طوبى الجزء الاول

الجزء السابع والثلاثين

مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_السابع_والثلاثين"أقحوانه1"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
فهاللحظه...
فتح اياد الباب وطلع وكان يبي يداهم صاحبة الرسائل..
اللي لما عرفها جاته صدمه مابعدها صدمه..
وهي قعدت تشوفله بنظرات فجعه وجسمها جمد تماما...
نظراته ليها كانت نظرات صدمه قويه..
مش مستوعب اللي يشوف فيه..مش قادر يصدق عيونه..
هي نزلوا دموعها وطول هربت تجري لحوشهم..
وهو يتبع فيها بنظره لين شافها خشت لحوشهم..
قعد واقف في مكانه يحاول يصدق اللي شافه..
صدمته مخلياته يحس بشعور بشع لايوصف...
غير عيونه وشبح للورشه وشاف ليوسا لقاه يشبحله..
مشاله ووقف عليه وقال:ماشفتش شي يوسا تمام؟
هز راسه وقال:تمام دكتور..
هو لف ومشي للسيارة وكانت خطوات رجليه ثقيله بعض الشي..
فتح الباب وطلع الظرف..بعدين سكره..
ومشي خش للحوش وسكر الباب..
☘اما هي بعد خشت للحوش..مشت تجري لدارها..
خشتلها وسكرتها عليها..
وحطت ايديها ع وجهها..
حست بخجل شديد..خجل نابع من شعور الخزي..
من داخلها كانت حاسه ان اللي دير فيه غلط..
بس مش مقتنعه وماتبيش تهتم لهالإحساس..
نزلت ايديها وهي تقول:حي عليا حي عليا..ياربي مايخبر حد..يارب مايقول لماما!..
☘☘☘☘☘☘
"ها شن رايك"
الجالي:كويس نبي نمط لبسك ديما يكون هكي..
نجاة بإبتسامه:تمام..ايه بنقولك راهو اليوم بناخد الصغار وبنمشوا لحوش العيله ليا اسبوع ماقابلتش بيهم وعمي يسأل ويلوم..
هو هز راسه بدون مايعلق..
نجاة:عاد مش تختفي بكل طل شويه شويه علينا..
ضحك وهز راسه بالموافقه بعدين رفع سبابته وقال:لكن هاه..بتردي بالك من تصرفاتك حركاتك نظراتك..ردي بالك حد يلاحظ حاجه فاهمه!؟
نجاة بضيق:باهي..
الجالي:خيرك قلبتي وجهك..
نجاة:تتكلم وكأنا دايرين عيب ولاحرام وكأنك مش راجلي واني مرتك غريبه عقليه ماليك وكأنك اول واحد يرد مرت...
وسكتت قبل لتكملها..
وهو قعد يشبحلها بحده ويقول:نجاة حني ع شن اتفقنا!؟
نجاة قعدت ساكته وهي مضايقه..
الجالي:كان تبي موضوعنا يمشي ونوصلوا للي نبوه خليك عاقله يانجاة وصبورة..اي تصرف غلط ديريه بيضيعنا اني وياك فاهمه..
نجاة:خلاص خلاص..اني نهدرز عادي وانت ماصدقت ولعت..
الجالي وهو منزعج:نوضي لمكتبك وماتقعديش تمشي واتجي هلبه حتى فالشركه ديري نفس النظام..
ناضت وقالت وهي معصبه:حاضر..
ومشت طلعت من حداه..
هو تنهد بضيق...بعدين رجع لهي بخدمته...
☘☘☘☘☘
في كلية اللغات..
كانت مقعمزه وسط صاحبتها بنات الطبقه المرفهه..
اللي كلامهم كله عن السفر والاكل في افخم المطاعم واللبس الماركات وكل شي عندهم اخر موضة...
كانت وهي مقعمزة معاهم تحس في روحها في عالم تاني..
عالم تتمنى تكون جزء منه مش متطفله عليه..
:ساعتك تجنن تجنن..
:تفضليها..
:ثانكس بيبي بس اني نبي نعرف من وين واخدتيها..
:طلبتها من برا واصله شحن هي والشنطه والشوز..
:ترا وريني من وين خديتيها..
وقعدت تشبحلهم كيف يشوفوا للتليفون ويحكوا بنظرات حسرة وغيره..
وحده منهم قالت:آلاء بيبي شن صار في اللي طلبته منك..
ابتسمت وقالت؛غدوة تجيك بيبي..
ركزوا التانيات وقالت وحده منهم؛ع شن تحكوا؟
:الاء مش خاشه كورس حلو طلبت منها ديرلي حاجه..
:تبيعي آلاء..
آلاء:لامازال لتوا لين نكمل الكورس..
:خلاص معناها لما تكملي بديرلنا كلنا ونشروا منك ونذوقوا مالينا..
آلاء بضحكه:لابيبي خلوها هدايا مني ليكم..
:تمام براحتك..بس توا لازم تنشطي حسابك ع الانستا بش تعرضي شغلك عليه..
آلاء:نفكر فيه..
"آلو مش كأن هداكا ولد عمك"
آلاء طول التفتت لقت وليد واقف ع واحد ويشوفلها..
غيرت عيونها عنه وشبحت لصاحباتها بضيق..
:نوضيله آلاء واضح يبي يكلمك..
آلاء؛واني مانبيش..
:جاي هني راهو..
آلاء:معاش تشبحلوه فوتوه..
وهو كان واصل فيهم قال:السلام عليكم..
البنات ردوا:وعليكم السلام..
هو شبحلها وقال؛السلام لله..
مابتش تعدل عليه..
وليد:نوضي  نبيك شويه.
ولاكأن في حد يكلم فيها..
وحده من البنات اشرت للباقي ينوضوا..
ناضوا كلهم ومشوا..
هو ابتسهم للبنات مجامله بعدين قعمز وقال:تصرفاتك هادي مالهاش مبرر عندي الشهور اللي فاتوا كلهم قعدت نراجي منك في رساله اتصال كل تهدا وتروق وترجع بروحها لكن الباين انك من جدك هالمرة..
الاء:اكيد من جدي مانلعبش..
وليد:لعبت بقلبي وفات ياآلاء بعد عام تقولي حني مش مناسبين لبعض!..اني مش شايف ان في وحده فالدنيا تناسبني غيرك..
آلاء بغرور:واني شايفه اني نستاهل خير منك..
كلامه موجع وهو قعد يشوفلها بنظرة غضب ممزوجه بالألم..
آلاء:لو سمحت وليد معاش تجيني ولاعاد تكلمني ارجوك قاعده نترجى فيك..
وليد:انتي في حد قايلك حاجه..
قعدت تشبحله ببرود وعيونها تعبوا دموع..
