طوبى الجزء الاول

الجزء السادس عشر

# طوبى "شارع القهوة"
#جمان_فريد
#الجزء_السادس_عشر"صديقات العمر"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
حطوا سفرة الغدي في الصاله..
ومطيرة قالت:بيبو بري نادي اميمه وغرفه يجوا يتغدوا..
طوبى ناضت من حدا بنات اختها وقالت:حاضر ..
اريج:جيبي Mp3
طوبى وهي ماشيه:باهي..
وقعدت تمشي بإتجاه وين قربت توصل للدار اللي كانت مردودة..
وقفت لما سمعت غرفة تقول..
"لالا وين يطلع عليك اللبس هدا انتي سوري ميمو بس يعني انتي مشفطه وجسمك مش حلو سوري..كيف بيطلع عليك اللبس خليك هكي احسن"
فنصت طوبى بصدمه...
اميمه بضيق:اني يعني..حكت جبهتها وقالت..خايفه عمر يشوفلي هكي كأني زي العزايز ومايمل مني ويفوتني..
طوبى بدهشه وهمس:عمر!
غرفه بضحكه:يابنتي ماهو عارفك من الاول وعاجبتيه حتى وانتي هكي..ويقولوا الحب اعمى ياحنه..مامنهم حبوا شينات مافيهم ماينشاف..
طوبى داخل لمحت غرفه وهي تتكلم وكانت مصدومه فيها هلبه..
عارفتها تغير من اميمه بس ماتوقتعهاش توصل بيها لهني..
وقصة عمر خلتها تشك وتبي تعرف شن في بينه وبين اميمه!
اميمه بضيق:تمام..باهي في بالك هكي تقولي علاش قعد الايام هادي كلها معاش جي..يعني مرات..حكت جبهتها وقالت بتساؤل واسف...معقوله يكون خلاص يعني من كلامك اخر مرة فاتني..
طوبى استغربت..لما عرفت ان في كلام بينها وبين عمر وهي تعرف عمر كويس كيف يشوف لأميمه وشايفه بعيونها كيف كان زمان يعاملوا فيها هو وغرفه..
عقلها بدي يفكر في الموضوع من ناحية تانيه..وحست ان في شي غلط...
بس عقلها ماقدرش يصورلها ان ممكن اختها تلعب ببنت عمها وديرها مضحكه...!
بلعت ريقها ودقت الباب..بعدين دفاته وقالت:تعالوا كم تتغدوا..
ناضت غرفه وهي تقول:واخيرا جعانه موت..
ومشت طلعت..
وناضت معاها اميمه وعقلها مش معاها فاتت من حدا طوبى وطلعت وعيون طوبى معاها..
لاحظت نظرة الحزن في عيونها وجعتها هلبه...
بعدين مشت بتلحقهم..بعدين تفكرت  Mp3..
ضربت جبهتها وولت للدار خداته من ع الطاوله ومشت طلعت..
🌻🌻🌻🌻🌻
"تو انت شن بندير معاك قولي راجل كبير بعقلك بصغارك..شن تبيني نهزبك ولانضربك!"
المهدي ببرود:نبي نعرف انت علاش حامق هكي شن الغلط اللي درته..نسيبي ووديته في عرسه بهديه هادي حاجة تزعل!!؟
بوه قعد يشبحله وهو مش عارف شن يقول..
المهدي:هو بروحه كان وسط النوبه وهيج لين عرفها هياجه..
تنهد بوه وقال تهكما:ماعندي مانقول كان ربي يكملك بعقلك وخلاص!
ومشي من حداه..
ضحك المهدي وخش داخل للصاله وهو يقول:وين الغدي ياهووو..
وقعمز ع الكنبه وحط رجل ع رجله..
وخدي الريموت بيد والتانيه فردها ع ظهر الكنبه وقعد يغير في التلفزيون...
☘وعائشة فهالوقت كانت فرحانه باللقطه اللي دارها المهدي وماعندهاش أدنى فكرة ع اللي صار..
وخوها لاوجعاته اخته ولااهتم لأمرها..
خوتها وبوها من النوعيه اللي يبرروا للراجل اي شي يديره..
يعني لو جاب المهدي سدرة ضرة على عائشه مش حيكون عندهم أي مشكله..
🌻🌻🌻🌻🌻
وسدرة تغسل في ماعين الغدي وتفكر في اللي داره المهدي..
وبين عيونها شكله وهو يغني..وقلبها موجوع..
ماتمنت توصل بيه لهني ويدير اللي داره..
غلط في حقها وفي حق عائشه وفي حق نفسه..
من قبل وتوا ومازال مستمر في الغلط..
بعد كملت حوسة الكوجينه..
جت بتطلع خلاص...رن تليفونها..
سدرة:ييه نسيته..ومشت فتحت دولاب الكوجينه وطلعاته..
شافت المتصل كان رقم غريب..
خافت يكون هو..
فصلت عليه..
عاود اتصل تاني..فصلت مرة تانيه وهي متوترة..
معاش اتصل..
تنهدت ومشت بتطلع....فجأة سمعت نغمة رساله..
وقفت وفتحتها..
"ردي يالسدرة"
ابتسمت وقالت:هو انت!
عاود اتصل..راجت شويه بعدين فتحت الخط..
وحطت التليفون ع وذنها..
جاها صوت خشن فيه بحة قال..
"ايوه"
سدرة مشت سكرت الباب وقعمزت ع الكرسي وهي تقول:اهلا..
"ياحظي الحلو ياناس"
ضحكت سدرة..
"وليتي خطيبتي يالسدرة خلاص توا"
سدرة بضحكه:بالله حق..باهي اللي قتلي..
ضحك وقال..
"شن جو"
سدرة بإبتسامه:تمام..شن جوك انت..
"مليح فوق الريح"
سدرة بإبتسامه:دوم ان شاء الله...وين انت..
"في الحوش"
سدرة:ايه باين عليك في مكان هادي..
"توا توا روحت..نراجي يجيبولي الغدي جعان ع الاخر"
سدرة:قصدك تقعد ماتاكلش في الخدمه!
"ايه..مانحبش ماكلة برا بكل"
سدرة:ع هكي لازم تفطر كويس قبل لتطلع من الحوش..
