نعتذر عن تنزيله والحذف الجزء نقطع مني بالغلط
#طوبى "أقحوان وفلة وياسمينه"
#جمان_فريد
#الجزء_الثالث_والخمسين"اواخر الشتا7"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
يوم الخميس..
الساعه 11:00صباحا..
جامعة طرابلس قاطع..ب
كلية اللغات..
كانت آلاء مقمعزة مع وحده من صديقاتها يهدرزوا عن..
آلاء:تحسابني مش عارفتها ولافاهمة لشن تبي توصل..تتلصق عليه..
:وانتي مش مدورة بكل..
آلاء:لإني عارفتها تعب في روحها ع الفاضي مهند معاي اني مايشوفش في حد..
:لكن هادي أكابر يالولو تعرفيها من تكون وبنت مني مرات مهند يشوف فيها فرصة العمر..
ابتسمت آلاء بثقة وقالت؛مهند لو يفكر هكي راهو مرتبط من زمان ياما حاموا حواليه نماذج زيها وماعبرهمش..
:ومع هذا نقولك ردي بالك هو في النهايه زيه زي باقي الشباب مايصلوش ع طرفه..
آلاء بإبتسامه غرور:حبيبتي مهند معمي بيا فاهمه شن معناها معناها مايشوفش الا فيا اني بس ياقلبي..
:إن شاء الله يكون هكي..وغيرت عيونها عنها جو ع مهند وهو جاي كيف جت بتقوللها شافت أكابر وقفت عليه قالت:هي تفضلي..واشرت بعيونها عليهم..
شبحت آلاء وين ماتشبح شافتهم..
ركزت ع مهند كيف يكلم في اكابر بأريحيه وكأنه يعرفها من سنين وهي مابطلتش ضحك وابتسامات..
تحرك في داخلها شعور الغيره ع حاجه تخصها ماتبيش حد يقرب منها..
قعدت تراقب فيهم وصاحبتها تراقب فيها هي..
☘أكابر:مانحكيلكش البوتيك كيف ولى زحمه وقداش باعت ماما من لما درنا الرعايه لبرنامجك..
مهند:وجوني المعلنين من كل تركينه وانحطيت في موقف محرج مع القناه واضطريت نرضى يكون في رعاة غيركم..
اكابر بضحكه:جيناك وجبنالك الخير..
مهند؛ووجع الراس والله..
قعدت تضحك اكابر بعدين قالت؛ربي يزيدك منه..
ضحك ضحكه خفيفه بعدين قال:ماشي لآلاء تجي معاي؟
أكابر:لاشن ندير جايه معاك ونولي عزول!؟..برا ماتعطلش عليها تو ديرلك قصه..
ابتسم وقال:لاآلاء عاقله ماعندهاش في الجو هدا..
رفعت حواجبها وقالت؛غريبه!..
عقد حواجبه وقال:شن الغريب؟
ابتسمت وقالت:شي شي..هي نخليك تمشي لخطيبتك..سلام..
مهند ابتسم وقال:سلام..ومشي وخلاها وباله تلميحها اللي مابتش توضحه...
مشي ناحية آلاء شافت صاحبتها وقفت وهي تكلم فيها بعدين مشت..
وهو وصل في آلاء وقال:السلام عليكم..
وقعمز جنبها بمسافه..
شبحتله بإبتسامه وقالت؛وعليكم السلام..شن جو..
مهند؛بشوفتك احلو..
آلاء:Thanks..امم قولي شن كنتوا تهدرزوا؟
مهند؛على موضوع الرعايه تشكر يعني..
آلاء:ع اساس فارق معاها ولامع امها..
مهند:مافهمتش؟
آلاء:قصدي خدمة امها هي تسلايه..مكسده ماعندها مادير قالت نفتح بوتيك اخر همها تربح ولاماتربحش..بعد وقت تمل وتفوته..
مهند؛مااعتقدش..صارفين هلبه ع المشروع..
آلاء:صدقني اللي صرفوه عليه أي كلام عندهم..
مهند؛ومن قالك هي تبي تكسب من وراه مرات تبي دير حاجه وتنجح فيها بس..
آلاء:تفكيرك مثالي اوفر..
ضحك وقال؛مش هكي..مش مقتنع ان في حد يحط مبلغ وقدره في مشروع بش يتسلى مازال ماوصلناش للمرحلة هادي من الرفاهيه..
آلاء:مسكين وماتعرف شي يامهند اني مخالطه العالم هدا وصلنالها وتعديناها المرحلة هادي بالذات الناس اللي شادين مناصب في وقتنا هذا غارقين في الفلوس..
مهند؛رزق سايب ماهو..وحرام..
آلاء:مش موضوعي حرام ولاحلال..اني بس نبي نوريك حاجه انت مش شايفها بس..