وليد:مش بلاش انتي اني متأكد.
آلاء بإنزعاج:إيييه علينا خلاص عاد دير لروحك كرامه معاش نبيك ياأخي مش بالسيف..
هو لمعوا عيونه بدمعه بينت حجم الوجع اللي تسببتله فيه من كلامها الجارح اللي وصل في كبريائه وكرامته..
ناض وقف وهو يقول:خليك متفكرة اليوم هو كويس..
ولبس نظاراته ومشي من حداها..
وهي بعد مشي دموع قعدوا ينزلوا وحده ورا التانيه..
جوها صاحباتها قعمزوا وقالوا..
"هاه شن صار"
مسحت دموعها وقالت:ولاشي خلاص انتهينا..
:خسارتكم كنتوا طالعين ع بعض هلبه..
آلاء:بالله عليكم غيروا الموضوع خلاص معاش نبي نحكي فيه...
☘☘☘☘☘
"بالله اعلقي المولد يافردوس"
فردوس:حاضر..
مشت فردوس للجهة اللي فيها مولد حوش اهلها..
بعد مانفدت كم خطوه..ولع..
مشت بسرعه للكوجينه وخدوا الحاجات اللي داروهم وحطوهم هي وعمتها في الفريز..
فردوس:بعيد هلبه حوش المناسبه..
مطيرة:قالي حسين تو نرفعكم..
تنهدت فردوس وقعدت ساكته..
وعمتها تحط في الحافظات الفريز..
شبحتلها شويه بعدين قالت:عمتي بنطلب منك طلب ومتحشمه..
مطيره:اللطف متحشمه تتحشمي من عمتك؟
فردوس بضيق:معليشي تسلفني حصتك اليوم..
مطيره:خوديها بكل..
فردوس:لالالا سلف عمتي بالله عليك..
تنهدت مطيرة وقالت:باهي ياستي سلف..
فردوس بإبتسامه:ربي مايحرمني منك..
ضحكت مطيره وقالت:يامختشه راكم بنياتي..
ابتسمت فردوس لعمتها وهي تفكر في الحاجه اللي تسلفت من عمتها ع خاطرها..
☘☘☘☘
واختها في حوشها حاصله في الغدي...
مكرونه شيعيريه بالخلطه وجنبها شربه ومايتبعه من المقليات..وكله طلبات عبد الرؤوف..
مش عارفه كيف تخش فيهم وتطلع لين انجبرت تتصل بطوبى..
"خليها الشعيريه في كسكاسها توا والهي بالبوريك والرول والشربه خليها اخر حاجه"
غرفه:باهي والمكسرات والزبيب نحطهم مع المكرونه..
"تي لايابنتي هادم يتحمسوا زي الكبده بالزبط بعد طيب المكرونه تحطيهم عليها"
غرفه:فهمت..
"اهم شي زي ماقتلت حببي المكرونه بالمرقه مرتين بس ردي بالك تعجن منك"
غرفه:تمام تمام.
"خلاص معاش في شي تاني بنخش المحاضرة..
غرفه:لالاخلاص تسلميلي بيبو سلام...
"سلام"
سكرت غرفه وحطت التليفون ع جهة بعدين بدت طبق في اللي قالت عليه اختها..
وقعدت ساعات في المطبخ لين كملت وهي منتهيه تماما..
قعمزت ع الكرسي وحطت راسها ع الطاوله بش تاخد نفس..
ع خشته هو للحوش...
كان يشم في الروايح..كانت حلوة..فكر ان نبيله دارتها وطيبت مكانها..
وصل في الكوجينه خشلها وانصدم..
لقاها تضرب تقلب منظرها لايحتمل..
شبحلها وخبط بيده الباب..
هي فزت مفجوعه..
عبد الرؤوف بغضب:خيرها الدنيا رايحه هكي..شن المنظر هدا..عمي ماخشيت كوجينة حوشنا ولقيتها هكي!.
غرفه بخوف:بنضمها اني بنضمها بس كنت نرتاح شويه بس..
خبط الباب تاني وقال:نوضي تحركي نوضي
هي ناضت طول وقعدت تقول بخوف:حاضر حاضر..
عبد الرؤوف:عليك هم..عليك بلوة بليت بيها روحي ندور فيك ع حاجه بيها مش لاقي كلك ع بعضك ماتسوي بارا...ومشي طلع من حداها ومازال يهزب فيها..
وهي ضم في اللكوجينه ودموعها ينزلوا.
وماكملت ضمان الا ونبيله خاشه للحوش بعد ماروحت من جلسه كان ترافع فيها..
مشت للكوجينه بعد ماشمت الروائح لقت غرفه توتي في الصواني بش بتحط الغدي..
نبيله بآبتسامه؛عطيك الصحه .
شبحتلها غرفه وابتسمت وهي تقول:الله يسلمك..
نبيله:راجيني نغير ونصلي ونجي نعاونك..
ومشت بسرعه..
غرفه بهمس:هدا كان خلاك...
وبدت تصب في الغدي وتحاول تنسق وهي تتفكر في تنسيق في طوبى..
شويه وجتها نبيله وبدت اطلع معاها في صواني الغدي لدار الاكل...
هو نزل من شقته ومشي خش عليهم..
عبد الرؤوف:روحتي..
شبحتله غرفه بخوف..
ونبيله بإبتسامه:تعالى تغدا من ايديات مرتك واضح عليها طباخه صح..
هو بإزدراء قال:مانبيش..
انصدمت غرفه..
ونبيله بإستغراب قالت؛كيف!..مش انت قلتلها دير هدا كله..
عبد الرؤوف:ايه بس تعرفيني عياف كان شفت كوجينه مش نظيفه مستحيل ناكل شي يندار فيها..
نبيله شبحت لغرفه..
وغرفه تشوفله وعيونها معبيات دموع..
عبد الرؤوف:طالع توا لحوش عمتي نادتني ع الغدي ومرات نعطل مادورونيش.
ومشي طلع من حداهم..
ونبيله حولت عيونها عن الباب بعدين مررت نظرها ع الغدي اللي دايراته غرفه..
ركز غرفه ع نظراتها وقالت:والله مش قصة نظافه ولاغيره هي كانت مش مرتبه بس والله عظيم هو هدا..ونزلوا دموعها.
شبحتلها نبيله وقالت:ماتبكيش حبيبتي ماتبكيش اني نعرفه هو هكي طبعه صعب شويه..امسحي دموعك وقعمزي تغدي..
مسحت غرفه دموعها وقعمزت..
ونبيله قعمزت بعدين ابتسمت وقالت:سفرة تسهف مش قادرة نصبر..
وبدت تاكل..
