طوبى الجزء الاول

الجزء الثاني والأربعين

(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_الثاني_والأربعين"ع خاطر الياسمين1"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
الساعه 1:00ظهرا...
في احدي المصحات القريبه من المنطقه الموجود فيها شارع القهوة..
دكتور اياد بإبتسامه؛لاالحمد لله توا فايقه ومقعمزة تهدرز مع بنت اختها وحالها باهي..
عبد الرؤوف:حرارتها نزلت بكل خلاص!..
اياد بضحكه:ايه الحمد لله اطمن ع الآخر..وبرا شوفها يش تطمن بروحك..
عبد الرؤوف:لاخليها توا مع بنت اختها براحتهم..تو نمشي ناخدلها مايقويها..
اياد؛ماكله مش لازم المصحه موفره كل شي تبي تجيب عصائر جيب ونفضل تكون طبيعيه يعني فواكه مضروبه في الخلاط..
عبد الرؤوف بإهتمام شديد:وشن تاني دكتور..
اياد؛لاهدا بس..ومرة تانيه ردوا بالكم تغيير الجو بين برا الحوش وداخله..بردة الصيف اقوى من بردة الشتي..
هز راسه وهو مضايق قال:حاضر..بارك الله فيك دكتور تعبناك وانت ماشي جاي تشوف..
اياد بضحكه:عيب ياراجل رانا جيران حتى كان طلعت من الشارع نقعدوا جيران..
ابتسم عبد الرؤوف وقال:ربي يحفظك..هي السلام عليكم..
إياد:وعليكم السلام..
ومشي عبد الرؤوف واياد ومشي يشوف في الحالات..
☘☘☘☘☘
"خودي هادي اللعبي بيها"
مشتدة وهي تشوف لصندوق الموسيقى قالت:كيف؟
تاله بضحكه:حطيها هكي قدامك..وافتحيها هكي واسمعي..
وبدت مشتده تسمع في الموسيقي..وانسجمت معاها تماما..
وتاله تتفرج عليها..
ع خطمة فايزة بتمشي للكوجينه..
شافتهم ابتسمت..
فرحانه بتغير العلاقه بين تاله وجداها بدت تعامل فيها كأنها بنت من عمرها تشارك فيها في كل حاجاتها...
وولوا احب الناس واقربهم لقلب مشتده مطيره وتاله...
خلتهم فايزة ومشت للكوجينه..
لقت صفاء واقفه دير في السويسرول...
فايزة:غير كان تخشي تقري يابنتي..
صفاء وهي مشغوله؛هادي راحتي من القرايه ياماما تعبت واني نقرا..
فايزة بضحكه؛باهي براحتك..
صفاء:ماما كان تقولي لخالتي سدرة يجوا يسهروا عندنا الليله..
فايزة:قلتلهم يجوا بكري قالوا مرات نمشوا لغرفه..
صفاء:اها...
☘وفي حوش لطفي الواعر...
في الكوجينه...
حطت موس الخضرة وتأففت بضيق وقالت:أستغفر الله..
طوبى وهي تحط في ورق الزبده في الطاجين قالت:خيرك سوسو..
سدرة؛من لما نضت وانا حاسه زي اللي قلبي مقبوض..كلمت بنات اختك..
طوبى:ايه اريج عمل والاء في الحوش..
سدرة؛وفردوس؟
طوبى:وقتها كانت راقده لما كلمت آلاء..
سدرة؛باهي وغريفه..
طوبى:الحق لا لهيت..
سدرة:تو نشوفها اني...
ومشت لتليفونها خداته من فوق المكيرويف...
حطت ع اسم غرفه واتصلت..
☘☘☘☘
اريج: شوفي هدا امس..
غرفه وهي تشوف لتليفون اريج:الله عليك جو محلاه سعدودكم خاطري في البحر..
اريج:شكله روفه غيور هلبه..
غرفه:غيور وسكتي..
فجأة رن تليفون غرفه..
غرفه شافتله وهو ع الكامدينو قالت؛ترا شوفي مني اريج.
