طوبى الجزء الاول

الجزء السادس والاربعين

(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_السادس_والأربعين"الجارح وياسمينه"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫🚫ملاحظه🚫🚫
اي تعليق عنصري حيتم حظر صاحبه..
اي تعليق فيه سخريه ع ثقافه الطوارق حيتم حظر صاحبه
واني هني نكتب في الحوارات باللغه الامازيغيه التارقيه لأعزائي التوارق مش لغيرهم احتراما ليهم وحبا لثقافتهم
نتمنى تكونوا قريتوا هالملاحظه كويس..وشكرا ع تعاونكم مسبق🌸
☕☕☕☕☕☕☕☕☕☕☕☕☕☕☕☕☕
"عطوني تلاته كياس من قهوتنا"
سدرة:اللطف!
طوبى بضحكه:نبيها حتى لبعدين
سدرة:اسمعي ماتكتريش قهوة مش باهي ليك تعب قلبك تعب المعدة متاعك..ماتخلنيش نخمم في
طوبى:ياعمري ماتخافيش عليا راده بالي من روحي كويس
ع خشة مطيرة قالت:اهو قفطانك هدا والعبايه البيضا اللي خيطتيها عند بنت فوزيه
طوبى:باهي اللي تفكرتيها عميمه..!
وخدت منها الكيسه اللي فيها قفطان تبيه طوبى من الكسوة والعبايه
ع جية سدرة بكيسه فيها القهوة وقالت:خودي..
"طوبى"
خشت اريج وقالت:بيبو هيا
تنهدت طوبى وجت لسدره ضمتها وقالت:سلمولي ع غرفه هلبه
سدرة وهي حاضنتها: يوصل...المهم انتي ردي بالك ع روحك وع راجلك
طوبى:ان شاء الله..
تباعدت عنها وجت لعمتها ضمتها.
مطيره:توصلوا بالسلامه يارب..
طوبى:اللهم امين تسلمي عميمه..
بعدين جت لأريج وحضنوا بعض..
طوبى:ردبالك ع روحك
اريج:حتى انتي..توصلي بالسلامه حبيبتي..
☘وسلمت بعدين ع فردوس وآلاء ومعتز..
وطلعت من الحوش لراجلها وبوها معاه برا..
سقدهم وقعد واقف في الباب يشوف لسيارتهم..
شبحت طوبى لبوها بنظرة حزن وع وجهها ابتسامه..
وهو ردلها الابتسامه..
الجالي:هي السلام عليكم..
لطفي:في امان الله..
وتحرك جالي بالسيارة وهو رافع معاه روح عيلة الواعر اللي ماتعودوش عليها تغيب عليهم يوم واحد...
☘جبريل:هذي سنة الحياة يالطفي..
لطفي بحزن:اللهم لااعتراض..ربي يسعدهم ويصرف عنهم كل شر..
جبريل وعبد القيوم قالوا:آمين..
بعدين عبدالقيوم قال:عمي لطفي بقولي لو نأجلوا المشيه لبكرا خير..
لطفي:لالا بإذن الله ماشيين اليوم...
رن جرس المربوعه..
ناض لطفي وقال:شويه وجاي..
ومشي طلع من حداهم وهما يقولوا:خود راحتك..
☘☘☘☘☘
"صح اني مانقعدش ديما ومانشوفش في كل شي..لكن في حاجات واضحه زي الشمس يانسرين وهادي مش اول مرة وكلكم شاهدين"
نسرين:مهدي انت باللي دير فيه ضر في عيشة بالدرجة الاولى..
المهدي بحزم:اني مرتي معاش نبيها تنزل الا من الجمعه للجمعه بس وتم الكلام..
نسرين تنهدت وقالت:انت حر دير اللي يعجبك..
هو عقد حواجبه وقال:فوتي الموضوع هدا وقوليلي راجلك خيره ماحضرش العرس؟
نسرين وهي تحاول تبان عاديه:مسافر مهدي ماتعرفش!
المهدي:لامانعرفش ماقالي حد..
نسرين ابتسمن وقالت:مسافر اسبوع العرس كله وغدوة بيروح..
المهدي؛مش صاير بيناتكم شي؟
ضحكت وقالت:لالا والله ماصايرة حاجه..
هز راسه بعدين قال بشي من التردد"باهي صاحبتك شن حالها..ماعجبتنيش امس حسيت فيها شي..
نسرين:فاقده طوبى..انت عارف شن طوبى عند سدرة..
المهدي هز راسه وقال:اني اللي نعرف..ع خاطرها هي قاعدين نعانوا لتوا..وفي الاخير خوي خداها..وهي اللي تولي كنة حوش شنيبه..الله يادنيا..الله ع المكتوب..
نسرين بضيق:هاك قلتها بروحك مكتوب..
تنهد من وسط قلبه بعدين قال:ماتبوا شي؟
نسرين:سلامتك..
لبس نظاراته ومشي طلع من الحوش..
ونسرين بعد ماكانتش تشوفله بأسف خشت داخل..
☘هو بعد طلع..
شاف سيارة سدرة طالعه من الحوش..
واريج تسكر في الباب..بعدين مشت تجري ركبت في الخلف..
ومن القدام جنب سدرة مطيرة..
وتحركت بسرعه بالسيارة.
المهدي بقلق:ان شاء الله خير..!
☘في الطريق..
سدرة بإنفعال وخوف:علاش يكذبوا عليا علاش المراة من امس وهي راقده في العياده تعاني بروحها واني نهيج ..
اريج:خويله..خالتي روفي هي اللي قالت ماتقولوش.
سدرة:وهما يسمعوا كلامها عاد!
مطيره بقلق:هدي ياسدرة يابنتي هدي بش تعرفي تسوقي..
خدت سدرة نفس عميق بعدين زفرت وبدت تقرا في سورة الفاتحه..
واريج ومطيره يشبحوا للطريق وهما يفكروا في غرفه..
☘وصلوا للعياده اللي قاعده فيها..
لقوا عبد الرؤوف يراجي فيهم..
فاتت من قدامه سدرة وهي معصبه وتقول:شكرا ياعبد الرؤوف..
غمض عيونه بنفاد صبر بعدين فتحهم ولحقها وهو يقول:غرفه هي اللي تبي هكي ع خاطر اختها ماتبيش تفسد عليها..
سدرة بعصبيه:لاحول ولاقوة الا بالله..لاحول ولاقوة الابالله..
طبطب مطيره ع كتف عبد الرؤوف..
شبحلها قعدت تترجى فيه بنظرات عيونها يسكت ويعديلها شن ماسمع منها...
هو تمالك نفسه وهز راسه وهو ساكت..
سدرة وقفت وقالت:وينها هي!
عبد الرؤوف مشي بسرعه للمصعد فتحه وقال؛خشوا..
خشوا النساوين وهو خش بعدهم..
سدرة:كيف يصير فيها شن خليتها دير في الحوش بش صار فيها هكي..
فنصت اريج..
ومطيره قالت:سدرة!
عبد الرؤوف:شوفي اني محترمك وساكت عنك لأنك في مقام ام غرفه ياريت ماتضغطيش عليا وتخليني ننسى انك اختها مرة وحده..
سدرة:وفوق من هكي تهدد!؟ترا شن بتقول سمعني..
انفتح باب الاصنصير وهو اول من طلع ومشي وهو متجاهلها بش مايغلطش معاها في الكلام..
وهي وراه مابتش تسكت..
سدرة:شن تحسابني بنسكت كان صارت فيها حاجه والله نشكي فيك ونمرمدك..
مطيره:خلاص اسكتي عاد..
