طوبى الجزء الاول

تكمله

(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_الثالث_والأربعين"إلا أنت2"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
وصل هو وصاحبه قدام حجرة الكشف..
قعمزه بالسيف ع الكرسي وقاله؛اهمد الهم اهمد دهشتني..
:تي والله انت اللي دهشتنى وشردتني حسبي الله ونعم الوكيل..
نضال مرر نظره ع الحالات وابتسم مجامله وهو يقول:وطي صوتك درت العار..
فجأة انفتح باب الحجره..طلعت الحاله واريج وراها وهي تشبح لقصاصة ورقه صغيره و تقول:نور الدين محمد الشيخ..كشف مستعجل..
نضال بإبتسامه؛اهوا..
قامت راسها وشبحتله فنصت عيونها وقالت:انت اسمك نور الدين!
هو بضحكه اشر ع صاحبه وقال؛اهوا اهوا..
شبحت لصاحبه رفعت حاجبها وقالت:تفضل خوي..
ناض صاحب نضال المغلوب ع امره ومشي للحجره ونضال وراه..
خش الشاب واريج سكرت في وجه نضال الباب..
هو غمض عيونه وقعد يضحك..
☘داخل..
الدكتورة؛تفضل استريح..
قعمز صاحب نضال...
الدكتورة؛اسم وسنك..
انفتح باب الحجره وبان نضال وهو يقول:اني جاي معاه دكتورة عادي نخش..
اريج قلبت عيونها بنفاد صبر..
الدكتورة؛تفضل مافيش مشكله..
هو بإبتسامه؛يزيد فضلك دكتورة..سكر الباب ومشي قعمز مقابل صاحبه.
واريج تشبحله ع جنب..
الدكتورة:الاسم الكريم..
صاحب نضال وهو يشبحله بغل:نور الدين محمد الشيخ..عمري26..
الدكتورة قعدت تكتب في البيانات..
ونضال يشبح ع جنب وين ماواقفه اريج وهو مبتسم ..
الدكتورة:خير من تشكي..
:عندي سوسه في ضرس العقل الحق مش مسببتلي ألم وكيف باديه لكن صاحبي شي سكر راسه برا عاين قبل لينضربوا عقاب سنونك..
نضال:تو بالله اني غالط يادكتورة..
ابتسمت الدكتورة وقالت؛لا..
ناضت وهي تقول:ترا تفضل معاي شويه يانور الدين..
ناض نور الدين ومشي لمكان الفحص واريج تشبحلهم..
ونضال غير مكانه وقعمز في مكان كرسي صاحبه بش يشوف لأريج كويس..
الدكتورة بدت تفحص في سنون صاحبه..
وهو يشوف لأريج كيف واقفه عاقله ومؤدبه..
حب يستفزها:راهو يشكي منه ومدايرتله ليالي سود غير هو يكابر وزعميته سوسه ماتعبنيش والجو هدا..هو اللي شد فيا بنعاين بنعاين لكن مش عارف وين جبته طول..
وصاحبه يسمع وهو يفنص بصدمه..
الدكتورة:فعلا السوسه واكله اغلب الضرس وخاشه ع اللي جنبه..
نضال:اها ريت جيت لكلامي شفت صاحبك قداش عنده بعده نظر واحساس بالمسؤوليه..مش عارفه من غيري انت وباقي الجماعه شن يصير فيكم..
الدكتورة قعدت تضحك..
هو شبح لأريج شاف ع وجهها ملامح الازدراء..
ضحك بدون صوت..
الدكتورة؛خلاص يانور الدين برا دير صورة ع الفك كامل وارفعها لقسم الخلع جنبنا بالزبط..
وشبحت لأريج وقالت:انتي بتكوني موجوده غادي في مكان عليا قالت بتتأخر شويه..
اريج:تمام..
نضال ناض وهو يقول:هي نوض نصوروا نوض..
ناض صاحبه وهو يقول:حسبي الله ونعم الوكيل..
الدكتورة شبحتله بإستغراب..
واريج شبه عرفت علاش تحسب..
جاه نضال خداه وهو يغني؛صورلي الدكتور سني ورجاني ست السوسه..
شبح لأريج وهو يغني..قاعده جوا مبسوطه بسيطه يافسفوسه.
واريج شاده روحها بالسيف قدام الدكتورة اللي كانت تضحك..
طلع نضال بصحابه وقال؛ايه حقه وين مكان التصوير!
الدكتورة؛المبنى اللي قدامنا..
هو بإبتسامه؛شكرا دكتورة..
وسكر الباب..
اريج؛مثقل دمه..
الدكتورة بضحكه:بالعكس دمه خفيف..
اريج قعدت تعجب عليها في سرها"دمه خفيف!..انتي اصلا انتي دمك ارزن من دمه"
☘ومشي نضال بصاحبه للمبنى التاني..
صوروا..وخدوا الصورة وطلعوا بيها يجروا لمكان الخلع.
صاحب نضال:شوف اني سايرتك لاني حسيت ان في عندك شي هني وطلع اللي في بالي صح.
نضال؛باهي كمل جميلك يلي ماتفوتك فايته..
وجو لحجرة الخلع..
دق نضال الباب..
سمع اريج قالت..
"تفضل"..
ابتسم وفتح الباب وخش ومعاه صاحبه..
ويلقى اريج واقفه ع دكتور مقعمز ع مكتب ويشبحلهم..
الدكتور كان آيه من الوسامه والجمال..
لما شافه نضال..حس بصهد يضرب في ضلوعه...
الدكتور:تفضلوا..
صاحب نضال قدم وفي يده الصورة ونضال خش وراه وجوه تلخبط بالمره..
الدكتور:انت نور الدين؟
:ايه دكتور تفضل..
خدي الدكتور الصوره وقال:تفضل قعمز يانور..
وقعد يشوف في الصورة...واريج واقفه تشوفله..
ونضال يشوفلها...
ناض الدكتور وقال:تمام تفضل يانور..
ناض صاحب نضال ومشي قعمز ع الكرسي متاع الخلع وغيره..
والدكتور لبس الكمامات وهويقول؛موضوعك ساهل وبسيط..اريج..
وقعد يعطي فيها التعليمات وهي تساعد فيه..
ونضال واقف يشوفلهم وهو مضايق ع الآخر..
الدكتور وهو بيضرب يبرة التخدير قال:هي بسم الله..ضربها وقال..ماحسيت بشي ولا..
حرك راسه بالنفي..
الدكتور:لما تفقد الاحساس بالمكان هدا قولي...
هز راسه..
