طوبى الجزء الاول

تابع

(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_الأربعين"كشف المستور3"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
نضال بجديه:ندوي جديات خديجه.
خفت ضحكتها وقالت؛شن في..
هو شبح برا...بعدين سكر الباب..
خديجه وهي شاده السياقه الملفوفه عليها نشافه قالت؛إن شاء الله..
نضال؛والله ماظني خير ياوخيتي قعمزي قعمزي..
هو قعمز..
وهي حطت السياقه ع جهة وقعمزت مقابلاته وقالت:حي عليك بعد هدا كله تطلع تتسهوك..
نضال؛ياريت والله..الموضوع جدي وخطير ياخديجه..
خديجه وهي تتكلم بإيديها بنفاذ صبر:باهي تكلم قول..
خدي نفس وقال في مرة؛في شي بين نجاة والجالي..
هي عقدت حواجبها وقعدت تشبحله بصمت..
نضال:مش مجرد شكوك راهو..شفت بعيني اللي يقطع الشك باليقين..اول مرة بكل لما الجالي انضرب وكان راقد في المستشفى بعتني نجيبله دفتر الشيكات تمام..وقالي تلقاه في القجر متاع السيارة يانضال..مشيت للسيارة..فتحتها..خشيت وفتحت القجر قولي شن لقيت؟
خديجه؛شني؟
نضال؛باكو في حديده مش عارف ذهب ولافضه..
قاطعاته خديجه وقالت:نفسها اللي لبستها يوم بيان عمر..
اشر عليها وقال؛هي نفسها..
خديجه بلعت ريقها وقالت؛شن شفت تاني؟
نضال؛هدا اليوم طازة..نزل عيونه وهو محرج وقال..كانوا مع بعض في دار المكوى..
انصدمت خديجه..
شبحلها نضال وقال:اني خايف لو يطلع داير معاها علاقه وخاش في الحرام..والله طاح من عيني وبدت وين نشوف تزهق كبدي..
خديجه رفعت حواجبها وقالت؛يعني كان متزوجها عادي!
نضال وهو يفكر هز راسه وقال:حتى هي طامه بس يقعد حلال في النهايه..
رفعت خديجه حاجبها بغل وقالت؛لاحرام ولاحلال...تزبك فيها طاهر الله يرحمه ينوض يلحقه الجالي! خيرة خوتي..
نضال رفع حاجبه اليسار وقال:واني شني!؟
خديجه؛مش وقتك نضال..المهم توا..انت لاريت ولاسمعت ولاقلت حاجه خليك زي قبل..تمام..
نضال:شن في فراسك!؟
خديجه؛مش مهم تعرف..المهم نقدر ننقذ مايمكن انقاذه..انت تعرف لو بوك عرف شن يديرمش بعيد يتبرا من الجالي بكل..الحاجات هادي مرفوضة رفض تام..وفوق هكي هما قاعدين عايشين علاقه الله اعلم شن شكلها في السر يعني يستغفلوا في الكل..
نضال:يستغفلوا في مغلية يارزيتهم رزيه..
خديجه:امي خليها بروحها..المهم زي ماوصيتك نضال خليك طبيعي زي قبل ماتخلي حد فيهم يحس بحاجه...وفي حالة عرفت بحاجه طول قولي..
تنهد وقال:حاضر..ويستر الله وخلاص..ايييه..نوضي اقليلي دحيه..
ناضت خديجه وهي تقول؛تبي نجلد بهادي..وشدت السياقه..
نضال؛مالا خلاص بنمشي نشهدر واللي نعرفه مش قايلك عليه باهي!
هي تجاهلاته وقعدت تنشف..
ناض وقال؛الجالي خيرتنا..وشكله اني عافنكم..ليا الله تو ينصفني يوم من الأيام..
ومشي طلع وهو يغني..
ليك يوم ياظالم..ليك يوم ياظالم تندم ع اللي كان..
وهي مش معاه بكل تفكر في اللي عرفاته منه وقالت؛غبارة سودا كان يطلع متزوجها غبارة..
☘☘☘☘☘
وفي حوش الواعر..
كانت سدرة راقده وهي تشبح للسقف وتفكر..
خشت عليها طوبى وقالت:رقدت..
تنهدت سدرة بضيق..
جت جنبها طوبى طلقت شعرها..وتمددت وطرحاته المخده..وقعدت تشبح للسقف وتفكر حتى هي..
شويه وقالت طوبى:تتوقعي تطلق!
سدرة؛خايفه ع بوي من الحاجه هادي..حكاية طلاق عمتي تعباته هلبه يابال بنت من بناته..مش ساد اللي صار مع فردوس واللي صايرلي اني..بيقعد عمره كله وهو يخمم ومش مرتاح..
طوبى:خايفه من الزواج..
شبحتلها سدرة..
