طوبى الجزء الاول

الجزء الثالث عشر

# طوبى "شارع القهوة"
#جمان_فريد
#الجزء_الثالث_عشر"قلوب معلقة"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
في جامعة الفاتح..
كلية الطب..
كانت مقعمزة ع المقاعد الطويله وتراجي في خوها يجي يروح بيها..
بعبايتها العاديه ووشاحها العاديه..وملامح الوجه الجميله اللي دفنتها قسوة الحياة..وهي شاده بإيديها الزوز شنطتها اللي كانت عاديه حتى هي..
تمرر في نظرها ع العالم الجديد اللي حواليها اللي شافت اشكال والوان من الناس..حست روحها مالهاش وجود بيناتهم..
كلهم يلمعوا ويبرقوا الا هي..هي الشي الباهت الوحيد في وسطهم..
يدوروا عيونها بين بنات جيلها كلهم مشرقات وحيويات..
وهي مش قادرة تكون زيهم..حاسه روحها مقيده..
حاسه روحها لو فكرت تنوض او تتحرك حتتصرف تصرف عبيط يضحك اللي حواليها عليها او يخليها مثار سخريه..
وهي في هيامها فهالعالم الجديد..
لمحوا عيونها اللي لونهم اصفى من مية البحر شخص يحبوه هلبه..
برغم انه مافيش حاجه تنحب ولاحاجه..
بس قلبها المسكينه بش يزيد من تعاستها فهالحياة مااختارش من ذكور الأرض غيره..
اكثر شخص يستمتع بالسخريه منها..وهوايته الهزوة عليها من صغره...عمر...
ولد جيرانها...
ايه اميمه حبت عمر...
شن شافت فيه بش حباته..!
جذاب..كان جذاب هلبه...انيق...معجب بنفسه...
بس هي ماحبتاش لهالاسباب...
الاسباب اللي حباته ع خاطرها..عند نفسها مجهوله...
لقت روحها مع مرور السنين تحبه وهي مش حاسه...
كيف مش عارفه!!؟
فات من قدامها وهي تبع فيه بعيونها...
لين وقف ع وحده من هالبنات البراقات اللامعات...
لابسه احلى لبس..مكياج..شنطه ماركه التليفون نوع جديد شاداته في يدها...
شبحتلها هلبه..بعدين شبحت لنفسها...ورجعت شافتلها..
وشافت كيف مشي هو وياها ويهدرزوا...
عيونها اللي بلون مية البحر..غرقوا بالدموع..
وقلبها قعد يدق في دقات موجعه....
زادت قوتها لما انفجعت فجأة...وين سمعت صوت نغمة هاتفها "البيلا"
طلعاته من الشنطه بسرعه..
لقت يوسف يتصل بيها..فتحت عليه وقالت:هيا جايه جايه..
وناضت بسرعه وهي مرتبكه..حطت تليفونها في الشنطه..
شبحت جيهة عمر والبنت اللي معاه بنظرات حزن..
بعدين لفت ومشت بسرعه..
طلعت برا الكليه..لقت سيارة يوسف ..
مشتلها تجري ركبت جنبه وقالت:اسفه عطلت..
يوسف:وين عطلتي! جيتي بسرعه يخي..
شبحت في يده التليفون ابتسمت وقالت؛كان قتلي راهو قعدت نمشي ع اقل من مهلي..
يوسف:ايه بش يعاكسوك..
اميمه ضحكت مجامله وقالت في نفسها..
"مافيا مايعاكسوني عليه"
شغل يوسف السيارة  وتحرك وهو يهدرز ع اخته وهي تهدرز معاه براحه...
مع الناس اللي نحبهم يكون لسانها منطلق..
بس مع الناس اللي ماتعرفهمش او ماترتاحلهمش يكون لسانها معقود..
وترتبك وين تحكي ع شي يخليها تخجل..او وين تكون مش واثقه في اللي تقول فيه...
🌻عكسها تماما..
قرينتها وبنت عمها غرفه..
غرفة اللي روحت من الكليه عن طريق باص..
لقت اختها فردوس في الحوش تحوش وضم استعداد لأستقبال لطفي وسدرة وطوبى اللي مروحين من بنغازي بعد ماكانوا في زيارة لصديقه جبريل...
خشت غرفه وتلقوها بنات اختها...
غرفه:اوووو فكروناتي..
اريج؛شن جو خالتو..وباستها..
غرفه:جو تعب ودراه كبد..
الاء:خويله..
غرفه؛جميلتي..وطبست باستها من خدها..
ع جية فردوس؛هي بدلي حوايجك وخشي الكوجينه عاونيني..
مشتلها سلمت عليها بالخد وقالت؛مش قبل الدوش يادوسه..نقطر عرق الجو اليوم رطوبه رغم ان في اخر عشرة..
فردوس:ايه صح..باهي بري دوشي فيسع وتعالي للكوجينه شويه وتخش عمتي..
غرفه؛ييييه تو بتشردني..
ومشت للدار وخشت...
فردوس:ضميتي المربوعه كلها روجه؟
اريج:ايه ماما وبخيت المعطر وسكرتها..
فردوس:صحة لبنتي...وانتي درتي اللي قتلك عليه!
آلاء بملل:ايه ايه...
فردوس؛تو نشوفه بعدين...شبحت لأريج وقالت..بري قعمزي حدا خوك مرات ينوض ومايلقى حد يقعد يعيط..
اريج:باهي..ومشت تجري للصاله...
والاء مشت وراها..
فردوس:سقدي ياغرفه!
ومشت ولت للكوجينه....
🌻🌻🌻🌻🌻🌻
"والله يام اني لما ضاقت مالقيتش غيرهم"
مشتده:خوتك يقعدوا خوتك..
فايزة؛امي بالله عليك ماتفرضي عليا حد..تبي نحطوك في حوشه ع طريقنا وحني ماشيين..
مشتده:ايه حطوني في حوشه ونبي نقعد غادي نهارين تلاته..