عبد الرؤوف:هي هادي حجرتها..ومشي طول وخلاهم..
فتحت سدرة الباب وخشت وهما وراها..
لقوا غرفه راقده لكن مش بالنوم..
سدرة جتها وشدت وجهها بإيديها وقالت:غرفه شن حالك ياماما!
غرفه بصوت متعب شويه:الحمد لله..كويسه..
مطيرة:ربي يعوضك خير بنتي المهم حالك باهي وان شاء الله القدام تحملي وتجيبي بدل الواحد اربعه..
غرفه:مش بالساهل ياعمتي حملي مايكملش الا بضرب الايباري والرقاد 24 ساعه.
سدرة:معليشي بتتحملي وكل شي بأجره بنتي..
غرفه غمضت عيونها وفتحتهم وهي تقول:الحمد لله ع كل حال..بعدين ابتسمت وقالت..كيف طلعت طوبى امس
اريج:زي العسل تهبل...سألت عنك هلبه..
سدرة:جت تسلم علينا قبل لتسافر..تسلم عليك هلبه..
غرفه بإبتسامة:سلمها يارب..
مطيرة؛من قعد معاك امس؟
غرفه؛نبيله وروحت الصبح ع خاطر عندها محكمه..
خدت سدرة نفس وزفرت براحه وقالت:اخر مرة ديروا حركة زي هادي وتخلونا اخر من يعلم..
غرفه؛بوي عرف!؟
مطيره:لالا مشي يوصل عمك جبريل ومرته للمطار وبيمشي مشوار مع واحد جي جديد للشارع..
غرفه:التارقي؟
سدرة:من وين تعرفيه؟
غرفه بإبتسامه:حكالي عليه رؤوف..
☘☘☘☘
والتارقي عبد القيوم..
كاين في شركة الكهرباء مع لطفي تفاهم مع الادارة غادي..وخبروه انه حيبدا خدمه من غدوة..
☘قدام مبنى الشركه..
عبد القيوم؛عمي لطفي عدي شوف احوالك تربح نا بندير برمه ع معارض السيارات بعدها عندي كم مشوار مانبي نشقيك معاي..
لطفي هز راسه وقال:ع راحتك ع راحتك المهم رقمي عندي يصير معاك اي شي كلمني طول..
ابتسم وقال:ان شاء الله..
لطفي:هي السلام عليكم..
عبد القيوم؛وعليكم السلام..في امان الله..
وتحرك لطفي..
وهو قعد معاه بعيونه لين السيارة ادرقت..
خدي نفس عميق بعدين قال:على الله توكلنا وبه نستعين..
وقعد يأشر بيده لسيارات الاجرة...
وقفت وحده ركبها وقال:السلام عليكم...بالله جامعة طرابلس..
☘الجنون بعينه حالة عبد القيوم اللي كان متخيل انه حيلقى ام العيون الحايرة وسط هالامم من الإناث االي يقروا في الجامعه..!☘
بعد طول مسافه قطعها وهو متشوق وملهوف...وصل في الجامعه...
لما نزل ماكانش عارف منها شي..
خش لكلية الطب..ماعرفهاش في البدايه كلية شني..
بس شاف بنات اشكال الوان...
التبرج ع أصوله..اللبس الضيق..الصوت العالي والضحك المفضوح...
شاف اللي مقعمزات مع الشباب ومافيش بينهم اي فاصل ولامسافه...شاف اللي ماشيات يشربوا في المكياطه..
و في اللي فاتوا من جنبه ريحة عطرهم قويه لدرجة دوخ...
وهو يشوف في هذا كله دار بينه وبين نفسه حديث...
عبد القيوم...
"حنعرفها بسهوله بينهن...حتبان عليا طول لأنها تفرق عنهن من لما كانت صغيره وهي متحجبه ومحتشمه يابال تو.."
واكيد هالمناظر مرت عليه من زمان مش شي جديد عليه لأنه قاري في جامعه وفي مدينه كبيره...
بس اللي فرق هالمرة ان البنت اللي عشقها قلبه من هالمدينه مايبيش عقله يتخيل انها زيها زي اللي شافهم..
راسملها صورة في خياله مايبيهاش تتشوه ولو شويه...
🌸واللي يدور عليها..في السمي طايره...
في الطيارة كانت طوبى..راقده ع كتف الجالي راجلها اللي كان راقد حتى هو...
وايديهم في بعض هو شاد فيها بقوة حتى وهو راقد..
وهي مستسلمه لقبضته القويه اللي كانت تحسس فيها بمدى تمسكه بيها هالشعور مفرحها هلبه...
☘واختها الكبيرة..
بعد ما هي طلعت من الحوش بدت حاسه ان اكثر شي كان مخليها متمسكه بالدنيا خلاها...
شعور بدي يراود في سدرة مش عارفه شن سببه..
هل لأن طوبى خلت فراغ كبير بعد طلعتها من الحوش حسسها بالوحشه!
او لأنها وصلت لمرحلة من التعب النفسي خلتها تزهد في وجودها في الدنيا ومعاش راغبه تقعد فيها اكثر من هكي!؟
☘طلعت من العيادة شافت عبد الرؤوف واقف لاهي بتليفونه..
تنهدت بعدين مشتله وقفت عليه وقالت..
سدرة؛عبد الرؤوف..
قام عيونه وشبحلها بنظرة فيها شي من الحده..
سدرة؛اسفه ع اللي صار بكري..
هو قعد يسمعلها وماباش يقاطعها..
سدرة؛اني اللي هكي لما ننفعل مانعرفش شن نقول ولاكيف نتصرف..ابتسمت وقالت..زي ماقلت انت..اعتبرني ام غرفه مش اختها وماتواخذنيش شن ماريت ولاسمعت مني..
هو ابتسم وهز راسه وقال:عارف مكانتك في عيلتك..وعند غرفه بالذات..هدا علاش بنقولك سامحيني وانسي اللي قلته وماتخليش غرفه تعلم بيه..
سدرة بإبتسامه:اكيد مش حنقوللها شي اني اللي بديت بالغلط مش من حقي نشكي..
ابتسم وهز راسه وهو ساكت...
سدرة:المهم توا امتى تطلع غرفه؟
عبد الرؤوف؛غدوة ان شاء الله...
فجأة..
رن تليفونه ..
عبد الرؤوف:لحظه..شاف الرقم قال..نستأذن..
سدرة؛خود راحتك...
مشي عبد الرؤوف تباعد عنها..
وهي قعدت واقفه تشم تشم في هواء..وتمرر في نظرها ع المكان..
لعند ماثبتوا عيونها ع شخص وين شافاته تفاجئت ونبضات قلبها تسارعت...
وهو كان واقف بعيد شويه جنب شجرة ويشبحلها من ورا النظارات..
لما شافاته حولهم...
تبددت ملامح المفاجآة اللي ع وجهها لملامح الحزن وقعدت واقفه في مكانها وتشوفله...
شويه ولقاته يقدملها..
وكل مالها نبضات قلبها تقوا وتتسارع...
وصل فيها..وقف قدامها وقال وهو يمرر في نظره ع الطريق:السلام عليكم..
هي ردت تقول؛وعليكم السلام..
شبحلها بعدين اشر براسه ع العياده وقال متسائل:لاباس..
هي قالت؛غرفه تعبانه شويه .
ضيق عيونه وقال؛ان شاء الله مش حاجه خطيره؟!
حركت راسها بالنفي وقالت:لاالحمد لله..
شبحلها شويه وقال:حاسك انتي التعبانه..
عيونها تعبوا دموع وهي تشوفله .
