#طوبى "اقحوانه فله وياسمينه"
#جمان_فريد
#الجزء_السابع_والأربعين "زهرة الذهب2"
طلع المهدي يجري من الشارع ومعاه محمود اللي يخدم معاه في المطحن..
وين وصلوا مكان العركه .
لقوا محمد بارك ع الولد ويضرب فيه..
ضحك محمود وهو يقول:قالك اكبر منه!
المهدي فرح وين شاف ولده هو الغالب لكن مشي جبده وبعده عن خصمه وقاله:برا روح يللا..
محمد وهو يأشر عليه وهو يهدد:تشوفك عيني فايت من حداهم..
ومشي خدي شنطته اللي كان ملوحها وكمل طريقه للشارع..
والولد اللي ضربه ناض بصعوبه ومشي بدون مايقول كلمه لأنه يعرف المهدي من يكون..
محمود بضحكه:كسره تكسير...
المهدي:ماتقولش قدام محمد الدوة هادي..ومشي..
ومحمود لحقه وهو يضحك..
☘☘☘☘☘
"ياوخيتي محلاهم قداش طالعين ع بعض"
سدرة:الله يبارك عليهم..
غرفه؛نتصلوا بيها!؟
سدرة:ريحي جمالك..
ضحكت غرفه..
مطيرة بإبتسامه؛شن نديروا الغدي؟
غرفه؛كسكسي عميمه..
مطيرة؛باهي..ومشت طلعت من حداهم..
غرفه شبحت لسدرة وركزت ع شي معين في وجههاوقالت:سدرة شن هدا اللي تحت عيونك؟
سدرة بآستغراب:شني؟!
غرفه؛زي النمش منظره..
سدرة اذكرت اللي صار تحت عيونها بسبب القيء بقوة اداركت الموقف وقالت؛ايه صح شفتهم الصبح شورني بادية نتحسس من الطن والحوت وين ناكلهم يطلعوا .
غرفه رفعت حواجبها وهي مستغربه..
سدرة هربا قالت:خل نمشي ندير قوة قهوة وان نديرلك عصير بنجر..وطلعت من حداها بسرعه...
☘☘☘☘☘
"محلات الورد هني يهبلوا"
الجالي بإبتسامه:تخشي..
طوبى وهي مبتسمه:ياريت..
وهي متعنقه ذراعه مشي بيها لمحل الورد...
خشوا..
وطوبى بإنبهار قعدت تشبح للمحل من داخل..
كان فيه جميع انواع الورد..
اوركيد..زنبق..توليب..جوري..غاردينيا وانواع الزهور الصغيره..
ابرزهم..
الأقحوان بكل انواعه..
بس طوبى وقفت قدام الأصفر قعدت تتأمل فيه وهي مبتسمه بعدين قالت:زهرة الذهب.
الجالي:الاقحوان هدا..
شبحتله وقالت بإبتسامه:ايه النوع هدا يسموا فيه زهرة الذهب..
رجعت شافتله بعدين عيونه جو ع الأبيض خفت ابتسامتها وقعدت تتأمل..
🌼وعيون التارقي الاسمراني..
على الاقحوان الابيض في مشتل من المشاتل...
وهو يتأمل فيه قعد يردد في كلمات...
ذات مرة في وقت القمر التاسع،كان المطر يتساقط طوال الليل قبل الفجر،وفي الصباح انتهى..اشرقت الشمس بكامل روعتها..لكن قطرات الندى الكبيرة كانت لاتزال معلقة ع الأقحوان في الحديقه وهي جاهزة لإنسكاب جمال خارق..
شبح للراجل اللي عنده المشتل لقاه يشوفله بالإستغراب..
ضحك وقال:اغنية يابانيه عن الأقحوان..بلاد الاقحوان اليابان عندك علم؟!
الراجل بضحكة احراج قال:منك نسمع..
ضحم عبد القيوم بعدين قال:باهي انا مش جاي نتفلسف عليك..نبيك انت تتفلسف عليا وتقولي كيف نزرعه في الحوش..عارف شويه حاجات بس مش بالتفصيل..
الراجل:شوف ياخوي الاقحوان يبي حاجتين مهما هلبه مكان مايكونش فيه ظل في النهار ضي الشمس وتربه خصبه مجهزة كويس..
