طوبى الجزء الاول

الجزء الرابع عشر

# طوبى "شارع القهوة"
#جمان_فريد
#الجزء_الرابع_عشر"مكتوب وصار"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
مكتوب وصار الله غالب مكتوب وصار
مكتوب وصار الله غالب مكتوب وصار..
مكتوب وصار الطير اللي ربيته طار..
"اعوذ بالله منك انت وهالاغنيه اللي شادها ليل نهار"
نضال بضحكه:غير خيرك يام اغنيه عاديه..باهي فوتيها واسمعي هادي..ست الحبايب ياحبيبة يااغلى من وروحي ودمى عندي زردة اليومين الجايات نبي فلوس عطيني ياأمي..
ياربي يخليك ياامي ياست الحبايب ياحبيبه ياحبيبه وحبيبه..
باسها من خدها وهي تقول بضحكه؛حول غادي..وانت هذا ماعندك الزرادي والهياجه بس..راك تشد قرايتك..
نضال؛اني مانشدش يام اني نقعمز في نحضر المحاضرة تعلق في راسي خلاص تحسابني هالناس العاديه اني..خسارة ماعرفتي شن جايبه لتوا ياموغي..
مغليه:باهي اسكت اسكت نفختلي راسي...
نضال؛باهي شن قلتي ع اللي نبيه منك..
مغليه:غدوة تو نعطيك..
نضال؛وعلاش مش اليوم!؟
مغليه؛ياغدوة يامافيش بكل..
نضال؛باهي باهي اهدا وروق ياحلو..وقرب باس راسها بعدين قال..طالع تبي حاجه!؟
مغليه؛سوق بالشويه تربح..
نضال ابتسم وقال؛حاضر...بنعطل شويه راهو..سلام..
مغليه:في أمان الله...
~~~~~~~~~
طلع نضال من الحوش بسيارته...
شاف سدرة جايه وهي تجري بالسيارة شدت فرينوا قوي قدام الحوش ووقفت ونزلت من السيارة..
سكرت بابها بقوة وخشت للحوش..وحتى هو خبطت باب بقوة..
ضحك وهو متصنع ملامح الخوف وقال:ياساتر..!
بعدين مشي ركب سيارته وتحرك...
🌻🌻🌻🌻🌻
طالعه من الكليه وهي تشوف لطرف الشكولاته في يدها وفرحانه ومش مصدقه انه من عمر..
انخبطت في الطريق ببنت..
البنت:هيييه ديري عيون!
اميمه بإحراج؛آسفه..
ولفت ومشت بسرعه وهي منحرجه
بعدين رجعت شافت للشكولاته من جديد وابتسمت..
فرحانه لأنها اول مرة تحس بقيمتها ووجودها..
وحست انها مميزة وفيها شي ملفت للإنتباه عكس ماكانت تشوف لروحها..
حركة عمر هادي رفعت معنوياتها وعززت ثقتها بنفسها..
وحسستها انها انثى فعلا..
زياده عن شعور الحب اللي تحسه اتجاهه...
☘اميمه مالقتش من يحسسها بأنوثتها في حياتها خوتها معاها كويسين وبرغم قرب حسين منها مالمسش فيها هداكا الركن من المشاعر..
مهم جدا ان الاخ يمدح اختها..ع لبسها وشكلها..حتى لو بأسلوب مزوح بش يعزز ثقتها بنفسها ويرفع معنوياتها ولما تجي من الأب احلى واحلى..تبي البنت شبعانه معنويا..ماتفرحهاش اي كلمة غزل تجيها من اي حد غريب..
هادي راهو تربيه الرسول لبناته كان يحب يمدح ويسمعهم عبارات الحب..لانه يعرف كويس كيف لازم تتربى البنت..
عكس اللي قاعد يصير في واقعنا توا ومجتمعنابنات عايشين حال اميمه واسوأ...مانبوش نعمموا...بس هذا حال الاغلبيه العظمى☘
🌻وصلت اميمه في سيارة يوسف وركبت..
اميمه بإبتسامه:شن جو؟
يوسف بإبتسامه؛زاهيه الحمامه!
اميمه وهي مبتسمه؛كان يوم حلو وخفيف..
يوسف؛دوم ان شاء الله..اهم شي شدي في قرايتك درنا المهندس والعسكري في العيله نبوا نديروا دكتورة..
اميمه بضحكه:إن شاء الله..
وتحرك يوسف وهو مازال يهدرز مع اميمه وهي تساير فيه مسايرة وعقلها عند عمر...
🌻🌻🌻🌻🌻🌻
روحت للحوش ومعاها بناتها الزوز وحده جابتها من الروضه  والتانيه من الحضانه..
فايزة؛هي خشوا بسرعه ماما..
وسكرت الباب..
فايزة وهي تحول في كندرتها:احمد ..احمد..
شويه وطلع احمد من دار النوم وقال:روحتي..
فايزة؛سامحني حبيبي عطلت اليوم ان شاء الله تاله ماتعباتكش..
احمد بإبتسامه؛تي عادي زي قبل..المهم توا خشي فيسع سخني الغدي حل بنتغدا ونمشي للسوبر ماركت..
فايزة؛هي ثواني بس..
حطت شنطتها ع المدخل وخشت للكوجينه وهي تقول:بالله احمد شوف صفاء ومروة..
احمد؛باهي..ومشي يشوف في بناته..
هي طول حطت الطنجرة والكسكاس ع النار..
ومشت غسلت ايديها كويس..
بعدين طلعت من الثلاجه حاجات السلاطه..
بعد ماغسلتها قرضتها..وعصرت عليها ليم وقطرت زيت زيتون وخل وخلطتها وخلتها ع تركينه..
ومشت طفت ع الطنجرة وبدت تسقي في صونيه لراجلها..
ساوتها كويس  وحطت جنبها صونيه سلاطه وكاشيك..
وصبتله طاسة عصير..
وخدت السفرة وطلعت بيها من الكوجينه للصالون..
حطتها ع الطاوله..
ومشت فتحت التلفزيون ع الاخبار..
ونادت:احمد..حمادة..
شويه وطلع وفي غمره مروه يهدرز ويضحك هو وياها.
جاته وقالت؛هي تعالي ماما خلي بابا يتغدا..
جت البنت عند امها ..
واحمد قعمز ورا الطاوله وقال:الله! كسكسي بالخضرة عطيك الصحه..
فايزة بإبتسامه:صحتين ع قلبك..
ومشت من حداه وهي تنادي:صفاء..
طلعت صفاء من الدار ولحقتها للكوجينه..