وهو متابع يقول:شكلك ماعجبنيش الايام اللي فاتوا..تاخدي في دواك ؟تاكلي كويس!؟
ابتسمت بألم وقالت:ياريت التعب اللي اني فيه من الغده بس..
قعد يشبحلها وهو ساكت لكن قلبه موجوع..
سدرة وهي تتكلم بيدها:حاسه بعد طلعة طوبى من الحوش وكأن الدنيا ولت فاضيه حاسه زي اللي كأنه الحياة فقدت طمعتها..مش عارفه كيف نشرحلك بس..حاسه ان خوك خدي مني روحي..ولااني عطيتهاله بإيديا...
هو يسمعلها وساكت..كان يبيها تفضفض وطلع اللي في قلبها..
رشفت وسكتت شويه بعدين قالت:تعرف..حاسه روحي..حاسه اني زي اللي خلاص..
عقد حواجبه وقال:خلاص شني!..
نزلوا دموعها وقالت؛خلاص..مهمتي في الدنيا انتهت..
للحظه حس قلبه شبه وقف من الكلمه اللي قالتها...
بخوف بدي يقول:شن مهمتك انتهت هادي..شن تقولي انتي!؟
بعدين من قال معاش تحتاجك طوبى شن ماتبيش تشوفي صغارها وتعانيهم معاها وتربيهم انتي وياها!؟ مش هي بس..
قعد يعد ع صوابعه وهو شاد النظارة..بوك..خواتك صحاباتك..اشر عليها وقال..هادم كلهم لمن مازال يبوا منك هلبه..اين مهمه اللي انتهت!..وبعدين تعالي جاي راهو اللي تحسي بيه توا امي حساته لما عطت خواتي..يخي امي تعبت هلبه وقعدت راقده قريب اسبوع!..مع الوقت تتعودي ويبدا عندك عادي...ضحك وهو مازال حاس بخوف كبير وقعد يقول..بعدين راهو الغده مرض تقدري تسيطري عليه غير ماتهمليش دواك وركزي ع الماكله اللي تفيدك..
تسمع فيه وتشوفله كيف يتكلم..
حست بأنه خاف من كلامها واضح من المواضيع اللي دخلها في بعضها وهو يتكلم..
المهدي؛حولي من راسك الافكار هادي..اصلا لو في حد بيكون الموت قريب منه اني مش انتي..
قلبها انقبض...
هو بإبتسامه تابع يقول:علي لحظه...يوقف..يسكر راسه معاش يخدم نقول يادنيا الوداع...ركز عليها بالنظر وعيونه تعبوا دموع وقال بنبرة فيها ألم واضح..
"مش حتموتي قبلي راهو..."
هي حست روحها حتنهار..
حطت يدها ع فمها وشدت بكاها ومشت بسرعه بتخش داخل..
هو شبحلها وقال..مش حتصير صدقيني..
خشت داخل للعياده وهي تبكي بكاء مكتوم..
نزلت يدها ومشت تجري وهي تقول:اطلعوله اطلعوا..
الممرضات واللي في الاستعلامات انفجعوا وقعدوا يسألوا فيها..
"خيرك ياماما..مني!؟"
سدرة وهي تبكي:واحد برا مريض قلب مريض قلب وتاعب..
سمعها دكتور كان جاي بالصدفه..
طلع يجري ولحقوه الممرضات..
وهي مشت قعمزت ع كرسي معاش قدرت توقف..وقاعده تبكي..
☘طلعوا الدكتور والممرضات برا..
لقوا المهدي مقعمز ع كرسي وحاط يده ع صدره..
وحداه عبد الرؤوف شاده..
هو اللي خداه وحطه ع الكرسي..
كان واقف يشوفلهم وهما تكلموا..
ولما خشت سدرة طول المهدي تعب وهو جاه يجري وشده ورفعه قعمزه ع الكرسي وجاي بيخش ينادي الدكاترة لكن سدرة سبقاته..
الدكتور جي للمهدي وقعد يساعد فيه ياخد نفس وبعدين بسماعاته قعد بيتفحص ويسمع في نبضات قلبه...
الدكتور:صار معاك شي خلاك تنفعل..!؟
عبد الرؤوف قعد يشبحله..
المهدي:ايه وراح ع حاله..ناض وقف وهو يقول..توا مافيا شي خلاص..
شبح للعياده شويه بعدين شبح لعبد الرؤوف وقال..وصيهم ع نسيبتك ديرولها تحاليل شوفوها وضعها مش مزبوط ياعبد الرؤوف..
هز عبد الرؤوف راسه وع وجهه باديه ملامح الضيق والوجع..
مشي المهدي وخلاهم.
وهما يشبحوله..
الدكتور؛قريبك؟
عبد الرؤوف بدون مايشبح للدكتور قال؛جاري..
ومشي خش داخل..
الدكتور قال:لاحول ولاقوة الا بالله..بروا خشوا شوفوا شغلكم..
مشوا خشوا الممرضات وهو قعد واقف يشوف للمهدي لين ركب سيارته وتحرك..
☘داخل..
عبد الرؤوف:شن صار بيناتكم..
سدرة وهي تمشي بإتجاه دار غرفه وهي تقول:شي..هو شن حاله..
عبد الرؤوف؛طلع من العياده ع رجليه..بس سامحيني في سؤالي هو جي هني صدفه!
وقفت وشبحتله بحده بعيونها المدمعات وقالت:لا دايرة معاه موعد!
هو غمض عيونه وفتحهم محاوله منه لتهدئه اعصابه وقال:مش هدا قصدي..نقصد جاي لحد هني!؟
سدرة بعصبيه؛برا انشده!..
ومشت من قدامه وخشت لدار اختها...
عبد الرؤوف قعد واقف في مكانه وهو يقول متسائل بتعجب:هادي كيف يتفاهموا معاها!؟
☘☘☘☘☘☘
طلع من كليه الطب وهو مازال يمشي ع رجليه..
ويمرر في نظره هني وهني..
اي حد يشوفه يلاحظ انه يدور ع حد..
لكن مايعرفش ان اللي قاعد يدور عليه شي اشبه بالسراب..
ماطلعش من الجامعه الا بعد اربع ساعات من وجوده فيها..
اربع ساعات من البحث المتواصل دون جدوى..
بس مافيش يأس..في داخله شعور قوي وامل كبير ان ربي ماجابه لطرابلس مرة تانيه وسخرله الخدمه فيها الا هو كاتبله يتلاقى معاها..
☘وهي فهالوقت كانوا واصلين هي وراجلها لأحد فنادق اسطنبول الكبيره في تركيا..
خشوا غرفتهم والجالي يكر في شنطته وشنطتها..
هي قالت: تو اني اوقات الصلاة في اسطنبول نعرفها بس زعمه القبله وين هني!؟
مدلها تليفونه وقال:خشي نلقي برنامج فيه بوصله تحددلك مكان القبله..
هي خدت التليفون اللي مافيشي اي شي من اسراره المدفونه اللي شراه بش يكلم بيه طوبى بس..
مشي خش للحمام..
وهي قعدت دور في البرنامج لين لقاته خشت عليه وقعد تبحت لين تحدد مكان القبله..
طوبى:تمام...
شبحت جهة الحمام وقالت:توا هو في الحمام..
غيرت عيونها للتليفون وقالت:خل نخش نشوف شن عنده تاني ناخده منه..
وطلعت تليفونها بش تنقل البرامج اللي تبيها....
وهي دور شافت الاستديو..فضولها خلاها تخش عليه..
وبدت تتفرج ع الصور اللي عنده..
لقتهم اغلبهم لسيارات ولأثاث..وغرف فنادق..وصورة للسلسله اللي هدالها..
بس في صورة لطقم ذهب..