فايزة؛براحتك يام برااااحتك...بناتي ماما هيا تعالوا نلبسوا..
ومشت طلعت من حدا امها..
مشتده:تو ينفعوك عيت الواعر اللي تفضلي فيهم ع خوتك..
🌻🌻🌻🌻🌻🌻
"لالانفكر نديرها نقش مش حنه كامله ماتنسيش اني حامل"
عتيقه؛حتى نقش قنينه..خسارة ياريتك تقدري تصبغي..
عائشه؛المهدي قالي معاش تغيري اللون هذا ديما اصبغيه..
عتيقه؛لامادام هو قال هكي خلاص...
☘وعند الناس اللي تحتهم...
كانت مغليه مقعمزة ومعاها خديجه..
والصغار يحوموا حواليهم...
صغار خديجه والمهدي..
زوز ولاد للمهدي...محمد...ويزن..
وبنت وولد لخديجه...محمد...وراما...
مغليه:تجيها امها ياحنه تركبها طول لشقتها يقعدوا بالساعات فوق..
خديجه:دلعها المهدي لين خلاها تشوف روحها وين كانت ووين اصبحت بنت جويده..لكن صحه ليها عرفت كيف تاخد عقله..
مغليه:تاخد والله عينها..
خديجه؛علاش!؟
تنهدت مغليه وقالت؛خوك الفالح كل يوم ينشد في نضال روحوا عيت الواعر من بنغازي ولالا..هو يقول لنضال ماتقولش اني نسأل فيك عليهم ونضال عاد ماتوصيش حريص جي وعاودلي..
خديجه؛تصدقي حتى المختشات عواطف ونجاح يلقحوا على قصة المهدي وسدرة عاد مايفوتهم شي لما يكسدوا يشدوا الروشن ويراقبوا في الشارع..
مغليه:ان شاء الله عقابها خير وخلاص..طول هالسنين واني ع اعصابي خايفه يدير مصيبه ويبلينا..تصدقي بديت وين نسمع بحد جاي يخطبها ندعي مايصيرش منه بش المدعي خوك مايطلعوش جنونه ويديرلنا خارقه..
خديجه:يستر الله..لكن تعرفي يام مرات لما طيريلي من هديكا نتمناه ياخدها عليها..
مغليه رفعت حواجبها وقالت:حتى اني..ايه حقه قبل لننسى خوك طاهر اليوم بيجي يتعشى عندنا...
ابتسمت خديجه وقالت:الله! استاحشته هلبه..
مغليه:قداش كبر في عيني منين تعارك هو وامه ع خاطر الجيان هني وخدي منها موقف وسيبلها الحوش قاللها كيف ماتبي تقطعيني عن بوي اني بنقطعك ونخليك تجربي..
خديجه؛تستاهل مراة متجبرة مهما كان مالهاش حق تمنعه عن بوه...
مغليه:وحده تاعبه...
ع خشة عتيقه وعائشه عليهم..
مغليه؛وين وين هذا كله نسيت انك جيتي..
عتيقه بضحكه؛قصدك طولنا..
وقعمزوا حداهم..
مغليه:ع اساس بتركبي معاها تشوفي الدبش اللي خداته لعرس خوها من نفيص ساعه رحتوا في ساعتين..
خديجه:قلنا الام وبنتها شكله في بينهم مؤامرات..
عائشه:مؤامرات شني العفو!
مغليه:ماهو الواحد غصب عنه بيشك وين تجي امك تقعدي انتي بالاربعه ساعات فوق..وعشرة دقايق عندنا تسلم وتطلع...
عتيقه:سامحيني يامغليه بس تاخد فينا الهدرزة هدرزة عاديه لامؤامرات لاسو..
خديجه:الواحد يتقي الشبهات...اني امي لما تجيني ماتركبش لشقتي بكل نقعدوا اني وياها لوطا مع متاعيني بش مانضايقهمش..
عائشه هزت راسها وقالت:حاضر مرة تانيه معاش ندير شي يضايقكم..
مغليه:ايوه خليك سلم بنتي..
عتيقه قعدت ساكته وهي مضايقه...
عائشه رفعت حاجبها وقالت؛بتجي نسرين العشيه؟
خديجه:ايه كلمتني وقالت جايه...
🌻🌻🌻🌻🌻🌻
فتحت باب الحوش وخشت..
كانت جايه وهي تاعبه..حامل وفي شهرها...
وماخدتش اجازة بكل من خدمتها تبي تعطي لأخر لحظه..
خشت داخل لقت عزوزتها شاده بنتها تمشطلها في شعرها..
نسرين:السلام عليكم..
عزوزتها حليمه:وعليكم السلام..باهي اللي جيتي..ولدك غيرتله ودرتله حمام ورقدته..الولد ليه يومين مش مدوش لين ريحته طلعت..
نسرين:تشبحي فيا ماعندي جهد ياعمتي..
حليمه:ديما وانتي ماعندكش جهد امتى عندك جهد..من نهار جيتي وانتي ماعندك كان النوم والتلفزيون وهالخدمه اللي تخرطي وتمرطي عليها..
تنهدت نسرين وقالت:باهي..
ومشت وخلتها...
حليمه:ماني عارفه وين كان عقلي لما بدلت بنت اختي بوحده زيك..
ونسرين تسمع ولامباليه...
ليها 4سنين وهي تسمع في نفس الكلام من عزوزتها المتغطرسه اللي تحب تتحكم في كل شي..
بس في نفس الوقت عيوب نسرين خلوها تعاملها هالمعامله..
نسرين مش فالحه..ومهمله وبليده وماتعدلش..
الزم ماعليها راحتها..يعني مرات تهمل صغارها عادي في سبيل راحتها..
والعزوز الحال هذا مايعجبهاش ع كبر سنها قعدت هي تعاني في صغار ولدها...
اما ولدها..فكان كل همه شغله والمشاريع والفلوس ومش مهتم هلبه لمشاكل الحوش..
