طوبى الجزء الاول

تكمله

(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_الثامن_والأربعين"في الداخل3"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫🚫ملاحظه🚫🚫
اي تعليق عنصري حيتم حظر صاحبه
اي تعليق فيه سخريه ع ثقافه الطوارق حيتم حظر صاحبه
واني هني نكتب في الحوارات باللغه الامازيغيه التارقيه لأعزائي التوارق مش لغيرهم احتراما ليهم وحبا لثقافتهم
نتمنى تكونوا قريتوا هالملاحظه كويس..وشكرا ع تعاونكم مسبق🌸
☕☕☕☕☕☕☕☕☕☕☕☕☕☕☕☕☕
خشت طوبى للكوجينه وهي تقول بإبتسامه؛عطيكم الصحه..
شبحولها وقالوا بإبتسامه؛سلمك..
طوبى:بشن نقدر نعاونكم؟
مغليه؛لالا ماك ماسة حاجه لين تسكري الشهر..
طوبى؛مايجيش عمتي حني مقعمزين وانتم تتحركوا..
شبحت نجاة لطوبى من فوق لتحت..
بعدين شافت مغليه وهي جايتها خدتها من يدها ووخرتلها كرسي وقالت؛والله ماك متحركه ولادايرة حاجه لاانتي ولاسلفتك لين تسكروا..
نسرين بإبتسامه:حلفت امي يابيبو..
طوبى وهي مبتسمه بإحراج:والله مايجي الحق..
مغليه؛قعمزي قعمزي وارتاحي توا لاحقه ع اللهيد والجري حصتك مدسوسه..
ضحكت طوبى وقعمزت ع الكرسي..
نسرين؛اميمه وين؟
طوبى:خشت للحمام..
هزت نسرين راسها وكملت شغلها..
بعدين فتحوا هدرزة هما وطوبى..
ونجاه كانت ع اعصابها كان تلقى تذبحها بالموس اللي تغسل فيه..
كملت غسل..والتفتت لطوبى وقعدت تشبحلها كيف تهدرز بنظرات كلها كره..
معاش تحملت تشوفلها..غيرت عيونها عنها وجو ع الباب..
شافت الجالي واقف بعيد ويشبحلها..
طول غيرت عيونها ليهم لقتهم كلهم لاهيين..
والمهم ان طوبى عاطياته بالظهر..
انسحبت بهدوء وطلعت..
هو اشرلها تقعد في مكانها..
وقفت حدا باب الكوجينه وقالت بحركة الشفايف ..لما حطت يدها ع قلبها...
"استاحشتك"
هو ابتسم واشر بحركه التليفون..ويقول بحركة الشفايف"
"كلميني"
☘فهالوقت
طلعت اميمه من الحمام اللي كان بعيد عنهم.
وقعدت تمشي وفيدها شنطتها بإتجاه الكوجينه..
وقفت حدا الدروج...
لما شافت نجاة واقفه حدا باب الكوجينه وتكلم في حد بالاشارات...
والطرف التاني ماكانش باين ليها..
قعدت واقفه في مكانها تراقب فيهم..
وهي مستغربه ومصدومه..وحست بقلبها مقبوض..
شويه شافتها بعتت قبله في الهوا..بعدين ولت خشت للكوجينه..
ادرقت اميمه تحت الدروج وهي تفكر بصدمه في اللي شافاته..
نجاة في من كانت تكلم!..
واحد من سلافها ولاراجلها!؟
ايه فكرت حتى في راجلها...
اللي توثق في الرجاله ثقة تامه تكون غبيه في نظر اميمه..
وفي الحقيقه في نظر اغلب بنات حواء...
"بنمشي نرقد معاذ ونجي"
اميمه استاقظت انها تحت الدروج يعني لو تجي نجاة فايته لجناحها حتشوفها..
مشت بسرعه وخشت لدار شافتها قدامها مردوده..
وسكرت الباب بهدوء..
في اللحظه اللي جت فيها نجاه وهي رافعه ولدها ماشيه لجناحها وتلعب فيه؛حبيب ماما وحياتها..
كانت تمشي بسرعه لين وصلت في جناحها وخشت وسكراته عليها..
اميمه سمعت صوت الباب كيف انفتح وبعدين تسكر..
فتحت باب الدار بالشويه وطلعت منها..
كانت تفكر في اللي شافاته والخوف ماليها..
سكرت الباب ولفت بتمشي وقفت في مكانها جامده لما شافت مغليه واقفه تشوفلها بإستغراب...
بلعت اميمه ريقها وهي في قمة الخوف والتوتر والارتباك؛كنت ندور ع دار..نبدل فيها..
مغليه؛وخيرك مابدلتيش..
بلعت اميمه ريقها تاني وقالت؛مالقيتش اللي نبيه قي شنطتي هادي شكله قاعد في الشناطي اللي في السيارة..
قدمت مغليه واميمه تشوفلها وهي قريب يغمى عليها من الخوف..
فاتت من قدامها وجت لباب الدار فتحاته وقالت:هادي داري اني وعمك..
اميمه بتوتر؛اسفه..ماركزتش..
شبحتلها مغليه بنظرات زادت خوفتها ووترتها بعدين قالت؛بري للكوجينه بري..
هزت اميمه راسها وهي مبتسمه بإرتباك وقالت؛حاضر..
ولفت ومشت والخوف مسيطر عليها..
لما قربت توصل في الكوجينه صنعت ابتسامه ع وجهها وخشت..
ومغليه خشت لدار وفتحت الضي وقعدت تمرر في نظرها عليها وهي تقول:شن عندك يابنت عبد المطلب شن عندك؟...
زعمه تخليني نندم اللي خليتك كنتي!؟...
تنهدت وهي مرتابه...بعدين مشت طلعت من دارها وسكرت الباب...
شبحت جهة جناح نجاة للحظات..
بعدين مشت بتقعمز في الصاله...
☘ونجاه في جناحها هايمه ع التليفون مع الجالي...
نجاة؛اني بنموت عليك اكثر منك
"اسمعي يوم الاثنين جايك"
نجاة بإستغراب؛وعلاش مش قبله؟!
"وراي مواضيع..المهم من توا كلمي خواتك بنبات في الشقه راهو"
نجاه وهي تضحك؛ووه عليها لهالدرجة ممله لعبتك!؟
"وانتي ضروري تتكلمي عليها!؟"
نجاة؛شن انت مش راضي فيها ولاكيف!؟
"كلامك عليها واني معاك يخلي فيا نفكر فيها ردي بالك"
ضحكت وقالت؛لاواضح تفكر فيها ومعبرها..المهم تو نكلم مروة تخلي عندها الصغار..
"نحبك موت يابلوة انتي"
نجاة بضحكه؛واني نعشقك...
وكملت مكالمتها معاه....وهدا وين انتبهت لولدها اللي رقد جنبها بدون ماتحس عليه..
رفعاته وحطاته في سريره..غطاته كويس..
بعدين مشت طلعت من الجناح متوجهه لكوجينه..
خشت عليهم لقتهم يهدرزوا..
مشت طول للكوشه تشوف في الطاجين اليوناني اللي داراته..
عائشه؛ولعت عليه من فوق..
نجاة؛قداش ليك؟
عائشه؛توا بس..
سكر الكوشه وقالت:شويه ونطلعه.
والتفتت ع طوبى اللي كانت تهدرز مع اميمه ونسرين..
طوبى:جو تركيا في الخريف خرافي اللي يبي يمشيلها يمشي في الخريف..
