طوبى الجزء الاول

تابع

(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_الثالث_والأربعين"إلا أنت3"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
حطت صورته ع الكامدينو بعنايه وكأنها تحط في تحفة غالية الثمن 
وصاحب الصورة عندها لايقدر بثمن...
مررت نظرها ع الدار كلها وهي مبتسمه بفرح..
كانت سعيده...في قمة السعاده..ممكن تكون اسعد من خلق الله فهاليوم...
لفت ومشت بتطلع بش تبدا توتي الغدي...
تفاجئت بيه خاش عليها وهو يصفق بإيديه ويقول..
عبد الرؤوف:هيا هي وتي شناطينا معاش في وقت عندنا تلاته ساعات بس..
غرفه وهي مستغربه:علاش!؟
قرص انفها وقال:ياشفشه بنسافروا بنطيروا لتركيي..
قالها بالتركي..
قعدت تضحك بمفاجأة وهي بطير من الفرحه وقالت:بسرعه هكي امتى لحقت..
ابتسم بغمزة وقال:مش صعبه ع عبروف بن موسى..
وشدها من يدها وخداها وحطها قدام الدولاب وقال:هيا سقدي روحك..اني طالع مشوار وجاي باهي..باس راسها..
ومشي طلع من حداها وهي تضحك..
بعدين فتحت الدولاب وقالت:الله ياربي شن الهني اللي اني فيه..اللهم لك الحمد...
وقفت شويه لما تفكرت شي مهم...
《الرسول قال سورة البقره اخذها بركه》
ابتسمت بعدين مشت خدت تليفونها من ع الزيانه واتصلت بيها طول...
☘هي كانت في المستشفى..
تشوف في حاله مع دكتور كبير وتسأل فيها عن الاعراض..
حاطه التليفون صامت..
☘غرفه؛اكيد مش فاضيه ان شاء الله تروح قبل نسافر بش نشوفها..
حطت التليفون في مكانه وولت للدولاب بش تجهز الشناطي..
🌸واميمه في المستشفى..
بعد كملت دورتها ع الحالات مع واحد من الدكاتره..
طلعت معاه من الحجره وهي تتكلم معاه بخصوص الحاله واغلب كلامهم كان بالمصطلحات الطبيه..
وفي من كان يشوفلها بنفس نظره الحب والاعجاب اللي مش قادر يمنعها رغم عنه عيونه يخونوا فيه..
الدكتور:خلاص خدينا تقرير وان شاء الله بعدين ساعتين تنزل العمليات..
اميمه هزت راسها وقالت:إن شاء الله..
مشي الدكتور..
وهي كملت طريقها وكانت طلع في التليفون من اليونيفورم..
لقت 3مكالمات فائته..
فتحتهم..لقت زوز من عمر ووحده من غرفه..
اميمه بإستغراب:غرفه!.. إن شاء الله خير!
وقفت في مكانها واتصلت بيها...
والعيون هديكا قاعده تشوفلها..
اميمه:ايوه غرفه صباح الخير..
"صباح الوردات ع احلى بنت عم"
ضحكت وهي عاقده حواجبها بإستغراب وقالت:شني الرضا هدا كله..
"وعلاش مانرضاش عليك وانت سبب فرحتي"
ضحكت بتعجب وقالت:اني!
"ايه انتي..من نصايحك وسورة البقرة اللي ماسيبتهاش بكل الحمد لله امورك اني وروفه ولت احلى من العسل واليوم بنسافروا تركيا شهر عسل متأخر" وضحكت..
اميمه وهي مبتسمه بفرح:مبارك مبارك وربي يهنيكم يارب..
"ليك مني هديه حلوة وكبيره"
اميمه:مش حنقول لا جيبي حاجه نحطها مع بتاتي..
ضحكت غرفه وقالت..
"من عيوني..امتى تروحي؟"
اميمه؛بعد العصر ان شاء الله..
"خسارة معناها مش حتلحقي عليا خلاص من توا نقولك بالسلامه."
اميمه:امتى مسافرين؟
"بعد ثلاته ساعات"
اميمه؛خسارة..يللا مش مشكله اهم شي تمشوا وتجوا سالمين بإذن الله...وبنقولك حاجه مهمه هلبه غرفه..توا زيدي شدي في سورة البقرة اكثر مش تسيبيها لأن زي ماأخذها بركه تركها حسرة"
"ان شاء الله..صحيتي ميمو"
اميمه:ماعنديش فيه جميل روفي..ربي يهنيك ويسعدك..
"اجمعين..هي نتلاقوا ع خير"
اميمه:ان شاء الله..في أمان الله..
"سلام"
اميمه:سلام..
وسكرت وهي مبتسمه برضا بعدين اتصلت براجلها اللي رد طول..
"سكري حبيبي تو نتصل اني المكالمه غاليه"
وسكر عليها..
ضحكت ونزلت التليفون وراجت يتصل بيها وفيسع اتصل..
ردت وقال:هلا شن جو..
ومشت كملت طريقها..والعيون نفسها قاعده تلاحق فيها...
☘☘☘☘☘
وفي مكان تاني...
حديقه جنب معمل حلويات تخدم فيه آلاء..
كان مهند مقعمز يستنى فيها..
