زوجي محنتي!

الجزء 4

بقيت كنضرب فراسي ونويل ... الشوهه.. اويلي شاف كولشي ..اويلي ملقيتي ياربي معامن تساطحني وأنا بهاد الحالة ...وميمتي فين غنحط وجهي قدامو غدا ... بلاتي كان الضلام يعني أيكون مافرزنييش مزيان ... ولكن أنا فرزتوو... أوف علا شمتة..نعست وأنا مفقوسة
صبح الصباح ...شفت الماكانة كانت ديك 8:00 ..نضت لبست عليا ما صليتش حيت زارتني خالتي (الحيض) .....فكرت نوجد لفطور بكري محد مزال تاحد ما ناض... حطيت الطابلة مزوقة .. و غرني الشيطان نمشي نطلل عليهم فالبيت ألي ناعسين فيه هيهيهيهي درت راسي دايزا من حدا الباب و كنشوف غير مناصص ..عمي ما كاينش يمكن خرج ولا فطواليط... كاين غير ياسين في سابع نوماتوو ...داوني رجلي لعندو بلاما نحس لا إرادياً ..كلصت حدا راسو ..ناعس كلمالاك آه ألي يشوفوا هكدا مايقولش أنه داك الشخص المنفخ وهاز قنانفوو لسما ...هزيت يدو لعندي ... رطبة كتر من يدي ههه بقيت نلمس فيها هههه تا زير عليا بيديه وأنا نقفز دربتها بجرية وحدا لبيتي
سديت عليا وحلفت لا وليت خرجت تشوهت بما فيه الكفاية ..تفو غيسحابليه غير ميتا عليه ...مالي منحوسة ... سمعت تقشقيش ..أكيد فاقوا ...ماما عيات ما تعيطلي نفطر .. فين هو لوجه ... ولكن إلا بقيت هنا مخبية غا تأكد شكوكو ..قررت نخرج او مانتسوقش ..بحالا مادرت والو ...اللي ليها ليها ..
خرجت نافخه صدري او هازا قنانفي سما ولا على بالي ....لقيتهم مجموعين علا الطبلة ...هو مبحلق فيا عينيه ومبتسم إبتسامة شريرة ،نوعاً ما مسهزئة ... بحالا تيقولي راني حصلتك..كان لابس سروال ديال لكيتمة وتيشورت ووجه منور على البارح وأخيراً ترخا شوية ... تميت جايا باش نكلس ساعا لقيت لبلايص كولهم مشدودين إلا وحدا حداه ... مرضيتش او تميت غادا نجيب كورسي .. وهو يعيطلي نجي نكلس حداه ... آه عيطلي الفارس المغوار المتكبر بجلاله وعضمته واكرامه او تنازل يسمعنا صوتو بل ويخاطبني ... عمي فرنس واحد التفريسة من نوع خاص ..أنا شكيت أو عرفت أنه باغي يدفعلي لهدرة علا ليوم
شغادي نقولكم أنا بحالا تخوى عليا سطل ديال الماء بارد ... مصارني تقلبوا ودارت بيا الدنيا ..وليت كي مطيشة..أما ودنيا كيسفرو كلكوكوط ..صدمتي ما بحالها صدما ما عرفت نفرح او لا نحزن ...أما ماما تحلها فمها 180 درجة وبقات غير كتمتم .... درت نشوف ياسين بانلي بنفس السيفة زرق ومزير ...أو عينيه غير فالحيط... يكون زعما فخبارو ولا فاجئوا باه تا هو ؟! ما بينا عليه مفاجأة.. أو زعما باغيني وكنعجبوو ؟ ولكن هو من الصغر ما شافني ؟! سرحت فبحر الأسئلة .....
عمي: أنا عارفكم تفاجئتو !! ...
