طوبى الجزء الاول

الجزء الثاني والخمسين

#طوبى "أقحوان وفلة وياسمينه"
#جمان_فريد
#الجزء_الثاني_والخمسين"Pinka"
《معظم أحداث هذه الرواية حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
وفي ليلة السبت الشتويه...
اختلطت اصوات هطول الأمطار مع المولدات اللي اشتغلت في أغلب حياش شارع القهوة..
والتارقي في شقته..
كان مستقبل ضيفه المستأجر منه..
اللي جي يتعشى عنده "مقطع" سخون وجاري وفي نفس الوقت يسهروا مع بعض ع قولت الشراقه..
عبد القيوم:اللي صاير داخل يامهدي كوارث..فساد لاقبله لابعده..
المهدي:هدا لاش الوضع كل ماله يزيد يتأزم..
عبد القيوم:للأسف..
وقعدوا ياكلوا الزوز بصمت لعند ماقال واحد فيهم..
المهدي:الله يبارك تقوت..
عبدالقيوم:اها..وطرابلس غرقت..
ابتسم المهدي تهكما..
سكتوا شويه مرة تانيه بعدين المهدي قال..
شن صار في موضوعك؟..
تنهد وقال:قاعد كيف ماهو عديت اليوم الجامعه وانا حاسم أمري بنكلمها ونفتح معاها الموضوع خلاص لكن من سماحه الحظ طلعت باديه عطلة نص السنه..ماني عارف ليش طريق الحب صعبه هك حتى لو كان حلال!؟
المهدي؛النصيب هو اللي يحكم ياتارقي..اللي يحب لازم يدير حساب كبير للنصيب..
عبد القيوم بضيق:الكلمه هذي بديت نخاف منها..
المهدي:كويس..
عبد القيوم؛شن الكويس!؟
المهدي:مدام بديت تخاف منها معناها حاسبلها حساب..يعني كان عرفت شي صدمك بعدين..الوجع يكون اهون..
شبحله عبد القيوم شويه بعدين قال:تصدق انا مانعرفش نتشائم ديما نحب نتبع احساسي حتى لوكانت مسكرة من جميع النواحي..
انا كنت ناوي نجي لطرابلس من سنتين فاتوا وصار اللي صار
فهالسنتين اللي سكر البيبان كلهم فوجهي..
بس قعدت ورا احساسي اللي يقولي اني حنعدي لطرابلس ونخدم فيها ونلقاها هي ويصير النصيب..
ضحك وهو يقول..وصار وجيت لطرابلس وخدمت فيها ولقيتها..وانا متأكد ان النصيب حيصير بإذن الله...
المهدي بإبتسامه؛وكان تقسم عليا شويه من التفائل اللي عندك..
عبد القيوم ابتسم بعدين رجع ياكل.
والمهدي تنهد وولى ياكل حتى هو...
🍃والجو برا قاعد ع حاله..
جو ينايري بإمتياز...
والجو هدا يبيله تقعميزة دافيه وحلوة وكلها حب..
زي اللي بين طوبى والجالي توا..
مقعمزين ع فرشه وكل حد منهم متلحف ببطانيه.
في ايديهم مقات كبار سحلب..
وهما مجاورين مدفأة الحطب اللي راقده "بينكا" قطوسة طوبى قريبه عليها..
طوبى:العيله كلهم يرفعوك اخت حكيم الكبيره وهي تعرف فيا عليهم كلهم سلموا عليا بحرارة وقالوا كلام حلو هلبه..
الجالي بإبتسامه:صحاب عمر اني وحكيم من الاعدادي ايام الثانوي اغلب يومي يمشي معاه ياهو في حوشنا يااني في حوشهم..
طوبى:ماعندكش غيره؟
الجالي:لاماعنديش اصدقاء غيره اني مانحبش كثرة الاصحاب اللي يكثر صحابه يندم..
طوبى؛في هادي عندك حق....
الجالي:اني ديما عندي حق..
طوبى قعدت تشبحله..
هو ضحك وقعد يشرب في السحلب.
وهي ضحكت وحركت راسها يمين ويسار وقعدت تشرب في السحلب..
شويه وقال؛امم..شن صار في شهادة السواقه امتى تاخديها؟
طوبى؛اخر الشهر هدا ان شاء الله..
الجالي ابتسم ع جنب ورجع يشرب في السحلب..
وهي تشوفله بإبتسامه بعدين قعدت تسمع في صوت المطر وبدت تغني..
قديش كان في ناس ع المفرق تنطر ناس
وتشتي الدني..
ويحملوا شمسيه..
وانا بأيام صحو ماحدا نطرني..
🍃النطره..الانتظار..
اصعب اللحظات اللي يعيشها الانسان من بين كل لحظات حياته..
كيف لو كانت اللحظات هادي سنين..
زي اللي عدت من عمر عواطف ونجاح وهما يستنوا امتى يتحقق حلهم البسيط جدا في إنهم يتزوجوا ويديروا صغار ويعيشوا حياة مستقرة زيهم زي بنات جيلهم...
بنات جيلهم اللي توا صغارهم في عمر الصبا...
وهما راقدات مقابلات بعض يتكلموا ع نفس الموضوع..
عواطف:اهم نص بنات الشارع مصفحات مرت خوك خديجه مصفحه واختها نسرين بنات عيت قاجا كلهم تزوجوا وبنتهم الصغيره عرسها سبوع هدا وكلهم مصفحات..
نجاح:الصغيره مش مصفحه..
عواطف؛تمام خواتها مصفحات..بنات عيت الناجم هما هادم كلهم مشوا معانا زمان لهديكا المراة..اللي مامشوش نتفكر فيهم..بنات الواعر وبنت الخويلدي فايزة وعيشه بنت الشيخ جويده وهاك تشوفي بعينك في حال سدرة الواعر وهي مش مصفحه..
نجاح:انتي تحسابي التصفيح يعطل الزواج بس يعطل ستين حاجه في حياة المصفحه وينكد عليها عيشتها..
عواطف:ماتنسيش راهو يفك في ليلة الدخول بخيط النيره..
تتفكري لما درناه كيف درناه مش قعدنا نتخطوا في المسده وحني ناكلوا في التمر ونقولوا اني حيط والراجل خيط! ليلة الدخول لما ينفك بخيط النيره تنقال جملة تشبهلها مش متفكرتها كويس ويتحول التصفيح..
نجاح:وهدا فك السحر بالسحر ومافيش من ورا السحر خير..في اللي يقولوا مايتحولش يقعد يخليك تتزوجي لكن مايهنيكش في حياتك..
عواطف؛كان هدا المطلقات بالشبردق!
نجاح؛مش شرط تطلق ياعواطف بس ماترتاحش في حياتها مع راجلها صغارها حتى ناسها..يخلي النفسيه ديما تاعبه والاعصاب راقيات من اتفه الامور تصير مشكله كبيره..
عواطف قعدت تسمع فيها وهي تفكر في كلامها..
نجاح بألم؛يدير حتى امراض في الرحم زي ماصار معاي..
حرمني نتزوج ..وتوا بيحرمني من انوثتي من الحاجه الوحيده اللي قاعده تثبتلي اني انثى...طاحوا دموعها وهي تقول..الحمد لله ع كل حال..الحمد لله ع كل حال..اجر بإذن الله..تنهدت بألم وقالت..بإذن الله اجر وتكفير ذنوب..
وعواطف تشوفلها ودموعها ينزلوا وهي متألمه ع حالها..
☘الحال المؤلم..
اللي يشبه حال سدرة..
وهي في دارها مقعمزة تكتب في مذكره ودموعها تنزل وهي تمسح فيهم وترشف..
توقف شويه وترجع تكتب وهي تقاوم في بكاها ..
🍃زي ماقاعده عائشه تقاوم في آلامها..
وتكابر على روحها ماتبيش تشغل حد معاها بس ع قد ماتحاول درق ماتقدرش درق ع امها..
عتيقه:هادي الطرونجيه غليها واشربي..
