالت:اشتاحشتك هلبه هلبه..
ضمها وقال بضحكه:اني اكثر..
بعدت وشدت وجهه ودموعها ينزلوا قالت:شكلك متغير هلبه...
ضحك ومسح دموعها وقال:كلمة طوبى..
نزلت ايديها وقالت بإبتسامه:شفتها؟
حسين:اول وجه شفته لما وصلت..
اميمه شدت يده وقالت:معاش تبي تكبر..
حسين:كل شي كبر فيها الاعمرها..مش عارفه قداش بنقعد نستنى لين تولي في عمرك..
اميمه بضحكه:سبعه سنين تانيات..
غمض عيونه وحك جبهته بيده..
واميمه تضحك..
ع طلعة امه وهي تقول:اميمه في من تكلمي !؟..لما شافاته شهقت وقالت؛حسين..
وضماته بقوة..وهو حضنها وقعد يضحك..
🌻وسلم حسين ع باقي العيله اللي كانوا فرحانين بيه..
واكثر من فرحان بيه..بوه...
طبعا..ليه مركز وقيمه توا لازم يقعد كاسبه..
☘برغم انه بوه وبرغم كل شي مجبور يقعد تحت رجليه..بش شي زي هذا مايعرفوشي اللي زي عبدالمطلب اللي تهمه مصلحته بس ويتعامل مع كل اللي حواليه ع هالأساس☘
🌻🌻🌻🌻🌻
في المدرسه..
من اول ماجت سدرة  وهي ملاحظه شي غريب
الابلات يتحاشوا فيها..وفي منهم يشبحلها بنظرات غريبه
هي مابتش نوقف عند الوضع هدا هلبه..قالت في نفسها انها مجرد تهيؤات..
🌻🌻🌻🌻🌻
"صباح الخير عمتي"
نجمه؛صباح الخيرات بنتي باهي اللي جيتي..هالمطيورات دارو طحنه الصبح وطلعوا لاعمالهم من غير مايديروا فطور بالله عليك ديريلي..
خديجه بإبتسامه:حاضر..بروا قعمزوا حدا حنينه وماديروش شطانه..
مشوا صغارها حدا حناهم..
وهي مشت خشت للكوجينه..
فتحت الثلاجه بطلع منها الفطور..
فتحت فمها مبلمه في اللي شافاته..
الثلاجه الحاجات كانوا مقسومات لجزئين..
جزء ملصق عليه ورقه من اعلى الثلاجه مكتوب عليه..
عواطف..
والجزء التاني ورقه مكتوب عليها نجاح..
وخرت عن الثلاجه وسكرتها...ومشت طلعت لعزوزتها..
خديجه؛عمتي..فتحت الثلاجه..
قاطعتها نجمه وقالت:نسيت بكل الطحنة كانت ع القصه هادي..
اللي هي خدت من حاجات جابتهم التانيه وقامت حرب البسوس..
خديجه بضحكه:باهي كيف يصير توا..
نجمه:ريتي الرف الاخير فيه حاجات عمك واخدهم ديري بيهم الفطور..
خديجه:باهي..
ولفت ومشت خشت للكوجينه وهي تقول بضحكه:ربي يشفي..
🌻🌻🌻🌻🌻
"ابله انتصار تفضلي القهوة"
الابله المصريه كانت تشبح للطاسه بنص عين وقالت:لاشكرا..
سدرة نزلت الطاسه وقالت:لاااا في ان واضح في شي..شن القصه ابله انتصار شن صاير..
الابله كانت تتهرب منها بعيونها وهي تقول:مافيش حاجه..
سدرة؛لافي في  ونص..نسألك بالله ياإنتصار تقولي اني ملاحظه من السبوع اللي فات ان في شي..واليوم تأكدت..
انتصار شبحتلها وقالت:هو انتي صحيح عشيقة جوز ابله عيشه..
انصدمت سدرة بقوة..
انتصار؛اصلها عماله بتحكي في المدرسه ان انتي بتلاحقي جوزها وانك غاوياه وعايزة تخربي بيتها..
سدرة من قوة الصدمه حست قلبها دق دقه موجعه هلبه..
حطت يدها عليه..