طوبى:خايفه نخيب حتى اني او يصيرلي شي وكان سبب جديد لوجع قلب بابا..
سدرة وهي تشوف لطوبى عيونها دمعوا..
شبحت طوبى لسدرة وقالت؛ديما ندعي لربي وتقول يارب اعطني من حظوظ الدنيا افضلها..بش نريح ونرتاح..
سدرة ؛يارب خليها احسننا حظ بش تكون سعيده عمرها كله..
طوبى ابتسمت وقربت لسدره وخشت حضنها..
وسدرة حضنتها وهي تمسح ع شعرها بعدين ضحكت وقالت:تتفكري!
طوبى؛اممم زمان لما كان شعرك طويل..توا قصتيه وتبادلنا الادوار..
ضحكت سدرة وقالت؛خل نلعبلك بيه لين ترقدي..
طوبى غمضت عيونها وشدت فيها وقالت؛باهي..
وقعدت تلعب ع شعرها وهي تغني:نني نني نني نني ياطوبى نني نني..
ضحكت طوبى..
سدرة وهي مبتسمه غمضت عيونها وهي تغني:نني نني جاك النوم..انتي قمرة وانتي نجوم....
☘وصوت سدرة الهادي ولعبها ع شعر اختها..خلى طوبى تغرق بالنوم...
وبعد مارقدت هي..بصعوبه قدرت ترق بعد تفكير مطول في حالة اختها غرفه..
اما مطيره اللي كانت راقده مع غرفه مرة مرة تنوض تشوفها...
بعدين تمشي دير طله ع خوها في المربوعه وهو راقد..
وحتى هي ماجاها النوم الابعد وين...
☘بس عبد الرؤوف مش قادر يخلي يجي جيهته..
مقعمز ع سريره بالعرض..يمرر في نظره ع شناطي غرفه ودموعه في عيونه...بعدين شبح للحيط..
وقعد يتفكر في ايام برغم صعوبتها الا انها كانت مليانه مواقف حلوة ماتنتساش..
مد يده..ودق ع الحيط.. بس ماجاش منه رد..
تنفس بعمق..وزفر...بعدين حط راسه ع المخده وغمض عيونه  وقعد يحاول يرقد وينسى اللي صار اليوم كله..
☘وفي من بات ودمعته ع خده وهو يحاول يخفيها..
آلاء..اللي راقده وغامه روحها بالشرشاف وهي راقده في الجنان..لأن الضي هارب..
وجنبها اريج تشبح لجسمها كيف يتحرك تحت الغطا وهي موجوعه عليها..
وامهم اللي كان بينها وبينهم معتز..
كانت حتى هي فايقه وقعدت تحسب في راسها وتعاود وتفكر كيف بتتصرف...
☘وفي من عدت ليلته كلها حب وكلام حلو زي نجاة والجالي اللي يتواصلوا بالتليفون وعايشين جوهم ومش مفكرين في اللي جاي بكل...
☘اما غيرهم في نفس الحوش..
المهدي بقلق؛هاه شن تحسي توا؟
عائشه وهي شاده بطنها:احسن شويه..
المهدي؛كان نرفعك نعاينك توا خير في مجمع عيادات نعرفه مفتوح 24ساعه..
عائشه بتعب؛غير بترعش الصغار.
المهدي:مش حيحسوا بشي نعاينك ونروحوا..هي نوضي..
عائشه هزت راسها وقالت؛حاضر..
ناض وقال:ولا نقولك خليك انتي تو نجيبلك عبايتك..
قعدت في مكانها وهي شاده بطنها..
وهو مشي فتح دولابها طلع ملايتها وخمارها وقفازاتها والجوارب
وجاها فيهم ولبسها بالحاجه حتى من جواربها .
ساوا الخمار كويس وحطه فوق راسها وقال:هي نوضي..
ناضت معاه عائشه وقعد شادها وهو يمشي فيها لين طلعوا من الحوش..
ولما جو طالعين نزلت خمارها..
مشي فتحلها الباب وركبها..
مشي ركب وشغل السيارة..
عائشه؛افتح اذاعة قرآن..
المهدي:حاضر..
فتح اذاعة طريق السلف كان فيها قرآن يتلى..
بعدين تحرك طول...
☘في مجمع العيادات..
الدكتور:هادي كلها اعراض البكتيريا الحلزونيه موضوعها مش مخيف..بس حنديروا فحص إيكو بش نطمئنوا اكثر..
تفضلي..
شبحت عائشه للمهدي..
هو هز راسه بالموافقه..
ناضت ومشت لمكان الجهاز..
وخشت الممرضه معاها..
الدكتور:بإذن الله مافي شي يخوف..
والممرضه نادت"دكتور"...
خش الدكتور وقعد يتفحص في بطن عائشه وعيونه ع الشاشه..