"والله ماعندي عليه الفطور..فنجان وقهوه وكان في كعك ولاحاجه حلوة ونطلع"
سدرة:لالا هكي غلط يالفاندي..اني بوي زي حالتك يقعد ساعات طويله برا الحوش يخدم ومايحبش ماكلة برا..
نديرله فطور متكم...دحي مطبوخ وجبنه حمرا وعسل وحليب وخضرا..وجبه كامله...وطبعا البسيسه اول ماياكل.
"ماشاء الله ماشاء الله..وهو ياكل في هدا كله ع الصبح"
سدرة:غصب عنه مش بكيفه..
ضحك وقال.
"وهو يقدر يقول لا للسدرة"
ضحكت وقالت؛ع خاطره هو ..صحته اهم من كل شي..
"باهي قصدك اني بعدين هكي بديريلي؟!"
سدرة:من توا وتي روحك يابابا اني ماعنديش ياامي ارحميني"ضحك ضحكة طويله..
وهي تسمع فيه وهي تضحك ورافعه حواجبها:علاش الضحك هدا كله!؟
هو هدا ضحك وقال
"مش قتلك حظي حلو اللي طيحني ربي فيك يابنت الريح"
سدرة يإبتسامة استغراب:ياشنو؟
"بنت الريح..الفرس الفرس"
ابتسمت سدرة بخجل وقعدت ساكته..
"باهي احكيلي يالسدرة شن درتي امس واليوم احكي بالتفصيل حتى كيف غسلتي الماعين طاسه طاسه صونيه صونيه كاشيك كاشيك"
ضحكت سدرة وقالت؛باهي..هدا ياسيدي امس من صبح ربي وحني حاصلين في التطييب..
☘وقعدت سدرة في الكوجينه تهدرز ع الفاندي..
والهدرزة خشوا فيه حتى خواته لما جابوله الغدي ناشبوهم وكلموها شويه...
وبعدين امه خشت عليه حتى هي وكلمتها..
وكانت الهدرزة حلوة بالمرة واغلب الوقت سدرة تضحك..
وصوت ضحكها كان مسموع برا للكل..
كل من يحبها فهالحوش..كان فرحانلها من وسط قلبه..
واخيرا سمعوا صوت ضحك سدرة..ضحك طالع من القلب..
واكثر من كان فرحان..
طوبى..
🌻🌻🌻🌻🌻
في الليله متاع نفس اليوم..
مشوا مغليه ونجمه وخديجه وعواطف ونجاح لحوش جويده بش يحضروا السهريه الكبيرة..ولدهم مادارش كسوى...
مغليه وخديجه خشوا للخيمه وهما متوترات..
حاسين الجيران كله يشبحولهم ويدووا عليهم..
اما عواطف ونجاح كانوا يدوروا ع عائشه بعيونهم بش يشوفوا شن صار فيها بعد اللي داره راجلها اليوم..
شويه وطلعت عائشه وهي بكامل اناقتها..
جت لحماتها وعزوزتها وسلمت عليهم وكان سلامها عادي..
لدرجة استغربوا فيها هما..
عواطف وهي تشوفلها:تبلدت ياناري..
نجاح:شكلها..
شويه جتهم سلمت عليهم بعد ماسلمت ع أمهم...
شدت عواطف يدها وقالت:صحة ليك بردتي روحك وخبطيه ع الحيط..
نجاح:الرجاله مايبوا كان هكي..
عائشه قعدت تشبحلهم بإستغراب وقالت:مافهمتش!
نجاح:فكينا من جو الاستعباط عاد..عارفتينا نحكوا ع راجلك وع اللي داره اليوم..
عواطف:ع النوبه اللي جابها وقعد يغني ع سدرة بيها فوسط الشارع..
عائشه زي من صب عليها مية مصقعه..
جبدت يدها من يد عواطف...ولفت ومشت وهي ترعش مع بعضها..
و حماتها وعزوزتها ماركزوش عليها كيف وقفت تهدرز ع عواطف ونجاح كانوا لاهيين بالهدرزة..
لكن امهم كانت معاهم قربتلهم وقالت:شن قتلولها..
عواطف:هدرزنا معاها ع عملة راجلها..
ابتسمت امهم سخريه وقالت:سلمكم هدرزات!
☘وداخل عائشه خشت لدار وسكرتها عليها وهي ترعش ودموعها ينزلوا..
شويه وخشت على امها شافت حالتها وقالت..
عتيقه بخوف:خيرك!
عائشه شبحتلها وقالت:تعرفي باللي داره المهدي ولا هذا علاش جوك مش مزبوط بكري.
سكتت امها وهي مضايقه..
عائشه:ماقلتيش وخلتيني زي الهبله قدام روحي وقدام الناس!
عتيقه؛مادوريش بنتي مادوريش المهم سدرة هادي تحولت من طريقي..
نزلت عائشه راسها وهي تحرك فيه رفضا وتقول:يام راجلي مش شايفني ومش حيشوفني مهما ندير...
عتيقه؛لالاغالطه بنتي توا هادي فرصتك مدام هديكا ولت لراجل تاني تو يكرهها بروحه بروحه ويحولها من راسه وينشغل بيه..
عائشه:امي اطلعي..
عتيقه:غير اسمعيني ياعويشه..
قاطعتها وقالت وعيونها مغمضات بشده:ارجوك ارجوك..اطلعي..
تنهدت عتيقه بحسرة..
بعدين لفت ومشت وطلعت من الدار وهي تشوفلها وسكرتها عليها..
وخلت بنتها تبكي...
☘ومعاش طلعت عائشه من دارها هديكا الليله..
وياما تكلموا الجيران عن اختفائها المفاجئ وكلهم كانوا يحكوا عن السبب..
~~~~~~~
مغليه؛ماني عارفه شن نقول عليه خوك هدا حشمني حشمني..
خديجه؛ربي يهديه وخلاص..ان شاء الله مايكونش هدا اخرها بينه وبين عيشه.