ماعندهاش زيه..ماجاهاش في الكسوة مع ذهبها..
فكرت انه ممكن يكون نوي يشريه بعدين ماصارش منه..
طلعت من الصور ورجعت دور ع البرامج لقت كم حاجه عجبتها خدتهم منه..
ع طلعته من الحمام وهو لابس الديشمبر:هاه شني عرفتي وين؟
اشرتله بيدها وقالت:هكي..
ناضت وقفت ومدتله التليفون وقالت:خديت منك كم حاجه عجبوني..
خدي التليفون وقال:ع حسابك التليفون وصاحبه..
ابتسمت ومشت خشت للحمام وهو قعد معاها بعيونه لين خشت للحمام..ابتسم..
بعدين مشي حط التليفون ع الزيانه...
☘☘☘☘☘
"طولتي هلبه ياريمه"
ريمه وهي في مكان عملها تتكلم بالتليفون:الحكايه مش ساهله تيام..الحوش مايفضاش بكل..
"ريمه المهله قريب تم"
ريمه:مازال شهر ياتيام صدقني في هالشهر حيتم كل شي..
"تمام ياريمه تمام..نراجو ونشوفوا شن يطلع معاك..
ريمه:تو تشوف..المهم انت معاش تكلمني لين اني نكلمك..
"اوكي..اوكي..سلام توا"
ريمه:سلام...سكرت وهي متوترة ومضايقه وتفكر كيف تقدر تنفد مخططها والهدف اللي ولت ع خاطره لليبيا بعد هالسنين في أقرب وقت...
☘☘☘☘☘☘
راقد ع السرير وهو يتفرج عليها كيف تصلي..
كملت صلاة وقعد تقول في الاذكار اللي بعدها..
وهو مازال يتأمل فيها..
لاحظ انها وين تصلي تنقطع تماما ع الدنيا..
تبان صلاتها صلاة حد مطمئن وخاشع ..
طول فيها هلبه..في ركوعها طول في سجودها طول...
تاخد منها الصلاة الوحده وقت صلوات مجتمعه..
وهو وين يصلي يراجي امتى يكمل ويطلع منها زي خش فيها  ماتغير فيه شي..
وغير هكي لما يكون عند نجاه يجمع في الصلوات..
نجاة نفسها مش محافظه ع الصلاة مرة تصلي ومرة تسيب..
استاقظ من تفكيرها لما شافها تشبحله وهي مصغره عيونها ومبتسمه قالت:وين سرحان وفي مني!؟
ابتسم وقال:فيك انتي..
ضحكت بعدين ناضت حولت الصلايه..بعدين المصليه وحطتهم ع تركينه..
وجت للسرير ورمت روحها..
وجت طايحه جنب الجالي شعرها جي ع وجهه..
هو قعد يضحك..
وطوبى تقول:نبي نرقد رقده سمحه..
حول شعرها عن وجهه وقال:حتى اني جعان نوم..
شبحتله وابتسمت وبدت تغني..
نام نام يللا لافرشلك ريش النعام..
قعد يضحك بعدين قال؛صوتك حلو..
ابتسمت وعيونها بدوا يتغمضوا..
هوبدي ينعس..قاللها؛غنيلي..
هي ابتسمت بنعس وبدت تغني:
عندي ثقة فيك عندي أمل فيك
بيكفي شو بدك يعني أكتر بعد فيك
عندي حلم فيك عندي ولع فيك
بيكفي شو بدك أنو يعني موت فيك
وبصوت يدوب طالع قالت..
موت فيك..وعيونها تغمضوا وراحت في النوم..
وهو قعد يتأمل فيها والنوم بيغلبه وفي الاخير استسلمله ورقد...
☘☘☘☘☘
الساعه 5:25 بعد العصر..
طلع من دار النوم وهو يسكر في سوستة التوب متاع التوته...
مشي بإتجاه الكوجينه سمع اصوات هدرزة مرته وولده..
خش عليهم..
محمد:بكري شويه شفته مروح للحوش..
عائشه:مالا برا ارفعله غداه سلم ولدي..
المهدي عقد حواجبه وقال:التارقي!؟
محمد:ايه بكري رفعتله الغدي مالقيتاش في الشقه..
المهدي ؛وينه غداه..
محمد؛نرفعه اني بوي..
المهدي:لا اني بنرفعه عندي معاه موضوع..
عائشه مشت فتحت الكوشه وطلع صواني وحطتهم في سفرة..
والمهدي قال لمحمد؛برا شوف امورك..
هز محمد راسه ومشي طلع من حداهم..
جاته عائشه بالسفرة وقالت:نحس فيك مش مزبوط..
خدي السفرة وقال:شويه ارهاق..انتي اللي وجهك مولي اصفر..
عائشه:لا عادي مافيا شي..
المهدي بعدم تصديق:مافيك شي.! مشي طالع وهو يقول..لوحي ورا ظهرك لوحي..مايهمك شي..
هي ضحكت بعدين التفتت ومشت لبراد الشاهي الاخضر بش تحطه ع النار..
☘هو طلع من حوشهم..ومشي بإتجاه الحوش اللي فيه التارقي..
وهو ماشي..شبح لحوش الواعر..
"ااو مهدي"
التفت ع اللي كلمه وحياه بيده وهو يقول:رقيله..
كمل طريقه وفات من قدام مطعم ربيع..
ربيع بصوت مخفم عالي:مهدي...
المهدي رد عليه بنفس الصوت:ربيع...
وصل في الباب اللي يدخل ع الدروج اللي يرفعوا للشقه..
ركب...
وصل في الشقه..وقف ع الباب وبدي يدق...
🍃وداخل..
ساكن الشقه كان غارق في النوم..
وعايش في وسط حلم جميل مايتمنى يفيق منه..
☄"عبدو نحبك بالتارقي كيف"
عبد القيوم بإبتسامه؛لو جيت بنقولهالك..اريقم...ولو انتي تبي تقوليها ليا...ارقي...
ام العيون الحايره الجميله ردت؛باهي لو جيت نقول نحبك هلبه كيف نقول..
عبد القيوم قولي:ارقي هولان...
ابتسمت ابتسامه حلوة وقالت:عبدو..
ابتسم بعشق وقال؛قلب عبدو من جوا..
هي:اريقم هولانه هولانه..
اختفت ابتسامته وقال؛اريقم!!..وهولانه هولانه!!!؟
☄وقطع عليه الحلم دقة المهدي للباب..
فتح عيونه وعقد حواجبه..
ركز وهو يسمع...
ناض قعمز...حك عيونه بسبابة وابهام يده اليمين..
بعدين زفر...وناض وقف..
ومشي طلع من الدار وهو يساوي في التوته في متاعه..
بعدين شعره..
وصل في الباب..وفتحه..
عبد القيوم:اووو الامير....تفضل خش تفضل الحوش حوشك..
ابتسم المهدي وخش وهو يقول:يزيد فضلك..
سكر عبد القيوم الباب والمهدي يقول:شكلك كنت راقد!
عبد القيوم:غفوة مش نوم عميق..
المهدي مدله السفره وقال:جابهولك وقت الغدي مالقوكش كنت طالع؟
عبد القيوم خدي منه السفرة وقال:اها كنت برا..بس ياريت مرة تانيه معاد تعبوا رواحكم خلوني نشقى بروحي وحدي.
المهدي:خش تغدا خش وبعدين تعال للقهوة..
ضحك عبد القيوم وقال:ان شاء الله..
المهدي:نتلاقوا..ومشي فتح الباب وطلع سكره وراه..
وعبد القيوم تنهد وقال:جا في وقته..بس زعم شن غداهم!؟
ومشي خش بيه للدار وقعمز بيه ع الارض..