عائشه بإنزعاج؛تي غير علاش تعبي في روحك يام!؟..صدقيني حالي باهي الايام هادي..
عتيقه:خودي الشكارة وريحيني..
خدت عائشه الكيس اللي فيه العشبه من امها بإستسلام..
عتيقه؛ياسرك معاش تسحني روحك ع خاطر حد اهتمي بروحك وصغارك وطز في غيرهم..
ضحكت وبقلة حيله قالت:حاضر...
☘☘☘☘☘
مقعمزة في دارها ع السرير وفي يدها تليفونها..
خاشه ع الفيس وتتفرج ع ستوري ضرتها..
كانت طوبى مصورة يدها ويد الجالي محطوطات ع بينكا وهي راقده قريب من مدفأة الحطب..
وكاتبه"Pinka My Love"
نجاه وهي تتكلم بينها وبين نفسها"القطوسه والورد"
"نجوته"
نجاه وعيونها في التليفون:همم..
صابرين؛هي نوضي المحمصه واتيه.
حطت نجاة التليفون وهي تقول:الله! المحمصه!..
ناضت وهي مبتسمه بحماس:قداش كانت تحبها امي..
صابرين بإبتسامه:سخونه وحارة..
طلعت نجاه تجري..
وصابرين وراها وهي تضحك..
☘وفي مكان تاني...
كانوا يتعشوا معتز واريج وفردوس عصيده...
وآلاء في الدار بروحها..قلت دحي وبطاطا تتعشى فيهم..
وفي لاهيه بتليفونها..
قدامها هديه مهند اللي مااهتمتش بأمرها..
مافي شي توا عندها من ولد عمها..
كانت دايرة حساب تاني متابعاته بيه..
ترددت هلبه تخش ع الستوري متاعه..
وفي الاخير خشت..
لقاته فيديو..
هو يسوق في السيارة تحت المطر بدون مايبين شكله ومشغل في السيارة اغنيه تحبها آلاء..
لما سمعتها طارت من فرحتها تأكدت ان وليد دار هدا كله قصدا ع خاطرها..
فجأة..
جتها رساله ع الماسنجر..
كانت منه هو..
قلبها قعد يدق بقوة..
خشت عليها لقاته باعت..
(آلاء)
ردت عليه..
(عفوا..من آلاء)
رد عليها..
(فوتي الجو هدا آلاء مش وليد اللي يغبى فيك)
ابتسمتت بعدين ردت..
(شن تبي)
(سمعتي ولا)
(بشني)
(آلاء فوتي الطروح)
ضحكت..
(آلاء سيبتها ع خاطرك)
(هي اللي سيباتك لأنك خنتها)
(انتي عارفه ان اني اللي سيبتها الاء ماتحرقليش دمي)
(اني مخطوبه كانك ناسي)
(لامش ناسي وزي مااني درت انتي ديري)
(وبعدين من بيرضالك تاخدني!؟ لاماليا ولاماليك)
(مادخلهمش بينا هادي حياتنا اني وياك وهدا نصيب ماصارش من غيرك وصار منك)
(اني مانبيش نسيب خطيبي)
معاش رد عليها..
بس اتصل بيها..
انخلعت لما شافت اتصاله ومابتش ترد..
فصل وعاود مرة تانيه ومابتش ترد..
اول مافصل طول سكرت التليفون وقالت؛لين نربيك..
وحطت التليفون ع الكامدينو وخدت من فوقه السفرة وحطتها ع رجليها وخدت الشوكه وبدت تاكل بيها في البطاطا..
عيونها جو ع هديه مهند..
بدت ع وجهها ملامح الضيق بعدين قالت؛شن درت في روحي بس...!
🍃ومهند مقعمز ورا اللاب توب متاعه..
بادي يجهز لحلقه الجايه من برنامجه..
ومرة مرو يشوف في الفيس من تليفونه..
ويراجي آلاء تنزل اي حاجه عن المفاجأة اللي دارها تعود بيها تنزل عن اي شي جديد يجيها من اي حد..
استغرب كيف مانزلت شي عن حاجه جابها خطيبها..
تنهد وقال؛شكلي جرحتها مارضيتهاش..حركتي غلط مفروض خديتلها اي حاجه تانيه غيرها..
حط قبضة يده ع فمه وهو يفكر..
بعدين حولها..وحط ع رقمها واتصل بيها ..
عطاه مقفل..
حك ذقنه..ونزل التليفون وهو مضايق...
☘☘☘☘☘
تاني يوم...
الساعه 12:00قبل الظهر..
كانوا خديجه ومحي وسلفها الكبير مروحين من السفر..
محي كان حاله يتحسن تدريجيا..
وقعد يمشي ع رجليه بمساعدة القيلا..
ومافيش زي فرحة امه وصغاره بيه لما شافوه بحال احسن من اللي كان عليه..
اما خواته فكانوا يعولوا ع غدي العيله..باقي خوتهم بعويلتهم جايين يتغدوا عندهم...
☘وفي حوش الجيران..
كانت اميمه خاشه للحوش وهي شادة باقة ورد..
وتحاول تشجع روحها بش تخش بيها ع عزوزتها وترضيها..
وين وصلت في دار المعيشه خدت نفس وخشت..
مالقت فيها حد استغربت..
طلعت منها ومشت للصاله خشتلها حتى هي مالقت فيها حد..
ومن الصاله للكوجينه كان الغدي محطوط ع النار بس مافي حد حداه..
مشت وهي مستغربه وتنادي..
عمتي..عمتي...
مافيش رد..
شافت دار النوم متاع عزوزتها مردوده..
قالت في عقلها..شكلها فيها..
مشت وقفت قدام الدار وقعدت دق وهي تقول:عمتي..عمتي..
مافيش رد..
فكرت بخوف لو العزوز ماتكونش موجوده في الحوش كله ومالهاش حس..
مرات تكون في دراها مغمى عليها او صايرتلها حاجه..!
دقت تاني ع الباب وهي تقول..عمتي..
بعدين فتحاته بتردد وخشت...
اميمه:عمتي..
ع جية مغليه من دار الكوي كانت تحدد في حوايج شيبانيها ولأن هالدار بعيده ماسمعتش صوت اميمه وهي تنادي..
وصلت في دارها..
وقفت في مكانها لما شافت اميمه طالعه.
واميمه لما شافتها انفجعت وقالت؛عمتي!
مغليه:شن عندك في الدار!
اميمه بتوتر:كنت ندور عليك..
مغليه بحده؛الدار هادي داري اني وعمك محرمتها ع بناتي يخشوها وانتي تخشي هكي عادي لاتستحي لاتتحشمي..
اميمه كانت حترد عليها برد بكلام اقسى من كلامها..
بس تفكرت نصيحة عائشه في اخر لحظه..
حاولت تهدي نفسها..وبلعت كلام عزوزتها وقالت..
اميمه:عندك حق اسفه..بس اني دورتك في الحوش مالقيتكش والدار هادي كنت واقفه عليها ودقيت وناديت ولما ماردتيش خفت تكون صايرتلك حاجه..
مررت نظرها عليها من فوق لتحت بعدين مشت للباب سكراته بقوة وقالت:اخر مرة نشبحك خاشتيها..
شدت اميمه ع قبضة ايدها بقوة وقالت؛حاضر...واسفه مرة تانيه.
حطات مغليه ايديها ع بعض وقالت؛علاش دوري عليا..
اميمه مدتلها الباقه وتصنعت ابتسامه وهي تقول:اسفه ع اللي صار اخر مرة سامحيني عمتي..
شبحت مغليه للباقه وقالت:طبيعي ولاصناعي!
صدمها السؤال بس مع هذا سايرتها وقالت:طبيعي..
خدت مغليه الباقه وقالت؛مرة تانيه نتفاهم اني وامك ياأميمه لو عاودتي كلمتيني بقلة أدب..
بلعت اميمه ريقها وابتسمت بتصنع وقالت؛مش حيكون في مرة تانيه عمتي...وجتها وباست ع راسها..
ومغليه ساكته..
وخرت عنها وقالت؛بنمشي نروح بعمر من المطار..