مغليه؛ايااه حوليها من راسك هادي الحاجه الوحيدة اللي مستحيل تفكر فيها عيشه الطلاق نسيتي ماليها انتي!؟
تنهدت خديجه وقالت:ربي يكون في عونها وخلاص..هيا يما توا تصبحي ع خير..
مغليه تنهدت وقالت:قدامك كل خير بنتي..
سقدت مغليه بنتها اللي طلعت لسيارة راجلها..
بعدين خشت داخل الحوش..
🌻🌻🌻🌻🌻🌻
تاني يوم...
كان يوم الخميس..
غابت اميمه امس ع الكليه...واليوم مشت..
قعدت تجري وتاخد في اللي فاتها من زملائها..
كانت مترددة ومتحشمه وهي تطلب وهما ساعدوها..
:تو نصورهم كلهم ونجيبهملك..
:خليها عليا اسامه اني نصورهم ونجيبهم..
حكت جبهتها وهي مبتسمه بخجل وارتباك قالت:شكرا..انتم عطوني واني نصور بروحي..
زميلها اسامه بإبتسامه:طالع اني..باااي.
ومشي يجري بالشيتات..ضحكوا البنات والولاد زملاء اميمه..
وهي ضحكت معاهم..
وحده من البنات قالت:قداش حشوميه انتي يااميمه جاية تطلب في شيتات وهي بتموت بالحشم تقول تطلب في فلوس..
اميمه زادت تحشمت وهي مبتسمه..
:خلاص خليها زدتها على مابيها..
اميمه بإبتسامه خجوله:ع العموم مشكورين نستأذن..
ومشت قعمزت في كرسيها اللي واخيرا حجزاته..
وزملائها يشبحولها ويتكلموا عليها..
وهي حاسه بهالشي..قعدت تفرك في ايديها ببعض وتوزع في نظرها ع القاعه..
لحظات وخش اسامه يجري..جي قدامها وحطلها الشيتات وقالت بإبتسامه؛جبتهم..
اميمه شبحتلهم وقالت:باهي..وطول فتحت الشنطه بطلع فلوس وهي تقول..قداش كلفوك..
اسامه بضحكه:بجديات انتي غريبه هلبه..
شبحتله..
اسامه قعد يشوف لعيونها وهو يقول:ماريتش زيك.. اميمه ضايقت منه ومدتله الفلوس وقالت؛شكرا..
هو ابتسم وقال:العفو..
ومشي من حداها بدون ماياخد حاجه..
هي قعدت تشبح ليدها اللي فيها الفلوس شويه بعدين ردتهم للشنطه وهي مضايقه..
بعدها شبحت للشيتات فتحتهم وقعدت تشوف فيهم..
واسامه وراها بتلاته مقاعد..يطلع في اللاب توب متاعه وعيونه عليها...
🌻🌻🌻🌻🌻
"كان مفروض تقولي احمد ماتخلنيش نسمع من برا.."
احمد وهو يشوف في السخانه متاع الكوجينه:شن تبي تمشي تسمعي كلمتين وتروحي!
فايزة:نمشي ندير اللي عليا وخلاص احمد هدا مرض راهو..
احمد:خلاص براحتك..اليوم العشيه نرفعك لكن شن ماسمعتي بتسكتي..
فايزة طلعت من دار النوم ومشتله الكوجينه وقالت؛مادورش انت..شافت للسخانه وقالت..مابتش تتصلح..
احمد:لالا خلاص امورها تمام توا تبدا تنزل ميه سخونه..
فايزة:ترا..وفتحتها وجربت بعدين قالت..ايه صح نزلت مية سخونه..وخدت شويه في يدها ونطرتها ع وجه احمد..
احمد:حي عليك!..وخدي شويه حتى هو بخ عليها..
هربت منه وهي تضحك بشماته لان ماجي فيها شي..
هو قال:باهي غير اصبري شويه بس..
وخرت للباب وهي تشوفله وتقول:شن بدير..
خدي طاسه نايلو كبير عباها ميه..
فايزة؛لالا احمد مش من جدك!
احمد:مالا من حناي!..
وجاها بيها يجري..
هي هربت منه وقعدت تجري وهي تقول:-لاشعري مستشور احمد..
احمد وهو يجري وراها :قلتي مستشور!!
فايزة وهي تضحك:لا احمد لا...
وحصل عليها وشدها وصب علي شعرها الميه وهي تبكي بتصنع وتقول..لاحرام عليك..
والبنات طلعوا من دارهم وقعدوا يتفرجوا ع بوهم وامهم وهما يضحكوا..
🌻🌻🌻🌻🌻
تمت المحاضرة..
وطلعت اميمه من القاعه..
وقعدت تمشي بإتجاه مكان فاضي تقدر تقرا فيه...
وين وصلت في المكان اللي تبيه..
مشت بتقعمز لكن وقفت وين طاحوا عيونها ع عمر واقف في نفس المكان ولاهي بتليفونه..
هي لما شافته..
اشرق وجهها بإبتسامه حلوة..وقلبها فرفرح...
مشتله طول..ووقفت وراه وقالت بإبتسامه وبطريقتها الحلوة...
"عمر"
هو قام عيونه عن تليفونه وقعد يشبح القدام شويه..بعدين التفت..
ويشوف وجهها الصافي الحلو..عليه نفس الابتسامه البريئة..
اللي يبي شاعر يوصفها ع قد ماهي حلوة..
اميمه بإبتسامه:عاش من شافك..
هو عقد حواجبه وابتسم ع جنب وقال:تعيشي..شن الاخبار..
هزت راسها وقالت؛تمام ماشي الحال الحمد لله..انت شن داير..
عمر:عادي عايش فهالدنيا..
اميمه عقدت حواجبها وهي مبتسمه وتسأل بإستغراب:خيرك اختفيت فجأة!؟
عمر حك دقنه وقال:قرايه..
اميمه:اكيد!
شبحلها بعدم فهم..
اميمه:مش زعلان مني !؟
عمر بإستغراب:وعلاش!؟
اميمه حكت جبهتها وقالت؛اخر مرة لما كنا نهدرزوا...نضت ومشيت بسرعه بطريقة غريبه..حسيتك وكأنك زعلت مني في شي..كان قلت شي ضايقك اني اسفه..
عمر مش مستوعب شخصية اميمه...