نجاة:بالعكس في الصيف احلى..فيها اماكن حلوة زي انطاليا مثلا..اختي مشتلها قبل وقالت فضيعه..
اميمه قعدت تشبحلها بنظرات فيها شي من الإزدراء..
طوبى بإبتسامه؛مشتيلها لما بتتت من غادي فعلا حلوة هلبه..بس اني نحب الخريف ونستمتع بجوه اكثر..
غيرت عيونها عنها ومررت نظرها بين نسرين وطوبى وقالت بضحكه:كان نحكيلكم ع الموقف اللي درناه تاني يوم..
اني قلت للجالي خاطري نمشي لغابه...نبي نعيش جو الطبيعه بعيد عن زحمة المدن ودوشتها..رتب الامور وخلاص بنمشوا وع اساس ناويين نفطروا غادي..
وين جينا بنطلعوا اني تفكرت مافيش عندنا مفرش نفرشوه نقعمزوا عليه ونحطوا حاجاتنا لما قتله عليه حار ومعاش عرف كيف يدير..قتله خلاص خل نشوفوا مكان تاني..قال لا ماشيين غادي يعني ماشيين..
وخش بيا داخل لمطعم الفندق كلم المسؤولين اللي فيه وطلب منهم مفرش..
نسرين بضحكه:وعطوكم..
طوبى بضحكه؛قعد يدوي هلبه هو وياهم تركي طبعا مانفهمش فيه ونشبح فيهم كيف يبتسموا ويضحكوا..شويه خش الراجل وجابلنا مفرش كبير..
اميمه بإيتسامه:محلاهم كيف متفهمين..
نسرين:تلقي الجالي كلي دماغاتهم بكلمتين حلوات.
طوبى بضحكه:ولا هادي وهادي..ياحناتي طلعنا حني العرسان رقم 100اللي يجوا للفندق متاعهم دارولنا مزايا خاصه وفي الليل حفله كبيره وكأنه عرس تاني..
عائشه ونسرين واميمه بدهشه قالوا:الله!؟..الله ع الجو!"
قامت طوبى التليفون وهي مبتسمه حطت الفيديوهات وعطت نسرين تتفرج وقالت؛اقربوا تفرجوا معاها..
قربوا طول عائشه واميمه..
اما نجاه اللي كانت والعه فيها جهنم..
كانت اخر من قدم بالسيف وقفت ورا نسرين وقعدت تتفرج..
عائشه:عبايتك تجنن!
طوبى :خيطتها عن بنت خالتي فوزية الخياطه الله يرحمها كنت ناويه نمشي بيها لآيه صوفيا وناخد صور غادي..وصدفت الحفله سبحان الله..
نسرين؛والجالي لابس رسميه كأنكم درتوا عرسكم مرة تانيه حق..
نجاة كانت تشوف للجالي كيف يبان سعيد مع طوبى وكيف ماسيبش يدها لحظه..وكان شادها بقوة..
ولا مرة شد يدها هكي..وابتسم ولاضحك معاها ببهجة زي ماتشوف فيه توا مع طوبى..
اميمه:محلاكم مع بعض..الله يبارك..
نسرين:ربي يخليكم لبعض ويعقد عسلكم..
عائشه:ربي يهنيكم..
طوبى وهي تمرر في نظرها عليهم بإبتسامه قالت:آمين..تسلموا..
عطتها نسرين تليفونها وقالت لأميمه؛مش مصورة حتى انتي في ايطاليا..
اميمه بضحكه:ياعيني والله..وقامت تليفوتها وفتحت ع الفيديوهات .
وطوبى حطت تليفونها ع الطاوله وقالت:مايخشوش الولاد هني ولا..
نجاة؛يستئذنوا قبل..
نسرين؛لما يكون في حد مايخشوش من غير استئذان.
هزت راسها وهي مبتسمه..بعدين فكت وشاحها وحولاته وحطاته ع كتافها وقعدت تساوي في شعرها وعيون نجاة الغيورة الحقودة عليها..
اميمه مدت التليفون لنسرين وقال؛هما هادم..
قربوا من نسرين وقعدوا يتفرجوا..
ونجاه كانت واقفه فوق راس طوبى وتشبحلها بنظرات حقد لاتوصف..تشوف لرقبتها وتتخيل في روحها تذبح فيها ذبح..
نسرين:البندقيه..
اميمه بإبتسامه:هادي اول ليله...
☘وهما يعلقوا ع مقاطع فيديوا اميمه..
كان راجل بنت عمها غرفه..عبد الرؤوف..مقعمز مع اخته نبيله ويتكلموا في موضوع مهم للغايه...
نبيله:لاماغلطتش انت سعيت في عمل خير..ومن رايي لازم تكلم غرفه في اقرب وقت..
عبد الرؤوف بقلق:خايف تبدا المشاكل بعدين..
نبيله؛ومرات ع يدك يرجع يلتم شمل العيله..
عبد الرؤوف قعد ساكت وهو يفكر وكان متردد هلبه في اتخاذ القرار..
نبيله؛اني نقول قوللها وخليه سر بينك وبينها وبعد تشوف خوها يتفاهموا بين بعضهم..
شبحلها شويه بعدين قال:هكي تقولي؟
نبيله:ايه هدا رأيي وانت حر تاخده ولاتخليه..
تنهد ورجع يفكر في الموضوع وكله خوف من الندم..
☘☘☘☘☘
"بتمشوا انتم وغرفه"
الاء:ماما مفروض حتى انتي تمشي..
فردوس:مابالي في حفلات واختي هدا حالها..
اريج:امي هادي مش حفله لحد براني..هادي لأختك لازم تكونوا معاها مش تخلوها بروحها..
مطيرة:انتم تكفوا وتوفوا ومعاكم غرفه..راهو حفله عاديه مش لازم نمشولها كلنا..
اريج:ماتبوش تشوفوا بيبو؟
مطيره:هيا تو تجينا تسلم علينا..
غرفه:خلاص معاش تحاولوا...
وهما يهدرزوا في الصاله..
وسدره مسكرة عليها دار المعيشه وهي تحاول تقرا قرآن .
كانت تتعب وتسيب وترجع 
فجأة هبط عليها النوم ..حطت المصحف ع تركينه وتمددت ع الفراش وراحت في نوم عميق..
☘☘☘☘☘
وفي حوش شنيبه..
حطوا عشاهم وتعشوا..
والنساوين طول ماهما يتعشوا...
عيون مغليه ع اميمه ونظراتها ليها كلها شك..
واميمه كانت تتجاهل فيها
بس من داخلها تفكر في اللي قاعد يدور في عقل مغليه وفي اللي شافاته ع نجاة ونجاة عيونها ع طوبى طول الوقت وطوبى مش مركزه معاها..
تهدرز مرة مع الصغار ومرة مع اللي معاها..
وابتسامتها مافارقتش وجهها..
هالإبتسامه اللي ولى هدف نجاة الوحيد انها تمحيها تماما..
☘☘☘
بعد العشي..
ركبوا العرايس..وحده لشقتها والتانيه لجناحها..
وبعدهم بشويه..
ركبوا العرسان..
نجاه وهي ضم في الكوجينه شافت الجالي كيف فات من قدامها متوجه للدروج..
وفي داخلها جنهم تلهب لهب...
☘هو وصل في الجناح فتح الباب..
لقي طوبى تسكر في الفيرندا..وتنزل في الستار..
سكر الباب وقال؛جعان نوم..
طوبى؛اكثر منك..هيا خش دوش بسرعه جولي ..
الجالي بضحكه؛ايه حقه ردي بالك تنسي وتناديني جولي قدام العيله..