ولأن الحديقه ماكانتش فاضيه في ناس لما شافوه عرفوه..
وجوه وقعدوا يسلموا عليه..
ع خشتها هي للحديقه..
شافاته واقف حدا وااحد من المقاعد وفي بنات واقفات عليه..
ابتسمت ومشت ناحيتهم...
وصلت فيهم بدون ماتتكلم كانت تسمع فيه هو شن يقول...
مهند؛بارك الله فيكم..كلامكم الحلو وسام نحطه ع صدري..
:ربي يحفظك..
مهند؛ويحفظكم..
ومشوا البنات..
وجاته آلاء وقالت؛ممكن صورة استاذ مهند..
مهند بإبتسامه:انتي ع حسابك مهند كله..
هي نزلت عيونها وابتسمت بخجل..
ضحك وقال:تفضلي قعمزي..
حطت ايديها ع بعض..ومشت قعمزت..
وهو قعمز جنبها بمسافه..
مهند وهو يشوفلها؛شن اخبارك شن امورك..
آلاء وهي تشبح القدام بخجل:الحمد لله ماشي الحال..
مهند؛الخدمه امورها تمام؟
آلاء:تقدر تقول تمام الحمد لله..
مهند:والقرايه نتيجة طلعت ولامازال؟
آلاء:الحمد لله طلعت وصفيت موادي كلهم..
مهند:حلو حلو..مبارك..
آلاء:الله يبارك فيك..بالله شن حال الدكتور إياد؟
مهند:الحمد لله زي قبل..
آلاء هزت راسها قالت:ربي يحفظهولك..
مهند؛تسلمي ويحفظ احبابك..
آلاء:آمين..
سكتوا شويه وهما يوزعوا في نظرهم حواليهم بعدين مهند شبحلها وقال..
مهند:آلاء..
شبحتله..
مهند؛مافي حد فحياتك ولا؟
آلاء حركت راسها بالنفي..
مهند؛ولاكان في؟
غيرت عيونها عنه وقعدت ساكته..
مهند؛تمام خصوصيات مانبيش نخش فيها وماتهمنيش مدامها ماضي..المهم الحاضر..
ابتسمت وشافتله..
مهند؛عندك مانع لوخطبتك توا؟
هي تفاجئت هلبه..
مهند بإبتسامه؛والزواج بعد تكلمي قرايه..شن رايك؟
آلاء وهي متفاجئه:الصراحه..انت فاجئتني هلبه...!
مهند:عارف...بس اكيد مش حنرضى ندير العيبه في جيراني واهلي..ونقعد اني وبنتهم علاقه...الحوش بنخشه من الباب يا آلاء غير حبيت قبلها نعرف رأيك بس..
آلاء قعدت ساكته مش عارفه شن تقول..
هي مش حاسه اتجاه مهند بأي شي غير الاحترام..
وانها تخش ع خطوة رسميه زي هادي طول تعتبر مجازفه بالنسبه ليها..
مهند؛شوفي اني مش حنضغط عليك..خودي وقتك وفكري ع مهلك وحنقعد نراجي في ردك شهر كامل..
قعدت تشوفله وهي ساكته..
مهند:يعني مرة تانيه حنجيك للكليه ونسمع ردك..وصدقيني شن ماكان اني حنتقبل برغم ان واحد فيهم حيوجعني بس في النهايه كله نصيب..
آلاء ابتسمت مجامله وهزت راسها وهي ساكته..
هو ناض..وهي ناضت معاه..
مهند؛تمام توا نخليك تشوفي شغلك..موفقه ان شاء الله..
السلام عليكم..
آلاء:وعليكم السلام..
تبعاته بعيونها وهي متفاجئه في شخصيته كيف راكزة وهو رزين وعاقل ومتفهم..يبان رجل ناضج فعلا رغم صغر سنه..
بس مع هدا..مازال ماحست اتجاهه بشي..
وحست انها حترفض عرضه في النهايه...
☘☘☘☘
"بنضفر شعرك ياشوشو"
مشتده؛باهي..وحطيني قدام التلفزيون وافتحي ع مكه..
صفاء بإبتسامه:حاضر..
ضفرت شعر حناها وشداته..
بعدين جابت ريحه وبختها ع دبشه..
وخدتها من يدها وطلعتها من الدار للصاله وحطتها قدام التلفزيون وحطت ع السعوديه قرآن.
اتكت مشتده وهي تسمع فيه...
وصفاء قعدت تشوف في صاله كان في حاجه حاده ملوحه او فيها خطر ع حناها اللي زي الاطفال في عقلها ماتميزش بين الحاجه الخطيره والآمنه..
لما تأكدت ان كل شي تمام..مشت لتاله ومروة وهما في دارهم وحده لاهيه باللاب توب تكتب..
والتانيه تلعب ع آيباد..
صفاء:اطلعوا قعمزوا حدا حنينه بنحط الغدي ع النار..
مروة:باهي..خدت لاب توبها وناضت ..
صفاء مشت الكوجينه وهي طلعت قعمزت حدا حناها...
وامهم في الخدمه تجري عليهم كلهم..
مصاريفهم ومصاريف امها وعلاجها..