هز راسه وقال..امورك كلها تمام..المعده تمام..القولون تمام..المرارة كويسه...وهدا الكبد كويس...زي ماقلت بكتيريا بس .
ناض ومشي طلع وخلا معاها الممرضه..
مشي قعمز ورا المكتب وقال:زي ماقلت بكتيريا...لأن كل الاعراض اللي قالت عليهم اعراضها..
وقعد يكتب في وصفه طبيه وهو يقول؛حتمشي ع كورس مضاد لمدة اسبوعين..
ع طلعة عيشه..شافت للمهدي من ورا الخمار لقت وجهه عادي اطمنت...
~~~~~~~~
في الطريق..
عائشه:الحمد لله المهم عرفت علتي وتربحتي.
المهدي:وطلعت بسيطه مافيش خوف منها..بس تو نجيبلك حتى ميه مرقيه وزيت زيتون مرقي..
عائشه:لالا تو نرقي روحي بروحي..
المهدي:ع راحتك..وزي ماقالك فوتي المنبهات والحار..
عائشه:قداش ليا فايتتهم
المهدي:مرات تزرقي في حاجه هكي ولاهكي
ضحكت عائشه..
ابتسم وقال:بعيد السو ع حاجه عايشه ربي مايورينا فيها شر..
شبحتله وابتسمت بحب..
وهو قاعد يشبح القدام بإبتسامه وهو يسوق..
☘☘☘☘☘
تاني يوم..
صباح الجمعه...
طالعه تقطف في ورد الفل وهي تغني:طلعت يامحلى نورها شمس الشموسه يللا بنا نملى ونحلب لبن الجاموسه..
ع طلعة عمتها تجيب المكنسه:واقف ع شط يادلي اسمر وحليوه عكف الطاقيه وقالي غنيلي غنيوه..
ضحكت طوبى وقالت:كان يسمعونا يقولوا فايقين ورايقين..
مطيره:البنادم مرة هكي ومرة هكي لازم يبدل جوه بش يقدر يقاوم ويكمل..
طوبى:درر يامطرايه درر..
طلعت سدرة وهي تقول:صباح الخير..بوي عند جدي؟
مطيره:ايه قال بنفطر مع بوي ومطلب..
سدرة؛قبل بنقوله ع فردوس جايه هي والبنات..
طوبى:قالتلي اريج..
مطيره:فهمت قصدك باهي تو نقوله..شفتي غرفه..
سدرة:لقيتها تصلي في الدار..طوبى وتي سفرة القهوة واطلعي بيها..
طوبى:حاضر..ومشت خشت بالورد داخل..
وسدرة قعمزت ع الحصيرة..
ومطيره تكنس في ارضية الجنان..
وتت طوبى سفرة القهوة ومعاها بريوش حوش سخون هي دايراته..
ونثرت ع السفرو ورد الفل وطلعت..
حطت السفره في الوسط وقالت؛راجو..
سدرة بتذمر:ووااك..
ضحكت طوبى وصورت..بعدين قالت..خل نشوف كان حلوة...
مطيره:تتمقعري!
ضحكت وقالت:طلعت حلوة..ابدوا..
سدرة:فضلتي علينا للا طوبى..
وطوبى تضحك وهي تنزل في الصورة ستوري.
ع طلعة غرفه لما شافتهم ملتمات ابتسمت وقالت؛صباح الفل..
هما شبحولها وقالوا:صباح الخيرات..
جت قعمزت حداهم وقالت:الله قداش استاحشت جونا..
ابتسموا وهما يشوفولها..
غرفه بإبتسامه؛اصبروا خل نصور..
سدرة؛عينك وعين عينك..
طوبى بضحكه:تو نبعتلك الصورة اللي خديتها..
غرفه:ايه هيا ابعتي..
وبعتت طوبى الصورة لغرفه...
وغرفه طول حطتها ستوري...
☘واول من يشوفها عبد الرؤوف اللي كان مقعمز في الكوجينه بروحه يشرب في قهوة..جنة..
انصدم لما شاف الستوري...بدون مايفكر بعتلها رد..
(ماشاء الله عليك ماشاء الله..استمري)
وهي تشرب في القهوة جاها الاشعار..
خشت طول ع الرسائل ابتسمت وفرحت قريب طارت..
كان معاش تهمه راهو ماعبرهاش..
كتبت ترد عليه..
(شكرا ع الدعم)
شاف الرساله ورد
(اليوم بيوصلوك حوايجك)
وجهها انخطف لونه وحست قلبها بيوقف..
طلعت من الفيس بكل..
وحطت التليفون بكل وشدت بكاها بقوة و حاولت تخش مع خواتها الجو بش تنكدش عليهم..
☘☘☘☘☘☘
وفي حوش شنيبه..