خشوا وقعمزتهم الزوز ع طاوله الكوجينه..
وسقتلهم صونيه صونيه وحطتهم قدامهم..وصبتلهم عصير..
بعدين قالت:بنمشي نبدل حوايجي ونجي نلقاكم ماسحين الصواني..
وطلعت من حداهم خدت شنطتها من ع المدخل..
وخشت لدار النوم..
سكرت الباب وشافت تاله كيف راقدة ابتسمت وقالت:ياعمري..
حطت شنطتها ع الزيانه ووقفت قدامها وقعدت تحول في وشاحها..
فجاة رن تليفونها..
شبحت للشنطه شويه..بعدين طلعاته منها..
شافت المتصل ردت طول..
فايزة؛ايوه سدرة...
☘سدرة وهي تشوف في الغدي وتبكي:ااه يافايزة لو تعرفي شن صار معاي اليوم..انكسرت بمعنى الكلمه يافايزة..
فايزة بخوف وقلق:خيرك سديرة!؟
سدرة:عيشه يافايزة عيشه معقوله هكي دير فيا اني معقوله!!
فايزة عقدت حواجبها وقالت:احكي سدرة قولي شن دارت!؟
قعدت سدرة تحكي من قهرتها مش قادرة تستوعب الموقف كان اقوى واقسى من انها تتحمل دسه..
وفايزة مصدومه لأبعد حد وطارتلها من عائشه لين خلاص..
فايزة بصدمه وغضب:هادي هبلت خلاص عقلها مش عليها!؟
"ياريت تجي يافايزة اليوم لوفيها كيف حاسه روحي بنتفجر بنموت.." وقعدت تبكي..
فايزة هزت راسها وقالت؛جايه جايه ان شاء الله جايه..
"باهي بالسلامه توا وسامحيني غششتك"
فايزة:مادوريش نتلاقوا بعدين بالسلامه..
سكرت فايزة وقعدت تفكر للحظات..بعدين اتصلت طول بنسرين..
~~~~~~~
ونسرين فهالوقت مقعمزة تاكل في سكالوب وتتفرج ع مسلسل تركي..
وصغارها مع حناهم في الكوجينه تغدي فيهم..
رن تليفونها..
قاماته وشافت المتصل..
استغربت وردت طول.
نسرين؛اممم...
"سمعتي باللي دراته مرت خوك المصون"
وقفت نسرين مضغ وقالت؛شن دارت!!!؟
🌻🌻🌻🌻🌻🌻
حطها الباص قدام الحوش..
نزلت منه بسرعه..وفتحت باب حوشهم وخشت..
شافت للمربوعه لقت حسين ويوسف وعمها وجدها مع بوها يهدرزوا..
تنهدت وخشت للحوش جري..
بش تبدل حوايجها وتلبس احلى توته عندها..
وفي الكوجينه..
طوبى كانت مقعمزة تفطر وتشبح لسدرة ..
باين عليها باكيه وجوها مش تمام..
مابتش تسألها لأنها تعرفها كان ماحكتش بروحها مش حتقول شي..
سدرة؛هيا كملي فطورك ووتي معاي الصفر..
طوبى؛حاضر..
شويه وناضت لمت حوستها..
بعدين بدت توتي مع اختها في السفر وتفرق في الحاجات عليهم..
ع خشة غرفه..
شمت سدرة ريحة عطرها التفتت شافتها شن لابسه وشافت المكياج اللي دايراته وكيف دايرة شعرها..
سدرة:خير ان شاء الله شن في!؟
طوبى شبحت لغرفه..
غرفة؛شن في!؟
سدرة؛الحاله اللي دايرتيها في روحك هادي كلها علاش!؟
غرفه:هدا العادي متاعي سدرة خيرك!
سدرة بحزم:خشي امسحي وجهك..
غرفه:علاش!؟
غمضت سدرة عيونها بنفاد صبر وقالت:خشي امسحي خليقتك..
غرفه شبحتله بغضب ودموعها عبوا عيونها..بعدين مشت من حداهم..
فتحت سدرة عيونها والتفتت لطوبى..
طوبى من الخوف ولت توتي في السفرة وهي مرتبكه..
تنهدت سدرة بعدين التفتت للغدي وقعدت تسقي..
🌻🌻🌻🌻🌻
وفي مكان بعيد عن شارع القهوة..
في مدينه بعيدة في طرابلس...
في حي من احيائها..
وفي شارع من شوراع هالحي..
كان في حوش شبه قديم ع دورين..
الحوش هدا كان حوش عيلة "بوسيف"
بو العيله متوفي ليه عامين..
وام العيله ميته من زمان...
راجلها خدي مرة تانيه بعد ماتت وجاب منها ولاد..
وعنده من الاول تلاته بنات اللي هما..
مروة...نجاة..صابرين...
مروة مواليد 1977 متزوجه من سنين..
وفي الحوش قاعدات..
نجاة مواليد1981...ومعاها اختها صابرين مواليد1988..
نجاة مهندسه وتخدم في نفس الشركه مع الراجل اللي مرتبطه بيه وقريبا حيخطبها...طاهر شنيبه..
اما صابرين اللي كانت تقرا في كلية التقنيه كانت واخده دورة تمريض قعدت تخدم بيها جنب قرايتها بش تحصل ماتصرف بيه ع روحها..
علاقتهم بمرت بوهم وخوتهم سيئة..
هذا علاش كل حد شاد حوشه وقاعد في حاله...
☘واقفه صابرين تحط في مكياج ع وجهها وهي تقول:صحة ليك كيف خليته يثبت روحه في حوش بوه..
نجاه وهي متكيه:طبعا ماما تبيني ناخده ونسكن معاه في الايجارات ونتحندب وهو عنده بوه تحته فلوس ماتاكلهمش النار!..لاوتخيلي يبدا عندي سلفات عايشات احسن عيشه واني نقعد في وسط ناقصه و مقهورة..
التفتت صابرين وقالت؛صدقتي..عيشي زيك زيهم واطلعي من الفقر اللي عايشين فيه...
ابتسمت نجاه وقالت:غير نطلع نو نطلعك معاي..
صابرين بضحكه:عندك سلف يستاهل!؟
نجاه:هما فيه..بس خسارة كبيرهم اللي يعتبر الكل في الكل متزوج..
حطت صابرين حاجتها في الشنطه وقالت بإبتسامه مكر وهي ترمش في عيونها:عادي الشرع حلل اربعه..
قعدت تضحك نجاة..
صابرين بضحكه:يللا باي..
