طوبى الجزء الاول

تابع

(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_الخمسون"الماجده2"
《معظم أحداث هذه الرواية حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫🚫ملاحظه🚫🚫
اي تعليق عنصري حيتم حظر صاحبه
اي تعليق فيه سخريه ع ثقافه الطوارق حيتم حظر صاحبه
واني هني نكتب في الحوارات باللغه الامازيغيه التارقيه لأعزائي التوارق مش لغيرهم احتراما ليهم وحبا لثقافتهم
نتمنى تكونوا قريتوا هالملاحظه كويس..وشكرا ع تعاونكم مسبق🌸
☕☕☕☕☕☕☕☕☕☕☕☕☕☕☕☕☕
في الطريق..
وهو متوجه لحوشه..
كان يتكلم بالتليفون..
المهدي وهو يشوف للطريق:خلوه عندكم للصبح لين نجيه..وزي ماوصيتك حبيبي تكتموا..تكتموا..مانبي شي يطلع..
ولف بالسيارة يسار وهو ساكت يسمع في اللي يكلم فيه..بعدين قال؛بارك الله فيك حبيبي........تسلم..وعليكم السلام..
سكر المهدي وحط التليفون في مكانه..
وزاد السرعه شويه..
وماوصل للشارع الا بعد ماجهد جهيد بسبب الغدران المعبيه الطريق..
وصل في الحوش ودخل سيارته..
بعدين بسرعه مشي ركب شقته..
☘☘☘☘☘
تاني يوم..
الساعه8:30صباحا..
لفت الشال ع رقبتها وهي تقول:بنروح طول لحوش بوي..
الجالي وهو يلبس في البالطو متاعه:تمام..مشي وقف جنبها ع المرايه وهو يشوف في هيئته ويساوي فيها ويقول؛زي ماقتلك اليوم بنعطل..
طوبى شبحتله بإبتسامه وقالت:مش مشكله..
ضرباته ضربتين خفاف ع ذراعه وهي تقول:هيا بسرعه وقت ع المحاضره...ومشت للباب وهي تقول..امتى بنوصل للكليه..
وفتحت الباب وطلعت..
وهو خدي تليفونه ونظاراته والشنطه ومشي لحقها بسرعه..
☘☘☘☘☘
فطروا الزوز بسرعه..
وع الفطور عطت طوبى علم لمغليه انها بتتغدا في حوش ماليها..ومغلية تقبلت عادي جدا..
بعدين طلعوا من الحوش ركبوا السيارة..
طوبى:جالي معليشي نزعجك كل شويه نتصل بيك ونطمن..
الجالي وهو يحرك في السيارة بيطلع قال بإبتسامه؛احب ع قلبي ازعاجك..درهيلي كبدي بالإتصالات ماعندكش مشكله..
ضحكت طوبى..
طلع بالسيارة من الحوش..
لقوا سيارة اميمه طالعه قدامهم من القراج..
لما شافها الجالي قال:صراحة وضع خدمتها مش مريح..
طوبى:جالي بالله عليك ماتدخلش خليها بينها وبين راجلها..
الجالي:راجلها مسافر ياطوبى يعني هي امانه عندنا..
طوبى:يعني هو مش عارف طبيعة خدمتها؟
الجالي؛مش واعي لوضع البلاد كويس..هو امتى روحلها ياطوبى؟!
طوبى قعدت ساكته معاش عرفت شن ترد..
الجالي؛وهي الباين عليها مش ساهله..
شبحتله وهي عاقده حواجبها بإنكار..
شبحلها بعدين شبح القدام وهو يسوق قال:ماتشبحليش هكي اسلوبها مع امي ماعجبنيش كلمة بكلمه هي وياها..
طوبى شبحت القدام وقعدت ساكته وهي مضايقه..
الجالي:طوبى نحكي معاك..
طوبى:عارفه..
الجالي:خودي واعطي معاي ماتخلنيش ندوي بروحي..
طوبى:وشن تبيني نقول..ايه صح كلامك مزبوط !؟ مش حنقولها ياجالي اسفه...
الجالي ابتسم تهكما وقال؛طبعا بنت عمك مش راضيه فيها..
شبحتله بإستغراب وقالت:جالي خيرك شن جاك فجأة؟!
تنهد وقال:خلاص خلاص..انسي..
شبحتله شويه بعدين شبحت القدام وهي تقول في نفسها
"شهر العسل تم ياطوبى"..
وقعدوا باقي الطريق ساكتين..
لين وصلها للكليه..