في صبح يوم الجمعه..
كالعاده المهدي وصل عائشه وسدرة لحوش ماليها..
وولى يفطر مع ولاده والعيله عصيده نسرين المفضله عندهم كلهم..
بس الكل كان فايق ماعدا واحد...
في الجنان وهما مفرشين حصيرة كبارة وعليها مفارش..وفوقهم صفر العصيده رجاله ونساوين وصغار...
كانوا يهدرزوا وجوهم حلو..
اما خديجه عيونها ماتحولوش عن الجالي ونجاه..
"شن بلاكم ياليبين سكارى ولاحشاشين"
مغليه:صبح يافتاح..
ع طلعة نضال برا؛اش بلاكم..سكارى ولاحشاشين..
بوه قام مغطى صونيه الفخار وقال:نهفك بيها!
نضال:لاياحاج خليها في مكانها..اني نبي نعرف انتم امتى بتعاملوني كإنسان عنده حقوق في الحياة لما ديروا حاجه مانحبهاش ديرولي مانحب..
المهدي:هو في احلى مم العصيده فطور الصبح؟
نضال:عندك انت جنرال اني noooo
عمر:مابعدك اللي بتاخدك..
نضال:قول يابنيه شورك صلايه حصلتيه ولد للغايه..
ضحكوا نجاة ونسرين..
نضال؛مش متعبها في شي ستالاف حاجه ماناكلش فيها ماطيبش ولاتعب روحها..
الجالي:من الاخير شن تبي من غير تكسير راس..
نضال:قلبي مش مطمن من الاول..لما ابص في عينو بتتلون..
خديجه"يرزيني في هبالك"
محمد شنيبه:قسما عظما كان ماانتفلت من قدام وجهي ندير فيك اللي مايندار..
نضال:باهي ياحاج هدي مش باهي ليك راهو..حتى المشاريع الجديده اللي تخططلها مايصيريش منها..
محمد المهدي بضحكه؛نوضوا ديروله حاجه ياكلها..
خديجه:اصبر عليا شويه..
نسرين:اني نوكل في سدرة..
نضال:بيبي سدرة توكلي فيها..بري انتي وياها مافي منكم فايده..مرت خوي..
نجاة التفتت لنضال..
ووجه الجالي لونه انخطف..
نضال:بنتعبك سامحيني ديريلي عجه حارة..
نجاة بإبتسامه؛حاضر..
نضال:يحضرلك الخير..ربحتي فيا اجر..هي اقعدوا فيها...
وخش داخل..
ناضت نجاه ومدت معاذ لعزوزتها وقالت:بنعتبك عمتي توكليه..
خديجه:هاتيه جاي..
مداته نجاة لخديجه وهي مبتسه مجامله بعدين خشت مشت خشت داخل..
وخديجه تشوف للجالي اللي شبحلها وهي خاشه..
المهدي:عطيك الصحه نسرين..
نسرين؛صحتين وخي..
ناض المهدي ومشي خش داخل..
والباقي قعدوا يكملوا في فطورهم..
☘المهدي فات الكوجينه وطلع منها..
ونجاة شافاته وهو فايت وقعدت تضرب في الدحي..
ع خشة الجالي قال بصوت منخفض:نموت في الفالحه..
نجاة بصوت منخفض:وهي تموت فيك..
وقف ع اللاونيدنو وهو يغسل في ايديه:احسبني حبي ولما توتيها ديري رنه ننزل ناخدها..
نجاه:من عيوني..
ابتسم بغمزة..بعدين مشي خدي منشف وقعد ينشف في ايديه وطلع من الكوجينه..وهي تنهدت بحب وكملت تخليط الدحي..
وخديجه في الجنان مخليتهم ع راحتهم ع الآخر..
☘☘☘☘☘☘
بعدصلاة الجمعه..
طلعوا المصلين من الجامع وكانوا اغلبهم سكان شارع القهوة..
المهدي وربيع والجالي مع بعض..
عمر وحسين مع بعض..
الحاج شنيبه الصيد ومعاهم علي الواعر مع بعض..
اما لطفي شاف عبد الرؤوف بروحه مشاله..
وقفه وقال:السلام عليكم..
شبحله عبد الرؤوف بإحراج ووقف:وعليكم السلام..وسلم عليه وباس راس وقال..بالله عليك سامحني ع اسلوبي معاك امس والله ماكنت بعقلي وصلت عندي حدها..سامحني بالله عليك..
لطفي:معذور ياولدي معذور..واني نبي نقولك سامحني نيابه عن بنتي ع اللي صار كله..هي كانت زعلانه ومضايقه وتصرفت غلط...ع العموم اني مش جايك بش نبررلها ولاناقشك اني بس نبي نعرف انت ع شني ناوي..
خاف عبد الرؤوف لما حس ان لطفي يتكلم بجديه وحزم..
