طوبى الجزء الاول

تابع

(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_السابع_والثلاثين"أقحوانه3"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
خشت ع اختها دار النوم قالتلها..
سدرة:خيرهم المكتبه والمدخل متاعك فاضيات؟
غرفه وهي تحاول دير روحها عاديه؛امس حولت الحاجات من المكتبه بش نلمعها..اما المدخل لتوا ماحطيناش فيه شي كان سبيدرو لرؤوف بس..
سدرة قعدت تشبحلها شويه بعدين قالت:غرفه قول الحق مستريحه معاه؟
ضحكت وقالت؛ايه ياسدرة مرتاحه..هو صح طبعه صعب شوي بس عادي نتأقلم معاه..
سدرة:مش واخده ع هكي انتي كيف بتتحملي.
غرفه شبحتلها بإبتسامه وقالت؛لازم نتعلم نتحمل ياسدرة لازم نتعلم هلبه حاجات..
تعجبت سدرة في حالها خلال اسبوعين وضح عليها التغيير..
عقدت حواجبها وقالت:تمام..بس في حال صار اي شي فوق طاقه تحملك حوش بوك قدامك تعالي طول وماتفكري في شي.
"مادوري شي"
شبحوله الزوز..
كان واقف في باب الدار وحاط ايديه ورا ظهره وهو يقول بإبتسامه:مادوري شي ولاتخافي من شي اختك معاي في امان..
هي اشرت ع غرفه بيدها وقالت تهكما؛ماهو واضح..!
عبد الرؤوف بمسايرة:يااختي اللي صارلها هدا قضاء وقدر مادخليش بيه مش عارف علاش ماتبيش تصدقي..
غرفه:صح ياسدرة الغلط مني..
هو شبح لغرفه وهي شبحتله..
وسدرة شبحتلها بعدين شبحتله هو وقالت:باهي باهي...المهم في الجديد انتي تردي بالك وهو يرد باله..
ضحك وقال:حاضر وخيتي حاضر..
ابتسمت غرفه..
سدرة:ايه حقه بنبات مع اختي يومين..
عبد الرؤوف:باتي حتى اسبوع مادوري شي..هي اني نازل لوطا تبوا اي حاجه كلميني غرفه..
غرفه:حاضر..
هو مشي وسدرة مشت وقفت في الباب وشافاته كيف طلع بعدين شبحت لأختها وقالت:شن عندك فالحوش بش ندير غدي..
غرفه:الكوجينه فيها كل شي وبالله ديري رز مسقي استاحشتك رزك موت..
ابتسمت سدرة وقالت:من عيوني..
ومشت طلعت من حداها للكوجينه..
وغرفه تنهدت وشبحت للروشن بان عليها منظر السمي الصافيه..
شويه جتها رساله...
فتحتها لقتها من ليبيانا رصيد 10..
هي قعدت تقرا في الرساله كويس بش تتأكد..
بعدين شافت خدمة الرصيد ولقاته موجود..
ضحكت وبعتتله رساله..
(شكرا)
واستنت هلبه يرد عليها لكن ماجاها منه شي...
☘فهالوقت..
درست سيارة اريج قدام حوش جدها..
نزلوا الزوز هي وخالتها..
وطوبى قاعده ترعش..
فتحت اريج الباب وقالتلها:خشي حبيبتي خشي..
خشت طوبى وبعدها اريج وسكرت الباب..
طوبى خشت داخل الحوش وهي تنادي:سدرة...سدرة..
اريج:شكله الحوش فاضي مافيه حد..
طوبى وهي ترشف:ايه حقه قالتلي بتمشي لغرفه..نمشولها!؟
اريج:تمام هي تعالي..
وخدتها من يدها من يدها ومشوا الزوز طلعوا من الحوش..
كان وقتها المهدي واقف قدام المطحن يتكلم بالتليفون..
وفجأة ركب سيارته بسرعه وطلع بيها يجري..
طوبى شافاته وقالت بنبرة باكيه:اكيد وصلهم خبر..
اريج:غير تعالي طوبى بطيحي في الشارع راك..
ومشت بيها لحوش خالتها..
وقف ع الباب ورنوا الجرس..
وطوبى تمسح في دموعها وترشف..
شويه وانفتح الباب..
اريج وطوبى وهما مرتبكات:السلام عليكم..
استغرب عبد الرؤوف في منظر طوبى وقال:وعليكم السلام..
خشوا..
وسع عن الباب..
وخشوا هما الزوز..
عبد الرؤوف:تفضلوا داخل غرفه وسدره في الشقه..
اريج:باهي..
رموا من رجليهم..
وخشوا للحوش..
هو وراهم قال: كملوا طول ولفوا يمين..
اريج؛باهي..
وخلاهم يكملوا برواحهم..
وقعد مرتاب من وضع طوبى..
☘☘☘☘☘
"تي وينه هدا خيره مايردش"
هادي نجاة تتصل بالجالي وتعاود لإن موعد الاجتماع قرب..
ولما ماردش عليها قلبها انشغل عليه وتوترت..