علاقته هو ونسرين علاقه تقليديه عاديه جدا..
راجل ومرته وعندهم صغار وخلاص..
شبه مافيش مشاعر بيناتهم حياة بارده...
بس اهو عايشينها وخلاص...
🌻🌻🌻🌻🌻
حط يوسف اميمه قدام الحوش ومشي بيشوف حاله..
خشت للحوش..
رمت كندرتها وحطتها ع تركينه..
بعدين خشت للحوش..
لقت جدها مقعمز يعاند في راديوه..
اميمه بإبتسامه؛السلام عليكم جدي كيف حالك توا..
علي:اووو قطوسه..الحمد لله..انتي شن درتي في الجامعه...
حولت وشاحها وهي تهز في راسها وتقول:ماشيه الحمد لله..
ومشت لدارها..
ع طلعة امها من الكوجينه وين شافتها ابتسمت وقالت:روحتي..
اميمه:شن حالك امي توا...
صفيه:الحمد لله..شن درتي.
اميمه بإبتسامه:كله تمام..
ومشت خشت لدارها وسكرتها عليها..
وامها مشت لشيبانها وقالتله:نطيبوا باللحم ولابالدجاج..
علي:باللحم باللحم..
صفيه:خلاص كسيكسو بالبصله..
علي:خلي منه لطوبى تحبه هلبه..
صفيه بضحكه: والله في عقلي..
ع طلعت اميمه من الدار بعد مابدلت:مازال مش مروحين؟
صفيه:العشيه ان شاء الله يكونوا هني طالعين من الفجر..
اميمه؛يوصلوا سالمين..
ومشت اميمه للحمام..
وصفيه ولت للكوجينه وهي تقول:آمين..
☘شويه وطلعت اميمه من الحمام..
صلت الظهر...بعدين هيئت نفسها..ومشت لحوش عمها..
وين خشت للجنان من الباب الفاصل..
سمعت صوت الاغاني يجيب من وين وين..
ضحكت ومشت من جهة الكوجينه..
شبحت من الروشن..
لقت غرفة شاده ساقم اللوح وتغني مع اغاني الراديو .
وترقص هي وبنات اختها اريج وآلاء..
خشت عليهم  هي تضحك..
اميمه؛شن جو..
غرفه قربت منها وقعدت تغني وترقص وتنخ عليها بشعرها..
واميمه تضحك..
قعمزت ع الكرسي جتها اريج باستها من خدها وقالت؛شن جو
اميمه قرصتها من خدها وقالت:مليح..
مشت غرفه وطت الصوت وقالت:شن جو يادكتورة..
اميمه:تمام..شن درتي انتي اليوم؟
غرفه:وووه نفخ ودراه كبد رجليا طاحوا واني نزل في المواد..
اميمه حطت ايديها في بعض وقعدت تفرك فيهم  وقالت:انسجمتي!؟
غرفه وهي طلع من الطاجين من الكوشه:عادي..
اميمه حكت جبهتها وقالت:مش عارفه اني علاش خفت حسيتها عالم تاني..
غرفه:ماهو انتم كليتكم كبيره..
ومشت قعمزت وقالت؛ان شاء الله ماتندميش انك خشيتي طب بس..
اميمه:وعلاش بنندم رغبتي!
قعدت غرفه تفرك في صبعها السبابه بالابهام وهي تقول:تبي كورسات تبي فلوس!..
اميمه؛جدي قال حيتكفل بكل شي..
غرفه:يعرف على من يصرف جدي..
اميمه عقدت حواجبها بإستغراب وقالت:مانحسش في عمي لطفي مقصر معاكم..
قلبت غرفه عيونها وقالت؛روجه آلو شوفوا بالك ماما تبي حاجه..
اريج؛قولي تبي توزعينا نفهموا راهو .
ضحكت اميمه..
غرفه:بري بري من غير طول لسان..
مشوا اريج وآلاء وطلعوا من حداهم..
غرفه شبحت لأميمه وقالت؛اكيد شفتي طروف بالشبردق غادي..
حكت اميمه حاجبها وقالت؛الحق ماركزتش هلبه..
غرفه بضحكه؛ايه حقه نسيت انتي تخصصك كلية الطيران..
اميمه فنصت فيها وقالت؛اصص..
ضحكت غرفه ..
اميمه تنهدت وحطت ايديها في بعض وقالت؛شفته اليوم جاي لكليتنا..
غرفه رفعت حواجبها وقالت:حقه!
اميمه:كان جاي لبنت تهبل وقف معاها وقعد يهدرز عليها..
خبطت غرفه قفا يدها اليمين براحة يدها اليسار وقالت:ياهبله انتي ما فهمتيشي..
اميمه شبحتلها بإستغراب وقالت؛شن نفهم!؟.
غرفه؛شوفي من اول يوم جاك للكليه وبلعاني جي قدامك وقف ع بنيه..هذا كله يبيك تغاري وتطلعي مشاعرك...
اميمه:معقوله!؟
غرفه؛واضحه ياغبيه غير انتي تفهمي ع الدور ع العاشر..
اميمه سرحت وهي تفكر في كلام غرفه..
وغرفه تشوفلها وهي شاده ضحكتها ورافعه حواجبها..
غيرت ملامح وجهها لما شبحتلها اميمه وهي تقول:قصدك يعني عمر بجديات معجب بيا..يعني عنده مشاعر جيهتي!؟؟
غرفه:ايه ايه يابنتي عييت واني نشرحلك انتي تشجعي وبينيله مشاعرك..
اميمه بارتباك؛كيف..كيف يعني..شن ندير!؟.
غرفه:ابتسمي مشيها ع الابتسامات..وين تشوفيله ابتسمي بش يفهم انك حسيتي بيه واخيرا..