معاش عرف شن يقول في البدايه بعدين قال:والله ياعمي اللي داراته غرفه تبي عليه تأديب ومن حقي نأدب زوجتي فبنخليها تقعد عندكم فترة لين تتعلم من غلطها..
لطفي:شوف ولدي فكرة انك تخلي بنت معلقه وتقعدك تماطل بعدين حولها من راسك بنتي مش زايده عليا بش نرميها ع حد ونقعد نجري في جرته ونراجي امتى يردها..من توا قول تبي تكمل معاها ولالا؟
عبد الرؤوف ضحك بخوف وقال:غير صل ع النبي ياعمي خيرك..راهو اللي قدامك راجل كلمته اللي تطلع من فمه ينشد منها..وتوا نبيك تحكم ضميرك..لو كنت مكاني كيف كنت حتتصرف..
تنهد لطفي بعد ماهدي وقال:وقال:عندك حق عندك حق..خلاص زي ماتبي...واني من جهتي حنتفاهم معاها..
عبد الرؤوف بإبتسامه؛بارك الله فيك ياعمي...
لطفي:السلام عليكم..ومشي في حاله..
وعبد خدي نفس وزفر..بعدي مشي حتى هو..
☘☘☘☘☘
واقفات ع خالتهم وهي تكركب في البازين وهما يحكولها..
اريج؛الصاله كلها قعدت تسأل على آلاء ونسوا العروس ومايجي منها..
طوبى:وجعتني البنت..
الاء:واني بيبو؟!
طوبى وهي تساوي كركوبة البازين:حتى انتي..انتم الزوز ضحايا هالطماعه مرت عمك..
اريج:ع قلوبهم جبال فلوس ومازال يبوا..
طوبى:اللي عاش عمر جعان مايشبعش لما يغنى..
الاء:ع قولتك..
طوبى ناضت خدت الطنجره من ع الغاز وقالت؛اهم شي درتي ديليت لوليد للأبد..
الاء:اكيده..
طوبى:ربي يعوضك بسيد سيده..
اريج:ايه.. ع سيرة سيد سيده..آلو قولي شن اكتشفت امس..
الاء:شني!؟
اريج:مهند ولد الدكتور اياد دايريلك اعلان ع صفحاته كلهم انستا فيس سناب..
الاء وهي متفاجئه؛تبصري!
اريج: والله العظيم..
طوبى وهي تحط في اللحم والدحي المطبوخ:مهند ماشاء الله عليه اخلاق ومحترم راجل متربي صح..
اريج مدت التليفون لأختها وقال:اهوا.
وقفت طوبى ع حيلها وشافت مع آلاء..
وقعدوا يقروا في الاعلان..
طوبى بإبتسامه؛يهبل يهبل..
الاء وهي مندهشه:وانا نقول علاش زادو عليا طلبيات هكي فجأة!
اريج:فيه الخير..
طوبى وهي ماشيه تحط القعاد في السفر:ربي يعطيهم ع قيس نيتهم..بس ماقلتوش..علاش ولد عمكم فات موضوع الفاتحه..
اريج:قالوا بوها تراجع وقال الفاتحه يخلوها مع العرس..
طوبى:مش ساهل راجل عمته..
اريج:تي واحد شيطان...
وآلاء تسمع فيهم وهي تفكر في كلامهم...
☘في الصاله..
فردوس:كل اللي قاله عنده فيه حق بوي كل اللي يقول فيه نشوفوا فيه قدامنا زمان ياما نصحني بس اني ماسمعتش النصيحه وهاني مكمله عمري نتحسر..
غرفه بحزن:اني نبي راجلي وحوشي..ومعترفه ان اللي درته غلط..بس غصب غني والله لقيت روحي طالعه ومش مفكرة في شي..
فردوس:خلاص انتي قعدتي توا هني غير جوك كم يوم وعاودي ترتيب اوراقك زي مايقولوا..
غرفه؛وكان طلقني؟
فردوس:الله لايقدر وماظنيش يديرها..انتي توا راجي بوي اليومين هادم شن يجي يقولك لأنه اكيد يبي يتفاهم معاه مش حيخليك مغلقه في الهوا..
غرفه بألم؛انتي عبد الرؤوف مانبيش نطلق..
فردوس:يارب اصرفه عليهم الطلاق وردهم للبعض..
غرفه ودموعها في عيونها:آمين..
☘☘☘☘☘
الساعه 5:30عصرا..
معتز وهو ماشي لباب الحوش:يبيك برا..
الاء وهي تساوي في وشاحها فتحت الباب وطلعت..
شافت جدها واقف ع سيارة قنينه وجديده سفار بناتيه وحلوة عجبتها هلبه شبحت لجدها وقال:نعم جدي..