زي ماقاعده صفيه تجري ع مصاريف بتات وعرس اميمه مش كل شي حيخلوه ع جدها اللي ياما صرف عليها طول السنين اللي فاتت..
وكذلك فردوس اللي قاعده تلم في القرش ودس ع تركينه لمعتز الوحيد اللي قعد مسؤول منها في المصروف وكان تلقى ماتنقصه حاجه..
اما مطيره فكانت تعبي في وقت فراغها بس...
☘في المعمل..
مطيره:راكبه نشوف مشتده لما يجوا كلموني..
صفيه وفردوس؛باهي..
مشت طلعت من حداهم..
وهما الزوز قعمزوا يراجو في الناس اللي بتجي تاخد طلبيتها..
صفيه مسحت ع جبهتها وقالت:امس طلعت  للمحلات اللي هني نشوف الاسعار قلت بالك نبدا نشري من توا..انصدمت في الاسعار.
فردوس؛اني شبه كل نطلع وندور قسما بالله مرات نتفرج ونروح..فجيوة في اللي ماعنداش بكل..
صفيه تنهدت وقالت: ع الاقل اللي ماعنداش نقولوا ماعنداش لكن اللي عنده وقاعدات زي جبال الهم ع قلبه ومايبيش يصرف منهم شي..
بدت ع وجه فردوس ملامح الأسف .
صفيه:مستخسر يدير لبنته حتى بدله...اني مش عارفه شن بتتفكر منه اميمه بالذات اللي ديما مستخسر فيها كل شي بنته الوحيده ياهمي اللي زيها اللي رفعتله راسه وولت دكتورة مفروض يفديها بروحه مش بس فلوسه..
فردوس؛الله غالب ياخالتي هدا عمي هكي من يوم يومه ومع الكل هكي حتى مع روحه مستخسر في روحه اللبس الباهي..
صفيه:صدقتي..بعد هالعمر اني تأكدت ان عمك هدا مريض مش طبيعي..
فردوس:ربي يهديه...عكسه مصطفى..مصطفى كان يلقى يقطع من لحمه ويوكل صغاره..عمرنا ماطلبنا منه حاجه وخلاها في خاطرنا..قداش تعب وقداش ري مني ماقدرتاش ولاقدرت اللي كان يدير فيه لين راح من بين ايديا..
وحطت ايديها ع وجهها وقعدت تبكي
نزلوا دموع صفيه مسحتهم وقالت؛وحدي الله يافردوس يابنتي..
حولت فردوس ايديها وقعدت تقول ببكي:اني كان ربي يخليني نعرف هو حي ولاميت..بش معاش نقعد نراجيه كل يوم..كل مايرن تليفوني قلبي يفز ونقول اكيده جماعة هيئة المفقودين يابيقولوا لقيناه حي..يالقيناه في وحده من هالمقابر..مرات وين نوض الصبح ندير زوز فناجين قهوة ونقول خل نتفائل خير بالك يرده ربي ونولوا نشربوها مع بعض الصبح زي ايام زمان......رشفت وهي تقول..كلنا يتامى من بعده كلنا اني وبناته وولده اللي يبي بوه معاه في العمر هدا
ااخ ياخالتي ااخ شن بنقول ولاشني قلبي مازال معبي مازال..وينك يااميمتي وين خلتينا بكري يما بكري هلبه كانك قاعده توا راني نبكي ونشكي ع صدرك وانتي تهوني عليا يام.
قطعت قلب صفيه اللي جتها طول وضمتها وقعدت تبكي معاها..
ع خشة مطيره وهي تقول:جو جماعة الطلبيه..
وين شافت حالتهم انفجعت وقالت:خيركم شن صاير!!؟
هدوا الزوز وتباعدوا عن بعض وقعدوا يمسحوا في دموعهم ويقولوا:مافي شي .
فردوس وهي ماشيه بسرعه للقصاع:هيا عمتي ابدي طلعي..
صفيه وهي معاها؛هيا يامطيره..
مطيره مررت نظرها عليهم بضيق واستغراب..بعدين مشتلهم تساعد فيهم...
☘☘☘☘☘☘
الساعه 3:00ظهرا..
في حوش لطفي الواعر...
كانت سدرة حاضنه غرفه وهي تقول:كلمينا ديما وابعتي صور..
غرفه وهي تضحك:حاضر..
ع جية طوبى تجري:اهم كتبهم كلهم..
تباعدت غرفه عن سدره وقالت؛هاتي..
سدرة؛علاش تكلفي فيهم ماك بتسافري بعد العيد..
طوبى:بنسافر بش نفصل قفاطين غادي ياسدره..
غرفه؛خيرك سدرة ريت هاللي طلباته حاجات بسيطه ماتكلف شي..
طوبى وهي تشبح لسدرة ع جنب:قوليلها..
وسدره تشبحلها بنفس النظره..
ضحكت غرفه وقالت:حتى اني بنجيلك سوسو..
سدرة:لالا مانبي شي كل اللي نبيه انك تعيشي جوك غادي وتكوني متهنيه ومرتاحه بس بس..
غرفه:مادخليش بيك انتي شن تبي..المهم اني شن نبي..واني نبي نجيبلك..
قعدت تضحك طوبى 
وهي تمرر في نظرها عليهم وع  وجهها ابتسامة امتعاض.