مغليه؛بري..ولفت فتحت باب دارها وخشت وخبطت الباب في وجه اميمه..
غمضت عيونها وهي تحاول تهدي نفسها بعدين فتحتهم وقالت بهمس:الصبر..
ومشت طلعت من الحوش...
☘ومن ترضية الأم..لترضية ولدها..
كانت اميمه مقعمزة في المطار تراجي في عمر يطل..
وفيدها باقة ورد تانيه تختلف عن باقة مغليه شويه..
وعيونها ع المكان اللي بيجي منه...
شويه وبان عليها بس ماكانش بروحه..
معاه مضيفه مش متججبه..
وتبان جميله وملفته هلبه..
تهدرز هي وعمر وتضحك معاه ويبان جو عمر رايق ع الآخر..
زيها زي أي مراة تحب راجلها بتغير عليه..
بس حاولت تتمالك نفسها وتتصرف بعقل..
استناته يكمل كلامه معاها قبل..
وقلبها والعه فيه النار..
دقايق..
والبنت مشت وعمر جي بيمشي جو عيونه عليها تفاجئ هلبه..
هي ناضت وقفت وقعدت في مكانها.
تشوفله بإبتسامة مجامله خفيفه...
اما هو فرحاته شوفتها تستقبل فيه أكبر فرحه..
مشالها طول..
ولما وصل فيها قال؛كيف عرفتي امتى مروح؟
اميمه بإبتسامة:حمد لله ع السلامه..
عمر؛الله يسلمك...جاوبي كيف عرفتي!؟
اميمه؛سألت وعرفت..
مدتله الباقه وقالت..ان شاء الله تعجبك..
هو خداها منها وقال:اللي تجيبيه انتي يعجبني ان شاء الله ربطة فجل..
يدوب ابتسمت وقال:باهي هيا..
شد يدها وقال؛اميمه خيرك!
اميمه بتعجب مصطنع:ماخيرني شي!
عمر:اميمه مضيفه عاديه زيها زي اي حد يخدم هني..
اميمه ضحكت وقالت:لاماتخافش مانفكرش زي ماانت تفكر..عندي ثقه فيك..
هو بدون مايحسب حساب لشي جابها لقلبه وقال:اسف.
اميمه بصدمه:عمر تحشم شن هدا الناس تتفرج!
عمر:مرتي طز فيهم..
اميمه:مرتك في الحوش مش هني..
وبعدت عنه..
هو شد يدها وقال:تعرفي الايام اللي فاتوا نحساب روحي نموت اللي حتى صوتك حرمتيني منه..
وهي تشوفله بطرف عينها قاومت ضحكتها وقالت:باهي هيا هيا..
هو ضحك ومشي هو وياها..
وقعد طول ماهما ماشيين يتغزل فيها وهي مكتفيه بالابتسامه..
☘☘☘☘☘
"كان هدا خليها غدوة وخلاص بيبو"
طوبى:لا يوم الثلاث نقول لأريج تاخدهم منك وتجيبهم هما والطورطه اللي حجزت فيها..
"أريج..!باهي باهي..مالا نخليك توتي روحك للحفله"
طوبى بإبتسامه:صحيتي روفي..
"ماعنديش فيه جميل ياهبله باي"
طوبى وهي مبتسمه:سلام...
وسكرت..وشافت عند رجلها لقت بينكا داعب بيها ..
ضحكت طوبى وقالت:موليه دحناسه هلبه..ولت استاحشتي صغويرتك..خدتها وقامتها..حست انها رزينه شويه..
طوبى بدهشه:حي! حامل ياحلوة..ياعمري كيف مالاحظتش!
وقعدت تمسح ع ظهرها وهي تقول..سامحيني بنكوشه لهيت عنك..
ومشت بيها بش تشوف جرينيا وبناتها..
وقفت عليهم وقالت:سامحوني..جولي خدي وقتي كله...
قعمزت لوطا وحطت بينكا في حجرها وقالت بحزن..تعرفوا بنياتي..قلبي واجعني عليه هلبه..مش عارفه شن عاش وشن شاف وشن قاعد يحس..مازعلتش منه انه درق عليا ع قد مازعلت عليه...ربي يقدرني ونساعده يشفى وينسى اللي صار معاه...حتى لو ماقدرش ينساه معاش يأثر فيه زي قبل..
قعدت تمسح ع بينكا وهي تفكر في الجالي بحزن...
بعدين حطتها ع الارض وقالت:خل نوض نشوف الغدي كان طاب نطفي عليه ونبدا نوتي روحي.
وناضت بسرعه ومشت طلعت من الدار..
☘☘☘☘☘
"خيرك مسكرة تليفونك؟"
آلاء:الضي هارب علينا من امس في الليل وهدا وين جي حطيته في الشحن وفتحته..
"لاحول ولاقوة الابالله..ازمة الضي ازمه"
آلاء:بالذات عندنا حني اللي حتى مولد مانكسابوه..
سكت شويه بعدين قال..
"الهديه حسيتها ماعجباتكش"
آلاء:بصراحه ماكانش ليها داعي طارتلي منها النيه الشنطه هادي..
"توقعت لما ماشفتش منك ردة فعل..ياستي اني اسف اللي زدت ضايقتك ان شاء نفاجئك بحاجه احلا مرة تانيه"
آلاء:ان شاء الله..
وحاولت تنهي المكالمه بسرعه ونجحت في الشي هدا..
ومشت طول خشت ع الماسنجر ورجعت تقرا في رسايل وليد اللي بعتهم بعد ماسكرت تليفونها..
اغلبهم كانوا صوتيات يعبرلها فيهم عن حبه وعن العذاب اللي عاشه بعيد عنها وقعد يترجى فيها تسيب خطيبها وتوليله
هي تبي تسيب مهند وترجعله بس شافت ان ارتباطها بمهند في الوقت الحالي مرفوض من الكل..
لهدا مش حدير شي لين يكون عندها ضمانات لكل شي..
☘☘☘☘☘
وفي حوش الصيد..
الكناين تلاقوا ع الكوجينه وتقاسموا بين الماعين والشاهي..
اما الحموات..
وحده فيهم ضم في المكان اللي تغدوا فيه بمساعدة بنت خوها..
والتانيه دور ع باقي الحوش وهي تبخر بالوشق وتردد
في تاج الذكر اللي ماباش يطيح من لسانها..
لسانها بقلبها تلقائيا يرددوا فيه...
☘☘☘
قعمزوا شربوا الشاهي مع بعض..
وهي هدرزت معاهم شويه بعدين ناضت من حداهم ومشت للدار بش تقرا سورة البقرة..
☘وهي تقرا فيها..
بكت هلبه وين قرت آية
¤وعسى ان تكرهوا شيئا وهو خير لكم¤
دق باب الدار وانفتح ..
شبحت للي خش عليها وقعدت تمسح في دموعها وسكرت المصحف وحطاته..
سكرت خديجه الباب وجتها وهي تقول:نجاح..
وقعمزت قدامها ع السرير وقالت:شكله الجو مش تمام..
نجاح قعدت منزله عيونها وماتبيش ترد..
خديجه؛عاينتي!.
نجاح هزت راسها وقعدت تبكي..
خديجه بقلق:شن قالولك؟
نجاح ببكي:ورم في الرحم لازم نحوله ياخديجه..
خديجه؛عادي هدا وهلبه داروها وحولوا الاورام وامورهم ولت تمام..
شبحتله نجاح وقالت ببكي:نحول الرحم مش الورم بروحه..
خديجه بصدمه:شني!!
حطت نجاح يدها فوق عيونها وهي تبكي..
خديجه؛غير دقيقه فهميني علاش قالولك حولي الرحم مش الورم بس.
نجاح ببكي:الدكتورة قالت لو حولتيه يولي ويدير نفس المشاكل نحوله خير..
خديجه:اهدي نجاح اهدي وشوفي غيرها الدكتورة هادي مرات تطلع غالطه ولاتلعب عليكم..
نجاح هدت بكي وقالت بإستغراب:تلعب علينا؟!