أنا من شحال هادي كنت داير في بالي انني ناخد شيماء لواحد من ولادي لأنها ما شاء الله ونعم التربية وما غنلقاش حسن منها بنت الأصل وألفصل والنسب والشرف.. وعارفها غتحطنا فعينيها وحنا كذلك فالمقابل ما غايخصها معانا تا خير..لكبار تزوجوا من برا او بقا صغير ..لذلك فكرت نخليها ليه ... وكنت مأجل هاد الموضوع حتا تكمل قرايتها ودير مستقبلها ..لكن مين سمعت مؤخراً أنها حبسات ... خدينا أول طيارة بلا يسبقنا شي حد او يديها هه ...(هزلي وجهي وقالي )..وبلا ما نشكر ليك ياسين كيما كتشوفيه راه باقي صغير 23 سنة أو ما بيناتكمش بزاف واخا طايش شوية لكن قلبو بيض وغيديرك في عينيه مع لوقت غاتولفو بعضياتكم ..هو خدام معا خوتو في الشركة شريك معاهم ..ونفس الوقت ملاكم ..هادا كان حلموا وحققوا.. فكري آآبنتي مزيان ..ومتزربيش فقرارك ..خودي كل وقتك .. او متجوبيش دبا مامزروبنش باقين هنا شهراين .. وأنا متأكد أنك ماغتخيبينيش او مغترفديش طلبي
أنا (مصدومة وتالفة ) : ولكن آ عمي ...(ماما قاطعاتني)
ماما : مرحبا وألف مرحبا ..الله يودي..هي بنتكم منكم وفيكم ..متحتاجوش طلبوها ...وما غنلقاوش حسن منكم ..حاشا نرفضو.. شكون يرفض هاد الزين تبركالله ما شاء الله طوله وتجريدة سيد الرجال ...
أنا حمرت فماما هي هي علا سيدا كانت باغا غير فوقاش تصدرني..
عمي : نبغيو نسمعوها هي ... تا تفكر علا خاطر خاطرها ... فالأخير الموضوع كيرجعليها بوحدها...
شاف فيا عمي او بتاسملي... هبطت راسي الأرض زعما راني حشمانة ،ستأذنت منهوم ..دخلت لبيتي ...أما ماما غير كضحك بوحدها فرحانة من قلبها ما مصدقاش..آنا ما وليت خرجت تال العشية ...لقيتهم مشاو ... ماما موجدة كسكروط وكاتسناني بوجه مبتهج وحاطة شهيوات ..سولتها عليهم ..قاتلي أنهم مشاو الأوتيل..تما غادي يبقاو ...
ماما : وهانتي ابنتي ..شكون بحالك ...الحمدلله ربي منسنانش ...شكون قال عمك كايفكر هاكا ..كن كانت فخباري كو عطيتك لهم شحال هادي ...همزة جاتنا ما بعدها همزة
أنا : ياك آآ ماما دغيا سخيتي تعطيني... وسخيتي بيا ..
ماما : اويلي علا هبيلة شكون يسخا بكبدتوو ..راك روحي وقطعة من دمي ولحمي ... سمعيني ا بنتي مزيان وحلي ودنيك .. نتي كبرتي مابقا والو أو تدخلي فالعشرينات ..لقراية حبستيها ماقلنا والو .. بغيتي تخدمي ما عاردناش ..لكن ترفضي راجل بحال هاكا كامل مكمول هادشي ممقوبلش.. لأن قليل ألي عندها الزهر بحالك هاكا يتقدملها شاب في مقتبل العمر زين و وسيم او لاباس عليها والأهم أنك غاديري وريقاتك تهزي راسك وتهزينا معاك ....لأمتع غنبقاو علا هاد الحالة شي نهار أنا غانعيا بتمارة أو نطيح لركنة داك الساعة شكون غادي يقوم بيكم ..نتيا هه ؟!
وماتنسايش أهم حاجة أنه مخلينا عندو فدار ... فضلو علينا كبير ..

شفت في ماما ..هدرتها اثرات فيا بزاف ..وخالاتي نفكر بطريقة معاكسة ...كليت معاها وستأذنت تاني لبيتي ..أنا غادا وماما وقفاتني ..