شبح الدكتور لأريج وقال:ايه خل نكملك المهم طلعت من غادي واني جعان مانشبح في شي قدامي غير الماكله..
مجرد وصلت للمطعم وبننزل خلاص اتصلوا بيا ع خاطرها قالولي توا تولي....
اريج بضحكه؛راهو حالة هادي..
:حالة وسكتي..قسما بالله وليت هني واني نسب ونلعن في جدها السابع.
ضحكت اريج..
ونضال واقف حداهم وهو اعصابه..
كان شاد ع قبضة يده بقوة وحس بكل جزء قاعد ينحرق..
ماتوقعش انه لهالدرجه اريج ملكت فيه كل شي..
كان يحساب روحه معجب..
بس اللي يحس بيه توا اللي الحكايه تعدت مرحلة الاعجاب من زمان..
اريج وهي تضحك؛ياريتني حضرت..
الدكتور بضحكه:هدا اليوم اللي خديتي فيه اجازة لما مرضتي..ان شاء الله امورك تمام توا..
اريج:الحمد لله..
"مازال دكتور"
التفتت اريج وشبحت لنضال لاحظت ع وجهه ملامح ماشافتهمش عليه قبل...
الدكتور رفع حاجبه وقال؛لين البنج ياخد مفعوله..
صاحبه قعد يمرر في نظره عليه وع اريج..
هو شبح لأريج وهز راسه..
واريج غيرت عيونها عنه وشبحت للدكتور وقالت:اني امس ناوبت كان في نقص في التمريض لوطا في الإسعاف خشيت معاهم..
الدكتور:عندك خبره!؟
اريج:ايه اني واخده زوز كورسات تمريض..
الدكتور:امتى خديتهم نشوف فيك صغيره..
اريج بابتسامه:ايام الشهاديه الثانيه وسنه اولى كليه..
الدكتور بإبتسامه:حلو..
نضال؛حتى بنج العمليه مش هكي!
شبحوله..
الدكتور؛شن تقرب للمريض..
نضال:صاحبه..
الدكتور:باهي تمام لو كنت مشغول او عندك حاجه تبي ديرها تقدر تتفضل وبعد نص ساعه تعالى..
هو كان يبي ينوض يضربه بس تمالك نفسه ع قد مايقدر وقال:مش مشكله نصبروا..
الدكتور؛تمام ياريت تكون هادي بش صاحبك مايتوترش..
نضال كان يجاهد بش يشد اعصابه حط رجل ع رجل وقال بإبتسامه صفراء:ان شاء الله...
صاحب نضال اشر للدكتور..
شافله وقال:خلاص؟
هز راسه بإيجاب..
الدكتور وقف وجاه وهو يقول:ترا اقربي اريج وشوفي كيف بندير للحاله متاعه..
نضال:شن دكتورة هي!؟
اريج شبحتله وهي مصدومه..
والدكتور عقد حواجبه وقال:معليشي من بكري نساير فيك وانت تماديت..تفضل اطلع برا..
نضال:مش طالع اني دافع فلوس هني ماطلعنيش..
الدكتور:اشهد أن لاإله إلا الله..خوي لوسمحت توكل مانبيش نكلم الامن يجوا يطلعوك مش حلوة في حقك..
نضال بعناد اكبر مستفز:مش طالع..
الدكتور شبح لأريج...
وهي تشوف لنضال من فوق لتحت..
وصاحبه يأشرله يطلع..
الدكتور:اريج اني مش داير شي لين يطلع..
ناض نضال قدمله وهو يقول:كلمني اني هني ماتكلمهاش هي..
الدكتور وهو يشوفله من فوق لتحت:وين جاي انت..
اريج وقفت قدام نضال:خلاص استاذ لوسمحت اطلع اني طالعه معاك خل الدكتور يشوف شغله..
الدكتور:وتعالي بتعاونيني..
اريج:حاضر دكتور..اطلع ياأستاذ لوسمحت..
نضال وهو يشبحلها بنظرات حاده هز راسه..بعدين شبح للدكتور بإزدراء ومشي طلع..
اريج:لحظه دكتور..ومشت طلعت وراه...
☘سكرت الباب وهي تقول..
اريج؛استاذ..
وقف والتفتلها وهو يشوفلها بغضب قال؛هادي هي خدمتك انتي!
شبحت حواليها وهي ماشيتله وقفت قدامه بعدين شبحتله وقالت؛شن قصدك!؟
نضال: ضحك وهدرزة وهو يخفف في دمه اللي زي القطران وانتي عاجبك ومنسجمه.
اريج:احترم نفسك وتكلم كويس..
نضال:اني محترم نفسي وهلبه..
اريج:واني محترمه غصب عنك واكثر منك وبعدين مالكش علاقه بيا بش تكلمني بالطريقه برا سقم روحك بعدين تعالى حاسبني..
نضال؛تقارني في روحك بيا!؟ انتي بنت فاهمه بنت يعورك ابسط تصرف غلط..
اريج وعيونها تعبوا دموع:الحمد لله اني ماغلطش ولاعمري غلطت اني ليا سنين نطلع ونخش ونخدم ولامرة درت العيب ولاخليت حد يعفسلي ع طرف..اعرف كيف تتكلم راهو شاده لساني عليك بالسيف ...
نضال بضيق:باهي علاش بتبكي انتي ..اني تكلمت هكي من خوفي عليك مش قاصد نهينك ..
اريج قلبت وجهها عنه وقعدت تمسح في دموعها..
نضال؛اريج من غير لف ودوران انتي عاجبتيني هلبه ونبيك بالحلال..
شبحتله وقالت؛مستحيل...
هو عقد حواجبه وقال؛علاش!
هي رشفت وقالت؛اول شي لأني المواضيع هادي لغيتها من حياتي في الوقت الحالي..تاني شي لو جت نفكر فيه انت اخر واحد ممكن نرضى بيه..
رفع حواجبه وهو مصدوم في كلامها وقال:علاش!
اريج؛لأن اللي زيي لما تجي ترتبط حتختار راجل يحترمها وعيونه مايشبحوش لغيرها راجل عند احساس بالمسؤوليه نأمن ع نفسي معاه..وانت مش هكي بكل...سامحني ممكن كلامي يكون واعر بس هدا الحق..ياريت معاش تجي هني وتسببلي مشاكل اني مانخدمش هني كساد ولاتضييع وقت وانت تعرف كويس ماتقطعش رزقي...
ومشت وخلاته وهو مصدوم من كلامها ع الآخر..
كان واعر هلبه..وحسسه بأنه مايسوى شي في الدنيا كلها..
برغم انه ياما سمع من كلام هزوة وسخريه اصعب من كلام اريج ولاأهتم..