رفع يده اللي فيها المفتاح وقال بإبتسامه؛تعالي خودي سيارتك..
حطت ايديها ع فمها وشهقت بفرح..
ع طلعة اريج وطوبى وهما يضحكوا..
طوبى:مبارك الو..
اريج؛صقع عليا ياكبدي ياعليك سيارة..
الاء مشت لجدها طول ضماته..وهو قعد يطبطب عليها وع وجهه ابتسامه..
نضال من القهوة:شكله خدالها سيارة..هديكا الشمطاء الحرفه تو نوريك في الامتحانات ياوهميه..
اريج وهي تشوف لجدها واختها كانت مبتسمه وهي متأثرة..غيرت عيونها عنهم بتمسح دموعها جو ع نضال..
ارتسمت ع وجهها ملامح الازدراء وغيرت عيونها عنه..
نضال بضحكه؛عليك بنت وخلاص..بديت نشوف فيها حلوة هلبه الزفت رغم ان مافيها ماينشبح..
☘اريج:هيا ديري بينا دوره..
الاء شبحت لجدها..
لطفي :سيارتك هادي خلاص..غير خليكم في المنطقه..
الاء بحماس:حاضر..هيا بنات هيا عزو..
ومشوا كلهم ركبوا السيارة..
سمت الاء بالله وحطت المفتاح في مكانه وشغلت السيارة وتحركت طول ..
معتز؛الاء خالتي سدرة خدتلي لاب توب جديد..
الاء:تبصر!..
معتز:والله حتى اسألي اريج وخالتي طوبى..
طوبى:مفروض امس يندار هدا كله لكن قدر الله وماشاء فعل..
اريج:ربي يهدي سرها خويله روفي..
طوبى وآلاء بأصوات متقطعه:آمين...يارب..
~~~~~~~~
فردوس بدموع؛والله ماعارفه شن نقول ماكنتش نبي نخالف وصيته حتى شويه بس الله غالب مجبوره ما في يدي شي..
لطفي:ربي يهديك يابنتي ماعندي مابنرد غير هكي..
فردوس ودموعها في عيونها:ويطوللنا في عمرك..
☘وهديكا الليله ..
جابوا زردة السيارة عاشوا اجواء حلوة نستهم مشكلة غرفه..
نست غرفه نفسها مشكله من كثر مااشتاقت لأجواء عيلتها الدافيه...
☘☘☘☘
"وصل نجاة وروح  بسرعه"
الجالي:ماعندي وين نسهر يام بايته..هي سلام..
ومشي طلع ركب سيارته.
وكانت قدامه نجاه بسيارتها وصغارها..
تحركت طول لما سمعاته شغل سيارته..
وهو تحرك وراها..
وخديجه وهي واقفه في روشن دارها كانت تراقب فيهم..
"في من تراقبي"
خديجه:خوتي نطمن عليهم.
محي:الجالي كان برا..
خديجه؛لا بس طلع توا يوصل في نجاة..
محي شبحلها شويه بعدين قال:تصبحي ع خير..
ورقد وعطاها بالظهر..
وهي قعدت تشبحله وتفكر...
تفكرت..
لما فتح معاها موضوع زواج الجالي من نجاة.
عقلها وهو يفكر رفعها لآستنتاجين..
اولهم ان راجلها يعرف بس عن طريق مني غير صابرين..معقوله يخونها مع مراة متزوجه!
وتانيهم..ان محي شاف عليهم شي..
رجعت بذاكرتها للخلف وتفكرت لما مرة قاللها محي يبي يفتح مع الجالي موضوع في الشغل ويبيها تتوسطله..
معناها محي مش للشركه وشاف حاجه غادي..
مشت خديجه للسرير وخشتله...وحطت راسها ع المخده..
ومازال عقلها يفكر..
لعند ماسمعت صوت سيارته..ناضت ومشت وقفت في الروشن..شافت سيارة الجالي خاشه للقراج..
رفعت عيونها وشبحت للساعه ع الحيط لقتها 2 بعد نص الليل اتفاجئت وقالت..وهو طلع من هني الساعه 11!!...
سكتت شويه وهي تفكر بعدين هزت راسها وقالت:ساهل ساهل..
جبدت الستار..وولت للسرير ورقدت..
ومحي حس بيها وشبه فهم انها خلاص بدت تزبط اللي صاير بين نجاة والجالي..
☘☘☘☘
تاني يوم..
الصبح..
جامعة طرابلس قاطع ب..كلية الاقتصاد..
مقعمزة اريج هي وصاحبتها يراجعوا في الماده اللي عندهم فيها امتحان..
:حاسه روحي ملخبطه..
اريج:انتي تتوتري وتلخبطي في روحك..
شافت الساعه قالت:قولي زي ماقتلك لاإله إلا الله وحده لاشريك له له الملك وله الحمد بيده الخير وهو على كل ش قدير..