🌸سلمت غرفه بعدين ع عمتها وحوش عمها وجدها..واخر من ودعاته بوها..بعدين طلعت هي وراجلها متوجهين للمطار..
وخلوا وراهم لطفي فرحان ومرتاح ع اخر ع شاف التفاهم الود اللي كان باين في وجوههم وفي طريقة تعاملهم مع بعض...
☘☘☘☘☘
في الطريق..
كان يسوق وهو يغني مع الاغنيه اللي مشغلها...
الجالي...
عصفورة قلبي..نيساني..
يارمل البحر..وروح الروح..
وياغابات الزيتون..
ياطعم الثلج..وطعم النار...
فجأة قطع ع اغنيه رن تليفون اللي كان موصله بالسياره..
شاف الشاشه لقي..
(احمد حميدا) يتصل بيك..
مط شواربه وعكرش وجهه بضيق..
بعدين فتح الخط وقال..
الجالي:ايوه..
"وينك"
الجالي:في الطريق مروح بنتغدا في الحوش..
"كيف مش اتفقنا نتغدوا ع البحر"
هو ضيق عيونه وقال بهمس:نسيت بكل..
"نسيت قصدك"
الجالي:اسف..اني اسف هلبه نجاه..بس الخدمه متراكمه عليا وامس مش راقد كويس واني نخدم..ضغط يعني..ونسيت .
"قبل ماتنساش بكل"
الجالي:اها يعني مفروض ماننساش بكل مش بنادم اني!؟
"مش قصدي..باهي خلاص..ولي توا"
الجالي:معاش فيها كيف وصلت للشارع خليها عشي وخلاص شن رايك..
"والصغار عند من بنخليهم"
الجالي وهو يفكر:نقولك خليهم في حوشنا عند امي وقولي عندك عرس ولالمه اللي هو.
"باهي حتى هو راي وبالمرة نروح ونبات غادي"
هوغمض عيونه بنفاد صبر..
"شن مافرحتش شكلك"
الجالي:نجاة مش ملاحظه روحك الفترة الأخيره تنبشي ع النكد...
"توا انت تسوق مانبيش ناقشك لما نتلاقوا بعدين نهدرزوا"
الجالي:تمام نشوفك بعدين..
"نحبك"
الجالي:اني اكثر..
وسكر عليها..
ورجعت الأغنيه من جديد..
ورجع يغني معاها وهو خاش للشارع...
فات من جنب المكانيكي شبح جيهتهم..
لقي يوسا مقعمز وقدامه سفره ماكله..
في يد كاشيك وفي اليد التانيه شاد حاجه..
درس السيارة قدام الورشه..
ونزل من السياره..ومشي خشله وهو يقول..
الجالي:يوسا السلام عليكم..
يوسا شبحله وابتسم وقال:وعليك السلام جالي..شن الحال..
الجالي بإبتسامه:الحمد لله..شبح لسفرة يوسا..
كانت سفرة غدي منظمه وحلوة..
في صونيه كسكسي بالحوت ومعاهم صونيه سلاطه وصونيه عنب وبطيخ..
وحكة مشروب..
الجالي:مبحبحه اليوم يوسا..
يوسا؛تفضل..
الجالي:لاصحه..
يوسا:بالله قعمز كول حتى شوي..
الجالي ضحك وقال:مش رادك..
وقعمز الجالي ع روس صوابعه وعطاه يوسا كاشيك وقاله:تفضل مابديت..
خداه الجالي..
ويوسا ناض بيجيب كاشيك..
خدي جالي كاشيك من الكسكسي وكلاه..
ويوسا جي بكاشيك وقعمز..
الجالي:اممم..حاجه صح الله يبارك من بعتهولك..
يوسا:توبا توبا...
وقف ماكله وقعد يشوفله بعدين ابتسم..
ويوسا بدي ياكل..
والجالي يشبحله..وتفكر ان طوبى ديما تود في يوسا وتحسب فيه في كل شي حتى في الدبش والاحذيه...
غار هلبه..
غار من يوسا اللي حظي بإهتمامها طول المده اللي فاتت..
وهو يشوف فيه كيف ياكل براحه..
لاحظ انعكاس معاملتها عليه شن داير فيه...
عيونه جو ع كتاب صغير محطوط جنبه..
الجالي:يوسا شن هو الكتاب هداكا؟
يوسا شبح للكتاب وقال:هدا كتاب هديه من توبا يتكلم عن اسلام بالفرنسي..
الجالي بإبتسامه:تبي تسلم يوسا؟
يوسا ابتسم وقال:مازال..
عيون الجالي رجعوا شافوا للكتاب بعدين قال:طوبى..
يوسا:انت محظوظ جالي محظوظ جدا..وهي محظوظه..انا فرحان انكم حتتزوجوا..هي طيبة جدا وانت زيها طيب..
الجالي قعد يفكر في كلام يوسا...
هو فعلا محظوظ اللي بيحوز بنت زي طوبى...بس هل طوبى محظوظه اللي بيولي هو راجلها!؟
حط الكاشيك وهو مبتسم مجامله وقال:صحيت يايوسا..
وناض وقف..
يوسا؛زيد زيد..