قبل لتنزل خدي شنطتها حط فيها فلوس..بعدين عطهالها وقال؛الواحد الا..حنكون قدام الكليه..
هي قالت بنبرة زعل واضحه:تمام..
ونزلت وسكرت الباب..
ومشت خشت للكليه..
وهو بعيونه معاها لين درقت من قدامهم ضحك وقال:مش عاديه لما تزعل..
وشبح القدام وتحرك طول بالسيارة...
☘☘☘☘☘
في المدرسه..
مقعمزة مع زميلاتها في حجرة المدرسات..
كانت مع الأبله اللي بتستلم منها الماده توري فيها شن عطت من المنهج خلال الفصل..
كانت صغيرة وواضح انها مش أكاديميه وماعندهاش خبره..
ملخبطه ومتوتره..
ونجاح كانت تحاول تساعدها..برغم انها من داخل كانت محروقه وحاسة روحها مش طايقتها...
بس في شي كان يقاوم في شعور البغض هدا بقوة..
:صحيتي ابله نجاح..
نجاح بإبتسامه:سلمك..موفقه ان شاء الله..
:اجمعين..
وناضت ومشت طلعت من حداها..
وهي تلحق فيها بعيونها اللي تعبوا دموع...
وحده من الابلات اللي كانت مقعمزة قريبه عليها قالت؛مش عارفه كيف سكتي وفوتيها..
شبحتلها وقالت:علاش شن نقدر ندير!؟
:اضعف الايمان ديري عركه..اني نعرفك ماتسكتيش عن حقك بكل مش عارفه كيف رضيتيها ع روحك توا..
نجاح آذاها الكلام وكانت حاسه بالغضب من كلام الابله..
بس نفس الشي في داخلها مخليها محافظه ع ثباتها الانفعالي وهي تقول:مش حيتغير شي..
:ايه هو صح مايتغير شي بس المهم تاخدي حقك..اني لو منك نسيبهالهم واسعه وعريضه..
نجاح:لاتقعميز الحوش مانحبه يمرض وبعدين تكوني ابلة احتياط خير من ابلة ماده لافي تحرقي دمك ع تحضير ولاشرح ولاامتحانات ولا رصد درجات..اني توا حاسة روحي زي اللي واخده اجازة..وضحكت..
وزميلتها ضحكت وقالت:تصدقي ابله نجاح حاسداتك مافيش وراك راجل يدرهلك كبدك ولاصغار يسحنوك ياعوينك..اني حياتي كلها كملتها في الجري برا الحوش وداخله..
كانت تتكلم بأسلوب مؤذي وكأنها قاصده تحرق نجاح..
برغم ان مافيش بيناتهم اي سوء تفاهم او مشاكل لاقبل ولاتوا..
☘بس في ناس هكي عندهم احساس عالي بالنقص ويبوا يحسسوا غيرهم بنفس الاحساس..المهم مايكونوش هما بس اللي حاسينه..☘
ابتسمت نجاح ابتسامه تخفي مابداخلها من ألم وقالت:قولي الحمد لله ع ماعطاك ربي..
تنهدت وقالت:الحمد لله..ضحكت وكملت..سلامتهم فوق شقاي في جرتهم مانقدرش نتخيل حياتي من غيرهم هما والمنجوه بوهم..
نجاح بإبتسامه:ربي يخليكم لبعض..
شافت للساعه وقالت:خلاص حصتي قريب تبدا..
ناضت وهي تلم في حاجاتها وقالت:نتلاقوا..
ومشت طلعت من حجرة المدرسات...
بعد ماطلعت تلاشت ابتسامه نجاح وكانت حاسه روحها بتبكي خلاص..
لكن قاومت بكل قوتها..
وطول فتحت شنطتها وطلعت منها مصحف صغير..
وفتحت ع الصفحه اللي وقفت فيها لما قرت الورد الفجر..
وبدت تقرا بهمس..
دموعها غلبوها ونزلوا وهي مسحتهم..
وفي صدرها حزن كبير..
وقفت قرايه..ورفعت عيونها وقالت بنبرة باكيه..
"ياذا الجلال والإكرام...اكرمني بعطاء...ليس له حد ولاند"
بعدين مسحت دموعها ورجعت تقرا في القرآن...
☘☘☘☘☘
"هي تفضل مهدي هني."
دخله صديق ليه من قادة كتائب تابعه للدوله مكتبه..
:تفضل قعمز مهدي قعمز..
قعمز المهدي وهو يقول:يزيد فضلك..
