طوبى الجزء الاول

تابع

(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_الحادي_والخمسين"اهرجو يناير7"
《معظم أحداث هذه الرواية حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
اميمه بغضب مكتوم:كلامك كبير ياعمتي كبير ..
مغليه:وشن هو اللي قلته اني!!..قلت الحق..لما ولدي اللي هو راجلك يسافر انتي مسؤوليتنا حني لو صارت فيك حاجه راجلك حيحاسبنا حني ويقول اني خليتها حداكم...
تخيلي حالي واني نراجي في مرواحك امس وتفوت الساعه عشرة وانتي ماروحتيش لاتقولي نتصل لانخبر لاشي..كان مش من ولد ولدي قالي انك روحتي طول لحوش جدك راني خليت سلافك يلحقوك للمستشفى...
تخيلي يلحقوك ويقعدوا يدوروا عليك وحضرت جنابك راقده عند امك..
اميمه وهي تسمع فيها شن تقول حست بالذنب..
كلام مغليه مافيشي غلط..مفروض عطتهم علم..
نزلت عيونها وتنهدت بعدين قالت:عندك حق اسفه..
مغليه ابتسمت بتهكم وقالت:توا طلع عندي حق!..من بكري لما تردي عليا وتقولي راجلي عنده علم ماكانش عندي حق..!
قامت عيونها فيها وجتها بتسلم ع راسها وتقول:سامحيني غير..
قاطعتها لما رفعت يدها في وجهها وقالت:خليك بعيد..نزلت يدها وقالت..خسارة ماكنت نعزك ونشكر فيك وفرحت بيك لما خداك عمر..خيبتي ظني فيك خسارة..
وخدت المصحف ونظارات ومشت طلعت من الكوجينه..
اميمه ماتحملتش تقعد في الحوش..
لفت ومشت وطلعت ودموعها ينزلوا..وصلت في الدروج وركبت لشقتها وسكرتها عليها...
☘وعند بنت عمها.
اللي كانت مقعمزة مع حماتها في الكوجينه حدا غداها اللي حطاته ع النار وهما يهدرزوا..
غرفه؛تقول دخلت لحوشي كافر! هدا خوي واني نبيه ونبي نواصله مش من حقهم ياخدوا مني هالموقف..
نبيله:هما غالطين وحتى انتي ياغرفه غلطتي بطريقة تعاملك مع الوضع..
انتي لازم تحطي في بالك انك كنتي صغيره لما خوك مختار هاجر وسيبكم..وفردوس وسدرة كبار وواعيات يعني اكيده في حاجات صارت زمان انتي ماتعرفيهاش خلتهم رافضينه وخلا سدرة خايفه عليك منه..
غرفه:علاش تحسسوا فيا ان عدوي مش خوي شن بيديرلي يعني حرام والله حرام ظلم اللي قاعد يصيرله..
نبيله؛باهي مش ملاحظه ان موقفك هدا حيعصب موقف خوك قدامهم..يعني حيقولوا لما جي هو تسببلنا في مشاكل وقطيعه بين بعض..
سكتت غرفه وهي مضايقه..
نبيله؛زي ماتبيهم يفهموك حتى انتي افهميهم وحاولي تقربي بينهم وبين خوكم مش تزيدي حجم الفجوة..
غرفه بضيق؛ماتعرفيش سدرة بانبيله..
نبيله:لانعرفها كويس..اختك هادي اللي زيها في المجتمعات الغربيه يقولوا عليهم قديسات..
اللي ضحت وربت وكبرت واخر همها نفسها ياخي نفسها مش من اولياتها بكل...
اختك لعند قبل شويه أتصلت بيا تسأل عن حالك..وتكلم وتوصي في راجلك عليك وتقوله معليشي سايرها وخلي خوها يخش عليها ويطلع وخلي عينك عليها..
دموع غرفه عبوا عيونها وطاحوا وهي تسمع في نبيله شن تقول..
نبيله ابتسمت وهي تقول؛لوكان عندي اخت زيها نخسر كل شي في حياتي مقابل نقعد كاسبتها كل عمري..
نزلت غرفه عيونها لصوابع ايديها اللي كانت تفرك بيهم في الطاوله ودموعها يقطروا عليها..
نبيله:هي اختك وهو خوك الزوز واجب عليك تواصليهم وتأدي حق اخوتهم عليك..لكن..كل حد في مكانه..
مسحت غرفه دموعها ورشفت..
بعدين ناضت ومشت تشوف في غداها..
ونبيله ضمت شواربها لداخل بأسف...
☘☘☘☘
وروحوا الرجاله من صلاة الجمعه..
وحطولهم غداهم..
وقعد غدي الجار اللي ياكل من عندهم هما بس يوم الجمعه..
☘سلفرت طوبى الصونيه متاعه وحطتها في السفره..
بعدين خدت كاشيك ولفت عليها كلينكس وشداته بعود اسنان..وحطاته في الصفره..
وحطت بعدين حكة المشروب ..
شبحت لباب الكوجينه الخارجي ونادت:يزن..
"برا مرت عمي"
رفعت السفره ومشت طلعت بيها برا..
لقت يزن واقف يراجي فيها..
مدتله السفره وقالت؛هي خود..
خداها يزن وقال؛سفرة متكمه اليوم..
ضحكت طوبى وقالت:ارفعها بسرعه قبل يبرد الغدي..
يزن بإبتسامه؛عطيك الصحه..
ومشي..
وطوبى ردت عليه وهي مبتسمه ؛سلمك..
بعدين خشت داخل..
~~~~~~
وصل يزن قدام باب الشقه.
وقعد يدق عليه..
ويدق ويعاود ومافي حد فتح..
يزن؛وينه!؟
"وراك"
التفت يزن وقال بضحكه:ليا ساعه نطق ع الباب..
عبد القيوم بإبتسامه؛سامحنا شحطناك ع قولتكم..
مد يزن السفرة وقال:تفضل..
خدي عبد القيوم السفرة وقال:بارك الله فيكم..سلم ع باتك..
يزن؛يوصل..السلام عليكم..
ومشي نزل بسرعه..
هو ابتسم وقال:وعليكم السلام..
بعدين جي للباب فتحه وخش للشقه..
