طوبى "شارع القهوة"
#جمان_فريد
#الجزء_الرابع "بنغازي2"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
طلعت من الكوجينه تجري وهي تسمع في صوت الهاتف يرن في المربوعه..
خشتلها..ومشت طول قامت السماعه وقالت..
وردة:ايوه..
"يما شن حالك اني فردوس"
وردة بإبتسامة فرح؛فردوس بنيتي شن حالك انتي يما؟
"الحمد لله يما في خيار خيري..انتم شن حالكم استاحشتكم هلبه"
وردة ودموعها ينزلوا؛حني اكثر يما...قوليلي شن حال راجلك وناسك.
"الحمد لله كويسين..يام شن حال بوي والبنات وجدي وعمتي ومرت عمي والعيله كلها"
ضحكت وقالت؛الحمد لله كلنا بخير..اهي اختك تقرا ليه ليه الامتحانات النهايه الاسبوع الجاي..
"ربي يفتحها عليها..ميمتي بنقولك غدوة يإذن الله بنجيكم"
وردة؛ايه عارفه بنتي غدوة السبوع..
"باهي..بيجيكم مصطفى بعدين شويه وبيجيبلكم البضاعه"
وردة:ان شاء الله مايكثرش ..
"بيجيب السبر يام المتعارف عليه"
وردة:باهي باهي..المهم حالك باهي بنيتي متريحه..
"والله يام متريحه والحمد لله يام جيبي ورقه وبيرو وسجلي رقم الهاتف هدا متاع حوشي.."
وردة بإبتسامه؛باهي شويه بس..
حطت السماعه ع تركينه..
ومشت تجري وخشت لدار سدرة وهي تقول:وريقه وقلم بنتي..
مزقت سدرة طول ورقه وعطت امها بيرو وهي تقول:شن بديري بيهم يام..
خدتهم وردة ومشت وهي تقول؛بنسجل رقم اختك فردوس..
وطلعت..
سدرة بلهفه؛فردوس!..وناضت لحقت امها تجري..
لين وصلوا الزوز للمربوعه وخشولها..
قامت وردة السماعه وقالت؛فردوس
"معاك يما"
وردة:هي ملي بنتي..
جت سدرة خدت من امها الورقه والبيرو وقالت:ملي عليا..
هزت راسها وردة وبدت تقول في الرقم اللي تمل فيه فردوس..
بعدكملت قالت سدرة؛عطيني نكلمها يام..
وردة؛معاك سدرة يافردوس..
"جيبيها جيبي"
خدت سدرة التليفون وقالت:ايوه بايرة..
"بايرة في عينك ياملسنه.."
سدرة بضحكه؛شن جوك .
"تمام تمام الحمد لله..غدوة جايه وتو نهدرزوا.."
سدرة بإبتسامه؛خلاص تستنوا فيك..هي بالسلامه..
"بالسلامه"
سكرت سدرة وقالت:من صوتها تحسيها فرحانه..
وردة بإبتسامه؛حتى اني هكي حسيت..حي!! قالتلي راجلها بعدين شويه بيجيب البضاعه وبوك من قاعد..
سدرة؛تو نكلم يوسف وحسين..
وردة:فيسع فيسع سلم بنتي..
مشت طول سدرة طلعت للجنان وفتحت الباب اللي يدخل للمطحن..
سدرة؛يوسف حسين..
جاها يوسف وهو يقول؛خيرك؟
سدرة؛شويه تانيه بيجي مصطفى راجل فردوس بش يجيب البضاعه متاع السبوع بش دخلوها..
يوسف:باهي خشي وانتي طالعه هكي..
ضحكت وقالت؛باهي..
ومشت وسكرت الباب...
🌻في نفس الوقت قدام حوش الجيران..
درست سيارة المهدي..
المهدي:هي انزل..
تنهد طاهر وقال:ياالله..وفتح الباب ونزل..
وهو جايب في يده سفرة باسطي ماقدرش يخش في اول جية ليه فاضي وفي نفس الوقت وسيله لكسب ود عيلته..
مشوا هو والمهدي للباب..
فتح المهدي الباب وقال:هيا خش..
ابتسم طاهر وخش..وخش بعده المهدي وسكر الباب..
المهدي:تعالى..
ومشوا خشو للحوش والمهدي رفع خوه للمربوعه..
بعدين مشي لأمه..
لقاها في الكوجينه..
المهدي:طاهر جي يام..
مغليه:هي شويه وجايه..
المهدي مشي ولى للمربوعه..
ومغليه طلعت من الكوجينه ومشت لدار خديجه ونسرين..
فتحت الباب لقتهم الزوز مقعمزين يقروا..
وحده تقرا في موادها الدراسيه والثانيه مجله..
مغليه:خوكم جي...
خديجه بان ع ملامح وجهها عدم التقبل..
اما نسرين بفرحه قالت:جي!..
مغليه:بنمشي نديرله قهوة..وحده فيكم تركب تقول لخوتها...
نسرين:حاضر..
ومشت مغليه للكوجينه..
ونسرين ناضت وهي متحمسه طلعت من الدار ومشت ركبت فوق لخوتها..
خديجه بإنزعاج؛اووف ماعنديش نيه نافق حد..
🌻في المربوعه..
طاهر:بوي مازال مش مروح؟
المهدي:يروح ع وقت الغدي بالزبط..
هز طاهر راسه بعدين قعدت يقلب في عيونه في المربوعه وقال؛حوشكم كبير ماشاء الله وكل شي راقي وقنين..شبحله وقال عكس الشقه اللي قاعدين فيها اني وامي ..
المهدي ماباش يرد وعليه وقعد ساكت..
وهو شاف للمهدي ابتسم بتهكم وقعد ساكت..
ع خشة مغليه بسفرة القهوة وبإبتسامه لطيفه قالت:اهلين ومرحبتين..
هو ناضلها..
هي حطت السفرة ع الطاوله وجاته صافحاته..
وهو بعد صافحها قال؛اهلا بيك..تفضلي.
خدت منه سفرة الباسطي وقالت؛علاش متعب روحك..
طاهر:حاجه بسيطه..
مغليه؛قعمز ولدي قعمز..وهي قعمزت
ولى قعمز طاهر..
ومغليه قالتله؛شن حالك وشن داير في قرايتك..