☘☘☘☘
الجالي؛قالتلك تاخدي الصحيه منها وترفعيها تزرعيها في تربة خصبه وهي هادي..
طوبى؛معقده شويه بس تو نزيد نشوف..نبي نزرع منه في الجنان وفي بلاكونة دارك غادي الشمس تجي عليها كلها..
الجالي بإبتسامه؛ديري اللي يعجبك..بعدين التفت ع صاحبة المحل وطلب منها تلف باقة اقحوان...
رجع شاف لمرته وقال:نحسابك تحبي الفل بس..
طوبى بإبتسامه:ايه اكيد الفل عندي التوب..بس الاقحوان عاجبني منظره حلو وهادي وصافي...ولونه ابيض..
الجالي؛يشبهلك..
قعدت تشوف لعيونه وهي مبتسمه بحب..
التفت لما ناداته المراة مشالها وخدي الباقه ودفع حقها..
بعدين جي لطوبى ومدلها الباقه وهو مبتسم بصمت..
هي خدت الباقه وقعدت تشوفلها كيف كانت مشكله من كل انواع الأقحوان..جت جنبه تعنقت ذراعه وقالت..هيا..
ضحك وطلعوا هما الزوز مع بعض..
والمراة اللي تخدم في محل الورد تشوفلهم بإبتسامه ود..
🌼الجالي:ياحلوة بنقولك الليله عندنا سهرة خاصه في مكان عمرك ماشفتي زيه..
طوبى:وين؟!
الجالي:تو بعد نوصلوا تعرفيه..المهم توا حني بنتغدوا في مكان قنين..بعدين نروحوا للفندق ونوتوا شناطينا بش نطيروا للمكان اللي قتلك عليه..
طوبى بضحكه حماس طلعت معاها كلمه انقالت بعياط:شوقتني..
الجالي وهو يضحك بتعجب:هدا كله حماس..
طوبى بضحكه:ايه..
قعد يضحك...وهي تسأل فيه تبي تعرف وين بيمشوا بس هو ماعطهاش معلومه رضت فضولها...
☘☘☘☘
في الوقت اللي كانت فيه نجاة مقعمزة في مكتبها في الشركه تكتب في منشور ناويه تثير بيه الجدل وحاجات تانيه...
كملت ودارت بيه إشاره لبعض الأصدقاء وحطت معاه صورة ونزلاته وعيونها تشوفله بنظرات مكر حاقده...
تزامن نزول منشورها مع المنشور اللي نزلاته نسرين
وهي تبكي..
(فقيدي مر عام ع غيابك..وكأنك رحلت البارحه)
ومنزله معاه صورة لطاهر..
طاهر اللي مر ع وفاته سنه كامله فهاليوم...
نسرين اكثر من فقد طاهر اللي كان يواسي فيها بدون مايعرف تفاصيل معاناتها..
ولما كانت ضيق بيها يطلع فيها معاه..في ساعات ينسيها همها..يمسحه مسح..
فقدانه خلا في حياتها فراغ كبير حست بيه هلبه فهالأيام الصعبه...
🍃شافت المنشور خديجه ودموعها غلبوها...
علقت عليه بالدعاء لخوها...
وبعده مباشرة شافت اشعار جديد جاها..
خشت عليه لقاته المنشور اللي اشارتلهم بيه نجاة..
مسحت دموعها ورفعت حاجبها اليسار وخشت عليه وقعدت تقرا فيه..
خديجه بحقد؛ياحقيره...
☘اما نسرين لما شافاته تفاجئت..
وقعدت تتفكر في كلام خديجه اختها ماقالتش ان نجاة تبي الجالي..قالت ان الجالي يبيها..
وهني هي دايرة منشور تترحم فيه ع طاهر اشارت بيه حتى للجالي...
حارت بين شكوكها مع كلام اختها وبين اللي تشوف فيه من نجاة..ومعاش فهمت شي..
☘☘☘☘
الساعه 4:00قبل العصر..
خشت سيارة كنتر لشارع القهوة..
كان مقعمز فيها عبد القيوم مع السواق متاعها..
ومن الخلف..
كان فيها طاوله بكرسيها..والتنور..والدفايه..
جماعة الشارع..
نضال وربيع..وفراس التونسي..
كانوا يشوفوا في اللي جايبه معاه..
هو نزل من السيارة ومعاه الراجل..
