طوبى الجزء الاول

تكمله

# طوبى "شارع القهوة"
#جمان_فريد
#الجزء_السابع_والعشرين"قطعة من جهنم الاخير "
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
خشت نسرين وفاتت ومن جنب سدرة
وسدرة سكرت الباب ولحقتها طول
نسرين وين قربت توصل لوسط الحوش..
لقت نسرين مقعمزة ع كرسي نايلو وتبان باكيه هلبه
لما شافتها خافت وماقدرتش تتكلم
نسرين بنظرات حاده:من امتى يلاحق فيك؟
سدرة وهي تشوف لفايزة؛جاوبيها جاوبي قولي ماتخافيش..
نسرين:تكلمي فايزة!
فايزة مسحت دموعها وقالت:من وليت للعمل بعد رميت العده..جاني غادي الحقير ودارلي شبهه بسببه هو سيبت العمل..
نسرين؛وعلاش ماقلتيش؟
فايزة:شن تبيني نقول شدي راجلك عليا راهو تحرش بيا!؟ شن ضمني انك حتصدقيني..
نسرين؛وعلاش مانصدقكش انتي عارفه روحك صادقه مادام واثقه في روحك اني حنصدقك..
سدرة شبحت لفايزة...
وقفت فايزة وقالت:لأنك مش حقانيه...ايه مش حقانيه ماتشبحليش هكي..شفناك شن درتي مع سدرة بعد المهدي تزوج عيشه..ريناك كيف انك تفضلي في مصلحة اللي ليك على اي حد تعرفيه..يابال مصلحة نفسك..اكيد مش حتخربي حوشك وتسيبي العيشه اللي عايشيها..اكيد مش حتصدقيني..
وبعدين اللي داراته عيشة في سدرة مانستبعداش عليك لأنكم الزوز تشبهوا بعض في الحاجه هادي تبيعوا الصحبه واالعشرة ع خاطر مصلحتكم..
سدرة؛فايزة..
فايزة وهي ترشف؛هدا الحق ياسدرة واني توا عارفتها جايه مشحونه والله اعلم شن كذب ع راجلها وهي طول صدقاته مع انه تعرفه كويس وجايتني دير فيا اني اللي ماقدرتش ديره فيه هو..وبعدها تمشي تشوه سمعتي في شارع القهوة كله بش تبرد ع قلبها...
سدرة كانت تشوف لنسرين وفايزة تتكلم..
كانت نسرين تشبحلها بنظرة مكسورة..ودموعها ينزلوا سيل.
فايزة ودموعها ينزلوا وهي تمسح فيهم؛صح ولا..هدا اللي ناويه عليه ولا!؟
نسرين رشفت وقالت؛اني عارفه من البدايه اي عينه عليك من لما كان احمد حي..بس ماكانش يقدر يقرب منك وقتها..بس بعد مات احمد حصل فرصة عمر..وقعد يزربز ويلف ويدور بش يوصل فيك بأي شكل..
تتهربي مني واني شاكه ان ورا تصرفك هدا شي دارهولك..حاولت نبينلك اني شاكه في شي بس مابتيش تحكي..اني كنت نبي منك تجي تحكي بش ناخدك من يدك ونرفعك لماليا ولبوي بالذات وتقولي كل شي بش يقتنع ويخليني نطلق..وين نقول يخون فيها يقولوا تتوهمي..يقولوا الرجاله كلهم هكي يقولوا ماعندكش دليل..بالعبرة قالت..مصلحتهم معاه..اهم مني..اهم من مشاعري واللي اني نحس بيه..مش انتوا تقولوا عليا بليده هو زاد بلدني وخلاني باردة وهما معاه وقعدت نعوض في روحي بالفلوس والذهب والطلوع والسفر..وطنشت وعشت عادي...وخليته يعيش براحته واني عشت براحتي كنت نحساب ان هدا الصح..بس طلعت نخلي فيه يتمادى...لين وصل في اقرب الناس ليا..
اني جيتك بش ناخدك معاي لحوش بوي ونخليك تحكي اللي صار كله..بس توا خلاص..مش حنحطك في الموقف هدا اللي مرات يضرك ع قد ماحينفعني..بس في نفس الوقت يافايزة الكلام اللي سمعته بينلي هلبه حاجات..ان حني بعاد عن بعض هلبه ومانعرفوش بعض بكل..اني بس نعرف صاحبه مالهاش امان زيي شن اللي يخليك تقعدي صاحبتها!..تنافقي يعني؟
فايزة قعدت تشبحلها وهي منصمته مش قادرة ترد حتى بتعابير وجهها..
نسرين؛من بعد اليوم مانكش مجبورة تنافقي حد يافايزة...
سدرة:نسرين..
ونسرين مشت طلعت وهي تمسح في دموعها اللي كانوا ينزلوا اجباري عنها..
فتحت الباب وطلعت ومشت لحوش بوها...
سدرة اللي كانت واقفه اخر الممر وهي تشوف فيها كيف طلعت..
شبحت لفايزة .
فايزة غمضت عيونها وحطت يدها ع جبهتها بعدين نزلتها وفتحت عيونها وقالت؛سدرة ابعتي البنات مع طوبى..
ومشت من حداها وخشت دارها وسكرت عليها..
فهمت سدرة ان فايزة تقعد بروحها..
تنهدت ومشت للباب وهي تقول:يقعدوا صاحبات وخوات دنيا لين يجي راجل ويفرقهم..وهما ماتفرقهم المراة..
فتحت الباب وطلعت ومشت لحوشهم .
شافت الدكتور اياد واقف ع واحد يكلم فيه وهو شاد ورقه كانت ورقة التحاليل..
غيرت عيونه عنه..هو شبحلها صدفه وقعدوا عيونه عليها..
اياد؛وهو هدا حبيبي..
:بارك الله فيك دكتور..
اياد بإبتسامه:طهور ان شاء الله..
ومشي بسرعه جهة حوش لطفي..
كانت سدرة حتسكر الباب لين شافاته..
ابتسم وقال:السلام عليكم..
سدرة:وعليكم السلام دكتور..
اياد؛الوالد قاعد.
سدرة:ايه..
اياد:معليشي تناديه..