ابتسم وقال؛تمام..فوتي الموضوع هداوخلينا في المهم..جايك اليوم نبيك موضوعين مهمين متصلين ببعض هما..
عقدت حواجبها وقالت:مواضيع شني هادي؟
تنهد وقال:ياستي بما إن البرنامج متاعي ولى برعايه اكثر من معلن فقلت لو نزيد عليهم معلن جديد ومهم هلبه بالنسبه ليا اني..
ضحكت وقالت؛راك تقول ليا اني..
مهند بضحكه:لاطبعا انتي مش فاتحه مشروع رسمي..
آلاء:مالا لمني؟
مهند؛لقهوة جنة..مطحن جدك لطفي.
آلاء وهي تفكر:وشن خطر عليك؟
مهند:ع خاطر خالتك بالدرجه الأولى..
آلاء:قصدك خالتي سدرة؟
مهند بإبتسامه:ايه خالتك سدرة..قداش تمنيت تكون مكان اللي ماعرفتهاش..وين جينا لشارع القهوة كنت صغير مانذكرش هلبه حاجات بس اللي مستحيل ننساه حنيتها ومعاملتها الحلوة..نظراتها اللي كلها حب يدها اللي تمسح بيها ع راسي..كنت نتخيل فيها امي كنت نبيها تكون امي..لكن للأسف هي مابتش.
لمعوا عيونه بالدموع وهو يقول..بوي قاعد يحبها لتوا ويتمناها من كل قلبه...
آلاء:خسارة ما ضيع من عمره لو نساها راهو توا عندك خوت وخوات.
مهند؛هو فقد أمله فيها صح بس ماباش يشوف لغيرها وفي نفس الوقت ماكانش يبي يجيب أي وحده ع خاطري اني عنده اي وحده غير خالتك سدرة مش حتكون زيها..
آلاء:باهي اهو انت توا كبرت وخاطب وبتتزوج وهو يقعد بروحه ..
مهند قعد يشوف لآلاء وهو يفكر في صراحتها ووضوحها انها تبي تسكن بروحها بعد الزواج ولأن عارف هالشي من البدايه
خطط يجمع بوه بالإنسانه اللي يحبها من سنين ويخليه يكمل عمره معاها وبهكي بطمن عليه..
مهند:هدا هو الموضوع التاني..نبيك تساعديني نجمع بوي بخالتك..
ضحكت وقالت؛مستحيل!
مهند:صعب مش مستحيل..
آلاء:انت مش فاهم مهند..خالتي الفترة الاخيره نفسيتها تاعبه هلبه...اغلب الوقت منعزله وديما في الحوش وكان قعمزت معانا ماتتكلمش هلبه..تحسها عجزت قبل وقتها..
مهند:وبوي عارف وضعها هدا وديما يسأل فيا عليها ديما يقولي سدرة تبي حد يعرف يطلعها من الوضع اللي هي فيه..وعنده الحق..خالتك تبي حد تكون في حياته كل شي..
يهتم بيها يكون قريب عليها همه الوحيد انها يسعدها وبس..خالتك عاشت عمرها لغيرها وتوا تبي من يعيشلها باقي عمره..
آلاء وهي تفكر في كلامه؛هو كلامك صح الحق..بس خالتي شن يقنعها يامهند حتسكر الموضوع طول اول مانفتحوه..
مهند:فكرت في الحاجه هادي ولقيت ان خالتك مايقدر حد يأثر عليها اكثر من طوبى..
آلاء:طوبى!
مهند؛ايه..انتي افتحي معاها الموضوع وشوفي رايها قبل في زواج خالتك بشكل عام لقتيها متقبله الفكرة قوليلي ع بوي..
آلاء هزت راسها وهي تفكر وقالت:تمام..تو نكلمها..
ابتسم وقال؛ان شاء الله يصير منهم..
شبحتله وابتسمت وهي تقول:إن شاء الله..
قعد يتأمل في ابتسامتها وهي تشوفله..
حط يده في جيب كبوطه وطلع منه سلسال ووراهولها وهو يقول؛ شن رايك؟
كان سلسال بسيط التعليقه متاعه اسمها ضحكت وقالت:حلوة..بس اني يومها هدرزت عادي راهو..
مهند؛صح..بس وانتي تحكي ع متاع خالتك حسيت خاطرك في واحد زيه..
آلاء بضحكه؛بصراحه ايه..
خدي الشيت منها وضربها ع رجلها ضربه خفيفه بيه وهو يقول:شن قلت قبل مش قلت خليك ع طبيعتك..
قعدت تضحك وخدت منه الشيت..
مدلها السلسال وهو مبتسم..
هي خداته وقعدت تتفحص فيه..