ناضت اريج شافت عضت ع شاربها بعدين قالت:خالتي سدرة..
غرفه:مركبه قرون استشعار اختي هادي..
ضحكت اريج..
غرفه؛جيبي خل نرد عليها قبل لتكلم رؤوف وتهزبه..
اريج وهي تضحك خدت التلفون ومداته لخالتها..
خداته غرفه وفتحت الخط وردت..
غرفه؛ايوه سوسو شن جو..
"تمام..شني قاعده راقده؟"
غرفه؛لا والله فايقه..
"شن ديري"
غرفه:اهو نحوس..
"شن فطوركم اليوم"
غرفه حدت جبهتها بعدين قالت:تو بعدين نبعتهولك في صورة ع ماسنجر..
"باهي..بنقولك راهو فكرت نجوك اني وعمتي وطوبى في الليل"
فنصت غرفه عيونها وقالت؛لا حني في الليل طالعين للبحر..
"اها...باهي مش مشكلله غدوة ان شاء الله وخلاص"
غرفه غمضت عينها اليمين وقالت:تطلعوا معانا؟
اريج عضت شاربها وفنصت..
"لالا ماعندنا مانديروا معاكم..هي خليك تكملي حوستك بالسلامه"
غرفه:بالسلامه..وسكرت وهي تقول..خسارة قبل بيجوني..
اريج:وانتي تعزمي فيها يانهارك كان شدت فيك..
غرفه؛لالاعارفتها مش حتمشي معانا..تنهدت وقالت..زي مااتفقنا روجي بالله عليك ماتجيبي سيرة لحد..
اريج؛باهي خلاص نفختي راسي شن هدا..
غرفه بضحكه:تافهه..
اريج ضحكت بعدين قالت؛هي اني طالعه نخليك ترقدي شويه تبي حاجه رني..
غرفه هزت راسها بإيجاب..
مشت اريج طلعت..
وغرفه حطت راسها ع المخده..
وفتحت تليفونها ع تطبيق القرآن وحطت ع سورة البقرة وبدت تقرا...
☘☘☘☘☘
الساعه 6:30مساءا..
"خودي نزلي لحناك"
خدت راما بنت خديجه السفرة ومشت طلعت من حداها..
ع خشت ولدها محمد وتاعب ومال:امتى يذن المغرب!؟
خديجه:مازال ساعه ونص اصبرمعاش قعد شي..
محمد:شن بيفوتهم..
خديجه؛برا ارقد كان هدا..
محمد بملل:عييت من النوم..
ومشي طلع من حداها..
خديجه؛هدا كان يخلوه ع راحته يفطر..
رن تليفونها..شبحتله وهو ع الطاوله..
بعدين سكرت الشيشمه ومسحت ايديها في المرقه ومشتله..
خداته وشافت المتصل ردت..
خديجه:ايوه نسرين..
"ايوه خديجه شن حالك اليوم"
خديجه:الحمد لله شن حالك انتي؟
"الحمد لله..قوليلي روح الجالي.."
خديجه؛ايه روح امس..
"باهي شن صار"
خديجه؛امك قالت قال باهي..
قعدت نسرين ساكته..
خديجه:اسمعي ردي بالك تتصرفي تصرف غلط يانسرين تنسينا اني وامي..
"شن بندير بنشهدر بخوي مانقدرش..ان شاء الله ربي يسامحنا ع اللي بنديروه"
خديجه؛حسستينا انا بنرتكبوا جريمه حني نديروا في خير ونمنعوا في شر يانسرين..
"نتمنى يكون هكي ياخديجه..يارب يكون هكي"
خديجه:ومش حيكون غير هكي...
☘☘☘☘☘
خش للمصحه وهو جايب معاه ماكله ومافي حد قدر يمنعه لأنهم يشبحوا في المسدس اللي لابسه في خصره..
وصل في القسم اللي راقده فيه مرته..
لقي العاملات ينضفوا..
وزع عليهم وجبات..
بعدين مشي بطريقه لحجر مرته..
وصل فيها..خدي نفس..
وفتح الباب..