الجالي؛تسلم يوسا تغدا انت صحتين..ماتبي شي..
يوسا؛شكرا لاشي..
هز الجالي وهو مبتسم بعدين قال:السلام عليكم..
ولف ومشي طلع من الورشه وركب سيارته وتحرك لحوشهم...
وهو ماشي..شبح لحوش لطفي الواعر وعقله يفكر في بنته الصغيره..
تنهد بعدين كمل الطريق لين وصل لحوشهم..
وخش بالسيارة داخل..
☘في الحوش..
مقعمزين في الكوجينه يتغدوا..
مغليه ونضال ومعاهم محمد المهدي حناه شداته ع الغدي..
كانوا يتغدوا عادي..
بس نضال كان ياكل من غير نيه..
مغليه وهي تشوفله:ماتقوليش خيرك شن صاير معاك مهبي وحتى ماكلتك بالهون..
هو مش معاها بكل..
محمد:ياعم...نضال..
شبحله وقال:همم!
محمد؛حناي تكلم فيك..
نضال شبحلها وقال؛نعم يام..
مغليه:خيرك شن صاير معاك جوك مش عاجبني الايام الاخيره..
هو ابتسم مجامله لأمه وقال:مافي شي شويه مشاكل بسيطه تنحل ان شاء الله..
مغليه:اكيد بسيطه!؟
نضال بضحكه؛والله بسيطه يام مادوريش..
ع خشة الجالي قال:السلام عليكم..
ردوا عليه السلام..
مغليه:من حظك كيف حطينا الغدي..
الجالي:لايام مش متغدي بنركب نرقد بعد نوض نتغدا..
مغليه؛باهي ع راحتك..
هو هز راسه ومشي طلع من حداهم وتوجه للدروج وركب..
وصل في جناحه خشله وسكر الباب..
مشي حط الشنطه ع الطاوله..
بعدين جي للسرير وانطرح عليه وحط ذراعه فوق عيونه..
برد المكيف خلاه يكسل حتى ياخد دوش..
قعد لحظات ع هالحاله..
بعدين حول ذراعه عن عيونه..
وطلع تليفونه من جيب سرواله..
خش ع الفيس...
وطول لصفحة طوبى..
لقاها منزله اخر منشور..
كانت صورة فيها واحد من المفارش اللي كملت خياطتهم..
مطبقاته وواخدتله لقطه حلوة ولازم في الصورة ورد الفل حاضر..
وكاتبه فوقها...
اللهم حظا جميلا..وعيشا رضيا..
ابتسم ودار لايك...
وكذلك خش ع المتفاعلين لقي حسين من ضمنهم..
الجالي؛خير امه شادها في جرتها!؟
طلع من الفيس وحط ع رقم طوبى واتصل بيها..
🌸هي كانت تلم في حوسة الغدي..
الكوجينه ع سدرة اليوم وهي عليها الحوش...
بس الغدي هي اللي طيباته بطلب من بوها..
وين جابت المكنسه الكهربائيه وبتبدا تكنس..
جتها مطيره بتليفونها اللي يرن وقالت؛ردي ياحنه ردي خطيبك..
تحشمت طوبى وارتبكت وخدت التليفون من عمتها من غير ماتشوفلها ومن الخجل..
ومطيرة مشت وخلتها وهي تضحك عليها..
طوبى فتحت الخط وردت؛ايوه السلام عليكم..
"وعليكم السلام والرحمه..شن جوك توا"
طوبى:تمام الحمد لله..شن جوك انت..
"توا بس ولى رايق"
ابتسمت وقالت:وين في الحوش ولاالخدمه؟
"في الحوش كيف روحت.."
طوبى:تغديت..
"لا...دايرين غدي مانحباش"
طوبى:شن هو..
"رز بالخلطه"
طوبى:يهبل الرز بالخلطه كيف ماتحباش!؟
"الله غالب مانعرفش ناكل"
ضحكت وقالت؛باهي بتقعد هكي من غير غدي؟!
"عادي مش مشكله"
طوبى:لاشن عادي متاعك هادي..
ومشت طول للكوجينه  وهي تقول:تحب الحوت...
☘هو ابتسم وعض ع شاربه بعدين قال:امم..علاش؟
"دايرينه غدي وفضل ماشاء الله قبل بنسقوه للتونسي بس طلع مسافر لتونس"
الجالي:قصدك حتى التونسي ياكل منكم؟
"ايه مسكين ماعنده حد مرة مرة نحسبوه معانا"
الجالي:في ميزان حسناتكم..
"آمين...نسخنه ونسقيه وكان يزن قاعد قوله يجي نبعته معاه.."
الجالي؛ماتعبيش روحك متعود نفوت وجبه في اليوم..
"فوت العشي عادي بس الفطور والغدي لا..كلم حد يجي بش نبعته معاه"
الجالي بإبتسامه؛صحيتي ياستي..
هي بضحكه
"سلمك ياسيدي.."
سمع سدرة خاشه وهي تقول..
"شن ديري هني بري اطلعي "
ردت عليها..
"نتكلم بالتليفون راهو."
"منو تكلمي"
فجأة معاش سمع شي..
زبطهم يتهامسوا..
ضحك نص ضحكه من غير صوت..