سكر الباب وشبح للسفرة لاحظ ان فيها شي متغير..
فيها اضافات وكل شي فيها منسق بطريقه حلوة..
يدوب ابتسم بعدين خش بيها داخل..
☘☘☘☘
وفي مكان تاني بعيد عنهم..
كانت نسرين موجوده في حوش عمة راجلها حامد اللي متعوده تلم العيله عندها كل شهر مرة..
تغدوا غداهم..
بعدين قعمزوا يشربوا في شاهي العاله وهما يهدرزوا..
وحده من بنات عمه كانت تحكي في قصة مست نسرين..
:وياحناتي جتهم وورتهم بالصور محادثات ولدهم وصوره مع البنات نزلوا فيه وقالوها خليه علينا حني تو نتصرفوا معاه وقعدت مسكينه تراجي ماليه يديروا حل ماصار شي وهو زاد تمادى..سيبتله الجمل بما حمل وروحت لماليها وطلبت الطلاق 
حاولوا يردوها بس هي سكرت راسها عليه..
وسكتوا فتره لاعاد كلمها حد ولاجاها منهم حد..
في يوم من الايام وصلتها دوة من ناس انهم يمشوا ويقولوا هو اللي يبي يطلقها لأنها بايرة وديما واخده وجهها وتنسرف في كل تركينه من غير ماتاخد شوره..
عمة حامد ضيقت عيونها وقالت بإزد.راء؛خ.زي..
:مش هكي وبس وين الناس قالولهم ان هي طالبه الطلاق لان هو ماينفعش ومتاع نساوين..كذبوها وطعنوا في شرفها وقالوا هي تقول هكي بلعاني تغطي ع عمايلها..
:وبالك ياوخيتي كلامهم حق..ربي يستر علينا!؟.
العمه قالت:البنيه اني نعرفها من لما كانت تقرا مع بنت كانوا يجوني ويهدرزوا عليا بنيه الله يبارك عليها محترمه ومتربيه وحشوميه..طاحت طيحة سوده..
؛اني ياعمتي اللي قاهريني ماليه عارفين ولدهم ماينفعش وركبوا بنت الناس الحق..
العمه؛ناس ماتخافش ربي..
نسرين بقصد قالت؛هو طبيعي يعني ماليه بيوقفوا معاه حتى كان غالط..
العمه:لالالا مش طبيعي يانسرين..اني والله لو واحد من ولادي يدير هكي ناخد حق بنت الناس منه تالت ومثلت..الدنيا اخرتها موت غدوة يوم الحساب مانافعني لا ولد ولابنت..
نسرين حست براحه عجيبه لما سمعت كلامها وزادت تشجعت اكثر ع اللي ناويه ديره...
☘☘☘☘☘
خشت بسفرة الشاهي للصاله..
لقت عزوزتها تتكلم بالتليفون..
فرقت ع سلفتها الكبيره..
بعدين حطت السفره ع الطاوله وخدت منه طاسة الشاهي ومدتها..
خدتها مغليه وهي تقول:لاوالله حرجانه منك يانجاة..
طوبى وهي تاخد في الطاسه متاعها قامت عيونها في مغليه لما سمعت اسم نجاه..
وعائشه مركزة معاها..
مشت طوبى قعمزت وتركيزها كله مع مغليه..
مغليه:خديجه بتروح نهار الاحد ان شاء الله وعربها بيديروا عشي ع سلامة ولدهم نبي نشوفك فيه..
"حاضر ياعمتي حاضر بإذن الله نكون غادي يوم الأحد"
مغليه؛ان شاء الله..اتصلي بعمك وانشدي عليه ماتخليشي يحرج منك تعرفيه قداش يعزك..
"حاضر عمتي ان شاء الله نسكر منك نكلمه هو"
مغليه؛بتبعتي الصغويره اليوم؟
"ايه بالله قولي لنضال يجي ياخدهم.."
مغليه:ان شاء الله تو نقوله..مانعطلش عليك بنتي سلمي ع وخيتك..
"يوصل عمتي حتى انتي سلمي ع الجميع..بالسلامه"
مغليه:يوصل..بالسلامه..
وسكرت وهي تقول؛اهي اللي ماهيش كنتي كان ماجتنيش لازم تتصل تنشد عليا..شبحت لطوبى وقالت..نجاة هادي وهي تسكن في اخر طرابلس لازم تكلمني وتحكيلي شن دارت وشن مادارتش وتاخد في شوري..تشوفي فيها هادي كانت مهندسه ليها قيمتها قبل تتزوج وبعد تزوجت راجلها قاللها قعمزي قعمزت...علاش الراجل يتزوج كان مرته تقعد برا اكثر من قعادها في حوشها...غدوة كان جو الصغار كيف يصير فيهم من بيعانيهم ويربيهم كان امهم ديما واخده وجهها وفي قولة نخدم نخدم...
عائشه وطوبى يسمعوا بصمت وولا وحده فيهم تقدر تعارض ولاتقول حاجه..
مغليه شافت للتلفزيون ورشفت من الشاهي بعدين قالت:حني نبو المركب تمشي لكن مادام بيستمر الحال هكي..شكلها بتغرق..
شبحوا طوبى وعائشه لبعض بقلق..
ومغليه عيونها ع التلفزيون وهي تشرب في الشاهي..
☘☘☘☘☘
وفي حوش جيرانهم...
كانت نجاح مقعمزة بروحها في الدار تشرب في مغلي النعناع وهي تتألم بعض الشي..
خشت عليها عواطف وقالت؛ناض عليك مرة تانيه..
نجاح بتعب:اممم..
عواطف؛صليتي اليوم ولاد..
هزت نجاح راسها بإيجاب بعدين قالت:زعمه عواطف..شن  اللي بتقوله الدكتورة غدوة!؟
عواطف؛ادعي يكون خير..
نجاح؛والله مابطلت دعاء..ربي يعطيني الصبر كان طلعت حاجه كبيره ويخليني نرضى باللي كتبه عليا..
عواطف:تفائلي خير اللطف!
ارتسمت ع ملامح وجهها المتعبه ابتسامه وهي تقول:حتى اني متفائله خير...
☘نجاح كانت متخوفه..وحاسه ان فيها شي خطير..
بس في شي داخلها كان يطمن فيها ويقوللها كله خيره..