طاهر:الحمد لله كل شي ماشي تمام..
مغليه؛بالنجاح ان شاء الله..
طاهر:شكرا..
ومهدي يراقب فيهم اثناء حوارهم..
لاحظ امه عاديه حدا وتبان فرحانه بجية طاهر وتهدرز معاه بأريحيه.
بس هو مواطي عليها عينه ويتكلم بإقتضاب وفوق من نفسه..
ع خشة خديجه ومعاها الجالي..
لما شافهم حس من وجوههم انهم مش مرحبين بوجوده..
جاته خديجه مدت يده وقالت:اهلا كيف حالك.
صافحها وقال:اهلا بيك وحالي باهي والحمد لله..
وطلقت يده ومشت قعمزت حدا امها..
اما الجالي صافحه بدون مايتكلم ولابي طاهر يقوله حاجه .
بعدين مشي قعمز جنب امه حتى هو..
المهدي؛هادم خديجه والجالي.
شبحلهم ويدوب ابتسم..
وهما كذلك ردوهاله ابتسامه مبتورة خاليه من المشاعر..
حس بضيق شديد وكان يبي ينوض روح لعندما..
"خويا"
رفع عيونه فيها وشاف في عيونها فرحة واضحه بيه..
وكلمتها..."خويا " حركت فيه شعور حلو بالمرة.
ناضلها وهو مبتسم..
وهي جاته تتكلم بعفويه وتضحك؛واخيرا شفتك قداش فيك شبه من بوي..
وضماته..
وهو فرح هلبه بهالحضن..حضن الأخت اللي يبان عليها قلبها كبير وحنونه وفرحتها بيه بانت عليه في عيونها..
طاهر؛انتي نسرين..
بعدت وقالت؛ايه نسرين اصغر منك بعام بس..
ضحك..
مغليه؛قعمز ولدي ماتقعدش واقف..
هو قعمز وقعمزت جنبه نسرين..
ع خشة عمر ونضال كانوا مستغربينه..
المهدي:سلموا ع وخوكم..
مشوله وسلموا عليه بدون مايتكلموا..وكان واضح عليهم انهم مش متقبلينه..
رجع ضايق مرة بس...
نسرين؛مش مصدقه اني واخيرا شفتك تعرف طالع احلا من المهدي..
المهدي رفع حواجبه..
ومغليه وهو طاهر وضحكوا...
وكانت نسرين واكله الجو كله تهدرز مع طاهر وكأنه تعرفه من سنين وكأنه تربت وكبرت معاه وهو ارتاحلها هلبه وخشت قلبه.
ولقي فيها اللي تمنى يلقاه في الأخت..الأخت اللي حتكون ال الحنينه اللي طبطب عليه وتمسح ع قلبه بحب وحتكون صديقه واقربله حتى من أمه...
🌱🌱🌱🌱🌱
وتقعد نعمة الأخوة من اغلى النعم..
نهار اسبوع فردوس ويوم جيتها لأهلها زايرة..
كانت سدرة تحوس وهي متحمسه وفرحانه وتراجي في جية اختها بفارغ الصبر...
الحوسة مع العمة وزوز من الخالات ومرت واقرب الجارات..
مغليه وعتيقه ومشتده..
وصاحباتها مش مغيبين جهد وكأنه اسبوع اختهم...
وقبل المغرب بلحظات كان كل شي واتي...
وهما جهزوا انفسهم وقعدوا يراجوا في خشة فردوس وعيالها زي مايقولوا التواجير...
وبدت اصوات الكلاكسات مسموعه في كل شارع القهوة...
جو وأخيرا..
وخش مصطفى بالسيارة لداخل بش ينزلوا فردوس اللي كانت لابسه العربي داخل...
جوها عمتها وامها ونزلوها وحده وحده عليها وحولوا من عليها الفراشيه..
وخششوها داخل....
واستقبلوها بالدربوكه والأغاني..
كانت طالعه زي الغزاله في البدله الكبيرة عاد بيضا والعيون خضر والنقش يهبل..كيف بتطلع؟!...
سلمت ع امها وعمتها وخالاتها ومرت عمها والجيران..
واخر من سلمت عليها سدرة...
بعد ماقعمزوها ع الكرسي..
فردوس وهي شاده يد فردوس بقوة؛استاحشتكم استاحشتكم..
سدرة بإبتسامه وعيونها مدمعات:وحني اكثر يابايرة..قوليلي شن دايرة مع مصطفى؟
فردوس بضحكه؛يهبل يهبل ويعامل فيا احلى معامله دمه خفيف وحنين هلبه هلبه ياسدرة..
سدرة:شكلك طبستي فيه..
فردوس:وعلاش مانطبسش فيه هو فيه حاجه ماتنحبش..
ضحكت سدرة..
شويه جو البنات..
عائشه:مبارك فردوس..
فردوس:الله يبارك فيك العقبه ليكم..
فايزة؛مكياجك خيال..
فردوس؛مكيجتني مزينه عندهم غادي..
فايزة:شن اسمها؟
فردوس:شكريه لكن شكريه شني مش عارفه..
نسرين:دوسه حلو الزواج..
فردوس ؛مش غير حلو...بالذات وين طيحي في راجل يدللك حتى من الماكله يوكل فيك بإيديه..
فايزة ونسرين وهما متشوقات:يااااايييي..
سدرة بضحكه؛من غير عار ياخفيفه انتي وياها..
فايزة؛خلاص اني موافقه على احمد..
فردوس بإستغراب:من احمد.
ضحكوا البنات..
وشويه وخلوا فردوس بروحها.
وهي قعدت تراقب في ضيافة اهلها لمتاعينها وفي حاجات ماعجبتهاش واضايقت منها..
شويه اشرت ع سدرة تجيها...
سدرة؛خيرك؟
فردوس:معقوله تفرقوا عصير عادي ياسدرة مش مفروض روزاطه وعبمبر..
سدرة؛هدا الموجود يافردوس..وبعدين ياما ضيفناهم في العرس..
هي قلبت وجهها وقالت:باهي باهي..
سدرة انتابها الغضب الشديد بس ماتقدر تقول ولادير شي مشت وخلتها وهي معصبه منها...
وشويه وحطوا العشي كان كسكسي وعصبان..