:شويه ونجيبهولك..تبي تشرب حاجه؟
المهدي حط يده ع صدره وقال:صحيت..
:تمام تو نوصيلك ع قهوة من قهوتكم ع فكره..
قالها وهو يضحك وطلع وسكر الباب..
وخلا المهدي يضحك بعدين تنهد وقال:مش في باب ضحك انت يالمهدي...
بعدين قعد بصمت يراجي امتى يخش عليه حامد..
☘☘☘☘
وخشت مرت خوه..
نجاة..ع مكتب خوه وهو شاده في يدها مخطط  وسكرت الباب..
هو كان يشوف في ملف قدامه..
وين حس بيها وصلت المكتب قال:قعمزي..
قعمزت نجاة وقالت:حمد لله ع السلامه ياعريس..
قام عيونه وشافلها..
نجاة:ماتبداش تلف ودور واضح انك كنت مسافر انت ولعبتك..
الجالي:عارفك عارفه..واضح مدام رقمي قعد مقفل فتره بعدين انفتح..
نجاة:ماشاء الله ع شهر العسل اللي مايبيش يتم..
رجع شاف للملف وهو ساكت..
نجاة:شكلها مش ساهله بكل ولادرويشه لعبتك..
الجالي:معاش تجيبي سيرتها لما نكون معاك..
ضحكت نص ضحكة ساخره وقالت:ياشارب اللبن مرجوعك للميه..
الجالي:كان ماعندك شي مهم توكلي..
نجاة:جالي ركز ع معاملتك عليا..ماتضغطش عليا هلبه..
شبحلها شويه بعدين ضيق عيونه وقال..تهددي!؟
نجاة برفعة حاجب:ايه..راهو حتى اني مرتك والاولى يعني احق بيك منها..
الجالي:ماتمليش..
نجاة ودموعها في عيونها:واني نطالب بحقي مش حنمل مش حنرتاح لين نولي زيي زيها اللي فضلوها عليا وخلوك بالسيف تاخدها بش ماتاخدش نجاة الارمله الكبيره اللي بصغارها..زوجوك بنت اصغر منك ب13سنه بش يقهروني اني بس وينسوك فيا..رشفت وهي تقول..24ساعه وهما يمدحوا فيها وفي اخلاقها تقول ملاك نازل من السمي مش عارفين ان النماذج اللي زيها هي اكبر وهميات والي داسينه بلي يابلي العقل مايستوعباش..
الجالي بملل:كملتي؟..
نجاة:لاماكملتش..رد بالك منها لعبتك هادي لأنها مرات تطلع زي اختها عشيقة خوك..
عقد حواجبه وقال:شن تخرفي انتي؟
نجاة قامت تليفونها وحطت الصور وهي تقول:شوف بعيونك..وعطاته التليفون يشوف لصورة المهدي وسدرة اللي خدوهم هي واختها في الفروسيه..
خداه وقعد يشوف فيهم..بعدين قال:امتى هدا؟
نجاة:امس..كانوا مرتبين موعد واضح مش صدفه..
مدلها التليفون وهو مضايق..
خداته نجاه وقالت:امثالهم هادم اللي يديروا في ارواحهم يصلوا ع طرفهم هما اللي يطلع عندهم ماضي اسود..
وهما اللي يخونوا..وهما المطلوقات ع حل شعرهم وماحد حاس بيهم..
عكسي اني الواضحه وقدامك كتاب مفتوح بكل عيوبي ..
انسانه طبيعيه..
مش ملائكيه وهميه زي لعبتك واختها..اختها اللي زي امها وهي اللي ربتها..
الجالي بإنزعاج:خلاص عاد انهي..ونوضي اطلعي..
ناضت وهي تقول:تمام..تمام ياجالي..
ولفت ومشت طلعت من حداه وهي عارفه ان قاعد يفكر في كلامها...
☘☘☘☘☘
رشف اخر رشفه من فنجان القهوة..
انفتح الباب..
حط الفنجان ع الطاوله بدون مايشبح الباب..
ونسيبه كان يشوفله وهو مكسوف ومعصب في نفس الوقت..
:خش..
حامد مشي وقعمز ع كرسي مقابل للمهدي..
سكروا الباب وخلوهم برواحهم..
خبط المهدي كفوفه في بعض وحامد يشبحله..
رفع عيونه فيه وقال:تو شن تبيني نقولك..شن الكلام اللي لازم يطلع من فمي في موقف زي هدا!؟ يجيني اتصال ع الصبح من واحد نعرفه يقولي الحق نسيبك شدوه في......