مهند:مش ذهب فضة مطليه ذهب..
هي ابتسمت وقالت؛لكن حلوة..
رفع حواجبه ونزلهم وقال تعجبا:غريبه!..
آلاء:شن قصدك!؟
مهند؛اللي عجباتك حاجه مني وقلتي عليها!..
ضحكت وقالت؛نجامل فيك بس..
مهند؛ايوه هادي آلاء اللي نعرفها..
بزعل مصطنع قالت:مطلعني مسمومه هلبه راهو..
مهند بإبتسامة حب:واحلى مسمومه والله..
ضيقت عيونها وهي تشوفله وضحكت سخريه..
وهو قعد يضحك عليها..
وأكابر من بعيد شويه تشوفلها ودمها يغلي من الغيره..
☘☘☘☘☘
مقعمزة ع السرير تحط في طلاء أظافر ع ظوافرها..
وهو طلع من الحمام بعد ماكان يدير في دوش وقال..
حامد؛بتباتي في حوش ماليك كالعاده..
نسرين:اكيد..
وهو ينشف في شعره؛امتى بتمشي؟
نسرين:بعد الغدي..
نزل الفوطه وقال؛تمام معناها نرفع امي والصغار لحوش خالتي بعدين نجيك..
نسرين؛مش لازم بنمشي في سيارتي..
حامد:انتي حرة..
ومشي وقف ع المرايه يمشط في شعره..
وهي لاهيه في اللي دير فيه وفي نفسها تتوعد فراجلها..
☘☘☘☘☘
الساعه 1:30ظهرا..
في شقة..شويه في حقها ينقال عنها شقه من تصميمها وديكورها الفخم...
كانوا موجودات آلاء وغرفه..
مقعمزات في صالونها..
يمرروا في نظرهم عليها ..
وآلاء في قمة الإنبهار..قالت..
الله يبارك.ولافي الخيال اللي نشوف فيه توا شفته في التلفزيون بس حتى في فيلا عمي ماريته..
غرفه بمباهاة:حتى هو مختار الواعر..
شويه سمعوا جرس الشقه رن..
وتجي الشغاله اللي من بلد عربي شقيق..
وتتوجه للباب بش تفتحه..
غرفه:شكله جي..
وقعدوا الزوز يراجو فيه يخش عليهم..
وبان عليهم وهو مبتسم ابتسامه عريضه ويقول:اهلا اهلا بالبرنسيسات اهلا..
ناضوا الزوز وهو يضحكوا..
وصل فيهم سلم عليهم الزوز بالأحضان وهما يسألوا عن احوال بعض..
بعدين قعمزوا وهو يقول:آسف جدا كان شغل مهم هدا علاش عطلت..
غرفه:ولا يهمك..
ابتسم وقال:شن حالكم شن اخر الأخبار..
هما الزوز ردوا؛ماشيه..الحمد لله..
غرفه:اكيد الاخبار عندك..
مختار:نبي نسمع منكم..
غرفه:بنت عمك شكلها بتطلق..
مختار:احسنلها ماعنده مادير بيه الزواج بنيه طموحه وناجحه في قرايتها جريمة درتها في عمرها انها تزوجت..بس اني اللي يهمني في القصه طوبى..
آلاء:لاخالتي طوبى وضعها يختلف خالو وراجلها كويس هلبه وحاطها في عيونه..
مختار:مازال ماتحكميش توا كلهم هماشهرين راهو..!
غرفه؛بس طوبى حق وضعها يختلف يعني ماعندها علاش يصير مشاكل بينها وبين راجلها عكس اميمه شغلها هو اللي وصلها لهني مع راجلها..
مختار:مش عارف..بس فكرة ان طوبى تتزوج في سن صغير من واحد اكبر منها ب13سنه غلط في نظري اني مش عارف كيف اختها ام العريف عطتها هكي..
غرفه ابتسمت تهكما
آلاء:بس متفاهمين خالو..قصدي مش باين عليهم الفرق والجالي كويس هلبه هلبه..
تنهد وقال:هو اني قعمزت معاه في فاتحه اختك يبان كويس..
آلاء بدهشه:جيت لفاتحة اريج؟
مختار لغرفه:ماقلتليهاش؟
غرفه؛راح عن بالي..
شبح لآلاء وقال:ايه حضرت الفاتحه بنت اختي هادي حتى لو أمها مابتش دورني..
الاء قعدت ساكته وهي متفاجئه..
غرفه؛رؤوف قالي ان في معرفه بينك وبين سلف فردوس..
ركزت آلاء..
مختار: اني وياه شركاء في مشروع برا البلاد واني اكبر ممول للمشروع..
آلاء في نفسها"اهااا..توا فهمت"
غرفه:امم..