سدرة؛حاضر..ردت الباب ومشت..
وهو تنهد وقعد يدور بعيونه في الشارع لين التفت للمطحن شاف المهدي واقف قدامه حاط ايديه في جيوبه ويشبحله بإمتعاض...
هو ابتسم ورفع يده وحياه..
وهو رد عليه..
"دكتور تفضل علاش واقف برا"
شبحله اياد وقال:كيف حالك عمي لطفي..
لطفي:الحمد لله..غير خش بعدين نهدرزوا..
اياد:لا والله مافيها كيف مازال بندور ع باقي حياش الشارع..
لطفي:علاش ان شاء الله خير..
اياد ضحك وقال:خير خير..غير عازمكم غدوة بإذن الله ع الغدي..صفرة شاميه بإمتياز بإيدين سوريه..
لطفي بضحكه:والله ماقايل لا ومفوت ع روحي عزومه زي ضحك اياد بعدين قال:نتشرف بيك..
لطفي:خلاص بعد صلاة الجمعه نكون عندكم..
اياد:مرحبتين بيك..هي تصبح ع خير..
لطفي:قدامك كل خير..
ومشي اياد لحوش الجد الواعر وطلعله يوسف ودخله بش يعزم الحاج علي وعبد المطلب..
والمهدي واقف قدام المطحن ويراجي فيه يطلع عنده فضول يعرف شن يبي من حوش الواعر..
طلع من عندهم وهو يسلم ع يوسف..
خش يوسف وسكر الباب..
واياد شبح للمهدي..ابتسم ابتسامه عريضه..
ومشاله..
والمهدي واقف يشبحله وهو مستغرب..
وصل فيه وقال؛عنتر شن جو..
المهدي بملامح وجه بارده وقال:كان كويس..
ضحك اياد وقال ؛وتوا ولى اكوس..وقعد يضحك..
والمهدي يشبحله بنفس الملامح وعنده رغبه يعطيه بوكس بس مايقدرش..
هدا اياد ضحك وقال:خلينا في الجد توا..ياسيدي غدوة بإذن الله داير عزومه عندي في الحوش ونبيك تتفضل..وياريت لو الوالد موجود تناديه خل نعزمه..
المهدي:شن المناسبه..
اياد بملامح جديه؛بنرحلوا...
المهدي بفرحة يحاول يخفيها واستياء مصطنع:لالالا..معقوله ياراجل! علاش!؟
اياد:هدا حالنا حني مانستقروش في مكان كل مرة في تركينه...
المهدي:والله شن بنقولك هدا حال الدنيا..يللا ربي يوجهكم لوين مافي خير..
اياد بإبتسامه:ان شاء الله..بارك الله فيك..وبالله كان الوالد قاعد ناديه..
المهدي :لحظه..وقام تليفونه واتصل ببوه..
شويه وطلع محمد شنيبه..
محمد:اهلا دكتور كيف الحال..
اياد:الحمد لله..شن امورك انت شن حال الصحه..
محمد:الحمد لله كله تمام..
اياد:تمام..عمي محمد عازمك غدوة ان شاء الله ع الغدي ع اكل شامي مافيشي ريحة الليبي بكل لاعصبان لابازين..
محمد بضحكه:حاضر نجي ليش مانجيش..
اياد:وحني نتشرفوا والله..
محمد:ع خاطر حاجه ولاهكي وخلاص؟
كيف جي بيتكلم المهدي سبقه اياد وقال:والله رد شويه من جمايلكم علينا اني وولدي.
المهدي رفع حواجبه..
محمد:جمايل شني ياراجل رانا عيله وبينا مافي جمايل..
اياد بإبتسامه:بارك الله فيك..هي نستأذن توا ماشي لجيرانكم..تصبحوا ع خير..
محمد:قدامك كل خير...
مشي اياد..
ومحمد شبح للمهدي:سادك خش للحوش تو يكمل عليك محمود ويسكره..
بعدين مشي خش داخل..
والمهدي مازال يشبح لإياد اللي واقف ع الصيد ويكلم فيه..
واعصابه بدت ترقى..
واياد كمل باقي دورانه ع حياش شارع القهوة وعزمهم ومافي حد قال لا..
وقعد المهدي واقف يراجي فيه..
لين جي مولي فات من قدامه..
المهدي:تافه عندك علم؟
شبحله اياد وقال بضحكه:ايه عندي علم بروحي من زمان..وبكري عطيتك علم بروحك....وشبح القدام ومشي كمل طريقه لحوشه..
المهدي كان خلاص بيمشيله يضربه ووتى حتى يده اللي بيضرب بيها بس وقف في مكانه وغمض عيونه وخبط قبضة يده اليمين بكف يده اليسار..
وبعدها فتح عيونه وخدي نفس ومشي خش للحوش وخبط وراه بقوة..
☘☘☘☘
"لالا والله مادخلني يايبعتوا صفرة مشكله يانهد عليهم"
لطفي:تو ندسلك ماتخافيش..
مطيرة بضحكه:البس سوريه عربيه جيوبها كبار..
سدرة؛مانبصرش اني راهو والله خاطري في ماكله شاميه من ايدين السوريين نفسهم..
مطيره؛اني ندير في ماكلتهم خير منهم انت غير اعزمهم يوم تاني وشوف شن يقولولك..
طوبى:والله حتى اني تسهفت..هما مفروض دارو العزومه للنساوين هما اللي يطيبوا ويتعبوا الرجاله مايديروا في شي كان يرفعوا الصفر وخلاص..
وشبحت لبوها وهي ترمش في عيونها..
قعدوا يضحكوا..
سدرة بضحكه؛والله عندها حق..
وهما يهدرزوا..
وفردوس حابسه روحها في الدار تسمع فيهم وهي تبكي بصمت..
اليوم مفروض صغارها يجوها بس فضلوا يقعدوا في حوش جدهم لان ثريا دايرة عيد ميلاد ولدها الكبير"وليد" وهما يبوا يحضروه.
واللي زاد قهرها انها كل ماتحاول تتصل بمصطفى يعطي في الصغار يردوا عليها ولو كان برا بروحه..
وبدت هكي توتي في روحها للطلاق..