وهالاحساس ماجاش من فراغ..
اثر الذكر والقرآن اللي تمسكت بيهم نجاح هلبه الفتره الاخيره ..
الروح توالفت مع اصلها تغذت بيه وتقوت وبدت تقاوم في اي شعور سلبي يوجعها ويتسبب في ضعفها..☘
🍃وهدا اللي كانت تبي تعيشه اميمه وهي مقعمزة في
دار نومها ع الكنبه وشاده المصحف وتقرا في سورة البقرة  ودموعها مابطلتش نزول..
ماسيبتهاش قعدت متمسكه بيها برغم ان وضعها زاد تعقد وامورها كلها ملخبطه ومش مرتاحه..
اكثر آيه كانت تقوي في اميمه في هالسورة ...
( وَلَنَبْلُوَنَّكُمْ بِشَيْءٍ مِنَ الْخَوْفِ وَالْجُوعِ وَنَقْصٍ مِنَ الْأَمْوَالِ وَالْأَنْفُسِ وَالثَّمَرَاتِ وَبَشِّرِ الصَّابِرِينَ * الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ * أُولَئِكَ عَلَيْهِمْ صَلَوَاتٌ مِنْ رَبِّهِمْ وَرَحْمَةٌ وَأُولَئِكَ هُمُ الْمُهْتَدُونَ )
كانت تشجع فيها تصبر وتقاوم وتستعين بالله وهي مؤمنه ان كل اللي يصير معاه امتحان لازم تتخطاه وتنجح فيه بش تاخد المكافأة...
قطع عليها قرايتها للسورة صوت جرس شقتها اللي يرن..
حطت المصحف وناضت ومشت طلعت من الدار بإتجاه باب الشقه..
وصلت فيه وفتحاته..
لقت عائشه قدامها..
قالت بإبتسامه:السلام عليكم..
اميمه بإبتسامة مجامله:وعليكم السلام..تفضلي عائشه..
خشت عائشه وهي تقول:يزيد فضلك..ان شاء الله ماعطلتك ع شي..
سكرت اميمه الباب وقالت:لالا..خشي خشي..
خشت عائشه واميمه معاها..
وصلوا في الصاله دخلتها وقعمزتها..
حولت الملايه وهي تقول:قاعده مقاطعه القهوة؟
عائشه؛لالا مانبي شي قعمزي بس..
تنهدت اميمه وقعمزت وهي تقول:شن حالك عائشه..
عائشه:الحمد لله في خير ونعمه..انتي شن جوك؟.
اميمه؛ع عينك..
عائشه:اميمه..اعتبريني اختك الكبيرة واسمعي نصيحتي..مهما صار معاك ومهما شفتي وسمعتي وين تجي ديري ردة فعل لازم ماتكونش ضدك وتكون معاك..خلي الحق معاك مش عليك يااميمه بش ماتخسريش..
اميمه ابتسمت تهكما وقالت:مانخسرش..والله ماعارفه اذا كان في شي يستحق نتحمل  ع خاطره بش مانخسراش..
عائشه:اميمه حبيبتي..عمر يحبك هلبه اني مرت خوه ونقولك ع شي ريته بعيوني..هو راهو فيه من المهدي عصبي ويتأثر بأمه وخواته..
اميمه؛المهدي مش هكي!..
عائشه:زواجي منه بسبب امه وخواته اثروا فيه وخلوه يدير هكي بش يقهر سدرة..
اميمه قعدت تشبحلها بألم..
عائشه ودموعها في عيونها:زيدي ع هكي السنين اللي عاشهم عمر بعيد اماليه غربه وخوف ومشاكل..هو توا زي اللي يعوض في روحه  ويعوض فيهم..بالذات امه..امه اللي خلاها تجري في جرته يااميمه وهو طالع بشنطته من الحوش ع خاطرك انتي...تترجاه يقعد وهو سكر راسه وطلع كله ع خاطرك يااميمه..
اميمه عمر تحدى ع خاطرك وقاعد يتحدى..ماتخليشي يخسر وتخليهم يقولوله هي هادي اميمه اللي تحدينا ع خاطرها!!؟
نزلت امه عيونها وهي موجوعه ودموعها ينزلوا..
قلبها حن لعمر ووجعها عليه وحست بالندم ع كل تصرفاتها معاه...
وكملت عائشه كلامها وهي تقول:اول سنه زواج زي المعركه..حرب بينك وبين اكثر من طرف حاولي ع قد ماتقدري تكسبي فيها...
رفعت اميمه عيونها فيها وهي تقول:نحس في روحي ماعنديش جهد نحارب اكثر من هكي...
.اني من اول ماوعيت ع الدنيا واني نحارب..في ظروفي..ونظرة الناس...الهزوة....حاربت بش غيرت من نفسي وطباعي بش قدرت نقحم نفسي في الحياة  ونثبت لروحي قبل الكل اني مش ضعيفه ومش ناقصه ومش هبله وعبيطه زي ماانقال عليا زمان..اني يا عائشه اخترت نتزوج راجل نحبه ويحبني لأني توقعت انه حيوقف معاي ويدعمني لين نوصل للي نبيه..تنهدت بألم وحركت راسها يمين ويسار وهي تقول..ماكنتش مستعده لحرب زي هادي..كنت نحساب روحي بنحارب بش نوصل اللي نحلم بيه بس نحارب بيه هو ومعاه...مش نحاربه هو واللي معاه ياعائشه..
عائشه:معليشي..اي حرب تطلعي منها حتى لو كنتي خاسرة تقويك وتعلمك حاجه..اهم شي تحاولي بش ماتندميش بعدين وتقولي ياريت...
سكتت اميمه وهي تفكر في كلام عائشه..
وعائشه تشوفلها بصمت..
شبحتلها اميمه بعدين قالت:طوبى وين؟
عائشه؛مشت لحوش بوها..
اميمه:ماوصلها شي من ورا اللي صار؟
عائشه؛لالا ماتخافيش..
شبحتلها اميمه شويه بعدين قالت؛عائشه نحلفك بالله تقوليلي..في شي مدرق في حياة في الجالي ومش طالع لحد صح؟.