وغرفه وهي تشوفلها ابتسمت من بين دموعها وقعدت تاكل حتى هي..
☘☘☘☘☘
الساعه 5:30عصرا..
كانت صفاء حابسه روحها في الدار..
راقده ع سريرها...وحاضنه مخدتها ودموعها تنزل..
فجأة دق باب الدار..
مسحت دموعها وقالت:خشي ماما..
انفتح الباب وسمعت..
"اني مش ماما"
صفاء لما شافت طوبى ناضت قعمزت..
طوبى وهي مبتسمه:نخش؟
صفاء:خشي..
خشت طوبى وسكرت الباب بعدين قالت:عادي ناخد الكرسي؟
هزت صفاء راسها بالموافقه...
خدت طوبى الكرسي وجتها بيه وهي تقول:لاعاد جيتينا ولادورتينا قلنا حني ندوروك كان تحبنا شويه حني نحبوها هلبه..وقعمزت وهي تضحك..
يدوب ابتسمت صفاء وقعدت ساكته..
طوبى :ايه..شن جو القرايه..
تنهدت صفاء وقالت:زي قبل..
عقدت حواجبها وقالت:خيرك مبوزمه هكي..
شبحت صفاء لطوبى بضيق ودموعها ع حفة العين..
رخت طوبى حواجبها وقالت؛خيرك صفصف حبيبتي صايرة معاك مشكله..
صفاء:طوبى انتي ديما تسمعي في اسراري ولامرة طلعتيها لحد نبي نحكيلك بس ماتقولي لحد بكل بالذات اختك سدرة..
طوبى:عارفتيني مستحيل نحكي لحد..شن في صفاء احكي..
نزلوا دموع صفاء وبدت تحكيلها..
☘☘☘☘☘
وفي مركز التجميل متاع امها..
كانت مقعمزه تشوف في شغل العاملات ع الزباين..
وهي تسمع في هدرزة زوز زبونات شدتها بقوة..
:ياحنه يطلع يتعارك هو وخوه في الشارع ويجبد عليه سلاح ويضربه..
:اللطف ياربي علاش شن صار بيناتهم.
:قالوا الزوز خاشين شراكه واحد منهم واكل فلوس ع التاني..
:هادم عيلة المحجوب جيرانك اللي وراك ولا؟
:ايه هما هادم..
فايزة؛لوسمحتي.
وقفوا البنات شغل ع الزباين..وهما الزوز شبحولها..
فايزة؛عيلة المحجوب اللي تحكي عليهم ولادهم ايمن وجمال وخالد ولا؟
:ايه صح..
فايزة؛من اللي ضرب تاني؟
؛ايمن ضرب جمال..
فايزة قعدت ساكته وهي مصدومه..
:تعرفيهم؟
فايزة هزت راسها وقالت؛كانوا جيرانا..
:مش عارفه كيف كنتوا مجاورينهم عيلة اعوذ بالله منهم بأنهم ببناتهم بولادهم  ديما بمشاكلهم ومصايبهم..
فايزة؛علاش شن صاير فيهم تاني!
:وحده من بناتهم استغفر الله ياربي سامحني هربت مع واحد سوري..
انصدمت فايزة..
:وياما صار فيهم بعد عملتها هادي..المتزوجه التانيه اطلقت ولوحها راجلها بصغارها وقعدت شبه يوميا عراكات هي وخوتها ع خاطر الصغار..
فايزة وهي مصدومه:لاحول ولاقوة الا بالله..وفتحيه شن صارلها بعد هدا كله؟
:جتها جلطه قعدت في تركينه اقسم بالله حالها يوجع رغم انها ماكانتش دايرة خير..يحكوا عليها شن دارت في ارمله ولدها الكبير وبناويته سبحانه ربي رده كله تالت ومتلت..
فايزة هزت راسها وقالت:كملوا شغلكم..
وكملوا الزباين هدرزة بين بعض..
وخلوا فايزة عايشه وسط ذكريات مؤلمة وايام صعبه مرت عليها والويل اللي شافاته من الناس هادي اللي مفروض تحميها وتحمي بناتهم ويكونلهم عيله تانيه...
واهو يدور الزمان وتجيها اخبارهم لعندها وتسمع بوذانها كيف الله سبحانه وتعالى استجاب لدعاء...
"حسبي الله ونعم الوكيل"
☘☘☘☘☘
صفاء ببكي:مافي حد حيفهم اللي نحس بيه كلهم حيقولوا كلمتك هادي حبيتي واحد في عمر بوك..بس اني العمر مايهمنيش اني نحبه هو نبيه وبس ومادخليش بعمره ولاشكله..
طوبى وهي تحاول تحتويها:باهي وهو؟
صفاء:هو لو معاش يفكر في اختك اللي مش مهتمه بيه بكل تو يحس بيا ويحبني..
طوبى:باهي مافكرتيش ان الراجل هدا اللي حني نقولولك انه زي بوك مرات يشوف فيك زي بنته..
صفاء:بس اني مش بنته..
طوبى:باهي اهو اني يعامل فيا معامله حلوة وديما يقولي بنتي اني نحس لما نسمعه منه كأنه بوي فعلا..
صفاء:انتي عندك اب ياطوبى..
طوبى قعدت ساكته وهي تشبحلها..
صفاء:طوبى اني متأكده انه بعد ماعرف خلاص يبدا يفكر فيا  بجديات ويفهم عليا ويعرف ان مافيش وحده حتحبه زيي..
طوبى تنهدت وقالت:باهي وبعدين..
صفاء:خلي بعدين لبعدين..
طوبى:نقولك حاجه توا انتي خلاص انكشفتي قدامه وتوا شوفي ردة فعله منها حتفهمي كويس اياد شن يكون..
صفاء:مازال مصرة انه زي بوي..اياد مش بوي اني بوي هو..خدت صورة بوها من ع الكامدينو وورتها لطوبى وقالت..احمد المحجوب اللي مات من 9سنين...اياد مش بوي ياطوبى..
طوبى قعدت تشبحلها بقلق وهي ساكته..
~~~~~~~~
طوبى بحزن:البنت تبي دكتور نفسي ياسدرة..
سدرة بضيق:لاحول ولاقوة الا بالله..منين بتلقاها امها لتلقاها مسكينه ماصدقنا وضعها تعدل واستقرت..
طوبى:ماهو حتى هي ساهمت كانت تقدر دير حل في حكايه الخدمه هادي وتخصص وقت لبناتها..
سدرة:الكلام ساهل ياطوبى..راهو المراة لتوا قاعده تخلص في ديون..تجري ليهم نهار بش توفيهم وترتاح..
