မိုးကောင်းကင်အောက်မှကလဲ့စား (အတွဲ ၂) မိုးေကာင္းကင္ေအာက္မွကလဲ့စား

Chapter - 211 "ရှေ့ဖြစ်နိမိတ်"

ရဲရှောင်နှင့် ပိုင်ရှင်းယွဲ့တို့သည် သခင်ကြီးဘိုင်၏ လက်ချက်ဖြစ်သည်ကို မသိကြပေ။ တိမ်မြူခိုးနန်းတော်တွင်ရှိသော လူများသည်လည်း သိလိမ့်မည် မဟုတ်ချေ။

အကယ်၍ သိသွားခဲ့ပါက သခင်ကြီးဘိုင်အား စုပေါင်း၍ တစစီပင် လုပ်ပစ်ကြပေလိမ့်မည်။ သခင်ကြီးဘိုင်ကြောင့်သာ ကြယ်ကြီး ကြွေကျလာခဲ့ပြီး တိမ်မြူခိုးနန်းတော်သည်လည်း ကြမ္မာဆိုးနှင့် ရင်ဆိုင်ခဲ့ရသည်။ ထိုကြယ်ကြီးကြောင့် ဂိုဏ်းတစ်ခုလုံး ပြိုကွဲသွားမတတ်ပင် ဖြစ်ခဲ့ရသည်။

လက်တွေ့ဘဝ၌ ဖြစ်ပျက်နေသော အဖြစ်အပျက်များသည် စိတ်ကူးယဉ်သည်ထက်ပင် ပို၍ ဆန်းကြယ်တတ်လေသည်။

တစ်ခါတစ်ရံတွင် ကိုယ်လုပ်လိုက်သည့် ကိစ္စတစ်ခုသည် အခြားလူများအတွက် ထိခိုက်နစ်နာစရာ အဖြစ်မျိုး ဖြစ်သွားတတ်သည်။ သို့သော် ထိုကဲ့သို့ ဖြစ်သွားသည်ကို ကာယကံရှင် ကိုယ်တိုင်သည်လည်း သိချင်မှ သိပေလိမ့်မည်။

ပိုင်ရှင်းယွဲ့သည် သက်ပြင်းချလိုက်ရင်း -

“ကျွန်မပြောခဲ့သလိုပဲ၊ ကျွန်မတို့တွေ ချင်းယန်နယ်ပယ်မှာ အားဖြည့်ကြာပန်းပင်တွေ လိုက်ရှာပြီး စုဆောင်းခဲ့ကြတယ်။ တွေ့တဲ့အခါကြရင်လည်း အပင်ပဲဖြစ်ဖြစ်၊ အစေ့ပဲဖြစ်ဖြစ် တိမ်မြူခိုးနန်းတော်ကို မရရတဲ့နည်းနဲ့ ယူလာကြတယ်။ ကျွန်မတို့မှာ ဆေးဥယျာဉ် ရှိနေတယ်လေ။ အဲ့ဒီဥယျာဉ်ထဲမှာ ကြာပန်းတွေကို ကောင်းကောင်း စိုက်ပျိုးနိုင်တယ်။ ပိုပြီး အဆင့်မြင့်သွားအောင်လည်း လုပ်နိုင်တယ်။ အခုလို ဖြစ်မယ်လို့ ထင်ကို မထင်ထားခဲ့ဘူး . . .”

ရဲရှောင်လည်း စိတ်မကောင်းဖြစ်သွားဟန်ဖြင့် -

“ဒါဆို အခုလို ဖြစ်သွားတော့ ချင်းယန်နယ်ပယ်မှာတောင် ကြာပန်းတစ်ပွင့် ရှာဖို့ဆိုတာ တော်တော်ခက်ခဲသွားတာပေါ့နော် . . .”

ပိုင်ရှင်းယွဲ့ ခေါင်းညိတ်လိုက်ရင်း -

“အဲဒီနေ့မှာပဲ ဥယျာဉ်တစ်ခုလုံး ရစရာမရှိအောင်ကို ပျက်ဆီးသွားခဲ့တယ်။ ပျက်သာ မပျက်ဆီးခဲ့ဘူးဆိုရင် အခုလို အခက်အခဲတွေနဲ့  ကြုံစရာ အကြောင်းကိုမရှိဘူး . . .”