عائشه عقدت حواجبها وقالت؛زي شني؟
اميمه مابتش تقول اللي تعرفه مرات عائشه مايكون عندها علم بشي:مش عارفه بس حاسه ان في شي في حاجه مش مزبوطه..
عائشه:الحق مانعرفش..بس..وسكتت..
اميمه:بس شني!؟
عائشه تنهدت وقالت:طوبى قاعده صغيره هلبه حاجات غشيمة فيها..لازم حتى هي تعرف تحافظ ع الجالي لأنه مختلف عن خوته طيب وهادي ساهل يستغلوه..
اميمه؛من تقصدي بالزبط؟.
عائشه ابتسمت وقالت:مانقصد حد بعينه نتكلم بوجه عام..
اميمه مااقتنعتش بكلامها بس قالت:ان شاء الله خير....
عائشه:إن شاء الله..
ابتسمت اميمه وقالت:شويه وجايه..وجت بتنوض..
ناضت عائشه وهي تقول:اميمه ارتاحي اني مروحه..
اميمه:حتى طاسة عصير ياعائشه اول مرة تجيني نهاري!
عائشه بإبتسامه:مرة تانيه نجوك اني وسدرة نتغدوا ولانتعشوا عندك..توا بنمشي لحوش ماليا..
تنهدت بإبتسامه:ع راحتك..بس لامفر من العزومه راهو..
عائشه بضحكه:ان شاء الله..هي السلام عليكم..
اميمة؛صحيتي عائشه.
ابتسمت وقالت؛ماعنديش فيه جميل..
ومشت طول طلعت من الصاله واميمه سقدتها..
بعد ماسكرت وراها الباب قعدت تفكر في كلامها اللي اثر فيها  وغير نظرتها لبعض الأمور...
☘☘☘☘☘☘
"هادي احلى من الاولى بهلبه"
سدرة؛حتى اني عجبتني هادي اكثر..الله يبارك علي موهبته مش عاديه..
طوبى وهي تشوف في اللوحه:صح..الله يبارك..
بعدين شبحت لأختها وقالت:شن غرفه حتى اليوم مش جايه؟
سدرة حاولت تخفي ضيقها وهي تقول :نحس فيها معاش تحب تطلع من حوشها..
طوبى:مدام هكي نمشيلها اني وامري لله..تمشي معاي سدره..
سدرة؛لالا..وراي خدمه في حاجات لازم نتمهم قبل اجتماع غدوة في المدرسه..
طوبى وهي تتفحص فيها بنظرها؛ماتجهديش روحك هلبه في الخدمه سدرة..
سدرة بإبتسامه؛حاضر..

مسحت بيدها ع شعرها وقالت:شن جوك انتي والجالي..
رسمت ع وجهه ابتسامه واسعه مزيفه وهي تقول:تمام التمام..
سدرة:دوم يارب..ربي يعقد عسلكم..
طوبى بنفس الابتسامه:آمين...
☘وبعدين..
مشت لحوش غرفه تزورها تطمن عليها.
وفي نفس الوقت تبي منها خدمه..
🍃غرفه؛القرايه حابسني في الحوش..
طوبى:خلاص توا اطلعي غير جو..
غرفه بضحكه:حني مازال ماكملناش حبيبتي..
طوبى وهي متفاجئه:مازال !...باهي امتى تكملوا؟.
غرفه:ان شاء الله الاسبوع هدا..
طوبى بإبتسامه؛بالتوفيق يارب..
غرفه:آمين..ايه قوليلي مافيش حويجه؟
ضحكت وقالت:سؤال سدرة اللي وين تشبح وجهي تسألهولي..لالا مافيش بعد نكمل العام هدا ان شاء الله هكي متفقين..
غرفه:احسن اللي تكمليه وانتي فاضيه تكمليه..الحق اني خايفه من الحمل كان حملت بنقعد محبوسه بالحق تلاته شهور واني ع السرير..
طوبى شدت يدها وقالت:معليشي حبيبتي كله بأجره..
تنهدت وقالت:الحمد لله ع كل حال..
حولت طوبى يدها وضمتها للتانيه وقالت:روفي..نبي نطلب منك طلب..
غرفه:قولي حبيبتي؟
طوبى:عيد ميلاد الجالي قريب ونبي ندير هكي زي الحفله الخاصه اني وياه بس..المهم قلت لصاحباتي يقترحواعليا شن ندير  وعطوني هلبه افكار..خديت بأغلبهم..واني ماكانش عندي غير فكرة وحده بنديرها..نبي ناخد زوز لبسات ليا اني وياه زي بعض..هو حني قبل درناها اكثر من مرة وكانت تصادف انه يطلع لبس الوانه زي الوان لبس عندي..بس هالمرة نبيها تكون مقصوده ويكونوا قراب من بعض هلبه..
غرفه بضحكه:حلو...بس ماعرفتش شن تبي مني؟.
طوبى:جاياتك في الدوة..نبيك تاخديلي من محلات عبد الرؤوف..
فتحت شنطتها وطلعت فلوس ومدتهم وهي تقول:قبل يوم الثلاث بالله عليك..
دفت يدها اللي فيها الفلوس وقالت:مصح وجهك دسي فلوسك بلا غباء..
طوبى:غرفه!
غرفه؛سكري فمك..توناخذلك ع ذوقي احلى شي بس قبلها عطيني مقاسات سلمان خان..
ضحكت طوبى وقالت:تمام..المهم قبل الثلاث يكونوا واتيات تمام؟
هزت غرفه  راسها وقالت؛تمام تمام..
☘قعدت عندها طوبى ربع ساعه تانيه بعدين روحت..
وهي قعدت في شقتها تراجي امتى يروح عبد الرؤوف بش تقوله..اهو بالمرة تستغل الفرصه وتصالحه..
~~~~~~~
عبد الرؤوف وهو يعلق في بالطوه في الدولاب:محلاتي كلهم ع حسابها تجي وتاخد اللي تبيه هديه..
غرفه؛مش هي اني اللي يناخدها..
سكر الدولاب وشبحلها من فوق لتحت وهو رافع حاجبه اليسار:وعلاش ان شاء الله!
غرفه بإبتسامه:هي تبي دير لراجلها عيد ميلاد وبتفاجئه بالحاجات..
عبد الرؤوف تنهد بتصنع وقالت:سعد الناس..