ضحكت طوبى وقالت؛ماننساش ماتخافش..
وجاته وحطت ايديها ع ظهره وقعدت دف فيه وتقول:هيا خش للحمام..
هو تابت بشي من قوته قصدا..وطوبى دف فيه بكل قوتها وهي تقول:جالي بلا براده..هيا خش..ولا والله نخش قبل ونخليك تراجي لين ياخدك النوم..
ضحك وقال:شفشه..ومشي خش للحمام..
وطوبى وهي تضحك قعدت دير في تمرينات لإيديها بعدين شبحت للسرير..
ارتمت عليه..شمت ريحة الجالي قاعده عالقه فيه برغم انهم ليه فترة ماخشش الدار..
ابتسمت وهي تتفكر في شكل عطره..طيب الريحه وطويل الأمد اللي بدت تبخ فيه معاه من كثر ماحباته..وغمضت عيونها بدون ماترقد..
☘وفي شقة اميمه وعمر..
كانت اميمه واقفه ع المرايه تحط ف كريم ع ايديها وهي تقول:عموري..
عمر وهو متكي في السرير:روحه..
اميمه؛تو نجاة ديما تجي وتبات؟
عمر؛لا مش ديما تبات..بس الجيان ديما في أخر الاسبوع..
التفتت وهي واقفه ع الزيانه وقالت:بصفتها شني!؟
عمر قعد يشبحلها وهو ساكت ماعرفش يرد..
قدمت اميمه وهي تقول؛هي توا ماتمتلكمش بأي صله غلط جيانها من اصله..
عمر عقد حواجبه وقال:بوي هكي يبي اميمه مايبيش صغار طاهر الله يرحمه يقعدوا بعاد عليه..
اميمه؛صغاره ايه بس امهم!؟
عمر:بوي صاخف عليها..يقول يتيمه وماعندها حد وتبي العيله مانبيش نحرمها منها..
اميمه؛مع احترامي لعمي بس اللي قاعد يصير غلط في الشرع والعرف..
انزعج عمر من الموضوع وقال؛قلبي بالله حني خلينا ع تركينه مادخلنا بحد علينا في ارواحنا بس..حوش العيله بوي كبيره واللي يبيه فيه يمشي ومافي حد يقدر يغير كلامه..
اميمه:باهي بهدوء عمر نهدرزوا عادي...
عمر غمض عيونها محاولة منه لتهدئة اعصابه بعدين قال:اسف عمري....لكن خلينا من توا نتفقوا حوش العيله باللي فيه مالناش علاقه باللي يصير معاهم..نبيك مهما سمعتي لوطا تقعدي ساكته..واللي يصير هني ردي بالك يطلع برا..
اميمه شبحتله شويه بعدين هزت راسها وهي مبتسمه بالغصب..
☘☘☘☘☘
"روفه شن رايك..نلبس البدله هادي ولاقفطان هدا"
عبد الرؤوف وهو عاقد حواجبه ويشوف للحوايج:البدله خير...
غرفه:حتى اني نبي البدله..
ردتهم للدولاب بعدين مشت خشت السرير وهي تقول:روفه اليوم جوك زي الكئيب شن صاير معاك؟
هو قال:قبلها بنسألك شن حال اختك سدرة؟
تنهدت غرفه بحزن وقالت:زي ماهي مرة باهيه مرة مريضه..شكلها محصله عين قويه في العرس..
عبد الرؤوف:في شيخ راقي نعرفه كويس ماشاء الله عليه تو نجيبلها منه مية مرقيه وزيت زيتون مرقي..
غرفه بإبتسامه حب؛سلملي حبيبي..
ابتسم وشد يدها بإيديه الزوز وقال:نبي نهدرز معاك في موضوع..لكن قلبها نبيك تعطيني وعد تحكمي عقلك وتكوني هاديه..
خافت غرفه وبان ع وجهها وهي تقول:موضوع شنو هدا!؟
عبد الرؤوف:قلت عطيني وعد قبل..
غرفه هزت راسها وقالت بنفاد صبر:نوعدك خلاص قول..
تنهد عبد الرؤوف بضيق وهو يشوفلها بعدين بدي يحكيلها..
☘☘☘☘☘☘
مستغل وجود مرته في الحمام..
خدي راحته وهو يهدرز مع زوجته السريه ع الماسنجر..
كانت تبعتله في صور توريله في صبغة شعرها والقصة اللي قصتها..
الجالي..
(اخر مرة يمس شعرك مقص)
نجاة
(قاعد زي ماهو قصيته طروف بس)
الجالي.
(لاطروف لاجلوف..شعرك معاش تقربيه)
نجاة
(حاضر) وحطت جنبها رمز القلب التعبيري..
سمع صوت باب الحمام ينفتح..
طول حدف المحادثه..وطلع من الماسنجر..وسكر النت وحطه صامت...بعدين فتح درج الكامدينو وحط التليفون في وسطه وسكره..
ع خشة طوبى..
فاتت من قدامه..وردة فواحه في اول عمرها..
ناعمه..جميله..صافيه...
اقحوانة خريفيه..في موسمها...
قعد يتأمل فيها وهي تفرد في شعرها..بعدين فتحت شنطتها اللي مسميها"جيب عبقور"..
وطلعت منها كريماتها وبدت تستعمل فيهم...
شويه قالت:اليوم جو حوشكم غير حبيته هلبه..
ابتسم وقال:باهي غيرتي الفكرة اللي خديتها اول يوم..
خدت علبة الفازلين الطويله وجاته بيها وهي تقول:هو عادي اللي صار اول مرة في كل موجود الشي هدا..
قعمزت قدماه وقالت:هات يدك
عطهالها وقال:علاش..
طوبى شدتها بإيديها الزوز وقالت؛موشنه....
وخدت الفازلين وحطت منه عليها وبدت تدهن فيها بلطف وهي تقول:تو يخف ويختفي بكل
وهو يمرر في نظره عليها..وع يده الضخمه  بين قبضتي ايديها الرقيقه،الصغار،محاوطينه ويعتنوا بيه بإهتمام ولطف
وصاحبتهم تشوف ليده وهي تدهن فيها وقالت:تي شن اكثر حاجه شدتني لجو حوشكم اليوم
طلقت يده اليمين وخدت يده اليسار وحطت عليها من الفازلين وقعدت تدهن فيها وهي تقول:الخوت الاولاد في الحوش..جوهم...طبعاهم المختلفه والحلوة مهدي الجدي والهيبه..عمر الهادي..نضال خفيف الدم وصاحب الروح الحلوة..وانت الحكيم العاقل ..غبطت نسرين وخديجه هلبه عليكم..
كل وحده فيهم وين تجي هني تشوفكم وتحس بالأمان..امان العزوة والسند..ماتخاف من شي مدام هما معاها من بعد الله...الحوش اللي مافيشي اولاد ياما ناقصه..
قالت كلمتها والعبرة خنقتها..
الجالي قلب تقطع وين سمعها..خداها لقلبه واحتواها وقعد يقوللها:اني ليك بوك وخوك..وكل شي في حياتك..اني زوجك
..فاهمه شن معنى كلمة زوجك..يعني ولي امرك..سندك وعزوتك والامان متاعك..عوضك ربي بيا عن كل شي فقدتيه في حياتك..
طوبى وهي تسمع في كلامه كانت تبكي بصمت وشاده فيه بقوة.
مصدقه كلامه...مصدقه كل كلامه..وكل مالها تزيد تتعلق بيه اكثر...