خلاص ليها شهور في حوش بوها والراجل رافض رفض قاطع انه يتواصل معاها..واضحه نهاية اللي يدير فيه..
لهدا هي اللي اتخذت القرار هالمرة..
راجت لين الكل يرد ويسكن الصوت..
ومشت طلعت من الدار للجنان..ورا الحوش.
قعدت تتصل وتعاود اكثر من مرة وهو مايردش..
بعتتله رساله..
"نبيك ضروري"..
شويه وهو اتصل بيها..
كيف جت بتقول الو..
هو قال..
"يعني لهالدرجه ماتفهميش انتي مانبيش نكلمك واضحه مانبيش..نسمع..صوتك..مش طايقك بكل"
نزلوا دموعها وهي تقول:عارفه..اني مش متصله بيك بش نهدرز عليك ولانسمعك صوتي..اني اتصلت بيك بش بنقولك شي واحد..إما إمساك بمعروف او تسريح بإحسان..
صمت تام..
فردوس:خلاص مش حلوة في حقي ولاحقك اللي قاعد يصير ماناش صغيرين حني..ومدام انت خلاص معاش تبي..خل نتفارقوا بالمعروف خير..
" هكي ببساطه !"
فردوس:لا مش ببساطه يامصطفى..اني حاولت معاك هالشعور بعتلك حتى مع الصغار لكن انت ماتبيش بكل انت بايع ومعاش تبي يامصطفى مش حنفرض روحي عليك بالسيف..بس صغاري راهو مش مستغنيه عنهم نبيهم ونبي نقعد عليهم وانت برا شوف نصيبك مرات ربي يعطيك كيف ماتبي ويعوضك ع السنين اللي قهرتك فيهم..
"تمام زي ماتبي"
وسكر عليها...
هي نزلت التليفون وقعدت تشبحله بعدين حطت ايديها ع وجهها وقعدت تبكي بألم. بكت لين طاب مافي خاطرها..بعدين ناضت خشت للحوش..
ومشت للدار وبصعوبه رقدت..
🌻🌻🌻🌻
الساعه 6:30صباحا..
"فردوس..فردوس"
فاقت وهي تقول:هممم..
طوبى بإبتسامه:نوضي توضي وصلي وبعدين البسي لبسه حلوة واطلعي لمصطفى..
كل شي فيها فاق في مره..
قعمزت وهي تقول:شن تقولي!؟
طوبى بضحكه؛مصطفى جي جي..نوضي..
فردوس بإحباط قالت في نفسها "مش قادر يصبر جايني من فجر ربي بش يطلقني"..
وناضت من مكانها ومشت للحمام..
ضحكت طوبى ومشت للكوجينه.
لقت غرفه مقعمزة تاكل في الفطاير ع الصبح وميه وجهها قاعده ماجفتش..
طوبى:صليتي..
غرفه؛يس..
طوبى"صلاة خالتي مغليه":باهي علاش مادرتيش فطور للراجل .
غرفه وهي تاكل:طوبى مش رايقتلك ديري الفطور بروحك كان بديري ..
طوبى مطت شواربها بملل وبدت تجهز للفطور..
••برا••
سدرة:والله فردوس امي داعيتلها في ليلة قدر..
لطفي بإبتسامه؛تو انت ياولدي واثق من قرارك تبي تردها خلاص..
مصطفى بإبتسامه:اني ياعمي درت هكي بش نأدبها بس ماعنديش غرض تاني غير هدا..
سدرة؛وهي راهو تأدبت مليح وانت سلم وخيي شد عليها ماتقعدش ترخي معاها بعدين تحصل..
ضحك مصطفى وقال:عندك حق..
لحظات وطلعت عليهم فردوس..
جتهم بملامح وجه كئيبه..
مصطفى:غير اقلبوا وجوهم بندير فيها مقلب..
سدرة :نحب المقالب..وماصدقت عاد قلبت وجهها..
وصلت فيهم وقالت:السلام عليكم..صباح الخير..
هما باصوات متقطعه:وعليكم السلام..صباح النور..
لطفي:اني نستأذن..ومشي خش داخل..
سدرة؛جايه معاك بوي..ومشت وراه..
والزوز خشوا داخل..
فردوس:قلت لبوي؟
هز راسه وهو ساكت..
فردوس:كنت تقدر تصبر للعشيه مش تجي ع فجر ربي ترعش راجل مريض ضغط..
مصطفى؛والله للأسف ماقدرتش نصبر..
فردوس:الصغار وين؟
مصطفى:في حوش جدهم..
فردوس؛جيب الصغار يامصطفى ماتخلنيش ناخدهم منك بالقانون..
مصطفى؛تمام يصير خير..
فردوس نزلت عيونها وقالت:هي ارمي اليمين..
مصطفى:مستعجله!
فردوس:هي مصطفى..
مصطفى:انتي...عمري وروحي وحياتي مانقدرش نعيش من غيرك..
هي فنصت تحساب روحها تهلوس
رفعت عيونها فيه..
مصطفى بإبتسامه:كان انتي مستغنيه اني لا..
فردوس دموعها نزلوا:وشن قصدك بكلامك امس!..
مصطفى:ماقصدي شي..اني اصلا شن قلت ماقلت شي..
قعدت تشبحله لحظات..بعدين ضرباته ع صدره وقالت:والله ماتتحشم..وحطت يدها ع وجهها وقعدت تبكي..
وهو يضحك ويقول؛خلاص اسكتي.
ع جية طوبى بسفرة الفطور وهي تقول؛واهو جي الفطور وسعوا وسعوا..
ضحكت فردوس من بين دموعها..
وقدم مصطفى خداه منها وقال:صحيتي..
طوبى؛هاه شن صار حليب ياقشطه زيت وشاميه..؟!
فردوس بضحكه؛بري خشي داخل يامزغده بري..
طوبى بإبتسامه؛خلاص فهمت سمن ع عسل.
ومشت خشت بسرعه وهما يضحكوا عليها..
☘☘☘☘☘
وفي حوش الجيران..
عيلة الصيد..
نجاح وعواطف وهما يشربوا في القهوة..