غمض عيونه وحرك راسه يمين ويسار بعدين فتحهم ورفع سبابته واشر عليه ويحرك فيها وهو يقول:تعرف لولا صغارك ومرتك اللي هي اختي..واشر ع نفسه..مادورتك بكل وخليتك في وسط عارك وفضايحك..
حامد حاول يدافع عن نفسه وهو يقول:يامهدي افهم القصة قبل راهو هدا كمين..
قاطعه وقال وهو معكرش وجهه بإزدراء:بالله عليك اسكت اسكت..تو يعني اني مانعرفكش ومانعرفش العبتير اللي دير فيه تحساب روحك مفوته علينا!؟ حني اللي نفوتوا ع خاطر صغارك..وياريتك مفكر فيهم..راهو عندك بنات..بنات..الفضيحه تلحقهم لين يكبروا وكان فكر حد يخطبهم يوخر بسبب سمعتك اللي تشرف..!
حامد غير عيونه عن المهدي وهو معصب لأنه مش قادر يرد عليه
المهدي:ع خاطرهم هما قعدت نترجى وقريب بست الأيادي بش يتكتموا ع اللي صار ويطلعوك..
شبحله حامد بطرف عينه..
اشر عليه المهدي وهويحرك في سبابته وقال بتحذير:لكن والله لو صار شي زي هدا ولاقريب منه..لاندور مرتك ولاصغارك ونفضحك فضيحه تلحق ولد ولدك...
رجع غير عيونه..
والمهدي قال بحده:سمعتني!؟
هز راسه بإيجاب..
ناض المهدي وقال:نوض هيا بتطلع معاي من هني.
ناض حامد بالسيف ومن داخل مقهور من اذلال المهدي واهاناته...
مشي المهدي فتح الباب وطلع..
وهو مشي وراه...
وين طلعوا لاقى المهدي صاحبه..
صافحه بإيديه الزوز وهو يقول:بارك الله فيك معروفك علينا كبير..
:ولايهمك يامهدي..وربك يسترنا جميعا..
حامد حط ايديه ورا ظهره وغير عيونه عنهم..
المهدي:امين..غير بالله عليك زي ماوصيتك تكتم ع الموضوع..
:كون هاني...
المهدي:بارك الله فيك ..هي السلام عليكم..
:وعليكم السلام..
طلقه المهدي ومشي ووراه حامد اللي كان يمشي معاه بالسيف..
طلعوا برا المقر..
مشي المهدي لسيارته ومعاه حامد بيركب معاه..
المهدي وقف شبحله من فوق لتحت وقال:وين !؟
حامد شبحله بإستغراب..
المهدي:برا اركب تاكسي..
وركب السيارة..شغلها وتحرك طول..
وحامد مع عيونه بالسيارة وهو يشوفلها بغضب..
بعدين قال بغيظ شديد:تفو..
ووخر وقعد يشبح للطريق ويراجي امتى تجي سيارة أجرة بش يوقفها...
☘☘☘☘☘
فهالوقت...
كانت نسرين طالعه من الفصل بعدين ماعطت حصتها..
لاقت زميلاتها هدرزت عليهم شويه..
بعدين طلعت برا المدرسه مروحه..
لما وقفت ع الطريق قعدت تعدد في مشاويرها..
نسرين:بنمشي نعطي الفلوس للجمعيه..بعدين نمشي للسوبر ماركت ناخد القضيه وهكي نكون وصلت لموعدي في العياده بعد نكمل نمشي لمدرسه محمد ونسأل عليه دوره هو المرة هادي...
شافت سيارة اجرة جايه اشرت عليها ووقفتها وركبت طول..
قضت مشوارها الاول بسرعه..
ونفس السيارة بترفعها لباقي مشاويرها بعد مااتفقت مع صاحبه..
وصلت للسوبر ماركت..
وخشت وخدت عربه وبدت تتسوق..
كانت تختار في الحاجات بعنايه وتشوف في الصلاحيه قبل تحطهم..
نسرين:النوتيلا تمت الصبح..خل ناخد زوز فازوات..واحد ليا وواحد ليهم..
وضحكت..
خدت زوز من ع الرف وحطتهم..
بعدين وخرت بش بتلف..
انخبطت في حد وراها..
التفتت وشافاته وقالت:اسفه جدا سامحني..
هو ابتسم وقال:الغلط مش منك اني اللي كنت ماشي وراك..
عقدت حواجبها وقالت:نعم!
هو تنهد ومرر نظره حواليه بعدين قال:نبيك شويه معليشي..