يعني مادارو شي زايد عن اللي جابه راجلها وزادت ضايقت وتنرفزت..
جتها امها وفرشت عليهاالمفرش وقالت:هي تو نجيبلك تتعشي..
فردوس؛علاش يام مازدتوش مبطن ولاطاجين..
امها تفاجئت وقالت؛ماخطرش عليا يابنتي..
فردوس؛مفروض حتى جبتوا مشروب نوع تاني ع اللي جابه مصطفى..
وردة بضيق؛سامحيني يابنتي بس حني هكي متعودين نحطوا ونديروا من اللي يجيبه الراجل..
مطت شواربها بعدم رضا وهزت راسها زهي ساكته..
امها تنهدت ومشت جابتلها طاوله..
وسدرة واقفه تشوفلها حستها وجعت امها بكلامها..
🌻في الكوجينه..
مطيرة بغيظ؛ااه يامرارتي غير مافيهاش كيف تراني عطيتها كف من الصح للصح شن هالبنت هادي..
سدرة وهي معصبه؛مانبيش حتى نسلم عليها وين تروح..
مطيرة؛خزي حيوانه..
ع خشة نسرين؛بيروحوا الناس راهو..
سدرة؛وهي بتقعد تبات؟
نسرين؛لابتروح معاهم.اطلعوا..
سدرة؛مش طالعه..
تنهدت مطيرة وقالت؛غير قدام الناس بس..ومشت طلعت..
نسرين؛خيرك سدرة..
سدرة وهي معصبه؛شي..بعدين تعالي هني..خوك هدا لأمتى بيقعد دايرلي هكي..
قدمتلها نسرين وقالت؛اكتبيله رساله وضحيله موقفك..
سدرة بعناد؛مادرت شي بش نوضحه خليه هكي والله ماني مدوراته لين هو يولي بروحه..
حركت نسرين راسها يمين ويسار بعدم رضا ومشت طلعت..
وخلت سدرة تحرق في نفسها من الغضب ع فردوس والمهدي...
🌱🌱🌱🌱🌱
في الليل..
بعد ماروحوا الناس....
قعمزت سدرة مع انها تهدرز عليها..
سدرة؛والله لاكل شي درتيه من احسن مايكون يام مادوريش كلامها بنتك هادي عمرها ماحتتغير عينها فارغه ومايعجبها شي..
وردة بضيق؛كدرتني ربي يسامحها وخلاص..
سدرة ضمت امها وباستها من خدها وحطت خدها ع خد امها وقالت:بعيد السو عليك من الكدر حبيبتي..
تنهدت وردة وقعدت طبطب ع يد بنتها ...
🍀🍀🍀🍀🍀
ومرت الأيام..
وجي اسبوع الامتحانات...
وحالة من التوتر والخوف عايشيتها سدرة وعائشه مش عايشين منها شي فايزة ونسرين..
نسرين باردة وبليده مادورش...وفايزة مش هامتها...
وفي ايام.الامتحانات المهدي ناقشه مشروعه وحصل عليه نسبه كويسه..وتخرج وكمل قرايه وخلاص..
بس عقله قعد مع سلطانة قلبه حتى وهو مجافيها...
وفي نفس الوقت..
كان الجار الجديد الدكتور اياد..
مستمر بإهتمامه بسدرة بنظراته اللي البنات اجزموا انها نظرات اعجاب واضحه..
سدرة؛تو اني مش قلت معاش تدووا عليه!؟
نسرين:اني خايفه المهدي يلاحظ ولايحس بحاجه..
سدرة؛وبشن يحس ولايعرف..انتوا درتوا قصة من لاشي بالله عليكم اخر مرة تدووا فيها عليه قدامي والله نفوتكم ومعاش نكلمكم..
عائشة؛خلاص انهوها هالقصه.
فايزة بضحكه؛باهي خليكم فيا اني اليوم احمد قالي واني طالعه من الحوش ان شاء الله بالنجاح..
عائشه؛اهو دعوته هادي هي اللي بتنجحك بإذن الله...
ضحكوا البنات..
بعدهاسكتوا للحظات..
وبعدين نسرين قالت؛المدرسه تمت خلاص لازم نسقوا من توا نتلاقوا كل اسبوع عند وحده..
سدرة:بيناتنا تليفون وتو نتفاهموا..
فايزة:اللي تتفقوا عليه قوليلي عنه عويشه..
عائشه:ان شاء الله..
وكملوا طريقهم لين كل وحده فيهم وصلت لحوشها...
🌻🌻🌻🌻
ايام الصيف زمان كانت حتى هي غير هلبه توا..
وطبعا كانوا اغلب الناس وقتها يخلوا حياشهم ع الزليز ويفرشوا الحصاير والبساطات الخفيفه والمنادير الخفاف بش يبرد الحوش...
وفي نفس الوقت يبدوا بتنفيض البساطات وغسلها...
وهدا مادايرين عواطف ونجاح في حوشهم..
الزوز راكبات فوق السطوح..
ناشرين البساطات ويخبطوا فيهم بالعصي ويراقبوا في الشارع..
عواطف؛نجاح..
نجاخ؛خير دعوتك؟
عواطف؛شوفي هداكا الدكتور جارنا الجديد..
الزوز شبحوله..
لقوه خاش لمحل..
عواطف؛يهبل الحق ..
نجاح؛تحسابيه بيشبحلك ولايعبرك..
عواطف شبحتلها بحده وقالت؛ومن قالك اني هامني اصلا راهو ارمل وعنده ولد اكيد مش حناخده شن ناقصني اني بش ناخد ارمل..
نجاح؛ع قولتك هدا علاش محولاته من راسي..
عواطف؛ع اساس كان حطتيه بيشبحلك..
نجاح؛خبطي خبطي البساط خير مانحطك مكانه ونقعد تخبط فيك..
عواطف بتهكم؛تقدري!..
نجاح قعدت تخبط في البساط بقوة وقالت:مش راده عليك..
عواطف؛ماهو ماعندك ماتردي..
سكتوا لما شافوا اياد طالع من المحل..وقعدوا يتبعوا فيه بعيونهم ويشوفوا وين بيمشي..
وفي الحوش اللي في جنبهم..
فتحت خديجه روشن دار خوتها بتهويها..