يعني معقوله في بني آدم نقي ونظيف وبريء لهالدرجة في دنيتنا هادي!!
ضايقه هلبه الشعور اللي حس..
وزاد صغر نفسه...وشعوره هدا خلاه يضايق من اميمه وفي نفس الوقت يحس اتجاهها احساس مش فاهمه.
عمر:لا وعلاش بنزعل منك شن قلتي انتي!؟ وبعدين لازم تعرفي حاجه مهمه اني مش اي شي واي حد يزعلني تمام..
هي شبحتله شويه وهي تحاول تفهم قصده بعدين ابتسمت وقالت:كويس..المهم عندي انك مش زعلان مني.
عمر بإبتسامه جانبيه:تؤ..
قعدت مبتسمه وحطت يدها في شنطتها وطلعت منها شكولاته سنكرس ومدتهاله وقالت بإبتسامه وهي مصغرة عيونها:جبتها قبل عربون اعتذار زي مايقولوا..بس مادام مش زعلان..خودها هديه..
اللقطه هادي..
جي عليها اسامه اللي كان لاحق اميمه ويبي يكلمها..
شافها واقفه ع عمر وتعطي فيه شكولاته..
تفاجىء واستغرب في نفس الوقت..
تفاجئ في إن بنت خجوله زي اميمه عندها علاقه بشاب..
واستغرب لما شاف الشاب لانه يعرفه..
صاحب بنت تقرا معاهم..داليا..
اللي ديما يشوف فيها معاه ويسمع فيها تحكي عنه..
مافهمش طبيعة العلاقه بين اميمه وعمر..
بس حس بخيبة امل صاباته وين شافهم مع بعض..
ولف ورجع من وين ماجي..
وعمر خدي الشكولاته من اميمه وقال:شكرا..
اميمه بإبتسامه:العفو وتوا بنستأذنك بنمشي نقرا محاضرات فاتوني زي ماتعرف كانت عندنا مناسبه انشغلت بيها وغبت امس..
عمر:ايه حقه مبروك ع بنت عمك واخيرا ريحتنا من موالها..
عقدت اميمه حواجبها وقالت:موال شنو!؟
عمر غير عيونه عنها وقال :خلاص مادوريش..
اميمه حست بحمقه ع سدرة وماتحملتش فيها وقالت بجرأة لأول مرة:هو والله هي اللي حترتاح من موال خوك اللي ان شاء الله يخيلها في حالها..
شبحلها وهو متفاجى لقي وجهها محمر من الغضب...
كانت حتى وهي معصبه حلوة ...وبانلها وجه تاني..
ضحك وقال؛باهي خلاص اني اسف مش قصدي وبنت عمك ع راسي فوق..
هدت شويه اميمه وقالت؛معليشي بس كلامك استفزني..
عمر بضحكه؛والله وطلعتي تعرفي تعصبي!؟
اميمه ضحكت خجلا غصب عنها وقالت:مش ديما..
عمر:احسن..
شبحتله اميمه بإبتسامه وقالت؛مالا نخليك توا خلاص.
عمر تلقائيا:خيرك مستعجله!
انتبه لروحه شن قال فيسع صلحها وقال بضحكه:ولا بري بري اقري..موفقه..
هي شبحتله شويه بعدين ابتسمت وقالت:سلام..
عمر؛سلام.. لفت اميمه وقعدت تمشي بحذر..
وهو مركز عليها..
لين قعمزت وحطت حداها شنطتها وطلعت منها الخطاط الملون..وفتحت شيتاتها وبدت تقرا..
ماكانتش تحسابه مازال قاعد واقف تحسابه مشي لما مشت وخلاته..
لكن هو غصب عنه قعد ماقدرش يمشي..
قعد يتفرج عليها وخلاص..
كان يشوف في وسط الكليه...في وسط كل اللي فيها..
مميزة ضوي وكأنها شمس مشعه..
مختلفه...عن الكل...
وهو في عز هيامه..رن تليفونه..
قامه طول وشاف المتصل..
"حبي"
رجع شاف لأميمه وحس بشي مضايفه...
بعدين ابتعد عنها ورد ع تليفونه..
عمر:ايوه حبي وينك...
🌻🌻🌻🌻🌻
"معقوله ياراجل تطلع من الحوش وتقعد في فندق وحوش بوك موجود!!؟"
طاهر:مانبيش نثقل عليكم..
المهدي:فوته الكلام اللي يكسر في الرقبه ونوض لم حوايجك وهيا معاي..
طاهر:خليني هني متريح..
المهدي بحزم:اني قلت نوض من غير نقاش..
تنهد طاهر وقاله:باهي كلم خالتي وخود شورها قبل..
المهدي؛اول مرة تجي تقعد غادي !؟
طاهر:غير سايرني وخودني ع قد عقلي..
تنهد مهدي بنفاد صبر واتصل بأمه ..
شويه وردت عليه..
"هاه مهدي"
المهدي:ايوه يام شن حالك توا..
"من ربي كويسه والحمد لله"
شبح لطاهر وقال وهو يغير في الموضوع:يام طاهر صايرة بينه وبين امه مشكله وراهو طالع من حوشهم وقعد في فندق..
"نهار احرش!يخلي بوه اللي يسرح فيه الخيل وقاعد في فندق"
المهدي:هاك كلميه راس القمبالي هدا..ومدله التليفون
ضحك طاهر وخدي تليفون خوه  رد ع مرت بوه وقال:ايوه خالتي كيف حالك..
"الحمد لله..نوض نوض لم حوايجك وتعالى"
طاهر:مانبيش نثقل عليكم ياخالتي..
"بالله تو هدا كلام تقوله!؟ اول مرة تجي تقعد في حوش بوك انت!؟ نوض سلم ولدي وماتخلنيش نبدا فيك"
ضحك طاهر وقال:حاضر..جايكم اني والمهدي وتي الغدي..
ابتسم المهدي..
"ادلل..."
طاهر:بارك الله فيك ربي يحفظك..
"ويحفظك ولدي..بالسلامه"
طاهر:بالسلامه..
سكر طاهر ومد لخوه التليفون..
خداه المهدي وقاله؛هيا نوض..