☘☘☘☘
"حيي بنتي"
سدرة وهي ضامه طوبى:من هو الحقير هدا الوسخ ..
طوبى وهي تبكي وترعش:واحد كان يناشب فيا ماعدلتش عليه وقعد يهدد فيا مادورتاش.
غرفه بقلق:مفروض حكيتي عليه..
سدرة:صح ياطوبى مفروض تكلمتي راهو درناله حد..
بعدت طوبى عن سدرة وقالت بنبرة باكيه:اني مافيا شي هاني عندك لكن الجالي..
غرفه وسدرة:الجالي!!
اريج:هو اللي حامى عليها وانضرب برصاصه في رجله..
غرفه حطت يدها ع خدها بصدمه..
وسدره خبطت صدرها وقالت:وصلت للرصاص هي!!؟
طوبى ودموعها زي السيل:نبي نعرف شن صار في الجالي بسببي اني مسكين جاته الرصاصه..
سدرة وهي مصدومه ضمت طوبى مرة تانيه:ربي يلطف بيه مسكين..
اريج:شفنا المهدي توا طالع يجري بالسيارة شكله سمع..
غرفه:ان شاء الله مايصير لرجله شي..
طوبى التفتت لغرفه وهي فحضن سدرة وقالت:علاش شن مرات يصيرلها يقطعوها قصدك لاياربي مايصير هكي يارب..
وشدت في اختها وقعدت تبكي..
وسدرة تفنص في غرفه..
وغرفه عقدت عقدت حواجبها بإنزعاج..
اريج:خالتي انتي شن حالك توا؟
هزت غرفه راسها وقالت:خير من امس..
☘☘☘☘☘
"قداش ليهم داخل"
نضال بقلق:نص ساعه لتوا..
المهدي وهو معصب:وين لقاها الرصاصه هو!قاعد يدخل روحه في المشاكل..ماشعفش من اللي صار معاه قبل!؟
نضال بتوتر:غير اهدا يامهدي حني مازال مش عارفين شن صار بالزبط..اللي اسعفوه قالوا كان يحامي ع بنت جايبن بيخطفوها..
المهدي غمض عيونه بشده والتفت للحيط وفتح عيونه بعدين قدم لين وصل وخبطه بقبضة يده من الغضب..
ونضال يشبحله وهو في قمة القلق..
☘القلق اللي كلي نجاة ماكله بعد ماتأجل الاجتماع لأن الجالي ماجاش..
قعدت تتصل وتعاود وهي قريب تنجن..
ونضال يشبح للمتصل اللي كان مسجله الجالي..
"احمد حميده"
نضال تأفف وقال؛نفخهم..وفصل الخط وسكر التليفون بكل..
☘هي لما فصل فجأة عاودت لقاته مفقل..
دموعها نزلوا وقالت؛لالا مش بلاش ياربي..ياربي مادير فيه شي كان صارت فيه حاجه نقتل روحي..
معاش قدرت تتحمل تقعد في الشركه..
خدت حاجاتها ومشت طلعت طول مروحه لشقتها..
☘☘☘☘
"اني من رايي نقول لعبد الرؤوف على اللي صار وهو يتصرف"
سدرة:ايه صح..اني متفكرة شكله زين البصرطادي!
طوبى هزت راسها وملامح الحزن مسيطره ع وجهها..
سدرة؛خلاص اتصلي بيه بيه غرفه وقوليله..
غرفه؛باهي..
اتصلت براجلها رن مرة وحده وفصل عليها..
هي نزلت التليفون وشبحتله..
سدرة:خيرك!
عاود هو ردت طول غرفه..
"ايوه"
غرفه؛ترا اركب نبيك شويه..
"تم"
وسكر عليها..
غرفه نزلت التليفون وقالت:اهو راكب..
طوبى:كان من يجيبلي خبر ع الراجل يطمني بس..
ومسحت وجهها بإيديها..
سدرة:معاش تاكلي روحك جاته في رجله تو يطلعوها وتمت القصه..
سمعوا باب الشقه انفتح..
"غرفه"
كانوا كلهم لابسات حجابهم...
غرفه:تعالى رؤوف..
شويه وجي وقف في الباب وقال:خيرك..
غرفه:في حاجه صارت مع طوبى تبي تحكيلك عليها..
عبد الرؤوف شبح لطوبى وقال:لاحظت..خير ان شاء الله ياطوبى شن صاير..
رشفت طوبى وبدت تحكيله في القصه من البدايه..
عبد الرؤوف وهو عاقد حواجبه :تعرفي اسمه..
طوبى:ايه البنت اللي كلمتني عليه قالتلي اسمه..
عبد الرؤوف:عطيني الاسم والمواصفات وين يقرا بالزبط..
طوبى:اسمه مؤيد الزياني..رقيق وطويل وشعرها كيرلي وهلبه ويقرا في قسم الرياضيات كلية التربيه..
حفظ عبد الرؤوف في عقله المعلومات وقال:اعتبريه موضوعه تم ووراقيه مختومه..