حول السلفر لقاه رز بالخضرة وجنبه طاجين جبن وسلاطه ومسير..
خدي الكاشيك وغرف شويه وكلي..
وقعد يتبنن...بدت ع وجهه ملامح الاعجاب وقال:لا والله نعمتهم سمحه مش كيف ماقال بلال..شوره واخد منهم موقف ولايحب عيت الواعر اكثر منهم..
ضحك وكمل ماكله..
☘والمهدي قعمز في قهوة خوه وطلب ميه وقعد يشرب فيها ومرة مرة يشوف لحوش الواعر..
ونضال واقف في الروشن يراقب فيه مع الزباين..
ع جية سيارة اريج..
غير عيونه عن خوه وشبحلها...
والمهدي يشوفلها حتى هو..
كان معاها فيها فردوس وآلاء..
مشوا لغرفة زيارة قبل العصر..
وقفت بسيارتها قدام الباب..
شويه انفتح وطلع منه معتز ووراه خالته سدرة تسقد فيه..
المهدي اول ماشافها قلبه فر...وعيونه لمعوا فيهم الدموع..
شافها حيتهم بحركه اليد..بعدين خشت وسكرت الباب..
واريج مشت بالسيارة وعيون نضال معاها لين ادرقت عنهم..
تنهد المهدي..
وفتح شيشة الميه وشرب ماقعد منها..
"صحة صحه"
نزل الشيشه وقال:يااهلا بالتارقي في قهوة الزعيم..
خش عبد القيوم للقهوة ومشي وين مامقعمز المهدي..
قعمز قدامه وقال:سمح نظام القهوة جزء داخل وجزء برا في الهواء الطلق..
المهدي:فكرة نضال خوي الصغير..
ع جية نضال وهو يقول:واهو جاك نضال يسلم عليك حبيبنا ويرحب بيك ياغالي..
ناض عبد القيوم وهو يضحك وسلم عليه باليد..
نضال:نورت القهوة..
عبد القيوم؛منورة بهلها..
نضال:ربي يحفظك..بشن تحب تستفتح؟
عبد القيوم؛قهوة حلوة..
نضال:عربيه؟
عبد القيوم؛اكيد.
نضال؛ثواني وتجيك..تفضل حبيبنا..
عبد القيوم بإبتسامه؛يزيد فضلك..
مشي نضال..
وولى قعمز عبد القيوم وهويقول:شهلولي خوك هضا وجوه سمح..
المهدي ابتسم وقال:خود البيرو هدا..وطلع الورقه من جيب التوته فتحها وحطها قدامه وقال..وقع..
عبد القيوم:نسيت القصه هذي بكل.
وخدي الورقه والبيرو ووقع في خانته...
دف الورقه وحط فوقها البيرو..
خداهم المهدي وقال:تو تتم باقي الامور..ونصورها ونجيبهالك..
عبد القيوم؛تم..
المهدي شبح محمد خاش للقهوة نداه؛محمد..
شبح لبوه وطول مشاله..
وصل فيهم وقال:السلام عليكم..
عبد القيوم:وعليكم السلام شنوحالك يازعيم..
محمد:الحمد لله..شن امورك انت؟
عبد القيوم:تمام ماشيه والحمد لله..
محمد:الحمد لله..
المهدي:هاك خود الورقه هادي ارفعها للحوش يدسوها في مكانها..
خدي الورقه وقال ؛حاضر..ومشي من حداهم..
عبد القيوم؛ربي يخليه لكي..
المهدي:تسلم..
عبد القيوم:عندك غيره؟
المهدي:ولد وبنت..
عبد القيوم:ربي يحفظهم..
المهدي:هاه شن تخبرنا ع يومك كيف كان وشن درت فيه..
عبد القيوم اتكا ع الطاوله بمرافقه وهو مربع ايديه وقال:ياسيدي بن سيد عديت مع عمك لطفي لمكان شركة الكهرباء..
☘وهو يحكي للمهدي شن دار في يوم بإستثناء بعض الامور..
فاقت طوبى من نومها..
شافت جنبها لقت راجلها مازال راقد..
ناضت قعمزت..
شبحت يمينها خدت تليفونها من ع الكامدينو وشافت للساعه اللي ضبطتها ع وقت البلد اللي هما فيه..
لقت الوقت متأخر وحتى الدنيا ظلمت..
طوبى وهي عاقده حواجبها:راحت صلاة المغرب..
شبحت للجالي وجت بتفيقه..تفكرت لما قاللها
"لماتجي تنوضيني ماتكلمنيش"
حطت يده عليه وقعدت تحرك فيه..
هو طول فاق مفجوع وقعد يشبحلها بنظرات واحد خايف مش عارف من في قدامه..
طوبى خافت مش شكله وقالت:خيرك جالي!..
هو قعد يشوفلها كويس ..بعدين تفكرها..
ارتخوا ملامح وجهه..
غمض عيونه وفرك جبهته بيده وقال:الساعه قداش؟
طوبى بشي من الخوف:الساعه سبعه..
نزل يده وفتح عيونه وشافها كيف تشبحله قال:خيرك!
طوبى بشي من التوتر بلعت ريقها وقالت:شي...حاولت تسيطر ع توترها وهي تقول:هي نوض نصلوا ونطلعوا..
هو لاحظ خوفها وفهم انه لما فاق دار شي وترها..
ناض قعمز وقال؛باهي..بس قبلها...قربها ليه وباس راسها..
هي شبحتله ويدوب ابتسمت بعدين قالت:بنخش الحمام..
خلاها لين نزلت من السرير ولفت عليه بش تمشي للحمام...
فجأة نقز من السرير..
عيطت ع طول حسها وحطت ايديها ع صدرها وغمضت عيونها بشده..
من الفجعه تسارعت نبضات قلبها وتسارع معاهم نفسها..
الجالي انصدم في ردة فعلها وقال:-خيرك..قبل بنسبقك للحمام بس..
فتحت عيونها وقالت:ربي يهديك...جت فجأة الحركه خوفتني..
جاها وشد راسها وطبع عليه قبله وهو يفكر انها مازال خايفه منه وقعد متسائل كيف تصرف لما ناض؟!.
بعد عنها وهو شاد وجههت وقال:اسف..
طوبى ابتسمت وقال:مادورنيش اني خوافه بزياده..
ابتسم وقال:باهي بري خشي الحمام..
هزت راسها ومشت خشت...
وهو بعد ماخشت مشي طول للشنطه متاعه..
فتحها..وفتح واحد من جيوبها الدخلانيات وطلع منه شريط الحبوب..خدي حبه ورجع دسه..
وسكر الشنطه..
وناض للثلاجه..طلع منها ميه..
كلي الحبه بسرعه وشرب بعدها ميه...
بعد شرب..
عيونه شبحوا في الفراغ....
تعبوا بالدموع...بدت ع وجهها ملامح البكاء..
نزلوا دموعه من عيونه الزوز في مرة..
مسحهم بسرعه...ومنع نفسه من البكي..
مسح يده ع شعره للخلف وغمض عيونه..
وقعد ياخد في نفس ويزفر..
شهيق زفير...شهيق زفير..
اكثر من اربع مرات..
ع طلعة طوبى من الحمام..
فتح عيونه وشبحلها..
طوبى بإبتسامه؛هي برا خش..
ابتسم  ومشي حط الشيشه ع الكامدينو..
بعدين توجه للحمام..
وهي خدت الملايه والمصليه من ع الطاوله..
فرشت الصلايه ولبست الملايه وبدت بالصلاة...
☘☘☘☘☘
طلع من دار النوم ومشي بإتجاه وسط الحوش..