خديجه ؛ايه توا ولوا يبزنزوا في صحة الناس..تمشي تعايني يطلعوا فيك الف علة ويطلبوا عليك تحاليل مالهاش لزمه ويخلوك ديري عمليه وتدفعي دم قلبك ويتقاسموا الفلوس بين بعضهم...
نجاح ؛بس الدكتورة معرفة عواطف!
خديجه؛حبيبتي في ناس ع خاطر الفلوس باعوا والديهم..
نجاح بضيق:باهي كان مشيت لغيرها واكدت كلامها؟
خديجه؛وقتها امر الله وكان..
هزت راسها وقالت:ونعم بالله..
خديجه:الدكتورة اللي بندلك عليها معروفه هلبه وليها اسم كبير يجوها من كل مكان في البلاد مضمونه وعندها ضمير ومصداقيه..
نجاح تنهدت وقالت:باهي وين تخدم..
خديجه في عيادة******..اني تو نكلمها وناخدلك موعد تمام..
هزت نجاح راسها وقالت:تمام..صحيتي خديجه..
خديجه:سلمك..ناضت وهي تقول..هي اطلعي معاي هدرزي وغيري جوك..
نجاح:لالا خليتي هني شويه بعدين نطلع..
هزت خديجه راسها وقالت:ع راحتك..
بعدين مشت طلعت من الدار..
وخلت نجاح تفكر في كلامها وتتأمل خير...
تنهدت من قلبها وقالت؛ياذا الجلال والإكرام اكرمني بعطاء ليس له حد ولاند..
وفتحت المصحف ورجعت تقرا في سورة البقرة...
☘☘☘☘☘
اللي كانت تقرا في خواتمها طوبى ضمن اذكار المساء..
جهزت نفسها وتراجي امتى يروح الجالي لأن عنده خدمه للعصر فهاليوم ..
لكنه تأخر هلبه في المرواح وهي انشغلت..
قعدت تمشي وتجي في الصالون وهي تقرا في الاذكار وبالها مشغول عليه..
شويه سمعت صوت الباب الخارجي انفتح..
وقفت في مكانها وتنفست براحه..
عيونها ع الباب تراجي فيه امتى يخش..
وخش..
سكر الباب وشبح قدامها شافها..
طوبى بقلق:وينك لتوا شغلتني!..
هو قعد يمرر في نظره عليها مبهور كيف طلعت في القفطان..
البنفسج يزيد فيها جاذبيه..وجمال..
مخليها..زهرة اقحوان بنفسجيه جميله جذابه...
الجالي وهو مبتسم بإعجاب:الله يبارك وخلاص..
غلبتها الضحكه وقالت:باهي قولي خيرك عطلت..
جاها وهويقول:البلاد غارقه وغدران وحاله..
وصل فيها حط يده ع ظهرها وقال:ماوصلت لهني لين خليني ونخليك..وباس جبينها..
طوبى:باهي رديت عليا لما كلمتك!
وخر عنها وحط يده في جيب البالطو طلع التليفون وشافه وقال وهو عاقد حواجبه:طلعت من الاجتماع ونسيته صامت..اسف قلبي..
طوبى:مرة تانيه ركز ع حاجات هادي وفكر ان في عندك حد يراجي فيك..
شبحلها بإبتسامه وقال؛وخايف عليا..
هي بإبتسامه:اكيد مالا شنو..
ضحك وقال:هيا هيا خل نوصلك للصاله هيا..
ضحكت ومشت لعبايتها لبستها بعدين خدت شنطتها..
وهو حط شنطة الخدمه وجاها حاوطهاوقعد يمشي هو وياها وهما يهدرزوا ليت طلعوا من الحوش..
🌸وفي صاله..
كانت طلة طوبى..طلة أميرات بفستانها الجميل المحتشم..
مبهره وملفته للإنتباه وسط الحاضرات اللي كانوا يشبهوا لبعض..تسريحات اخر صيحه وفساتين تظهر اكثر ماتخفي..
ماكانش شكل طوبى ولبسها بس المثيرات للإعجاب..
حتى اسلوبها حلو في الكلام وبشاشة وجهها خلوها تخش قلب كل مايعرفها..
☘وألقيت عليك محبة مني☘
☘☘☘☘☘
وعدا هاليوم...
وجي اليوم اللي بعده..
اللي كانوا فيه عيلة الصيد مدايرين فيه عشي ع سلامة ولدهم محي الدين...
من بعد العصر..
كان حوش الصيد معبي بالناس اقارب وجيران من كل طرف حتى من طرف حوش شنيبه..
يوما الجالي روح متأخر وجاب طوبى بسرعه لحوش بوه..
☘في الجنان..
حطت طوبى الصندوق اللي فيه بينكا تحت شجرة السرول..
وقالت:هني كويس .
الجالي بإستعجال:باهي هيا طوبى رانا اخر الناس..
وهي استعجلت معاه وقالت؛هيا هي..
ومشت معاه وطلعوا من حوش الحاج محمد لحوش الصيد..
هو خش للمربوعه الخارجيه..
وهي خشت للحوش..
وين وصلت في الصاله..
لاقتها نجاح..
نجاح بإبتسامه:اهلا اهلا طوبى..
طوبى بإبتسامه:اهلا بيك نجاح..
سلمت عليها بالخد وهي تقول..حمد لله ع سلامة خوك..
نجاح:الله يسلمك..شن حالك وحال صحتك..
طوبى:الحمد لله شن حالك تاني..
نجاح:الحمد لله..
وخروا عن بعض ونجاح تقول:هي تفضلي تفضلي..
وخشت طوبى للصاله..
ركزوا عليها عمتها واختها سدرة واميمه وخالات الجالي وخديجه..
وحده من خالاتها كانت مقعمزة حدا خديجه قالتلها:وهادي شن وضعها؟
خديجه؛كويسه لتوا مش زي بنت عمها..شوفيها كيف مقعمزة حدا امها ومابتش تنوض من حداها
:وحاطه رجل ع رجل والخشم في السمي.
خديجه؛ع اللي مايعرفهاش.
:شدولها من توا هادي ماتخلوهاش ع راحتها زي مادرتوا للأولى..
وخديجه تسمع فيها وتشوف لطوبى كيف تبوس ع راسها امها وهي تسلم عليها..
زي ماقاعده تشوفلها صفيه وقالت لبنتها:طوبى مهنيه ع روحها..
اميمه بإستغراب:مافهمتش؟
صفيه:شوفي كيف تسلم ع مغليه وكيف تضحك دني في النار لخبزتها..
اميمه:طوبى مش هكي وانتي تعرفيها كويس.
صفيه:ااخ..مش عارفه لأمتى بتقعدي هكي يابنتي ماتعرفيش الناس كويس..
اميمه:امي..طوبى بالذات مستحيل تكون بوجهين هي هكي من زمان..
صفيه:باهي باهي..اني معاش بنقول شي اعرفيها بروحك..
اميمه تنهدت بملل وكلام امها ماأقنعهاش ولاخش راسها..
قعدت بعيونها مع طوبى وهي تسلم ع باقي النساوين لين وصلت في خديجه..
وخديجه وقفتلها وقعدت تسلم عليها بحرارة..
عكس سلامها ع اميمه اللي كان من فوق النفس وهي مقعمزة..
صفيه:اسكتي ياصفيه اسكتي ماتتكلميش..
قلبت اميمه عيونها وحركت راسها يمين ويسار..
بعد سلام طوبى ع حماتها..سلمت ع خالات راجلها..
واخر شي اختها وعمتها وقعمزت حداهم..
سدرة؛اخر الناس!؟
طوبى:والله خدمة الجالي عطلتنا الفترة هادي مشغول هلبه ويعطل في الخدمه يروح بعد العصر..
مطيرة:وتقعدي بروحك غادي!؟
طوبى:عادي عمتي قعدت ماصارلي شي..الايام اللي فاتوا كان عندي عرس..
سدرة:اها عرس اخت صاحبه..
طوبى بإبتسامه:ايه..وطلعت وحطت ع الصور وقالت:شوفوا..