سدرة؛وراقي شني؟
اريج بضحكه:اجراءات الدفن..
ضحكوا عبد الرؤوف وغرفه..
اما طوبى انفجعت وقالت؛لالا موت لا بالله عليك لا اني نبيه يخليني في حالي بس.
عبدالرؤوف بضحكه:لالا مافيش موت بنقرصوله ودانه بس..
طوبى:باهي بالله عليك لو عندك رقم المهدي كلمه واسأله عن الجالي.
عبد الرؤوف:تمام مادوري شي..اهو وبس تتريحي بنكلمك قدامك ونفتح المايك..
اتصل عبد الرؤوف بالمهدي نادى مرتين بعدين رد...
عبد الرؤوف:هاه مهدي..
"ايوه عبدو"
عبد الرؤوف:شن الامور..
"والله شن بنقولك..متفركسه"
وسدرة تسمع وقلبها يستجيب..
عبد الرؤوف:ان شاء الله خير!
"خوي الجالي خاش في مشكله وجاته رصاصه في رجله"
عبد الرؤوف:لالا!! لاحول ولاقوة الا بالله..باهي شن حاله توا..
"لاالحمد لله طمنونا عليه طلعوا الرصاصه ووقفوا النزيف لكن يبي دم ماشيين نجيبوله اني ونضال"
اريج ركزت مع التليفون..
عبد الرؤوف:باهي المهم اطمنتوا عليه..مهدي ماتبي شي..
"بارك الله فيك"
عبد الرؤوف:مايحشمك شي مادور شي..
"كان احتجت حاجه نكلمك طول"
عبد الرؤوف:باهي حمد لله ع سلامته.
"الله يسلمك"
عبد الرؤوف:السلام عليكم..
"وعليكم السلام"
سكر عبد الرؤوف وشبح لطوبى وقال:هاه تريحتي؟
طوبى:بارك الله فيك..
عبد الرؤوف:باهي اني بنطلع ماتبوا شي من برا..
غرفه:ماتبوا شي يابنات؟
سدرة؛اني نبي نقولك بارك الله فيك..
ابتسم وقال:فيك بارك الله ياستي باهي الللي رضيتي علينا..
ضحكوا..
سدرة:لا راهو مش رضا تام مازال عليك مازال بكري..
فنصت غرفه وهي شاده ضحكتها..
عبد الرؤوف:مش مشكله نستنوا..هي السلام عليكم..
كلهم قالوا بأصوات متقطعه:وعليكم السلام..
ومشي..
سدرة شبحت لطوبى وقال:قاعده تاكلي في روحك..
طوبى:قالوا يبوله دم..
سدرة؛لالا واضح من صوت المهدي ان وضعه يطمن..
غرفه؛اني بس نبي نعرفه شن غادي؟.
سدرة؛وشن دخلنا بيه حني؟
اريج:اكيد عنده موضوع مز في كليتنا..
سدرة ضربتها ع رجلها وقالت؛تحشمي ياتافهه..
اريج قعدت تتحسس في رجلها وهي تضحك..
فجأة رن تليفونها..
قاماته شافت المتصل لقاته آلاء .
اريج؛خل نمشي نروح بهديكا..
طوبى؛ردي بالك روجه..
اريج:تمام..هي سلام توا..
ومشت طلعت من حداهم..
سدرة؛واني خل نمشي نشوف غداي..
وطلعت من حداهم ..
غرفه شبحت لطوبى لقتها سرحانه:بيبو..
لارد..
غرفه:بييبو..
شبحتلها..
غرفه:خلاص انسي..
طوبى؛شن بننسى ياغرفه قربت رحت فيها اليوم لولا لطف ربي...ربي يبارك في عمره الشيخ اللي يجي في قناة الرساله..
قال لو الواحد التزم بلاإله إلا الله وحده لاشريك له له الملك وله الحمد بيده الخير وهو على كل شي قدير مية مرة صبح وليل..يولي محفوظ من كل شي..
غرفه:ونعم بالله..
طوبى:قسما بالله ياغرفه كنت حنريح فيه وماعرفتش الجالي منين طلعلي فجأة..
غرفه:كلا الجالي هدا راجل بمعنى الكلمه ومايخافش بكل..تذكري شن صار لماهجموا جماعة******* ع حوش السعدواي وماكانش الا نساوين بس في الحوش وقتها الوحيد اللي وقفلهم الجالي وضرب الراس متاعهم..
طوبى:وشن داروله بعدين مش طبوه وقعد عندهم شهر..
غرفه:صح بس طلع منها وكمل حياته ومأثر فيه شي قداش تعجبني شخصيته..
طوبى:تحشمي راك مراة متزوجه..
ضحكت غرفه وقالت:كان يسمعني رؤوف يفترشني..
ابتسمت غرفه وقالت؛واضح عليه يحبك جديات.
ابتسمت غرفه وهزت راسها بإيجاب..