هيا نوضي وانتي ماشيه قوليه في سرك..
ناضوا الزوز وقعدوا يرددوا في الذكر لين خشوا للقاعه..
خدوا مكاناتهم وقعمزوا..
وشويه وخش استاذ الماده ومعاه نضال مراقب..
الطلبه لما شافوه خطر عليهم الفيديو..اللي قعد يضحك بكتمان واللي شد ضحكته..
هو ركز عليهم طارتله..شبح لأريج لقاها حاطه ايديها ع طاوله المقعد ومشبكه صوابعها في بعض ومغمضه عيونها وفمها يتحرك وكأنها تهمس بشي..
هو فهم انها تراجع وبرغم انه كان معصب منها بس لما شافها هكي تلقائيا ابتسم..وبدي يسمع في دقات قلبه..
الاستاذ:تفضل استاذ وزع عليهم..
خدي نضال الوراق وهو مبتسم وبدي يوزع ع الطلبه يشوف كيف يشبحوله ويضحكوا..
نضال؛الضحك متاعكم هدا تو تشوفوه في النتيجه..
وجوههم انخطفت..وبلعوا الضحكه..
وهو قاعد يوزع لين وصل في أريج اللي كانت ع نفس حالتها..
خبط الورقه ع المقعد .
هي فنصت عيونها بفجعه وشبحتله..
لقاته يشوفلها بإبتسامه غريبه..
اربكتها..ولأول مرة يربكها نضال..
طول نزلت عيونها عنه وجبدت الورقه وقعدت تشبحلها..
هو عطي الورقه التانيه ليها وقال:مدي لصاحبتك..
هي بدون ماتشبحله خدتها..ومدتها لصاحبتها..
مشي من حداها وابتسامه ع وجهه بعد عداها بإرتباك قلبه...
☘وفي نفس الوقت..
كانت آلاء دير في امتحانها ونفسيتها حلوة هلبه بالذات بعد ماشافوا صاحباتها سيارتها وهبلوا عليها وبانت فيهم نظرات الغيرة...
والحاجات هادي تحبها آلاء هلبه وكفيله انها تنسيها جروح المشاعر..
اما خالتهم طوبى..
فكانت حتى هي زيهم دير في امتحانها..
وعقلها يفكر في حال بوها الصبح لما وصلها للكليه كان يبان مهموم هلبه وماهدرزش معاها نهائي...
حاولت تركز في امتحانها ع قد ماتقدر لكن قلبها قاعد مشغول ببوها...
☘تمت امتحانها...
ومشت طلعت من القاعه وهي مضايقه..
جاها اتصال..
فتحت الخط وردت طول..
طوبى:ايوه الاء..
"كملتي بيبو "
طوبى؛ايه..
"تمام جاياتك بنروح بيك توا كلمتني خالتي قالت روحي بيها"
هزت طوبى راسها وقالت؛نراجي فيك...
~~~~~~~
في الطريق..
آلاء:بيبو امتى تكسري حاجز الخوف وتتعلمي السواقه..
طوبى بخوف:لالالا..لايمكن..اني كان نسوق ونشوف فث الطريق طانطا جايه نوقف ونخليها تجي تمزطني..
الاء بضحكه؛فوبيا هادي بيبو..
طوبى:مرات مش عارفه بس اني كان شفت طانطا ولاافيكو في الطريق واني راكبه معاكم نقعد ندعي في سري يابال اني اللي نسوق...لاالا مستحيل..خل يحولوا الافكيوهات والطانطات من البلاد وبعدين نفكر نسوق..
والاء تسمع فيها وتضحك..
🍀وصلتها للحوش..
وين جت بتنزل قالت..
طوبى:انزلي اشربي قهوة..
الاء:لا والله بيبو مافيها كيف وراي طلبيات ع قرايه قصة حزينه..
طوبى بإبتسامه؛باهي موفقه ان شاء الله..سلام..
نزلت من السيارة وآلاء تقول:سلام سلمي ع خويله..
سكرت طوبى الباب وهي تقول:يوصل...
ومشت آلاء..
وطوبى طلعت المفتاح من الشنطه وفتحت باب الحوش وخشت..
سكرت الباب وفتحت الشاربه طول بدون ماتحولها..
ومشت بطريقها للكوجينه..
شبحت للفل وهي مبتسمه..
بعدين حولت كندرتها وخشت داخل..
سمعت اصوات هدرزة..
كانت بين سدرة واللي معاها فايزة..
مشت بتطلع للصاله بش تسلم عليهم..
لكن وقفت لما سمعت سدرة تقول..
سدرة؛مش عارفه كيف بيطلع حظ طوبى اكثر وحده قلبي شاغلني عليها..وبوي حامل همها هي اكثر منا كلنا ديما يقولي هالبنت مانتحمل فيها شي..