شافاته وقعدت تشبحله حتى هي..
لين خش لمطحن عيت الواعر..
🌻إياد:السلام عليكم..
لطفي:وعليكم السلام تفضل..
اياد بإبتسامه؛عرفتني اني جاركم الجديد سكنت في حوش عيت الباني.
لطفي بإبتسامه؛ايه عارفك اهلا وسهلا بيك.
اياد؛وبيك عمي لطفي..اني ليامدة بسيطه ساكن في الشارع وكل نتعرف عن سكانه..والحق قبل لنجي نسكن هني سألت عنكم وزي ماتعرف الجار قبل الدار والناس شكروكم ليا وشجعوني ع السكنه هني..
لطفي؛مزبوط حني في الشارع هدا عيلة وحده..
اياد هز راسه بإبتسامه وقال:لاحظت..صراحه عجبتني منكم انكم عزمتونا ع عرسكم رغم انكم مازال ماتعرفوناش وامي حبتكم هلبه وقالت لازم نعزموهم..
لطفي بإبتسامه:والله انتم جيرانا حتى لو مازال ماتعرفنا ع بعض وطبيعي جدا نعزموكم...وبالنسبه لعزومه الوالده حاضر تو نعطي علم للعيله عندي ويجوكم عن قريب..
اياد بإبتسامه؛تفرحونا بجيتكم هلبه..
لطفي:بارك الله فيك..
مرر اياد نظره ع المكان وقال؛قهوتكم ماشاء الله عليها ريحتها نشم فيها من مسافه..
لطفي؛هادي قهوة بنتي ربي يحفظها هي اللي تخلط فيها السر عندها..
ابتسم اياد وقال:نبي منها زوز كياس..
لطفي:حاضر..
وناض لطفي وخدي زوز كياس حطهم في شكارة ومدهم لإياد وقال؛تفضل..
خداها اياد وقال:بقداش..
لطفي:هديه..
اياد؛لا شن هديه مايجيش عمي لطفي..
لطفي:لايجي اول مرة تخشلي المطحن وجارنا الجديد لازم نديروا معاك الواجب..
ابتسم اياد وقال:احرجتني الحق..
لطفي؛مافيش احراج ولدي...
🌻فهالوقت..
طلعت سدرة من الحوش بتمشي للمطحن بش تكلم بوها ع حاجه..
في نفس اللحظه اللي طلع فيها المهدي من الحوش..
شبحلها في شبحتله وقلبت وجهها عنه ومشت للمطحن..
وين وصلت فيه وجت بتخش تلاقت مع اياد طالع قريب انخبطت فيه..
ابتسم اياد وبعد وهو يقول؛تفضلي..
وهي منزله عيونها خشت طول بدون ماتكلمه...
مشي وهو مبتسم وعيون المهدي اللي يقدح منها شرار الغيرة تلحق فيه...
بعدين رجع عيونه للمطحن...
🌻سدرة؛باهي بوي..
وكيف جت بتطلع بس تمشي لحوش فايزة..
فاتت سيارة تبيع في الحوت..
صاحبها ينادي...
"حوت حوت...
سردينه...كوالي..حوت"
التفتت وولت لبوها وقالت؛بوي خاطرنا في حوت..
لطفي؛حاضر تو ناخد بري انتي لصاحبتك..
مشت طلعت سدرة وفاتت من حدا السيارة..
اللي كان يقدملها المهدي بش ياخد حوت وهو يشوفله..
وهي متجاهله..
بعدين طلع بوها حتى هو بياخد...
المهدي كان يتعامل مع لطفي بشي من الرسميه ولطفي فاهمه علاش ومش مدوره..
والتموا ناس هلبه ع سيارة الحوت وبدوا ويشروا...
🌱🌱🌱🌱
الساعه 3:30بعد الظهر..
سدرة؛تفضلي خالتي صفيه..
خدت صفيه طنجره وكسكاس من سدرة وهي تقول؛صحيتوا..وسلمي ع امك..
سدرة؛يوصل..
ومشت سدرة .
وخشت صفيه داخل ومشت للكوجينه..
وهي كانت توتي في سفرة الغدي اللي كان شرموله..
عرت ع الكسكاس لقاته معبي حوت مقلي وبطاطا مقليه.قاماته لقت تحت طبيخه حوت..
ابتسمت ومشت خدت الصواني وبدت تصب وتفرق في الحوت والبطاطا..
بعدين حطت.الخبزة وطلعت بيها لوسط الحوش...
وحطتها ع المفرش..
عبدالمطلب:صنة حوت..
صفيه:بعتوه حوش خوك..هي قدم عمي..
جي علي وقعمز وهو يقول؛الصيف قريب يتم وماخشش حوشنا..
عبدالمطلب:كان خاطرك فيه شريته يابوي..
علي:مانيش شاريه..
سكت عبد المطلب وبدي ياكل..
صفيه وهي تشوفله بإزدراء قعدت تنادي:اميمه..يااميمه..
علي:خليتي للولاد..
صفيه:ايه مالا شنو يروحوا مهدودين من الخدمه ياناري يبوا بش يتقوتوا..
عبدالمطلب:تريس هادم لازم يتعبوا ويخدموا في اكثر من حاجه بش يبنوا ارواحهم..
علي في نفسه"ع خاطر انت درت هكي"
ع جية اميمه تجري: حي حوت حوت..
عبدالمطلب؛انطمري قعمزي واسكتي..
البنت.خافت وقعمزت ...
وبوه يشبحله.بحده وهو ياكل..
صفيه وهي متحسره ع بنيتها؛خل نحولك الشوك بنتي ونعطيك..
اميمه بصوت يدوب طالع؛باهي...
🍀🍀🍀🍀🍀
وبري ياأيام وتعالي ياأيام..
والنتيجه متاع البنات قربت تطلع وفي من قلوبهم ع نار..
وفي من قلوبهم مبردة .
نسرين؛مش مدورة هلبه اخرتي معهد زيك بالزبط ممنوع علينا الجامعه حني..
خديجه وهي تاكل في الاسكيمو؛وهديكا صاحبتك بتخش جامعه
نسرين؛ايه هي وعائشه بيخشوا كلية تربيه..
خديجه؛ايه حقه يومها ربتهم طالعين كلهم واشبح وين ماشين ع رجليهم جهة الخياطه..