عواطف وهي مضيقه عيونها وتشبح في الفراغ:ياوخيتي امس ماقدرتش نرقد واني نفكر كيف محي ركب لحوشه وماصارتش مشكله بعدين..زعمه قتلاته!؟
نجاح؛معاش تتفرجي ع الهنود..
عواطف:باهي فهميني شن صار!
نجاح؛واني وين نندري عليهم زيي زيك..ياودي ياخبر توا بفلوس بعدين يولي بالبلاش..
🍃وفوق..
في شقه خوهم..
كان محي واقف يمشط في شعره..
بعدين حط المشط وبخ عطر...
وبعدها خدي تليفونه بعت مسج لصابرين..
وحطه في جيبه ومشي طلع من الدار..
للكوجينه..
لقي خديجه واقفه فيها بكامل اناقتها وهي تخلط في عصير طبيعي في الخلاط..
محي:صباح الحب..يالحب..
خديجه بإبتسامه؛صباحك ورد حبيبي..قعمز..
محي؛وين الصغار..
خديجه؛فطرتهم وقعزمتهم قدام التليفزيون..
محي قعمز ع الكرسي وقال؛كويس..
هي جاته بمالقي العصير صبت طاسه وحطتها قدامه..
محي؛يسلموا ياعمري..
ابتسمت وقعمزت وهي تقول:افطر حبيبي..
محي:اهو نفطر قلبي..
وقعدوا يفطروا هما الزوز..
رن تليفونه بنغمة رساله...هو ثبت ع لقطه للحظه بعدين رجع ياكل عادي..
شبحلها لقاها تاكل ومش مدورة..
ابتسم بإرتباك وخدي طاسة الميه وقعد يشرب بعدين ردها ورجع ياكل..
بعد الفطور..
حددتله لبسه العربي وعطراته وعلقاته..وماكانتش هادي تصرفات جديده عليها خديجه مهتمه بحوشها وراجلها هلبه..
لهدا محي الدين حس ان كل شي ماشي طبيعي مافي شي لفت انتباهه..
هي بعد ماكملت شغلها..
لبست عبايه ووشاح وخدت صغارها ومشت لحوش بوها..
وغادي تلقتها امها ووجهها مايبشرش بخير..
مغليه بقلق:حاسه هداكا الحقير اشبح شن دايرلها..
خديجه هزت راسها وقالت:هاني ماشيتلها طيبي غداك امي ومادوري شي..
ع نزلة نضال من فوق:ماتت قلوب الناس..ماتت بها النخوه..
غمضت مغليه عيونها وقالت:يرزيك في هالأغاني.
وفتحت عيونها ومشت وهي معصبه للكوجينه..
وهو يتبع فيها بعيونه ويضحك..بعدين شبح لخديجه وقال:صباحو دج دج..
خديجه:صباحو فل..ومشت لدارهم ..
وهو مشي للكوجينه..
خشلها وقعد يغني..
اطفال شيوخ نساء تصرخ وماحدش سامع..
اشلاء دماء شهداء..
لاالا يام لا..
طلع يجري ووراه المغرف طاير لكن مجاش فيه وطاح لوطا..
☘☘☘☘
في دار خديجه ونسرين..
كانت نسرين راقده وحاطه ذراعها ع عيونها..
خديجه جتها حولت عنها الغطا وهي تقول:نوضي تحركي..نوضي وياسرك من جو المراة المتحطمه..
حولت نسرين وقالت وهي تبكي:نبي نطلق اني خلاص معاش نقدر نتحمل 
خديجه:امم..وبعد تطلقي شن يصير..امه مستحيل تخلي الصغار عندها هي اصلا تعاني فيهم بش طلعك انتي ماتنفعيش..واكيد هو حيلوحهملك..ويقعدوا في رقبتك الثلاثه..
من ياخد بعدين مراة في رقبتها تلاته صغار..
نسرين؛ومن قالك نبي نتزوج..معاش نبي خلاص..
هزت راسها وقالت؛تمام مش حتتزوجي..بس معاناة تلاته صغار ع روس بعض بروحك تحسابيها ساهله! ولا عابيه ع خوتك متلا..اللي هدا بعدين ياخد مراة ويقعد لاهي بحياته وانتي تقعدي ممردة بروحك..والسيد حامد عايش حياته بالطول وبالعرض..
قعمزت وهي تقول:انتي مش فاهمه شي هو اصلا يبي يطلقني زايد ناقص..
خديجه؛وعلاش مادارهاش من قبل!؟..لأنه يبيها تجي منك..بش مايقولوش عليه طلق مرته ولوح صغاره ع خاطر نزواته..راجلك مظهره العام يهمه هلبه لذلك مش حيطلقك الا اذا طلبتي الطلاق..وانتي مش حتطلبي حتقعدي ع قلبه..هكي..وحطت ايديها ع بعض..
نسرين وهي تبكي:انتي مش عارفه شن صار مش عارفه!
خديجه بتساؤل؛علاش شن صار..مع مني هالمرة وحده تعرفيها!؟
نسرين قعدت تشبح لأختها وهي ساكته ع راس لسانها اسم فايزة بتقوله..
بس فكرت في ردة فعل خديجه..عارفتها حدير العار ومش حتحسن الظن في فايزة نهائي..
نسرين:لا..بس اني شفتهم يعني في السيارة!
خديجه:وان شاء الله في شقه..طز..طز...استكرديه بس اقعدي ع قلبه..خليك انتي الملكه والباقي كلهم جواري..
نسرين تسمع في كلام اختها وتفكر فيه..
خديجه؛صدقيني يانسرين..مافي حد حيوقف معاك..انتي اوقفي مع نفسك وخلي كلمة الطلاق برا قاموسك..
نسرين قعدت تشبح في الفراغ بحزن وضيق ودموعها ينزلوا..
وخديجه تقول؛قوي روحك اقهريه وماتخليشي يقهرك..
نسرين شبحتله لاحظت الدموع في عيونها قالت؛خيرك خديجه..
رفعت حواجبها وقالت؛شي محروق دمي منك بس..
جتها قعمزت حداها وحضنتها وقالت:خليك قويه نانسي خليك ديما انتي الكاسبه مش الخاسرة...
ونسرين وهي في حضن اختها قعدت تفكر في كلامها...