شبحتله من فوق لتحت بعدين التفتت القدام وجت بتمشي..
هو وقفها وقال:نبيك في شي يخص راجلك..
وقفت والتفتت تاني وهي تشوفله..
:ماعرفتنيش؟.
نسرين وهي منفعله من التوتر:وعلاش بنعرفك!؟وبعدين انت شن علاقتك براجلي!؟..ترا قولي راجلي شن اسمه!؟.
ضحك وقال:حامد******
هي زادت توترت..
:لكن بجد بجد ماعرفتنيش؟
نسرين:وعلاش بنعرفك يابنادم انت!؟
خطم جنبهم واحد وقال:خير اختي في حاجه..
نسرين بعصبيه:مش عارفه شكالات زي هادم كيف يخلوهم يخشوا هني..
جي قدامه الراجل وقال:تحشم ع وجهك ياراجل خود حاجتك اللي تبيها ولاتوكل..
هو قال؛غير وسع بالك ياخوي..شبح لنسرين وقال..اني ربيع الباني ولد جيرانكم..
هي تفاجئت..
والراجل شبحلها وقال:شن ياأختي..
شافت للراجل وهي متفاجئة بعدين هزت راسها وقالت:صار خير خوي وبارك الله فيك..
؛فيك بارك الله..
ومشي ع حاله...
لحقه ربيع بعيونه بعدين رجع شاف لنسرين وقال؛اسف..عارف الموقف كله ع بعضه غلط بس الحق ضميري ماهنانيش ولا انت هنتي عليا بنت شارعنا وزي اختي ومانرضاش فيك..
نسرين:قول اللي عندك طول لوسمحت..
تنهد وقال:راجلك والله مايستاهلك ولايستاهل الصغار اللي عنده..
نسرين عيونها تعبوا دموع وقالت:شن قصدك!..
طلع ربيع تليفونه من جيبه وحط ع مقطع فيديو..
كان مصور فيه حامد وهو طالع مع وحده من كافي..
وركبها سيارته..واخر المقطع واصل للفيلا متاعه وخاش بيها داخل..
ربيع:انجبرت ندير هكي بش تصدقي كلامي..
ومدلها التليفون..
هي مدت يدها وهي ترعش وخداته..
فتحت ع الفيديو وقعدت تتفرج..
بدوا دموعها ينزلوا..
وربيع يشوفلها بألم بعدين قال:مش اول وحده واكيد مش الاخيره شفته مع غيرها هلبه مرة بالصدفه والباقي بالقصد لأني قعدت نراقب فيه..
مسحت دموعها وشافتله بعدين مدت التليفون .
خداه وهو يقول بضيق؛سامحيني وجعتك واحرجتك بس صدقيني معتبرك وخيتي..
هي لفت ومشت بسرعه حتى بضاعتها خلتها في مكانها..
هو قعد واقف في مكانه يشوفلها بحزن..
وصلت برا وهي شاده بكاها بقوة..
قعدت تمشي وخلاص وهي مش حاسه بروحها..
عارفة حقيقته كويس وياما تأذت منها وفوتت ومشت..
ومن كثر مامشتلها اهانته المتتاليه في حقها وصلت بيه انه يهينها في حوشها وفي المكان اللي يخص علاقتهم المقدسه اللي دنسها بقذارة فسقه ومجونه...
وهي ماشيه زي الهايمه ع وجهها..
جت جنبها سيارة الاجرة وصاحبها قال:يااختي..
هي وقفت وشافتله..
؛شن صار؟
نسرين مشت فتحت الباب الخلفي وركبت وهي تقول..لجردينة****** لو سمحت..
:تم..
وتحرك الراجل..
وهي طول قامت تليفونها واتصلت برقم محدد..
نادى مرتين ورد صاحبه..
بكت وهي تقول:بنطلق خلاص معاش نقدر نتحمل اكثر من هكي حيلي انهد..
☘☘☘☘☘
"وتوا شني"
سدرة المهدي اشرت ع رجليها وهي تقول..
اللهم اني اصبحت اشهدك واشهد حملة عرشك وملائكتك وجميع خلقك انك انت الله لاإله إلا انت وحدك لاشريك لك وان محمد عبدك ورسولك..
وقالت هي وامها مع بعض..وهدا ربع طلعناه من النار..
ابتسمت سدرة وحطت ايديها ع فخادها وعاودت قالت نفس الذكر..
وبعد كملت قالت هي وامها...
وهدا ربع تاني وطلعناه من النار...
☘ع خشة المهدي للشقه..