بس كلام اريج وجعه هلبه...
وهو هني تأكد اللي يحسه اتجاه اريج مش مجرد اعجاب..
بل..حب...
☘☘☘☘☘
في الطريق
كان يسوق وهو ساكت وصاحبه مرة مرة يشبحله..
لما ماقدرش يكلمه بسبب حالته بعد قلع سنه..
حطه وين مايبي بعدين مشي لشارع القهوة..بس بيفتح القهوة...
☘☘☘☘☘
الساعه 9:00ليلا..
مقعمزة في الجنان بعد هرب الضي..
شاده في يدها "اسكيمو" تاكل فيه وهي سرحانه تفطر في اللي صار اليوم..
جتها اختها قعمزت جنبها وقالت:امم احكي شن صاير معاك؟
اريج تنهدت وقالت:شي..
آلاء بعدم اقتناع:عليا اني روجه راك اختي ونعرفك احكيلي شن في..
كملت باقي الاسكيمو وهي تشوف لأختها..
والاء تشبحلها تراجي فيها تتكلم..
اريج وهي تاكل؛امم..اسمعي..ممم..بنسألك سؤال جاوبي عليه بجديه من غير تسهويك ودراه كبد..
الاء بإبتسامه؛باهي وعد..هاتيه..
تنهدت اريج وقالت؛يعني..الوحده كيف تعرف انها...تحب؟
الاء ضحكت بعدين قالت؛امم..كيف بنشرحلك..خل نختصرهالك..لو حست روحها وين ماتشوف حد معين بشعور مش مفهوم لكن تحس طالع من هني..وحطت يدها ع اعلى صدرها وقالت.. ولاعارفه ترجمه اذا كان شعور ولااخيي..معناها تحب..
اريج قعدت تفكر في كلام اختها وحست ان كلامها ينطبق ع حالتها لما تشوف نضال 
عيونها طول تعبوا دموع..
آلاء؛شفتي نضال اليوم؟
طاحوا دموع اريج..
آلاء؛اووو...لاانتي حالتك صعبه يااختي..
مسحت دموعها وقالت:بدون مانفهم ولانحس ع روحي..ماكنتش فاهمه اني نحس بالزبط..بس بعد اليوم تأكدت..
الاء:وين تلاقيتوا..
تنهدت اريج وحكت لأختها كل شي..
اريج؛بعد ماكلمته هكي وخليته ومشيت حسيت بشغور خيي كان حيبكيني بس شديت روحي بالقوة..
الاء:ووه حرام عليك فوق اللي داره ع خاطرك طلعتيه مش راجل..يعني ع خاطر بصايري وجوه مليح وديما يضحك يكون مش راجل!
اريج:لاوالله ماقصدي هكي..ضربت فمها وهي متنرفزة..مش عارفه هدا شن طلع..
الاء بضحكه:انتي اصلا كنتي حامقه من هدرزته مع الدكتوره..
شبحتلها وهي ساكته..
الاء:صح ولا!؟
اريج عقدت حواجبها وقالت:وهي تضحك التافهه ماصدقت..مركها البارده الصامته المالغه..
والاء تسمع في اختها وتضحك عليها..
ع طلعة امهم قالت؛تتعشوا هني ؟
اريج؛ايه يام جيبي هني..
فردوس وهي مبتسمه:باهي..ومشت خشت داخل..
اريج:ملاحظه امي مزيانه ولا؟
آلاء:وين مزيانه والشعر ولا شعرتين وشيب وهي مش مدورة بكل..عمتي مطيره تبان اصغر منها..
اريج؛وشن هو الهم اللي عند عمتي مطيره لاوراها ولاقدامها..
الاء؛بالله فكيني من السبل الفارغه ياما منهم يعانوا ويكافحوا ومحافظات ع ارواحهم لكن امك ديما هكي مهمله..
اريج؛تكلمي كويس شن الاسلوب الحقير متاعك هدا..
الاء؛لأنها منرفزتني يومها شافوها البنات وهي مروحه من المعمل لابسه عبايه عزايز ولفت الوشاح متاعها تحشم وريحة البصل واضحه..
اريج بنرفزة؛مااتفهك ومحقرك آلاء بجديات مافيكش فايده..
الاء:انتم اللي ماتحبوش الصراحه والصريح..
اريج:طياح سعد الصراحه اللي تعرفيها..
ع طلعة فردوس بسفرة العشي وهي تقول؛هي تعالوا..
ناضت اريج وفاتت الاء..والاء ناضت ومشت وراها..
وصلوا الزوز في امهم وقعمزوا حداها..
اريج؛عطيك الصحه حبي..
فردوس؛صحيحتين..هي تعشوا..
الاء:سعدوده عزو يهيج توا..
فردوس بضيق؛الحق مش راضيه عن سفره..
الاء:وعلاش ماشي مع عمامي!
فردوس؛يمشي ويروحلي واحد تاني مش عاجبه شي ويبي هادي ويبي هديكا والله ايدي ع قلبي هالمرة شن بيطلب..
اريج:سامحيني يام الغلط منك انتي..شن مايبي حاضر مافيش مرة قلتي لا...لازم تقولي لا لازم تخلي يكون واعي لظروفنا وتخلي عنده احساس بالمسؤوليه هدا الراجل اللي بنعبوا عليه بعدين يام نبي يشيل معانا الحمل مش يزيد هم ع همنا..
فردوس بضيق شديد:نصخف عليه وين يطلب مني حاجه مانقدرش نرد..لما بوه كان موجود مافيش مرة قاله لا..
تعبوا عيون آلاء بالدموع وقالت:الله يسامحك يابابا..
فردوس شبحتلها ودموعها نزلوا..
اريج:خلاص سكروا ع سيرة خل نتعشوا توا..
وبدت تاكل ومن داخل كانت موجوعه وقلبها يبكي..
امها مسحت دموعها وقعدت تاكل..
والاء حتى هي..
بس وحده ربي عالم كيف تنزل اللقمه في الزور..
بصعوبه..والعبره بينهم وبين الهنا بيها...
☘☘☘☘☘
وبعيد عن الحزن الدائم الغير المنقطع..
الى حالة جديده قاعده تعيشها طوبى..
كل ماتجي تقعمز حدا السلاحف وتتفرج عليهم شن يديروا تقعد تفكر في الجالي..
ويبدا فضوله يزيد اكثر واكثر اتجاهه خاطرها تعرفه اكثر..
تبي تعرف الراجل اللي حيكون زوجها بعد شهرين..
وهي في عز تفكيرها بيه..