☘☘☘☘☘
في الطريق..
مصطفى:ماتخلي حد يبني سعادتك ع خرابنا حني يافردوس..حطي عقلك في راسك وفكري في صغارك بس..واني ربي يقدرني ونعيشكم احلى عيشه وعمري ماحنقصر في حقكم..
قعد تشبحله بإبتسامه حب ونظرات ندم..
في شهور البعد تأكدت فردوس انها غنيه هلبه براجل زي مصطفى مافيش منه فهالدنيا وقعدت تدعي في نفسها لربي انه يحفظه..
🌻روحت ع حوش شيابينها..
فرحوا بيها عزوزتها وشيبانها هلبه..
وحمواتها حتى هما بس مش اكثر من فرحة صغارها برجوعها..
ودارولها احلى غدي بمناسبة رجعتها لحوشها وصغارها..
🌻احلى غدي..
كان غدي حوش اياد..
اصناف واشكال من الماكله السوريه والرجاله ياكلوا بشهيه..
بس الحاج الواعر ماتقبلش الماكله هلبه جامل مجامله وقعد يدعي لربي ان صفيه تخليله من غداها..
وبعد الغدي كانت في تحلايه...
ومن كل شي بعتوا مع الضيوف لحياشهم..
☘نضال:يااهل المروة والعزة والكرامه والطيبه والنخوة والشرف والشهامه..
مغليه؛تي حط الصفرة قبل لتجي مقلوبه ع وجهها..
حط السفره وقال:هي ابدوا..
خديجه:يسهف..
نضال:البنه بروحها..
خش الجالي وقال:يام شن درتوا غداكم..
مغليه:عيشه دارت كسكسي..
الجالي؛خليتولنا...
مغليه:علاش ماتغدتيش غادي!
الجالي؛عارفتيني مانعرفش ناكل قدام الناس..
نسرين؛باهي تعالى..
الجالي:عادي!
خديجه؛غير كول بالشويه..
جاهم طول وقعمز ع روس صوابعه وقعد ياكل..
نضال:العفو!!!..واني ياحناتي خيركم ماعزمتوني ماتجيش عليا العزومه ولاشني!؟
ضحكوا ع اسلوبه..
والجالي قال:وين بتحطه وين..قعدت تاكل بإيديك ورجليك وتقول..ماناكلوا حق كان برا..
فنصوا فيه امه وخواته..
هو حدف المخده ع الجالي وقال؛تصدقي فيه يام كذاب الفتان هدا..
الجالي بربع عين :كذاب!!
مغليه؛باهي باهي بارك الله فيك..
نضال؛يام....!شبح للجالي بحده..
والجالي ضحك عليه بعدين رجع ياكل..
كلهم قعدوا ياكلوا بصمت..
ونضال يتفرج عليهم بعدين قعد يغني..
النذل بيزرع فتنه بيحصد شر النذاله.
والجالي يضحك وهو ياكل..
🌻🌻🌻🌻🌻
سدرة:اممم الله الله يسلموا والله..
مطيرة؛الحق نفسها حلو بالذات في الكبه المشويه..
غرفه:محشينا احلى..
طوبى؛محلاها اللحمه بعجين..
سدرة:حتى عجبتني..
"مطيرة يامطيرة"
مطيرة؛بوي..وناضتله تجري..
سدرة:ان شاء الله خير..
وصلت فيه مطيرة قالت:نعم بوي..
علي وهو معصب:شن درتوا غداكم..
مطيرة؛رز بالبصله..
علي:خليتي منه؟
مطيرة بضحكه:درتلك بازين بالفول..
الحاج علي عيونه لمعوا بالفرحه:جديات!؟
مطيرة بضحكه:والله عارفاتك مش حتعجبك ماكلتهم..خش وبيي للمربوعه خش لين نسخن صونيتك ونطلعها..
علي خش داخل وهو يمشي بعكوزه:هي خشيت سقدي روحك..
مشت للكوجينه وهي تضحك..
☘☘☘☘☘
"والله ماشاء الله تعرفي طيبي نفسك في الماكله ماشاء الله"
نجاة:صحتين عمتي..
لطفيه:ها شني مش مخططه لجيابك..
نجاة:الحي واللي يعيش ياعمتي مازلت في الشهر الخامس..
لطفيه:فيسع مايفوتوا وتلقي روحك جايبه..زي ماتعرفي اول عيل ع عيلتك من توا وتوا رواحكم مانبيش نقعد في حشايم قدام الناس..
نجاه بلعت ريقها وقالت:ربي مايجيب حشايم ياعمتي حني مانديروا كان الحاجه اللي تشرف..
لطفيه:تو نشوفوا..
نجاه ويدها ترعش من الغضب اللي تحاول تكبته خدت طاسة الشاهي الاخضر وقعدت تشرب فيها وفي نفسها تقول..
"ياما بتشوفي ياعزوز الستوت "
~~~~~~~~~
في الطريق..
طاهر:خيرك ساكته؟
نجاة:لاشي هكي وخلاص...طاهر..
طاهر؛نعم..
نجاة؛شن رايك نخطموا ع حوش بوك..
طاهر:لا الاسبوع الجاي ان شاء الله زي هاليوم نمشولهم..
نجاة:اعتقد هكي غلط انت قاعد تبعد في بوك عنك..
طاهر:عادي عشت عمر قبله..
نجاة:ماتكونش جاحد طاهر وتنسى اللي داره ع خاطرك
تنهد وقعد ساكت..
نجاة:الدنيا فيها حياة وموت..
هز راسه وقال:عندك حق..بس برضو مش حنمشوا غير الاسبوع الجاي..
مطت شواربها ع جنب وقعدت تشبح القدام..
🌻🌻🌻🌻🌻
"علاش هكي يايوسف علاش!؟"
يوسف بضيق:خلاص هدا اللي صار ياسدرة.
سدرة:غلطت غلطه كبيره..كان جيتني وكلمتني يايوسف غلط اللي درته اكبر غلط..الحداد اصلا حرام اكثر من تلاته ايام واني مدة حدادي تمت خلاص مش من حقك تتصرف من راسك وتقرر بدون ماترجعلها ولاتسألني..