كان يسمع فيهم..
ابتسم ومشي للكوجينه..
وقف في الباب..
وقعد يشوف لعائشه كيف ضم وتعول في الكوجينه وسدرة حداها تقرا في الاذكار.
قعد واقف يتفرج عليهم..لين كملوا..
عائشه:الحمد لله عتقنا ربي من النار من هني لقبل المغرب..
سدرة :الحمد لله..وتوا ماما شني...
عائشه بإبتسامه؛قعمزي توا ع الكرسي بش تفطري..
المهدي:حطيلها فطورها وتعالي للدار نبيك في موضوع..
سدرة؛بابا امتى جيت.
المهدي:توا ياجرانه..
ومشي من قدام الكوجينه للدار..
عائشه حست ان في شي مهم..
وتت فطور بنتها وحطاته قدامه بعدين مشت طلعت وهي تقول؛ردي بالك تزيدي شاميه..
جاها صوت سدرة وهي تقول:حاضر..
وصلت دار النوم وخشتلها .
لقاته مقعمز ع السرير يراجي فيها..
عائشه:ان شاء الله خير!..
تنهد بعدين شبحلها وقال:جيبي الكرسي وقعمزي قدامي..
عائشه وهي قلقه جابت كرسي الزيانه..
وحطاته قدامه وقعمزت..
☘☘☘☘☘
"صار كسرتي حاجز الخوف"
طوبى بضحكه:مش بالزبط نقول هكي لما نبدا نسوق في الطريق وهي معبيه سيارات..
:لكن تصدقوا محلاه الراجل لما يوقف مع مريه ويقويها..
ابتسمت طوبى..
:بيبو حلو الزواج من واحد اكبر منك بهلبه..
طوبى:ع الراجل في اللي يحسسك بفرق العمر وفي اللي لا..
:اني مش مهم عندي الحق المهم نتزوج وندهور وناكل شاورما اني وياه في السيارة ونصور ونزل..
ضحكول البنات ووحده فيهم قالت؛وبعدين ياحنه!
:شنو بعدين!
:بعد شهر العسل والدهوير والشاورما..ضمان وغسل وتطييب ومجاملات ليه ولأماليه..وحرق دم ومشاكل..
:علاش تخوفي في البنت قاعده عروسه!
طوبى:بالعكس كلامها واقعي..العسل مايدومش في الزواج..
؛ايوه انتي حصلتي الراجل وهنيتي ع روحك وتبينا نقعدوا..
طوبى بضحكه؛ياهبله نبيك تعرفي ان كلامها صح الزواج مسؤوليه اكثر ماهو مرحلة حلوة في حياتك..
:عليك نور بيبو هدا قصدي..ومش ديما حياتك حتكون حلوة مع راجلك مرة هكي ومرة هكي..
طوبى:مزبوط..
:ياودي اني نبي نعيش يومين في هالحياة المنكوبه ..خلي ندهور وناكل شاورما وبعدين نخش ع النكب واخده عليه..
ضحكوا عليها وطوبى قالت؛محلاك كيف تقلبي النكد لضحك..
:بش نعيشوا يابيبو بش نعيشوا .
ابتسمت طوبى وهي تفكر في الحديث اللي دار بيهم..
وفي داخلها انزرعت بذرة قلق من اللي جاي..
☘☘☘☘☘☘
الوسخ المعفن الله ينزعه سحيقه"
نسرين ببكي:خلاص اني خلاص معاش نتحملها العيشه معاه في حوش واحد..خلاص..
سدرة؛باهي اهدي شويه حبيبتي بش تعرفي تفكري..
نسرين:مازال فيها تفكير هي!؟
سدرة:نقصد تفكري كيف تخلصي منه وفي نفس الوقت تاخدي حقك تالت ومتلت..
رشفت نسرين وقالت؛مانبي منه شي..
سدرة:لاياهبله ردي بالك تخليه يفلت باللي داره ربيه الكلب هدا..
نسرين:شن تبيني ندير؟!
سدرة؛ماتطلبيش الطلاق هكي ارفعي قضيه واعطي الفيديو للمحكمه وامسحي بيه الأرض..
نسرين بخوف؛لالافكيني من الفضايح فوق الطلاق فضيحه لالا..
تنهدت سدرة وقالت؛براحتك بس ردي بالك توخري ع الطلاق وترضي لروحك الاهانه اكثر من هكي..
نسرين بحزم؛خلاص الطلاق قرار نهائي مش حنرجع عنه..