طوبى:لاحول ولاقوة الابالله...اني توا عقلي في الدكتور اللي عرف كل شي كيف بيتصرف تخافي يقولها لفايزة طول فوق انه حيصدمها حيحرجها هلبه..
سدرة:كلامك صح..اني بعدين تو نوقف في المطحن حسين مش حيكون فيه ونراجي لين نشوفه ونكلمه وخلاص..
طوبى:شن رايك اني نكلمه يكون احسن..
سدرة قعدت ساكته وهي تفكر بعدين قالت:تمام معناها نرفعك للمصحه اللي يخدم فيها خير..
هزت طوبى راسها وهي تقول:يكون احسن يكون احسن..
☘☘☘☘
نزل من الدروج كان ناوي يطلع..
وهو نازل سمع دوشه طفل رضيع عرف ان نجاة وصغارها جو..
خدي نفس..ومشي وقف فم الصاله وقال..
"يام"
نجاة قلبها بدي يدق بقوة شبحت طول للباب..
مغليه:حطي وشاحك ع راسك بنتي..
استاقظت نجاة وقالت؛نسيت..ولبست وشاحها وهي تضحك بربكه..
مغليه:خش ولدي خش..
خش الجالي وهو يقول:السلام عليكم..
ردت نجاه:وعليكم السلام..
الجالي:كيف الحال..
نجاة؛الحمد لله كيف حالك انت..
الجالي:الحمد لله..وين حمزة وجوري؟
مغليه:جوري تلعب مع سدرة وحمزة طلعه نضال معاه..تبي تشوف معاذ..
الجالي:ياريت..
ناضت مغليه وجت لنجاة وخدت منها معاذ ومشت بيه لعمه..
نجاة عيونها ع الجالي وهو يشبح لولد خوه..وصل فيه خداه من امه وهو يسمي بالله..
بعدين طبس عليه وباسه من خده وهو يقول:الله يبارك..
مغليه بإبتسامه:ايه يكبر فيسع ماشاء الله في الاربعه شهور توا..
نجاة:بيخش الخمسه ياعمتي بعد اسبوع..
الجالي:بطول عمره..مده لأمه وقال...طالع يام ماتبو شي..
مغليه خدت الولد وقالت:سلامتك..
هو مشي بيطلع ويقول:السلام عليكم..
ردوا عليه الزوز:وعليكم السلام..
ونجاة تفكر زعما وين ماشي..
وماارتاحتش لين بعتتله رساله تسأل فيه..
(وين يامهون)
رد عليها يقول..
(لمرتي التانيه)
ردت عليه..
(نذبحك ونذبحها بعدين)
بعتلها ضحكه وكلام
(داير عزومه لجماعتي يامجرمه)
ردت عليه تقول..
(رد بالك ع روحك..نحبك)
رد عليها..
(وأني اكثر)
☘☘☘☘☘☘
بعد المغرب..
في حوش عبد الرؤوف..
كانوا نبيله وغرفه مقعمزات ع الصالون يتفرجوا ع مسلسل..
ويروح عبد الرؤوف فهالوقت ويخش عليهم..
شافها منسجمه تتفرج وجوها مليح:السلام عليكم ..
شبحوله الزوز وردوا السلام..
بعدين طول غرفه هربت بعيونه..
هو اتكى ع كرسي وقال؛تسلم عليك عمتي..
نبيله؛سلمها وسلم من جاب سلامها..
عبد الرؤوف:قامتها بيا مانحكيلك هي وبناتها حط هادي ارفع هادي...
نبيله:تعرفها قداش تحبك..
عبدالرؤوف ابتسم وقال:ايه..الحق تحشمت منها وعزمتها تجي هني تقعد يومين تلاته..
فنصت فيه وقالت:كيف دير حاجه زي هادي من غير ماتشاورني اني مش فاضيه بكل وانت تعرف عمتي وبناتها كان جو يبوا من يخدمهم ليل نهار..
عبد الرؤوف:تي هدي وروق ياجميل..ناسيه انك دايرة كنه.
شبحت نبيله لغرفه اللي كانوا عيونها الغارقات بالدموع في التلفزيون ووجهها في لون تاني..
عبد الرؤوف:هي جايه تشوف المراة اللي خدتيها شن وضعها تبي تطمن ع ولد خوها..
نبيله شبحتله وقالت:مرة تانيه رجاءا مبروك معاش تتصرف من راسك..
ضحك نص ضحكه وقال:حاضر..
ولف ومشي للباب الفاصل..
وشويه وناضت نبيله ولحقاته..
تبعتها غرفه بعيونها بعدين مشت قالت بألم وهي على وشك البكاء..يارب ساعدني يارب..
☘خشت نبيله ورا عبد الرؤوف..
شداته من ذراعه وقالت؛تعالى هني..
هو قعد يشبح ليدها برفعة حواجب..
وهي سكرت باب الحديد وطلقت ذراعه وقالت بصوت منخفض وغاضب :شن الحركات اللي دير فيها هادي علاش تتعامل مع المراة تقول خدامه مش مرتك..
عبد الرؤوف:تو كان قلتلها ديري غدي ولاديري واجب ضيوفك نبدا نعامل فيها زي الخدامه!
نبيله:اني نحكي ع اسلوبك اسلوبك معاها زفت مازال ماسكرتش شهر وقاعد تبكي فيها..اسمع جاي اني فكرت نزوجك بعد ماشفتك تخطيت اللي صار معاك زمان..لكن الباين طلعت غالطه ان قاعد عايش بيه لتوا..
هو حط ايديه ورا ظهره وقعد يشوفلها وهي تتكلم وماباش يقاطعها..
نبيله:بنت الناس مالهاش علاقه بهديكا...ماتاخدهاش بجريرتها بش ماتوليش ظالم..تبي تفش غلك وغيظك برا دور ع هديكا وين ماكانت خودها وخلص تارك فيها واطلق سراح بنت الناس اللي ماريتش منها الا كل تقدير واحترام فوق معاملتك المعفنه..سمعتني..!
ومشت فتحت الباب وهي معصبه وسكراته وراها بالقوة.
هو ضحك نص ضحكه..بعدين حرك راسه يمين ويسار ومشي ركب الدروج..
☘☘☘☘☘
"خودي"
آلاء:شن هدا؟
فردوس:افتحيها وشوفي..
فتحت آلاء الكيسه لقت فيها باكو تليفون جديد بدهشه قال:آيفون!
فردوس ابتسمت..
واريج تشوف لأمها وهي مبتسمه بوجع..
آلاء:شكرا ماما شكرا بجد..
فردوس:غير حافظي عليه..
الاء بإبتسامه؛اكيد..باهي شن صار في السيارة فتحتي الموضوع مع جدي..
اريج غمضت عيونها بنفاد صبر..