"شن حالهم اليوم"
وقفت ع حيلها وقالت؛بابا..
لطفي بإبتسامه؛شن حال عويلتك؟
طوبى بضحكه:اهم هايمين..
لطفي:وانتي.
طوبى بإبتسامه:الحمد لله بابا كويسه..
لطفي:بنتي لأخر مرة نسألك متريحه..
طوبى نزلت عيونها وهي مبتسمه وقالت:ايه بابا معاش تخمم فيا خلاص..
لطفي بإبتسامه؛ربي يسخرلك الخير وين ماتمشي يابنتي..
شبحتله وقالت؛اجمعين حبيبي..
هز راسه بعدين قال؛نخليك مع عويلتك..
ضحكت وهو مشي خش داخل..
هدت ضحك وخدت نفس..بعدين شبحت للسلاحف..ابتسمت..
☘☘☘☘☘
"لالا..لا..لالا..لا..سيلافي..لااالالالا"
هادم الجالي ونجاه...مشغلين الاغنيه هادي في المنظومه في شقتهم..ويرقصوا ويغنوا معاها..
محتفلين الزوز بعيد ميلاد نجاة..
بعد تمت الاغنيه..
شد يدها ومشي بيها للطاوله وهو يقول؛نحبك وانتي مجنونه هكي..
نجاة قعمزت وهي تضحك:حلو الهبال مرة مرة..
الجالي طلع من جيبه باكو صغير وفتحه وقال:انتي احلى يااحلى حاجه خشت حياة الجالي..
نجاة وهي منبهره؛الله حبيبي يجنن يجنن خيال
الجالي حوله وخدي يدها ولبسهولها بعدين قبلها نجاة بإبتسامة حب:تعيش وتجيبلي حبيبي..
الجالي؛ومايحرمني منك ياعمري..مانرتاح الا واني معاك..وين نكون عندك نتجرد من كل شي نقعد ع طبيعتي زي مااني..نحس فيك زي المرايا متاعي وين نشوفلك نشوف نفسي فيك..
نجاة؛حتى اني حبيبي نشوف في نفسي فيك ومعاك نولي نجاة بس نجاه بروحها من غير شي..
الجالي:هدا علاش نقولك ياعمري رد بالك تفكري ان في من يقدر ياخد مكانك..حط يده ع قلبه وقال..انتي مسيطره علي هدا كله..ليك انتي وبس..
شدت يده بإيديها الزوز وقالت:ياعمري نموت فيك...
☘☘☘☘☘
وروح من غادي مع نص الليل..
بعد ماروح بيها هي لصغارها اللي كانت قاعده معاهم اختها الكبيره..
كان حوشهم هادي لأن الكل راقد..
وهالهدوء كان مخليه يفكر في شي عاش اليوم كله وهو هارب منه..
خش لدارها..
وطول مشي لسريره وانطرح عليه وقعد يفكر في وضعه وكيف بيدير بعدين..
دوامه طايح فيها ومش عارف كيف بيطلع منها..
مش عارف حتى يقيم نفسه باللي داره...
اللي داره كله فهالسنه الاخيره..
بداية بالزواج من نجاه الى عند خطبته لطوبى...
وبين هذه وتلك..
اهله...بوه..امه...لو عرفوا الحقيقه..
خوته وبالذات المهدي.
الناس...فضيحه شن يلمها بعدين...
غمض عيونه وتنهد من اعماق اعماقه بعدين قال..يارب..
وشويه شويه جاه النوم ورقد...
🍀🍀🍀🍀🍀🍀
وتمر الأيام...
والحال كماهو عليه مافيش أي جديد طرأ عليه...
كل حد عايش في العالم متاعه ومكتفي بهمومه واهتماماته...
وفي يوم كان اربعاء...
لطفي نسق مع العيله مشيه للبحر...
بيقعدوا فيه من الصبح لبعد صلاة العشاء..
مافي حد اعترض ولااعتذر..
حتى عبد المطلب تشجع يمشي بعد عرف ان كل شي ع لطفي وولده يوسف طبعا..
والحاج علي كان يلقى يمشي قبلهم...
مع الساعه ثمانيه الصبح كلهم كانوا طالعين بسيارتهم من الحياش..
في الوقت اللي طلع فيه الجالي بيمشي للشركه..
شافهم..
وتلقائيا قعد يدور ع طوبى في السيارات..
لين شافها مقعمزة جهة الروشن لابسه وشاح لونه وردي هافت وفي يدها شاده وردة جوري وتهدرز مع اميمه وهما يضحكوا..
تبع السيارة بعيونه لين اختفت من قدامه...
حس بنفس الشعور اللي ازعجه..
بس حاول يتجاهله ومشي طول ركب سيارته..
شغلها وتحرك....
☘☘☘☘☘
الساعه 10:00صباحا..
مقعمز ع الاب توب يشتغل ع تصميم..
كل مايحاول يركز فيه تجي بين عيونه طوبى يتشتت..
يحاول يرجع يركز مرة تانيه..
يقعد يتخيل فيها تتمشى ع الشط والعيون بتاكلها..
غمض عيونه وهو يحاول يهدي اعصابه..
خدي نفس عميق وزفر..
بعدين فتح عيونه وشاف لتليفونه لحظات..
وخداه وقعد يدور ع رقم معين واتصل بيه..
نادى مرة تنين وانفتح الخط..
"ياهلا وغلا بالباش مهندس صباح الفل"
الجالي؛صباح الخير خديجه..شن الامور..
"تمام الحمد لله شن امورك انت"
الجالي:تمام..حك جبهته وقال..خديجه..عندك رقم طوبى؟
"واخيرا طلبته واخيرا.."
الجالي؛قصري خديجه عندي ماندير..
"ايه عندي"
الجالي؛ابعتيه..سلام..وسكر عليها وقعد يراجي الرقم يجيه..
رجله اليسار تهز..
وقعد يضرب بأصابع يده اليسار طاوله المكتب اللي حاطها عليه..
جاته الرساله..فتحتها طول..
شاف الرقم..
قعد يشبح للحظات..بعدين طول ضغط عليه ودار اتصال...
☘☘☘☘☘
قدام الشط..
كان في عشه مقعمزين فيها العيله نساوين ورجاله..
والبنان الصغار ع الطاولات والكراسي  ع الشط..
خشوا اريج والاء يعوموا..
واميمه وطوبى مقعمزات تحت المظله..
والزوز لابسات طواقي كبار صيفيات منظرهم  حلو..
وقارنات الروس يشوفوا لتليفون وحده فيهم.
طوبى:نبيه هدا بناخده..