هزت سدرة راسها تشجيعا ليها وقالت:وفي حالة غيرتي رايك وبترفعي قضيه ماتعبيش روحك في الدوارة ع محامي بري طول لنبيله حماة اختي..محامية شاطرة هلبه ومافيش قضيه طلعت من خاسرة..
نسرين:ان شاء الله مانحتاج محاكم..يطلقني طول ونفتك من شوفة وجهه..
سدرة:باهي وماليك؟
نسرين بعصبيه ودموعها ينزلوا؛مافي حد فيهم ليه دخل بحياتي..ساد مادخلوا قبل بش مانطلقش..وفي الاخير نقعد اني عايشة في الهم بروحي وهما اللي هدا عايش حياته متهني...معاش مفكرة في حد الا نفسي وبس..
سدرة لما سمعت جملة نسرين الاخيرة سرحت بعيد وهي تفكر فيها..
نسرين لاحظتها وقالت:سدرة..انتي شن حالك؟
شبحتلها بإبتسامه وقالت:الحمد لله الحمدلله..هي نوضي نروحوا الباين عليها بتمطر...
مسحت نسرين دموعها وناضت وهي تقول:ايه..بس من غدوة يتغير الجو..
سدرة ناضت وهي تقول:ان شاء الله..البلاد غرقت..
ومشوا مع بعض وهما يهدرزوا لين وصلوا سيارة سدرة..
ركبوا الزوز وتحركت سدرة وصل نسرين لحوشها..
وهي ولت للمدرسه...
☘☘☘☘☘
الساعه1:30ظهرا..
في المستشفى..
"دكتورة اميمه"
اميمه وهي ماشيه بتروح سمعت صوت زميلتها وهي تنادي..
وقفت والتفتت تشوفلها وهي جايه ناحيتها قالت:
شن خطر عليه تاني ؟!
ضحكت ولالا دكتور طلع عنده عمليات في المصحه..نبيك تجي معاي نسلموا ع أسامه بيسافر غدوة ان شاء الله..
اميمه بإبتسامه:ربي يوفقه ان شاء الله..سلميلي عليه..
:وعلاش ماتمشيش تسلمي عليه بروحك؟
اميمه:يعني ماتعرفيش!
ابتسمت صاحبتها بأسف وقالت:مزبوط عندك حق راح بالي..خلاص تو نوصله سلامك..
اميمه:تمام سلام..
ولفت ومشت..
وزميلتها مشت بطريقها للمكان اللي فيه اسامه ومعاه زملائه يسلموا ليه..
وصلت فيه وقالت:توصل سالم دكتور وربي يفتح عليك..
اسامه وهومبتسم:بارك الله فيك..
:وحتى اميمه تسلم عليك ودعتلك ربي يوقفك..
زملائهم اللي كانوا واقفين اغلبهم يعرفوا بحبه لأميمه لأنهم شهدوا عليه طيلة سنوات الدراسه..
لما جت سيرتها كلهم قعدوا يشوفوا في ردة فعله من تعابير وجهه .
اللي هو حاول بيهم يخفي حجم الألم اللي كان يحس بيه وقتها..
بإبتسامه خفيفه قال:مشكورة..
☘وهي ركبت سيارتها وهي تكلم في راجلها بالتليفون..
اميمه:لاحبيبي اليوم كملت بكري وتوا مروحه في الطريق..
"تمام حبيبي لما يجيك يوم تكملي فيه متأخر قولي لواحد من خوتي يجي يروح وراك"
اميمه:لاحبيبي كلمت حسين ويوسف واتفقت معاهم على هكي.
"كويس بكل..باهي قوليلي شفتي امي امس"
هي غمضت عيونها وحكت جبهتها وقالت:ايه..فتحت عيونها وقالت..وكانت عندها خديجه امس..
"تمام قلبي واليوم خليك معاها باهي"
هزت راسها وهي تقول:حاضر حاضر..
"تمام عيوني بنسكر توا...لما نفضى نعاودلك"
اميمه:تمام..رد بالك من روحك والبس كويس صقع هلبه غادي..
"جايتيها قبل" وقعد يضحك..
هي رفعت حواجبها تعجبا وقالت:لا..بس نعرف عنها معلومات ..
هو بضحكه قال...
"خيرك طارتلك نبصر عليك"
اميمه:واني جاوبتك بهدوء..
"خلاص معاش نبصروا عليك يازعوله..نحبك..سلام"
اميمه:سلام..
نزلت التليفون وسكرت وهي تشوفله..
قعدت تاكل في شفايفها من داخل وهي تفكر..