"جالي"
هي قالت اسمه عادي وهادي ماكنتش المرة الاولى اللي تقوله فيها..
بس هالمرة كان وقع مناداته بإسمه ع قلبه قوي هلبه..
لدرجة انه سمع صوت نبضاته وهي دق بقوة متسارعه..
الجالي:ترا عاودي قوليه مرة تانيه..
☘طوبى انحرجت حدا سدره..
مشت طلعت من حداها وهي تقول:ايوه..
"الو..تسمعي فيا"
طوبى:ايه...سكر توا خل نبدا نوتي غداك ولما يبدا واتي نرن عليك..
"تمام تمام...سلام"
طوبى:سلام..
نزلت التليفون وسكرت وقعدت تمروح بيدها ع وجهها..
بعدين لفت ومشت ولت للكوجينه..
☘☘☘☘☘
"باهي انت اثبتلها العكس"
نضال؛-عكس كيف تبيني نتصنع ونولي واحد تاني!
محمد:عمي افتح دماغك معاي شويه البنت من كلامها واضح ان اللي مضايقها منك جوك مع البنات كيف تبصر وتهدرز وعلاقاتك تي انت صاحبت نص بنات طرابلس وهي عارفه هالماضي كويس ويخي كان قدام عيونها..
نضال وهو يفكر في كلامه:قصدك تقول هي رفضتيني لهالسبب!؟
محمد؛ومافيش غيره..
ارتسمت ع وجهه ابتسامه عريضه وقال:معناها تغير عليا هي!
محمد بضحكه:صح النوم..
شد راس محمد بإيديه الزوز وباسه بعدين قال:يؤبرني ربك يافرخ انت شن هالدماغ اللي عندك...
محمد بضحكه:والله ماتبي ذكاء واضحه زي الشمس..
نضال طلقه وضربه ع قفاه وقال:باهي فهمنا..هز راسه وقال..تمام..تمام..تو نخليك تتبشمطي ياشمطاء..
محمد فنص عيونه فيه وقال:شن بدير!؟
نضال:مش شغلك نوض اقرا قرايتك..
محمد؛صح النوم نراجي في النتيجه..
نضال:بالله عليك!..باهي..باهي ان شاء الله بالنجاح..
ومحمد يضحك وهو يحرك في راسه يمين ويسار..
☘☘☘☘☘
ماشيه للباب وهي لابسه حجاب كامل..
في يدها سفرة الغدي..
وقفت في الباب وفتحاته...
عابيه بتلقى يزن ولد المهدي..
بس تسمرت من المفاجآة لما لقاته بروحه..
لابس تيشرن وسروال جينز ومغطي عيونه بالنظارات وع وجهه ابتسامه
طوبى ووجهها احمر بإرتباك قالت:تفضل..
هو خدي منها وقال:مدايرتيه انتي..
طوبى وهي مبتسمه بخجل:ايه..
الجالي:باهي نولي بارد كان طلبت مبروشه..
ضحكت وعيونها لوطا بعدين شبحتله وقالت:باهي..
ابتسم وقال:مشكورة ياجميله..
طوبى بخجل:العفو..
الجالي بضحكه:سلام..
طوبى:سلام..
لف ومشي...وهي سكرت الباب..
ومشت خشت وهي حاسه روحها سخنت زياده ع الجو من التوتر والخجل..
قابلتها سدرة وشافت حالتها قالت:خيره وجهك زي الطماطم!
طوبى بإحراج وارتباك:هو جي خدي الغدي وقال يبي مبروشه..
سدرة:وبري ياحنه ديريله المبروشه..
نزلت طوبى عيونها ومشت خشت داخل..
ضحكت سدرة ضحكه خفيفه وقالت:الحمد لله ياربي..هادوا غرفه وطوبى تهنينا عليهم...يارب اصرف عنهم بنات وولاد الحرام يارب...
☘والجالي..
مقعمز في الجنان يتغدا..
كان ياكل بشراهه وهو متلذذ ع الاخر ببنة الماكله..
فجاة جمع تخطخيط شبشب كعب..
الجالي وهو ياكل؛شن بيخلصك يالجالي!..
وبانت عليه ام شبشب الكعب شافاته قالت:صحتين صحتين..
الجالي:سلمك..خشي جيبي كاشيك وتعالي..
خديجه وهي مبتسمه:شويه بس..
ومشت بسرعه خشت جابت كاشيك بعدين جاته..
وبدت تاكل ع الواقف..
خديجه:اممم..عطيك الصحه ياطوبى..
هو شبحلها وقال:اما تبطليها وقفة الروشن!
خديجه وهي تاكل:امم..لين نطمن عليكم...امم..غير تجينا هالطوبى كل جمعه بنخلوها تشد الكوجينه..
الجالي:واخدها بش توكلكم!؟
خديجه وهي متعجبه:اشيه اشيه اشيه..هادي واخدينهالك بالسيف عليك ودرت هكي مالا كان برضاك كيف..
الجالي جبد منها الكاشيك وحطه في السفره وقال:بري خشي بري..
قعدت تضحك ومشت من حداه وهي تخطخط بالكعب وتغني..
قولي احبك كي تزيد وسامتي فبغير حبك لا اكون وسيما..