شبح لربيع ونضال رفع يده وحياهم وهو يقول:خير..
هما الزوز ردوا عليه؛خير..
وقدموله هما الزوز..
ربيع:ترا شن جايب..
عبد القيوم بضحكه:ديكور عزابه..
ضحك ربيع وقال:نعرفه كويس..ترا ياغالي افتح..
جي الراجل فتح الكنتر من الخلف..
عبد القيوم؛لابالله ماتعبوا ارواحكم..فنص عيونه وقال...انزل انت وياه!
مابوش يعبروه نضال وربيع وقعدوا ينزلوا في البضاعه ومشوا بيها للحوش..
ضحك عبد القيوم بقلة حيله ومشي نزل الدفايه وتوجه بيها للحوش..
والراجل رجع قعمز في سيارته يستنى..
وعيون فراس التونسي تراقب فيهم..
شويه طلعوا الثلاثه..
عبد القيوم؛خلاص حتى انت اسكن وحدك وعيش الجو..حلاوة حياة العزابه في الوحده..
ربيع؛مزبوط..
نضال:لااني راجل مايعرفش يعيش بروحه الحق...
ربيع:لا انت شكلك ناوي تتزوج..
نضال بدهشه:كيف عرفت..
عبد القيوم بضحكه:اها معناها بديروا فرح جديد في الشارع...بالله اعزمني عليه انا الاول نعوض مافاتني في فرح خوتك..
ربيع بضحكه:هيجنا هياجه ليا عليها سنين..
عبد القيوم:ان شاء الله نهيجوا هياجه كيفها في فرح نضال..
وقفوا ع السيارة الثلاثه ونضال يقول..
نضال:بنجيب السوكني يالعبيردي يامعليف وبندير حفلة توديع عزوبيه...
عبد القيوم:انت مظنك بتجوز عشان الهياجه..
ربيع بضحكه ركب الكنتر وقال:هدا اني مش نضال..
ضحك عبد القيوم وركب ونضال قعد لوطا وهويقول:فرن هدا ولا..
عبد القيوم:اها فرن ع قولتكم تنور ع قولتنا...
ورفعوه هو وربيع..
ومشوا بيه ونزلوا ونضال عاونهم..
عبد القيوم:في الجنان..
ربيع؛من وين..
عبد القيوم:لاورا..
وخشوا بيه للجنان وقعدوا يمشوا لين وصلوا للخلف
عبد القيوم وهو يأشر بعيونه:غادي غادي..
بعد نضال..
وحطوه هو وربيع في مكانه..
ربيع:كل يوم بتبعت فرده والله مانعرفك..
نضال؛اني بنجي ناخدها بروحها..
ضحك وقال:ادللوا ياغوالي تاخدوا عيوني كان تبوا..
نضال؛ماعندنا نديروا بيهم عندنا عيون خبزة الفرن اللي ماعندناش..
عبد القيوم قعد يضحك..
ربيع بضحكه:-يعينك الله ع صماته..
عبدالقيوم بضحكه:لاوالله حانط غير جوي..
نضال:الله اكبر!..الحمد لله اللي عشت وشفت اليوم اللي فيه حد مدح فيا وفي خفة دمي....
ربيع:الله يسامحك ياتارقي..
عبد القيوم ضحك بعدين قال:سامحوني تعبتكم..
نضال بنفاد صبر:رسمي هلبه يارا....
ربيع:اكسرها الرسميه هادي عبدو خش بقوة واندفاع..
عبد القيوم:غير قاعد جديد تو لما ناخد عليكم تقعدوا تغنوا ياريتنا لاريناه ولارانا..
قعد يضحكوا نضال وربيع...
هدرزوا شويه مع بعض..بعدين طلعوا مع بعض..
نضال وربيع مشوا لأعمالهم..
وعبد القيوم دفع لصاحب الكنتر اجرته..
وولى خش للحوش...
☘☘☘☘☘
واقف ع المرايه يمشط في شعره..
بعدين حط عطره..وخداهم ورفعهم لشنطه دسهم فيها..
وجي بعدها للسرير قعمز عليه وهويقول:مازال ساعه ع الرحله...
هي كانت مقعمزة ع السرير تشوف لتليفونه بملامح تبان هاديه بس فيها شي غريب عليه ردت عليه هو تقول بنبرة اغرب:مازال الوقت..