خدت السدرة التليفون وقعدوا يشوفوا في الصور هي وعمتهاا..
مطيره:الله يبارك الله يبارك..
سدرة بضحكه:طلع عليك الساري هلبه..
طوبى بإبتسامه:ايه حتى الجالي عجبه..
🍃وهني خشت نجاة لصاله حوش عيت الصيد..
عيونها جو ع طوبى..
لقتها مقعمزة حدا اختها وتهدرز وتضحك..
يعني اللي عرفاته عن الجالي ماغير شي قاعده ضحكتها ع وجهها هي هي...تبان حقيقيه ومش مصطنعه..
زادت انقهرت..وزادت اصرار ع تنفيذ اللي في راسها المهم تقهر طوبى وتحرق قلبها وتخفي الضحكه عن وجهها ..
غيرت عيونها عنها..
جو في عيون خديجه..
كانت نظرات خديجه ممتعضة..
تجاهلتها ومشت تسلم ع الموجودات..
اميمه لما شافتها خشت شبحت لعائشه لقت عائشه تشوف لنجاة كره واضحه..
غيرت عيونها عنها وشبحت لطوبى..
وفهاللحظه بس طوبى شافت نجاة وقعدت مركزة معاها..
وصلت في مغليه وكان سلامها عليه حار ومغليه تبان فرحانه بشوفتها..
صفيه:ماني عارفه لامتى بتقعد لاصقع فيهم هادي..
ومن جهة تانيه عتيقه قالت لبنتها:عليك حظ عند هالنجاة مع مغليه..
عائشه:تعرف كيف تتعامل معاها..
عتيقه؛وخيرك ماديريش زيها..
عائشه:مانعرفش نافق يام حتى لو حاولت يبان ع وجهي...
عتيقه:هذا علاش هذا حالك..
شبحت عائشه لأمها بطرف عينها..
عتيقه بنرفزة:زيدي اشبحيلي..
غيرت عيونها عنها وهي مبتسمه وشافت لنجاه..
لقتها وصلت في خديجه بتسلم عليها..
ناضتلها عليها وسلمت عليها بالخد وهي تقول:عطيك دعوة في صحة وجهك..
نجاة وهي مبتسمه بتصنع:عمتي قالت تعالي..
وخرت عنها وهي تقول..واني مانقدرش نقوللها لا..
ابتسمت خديجه تصنعا قدام الناس وقالت؛فيك الخير..
نجاة وهي مبتسمه بإستفزاز:تسلمي ديجا..
وطلقتها وقعدت تسلم ع خالاتها بالوحده..
وهي قعمزت وعيونها عليها..بعدين غيرتهم لنسرين اللي كانوا هي ونبيله قارنات الروس ويهدرزوا من اول ماجت نبيله..
🍃وصلت نجاة في طوبى وهي تسلم..
نجاة:هلا طوبى..
طوبى بإبتسامة مجامله وهي تسلم بالخد؛اهلا نجاة كيف حالك وحال الصغار
نجاه:الحمد لله..كيف حالك انتي..
طوبى وخرت عنها وقالت:الحمد لله..
نجاة:لاباين عليك حالك باهي سامنه ومزيانه الله يبارك..
وشافت لسدره رفعت حواجبها وقالت:اهلا..
سدرة وهي مبتسمه؛اهلا بيك..
قعمزت طوبى وهي تشوفلها كيف تسلم ع اختها وعمتها وبعدين كملت سلامها ع الباقي..
☘☘☘☘☘
"هيا بنبدوا راهو"
يزن؛راجي نخش نجيب تليفوني من الشحن..
:
بسرعه..
فتح يزن باب حوش جده وخش يجري..
وبينكا اللي كانت دور في الجنان شافاته وهو خاش يجري..
بعدين شبحت للباب. ومشتله وطلعت منه..
قعدت تمشي...وتمشي..
فاتت من قدام المطحن بعدين من قدام القهوة..بعدين من قدام المطعم...وقفت تتفرج عليه وهي تشم في ريحة شوا..
شافها ربيع كيف واحد من الزباين كيف واقفه تتفرج..
ناض من مكانه وفيده طرف شوايه وجاها بيه وحطه قدامها وهي يقول:هي خودي..
هي طول خدت الشوايه ومشت بيها بسرعه خشت للباب اللي يرفع لدروج شقة عبدالقيوم..
خشت منه وركبت الدروج لين وصلت للمستراح فم الشقه..
وقفت غادي وقعدت تاكل..
☘☘☘☘☘
"نبوك تحضري انتي وكناينك ياحاجه"
مغليه:بإذن الله..
عائشه:اني ياخالتي جازيه نبيك تعفيني..
:لا ياعويشه مانعفيك من ليلة السهريه مافيها موزيقا يابنتي دربوكه بس..
نجمه؛معاش عندك سبله ياعويشه..
عائشه بضحكه:خلاص نجي ان شاء الله..
مغليه؛جازيه نشبح معاك كناينك كلهم ماعدا مرت عيسى؟
بأسف ردت تقول؛لاخلاص مرت عيسى معاش ولت مرته..
اغلب الحاضرات صدمهم الكلام..
صفيه؛خيرهم!؟
تنهدت وقالت؛ماتفاهموش وطلقها..
مغليه؛شن السبب..
:قال ماتقعدش في الحوش بكل يومك وتاليك في حوش ماليها وتقعد عندهم باليومين وهاملاته هلبه..
خديجه؛بالك حامل وتتوحم!؟
:لالا حامل لاشي تقول امي تعبانه وبوي ماعنداش من يخدمه..
مغليه؛كيف وولاده ونساوينهم..!؟
:والله منين مشينا نطيروا في السو ع امها لقيناهم زي خلية النحل مش مغيبات جهد..ياحنه تبي تقعد في حوش بوها ماتبيش تتحمل مسؤوليه..
مغليه:لاوحده زي هادي تستاهل الطلاق علاش متزوج!؟
نجاة:مفروض خدي عليها ورباها..
مغليه؛ايه والله تستاهل ياخد عليها مراة ديما برا حوشها هامله حوشها وراجلها وواجبتها تساهل ياخد عليها ويربيها..
اميمه قعدت تشبح لمغليه بطرف عينها..
وخديجه تشبحلها هي برفعة حاجب..
:لاياخد عليها لاتاخد عليه هونا طلقها وكل حد مشي ع حاله..
خديجه:بنوت هالوقت ياخالتي جازيه يحسابوا الزواج طلوع ودهوير وحبني ونحبك ماليهم زوجوهم قبل ليربوهم..
مغليه؛صدقتي..
عائشه وطوبى قعدوا يشبحوا لأميمه..
وسدرة ومطيره حسوا انهم يلقحوا بش مش عارفين ع مني..
اما صفيه طول حست ان بنتها هي المقصودة بكلامهم قعدت تحرق في روحها من داخل تبي تعرف علاش يقولوا هكي شن اللي صاير بينهم وبين اميمه وهي مدرقاته عنهم..
واميمه وهي تمرر في نظرها بين مغليه وبنتها قعدت تفكر إلى مدى ممكن يخلوها تتنازل بش تكسب رضاهم وتحافظ ع زواجها...!؟
☘☘☘☘☘
واقف قدام مراية المدخل..
لبس طاقيه الصوف ع راسه وساواها كويس..
بعدين طلع السبيدرو متاعه ولبسه..
ومشي للباب وفتح وطلع..
لما طلع..عيونه جو ع قطوسه راقده في الزاويه..
منظرها جميل ولطيف..خلاه يبتسم..
هي ناضت فجاة..
يحسابها بتهرب..لكن اللي داراته فاجئه طول خشت للشقه..
ضحكت بتعجب ولحقها وسكر الباب..
رمي من رجليه وقعد يمشي وراها..
عبد القيوم؛وين تبي الهانم !؟
والقطوسه قعدت تمشي لين خشت لداره اللي كانت دافيه خدت تركينه ورقدت..
هوضحك..
ومشي قعمز ع رووس صباعه قريب منها وقال:تبان قطوسة حوش..زعما رايحه من حد؟
مد يده ومسح عليها..