يوسف قعد ساكت وهي مضايق..
سدرة:عطيني رقمها نكلمها..
يوسف:مش حتحصليها سافرت لسوريا..
خبطت سدرة كفوفها ببعض اسفا بعدين قالت؛حرام عليك والله حرام..
تنهد وناض وهو يقول:ماتبي شي..
سدرة:لامانبي شي..برا اطلع برا اطلع...اهرب..
مشي طلع من الحوش وهي طارتلها منه هلبه..
وبعد ماطلع بشويه مشت سدرة لحوش فايزة تشوفها..
فايزة وهي طبق في الحوايج:لااليوم خير من امس..
سدرة:باهي اني مش متكلمه معاك في الموضوع بش مانعكرش جو بس جايه نحكيلك ع عملة يوسف..
~~~~~~~
صفيه:والله يومها مرضت ..بس مابيتش نقول لسدرة بش ماتحملش روحها الذنب..
مطيره:حتى هو دار نفس الشي خدي قرار بروحه ونفد وخلاها في الوسط مسكينه..
اميمه بحزن:حتى اني وجعتني هلبه وتعاركت معاه ع خاطرها وقعدت فتره مانكلمش فيه..
صفيه:المشكله البنت خلاص سافرت مع اماليها ويبوا سنه بش يروحوا..
مطيرة:لاحول ولاقوة الابالله...
☘☘☘☘☘
الساعه 8:00مساءا..
خش للحوش..
سمع دوشة صغار..استغرب..
كمل طريقه داخل..شافه ولده جاه يجري..
"بابا"
هو طبس وضمه ورفعه فوق وقال:اهلا بابا..
جاته بنته تجري؛بابا روحنا..
مسح ع شعرها وقال؛اهلا حبيبتي..
فات نسرين من قدامه وهي شاده صونيه معبيه شيبس..
نسرين وهي تاكل؛جيت!..هونا امك مخليتلك عشي..
ومشت من قدامه وهي تاكل في الشيبس بعدين سمعها تقول:منجيه كان سدرة ناضت الحقيني بيها لدار المعيشه..
هو غمض عيونه بنفاذ صبر بعدين فتحهم وقال:تفي ع الحظ..
فرح؛شني بابا..
ابتسم وقال:شي بابا شي..هي نمشوا لحنينه...ومشي بصغاره لجناح امه...
☘☘☘☘☘☘
الساعه 10:00ليلا...
محي الدين:اووو جت في وقتها...
عطاته طاسة مغلي البابونج وقالت:اشربه وخل ندلكلك كتافك..
محي:ايه والله يوجعوا فيا هلبه اليوم..
جت وراه وقعدت دلك فيهم وهي تقول:انت تجهد في روحك..
محي الدين؛ع خاطر مني ندير في هدا كله مش ع خاطركم!
خديجه:حني مانبوا شي غيرك انت حياتي..
فجأة رن تليفونه..
قامه وهي شافت الشاشه..
ابوالغيث يتصل بك..
خديجه:رد..
محي:ماعنديش فيه نيه واحد نفاخ ودراه كبد..
وداره صامت وحطه في جيبه وقال؛ايه شن كنا نقولوا..
~~~~~~~
صابرين:شكلها هديكا الثعلبه قاعده بحداها..
تنهدت بعدين حطت التليفون ع تركينه وقعدت تدهن في شعرها بديرله حمام زيت...بزيت الحية...
🍀🍀🍀🍀🍀🍀
بعد يومين..
في واحد من المقاهي..
خديجه:صاحبات قدم انتم..
:هلبه..
خديجه:حلو..يعني تعرفوا عن بعض كل شي..
:بالتفصيل..
خديجه:اها..يعني اكيد عندكم ذكريات مع بعض وفيها اسرار صح..
:ولتوا..يعني صح كل وحده لهت بحياتها بس نعرفوا كل شي ع بعض..
خديجه:حلو..باهي شن رايك في 1000 جني..
البنت انصدمت..
خديجه:ليك حلال صافي..بس مقابل..
البنت بحماس:شن هو واني مستعده نديره...
☘☘☘☘☘☘
"زي ماخداته ايطاليا اخر مرة حتاخده مرة تانيه"
:تي روحي انتي وايطاليا متاعك .
داليا؛مالا من بياخده بالك البرازيل!
:ومن عيونهم كلهم...
اسامه:هدي يانمر المرة هادي الكاس للطواجين وقول قالها اسامه..
واميمه مقعمزة معاهم في القاعه وتسمع في نقاشهم وهي مبتسمه..
اسامه:وانت ياكناري من تشجع..
شبحولها زملائها..
وهي سؤاله رجعها سنين لتالي..
لما كانت في عمرها16 سنه...
كانت واقفه فوق السطح تنزل في الحوايج....
شافت عمر هو وصحابه مروحين لحوشهم وكلهم لابسين سيريات الارجنتين..
ويتكلموا عن ميسي..
عيونها كانوا يشوفوا فيه هو بس ومن بعد ماعرفت من يشجع برغم انها مالهاش في الكورة بس شجعتهم..
وهدا اللي خلاها محط سخريته..
في مرة لما تلاقوا في الشارع..
🌻غرفه:تو تشوف شن دير البرازيل...
عمر:والله مادايرة حاجه راحت عليكم خلاص..
غرفه؛تو نشوفوا...
وامهم تسمع في نقاشهم ومش عارفه كيف تخش فيه..
هو شبحلها وقال:شينه..
شبحتله طول..
ضحك وقال:عرفت روحها .
قعدت تضحك غرفه..
هي وجهها ولى احمر وغيرت عيونها عنه.. عمر:غير جديات من تشجعي شينه...
اميمه يدوب رفعت عيونها فيه وقالت بإرتباك وخجل:ميسي..
هو غطا وجهه وقال:لاااالا ياربي لا وووه..
غرفه:انتحستوا ياولد جيرانا..
نزل ايديه وقال:بالله عليك شجعي البرازيل..
غرفه؛ووك عليا لالا شجعي ساحل العاج..
ضحك ومشي وهو يقول:قنعيها..
غرفه:تو نحاول..
واميمه ودموعها في عيونها تبعاته لين خش لحوشهم..