نسرين؛اها عازمتهم السوريه..
خديجه؛بيتعارفوا..
نسرين:ايه...
خديجه:امم..الدكتور يهبل يعطيه نقطه..لكن خسارة ارمله..
ونسرين اللي ماتنبلش في فمها فوله قالت:معجب بسدره..
فتحت خديجه عيونها ع الاخر..
نسرين:وين يشوفها في الشارع ماينزلش عيونه من عليها.. ومرة سألها انتي سدرة الواعر..
خديجه وهي مندهشه؛حي شن يبي هدا !!؟ شوره مش عارف شي..
نسرين؛بيقصر اياماته فهالدنيا كان يعرف ومش مدور..
خديجه؛باهي هو لما سألها شن قالتله..
نسرين؛شن بتقوله فاتاته..
خديجه؛اها..وقعدت تاكل في الاكسيمو وقسم الخبث في عقلها بدي يخدم...
🌱🌱🌱🌱🌱
"ايه حامل ومتحشمه نقول لأمي انتي قوليلها"
سدرة بضحكه؛باهي باهي..مبارك..
"الله يبارك فيك وعقبال ربي يلم شملكم انتي والمهدي ونفرحوا بصغاركم"
سدرة تنهدت وقالت؛ان شاء الله..
"خيرك"
سدرة؛شي..سكري توا خل نمشي نفرح امي..
"باهي وسلميلي عليها"
سدرة؛يوصل..
وسكرت منها ومشت طول لأمها..
لقتها واقفه ع الغساله برا متاع البنت وامها..
طلع في الحوايج من العصارة..
سدرة بإبتسامه:امي..
وردة:نعم امي..
سدرة:تو كانت تكلم فيا فردوس..
شبحتلها وقالت؛حق شن حالها وعلاش ماضبحتيش عليا نكلمها..
سدرة؛هي مابتش ع خاطر متحشمه..
وردة بإستغراب؛متحشمه؟
سدرة بضحكه؛ماهو حامل..
ضحكت وردة بفرح ومشت بسرعه خشت وهي تقول:ماشاء الله ماشاء الله..خل نمشي نكلمها ونوصيها ع حاجات ديرهم..
وسدرة تشوفلها بإبتسامه..
شويه جت غرفه لسدرة وقالت؛سدرة انفكت بمبلتي تعالي ركبيهالي..
تنهدت وقالت؛باهي بري قدامي....
🌱🌱🌱🌱🌱
الساعه 10:15ليلا..
كانت كالعاده مغليه تلود ع الحوش وضم فيه فيه قبل ترد..
تحت الدروج تكنس...
ع نزلة خديجه تجري من فوق...
جتها ولقتها تحت الدروج ابتسمت بمكر بعدين جتها وقالت؛يما..
مغليه وهي تكنس؛هممم..
شويه فتح مهدي الباب وخش.. وكان في باب فاصل بين مدخل الحوش والحوش داخل وهو مسكر..
ماسمعتش مغليه الباب..
خديجه:شن رايك نعزموا السوريه يام..
مغليه:فكرت فيها بس قلت نلموا بعضنا الجارات ونمشولها قبل..خديحه علت صوتها شويه وقالت؛لكن حوش عمي لطفي مشولها..
مغليه:نندري هي عزمتهم ترد ع عزومتهم ليها في العرس..
خديجه؛مش هكي وبس يام...قالوا مرا يعطوا سدرة لولدها..
انصدمت مغليه وقالت:شن تقولي؟!
خديجه؛والله وحتى نسرين قالت حاط عينه عليها ومرة كلمها.
وينفتح الباب الفاصل ويجي المهدي وهو في قمة الغضب يشد اخته من مرفقها بقوة ويقول:شن تقطفي انتي!؟
خديجه بوجع؛ااي..شن دخلي اني هدا اللي سمعته من نسرين..
المهدي؛وينها نسرين وينها..نسرين..
مغليه بخوف:استهدي بالله ولدي اكيد في غلط..
ع نزله الجالي من فوق وقف في اول الدروج من فوق وهو يشوف للمهدي..
طلعت نسرين مخلوعه من الدار وهي تقول:-خيرك شن في..
جاها وهو يفنص فيها قال:شت قصة دكتور الشياطين مع سدرة حق كلمها
شبحت نسرين لخديجه:لالا كذب مافيش منها الدوة..
خديجه؛كيف كذب انتي قلتيلي مرة وقفها وسألها انتي سدرة الواعر..
المهدي تفكر موقف المطحن عيط في وجه اخته وقال؛تكلمي من غير كذب..
مغليه بهمس وخوف:ياحليلي..
نسرين من الخوف هزت راسها بإيجاب وقالت؛لكن والله هي ماعبراته..
خديجه؛يومها شفته خاش المطحن ويهدرز ع بوها شكلهم ماردكوش ياوخيي من فراغ..
فنصت نسرين في خديجه بصدمه..
وامها شبحتلها بحده..
وهدا كله والجالي يتفرج..
المهدي لحظتها كان يلقى يهد الحوش ع اللي فيه..
بس حاول يتمالك اعصابه وقال بنبرة هدوء مخيفه؛وصلي لصاحبتك. من اليوم وبرا غادي تنسى واحد اسمه المهدي قوليلها مات..
مغليه؛بعيد السو..
نسرين؛والله يامهدي مافي حاجه...
عيط في وجهها وقال؛سكري فمك ووصلي كلامي زي ماهو وكلكم وصلوه...سدرة والمهدي..خبط كفوفه ببعض وقال..خلاص تمت حكايتهم...
ومشي للدروج وركب يجري..
وفات من جنب الجالي اللي كان يشوفله...بعدين تنهد وركب حتى هو..
نسرين جت لخديجه بتضربها امها شدتها وقالت؛هدا اللي مازال!؟!
نسرين بكره؛وحده مربضه اقسم بالله مريضه وتبي علاج..
ومشت للدار...
رفعت خديجه حواجبها وقالت؛تو اني شن درت جبت حاجه من عندي!!؟
امها شبحتلها بحده بعدين حركت راسها يمين ويسار ومشت بتجيب الباله من الكوجينه..
وخديجه عضت ع شاربها وهي مبتسمه بمكر..