ومشي طلع من الدار..
هي لحقاته وقالت؛شوفوا الأكال النكار..مش درتلك عيد ميلاد وفاجئتك بيه وخديتلك هديه انت بروحك كانت ناسي ان هداكا اليوم عيد ميلادك..
خش للكوجينه وقال:جعان جعان..
وقف ع الرخامه وقعد يدربك وهو يغني..جعان..جعان..جعان..
خشت تضحك وهي تقول؛باهي باهي تو ندير عشي بس قولي قبلها ترفعني غدوة..
اتكي ع الرخامه بظهره وقال؛باهي..غير ديري العشي حاجه جاريه دفي المصارين..
حط ايديه ع بطنه ومشي بيطلع وهو يقول:ملت بطني من نفاص الطن والحي..
وطلع من حداها..
غرفه:اندومي معناها..
"عينك معناها..رز جاري رز وبالقديد"
غرفه بصوت منخفض: قديد يعع... امري لله لازم نسايره لين نرضى الحصيله هدا..
☘☘☘☘☘
"شن رايك فيها"
الجالي وهو يشوف للوحه:احلى من هديكا..
طوبى بإبتسامه؛يعني عجباتك..
ابتسم وقال:هلبه ياحلو ..غدوة ان شاء الله نرفعها معاي المكتب..
طوبى؛فكرتي خل نمشي نختارلك لبسة غدوة..
ومشت للدروج وهو شاد اللوحه قعد يتبع فيها بعيونه ويسأل:ايه غدوة تبي تقعدي في الحوش ولانرفعك لشارع القهوة؟
وطوبى وهي واصله فوق:لابنقعد هني بش نوتي روحي للكسوة..
هز راسه وقال:ايه صح صح نسيت.
ومشي باللوحه بيطلع بيها للسيارة...
☘☘☘☘☘
تاني يوم...
الساعه 11:00صباحا..
نزلوا نجاح وعواطف من السيارة وخشوا للعياده..
كانت عواطف خايفه ومتوترة اكثر من نجاح..
وصلوا لحجرة الدكتورة وقعمزوا يستنوا في دورهم..
وجي دورهم وخشوا...
🍃الدكتورة وهي تشوف في التحاليل:امم..باهي معليشي يانجاح نوضي معاي شويه..
ناضت نجاح اللي بدت تخاف..
ومشت مع الدكتور لمكان جهاز فحص..
الدكتورة اشرت لنجاح وقالت:استريحي نجاح..
مشت نجاح ورقدت ع السرير وقلبها بدي يدق بقوة من الخوف وقعدت في نفسها تردد في تاج الذكر..
وعواطف اختها تشوفلهم من مكانها وهي في قمة القلق..
بدت الدكتورة تفحص في نجاح وهي تشوقف للشاشه..
ونجاح نشوف لملامح وجه الدكتورة .
هزت راسها وكملت فحص وعطت لنجاح مناديل تمسح بيهم الجل..خدتهم نجاح وهي تقول:شني دكتورة؟.
الدكتورة:للأسف عندك ورم في الرحم..
انصدمت عواطف..
ونجاح غمضت عيونها ودموعها طول نزلوا..
عواطف جتهم وهي تقول بصدمه:ورم شني يادكتورة!؟
الدكتورة:هدا ورم ليفي مسبب لاختك المشاكل هادي كلها..
عواطف:فهميني يادكتورة يعني هو سرطان ولاشني؟
الدكتورة:ممكن تهدي شويه ياعواطف اني حنوضحلكم اللي صاير بالزبط
عواطف:باهي هديت هي وضحي بالله عليك..
ونجاح فتحت عيونها وهي تشوفلها بعيون مليانه دموع وبدت الدكتورة تشرح عن الحاله..
واللي تقول مايفرحش بكل ويوصل لنتيجه وحدها..
الدكتورة:ممكن لو حولتيه يرجع من جديد ويتعبك اكثر من قبل..نصحيتي ليك وانتي في العمر هدا..انك ديري عملية استئصال..
نجاح بصوت مخنوق:استئصال شني!؟..
الدكتورة بأسف..
"الرحم"
🍃🍃🍃🍃🍃🍃
طول الطريق عواطف تسوق وهي تبكي..
اما نجاح كانت في حالة صدمه..
هي توقعت هلبه حاجات..الا هادي ماتوقعتهاش بكل..
كان حولت الرحم..
معناها حلمها انها تولي ام يوم من الايام حيموت  نهائي..
خلاص الفرصه الاخيره ضاعت..
كانت خايفه من غدر قطار العمر...
ليفوتها بالمرة ويموت املها في تحقيق علمها..
بس القدر فاجئها بشي ماكانتش حاسبتله حساب..
نجاح؛عواطف..
عواطف بنبرة باكيه:نعم؟
نجاح؛اطلعي بيا من الزحمه امشي للبحر بالله عليك نبي نتنفس..
عواطف بألم؛حاضر..
ومشت بأختها للبحر..
وقفت بالسيارة في مكان بعيد عليه شويه..
نزلت نجاح الروشن وقعدت تاخد في النفس وعواطف تشوفلها بحزن وهي تبكي بصمت..
بعد ماخدت نفس وطلعاته اكثر من مرة..
قعدت تشبح للبحر..وتسمع في حركة الموج..
وتشوف للسمي المسحبه..
دموع عيونها طاحوا ..
وقلبها ذرف دموعه الحمراء وهو موجوع...
قعدت تقول في نفسها..
"شن معناه اللي قاعد يصير معاي ياربي ..معاش فهمت..
انت تعاقب فيا..ولاماقبلت مني شي من اللي درته!؟..
معاش فهمت شي ياربي..اني ضايعه وحايره ومصدومه وموجوعه هلبه وانت شايف كل شي وعارف ياربي..يارب"
ودموعها ينزلوا زي السيل وهي نشوف البحر.
واختها تشبحلها بألم ومش عارفه كيف تواسيها...
مسحت نجاح دموعها..
بعدين خدت شنطتها وفتحتها وطلعت منها النقال وقالت؛خلاص روحي بيا...
عواطف:متأكده!
نجاح؛مالا شنو بنقعدوا في الشارع..!..
عواطف؛حاضر..