فردوس:لاماكلمتاش اليوم جدك في الزوايه مش في طرابلس..
الاء:باهي في اقرب فرصه كلميه بالله عليك نبيها السيارة ضروري..وايه..نبي فلوس بش نشري مواد ندير بيهم سته طورطات لصاحباتي..
اريج:6!؟
الاء:سته..هما جايين بيشروا مني ع اساس يساعدوني يحسابوني بنشحت منهم نبي ناخد احسن شي بش نوريهم..
فردوس:لكن هدا كله يبي يابنتي يبي هلبه واني اللي خديته شريت بيه التليفون..
آلاء:مش مشكله نراجي الطلبيه اللي تجي بعدها ..
اريج بعصبيه:هييه انتي زودتيها هلبه راهو شن تحسابي ماوراه شي غير طلباتك..
آلاء:انتي سكري فمك وماتدخليش..
فردوس:خلاص انتي وياها خلاص..اريج انتي مادخلكش بيني وبينها..
قلبت الاء عيونها بعدي ماشافت لأختها بمكر..
فردوس وهي تحاول تخفي ضيقها:خلاص زي ماتبي..
ومشت طلعت من دارهم..
اريج:انانيه حقيرة..
وآلاء مشت بتجرب تليفونها الجديد وتجاهلت اريج وكلامها تماما...
☘اما فردوس لما طلعت من الدار..
جاها معتز وقال:حتى اني نبي سبيدرو جديد مش كل شي لآلاء .
هي تنهدت وقالت:حاضر حاضر ياولدي حاضر..وخشت لدارها وسكرت الباب..
☘☘☘☘☘
"سبحان الله !"
فايزة؛خطر عليا اللي داروه فيا كله تفكرت كيف كنت وقتها نقول امتى ربي ياخد حقي منهم امتى يوريني فيهم يوم يبرد قلبي فيهم..وقعدت نراجي لين نسيت وعشت حياتي عادي لكن ربك ماينساش وجابلي حقي لعندي.
سدرة؛يمهل ولايهمل
مطيرة:ايه والله هدا ربك ماينسى حد ولايخلي حق حد..لكن بنسألك فيزة معاش سمعتي شي عن خوتك وامك.
فايزة تنهدت وقالت؛من السنه اللي فاتت ياخالتي مطيرة لما خوي دار عمليه المصران الغليظ معاش نندري عليهم..علاش سمعتي عنهم حاجه؟
مطيرة؛لاوالله يابنتي غير توا خطروا عليا بس..
هزت فايزة راسها وع وجهها باديه ملامح الحزن..
وسدرة تشوفلها بحزن ع حالتها وحالة بنتها اللي ماتندريش عليها..
فايزة:ايه حقه سدرة مشت طوبى لصفاء؟
ابتسمت سدرة ابتسامه تخفي بيها اللي ماتبيش فايزة تشوفه وقالت:ايه مشت وهدرزوا مع بعض ماتخافيش كله تمام..
ابتسمت فايزة براحه وقالت؛باهي الحمد لله..وبالله عليك قوليلها تمشيلها مرة مرة تهدرز عليها..
سدرة:إن شاء الله..
مطيرة:الا وينها طوبى هي؟
سدرة؛فوق في دار الخزين شاده لوحتها وترسم..
☘وطوبى فوق...
كانت مشغوله باللوحه متاعها..
اللي كانت ترسم فيها فرسمه وصلت فيها فاللمسات الاخيرة..
نظفتها كويس...بعدين طلعت من جيبها الصورة.. وقارنت بينها بين الرسمه..
ابتسمت وعيونها تعبوا دموع وقالت؛ياربي يجي يوم وتجينا ونوريهالك..وتعرف اني طول سنين غيابك كنت اكثر من يستنى فيك ياخوي..
تنهدت بحسرة بعدين دست الصورة..
ومشت خدت شرشاف وغطت بيه اللوحه..
وطلعت بعدها من دار الخزين...
☘☘☘☘☘
الساعه 1:30ليلا..
كان راقد في سريره يتفرج ع فيديو في تليفونه ليه علاقه بأخبار بالبلاد..
فجأة دق باب الدار..
غمضت عيونها بنفاد صبر..
بعدين ناض..ومشي للباب وفتحه..
كانت واقفه قدام الباب وهي تشوفله ببراءة..
رفع حواجبه؛جو شبحات القطاطيس اللي يوقفوا قدام الجزار فوتيه وقولي شن تبي..
ضحكت وقالت؛حلو التشبيه..المهم نبي الجزار..ااه قصدي رصيد..
عبد الرؤوف:تخفي في دمك!؟
غرفه؛خفيف من ربي اصلا انت هكي كنت تقول..
عبد الرؤوف:كذب عمري ماقلتها..
غرفه ابتسمت وقالت؛ايه صح مش انت نسيت هداكا واحد عرفته زمان كان صاحبي..
قعد يشبحلها بتعجب وحواجبه مرفوعات..
غرفه:امم المهم توا نبي رصيد ..
هو قعد يحرك في يده ويقول:امشي اقلبي وجهك بري..
وسكر في وجهها الباب.
غرفه:حتى دينار بس..
"تعرفي كان مامشتيش لدارك نطلع نوريك الرصيد اللي تبيه"
☘داخل.
عبدالرؤوف:تحسابه يعدي عليا الجو اللي دير فيه ..
"مياااو"..
التفت للباب وهو بيضحك خلاص وقال؛يافرخه راهو خيرلك راهو ماتجربيش صبري..
"مياااو..ميياااو"
مشي طول للباب فتحه بقوة..
هي هربت تجري للدار وسكرت عليها الباب..
رفع حاجبه وقال:تافهه..
وسكر الباب..
ومشي بإتجاه السرير وقعد واقف يراجي فيها دق مرة تانيه بس عطلت وماجت..
رجع انطرح ع السرير..وفتح الفيديو اللي كان يتفرج عليه...
فجأة..
سمع صوت دق جاي من الحيط..قعد يسمع بتركيز بعدين شبح للحيط يمينه والتفت بسرعه للحيط اللي وراه.
غمض عيونه بنفاد صبر ...
☘وهي في دارها مقعمزة جنب الحيط ودق عليه وهي تضحك..
فجأة 
جتها رساله..
طول قامت التليفون لقت تم تحويل 5دينار من الرقم متاعه للرقم متاعها..
ضحكت بفرح..وخشت طول ع الفيس فتحت النت..
بس ماباش يفتح قالت:مغباني حل نشترك الاول..
وطلعت من الفيس وخشت بتشترك جتها رساله ان رصيدها غير كافي..
ضيقت عيونها وقالت:كيف!..