مختار:المهم..الجالي راجل طوبى حكالي
عنها وكيف انها متمنيه تشوفني وحتى حكالي عن اللوحه اللي رسمتهالي زاد شوقي لشوفتها اني نحضنها ونهدرز معاها زي مادرت معاكم..بس هي بزايد..
تحرك داخل غرفه شعور ليه وقت خامد تجاه طوبى وهي تسمع في مختار شن يقول..
آلاء:الحق خالو طوبى تحبك هلبه من غير ماتعرفك وقداش تمنت تشوفك وبكت ع خاطرك..
بانوا الدموع في عيون مختار وغرفه لاحظتهم وماتحملتش وبدت تقول؛لو هكي حق علاش ماطلبتش تشوفه ولاتكلمه مستحيل ماتكونش عارفه انه روح وان جي لحوشي وانه حضر فاتحة اريج مادامه الجالي هدرز عليه..
سكتت آلاء وهي تفكر في كلام غرفه..
ومختار نفس الشي..
غرفه وهي تشوفله؛اكيد سدرة قلبت راسها بكلمتين اللي تقوله سدره ديما ماشي عليها وهي ماتفضل ع سدرة حد..
آلاء:بس خالتي سدره ولا مرة تكلمت ع خالو..
غرفه:بالك بتدوي قدامك!؟ وبعدين بالمنطق يعني معقوله الجالي مايقولهاش!؟..بلاش الجالي ماسمعتش من هني ولاهني!؟
مختار عقد حواجبه وقال:راجلها نفسه طلب رقمي بش يعزمني لحوشه ع اساس يبي يفاجئها بس اني قلت خبرها قبل وشوف شن تقولك..الباين صار زي ماقلتي ردت الشيرة ع أم العريف وهي منعتها..تبي تقهرني بيها..الوحيده اللي ماحضرتش ولادتها ولاأي جزء من طفولتها عكسك انتي ياغرفه...
غرفه لاحظت كيف يدوي وهو غضبان ومقهور قالت:ماتحرقش دمك وخيي خلاص فوت حني جايين نوسعوا خاطرك وخاطرنا مش نزيدوها نكد!..
شبحلها شويه بعدين ابتسم وقال؛عندك حق..بعدين ضيق عيونه وقال. راجلك وينه؟
غرفه:عند خدمه يكملها وع الغدي يكون هني..
ناض وقال:تمام..هي نوضوا نوريكم الشقه..
آلاء؛حرام ينقال عليها شقه..
ضحكوا غرفه ومختار بعدين قال:تعالوا معاي تعالوا..
☘☘☘☘☘
وفي البركيدجو المغلق التابع للشركه الهندسيه اللي يخدموا فيها نجاة والجالي..
كانت واقفه عليه وهو شاد ايديه الزوز ويقول..
الجالي بضحكه؛بطلي هبال ياختشه..
نجاة:قول ياصبارة..مش سادني هديكا يكملوا عليا السنكوحات اللي هني!..وبعدين خفف اناقه شويه والعطر متاعك غيره..
الجالي بضحكه:وشن تاني!؟
نجاة:من غير تسهويك زي ماانت تغار حتى اني نغار..
ابتسم وقال:باهي بري اركبي سيارتك يللا..
نجاه:اليوم بنتلاقوا غادي..
رفع حواجبه وقال:نجاه ريحي جمالك..
طلقت ايديه ومشت وهي تقول:مريحاته بس جمالي مش حيريحك..
قعد معاها بعيونه لين ركبت السيارة..
لما سكرت الباب شبحتله وغمزت بعينها وهي مبتسمه..
وهو ضحك وحرك راسه يمين ويسار بعدين مشي ركب سيارته..
شغلها وتحرك ومشي طلع وهي طلعت بعده..
🌼وطوبى..
في الحوش..كانت توتي في كذا نوع اكل..
حلو..المبروشه وسوسيرول..
والحار..لازانيا والفخده الكذابه..
حكمت عليهم مغليه يديروا لمة نهار الخميس وكل وحده تجيب معاها حاجه..
كملت كل شي ولفاته كويس..
بعدين ركبت للدار..
دوشت..ولبست وقعدت تراجي في الجالي..
كانت خاشه تشوف في الفيس..
لقت منشور لأميمه كيف نازل..
(الإنسحاب من حياة بعض الأشخاص..لايعني الاستسلام بل غالبا يعني انك صمدت طويلا من أجل شيء لايستحق)
دمعوا عيون طوبى وهي تقرا فيه..
🍃بس في عيون فرحت بيه ع الآخر..
قصي وهو مبتسم بنصر؛من الاول عارفينه مايستحقش ياأميمه لكن انتي ربي يهديك..يللا المهم حولته من طريقي..