وشغلت السيارة  وتحركت..
ونجاح لهت بتليفونها..
خشت ع الفيس بش تبحت عن موضوع حالتها..
بس قابلها منشور وقفت عنده هلبه..
\~في اللحظة التي تشعر فيها أن كل شيء يعاكس رغباتك، تذكَّر قوله تعالى:
‏﴿ لَا تَدْرِي لَعَلَّ الله يُحْدِثُ بَعْدَ ذَلِكَ أَمْرًا ﴾.
عاودت قراته اكثر من مرة..
وفي كل مرة كان كل شعور سلبي حست بيه بادي يتبدد..
شبحت للطريق وهي توزع في النظر عليها..
خدت نفس..
وعواطف عين فيها وعين في الطريق..
لمحتها دست التليفون وطلعت المسبحه ولبستها وبدت تمتم...
ركزت عواطف في الطريق..
ونجاح قعدت تردد بهمس في تاج الذكر...
ومجرد مابدت تردد فيها..
جتها الوساوس والافكار السلبيه اللب تحاول تردها للحالة اللي كانت فيها..
كانت تبي تيأسها وتخليها تقنط من رحمة ارحم الراحمين..
بس قوة الذكر اللي تمكن من قلبها بكثرة المداومه عليه..
غلبت الوساوس كلها..
وبرغم انها مازال حزينه ع وضعها..بس في داخلها في شي كان مطمنها بعض الشي..
نجاح:عواطف ماتقولي لحد لبعد مايروح محي من تونس ونطمنوا عليه..
عواطف:باهي انتي قررتي شن بديري 
نجاح:مازال..المهم توا انسي الموضوع لين يروح خوك وبعدين ساهل..
عواطف رشفت وهي تمسح في دموعها بقفا يدها قالت:حاضر...
☘☘☘☘☘
الساعه 2:00بعد الظهر..
خش الجالي لموقف السيارات المغلق الخاص بالشركه وهو ماشي لسيارة..
سمع صوت سيارة..شبحلها..لقي نجاة طالعه بسيارتها..
تنهد..بعدين مشي ركب سيارته...
~~~~~~
روح للفيلا...
وخش هو يشم في ريحة مطهر حلوة..
مرر نظره ع الحوش عرفها ضماته قبل ليطلعوا بس ماتحصلش فيه في الليل..
مشي للدروج وركب..
ومشي لدار النوم..
خش...
شافها مقعمزة قدام المرايه وهي تحط في لمساتها الاخيره ع وجهها..
تفاجىء وين شافها لابسه الساري الهندي..
كان محتشم..
لونه ابيض فيه فضي..
وشعرها مفرود ع ظهرها وجزء منه حطاته القدام ع كتفها..
ناضت وقفت..
شاف الزي بوضوح فستان كامل وعليه شال طويل نغطي نص الفستان لعند الكتف الايمن..
لفت بتمشي تجين كندره شافاته تفاجئت وقالت:امتى جيت؟
وهو يمرر في نظرها عليها يإنبهار..
ويشوف في وذانها مزينات بأقراط فضه كبار..
و معاهم عقد فضة كبير لبساته قال:الله يبارك..الله يبارك..اقسم بالله خايف ناخدك بالعين هي باهي..
قعدت تضحك بخجل وهي تقول:باهي الحمد لله معناها طلع عليا..
ومشت بتجيب الكندره وهو يتبع فيها بعيونه قال:انتي كان تفصلي شكارة خيشة وتلبسها تطلع عليك..
طوبى وهي داخل قالت:اشيه عليا اشيه.
قعد يضحك..
جاه صوتها وهي تقول..
"البدله العربيه المعلقه عندك"
االجالي:شفتها ياقلبي بس كيف في الغدي ياسمح؟
"في الكوجينه جولي تغدا بسرعه ووتي روحك معاش في وقت"
بإبتسامه قال:حاضر..
🍃ونزل لوطا تغدا ع السريع بعدين ركب يوتي في روحه..
الكسوة ناسها جايين من مدينه تانيه هدا علاش بتجي قبل العصر..
الجالي وهو يبطم في ازرار كم السوريه قال:طلعتي الكندره متاعها؟
طوبى:ايه..
الجالي:تمام.
فجأة وبدت سابق انذار تقطع الزر وطاح..
الجالي بتذمر:ايااااح..!
طوبى:مش مشكله مش مشكله..
طبست جابت البطمه وحطتها ع الزيانه..
بعدين فتحت الدرج وقالت؛تو نخيطها ع السريع ماتاخدش وقت..
طلعت السلك والابرة..
مرقت خيط سلك ابيض بالإبرة..
بعدين خدت الزر وقالت:هات يدك..
مد يده وهو يشوفلها..
وهي تبتت الزر في مكانه وقالت؛تو صاحبك هدا عزابي ولامتزوج..
الجالي بضحكه:حكيم مضرب عن الزواج..
طوبى وهي تخيط؛علاش؟
الجالي:مش لشي بس هكي يحب يعيش حر..
طوبى:قعد ع حل شعره..
الجالي بضحكه:لا ياشفشه مش هكي بالعكس اني وحكيم شخصياتنا متقربه غير هو نوعه مايحبش يتحمل المسؤوليه..
طوبى:لاكان هكي باهي اللي قعد عزابي خيرله...ترا تعالى مدعبل..
وهي شاده مكان الزر خداته من يده وقرباته للدرج اللي طلعت منه مقص..
قصت الخيط بعد ماكملت وهي تقول:تمام هكي..
هو رفع يدها وقبلها بعدين ؛يسلموا..
طوبى يإبتسامه:تسلم..
الجالي:هي خلاص واتيه..
طوبى:شويه نطلع العبايه..
الجالي:هي..
وقعد معاها بعيونه وهو يتأمل فيه.
طلعت العبايه من الدولاب..
ضحكت لها سمعاته يغني..
ناري ناري ناري من جمالو..
ناري ناري قلبي ايه جرالو..
جاته وهي تضحك وقعدت تلبس في العبايه..
الجالي:رقيتي روحك..
طوبى:ناهي ناهي..
الجالي ضحك بعدين قال:تو نقرا عليك اني..
حط يده ع راسها وبدي يقرا عليها..
وهي مبتسمه بود طول الوقت.