خشت تشوف الرصيد لقاته قاعد زي ماهو 50 درهم..
رجعت من جديد لرساله الرصيد وين ركزت عليها غمضت عيونها بشده وقالت:غبيه وحمارة..
سمعت صوت دقان قوي ع الحيط..
شبحت للحيط بغل ودقت بقوة عليه..
وصلتها رساله..
طول فتحتها .
(عاوديها مرة تانيه بش نجي نكسرها)
خافت من استفزازه اكثر من هكي..ناضت من مكانها ومشت للفراش  رقدت وتغطت بالشرشاف وحطت التليفون تحت المخده وهي مضايقه ع الآخر..
تفكرت ايامها في حوشهم بين عيلتها بوها وعمتها وخواتها..
كانت عايشه احلى عيشه..تحسرت عليها توا هلبه..
نزلوا دموعها وبلوا وسادتها..وقعدت تبكي بصمت لين جاها النوم ورقدت...
☘☘☘☘☘
"اها انتي تتحدي فيا توا"
نجاة وهي تتكلم بالتليفون؛ايه نتحدى فيك..وسكرت عليه..
وقعدت مقعمزة ع الصالون في جناحها وهي تراجي..
نجاه؛واحد..تنين..تلاته..اربعه..خمسه..سته..سبعه..تمانيه...
تسسسس...
ودق الباب..
ضحكت وناضت للباب فتحاته بهدوء..
ابتسمت وقلت:خش..
خش وهو يشوف وراه بعدين سكر الباب...
☘☘☘☘
تاني يوم..
الساعه 9:00صباحا..
جت خديجه لحوش ماليها الصبح بفطورها تبي تفطر مع امها..
وين خشت للكوجينه..
شافتها ع طاوله الفطور هي ونجاه والصغار يفطروا..
قلبت عيونها بملل وقالت:صباح الخير..
التفتت نجاه شبحتلها..
ومغليه قالت:صباح الخيرات..جايبه فطورك..
قعمزت خديجه ع الكرسي وحطت حافظتها ع الطاوله وهي تقول:نحسابك بروحك..
نجاة ابتسمت وقالت:صباح الخير ديجا..
خديجه ردتها ابتسامه صفرا وقالت:صباح الخير..
غيرت عيونها عنها وشبحت لصغار خوها وقالت؛شن مافيش صباح الخير عمتو ولامش متعلمينها..
شبحت مغليه لنجاه..
ونجاه تبلع وتفوت غصب عنها ومن داخل تسحن ع خديجه..
حمزة وجوري قالوا:صباح الخير..
ع خشة سدرة المهدي ووراها الجالي.
سدرة:صباح الخير..
كلهم ردوا:صباح الخيرات...صباح الخير..
ونجاه تسرق في النظر للجالي اللي كان يتجنب يشوفلها..
الجالي:صباح الخير خديجه ترا شن دايره..
خديجه:افتح وخود..
سدرة:عمتو كان في بريوش عطيني خديجه:عطيها جالي..
مغليه:شن دير امك ياسدرة..
سدرة جت لحناها وقالت:ماما مشت المدرسه بابا رفعها..
مغليه:فطرتكم؟
سدرة؛لالا بابا فطور هي كانت تراجع ليزونه عنده امتحان..
نجاة:ماشاء الله سلفي المهدي متعاون..
الجالي وهو ياكل شبحلها..
خديجه:من لما كان عزري يعاون فينا عادي..شبحت للجالي  وقالت..هدا اللي مستحيل يحرك حاجه..
قعد ياكل بدون مايعلق..
ونجاة شبحتله وابتسمت..
"قلبي مش مرتاحلو"
مغليه؛صبح يافتاح..
خش عليهم نضال وهو يغني..
ودي حاجه نفسي يوم اصرحلوا بدي حاجه..
شك ومضيعني واللي مانعني ماعندي دليل..
جي للجالي وقعد يغنيله..
حكايتو مش كامله اه ياناري.
شكلوا عامل عمله ومداري..
هات جاي..
خدي منه التست وقعد ياكل..
وكمل غني..
ياما قالي ياما قالي ع اللي جواه
وبردوا مابصدقهوش يحلف وانا
ليه حاسس بعنيه في حاجات بتقول ماأمنولوش..
ونجاه والجالي قعدوا ياكلوا وجوههم متلونه..
مغليه:ناس تصبح ع ذكر ربي وانت تصبح ع ذكر الشيطان..
نضال:الحق فيا اللي قاعد نوعي ونوقظ ع قد ماندير خير في اللي حواليا مافي حد مقدر..
خديجه:لشن توعي ان شاء الله..
نجاة والجالي قعدوا يشبحوله وهما ياكلوا..
نضال:لحد داير فالطه هكي كبرها او انه ع وشك يديرها..
الجالي بلع وقال:وضح كلامك..
نجاة شبحتله..
نضال:مانيش موضح شي كله تو يبان بعدين يللا سلام ياعيله..
ومشي طلع من باب الكوجينه..
مغليه:الولد هدا يعرف حاجه ويبي يقولها ومش عارف كيف لكن اني تو نعرفها بروحي..
الجالي بلع اخر لقمه وقال:اني طالع..سلام..
ومشي طلع..
نجاة ناضت وهي تقول:لازم نسبق المدير..هي بالسلامه توا عمتي وسامحوني بنتعبكم في الصغار..
مغليه:بري لخدمتك بري ربي يفتحها عليك..
نجاة:تسلمي عمتي..
ومشت طول طلعت وخديجه لحقتها بعيونها..
☘وصلت برا..
لقت الجالي طالع بسيارته..
طول ركبت سيارتها وطلعت وراه..
سيارتهم ورا بعض خطمت من قدام حوش الصيد ع طلعة محي من الحوش..
شافهم وقعد يلحق فيهم بعيونه بعدين قال؛خسارة مالحقتش عليه..
☘☘☘☘☘
"خليها بعد حفل التخرج احسن"
عمر:لاياعمري ع عرس خوك خير ناخدوهم ع غفله وهما شايشين جدك طول يقول باهي..
اميمه بضحكه:اسمع ارزن شويه قدام جدي راهو يدورلك فيها..
عمر:خلاص ماعنده مايدور كلمة تريس هادي مافيهاش رجعه..هاه شن قلتي..
تنهدت اميمه وقالت:باهي..بس لو جدي رفض ردبالك تحاول معاه تاني عمر تمام..
عمر:مش حيرفض صدقيني في عرس خوك حتولي مرتي وقولي قالها عمر.
ابتسمت اميمه وقالت:باهي تقدر تخليني نمشي نخدم ع حالي.
ابتسم وقال:تفضلي ياستي..
اميمه؛ايه حفه امتى رحلتك؟
عمر:بعد ساعه..