طاهر:مش قبل ماتقول اللي جيت ع خاطره..
قعد يشبحله المهدي وهو ساكت..
طاهر ابتسم وقال:هات اللي عندك..
~~~~~~~~
في الطريق..
طاهر:شوف مهما نقولك دوة فاضيه..محاولة اقناع العاشق انه ينسى اللي يعشقها زي انك تقوله حاول تموت..
المهدي:والله انت اللي فاهمني بالله..
طاهر:بس..فكر توا انها ولت لغيرك..
المهدي قريب راحت منه السيارة لولا انه لحق نفسه في اخر لحظه..
طاهر بصدمه؛مازال نبي ونتزوج 
المهدي بنرفزة:انت تلبز..
طاهر؛مانلبزش نتكلم بالواقع..مهدي اللي نعرفه الراجل الشهم اللي عنده نخوة..يرضى يقيم عيونه في وحده متسميه ع غيره!؟
المهدي شد الدومان بقوة..
طاهر:حط روحك مكانه..تخيل لو في حد حاط عينه ع مرتك ويتمنى فيها..
بانت ع وجه المهدي ملامح الضيق وهو يقول:شن تقول ياراجل!؟
طاهر:هاه ريت مش حتتحمل وهو راجل ومش حيتحمل..
انت لوتحبها حق..خليها تعيش حياتها وتمنالها كل خير.
المهدي بألم؛ونكمل حياتي وقلبي معلق بيها..وهي مرات قلبها يتعلق بيه هو..!؟
طاهر:لما تتزوج حتطلع من الشارع وتنساها..
المهدي:لو تمشي لأخر الدنيا يقعد مكانها في قلبي هو هو.
طاهر:خلاص خلي اللي في القلب في القلب وقول ربي يهنيها..ويهدي سري..
المهدي قعد ساكت وهو حاس روحه مخنوق..
طاهر؛اشبح لصغارك ربي يحفظهم واشبح لمرتك مراة كويسه هلبه اللي صابرة ومتحمله هدا كله وساكته..
تنهد المهدي وقعد ساكت..
طاهر:فكر في كلامي فكر..ربي يريح بالك ياخوي..
وشد ذراعه بقوة..
يدوب ابتسم المهدي..
وطاهر ابتسم وطلع ذراعه وقعد ساكت وخلاه يفكر...
🌻🌻🌻🌻🌻
الساعه 5:30عصرا..
في حوش اهل احمد..
فتحيه"ام احمد":باهي اللي ريناك ياحنه قبل مانموتوا..
فايزة؛سامحيني ياعمتي والله ماكان عندي علم..وباست ع رسها..
فتحيه؛كيف احمد ماقالكش!؟
احمد:كان بنقوللها بتشد في الجيان واني عارف ان غير مرغوب فيها هني..
التفتت عليه فايزة وفنصت فيه..
واحمد مش مدورها..
فتحيه:لامرغوب فيها ياسيدي من اليوم.
احمد:واني نتمنى غير هكي يام!
امه غيرت عيونها عنه وهي طنفر..
وفايزة تشوف لاحمد وتفنص وخلاص..
والبنات مقعمزات يشبحولهم بس..
ع جية خوات احمد..
:اووو ابو البنات هني هو بناته..
فايزةضايقت..
احمد:ايه هني اني واميراتي..شن مش عاجبك!
ابتسمت فايزة..
:غير خيرك حمقت بصارة..
وسلمت عليه بعدين مشت قعمزت بدون ماتسلم ع فايزة ولادور البنات..
فايزة تجاهلتها واحمد قعد يشبح لفايزة .
التانيه سلمت عليه بعدين جت سلمت ع فايزة وقالت؛خيرك سامنه هكي!؟..شكلك دايرتيها يادعوة..
اختها:لاماتقوليهاش بتعبي الحوش اناثي!
فايزة بضيق؛لامش حامل..
احمد وهو يعجب ع اخته؛اناثي اناثي..وشن انتي محسوبه علينا!.؟
فتحيه؛احمد..
احمد بحمق؛تكلمتي توا يام ولا!؟
فتحيه؛يبصروا خواتك..
جي احمد بيرد قالت فايزة بضحكه؛حتى هو يبصر ياعمتي تعرفوا بصارته..
شبح لفايزة وهو معصب بس تمالك نفسه..
:ع العموم اسفين معاش نبصروا مرة تانيه..
فايزة؛المهم توا..حالك باهي عمتي 
فتحيه؛نولي باهيه كان وليتي تجيني انتي والبنات كل جمعة..
فايزة بإبتسامه؛حاضر كل جمعه ان شاء الله..
فتحيه:من الصبح وتروحوا في الليل..
فايزة بضحكه؛حاضر...
واحمد يشبحلها وهو ساكت..
~~~~~~~~
في الطريق..
احمد؛بتتحملي يافايزة مانبيش نسمع شكاوي..
فايزة؛اللي يسمعك يقول ديما تشكي اني!؟
تنهد وقال:مش قصدي..بس الحق اني اللي مش حنتحمل .
فايزة؛انت خليك مع خوتك ومادخلكش..هو كله يوم ياأحمد. .
احمد؛ باهي علاش توا بس!؟
فايزة تنهدت وقالت؛نبي البنات يتعودوا ع حوش جدهم ياأحمد مانبيهمش يقعدوا منبوذات..لامن هني ولامن هني..
احمد سكت وهو مضايق ويشوف لبناته من المرايه..
وجعه قلبه عليهم..وحس ان كلام فايزة صح واقتنع بيه...
🌻🌻🌻🌻🌻🌻
"تو هدا لامتى بيقعد هني"
نضال؛حسستني انه قاعد ع قلبك قاعد في حوش بوه حتى هو..
عمر بنرفزة؛اني نشبح كائن طفيلي يجي لمصلحته وبس حتى افلام عراكاته هو وامه مش ماشيه عليا..
نضال:افلام ولاحق..هدا حوش بوه وليه حق فيه..
عمر:في الموضوع هدا بالذات مايندواش معاك انت.
وناض من مكانه ومشي طلع من الدار..
وخلا نضال يقرا..
سكر باب الدار..