بعدين حطت التليفون جنبها وقامت عيونها تشوف للطريق وشغلت السيارة وتحركت..
☘☘☘☘☘
والجالي في الطريق..
متوجه لكلية طوبى بش بيروح بيها..
بعد ماقطع مسافه لاباس بيها وصل للكليه..
درس السيارة وجي بيتصل بيها..
بس...
《امثالهم هادم اللي يديروا في ارواحهم يصلوا ع طرفهم هما اللي يطلع عندهم ماضي اسود..
وهما اللي يخونوا..وهما المطلوقات ع حل شعرهم وماحد حاس بيهم..》
تراجع..بعدين فتح الباب ونزل..
سكر السيارة كويس .
وخش للكليه وقعد يمشي ويدور فيها..
وهو يدور كان كلام نجاة يتردد في عقله ويخلي يتخيل يلقى طوبى واقف ع واحد...
شدة ع قبضة يده وقال في نفسه..
"نقتلها في مكانها"
فجاة..
سكت الغضب في داخله وهدي مرة وحده..
لما لقاها متوسطه صاحباتها وهي شاده نقالها تتفرج على حاجه وهما معاها..
☘طوبى:احلى شي في اليونان الحياش هادم والطريق هادي...
قاطعتها صاحبتها وهي تقول:راجلك..
طوبى:شني!؟
:راجلك واقف غادي..
البنات كلهم شبحوله..
هو لف ومشي تباعد من خطوة..
هي ناضت وعيونها ع صاحباتها قالت:هي ياماماتي عيونك انتي وياها..
ضحكوا ووحده فيهم قالت:ايوه حني ياغيور انت.
ضحكت بعصبيه مصطنعه وهي تقول:سلام..
هما ردوا عليها:سلام..
مشت لراجلها وهو التفت شبحلها جايه..
وصلت فيه وقالت:السلام عليكم.
الجالي:وعليكم السلام..شن جو؟
طوبى:تمام..علاش ماأتصلتش؟.
رفع عيونه للسمي وقال:شفت الدنيا مسحبه توقعت تصب المطر وانتي طالعه..قلت ياولد خشلها انت بش كان صبت المطر دخلها تحت البالطو وتقيها..وابتسم برفعة حاجب..
طوبى وهي مضيقة عيونها:بالله!.
هوضحك وقال:والله..
طوبى :والله كان صار وصبت انت عطيني البالطو جاي وخلي الباقي عليا..
الجالي:يالئيمه..
طوبى وهي تقاوم في ضحكتها:باهي هيا خل نلحقوا نوصلوا  لسيارة قبل لتقعد من غير بالطوا.
ضحك وقال:هيا..
ومشوا الزوز مع بعض والجالي يناشب فيها يبيها تضحك وهي قعدت بقوة محافظه ع ملامح الزعل..
وصلوا في السيارة وركبوا..
والجالي قال:وصلنا ع خير حمد لله ع السلامه..
مابتش ترد..
هو ضحم ضحكة خفيفه بعدين شغل السيارة وتحرك..
قعد يدور فيCDمعين لين لقاه وحطه في المسجل..
وشغله..
اشتغلت اغنيه فنانه المفضل..
"البنيه"
علا الصوت وهو يغني فيها..
طوبى قلبت وجهها للروشن وقعدت تضحك بصمت..
وهو لاحظ جسمها كيف يهتز زبطها تضحك..
علا صوته وهو يغني.
"فيها شي..لامافيها..عيني فيها شي لامافيها"
وقعد يناشب لين افرجت عن ضحكاتها ونست الزعل وقعدت تهدرز معاه عادي...
☘فهالوقت..
روحت اميمه للحوش..
خشت بسيارتها للقراج وهي تفكر..
كيف بتنزل تخش داخل..وشن يستنى فيها داخل..
خدت نفس عميق وقالت:اللهم يسر لي امر..
فتحت الباب ونزلت..سكرت سيارتها..
ومشت طلعت من القراج للحوش..
لقاته الباب كالعاده مردود..
خشت وحولت من رجليها ومشت بإتجاه الصاله وهي مترددة ومتوترة..
لما وصلت فيها..
خشت..مالقت حد..
اميمه:شكلها في الدار..
تنهدت بعدين طلعت ومشت اتجاه الدار..
وين قربت منها سمعت صوت محمد المهدي وهو يتكلم..
☘محمد:والله مامدور يضربوني يهزبوني يديروا مايبوا فيا لكن امي لا حناي..
مغليه:ريته بوك زيك..