خشله لقي مرته مقعمزه قدام التلفزيون تغير فيه بملل..
ابتسم بتهكم وقال:غريبه مش في حوش ماليك..
هي بدون ماتشوفله:ماهو قعدت عندهم سبوع ساد..ولاانت تبي تفتك مني وخلاص..
محي الدين:استغربت بس..ع العموم وجهك يقول في حاجه تانيه..
خديجه؛لاحاجه تانيه لاتالته..
قدملها وقعمز قريب عليها وقال:يعني مش نادمه!
التفتت شبحتله وقالت:ع شني؟
محي:ع اللي درتيه في بنت الواعر..
خديجه؛وشن درتلها!؟ قداش وحده حسدتها ع نصيبها وتمنت تكون مكانها عارفين العز بتعيش فيه والقصر اللي بتسكنه..ومع الوقت خوي تو ينسى الجيفه هديكا ويلوحها ورا ظهره ويلهى بحياته..
تنهد محي وقال:ان شاء الله..ان شاء الله يصير هكي..
شبحتله شويه وقالت؛تشرب قهوة؟
محي:السوريين يقولوا المنيحه مابدا سؤال..
يدوب ابتسمت وناضت..حطت الريموت ع الطاوله ومشت من حداه..
هو تبعها بعيونه اللي كان مضيقهم بعدين قال:كأنها محلوة وباديه تصغر!
☘وفهالوقت..
عديله جاي بسيارته لحوش نساباته..
ع مرواحة فايزة بسيارتها من شغلها..
درس حامد السيارة ونزل..
وهو يشبح لفايزة كيف خاشه بالسيارة للحوش..
ومن بعيد شويه ربيع يشوفله وركز ع نظراته لفايزة..
حامد في نفسه"ااخ يافايزة ع قد ماعرفت نساوين في حياتي مافيش وحده دارت فيا اللي انتي درتيه"
تنهد وشبح لحوش شنيبه بعدين مشي للباب..
ربيع من قدام مطعمه مشي للقهوة وقف ع السياج اللي كان قريب ع طاولة المهدي وعبد القيوم وقال:نسيبك جي..
المهدي:شفته ماعندي ماندير بيه..
عبد القيوم قعد يشرب في القهوة وهو يسمع بدون مايشوف للمهدي..
ربيع شبح جهة الحوش اللي قاعده فيه فايزة وقعد يفكر..
بعدين ولى للمطعم متاعه...
قعد مقعمز قدامه...
بعد عشرة دقايق مباشرة..
طلع حامد وهو قايم شناطي ومعاه صغاره..
حط الشناطي من الخلف..والصغار ركبوا السيارة بعدين هو مشي ركب...
واخر من طلع نسرين..
ركز ع ملامح وجهها باين فيهم الكدر..
وكأنها طالعه غصب عنه..
ركبت جنب راجلها..
وطول تحرك بالسيارة..
غير عيونه القدام وع وجهه بدت ملامح الضيق وهو يفكر...
☘☘☘☘☘
واقفه ع المرايه تلبس في وشاحها..
وهو يمرر في نظره عليها كيف طالعه باللبسه لابستها..
بلوزة لونها ياجوري طويله لعند الركبه مودلاه واسع وحلو..
وتحتها سروال اسود ضابط...
والوشاح ياجوري مخربش بالأسود...
لبست في يدها الدبله وبدها التانيه خاتم ذهب ابيض هديه من بوها..
وخدت شنطتها الصغيرة السودا اللي كان حزامها سلسال لونه ذهبي لبستها وشبحتله وقالت بإبتسامه:هيا..
كالعاده الوجه مافيش عليه ذرة مكياج..
وهو يشوف فيها ع طبيعتها اجمل ...
ناض وجاها شد يدها ولفها حوالين نفسها مرة ووقفها قدامه وقال:تعرفي نفكر ندسك..
وهي نضحك قالت؛مافيا مايندس..
الجالي:قلة ثقة ولا تواضع..
طوبى بإبتسامه:قول الجميلات مايشكروش ارواحهم..
ضحك وخداها لقلبه وهو يقول:تهبلي يافرخه تهبلي..
وطوبى تضحك بعدين بعدت عنه وقالت:هيا نطلعوا..
الجالي:وين تبي نمشوا؟
طوبى؛ننزلوا ناكلوا حاجه تمام بعدين نمشوا للبسفور شن رايك..
الجالي:ماشيتيله قبل؟
طوبى؛ايه..بس لقيت اكثر اللي فيه تنين تنين متجمعين في الهوا دايبين نبي ندير زيهم اليوم..
الجالي قرصها من خدودها وقعد يقول:تهبلي تهبلي تهبلي..
وطوبى وهي تضحك؛آاي شدوقي..
الجالي ضحك ع صوتها وحاوط كتافها بذراعه وقال؛هي تعالي..
وهي مشت معاه وتتحسس في خدودها وتقول:قطعتلي شدوقي..
فتح الباب وطلع بيها وهو يقول:ماقالك حد تعالي حلوة هكي..
وسكر الباب..
🌸ونزلوا تعشوا مع بعض في مطعم الفندق وهما يهدرزوا..
وكل مرة كانوا يفتحوا موضوع شكل وهما منسجمين مع بعض هلبه..
واي حد يشوفهم مع بعض يحبهم لبعض...
بعد العشي..
طلعوا برا الفندق وركبوا سيارة اجرة...
ومشت بيهم للبسفور..
لما وصلوا طوبى طول شدت يده وهو شدها بقوة وقعد يشوف حواليهم لقي اغلب اللي واقفين شاب وبنت مع بعض..
مش معروف نوع العلاقه بيناتهم..
بس هما الزوز يعرفوا العلاقه اللي تجمعهم..
زوج وزوجه..وهما الاحق من غيرهم في انهم يعيشوا الرومانسيه..
طوبى وهي تشوف للبحر قالت بإبتسامه؛محلاه في اللي....
ومالحقتش تكمل جملتها الا ولقت روحها في حضن راجلها والدنيا تلف حواليها..
طوبى وهي متفاجئه:جالي!...وبدت تضحك..
وهو يدور بيها ويشوف لضحكتها بإبتسامه حب..
واللي حواليهم يتفرجوا عليهم وهما معجبين بيهم..
وقف وقعد يمشي بيها وهو رافعها لوحده من المقاعد وقال؛هاه شن رايك في راجلك دارلك اللي هما ماداروشي..
طوبى وهي تضحك؛يهبل راجلي..
باسها ع جبينها...
بعدين حطها ع الكرسي..
وقعمز جنبها..
هي حطت راسها ع كتفه وقالت؛داخيت..
شبحلها وابتسم..
بعدت عنه وشبحتله وقالت:تو زعمه تجينا بنيه صغيره تبيع في الورد وتقولك..اشتريلا ورده ازا كنت بتحبا..
الجالي:لاتو بتقول اشتري مني ورد الله يخليلك مرتك ع اساس حني مش متزوجين يعني وهي عارفه غير دير في الجو بش تخليني نشريلك...
طوبى بضحكه:زعمه!.
فجأ جتهم مراة كبيره تبيع في الورد..
وقفت قدامهم وقعدت تكلم فيهم بالتركي..
الجالي ضحك ورد عليها بعدين خدي منها السلة متاعها كلها وعطاها فلوس..دعتلهم بالتركي ومشت..
طوبى وهي مندهشه:تدوي تركي!؟
ضحك وقال؛خدمت معاهم زمان لما كانوا هني وتعلمت لغتهم بش نتفاهم معاهم طول من غير مترجم..