هو التفت وشبحلها وقال وضحكتها شادها بقوة:ارزيك فهالشبشب..
خبطت بالكعب ع ارضيه مرتين..
هو التفت القدام وقعد يضحك ويحرك في راسه يمين ويسار..
وهي خشت تضحك..
حولت الشبشب وقعدت تقول في نفسها
"مش حطول معاه اكثر ماطولت هديكا اللفعه..اهم شي توا نخليه براحته ع الآخر"
☘☘☘☘☘
الساعه 8:30مساءا..
من قدام شط البحر..
كانوا مدايرين طاوله وكراسي وفوقها عشاهم اللي داراته نجاه..
هي كانت تهدرز عليه..
وهو عيونه ع بحر وسرحان..
نجاة:نفكر نقصه شن رايك؟
هو ماكانش مركز عليها شن تقول:ع راحتك..
نجاة؛قصدك عندك عادي نقصه شعري مش قبل قتلي ماتمسيشي بكل!؟
هو شبحلها وقال:ايه عادي..هو شعرك انتي مش شعري..
نجاة:جالي خيرك.! معقوله مش ملاحظ انك متغير هلبه المده الاخيره...
الجالي شبح للبحر وقال؛يتبدا في النكد..يعني يانجاة مش عارفه اني بشن قاعد نمر المفروض انتي ديري جهدك بش طلعيني من اللي اني فيه مش تزيديني ع مابيا..
نجاة:صايرة حاجه تانيه؟
الجالي:لا..
نجاة شبحتله شويه بعدين خدت يده وقالت:حبيبي اني معاك وحنساعدك صدقني وحنعلنوا زواجنا ونخلوهم يباركوا ونخلصك منها طوبى هادي..
حس بضيق شديد لما حكت ع طوبى..جبد يده من يدها بالشويه وقال بإبتسامه:ان شاء الله..هي خل نتعشوا المنظر يسهف..
نجاة ابتسمت وقالت:اللي تحبه كله درته..
وقعدت تقربله في الماكله وتعطي فيه..
وهو يشوفلها ويشوف لماكلتها وياكل وقاعد يحاول يسترجع المشاعر اللي كان يحس بيهم معاها مش قادر..
وكأن في شي في داخله ناحية نجاة كان مشتعل..وفجأة انطفي...
ع قد ماحاول معاه مافيش فايده..
حتى الهاله اللي كان يشوف فيها حوالين نجاه انطفت...
معاش في شي زي قبل....
وفي نفس الوقت..
في شي في داخله كان يبي يسمع صوت طوبى..كان يبي يروح لشارع القهوه لأنها فيه...
☘☘☘☘☘
صبت من البكرج القهوة في فناجين..
حطتهم في سفرة فضيه اللون..
مع زوز طواسي ميه.. بعدين رفعت السفره ومشت طلعت بيها من الكوجينه..
وين قربت توصل للمربوعه..
قلبها بدي يدق لما سمعت صوته يتكلم..
خدت نفس..بعدين دقت دقتين ع الباب...
شويه وطلع بوها خدي منها السفرة وقال..
لطفي:بنشده للعشي..
هزت سدرة راسها بإيجاب..ومشت للكوجينه..
وولى بوها للمربوعه..
لطفي:هي تفضل يامهدي..
المهدي خدي الفنجان وقال:يزيد فضلك..
حط لطفي السفره ع الطاوله وخدي الفنجان وولى قعمز وهو يقول..
لطفي:وهدا هو الوضع كيف ماشرحتهولك..
المهدي:كون هاني ياعمي لطفي مادور شي بكل..
لطفي؛بارك الله فيك يامهدي..
المهدي؛فيك بارك الله..وبعدين ماعنديش فيه جميل حني عيلة وحده توا خلاص..
لطفي بإبتسامه:مزبوط..هدا علاش بتقعد للعشي..
المهدي:لا اني اعفيني والله عندي ماندير..
لطفي؛والله مانك طالع من الحوش من غير ماتتعشى..
المهدي:تي غير علاش الحلفان ياعمي لطفي..
لطفي:خلاص توا طلعت من فمي وحلفت..
المهدي حرك راسه يمين وقال؛ربي يحفظك وخلاص..وقعد يشرب من فنجان القهوة اللي كان واثق ومتأكد ان سدرة هي اللي داراته...ومد داخله مش عارف وين بيحط فرحته اللي شده لطفي ع العشي..
المهم عنده يكون في نفس المكان اللي فيه سدرة ..
مكان عايشه فيه...
كل شي فيه عليه بصمتها...
الهوا متاعه فيه من انفاسها..
الياسمين معبي بريحته زواياه....
المهم مكان ليها وهي فيه...
☘☘☘☘☘
خشت للحوش وكان باين ع ملامح وجهها انها باكيه..
تمشي بخطوات محبطه وهي خاشه داخل..
سمعت صوت بنتها الصغيره تهدرز على حناها..
وحناها تقوللها..
"كان مش مني راكم متوا من الشر"
وبنتها الكبيره ترد..
"امي صح بس تنباله هلبه امس رقدت وخلت ماعين العشي لين خشيت اني غسلتهم"
والجده تقول.