ضربتها غرفه ع راسها وقالت:شن فهمك في الكورة انتي..علاش تحكي فيها..
اميمه نزلوا دموعها وقالت:معاش ديرهالي الحركه هادي...
ومشت بسرعه وخشت لحوشهم وسكرت الباب وقعد تبكي..
🍃🍃🍃🍃
"اميمه اميمه"
استاقظت وشبحت لأسامه وعيونها معبيات دموع..
داليا؛شكلها من جماعة البرازيل..
:قولي من جماعة ايطاليا قلبها حاسها انها حتطلع من الدول الاول..
ضحكت اميمه ومسحت دموعها وقالت:اني السنه هادي بنشجع منتخب عمره ماخدي كاس عالم..
اسامه بفضول:زي مامني ترا..
اميمه:امم..اسبانيا..
:تراهنوا انهم حياخدوه مدام شجعاته هالملايكه هادي..
اسامه خبط طاولته..
زملائهم شدوا ضحكتهم..
والولد اللي قال الكلمه ضحك وقال؛Sorry
واميمه ماحبتش اللي صار..طول التفتت القدام وفتحت اللاب توب ولهت بيه..
واسامه يشوفلها بإبتسامه..
☘فهالوقت..
كان عمر متوجه لمكان التدريب وهو مشغل اغاني عاطفيه في سيارته وياكل في السنكرس..
بعدين قال:والله معاد نقدر نصبر اكثر من هكي خل نمشيلها اليوم نكلمها..ضروري نكلمها..
☘☘☘☘
بعد المحاضرة..
طلعوا اميمه وداليا وهما يتناقشوا عن المحاضرة..
وقعدوا يمشوا مع بعض لين وصلوا لمكان اميمه المفضل اللي ولى مكانهم الزوز..
اميمه:امتى يتجي للمعهد اليوم..
داليا:الاربعه..
اميمه؛بعدك بنص ساعه بنطلع نوتي روحي لمشية العمره..
داليا:يابختك ..
ابتسمت اميمه وقالت:عقبالك..
داليا:يارب..
🌻فهالوقت..
خش عمر الكليه وقعد يدور فيها لين لقاها..
ابتسم من قلبه..وانشرح صدره..
بعدين تنهد وقدملها..
اميمه؛هاه شوفي اثره ع يدي خودي منه..
داليا؛عاودي اسمه..
اميمه:أ...
"السلام عليكم"
داليا شبحتله بعدين شبحت لأميمه..
اللي وجهها ولى احمر وماعرفتش ان كان غضبا او خجلا..
ودموعها في عيونها..
فجأة..
ناضت ومشت وهي تلبس في شنطة اللاب توب..
داليا:خلي البنت ساد ماجاها من وراك..
عمر:سكري فمك انتي..ومشي لحقها..
قرب منها وهو يقول:اميمه ميمو..قلبي..عيوني انتي.بالله عليك اوقفي واسمعيني..
وقفت..
هو طول جي قدامها وقال:هالمرة بالله عليك ماتدويش اسمعيني بس..
اميمه بنظرات عيون لونهم من لون البحر زايد غارق في بحر دموعها..بس كانت حاده:انت شني قولي شني غرورك لوين ناوي يرفعك لهالدرجه مش شايف حد كان نفسك..
يوم تكسد ع هادي يوم تضحك ع هديكا..ويوم تخطب غيرهم..لهالدرجه انت تافه ووضيع..
عمر:اميمه ماتغلطيش في الكلام..
اميمه:لا نغلط ونص وعشره..باهي..واحد زيك انت مفروض مايغلطوش في غيره..
عمر:علاش تدوي هكي فهميني..اميمه مش معقوله بعد هدا كله مازال في عقله اني نضحك شن ندير بش تصدقيني نحدف روحي قدام سيارة..!
اميمه:بالله معاش تكلمني هكي الكلام هدا معاش يمشي عليا معاش ينضحك عليا بيه..تي يابني آدم رانا ساكنين في شارع واحد تحساب الدوة مش حتوصلني!
هو بعدم فهم:دوة شني!؟
اميمه؛برا انشد اختك خديجه تو تقولك...
ومشت من قدامه وخلاته حاير ومش فاهم شي .
وقعد يتسائل"شن قايله خديجه"
طول قام تليفونه واتصل بيها ماتردش..
مشي طول طلع لسيارته ركبها وتحرك طول للحوش..
~~~~~~~
مغليه:مافيش لادوة لادواوي.
عمر:يام مادرقيش عليا قولي انتي خير مانعرف بروحي..
مغليه:شن تهدد فيا! اسمع جاي اني ماعندي شي نقوله وكان تبي تعرف حاجه راجي خديجه لين تروح وتقولك..
~~~~~~~
في جنان حوش الصيد..
خديجه:دوة شني مافي شني..
عمر:خديجه كان عرفت من برا تندمي..
خديجه:برا انشد واللي يقولك قالت خديجه واجهني بيه..
عمر هز راسه وقال:تو نعرف بروحي.
ومشي بيطلع ..
خديجه؛اقعد تغدا..
ماباش يرد عليها طلع وسكر الباب..
هي ابتسمت تهكما ومشت لدروج شقتها..
🍀🍀🍀🍀🍀🍀
بعد مرور ثلاثه أيام..
"وعلاش مصرة هكي انتي؟!"
خديجه؛ماما يام بالله عليك ديري زي ماقتلك..
مغليه:بعدين بنعرف كل شي..
خديجه؛حاضر ع راسي غير ديري اللي قتلك ليه..
مغليه؛جيبي تليفوني هونا حداك..
خديجه خداته من ع الطاوله ومداته لأمها..
~~~~~~~
نجاة:هما توا يدوروا غير في رضانا اني وطاهر..
"قصدك نجيك غادي عادي؟"
نجاة:تي تعالي خلاص المراة هي اللي قالت ناديها..
"تمام"
نجاه:خلاص بري طيري توا..
"سلام"
نجاة:سلام..
وحطت تليفونها قدامها ورجعت تاكل وتتفرج ع التلفزيون..
🍀🍀🍀🍀
ويعدي يوم الخميس..
ويجي الجمعه..