نجاة:ايه قبل لتمشي كلمت مروة وقالت بتجي تحضر غدوة..
مشت صابرين وهي تقول:باهي اللي تفكرتنا..
ومشت طلعت من الشقه..
تنهدت نجاه وقامت تليفونها وكتبت رساله حب وغرام لطاهر وبعتتهاله.
وهو طول بعدها اتصل بيها..
ضحكت وردت عليه...
🌻🌻🌻🌻🌻🌻
بعد الغدي..
كانت طوبى مقعمزة في الصاله تقرا وهي لابسه وشاح..
وغرفه مقعمزة وطارحه شيتاتها ومرة تشوفلها بإستغراب..
فجأة سمعوا دقة باب..
وسمعوا صوت ينادي..
"بنات العم"
غرفه قعدت تساوي في شعرها وقالت بلهفه:خش حسين..
وطوبى تشوفلها..
خش حسين وعيونه جو ع طوبى ابتسم من قلبه وقال:شن جو؟
غرفه بإبتسامه:الحمدلله..شن جوك انت..
قعمز حسين قريب ع طوبى وحط ايديه ع الطاقيه اللي لابسها ع راسه وقال؛لبستها بش ماتخافيش..
طوبى ابتسمت بإحراج؛مش قصدي حسين والله ماقصدي..
ضحك وقال:نبصر معاك..
وغرفه نشوفلهم بنظرات غيره.. حسين:خيرك لابسه وشاح في الحوش صقعانه!؟
طوبى بضحكه:لاخلاص اني تحجبت..
غرفه؛برا الحوش الحجاب ياحلوة مش داخل..
شبحت طوبى لحسين وقعدت ساكته..
هو قعد يشوفلها بإبتسامه وقال:لبساته عني ..
نزلت عيونها في الكتاب وهي متحشمه..
غرفه:حني عيلة وحده ومتربيين مع بعض مش لازم نتحجب قدامكم..
شبحلها حسين وقال؛لالازم حني نقعدوا ولاد عمكم اجانب عليكم لازم تلبسوا قدامنا الحجاب ولبسكم يكون مستور..
تلقائيا قعدت غرفه تنزل في فانيلية التوته اللي كانت ضيقه..
شبح حسين لطوبى وقال؛شن جو الاعدادي!؟
طوبى:عادي..
حسين؛مافيش شي صعب عليك..
طوبى:لتوا لا..
حسين:انتي عاد قاريه ع خمسة سنين فايته جيلك بعام..فايته جيلك في كل شي..
ابتسمت طوبى بخجل وقالت؛حقه!
ثني ركبته ورفعه فوق وحط ايديه عليها وحط راسه فوقهم وهو يشوفلها بإبتسامه:حقه..تنوضي ديريلي قهوة..
طوبى بإبتسامه:حاضر...
حطت كتابها ع تركينه وناضت مشت طلعت من حداهم للكوجينه وهو بعيونه معاها..
غرفة وهي تشوف لنظراته؛مازال بتسافر مرة تانيه؟
شبحلها وقال؛مش معروف..
غرفه؛نفقدوا فيك لما تسافر..اصلا من لما خشيت العسكريه بعدت هلبه..
حسين بإبتسامه؛مجبور..
غرفه:انت ماتفقدش فينا..
شبح لفتحة الصاله وقال:هلبه..
غرفه تنرفزت هلبه من حركاته لكن قعدت شاده روحها..
غرفه؛نقرا في كلية العلوم..
شبحلها وقال :مش ساهله كلية العلوم شدي ياغرفه..
غرفة بإبتسامه:ان شاء الله..
فجأة..
سمعوا صوت دق باب وصوت قال..
"سدرة"
حسين؛خش يوسف..
يوسف جاهم وقال:سدرة وين؟
"تعالى حدا الجنان يايوسف"
التفت ومشي طول..
حسين:اشبح شن في بيناتهم من اسرار..
غرفه ضحكت وقالت:ديما قارنين الرووس ويوشوشوا..
ع خشة طوبى بسفرة القهوة..
مدت لحسين وقالت:الكيكه اني درتها امس..
حسين خدي منها السفره وقال:قعمزي..
مشت قعمزت طوبى في مكانها..
وهو خدي من الكيكه وفنجان القهوة..
غرفه:خيرك ماحسبتنيش يامسمومه!؟
شبحلها حسين برفعة حواجب.
طوبى:ماقلتيش نبي..
غرفه:بالقولان هي!؟ مفروض تعرفي بروحك..
حسين:شن عرفها انك تبي توا وهي واخده عليك تشربي فيها العشيه مش بعد الغدي..
سكتت غرفه..
ناضت طوبى وقالت؛باهي تونديرلك..
غرفه:قعمزي معاش نبي منك شي تو نوض ندير بروحي..
وناضت وهي حامقه..
تنهدت طوبى بضيق وقعمزت..
حسين شبحلها وقال:ماتعدليش عليها اختك هادي وحده حالة..
ضحكت طوبى وقالت:تو تسمعك..
كلي الكيكه في فم واحد وقال وفمه معبي:خل تسمع..
طوبى بإبتسامة ازدراء؛شن هدا حسين وليت همجي!
حسين حط يده ع فمه وقعد يضحك..
وطوبى تضحك وهي منقرفه..
بلع وقال:قريب قتلتيني..مالا كان نقولك شن كانوا يوكلوا فيا...بوبريصات...
حطت طوبى ايديها ع وذانها وقالت:اسكت..
وحسين يضحك عليها...
🌻"شن غير رايك فجأة"
سدرة؛فكرت هلبه في الموضوع عجبني وتقبلته..
يوسف:فيك شي مش مريحني..
سدرة:واااك الواحد معاش فهمكم انتم من جهة تقولولي عيشي حياتك وحرام عليك تقعدي هكي..وتوا تقولي مش مرتاح ومش عارفه شنو!! شن يعجبكم انتم!!؟
يوسف:باهي خلاص هدي هدي..يعني انتي موافقه ع الفاندي بقناعه..
سدرة؛اكيد ماعندي من يجبرني..
يوسف:تمام..معناها العشية نمشيله غادي ونبلغه..
وسدرة هزت راسها وقعدت ساكته...
🌻🌻🌻🌻🌻
ويأذن العصر..
وبعد العصر..
تطلع فايزة من الحوش رافعها احمد لحوش عمها الواعر...
وصلت غادي..
في نفس الوقت اللي وصلت فيه نسرين لحوش اهلها.
حطوهم رجالتهم بصغارهم  ومشوا..
نسرين خلت صغارها عند اهلها..