لقاها راقده..
ابتسم...
خش وسكر الباب ومشي حط الوجبه جنبها..
وخدي كرسي بهدوء وقربه ليها وقعمز..
وفتح تليفونه ع تطبيق القرآن وبدي يقرا..
ويمر الوقت..
والمغرب يأذن..
سكر..وحط التليفون في جيبه...
وخدي من الكيسه حافه فيها بسيسه وتمر..
حطهم فوق طاولتها..
بعدين خدي شيشة الميه وقعمز.
وقال:ذهب الضما وابتلت العروق وثبت الأجر بإذن الله..
وشرب شويه من الميه..
هني هي فتحت عيونها...
تنهدت..وقعدت تغمض في عيونها وتفتح وتشوف حواليها..
لو جو عيونها ع الطاوله فوقها الحافظه..
"صح النوم"
شبحتله...لقاته يشوفلها وهو مبتسم..
ابتسامه حلوة..حره من غير مايشدها ولايمنعها تطلع..
ابتسامه فكرتها بأيام زمان..
ايام المبروك لما كان يلاقي فيا بإبتسامه حب صافيه هي وقتها ماكانتش مهتمه ليها...
بس توا ولت تعنيلها كل شي..لدرجة انها فرحت بيها فرحة لاتوصف..
عبد الرؤوف:شن جو توا..
هي قعدت تتأمل فيه والدموع في عيونها بدون ماتنطق بكلمه..
عبد الرؤوف بضحكه:خيرك الحرارة اثرت ع لسانك!؟
هي قالت بصوت يدوب طالع من النوم:بيكو..
هو رجع شرب من الميه وقال:تنوضي تسايرني في الفطور؟
وهي تشبحله دموعها طاحوا بدون ماترد..
هو تأفف وقال:ايااه علينا عاد..
حط الشيشه ع تركينه وناضلها وقعد يمسح في دموعها بقوة وهو يقول:سكري هالميزاب اللي ديما مفتوح ويصب ع الفاضيه والمليانه سكريه..
غرفه وهي تضحك قعدت وقول:ايه بالشويه وجهي شكرته..
هو فات وجهها ودخل ايديه في الوشاح وقعد يريش في شعرها ويقول..معاش تعلي صوتك..
غرفه؛لالا شعري لا والله نعيط..
طلقها وهو يضحك قال:هي نوضي قعمزي بنطيح من جوعي..
هي قعدت تساوي في شعرها وقلبها يدق بقوة من الفرح مش مصدقه كان اللي عايشاته توا..وهم..ولاحلم..ولاعلم..
قعمز وقال:شربتي العصير كله..
ناضت قعمزت وهي تقول:لاقعد نصه..
هو وقال:وين الشيشه .
كملت مساوة وشاحها وقالت؛في الدولاب اللي جنبك..
هو شافه فتحه وطلعها وطلع معاها طاسه..
غرفه:لاماتصبليش بناكل بسيسه..
هو قال:من قالك ليك انتي..
ابتسمت بإحراج وخدت كاشيك وبدت تاكل في البسيسه..
وهو يصب في العصير وابتسامته ع وجهه..
بعدين حطه ع الطاوله..وقف شويه وحول المسدس حط ع الكامدينو..
غرفه شبحتله بخوف وقالت؛علاش جايبه معاك؟
هو قال:بش نقتلك..
غرفه قعدت تشبحله بريبه..
عبدالرؤوف:هبله..جايبه لإثارة الرهبه والخوف بش يجروا عليك ويخدموك برموش عيونهم الليبين يخافوا ما يتحشموش حاشا القله..
غرفه قعدت تاكل وهي تشبحله..
وهو بدي ياكل بدون مايشوفلها..
شويه وقال:نبي نعرف شن عندك في خليقتي..
غرفه ابتسمت وقالت؛شي..وقعدت تاكل..
كانت متعجبه ومستغربه في تغيره معاها وكانت تبي تعرف هل حيدوم ولا بعد تتحسن يرجع كل شي زي ماكان..
بس اختارت تسكت وتستمع باللحظات اللي عايشتها توا..