وطاهر ومرته واختها كانوا في حوش العيله والكل فرحان بيهم..
ماعدا الجالي اللي في كل جية لخوه يمشي لحوش خالته..
ع الغدي..
جو نسرين وخديجه..
وكانت الاجواء عاديه جدا وهاديه..
برغم خوف صابرين من خديجه اللي كانت تخفي فيه..
بعد الغدي خشوا نجاة واختها لجناحها..
☘نجاة:يمشي موت يعرفه هالحقير قاهر طاهر في عمره..
صابرين:وانتي كنتي تبي دبسيني فيه.
نجاة:بالله غيري سيرته اللي تغم وقوليلي..معاش في جديد..
صابرين:لاجديد ولاقديم ع حطة ايديك..
نجاة؛والحديده اللي ريتها نهار العزومه..
صابرين ضحكت بعدين قالت؛سلف يابنتي من نجوى..
نجاة برفعة حاجب:اها..
فجاة دق باب الجناح ثلاته دقات..
نجاة:ان شاء الله مش البليده..
صابرين؛بجد ملكه البلاده اللي بعد ماصار فيها قاعده مع راجلها..
ناضت نجاة ومشت لباب الجناح وصلت فيه وفتحاته لقت خديجه واقفه قدامها وهي تشوفلها بإبتسامه غريبه وقالت:نخش..
نجاة بإبتسامه؛تفضلي..
خشت خديجه..ونجاة لاحظت في يدعا مظروف ابيض..
سكرت باب الجناح..
مشت خديجه خشت للصالون وقالت:ترا نادي صابرين..
نجاة خافت هلبه وقالت؛باهي..
ومشت لدار النوم خشت ع صابرين لقتها واقفه ومتخزرطه..
شدتها من يدها وقالت من تحت سنونها:تعالي..
ومشوا للصالون لما قربوا يوصلوا فيه ..
طلقتها وخشوا الزوز ورا بعض..
صابرين:نعم!
خديجه وهي مبتسمه قدمتلها وقالت:محلاك ياصابرين..حلوة..وصغيرونه ونعومه..وقعدت تلعب بشعر صابرين وهي تقول...والف راجل يتمناك..
علاش تمشي في طرق ملتويه بش تاخدي راجل معبي وانتي بقدرك لوتأشري بيدك يجيك احسنهم ويتزوجك..
صابرين؛مش فاهمه شي من كلامك..
نجاة:ولااني صراحه..
خديجه؛تمام..فتحت المظروف وطلعت منه صورة وورتهالهم الزوز مع بعض كانت لصابرين ولراجلها..
خديجه:شوفوا المنظر اللي خدولها فيه الصورة..قصدكم انتم هكي متربيات يانجاة!؟
نجاه قعدت تشبح لأختها بنظرات حاده مخيفه..
وصابرين ترعش مع بعضها...
خديجه:وياريت هو بس ياما منهم عندي صورها معاهم بس ماعندكم ماديروا بيهم..
زادت قدمت لصابرين وصابرين وخرت خطوه..
خديجه:خلي الطابق مستور حبيبتي لانك لو اصريتي تمشي فهالطريق حنتفضحي وضيعي انتي واختك معاك...مفهوم ياحلوة..
صابرين قعدت ترعش وهي ساكته..
خديجه حطت الصورة في وين ماكانت..
ومشت طلعت من حداهم فتحت الباب وطلعت وسكراته وراها..
نجاة قعدت تشبح لصابرين..
صابرين وهي خايفه:اني درت هكي ع خاطرك كنت نبي نحرقها..
قدمت نجاه بقوة وعطتها كف من فوته لين طاحت ع الارض..
ضربتها برجلها وهي تقول:تنوضي تلبسي عبايتي وتروحي للحوش وغادي ليا معاك كلام تاني..
ناضت صابرين وهي شاده دموعها بالسيف..
مشت لبست عباياتها ووشاحها وطلعت من الجناح.
وخلت نجاة قريب تموت..
نجاة:اه ياحقيرة خليتي خديجه تشد عليا حاجه..
عيطت عيطه مكتومه بغيظ..بعدين انهدت ع الكنبه وقعدت تتفكر في كلام خديجه كله..
ودرس خديجه ماكانش لصابرين بس لأنها مش المذنبه الوحيده..
☘"تفضل"
محي وهو مقعمز قدام اللاب توب يخدم:جيت في وقتها حبيبتي تسلمي..
هزت راسها وقعدت ساكته شويه بعدين قالت:محي..
محي:نعم؟
خديجه:تعرف صابرين اخت مرت خوي..
وجهه تغير لونها وقلبها قريب وقف من الخوف..
محي:من صابرين..
خديجه:انت تعرفها اكثر مني..
محي بضحكه ارتباك:اني!؟
هي حطت الصورة قدامه وقالت؛ايه انت..
هو لما شبح الصورة..عداداته كلها وقفت والضي هرب..
خديجه:تعرفها كويس..كويس..كويس..لهالدرجه..واشرت ع الصورة..هادي اللي كنت تبي طلقني ع خاطرها صح..
هو مازال ع حاله يشبح للصورة..
خديجه تهكما:هو اني قتلك انت تعرفها كويس! لالاماتواخذيش خاني التعبير ممكن .
وطلعت باقي الصور قدامه وقالت..لأنك اكيد ماتعرفش اللي معاها في الصور..
كانت لصابرين مع رجاله في اماكن عامه..
تصور فيهم صاحبتها لما تطلع معاهم...وكل الصور عندها..وشرتهم منها خديجه...
ناضت وهي تقول:تبدل بنت الناس والعز والشرف اللي عزاتك ودارتلك قيمه بوحده زي هادي!؟ مانديرهاش خدامه عندي..
غير الله غالب ماعندناش حكومه ع طاهر كان هدا مستحيل نخلوه يطيح هالطيحه..
هو بلع ريقه وقام عيونه وشبح لخديجه..
خديجه ابتسمت وقالت:وتوا وريني ياراجلي..كيف تقدر تردني من حوش بوي..
ولفت ومشت من حداه..
وخلاته غارق في حالة صدمه مش قادر يطلع منها...

#قطعه_من_جهنم
#طوبى

...يتبع..