وفي الشقه المقابله جناحهم..
ورا سيرانتي الفيراندا المسكر..
كان عبد القيوم مقعمز يكمل في باقي اللوحه اللي كاتب عليها كلمة مطحن بس..لتكون الكلمه التانيه اللي مرافقتها...
جنه...
مطحن جنه...
وهو يكتب كان يغني..
اوليهن ايملن...آيسان ترهى...
يسان سيمغار..ناوا يرهى...
جير تميديوين....هاكد يتمى..
🌼" قلبي ابيض...يعرف الحب
يعرف التعظيم....للشي الذي يريده...
بين الأحباء والاصدقاء..."
نك ليغ الزمن...ايلان ايويتيان
نماغي ترهى
هيغ اكالين...اي ميديوان...
🌼 "انا منذ زمن بعيد..ومنذ سنين
ابحث عن الحب..
في بلادي..يااصحابي.."
☘☘☘☘☘
تشوفله بصدمه ودموعها ينهمروا من عيونها ..
وهو يقولها وع وجهه باديه ملامح الضيق:اني تصرفت من راسي ونعترف اني غلطت..كل اللي فكرت فيه اني نفرحك بس..نعوضك بأي طريقه..
غرفه ودموعها تنزل؛هو قاعد في ليبيا ولا؟..
عبد الرؤوف؛قال بنقعد اسبوع كامل..
غرفه نزلت عيونها وقعدت تشبح لأضافرها اللي تحك بيهم في البطانيه ودموعها يقطروا عليها..
عبد الرؤوف بضيق شديد:غرفه خلتيني نندم...!
رفعت عيونها فيه وقالت؛نبي نشوفه..بس مش توا ومش بروحي..
عبد الرؤوف:اني معاك مش بروحك..
غرفه:قصدي نبي وحده من خواتي معاي..
هو بتساؤل قال؛مني منهم؟
غرفه:فردوس..الوحيده اللي حكتيلها عن جية مختار اللي قتلي عليها السنه اللي فاتت وحتى هي خاطرها تشوفه هلبه..نبيك تقوله يراجي حتى اسبوع تاني..
هز عبد الرؤوف راسه وقال؛تمام..مدام انتي تبي خلاص..
شدت ايديه الزوز وقالت؛نحبك هلبه روفه..
ضحك ضحكه خفيفه وحطت يده ع راسها ومسح ع شعره وهي تشوفله بعيون دامعه نظراتها مليانه حب..
☘ونجاه..
مقعمزه ع سريرها في جناحها وهي تتصل بالجالي وتعاود ومافيش منه اي رد..
كانت حاسه روحها بتموت..
من قوة الغيرة والغيظ..
خدت المخده متاع السرير وقعدت تعض فيها بقوة..
ودموعها ينزلوا...
☘☘☘☘☘☘
وعدت هالليله....
وجي اليوم اللي بعده...
نهار الجمعه...
كانت طوبى في دار الكوي..
تكوي في سورية راجلها العربيه بالمكواة البخاري...
وهي تردد في ذكرين مع بعض...
طوبى:لاإله إلا الله وحده لاشريك له له الملك وله الحمد بيده الخير وهو على كل شيء قدير...اللهم صل وسلم وبارك على نبينا محمد...
وقعد تردد فيهم واحد وراه تاني..
فجأة..
دق الباب..
طوبى وقفت اللي دير فيه وقالت:مني؟!
انفتح باب الدار..
رفعت حواجبها استغرابا لما شافت اللي خش عليها..
بإبتسامه لطف مزيفه قالت نجاة؛مشغوله طوبى؟
طوبى؛لاخلاص كملت..ومشت تفك في خيط المكواة البخاريه..
ونجاه تشوف لسورية الجالي اللي كانت تحدد فيها طوبى..
التفتت طوبى لنجاة وقالت:تبي حاجه؟
نجاة خشتلها وقالت؛ايه بنطلب منك بس متحشمه منك..
طوبى بإبتسامه مجامله؛قولي شن تبي ماتتحشميش..
نجاة بشي من التردد تصنعا؛بصراحه اني عاجبني مكياجك هلبه..بالذات يوم المحضر تفاجئت لما عرفت انك درتي مكياجك بروحك..
طوبى:كنت نخدم في مزين زمان..
نجاة؛ايه قالولي..المهم اني نبيك يعني لو مانكونش صحيحة وجه في طلبي...تمكيجيني بعدين..
طوبى قعدت تشبحلها وهي ساكته..
نجاه:الحق واخده قفطان قنين ويبي مكياج قنين..ياريت بس لو تلبي طلبي..خاطري نطلع غير هلبه اليوم..بضحكه كملت تقول..مش بقصد نخطف الاضواء من العرايس بس هكي حابه نفرح بروحي..
ابتسمت طوبى لما سمعت اخر جمله وحست اتجاهها بالتعاطف..غمضت عيونها وفتحتهم وقالت..تمام..
جتها نجاه وهي متصنعه الفرح وباستها من خدودها وهي تقول:ياوخيتي سلمها..عندك الحق جالي ينهي عزوبيته ع ايديك..
طوبى وهي مبتسمه مجامله قالت؛تخدمي مع الجالي في مكان واحد؟
نجاة بضحكه:ايه وبنشكيلك منه راجلك مدير واعر هلبه مش محصلين معاه النفس قوليله يخف علينا شويه..
طوبى مسايرة قالت:تمام تو نحاول معاه..وتوا خليني نمشي نعلق سوريته في الدار يبيها واتيه قبل ليخش يدوش..
نجاه بإبتسامه:خطر عليا طاهر الله يرحمه هكي كان..
طوبى وهي تاخد في سوريه راجلها بالعلاقه قالت:الله يرحمه..
ومشت طلعت بيها من الدار ونجاه وراها وهي تشوفلها بنظرات تخوف..
لو كانت النظرات تقتل راهو قداش ليها طوبى في عداد الموتى...
طوبى؛تمام بعد العصر نجيك بالعده متاعي..ولاعندك مكياج؟
نجاة:لاعندي..بس يعني انتي امتى بتلحقي توتي روحك؟
طوبى؛لا اني مش محتاجه شغل هلبه..
شبحتلها من فوق لتحت بحقد لما حستها قاصده الكلمه اللي قالتها..
وهي طوبى قالتها بحسن نيه مش قاصده منها حاجه..
وهما ماشيات تلاقوا بمحمد ولد المهدي..
طوبى وهي مبتسمه بمفاجأة؛محمد..واخيرا شفناك..
ضحك بإحراج وقال؛مرت عمي شن حالك..
طوبى بضحكه:الحمد لله..شن اخبارك شن داير في القرايه..
محمد:الحمد لله ماشيه الامور...
نجاة؛شن جو محمد..
محمد وهو مش طايق يشبح لوجهها وعيونه في طوبى؛تمام..سامحيني مرت عمي بنمشي عندي ماندير .
طوبى بإبتسامه:ولايهمك ربي يعاونك..
محمد؛تسلمي..ومشي..
وطوبى حتى هي مشت للدروج وركبت..
ونجاة قعدت واقفه وهي تشوفلها كيف تركب بحذر ع خاطر السوريه..وكل مالها جنهم في داخلها تزيد تستعر..
وخلتها تتوعد طوبى في نفسها...
"كان ماخلتيكش تندمي ع اللحظه اللي قبلتي فيها بالجالي مانوليش نجاة"
☘☘☘☘☘
وفي حوش لطفي الواعر...
كانوا البنات يجهزوا في ارواحهم للحفله..