فجأة سمعوا حاجه طاحت تكسرت..
انخلعت خديجه..
وجت مغليه تجري وهي تقول:ياحليلي ارزيني فيك ياخديجه..
خديجه؛مادرت شي اني...ومشت طول خشت للدار...
وخلت امه تخمم في ولدها وخايفه...
🍀🍀🍀🍀
وتمر الايام..
والمهدي كل يوم يزيد غضبه اكثر من اليوم اللي قبله وهو يشوف في سدرة عايشه حياتها عادي ومش معبراته وهدا يزيد يأكدله كلام اخته..
ونسرين ماقدرتش توصل كلامه لسدرة ماتبيهاش تتنكد قبل لتطلع نتيجه..
وجي يوم النتيجه اللي كانوا يسموا فيها فالراديو هديكا الأيام..
في الجنان مقعمزين عيت الواعر كلهم يسمعوا...
وفي حوش فايزة مقعمزين يسمعوا في الراديو هي وامها وبوها..
وعائشه كذلك..
وفي الدكان اللي حداهم احمد يسمع في الراديو ومركز معاه..
ومطحن عيت شنيبه...
كان المهدي مقعمز ويسمع حتى هو وقلبه ع نار..
وصلوا في مدرسه البنات وبدوا يسموا..
لين وصلوا في حرف السين..
سدرة لطفي علي الواعر جيد جدا...
زغردت مطيره...
وورده طول حضنت سدرة اللي قريب طارت من الفرحه..
وبعدها قعدوا يباركولها كلهم واخرهم بوها اللي طبع قبله ع جبينها وقال؛صحة لبنتي..
وهي تضحك بفرح..
وحبيب قلبها في المطحن رغم غضبه منه الا فرح هلبه لما سمع اسمها بين الناجحين وللحظه نسي كل شي صار..
ووصلوا في اسم عائشه..
عائشه جويده سالم الهادي...جيد جدا...
عائشه بفرحه وعيونها دمعوا:الحمد لله الحمد لله ..
عتيقه بفرح؛رفعتي راسي..
ابتسمت بفرح وقالت؛امتى يجي بوي ونقوله..
ع خشة للحوش وهو يقول؛شيخه عائشه..
ناضتله تجري..
جويده؛رفعتي راسي..
هي كبت ع يد بوها وقالت؛ديما مرفوع ان شاء الله..
🌻وبعده مباشرة جي اسم فايزة..
فايزة صبري محمد الخويلدي..جيد..
فايزة بصدمه؛شنو من وين جي هدا!!؟
وامها طلقتها زغروده ماتحسابهاش بتنجح بكل..
وبوها يضحك...
واخر من تسمى اسمها كانت نسرين اللي جابت جيدا جدا مع زي سدرة وعائشه وفرحتها كانت لاتوصف...
وكل اب طلع هديكا الليله شري الباسطي والحلوة وقعدوا يفرقوا ع الجيران...
وقرروا في هداكا اليوم يشتركوا عايلات البنات عزومه وحده يشتركوا فيها كلهم وتكون في حوش شنيبه.بحكم انه اكبر حياش الشارع...
🍀🍀🍀🍀🍀
وكان يوم العزومه زي العرس في العواله متاعه لأن.الشارع كله معزوم...
في الجنان....
كانت سدرة ماشيه بتجيب صواني من المخزن..
لاقت ولد اياد.مقعمز يبكي...
جاته وقالت؛خيرك حبيبي..
الولد رفع راسه وشافها وقال؛مافي حد يبيني نلعب معاه كلهم يلزوا فيا..
سدرة؛من هما هادم..
الولد؛كلهم..
سدرة مدت يدها وقالت؛نوض ترا.
ناض الولد وشد يدها وقالت؛شن اسمك انت..
:مهند..
سدرة؛تعالى يامهند..
ومشت بيه وين مافي الولاد وصلت فيهم وقالت؛خيركم ماخليتوش مهند يلعب معاكم..
كلهم وقفوا لعب وقعدوا يشبحولها..
عمر؛مانعرفوشي..
سدرة؛لما تلعب معاه تو تعرفه..
عمر:بالسيف..
سدرة؛انت بالذات تسكت مانبيش نسمع صوتك ماسالم حد من شرك..
اضايق عمر ونزل راسه ماقدرش يرد عليها كان يخاف ويتحشم منها..
شبحت للولاد وقالت؛تبوه يلعب معاكم..
الولاد شبحوله وقالوا:ايه..
ونضال قال؛هي تعالى..
سدرة شبحت لمهند وقالت:هي برا..طلق مهند يدها ومشالهم..
وبدوا يلعبوا مع بعض..
هي تنهدت بعدين لفت ومشت..ومهند قعد يشبحلها وعيونه تعبوا دموع..
هي ولت للمخزن ..وقفت لما سمعت..
"شكله االي سمعناه حق"
شبحت يمينها وشافاته وهي متفاجئه..
المهدي وهو حاط ايديه ورا ظهره قال؛تقوي في علاقتك بولد ع خاطر مني ترا!..
عقدت حواجبها وقالت؛شن تقول انت؟
هو فنص فيهاوقالت؛فاهمه عليا كويس...الناس كلها باديه تدوي وتقول ان بوك بيعطيك للدكتور هداكا..
ضحكت تعجبا وقالت؛كيف!
المهدي؛ياسرك انكار ياسر كله ولا واضح طلعتي زيك زي ا المراهقات اللي كل يوم يميلوا لواحد..
سدرة بصدمه؛مهدي!..
المهدي: المهدي حرقتيه المهدي سحنتي قلبه سحن قلبه اللي يتمناك تكون معاه اليوم قبل غدوة وانتي مبرده ولامدورة ولافارق معاك
دمعوا عيونها وقالت:اني!؟
المهدي اشر عليها وقال:ايه انتي..حتى بعد عرفتي ان بوك ردني مادرتيش اي ردة فعل
تبدلت ملامح وجهها للحده وقالت؛تبيني نوقف في وجه بوي ونقوله نبيه ولاكيف!؟
المهدي؛لو كام يهمك الامر في الف طريقه اديريها ..لكن انتي ماتبيش من داخل ماتبيش تعرفي علاش..لانك عمرك ماحبيتي المهدي..عجبك اهتمامه بيك وكلامه الحلو في الرسايل والناس اللي تهدرز وتقول المهدي بيموت ع سدرة وياما دار ع خاطرها..هدا اللي كان عاجبك بس..ووين جد الجد...شفتي لغيره
سدرة بلعت ريقها وتمالكت اعصابها وقالت؛تعرف..بندير روحي ماسمعت شي وكأنه اللي صار توا ماكان..