ومشت طول لحوش عمها الواعر...
وفي الحوش وقتها ماكان في حد كان البنت..
طلعوا طوبى وغرفه من الدار وخشوا مع سدرة وسكروا الباب..
غرفه؛صايرة حاجه كبيرة..
طوبى بقلق:ربي يستر..
☘في الدار..
واقفات فايزة ونسرين مصدومات وموجوعات وهما يسمعوا في سدرة شن تقول وهي تبكي..
سدرة ببكي:اني كله فوته كله عديته وقلت يابنت حقه راجلها وحوشها  تبي تحافظ عليهم..لكن توصل بيها انها تشوه سمعتي تطعن في شرفي وديرني عشيقه!!..وين العشرة راحت وين الايام اللي كانت بينا..تي كنا نلعبوا مع بعض ناكلوا مع بعض نلبسوا من بعض ومرات نباتوا مع بعض..اني وعيشه انتم تعرفوا كيف كنا..اني بس نبي نفهم شن اللي خلاها تولي هكي!!؟ مهما تكون حبت المهدي ماتوصلش بيها لهني..حطت ايديها ع وجهها وقالت..مش عارفه كيف مامتش اليوم مش عارفه!؟
فايزة بغضب؛اني من قبل تصرفاتها تستفز فيا ونفوت ونقول معليشي معذورة..بس لعند هني وياسر..
نسرين:حتى اني كنت نبررلها بس بعد اللي داراته توا خلاص..عيشه تبي كف بش تفيق ع روحها عمرها ماحتكسب راجلها بالطريقه هادي..
فايزة:نبي نمشيلها نبردي قلبي فيها تبيها الهزيبه تبيها..
سدرة:لالالا فوتها..تو عن قريب تهدا وترتاح..
شبحولها صاحباتها بإستغراب..
سدرة رفعت حاجبها وقالت:وافقت ع الفاندي..
انصدموا الزوز..
فايزة:لاهكي انتي بتزيدي تغلطي..
سدرة::لاهدا الصح اللي كان مفروض يصير من البدايه..
نسرين؛ووصية خالتي وردة..
سدرة:اول شروطي اللي رضي بيهم الفاندي من زمان..
نسرين قعدت تشبح لسدرة هلبه بعدين قالت؛كله من عيشه.. ومشت وهي تقول..تعالي فايزة..
فايزة مشت معاها والزوز طلعوا من دار سدرة..
وسدرة مشت قعمزت ع سريرها بهده..
ومسحت وجهها بإيديها بعدين وخرت شعرها للخلف وهي تقول:ياربي..
🌻🌻🌻🌻🌻
"ايوه ماما صح كمل"
محمد قعد يكتب في واجبه اللي عطتهوله الروضه..
وحداها يحزن يخربش ع كراسه..
فجأة سمعت باب الشقه يدق..
ناضت وخدت وشاحها حطاته ع راسها ولفاته وقعدت تمشي ع مهل لين وصلت في الباب وقالت:مني"
جاها صوت نسرين تقول افتحي..
فتحت عائشه الباب..
شافت فايزة مع نسرين والزوز واقفات يشبحولها في شبحات في فهمت سببهم..
خشت نسرين وبعدين فايزة..
نسرين؛محمد خود خوك وانزلوا العبوا مع فرح ومحمد"صغارها"
محمد ناض وهو يقول:حاضر عمتي..
مشي الولد خدي خوه..والزوز طلعوا من الحوش..
نزلت نسرين كم درجه تشوف فيهم بش تتأكد انهم نزلوا لوطا..
وبعد نزلوا ولت ركبت وخشت الشقه وسكرت الباب
حولت عائشه وشاحها وقالت برفعة حاجب:خير!
نسرين؛شن اللي درتيه اليوم هذا مع سدرة!!؟
عائشه بضحكه ساخره؛فيسع خبرتكم!؟
فايزة؛البنت قريب تبلغمت من عملتك اني بروحي قريب انجلطت..شن جاك انتي شن جاك معقوله هكي!
عائشه:عندكم حق اللي يده في الميه مش زي اللي يده في النار لو كل وحده فيكم تحط روحها في مكاني حدير احرف منك..
نسرين؛ياسر بالله ياسر..عذرناك لين عيينا..اللي درتيه يوم وطعنك في شرف صاحبة عمرك خلاك طيحي من عيني خلاني نخاف منك..
فايزة؛خليهم العشرة والصحبه ع تركينه..الدين اللي تربيتي عليه ماعلمكش ان اللي درتيه اليوم حرام يامدينه!
سكتت عائشه وعيونها تعبوا بالدموع..
فايزة؛كل شي يتعوض في الدنيا ياعيشه الا الوالدين والصحبة الطيبه..وانتي اليوم خسرتي وخيه وصاحبه ياما دارت ع خاطرك..لدرجة انها وثقت فيك وشجعاتك تاخدي الراجل اللي تبيه تعرفي علاش..لانها تحساب روحها تعرفك كويس..بنت متربيه ع الدين وقلبها طيب..كانت تبيه يعيش مع مراة كويسه يقدرها وتقدره..
عائشه نزلت دمعتها وقالت:ويقعد يحبها هي!
فايزة؛:والله هدا غلطك مش غلطها..شغلتي نفسك بيها ونسيتي راجلك تحسابي روحك كان تقعدي تضربي فيها هي حتحافظي عليه وتملكي قلبه...
قعدت عائشه تشبح لفايزة وهي ساكته ودموعها ينزلوا..
فايزة:ع العموم من اللحظه هادي تريحي سدرة خلاص في حكم انخطبت ونتمنى المعلومه هادي توصل لراجلك خل يطلعها من راسه وينساها.
نسرين:حتوصله اكيد ووقتها حيحط عقله في راسه..
فايزة شبحت لعائشه من فوق لتحت بعدين مشت فتحت الباب وطلعت..
ونسرين عطتها نظرة حارة وبعدين لحقت فايزة..
مشت عائشه سكرت الباب ودموعها ينزلوا من عيونها زي السيل..
☘نسرين وفايزة وهما نازلات مع بعض من فوق..
وين وصلوا لأخر الدروج..
خش المهدي من الباب الفاصل وشافهم..
كانت نظرات فايزة ليه واعرة..
هو استغربهم ووخر عن الباب..
مشت طول طلعت..
شبح لاخته وقال:صايرة حاجه!؟
شبحتله نسرين وهي تفكر في قرار سدرة وكيف حتكون ردة فعله لما يعرف..