اميمه بإبتسامه؛استودعك الله...سلام..
ومشت..
وهو قعد معاها بعيونه اللي يشوفولها بحب وقال:سلام..
بعدين تنهد ولف ومشي بيطلع من المستشفى..
☘☘☘☘☘
جامعة ناصر قاطع ب..
كلية الاقتصاد...
في احدي القاعات..
:اسمعي فكينا من هبالك اريج..
اريج وهي تمضغ في المستكه؛اسكتي انتي والله نوريه ع هزوته عليا امس..والله مافهمت من ورقتك حاجه هادي كتيبه ولا مسيرة نمل مليونيه..قالت كلامها وهي تقلد فيه..زي ماضحكهم عليا امس تو نضحكهم عليه..
وحولت المستكه من فمها ولصقتها ع الكرسي..قعمز ياأستاذ قعمز..
:والله بتودري روحك يابنت..
اريج:مايصيرلي شي..
:راك تنسي هو في النهايه استاذ مش كل شي بيعديه..
اريج؛طز فيه..
ومشت قعمزت في المدرج وصاحبتها قعمزت جنبها..
وقعدوا الطلبه يجوا واحد ورا التاني لين تعبا المدرج واريج تمرر في نظرها عليه وهي تتخيل في منظره قدامهم بعد المقلب..
لحظات وخش وهو شاد شنطة اللاب توب في يده مش لابسها لبس..
مرر نظره عليهم وقال :صباح الخير..
هما ردوا عليه..
واريج مركز معاه وتراجي امتى يقعمز..
هو طبس دار حاجه بعدين حط شنطة اللاب توب ع الطاوله وفتحها..طلع اللاب توب وفتح وحط ع المحاضرة..
بعدين جي بيقعمز..
واريج تتقرب..
قبل ليقعمز..شاف للكرسي..ابتسم ع جنب وقال:شن هدا؟
:حي عليك شافها!
اريج:لا ياربي علاش ماقعمزش طول!؟
فجأة...فتحت عيونها ع وسعهم لما شافاته مطلع ورده وهو يقول:اووووووه..
اريج قعدت تشبح للوردة وهي مفنصه.
وصاحبتها متفاجئه..
والطلبه يضحكوا..
هو حط الورده ع الطاوله وقال:لاتعليق.
حك لحيته وقال:خل نبدوا محاضرتنا..
اريج حست روحها بدوخ..
وصاحبتها شاده ضحكتها..
وهو بدي يعطي في المحاضرة عادي وخلا اريج قاعده متنحه من اللقطه اللي صارت..
جو عيونه في عيونها وفاتهم فيسع وهو يشرح ومن داخله كان يضحك عليها..
بعد ساعه بالزبط تمت المحاضره..
وهي كانت اول من طلع من كثر كانت معصبه..
هو طلع بعدها وسرع مشيته لين وصل فيها وقال..
نضال؛حافظك حفظ ياشمطاء...وكمل طريقه..
وهي وقفت في مكانها وهي تشبحله لين درق..
جتها صاحبتها وقالت:شن قالت.
اريج عكرشت وجهها وقالت؛مثقل دمه..
ومشت وصاحباتها معاها...
☘☘☘☘☘
وفي الكليه اللي تقرا فيها خالتها...
كانت طوبى حتى هي طالعه من محاضرة ومعاها زميلاتها..
فاتت من قدام الولد نفسه اللي ديما يبعتلها وترفض فيه.
كان يشوفلها ويقول بصوت عالي؛تو نوطيه خشمك هدا تو تشوفي..
طوبى ولاعبراته..
وهو قعد يشوفلها بوعيد..
☘☘☘☘☘
في الحوش قاعده بروحها...
راجلها طالع من الصبح عنده خدمه..
وحماتها عندها الجلسات في المحكمه..
هي من الكساد ضمت الحوش كله..
بعدين دارت قهوة وحلو وقعمزت..
فتحت تليفونه..وخشت ع الاستديو..
وقعدت تشوف في البوم صورها هي وصاحباتها في الكليه..
دمعوا عيونها وهي تقول:هدا الزواج اللي قريب متي عليه ياغرفه!..ااه ياربي بس لو الواحد شن بيصيرله القدام..تنهدت وقالت..استغفر الله العظيم وخلاص..
حتى بنتصل بيهم مش قادره..ايااه تو يحاسبوني هايمه في شهر العسل..طيح سعدي..
وقعدت تبكي بصمت..
فجأة رن جرس الحوش..
مسحت دموعها ومشت ردت الانترفون..
غرفه:ايوه مني..
"افتحي حبيبتي حني عيت عمة راجلك"
غرفه توترت وقالت:هي شويه بس..
سكرت ومشت..طول  من الحوش..
توجهت للباب الخارجي وفتحاته..
وتخش عزوز كبيره وسمينه هلبه لابسه فرشايه..
ووراها زوز بنات وحده متزوجه جايه بصغارها والتانيه بنت..
كلهم لما خشوا قالوا:السلام عليكم..
سكرت غرفه وقالت:وعليكم السلام..
عمة عبد الرؤوف"ريسه":هي هادي العروس يابنات..
البنت متزوجه"فدوى":لاقنينه مش خاطيه..كيف حالك حبيبتي..
غرفه وهي مرتبكه:الحمد لله..
البنت التانيه"لميس":شورك ماتبيش تسلمي علينا..
غرفه:لا والله مش هكي اسفه..
وسلمت ع العزوز سلام باهي بعدين بناتها..
ريسه:العفو بنقعدوا واقفين برا هلبه!
غرفه وهي مرتبكه ع الاخر:لا شن واقفين تفضلوا تفضلوا..
مشوا بيخشوا وفدوى عيطت ع صغارها:هيا خشوا انت وياه بش نفطروا..
ريسه:البنات جايات من غير فطور وتيلهم سفرة باهيه..
غرفه؛حاضر تفضلوا تفضلوا..
خشوا وهي وراهم تشوف لشناطيهم وحاسه روحي بتبكي خوفا من اللي بتشوفه طول مدة اقامتهم..
☘☘☘☘☘
الساعه 12:00قبل الظهر..
في الطريق..
سدرة:اتصلت بالمصحه وسألت عليه قالوا واخد اجازة..
طوبى:الصبح ماشفتش سياراتهم قدام الحوش لاهو ولامهند..
سدرة:شن تتوقعي..
طوبى بضيق:مانبيش نتوقع شي الصراحه..
سدرة قعدت ساكته وهي تفكر بقلق...
☘☘☘☘☘
في الكوجينه حاصله بدير الغدي..
والصغار خاشين عليها طالعين..
مرة يبوا نفاص مرة يبوا ميه..