الجالي قعد يشبحلها وهو ساكت..
شبحتله وقالت:اليوم خوك طاهر يسكر سنه متوفي!؟
الجالي فاجئه السؤال ووتره شويه...
طلع تليفونه من جيب جاكيته وشاف التاريخ...
هز راسه وقال:ايه..الله يرحمه ويغفرله..شبحلها وقال..خواتي منزلات حاجه..
طوبى:لا...مرته نجاه..ومادايرتلك اشاره انت وخديجه ونسرين..
هو وانصدم وانخطف لون وجهه بس حاول يبان طبيعي..
المشكله ان ملامح وجه زادت وتراته..
تبان هاديه...بس نظراتها تبين العكس..
هز راسه وهو يقول:اها..
رفعت حواجبها ونزلتهم وهي تقول:الله يرحمه ويغفرله..شكله علاقتكم ببعض كانت غير!..
الجالي:علاقتي بمني؟
طوبى:بخوك طاهر..!
بلع الجالي ريقه بعدين عقد حواجبه ورخاهم وهو يقول:ايه كنت اقربله واحد..
طوبى:امم....لكن شكل طبيعة علاقتكم بنساوين خوتكم مافيهاش حدود.
الجالي:عاديه..زي علاقتنا بنسرين وخديجه.
طوبى سكتت وهي تشوف للمنشور..
والجالي يشوفلها بريبه..
قامت عيونها وشبحتله وهي تقول:باهي بنقولك حاجه ونتمنى تتفهمني وتفهم عليا صح..
عقد حواجبه وقال:قولي..
طوبى:نبيك تحط حد في العلاقه بنساوين خوتك عمرهم ماحيكونوا خواتك ياجالي..
الجالي:تمام عندك حق ماعندي مانقول في كلامك..بس حتى اني نبيك تحطي في علاقتك مع ولاد عمك...
طوبى:علاقتي بيهم شبه رسميه..
الجالي؛نبيها تكون رسميه..زي انك تحدفيهم من الاصدقاء ع الفيس..
طوبى ابتسمت وقالت؛وانت تحذف نجاة!..
هو قام تليفونه وخش ع الفيس ..ومشي طول لقائمة الاصدقاء خش ع حساب نجاة ..
وجه شاشة التليفون لطوبى وضغط ع الحذف وهو يشوفلها بإبتسامه..
هي هزت راسها وخشت ع قائمة الأصدقاء..
قربت منه وجت جنبه توري فيه كيف حذفت يوسف..
بعدين قعدت دور ع حساب حسين مالقتاش..
بإبتسامه قالت:شكله هو اللي حذفني قبل..
شبحتله وقالت:كويس هكي؟!
الجالي:هلبه..
قرص انفها بقوة وقال:لكن طلعتي غيوره..
طوبى ضحكت وقالت؛مش قصة غيره...بس هادي حاجات اني تربيت عليها..يعني بوي مايجيش بينه وبين مرت عمي دوة نهائي الا فالضرورة القصوى..وبعدين مرت يوسف حسين مايزبطش شكلها تصدق!
الجالي:كل حد ونظامه اهم شي النيه الصافيه القلب نظيف بس..
طوبى بإبتسامه:اممم..
لف ذراعه ع رقبتها وشد عليها شويه وهو يقول:مش حلوة وانتي متكهربه هكي..اضحكي وبصري فكينا من النكد...
طوبى وهي تضحك؛باهي حول كسرتلي رقبتي..
خفف الشده متاعه وقال:خلو جوك رايق بش تعيشي جو المفاجآة بعدين..
طوبى وهي تشوفله قالت بإبتسامه؛هيا امتى بنمشوا..
الجالي:نوضي توا نطلعوا..
طوبى بحماس؛هي..
ورفع شناطيهم هو وياها وطلعوا من الغرفه بعدين من الفندق نفسه..
ركبوا تاكسي..
كانت طوبى مركزه ع الطريق..
اما الجالي فكان لاهي بتليفونه يكتب في رساله لنجاة من حساب تاني دايره طوبى ماعندهاش بيه علم...
☘وصلت الرساله لنجاة اللي كانت تقري في صغارها..
طول فتحتها وقرتها...
(استمري استمري..ترحمي ع راجلك وادعي ربك يصبرك ع فراقه)
ضحكت وعضت ع شاربها..