ع طلعة طاهر من دار المهدي اللي عطهاله..
شبحله وابتسم..
عمر تجاهله ومشي لدار الجالي..
خفتت ابتسامه طاهر ولف ومشي نزل من الدروج..
خش عمر ع الجالي لقاه لاهي برسم تصميم هندسي..
سكر الباب وقاله؛ربي يعاون..
الجالي وهو لاهي:تسلم..
عمر:شفت شن صار!
الجالي:طبعا بيجي يقعد هني بش يتم امور عرسه زي مادار قبل وتم امور شقته..
عمر:نفس كلامك بالزبط قلته جاي لمصلحته..
الجالي:في النهايه ماعندنا مانديروا حوش بوه حتى هو وليه حق زيه زينا .
عمر؛هذا الهم...
الجالي قعد يرسم وهو ساكت..
عمر:امتى تفضى نبي نطلع زرده انت فيها..
الجالي وخر عن اللوحه وهو شاد المثلت ويشوف للرسمه ويقول:المده هادي كلها ماعنديش وقت نحك شعري..
عمر:ماشاء الله تخدم من جد جدك..
الجالي:اللي عنده طموح وبيدير لروحه اسم ومكان لازم يخدم ليل مع نهار..
عمر قعد ساكت وفي كلام يتردد لوذنه...
《 باهي ماعندكش طموح..قصدي انت خاش كلية الطيران اكيد حاط في بالك تولي كابتن ليه اسم وتطلع وتخدم في مطارات برا البلاد..》
الجالي شبحله لقاه سارح قاله؛هييه وين سافرت!.؟
استاقظ عمر شبحله وقال؛شي..ناض وقال..هي مالا نخليك تخدم..
ومشي طلع من حداه..
قعد معاه الجالي بعيونه وهو مستغرب بعدين رفع حواجبه ورجع لهي بشغله..
🌻🌻🌻🌻🌻🌻
هديكا الليله..
كانت حفلة دخول خو عائشه..
مشوا خديجه ومغليه حضروه وهالمرة لقوا عائشه حاضرة ودايرة روحها عاديه كأن ماصار شي...
روحوا هديكا الليله وهما مطمنين...
اما عائشه قعدت يومين تانيات في حوش اهلها تعاون امها في ضم الحوسه...
وبعد هاليومين جاهم المهدي روح بيها هي والصغار...
كان طول الطريق ساكته ولاكلمه...وهو لاحظها..
وماكانش سكوتها هذا في الطريق بس..
حتى في الشقه..
تكلم في صغارها بس وهو متجاهلاته..
وهو اكيد فهم سبب المعامله..لما مافكرش يكلمها نهائي ولايجي من ركنها..
حس ان هكي اريح لراسه..
...في الليل....
عائشه وهي جايه بترقد؛بنمشي للمدرسه غدوة..
المهدي؛تمام..
وعطاها بظهره وتغطا ورقد...
وهي رقدت وعطاتها بظهرها وتغطت..بس دموعها بدوا ينزلوا...
🌻تاني يوم...
ناضوا بكري هما الزوز..
بعد الصلاة...
دارتلهم فطور...فطروا وجهزوا ارواحهم..
ونزلوا من الشقه وطلعوا من الحوش..
لما طلعوا..
شافوا سدرة تسكر باب الحوش الخارجي بعد ماطلعت السيارة وهي تتكلم بالتليفون ومبتسمه..
سدرة؛توا توا طلعت..
"هو الموف"
سدرة قعدت دور بعيونها لين شافت سيارته مدرسه بعيد وهو فيها وين شافها حياها من بعيد وهو مبتسم..
هي ابتسمت ومشت للسيارة تقول؛نظام مراقبه..
"مش مراقبه حراسه"
ضحكت وركبت وهي تقول؛بنسكر توا بعدين نهدرزوا...
غرفه وطوبى يشبحولها بإبتسامه..
"تمام...يوم حليب ان شاء الله"
ضحكت سدرة وقالت؛اجمعين..وسكرت وحطت التليفون قدامها..
وشغلت السيارة وتحركت..
وشويه تحرك وراها الفاندي..
وهدا كله ع عيون المهدي وعائشه...
اللي سبقوهم الصغار وركبوا السيارة..
دق محمد ع الروشن وقال؛بوي امي هيا..
المهدي شبح لولده..بعدين بلع ريقه ومشي ركب السيارة..
وعائشه لحقاته وهي شاده دموعها بقوة وركبت معاه السيارة..
تحرك طول بالسيارة..
وفي وذانه يتردد كلام خوه طاهر..
《 مهدي اللي نعرفه الراجل الشهم اللي عنده نخوة..يرضى يقيم عيونه في وحده متسميه ع غيره!؟》
شد ع الدومان بقوة وقبضة يده الثانيه وعائشه مركزة عليه..
بعدين غيرت عيونها عنه وشبحت للطريق...
🍀🍀🍀🍀🍀🍀
وتمر الايام..يوم ورا يوم..
والفجوة بين المهدي وعائشه كبرت..
وهو كأنه ماصدق معاش دوراته..وهي كانت تحاول تعفس غ قلبها لتنقذ ماتبقى من كرامتها...
☘وفايزة قاعده تتحمل وتتنازل بش ماتخسرش عيلتها وعيلة راجلها..
تمشي لحوش خوها بش تشوف امها وتتحمل في الكلام اللي تسمع فيه..
وتمشي لحوش اهل راجلها بش ماتقطع بناتها عن اماليهم وتتحمل في اللي تسمع فيه..
واحمد حاس بيها ويحاول يخفف بطريقته ..
ماكانش عارف احمد ان وجوده بس عند فايزة يكفي بش يمسح عنها هموم الدنيا كلها..
☘وفي من قاعد يفقد السيطرة ع نفسه ومش قادر يتحكم فيها..
عمر اللي ولى يوميا يمشي للكليه بش يشوف اميمه ويهدرز عليها..
وفي كل مرة يشوفها فيها يحس بمشاعر متناقضه..
جذب..وتنافر..
ضيق..وبهجه..
يقعد بينه وبين نفسه يذكر في روحه ان هذا مجرد مقلب وهو قاعد يستمتع بيه مش اكثر ويجيه يوم وينتهي..