وهي مستمرة في النوم..
حول يده وقال:زعم نطلع ونخليها ولانقعد معاها!؟
تنهدت وقعمز حداها وهو يقول؛قعمز حداها لين تاخد غايتها في النوم..بعدين ناخدها معاي وندور ع صحابها..
قعمز ع الارض وحول الطاقيه وطلع تليفونه وقعد لاهي بيه..
☘☘☘☘☘☘
"هدا امتى"
طوبى:امس واولامس..
خديجه وهي تشوف في الصور:كسوة وحفله..
طوبى بإبتسامه:ايه..
خديجه؛تجنني في الساري مش عاديه..
نسرين:جيبي خل نشوف.
خديجه:غير اصبري..وقعدت تفوت في الصور لين وصلت في صور الحفله خديجه بدهشه..الله!القفطان مش عادي!
سدرة:هي مخلياته حلو..
شبحتلها خديجه وابتسمت.
وسدرة ردتلها الابتسامه مجامله..
اما طوبى فكانت تشوف لأختها بإبتسامة حب..
ونجاة تشبحلها بنظرات كره..
جت نسرين لخديجه وقعمزت جنبها وشافت الصورة وقالت:الله يبارك الله يبارك..
نجاة:سهفتونا نبوا نشوفوا حتى حني..
شافتلها خديجه بعدين رجعت شافت للصور وهي تمرر فيهم..
اميمه؛سعدودك لاقيه وقت تطلعي فيه وتمشي للعراس..
خديجه؛قصدك مش ماشيه لعرس عيت قاجا؟
اميمه؛لابنمشي يوم الخميس بس..
شبحتلها خديجه شويه بعدين رجعت تشوف للصور  وهي تهز في راسها..
نجاة:مابعدكم الدكاترة ماتلقوش وقت تعيشوا فيه حياتكم..
ابتسمت مجامله وهي تشوفلها..
سدرة:ربي يعاونك اميمه..
اميمه:تسلمي سدرة..
مطيره:ايه والله خدمتكم مش ساهله وباهي اللي طحتي في راجل وعيلة يقدروا في ناس توا متخلفين وهمج ياخدوها دكتورة وبعدين يقعمزوها في الحوش سحيقه تسحق جرتهم.
خديجه معاش ركزت ع الصور قعدت منتبهه لكلام مطيره..
ونجاة حست ان مطيره تلقح في الدوة..
نسرين:قداش عجبني قفطانك من وين واخدتيه..
طوبى بإبتسامه؛من ****** ذوق الجالي هو خداه اني ماكنتش ناويه نشري بكل عندي مانلبس للحفله بس هو سكر راسه وخداه..
خديجه؛يابختك ياطوبى والله الجالي مافيه منه في الكرم والدلع..
نسرين؛مش لأنه خوي بس يده سخيه هلبه..
نجاه:واني نشهدله..
شبحولها..
وطوبى ركزت فيها..
نجاة:لما يطلع الصغار بش ياخدلهم حوايج يشري باللبستين والثلاته ومن احسن شي..
سدرة:ربي يجعله في ميزان حسناته..
نجاه بإبتسامة مجامله:آمين..
وخديجه تشوفلها بحده..
نجاة تجاهلت نظراتها وقالت؛نجي حداك نتفرج نسرين..
نسرين:تعالي..
ومشت ناضت قعمزت حداها وهي تتفرج ع الصور..
وطوبى مركزة عليها..
لاحظت لمعة الدموع في عيونها وهي تتفرح وفي شي من الغيظ واضح في عيونها...
🍃هذا كله وهما مقعمزين في تركينه بروحهم في الصاله بعد عن سمع ونظر باقي الموجودات..
☘☘☘
آذن المغرب..
وطوبى خدت الإذن بش تمشي تشوف قطوستها بينكا..
روحت لحوش شيابينها وخشت لقت الباب مردود خشت..
شافت الجالي مقعمز وحداه سدرة بنت خوه يشوفلها في  الآيباد متاعها..
طوبى بإبتسامه؛السلام عليكم.
ردوا سدرة والجالي وهو لاهي:وعليكم السلام..
قدمتلهم وقالت؛خيره؟
سدرة؛يستاكا مش عارفه خيره..
الجالي:منزله حاجه فيها فايروس لعبلك فيه..
سدرة:قصدك خلاص عمو فسد؟
الجالي:لالا راجي شويه..
وطوبى مشت وخلتهم وهي مبتسمه..
توجهت للشجره المحطوطه تحتها بينكا..
وين وصلت في البوكس شافاته مالقتهاش..
قالت؛وين مشت؟..
وقعدت دور في الجنان...
درات عليه كله مالقتهاش..
وصلت فيهم وهي تقول بخوف:حي عليا ياجالي بينكل مهناش!؟
شبحلها وقال:بالك خشت داخل..
طوبى:ماتخشش داخل من غيري ياالجالي.
سدرة؛تو ندورها داخل..ومشت خشت تجري..
وطوبى لحقتها وهي في قمة القلق ع قطوستها..
قلبوا الحوش هي وسدرة ومالقوهاش..
طوبى حست قلبها بيوقف..طلعت تجري للجالي ونقوله وهي ترعش؛ماهناش مالقيتهاش جالي وين مشت وين !؟
الجالي ناض وقف وهو يقول؛دورتوا كويس؟
سدرة بقلق:ايه عمو في كل الحوش مهناش.
طوبى؛حي عليا كان ماطلعت وضربتها سيارة ولافي حد خداها ودارلها حاجه..
وبدت تبكي..
الجالي:لالالا طوبى..لا..
وجاها وخداها لقلبه وهو يقول:بطلي بكي تو نطلع نشوفها بالك عند الصغار يلعبوا عليها برا..
بعدت عنه وهي تقول بفجعه؛حي لا..حامل ياجالي حامل شن يلعبوا عليها هادي!..
غلباته الضحكه وهو بيدير روحه متأثر قال؛حامل!..
طوبى ودموعها ينزلوا؛تضحك ياجالي!..
الجالي:اسف ياقلبي مش قصدي..سدرة خودي..
خدت سدرة الآيباد..
وهو قال:طالع ندور عليها وتو نلقاها ماتخافيش..
ومشي بسرعه طلع من الحوش وهوشاد ضحكته..
وهي تبكي من خوفها على بينكا..
سدرة؛تو يلقاها معاش تبكي..
طوبى هزت راسها وهي تساير في سدره..بعدين مشت قعمزت ع كرسي في الجنان وقعدت تراجي ع نار ودموعها ماوقفوش..
☘برا..
الجالي طلع للصغار كانوا يلعبوا برا في "البوبجي"
سألهم...
شباب..
ماحد فيهم دوره..
الجالي بصوت عالي:هييه انت وياه!!
انفجعوا كلهم وشبحوله..
الجالي:شفتوا قطوسه لونها ابيض في الرصاصي وفيها بقعه لونها بودري.
كلهم حركوا رووسهم بالنفي..
هو مرر نظره عليهم وقال:على شن تندروا انتم..
ومشي وخلاهم..
هما طلعوا رجعول للعبهم..
وهو مشي لنضال في القهوة قعد ينادي:نضال..نضال..
شويه وطلع نضال وهو يقول:ايوه..
الجالي:ماشفتش قطوسه طوبى!؟
نضال بضحكه:وين بنشوفها!؟
الجالي:قلبت عليها الدنيا مالقتهاش شكلها طالعه من الحوش اشبح وين مشت..
نضال مط شواربه للاسفل بعدم معرفه..
الجالي بضيق :تي غير وين خدت وجهها المراة خليتها تبكي..
نضال شد ضحكته..
هو قعد يمرر في نظره ع الطريق ويقول:المشكله حامل هي..
نضال:اوو مبارك مبارك مبارك..نبوا الزرده والله مادخلي فيك..
شبحلها الجالي وهو معكرش وجهه وخبطه ع كتفه بقفا يده وهو يقول:القطوسه ياراجل.
ومشي من حداه ..