انتصار خافت وقالت:هي عماله تحكي في المدرسه حكاوي عنك..وللأسف الكل صدقها لأنها ملتزمه مش حتكذب..
غمضت سدرة عيونها للحظات..
بعدين نزلت يدها عن قلبها...ولفت ومشت طول..
هي تمشي ويجي بين عيونها ايام صداقتها هي وعائشه..
عائشه كانت اقرب لسدرة من باقي البنات..
عائشه كانت بير اسرار سدرة..
عائشه هي وسدرة كانوا ع قلب واحد..
عائشه كانت هي وسدرة روح وحده في جسدين..
عائشه اللي شهدت ع علاقة المهدي بسدرة من لما كانوا صغار...
عائشه...يطلع منها هذا كله....!!
فعلا الضربه المسمومه ماتجيك الا من اقرب الناس ليك..
قعدت سدرة تمشي ودور..
لين وصلت في حجرة المدرسات..
لقتها مقعمزة مع الابلات تهدرز..
خشت وقالت؛معليشي ياابلات اطلعواشويه لو سمحتوا وخلوني مع ابله عيشه بروحنا..
عائشه رفعت حاجبها وهي تشوفلها..
والابلات مرروا نظرهم عليهم بعدين ناضوا طلعوا بالوحده.. سكرت سدرة وراهم الباب والتفتت لعائشه وقالت..
سدرة:انت امتى وليتي هكي!! ولاكنتي من زمان هكي واني مش حاسه!
عائشه قعدت تشبحلها ببرود وهي ساكته..
سدرة خبطت بيدها ع الطاوله وقالت بانفعال:للاخر لحظه قاعده نطلعلك في الاعذار..خبطت بيدها ع الطاوله مرة تانيه وقالت..مراعيه فيك حق الصحبه والعشرة حتى بيني وبين نفسي..خبطت بيدها مرة تانيه وقالت..ع قد مادرتي فيا السنين هادوا كلهم كنت نبررلك..العشرة ماهانتش عليا زي ماهانت عليك!..تي اني اني قتلك لو معاش تبيني في حياتك قوليلي..يخي اني طلعت منها حتى قبل ماتقولي..
ناضت عائشه وقالت؛ماطلعتيش منها قاعده في وسطها واقفه بيني وبين قلب راجلي..سدرة اني حبيت المهدي حب نتحدا اي مراة في الدنيا تحبهوله حتى انتي..اللي قاعده عايشه معاه ومتحمله انه يكون معاي جثه بس والروح في مكان تاني ..المهدي توا راجلي اني..وخبطت بيدها ع صدرها.. وبو صغاري..ومن حقي نحارب بش نكسب قلبه ونحافظ عليه...
جتها سدرة شدت يدها وحطت يدها فيها  وهي تقول ودموعها ينزلوا:اني عطيتك المهدي اني..اني ياعيشه ولانسيتي..اني اللي قتلك حبيه وخليه يحبك وينسيك فيا اني..اني عطيتك احلامي ومستقبلي كله..اني ياعيشه..
جبدت عيشه يدها وقالت؛انتي ماعطتيني شي..المهدي هو اللي اختارني بيك ولابلاك كنت حنكون مرته..
سدرة وهي مصدومه:مش هي والله ماهي مش نفسها عيشه صاحبة عمري..انتي بنادمه تانيه..
مسحت عائشه دموعها وقالت:اطلعي من حياتنا ياسدرة.
اطلعي..اطلعي منها خير مانزيد نصدمك فيا اكثر واكثر..
سدرة مش مستوعبه مش قادرة تستوعب..كيف عائشه ولت هكي..
معقوله حبها للمهدي قلب حالها هالقلبه!!
شبحتلها مطولا بعدين قالت..
"من اليوم انتي متي بالنسبه ليا"
طول ردت عائشه وقالت..
"انتي عندي ميته من زمان"
معاش قدرت تتحمل سدرة..
فتحت الباب وطلعت بسرعه..
والابلات يشبحولها..
كانت تمشي وتسرع في خطواتها..
لين طلعت من المدرسه..
مشت لسيارتها ركبتها وطلعت..
🌻🌻🌻🌻🌻
في كلية العلوم..