اميمه:يمشي معاك..لكن تعرفي حسك قلبتي دماغي شكلي حتى اني بناخد كسوتي بروحي..
طوبى:حاولي في عمر خليه يوافق تسافري معاي تركيا بش نفصلوا قفاطينا مع بعض غادي..
اميمه؛ياودي صعب صعب هلبه يابيبو بس ممكن نوصيكم تاخدولي حاجات من غادي..
طوبى:تمام...
فجأة رن تليفون طوبى كان ع الطاوله..
خداته وشافاته قالت؛رقم غريب..سكرت الصوت..ورداته ورجعت شافت لتليفون اميمه وهي تقول:اني مانحبش القفاطين المبوجات نحب اللي يكونوا مريحات ويخلوك تتحركي براحتك..
☘والجالي يراجي فيها ترد لين فصل..
تلقائيا ابتسم..وبدي يكتب في رساله..
☘اميمه؛الموديل هدا حلو..
طوبى:يمشي مع جسمك ميمو..
اميمه بإبتسامه؛بنشوف زيه..
وصلت الرساله..
طوبى شافت لتليفونها بعدين خداته..
فتحت الرساله..
(صباح الورد..ردي..الجالي)
وجهها ولى احمر وتوترت هلبه وهي تقول:الجالي!
اميمه وهي مبتسمه وعاقده حواجبها:قصدك هو اللي كان يتصل..
طوبى بتوتر:ايه..
اتصل..
طوبى:حي اتصل!
اميمه وهي تضحك؛خيرك طوبى مش واكلك راهو..
طوبى بخجل:مش عارفه خيرني بديت وين نلمحه في الشارع نتلخبط ونتوتر..
اميمه بضحكه:باهي ردي تو يقول مايبيش تكلمني..
خدت نفس بعدين جت بتنوض فصل.
طوبى براحه:فصل احسن..
عاود اتصل..
بتوتر قالت:عاود عاود!..
واميمه تضحك وخلاص..
خدت نفس عميق..بعدين ناضت ومشت القدام للشط...
فتحت الخط..
وردت..
طوبى وهي تحاول تبان عاديه:السلام عليكم..
"وعليكم السلام..باهي اللي تواضعت وحنت علينا طوبى هانم وردت"
طوبى وهي تمرر في نظرها ع الشط؛ماكنتش نعرف رقمك..
"قلنا ردي رانا الجالي واتصلنا وماردتيش"
طوبى:اسفه بس كنت لاهيه مع بنت عمي شويه..
"تي باهي ياطوبى باهي.."
هي شدت ضحكتها..
"المهم شن الامور شن دايرة"
طوبى:تمام الحمد لله..شن حالك وشن حال عمي وعمتي"
قعد يضحك الجالي..
هي استغربت..
هدا ضحك وقال..
"ااه ياربي قداش ليا ماضحكتش من قلبي هكي"
طوبى:دوم ان شاء الله..بس نقدر نعرف علاش؟
"لاماتقدريش"
طوبى طارتلها وقعدت ساكته..
هو بنبرة هاديه قال .
"مش عارف بس لعند توا مش مستوعب طوبى الطفله اللي لتوا بين عيوني شكلها اول ماجت لشارع القهوة كركوبه صغيره هلبه شعرها اصفر بيضا لين خدودها حمر..لابسه قفطان ابيض وع ظهرها جوانح نحل ولاطير مش متفكر وقتها اني كنت شهاده اعداديه...ولاع بالي ولاتخيلت ان البنيه العسوله هادي في المستقبل بتولي مرتي"
طوبى وهو يحكي حست بشعور غريب عليها بس حلو..
كلامه حلو..والطريقه اللي يحكي بيها...
"وهو هذا اللي ضحكني ياستي"
طوبى بإبتسامه قالت:امم..نصيبات..
"صح..نصيب..نسمع في دوشه حداك وصوت زي صوت الموج"
طوبى:ايه حني في البحر توا..
"وشن نظامه البحر اللي مشيتوله"
طوبى:مصيف عائلي..
"خشيتي عمتي؟"
طوبى:لالا مانحبش ومانعرفش مقعمزة قدام الشط ونتفرج..
"اكيد؟"
طوبى؛اكيد طبعا..بعدين اني ماعنديش علاش نكذب لو عمت نقولك عادي وين المشكله؟!..وع فكره مش متعوده نكذب ولانحب الكذب ولاالكذابين..
هو سكت للحظات..
وهي قعدت ساكته وكانت متشنجه شويه..
بعدين تكلم وقال..
"مش باين عليك انك شخصيه حاده"
هي تنهدت بعدين قالت:اسفه بس استفزني تشكيكك فكلامي..
"تمام حتى اني اسف..بس لازم تحطي في بالك اني خطيبك صح مانقدر نفرض عليك شي بش حلو لو تعاملنا مع بعض بالآحترام"
طوبى:مزبوط عندك حق الاحترام المتبادل اهم شي..
"باهي ياطوبى هانم نقدر نعرف شن لابسه"
ابتسمت وقالت:بلوزه ورديه طويله لتحت الركبه وتحتها سروال جينز ازرق..ووشاح وردي..وطاقيه سعف لونها ابيض في نصها في حزام لونه قهوي..ومرسوم ورده صغيره ع الحافه متاع الطاقيه من فوق..
ضحك وقال..
"تخايلتك هدا علاش كان نلقى تروحي حالا بالا"
ابتسمت بخجل وقعدت ساكته..
فجأه خطم واحد من جنبها ناشبها وهو يقول..
"هو الوردي اللي ساحرني"
هي انصدمت..
وهو قال بنبرة حاده..
"طوبى سيبي الشط"
طوبى بضحكه:خزي يابارد طيحت قلبي..
"طوبى!"
طوبى:هدا يوسف مبرده..
يوسف:هاتي جاي في من تكلمي..
جبد منها التليفون وقال:آلو...
طوبى:يوسف هات جاي بلابراده..
يوسف بضحكه:اوو بونسيب..وتباعد عنها..
هي ضحكت وحركت راسها يمين ويسار وولت للطاوله..
اميمه بضحكه؛يوسف كان يراقب فيك من الاول زبطك تكلمي في الجالي..
طوبى قعمزت وهي تقول:ان شاء الله مايتصمتش توا ويقعد يهتري في دوة صارت ودوة ماصارت..
واميمه تضحك..
ع جية الاء واريج وهما لفات ارواحهم بفوط كبار..
قعمزوا معاهم والآء قالت؛يجنن البحر توا..
اريج؛من كنتي تكلمي بيبو..
الاء؛جلاجل واضحه ماتشبحيش فيها كيف خاشه بعضها..