☘☘☘☘☘
"قريب ننجن ياصابرين بنهبل"
"اهدي يانجاه ياوخيتي اهدي"
نجاه وهي تبكي:ماتقوليش اهدي نار والعه فيا ياصابرين قوليلي كيف ندير بش نعرف هو وين وشن صاير فيه!
"اسمعي عند رقم حد من سلافك"
نجاة:ايه المهدي..
"خلاص كلميه قوليله عندنا اجتماع والجالي ماجاش ومايردش ع تليفونه..عادي جدا جدا نجاة"
نجاة وقفت بكي وهي تقول:هكي تقولي؟
"ايه كلميه توا"
نجاة:باهي سكري..
وسكرت نجاه ودورت ع رقم المهدي بعدين اتصلت بيه..
نادى مرة..تنين...تلاته..
بعدين انفتح الخط
"السلام عليكم"
نجاة:خوي مهدي وعليكم السلام كيف الحال..
"الحمد لله كيف حالك انتي والصغار"
نجاة:الحمد لله..حكت رقبتها وقالت..خوي مهدي بنسألك ع الجالي عندنا اجتماع مهم في الشركه ويبي حضوره وهو ماجاش واتصلوا بيه مايردش يعني حني في الشركه انشغلنا الاجتماع مهم جدا استغربنا كيف ماحضراش وماردش ع هاتفه قلت يعني لو تعرف عنه شي..
"ايه الجالي صايرة معاه مشكله"
نجاة؛مشكله!
"خش عركه وانضرب برصاصه"
نجاة حطت يدها ع قلبها اللي حاساته في لحظه وقف..
"لكن وضعه توا كويس طلعوا من رجله الرصاصه وحصلناله دم خبري جماعة الخدمه غادي باللي صار"
نجاة وهي تحاول ترد طلعت معاها بالسيف كلمه؛باهي..
"هي السلام عليكم"
وسكر..
وخلاها مفجوعه ع راجلها وحاسه روحها بتطلع من خوفها عليه..
قعمزت ع الكنبه متاع الصالون وهي تشبح في الفراغ بصدمه..
ودموعها ينزلوا ورا بعض...
رن تليفونها..شافت المتصل..كانت صابرين..
ردت عليها وقالت بنبرة صوت مخنوقه؛تعاليلي ياصابرين...
☘☘☘☘☘
قدام حوش سدرة .
الدور الاول اللي فيه المعمل..
كانت مدرسه كنتر..
وفردوس وصفيه ومطيره يطلعولها في القصاع.
وفي شباب ياخدوا منهم ويحطوا فيها من الخلف..
بعد ماكملوا..
الشاب مدلهم اتعابهم وقال:يعطيكم الصحه..
خدت منه مطيره الفلوس وكلهم قالوا:الله يسلمك..
بعدين مشوا خشوا داخل..
وفي الدور التاني..
كانت صفاء واقفه في روشن دارها تشوف جهة حوش اياد السيارة مهناش..وهما مش باين منهم حد..
ودموع الحزن ينزلوا من عيونها وحده ورا التانيه..
خشت وسكرت الروشن وهي تبكي..
وفي الدور الأول..
مطيره:وهادي حصتك ياصفيه..
خدت صفيه الفلوس وتنهدت..
فردوس:خيرك خالتي قاعده تخممي.!
صفيه بألم؛مش عارفه علاش ولادي حظهم هكي..واحد لخبط حياته وضيعها بإيده والتاني معلق روحه بوهم..
مطيرة:ماتقوليش هكي ياصفيه..ماتعرفيش الخيره وين..
صفيه ودموعها نزلوا؛قبل نبي نفرح بيهم ونديرلهم اعراس كبيره زي اللي اندارت لأولاد الشارع قبلهم..قبل نبي نشوفهم مرتاحين ومتهنيين..
فردوس:ماتندريش ياخالتي مرات ربي يعوض حسين ببنيه تنسيه اختي ومايجي منها ويعيش متهني ويوسف نحس مرتاح مدامه واخد المراة اللي يبيها..
صفيه:والله ماهو مرتاح ولاشايفها الراحه اللي يعشم بنات الناس ويرخي بيهم..
سكتوا الزوز معاش عرفوا شن يردوا كلامها صح..
غمضت عيونها بعدين فتحتهم وقالت:خلاص توا اللي صار صار الله غالب..
مطيرة:باهي خلاص ياسرك معاش تكدري روحك..وبري روحي شوفي غدي عويلتك..
هزت راسها وقالت:بالسلامه توا..
الزوز قالوا:بالسلامه..
مطيرة؛هي خل نضموا الحوسه ونسيقوا بعدين نتسقدوا لحوش اختك..
وبدوا الزوز يضموا في المعمل ويسيقوا فيه ..
وماطلعوش منه لين خلوه نظيف تماما..
بعدين سكروه ومشوا لحوش غرفه..
☘☘☘☘☘
الساعه 5:30عصرا..
واقفه ع المرايه تساوي في وشاحها وتسمع فيه شن يقوللها..
حامد:بتعطي الفلوس وكل شي ترفعيه معاك بإسمي وتتكلمي عني كويس..