طوبى بإعجاب:ماقتليش قبل..
الجالي بإبتسامه؛ماجتش في سيره بيني وبينك..وهي خودي ياحلوة هادي كلها ليك..
خدتها وقالت بضحكه:باهي شن قالتلك..
الجالي:زبطتنا متزوجين ودعتلنا"ان شاء الله تهرما على وسادة واحده"...
ضحكت طوبى وخدت ورده من الورد وقعدت تشم فيها..
هو تأملها بعدين تنهد وقال:آمين يارب العالمين..
هي شبحتله وضحكت بخجل..
☘☘☘☘☘
وفي حديقه ليبيا الخلفيه..
إيطاليا...
تحديدا مدينة البندقية..
ع القارب الشهير كانوا راكبين عمر واميمه..
مغمورين في الحب والسعاده وعايشين احلى لحظات حياتهم..
مدت اميمه يدها اللي فيها الدبله وقالت:حط يداليسار عموري وخلي دبلتك تبان ورد بالك درق دبلتي..
ضحك ودار زي ماقالت وقال:هكي..
اميمه بإبتسامه:ايه..
وقامت تليفونها وعضت ع شاربها ووجهت الكاميرا لإيديهم وقعدت تحاول تاخد وضعيه حلوة في التصوير..
عمر:ميمو عمري هيا عاد وقف الدم في عروقي..
اميمه وهي تصور:اصبر اصبر..ماتتحركش..ايوه ايوه..وصورت..ماتنزلش يدك لين نشوفها..
شافت الصورة وقالت بإبتسامه:حلوة..
نزل عمر يده وهو يمسد فيها ويقول:الحمد لله...
☘بعدين نزلتها ع الانستقرام وكتبت تحتها..
"لاموري"...
شافت الصورة اريج ودارت لايك وهي مبتسمه..
وآلاء قالت:يابختهم...
............
وشافتها فايزة اللي كانت امها راقده ع رجلها..
ابتسمت ودارت لايك وعلقت..
"ربي يخليكم لبعض"
...........
وشافتها سدرة دارت لايك..
وعلقت..
"شدوا في الاذكار واشربوا مية الرقيه"
☘وياريتك اللي توصي بيه ديري فيه ياسدرة"
مطيرة حداها كانت لاهيه بالفيس قالت:شفتي خديجه شنيبه شن منزله..
سدرة:لالا شويه خل نخش ع الفيس..
طلعت من الانستغرام وخشت ع الفيس..
لقتها منزله فيديوهات من يوم الكسوة والحفله والمحضر..
وكلهم كانت مصورة فيهم الديكورات وخشة خوتها مع عرايسهم اللي كانت مصورتهم وهما عاطيين بالظهر..
وسوابيت الكسوة...ديكور الصاله في المحضر..
سدرة بعدم رضا:علاش منزلتهم؟
مطيره:مش باين منهم شي مصورة الطرحات بس...
سدرة بضيق:والله ماراضيه عليه التنزيل هدا وان شاء الله طوبى تقعد عاقله وماتنزل شي..العين حق...
مطيره بإقتناع:في هادي عندك حق..
خشت سدرة ع التعليقات..
شافتها راده ع الكل ماعدا...
سدرة؛ركزتي عليها كيف راد ع كل التعليقات ماعدا تعليق عيشه..
مطيره وهي تشوف في التعليقات:صح..شكلهم تاكينها..
سدرة؛سبر خديجه في كل مناسبه..
مطيرة:يللا فخار يكسر بعضه غير يخطوا بناتنا..
سدرة:والله ناكلها بلا ملح لو جت جيهتهم تحسابني عتيقه هديوقا ندور غير في رضاهم..
مطيره:ايه مابانتش في العرس كان يوم الدخول لما جوا بالعرايس لحوش شنيبه..
سدرة؛التزمت ماهو خلاص..
مطيره:ولت موضه الحكايه زي عواطف بنت الصيد فجأة بين يوم وليله التزمت..
سدرة؛كانه لربي ان شاء الله يزيدهم هدايه ويهدينا معاهم..
مطيره:آمين..
سكتوا وهما لاهيين بالفيس خطم عليهم منشور لطوبى مدايرة فيه اشارة لجالي..
كاتبه دعاء السفر ومش موضحه اي شي تاني..
ابتسمت سدرة وخشت علقت...
"ربي يهنيكم ويسعدكم طول العمر"
☘وضرة اختها كانت تشوف لنفس المنشور بنظرات حاقده وهي تبكي بصمت..
رشفت ومسحت دموعها وقالت؛عيشيلك هاليومين عيشي..من بعدهم والله معاد رايه نهار ابيض..
☘وعيون حاقده تانيه..
كانت تشوف في البوست اللي نزلاته اميمه ع الانستقرام..
قصي:هدا غير مش مفكرة في الزواج بكل يادكتورة!..
لكن مش اني اللي تعشميني وترخي بيا..كان ماخلتيكش تندمي ع اني فضلتي عليا هالخرتيت مانوليش قصي المسعودي...
☘وعيون تانيه كانت برغم وجع الجرح..
وعذاب الحرمان...محبه بنقاء وصفاء نيه وبياض قلب ينزف..
حسين اللي حذف طوبى من قائمه الاصدقاء ..
ولت مرت راجل مايبيش يتسببلها في مشاكل معاه..
☘هو نفس الفعل اللي داره اسامه فهاليوم بعد ماقرر يسكر قلبه ع اميمه ويبعد عنها ويخفي شعوره لين ربي يشفيه منه...
☘☘☘☘☘
يتمشوا ع البسفور وهما يهدرزوا...
طوبى وهي حاضنه نفسها:اني عندي رهبه من ركوب السيارة نفسه والله نبدا راكبه السيارة مع حد ونتخيل اننا نديروا حادث..
الجالي؛صقعانه..
ضحكت وحركت راسها بالنفي..
حول جاكيته وهي تقول:لالا جالي خليه مش صقعانه.
ماباش يعدل عليها وقفها وقعد يلبس فيها..
وهي تشبحله وتقول:جالي انت تمرض بعدين..
وهو بعدها مالبسها حاوطها بذراعه وقعد يمشي هو وياها ويقول:انتي لازم تحولي الرهبه هادي بالشويه بالشويه..مثلا في الاول تبدي تسوقي حاجه غير السيارة..
طوبى وهي تتأمل فيه بإبتسامه:زي شني؟
الجالي:دراجه مثلا..
طوبى ضحكت بعدين قالت:اني سقت دراجه زمان بس كنت صغيره هلبه وقتها..
الجالي:ع اساس انتي كبيره توا..
ضرباته ع بطنه..
فنص عيونه وهو يضحك..
وهي تشبحله بغضب مصطنع..
هدا ضحك بعدين قال:تمام يامدام طوبى نركب معاه ونشجعك شن رايك..
طوبى شبحت فوق وهي تحرك في عيونها و تفكر:امممم..
والجالي دار معاها نفس الحركه وقعد يقول:امممم..
بعدين غمضوا الزوز العين اليسار..
وشبحوا لبعض وقالوا مع بعض:باهي..
قعدوا يضحكوا الزوز..وهو قرب منها باس راسها...
وهي غمضت عيونها وابتسمت بحب..
فجأة..
حسوا ع قطرات مطر نزلت عليهم..
طوبى:المطر بتصب شكلها..
الجالي:تعرفي تجري..
طوبى بضحكه:لالا علمني..
الجالي:تعالي..ودسها عنده..وطلع بيها يجري وهي تجري معاه وتضحك..
لين وصلوا في الطريق وقف تاكسي..
وركبوا فيها..
وبدت المطر تصب وتزيد تقوا..