كانت مقعمزة غرفه ع الكراسي تاكل في شوكلاته وتشرب في مكياطه وهي تفكر في حسين..
فجأة سمعت صوت تعرفه..
قامت عيونها شافت عمر خاش مع بنيه..
نفسها صاحبته..
البنت مشت لبنات صاحباتها وهو قعد واقف يراجي فيها..
ناضت غرفه ومشتله  هي مبتسمه بمكر..
لعند ماوصلت فيه وقالت:شن جو ولد شارعنا..
شبحلها وقال:اوووغرفه شن جو..
غرفه:تمام..شن اخبارك انت..
عمر؛ماشيه..
غرفه؛وين ياطيار مش قاعد في كليتكم..
عمر:عندي استراحه بين المحاضرات..
شبحت غرفه لصاحبته وقالت؛طرف..
عمر ابتسم ع جنب .
شبحتله وقالت؛طالعين ع بعض..
عمر:حتى هو ذوقي..
قعدت تضحك..
عمر:شن يضحك فيك..
ساوت شنطتها وقالت بضحكه:كان نقولك حاجه ماتصدقش..
عمر:شني!؟
غرفه:قول من اللي طابة في غرامك وغرقانه لشوشتها..
حطت ايديه ع وجهه وقال:ماتقوليهاش!
غرفه؛لابنقولها اميمه العبيطه..
نزل ايديه وقال:ياوالله عليك حاله اني لما تشوفها نضحك ونكت عليها تنوض هيا بدال ماتكرهني تحبني..
غرفه:حظك..
ضحك ووزع نظره ع المكان بعدين شبح لغرفه ورفع حاجبه وقال:نقولك خلي اللي قلتيه توا بيني وبينك..
غرفه:في راسك شي!
عمر؛نبي نكسد عليها شويه..
ضحكت غرفه وقالت:حي عليك صاحبتك..
عمر:من بيقوللها انتي!
غرفه بضحكه:باهي شن بدير..
عمر؛مادخلكش اطلعي منها..
غرفه رفعت ايديها وقالت:طالعه منها يللا سلام..
ولفت ومشت وهي تقول:ايوه هكي اذهبلها شيرتها خليتها تطلع من الطب بكري بكري..
وقعمزت ع كرسيها..وشبحت لصاحبة عمر جاياته هي تشبحلها..
داليا:من هي هادي.
عمر:بنت شارعنا وزي اختي..شد يدها وقال..هيا خل نردك لكليتك بش نولي لكليتي..
🌻وطلع عمر بصاحبته لكليه الطب..نزل معاها ودخلها داخل..
وطلع وهو يدور في اميمه..
لين لقاها..كانت مقعمزة بروحها تقرا..
ضحك ومشالها..
وقف عليها وقال:شن جو؟!
هي جمدت في مكانها للحظات بعدين رفعت عيونها فيه..
عكسوا عليهم اشعة الشمس..خلا لونهم يبان غريب عجيب ومبهر..
قعد يشبحلهم للحظات بعدين رمش عيونه بسرعه وعقد حواجبه...
اميمه بإرتباك:عمر!
ابتسم ع جنب وقال:شن دايرة..
اميمه ووجهها مولي احمر:تمام..يعني كويسه..
ضحك ومدلها شكولاته نوع"كيتكات" وقال:خودي..
هي شبحت هلبه للشكولاته وقلبها يدق بقوة..
عمر:خودي..
هي بلعت ريقها ومدت يدها للشكولاته وخدتها وقال بخجل:شكرا..
هو قال:العفو سلام...
ولف ومشي وهو يقول بضحكه ساخره..عبيطه....
وهي من فرحتها..
طول قامت تليفونها واتصلت بغرفه بش تخبرها...
🌻🌻🌻🌻🌻
مقعمزة في سيارتها اللي كانت مدرستها في تركينه..
وهي تبكي وتفكر...
شويه مسحت دموعها وقامت تليفونها واتصلت برقم محدد..
حطت التليفون ع وذنها وقعدت تراجي الخط ينفتح وانفتح..
"هاه سدرة"
رشفت سدرة وقالت؛ايوه يوسف..قول لصاحبك الفاندي كان مازال شاري....
"اني موافقه"

#قلوب_معلقه
#طوبى

.....يتبع......