تنهد وقال..توا ياقصي اميمه مكسورة وحزينه تبي من يطبطب عليها ويرفع معناوياتها ومافيش خير منك للحاجه هادي..
ضحك نص ضحكه وناض ومشي طلع من مكتبه..
☘☘☘☘☘
وجي عبد الرؤوف لشقة نسيبه مختار..
وهالزيارة كانت هم ع قلبه يراجي امتى يزيحه..
تغادى وجامل لين زهقت كبده وبعد الغدي..
مختار؛هي نخلوكم براحتنا وحني نمشوا نهدرزوا ع حالنا..
غرفه بضحكه:ع شني!؟
مختار:خدمه ياقصقاصه..
وعبد الرؤوف يشوفله وهو يفكر شن يبي منه..
شبحله مختار وقال:هيا بونسيب .
ابتسم عبد الرؤوف وقال:هيا..
مختار:تفضل للمربوعه..
ومشوا الزوز ناحيتها..
غرفه وهي تشوفله؛خاطري نزوجه..
الاء؛تزوجي مني واضح خالو كاره الزواج.
غرفه تنهدت بضيق وقالت:ان شاء الله تصير حاجه تغيرله رأيه..
☘☘☘☘☘
"ماشاء الله ماشاءالله سفرة مشكله منوعه"
هادي نسرين وهي تصور في لمة غداهم...
وعائشه واميمه واقفين يشوفولها بضيق..
بينما نجاة قاعده تصور معاها.
مغليه:بري العاله المحطوطه في الدار حتى هي..
نسرين:شويه بس..
وقفت تصوير ومشت طلعت من حداهم..
نجاة:صحيتي عمتي درتلينا تغييرة جو.
مغليه:ديما جونا مليح ورايق ان شاء الله..
نجاة؛ان شاء الله وديما عامر هالحوش..
وطوبى وعائشه يشبحولها..
مغليه؛حوش عمك ديما عامر ومفتوح لناس كلها لكن مايقعد فيه كان الباهي..
شبحت طوبى لعائشه..
عائشه غمضت عيونها وفتحتهم بمعنى فوتي..
مغليه:توقعتك ديري العصبان ياطوبى وعدتيني بيه عاد..
نجاة شافتلها وهي مضيقه عيونها..
شبحتلها وبلعت ريقها وهي تحاول تهدي نفسهابعدين قالت:راح عن بالي عمتي سامحيني..
مغليه؛الخميس الجاي نبيه مادخليش بيك..
ابتسمت مجامله وقالت:حاضر..
ونجاة تشوفلها من فوق لتحت وعائشه مركزة عليها..
ع خشة نسرين وهي تقول:نزلت كله ستوري وبوست كلامه مستف وشكرتكم فيهم هلبه نساوين خد
نجاة:نجيها ياربي..
طوبى وعائشه:شكرا..صحيتي..
مغليه:هيا بسرعه توا سفرة الرجاله..
نجاه بإستعجال:هيا هي..
وقعدوا يجهزوا وطوبى وعائشه بالسيف عليهم يتحركوا..
🍃🍃🍃
خديجه وهي تشوف في المنشور اللي نزلاته نسرين:ايوه يما ايوه زيدك عز...
🍃مطيرة:ريتي نسرين صاحبتك شن منزله؟!..
تنهدت سدرة وهزت راسها بإيجاب..
مطيره وهي متنرفزة:لولا خوفي ع طوبى كنت وريتها العنقروفه مغليه..
سدرة قعدت ساكته وهي مضايقه..
🍃وفي حوش الحاج علي..
خشت صفيه ع اميمه الدار وهي تقول:ريتي بنت عمك..
اميمه بإستغراب؛مني!؟
عطتها التليفون وقالت:شوفي..
خداته اميمه وشافت المنشور..
وقراته..ابتسمت بتهكم..
صفيه؛تبندرلهم..
اميمه مدتلها التليفون وقالت؛شن تبيها دير قوليلي تطلب الطلاق حتى هي ع خاطري!؟
صفيه خدت التليفون وقالت؛تاخد موقف تبين انك مش هاينه عليها...مش هكي نهاري!؟
اميمه؛نسأل سؤال ماما..لو صار العكس وطوبى في مكاني توا شن تنصحيني ندير؟
سكتت صفيه معاش عرفت ترد..
اميمه ابتسمت وقالت:خلاص يام اني معاش يهمني حد لاهو ولاماليه ولاشن يديروا..همي الوحيد توا اني نخلص بس..
شبحتلها بنظرة عدم رضا بعدين مشت طلعت من الدار وجبدت بابها بقوة..
تنهدت اميمه بعدين رجعت فتحت الكتاب اللي كانت تقرا فيه..