بعد كمل باس راسها وقال:هيا..
هي تعنقت ذراعه ومشت معاه...
🌼🌼🌼🌼
وحضور طوبى في صالة الكسوة طغي ع كل الحضور بطلتها المميزة..
قعدوا الموجودات يتسائلوا عنها من تكون..
والجواب كان..
"مرت الجالي"
بحكم ان الجالي مشهور عند عيله حكيم كلها لأنه اقرب اصدقائه ليه..
☘☘☘☘
ومن صالة الافراح..
للمصحه..
اللي كانت راقده فيها مشتده..
اليوم جتها صفاء تزور فيها مع امها..
وبعد مااطمنوا عليه كانوا طالعين من المصحه متوجهين لعياده الصحه النفسيه..
اليوم اخر جلسه علاج لصفاء..
وهما طالعين..
تلاقوا مع اياد خاش.
لما شافاته صفاء تمنت لو تبخرت ..
من الاحراج الشديد..
اما هو دار روحه عادي جدا وقال:السلام عليكم.
فايزة اللي خلت الوضع يبان عادي:وعليكم السلام..
اياد؛هاه شن اطمنتي ع امك اليوم خير من الايام اللي فاتوا..
فايزة بإبتسامه؛ايه الحمد لله رب العالمين..
اياد:دوم حمدك ان شاء الله..شبح لصفاء وقال..شن حالك صفاء بنتي..
قامت عيونها الخجوله فيه وقالت:الحمد لله...عمو..
ابتسم وقال:شن اخبار القرايه؟
صفاء:الحمدلله ماشيه..
اياد بإبتسامه:موفقه بنتي..
صفاء بإحراج؛شكرا..
شبح اياد لفايزة وهو مبتسم قال:ربي يطمن ع الوالده اكثر..هي السلام عليكم..
فايزة؛وعليكم السلام..
ومشي اياد..
وفايزة مشت طلعت من المصحه ومعاها صفاء وهي في قمة الاحراج..
🌸"شن حسيتي لما شفتيه؟"
صفاء:انحرجت هلبه تمنيت الارض تنشق وتبلعني..مش عارفه كيف كنت نفكر فيه هكي..حطت ايديه ع وجهها وقالت..وواك ياربي..
الدكتورة وهي مبتسمه:حاولي تتخطي هدا كله ومعاش تفكري فيه..اهم شي بدي تعرفي كيف الاشخاص اللي حواليك في اماكنهم الصح..
صفاء بآبتسامه؛اكيد..من قلبي دكتورة نتمنى لو نقعدوا ع تواصل..
:اكيد حبيبتي رقمي عندك...مكان العياده وتعرفيه..تشرفي في اي وقعت..
صفاء بإبتسامة امتنان؛شكرا دكتورة..
☘☘☘☘☘
"كبدي درهت من المواضيع اللي يفتح فيها وديما يحب التفلسيف"
عمتها الصبيه؛وعلاش رضيتي بيه مدام مش عاجبك غير بش ترديها لوليد..
سكتت آلاء وهي مضايقه..
فجأة..
رن تيليفون عمتها..
ردت طول وهي تقول:عمتك..ايوه ربيعه.........غير خيرك بالشويه ادوي بالشويه بش نفهم.........ايه...........بصدمه قالت..علاش!!؟............شبحت لآلاء...وهي تشوفلها بإستغراب..
:والله مايست*حي ولايتحشم خ.زي عليه الت.افه.....والله تافه ولد خوك هدا تافه بنتك مش ليه بكل..
بدت ع وجه آلاء الفضول الشديد تبي نعرف شن صار بين وليد وخطيبته..
؛خلاص خلاص تو نقول لواحد من خوتي يجيبني....باهي باهي...
وسكرت وهي تقول؛ريتي التافه وليد خان بنت عمته الكل*ب
افتكيتي منه واحد مقلب مشت مزبوط...خل نوض نقول لواحد من عمامك يرفعني  غادي مسكينه البنيه مناهره..
وناضت معاها وخلتها وهي مندهشه وفرحانه في نفس الوقت...
🍃وفي من كان مايفكر الا كيف يفرحها ويجبر بخاطرها..
خطيبها اللي خدالها الشنطه اللي بكت عيونها قبل كم يوم..
اصليه وتوصيه من برا لعيونها..
ومش هامها قداش حط فيها..
ومش غير هكي وبس حب يهديهالها بطريقه مميزة..
طريقه تحبها هي...
رفعها لأشهر مكتبة تغليف هدايا..الوفاق..
غلفوها بطريقه حلوة..
وصوروها ونزلوها بناءا ع طلبه..
وكتبوا عليها
من مهند بن زايد..إلى خطيبته...
"سروري أن تبقى بخيرٍ ونعمةٍ
وإنّي من الدّنيا بذلك قانعُ"
التفاعل ع المنشور كان رهيب..
واريج اكثر من فرحت بيه وعجبها..
دارت تاق لأختها ودعتلهم
"ربي يخليكم لبعض"ونهت التعليق برمز القلب التعبيري..
خش عليها نضال خاص..
(تو تشوفي اني شن نديرلك)
ضحكت وقالت؛زي الصغار لما ينغروا..
وبعتت رموز ضحك تعبيريه...
وهو تعتبها رمزي تعبيري لابس نظارات..
اريج بضحكه؛طرشوق..
☘☘☘☘☘
"شن رايك ترا"
عبد الرؤوف:حلو حلو..بس توا هي قالتلك اختاري اللون هدا؟
غرفه؛طوبى تحب الابيض والازرق بدرجاته والموف..
حسيت السماوي يمشي معاهم الزوز..ومميز في نفس الوقت..
هز عبد الرؤوف راسه وقال:ماشي حالهم..
غرفه بشقاوة:تبي ناخدلك حاجه؟!.
عبد الرؤوف تهكما:والله!..
"عبروف"
عبد الرؤوف؛نزلي الخمار فيسع..
نزلت الخمار ع وجهها وهو مشي لصاحبه طول..
قعدت دور ونشوف في باقي الباقي لين مشي صديق راجلها بعدين طلع بيها بالحاجات اللي شرتهم وروح بيها..
هي في الطريق بعتت لطوبى رساله انها خدتلها شن تبي وبعتتلها الصور..