حركت راسها بالنفي ومشت طلعت من حداه وهي تمشي ع مهل ..
هو شبح فوق جهة الشقه..
بعدين ركب بسرعه ...
وصل في الشقه فتحها وخش..
سكر الباب وقعد يمشي ويدور بعيونه في مرته..
لين خش لدار النوم..
لقاها واقفه ع المرايه ترسم في عيونها..
المهدي:خيرهم جوك وروحوا من عندك بسرعه..
هي قالت:جايين يشوفوا الحوايج اللي خديتهم لعرس خوي..
قعد يشبحلها بشك..بعدين قال:ديريلي قهوة..
عائشه حطت القلم وقالت:حاضر..
وهو مشي للصاله...
خدت نفس عميق..ومشت طلعت من الدار للكوجينه..
🌻🌻🌻🌻🌻
"هي قعمز اشرب شاهي"
قعمز يوسف في محل قطع الغيار قدام الفاندي وقال:بدل الشاهي بالروزاطه..
الفاندي بإبتسامه:هاه شني نويت خلاص!؟
يوسف بضحكه؛انت اللي انوى..
عقد الفاندي حواجبه بعدم فهم..
يوسف:بنت العم قالت كان مازال صاحبك شاري اني موافقه..
قعد الفاندي يشبح ليوسف وخلاص..
يوسف بضحكه:سمعتني!
الفاندي:لا..
يوسف:قتلك بنت عمي واخيرا رضت وقالت قوله يجيب العيله..
الفاندي:هي نفسها السدرة!؟
يوسف قعد يضحك وقال:انت خطبت غيرها!؟
الفاندي؛لاوالله خمسه سنين واني مانخطب كان فيها هي..
يوسف؛وهاك حصلت الموافقه بعد خمسه سنين!!..
الفاندي مسح بيده ع شعره وضحك نص ضحكه وهو مازال مش مصدق..بعدين نادى واحد من اللي يخدموا عنده وقال:برا يجيب مايسد الرابش روزاطه وعبمبر..
ضحك يوسف..
:علاش يافاندي فرح مني!.
الفاندي:برا دير اللي قتلك عليه..
ضحك الولد وقال؛حاضر..
عطاه الفاندي فلوس وطلع يجري..
الفاندي وهو يمسح ع لحيته ضحك وقال:سامحنا يايوسف قصدي الدنيا خشت بعضها عندي شن ماشفت دير الحوله..
يوسف هز راسه وهو يضحك ...
🌻وروح هداكا اليوم يوسف بروزاطه وعبمبر..
وهو ينزل فيهم من السيارة شافه المهدي اللي كان مقعمز يشرب في قهوة في وسط المطحن متاعهم..
وع طول جي في باله انها زردة تخص يوسف ومافكر في شي تاني..
وفي حوش اهله..
🌻مغليه:حي غبارة حي في شكارة..
نسرين؛من بكري عقلي يرفع ويجيب..
خديجه؛مرات مايدير شي وانتم تبالغوا..
مغليه؛راهو هدا ولدي واني اللي ادرى بيه.. ؛تو تشوفي بعيونك شن يدير..
سكتت خديجه وهي تفكر بقلق..
شويه خش عليهم المهدي وهو يقول:شكله في عرس قريب في الشارع..
هما التلاته وين خش عليهم وتكلم انتفضوا من الفجعه..
استغرب وقال:خيركم!..
امه وهي تحاول تخفي ارتباكها؛عرس! عرس مني!؟
المهدي قعمز حط رجل ع رجل ومد ايديه ع مسند الكنبه وقال :يوسف ولد الواعر.
خديجه:من قالك..
المهدي:شفته وهو مروح بروزاطه وعبمبر...شبح لنسرين وقال..كنتي عندهم انتي بكري ماسمعتي شي!؟
نسرين حركت راسها نفيا وقالت:لا..
شويه وسمعوا صوت نضال يغني بصوت عالي..
مكتوب وصار الله غالب مكتوب وصار مكتوب وصار الله غالب مكتوب وصار..
خش عليهم وكملها..
مكتوب وصار الطير اللي ربيته طار..
مغليه:قتلك معاش تغنيها الاغنيه المشومه هادي ولا..
نضال بضحكه:مش عارف كيف تفكري يام..
المهدي:علاش خيرها!؟
نضال بضحكه؛تقولي تفاول ماتفاول.
ضحك المهدي نص ضحكه وقال:والله عليك امي وخلاص..
وامه وخواته يشبحوله وخلاص..
قدم نضال للمهدي ومد يده وقال:ايدك ع ميه في سبيدرو عجبني نبي ناخده..
طلع المهدي تزدان من جيبه وطلع الفلوس اللي يبيهم خوه..
ومدهوله..
خداهم نضال وقال:منور يازعيم..وطلع من حداهم..
رجع شاف لامه وخواته وشاف نظراتهم قال:خيركم تشبحولي هكي!؟
نسرين:خيرك معاش جيتني حوشي..
المهدي؛ديما وين نجيك مانلقاش في راجلك معاش نبي نخشه الحوش الا وراجلك قاعد..
خديجه:انت جاي لاختك..
المهدي:مايجيش لازم يكون موجود..
تنهدت نسرين وقالت:براحتك..
شبحلها المهدي وحس انها مش مرتاحه عكس خديجه اللي تبان مرتاحه ومتهنيه..
لكن طبعا مش حيدخل الا لو هي دخلاته...
🌻🌻🌻🌻🌻
راقدة في فراشها..
وهي شادة بإيديها غلاف الشكولاته وتتفرج عليه وابتسامه حلوة ع وجهها..
وقاعد تتفكر في نظراته وكلامه..
كان تفكيرها فيه بريء هلبه وكله وردي..
قعدت تتخيل حتى في عرسهم...
وكلام بنت عمها يتردد في وذنها..
"مش قتلك يحبك ويموت فيك"
ضحكت وحطت يدها ع فمها..بعدين طلعت تليفونها من تحت المخده واتصلت بغرفه..
نادى اكثر من مرة وفي الاخير فتح الخط..
"ايوه اميمه"
اميمه؛مش قادرة نبطل تفكير فيه ياغرفه..مش مصدقه ان عمر يحبني..
وحكت جبهتها وقالت..متلهفه لغدوة هلبه..
"عندك حق من يلومك...سعدودك ياميمو"
ضحكت اميمه بخجل..
"هي توا بنسكر ميمو حاصله في الدبش"
اميمه:باهي ربي يعاونك..سلام...
"سلام.."
سكرت اميمه وحطت النقال في مكانه..