قعدت تفكر اميمه بعدين قالت:مش عارفه مش مصدقه ان عمر معجب بيا..هو ديما يشوف فيا شينه وهازي عليا شن بيعجبه فيا توا!!؟
غرفه:ياعبيطه هدا جو يدير فيه..هو حركاته شي وشعوره شي تاني حتى لما يناشب فيك بلعاني يبي يحتك بيك وخلاص..
اميمه:زعمه!؟
غرفه:تعبتيني يااميمه راهو..
تنهدت اميمه وابتسمت وقعدت ساكته وهي تفكر..
وغرفه ناضت من جنبها وهي تغني ومشت علت صوت الراديو ورجعت ترقص ..
واميمه تشوفلها وهي تضحك..
وبرا الكوجينه..
من فم الحوش..
خشوا مطيرة ومعاها فايزة وبناويتها التلاته..
صفاء ومروة وتالة..
واللي فتحتلهم الباب اريج..
خشوا كلهم للحوش واستقبلتهم فردوس بالسلام وخشت هي وياهم داخل...
☘☘☘☘☘☘
الساعه 6:00مساءا..
حدا سيارة المهدي..
كان واقف هو واحمد يهدرزوا..
وحداهم محمد ولد المهدي يلعب مع الصغار..
المهدي وهو يهدرز عيونه كانوا ع الطريق..
يراجي في خشة سيارة لطفي...
شويه جت سيارة من الطريق اللي يشوفلها لكن كانت سيارة خوه الجالي..
درس الجالي قدام المطحن مباشرة ونزل من السيارة..
وجي لأحمد:حمادة شن جو..
وسلموا ع بعض بالخد..
احمد:تمام الحمد لله..شن جوك انت ياهندسه..
الجالي:خدمة ليه ليه..
احمد:صحة ليك خدمت بسرعه ماقعدتش تراجي..
الجالي:المعارف ليهم دور ياصاحبي الحكايه مش ساهله..
المهدي:كان ماوراه حد راهو قعد يستنى زي هلبه ناس..
احمد هز راسه وقال:صح..
شويه وخشت سيارة لطفي للشارع..
المهدي قعد يشوفلها بلهفه..
لمح سدرة تتكلم بالتليفون...
قعد يشبحلها ويملي في عيونه..ليه عشرة ايام محروم من شوفتها..عشرة ايام حسهم عشرة سنين...
احمد:روحوا ...
الجالي التفت وشاف للسيارة ..
درس لطفي..
ونزلوا سدرة وطوبى من السيارة..
محمد اول ماشافها قال:طوبى..
ومشالها يجري..
هي سمعت اسمها بصوته ضحكت وقالت:ميدو مشاكل..
جاها ووصل فيها..هي طبست عليه وحضناته وقالت:استاحشتك هلبه..
محمد:حتى اني..رسمت هلبه رسمات وانتي مهناش..
بعدت وقالت:حقه...!
محمد:وماوريتهم لحد حتى للمس في الروضه..
طوبى:احسن بش نشوفهم اني الاولى..
هذا كله وسدرة واقفه تشبحلهم بإبتسامه..
والمهدي عيونه عليها بس..والجالي يشبحله..
لطفي:هيا بابا طوبى خشوا..
سدرة:هيا طوبى..
طوبى:برا ميدو توا وبعدين تعالى بالرسمات باهي.
محمد؛باهي..
ومشي محمد يجري ولى لبوه..
المهدي:حمد لله ع السلامه عمي لطفي..
طوبى شبحت لسدرة لقتها مشت للباب فتحاته وخشت لحقتها..
لطفي:الله يسلمك..
المهدي وهو يشوف للباب؛شن جو الطريق..
لطفي:ميه ميه منظمه وامنه..
المهدي هز راسه وقال:كويس.
والجالي واحمد مشوا للطفي سلموا عليه بعد ماخشوا البنات..
المهدي علاش مادارش زيهم!؟
لأن المنطقه محظورة ع المهدي ممنوع يقرب منها..
هذا كله بسبب تهديدات بوه ليه... هالتهديدات اللي تخوف في المهدي هلبه..
"ارحل من هني"
لايمكن يرحل..ولايقدر يكمل حياته في مكان مافيشي سدرة..
عشق اشبه بالسرطان تمكن من ذرة من ذرات الجسد..
ملك الروح ملك مقدس..
مرور السنوات خلاه يكبر مايصغر..
كيف بيصغر وكيف بينتسى!؟
هذا حب عمر..حب طفوله..
حب كبر معاهم تربوا عليه...حب زي هذا يتعب ايه..
لكن مايموتش...
🌻🌻🌻🌻🌻
"ياناعلي ياناعلي روحتوا ياناعلي"
سدرة بنبرة اهل الشرق؛ردينا ياحنه سالمين غانمين ..
طوبى:توحشتكم بكل بكل..واااجد..
مطيرة ضمتها بقوة وقالت؛نجك ليا..
طوبى وهي معصورة:ياناعلي متت..
قعدوا يضحكوا..
وغرفه تشوفلها بغيره..
فردوس وهي تسلم ع سدرة؛حمد لله ع سلامتكم..
سدرة؛الله يسلمك..نشم في روايح زكيه شن درتولنا..
فردوس؛كل خير ياحنه كل خير..
بعدت سدرة عن فردوس وجت لفايزة وقالت؛شراده..
فايزة بضحكه؛سديرة ليك وحشة ياجحشة..
وحضنوا بعض..
وطوبى مشت سلمت ع فردوس..
وقعدوا يسلموا ع بعض لين وصلت طوبى في غرفه..
طوبى:واضح انك مااستاحشتنيش.
طبست عليها غرفه وباستها بعدين قالت:كيف عرفتي!
طوبى بإبتسامه؛واضح لكن اني استاحشتك..وباستها من خدها..
بعدين جت لأميمه:ميمو..
اميمه بضحكه:طوبى..
وضمتها..
كانت اميمه طويله وطوبى واصله لأعلى بطنها وهي ضم فيها..
قامة اميمه وطولها حلوين..