نسرين وهي تشوفله من المرايه:مش اول مرة نحضر عنك حفلة خيريه..
ناض وقف وقعد يمرر في نظرها عليها وقال؛طلتك حلوة..
نسرين التفتت وقالت بإبتسامه متهكمه؛شكرا..
بعدين خدت الشنطه وكيسة هدايا كبير وقالت؛سلام..
ومشت طلعت من حداه..
هو تنهد بعدين طلع وراها متوجه لشقة امه...
☘☘☘☘
كانت نسرين ماشيه تحضر حفله خيريه دايرها راجلها في دار المسنين..
وهادي كانت من ضمن هلبه نشاطات خيريه يدير فيها حامد كلها الغرض منها تلميع صورته وتزيين مظهره قدام الناس..
وكان ديما يحب يستعرض بنسرين بنت شنيبه التاجر الكبير والمعروف..
ونسرين كانت تحب الاجواء هادي لين تعرف فيها ع هلبه ناس وتكسب في هلبه صداقات..
وصلت للدار..
درست سيارتها ونزلت بالكيسه بعدين كلمت واحد من الموظفين ينزل الهدايا من السيارة..
خشت بهداياها للدار ولقت المسؤولين فيها قدامها استقبلوها استقبال حلو..
ودخلوها للمكان اللي فيه النزلاء..
كانوا كلهم موجودين في صاله كبيره..
جزء فيها للعجائز..وجزء للشيابين...
هي مررت نظرها عليهم وكانت حاسه بوجع في قلبها عليهم..
☘وفعلا يوجعوا القلب يقطعوه تقطيع..
تخيلوا تجيبوا وتربوا وتتعبوا وتكبروا واخر المطاف تلقوا رواحكم فهالمكان... ويكون هدا مقابل كل اللي درتوه!!؟
شي يدمي القلب☘
مشتلهم نسرين وسلمت عليهم نفر نفر وهي تسأل عن احوالهم بأسلوب حلو ومضحك رسمت بيه ع وجوهم البسمه..
وين وصلت في صف العجائز..
لما مررت نظرها عليهم ثبتوا عيونها ع مراة مقعمز تشبح للفراغ وهي سرحانه..
نظرات نسرين المصدومه لاحظتها وحده من الموظفات وقالت:عندها الزهايمر..
شبحت نسرين للموظفه بصدمه بعدين رجعت شافت للعجوز ودموعها رغما عنها نزلوا...
☘☘☘☘☘
"وووك عليا يانهاري ووك"
محمد شنيبه؛يامراة استهدي بالله قلنالك حاله باهي..
مغليه وهي تبكي:هالولد مامتلقي ياكبدي مامتلقي ياناري ع وليدي ياناري عليه..
المهدي:تعوذي من الشيطان يام ..انتي مراة مؤمنه مايجيش اللي ديري فيه هدا!؟ بعدين الجالي حاله باهي ووضعه مايخوفش..
مغليه؛باهي ارفعوني نشوفه..
المهدي:القسم اللي هو فيه كله رجال شن بديري غادي..
مغليه؛باهي نكلمه نرتاح..
المهدي:حاضر اني مكلم نضال قتله اول مايصحصح ويولي حاله بيها يكلمني..
محمد: خلاص خشي جيبي الغدي..
مغليه بإنفعال:وانت هدا اللي هامك بطنك بس ماتقولش ولدي مضروب برصاصه وملوح في المصحه.!
محمد وهو معصب قال:غير ولدك موجود بس..
ومشي بيطلع من الحوش..
المهدي:يام غلط كلامك راهو الراجل رقي عليه الضغط لما سمع..
مغليه وهي تبكي؛واني في حالتي هادي مايلومني حد ع اللي نديره..
تنهد وقال؛باهي اني راكب..
شداته وقالت؛انت تقعد حداي هني لين يتصل خوك..
المهدي:ياودي مازال يام نركب نتغدا وننزل طول..
مغليه:اني قلت اقعد وتو نحطلك غدي..
بانت ع وجهه ملامح الامتعاض..
وهي قالت:خش قدامي قعمز شويه وجايه بالغدي..
هز المهدي راسه بإستسلام ومشي خش الصاله..
وهي مشت للكوجينه وتردد؛ياحليلي وليدي ياحليلي..مامتلقي ياجالي .
☘☘☘☘
وفي الحوش اللي يجاور الحوش اللي مجاورهم...
كانوا سدرة ونبيله ومطيره وغرفه مقعمزين في دار النوم..
هي ع السرير وهما فرشوا لوطا ودايرين في نصهم سفرة فيها قهوة وحلو..
هالتقعميزة ماحضروهاش فردوس وبناتها لأنهم روحوا بعد الغدي..
وطوبى كذلك اللي كانت راقده في الحوش من التعب والرعشه اللي حصلتها..
وكان في حديث يدور ع الماضي بين المجتمعات...
مطيره:وهادي قصتي كلها...
نبيله:مرت عليا قصة تشبهها بس المراة في الاخير تنازلت وولت لراجلها..