رسالته بينتلها انه غار عليها..ولو قاعد يغير عليها معناها مازال عنده مشاعر اتجاهها..
وان مشاعره اتجاه طوبى مجرد مشاعر اعجاب لاأكثر..
لو حبها حق ماكانش حيهتم الابمشاعرها هي..
بس اللي توضح من رسالته ان كل اللي طبيعة المنشور اللي نزلاته...
طول كتبت وهي ترد عليه..
(نساعدك فيك يامسوس..مانبيش لعبتك تشك في حاجه واختك خديجه تحل عن سمانا..عارفني نموت فيك يامختش..)
قري الرساله وملامح ابتسامه خفيفه ارتسمت ع وجهه..
شويه وجاته رساله صوتيه..
حط السماعات في التليفون ولبسهم وفتح التسجيل الصوتي..
كانت اكثر اغنيه تحبها نجاه..
"يما انا غزالي وين نمشي بيه"
طوبى:الجو بدي يصقع رسمي هني..ياريتنا جبنا دبش شتوي بش دهورنا براحتنا...
ماردش عليها..شبحلته..
لقاته حاط السماعات في ودانه وهو يشوف للروشن وابتسامته ع وجهه..
مدت يدها وحطتها ع يده وشدتها..
هو طول شبح ليده اللي شادتها بعدين شبحلها..
طوبى بإبتسامة :نحكي معاك ماسمعتنيش؟.
حس بشعور وجعله قلبه..
طول جبد السماعات وقال بإبتسامه:اسف..سامحيني..
شد يدها بقوة وقال:شن كنتي تحكي؟
طوبى بإبتسامه؛عن الجو في تركيا صقع هلبه..
الجالي بضحكه؛الجو في اللي مكان بنمشوله مثلج..
طوبى:لالا!!؟
ضحك وقال؛داير حسابي ماتخافيش..
طوبى:باهي ماتبيش تعطيني تلميحات..!؟
الجالي:اكثر من هكي!؟
ضحكت طوبى وقالت برجاء:قولهالي من توا بالله عليك..
الجالي:لا....
طوبى:مكروش..
الجالي بضحكه هو مضيق عيونها:شن هي!؟..
طوبى:مكروش من المكر..ماكر مكار مكروش..
ضحك بعدين قاللها:باهي يامكروشه قوليلي شن بتلبسي الليله..
طوبى؛لا..
قرص خدها بقوة وهي قعدت تتحسس في خدها وتقول:ااي يامسموم..
☘ووصلوا في للمطار..
وركبوا الطيارة اللي سافرت بيهم لمدينه سياحيه في تركيا..
غادي كان حاجز في جناح قريب ع البحر..
الاجواء فيه جميله جدا..
حطوا شناطيهم في الجناح..
بعدين طلعوا يتمشوا ع البحر..
طوبى:لاباهي جوهم مش مصقع هلبه..
الجالي:في الليل تتجمدي..
طوبى:في تدفئه مركزيه في الجناح ولا؟
الجالي بإبتسامه؛ايه اطمني..
ابتسمت وقعدت تشبح للبحر وهو يشوفلها بعدين قال..
الجالي:نتفكر مرة قلتي مانحبش نعوم...
طوبى:ايه صح..
الجالي؛ماتحبيش ولاتخافي!؟.
طوبى بضحكه؛الزوز مع بعض..اني البحر ديما نخاف منه..نحسه مالاش امان..
الجالي شبح للجاكيت اللي لابسه كان لونه ازرق..بلع ريقه بتوتر وشبح للبحر..
طوبى؛نفضل نوقف ونشبحله من بعيد وخلاص..
هو ابتسم وقال:ان شاء الله في الصيف نجيبك هني ونعلمك تعومي بعد ماتكسري حاجز الخوف طبعا..
طوبى:هادي مستحيله مش حتقدر عليها..
الجالي بإبتسامه ثقه تسائل:تتحديني؟
طوبى:نتحداك..
الجالي:واني مش طلعتش خاسر من تحدي في حياتي..
طوبى:معاي اني حتكون اول خسارة..
الجالي بضحكه:تو نشوفوا..بعدين خدي يدها وقعد يتمشى هو وياها ويهدرزوا لين حل الليل..
ولوا للجناح متاعهم..