عكس غرفه اللي كانت مليانه شويه..
بينما طوبى كانت تبان اكبر من سنها من طولها وجسمها..
التفتت بعدين لبنات اختها وخدوا بعضهم وقعمزوا مع بعض..
وبدت طوبى تهدرزلهم ع رحلتها الاولى لبنغازي..
وهما يسمعولها بإهتمام..
والنساوين مشوا قعمزوا في الصاله وقعدوا..
شويه وخشت عليهم صفيه وفيدها صونيه..
سلمت عليهم..
بعدين جت لطوبى وسلمت عليها سلام حار وقالت:درت كسكسي بالبصله خليتلك منه..
فردوس بضحكه:حتى اني درت كسكسي..
طوبى:من غير زعل دوسه ماذوقتش كسكسي احلى من كسكسي سدرة غير متاع خالتي صفيه..
صفيه:سلمها ياربي..
فردوس بضحكه:عندك حق مش زعلانه..
مطيره:وكسكسي عمتك ياحنه!؟
طوبى بضحكه:بالحوت مايغلبك فيه حد..
ضحكوا...
صفيه:ان شاء الله ماتعبتوش في الطريق..
سدرة:نص الطريق وحني نخضخضوا مع بعضنا..
طوبى:راسي انخبط في سقف السيارة مرتين..
سدرة:اخر مرة نمشوا بر..
غرفه:انتي اللي قلتي تبي بر..
سدرة؛توبه معاد نعاودها..شبحتلها وقالت..مشيتي الجامعه.
غرفه:ايه ونزلت موادي..
شبحت سدرة لمرت عمها وقالت:ان شاء الله ماقعدتش شاده التلفزيون ومخلياتك تحوسي بروحك..
صفيه؛لاحرام عليا معانا اني واميمه يد بيد..
غرفه:تحسابني بايرة..
سدرة؛مش نحسابك انتي بايرة حق..غير شكلها تحشمت منك خالتي صفيه..
ضحكوا ..
غرفه؛انتي هكي! مالا ماتاكليش من الطاجين اللي درته..
سدرة:باهي اللي قلتي عليه بش ماناكلش منه..
قعدوا يضحكوا ع غرفه..
وهي قلبت عيونها ووجهها وتكنطت..
🌻🌻🌻🌻🌻🌻
"مرحبتين ولدي مرحبتين"
طاهر:كيف حالك خالتي..وباس راس مغليه..
مغليه:الحمد لله ولدي قعمز ارتاح..
قعمز طاهر وهي قعمزت جنبه وقال:شن امورك وشن امور الخدمه..
طاهر:الحمد لله كل شي ماشي تمام..
ع خشة خديجه ونسرين..
خديجه:طاهر .
ناض طاهر وقال:خديج..
وسلموا ع بعض بالأحضان..
خديجه:وينك مغيب.
طاهر:لاهي فهالدنيا..شن حالك انتي وحال محيي وين الصغار..
خديجه:اهو شويه ويخشوا..
نسرين:هيا دوري..
طاهر:نانسي..
وبعد عن خديجه وضم نسرين..
نسرين:ليك وحشه بصغارها..خيرك معاش جيتني حوشي..
طاهر:والله مشغول باهي اللي حصلت هاليوم بش نشوفكم..
مغليه:ربي يعاونك ولدي ويفتح عليك..
وقعمزوا حداه خواته وقعدوا يهدرزوا عليه..
بعدين خشوا صغارهم اللي مخلا مافرق عليهم...
شويه وجي المهدي ومعاه ولاده ..
بعد السلام...
طاهر:ماشاء الله محمد راح راجل..
المهدي:امتى بيدير صغار عم؟
ضحك طاهر وقال:اكبر سبب لجيتي الموضوع هدا..
نسرين بفرحه؛حقه!؟
طاهر بإبتسامه؛ايه..قنعت امي بعد جهد جهيد تمشي معاي وانتي معاها خالتي تخطبولي..
مغليه تفاجئت..
طاهر؛مش ماشي من غيرك خالتي..ليك فضل عليا وياما وقفت معاي السنين اللي فاتوا وكنتيلي ام تانيه..مانمشيش نخطب من غيرك..
ابتسموا البنات وهما يشوفوله بحب..
والمهدي شبح لأمه بإبتسامه وقال:هاه شن قلتي..
دمعوا عيون مغليه قعدت تمسح فيهم  وتقول:كبر قدارك وليدي..حاضر نمشي معاك..
طاهر:والله فرحتيني ياخالتي..
طبطبت خديجه ع ظهره..
ونسرين قالت:ربي يكملك ع خير يارب..
ع خشة نضال:اووو طاهر عندنا..واني نقول خيره الحوش قاوي ضيه..
ضحك طاهر وناض وسلموا ع بعض..
☘فهالوقت..
نزلوا الجالي وعمر من فوق وهما يهدرزوا..
عمر:نكره نجامل ونافق..
الجالي:اكثر منك..بس يقعد خونا ماعندنا مانديروا..
عمر:اووف..
ومشوا الزوز بإتجاه المربوعه..
خش الجالي وسلم عليه سلام كويس..
لكن عمر كان سلامه جاف هلبه..
طاهر ماأهتمش خدي عليه..وبالنسبه ليه توا مكتفي بحب خواته ليه..بالذات بعد ماتغيرت معاه خديجه ولت قريبة عليه..
وفي الوقت اللي فيه كلهم مقعمزين حدا بعض..
كانت عائشه تحوس في الكوجينه بروحها ع عشاهم..
عائشه بهمس:توا طاح الغلا في خوهم ومعاش يبوا ينوضوا من حداه!..
ع خشة ولدها محمد:ماما نبي ناكل..
عائشه بنرفزة:اطلع من حداي توا مش فاضيتلك..
طلع محمد وهو مضايق..
وهي قعدت تحوس في الكوجينه وتوتي في السفر..
🌻🌻🌻🌻🌻🌻
وفي حوش الواعر..