كل وحده فيهم واخده استشوار وتجبد في شعرها..
وامهم مع سدرة ومطيرة يشربوا في القهوة ويهدرزوا عن مستقبل آلاء..
سدرة؛زي الولد زي بوه زي عيلتهم ناس الله يبارك عليهم..لكن بنتك..متأكده من قرارها..راهم ناس عاديين ومستواهم المادي عادي وهي واسعه ومتطلبه هلبه..
فردوس :هي اللي جت كلمتني عليه ياسدرة معناها عارفه كل شي وراضيه..
مطيرة:الحق الحق يافردوس اني خايفه من بنتك تفوت الراجل بعدين..
سدرة:هدا اللي مخوفني حتى اني..
فردوس بعدم اقتناع:لالا ماديرهاش..اكيده تبيه ويبيها ومقتنعه بيه..
سدرة:واني والله مانتمناها لغيره وليد متربي ماشاء الله عليك..وكان حق زي ماقلتي ربي يكمل ع خير..
فردوس تنهدت بشي من القلق وقالت:آمين..
مطيره:آمين يارب العالمين..قولي سديرة طوبى بكري كلماتك؟
ابتسمت سدرة وقالت:ايه..نبرة صوتها مرتاحه وفرحانه..
فردوس بإبتسامه:هدا علاش وجهك ناير اليوم..
رشفت سدرة من القهوة وهي مبتسمه..
ومطيره وهي تشوفلها بحب قالت:دووم إن شاء الله...
☘وفي حوش الجد علي..
كان جايهم يوسف من الصبح بمرته اللي حتحضر مع عزوزتها الحفله..
صفيه:قنين هدا البسيه..
ريما بإبتسامه:ذوقك حلو عمتي..
ابتسمت صفيه...
☘ويوسف جهز نفسه مع خوه وبوه والجد..
بش يمشوا لصلاة الجمعه..
وجي وقت مشيهم طلعوا كلهم..
صفيه:اني خاشه للحمام خليك حدا الطبيخه اول ماتبدا تغلي غيري الطنجره ع الراس الصغير..
ريما:حاضر عمتي..
صفيه مشت طلعت من حداها وتوجهت للحمام..
بعد ماسمعت باب الحمام انفتح وتسكر..
طول غيرت الطنجره ع الراس الصغير..
بعدين طلعت من الكوجينه ومشت للممر اللي يرفع لدار نوم..
كان في رفوف ع الحيط عليهم تحف..
خدتهم بالوحده وقعدت دور فيهم لين عترت في المفتاح..
خداته وطلعت من جيبها حاجه حطت عليها المفتاح بعدين بسرعه رداته لمكانه..
ولت تجري من جديد للكوجينه..
ع طلعت صفيه من الحمام..
مشت للكوجينه..خشت عليها لقتها مقعمزة ع الكرسي ولاهيه بتليفونها..
شافت للغاز لقتها مغيره الطنجره..شبحتلها وقالت..
صفيه:خلاص نوضي توضي وصلي واقري الكهف..
ريما بإبتسامه؛حاضر عمتي.
صفيه؛يحضرلك الخير..
ومشت طلعت من حداها..
وريما ناضت لحقتها لقتها خشت بتصلي في دار اميمه وسكرتها عليها..
ريما:حلو بكل يارموش..ان شاء الله تطلع الدار مفتوحه وتلقي فيها ماتبي..
ومشت بسرعه وبخفه للدار..
حطت يدها ع المقبض وجربت تفتح..
وانفتح معاها فرحت هلبه..
خشت للدار..
وقعدت دور فيها بعيونها لين طاحوا ع الزيانه..
لقت فوق شك مفاتيح..
وين جت خدتهم تتفحص فيهم لقت واحد فيهم صغير يبان مفتاح دولاب..
قريب عيطت من الفرحه..
خدت حتى هو ونسخت هلبه.
بعدين رداته لمكانه كيف ماكان..
ومشت طلعت من الدار....وسكرتها وراها بهدوء..
☘☘☘☘☘
"جتنا وفتحت الموضوع مع جدك وعمامك"
وليد بصدمه:واني علاش مانعرفش عمتي!
؛بصفتك شنو ان شاء الله!؟
وليد بغضب وعيونه فيهم لمعة دموع:عمتي ماتحرقيش دمي..
:ينحرق ولااللي هو..البنت بتشوف نصيبها زيك زيها..
وليد؛عمتي معاش تتكلمي بإستعباط كأنك ماتعرفي شي..
:حذرتك قبل ونبهتك قتلك اللي دير فيه اكبر غلط..تحمل النتيجه..
وليد؛يعني مش حتكلميها..
:لامش مكلمتها..وخلاص طلعها من راسك والهى بخطيبتك والله وجعتني في وسط كبدي بنية اختي طيبه ماتستاهلش اللي دايره فيها..
وليد هز راسه وهو معصب وقال:تمام..تمام بكل..
ومشي طلع من حداها وهي تقول :درتها بإيديك حلها بسنونك..
☘☘☘☘☘
طالع من الحوش وهو لابس جلابيه كشمير..
الجو بدي يصقع وهدا وقتها..
حط ايديه في جيوبها ومشي متوجه للجامع..
"تارقي"
التفت شاف ومعاه الجالي جايين ناحيته..
لما الجالي جوه تعكر بالمرة..
وصل فيه المهدي وقال:السلام عليكم..
عبد القيوم:وعليكم السلام
المهدي:شن حالك اليوم..
عبد القيوم:الحمد لله..شنو حالك انت؟
المهدي:الحمد لله.
عبد القيوم شبح للجالي لقاه يشبح القدام بتكبر وهو لابس نظارات سود..قاله:حمد لله ع السلامه
ياعريس..
الجالي شبحله وابتسم مجامله وقال:الله يسلمك..بعدين قال لخوه..بلال وين مش باين..
المهدي:تلقاه سبقنا للجامع..خل نلحقوا..
مشوا الثلاثه مع بعض وع وجه عبد القيوم بدت ملامح التجهم..
الجالي:خدتله حاجات من غادي ونبي نعطيهوله اليوم..
المهدي:حتى العشيه..
الجالي بضحكه:خايف ننسى والعيله عندي يديرولي مشكله..
المهدي:اها..عندك حق..تو في الجامع تشوفه شده وقوله يروح معانا وتعطيه حاجاته...
الجالي؛هو هدا.
عبد القيوم:بلال جا عن طريقكم لشارع القهوة؟
المهدي:لا ماجاش عن طريق حد..
هو قال:لاحظت انكم مهتمين بيه واجد هذى ليش سألت هالسؤال..
المهدي :الشارع كله مهتم بيه مش حني بس..
خطهم حداهم واحد قال:السلام عليكم..
هما ردوا السلام..بعدين عبد القيوم قال..
عبد القيوم:انا لاحظت انه متعلق بالشارع..ومرة شكرلي في حوش الواعر واجد..
المهدي ابتسم وقال؛هما اللي دخلوه الاسلام..
ابتسم الجالي..
عبد القيوم هو متفاجئ:قصدك ماكانش مسلم!؟
المهدي:ايه..قعد قريب 4سنين معانا..يوم وقفه عرفه العيد اللي فات خش الاسلام...
عبد القيوم وهو مبتسم قال؛ماشاء الله الله اكبر..يابخت عيت الواعر..
والمهدي والجالي يسمعوا فيه وهما مبتسمين..
وصلوا في الجامع..
وخشوله وكانت الخطبه كيف باديه..
موضوع الخطبه كان عن الغش...