ومشت بتخش المخزن
شدها من مرفقها وقال؛قاعد نكلم فيك ماتمشيش وتخليني مش كلب اني
جبدت مرفقها وقالت؛حاشاك..ومعاش تمسني مرة تانيه..
المهدي؛كلامي حق ولامش حق قولي كان مش حق راك ماهربتيش...
وجعها هلبه بكلامه وخلاها تبي توجه قالتله بتحدي:ايه مزبوط.تريحت توا..
ومشت بسرعه خشت المخزن خدت. الصواني..
ولما جت طالعه وقفت لما سمعاته قال..
"من اليوم اعتبري المهدي مات"
هي حست وكأن موس خش لقلبها وقعد يمزق فيه...
بعدين مشت تجري وهي شاده روحها بقوة ماتبيش تبكي..
وخلاته واقف في مكانه مصدوم..تمنى الموت ولاتمنى يسمع.منها اللي قالاته وجبراته ع انه يطلع هالكلام من فمه...
مشي طول طلع من الحوش وخش للمطحن وسكره عليه..
🌻وسبحان من عطي سدرة قوة قدرت بيها درق اللي تحس بيه هديكا الليله..
لين روحت للحوش...
وحبست روحها في دارها وبكت بكت...لين تعبت ورقدت...
🍀🍀🍀🍀
ومر ع فراقهم شهر كامل..
وصاحبات سدرة حواليها يحاولوا يخلوها تنسى اللي صار...
ونسرين كانت ناقمه ع خديجه ومقاطعتها وماتبيش تكلمها..
وخديجه عاجبها الجو وكانت اخر رواق...
اما المهدي فأنشغل مع بوه في مشروعه بش ينسى ومعاش يفكر فيها...
وخلو المطحن الجالي اللي بادي يتعود ع الخدمه فيه ويحب القهوة ويدمن ريحتها زيهم...
وطلع.فصل الصيف وخش الخريف...
ووحم فردوس كان صعب بس ماطلعتش من حوشها..
واهل راجلها يخدموا فيها ورادين بالهم منها غير شن تبي..
طاحت فردوس في ناس باهيه وراجل باهي مش مقصر عليها في شي..
وهذا اللي ريح قلب بعد مامشتلها كم زيارة ولاحظت هدا كله...
🌻🌻🌻🌻
سجلوا سدرة وعائشه في كلية التربيه...
وخشوا نسرين وفايزة معهد علوم..
بعد التقدير اللي جاباته قررت تقرا في المعهد سنتين وتاخد شهاده تقعدلها لعازة الايام زي ماامها قالتلها وخلتها تقتنع...
وقعدت الحياة ماشيه زي ماهي..
والقلوب المجروحه جروحها مابتش تبرا..
وفي قلوب عاشقه خلت اصحابها يخشوا الحوش من بابه..
🌱"الحق يام الولد عاجبني وهو بروحه قالي ماعنديش مشكله تكمل قرايتها هو يبيها خطبه بس لين تكمل يعني"
مشتده؛يعني الموضوع كويس..
ولدها؛تعرفيه احمد يام وتعرفي عيلته..
مشتده؛قلت لبوك..
:ايه وقالي شوف امك قبل..
هزت مشتدة راسها وقالت؛خل نشوف اختك قبل وبعدين نرد عليك..
؛اقنعيها يام...احمد مايتفوتش..
مشتده؛باهي ياهي...
~~~~~~~
"احمد"
مشتدة شدتها من ذراعها وقالت؛وخيرك قلتيها وانتي فرحانه هكي!!؟في بينك وبينه حاجه..
فايزة وهي تتوجع؛آاي يام..لاوالله لا..بس هو عاجبني..
قرصتها وقالت؛تحشمي..
فايزة؛وااك يام قددتيني..المهم قولي لخوي موافقه توكلوا ع الله..
رمت مشتده شبشبها..
وفايزة طلعت تجري وخشت للدار وسكرت الباب...
والشبشب جي عليه...
🌱🌱🌱🌱🌱
فهالوقت كانوا سدرة عائشه مع بعض مروحات بعد ماحطهم الافيكو في اول الشارع..
وصلت سدرة للحوش وقالت؛بالسلامه عيشه..
عائشه؛بالسلامه..
ومشت...
وسدرة فتحت الباب وخشت..
وين وصلت في الباب رمت كندرتها..
وخشت للحوش داخل...
كانت تسمع في صوت نقاش امها وبوها..
وردة؛هلبه عامين يالطفي..
لطفي؛مضطر نبي شغلي يكبر ياوردة راهو المطحن مش جايب همه..وعيت.شنيبه ينافسوا فيا بقوة..خايف بعد.وقت نسكر المطحن ونقعدوا هكي..
خشت عليهم وقالت؛شن صاير..
شبحولها الزوز وقعدوا ساكتين بعدين.لطفي قال:تعالي قعمزي.بنتي..
قعمزت سدرة وحطت كتاباتها ع تركينه..ونزلت حزام شنطتها من ع كتفها وقالت:شن في بوي..
تنهد وقال:تعرفي بنتي ان وضع المطحن الفترة الاخيرة مش مزبوط..واني خايف خسايري تزيد وننجبر نسكره..
سدرة؛ان صح نعرف ان الوضع مداير شويه لكن مانحسباش لهالدرجه..
لطفي؛لا لهالدرجة واكثر يابنتي...واني من قبل عارض عليا صاحب شرقاوي يشاركني في مشروع مطحن كبير في بنغازي وقالي غادي رابح ميه في الميه ..قالي نقعد عامين لين يصير من المشروع وينجح بعد مانطلع بمربح باهي نروح هني ونكبر المطحن هدا وهكي يقعد عندنا فرعين هني وبنغازي واسمنا يولي معروف...
سدرة:باهي كويس اني معاك..
وردة ودموعها في عيونها:بوك يبيني اني نمشي معاه وانتم تقعدوا هني..