طلعت سدرة فتحت الباب الخارجي..
سدرة بضحكه:سعاد اقبال..خالتي تبرة..تفضلوا تفضلوا..
هادوا كانوا عيلة الفاندي..
امه وخواته البنات اللي ليهم سنين مصاحبين عيت الواعر صحبة قويه...
دخلت سدرة البنات وامهم..
والفاندي في السيارة يشبحلها بشوق..
هي شافتله..هو رفع يده وحياها..
وهي يدوب حركت راسها ردا عليه...
بعدين ردت الباب..
تبرة:حمد لله ع سلامتكم..
سدرة:الله يسلمك خالتي..
سعاد؛ليكم وحشه قداش فقدناكم تعودنا كل خميس نسهروا عندكم كسدنا الخميسات اللي فاتوا..
سدرة بضحكه؛والله حتى اني استاحشت سهرياتنا..
هي خشوا خشوا 
اقبال:فايزة هني..
سدرة بضحكه:ايه ياحنه هني..
ودخلتهم داخل بعدين قالت ليوسف ع الفاندي..
طلعله دخله للحوش...
🌻الفاندي فهالسنوات تغيرت فيه هلبه حاجات..
طباعه تغيرت شويه..مظهره الخارجي ولى مرتب هلبه ومقبول..
وهذا كله ع خاطر سدرة اللي تمكن حبها من قلبه وماخلاشي يشوف لغيرها طول هالسنوات..وكل يوم يزيد يتأمل فيها اكثر من اليوم اللي قبله..رغم انها قاطعتله كل حبال الأمل من ناحيتها...
☘☘☘☘
والتموا الاحباب والاصحاب ع سفرة وحده وقعدوا يتعشوا وهما يهدرزوا في احلى هدرزة..
وطوبى مقعمزة بروحها ع صونية صفيه وتاكل من كسكسيها..
وغرفه مرة مرة تشبحلها..
تبرة:معاش روحلكم ولدك العسكري ياصفيه..
صفيه؛لاخلاص معاش مازاله شي الثلاثه شهور فاتوا خلاص..
مطيرة؛ربي يحفظه ولدي ولى ضابط مالي مكانه غير يمشي في الشارع اللي مقعمز يوقف..
سدرة:ربي يحفظه من كل شر..
وغرفه تسمع فيهم وهي هايمه وتتخيل في حسين بالبدله العسكريه..
اقبال؛فيزة منظرك منظر وحده حامل..
فايزة دفتها وهي تقول؛تحركي من مكانك اللطف!
ضحكوا..
تبرة:وخيره يابنتي نعمه بالك تخاوي لبناتك..
فايزة:لالا مازال خل تكبر تاله شويه والله تعبت من معاناتهم وحتى خدمتي خايفه يلزوني منها من وراهم..
صفيه؛ربي يقدرك ع تربيتهم عندك حق راجي لين تكبر تاله شويه بعدين خاويلهم..
فردوس:غير ماتعطليش تعطيلتي تلقي روحك بعد نسيتي موال الصغار تخشي فيه من اول وجديد..
سدرة:نجيه ياربي كابر هالمطبش..
طوبى:وبدي يقول كلمات..
سدرة رفعت حواجبها 
فردوس؛بحداه خواته ديما يبربروا يلقط منهم في كلمات..
اريج:تو حني نبربروا ماما!؟.
ضحكوا عليها ..
وكملوا هدرزتهم وسط اجواء حلوة وحميميه.
🌻زي الاجواء اللي جمعت طاهر بخوته وبوه ع سفرة وحده
وكانت محور هدرزتهم موضوع خطبة طاهر وشن مخطط يدير...
~~~~~~~
"استغربت كيف قال بيرفعك انتي وامه"
مغليه:هو حتى اني استغربت لكن ماقدرتش نرده..
محمد:ردي بالك تعلقي معاها لسانها طويل تعرفيها انتي..
مغليه:مش مدورتها بكل وكان قالت حاجه نخلي ولدها يرد عليها..
تنهد محمد وقال:ان شاء الله خير وخلاص..هاك حطي الساعه غادي..
خدت منه الساعه حطتها ع الزيانه...
~~~~~~
"ظهري يوجع فيا هلبه.."
المهدي؛مية مرة كان قتلك كان ماتقدري ديري شي ماتغصبيش ع روحك..
عائشه وهي تتوجع:مانبيش عمتي تحرج..
المهدي شبحلها شويه وقال:نرفعك نعاينك..
عائشه؛لالاتو نرقد ونرتاح..انت بس رد بالك من الاولاد..
هز راسه وقال:تمام..ارقدي ومادوريهمش وكان حسيتي روحك مش قادرة تتحملي قولي..
عائشه رقدت وهي تقول:باهي..
وهو جاها غطاها...بعدين مشي طلع من دارهم لدار الولاد..
🌻🌻🌻🌻🌻
"بيرفع امي تخطبله مع امه"
محي الدين وهو لاهي باللاب توب:فيه الخير والله...
خديجه:امي باهيه فيه حتى هي..
محي:ربي يحفظها خالتي..ايه حبي ماقلتيش كلمتي بوك..
خديجه:ايه كلمته قال غدوة تعالى للمحل نزيدوا نتفاهموا..
محي:تمام...وطلع من جيبه مبلغ وقال..خودي..
خديجه:اللي عطيتهملي الشهر اللي فات ماصرفت منهم شي..
محي:حطيهم ع بعضهم تلقيهم..
خديجه بإبتسامه؛ربي يزيدك من خيره.
محي:آمين..
خديجه بضحكه:ماصار شي لوطا اليوم..
ضحك وقال؛والله ماني عارف روحت طول ركبت الشقه..
خديجه بضحكه:تو غدوة ننزل لعمتي تحكيلي...
🌻🌻🌻🌻🌻
الساعه 12:00ليلا..
في حوش الواعر..
بعد مافضي من ضيوفه.