مطيره:حني التنازل مش في قاموسنا بكل..
ضحكت نبيله وقالت:انتم قويات..بجد..زي سدرة  اللي تحملت مسؤولية عيله..زي فردوس اللي تحاول توقف ع رجليها وتكتفي بذاتها هي وبناتها الطالبات العاملات...زيك انتي مطيره اللي برغم كل اللي عشتيه قاعده تدعمي في غيرك..بجد نفرح وين نشوف نساوين زيكم..
سدرة؛بس مافيش وحده فينا بقوة فايزة صاحبتي اللي مر ع فايزة مامر ع حد في وسط عاصفه قعدت تابته وصامده حاطه بناتها تحت جناحها وقاعده تخدم عليهم بش ماتخليهم محتاجين لحد..تخلوا عنها الخوت وامها سيبتها عادوها اهل راجلها وطعنوا في شرفها ومع هدا كله قاعده تقاوم وتجاهد ومافيش ع لسانها كان جمله وحده..
"حسبي الله ونعم الوكيل"
وربي ماخلاهاش سخرلها الناس الطيبه اللي وقفت معاها وجابلها حقها لعندها..
نبيله؛جديات مراة زي هادي هي اللي ينقال عليها بألف راجل تستحق كل احترام وتقدير..
مطيره؛ايه والله هالشراده سبحانك ياربي كيف كانت وهي صغيره دلوعه ماينعبا عليها في حاجه وكيف تغيرت بعدين..
سدرة:الوقت يغير ياعمتي..
مطيره هزت راسها وقالت:صدقتي الوقت يغير..
وقعدوا يرشفوا من القهوة بعدين شبحت نبيله لغرفه وقالت:هدرزي..
هما شبحولها..
غرفه بإبتسامه:عجبتني هدرزتكم نبي نسمعكم بس..
ابتسمت نبيله..
سدرة؛نعليلك المكيف..
غرفه:لالا هكي كويس..
سدرة شبحت لنبيله وقالت؛عندكم مولد؟
نبيله:ايه..
وهي قالت كلمتها من هني والضي هرب من هني..
مطيره:واااك ياسدرة..
سدرة:شن قالولك يراجو فيا نتكلم!
فجأة ولع الضي..
نبيله بضحكه:المولد يولع طول...
سدرة؛احسن حاجه..
☘☘☘☘☘
فهالوقت..
خشت سيارة فايزة لشارع القهوة من جهة..
وخشت سيارة نسرين من الجهة..
وكل وحده فيهم كانت ليها وجهتها..
فايزة لحوشها..
ونسرين لحوش اهلها بعد ماسمعت باللي صار لخوها الجالي..
وصلوا لمقصدهم..
كل وحده فيهم درست ونزلوا الزوز في وقت واحد..
شبحوا لبعض صدفه..
كانت نظرات نسرين لفايزة نظرات شعور الألم غالب عليهم..
اما فايزة هربت بعيونها عنها ومشت لحوشها ..
هي تنهدت ومشت لحوش بوها..
وكل وحده فيهم فتحت الباب وخشوا في وقت واحد..
وسكروا الباب في وقت واحد..
☘☘☘☘
في صالة حوش شنيبه..
نسرين؛ولدك هدا يدير في حاجات مش عارفه كيف نوصفها هو شن دخلها بيها البنت هادي بش يحامي عليها!
خديجه؛يحساب روحه ابوزيد الهلالي يوم تاني لاقدر الله تجي الرصاصه في راسه..
مغليه؛بعيد وبر ع وليدي بعيد وبر ياكبدي..هو خوكم هكي من يومه صاحب نخوه زايده ..
نسرين؛هبعت بيه هالنخوه..
امها واختها شبحولها وعيونهم تعبوا دموع وهما ساكتات..
وهي ماكانتش تشبحلهم كانت معصبه هلبه من خوفها عليه..
ع خشة عائشه..
عائشه:السلام عليكم..
مغليه؛علاش جايه توا ياحنه راجيتي لين يطلع من المصحه وخلاص!
عائشه؛والله المهدي هدا وين قالي..
خديجه:ماهو كانك تجي هني وتونسي عزوزتك اللي قاعده بروحها راك عرفتي حتى قبلي اني..
عائشه:روحت تعبانه ياخديجه يدوب حطيت الغدي ورقدت...
نسرين:خلاص ماصار شي في النهايه وقت اللي سمعت جت طول..تعالي عويشه..
عائشه وهي مضايقه مشت قعمزت جنب نسرين..
بعدين قالت؛شن صار فيه؟
نسرين؛قالوا وضعه كويس حتى كلم امي في التليفون..
عائشه؛باهي الحمد لله ع سلامته..
فجأة خشت عليهم جوري بنت طاهر تجري ومشت طول لمغليه..
حضنتها مغليه وقالت؛جيتو..
خشت بعدها نجاه..
ركزت عليها خديجه عيونها حمر منفخات..
نجاه؛خير ياعمتي لاباس ع الجالي..