فايزة؛ان شاء الله يطلع زيها ربي..طوبى زي الملايكه وربك حيحط في طريقها الناس اللي زيها..
سدرة؛يارب يافايزة يارب..نبي نطمن عليها..الفترة الاخيره ماغير نحلم بيها ونخمم عليها..
فايزة؛نص عمرك راح ع طوبى..احلامك كلها فديتيها بيهم..
سدرة:ومش خسارة فيها روحي لو تبيها هادي بنتي اللي ماجبتهاش..
وخرت طوبى وولت للكوجينه ودموعها ينزلوا ورا بعض..
نفس الكلام تسمع بيه من فترة للتانيه..
نفس الكلام اللي يوجع في قلبها ومش مخليها مرتاحه..
قعمزت ع الطاوله اللي كانت تحت مظله..
ونزلت شاربتها وقعدت تبكي بصمت..
ورجع عقلها يفكر في بوها وفي حاله اليوم الصبح..
شويه ومسحت وجهها وغمضت عيونها ورفعت راسها وقالت:يارب..يارب..ماتخليني هم ع قلب حد ولاحمل يكسر ظهر حد...
☘☘☘☘☘☘
الساعه 2:30ظهرا...
طلعت سيارة نجاة للشركه وهي تتكلم بالتليفون..
نجاة:حبيبي طلعت توا....
"كلمتي اختك"
نجاة؛ايه هي ماشيه تاخد الصغار..
"تمام عشرة دقايق نكون عندك"
نجاة بإبتسامه؛نراجي فيك قلبي..
وسكرت..وكملت سواقه وهي تغني..
☘لحظات..
وطلع الجالي من الشركه...
متوجه للشقة اللي خداها لنجاة..
بعد طول مسافه وصل غادي..
خش بالسيارة للعمارة داخل...
ومن بعيد كانت واقفه سيارة عواطف..
اللي مقعمزة فيها خديجه وهي تصور بتليفونها خشة سيارة خوها للعمارة..بعد ماصورت خشة نجاة حتى هي..
شبحت للصورة وقالت؛ياويلك ياجالي لو تطلع واخدها ياويلك..
حطت تليفونها في الكرسي اللي في جنبها بعدين تحركت مولية لحوشها....
☘☘☘☘☘
الساعه 6:00بعد العصر
واقفه في روشن دار نومها تراقب في باب حوش بوها..
واخيرا شافت سيارة خوها الجالي وصلت للحوش..
لفت ومشت وهي تقول: ي راما بنتي انزلي لعماتك..
"حاضر ماما"..
طلعت من دارها وقفت قدامها وقعدت تسمع..
باب الشقه انفتح بعدين تسكر..
هي طول قامت تليفونها واتصلت بالجالي..
رد عليها طول..
"ايوه دوجه"
خديجه:هلا جللو وين انت؟
"توا كيف روحت"
خديجه؛باهي بالله عليك وخيي تجيني توا نبيك في موضوع ضروري..
"إن شاء الله خير"
خديجه؛تعالى بس ضروري نحكي معاك كان ماحكيتش معاك نمرض..
"باهي تعالي للحوش نهدرزوا في داري"
خديجه؛لالا مانبيش امي تحس بشي بالله عليك تعالى اول مرة نطلبك تجيني جالي..
تنهد بعدين رد..
"خمسة دقايق ونجيك"
خديجه؛سامحني وخيي..
"بري ياهبله"
وسكر عليها...
هي نزلت التليفون وشبحتله وهي تقول:هبله...هزت راسها وقالت..تمام ياجالي...
☘وفعلا..
بضع دقائق..
وطلع الجالي من حوشهم ومشي لحوش الصيد..
فتحله واحد من سلاف خديجه هدرزوا شويه بعدين مشي للدروج اللي يرفعوا لشقة اخته..
ركب الدرجه بزوز لين وصل في الباب..حول نظاراته ودق عليه..
طول انفتح..
الجالي:شغلتيني يامراة شن صاير معاك..
خديجه وع وجهها باديه ملامح الضيق المصطنع:خش خش..
خش الجالي..
وهي سكرت الباب..
الجالي وهو خاش داخل؛انتي ومحي الدين؟
خديجه؛غير قعمز شويه ونجيك..
قعمز ع الصالون وهو مستغرب جدا...
وهي مشت خشت داخل...
ولحظات وطلعتله وفي يدها صور..
جاته وقالتله؛تفرج..
هو عقد حواجبه وخدي الصور..
وبدي يتفرج..
بانت ع وجهه ملامح الصدمه..
وخديجه تشوفله كيف يتفرج ع صور صابرين مع راجلها زمان وهي مبتسمه بأسف....

#كشف_المستور
#طوبى

...يتبع...