قعدوا الخوات التلاته مع بعض سهرنات يهدرزوا..
غرفه:سدرة..علاش ماتوافقيش ع الفاندي..
سدرة؛شن خطر عليك..
غرفه:حسيته يحبك هلبه وعيلته تهبل..والحق اني خاطري نشوفك عروس..
ابتسمت سدرة وقالت:نشوفك انتي ان شاء الله..
طوبى:سدرة..علاش ماجاوبتهاش..
سدرة؛ترا ارقدي انتي وياها مش فايقه لكلامكم..ارقدوا وراكم نوضه بكري...
غرفه؛مش ماشيه غدوة مافيش محاضرات..الاسبوع الجاي نبدوا..
سدرة:اسمعي شدي في قرايتك يابنت خيرلك التسهويك فكيني منه..نشوف عليك هكي ولاهكي نذبحك..
غرفه؛شن تشوفي فيا صايعه!؟
سدرة:كان نشوف فيك هكي مانخلكيش تقصي خطوة برا الحوش..
سكتت غرفه..
طوبى وعيونها بيتسكروا:خلاص بنرقد تصبحوا ع خير...
غرفه:ايه ارقدي وخزني الكلام اللي بتحكيه غدوة لصاحباتك عن رحلتك لتركيا..
سدرة شبحتلها بإمتعاض..
طوبى رفعت روحها وشبحت لغرفه..حولت عيونها ومدت سنونها القدام وقالت:اننننن..
غرفه ضحكت بسخريه..
وسدرة ضربت طوبى ع ظهرها وهي تضحك وقالت:ارقدي ارقدي..
قلبت طوبى عيونها وهي تضحك..ورقدت..
وغرفه غمضت عيونها..وشويه ورقدت..
اما سدرة قعدت فايقه تخمم...لعند ماجاها النوم ورقدت...
🌻🌻🌻🌻🌻🌻
"مواضيعك انتي وامي حلوها برواحكم"
نسرين:تمام معاش تعاودلي كلامها مالا..
حامد:حتى انتي اهتمي شويه بصغارك مش كان حامل تفوتيهم بكل..
نسرين وهي تدهن في ايديها بالكريمه قالت:باهي..
رقد راجلها وقال:اطفي الضي..
ناضت وهي تقول :باهي..
ومشت طلعت من حداه..
خشت للصالون بعد ماظلماته كله وولعت الاضواء المخفيه..
قعمزت وحطت السماعات في وذانها وحطت ع اغنيه عاطفيه..
واتكت ع الكنبه وقعدت تسمع فيها ودموعها ينزلوا....
☘كانت حاسة بفراغ عاطفي رهيب..مخليها تحن لأيام فؤاد اللي معاش تعرف عنه شي...اللي دير فيه نسرين خيانه صريحه وواضحه..بس ليها دوافع كبيرة..واهمال الزوج لزوجته ديما يخلف عند المراة عقد نفسية كبيرة مش شرط تخليها تخون...بس تتعبها من داخل وتؤذي قلبها وروحها اكبر ايذاء☘
🌻🌻🌻🌻🌻🌻
تاني يوم..
وقفت ع المرايه وهي تشوف لروحها..
كالعاده مش راضيه عن نفسها ومش عاجبها اي شي فيها...
بس كلام غرفه كان يدور في عقلها ومخليها فرحانه شويه..
خدت نفس ومشت طلعت من الحوش بتقعمز في سيارة خوها لين يطلع..
طلعت وقعمزت فيها..نزلت المرش وقعدت تشبح جهة حوش الواعر..
شويه شافت عمر يفتح في باب القراج..
《 ابتسمي مشيها ع الابتسامات..وين تشوفيله ابتسمي بش يفهم انك حسيتي بيه واخيرا..》
خدت نفس وقعدت تساوي في وشاحها وتشبح جيهته
هو طلع سيارته..بعدين نزل يسكر باب القراج..
وولى تاني بيركب السيارة شبح لأميمه بنظرة عابرة..
هي طول ابتسمتله بشي من التردد.
عقد حواجبه وركب السيارة وقال:خيرها الهبله هادي!؟
واميمه بس تشوفله وهي مبتسمه..
ضحك نص ضحكه ساخره وتحرك بسيارته ومشي..
حكت اميمه جبهتها وقالت:كأنه ضحك..يعني كلام اميمه صح!؟
معقوله عمر معجب بيا اني!!؟..وحطت يدها ع خدها وهي مبتسمه بخجل واندهاش..
انفجعت لما سمعت خش يوسف السيارة..
يوسف:خيرك انخلعتي!؟
بلعت ريقها وقالت بإبتسامة مرتبكه:كنت سرحانه بس..
يوسف؛معاش تسرحي..
يدوب ضحكت..وهو شغل سيارته وتحرك..
وفي حوش عمهم..
كانت سدرة دور حوالين طوبى وتشوف في بدلتها الاعدايه بعدين قالت:لاواسعه..
طوبى:سدرة خيرك مش خدت الخياطه القياسات قدامك.!
سدرة:انتي تاكلي هلبه الفترة الاخيره مرات سمنتي وضياقت عليك..ساوي وشاحك ماتخليش شعرك يطلع راك من اليوم معاش بتحولي الحجاب..
طوبى بإبتسامه:ايه خلاص حتى اني نبي نتحجب..
سدرة:كويس..هي اركبي السيارة..
طوبى:خليني نمشي مع صحباتي اليوم..
سدرة؛تسيبي السيارة وتمشي ع رجليك!
طوبى؛خاطري مرة نمشي مع البنات ع رجليا..
سدرة بحزم:طوبى اركبي السيارة..
ماحاولتش طوبى تصر لأنها تعرف نبرة سدرة هادي في الكلام معاش في بعدها نقاش..
هزت راسها ومشت ركبت السيارة..
وسدرة مشت خشت لغرفه عطتها شويه تعليمات..
بعدين ولت للسيارة..