بعدين قعدت تفكر وقالت؛حي ماقريتش اليوم..
ناضت قعمزت وقالت...لاياأميمه كل حاجه بروحها..ماتلهيش عن قرايتك..
دست غلاف الشكولاته..
وطلعت الشيتات....وبدت تقرا..
بينما غرفه..
كانت راقده في الدار تسمع في الاغاني وسرحانه في حسين...
~~~~~~~
وفي دار بوها...
لطفي:انتي متأكده من قرارك هذا!؟
سدرة:ايه بوي متأكده..
لطفي:ووصية امي..
سدرة:شرطي الاول والاخير..
لطفي؛متأكده ان الفاندي ان حيتحمل معاك مسؤولية زي هادي..
سدرة:حنحط كل شي قدامه ع الطاوله عجبه كان بيها ماعجباش سلامته..
لطفي تنهد وقال:اني معاك في اي قرار تاخديه من قبل قتلك هالكلام..ونتمنى يابنتي ع قرارك هذا ماتندميش بعدين..
سدرة؛اطمن بوي...بإذن الله مافيش ندم..
🌻🌻🌻🌻🌻🌻
تاني يوم...
سدرة مشت للمدرسه...
ايه مشيت تحديا في الجميع واولهم عائشه..
وفي نفس الوقت بش ماتثبتش افتراءات عائشه عليها..
غادي تعاملت مع الكل برسميه شديده..
خدمت خدمتها...وطلعت روحت..
وهي طالعه بسيارتها من المدرسه..
وقفت قدامها سيارة عاليه..
نزل منها صاحبها وجاها..
سدرة؛غير خل يصير منه قبل!
وقف ع روشنها ودق بمفتاح السيارة..
هي نزلاته...
الفاندي:السلام عليكم..
سدرة؛وعليكم السلام..
الفاندي:سامحيني اللي جيتك هني بس جيتي للضرورة مش ضياع وقت..
سدرة:ضرورة!؟
الفاندي:ايه عندي كلمتين لازم نحكيهم معاك..
سدرة قعدت ساكته وهي تفكر بعدين قالت:حتى اني..
وقف ع حيله وقال:تمام..نتلاقوا في الفروسيه شن رايك..
هزت سدرة راسها وهي ساكته..
هو قال:تمام..
ومشي ركب سيارته وتحرك...
وهي لحقاته...
🌻🌻🌻🌻🌻
في جامعة الفاتح..
كافتيريا كليه الطب..
خشت وهي تشوف في الزحمه..والدوشه هلبه..
كانت مضايقه...بس مابتش تطلع..
قعدت دور بعيونها لين طاحوا ع مبتغاهم..
مشتله ووقفت عليه وهي تتفكر في كلام بنت عمها..
《غرفه شن اكثر شكولاته يحبها عمر كان عندك فكره؟
غرفه:سنكرس》
وكانت هادي اكثر نوع شكولاته يكرهه عمر..لانه يكره الكاكاويه ومايحبهاش.
وهي مسكينه خدتهاله..وخدت لروحها وحده..
ومشت طلعت من الكافتيريا وتوجهت للمكان نفسه اللي جاها فيه عمر..
قعمزت ع المقعد وقعدت تراجي..
وتراجي...
لين شافاته جاي لكن معاه نفس البنت..
بانت ع وجهها ملامح الحزن والضيق..
قعدت تشوف للبسها..وتشوف لروحها شن لابسه..
قالت في نفسها"لبسها غالي هلبه..اصلا حتى اني كان خديت زيه مش حيطلع عليا زي ماطالع محلاها ومحلا جسمها..باهي تطلع صديقه عاديه لعمر ولاشنو!؟"
وعمر لاهي مع صاحبته داليا هدرزة وضحك.
شويه وقالت:حبيبتي توا عندي محاضرة نتلاقوا بعد ساعتين..
عمر:اني مولي للكليه..
داليا بإبتسامه:تمام يللا باي..
رفع يده وحياها..
وهي مشت...
بعد مشت هو جاي بيطلع من الكليه..نسي اميمه وقصتها بالمرة..
بس وهو ماشي يوزع نظره ع المكان جو عيونه عليها وتفكر..
وقف والتفت شاف للمكان اللي مشت منه صاحبته تأكد انها خلاص داخل..
رجع شاف لأميمه ومشي ناحيتها..
هي ارتبكت واحمر وجهها الابيض بياض الحليب خجلا...
ناضت وقفت وهي تساوي في وشاحها..
وهو وقف عليها وقال:شن عندك محاضرة!؟
اميمه ضحكت بخجل وارتباك وقالت؛ايه..بس كنت نراجي فيك..وحكت جبهتها..
عمر:خسارة حظي مش حلو..
اميمه ابتسمت خجلا وقالت؛مرة تانيه..
عمر:اكيد مرة تانيه وتالته ورابعه..
اميمه نزلت راسها وهي متحشمه ومرتبكه ع الاخر..
هو قعد يشوف لتفاصيلها الخجوله..
احمرار وجهها..صغر عيونها..ايديها اللي تفرك فيهم في بعض
فجأة قامت عيونها فيه..
وتعكس عليه الشمس بأشعتها من جديد
.الشمس بينت لو رموش عيونها الكبار الصفر...
بان وجه اميمه شي عجيب لايوصف..
قعد يشوفلها وخلاص..
اميمه مدتله طرف الشكولاته وقالت؛تفضل..
هو شبح ليده وشاف نوع الشكولاته..
اميمه بخجل:سمعت انك تحبها..
هو زبط ان غرفه قالتلها الحاجه هادي..
خداها منها وقال:صح...شكرا..
اميمه حكت خدها وقالت:العفو..
عمر:اميمه عندك تليفون..
طلعاته من الشنطه وقالت:اهوا..
عمر:نبي رقمك..
هي شبحتله شويه بعدين ابتسمت وقالت:علاش!؟
عمر:هكي نبي نتعرف عليك اكثر ونهدرزوا..
حطت التليفون ع ذقنها وقالت؛ممكن سؤال..
عمر:تفضلي..
اميمه؛من تكون البنت اللي نشبح فيك ديما معاها!؟
عمر عقد حواجبه وقال:صديقه عاديه..
ابتسمت اميمه وقالت:توقعت..
عمر ابتسم وقال؛هيا سميلي الرقم..
ابتسمت وهي مصغره عيونها وقالت:نحس لو نقعدوا نتكلموا وجه لوجه احسن..
عمر:بس مش كل شي نقدر نقوله وجه لوجه..
اميمه بخجل:اني هكي نرتاح..