هو قعد يتفرج عليها من روشن السيارة..
وطوبى تتفرج عليه..
بدت تحس اتجاهه بمشاعر حلوة هلبه مش قادره توصفها...
وهو يتفرج من الروشن قال:غير لبسنا خفيف راهو مشينا تحتها شويه..
نزل راسه وشبحلها لقاه قايمه عيونها فيه وتشوفلها.
الجالي بإبتسامه استغراب:خيرك!
ابتسمت وحطت راسها عليه وغمضت عيونها وشدت فيه بقوة..
هو ابتسم وتنهد من قلبه..
وهي تسمع في دقات قلبه كيف زادت قوت اكثر وابتسامته زادت كبرت...
☘☘☘☘☘
"قهوة الزعيم"
في كراسة عبد القيوم انكتبت هالجملة بالخط العثماني..
وهو يتأمل فيها ويشوف في تفاصيلها بعدين قال:ان شاء الله ع اللوحه تطلع معاك كيف هذي واحسن..
تنهد بعدين قال:خلاص صبي ارقد ياليد بكرا وراك يوم طويل..
بتعدي للخدمه..بعدها بتشوف سيارة..بعدها بدور وين يبيعوا التنور تاخد واحد..لازم بكرا مواضيع السيارة والتنور يتموا..
سكر الدفتر وحطه ع المندار وقال...وموضوع الطاوله والكرسي والفرشه والدفايه!!؟...ع هكي مش حنحصل وقت نعدي فيه للجامعه.!؟
قعد يفكر وهو ساكت..بعدين قال...خلاص نأجلوا موضوع السيارة ليوم تاني مافيها شي كان تميناه السبوع الجاي...
يللا خلاص..للسبوع الجاي..
وناض طفي الضي..بعدين خش فراشه وتغطى..
خدي تليفونه وفتح الفيس...
قعد يشوف شن في من اخبار جديده..
وهو يتصفح..جت قدامه اقتراحات الصداقه..
لقي المهدي شنيبه صديق مشترك مع حسين الواعر..
بعتله طول..
بعدين شاف حساب عمر حتى هو صديق مشترك مع حسين وماكانش ضايف غيرهم من حوش شنيبه..
فات عمر..شاف بعده واحد مايعرفاش..بعده شاف حساب الماجده ياسمينه كانت صديق مشترك مع حسين فاتها وجي قدامه حسابه..طوبى الجنه...
ضيق عيونه وهو يشوفله ومركز ع صورة البروفايل..
بنت مصورة قدام البحر وهي عاطيه بالظهر..
تنهد وطلع من الفيس وقال..تو عبد القيوم كيف بتعثر فيها..وين بتلقاها...!؟ يارب..دلني عليها...كانهي بعيد قربها يارب..ماعليك مستحيل ياالله...متعشم فيك انت ياربي وانت ماتخذل من تعشم فيك...
حط التليفون جنبه ورقد ع ظهره وحط ذراعه عيونه..
وماهي الا لحظات وراح في نوم عميق...
☘☘☘☘☘
تاني يوم..
وفي صباح جوه مغيم بس كان حلو..
في تركيا..
كانوا الجالي وطوبى ماشيين وسط غابه فيها شجر كبار..
والطريق اللي يمشوا فيها معبيه ورق شجر اصفر طايح..
الجالي:هدا المكان اللي قلتي خاطري نمشيله..
طوبى بإبتسامه:ع الطبيعه احلى بهلبه..
ابتسم وقعد يمرر في نظره الطريق بعدين قال:نقعمزوا..
طوبى:باهي..
رفعها لتركينه حلوة كانت تحت شجرة كبيره
وقال:هاتي البخشه..
مدتهاله وهي تضحك قالت:جو علينا كيف طلبناها من جماعة الفندق..
الجالي فرش البخشه وقال:تعرفي علاش عطوهالنا..
طوبى:علاش!؟
الجالي:قعمزي
حولت طوبى البوت متاعها وقعمزت ..
وهو حول سبيدروه وقعمز جنبها..
الجالي:ياستي حتي طلعنا العرسان رقم 100 اللي يجوا لفندقهم والليله بيديروا حفله في الفندق ع خاطرنا.
طوبى وهي مندهشه:الله ع الجو!!..
الجالي بضحكه:شفتي كيف!
طوبى:باهي الحفله هادي شن شكلها مش ديسكو وشرب وهكي!
الجالي ضحك وقال:لالا حفله عاديه جدا والفندق هدا صاحبه مش علماني رسيتهم ع الوضع وهما كانوا متفاهمين هلبه..
ابتسمت بحماس وقالت:تشوقت..
ابتسم وقال؛باهي مش متشوقه لسواقة الدراجه..
خفت ابتسامتها وقالت:لالا..
ضحك ع تعابير وجهها بعدين قال:تمام انسيه موضوعها توا..
شد يدها وقال:شن خاطرك نديروا تاني فالسبوعين..
طوبى:مافي بالي شي توا غير في حاجه وحده..
الجالي:اللي هي؟
طوبى بإبتسامه؛المكان الحلو هدا والجو فضيع وتقعميزتنا هادي مش ناقصها غير انك تغنيلي..
ضحك وقال:نغنيلك؟
طوبى:ايه..صوتك حلو هلبه وجذاب..
ابتسم وقال:حاضر...نزل راسه وهو يفكر شن يغني..
بعدين قام عيونه وشبح لعيونها وبدي يغني بإحساس عالي..
زيديني عشقا زيديني..
ياأحلى نوبات جنوني زيديني..
زيديني غرقا ياسيدي .
إن البحر يناديني..
زيديني موتا عل الموت..
إذا يقتلني يحيني..
وطوبى تسمع فيه وتشوف لعيونه وهي منسجمه ع الآخر..
يااحلى امرأة بين نساء الكون..احبيني..
يامن احببتك حتى احترق الحب..
وحط يدها ع قلبه وقال..احبيني..
ان كنتي تريدين السكن اسكنتك في ضوء عيوني..
نزل يدها وقعد شادها وهو يغني..
حبك خارطتي..حبك خارطتي ماعادت خاطرة العالم تعنيني..
شد ع يدها بقوة وهو يغني فهالمقطع وعيونه لمعت فيهم الدمعه..
انا اقدم عاصمة للحزن..وجرحي نقش فرعوني..
وجعي يمتد..كسرب حمام من بغداد الى الصين..
🍃فهالمقطع لاحظت حزن واضح في عيونه..حست بقلبها وجعها عليه شدا يده بقوة حتى هي..وهو شبح ليدها وكمل يغني 
عصفورة قلبي نيساني..
يارمل البحر .
وروح الروح..
وياغابات الزيتون..
ياطعم الثلج..وطعم النار..
ونكهة شكي ويقيني..
اشعر بالخوف..
وشد يدها التانيه وهو يغني..
اشعر بالخوف من المجهول فضميني..
اشعربالبرد..اشعر بالبرد..
اشعر بالبرد فغطيني..
وظلي قربي غنيني..
فأنا من بدء التكوين..
ابحث عن وطن لجبيني وعن حب امراءة يأخذني..
"لحدود الشمس..ويرميني"
ابتسمت وهي متأثره وعيونها تعبوا دموع..
وهو ابتسم وكمل..
زيديني عشقا زيديني ياأحلى نوبات جنوني..
زيديني..زيديني..
قام يدها وقبلها...
اما هي احتواته بحنان جارف..
فاجئه هلبه..وبعدين بادلها هالاحتواء وهو حاس روحه قاعد وسط جنه مابيبيش يفارقها..
☘☘☘☘☘

#يتبع  في التكمله بإذن الله