وهو شبه عرف شن يدور في عقلها وخلا التوضيح للأيام....
☘☘☘☘☘
ومن بعد ماصارش من السهره في حوش غرفه..
خلوها في حوش فايزة....
🌸فايزة:باهي اللي جيتوا..بالذات طوبى..
ابتسمت طوبى بإستغراب..
سدرة:علاش شن في؟
فايزة؛في موضوع جاي لطوبى..
قلب سدره انقبض..
وطوبى شبحتلها بعدين شبحت لفايزة وقالت:موضوع زواج؟
فايزة؛اكيد..ومن عيله الله يبارك وولدهم ماشاء الله عليه الناس اللي يعرفوهم شكرولي فيهم هلبه...
سدرة؛علاش جو عن طريقك انتي؟
فايزة؛ماهو من زباين المركز طوبى تعرفهم كويس..
طوبى بإستغراب:اني؟
فايزة:ايه العروسه اللي سيبتها وانتي كملتيها عني..
طوبى بعد ماتفكرت؛اها..تفكرتها ايه..
فايزة؛ياحنه عمها...اصغر واحد في عمامها مواليد 86 عندك معرض سيارات في ******* وهو خريج قانون لكن ماخدمش بشهادته قعد يخدم في رزق عيلتهم زي باقي خوته كون روحه بروحه..دار حوشه بروحه كامل ماناقصاته يبرا بسيارته..اموره كلها تمام التمام...وطبعا يشكروا في اخلاقه ودينه لكن عاد انتم زيدوا اسألوا..
سدرة:ومن اللي يشكرلك فيه اخته؟
فايزة؛لا طبعا زباين جوني طلعوا يعرفوهم وشكروا هلبه في الولد هدا..
سدرة؛يعني هو مش شايف طوبى قبل..
فايزة؛الحق الحق قالت البنت شافها لما طلعت اخته من المزين ومات عليها..
طوبى وهي منحرجه؛ماركزتش عليه..
سكتت سدرة وهي تفكر..
اما طوبى برغم التوتر اللي حست بيه فكانت عندها نيه توافق..مش رغبه في الزواج نفسه..بل سبب اصبح جلي ومعروف..
فايزة؛نعطيها ارقامكم البنت؟
سدرة؛عطيها رقمي..
طوبى شبحت لسدرة وهي تفكر في ماسألتهاش اذا كانت تبي تتزوج ولالا..الحركه هادي حسستها ان سدرة تبي تزوجها وتتريح عليها بسرعه...
او ممكن تتريح من همها...كل شي فكرت فيه طوبى وقتها..
فايزة؛تمام..هي سجلي..
وقامت تليفونها وحطت ع رقم البنت..وبدت تمل فيه..
وسدرة تسجل وطوبى تشبحلها ودموعها في عيونها..
ع جية مطيره من دار مشتده..
قعمزت حداهم وقالت؛رقدت..
فايزة:شربت الحليب..
هزت مطيره راسها وقالت:في شن كنتوا تهدرزوا..
طوبى بإبتسامه فيها شي من الأسى:ع موضوع جايني.
شبحتلها سدرة وقالت؛شكلك ماتبيش؟
طوبى حركت راسها بالنفي وقالت:بالعكس..بس زي اللي خفت شويه..
فايزة بضحكه؛طبيعي كلنا خفنا في البدايه..
مطيره:باهي احكولي عنه من هو ومنو عيلته.
وقعدت فايزة تحكي لمطيره..وسدرة مركزه معاهم..
وطوبى تمرر في نظرها عليهم..
حستهم كلهم متحمسين للموضوع ويبوه اكثر منها..
او الدوة اللي كانت تسمع فيها مرارا وتكرار هي اللي شكلت الفكرة في راسها...!؟
في كل حالات هي كانت تبي حتى وان كان مش برغبه حقيقيه..
المهم تريح...لكن ترتاح...هادي تقعد في علم الغيب..🍃
☘☘☘☘☘
الساعه 2:00ليلا..
عبد الرؤوف:هيا هادي بس..بس بس..