ماما : قبل ماتخدي أي قرار ..حطي هضرتي قدام عينيك ... أو باش نكون معاك صريحة إلا رفضتي غتنزلي من عيني ..تصبحي على خير
*دخلت لبيتي و تكيت بقيت نتقلب يمين وشمال .. النعاس حلف لا جاني ...الليل كامل وأنا كندور نمشي ونجي ... حاولت ما أمكن نطابق مواصفات فتى أحلامي مع ياسين هه وخرجت بنتيجة
فتى أحلامي = ياسين
كاع المواصفات الي باغاهم متوفرين فيه ..الزين : قلبي الصغير لا يتحمل بلاما نعودلكم...*.*
الرجولة موجودة ...لخدما : خانز فلوس و لوريقات من لفوق.. إلا حاجة وحدة العصبية ..لكن معليش
أما الحب فكيجي من بعد لزواج خصوصاً انني (بلاما نكدب علا راسي) اعجبت بيه مين حط رجلو في دارنا ...دوخني .. دوونك ما بقا إلا نصلي صلاة استخارة ونتوكل على الله ...

صبح الصباح لكن هاد المره ما فقتش حيت اصلا منعستش..نضت مشيت لعند ماما ديريكت تلاحيت عليها هه خلعتها كانت فسما سابعة ...
ماما : سباحاتو الله ...مالنا آش واقع
أنا : صافي موافقه ...
ماما : روررروروررري صلا وسلام علا رسول الله .... رورورري
أنا : اويلي هه الجيران ا ماما
ماما : أخيراً انشوف بنيتي عروسة ونفرح بيها ...عقبال منشوف وليداتكم إن شاء الله ... فرحتي ما بحالها فرحة ..ونوض نخبرهم ...
أنا : اويلي ايكونو باقين ناعسين .... تالعشية وعيطي خبراتهم ماما بقراري وقاتلي أن عمي ما قاداه فرحة كان متوقع موافقتي ... وتافقو اننا نخطبو منهنا يوماين ...نديرو غير خطبة صغيرة بناتنا نركبو لخواتم أو صافي.. أما العقد منهنا سيمانة ..
أنا : اويلي علا نتزوج بيه منهنا سيمانة ؟ ياك هوما مازالين فلمغرب مالهم علا هاد الزربة ؟
ماما : اوا راه باقي تابعنا لعرس ولوراق ..حيت غيديك فخطره ... أللهم نعجلو لأمور ... المهم ليوم سيري لحمام ودربيها بحكة وغسلة ..أنا غادي نحددليك قفطانك ...وحاولي ترجعي بكري باش ندوزو لكوافورة ...
أنا : ماكاين لاش ..صافي اندير ماكياج خفيف لراسي ..داكشي حدو قدو ..
ماما : ألي بغيتي ...يلاه وهي إلا جمعتي لوقفة دابا
درت داكشي ألي قاتلي ماما ولبست قفطاني فلبيض واخا قديم وبيني بلدية ... وخى هكاك جا معايا ..درت الماكياج خفيف بزاف ..شوية ديال لعكر ولكحل وشوية ديال فراجو ...عيات معايا نحيد الزيف أو ندير شي مشيطة ولكن وآلو ...والله منعري شعري قدامو تانديرو لعقد ... بقيت في بيتي.. تاسمعت الهدرة ..أكيد جاو ...شوية دخلات ختي الصغيره قاتلي كيعيطولي... خرجت وأنا حانية راسي مابغيتش كاع نعلي عيني ....لكن ماقدرتش نتحمل هه هزيت عيني بانلي عريسي داربلك واحد الكوستوم يا سلام جا كي شي رجل أعمال ... أول مرة نشوفو فالكلاس ...هاز عينيه فصقف حرام واش شاف فيا .... أما عمي سلم عليا بوجه مبتهج كما العادة ... الطابلة لوله مزوقة بما لذ وطاب من الحلويات مع كويس ديال الاتاي أما الثانية عامرة بهدايا لعريس داكشي كثير تهلا فيا..خوتي تايتجاراو ... ماما غير كتسخر كلسونا حدا بعضنا ..أنا غير حالة فيه فومي أو مامتيقاش راسي ...ديتو ديتو والله ما خليتو ..أما هو حرام واش شاف فيا ...بارد ..يمكن حشمان هه ...إيه شكون قال أنا والبهلول كتابينا لبعضنا .. عمي شحال وهو يخطب علينا ما بغاش يسكت ما قداه فرحة هه .. كنت كنتسنا ياسين يقولي شي حاجة فودني أو يشدلي في يدي زعما ولا شي غمزة داكشي ديال الأفلام ..ساعة حرام كالس حدايا كي شي صنم... ماكيدور لا يمين لا شمال ... ما فيهش حس الرومانسية