ونضال قعد يضحك عليه..
بعدين التفت ع الزباين اللي مقعمزين في القسم الخارجي من القهوة وقال:ياعيله اعيروني انتباهكم..
شبحوله كلهم..
نضال:قابلتكم قطوسه حامل!؟
كلهم قعدوا يشبحوله بنظرات مريبه..
هو مرر نظره عليهم وقال:ماقابلتكمش تمام..تابعوا تابعوا..صحتين..وسلمكم هدرازين.
ومشي طول خش داخل..
والزباين بين اللي يضحك وبين اللي يعلق عليه..
🍃والجالي قعد ماشي ويدور واللي يلقاه مقعمز في الشارع يسأله..
ع جية لطفي..
شافه حايس ومرتبك استغرب..
جاه وهو يقول؛جالي..
الجالي التفت وشافه بعدين قال:عمي لطفي شن حالك؟
لطفي:الحمد لله انت شن حالك نشبح زي اللي حايس ان شاء الله خير..
ضحك الجالي وقال:قطوسه بنتك ياعمي طلعت من الحوش اشبح وين مشت وهي دايرة ع خاطرها مناحه..
ضحك لطفي وقال:ماتروحش قبل تلقاها ولا بتقعد منكدتها عليك..
الجالي:تي غير وين بنلقاها!؟ والله قريب نطق ع حياش الشارع حوش حوش..
☘فهالوقت..
طلع عبد القيوم من الشقه وهو قايم القطوسه في حضنه ويقوللها:تو كيف  بنلقوهم صحابك!؟ مافيش غير اني نعطيها لنضال يحطها عنده في القهوة واللي يفوت من قدامها يشده ويسأله عنها..ولابالك صاحبها يدور فيها يلقاها عنده...
وصل لوطا..
وطلع من الحوش..
شافه لطفي وعيونه جو بينكا وهي فيده..
لطفي:هويناه..
التفت الجالي شافها عند عبد القيوم ماشي بيها للقهوة..
احتدت ملامح وجهه ومشاله طول..
الجالي:هيي ياانت هييه..
وقف عبد القيوم لما سمعه يتكلم بصوت عالي ماكانش يحسابه يكلم فيه هو..
لين جاه وقف قدامه وقال:شن دير عندك؟
رفع عبد القيوم حواجبه وقال:اها ليك هي.
الجالي:جيبها..وشدها بياخدها منه..
طلقهاله وهو يشوفله بإمتعاض..
الجالي:وين لقيتها؟
عبد القيوم:يالا شقتي..
الجالي هز راسه وقال:خشت لحوش المهدي...ان شاء الله ماعطيتها شي..
عبد القيوم:لا..
الجالي:كويس لأن مش أي شي تاكله وتشربه..مربيه هادي مش متاع شوارع..
عبد القيوم قعد يشبحله وهو ساكت..
الجالي:ع كل حال..صحيت..
ولف ومشي بيها للحوش..
وهو قعد واقف في مكانه يتبع فيه بعيونه وتخيل روحه يضرب فيه ضرب يرقده...
ع جية لطفي وهو يقول:وين لقيتها؟
شبحله وقال بإبتسامه:والله هي اللي جتني..
ضحك لطفي وقال:لبنتي هادي كان مالقوهاش راهو اشبح شن صار فيها..
عبد القيوم:ربي يحفظها لكي..هي تعدي للجامع المغرب قريب..
لطفي:خل ندير دورة ع المطحن ونجيك..
هز عبد القيوم راسه وهومبتسم..
ولطفي قص الطريق ومشي للمطحن..
🍃"بينكا"
الجالي بضحكه:غير بالشويه..!
هي خدتها لحضنها وقعدت تمسح عليها وهي تقول:وين لقيتها؟
الجالي:واحد لقاها وجابها..
طوبى:ياعمري...
سدرة؛قلتي حامل بتجيب قطوسات صغيرات؟
ابتسمت طوبى من بين دموعها وقالت:ايه..
سدرة:وقطوساتها اللي زمانها وينهم؟
طوبى:خليتهم لسدرة اختي تربي فيهم..
سدرة؛باهي هادم تعطيهولي اني نربيهم؟
طوبى بضحكه:نعطيك وحده منهم..ونعطي جوري وحده حتى هي..
لما جت سيرة بنت نجاه تعكرت ابتسامة الجالي..
سدرة بإبتسامه:بنسميها هريرة متاعي..
الجالي بضحكه:هريرة!؟
سدرة؛ ع قطوسة ابو هريرة ماتعرفاش!؟
الجالي وهو يضحك:لا نعرفه نعرفه..
طوبى بإبتسامه؛حلو..باهي ياأم هريره نخلي عندك بينكا لين نروح..
سدرة بحماس:ونحطها في عيوني.
الجالي:اه منك ياام لسان..
طوبى بضحكه:يقطر عسل..خلاص سوسو بنخليها ردي بالك منها باهي..
سدرة:حاضر..
وخشت طوبى ببينكا داخل حوش عطتها ماتاكل وتشرب في الكوجينه..بعدين ردتها للبوكس متاعها ومشت بيها لدار المعيشه وسدرة معاها..
خلتها حداها..ومشت ركبت لجناحها توضت وصلت المغرب..
وبعد الصلاة..طلعت ع الفيرندا دارت طلة ع ورد متاعها لقاته في احسن حال.
طوبى بإبتسامه:شكلها عمتي راده بالها منهم..
غيرت عيونها عنهم للسمي وهي تشوف في نص القمر..
ابتسمت..بعدين ولت وخشت داخل..
☘☘☘☘☘
الساعه 10:30ليلا.
روحوا مغليه وكناينها للحوش..ونسرين قبلهم كانت مروحه لحوشها..
خشوا للحوش ومغليه تقول؛والله عمك لو يعرف انك وصلتي هني وماسلمتيش عليه معاش يعرفك بكل..
نجاة:ليل ياعمتي كيف بنروح؟
مغليه:يروح وراك واحد من الولاد شن أول مرة؟
تنهدت نجاه وقالت:باهي..
وطوبى واميمه كانوا مضايقات ع الآخر..
☘وين خشوا للحوش..
لقوا محمد شنيبه مع ولاده في الصاله..
المهدي وعمر والجالي..
خشوا عليهم وهما يقولوا:السلام عليكم..
الجالي لما شاف نجاه تبدلت ملامح وجهه للحده وهو عاقد حواجبه وقعد يشبح للتلفزيون..
ونجاة وهي تشوفله قلبها فر فران كانت مشتاقتله هلبه ومستعده تنسى اللي داره كله لو يشوفلها بنظرة رضا..
اما المهدي وين شاف نجاة بدت ع وجهه ملامح الغضب وبدي يهز في رجله بعصبيه..
كيف تتجرأ ودير عكس ماطلب منها وتجي للحوش!؟
محمد شنيبه:غير من وين زرقت الشمس اليوم..نجاه جتنا..
ضحكت بإحراج ومشتله وصلت فيه وقالت:كيف حالك عمي..وباست ع راسه..
محمد؛كان يهمك حالي  راك جيتي شفتيني..خيرك يابنتي مادرتيهاش من قبل تبعتي في صغارك بس..شفتي شي ضايقك سمعتي كلمة وجعاتك..راك عندي بمكانة خديجه ونسرين..
طوبى وهي تسمع في كلامه ليها حست بضيق شديد سببه مش واضح بالنسبه ليها..
اما اميمه فكان سبب ضيقها من كلامه واضح وعيونها يراقبوا في الجالي وتعابير وجهه..
مغليه:والله قلتلها نفس الكلام ياحاج..
نجاة؛سامحوني بالله عليكم بس الفترة هادي انشغلت ومالقيتش فضوة..
محمد:مالا فضي روحك الخميس هدا نبيكم كلكم تباتوا هني حتى اللي يسكنوا فوقنا نبي لمات يام زمان بالذات في الشتي..حتى نسرين وخديجه نبيهم بصغارهم يباتوا هني..
مغليه:من الاربعا يجوني نجاة وطوبى بش تمشوا معاي لعرس عيت قاجا..