بعد ماصلوا المغرب..الجالي خدي حوايجه وطلع من الجناح وخلا طوبى تجهز نفسها..
بعد ماكملت جت بتطاع من دار النوم لقت بابها مسكر بالمفتاح..عرفت ان الجالي دار هكي بش يوتي مفاجئته ع راحته..
قعمزت ع السرير تستنى..
لين سمعت الباب قاعد يتفتح..
ناضت وقفت..
وهو خش عليها وشافها..
قعد واقف في مكانه وهو مسهم فيها..
كانت لابسه فستان اسود وفي رقبتها عقد لولي...
مخلي طلتها قاتله....
طوبى بحماس:نطلع!؟
جاها خدي يدها وقبلها..بعدين قال:في خير درته في حياتي ربي قبله وجزاني بيه عليك..
ضحكت وقالت:باهي الحمد لله..هي طلعني نشوف شن داير..
ضحك وخداها من يدها وطلع بيها من دار النوم وهو يتأمل في جمال طلتها وجاذبيتها القويه..
وصلوا برا..
لقاته مجهز طاوله رومانسيه..
اضواء مخفيه وشموع....
وزهر الفل مزين الطاوله..
طوبى بإنبهار:روعه روعه..!
الجالي:عجبك!؟
طوبى:هلبه هلبه...
ابتسم وخداها لطاوله..جبد كرسي وقعمزها عليه..
وهو قعمز مقابلها..
الجالي وهو يتأمل فيها قال؛تعرفي..
طوبى:امم..
االجالي:لو كنت نعرف ان ربي قاسمك ليا كنت ربيتك ع يدي ياطوبى..وخليتك تموتي في الجالي..
طوبى؛وانت حتسلم!؟.
ضحك وقال؛اكيد لا..
طوبى بإبتسامه؛بس نقدروا توا نديروا اللي نتمنوه..ونعيشوا اللي تمنينا نعيشوه من زمان..
الجالي:اني نحس في روحي بديت من وقت..
ابتسمت بخحل وقعدت ساكت..
ضحك وقال:شكله احساسي في محله..
طوبى بشي من الخجل:ماننكرش اني معجبه بيك هلبه...ومتأكده ان هالاعجاب مع الوقت حيولي حاجه تانيه..
الجالي:نفس الكلام اللي جيت بنقوله..
طوبى بإبتسامه؛وحده وحده كل شي يجي بعدين وحلاوته لما نخلوه يجي بروحه..
هو ضايقه كلامها..كان يبيها تحبه بسرعه وتتعلق بيه...
لأنها لو حباته حتتنازل هلبه مقابل انها تقعد معاه..
ابتسم مجامله وقال؛صح...
🍃وبعيد عن هالاجواء الرومانسيه...
مع صلاة المغرب في العاصمه طرابلس..
كانت سدرة مع عمتها مطيره في الكوجينه..
وحدة توتي للعشاء..
والتانيه واقفه دير فالقهوة..
سدرة..وهي تحرك في القهوة..
فجأه وبدون سابق انذار..
حست بشي من رجليها قاعد يركب لين وصل لقلبها وتسارعت نبضاته..
حست انها حتفقد الوعي..
التفتت للطاوله..مشتلها وقعمزت ع الكرسي وهي تقول:عمتي..عمتي..
شبحتلها مطيره خلت اللي في يدها وجتها تجري..
مطيرة بخوف:خيرك..
سدرة وهي حاطه يدها ع صدرها:ميه وملح وسكر بسرعه..
عمتها شدتها ونهضتها وهي تقول:تعالي معاي قبل..
وطلعتها من الكوجينه واحساس الموت مرافق سدره قعدت تقول لعمتها وهي خايفه ومرعوبه:نحس في روحي بنموت ياعمتي .
مطيرة:بعيد السو ع بنتي بعيد السو..
ورفعتها للصاله رقدتها ورفعتها رجليها حطتهم ع الحيط..
ومشت تجري للكوجينه..
وسدرة مازال حاسه بالموت وضيقة الصدر ورعشه في جسمها كله...
تشبح للسقف..تشوف فيه اصفر معاه بقع حمر...
زادت خافت....
ع جية عمتها تجري قالت:فيتامين دال طايح عندك قريب مهناش بكل..طبيعي يصير فيك هكي..