عمر تنهد وقال:تمام..خلي حكاية الرقم توا لين ترتاحي اكثر..
اميمه بإبتسامه:تمام..عطلت هلبه عن المحاضرة..سلام..
ومشت بسرعه..
عترت في نص الطريق..
هو قال:ياساتر!
هي تحشمت هلبه والتفتت شبحتله وهي مبتسمه بإحراج بعدين لفت ومشت كملت طريقها..
عمر تأفف وقال:مثقل دمك..
ولف ومشي لسيارته..
ركبها وشغلها..
شبح للشكولاته..
وهو يشوفلها..جو بين عيونه ملامحها وتفاصيل خجلها..
غمض عيونه وفتحهم..وعقد حواجبه بعدين لوح طرف الشكولاته من الروشن..وتحرك بالسيارة بسرعه...
🌻🌻🌻🌻🌻🌻
في نادي الفروسيه..
وسط هالجو الخريفي..
كانت سدرة واقفه مع ايهاب الفاندي وهي تسمعله..
ايهاب:مانكذبش عليك وحق المعظم امس كان عندي عيد..تخيلي نراجي في اللحظة هادي ليا خمسة سنين مش شهر ولاشهرين...بس..ع قد فرحتي..في حاجه هكي قعدت تخبرش في قلبي وماريحتنيش..
سدرة بإبتسامه:شن هي!؟
ايهاب:علاش توا!؟ شن اللي خلاك تفوتي وصية امك توا بالذات..
تنهدت وقالت؛لكل شي اوان..وهذا اوان موافقتي عليك..اما بالنسبه لوصية امي مستحيل نفوتها هي اول شروطي واخرهم..نبي مهري حوش في شارع القهوة بش نقعد قريبه ع ماليا وخواتي بالذات الصغيره مانبيهاش تفارقني يوم..
الفاندي بإبتسامه:من قبل قتلك ماعنديش مشكله والحوش اللي تبيه هذا حقك ومش حيكون مهرك مهرك خليه بروحها...اصلا وحده زيك انتي اندفع مهرك صناديق ذهب شويه عليك..
سدرة:مش لهالدرجه..
الفاندي:واكثر..لو تعرف قيمتك بس..
سدرة ابتسمت وقالت:شكرا..
الفاندي:ومازال في قلبي تخربيشه مش مريحتني..
سدرة؛يادي التخربيشه هادي!!
الفاندي ضحك بعدين قالت:ماعندك شي تبيني نعرفه..
ابتسمت سدرة وغمضت عيونها بعدين فتحتهم وقالت:لانك عارف مافيش داعي نقولك..
الفاندي:نبي نسمع منك انتي مش من الناس..
تنهدت سدرة وقالت:كان في شي وراح ع حاله وهو توا تزوج ودار عيله..
الفاندي:طالع من قلبك!؟
سدرة عيونها تعبوا دموع وطاحوا طول..
لفت وجهها عنه وغطت عيونها بيدها..
وهو حط ايديه ورا ظهره وقعد يشوفلها وحواجبه معقودات بعدين قال؛تبي تنسيه بيا..
التفتت وقالت؛لاا..لاالالا...نهائي..لو نبي ندير هكي راهو من اول مرة طلبتني فيها وافقت..مسحت دموعها وقالت..
"اني نبي خاطري ينجبر بيك"
الجمله خشت في قلب الفاندي طول..
سدرة وهي شادة روحها عن البكي:اني مكسورة من داخل ومتهشمه..موت امي كانت اكبر كسرة ليا ووصيتها كسرة اكبر..واللي صار بعدين كمل عليا...تشوفني تقول قويه..ايه ممكن نكون قويه..بس في نفس الوقت مكسورة..
رشفت وكملت تقول..شوف توا الكورة في ملعبك انت..وقعدت تأشر عليه..رضيت تبدا معاي باهي مارضيتش..بسلامتك..اني هكي ولاهكي حياتي مكملتها ومش حنحتاج فيها حد غير ربي..
الفاندي:واني مانبي شي في حياتي قد مانبيك انتي...قبل شاد فيك بإيديا بس..لكن توا بإيديا وسنوني..نبيك توا اكثر من قبل بوين..
ابتسمت وقالت:متأكد!؟
الفاندي؛هادي اكثر حاجه متأكد منها في حياتي كلها..اسمعي خلاص..غدوة ان شاء الله يجوكم امي وخواتي وعماتي وخالاتي..راهو كلهم قالوا نهار يصيرلك منها بنمشوا كلنا..
سدرة بضحكه؛مرحبتين بيهم..
الفاندي بإبتسامه:والله تقول ملكوني الدنيا بالله..
ابتسمت سدرة بخجل.. الفاندي بإبتسامه:ربي يحفظك يالسدرة..
ابتسمت وقالت:ويحفظك..
رن تليفون الفاندي..
الفاندي بضحكه:مش وقت امهم بكل..
ضحكت سدرة..
هو طلع التليفون من جيبه الخلفي وقال:خدمه..تمام..تو احني متفاهمين يالسدرة خلاص..
سدرة:قعدت حاجه اخيره..
شبحلها بإبتسامه وقال؛شن هي..
سدرة:نبي العرس بعد مااختي طوبى تكمل الاعدادي..
ابتسمت خفت..
سدرة؛مزال صغيره وتبيني معاها....
الفاندي:يعني امتى بالزبط..
سدرة؛ع 2011..
الفاندي؛بنراجي عامين تانيات!؟
سدرة؛القرار ليك..
شبحلها شويه بعدين ابتسم وقال:اللي يراجي خمسة سنين يقدر يراجي عامين توا..ع الاقل توا ضامنك ليا وبتولي خطيبتي... شوق خير..شوق خير..
ضحكت سدرة غصب عنها ..
ابتسم وقال:خلاص متفقين..
هزت راسها وهي مبتسمه..
الفاندي وهو يحرك في ايديه؛معاش في حاجه من هني ولامن هني..
حركت راسها بالنفي..
الفاندي:هكي ولاهكي..
ضحكت وقالت:لاخلاص معاش في شي..
الفاندي ضحك بعدين قال:خلاص موعدك مع قبيلتنا غدوة...وحط تليفونه في جيب سرواله الخلفي..
سدرة وهي مبتسمه:مرحبتين بيهم..
الفاندي ابتسم وقال:مازال قاعده..
سدرة:تطلع انت قبل بعدين نطلع بعدك..
هز راسه وقال:تمام..هي في امان الله..
سدرة:مع السلامه..