وجتها طبست عليها وباست راسها..
مغليه؛لايوريك باس يابنتي منين سمعتي..
نجاة:المهدي خبرني..
عائشه وحمواتها فتحوا عيونهم فيها..
قعمزت نجاه وولدها في يدها جنب مغليه وقالت:شن صار فيه؟
مغليه:والله يابنيتي قالوا شاف بنيه حاولوا يخطفوها نقدها منهم وحامى عليه ضربوه برصاصه في رجله..
نجاه في داخلها" ع خاطر بنت!":لاحول ولاقوة الابالله لطف بيه ربي..
خديجه؛كيف نايضه من النوم شكلك عيونك منفخات..
نجاة شبحتلها شويه بنظرة فاهمه عليك..بعدين هزت راسهت وقالت:من لما روحت من الخدمه حتى الصغار روحت بيهم اختي من المدرسه والروضه وقعدوا عندها..
خديجه؛اها...
وعائشه تشوف لنجاه وعقلها بدي ينخر فيه الوسواس...
~~~~~~~~
"هي اتصلت"
عائشه وهي حاطه يدها في نصها وتهز في رجلها:وعلاش متصله بيك..
المهدي مرر نظره عليها من فوق لتحت وقال؛معجبه بيا..
عائشه؛مهدي ماطلعنيش عن طوري..
جاها وجبد قصتها وقال؛ماتعيطيش عليا..
فردها ع جبهتها وقال:انتي تعرفيني كويس كان نبي حاجه نديرها وفي العلن ومافي حد يقدر يسألني انت شن دير..
عائشه؛يعني نرتاح.!؟
المهدي:وحطي في بطنك بطيخة صيفي..
ومشي للحمام..
هي غمضت عيونها وقالت:اعوذ بالله من الشيطان الرجيم..
بعدين فتحتهم وهي تتألم وحطت يدها ع بطنها وقالت..لاالباين انهم اعصاب معده ياعيشه..
ومشت طلعت من الدار للكوجينه بش تغلي حاجه تشربها..
☘☘☘☘☘
"هما بيعطونا عطله قبل الامتحانات ولا خلاص نمشوله في العطله وناخدوا عنده"
؛خلاص معناها نتفق اني وياه!؟
محمد:توكل ع الله..
:تمام مالا..اوينا..
محمد؛في امان الله..
مشي صاحبه وهو خش للقهوة بيعطي قائمه طلبات الزباين للعاملين..
نضال؛حمادي نعبى عليك تكمل عليا بنمشي للجالي نبات معاه..
محمد؛بري وانت متريح..
نضال؛نوارة ياغالي..
ومشي طلع من القهوة...
وهو ماشي لسيارته قال:اياه قريب نسيت الشيك..
ومشي خش للحوش توجه للقراج..
خشله ومشي لسيارة الجالي..
فتحها وركب..فتح الدرج متاعها بيطلع دفتر الشيكات..
شاف علبة مجوهرات..خداها وفتحها لقي فيها حديده ذهب ابيض كان شكلها حلو بالمرة..
استغرب هلبه..بعدين سكرها وردها لمكانها وطلع الدفتر وسكر الدرج..
ونزل من السيارة...
☘☘☘☘☘
في جناح نجاة..
نجاة:باهي انت علاش دير هكي..راك مش بروحك يالجالي اني في رقبتك..
"حبيبي اني في حالات زي هادي مانقدرش نتحكم في روحي وانتي تعرفيني"
نجاه بنبرة باكيه:باهي كان صارت فيك حاجه شن ندير..
"ماصار فيا شي ياودي..نجاة فكينا من البكي ماتوجعيش قلبي..
نجاة ببكي:معاش تتهور مرة تانيه بالله عليك راهو اني مانقدرش نتنفس من غيرك..
"تي باهي يادارما كوين خلاص بنرد بالي من تصرفاتي ع خاطرك ياستي شن تبي اكثر من هكي"
نجاه بضحكه من وسط دموعها؛بارد..
"يحبك البارد"
نجاة؛واني نموت فيه...
☘☘☘☘☘
الساعه 1:30ليلا..
كانت طوبى في الدار..
مفرشه صلايتها وتصلي في القيام..
وفي كل سجده كانت تحمد في اللي نجاها ولطف بالجالي..
بعد ماكملت صلاة..
رفعت عيونها وقالت؛اللهم لك الحمد انت الهمتني نحافظ ع هالذكر بش تحميني بيه...نعاهدك ياربي اني مش حنخليه من
اليوم...وقعدت تردد فيه من جديد..
لاإله إلا الله..وحده لاشريك له..له الملك وله الحمد بيده الخير وهو على كل شيء قدير...
☘☘☘☘
وفي حوش اختها..
كانت سدرة واقفه في الكوجينه..
حاطه يدها قرب فمها وتقرا..
¤إهدنا الصراط المستقيم○صراط الذين انعمت عليهم○غير المغضوب عليهم○ولاالضالين¤
نفثث فيها..بعدين مسحت ع رقبتها..