☘☘☘☘
"الموضوع فيه لعبه"
مختار؛لعبه!
عبد الرؤوف وهو مبتسم بثقه؛ايه وواضحه ماتمشيش عليا يامختار بيصير في تلاعب في اوراق رسميه..
مختار:تحب المبالغه..
عبد الرؤوف:لا مش مبالغه...اللعبه هادي لو انكشفت اول من بيريح في القص اني..
مختار عقد حواجبه وقال:هدي شويه هدي وماتغلطش في الدوة...شن تشبح فيا قدامك حرايمي!؟
عبد الرؤوف:شوف مختار من الاخير بش نريحك وتريحني..راهو عرفت عليك كل شي..كل شي حتى اتفه التفاصيل..هدا علاش بنقولك اختك مش نمنعها تواصلك لكن اني طلعني من حساباتك تمام..
قعد يشبحله وهو ساكت..
وعبد الرؤوف ناض وهو يقول؛ان شاء الله ديما عامر..
وقعد يشبحله مختار وهو ساكت..
عبد الرؤوف؛ماتبيش تسقدنا؟
ناض مختار وملامح وجهه متجهمه..
وقال:تفضل..
مشي عبد الرؤوف وهو وراه يشبحله بحده..
🍃وصلوا للصالون..
عبد الرؤوف:غرفه هيا..
غرفه؛مازال بكري رؤوف حتى العصر ماآذنش!..
مختار:الراجل مشغول وعنده هلبه مشاوير بعيده مايقدرش يولي بعدين..نهار تاني تعالي من الصبح وروحي امتى مايعجبك..
ناضت غرفه وآلاء ناضت بعدها..
وعبد الرؤوف حاط ايديه ورا ظهره وهو يحرك في الصوابع من العصبيه..
اما مختار بصوت يفجع نادى:عنيات..
شبحوله كلهم بفجعه..
وهو مادور حد فيهم..
وصلت فيهم الشغاله وهو قاللها؛جيبي عباية المدام..
:حاضر..ومشت طول..
غرفه قعدت تشبح لعبد الرؤوف وهي تسأل فيه بعيونها وهو تجاهلها..
وآلاء مركزه مع خالها اللي كان باين فيه الغضب..
جت الخدامه وقالت:تفضلي حضرتك..
خدت غرفه الملايه والخمار ولبستهم..
عبد الرؤوف:هي السلام عليكم..
ومشي وهو يقول:بسرعه غرفه..
بعد مالبست غرفه حولت الخمار وجت لخوها سلمت عليه وهي تقول؛تعالالي باهي..
مختار هز راسه وقال:ان شاء الله..
غرفه تأكدت ان في شي صار بينه وبين عبد الرؤوف..
مشت وهي مضايقه..
والاء سلمت عليها بسرعه وطلعت..
هو بعد ماسمع باب الشقه تسكر..
غمض عيونع بغضب بعدين فتحهم ومشي بإتجاه داره...
☘☘☘☘
بعد الغدي..
تعانوا طوبى وعائشه ع غسل الماعين..
امان نجاة تسبلت بولدها اللي بيرقد وهربت طول لجناحها..
بينما نسرين..
🍃مغليه؛شن خطر عليك توا!؟.
نسرين؛اني موصيتها تجيبهولي اليوم.
مغليه؛باهي امتى بتولي..
نسرين:قبل المغرب..هي بالسلامه توا..
ومشت طول طلعت من الحوش..
اتصلت بالشغاله قبل لتركب السياره..
نسرين:طلعتي انتي؟.
"ايه يامدام وهو طالع بعدين"
نسرين ؛تمام..
وسكرت عليها..بعدين ركبت السياره..وشغلتها وتحركت..
☘فهالوقت..
مشي الجالي بإتجاه جناح نجاه لما اكدتله في رساله ان الكل لاهيين وانها رقدت صغارها..
قعد يتسحب لين وصل في الجناح..
وهي كانت واقفه في الباب تراجي فيه..
اول ماشافاته فتحت الباب..
خش طول وهي سكرت الباب بالمفتاح..
🍃وفي الكوجينه..
طوبى:اني حاولت يومها نحصل معاها ماقدرتش قلت نتلاقوا اني وياها برا خير..
عائشه:تعبي في روحك ع الفاضي حاسمه امرها...
طوبى؛اني بنحاول صابت صابت خابت خابت..وربي يعوضهت خير..
عائشه تنهدت وقالت؛ان شاء الله..هي خل نطلعوا نقعمزوا حدا عمتك خير ماتقول يتآمروا عليا..
ضحكت من وسط ضيقها..
بعدين مشوا هما الزوز طلعوا من الكوجينه وتوجهوا لدار المعيشه..