طوبى؛قصدك باين عليا!
ضحكوا البنات..
طوبى بإنزعاج:مبردكم...
ع جية يوسف حط قدامها التليفون وقال؛خليك متمسرة في مكانك قال مانعرفهاش تخش بحر..
طوبى؛لما يقرا الفاتحه يحكم..
يوسف بصدمه؛بي بي بي بي..
والبنات يضحكوا..
وطوبى مبتسمه بنرفزة..
☘اما الجالي سكر من يوسف وهو يضحك..
رد تليفونه لمكانه ورجع يشوف للاب توب..
ولما جي بيركز في التصميم..
《بلوزه ورديه طويله لتحت الركبه وتحتها سروال جينز ازرق..ووشاح وردي..وطاقيه سعف لونها ابيض في نصها في حزام لونه قهوي..ومرسوم ورده صغيره ع الحافه متاع الطاقيه من فوق..》
ضحك....
وجي بيرجع للتصميم بس...
《اكيد طبعا..بعدين اني ماعنديش علاش نكذب لو عمت نقولك عادي وين المشكله؟!..وع فكره مش متعوده نكذب ولانحب الكذب ولاالكذابين..》
اختفت ملامح الضحكه من ع وجهه..
وحس بضيق شديد في صدره..
حط يده ع جبهته وقعد يفرك فيها من التوتر .
فجأة..
دق الباب وانفتح..
وخشت نجاه وهي تقول:فاضي..
شبحلها نزل يده وقال:اني شن قلت ع خشان بالطريقه هادي!
نجاة:جيت ومالقيتش السكرتيره..
الجالي:تقعدي مقعمزة في مكتبها لين تجي كم مرة بنوري ونعلم يانجاة!
نجاة وهي معصبه:اسفه..
ومشت طلعت وسكرت الباب وراها..
هو غمض عيونه بعدين فتحهم وهو يحاول يهدي نفسه..
بعدين قام سماعة هاتف المكتب وضغط ع رقم شويه وقال:مق قهوة مرة...
ورجع سكر السماعه..
واتكى ع الكرسي وغمض عيونه...
☘☘☘☘☘
الساعه 6:30مساءا..
كانت اميمه تتمشى ع الشط وهي تكلم في عمر..
اميمه:حبيبي الحفله الاسبوع الجاي مش اللي بعده..
"معناها بنعطي وحده من الرحلات لواحد من الجماعه"
اميمه:ديما ركز معاي وين نهدرز معاك..
"اقسم بالله مركز بكل حواسي ياقلبي بس هادي هربت مني شورك قلتيها واني شبه راقد يومها"
اميمه:خلاص معاش بنهدرزوا في الليل..
"شورك ع سبله"
قعدت تضحك بعدين وقفت وهي تتفرج ع البحر قالت:يهبل بحر القره بولي..
"مش احلى من بحر عيونك اللي غارق فيه"
ضحكت اميمه بخجل وقلبها يرفرف وسط ضلوعها..
فجأة بدت تضحك لما قالت:كان تشوف جدي خاش البحر بعكوزه..
"لاجدك هدا متوقع منه كل شي"
اميمه:عمر...
"تي نحبه ونموت فيه اللي جاب بوك اللي جابلي حب قلبي"
واميمه تضحك وخلاص...
من بعيد شويه..
يوسف:ريتوا اللي يمشي ع الميه هدا جدي..
مطيره:قول اللي يبي يدير طريق في البحر..
ضحكوا..
سدرة:خلاص عاد ياسركم الا جدي ايوه..
ريمه وهي مبتسمه؛ربي يحفظه مش باين عليه العمر..
صفيه:قولي الله يبارك اللطف..
يوسف شبح لأمه..
ريمه وهي مبتسمه بإحراج؛الله يبارك..
تكهرب الجو شويه بس سدرة حاولت تلطفه لما قالت:شوفوا بوي وعمي..
شبحوا جهتهم..
لقوا لطفي يشجع في عبد المطلب يدير سالطو ع قولتنا
لكن عبد المطلب كان جبان هلبه..
فاته لطفي وهو اللي داره..
بناته وحفيداته عيطوا وقعدوا يصفقوا وايديهم مرفوعات فوق..
وهو يعوم برشاقه وكأن مازال شاب في العشرينات...
☘وعدى هداكا اليوم الحلو بسرعه..
زي كل الأيام الحلوة...تعدي لحظه..
وروحوا بعد آذان العشاء لشارع القهوة..
لما درسوا سيارتهم قدام الحياش..
شافوهم محمد شنيبه وولده المهدي اللي كانوا واقفين ع السيارة يهدرزوا..
محمد:لطفي..
نزل المرش وقال:اووو حاج محمد شن الامور..
محمد:الحمدلله...كنتوا في البحر..
لطفي:تغييرة جو..
محمد؛مرة تانيه خل نديروها مع بعض توا حني ولينا عيله وحده عاد..
المهدي وهو حاط ايديه ورا ظهره سرق النظر لسدرة اللي كانت مقعمزة جنب بوها عيونها في صندلها اللي لابساته في رجليها..
الزوز اثرث فيهم كلمة" وليناعيله وحده..."
ووجعتهم هلبه.
لطفي:ان شاء الله إن شاء الله..
عبد المطلب:شن حالك يامحمد..
محمد شبحله وحياه بحركة اليد وقال:الحمد لله شن حالك انت..
عبد المطلب:ماشيه..
اما الحاج علي ماباش يعبرهم نهائي..
المهدي ركز عليه وحرك راسه يمين ويسار بعدين قال:شن حالكم..
لطفي:الحمد لله زعلان منك راهو..
المهدي ابتسم وقال:عارف وحقك ع راسي غدوة بإذن الله نكون عندك..
سدرة قلبها قعد يدق بعنف..
وطوبى واميمه شبحولها..
لطفي:مرحبتين بيك..هي تصبحوا ع خير..
عبد المطلب:تصبحوا ع خير..
محمد والمهدي:قدامكم كل خير..
وخشوا عيت الواعر حياشهم..
ومحمد شنيبه وولده ركبوا السيارة وتحركوا...
وخلوا نضال مقعمز في قهوته مقابل حوش لطفي الواعر يشوفله ويفكر في حفيدته...
وفي جنبه مطعم ربيع اللي كان شغال وزباينه كل يوم يكثروا..وهو منشغل بيه هو وبس...
☘☘☘☘☘
مقعمزات كلهم في الدار وهما لابسات بيجامات زي بعض غير الالوان تختلف..
ولافين شعرهم المبلول بفوطه..