اميمه مش ليه ولاهو ليها..
اميمه الشينه...العبيطه ..الهبله..الساذجه..
لايمكن تكون لعمر ولد شنيبه..
ولد العز..الوسيم الانيق..اللي البنات بيهبلوا عليه..
شن جاب اميمه ليه!؟
هكي كان يخدر في روحه الكاتبن عمر وين يحس بإنجراف في مشاعره اتجاهه اميمه..
☘انجراف المشاعر نفسه اللي قاعد يصير لغرفه مع حسين وهي ماتبيش تكبحه..
لامدورة قرايه ولاشي..شادتها بس ع المسلسلات التركيه والاغاني والتفكير في حسين...
وحسين ولايندري عليها..حسين قاعد يراقب في الوردة اللي زارعه في قلبه ويسقي فيها من حبه كيف قاعده..
ويراجي امتى تكبر وتتفتح بش يقطفها ويشم ريحتها الحلوة...
☘☘☘☘☘☘☘
وفي مكان بعيد بعيد هلبه..
في جنوب شرق ليبيا...
تحديدا مدينه الكفرة...
في حي من احيائها...
حوش قنين متوسط الحجم..لاهو كبير ولاهو صغير...
جنانه...احلى مافيه جنانه..كان مزلز بس في كل جيهه منه كانت مزروعه حاجه..
ورد..نعناع..حبق..عطر...شجر...ونخل...
كانوا عايشين فهالحوش..
جدة وحفيدها..
حفيدها كان متهيأ يطلع من الحوش شافاته وقالت..
فاطمه: عبدالقيوم تجماضد؟؟
"عبدالقيوم طالع"
التفت عبدالقيوم وشبحلها وقال؛ايوه
فاطمه:ميس تكيد؟
"وين ماشي"
عبدالقيوم عقد حواجبه وقال؛ايهنان عبدالله ابانيس يتعاب شوي اكيغ ايتنيغ مرات هيرمس فول امجين انة
"لحوش عبد الله بوه تاعب شويه بنمشي نهوى عليه مرات يشدني ع العشي ياجدتي"
فاطمه هزت راسها وقالت:وهينتقيمد ابراضين
"باهي ماتعطلش سلم ولدي"
هز راسه وقال:باهي ارالساغت...ومشي...
"باهي بالسلامه توا"
فاطمه وهي ماشيه لدارها؛ارالساغت
"بالسلامه"
وطلع الشاب المكمل العشرين من عمره برا الحوش..
لبس سبيدروه..
وطلع للجنان قعد يمرر في نظره ع الورد...
جت بين عيونه ورده..
شافها مرة وحده بس..مرة وحده..
من يومها معاش غابت عن باله..
ابتسم ع جنب وهو عاقد حواجبه بعدين طلع من باب الحوش الخارجي...
وبدي يغني..
نك ليغ الزمن...ايلان ويتيان
نماغي ترهى
هيغ اكالين...اي ميديوان...
"انا منذ وقت بعيد..ومنذ سنين..
ابحث عن الحب
في بلادي...يااصحابي..."
"عبدو شن جو ياهو"
عبدالقيوم شبح للي كلمه ابتسم وحياه وقال:تمام ياهو انت شن امورك شن داير..
:اهوماشيه..
عبدالقيوم؛قول الحمد لله..
:الحمد لله..الحمد لله..
وكمل طريقه...شاف ولد صغير شاد طوبو ميه ويشرب الميه..
عبدالقيوم؛خلاص معاش عندكم ميه في حوشكم..
الولد ضحك وهو يشرب لين شرق..
عبدالقيوم؛عدي رد التيبو لمكانه واطفي الميه خيرلك..
ومشي من حداه 
لقاه واحد قال؛السلام عليكم.
عبدالقيوم؛وعليكم السلام...
واخيرا وصل في حوش صاحبه..
دق الباب دقتين قواي..وبعد ووقف ع جنب...
لحظات وطلعت عبد الله..
عبدالله؛هيا خش خش..
خش عبد القيوم وقاله؛خيرك داهش..
عبدالله؛ياراجل سيبت المباراة وجيتك نفتحلك..
عبدالقيوم؛قصدك بدت هيا!!.
عبدالله؛اها..
عبدالقيوم؛قبلها دخلني ع باتك نساوله وبعدها نعدوا نتفرجول جميع.
عبدالله؛باهي هيا خفلي روحك..
عبدالقيوم شبحله ع جنب وحول السبيدرو..
عبدالله بإستعجال:تي هيا ياراجل..
عبدالقيوم؛كنك انكلبت انت..
عبدالله:انت تتصمت نشوف فيه كيف تحول في الكويش..
ضحك نص ضحكه وقال؛ارفعني لباتك هيا..
عبدالله:تحرك قدامي..
مشي عبد القيوم وهو يضحك وصاحبه لحقه..
🌻🌻🌻🌻🌻🌻
"مافيش احسن من زيت جوز الهند للشعر ها شوفي شعري كيف ولى منه"
غرفه:ايه حقه يافرخه شعرك مش عادي مولي.
طوبى بإبتسامه؛لكن كان جيتي بتشري اطلبي زيت الشعر مرات يعطوك متاع الماكله.
غرفه؛يطيبوا بيه هو؟
طوبى:ايه الاكل الصحي..
غرفه؛يافرخه منين تتعلمي هدا كله..
طوبى؛من التلفزيون من وين يعني..
ع خشة سدرة قالت:انتم قصدكم قاعدات تفنصوا..
غرفه:كانت تعطي نصائح اهتمام بالجمال..
سدرة؛وماعطاتكش نصائح تانيه زي اهتمي بقرايتك مثلا؟
طوبى رفعت يدها ووخرتها للخلف وقالت؛لين ابري لساني..
ضربتها غرفه ع ركبتها..
سدرة وقفت وحطت يد في نصها والتانيه قعدت تأشر بيها علي غرفه تهديدا وهي تقول؛بنوصل الكلام لبوي يتفاهم معاك انتي..
غرفه بنرفزة؛نقرا الهم والله نقرا..