والشيخ تكلم عن كل جوانب الموضوع..لين وصل للغش فالزواج...
وقعد يضرب في امثله..
عن اللي يكون مدمن ويزوجوه..
واللي يكون مريض نفسي ويزوجوه..
ويغشوا بنات الناس بيهم...
والعكس صحيح كذلك ياما من رجال انغشوا وانضحك عليهم..
وقعد يحكي عن العقاب اللي بيلحق هؤلاء في الدنيا والآخره..
الخطبه خلت فرائس الجالي وبوه وخوته المهدي ونضال وعمر ترتعد..
كلهم عارفين باللي صاير للجالي..
منهم اللي يعرف كويس وشاهد كل شي زي محمد شنيبه ونضال..
ومنهم اللي يعرف بس ماكانتش عنده درايه كافيه عن وضع الجالي حاليا زي المهدي وعمر...
اما الجالي وهو يسمع كان ضام ايديه لبعض بقوة والخوف مسيطر عليه..
بدي يعرف..ويمسح في العرق بيده..
وعبد القيوم مركز معاه من اول مابدي يخطب الشيخ عن الغش في الزواج..
وفكرة عبد القيوم عنه كانت مختلفه عن اللي دور في عقل محمد شنيبه وولاده..
وين شاف حالة الجالي ماحسش انها مرضيه..
لكن تأكد ان في شي مخفي في حياة الجالي...
الا وهو علاقته بأرملة خوه..
غير عيونه عنه ومررهم ع عيلة الواعر بالواحد..
بعدين ثبتهم ع حسين وقال في نفسه..
"خسارة بنت سيدك فيك كبيره"
☘☘☘☘☘
مروحين من صلاة الجمعه...
محمد شنيبه مع لطفي وعبد المطلب وعلي..
والجالي والمهدي وعبد القيوم وعبد الرؤوف وعمر ونضال ومعاهم بلال..
بلال:شكرا هلبه جالي..واشكر لي توبا..
الجالي بإبتسامه:يوصل..هي تعالى معاي..
ومشي هو وياه وخشوا للحوش..
عبد القيوم؛من يقصد بتوبا؟
المهدي:طوبى مرت الجالي..
عبد الرؤوف بإبتسامه فخر؛نسبيتي اللي خلت بلال يخش الاسلام..
عبد القيوم بدهشه؛ماشاء الله!
المهدي:عبروف نسيبتك وبنتنا..
نضال:يتجكتروا ع بعض..
ضحكوا ..
وعبد القيوم كل ماله توجعه بنت الواعر..طوبى..
ضاق صدره هلبه..وبإبتسامه تخفي هالضيق قال:هي انا اسمحولي...
المهدي:تعالى للعشي..
عبد القيوم:ان شاء الله..السلام عليكم..
ولف ومشي بإتجاه الحوش وهو يقول بصوت منخفض..
"لاحول ولاقوة الابالله"
وخش داخل...
ركب لشقته..
وصل فيها فتحها وخش..
وسكر الباب وراه..
مشي طول بإتجاه الدار اللي يمارس فيها هوايته..
كان يبي يطلع اللوحه اللي فيها اسم مطحن حوش الواعر..
بس شم ريحة الحبر معبيه الدار..
مشي طول رقى السيرانتي..
شاف من المرش جهة دار الجالي لقي باب الفيراندا مسكر..
فتح الفيراندا متاعه هو ونزل الستار..
بعدين مشي خدي  اللوحه وطلعها من الدار..وسكر الباب..
☘☘☘☘☘
ع الغدي..
كانت الاجواء عاديه لكن مش خاليه من التوتر..
مغليه حطت اميمه تحت المجهر وقعدت مقيدتها في كل حركه..
واميمه كانت مضايقه هلبه..منها ومن نجاه اللي تبي تعرف مني من ولاد شنيبه قاعد يلعب بذيله معاها...!
ونجاه كانت تراجي بفارغ الصبر امتى يجي وقت بعد العصر...
وجي هالوقت المنتظر..
طلعت مكياجها وقفطانها..
والاستشوار..وقعدت تراجي في طوبى...
لحظات..
ودق باب الجناح..
مشت بسرعه فتحاته..
وبإبتسامه عريضه كاذبه استقبلت طوبى وهي تقول:اهلا تفضلي..
خشت طوبى وهي تقول:اهلا بيك..
وحولت وشاحها وقالت:صغارك هني؟
نجاة:لاقاعدين برا مع صغار عمامهم وعماتهم..
طوبى:تمام..
نجاة:خشي خشي علاش واقفه هني!؟
خشت طوبى ونجاة وراها وهي تشوفلها بنظرات مكر..
وقفت طوبى لما جو عيونها ع القفطان المعلق..
لونه خمري..حلو عليه..بس جريئ هلبه..ومش لعمر نجاه..
نجاه؛نبي مكياج يمشي معاه..نبي نطلع صاروخ ارض جو..
وضحكت..
شبحتلها طوبى بإبتسامه وقالت:انتي جميله من غير شي..
نجاة بإبتسامه ود كاذب:ياعمري انتي الجميله..
طوبى وهي مبتسمه:شكرا..خلينا توا نبدوا بشعرك بسرعه..
نجاه:ok
ومشت قعمزت ع كرسي الزيانه..
وطوبى مشت للإستشوار..وشغلاته..
ونجاه طلقت شعرها..
قربتلها طوبى وبدت تجبد في شعرها..
شويه وقالت بصوت عالي ؛القصه حلوة هلبه..
نجاة بنفس نبرة الصوت:عيونك الحلوة..
طوبى:صبغة شعرك ماشيه معاك..
نجاه:محلا لسانك اللي يقطر عسل..
طوبى:شكرا...بس كلامي مش مجامله راهو هادي الصراحه..يعني لو ماعجبنيش نقول عادي..
نجاة:باهي شن رايك في القفطان.
طوبى؛حلو بس جريء هلبه في مازال احلى منه يمشوا معاك اكثر..
نجاه:لاهدا اللي يمشي معاي..اني جريئه هلبه ونحب ديما ندير الحاجات الجريئه..ونتحدا بيها اي حد يرفضها..
طوبى رفعت حواجبها ونزلتهم وهي مبتسمه..
نجاة:سكريه شويه..
سكرت طوبى الاستشوار..
نجاه:نعطيك نصيحه وخوديها من مراة اكبر منك خبرة في الحياه..خليك جريئة مع راجلك بش يموت فيك ومايقدرش يستغنى عنك الرجاله مهما بانوا عاقلين وراكزين يحبوا المراة الجريئه..
طوبى بإبتسامه؛ياستي مشكورة ع النصيحه..هي خل نكملوا وفتحت الاستشوار  مرة تانيه..
ونجاه اكتفت بابتسامه عاديه تخفي الكثير..
🍃وجبدتلها طوبى شعرها..
بعدين خلتها تلبس القفطان وبدت تمكيج فيها..
نجاة استغربت في طريقتها وكأنها قاعده تلون في رسمه راسماتها..وخافت اطلعها قبيحه...
طوبى؛تمام هكي..قعدت التسريحه..
شافت نجاه شكلها في المرايه انصدمت..
غيرتها هلبه وصغرتها...
طوبى:عجبك؟
نجاة:امم..حلو...
طوبى :شعرك تبيه مفرود ولاتبي تقيميه..
نجاة:نبيه ذيل حصان..طبعا بطريقه حلوة..
طوبى:تمام...
☘والجالي في الكوجينه يتناقش ع نسرين..
الجالي:بنتك قالت بوي خدي السيارة من امي..وتعارك هو وياها..