سدرة ضاق صدرها ع الاخر..
لطفي؛مانقدرش نرفعكم معاي انتي واختك قرايتكم ووضعكم كله بيتلخبط هدا علاش اتفقت مع عمهكم تقعدوا عنده...
سدرة بان ع وجهها ملامح الضيق غصب عنها..
لطفي؛كان نقدري نشدي الخدمه في المطحن مع قرايتك انتي وصغار عمك شديه..واللي يخش عليكم تتقاسموه كان هدا جدك بيولي يشده معاهم ماتخافيش مايقدر حد يتحكم في رزقكم وجدك موجود..
سدرة قعدت ساكته ومش عارفه شن تقول..
بتقعد من غير بوها وامها عامين..وفي حوش عمها عبدالمطلب اللي محول حياة عيلته لجحيم ومايتفاهمش بكل واكيد ياما بيصير بينها وهي وياه..
في نفس الوقت ماعجبهاش وجه بوها حساته فعلا مضايق وخايف..فعلا لو خسر المطحن وتسكر حيحمله عمها المسؤوليه ويقول انه ضيق رزقهم...
وحاجه تاني قاهرتها هي منافسه عيلة شنيبه ليهم بسبب المعارف اللي عندهم ويساعدوا فيهم بش يشهروا قهوتهم ...
كانت تبي مطحن الواعر ينافس وبقوة ويفوتهم غادي..
رسمت ع وجهها ملامح الرضا وقالت؛ماعندكش مشكله بوي..عامين يفوتوا زي الريح برا وانت مطمن واعبى عليا بعد الله..
ابتسمت وردة بحزن..
وبوها ابتسم وقال؛عارفك والله عارفك يابنتي مافي مرة خيبتي ظنتي فيك ديما ساندتيني...
وردة؛اني واجعتني غرفه مش حتتحمل بعدي عليها..
سدرة:تتعود يام مادوريش..
وردة؛واختك فردوس..
سدرة؛يام بري وانتي مطمنه اعبوا عليا والله لما ندير جهدي كله..
امها وجعتها بنتها ع صغر سنها قاعده تتحمل في هلبه مسؤوليات شويه شويه حتنسيها نفسها...
اما بوها فكان فرحان وفخور بيها وحس ان ربي عوضه عن مختار بيها هي...
🍀🍀🍀🍀
وعدوا يومين
جهزوا فيهم لطفي ووردة رواحهم للسفر..
وردة مابطلتش بكي...مش هاين عليها تخلي بناتها حتقعد تخمم فيهم وبس حتى هما عامين...لوكانت تقدر تقعد راهي قعدت لكن لطفي كان مصر اصرار شديد انها تمشي معاه وهي ماقدرتش تمانع...
🌻وردة؛بالله عليك البنات ياصفيه..فردوس وغرفه بالذات..
فردوس بتجيب واني مش معاها صفيه بالله عليك..
ومعاش قدرت تتكلم وقعدت تبكي..
ضمتها صفيه وهي متأثرة وقالت؛في عيوني ياوردة هادوا بنياتي راهو...
~~~~~~~
مغليه:بناتك بناتي..وجيبة فردوس كلها عليا اني..
وردة بدموع؛مغليه!
مغليه؛شن دايرتيني برانيه راني مربيتهم بناتك مع بناتي ياوردة...
وردة ودموعها ينزلوا؛بارك الله فيك يامغليه..
مغليه بإبتسامه:ماعنديش فيه جميل راك وخيتي..
وحضنوا بعض...
~~~~~~
لطفي؛عارفكم ماتقصروش محمد..
محمد؛خلاص امشي وانت متهني..
المهدي؛هادوا بنات جيرانا معناها بناتنا ياعمي ماتخافش عليهم وحني موجودين..
طبطب لطفي ع كتف المهدي وقال:ربي يحفظك ياولدي...
~~~~~~
علي الواعر وهو يشوف لولده كيف يكب ع يده؛ربي يفتحها عليك وتلقى ماتبي غادي..
وقف ع حيله وقال؛وادعيلي ربي يسترها معاي..
علي؛امين امين مستور دنيا وآخره..
مطيره بدموع؛اطمن وخيي ع بنياتك وعمتهم موجوده..
الشامس؛مش حنقصروا معاهم بكل...
لطفي هز راسه وقال؛ربي يسلمكم..ناديلي وردة يامطيره..
خشت مطيرة تنادي ورده لقتها تتعنق في بنياتها وتبكي..
وفردوس بالذات منهارة بكي..
جبدوها منها جبد..
وطلعت ورده من غير ماتودع غرفه اللي كانوا ملهينها بالرسوم المتحركه في التلفزيون..
طلعت وردة ووراها بناتها..
والعيله كلهم وراهم..
لطفي؛هي بالسلامه..
وردة وهي تبكي:بالسلامه..
وخداها لطفي من يدها ومشي بيها للسيارة وركبها..
والجيران فم الباب واقفين يشوفولهم..
ونسرين عيونها مع سدرة اللي حاطه يدها ع فمها وتبكي..
والمهدي يشوفلها وقلبه يتقطع تقطيع..
هي غيرت عيونها وقعدت تشوفله وقلبها موجوع ونظراتها الحزينه الدامعه..فتتت قلب مهدي تفتيت..
شغل بوها السيارة وشبحتلها وحست روحها بتطلع...
ومطيرة قدمت وفي يدها مالقي ميه..
عادة البعض كانوا يديروا فيها ايام الجهل وقله الوعي الديني..
معتقد انهم لما يصبوا الميه ورا المسافر حيمشي ويجي سالم..
وفي الحقيقه الله هو الحافظ..واللي يودع احبابه وهو مطمن يستودعهم الله فقط ...
تحركت السيارة..وصبت وراهم مطيره الميه من المالقي وهي تنطر فيها وقالت؛تمشوا وتجوا سالمين يارب..
فردوس انهارت بالبكي مرة تانيه خدتها صفيه ودخلتها..
ومطيره خدت سدره وخشت هي وياها...
والشامس وعبد المطلب ولو للحوش هما والولاد ..
وقعد علي الواعر واقف في مكانه يشبح للطريق اللي مشت منها السيارة وهو يفكر....
#بنغازي
#طوبى