سدرة؛معاش تحلفي..وهيا ارقدي انتي وياها مانقعدش نشيط في ريقي غدوة واني نوض فيكم..
رفعت غرفه حواجبها..
وطوبى قالت بإبتسامه شقيه؛معليشي سوسو تصحيح بسيط..حني اللي بدينا نشيطوا في ريقنا بش انتي تنوضي بكري..
غرفه هزت راسها موافقه لرأي طوبى وهي رافعه حاجبها..
انحرجت سدرة ووجهها ولى احمر وقالت بنرفزة؛باهي ارقدي ارقدي انتي ارقدوا...
انطرحوا الزوز ع اسرتهم وهما يضحكوا..
وسدرة مشت سكرت الضي..
وخشت فراشها وحطت التليفون تحت مخدتها..
مرت ساعه خداها فيهم النوم..
لين رن تليفونها ع الهزاز..
يدوب فاقت طلعاته من تحت المخده. شافت المتصل ابتسمت وردت..
سدرة؛ايوه..
"رقدتي شكلك"
سدرة؛ايه اليوم تاعبه..
"سلامتك من التعب..مش مشكله غدوة نهدرزوا في موضوع مهم"
سدرة؛شن هو
"خليه وانتي مصحصحه احسن"
سدرة بإبتسامه؛تمام..تصبح ع خير.
"تلاقي الخير"
سكرت سدرة وردت التليفون لمكانه وغمضت عيونها وهي مبتسمه...
🌻🌻🌻🌻🌻🌻
تاني يوم...
الساعه 10:30صباحا..
في احدى الشركات...
كانوا واقفين ع بعض يهدرزوا..
طاهر:الفضانيه كلهم شكروا فيها مافي حد ذم ماقصرتوش بكل..
نجاة بإبتسامه؛الحمد لله...
طاهر بإبتسامه؛وبإذن الله نديرلك بيان ماصارش..
نجاة بإبتسامه؛المهم عندي طاهر اني وليت ليك..يااه قداش صبرنا واستنينا..
طاهر بإبتسامه:ربي يجمعني بيك عن قريب يارب..
ابتسمت نجاة بخجل وهو يتأمل فيها بحب..
شويه وقالت؛خل نمشي للمكتب فكنا من التلقيح..
طاهر؛عندك حق..هي بري فيسع..
ضحكت نجاه ومشت..
وهو تبع بعيونه وهو مبتسم بعدين لف ومشي لمكتبه...
🌻🌻🌻🌻🌻
فهالوقت..
نسرين اخته كانت طالعه من  المدرسه وهي حاسه بتعب...
وقالت في عقلها شكلها بتجيب...لأن خلاص موعدها فات..
ماتقدرش تسوق سيارتها هي فهالحاله..
خشت قعمزت في وسطها وقامت تليفونها واتصلت براجلها..
فصل عليها..
عاودت مرة تانيه فصل عليها..
تأففت وهي تتألم بعدين جت بتعاود عليه جو عيونها ع رقم فايزة تحته..
لقت روحها اتصلت بيها طول..
"ايوه نانسي"
نسرين بتعب؛فايزة انتي قريبه عليا بالله عليك تعاليلي بنجيب خلاص ومش لاقيه من يرفعني..
"دقايق ونكون عندك"
نسرين؛تلقيني قدام المدرسه..
"باهي باهي"
وسكرت فايزة..
نزلت نسرين التليفون وهي تأن وتتألم...
🌻🌻🌻🌻🌻
فهالوقت..
طلعت عائشة من حجرة المدرسات ومشت للدروج بتنزل..
كان الممر فاضي مافيه حد الابلات الموجودات في حصصهم..
وهي نازله لوطا بتاخد حاجه للمقصف حست بجوع شديد..
خصوصا انها طالعه من غير فطور...
وهي نازله كانت حاسه بشويه دوخه لكن قعدت تشد في روحها..
بس تعب الجوع كان مسيطر ع جسمها..وين جت بتنزل الدرجه التالته..زلقت رجليها وجت طايحه..
شد في السياج وهي تعيط بش ماطيحش ع بطنها..
لكن يدها كانت تفلت وقعدت طيح لين وصلت اخر الدروج وهي مقعمز..
كانت تحس بألم رهيب وقعدت تعيط ع طول رقبتها وتقول "تعالولي"
فهاللحظه سدرة كانت جايه من اخر الممر طالعه من فصلها بش تمشي تجيب كراسات الطلبه من حجرة المدرسات..
سمعت العياط انفجعت وقالت..
"عيشه!"
وطلعت تجري بدون وعي منها لين قربت من مصدر الصوت..
جت للدروج شافت عيشه طايحه وهي مقعمزة وتعيط..
نزلتلها تجري وهي تعيط وتقول:عيشه..
عيشه رفعت راسها شافتها وقعدت تعيط وتقول؛سدرة زوديلي بنموت بنموت ياسدرة..
وصلت فيها سدرة قعمزت جنبها وشدتها وهي تقول؛شن صارلك..
عيشه وهي بتنجن من الالم؛طحت من فوق...وووك عليا...بنموت سدرة بنموت..
سدرة نزلوا دموعها وهي مفجوعه وبدت تعيط وهي تنادي؛تعالوا تعالوا...كلموا الاسعاف يابشر..مافي حد يسمع فينا..
ع جية المديرة تجري ومعاها ابلات من الدروج من تحت..
:شن في ابله سدرة..
سدرة وهي تبكي وتعيط؛ماتشوفيش فيها ياابله! كلموا الاسعاف كلموهم ..
:نرفعوها حني..
سدرة؛لالامايحركها حد لا..كلموا الاسعاف..وقالتهت بعياط..
وعائشه طاح راسها ع صدر سدرة..
شبحتلها وقالت بخوف:عيشه!
عائشه وهي خلاص حتفقد الوعي؛سامحيني بالله عليك سامحيني..
سدرة وهي تبكي؛مادرتيلي بش نسامحك خلاص اسكتي..
عائشه يدوب ابتسمت وفقدت الوعي..
عيطت سدرة ع طول حسها وهي تقول..
"بسرعه يابشر...بسرعه"

#صديقات_العمر
#طوبى

....يتبع....