☘☘☘☘
ونسرين وصلت للشارع اللي تسكن فيه..
درست بعيده شويه..
وقعدت تراجي امتى تطلع سيارة حامد..
ماطولتش وهي تستنى طلع..
وهي مشت وراه بس بمسافه بش مايشوفهاش..
🍃قعدت وراه لين وصل لزنقه في منطقه ما..
طلعتله وحده ركبت معاه..
تحرك طول..
وهي لحقاته...
وقعدت وراه لين وصل للحوش وخش بالسيارة داخل..
نسرين بغضب ودموعها في عيونها:آااه ياكلب ياوسخ تو تشوف شن يصير فيك..
واتصلت بعمته...
نسرين:ايوه عمتي وينك توا..
"اهو توا بنخش لشارعكم جايه مع كنتي راهو"
هي تفاجئت
"هي زي ماتعرفي استشاريه في امور الاسرة وهكي بالك تساعدك"
نسرين:مش مشكله..
"هي هانا وصلنا نشبحوا في سيارتك.."
نزلت نسرين من السياره..
شبحتلهم حيتهم بحركة اليد..
وهما ردوا عليها ونزلوا..
جوها وسلموا عليها..
بعدين قالت عمته؛متأكده انه مش فالحوش..
نسرين؛ايه ماعنده مايدير فيه..
كنة عمتها:ع العموم كل مشكله وليها حل..
نسرين؛ان شاء الله...هي تفضلوا..
الزوز قالوا:يزيد فضلك..ومشوا معاها..
☘حكتلها نسرين ان في مشاكل بينها وبين حامد وانها واصله بينهم للطلاق بس خايفه تاخد هالقرار وتخرب حوشها..وعمته لأنها تحب تصلح بين الناس قررت تخش بيناتهم بالخير زي ماتوقعت نسرين..وطلبت يتلاقوا ويهدرزوا اكثر..ونسرين قبلت وعطتها الموعد والمكان..☘
وهي خاشه للحوش كانت ترعش مع بعضها بس تحاول دير روحها عاديه..
نسرين:ايه حقه عمتي انتي ماشفتيش الفيلا كلها ولى..
:هي كلها مريرة اللي جيت فيها وقفت ع عزوزتك وروحت..
نسرين ابتسمت وقالت:باهي خل نوريك ذوقي.
شبحت لكنتها وقالت بإبتسامه؛تفضلي..تفضلوا..
ومشت نسرين وقعدت توري فيهم فالفيلا..
تبي ترفعهم لدار النوم قبل أي شي بس ماتقدرش بش ماثيرش شكوكهم..
وصلوا في الممر اللي يرفع فيها..
نسرين؛هونا دار نومي..
والباب كان مسكر..
مشتلها نسرين وقلبها يدق يقوة من التوتر والخوف ووراها عمة راجلها وكنتها..
لما قربوا يوصلوا في الباب..
العمه قالت وهي متعجبه:هذا شنو؟
ونسرين فتحت الباب طول...
☘☘☘☘☘
طلعت من الجناح ومشت خشت للدار..
نجاة؛مارقدوا لين طلعوا..
مغليه بإبتسامه:سلامتهم..
ومشت قعمزت قريبه ع طوبى..
مررت نجاة نظرها عليهم وين جو عيونها ع طوبى لقتها تتفرج ع التلفزيون..
قامت تليفونها وخشت ع الرسايل وكتبت رساله وبعتتها..
(الطريق سالكه)
🍃جاته الرساله..
قراها وهو واقف ع الزيانه..بعدين مشي طلع من الجناح..
ونسي ساعته غادي..
🍃طوبى وهي تتفرج..
شمت ريحة عطر تعرفه كويس..عطر الجالي..
راجلها..
كان فايح من نجاة...
نزلت عيونها وهي تشوفلها..
لقتها لاهيه بالتليفون وهي تبتسم..
عقدت حواجبها..
وصدرها ضاق..ضاق...ضاق..ضاق هلبه..
نزلت نجاه التليفون لوطا وهي مبتسمه وشبحت للتلفزيون..
وطوبى مازال تشوفلها وهي حاسه بشعور خوف رهيب اجتاح قلبها اللي انقبض..
مغليه:طوبى نوضي فرقي الشاهي..
استاقظت وشبحت لعزوزتها بعدين ناضت من غير ماترد..
وكانت حاسه روحها وكأنها بدوخ..
خدت السفرة ومشت عطت لعائشه اللي ماخدتش اكثر من الشاهي..
ماقالتلهاش خوي معاه حاجه ولا أصرت عليها..
مشت طول لنجاة ومدتلها..
ونجاه خدت الطاسه ومعاهم كم حاجه وهي تقول:سمعت عن مبروشتك هلبه تشوقت نذوقها..