نسرين:تاخد في كلام الصغار وتصدق فيه ياجالي معقوله!
السيارة فسدت هو خداها مني ورفعها للورشه ليها مده..وتوا قالي فوتيها وخودي غيرها..ولو ع العراك مافيش زوز متزوجين مايتعاركوش تو تجرب هالشي مع مرتك لازم تصير ططشات...ملح الحياة الزوجيه..وابتسمت بتصنع..
هو ماصدقش كلمه من اللي قالتها بس ماباش يناقشها..
مشي لتلاجة الميه بش يشرب وهو يقول:تمام..لكن علمي بنتك معاش طلع اللي يصير في الحوش برا يانسرين..
نسرين:مزبوط عندك حق..
هو قال؛ناديلي طوبى كان ماعندها شي ديره..
وشرب الميه..
نسرين بإبتسامه:مش فاضيه لاهيه مع نجاة..
هو شرق بالميه وقعد يكح ويكح.."يسعل"..لين قريب عيونه طلعوا..
نسرين وهي تشوفله بقلق:خير دعوتك علاش تشرب بسرعه..!
الجالي حاول يوقف الكحه وقال:ماصار شي..اني طالع..
ومشي طول طلع من الكوجينه من برا وهو خايف..
ومازال يكح..
قام تليفونه واتصل بطوبى..
🍃طوبى بإبتسامه:الله يبارك عليك..
نجاة:ويبارك في ايدياتك..شكرا تعبتك معاي..
طوبى:ولايهمك..هي خل نمشي نلحق نوتي روحي.
نجاة؛سامحيني عطلتك..
طوبى بإبتسامه؛ولايهمك..المهم تفرحي بروحك..وغمزتلها..
ابتسمت نجاه..
وطوبى لفت ومشت طلعت من الجناح وسكرت الباب وراها..
نجاة ضحكت نص ضحكه ساخره وقالت:مش بروحي بنفرح بروحي..حتى راجلي ياعسوله..وفي عقر دارك..
لفت ومشت لتليفونها وخداته من ع الزيانه وبدت تصور في روحها صور سلفي..
☘وع الدروج..
طوبى وهي تتكلم بالتليفون قالت بضحكه:خلاص خليني نركب نوتي روحي معاش في وقت..
"خليني نشوفك بعد تكملي صوري وابعتيلي"
ضحكت وقالت:حاضر..سلام جولي..
"سلام عسولتي".
سكرت طوبى وركبت بسرعه وهي تضحك..
☘☘☘☘☘
وفي حوش بوها..
كانت اختها غرفه غادي تجهز في نفسها مع بنات اختها للحفله..وغالبا عقلها شارد يفكر في خوها وكيف بتفتح موضوعه مع فردوس..
🌸مع المغرب كانوا جاهزات..
وهما طالعين شدتهم سدرة..
سدرة:التعليقه هادي لبسوهالها غادي قدام الحاضرين وقولوا من سدرة..
خدت غرفه الكيسه وهي مبتسمه وقالت؛ حاضر..
سدرة:وانتي ردي بالك ع روحك..اقروا الاذكار اقروا..
ابتسموا وهما يقولوا:حاضر .
سدرة:سلموا عليها هلبه..وردوا بالكم تحسسوها بحاجه..
اريج:ماتخافيش خويله مش حنحسسوها بشي..
سدرة:عابيه عليكم..في امان الله..
الثلاته قالوا بأصوات متقطعه؛سلام..باي..
وطلعوا من الحوش وركبوا سيارة اريج..
قصت الطريق بعدين درست وسط زحمه السيارات..
ونزلوا هي واختها وخالتها ومشوا خشوا..
نضال كان يراقب فيهم..
بعد خشوا قال بإبتسامه:ان شاء الله تولي سلفة خالتك يابساتشيو..
☘☘☘☘
وفي صالة حوش الواعر المعبيه بالناس اللي جت تبارك..
مع الاقارب المقربين..
خشت نجاة ببنتها جوري..
والعيون عليها..
مغليه استغربت في طلتها ماكانتش مناسبه نهائي..
والناس كذلك استنكروا طلتها.
وهي ضاربه الكل في الحيط قعمزت وحطت رجل ع رجل وماعبرت حد..
ع خشة غرفه واريج وآلاء ومعاهم نسرين..
نسرين:تفضلوا تفضلوا..
شافتهم نجاة وهما خاشات وقعدت معاهم بعيونها لين قعمزوا في مكانهم..
رحبت بيهم نسرين تاني وسألت عن سدره..
بعدين ولت طلعت مرة تانيه..
آلاء:يهبل تنسيق حفلاتهم شكلهم متعاونين مع شركه صح..
غرفه وهي تمرر في نظرها ع الصاله:ايه حلو..
ع خشة صفيه ومعاها ريمه كنتها..
شافوهم غرفه وبنات فردوس..
صفيه شدتها مغليه تسلم عليها..
اما ريمه شافت البنات يأشرولها ابتسمو ومشتلهم..
☘برا..
نسرين بإبتسامه:الله يبارك ع كناينا الله يبارك..
واميمه وطوبى يشبحولها بإبتسامه..
اميمه كانت لابسه بدله سودا قونه للركبه..
والجاكيت متاعها يلمع ويبرق بالعدس وفي يدها شنطه صغيرة سودا لماعه..
مكياجها هادي..
وتسريحتها كلاسكيه بسيطه وحلوه..
طوبى لبست فستان ابيض ناعم وطويل هلبه..وفي يدها شنطة صغيره فضيه...
وخلت شعرها مفرود ع ظهرها وكتافها..ومكياجها كان ناعم..
خشوا مع بعض للصاله..
واول ماشافوهم قعدوا يزغردوا..
ونجاة عيونها ع طوبى..وع طلتها اللي كانت برغم بساطتها زايدتها جاذبيه..
غرفه كانت مستاحشتهم هلبه وانجبرت تراجي لين يطق فيا الدور في السلام..
وهما تطلقهم وخده تشدهم التانيه..
ومغليه شايفه روحها بيهم ع كل الحاضرات..
بعد مشوار طويل من السلام والتعارف.
وصلوا في البنات .
غرفه وطوبى وهما حاضنات بعض بقوة..
طوبى:استاحشتك روفي قلبي..
غرفه:اني اكثر ياعمري..باست خدودها بعدين بعدت وشادتها قالت:الله يبارك سامنه وزايده في الزين..
طوبى بضحكه:جديات!
غرفه:والله..
اريج؛ياودي هاني جاي حتى اني عندي فيها حصه..
وجبدتها من غرف وضمتها وهي تقول:استاحشتك ياجحيشة..
طوبى:اني اكثر ياحميرة
قعدوا يضحكوا..
وغرفه تسلم اميمه..
اميمه:الحمد لله ع سلامتك حتى انتي ان شاء الله ربي يعوضك خير..
غرفه بإبتسامه اسف:امين..
وبعد السلام..
مشوا العرايس قعمزوا حدا بعضهم ع كرسي واحد اشبه بالكوشه يكفيهم هما الزوز..
مررت طوبى نظرها ع الموجودات وتبتوا ع نجاة..
لقتها واقفه تسلم ع وحده..
ركزت اكثر في القفطان كيف طالع عليها.
اميمه وهي تشوفلها بعدم تقبل: مش ليها القفطان.
طوبى:صح..بس حلو لولا موديله الجريء..
اميمه:ايه..بس صراحه التاكم الللي لابساته عجبني هلبه..
ركزت فيه طوبى...وحست روحها شايفاته قبل يش متفكره وين وامتى...