بعدها التفتت لشيشة الميه قرت عليها سورة الفاتحه كذلك فوق السبع مرات ونفثث فيها..
صبت منها في طاسه..وقعمزت ع الكرسي وشربتها..
بعدين ناضت ومشت لدار غرفه بيهم..
خشت عليها لقتها لاهيه بتليفونها..
سدرة :غرفه..
غرفه شبحتلها:امم..
صبت سدرة ميه في طاسه ومدتها لغرفه وقالت:هاك اشربي مية مرقيه..
خدت غرفه الطاسه وشربتها كلها..
خدتها منها سدرة وحطتها هي والشيشه ع الكامدينو..
بعدين تمددت ع فراشها..
فتحت شاشه قفل تليفونها اللي لازالت خلفيته صورة صدام حسين برغم انها دارت اكثر من هاتف...
دارت المنبه ع صلاة الفجر..
بعدين حطاته جنبها وتغطت ورقدت..
وغرفه جتبها خاشه ع حساب راجلها تشوف في جديده وعبتله الصفحه كلها لايكات..
وهو لوطا راقد مايندري ع حاجه...
☘فالوقت اللي كان فيه المهدي فايق..
وجنبه عائشه غارقه بالنوم..
هو كان شاد تليفونه وخاش يفتش حساب سدرة اللي واخيرا لقاه..
ضحك لما لقاها مسميه روحها باللغه الانجليزيه..
الماجده ياسمينه..
عرفها من حبها للياسمين وصدام حسين. اللي كانت دايراته صورة غلاف مكتوب عليها البيت المشهور بيه..
(طالما رقصت ع جثث الاسود كلاب)
اما صورة البروفايل كان زهرة الياسمين..
قعد يشوف في مناشيرها اغلبها دينيه وفي منها عن نشاط المدرسه متاعه..
وكان عندها فيها هلبه متابعين..
خش ع واحد من منشوراته لقي واحد..
سعيد الزروق معلق..
"ادارة متميزة مديرة متألقه"
المهدي ولع في مرة...
خش لحساب الراجل ماخلا مقاله..
وهدده لو علقلها مرة تانيه يقتله.
وسكر الفيس بكل وحط التليفون ع الكامدينو..
وعطي عائشه بالظهر وربع ايديه وغمض عيونه وهو في قمة الغضب..
☘☘☘☘
تاني يوم..
الصبح..
في حوش لطفي الواعر..
سدرة وهي نلبس في شنطتها:قالوا جاي من الصبح داير نشفه..
طوبى:ان شاء الله خير..
سدرة طلعت وهي تقول:ان شاء الله..مش تغيرك رايك وتمشي للجامعه عبد الرؤوف قال ماتتحركيش من الحوش لين يشدوه..
طوبى بضيق:حاضر..
ع جية بوها من داره؛ماتقدرش تغيب عن مسؤوليتها بكل..
طوبى؛حتى كان هربت من وحده تمشي للتانيه.
ابتسم لطفي وهز راسه بإيجاب بعدين قال؛مش ماشيه اليوم..
طوبى:لاماعنديش محاضرات مهمه..
لطفي:باهي باهي..لبس كندرته وقال:ماتبي شي..
طوبى:سلامتك بابا بس شن تبي الغدي؟
لطفي:خاطري في كسكسي بالخضرة من ايديك..
طوبى بإبتسامه؛من عيوني..
ابتسم لطفي ومشي ركب سيارته وطلع من الحوش..
وطوبى تنهدت وخشت داخل..
☘☘☘☘
سدرة وهي تضحك بتعجب؛واني شن علاقتي مافهمتش!.
ولي الامر:تفضلي شوفي الرساله اللي جتني..
هي قالت:ترا..
وشافتها..
(تعرف ياديوث ياقليل النخوه مازال تعلقلها ولاتجي جيهة حسابها...نقتلك)
هي شافت بروفايل صاحب الرساله..
لقت اسمه بالانجليزي...المهدي شنيبه..
غمضت عيونها بنفاد صبر..
:من يكون هدا..
فتحت عيونها وشبحله بحده وقالت:هدا واحد زيك انت بالزبط..
خدي منها التليفون وقال:احترمي نفسك ياابله خيرلك..
سدرة؛علاش شن بديرلي ع فلوسك نعطيهملك كاملات مش حاجه كبيره راهو.
:حنشكي فيك للوزاره..
سدرة:برا الطريق قدامك..
الراجل هز راسه ومشي طلع..
سدرة وهي معصبه:المهدي هدا رسمي فيوزاته انضربوا..
☘☘☘☘☘
وفي المدرسه اللي تقري فيها مرت المهدي..
جتها صاحبتها زيارة وقعدوا بيهدرزوا في موضوع مهم..
نسرين:لما خشت عليهم وشفتهم ماركزتشش انهم فيهم حد نعرفه لين جبت عند العزايز قولي من شفت...
عائشه:ياستبر مني؟
نسرين يألم:خالتي مشتده..
"ام فايزة"

#اقحوانه3
#طوبى

....يتبع...