طوبى قعدت تشبحلها وهي مازال تشم في ريحة العطر..
نجاة:صحيتي..
طوبى وخرت عنها وردت السفره مكانها..
مغليه:خيرك ماخدتيش؟
طوبى قعمزت وهي في قمة الضيق وقالت:ماعنديش نيه توا..
مغليه؛ع راحتك.
وعائشه ركزت ع طوبى لقتها تشبح لنجاة بنظرات غريبه..
🍃🍃🍃🍃🍃🍃
"نهار احرش اسود مغبر!"
ومشت تجري وهي جابده كنتها معاها..
ونسرين بغضب ودموعها ينزلوا:تفي...
ولفت ومشت بسرعه وهي ترعش مع بعضها..
العمه وهي تندب بصدمه:حي ياحي!..
:شن في عمتي شن شفتوا داخل!؟
جتهم نسرين وهي ترعش مع بعضها ودموعها ينزلوا سيل..
جتها شدتها وهي تقول بنبرة خوف:نسرين شدي روحك يابنتي شدي روحك ربي فضحك قدامك هالفاجر هدا لعنة الله عليه..
نسرين وهي تبكي:نبي نطلع ..
عمته وهي ترعش:عندك حق ياكبدي حق مازال ينقعد فيه حوش نخش زي هدا!!؟
ومشوا طلعوا بيها ونسرين ترعش وتبكي..
☘صح اللي صار مش مفاجئ ليها هي عارفه كل شي..بس مش زي لما تشوفه بعيونها..حتى لو ماكانتش تحب راجلها بس الموقف كان مهين ويكسر ويقهر في النهايه هي مرته☘
طلعوها برا..
ومشت بيها العمه للسيارة..
؛سوقي انتي ياسهير اني فشلت مع بعضي..
:حاضر عمتي..
خدت منها مفتاح السياره..
ركبوا كلهم ..
والعمه ركبت مع نسرين للخلف..
العمه بصدمه: زمان يقولوا عليه بناوتي وبنت خالته سيباته لأمنه خانها لكن ماصدقتش ماكانش يبان عليه ياهمي!...اطلقي منه هالفاجر اطلقي حرام تقعدي ع ذمة واحد زيه...
نسرين انهارت بالبكي..
كنة العمه بأسف:لاحول ولاقوة الا بالله..
وتحركت بالسيارة طول..
🍃اما هو..
حامد وهو يرجف وفي قمة التوتر:بسرعه تحركي بسرعه..
طلعت اللي معاه تجري...وهو طلع معاها...
وركبوا السيارة وطلع بيها برا الحوش..
☘☘☘☘☘
"خوك هدا اني معاش نبي تكون عندي بيه اي علاقه"
غرفه بصدمه:شن جاك عليه فجأه! من معبيلك راسك قول..
عبد الرؤوف بعصبيه:شن تشبحي فيا عيل قدامك !..
قدملها وقال..توا بس فهمت علاش سدره ماتبيش تعطيه فرصه..خوك هدا ماينفعش من الاخير..
غرفه:معناها هي اللي لاعبه بعقلك!؟
عبد الرؤوف من تحت سنونه؛معاش تقوليها الكلمه هادي معاش تقوليها..خوك ياغبيه..يبي مني نمشيله خدمه مش شرعيه ومش قانونيه حاجه ينلعب فيها ع الدوله بحالها..
غرفه بصدمه:كذاب!..
عبد الرؤوف؛تي تعرفي الحاجه هادي بعدين لو انكشفت اول من بيريح في القص اني..اني ياهانم...
غرفه دموعها نزلوا وهي تقول:انت فاهم غلط..
هز راسه وقال:تمام خوك ماتبيش تصدقي فيه ومانلومكش وقتلك قبل لوتبي تواصليه واصليه لكن اني معاش نبي نعرفه ولانبيه يخشلي حوش...
ومشي طلع من حداها وخلاها واقفه في مكانها مصدومه وماتبيش تصدق ان خوها ع خاطر مصالحه مستعد يضرها...
☘☘☘☘☘
فتح باب الشقه وخش بعد ماروح من الخدمه..
سكرها وهو يقول..
عبد القيوم ؛والله ماعندي نيه كان في النوم الشتا يقولك ارقد وبس..
بعد ماحول من رجله ومشي بيخش..
دق الباب..
التفت شبحله بإستغراب..
بعدين فتحه...
تفاجئ هلبه ..
لما شاف اللي واقف وراه..
كان حاط يد وحده ورا ظهره وهو يشوفله بإبتسامه كبر ويقول..
الجالي:السلام عليكم..تارقي...
#اواخر_الشتا
#طوبى
....يتبع.....