قعمزت جنبها..ونهضتها شويه وقعدت تشرب فيها في المية..
لين كملتها..
سدرة وهي ترعش:صقعانه عمتي..جيبي بطانيه..
هزت مطيرة راسها وهي بتموت من خوفها عليها..
رقدتها كويس..
بعدين ناضت ومشت بش تجيبلها بطانيه..
وسنون سدرة بدوا يصطكوا من البرد اللي تحس بيه..
جتها عمتها بالبطانيه...غطتها..بعدين حطت يدها ع جبهتها تشوف في حرارتها بإستغراب قالت:مافيش حراره..
ناضت وقالت..خل نمشي نجيب الترمومتر..
ومشت من حداها وسدرة تغطي في روحها ومازالت ترجف من الصقع..
☘قاستلها عمتها حرارتها لقتها طبيعيه..
قالت في بالها اكيد هدا كله من نقص فيتامين داخل والغده...
وبعد ماطلع وقت المغرب....
سدرة بدت تولي كويسه وكل عرض حست بيه بدي يختفي..
ماعدا الخوف..
الخوف من الموت...والخوف من انها ترجع تعيش نفس الحاله من جديد...
☘☘☘☘☘
"اكيد الشيطانه خديجه قالتله احذفها"
صابرين؛ومرات مرته..
نجاة وهي تاكل في اللوز؛اهمم..مستحيل..اصلا لوكان معبرها ولامدور مشاعرها كان لما كلمني قالي علاش ديري وتبي تسببيلي مشاكل معاها ومن هالكلام..ابتسمت وقالت..لكن هو غار حبيبتي غار..
ضحكت صابرين بعدين قالت؛تو مش حيفوت السبوع هدا الا وتبدا تاخد وتعطي..
نجاه:قصدك السحر بيبدا يبان عليها؟!
صابرين:قولي المرض بيبدا يبان عليها..مش حيكملوا اسبوعين العسل متاعهم..وحيروحلك متنكد وانتي عاد لازم تحتويه ياروحي..
نجاة بضحكه؛ماتوصيش حريص..
صابرين:لازم تحملي نجاة هالمرة لازم..
نجاة؛اني قاعده نتسنى تصير الحاجه هادي عن قريب..
صابرين:ان شاء الله ياربي..والله لو صارت يانجوته تعفسي ع رقابهم كلهم وتخليهم يزوجوك ولدهم وعين تضحك وعين تبكي...
نجاة بكره؛بالذات خديجه الحقيره هادي..
صابرين:بعدين نلهوا بيها حتى هي..
نجاة:مش بالسحر صابرين هادي بالذات لا وكان تصير فيها اول من بيشكوا فيها اني...
صابرين:تؤ..مش سحر..هادي لازم تتبهدل وعقلها عليها..
ضيقت نجاة عيونها وقالت:شن في فبالك؟
صابرين وع وجهها باديه ملامح الحقد:مافي شي محدد في بالي..خليها لوقتها...
☘☘☘☘☘
وضحيتهم الاولى سدرة...
لما جي وقت النوم...
رقدت عادي جدا مع عمتها في دار المعيشه..
كانت غارقه في النوم...
لين جت الساعه 2ونص...
فاقت مفزوعه وقعمزت وحطت يدها ع قلبها اللي حساته بيطلع من مكانه...
حولت الغطا وناضت..
وطلعت من الدار وهي ساكته..
وقعدت دور في الحوش وهي تقول بصوت منخفض:لاإله إلا إلا الله!
ماكانتش تبي تعيط وتنوض حد...ولاترعشهم معاها مرة تانيه..
بس خافت انها ماتقدرش تتحكم في نفسها اكثر من هكي...
لحظات..وبدت تختفي الاعراض...
كانت اخف من الليله اللي فاتت..
قالت في نفسها.."الباين الدوا بدي يدير في مفعوله..لكن علاش قاعده خايفه هكي!؟"
وهالخوف قعد مسيطر عليها..
خلاها تمشي تاخد بطانيتها ومخدتها من الدار وتطلع ترقد في الصاله وهي فاتحه التلفزيون...
من الخوف..قعدت مقعمزة وهي لافه روحها بالبطانيه وتتفرج..وشعور الخوف مسيطر عليها ومانعها من النوم...
#زهرة_الذهب
#طوبى