وحناهم وامهم وحالتهم..مرة شاهي مرة قهوة معاش لحقت دير شي..
من العجز والتوتر والارتباك قعدت تبكي..
فجأة رن تليفونها..
خداتع من الدولاب لقاته هو يتصل..
طول فتحت الخط..
"جت عمتي"
غرفه:ايه..
"درتي الواجب ولا"
غرفه:ايه فطروا بعدين شاهي وقهوه وكله درته اني مادار معاي حد حاجه..
"وبالك تبيهم يديروا...مصح وجهك اما مصح وجهك"
غرفه رشفت وقالت:مش هدا قصدي اني قلت هكي بش تعرف اني درت كل شي بروحي بس..
"باهي خلاص فهمنا..المهم نبي نروح نلقى الغدي يشرف..وردي بالك من النظافه عمتي زيي بالزبط مراة عيافه تشوف عليك حاجه حتى طاسة الميه معاش تشربها ماتحشميناش معاها.."
وسكر عليها..
غمضت غرفه عيونها وهي تتمالك في اعصابها..
"غرفه..انتي يامراة"
فتحت عيونها وتماسكت ومشت طلعتلهم..
انصدمت وين شافت حالة الحوش..
ريسه:تعالي هني وقولي شن بديري الغدي.
هي شبحتلها وقالت:اللي تبوه..
فدوى:كسكسي يالبصله..
ريسه؛ايه..ايه..
لميس:ديريلي مكرونه اني مانحباش الكسكسي..
فدوى:ورينا ابداعتك وديري معاه مبطنات ع سويسرولات ع بيتزا نموت في البيتزا مع الكسكسي..
لميس:كثري منها بش نشربوها مع الشاهي..
غرفه شويه ويوقف قلبها ماتعرف دير شي من اللي قالوا عليه بكل..وقعدت تتخيل في اللي بيديره فيها عبد الرؤوف لو دارت شي ماينفعش..
ريسه:شن تراجي تحركي للكوجينه وفت..
غرفه:باهي..
ولفت ومشت للكوجينه..
ريسه:مرخيه ماعجبتنيش بكل..
فدوى:هما هكي يسيبوا الفالحه ويجروا ورا البايرة...
ولميس اختها تشبحلها وهي تهز في رجلها من الغيظ..
☘وغرفه في الكوجينه بتنهار..
تبي تتصل بطوبى بس ماعندهاش رصيد..
قعدت تقول وهي بتبكي:كيف ندير ياربي كيف ندير..
رن تليفونها شافت المتصل..
بفرحه قالت؛حبيبة قلبي حست بيا..
فتحت الخط وردت:ايوه بيبو اتصلي في وقتك ياروحي انقذيني بالله عليك..
"خيرك شن في بسم الله!"
غرفه؛تو نقولك..
وحكتلها كل شي...
وطوبى قالت:تمام عشرة دقايق ونجيك..
غرفه؛ياعمري نراجي فيك..
وسكرت..
بعدين قالت:لازم ندير حاجه لين تجي..
وقعدت توتي في الحاجات..لين رنت عليها طوبى..
غرفه:جيتي..
"فم الباب"
غرفه:شويه بس..
وطلعت بسرعه فتحت الباب وطلعت دخلتها..
غرفه:خشي من الكوجينه..
طوبى:من وين؟
غرفه اشرتلها:من غادي..
طوبى:تمام..
ومشت بسرعه جهة الكوجينه..وغرفه خشت داخل وسكرت الباب..
ومشت للكوجينه خشت وسكرتها وراها..
طوبى خشت من برا وقالت:شني غرفه عبد الرؤوف شكله يخوف..
غرفه:لايخوف لاشي بس زيه زي هالرجاله يبي يوري فلاحة مرته لماليه..
طوبى:جيتي لكلامي يابايرة ياما قتلك تعلمي بش تلقي روحك..
غرفه:بيبو مش وقته هدا ابدي بالله عليك..
طوبى رفعت كمامها وقالت:راقبيني..
وبدت طوبى بالبصله اول شي..
بعدين قعدت توجه غرفه
طيب مفروم المبطن..
بعدين تفرم صدور دجاج للسويسرول..
وعجنت البيتزا..
وطوبى لاهيه بالكسكسي لين كملت وحطاته ع النار..
بعدين جتها تساعد فيها ع السريسرول الاول لين حطوه في الثلاجه..
بعدين داروا المبطن وغرفه بدت تقلي فيه..
وطوبى بدت دير في البيتزا..
كله بسرعه داروه لقوا روحهم شبه كملوا..
وبرا العيله يعلقوا ع غرفه كيف مسكرة باب الكوجينه..
فدوى:شن قصدها بيها حركه زي هادي..
ريسه:كناين هالوقت مايبوا حد يجيهم..
لميس:ماهو جايين لحوشها!؟
☘☘
طوبى:خلاص....كملنا..
غرفه؛حاجه اخيره نبي تنسيق الماعين طوبى شن نحط وكيف؟
طوبى:ماعينكم وين.؟
غرفه اشرتلها وهي تقول:الدواليب هدوكا..
التفتت طوبى ومشتلهم فتحتهم وقعدت تتفحص في الماعين لين طلعت اللي تبيه وقعدت تقوللها شن دير..
طوبى:خلاص بنروح مرات يجي راجلك توا..
غرفه:راجي نحطلك شويه..
طوبى طلعت وهي تقول:خليه لضيوفك مرات مايسدش..سلام..
ومشت تجري..وغرفه طلعت وراها..
لين شافتها طلعت من الحوش بكل..
ابتسمت بآمتنان وعيونها يلمعوا بالدموع بعدين ولت للكوجينه..
☘☘☘☘☘
"بالله وين نلقى الباشمهندس الجالي مشيت مكتبه قالوا مهناش"
:نزل للبركيدجو تقريبا سمعته قال بيجيب حاجه من سيارته..راجيه في مكتبه اذا تبي..
محي الدين بإبتسامه:لاعادي ننزله لوطا نسيبي هو..
:اها..
محي الدين؛عن اذنك..
:اذنك معاك..
ومشي طول طول من مبنى الشركه متوجه للبيركيدجو..
وصل فيه وخشله..
كان بركيدجو كبير هلبه وفيه هدوء عجيب..
لعند ماسمعت صوت هدرزة..
قعدت يمشي وكل ماله يقرب منها لين شاف شي خلاه يوقف في مكانه..
نجاه مقعمزه ع مقدمه سيارتها بالجنب..
والجالي قدامها وشاد ايديها الزوز..
الراجل طول وخر وانسحب من المكان وهو مصدوم ع الآخر...

#اقحوانه
#طوبى

...يتبع....