آلاء:ياريتك شفتيه كيف يشبحلك ياناري مسكين شكله كلامك وجعه هلبه..
اريج وهي شاده ركبتها كانت تسمع في اختها وع وجهها باديه ملامح الحزن..
طوبى:انتي مش مقتنعه مايجيش تجرحيه هكي تقدري ترديه بإحترام يااريج نضال كويس هلبه مايستاهلش..
اريج:افف..باهي خلاص انتي وياها قريب نمشيله ونكب ع راسه..
آلاء؛كانك مراة وبنت امك وبوك ديريها..
طوبى:آلاء منك جد!؟.
اريج:فوتيها تخفف في دمها المالغه هادي..
والاء تضحك..
بعدين سكتوا للحظات وبدت طوبى بالكلام  .
طوبى:خسارة ديما فايتها الجو..
اريج:من هالعقده اللي واخداته..
طوبى؛مش عقده غيور..
اريج:غيره غبيه..
الاء:تسلط وتحكم وهي شخصيتها صفر قدامه..
طوبى:ريحوا رواحكم ردوا بالكم تقولوا قدامها الكلام وتشحنوها عليه..
اريج:اكيد بيبو .
آلاء:كلا اني بنقول..
طوبى:بش نقرض لسانك..
☘وغرفه ماكانتش تراجي في من يحرضها..
عبدالرؤوف:نطلعك الفجر نقعدوا للصبح ونروحوا.
غرفه بإستسلام:باهي راضيه ياسيدي المهم نشوف البحر..
عبد الرؤوف:تمام وتي روحك غدوة بعد صلاة الفجر..
غرفه؛خل نوض نحدد العبايه..
عبدالرؤوف؛فوتيها وديري عشي قبل بعدين حدديها..
ناضت وهي تقول:حاضر...امتى بتروح ببلبله؟
عبد الرؤوف؛شدتها خالتي تبات..
طلعت غرفه وهي تقول؛اها..
وهو قعد يتفرج ع التلفزيون...
☘ومن اللي عايش حياته اللي تعود عليها بهدوء..
للي قاعده حياته تمر بتقلبات كبيره...
الجالي...
اللي قاعد سهران للساعه12وهو يخدم ع تصميم لفيلا كبيره...
وهو مشغول بيها خطرت عليه الفيلا متاعه...
وخطرت عليه اللي بتسكنها..
وسبله ولقاها بش يفتح معاها حديث بعد نص الليل..
قام تليفونه واتصل بيها.
الجالي:ان شاء الله مش راقده...
☘وطوبى فهالوقت كانت فايقه..
سهرانه تخيط في مفارش حيكونوا جوء من بتاتها..
رن تليفونها..
سيبت اللي فيدها وطلعاته من جيب التوته وشافت المتصل..
ابتسمت ابتسامه خفيفه وحطت التليفون جنبها بعد سكرت الصوت ورجعت كملت خياطه.
☘هو عاود اتصل بيها مرتين تانيات وهي مابتش ترد..
تنهد وقال:شكلها راقده...
قعد يهز في رجله وهو مضايق..بعدين خش ع الفيس..
ومشي طول لحساب اخته نسرين..
خش ع قائمه الاصدقاء وقعد يدور ع حسابها لين طاح فيه..
كان اسمه "طوبى الجنه" باللغه الانجليزيه..
خش عليه لقاها مسكر...
مايقدرش يشوف منه الا الصور الشخصيه والغلاف فقط..
لقاها مغيره صورتها الشخصيه من سبعه دقايق بس..
ضيق عيونه وهو مستغرب..بعدين ركز في الصوره..
كانت ليها هي بس بدون ماتبان منها حاجه.. صورتها اميمه وهي واقفه قدام الشط عاطيه بالظهر وقت الغروب..
كانت الصورة حلوة بالمره..
هو طول دارلها حفظ...بعدين خش ع التعليقات لقاهم كلهم من بنات زميلاتها بنات اختها غرفه...
بعدين خش ع اللايكات لقاهم نفسهم بس زاد عليهم حسين..
هو عصب لما شافه وعرفه من ضمن الأصدقاء...
بعتلها طلب اضافه..بعدين طلع من الفيس وحط التليفون ع الطاوله..
وتتصل نجاة..
بلهفه قام التليفون يحسابها طوبى..
بس لما شاف اسم"احمد حميدا"بدت ع وجهه ملامح الملل..سكر الصوت حط التليفون في الدرج ورجع لهي بخدمته....
☘☘☘☘☘
تاني يوم...
الساعه 6:30فجرا...
واقفين قدام البحر وهما يشوفوا في منظر الشروق..
غرفه وهي مبتسمه:الله..مافيش احلى من البحر في الوقت هدا عندك حق..
عبد الرؤوف بإبتسامه؛بش تعرفي بس..
شبحتله بإبتسامه..
وهو شبحلها..
ريحة البحر وجوه الجميل ومنظر الشروق...
هادم كلهم خلوا مشاعر غرفه تتحرك وبقوة وقالت:انت اللي مش عارف..
هو بإستغراب:مش عارف شني؟
غرفه بنظرات كلهم حب وفيهم لمعة الدموع قالت:مش عارف اني شن نحس كل مانشوفك..ولاقلبي شن يصير فيه لما تضحك معاي وتهدرز لما تكون قريب مني تحن عليا برغم كل شي..حتى في عز قسوتك..
هو قعد يشوفلها ويسمع في كلامها ودقات قلبه متسارعه..
غرفه:نحس اني مستاحشه هداكا الراجل اللي كان كل صبح يراجي فيا ع رخامات علوم..
مستاحشه نظراته اللي كلها حب ولهفه..حكاويه العفويه ضحكته اللي ديما في وجهه..تسمع فيا كيف نتكلم ولا!؟
نزلوا دموعها مسحتهم وقالت..عمري ماتوقعت يجيني يوم ونقول هالكلام لحد في حياتي..
بس صار وقلته ليك انت ومافي حد يستاهله غيرك..
"مبروك...نحبك"
هو حس بكميه مشاعر رهيبه تجمعت في صدره خلاته يتنهد من وسط قلبه..
والدموع لمعوا في العيون..بس ماقدرش ينطق بكلمه..
هي تنهدت وقالت:عارفاتك صعب ترجع تصدق كلامي بس المهم عندي اني قلته وانت سمعته..
ورجعت شافت لمنظر الشروق اللي شهد ع هاللحظه المهمه في حياة عبد الرؤوف وغرفه..
غرفه اللي حست رد عبد الرؤوف..او مبروك مش بس تسمعه..
وهو محتويها بكل مشاعره..