مشي الفاندي وسدرة معاه بعيونها لين طلع برا المكان..
تنهدت بعدين مشت خدت شنطتها من ع الكرسي
ولفت ومشت بتطلع..
وفجأة..
وقفت في مكانها..
اللحظات الحلوة والهاديه اللي عاشتها قبل شويه..
تبخرت في لحظه..
وحلت محلها عاصفه قلبت كيانها قلب..
بس مع هذا كالعاده تجاهلاته..
ومشت كملت طريقها وكأنها ماشافتاش..
هو اعترض طريقها ووقفها..
مشت من الجهة تانيه..
اعترض تاني طريقها ووقفها..
وقفت وقامت عيونها فيه..
شافت نظرات غصب في حزن في الم..
ولمعة الدموع واضحه...
العيون هادم شن ماكانت نظرتهم مع الاسف يعرفوا كيف يذوبوا قلبها...
وبرغم كل اللي تحس بيه كملت في مسلسل التظاهر بالعكس وقالت بنفاد صبر:انت شن مازال تبي مني!؟
المهدي بصدمه:شن في ياسدرة!؟..شن ديري معاه هني!؟
سدرة:انت شن دخلك!؟
المهدي:نسأل فيك سؤال واضح جاوبي عليه..
سدرة:مش ملزمه نجاوبك على شي..تبي تمارس طقوس التحكم متاعك..هونا عندك مراة احكم واطلق فيها..
وجت بتمشي..وقف قدامها مرة تانيه..
المهدي:سدرة شن في بينك وبينه ماتهبلنيش قولي في شن كنت تحكوا ع شن كنتي تضحكي وتبتسمي معاه شن كنتي تقوليله بش هو ضحك...تكلمي!؟
سدرة:مادخلكش قتلك مادخلكش يابني آدم...
المهدي شد يدها بقوة وقال بصوت غاضب:سدرة!
جبدت يدها بقوة وقالت؛هيه الزم حدك وياسرك عاد ياسر..الهى بحياتك..الهى بمرتك وصغارك ..خليك راجل يامهدي وماتكونش خوان..
المهدي شبحلها بألم وقال بإنفعال:واني امتى ماكنتش خوان..اني قاعد نخون فيها في كل وقت..في كل لحظه..نخون فيها واني نكلم فيها ونضحك معاها..نخون حتى وهي تجيب في صغاري اللي نتخيل فيهم  منك..امتى طلعت من هني انتي امتى طلعتي..وقعد يضرب بيده ع راسه وهويقول..امتى..
سدرة قعدت تشبحله بألم والدموع عبوا عيونها..
المهدي:اني مش عايش راهو والله ماعايش..
سدرة؛ايه واضح هلبه عندك منها زوز صغار والثالت في الطريق..
المهدي ضحك بسخريه وقال:لو دوري ع البلاد بكبرها حوش حوش حتلقي اغلب المتزوجين فيها عندهم بتسعه بالعشرة صغار..بس قلوبهم خاليه مافيها شي...راهو الزواج سنه في الكون كله ياسدرة ...الزواج شي...والحب شي تاني..تاني بكل بعيد عنه...
سدرة:اللي صار صار توا واللي كان كان خلاص وكل حد شاف نصيبه يامهدي عيشه تحبك مجنونه بيك..تتمنى بس رضاك ماتستاهلش منك اللي دير فيه توا..
المهدي:ديما وانتي مفضله الناس عليا..عيلتك..صحباتك..واني اخر همك اني ولاحاجه في حياتك في الاصل هذا علاش سلمتي فيا بالساهل..
سدرة تنهدت بحرقه وقالت؛ياراجل علاش تقهر فيا وتقهر في روحك..برا شوف حياتك بالله عليك خلاص..اهو حتى اني بنشوف حياتي..
عقد حواجبه  وحط يده ع وذنه وقال:شنو شنو عاودي..كيف بتشوفي حياتك!؟
سدرة:الراجل اللي شفته واقف عليا توا من غدوة بيولي خطيبي...
سيف وخش لقلب المهدي..
خش فيه وطلع.....وياااه ع قوة الألم...!
قعد يشبحلها  هو مصدوم..
هربت بعيونها عنه وقالت:سلم آمن خلاص...اني وياك مالناش نصيب في بعض يامهدي..ربي مش كاتبنا لبعض..
المهدي وهو مصدوم قال بنبرة هاديه:اشبحيلي..
سدرة:لا..
المهدي جاها من الجهة اللي قالبه ليها وجهها وهو قال:علاش هاربه من عيوني..علاش قولي..
غمضت عيونها وعطاته بالظهر..
المهدي بإنفعال:مهدي اني مانقدرش نتزوج ع خاطر امي وصتني ع اختي مانقدرش نخليها..
نقولك مستعد نكون ليك وليهم كل شي..
تقولي يامهدي انت مش فاهمني..يامهدي..اني حياتي لبوي وخواتي مانبيش تزوج!!..
شن صار توا..شن صار اها!!! شن تغير توا!!؟
سدرة تبكي بصمت ومش قادرة ترد ولاتلفت عليه..
المهدي قعد ساكت وهو يشوفلها ويتنفس بسرعه..بعدين قال:مش مسامحك اقسم بالله مامسامحك ياسدرة..والله مامسامحك في حق قلبي اللي لعبتي بيه لعب مش مسامحك لاخر لحظه كنت نسب في روحي وكارهها والندم ياكل فيا ونقول اني الظالم اللي ظلمتها وظلمت روحي وظلمت بنت الناس معاي..بس توا ماطلعش في حد ظالم غير انتي..وذنبي وذنب عايشه في رقبتك لين تموتي ياسدرة..
مسحت دموعها والتفتت عليه سدرة وقالت:كان اني ظالمه ان شاء الله ربي مايسامحني..وكان انت الظالم..ان شاء الله ربي يسامحك..
ومشت من حداه بسرعه وخلاته..
واقف يشوفلها..بنفس نظرات الغضب والحزن والألم..
بس الدموع معاش قدر يحبسهم اكثر من هكي..
حط يده في فمه وقعد يعض ع سبابته بقوة...
من القهر طلع اه...من وسط قلبه المحروق..
صوتها اللي يسمعه يحس بقوة الألم اللي يحسه صاحبها..
أما هي..
ركبت سيارتها وقعدت تبكي بعدين هدت شويه..
وخدت نفس عميق وطلعاته وشغلت سيارتها وتحركت....

(مش مسامحه اي حد يقرا ومايتفاعلش حتى بلايك)

#مكتوب_وصار
#طوبى

....يتبع....