وركبت وطلعت بطوبى..
وهما طالعين بالسيارة..
لقوا المهدي في سيارته مع مرته وولاده في الخلف..
محمد شاف طوبى قعد يحيي فيها بيده وهي ترد عليه..
والمهدي كان يبي يشبح للسيارة ويشوف سدرة بس وجود عائشه منعه..
هي طول تحركت بالسيارة بسرعه..
المهدي بتلقائيه:خيرها اهيا!؟
عاائشه:من هي.!؟
المهدي:حد..وشغل سيارته وتحرك طول..
وعائشه ساكته ولاكلمه..
قعد يزيد في السرعه لين لحق ع سدرة..
هي شافاته من المرايه زادت سرعتها..
وغيرت طريقها..
وهو كمل طول للمدرسه وكان معصب ع الاخر..
حطت سدرة طوبى في مدرستها.
بعدين مشت للمدرسه الثانويه...
كانت تدعي ماتتلاقاش معاه..
وين جت خاشه للمدرسه..
هو جي طالع منها....
قعد يشبحلها وهي تجاهلاته تماما..
خشت بسيارتها..
لداخل درستها ونزلت..
ومشت فاتت من قدام عائشه اللي كانت تمشي هي وصغارها..ببطئ..وعائشه تشوفلها بغيرة وعيونها معبيات دموع...
🌻🌻🌻🌻🌻
حضرت محاضرتها ع الواقف لما مالقتش مكان..
وطلعت من القاعه وهي حاسه رجليها مش حاملينها..
مشت قعمزت ع واحد من الكراسي بش تريحهم..
وقعدت تمرر في عيونها ع المكان وتشوف في البنات..
اللي تشرب في مكياطه..واللي تاكل في شكولاته..
واللي تاكل في بريوش..واللي تفطر في حاجه حارة..
تسهفت وجي في خاطرها..
الفلوس وعندها بس كانت متحشمه تاكل قدام الناس..
شويه لفتت انتباهها البنيه اللي جاها عمر امس..
كانت مقعمزة مع صاحباتها وتاكل في شكولاته..
قعدت مركزة ع تفاصيلها هلبه..لبسها شكلها حركاتها..
قالت في نفسها..
"معقوله عمر يفوت هادي ويشبحلي اني!؟"
فجأة..
شافاته جاي للبنت نفسها..
قلبها بدي يدق بقوة..
ساوت تقعميزتها وقعدت تساوي في وشاحها..
وهو ولاشايفها اصلا..
قعمز جنب صاحبته..ومدلها كيسة فيها فطور..
هي سلمت عليه وطلعت الفطور حصتها وحصته وبدوا ياكلوا..
واميمه تشبحلهم..
ركزت عليها البنت وحستها مش طبيعيه..
داليا:حبيبي في بنت مقعمزة عادي تشبحلنا من بكري..
عمر شبح وين ماتشبح داليا..
شاف اميمه تشبحله وتبتسم في نفس الابتسامه متاع الصبح..
عمرشبح لداليا وقالت:فوتيها وحده فيها الطقه..
داليا:تعرفها!؟
عمر:بنت جيرانا وحده عبيطه وهبله من لما كانت صغيرة..
داليا:شكلها معجبه بيك..
انفجر عمر ضاحك..
داليا بضحكه:خيرك..راك تغص..
قعد يكح من الضحك..
عطاته شيشة الميه..
فتحها وشرب وهو يشوف لاميمه وهي تبتسم..
بعدين شبح لداليا وقال:هذا اللي كان ناقص..
ضحكت داليا وولت تاكل..
وعمر رجع ياكل..وشاف لاميمه لقاها مازال تشبحله وتبتسم..
ناض عمر وقال:نوضي حبي من هني نوضي..
داليا:درهتلي كبدي حتى اني..
وناضوا حطوا فطورهم في الكيسه..
وشدها من يدها ومشي هو وياها..
وهي تبع فيهم بعيونها..حست بشي غريب..ومعاش فهمت شي..
طلعت تليفونها واتصلت بغرفه..
اللي كانت تشرب في القهوة في الكوجينه وهي تسمع في الاغاني وتغني معاهم..
رن تليفونها..قامت وشافت المتصل..
ضحكت وناضت للراديو نقصت الصوت..
وردت عليها..
غرفه:صباحو ميمو..
"صباحو..أ..غرفة بنقولك شن صار معاي توا"
وقعدت تحكيلها وغرفه شادة ضحكتها وهي تقول:اممم..امممم.....
"مافهمتش اللي صار شن معناه"
غرفه:ياحبيبتي يااميمه بالشويه بالشويه مش طول هكي..خليك ماشيه زي ماانتي..وتو يجي الوقت المناسب اللي يصارحك بيه..
"غرفه...انتي متأكده ان...يعني عمر معجب بيا..!؟ انتي ماشفتيش البنت اللي معاه حلوة هلبه هلبه اني مانجي شي قدامها"
غرفه بعدت التليفون وضحكت بعدين قرباته وقالت:مش بالشكل..عمرها ماكانت بالشكل..عمر شافك من داخل ياميمو  وانت داخليتك بشهاده الجميع ملائكية"
"يعني تقولي هكي انتي"
غرفه:مش اني نقول هكي هذا الواقع..
"باهي صحيتي غرفه ريحتيني نخليك توا..سلام"
غرفه:سلام..وسكرت عليها وهي تقول..ياهبله ياغبيه يادرويشة ياعبيطه..يااكبر عبيطه..
ويقولوا..ياريتك زيها اميمه شاطره..اميمه اللي ديما تجيب فيها من الاوائل اميمه النابغه..
قعمزت وهي تقول..وهي اكبر غبيه خلقها ربي..
وخدت فنجانها وقعدت تشرب وهي تضحك..وتقول..عبيطه...

(مش مسامحه اي حد يقرا ومايتفاعلش حتى بلايك)

#قلوب_معلقه
#طوبى

...يتبع...