🌼شافتهم طوبى وعجبوها هلبه..
وزادت تحمست ليوم الثلاثاء..
☘☘☘☘☘
الساعه 7:30مساءا..
قدام مبنى المستشفى..
اميمه:ماتعرفيشي كيف كل مرة بحال مرة لطيف ومحترم ومرة يولي عصبي واسلوبه مستفز..
حسناء:ع مزاجه دكتور قصي مزاجي حسيته..
اميمه:مزبوط..
حسناء؛اهو طلع طلع..
سكتوا الزوز  وعيونهم يدوروا ع باحة المستشفى..
هو جنبهم وقف وقال؛اميمه.
شبحوله الزوز..
قصي:آسف اليوم عصبت عليك شويه..بس مضغوط هلبه الفترة الاخيره اعذريني..
اميمه؛لاخلاص دكتور تعودت عادي..
شدت حسناء ضحكتها..
قصي شبحلها شويه وقال:توا اني مستعجل معاش عندي وقت..بعد غدوة ان شاء الله نتلاقوا ونهدرزوا..سلام..
ومشي من حداهم وهما يشبحوله..
اميمه؛ربي يصبرني وخلاص..
حسناء ابتسمت وقعدت ساكته..
فجأة اميمه قالت بإندهاش:حسين خوي!..
التفتت حسناء وشافاته...
كان لابس كاجوال وبالطو طوله لفوق الركبه ومخليه مفتوح..
اشر لأميمه تجيه..
اميمه؛نروحوا بيك حسناء يعني وراك..
حسناء شبحتلها بإرتباك وقالت:لامافي داعي تعبي خوك وتخليه يديره طريقين..
اميمه:خليني نسأله قبل ولو اني عارفه اجابته..
ومشتله طول..
وحسناء توترت وهي تشوف لحسين..
وفي نفس الوقت حست امه عاجبها...
شويه شافت اميمه تأشرلها تجي..
هي مشت ناحيتهم وكانت متوتره ومرتبكه..
وحسين يشوفلها  وهو مضيق عيونه..
وصلت فيهم وقالت؛السلام عليكم..اسفه بنتعبك معاي..
غير عيونه عنها وقال:مش مشكله..
ومشي للسيارة..
اميمه بإبتسامه؛هي بري اركبي سيارتك..
ابتسمت حسناء ومشت لسيارتها..
وهو تبعها بعيونه لين شافها ركبت السيارة..
ركبت جنبه اميمه لاحظاته يشبحلها قالت:هيا حسين..
حسين:خل تطلع قبل.
طلعت حسناء بسيارتها.
وحسين طول طلع وراها...
☘☘☘☘☘
وفي محل لمصورة افراح..
كانت تجهز في البوم لزبونه..
وقريبه ليها مقعمزة ع اللاب متاعها وتتفرج ع فيديو العرس..
المصورة:سفرة علاج امي عطلتني عليهم تعرفي كان مش نعرف بنتهم راهم دارولي مشكله كبيره..
:حي!..
التفتت وقالت؛خيرك!؟
:تعالي ترا تعالي..
مشتلها طول..
وصلت فيها وقالت:خيرك؟
:اللي لابسه  اسود وترقص في نفس هادي من تكون لناس العرس؟
:والله مانعرف تقريبا من المعازيم.
:هادي زمان كانت تخدم معاي في العياده وحده شيطانة رجيم..حفرت حفرة لصاحبها قريب ضيعاته..
:علاش..خانها؟
:والله مانعرف نتفكر قالت بنجربه في الاول بعدين طلعت ناقمه عليه..
فجأة..
طلع قدامها مقطع زفة الجالي وطوبى..
وين ركزت في الجالي انصدمت واشرت عليه:هو هدا والله الا  هو!؟
:تي من هو ياهمي!؟
:صاحبها اللي حكيتلك عليه..
:تبصري!!
:والله العظيم هو متأكده مستحيل ننساه صح شفته في صورة بس قعدوا في عقلي ملامحه زي الهنود..
:حيي ع الجو جي وجايه تحضر عرسه وترقص فيه!
:ريتي!...باهي قوليلي اللي بتجيك توا اخته؟
:ايه اخته..
وخشت عليهم نسرين فهاللحظه..
نسرين:ايناس حمد لله ع سلامتك وسلامة امك.
وسلموا ع بعض بحرارة..
:الله يسلمك يارب..شن امورك..
نسرين:الحمد لله..ترا بالله بسرعه جيبهم الليل ليل..
:هي لحظه بس..
طلعت CDمن اللاب توب ومشت حطاته في غلافه..
وقريبتها كانت تشوف لنسرين وعندها فضول شديد تعرف شن علاقتهم بصابرين..
:معليشي بنسألك..
نسرين:تفضلي..
شبحتلهم المصورة..
:صابرين المعلول شن تقربلكم..
نسرين بإستغراب:اخت مرت خوي الله يرحمه..
:اها..
نسرين:تعرفيها!؟
:كانت تخدم معاي وكنا اصحاب اسرارنا عند بعض..الحق اني تفرحت ع الفيديو ونوسه تخدم فيك..شفتها وشفت العرسان الكبير فيهم..نعرفه..
المصورة بدت ترعش خافت تلعبلها في رزقها..
نسرين:تعرفيه!؟
:ايه ع اساس كان صاحب صابرين..
انصدمت نسرين...
والمصوره جتها وقالت:تفضلي.
نسرين:لحظه لحظه..كيف صاحبته؟
المصورة"ارزي*ني فيك"
:هكي نعرف زمان من سنين ايام كانت تخدم معاي.
شبحتلها نسرين شويه..بعدين غيرت عيونها عنها وشافت للمصورة مدتلها الفلوس وخدت منها الحاجات وقالت..مرة تانيه معاش تخلي اللي يجي يتفرج امانه عندك الحاجه هادي لو خنتيها حتتحاسبي حساب عسير..
ومشت طلعت من حداهم وخلتهم يتعاركوا مع بعض..
وهي ركبت سيارتها ومشت بطريقها لحوش بوها وهي تفكر..
في القصه الجديده اللي طلعت من حيث لايعلمون....

#اهرجو_يناير
#طوبى

.....يتبع....