غرفه:من بكري تقولي في نفس الكلمه لين لقيت روحي مكمله نصها..
عبد الرؤوف:اهييه عليا اني..تي انتي العادي متاعك وحده كامله..
ضحكت وهي تقول:لا والله مش لهالدرجه اصلا ماعنديش ع الدجاج هلبه..نحب اللحم..
عبد الرؤوف:الدجاج الفايده متاع اكثر..افتحي فمك..
فتحاته بإستسلام ووكلها..
هو التفت قعد يدور في شيشة العصير ويقول:وينها وينها..
غرفه وهي تاكل؛في الدولاب..
عبدالرؤوف؛ايوه في الدولاب..
فتحه وطلعها وقال:بتشربيها مش تقولي اعع مش مصقعه وجو الدلع متاعك..
غرفه؛لاعادي نشرب المهم يمشي اللي علق هني..
وحطت يدها ع أعلى صدرها..
عطاها وقال:اشربي..نمشي نغسل ايديا ونجي..ومشي للحمام متاع الحجره..
غرفه تنهدت وقالت:ياربي خايفه نحسد روحي ع الهني اللي فيه..ووك عليا قلبي..قداش محلاه وقداش حنين وقداش نحبه..وحق ربي ماعرفت نحب في حياتي كان هو..
طلع من الحمام هي دارت روحها تشرب في العصير..
مشي خدي كلنيكس وقعد يمسح في ايديه..
وهي تملي في عيونها منه...
شويه مشي لوح الكلينكس في السله وقال:تبي نفتحلك التلفزيون تكسدي عليه بنتكا شويه..
غرفه:انت بتبات معاي الليله..
اتكا ع الكنبه وقال:ايه دافع قلبي في جناح خاص نبي نبرطع فيه..
ضحكت..
حط ذراعه ع عيونه..
غرفه:ومن بيلم الحوسه؟
عبد الرؤوف:انتي ياغزاله..لاك مكسورة لاك مشلوله بعيد السو نوضي تحركي وساد تنبله..
غرفه بضحكه وقلبها طاير فرح؛باهي..
ونزلت من السرير وضمت الحوسه كلها..
بعدين خدت الكرسي قرباته منه وقعمزت تتفرج ع التلفزيون..
وهو حداها في النوم..
قعدت تشبحله كيف راقد سهفها ترقد حتى هي..
ساوت روحها ع الكرسي وغمضت عيونها وراحت في النوم..
☘في الوقت اللي فيه اختها طوبى..
كانت تصلي في صلاة القيام..وفي كل سجده كانت تدعي الله مايخليها هم ع قلب حد ولاثقل ع حد...
ماكانش فيه ع لسانها غير هالدعاء...
اما سدرة اللي كانت مقعمزه في الجنان تفكر..
خطرت عليها الحلمه وتفسيرها..
(اعطيها لراجل الظاهر متاعه زي الداخل)
باهي هدا اللي جاي لأختها كيف بتعرف داخله؟!..
حتى لو سألوا عنه الناس حتقول الظاهر اللي تشوف فيه..
وممكن مايقولوش الحق درءا للمشاكل..
خدت نفس بعدين قالت:يارب...
رن تليفونها..
خداته من ع الطاوله شافت المتصل ردت..
سدرة:عاش من سمع صوتك ياحنه..
"وخيرك انتي ماتتصليش وتسألي"
سدرة؛لقيت روحي اني بس اللي نتصل وندور اني وعيشه كان كان ماكلمناكم مادوروش..
"عندك اسفه ياستي وسامحيني بس انتي ادرى بوضعي ومشغولياتي..حامد مخلي كل شي عليا اني حتى مشاوير امه اني نقضي فيهم"
سدرة:يللا ربي يعاونك..شن حالك وحال صغارك.
"الحمد لله الكل بخير..انتم شن اخبارك شن جوكم شن جديدكم"
تنهدت سدرة وقالت؛قاعدين زي ماحني...
"شن جو غرفه"
سدرة:الحمد لله امورها ماشيه..