نجاة؛اني اعفيني عمتي..
مغليه:لالا ماتناقشنيش بتجي وتقعدي..
نجاة ابتسمت بقلة حيلة وقالت؛حاضر..
الجالي ناض وقال:هيا طوبى.
مغليه:اقعدوا باتوا..
الجالي:ماهو بنجوا نباتوا يوم الاربعا يام..هيا طوبى وتي روحك...
طوبى:سدرة وين..
المهدي:مع القطوسه في الدار راقده جنبها..
طوبى بآبتسامه:ياروحي..
محمد بضحكه؛حكتلنا كيف راحت اليوم وكيف قعدتي تبكي..
الجالي بضحكه:دارتلي مناحه..
قعدوا يضحكوا عليها وطوبى تضحك بإحراج وعيون نجاة عليها..
ع خشة سدرة وهي تقول:روحتي مرت عمو..القطوسه قعدت راقده معاش ناضت..
طوبى:ايه الفترة ترقد هلبه..
سدرة:ع خاطر حامل!..
طوبى زادت انحرجت..
وكلهم قعدوا ساكتين واغلبهم شاد ضحكته..
سدرة قعدت تمرر في نظرها عليهم بإستغراب.
وبوها قال:عايشه روحت طول؟
مغليه؛طلعت مع امها قبلنا مامشيتش لشقتك؟
المهدي؛لا..ناض وقال..هيا سدرة بابا..
سدرة؛هيا تصبحوا ع خير..
محمد بضحكه:قدامك كل خير..
وهما ردوا؛وانتي من اهله..
المهدي؛تصبحوا ع  خير..
وفات من قدام نجاة وهو كاتم غضبه ومشي طلع ببنته من الصاله وهما يردوا عليها..
الجالي:هيا طوبى..
طوبى:لحظه بس..
ومشت طلعت وهو مشي وراها وعيون نجاه معاه..
واميمه تراقب في كل شي..
مغليه:نضال وين؟
محمد؛هو ومحمد ولد المهدي معزومين عند واحد بيحضروا كورة..
مغليه؛معناها عمر يروح ورا نجاة..
اميمه شبحت لعمر اللي طول ناض وقف وهو يقول:مافيش مشكله..هيا نجاة..
نجاة:سامحني بالله..
عمر:وخيتي شن تقولي..
نجاة:بارك الله فيك..مررت نظرها ع محمد ومغليه وقالت:تصبحوا على خير..
ومشت طلعت..
وعمر قال لأميمه:روحي..
هزت راسها وهي تحاول تبان هاديه ع قد ماتقدر وقالت:تصبحوا ع خير..
محمد؛قدامك كل خير.
ومشت طلعت حتى هي..
محمد لمغليه:قعمزي احكيلي شن تحكي بنتك ع حالة راجلها حسيته زي اللي مايبيش يدوي هلبه قدام الناس..
قعمزت مغليه وقالت؛ماتخافش عليه حاله باهي..
☘وبرا..
طلعت نجاة لسيارتها ..
ركبت قعدت تراجي في عمر يطلع بسيارته من القراج..
شافت الجالي طالع مع مرته وهو شاد بوكس القطوسه..
حطها في الخلف..
وركبت طوبى من القدام بعدين هو ركب وشغل السيارة وتحرك..
طاحوا دموعها..وطول مسحتهم..
ع طلعة عمر من الحوش بسيارته..تحركت طول وهو لحقها..
☘☘☘☘☘☘
تاني يوم...
الثلاثاء..
كان الجالي لتالت يوم ع التوالي عنده خدمه لبعد العصر وهالشي كان لصالح طوبى..
بش تجهز فيه مفاجئتها ع راحتها..
قبل العصر بشويه..
جتها اريج للحوش جايبه معاها التورته والهدايا مغلفات كيف ماتبيهم طوبى..
قعدت معاها شويه عاونتها في التجهيزات بعدين مشت روحت..
🍃ومع المغرب..
كان الجالي واصل للحوش بسبب الزحمه الطريق المسكرة بالغدران..
خش للحوش وهو تاعب يبي يرقد..
تفاجئ..
بالحوش المظلم ماعدا الاضواء الخافته المفتوحه..
فجأة..
اشتغلت اغنيه..
"سألتك حبيبي لوين رايحين"
استغرب وقعد ينادي:طوبى..
ومشي..
تعثر في حاجه وقف..
كان بوكس صغير مفتوح وفيه ورقه..
ابتسم بإستغراب وطبس خداه طلع الورقه وقراها..
(متأكده انك ناسي بس عادي اني نتفكرلك.
برا لدار المعيشه عندك فيها حاجه)
الجالي ضحك وقال:والله حق ناسي بكل..شفت التاريخ الف مرة اليوم وماجاش في بالي..
ومشي طول لدار المعيشه..
كان ضيها مفتوح..
خشلها وشاف بوكس محطوط ع طاولتها..
مشاله..
حط شطنته ع الطاوله وفتحه..
لقي فيه لبسة وفوفها ورقه..
ابتسم..وخدي الورقه قراها..
(ان شاء الله تعجبك..البسها)
ضحك وقال:تمام..
حط الورقه وبدي يطلع في اللبسه بالحاجه..
الجاكيت اللي كان لونه سماوي..
وقميص ابيض وسروال جينز لونه بترولي..
عجباته هلبه..
بدل حوايجه..
بعدين طلع وقف ع  مراية المدخل..
قعد يمشي ع شعره الخلف بصوابعه..
ويساوي في الجاكيت..ابتسم وهو راضي ع طلته اللي كانت ناقصتها حاجه وحده بس..
رجع خش للدار..وخدي شنطه وطلع منها شيشة العطر متاعه..
وحطه منه هلبه وبعدين رده للشنطه..
ومشي طلع من الدار متوجه للصاله والابتسامه مافارقتش وجهه..
وين وصل فيها..
وقف متفاجئ..
لما شاف عرض بروجكتر ع واحد من الحيوط..
كانت في بدايته صورة لبديه وهو في عمر السنه لما شافها ضحك بصدمه وقال:وين طاحت فيها هادي!.
وبدي العرض بروحه يشتغل ع اغنية..
"كل سنة وانت طيب"
ويمروا قدامه صور ليه في مراحل عمره الاولى هو ناسيها بالمرة..
وكل مايشوف صورة يقعد يضحك..
فجأة وطي صوت الأغنيه..
وخش عليه صوت تسجيل..
ليه هو وعمر  وهما صغار..
"هي قول حاجه"
"شن بنقول..باهي قول انت"
"ترا شن تاريخ اليوم قول فيسع بيخش علينا مهدي"
"مانعرفش"
"شن تعرف انت..اليوم التاريخ11|11|1995"
"صوت المهدي نوض فيسع"
"دقيقه هادي بس..نزلت للبحر تتشمس الحلوة"
"شن ديروا هني انت"..
ووقف التسجيل..
والجالي حط يده ع عينه اليسار وهو مغمض عيونه الزوز ويضحك..بعدين قال..تي غير وين طحتي فيه العار هدا..
وقعد يمشي العرض...
صورة وهو في الاعدادي..بعدين في الثانوي..وفي الجامعه..
وصورة من حفل التخرج..
واخر شي مقطع فيديو للقاء دارو معاه في وحده من الفعاليات اللي اقيمت في العاصمه تخص مجاله كانت سنه 2014..
قعد يتفرج عليه وهو مبتسم لين تم..
وختام العرض كان صورة ليه هو وطوبى من عرسهم..
انفتح الضي كله متاع الحوش..
هو قعد يدور فيها..
شافها جايه وهي لابسة فستان لونه سماوي ومزينه راسها بكارونه بيضا كلها لولي..وفارده شعرها..
طالعه وكأنها أميرة من اميرات الحكايات...
جاياته وهي تغني..
🌸عندي ثقة فيك عندي أمل فيك
بيكفي شو بدك يعني أكتر بعد فيك
عندي حلم فيك عندي ولع فيك
بيكفي شو بدك أنو يعني موت فيك