☘☘☘☘
شغلوا المنظومه..
وبدوا يهيجوا ع اغانيها..
اميمه كانت مش مبتهجه هلبه..
مركزه بس مع نجاه اللي قاعده لاهيه بتليفونها وواضح انها تتراسل مع واحد من ابتساماتها وضحكها..
وطوبى وهي تهدرز مع اريج وآلاء وغرفه مرة مرة تشبح للطقم متاعها..
غرفه؛يراجوا في جيتك..
طوبى بنجي غدوة في الليل وبنبات..
هما بدهشه؛الله!.
شبحولهم بعض االحاضرات ونجاة معاهم..
طوبى بضحكه:درتوا العار..
اريج؛خلاص بايته للاثنين....
طوبى:بنروح الثلات..
غرفه؛وكيف رضالك الجالي!
طوبى:بعد زن ومحايله بش وافق..وعلى مضض..
الاء عنده الحق الراجل عريس نهاري!
طوبى:يومين مايأثروش..
☘ونجاة قاعده تأثر عليه بكل ماعندها من كيد بش تستحوذ ع قلبه..
بعد ماعيي وهو يطلب منها في الصورة..
بعتتله وحده..
بعد ما وصلاته بشويه..
بعتلها رساله..
"اركبي لداري "
ضحكت نجاة ضحكة خفيفه..
بعدين ناضت ودارت روحها تتكلم بالتليفون مستغله انشغال الجميع..
وعيون اميمه لاحقتها..
وكذلك عيون نسرين..
بس كل منهم لهوا غصب عنهم من الحضور..
وطوبى منسجمه مع غرفه وبنات اختها...
🍃ركبت نجاه فوق وخشت للدار...
والجالي خش من الكوجينه وهو يتسحب..
وركب الدروج بسرعه بدون مايخش بيه حد..
وصل في داره فتحها وخش وسكر وراه الباب بالمفتاح.
الجالي:مافي حد حس بيك..
نجاة بإبتسامه؛كلهم لاهيين ياحياتي انت..
☘زي انتم لاهيين عت فتحة باب الفيرندا البسيطه.
اللي مقابله فيرندا عبد القيوم ..
خش للدار لقاها مصقعه..
عبد القيوم؛نسكر الفيرندا قبل بعدين نجيب الدفايه..
وقدم للسيرانتي بينزله..
عيونه جو ع فريندا الجالي..
شاف شي صدمه ع الاخر..
درق بسرعه وهو مصدوم..
وبدي يحس بكل شي فيه والعه فيه النار..
مشي بسرعه طلع من الدار وسكرها وهو يقول بصدمه شديده:والعياذ بالله!..واصله لهنى هي!؟
☘وفي الصاله..
طوبى؛الكندره مش مريحتني..
غرفه:ضيقه!
طوبى:شويه..خل نركب نغيرها وخلاص..
اريج؛نجي معاك..
طوبى:لالا مش لازم..
ومشت طلعت من الصاله..
نسرين سألت غرفه:خيرها؟
غرفه:بتغير الكندره..الكندره..
هزت نسرين راسها بعدين مشت طلعت من الصاله وعيون اميمه معاها..
ركبت طوبى فوق...
ووصلت في باب الجناح..
حطت يدها ع المقبض جت بتفتح الباب لقاته مسكر بالمفتاح..
ومافيش مفتاح ع الباب يعني مسكر من داخل..
دقت ع الباب وهي تقول:جالي!...
مافيش رد...
دقت تاني وقالت:جالي..
فجأة انفتح الباب وطلع الجالي ..
لما شافها كيف طالعه تنح فيها..
طوبى:شن عندك هني؟..
الجالي استاقظ وقال:جيت بنرقد شويه بس ماقدرتش من صوت المنظومه اللي قالب الدنيا..
هي قالت؛باهي شويه خل بنخش نبدل الكندره تعبتني..
خشت وهو وراها..
وكان في قمة الخوف والتوتر والارتباك..لكن حاول يبان عادي..
الجالي:ضيقه..
طوبى:ليه..
حولت الكندره ومشت قامت غطا صندوق الاحذيه الطويل التابع للسرير..
طوبى:ترا تعالى اختار معاي..
جاها وقعد يشوف في الاحذيه..
طلع كندره فضيه وقلل:شن رايك..
ابتسمت طوبى وقالت:حلو..
غطت الصندوق..
الجالي؛قعمزي..
قعمزت وهي مبتسمه..
قعمز قدامها ع رووس صباعه وقعد يلبس فيها وهي تشوفله بإبتسامه حلو..
كمل ووقف وخدي يدها ووقفها..
طوبى بإبتسامه:ميرسي..
الجالي بضحكه:علاش تفكري فيا بيها..
مشت وهي تضحك لشنطتها فتحتها وطلعت منها4اصابع شكولاته"ميرسي"
وجاته
بيهم وقالت بضحكه؛خنبتهم ع خاطرك من الطاوله متاع الاستقبال..قلت تو تكمل ومعاش نحصلها..
الجالي لمعوا عيونه بالدموع هو يشوف في نظرات عيونها البريئه وابتسامتها اللي كانت غاية في اللطف..
خداها منها ومشي حطها في الثلاجه......
وطوبى وقفت ع الزيانه وقالت:خل نعدل مكياجي..
هو جاها باس راسها وقال:شكرا حلوتي..
ابتسمت وتغمض في عيونها وتسكر فيهم..
الجالي:بنخش الحمام شويه..
ومشي خش للحمام وسكر الباب..
بصوت هامس قالت بحده:خيرك ماطلعتهاش!؟
فنص وهو يقول بصوت هامس:سكري فمك واسكتي..اصلا اللي حني فيه توا منك انتي..
نجاه:نعم!!..مش انت قتلي اركبي داري!؟
قدملها وقال بإنفعال:فوتيه جو الاستغباء نعرفك زي كف يدي راهو..عارفتيني مانقدرش نجيك في جناحك!
نجاة تهكما:وانت عاد غشيم مسكين ينضحك عليك بسرعه!
حط سبابته ع فمه وفنص فيها..
هي قلبت عيونها وغيرتهم عنه..
"جولي"
رفعت حواجبها تعجبا لما سمعت الاسم!
الجالي بصوت عادي:نعم..
"طلعت اني".
الجالي:تمام حلوتي تمام...
ضرباته نجاة ع صدره..
فنص فيها..
سمعوا باب الدار اتفتح وتسكر..
الجالي بهمس:اقعدي في مكانك..
طلع وسكر الباب..
وقعد يمرر في نظره ع الدار..مافيش لطوبى اثر..
مشي للحمام وفتحه وقال:اطلعي..
االجالي؛بننزل اني توا انتي انزلي بعدي بوقت..
ومشي بسرعه طلع وسكر الباب..
وهي قعدت واقفه تمرر في نظرها ع الدار بعدين قالت..مش الاخيره..وعقبال الفيلا حتى هي..
مشت وقفت ع المرايه وعدلت في طلتها...
بعدين مشت للباب يدوب فتحاته..
طلعت راسها تشوف مالقت حد..
طلعت وسكرت الباب بهدوء..
ومشت بسرعه نزلت من الدروج..
وصلت في المستراح بعدين مشت نزلت الدروج تاني..
بعد مانزلت اول درجه شافت لأخر الدروج..
جمدت في مكانها لما شافت الشخص اللي واقف غادي وكأنه كان يراجي فيها ويشبحلها بنظرات حاده...

#في_الداخل
#طوبى

....يتبع...