"الحمد لله..وطوبى شن دايره"
سدرة؛اهو نفكرولها في موضوع جاها حتى هي..
"موضوع..زواج قصدك؟"
سدرة؛ايه مالا موضوع شنو..ياما جوها وردينا في قولة صغيره توا خلاص كبرت ولازم تتزوج في وقتنا هدا البنت لو جاها نصيب باهي ماتقعدش..
"سدرة خش عليا رقم انتظار خل نشوفه منو ونعاودلك"
سدرة؛اوكي..
وسكرت..
☘نسرين بعد سكرت طول اتصلت بخديجه...
نسرين:ردي هيا...
ردت عليها خديجه وهي تقول..
"ايوه نانسي شن جو"
نسرين:خديجه انتي وينك..
"في شقتي علاش شن في؟"
نسرين:تمام..اسمعي توا كنت نكلم في سدرة وقالت طوبى في ناس جوها بيخطبوها وهما يفكروا في الموضوع..فوتوها وشوفوا غيرها..
قعدت ساكته خديجه..
نسرين؛ايوه خديجه!؟
"معاك معاك...شكله مافيهاش نصيب البنت هادي"
نسرين:من الاول قتلك مش مناسبه شوفي غيرها..
"خلاص خلاص..المعلومه وصلت سكري خل نقعد مع روحي ونفكرله في غيرها"
نسرين:تمام ولشن توصلي خبريني...سلام..
"سلام"
سكرت نسرين بعدين تنفست براحه وقالت:الحمد لله..
وعاودت اتصلت بسدرة..
☘☘☘☘☘
"نفكر حبيبي غدوة نطيب فطورنا ونمشوا لحوشكم"
يوسف وهو يتسحر؛عاجبك استقبال امي لينا المرة اللي فاتت..
ريمه:معذورة ومش لايمتها...في النهايه امك مراة طيبه وسيورها ترضى...
يوسف ابتسم وقال:والله كان انتي تبي تحاولي وتتحملي ردة فعلها خلاص..
ريمه بإبتسامه؛باهي قولي هي شن تحب تاكل بالزبط..
يوسف؛امي تموت في حاجه محشي فلفل والبراك..ديريلها طنجرة تطلع منها بروحها..
ريمه:حلو وشن تاني...
وقعد يوسف يعدد لمرته في الحاجات اللي تحب تكلهم امه...
☘واخته تعدد لراجلها في حاجات مهمه تبيها تكون موجوده في شقتها..
اميمه؛هادم نبي نخش الشقه نلقاهم قدامي عموري.
"حاضر من عيوني ماطلبتي شي..بس بنسألك قلبي خوك حسين امتى بيروح بالزبط"
اميمه:الدورة ان شاء الله بتقعد اربعه شهور يعني يروح في 11..
حسين:كويس بكل...
☘☘☘☘
"شن هو اللي كويس انتي التانيه"
صابرين؛نجاة زواج الجالي من وحده بالمواصفات هادي حيسهل عليكم هلبه زي ماقال الجالي..
بعد يتزوج هديكا بنت جيرانهم يفوت فتره ويجي لبوه ويفتح معاه موضوع انه بيردك ويقوله نبي نربي صغار خوي مراة قاعده بروحها وماعندها حد وبلابلابلا..المهم بوه مش حيلقى حجه تخليه يرفض نية ولده من هالزواج احفاده..وولده متزوج من قبل يعني مش اعزب..
نجاة؛باهي والزفته اللي بياخدها هادي!؟
صابرين:هو شن قالك عليها..طفله وساذجه..يعني حتى الطلاق حتخاف منه واهلها مش حيجازفوا ويخلوها تطلق في هالعمر..ومن الاساس مش حيقدروا يعارضوا الناس حتعيب عليهم ويقولوا منعوا الخير عن اليتامى..
نجاة قعدت تفكر في كلام صابرين وحست انه منطقي ومقنع جدا..
صابرين؛توا انتي خليك فالحه وزيدي دخلي روحك في العيله وخليك عاديه جدا جدا...احضري حتى عرسه وهيجي فيه..