"ردوا بالكم تولوا زيها خليكم زي حناكم وعماتكم ناشطات وفالحات"
البنت الصغيره قالت..
"تهبل الصالصه متاعك ياحنينه احلا من متاع ماما"
البنت الكبيره قالت..
"ع اساس ماما تعرف دير مكرونه صالصه"
اكتفت بهالقدر من حديثهم اللي تسمع فيه يوميا بلامبالاة ومش مهتمه..
هي اليوم بالذات مش حتهتم بشي قد المصيبه اللي نزلت ع راسها..
مشت خشت لدار النوم وسكرتها عليها..
لوحت الشنطه ع طول يدها..
حولت الوشاح لوحاته ع السرير..
قعمزت ع السرير..رمت شخاشيرها ودفتهم برجليها تحت السرير..وانطرحت  وهي تشبح للسقف وتتفكر في كلام الدكتورة..
"مدام نسرين مبروك انتي حامل"
غمضت عيونها بشده وحطت ايديها الزوز ع وجهها وقعدت تبكي بألم وقهره...
☘ومن جهة تانيه..
نجاة بعد ماروحت من لقائها مع الجالي اللي حست فيه ان الراجل تغير هلبه وممكن جدا تخسره ويضيع من يدها..
مشت طول لعياده قريبه..
ودارت تحاليل حمل..وللأسف..
"مافيش حمل مدام"..
روحت وهي تبكي في السيارة...مش عارفه كيف بيصير فيها لو الجالي رخي بيها..
حضيع...حتنتهي...
وماإن وصلت لشارع القهوة ..مسحت دموعها..
وبعد ماخشت بسيارتها للقراج..
طلعت عدة المكياج وقعدت تحط في رتوش تمحي اثر الضعف.
بعدين نزلت ومشت خشت للحوش..
☘داخل..
خديجه؛نبدوا بالشويه بالشويه الفيلا كبيره ماشاء الله ونبوا بنت االواعر تخشلها تلقاها ماناقصتها يبرة..
ع خشة نجاة قالت؛السلام عليكم..
شبحولها وردوا السلام..
نجاة خشت قعمزت وهي تقول:تعبوك الصغار عمتي؟
خديجه؛اني وعيشه عاونها فيهم..
مغليه:شن حالها صاحبتك توا...
نجاة:الحمد لله شاده صحتها..
خديجه وهي تشبح لنجاة من فوق لتحت:شكلها لمتها بسيطه..
نجاة؛مش لمة هي عادي..حني لمينا بعضنا ومشينالها..
خديجه؛اها..
نجاة؛امم..في شن كنتوا تهدرزوا قبل نخش..
خديجه؛في حال هالدنيا..
عائشه شبحت لخديجه بإستغراب في ردها ع نجاة وحست انهم متقصدين مايحضروهاش في أي شي يخص عرس الجالي..ومافهمتش علاش...
نجاة رفعت حاجبها وهزت راسها وقالت؛حال الدنيا..امم..ولى يبكي..
خديجه:وهلبه..
نجاة؛ربي يجيرنا ويجيركم من تقلب حالها..
مغليه عقدت حواجبها وقالت:ويجيرنا من كل يبينا بسو ويكشفه قدامه بكري بكري بش نحطوله حد..
نجاة بلعت ريقها وهي تشوف لمغليه وقالت:آمين..
وخديجه تشوفلها بنظرة ماكره..
وعائشه في وسطهم مش فاهمه شي..بس بدت تتأكد من احساسها ان في شي صاير يخصهم هما ونجاة ومدرقينه..
ع خشة الجالي للحوش..
مغليه:جالي.
الجالي من برا..
"نعم يام"
مغليه:هونا عندك حاجه في الكوجينه..
"كان ع العشي تعشيت"
ضحكت خديجه..وعائشه ابتسمت..
مغليه بضحكه؛لامش عشي مش عشي خش وشوف بروحك..
"تمام"
نجاة وهي تسحن من داخل قعدت تشبحلهم وتبي تسأل بس مش قادره..
وهما خلوها تزيد تسحن في روحها ومابو يقولوا شي قدامها..
☘اما هو..
خش الكوجينه..حط كيسة موبايل جديد شاريه ع الطاوله..
وشاف بوكس حلو..
فتحه...وشاف المبروشه ابتسم..
كانت مقصوصه ماعليه الا ياخد بس..
خدي طرف وقامه وبدي ياكل وهو يتخيل في طوبى دير فيها..
رجع شاف للبوكس..عيونه جو ع عقد فل صغير جنبه..
خداه وقعد يشوفله وهو يضحك..بعدين قربه من انفه وقعد يشم..
تنهد...
ورد الطرف للبوكس..سكره..وخداه وفي يده عقد الفل..
وخدي كيسة الموبايل الجديد..
وطلع من الكوجينه ومشي طول ركب فوق...
ع طلعة نجاة من الصاله..
شافاته وهو راكب بسرعه وفي يده حاجات..
عيونها تعبوا دموع..
وقلبها تعبى بشعور الغضب اللي ولداته الغيره الشديده..
ومشت لجناحها وهي تفتح في يدها اليمين وتسكر من العصبيه..
بعدين خشت جناحها وسكرت وراها الباب...

#إلا_أنت
#طوبى

....يتبع....