عبد الرؤوف وهو معصب ومبتسم بفرح في نفس الوقت:بكل يافرخة انتي ماعنديش معاك عزم بكل..
هي قعدت تضحك وقالت:عارفه..
عبدالرؤوف ضحك وقال:شفشه..
🌸ومن بعد هاللحظه حلوة...انكسرت كل الحواجز..وذاب ثلج حقد السنين اللي فاتوا..ذاب عن جبال القلب اللي برغم كل شي صار فيه ماقدرش يقاوم حبه اكثر....استلسم وخضع لسلطة الحبيب الطاغيه....🌸
☘☘☘☘
"صباح الخير يام"
مغليه؛صباح الخير وليدي..افطر..
قعمز الجالي وبدي يفطر..
امه حطتله براد الشاهي حداه وقالت؛خل نطلع نشوف بوك..
ومشت طلعت من حداه..
وهوطلع تليفونه من جيبه وخش ع الفيس وطول للإشعارات..
لقي طوبى قبلت طلب الاضافه..
طول خش ع حسابها...
اللي كانت تفوح منه ريحة الفل وكله مليان لطافه...
زي الصورة الاخيره اللي منزلتها..
فنجان قهوة فوق طاوله منثور عليها ورد الفل...
وفوقها ذكر من اذكار الصباح..
عجباته طول دار لايك..
نزل للي بعده لقاها منزله صور  من طلعة البحر ومدايرة اشارة بيهم لبنات اختها اميمه وسدرة...
وكاتبه فوق..
(My Family💓)
تلقائيا كان يبتسم وهو يشوف في الصور...
بعدين خش ع التفاعل طول..
لقي حسين مرة تانيه داير لايك..
تبدلت ابتسامته لملامح الحده..
وطلع من الفيس واتصل بيها طول..
🌸هي كانت تشرب في القهوة بروحها ع رواق..
باقي العيله راقدين..ماعدا بوها اللي كان في حوش جدها يفطر مع بوه..
رن تليفونها شافاته..
ابتسمت خلاته يرن شويه تانيه بعدين فتحت الخط وردت..
طوبى:السلام عليكم صباح الخير..
"وعليكم السلام..ياصباح الورد ع طوبى هانم اللي شايفه روحها علينا ومش معبرتنا"
طوبى بضحكه:لاوالله مش هكي بكل بس امس اتصلت في وقت متأخر هلبه ماقدرتش نرد عليك..
استغرب صدقها وصراحتها وفي نفس الوقت عجبوه..
"يعني لامتى مسموحلنا نتصلوا بيك"
طوبى:العشره..
"وبعدها تشربي حليب وترقدي"
ضحكت وقالت:والله ياريت ندير هكي..بس للأسف مانحبش الحليب..
"اجاباتك ديما واتيه"
طوبى ابتسمت بإستغراب وقالت؛اول مرة حد يقولهالي..
"بطول عمرك ياجميله...قوليلي شن ديري توا"
هي ابتسمت بخجل وقالت:شي نشرب في القهوة بس..
"صحه"
طوبى:سلمك...وانت شن ندير..
"اني توا طالع للجنان نتمشى ونكلم فيك"
طوبى بإبتسامه؛باهي علاش اتصلت متأخر امس..
"حلو انك سألتي هالسؤال..ياستي قبل بنحكي معاك عن الفيلا اني لتوا ماجبتلهاش اثاث نهائي فقلت نسألك تفضلي تختاريه انتي؟"
طوبى:لالالا نبيك انت دير في كل شي بروحك مش حنختار معاك شي وبعدين لما نسكن فيه كان شقت حاجه ماعجبتنيش نقولك غيرها..
هو ضحك وقال
"تي اختصري عليا يابنت من الاول واختاري بروحك"
طوبى:لااختار انت الاول مرات ذوقك يطلع احلى من ذوقي..
"وكان طلع العكس"
طوبى:قتلك نغيروا بعدين..
"شكلك بتعبينا هلبه ياطوبى"
طوبى:شويه مش هلبه..
قعد يضحك...
وهي مبتسمه..
شويه قال..
"ايه العيله الجديده اللي تبنتيها شن سميتهم"
طوبى بضحكه:ياسيدي الفكرونه الكبيره سميتها "جرينيا" والصغار الزوز" لولي" و"لالي"
"حلو حلو...المهم حبيتهم"
طوبى:يهبلوا ويجننوا عندك علم احلى هديه تجيني في حياتي.؟!
"خلاص تو نديرلك الجنان حديقة حيوانات"
طوبى ضحكت..
☘وهو في عز انسجامه خش عليه انتظار..
شاف الرقم مط شواربه بإنزعاج ورد ع طوبى وقال:تمام اني بنسكر توا ماشي للخدمه بس قبلها بنطلب منك طلب..
"شنو هو"
الجالي بإبتسامه:تركبي فوق السطح وتوقفي مقابله حوشنا نبي نشوفك واني طالع..
"اممم.."
الجالي:لااممم لااببب بتركبي يعني تركبي..
ضحكت وقالت..
"باهي"
هو ابتسم وقال:سلام توا..
"سلام"
سكر وتنهد بضيق بعدين رد ع المكالمه التانيه..
الجالي:صباح الخير..
"صباح النور مع مني هدا كله انتظار ع الصبح"
الجالي:مصرة يانجاة تعكري مزاجي وتخليني نطلع من الحوش واني مش طايق روحي..
"خلاص انسى..طالع توا.."
الجالي:ايه توا ماشي للباب..تبي شي..
"سلامتك بس حبيبي نتلاقوا..باي"
الجالي:باي..وسكر عليها..
بعدين فتح باب الحوش وطلع..
شاف لحوش الواعر..
لقاها وافقه تراجي فيه..
ابتسملها ولبس نظاراته..وهي ردت الابتسامه..
بعدين مشي ركب السيارة..
خدي تليفونه وقعد يكتب بعدين بعتلها..
🌸هي جتها الرساله فتحتها..
"انزلي ياجميله"
شبحتله لقاته يشوفلها..
ابتسمت ومشت طول بش تنزل..
وهو ابتسم ابتسامه طالعه من وسط قلبه..
حس بدفعة طاقة ايجابيه سرت في جسده كله..تحرك بالسيارة وطلع سيدي فنانه المفضل...
وتبدا وحده من الاغاني بدي يغني معاها...
زيديني عشقا زيديني..يااحلى نوبات جنوني زيديني...
زيديني غرقا ياسيدي عل البحر يواسيني..
زيديتي موتا عل الموت...اذا يقتلني يحييني....

#إلا_انت
#طوبى

....يتبع....