معليشي..المهم في النهايه توصلي لهدفك..تحملي واصبري بالله عليك وخيتي..
غمضت نجاة عيونها..
خدت نفس عميق وزفرت..
بعدين فتحت عيونها وقالت:تمام...
صابرين؛ايوه كل ماتفكري افكار سلبيه تحرق دمك خودي شهيق وزفير بش تطلع..
نجاه:من فمي ولامن خشمي..
صابرين بضحكه:تتسهوكي ياتافهه..
نجاه وهي تغلب في ضحكتها:نحاول نطرد الافكار السلبيه..
ضحكوا شويه بعدين سكتوا...
شويه وقالت صابرين؛صدقيني كل شي حيمشي لصالحك..
نجاة بلعت ريقها خوفاوقالت:ان شاء الله...
رن تليفون صابرين قالت؛اهو جي مراد..
ناضت وهي تقول:شن مايصير جديد قوليلي..
نجاه ناضت معاها وقالت؛باهي..
سلموا ع بعض..
بعدين سقدت اختها وسكرت وراها باب الشقه الحديد..
بعدين سكرت باب اللوح بالمفتاح...
☘☘☘☘☘
تاني يوم...
الساعه 11:00صباحا...
في الطريق..
غرفه:حلويات شرقيه عمتي تموت فيهم وخود كنافه طوبى وسدرة يحبوها...
عبد الرؤوف:حاضر...
غرفه سكتت وهي تشوف للطريق..
عبد الرؤوف:شبه مافيش ضي بكل...
غرفه:ايه المحلات كلهم شغالين بالمولدات..
عبدالرؤوف حرك راسه يمين ويسار وهو ساكت..
☘بعد طول مسافه..
وصلوا لشارع القهوة..
خشت السيارة وين خطمت قدام مطعم ربيع لقوا جنبه لافته مكتوب عليها سفنز ربيع..
غرفه:هدا من امتى!؟
عبد الرؤوف:صح نوم..من اول رمضان..
غرفه:والله ماسمعت بيه..بالله خودلنا منه..
عبد الرؤوف:ماعجبنيش صراحه بس حاضر نجيبلك من مكان احسن منه نعرف صاحبه ليه سنين في السفنز..
غرفه؛مزيت معناها..
عبد شد ضحكته وقالت:انزلي خيرلك..
نزلت وهي تضحك..وهو نزل معاها..
ومشوا خشوا لحوشهم...
☘☘☘☘☘
الساعه 11:00ليلا..
طوبى وهي واقفه ع المرايه في الممر تساوي في وشاحها قالت؛مازال عميمه!؟
سدره من فم الباب بنرفزة:تي هيا عاد!
جت مطيره وهي تقول:واك منك تقول بنضربوا مشوار وهي خطوه..
سدرة:من بكري نقول وتوا ارواحكم من بكري..
طوبى:خلاص سوسو هدي هانا طلعنا..
ومشوا طلعوا التلاته وسدرة سكرت الباب..
بعدين مشوا للباب الخارجي كيف جت مطيره تفتحه..
دق..
شبحوا لبعض بإستغراب..
دق تاني..
سدرة بهمس لعمتها:افتحي..
مطيره فتحت الباب...
وهما تلاته..
مطيره اللي ع يسار..
سدرة اللي ع يمين..
طوبى اللي واقفه في النص...
تفاجئوا هلبه..
لما شافوا قدامهم مغليه وخديجه وهما واقفات ووحده في يدها سفرة بكلاوة كبيره..والتانيه صندوق عصير..
وع وجوههم ابتسامه عريضه وهما الزوز قالوا...
"السلام عليكم"
ومطيره وسدرة وطوبى وهما مازال متفاجئات ؤدوا مع بعض...
"وعليكم السلام"
وعيون مغليه وخديجه ع وطوبى وهما يشبحولها بإبتسامه..
وهي لاحظت نظراتهم وترتها..وخلتها تبتسم بإرتباك.

#ع_خاطر_الياسمين
#طوبى

....يتبع....